វល័ក្ខ - La Reine Media

CIMB សម្ពោធដំណើរការធនាគាររបស់ខ្លួនជាផ្លូវការក្នុងប្រទេសហ្វីលីពីន

ម៉ានីឡា-ហ្វីលីពីន៖ ក្នុងថ្ងៃនេះ CIMB (ធនាគារ CIMB) បានប្រកាសសម្ពោធជាផ្លូវការ នូវវត្តមានរបស់ ធនាគារ CIMB នៅក្នុងប្រទេសហ្វីលីពីន។ វត្តមានរបស់ធនាគារ CIMB Philippines Inc. (ហៅកាត់ថាធនាគារ) គឺក្នុងគោលបំណងចង់ក្លាយជាធនាគារផ្តល់សេវាកម្មចល័ត និងធនាគារឌីជីថលមុនគេបង្អស់ ក្នុងប្រទេសហ្វីលីពីន ដែលធានាឲ្យប្រតិបត្តិការសេវាធនាគារ កាន់តែមានភាពសាមញ្ញងាយស្រួល និងគ្មានការពិបាក។

កម្មវិធីសម្ពោធជាផ្លូវការនាថ្ងៃនេះ ត្រូវបានប្រារព្ធធ្វើឡើង នៅក្លឹបសមាជិកឯកជន Manila House ក្នុងទីក្រុង Bonifacio Global នៃតំបន់ Taguig ក្រោមអធិបតីភាពលោក Chuchi G. Fonacier អភិបាលរង របស់ធនាគារកណ្តាលនៃប្រទេសហ្វីលីពីន BSP និងលោក Datuk Mohd Nasir Ahmad ប្រធានក្រុមប្រឹក្សាភិបាល CIMB Group។

ថ្លែងក្នុងកម្មវិធីដ៏ឱឡារិកនេះ លោក Effendy Shahul Hamid ដែលជាប្រធាននាយកប្រតិបត្តិ ផ្នែកផ្សងព្រេង និងភាពជាដៃគូរបស់ CIMB Group បានឲ្យដឹងថា៖ «យើងមានក្តីសោមនស្សរីករាយក្រៃលែង ក្នុងការចាប់ផ្តើមបម្រើសេវាកម្មជូនអតិថិជន នៅក្នុងប្រទេសហ្វីលីពីន។ កិច្ចដំណើរការនេះបានបំពេញនូវវត្តមានប្រតិបត្តិការរបស់ធនាគារ CIMB ក្នុងតំបន់អាស៊ានទាំងមូល ហើយយើងនឹងនាំយកមក នូវសេវាកម្មធនាគារឌីជីថលដ៏ខុសប្លែក និងទីតាំងរបស់ឌីជីថលក្នុងទីផ្សារ។ ប្រទេសហ្វីលីពីន ជាទីផ្សារមួយដែលមានការរីកចំរើនខ្ពស់ក្នុងការប្រើប្រាស់ប្រព័ន្ធអ៊ីនធើណេត និងទូរស័ព្ទចល័តនៅលើពិភពលោក ដែលជាសញ្ញាយ៉ាងច្បាស់ នៃសង្គមបែបទំនើប និងជឿនលឿនមួយ សម្រាប់យើងបម្រើសេវាកម្មជូន»។

លោក Vijay Manoharan ដែលជាប្រធាននាយកប្រតិបត្តិរបស់ធនាគារ CIMB ហ្វីលីពីន បានរៀបរាប់លម្អិត អំពីគោលបំណង ដែលធនាគារ CIMB ហ្វីលីពីន គ្រោងនឹងផ្តល់បទពិសោធន៍នៃការបម្រើសេវាកម្មធនាគារបែបថ្មី ទៅដល់ប្រជាជនហ្វីលីពីនថា៖ «អតិថិជន នាពេលបច្ចុប្បន្ន និងពេលអនាគត ត្រូវការសេវាកម្មហិរញ្ញវត្ថុ ប្រកបដោយភាពច្នៃប្រឌិតខ្ពស់ ដែលសមស្របនឹងតម្រូវការហិរញ្ញវត្ថុផ្ទាល់ខ្លួន ក៏ដូចជាជួយឲ្យពួកគេឈានមុខគេជានិច្ច ប៉ុន្តែពួកគាត់មិនចាំបាច់ធ្វើប្រតិបត្តិការ ដោយទៅកាន់ធនាគារផ្ទាល់នោះទេ។ ជាមួយនឹងការផ្តល់ជូននូវផលិតផលភាគច្រើនរបស់យើង តាមរយៈកម្មវិធីទូរស័ព្ទ OCTO ប្រកបដោយសុវត្ថិភាព យើងក៏អាចផ្តល់ជូននូវសេវាកម្មធនាគារកាន់តែល្អប្រសើរថែមទៀត គ្រប់ពេលវេលា រៀងរាល់ថ្ងៃដែលនាំមកនូវភាពងាយស្រួល សម្រាប់អតិថិជនរបស់យើង ដោយអាចឲ្យពួកគេធ្វើប្រតិបត្តិការធនាគារ ពីបាតដៃគាត់ផ្ទាល់តែម្តង»។

ដៃគូអាជីវកម្មរបស់ធនាគារ CIMB ហ្វីលីពីន រួមមាន 7-Eleven និង DragonPay ជាដើម ជាមួយនឹងទីតាំងផ្តល់សេវកម្មជូនអតិថិជន ប្រកបដោយភាពងាយស្រួល ជាង ៨.០០០កន្លែង ទូទាំងប្រទេស។ បណ្ណឥណពន្ធ VISA-powered របស់ធនាគារ អាចប្រើប្រាស់បាននៅគ្រប់ ២០.០០០បណ្តាញរបស់ Bancnet រួមទាំង VISA និង VISA Plus ATM ទូទាំងប្រទេស ព្រមទាំង និង ជាងពីរលានទីតាំងទៀត ទូទាំងពិភពលោក។

ដើម្បីបំពេញតម្រូវការ ដល់អ្នកដែលបានរៀបចំនូវការសន្សំសម្រាប់អនាគត ធនាគារ CIMB បាននាំយកគណនីសន្សំ UpSave ដែលផ្តល់នូវការសន្សំកាន់តែអស្ចារ្យ ជាមួយនឹងអត្រាការប្រាក់ខ្ពស់រហូតដល់ ២% ក្នុងមួយឆ្នាំ (ខ្ពស់ជាងធនាគារផ្សេងៗទៀតដល់ទៅ ៨ដង)។ សេវាកម្មហិរញ្ញវត្ថុបុគ្គលរបស់ធនាគារ CIMB ហ្វីលីពីន ត្រូវបានគាំទ្រដោយកម្មវិធីទូរស័ព្ទ OCTO ដែលអតិថិជនអាចទាញយកពី Apple App Store ឬ Google Play។ ដើម្បីស្វែងយល់បន្ថែម សូមចូលទៅកាន់ www.cimbbank.com.ph ឬ Like ទំព័រ Facebook របស់យើង www.facebook.com/CIMBBankPH និងធ្វើការ follow នៅលើ Instagram @CIMBBankPH។

ជាមួយនឹងការសម្ពោធដាក់ឲ្យដំណើរការនៃធនាគារ CIMB ហ្វីលីពីន ធនាគារក៏បានប្រកាសពីការទទួលការអនុម័តផ្លូវច្បាប់ផងដែរ ពីគណៈកម្មធិការមូលបត្រ និងភាគហ៊ុន នៃប្រទេសហ្វីលីពីន សម្រាប់ការដាក់ឲ្យដំណើរការធនាគារវិនិយោគ ក្នុងប្រទេសហ្វីលីពីន ដែលមានឈ្មោះថា ក្រុមហ៊ុន CIMB Bancom (CIMB Bancom)។ ជាមួយគ្នានេះ លោក Shahul Hamid មានប្រសាសន៍ថា៖ «យើងមានសំណាង ក្នុងការប្រកាសជាផ្លូវការ នៃធនាគារវិនិយោគ CIMB Bancom ដែលនឹងផ្តល់ប្រឹក្សាយោបល់ដ៏មានគុណតម្លៃ និងសេវាកម្មទីផ្សារមូលធនឆ្លងប្រទេស ទៅដល់ក្រុមហ៊ុន ក្នុងប្រទេសហ្វីលីពីន ដែលកំពុងសម្លឹងរកការពង្រីក និងភាពរីកចម្រើន នៅទូទាំងតំបន់អាស៊ាន ក៏ដូចជាការពង្រឹងវត្តមានកាន់តែរឹងមាំរបស់ CIMB នៅក្នុងតំបន់ ដើម្បីបង្កើនប្រភពនៃការព្រមព្រៀងពាណិជ្ជកម្ម ទៅកាន់ប្រទេសហ្វីលីពីន»៕

January 31, 2019

សាលមហោស្រព NABA ផ្តល់ជូននូវការសម្តែងសិល្បៈនៃដំណើររឿងស្នេហាដ៏រ៉ូមែនទិក

រាជធានីភ្នំពេញ ថ្ងៃទី31 ខែមករា ឆ្នាំ2019៖ ទស្សនាការសម្តែងសិល្បៈដោយផ្ទាល់ដ៏អស្ចារ្យជាមួយគ្នា! ដើម្បីចូលរួមអបអរក្នុងទិវានៃក្តីស្រឡាញ់ក្នុងខែកុម្ភៈនេះ សាលមហោស្រព NABA នៅណាហ្គាទី 2 នឹងផ្តល់ជូននូវការសម្តែងសិល្បៈនៃ “ដំណើររឿងស្នេហា” បែបសហសម័យដ៏ប្លែកឥតគិតថ្លៃសម្រាប់គ្រប់វ័យដែលនឹងចាប់ផ្តើមពីថ្ងៃទី 2 កុម្ភៈ រហូតដល់ថ្ងៃទី 3 មីនា ពីរៀងរាល់ថ្ងៃព្រហស្បតិ៍ដល់អាទិត្យ ចាប់ពីម៉ោង 8យប់។ សំបុត្រឥតគិតថ្លៃ មានផ្តល់ជូននៅណាហ្គាវើលដ៍។

ទទួលសំបុត្រចូលទស្សនាការសម្តែងសិល្បៈនៃដំណើររឿងស្នេហាបែបសហសម័យ ឥតគិតថ្លៃ នៅសាលមហោស្រព NABA ណាហ្គាទី ២

ការសម្តែងរយៈពេល 45នាទីនេះ រួមមានការចាក់ភ្លេងដ៏ពីរោះ និងការរាំដ៏រស់រវើកដែលផ្តល់ជូនដោយអ្នកសម្តែងជាតិ និងអន្តរជាតិអមដោយការបញ្ចាំងភ្លើងដ៏មហស្ចារ្យនៅក្នុងសាលមហោស្រពបច្ចេកវិទ្យាវីដេអូ 3D mapping ដំបូងគេបង្អស់ក្នុងប្រទេសកម្ពុជា។ ត្រៀមខ្លួនទទួលយកនូវអារម្មណ៍ដ៏រំភើបញាប់ញ័រមិនអាចបំភ្លេចបានជាមួយការសម្តែងរបស់លោក Justin និង Cherry ។

មុនទៅទស្សនាការសម្តែងសិល្បៈពុកម៉ែបងប្អូនរបស់យើងអាចអញ្ជើញពិសាអាហារប៊ុហ្វេអន្តរជាតិដែលមានច្រើនមុខជាងគេក្នុងរាជធានីភ្នំពេញ ចាប់ពីម៉ោង 5:30ល្ងាច នៅភោជនីយដ្ឋានប្រណីត 2Pangea ដែលមានទីតាំងនៅជាប់សាលមហោស្រព NABA ។ សូមអញ្ចើញនាំក្រុមគ្រួសារ និងគូស្នេហ៍របស់អ្នកមកជាមួយហើយរាល់អ្នកញ៉ាំទី2 បង់ត្រឹមតែ 8ដុល្លារ តែប៉ុណ្ណោះ។ រីករាយពិសាតាមចិត្ត! ហើយជម្រើសមួយទៀតលោកអ្នកអាចទៅពិសាប៊ុហ្វេបង្អែមម្នាក់ 12ដុល្លារ តែប៉ុណ្ណោះ ពិសាបង្អែម និងបង្កើនភាពជិតស្និទ្ធជាមួយក្រុមគ្រួសារ និងជាមួយមនុស្សជាទីស្រឡាញ់របស់អ្នកនៅណាហ្គាវើលដ៍។

សម្រាប់ការប្រារព្ធទិវានៃក្តីស្រឡាញ់នៅថ្ងៃទី 14 កុម្ភៈ លោកអ្នកអាចកក់ទុកជាមុននៅភោជនីយដ្ឋានបារាំង Le Gourmet និងពិសាម្ហូបឈុតបារាំងពេលល្ងាចក្នុងបរិយាកាសដ៏រ៉ូមែនទិក 2នាក់ មានតម្លៃ 98ដុល្លារ ដែលមានបន្ថែមជូននូវស្រា Prosecco ឥតគិតថ្លៃ។ អាហារពិសេសណែនាំដោយមេចុងភៅរួមមានសាច់គោអូស្ត្រាលីជាមួយថ្លើមក្ងាន ស៊ុបព្រាបថ្លា ជើងកង្កែបបំពង និងនំការ៉េមស្ត្របឺរីពិសេស។

ចំណែកក្នុងឱកាសបុណ្យចូលឆ្នាំថ្មីប្រពៃណីចិន លោកអ្នកអាចនាំក្រុមគ្រួសារនិងមនុស្សជាទីស្រឡាញ់របស់អ្នកមកពិសាម្ហូបឈុតពិសេសជុំគ្នានៅភោជនីយដ្ឋានចិនប្រណីតរបស់ណាហ្គាវើលដ៍ Fortune Palace និង Hall of Golden Chimes ។ មិនតែប៉ុណ្ណោះលោកអ្នកអាចទិញនំនាំលាភផងដែរ ដូចជា នំម្សៅអង្ករដំណើបបែបក្លាស៊ីក និងនំស្រួយជាច្រើនជម្រើសសម្រាប់ធ្វើជាអំណោយសម្រាប់គ្រប់គ្នា។

ជាចុងក្រោយសូមកុំភ្លេចថតរូបជាមួយទេវតាទ្រព្យ និងម៉ាស់ស្កត់ទុកជាអនុស្សាវរីយ៍ដែលពួកគាត់នឹងដើរជូនពរពេញក្នុងអាគារ និងផ្តល់អាំងប៉ាវដល់ភ្ញៀវ ជារៀងរាល់ថ្ងៃចាប់ពីម៉ោង 6ល្ងាច។ ពួកគាត់ នឹងចូលរួមសម្តែងសិល្បៈអបអរបុណ្យចូលឆ្នាំចិនផងដែរចាប់ពីម៉ោង 10 យប់រៀងរាល់ថ្ងៃនៅឆាកជាន់ផ្ទាល់ដីណាហ្គាវើលដ៍។ បង្កើតអនុស្សាវរីយ៍ល្អៗមិនអាចបំភ្លេចបាននៅក្នុងខែកុម្ភៈនេះ និងឆ្នាំបន្តបន្ទាប់នៅណាហ្គាវើលដ៍។

រីករាយពិសាម្ហូបចិនរសជាតិដើមនៅភោជនីយដ្ឋានចិនប្រណីតទាំងពីរនៅណាហ្គាវើលដ៍

ណាហ្គាវើលដ៍ជាមួយការពង្រីកបន្ថែមថ្មីចុងក្រោយ ណាហ្គាវើលដ៍ មានបន្ទប់ប្រភេទស្វីត និងដឺលុច្សជាង 1.658បន្ទប់ ភោជនីយដ្ឋាន បានីយដ្ឋាន និងក្លឹប 27កន្លែង មណ្ឌលស្ប៉ាប្រណីតពីរ សាលមហោស្រព NABA ដែលមាន 2.000 កៅអីនៅណាហ្គាទី 2 ផ្សារទំនិញរួចពន្ធប្រតិបត្តិការដោយក្រុមហ៊ុន China Duty Free Group ដែលជាផ្សារទំនើបក្រោមដីទីមួយក្នុងប្រទេសកម្ពុជាដែលមានលក់ទំនិញម៉ាកអន្តរជាតិល្បីៗ សេវាកម្សាន្តសម្បូរបែប និងសាលប្រជុំដែលបំពាក់ដោយបរិក្ខារទំនើបៗ៕

January 31, 2019

មជ្ឈមណ្ឌលភាសា អេ អាយ អាយ និងសាលារៀន អន្តរទ្វីប អាមេរិកាំង បើកសន្និសីទកាសែតពង្រីកសាខាថ្មីនៅសង្កាត់ចោមចៅ

រាជធានីភ្នំពេញ៖ នៅថ្ងៃទី 30 ខែមករា ឆ្នាំ 2019 មជ្ឈមណ្ឌលភាសា អេ អាយ អាយ និងសាលារៀន អន្តរទ្វីប អាមេរិកាំង បានបើកកម្មវីធីសន្និសីទកាសែតស្តីអំពីការពង្រីកសាខាថ្មីនៅសង្កាត់ចោមចៅក្រោមអធិបតីភាពរបស់លោកឧកញ៉ា វេជ្ជបណ្ឌិត គួច ម៉េងលី ជាស្ថានិក ប្រធានក្រុមប្រឹក្សាភិបាល និងអគ្គនាយកប្រតិបត្តិ។

មជ្ឈមណ្ឌលភាសា អេ អាយ អាយ និងសាលារៀន អន្តរទ្វីប អាមេរិកាំង បង្កើតឡើងក្នុងឆ្នាំ 2005 ក្រោមគំនិតផ្តួចផ្តើម ដោយ លោកឧកញ៉ា វេជ្ជបណ្ឌិត គួច ម៉េងលី។ មជ្ឈមណ្ឌលភាសា អេ អាយ អាយ និងសាលារៀន អន្តរទ្វីប អាមេរិកាំង មានការរីកចម្រើនគួរឱ្យកត់សម្គាល់ ដែលចាប់ផ្តើមដំបូងមានសិស្សត្រឹមតែ 4នាក់ តែប៉ុណ្ណោះរហូតមកដល់ពេលបច្ចុប្បន្ននេះចំនួនសិស្សកើនឡើងដល់ជាង 1,1000នាក់។

សព្វថ្ងៃនេះមជ្ឈមណ្ឌលភាសា អេ អាយ អាយ និងសាលារៀន អន្តរទ្វីប អាមេរិកាំង មិនត្រឹមតែមានកេរ្តិ៍ឈ្មោះល្បីល្បាញក្នុងព្រះរាជាណាចក្រកម្ពុជាប៉ុណ្ណោះទេ ប៉ុន្តែក៏ទទួលបានការទទួលស្គាល់ និងល្បីល្បាញជាអន្តរជាតិតាមរយៈការទទួលពានរង្វាន់ លក្ខណៈអន្តរជាតិពីបណ្តាប្រទេសផ្សេងៗដូចជា សិង្ហបុរី បារាំង អារ៉ាប់រួម(ឌូបៃ) ស្វីស អង់គ្លេស សហរដ្ឋអាមេរិក ព្រុយណេ ប៊ែលហ្សិក ចិន (ហុងកុង) និងប្រេសីលជាដើម។

មជ្ឈមណ្ឌលភាសា អេ អាយ អាយ និងសាលារៀន អន្តរទ្វីប អាមេរិកាំង បច្ចុប្បន្នមាន 3ទីតាំង គឺការិយាល័យកណ្តាលស្ថិតនៅតាមបណ្តោយមហាវិថីម៉ៅសេទុង សង្កាត់ទំនប់ទឹក ខណ្ឌចំការមន សាខាទួលគោកស្ថិតនៅ ផ្លូវលេខ289 សង្កាត់បឹងកក់ទី1 ខណ្ឌទួលគោក (ទល់មុខសាលាបឋម សិក្សាទួលគោក) និងសាខាចាក់អង្រែស្ថិតនៅផ្លូវជាតិលេខ2 សង្កាត់ចាក់អង្រែក្រោម ខណ្ឌមានជ័យ (ទល់មុខរង្វង់មូលព្រះនរាយក្រុងតាខ្មៅ ឬសាខាខេត្តកណ្តាល) រាជធានីភ្នំពេញ ព្រះរាជាណាចក្រកម្ពុជា។

លោកឧកញ៉ា វេជ្ជបណ្ឌិត គួច ម៉េងលី បានមានអោយដឹងថា «មូលហេតុដែលបានជំរុញអោយបើកដំណើរការសាខាថ្មីគឺដោយសារតែស្ថេរភាពនយោបាយ កំណើនសេដ្ឋកិច្ច និងមានកេរ្តិ៍ឈ្មោះសាលាមានភាពល្បីរន្ទឺ ទាំងក្នុងស្រុក និងក្រៅស្រុក ព្រមទាំងដើម្បីរួមចំណែកក្នុងការផ្តល់សេវាអប់រំប្រកបដោយគុណភាព និងដើម្បីឆ្លើយតបទៅនឹងតម្រូវការទីផ្សារ និងសំណូមពរជាច្រើនពីសំណាក់មាតាបិតា អ្នកអាណាព្យាបាល និងសិស្សានុសិស្សពីគ្រប់មជ្ឈដ្ឋាន អំពីគុណភាព វិន័យ និងសេវាកម្ម។ មជ្ឈមណ្ឌលភាសា អេ អាយ អាយ បានបើកដំណើរការសាខាចោមចៅ ដែលមាអាសយដ្ឋានអគារលេខ222 លើផ្លូវ វេងស្រេង ភូមិជ្រៃកោង សង្កាត់ចោមចៅ ខណ្ឌពោធិ៍សែនជ័យ រាជធានីភ្នំពេញ ព្រះរាជាណាចក្រកម្ពុជា ចាប់ពីថ្ងៃ ទី13 ខែកុម្ភៈ ឆ្នាំ2019 តទៅ។ មជ្ឈមណ្ឌលភាសា អេ អាយ អាយ បានចាប់ផ្តើមទទួលចុះឈ្មោះសិស្សសម្រាប់វគ្គសិក្សាថ្មីចូលរៀន នៅថ្ងៃទី13 ខែកុម្ភៈ ឆ្នាំ2019។ អគារសិក្សាថ្មី សាខាចោមចៅនេះមានកម្ពស់ 7ជាន់ សាងសង់នៅលើផ្ទៃដី 656.5 ម៉ែត្រការ៉េ ដែលស្ថិតនៅមហាវិថី វេងស្រេង មានបរិវេណធំលូលាយសម្រាប់សិស្សានុសិស្ស បំពាក់ទៅដោយសម្ភារសិក្សាទំនើបៗ បន្ទប់មាន ផាសុកភាព អនាម័យ និងបរិសុទ្ធចេញចូល គ្រប់គ្រាន់ និងមានសុវត្ថិភាពដល់សិស្សានុសិស្សក្នុងការសិក្សា ប្រកបដោយប្រសិទ្ធិភាព និងគុណភាព តាមស្តង់ដាអន្តរជាតិ»

លោកបានលើកឡើងទៀតថា «យើងមានចក្ខុវិស័យ និងបេសកកម្មច្បាស់លាស់ក្នុងការពង្រីកសាខា ចោមចៅគឺជាទីតាំងយុទ្ធសាស្ត្រមួយរបស់យើងក្រៅពីសាខាម៉ៅសេទុង សាខាទួលគោក និងសាខាចាក់អង្រែ។ នៅតំបន់នេះ និងតំបន់ជុំវិញចោមចៅ កំពុងមានការអភិវឌ្ឍយ៉ាងខ្លាំង ដែលធ្វើឱ្យមានកំណើន ប្រជាជន និងសំណង់អគារធំៗ ជាច្រើនកំពុងរើកដុះដាល»។

មជ្ឈមណ្ឌលភាសា អេ អាយ អាយ មានគម្រោងពង្រីកសាខាថ្មីចំនួន3 បន្ថែមទៀត ដែលមានទីតាំងដូចខាងក្រោម៖

សាខាផ្សារថ្មី នឹងបើកដំណើរការក្នុងវគ្គសិក្សាទី61 ហើយយើងក៏កំពុង សម្លឹងមើលទីតាំងថ្មីមួយបន្ថែមទៀតនៅម្តុំផ្សារថ្មីដើម្បីបើកសាលារៀន អន្តរទ្វីប អារិកាំង ឬ យើងអាចប្រើប្រាស់អគារ Aii-PT សម្រាប់មជ្ឈមណ្ឌលភាសា អេ អាយ អាយ និងសាលារៀន អន្តរទ្វីប អារិកាំងសម្រាប់ឆ្នាំសិក្សា 2019 – 2010 តែម្តង។
សាខាសែនសុខ ដែលមានទំហំដី 3ហិកតា សម្រាប់បើក មជ្ឈមណ្ឌលភាសា អេ អាយ អាយ និងសាលារៀន អន្តរទ្វីប អារិកាំង និងមានទីតាំងលេងកីឡា និង MJQE Square នៅសាខាសែន សុខ។
សាខាទួលសង្កែ ដែលមានទំហំដី 7000 ម៉ែត្រការ៉េ សម្រាប់បើក មជ្ឈមណ្ឌលភាសា អេ អាយ អាយ និងសាលារៀន អន្តរទ្វីប អារិកាំង។

មជ្ឈមណ្ឌលភាសា អេ អាយ អាយ មានយុទ្ធសាស្ត្រ និងមានគំម្រោងបើកសាខាថ្មីមានដូចខាងក្រោម៖

សាខាច្បារអំពៅ
សាខាជ្រោយចង្វារ
សាខាទឹកថ្លា
សាខាភ្នំពេញថ្មី
សាខាទេពផន
សាខាព្រែកភ្នៅ
សាខាខេត្តកំពង់ស្ពឺ
សាខាខេត្តកំពង់ចាម
សាខាខេត្តសៀមរាប
សាខាខេត្តបាត់ដំបង

មជ្ឈមណ្ឌលភាសា អេ អាយ អាយមានកម្មវិធីសិក្សាដូចជាវគ្គបណ្តុះបណ្តាលផ្នែកភាសាអង់គ្លេស និងភាសាចិន គ្រប់កម្រិត វគ្គបណ្តុះបណ្តាល TESOL ថ្នាក់ត្រៀមប្រឡង TOEFL ព្រមទាំង កុំព្យូទ័រគ្រប់ជំនាញ សម្រាប់សិស្សានុសិស្សគ្រប់វ័យ។ ក្រៅពីនេះផងដែរ ដើម្បីផ្តល់នូវឱកាសសម្រាប់យុវជនឱ្យទទួលបានការបណ្តុះបណ្តាលល្អ និង ទទួលបាននូវបទពិសោធសម្រាប់អាជីពនាពេលអនាគតរបស់ពួកគេមជ្ឈមណ្ឌល និងសាលារៀនមានមជ្ឈមណ្ឌលរៀបចំផែនការអាជីព និងស្វែងរកការងារធ្វើ (Career Planning and Placement Center) និងកម្មវិធីបណ្តុះបណ្តាលវិជ្ជាជីវៈខ្លីៗសម្រាប់សិស្ស និស្សិត ដែលកំពុងសិក្សានៅតាម មហាវិទ្យាល័យដែលត្រូវការបទពិសោធ និងប្រាក់ឧបត្ថម្ភសម្រាប់ការសិក្សា។

មជ្ឈមណ្ឌលភាសា អេ អាយ អាយបានផ្តល់ជូននូវ៖

គុណភាព វិន័យ និងសេវាកម្មល្អ
លោកគ្រូ អ្នកគ្រូ និងបុគ្គលិកមានក្រមសីលធម៌វិជ្ជាជីវៈ គរុកោសល្យ និងបទពិសោធន៍ខ្ពស់ក្នុងការបង្រៀនទាំងគ្រូសញ្ជាតិខ្មែរ និងគ្រូបរទេស។
វិធីសាស្ត្រក្នុងការបង្រៀនតាមបែបបច្ចេកវិទ្យាទំនើប ដើម្បីឱ្យទាន់សម័យកាលសតវត្សរ៍ទី21
ការគ្រប់គ្រងប្រកបដោយតម្លាភាព (គ្មានការលួចចម្លងគ្នា គ្មានការសូកប៉ាន់ ជាដើម)
មានប្រព័ន្ធតាមដាន (ការហៅអវត្តមាន, ការជូនដំណឹងអំពីការមកចូលរៀនយឺត, ជំនួបរវាង អាណាព្យាបាល ជាមួយនឹងលោកគ្រូ អ្នកគ្រូ (PTA), ការជូនដំណឹងជាទៀងទាត់ទៅកាន់មាតាបិតា ឬ អាណាព្យាបាលសិស្ស។ ល។ )
ការវាយតម្លៃជាប្រចាំអំពីវឌ្ឍនភាពរបស់សិស្ស (ការធ្វើកិច្ចការផ្ទះ/ កិច្ចការស្រាវជ្រាវ/ ការប្រឡង។ល។
ចូលរួមសកម្មភាពផ្សេងៗ (សិក្ខាសាលា, កម្មវិធីប្រកួតប្រជែង, ទស្សនកិច្ចសិក្សា) ដើម្បីបញ្ជ្រាបនូវចំណេះដឹងបន្ថែម និងផ្សារភ្ជាប់ទ្រឹស្តីនឹងការអនុវត្ត
ទីតាំងនៅជិតលំនៅដ្ឋានសិស្សានុសិស្ស ងាយស្រួលក្នុងការធ្វើដំណើរ ចំណេញពេលវេលា ចំណេញថវិកា ព្រមទាំងបន្ទប់សិក្សាបំពាក់ដោយគ្រឿងបរិក្ខារទំនើបៗ និងមានផាសុកភាព
បណ្ណាល័យស្រាវជ្រាវ ពោរពេញដោយឯកសារគ្រប់កម្រិត និងគ្រប់ជំនាញ
សេវាកម្មដឹកជញ្ជូនប្រកបដោយដោយសុវត្ថិភាព និងផាសុកភាព
សេវាកម្មប្រឹក្សា ពិនិត្យសុខភាព និងព្យាបាលជំងឺ
សិស្សានុសិស្សមានភាពងាយស្រួលក្នុងការផ្លាស់ប្តូរម៉ោងសិក្សា
កម្មវិធីសិក្សាច្បាស់លាស់ និងសម្បូរបែបចាប់ពីថ្នាក់ក្រោមមត្តេយ្យសិក្សា រហូតដល់ថ្នាក់ មនុស្សពេញវ័យ
សេវាកម្មប្រឹក្សា និងណែនាំអំពីផ្នែកអប់រំ
សិក្សាភាសាអង់គ្លេស និងភាសាចិន នៅមជ្ឈមណ្ឌលភាសា អេ អាយ អាយ ធ្វើឱ្យសិស្សានុសិស្សឆាប់ចេះក្នុងរយៈពេលដ៏ខ្លី ពោលគឺអាចស្តាប់ និយាយ អាន និងសរសេរបាន ស្ទាត់ជំនាញ
សិស្សានុសិស្ស និងមាតាបិតា ឬអាណាព្យាបាលមួយចំនួនធំបានវាយតម្លៃខ្ពស់ចំពោះមជ្ឈមណ្ឌលភាសា អេ អាយ អាយ ថាជាសាលាប្រកបដោយគុណភាព ឧត្តមភាព និងជាមាគ៌ាដឹកនាំសិស្សានុសិស្សទៅរកអនាគតដ៏ភ្លឺស្វាង។

គ្រាន់តែចុះឈ្មោះសិក្សានៅមជ្ឈមណ្ឌលភាសា អេ អាយ អាយ សាខាចោមចៅនឹងទទួលបានអាហារូបករណ៍ដូចខាងក្រោមកម្មវិធីសិក្សាភាសាអង់គ្លេស (ESL Program)៖

50% សម្រាប់សិស្សម្នាក់ៗ ពេលចុះឈ្មោះ 4នាក់ឡើងទៅ ក្នុងពេលតែមួយ
35% សម្រាប់សិស្សម្នាក់ៗ ពេលចុះឈ្មោះ 3នាក់ ក្នុងពេលតែមួយ
25 % សម្រាប់សិស្សម្នាក់ៗ ពេលចុះឈ្មោះ 2នាក់ ក្នុងពេលតែមួយនិងកម្មវិធីសិក្សាភាសាចិន (CSL Program)៖

50% សម្រាប់សិស្សម្នាក់ៗ ពេលចុះឈ្មោះ 4នាក់ឡើងទៅ ក្នុងពេលតែមួយ
35% សម្រាប់សិស្សម្នាក់ៗ ពេលចុះឈ្មោះ 4នាក់ ក្នុងពេលតែមួយ
25% សម្រាប់សិស្សម្នាក់ៗ ពេលចុះឈ្មោះ 2នាក់ ក្នុងពេលតែមួយ
15% រហូតដល់ 35% ពីកម្មវិធីបញ្ចុះតម្លៃសេវាកម្មរថយន្តពីសាលា

រចនាសម្ពន្ធក្រុមហ៊ុនមានដូចជា៖

ក្រុមហ៊ុន ម៉េងលី ជេ. គួច អេឌ្យូខេសិន (Mengly J. Quach Education)

មជ្ឍមណ្ឌលភាសា អេ អាយ អាយ (Aii Language Center)
សាលារៀន អន្តរទ្វីប អាមេរិកាំង (American Intercon School)
- ក្រុមហ៊ុន ម៉េងលី ជេ. គួច អេឌ្យូខេសិន សឺវីស (Mengly J. Quach Education Services)
អាហារដ្ឋាន អាឡិច គួច (Alex Food Court)
ហាងកាហ្វេឆាតូ (Café Chateau)
សេវាកម្មដឹកជញ្ជូនសិស្ស អន្តរទ្វីប (Intercon Transportation Services)
បណ្ណាគារ អន្តរទ្វីប (Intercon Bookstore)
ស្មាតម៉ាត (Smart Mart)
មជ្ឈមណ្ឌលសុខភាពសិស្ស ម៉េងលី ជេ. គួច (Mengly J. Quach Student Health Center)
TESOL House
The Intercon Rooster
MJQTV
Mengly J. Quach University Press
Mengly J. Quach Research Center
- Mengly J. Quach Foundation
- ប្រសិទ្ធភាពហ្វាយនែន (Prasethpheap Finance)

ពានរង្វាន់ និងការទទួលស្គាល់គឺពាន់រង្វាន់ទទួលស្គាល់ជាអន្តរជាតិទៅលើ គុណភាព ឧត្តមភាព ការចូលរួមចំណែកក្នុងសង្គម (CSR) ភាពជាអ្នកដឹកនាំពីប្រទេសនានាជាច្រើនដូចជា៖ ប្រទេសសិង្ហបុរី ប្រទេសបារាំង សហព័ន្ធអារ៉ាប់ ប្រទេសស្វីស សហរដ្ឋអាមេរិច ចក្រភពអង់គ្លេស ប្រទេសប្រេស៊ីល ហុងកុង និងប្រទេសប្រ៊ុយណេ៕

មជ្ឈមណ្ឌលភាសា អេ អាយ អាយ សាខាចោមចៅ បានចាប់ផ្តើមទទួលចុះឈ្មោះសិស្ស សម្រាប់វគ្គសិក្សាថ្មីចូលរៀន នៅថ្ងៃទី១៣ ខែកុម្ភៈ ឆ្នាំ២០១៩ និងសាលារៀន អន្តរទ្វីប អាមេរិកាំង សាខាចោមចៅ ទទួលចុះឈ្មោះសិស្សចូលរៀនថ្នាក់ចំណេះទូទៅភាសាខ្មែរ សម្រាប់ឆ្នាំសិក្សាថ្មី២០១៩-២០២០ ចាប់ពីពេលនេះតទៅផងដែរ៕

January 31, 2019

លោក Klopp ផ្ទុះកំហឹង ខណៈ Liverpool ខ្ជះខ្ជាយឱកាសក្នុងការដណ្តើមយកប្រៀប

លោក Jurgen Klopp អ្នកចាត់ការទូទៅរបស់ក្រុម Liverpool បានបញ្ជាក់ថា ក្រុមរបស់លោកមិនត្រូវបានផ្តល់បាល់ប៉េណាល់ទីយ៉ាងជាក់លាក់ 1គ្រាប់ ដែលអាចធ្វើឱ្យពួកគេដណ្តើមបានជ័យជម្នះលើក្រុម Leicester កាលពីថ្ងៃពុធ និងនាំមុខ 7ពិន្ទុដាច់នៅលើតារាងក្របខ័ណ្ឌ Premier League។

ប៉ុន្តែ ផ្ទុយទៅវិញ ក្រុម Liverpool បានបញ្ចប់ក្នុងលទ្ធផល 1-1 នៅកីឡដ្ឋាន Anfield ដែលធ្វើឱ្យពួកគេបាននាំមុខត្រឹមតែ 5ពិន្ទុលើក្រុមឈរលេខ2 Manchester City ប៉ុណ្ណោះ ក្រោយពីក្រុមម្ចាស់ការពារតំណែងជើងឯកមួយនេះ បានរងបរាជ័យក្នុងលទ្ធផល 2-1 នៅលើទឹកដីក្រុម Newcastle កាលពីថ្ងៃអង្គារ។

គ្រាប់បាល់ស៊ុតបញ្ចូលទីរបស់ខ្សែប្រយុទ្ធ Sadio Mane នៅនាទីទី3 ត្រូវបានតាមស្មើដោយខ្សែការពារ Harry Maguire របស់ក្រុម Harry Maguire នៅជិតបញ្ចប់ការប្រកួត។

ប៉ុន្តែ ទោះបីជាយ៉ាងណាបន្ទាប់មក ក្រុម Liverpool បានធ្វើការតវ៉ាសម្រាប់បាល់ពិន័យ 11ម៉ែត្រយ៉ាងច្បាស់ នៅពេលដែលកីឡាករ Naby Keita ត្រូវបានធ្វើឱ្យដួល ក្រោមការប្រជែងពីសំណាក់កីឡាករ Ricardo Pereira។

លោក Klopp បាននិយាយទាំងខឹងសម្បាថា៖ «វាគឺជាស្ថានភាពបាល់ពិន័យ 11ម៉ែត្រដ៏ច្បាស់បំផុតដែលយើងត្រូវបាន។ អ្នកត្រូវតែសួរអាជ្ញាកណ្តាលពីមូលហេតុដែលមិនបានផ្តល់បាល់ពិន័យ 11ម៉ែត្រនោះ»។

លោក Klopp ដែលទន្ទឹងថានឹងបញ្ចប់ការរង់ចាំអស់រយៈពេល 29ឆ្នាំរបស់ក្រុម Liverpool ក្នុងការក្លាយជាម្ចាស់ជើងឯកអង់គ្លេសម្តងទៀតនោះ បានប្រាប់ទូរទស្សន៍ BT Sport ថា៖ «គូប្រកួតមានការរៀបចំបានល្អ និងបានការពារទីយ៉ាងរឹងមាំ។ ទីលាននេះពិតជាពិបាក ហើយយើងត្រូវតែបង្កើនល្បឿនលេងនៅរយៈពេល 15នាទីលើកទី3»៕

January 31, 2019

«ទន្លេសាប» កម្មវិធីទូរស័ព្ទដៃផ្តល់ចំណេះដឹងកសិកម្មដំបូងគេនៅកម្ពុជា

ភ្នំពេញ៖ គ្រឹះស្ថានមីក្រូហិរញ្ញវត្ថុ អេ អឹម ខេ បានដាក់ឱ្យប្រើប្រាស់ជាផ្លូវការនូវកម្មវិធីទូរស័ព្ទដៃទន្លេសាប កាលពីថ្ងៃទី២៩ ខែមករា ឆ្នាំ២០១៩ ត្រូវនឹងថ្ងៃអង្គារ ៩រោច ខែបុស្ស ឆ្នាំច សំរឹទ្ធិស័ក ព.ស ២៥៦២ នៅសណ្ឋាគារ The Great Duke ភ្នំពេញ ដែលមានការអញ្ជើញចូលរួមពីអ្នកសារព័ត៌មាន និងភ្ញៀវជាតិ អន្តរជាតិជាច្រើន។ កម្មវិធីទូរស័ព្ទដៃ ទន្លេសាបត្រូវបានផ្តួចផ្តើម និងបង្កើតឡើងដោយគ្រឹះស្ថានមីក្រូហិរញ្ញវត្ថុ អេ អឹម ខេ ក្រោមកិច្ចសហប្រតិបត្តិការជាមួយ ក្រសួងកសិកម្ម រុក្ខាប្រមាញ់ និងនេសាទ និងគាំទ្រសហការមូលនិធិដោយ គ្រឹះស្ថានមីក្រូហិរញ្ញវត្ថុ អេ អឹម ខេ គម្រោងមូលនិធិការបង្កើតថ្មីសម្រាប់កាត់បន្ថយភាពក្រីក្រ (IAP) ដែលសហការអនុវត្តរួមគ្នាដោយ Sida, SNV, IBSweden និង BoPInc និងគម្រោងហាវែស II នៃទីភ្នាក់ងារជំនួយអាមេរិក USAID ។

លោក គា បូរាណ ប្រធាននាយកប្រតិបត្តិនៃគ្រឹះស្ថានមីក្រូហិរញ្ញវត្ថុ អេ អឹម ខេ បានឱ្យដឹងក្នុងសិក្ខាសាលាដាក់ឱ្យ ប្រើជាផ្លូវការនៃកម្មវិធីទូរស័ព្ទទន្លេសាបថា “ដោយមើលឃើញពីអតិថិជន អេ អឹម ខេ ជាង៥០% បានខ្ចីប្រាក់យកទៅប្រកប មុខរបរធ្វើកសិកម្មដូចជា ធ្វើស្រែ ចំការ និងចិញ្ចឹមសត្វជាដើម ។ ដូច្នេះហើយបានជា អេ អឹម ខេ ផ្តួចផ្តើមគំនិតក្នុងការបង្កើត កម្មវិធីទូរស័ព្ទដៃទន្លេសាបនេះឡើង ដោយមានការចូលរួមគាំទ្រពីរាជរដ្ឋាភិបាលកម្ពុជា អង្គការជាតិ និង អន្តរជាតិជាច្រើន ហើយនេះក៏ជាសមិទ្ធិផលថ្មីមួយទៀតដែល អេ អឹម ខេ បានចូលរួមចំណែកជួយលើកម្ពស់វិស័យកសិកម្មនៅកម្ពុជា។ ខ្ញុំសង្ឃឹមថាកម្មវិធីទូរស័ព្ទដៃទន្លេសាបនេះ នឹងផ្តល់អត្ថប្រយោជន៍ដល់កសិករខ្មែរក្នុងការធ្វើស្រែ ចំការ និងចិញ្ចឹមសត្វ ឱ្យកាន់តែរីកចម្រើន និងទទួលបានប្រាក់ចំណូលកាត់តែច្រើនព្រោះថាក្នុងកម្មវិធីនេះគឺយើងព្យាយាមផ្សារភ្ជាប់តួអង្គនៃខ្សែ ច្រវាក់ផ្គត់ផ្គង់កសិកម្មពី អ្នកផ្គត់ផ្គង់សម្ភារៈកសិកម្ម អ្នកផលិត អ្នកទិញលក់ផ្ទាល់បានជួបគ្នា បន្ថែមពីនេះផ្តល់បច្ចេកទេស ដាំដុះ ការប៉ាន់ប្រមាណពីចំណូល និងចំណាយដើម្បីឱ្យកសិករគាត់ត្រៀមថវិកាក្នុងការផលិតតាមបច្ចេកទេសណែនាំ និងអាចទំនាក់ទំនងផ្ទាល់មកគ្រឹះស្ថានមីក្រូហិរញ្ញវត្ថុ អេ អឹម ខេ សម្រាប់តម្រូវការសេវាហិរញ្ញវត្ថុនានា ដូចជា កម្ចី ឬ ផ្ទេរប្រាក់ជាដើម។ ”

ថ្លែងក្នុងពិធីដាក់ឱ្យប្រើកម្មវិធីទូរស័ព្ទដៃទន្លេសាប លោក ស្រ៊ុន សុខុម អគ្គនាយករង នៃអគ្គនាយកដ្ឋានកសិកម្ម នៃក្រសួងកសិកម្ម រុក្ខាប្រមាញ់ និងនេសាទ បានមានប្រសាសន៍ថា “គោលដៅរួមរបស់រាជរដ្ឋាភិបាលកម្ពុជាគឺដើម្បីកាត់បន្ថយភាពក្រីក្រ និង ជំរុញកំណើនសេដ្ឋកិច្ចតាមរយៈការលើកកម្ពស់ការអភិវឌ្ឍវិស័យកសិកម្ម។ គោលដៅសំខាន់សម្រាប់អភិវឌ្ឍវិស័យកសិកម្ម គឺដើម្បីធានាឱ្យបាននូវសន្តិសុខស្បៀង បង្កើនចំណូល បង្កើតឱ្យមានការងារធ្វើ និងធ្វើឱ្យប្រសើរឡើងនូវស្ថានភាពអាហារ រូបត្ថម្ភសម្រាប់ប្រជាពលរដ្ឋទាំងអស់តាមរយៈការបង្កើនផលិតភាពកសិកម្ម ហើយកម្មវិធីទូរស័ព្ទដៃទន្លេសាបនេះពិតជាបាន បង្កើតឡើងចំពេលដែលស្របទៅនឹងទិសដៅរបស់រដ្ឋាភិបាល និងសម័យបច្ចេកវិទ្យាទូរស័ព្ទ ដើម្បីជួយផ្តល់ជាចំណេះដឹង ផ្នែកកសិកម្មដល់ប្រជាពលរដ្ឋជាពិសេសកសិករកម្ពុជា ដែលពួកគាត់ងាយស្រួលក្នុងការស្វែងរកប្រភពចំណេះដឹងដូចជា វិធីធ្វើដើម្បីទទួលបានទិន្នផលខ្ពស់ជាមួយបច្ចេកទេសដែលមានស្តង់ដារ ងាយស្រួលក្នុងការរកធាតុចូលសម្រាប់ផលិតកម្ម កសិកម្ម មិនតែប៉ុណ្ណោះអ្វីដែលខ្ញុំពេញចិត្តនោះគឺ កសិករអាចយល់បានកាន់តែច្បាស់ពីតម្លៃទីផ្សារផលិតផល និងធាតុចូល កសិកម្មភ្លាមៗ ដែលធ្វើឱ្យពួកគាត់កាន់តែមានអំណាចក្នុងការចរចាតម្លៃទាំងពេលទិញធាតុចូលកសិកម្ម និងលក់ផលិតផល ទៅវិញ និងអាចរួចផុតពីការបោកបញ្ឆោតពីឈ្មួញកណ្តាលមួយចំនួនក្នុងការទម្លាក់តម្លៃផលិតផលរបស់ពួកគាត់។

ខ្ញុំសូមបញ្ចាក់ ផងដែរថាការសហការជាដៃគូរវាងក្រសួងកសិកម្ម រុក្ខាប្រមាញ់ និងនេសាទ និងគ្រឹះស្ថានមីក្រូហិរញ្ញវត្ថុ អេ អឹម ខេ ជា សកម្មភាពចូលរួមអនុវត្តកម្មវិធីភាពជាដៃគូរវាងគ្រឹះស្ថានសាធារណៈ និងវិស័យឯកជន (Public-Private Partnership) ដែលរាជរដ្ឋាភិបាលកម្ពុជាបានលើកកម្ពស់ និងជំរុញនាពេលបច្ចុប្បន្ន។ ជាចុងក្រោយខ្ញុំសូមអរគុណដល់គ្រឹះស្ថានមីក្រូហិរញ្ញវត្ថុ អេ អឹម ខេ ក៏ដូចជាអង្គការជាតិ អន្តរជាតិ និងដៃគូអភិវឌ្ឍន៍ ជាច្រើនដែលបានយកចិត្តទុកដាក់ និងគាំទ្រក្នុងការបង្កើតកម្មវិធីទូរស័ព្ទដៃ ៉ទន្លេសាប ៉ នេះឡើង។

គួររម្លឹកផងដែរថាទន្លេសាបគឺជាកម្មវិធីទូរស័ព្ទដៃដែលបង្កើតឡើងក្នុងគោលបំណងជួយផ្តល់ចំណេះដឹងដល់កសិករពីបច្ចេកទេស ព័ត៌មានទីផ្សារកសិកម្ម ផ្តល់គន្លឹះសំខាន់ៗក្នុងការដាំដំណាំ ស្វែងរកសម្ភារកសិកម្ម និងចិញ្ចឹមសត្វឱ្យកាន់តែ ប្រសើរឡើង មិនតែប៉ុណ្ណោះកសិករអាចស្វែងរកសេវាហិរញ្ញវត្ថុដើម្បីពង្រីកមុខរបរកសិកម្មរបស់ខ្លួនបានតាមរយៈកម្មវិធី នេះផងដែរ។ កម្មវិធីនេះត្រូវបានដាក់ឱ្យប្រើប្រាស់ដោយសេរីលើ App Store ប្រព័ន្ធ (IOS) និង Play Store ប្រព័ន្ធ Android ដែលផ្តល់ជូនមុខងារពិសេសជាច្រើនដូចជា ទទួលបានចំណេះដឹង និងបច្ចេកទេសកសិកម្មនានា (ដាំដំណាំ និងចិញ្ចឹមសត្វ) ទទួលបាននូវការចែករម្លែកបទពិសោធន៍ពីសំណាក់កសិករជោគជ័យ ទទួលបាននូវការប្រឹក្សាយោបល់ពីអ្នកជំនាញកសិកម្ម ដើម្បីដោះស្រាយបញ្ហាដែលកសិករបានជួបប្រទះ ងាយស្រួលស្វែងរកសម្ភារកសិកម្មពីក្រុមហ៊ុន ឬដេប៉ូផ្គត់ផ្គង់សម្ភារ កសិកម្ម ទទួលបានព័ត៌មានថ្មីៗដែលពាក់ព័ន្ធនឹងតម្លៃទីផ្សារផលិតផលកសិកម្ម និងអាចកត់ត្រាព័ត៌មានទាក់ទងនឹង កសិដ្ឋានផ្ទាល់ខ្លួននៅលើទូរស័ព្ទដៃ។

អេ អឹម ខេ គឺជាគ្រឹះស្ថានមីក្រូហិរញ្ញវត្ថុដែលឈានមុខគេលើវិសាលភាពប្រតិបត្តិការ និងចំនួនអតិថិជនប្រាក់កម្ចី។ គិតត្រឹមខែធ្នូ ឆ្នាំ២០១៨ អេ អឹម ខេ មានអតិថិជនសរុបចំនួនជាង ៧៦ ម៉ឺននាក់ ជាមួយនឹងផលប័ត្រប្រាក់កម្ចីជាង ២៥២ លានដុល្លារអាមេរិក និងប្រាក់បញ្ញើជាង ១៥៨ លានដុល្លារអាមេរិក មានការិយាល័យប្រតិបត្តិការចំនួន ១៥០កន្លែង និងមានភ្នាក់ងារជិត ៤.០០០ កន្លែងនៅទូទាំងប្រទេស។ អេ អឹម ខេ មានផលិតផល និងសេវាកម្មជាច្រើនកំពុងផ្តល់ជូនអតិថិជនដូចជា៖ សេវាប្រាក់កម្ចី ប្រាក់សន្សំ សេវាផ្ទេរប្រាក់ក្នុងនិងក្រៅប្រទេស សេវាទូទាត់វិក្កយបត្រ ធានារ៉ាប់រងខ្នាតតូច ធនាគារចល័ត សេវាបើកប្រាក់បៀវត្សរ៍ ម៉ាស៊ីនដក និងដាក់ប្រាក់ដោយស្វ័យប្រវត្តិ (ATMs/CDMs)៕

សម្រាប់លោកអ្នកប្រើប្រាស់ទូរស័ព្ទ iPhone (iOS) សូមចូលទៅកាន់តាម Link ខាងក្រោម៖https://itunes.apple.com/au/app/tonlesap-app/id1439403157

សម្រាប់លោកអ្នកប្រើប្រាស់ទូរស័ព្ទក្រៅពី iPhone (Android) សូមចូលទៅកាន់តាម Link ខាងក្រោម៖https://play.google.com/store/apps/details?id=com.tonlesap.cambodia

January 30, 2019

គម្រោង GOLD TOWER 42 បានបញ្ចប់ការសាងសង់គ្រោងអគាររបស់ខ្លួនហើយ

គ្រោងអគារ Gold Tower 42 ជាន់បានបញ្ចប់ការសាងសង់ហើយកាលពីថ្ងៃចន្ទ (ទី២៨ មករា) បន្ទាប់ពីសំណង់អគារមួយនេះត្រូវបានពន្យារពេលសាងសង់បន្តអស់ជាច្រើនឆ្នាំកន្លងមក។

ក្រុមហ៊ុន Yon Woo Cambodia ដែលជាក្រុមហ៊ុនកាន់កាប់អគារ Gold Tower 42 ជាន់នេះ បានចុះកិច្ចព្រមព្រៀងកាលពីខែវិច្ឆិកា ឆ្នាំ2017 កន្លងទៅជាមួយក្រុមហ៊ុន Shenzhen Hongtao Co.,Ltd និងក្រុមហ៊ុនវិស្វកម្មសំណង់ Hongtao Weimin ក្នុងការទទួលខុសត្រូវបញ្ចប់គម្រោងនេះ។

សំណង់អគារ 42ជាន់ ស្ថិតនៅចំបេះដូងនៃរាជធានីភ្នំពេញត្រង់ចំណុចប្រសព្វរវាងមហាវិថីព្រះមុនីវង្ស និងមហាវិថីព្រះសីហនុ។ គម្រោងនេះបានចាប់ផ្តើមនៅឆ្នាំ2008 ហើយបានពន្យារពេល 3ដងមកហើយ ពោលគឺ ម្តងនៅក្នុងឆ្នាំ 2009 ដោយសារតែវិបត្តិហិរញ្ញវត្ថុសកល និងម្តងទៀតនៅឆ្នាំ2012។ បន្ទាប់មកសំណង់នេះបានសាងសង់ឡើងវិញនៅឆ្នាំ 2013 ក្រោយមកបានបញ្ឈប់ទៅវិញម្តងទៀតនៅឆ្នាំ2017។

ក្រុមហ៊ុន Yon Woo Cambodia ធ្លាប់បានប្រកាសកាលពីឆ្នាំ2018 ថា សំណង់អគារ 42 ជាន់នេះបានចំណាយទុនវិនិយោគអស់ប្រមាណជា 100លានដុល្លារអាមេរិករួចមកហើយ ហើយទឹកប្រាក់ជាង 140លានដុល្លារអាមេរិកទៀតនឹងត្រូវវិនិយោគបន្ថែមដើម្បីបញ្ចប់គម្រោងទាំងមូល។

ដោយឡែកកាលពីថ្ងៃទី28 ខែមករាម្សិលមិញនេះ គម្រោងសាងសង់ Gold Tower 42 ជាន់នៅប្រទេសកម្ពុជាដែលបានចុះហត្ថលេខាសាងសង់បញ្ចប់ដោយក្រុមហ៊ុនវិស្វកម្មសំណង់ Hongtao Weimin (ខេមបូឌា) បានធ្វើការបញ្ចប់គ្រោងអគារនេះផ្នែកខាងក្រៅជាផ្លូវការហើយ៕

January 29, 2019

កម្មវិធីស្មាតហ្វូនវីងងាយស្រួល ទាន់សម័យ ថែមទាំងទទួលបានរង្វាន់

«គឺអត់ជឿជាក់ អាចថាគាត់ [បុគ្គលិកភ្នាក់ងារវីង] អាចច្រឡំអ្វីមួយចឹង ខ្ញុំក៏ Call [ទូរស័ព្ទ] ទៅបញ្ជាក់គាត់ម្តងទៀត ហើយពូខ្ញុំក៏គាត់បានប្រាប់ដែរថា ក្មួយមានបញ្ជាក់គេ ឬអត់? រង្វាន់ហ្នឹងនៅណាវិញ? ហើយគេឱ្យយើងសម្គាល់ខ្លួនបែបណាខ្លះ? ហេតុអីបានជាយើងជឿជាក់គេ?»។

ទាំងនេះជាការរៀបរាប់យ៉ាងរំភើបពីម្ចាស់រង្វាន់ម៉ាស៊ីនបោកខោអាវ ពីធនាគារឯកទេសវីង គឺកញ្ញាសាយ ចាន់រ័ត្ន រស់នៅរាជធានីភ្នំពេញ ខណៈកញ្ញាមិននឹកស្មានថាខ្លួនអាចឈ្នះរង្វាន់បានយ៉ាងពិតប្រាកដ ដោយបច្ចុប្បន្នមានការឆបោកថាឈ្នះរង្វាន់ស្រដៀងគ្នានេះជាច្រើន។

ក្រោយពីបានសួរនាំទៅកាន់បុគ្គលិកផ្នែកបម្រើអតិថិជនរបស់ធនាគារឯកទេសវីង ដោយអស់ចម្ងល់រួចហើយ កញ្ញាចាន់រត្ន័ ក៏បានសម្រេចចិត្តធ្វើដំណើរមកកាន់ហាងលក់ផលិតផលអេឡិចត្រូនិករបស់ក្រុមហ៊ុន LG ដែលស្របតាមការអញ្ជើញរបស់ភ្នាក់ងារវីងនាព្រឹកថ្ងៃសៅរ៍ទី 19មករាផងដែរ។

ការឈ្នះរង្វាន់នេះ គឺដោយសារតែស្ត្រីរូបនេះបានប្រើប្រាស់កម្មវិធីស្មាតហ្វូនវីង ដើម្បីធ្វើការបញ្ជូលទឹកប្រាក់ប្រើប្រាស់ប្រព័ន្ធទូរស័ព្ទ ខណៈកញ្ញាវ័យ 24ឆ្នាំនេះ បានប្រើប្រាស់សេវាកម្មនេះតាំងពីពាក់កណ្តាល ឆ្នាំ2018មកម្លេះ។ កញ្ញា ចាន់រ័ត្ន ក៏បានលើកទឹកចិត្តអ្នកប្រើប្រាស់ទូរស័ព្ទស្មាតហ្វូនទាំងអស់ឲ្យចាប់ផ្តើមប្រើប្រាស់សេវានេះ ព្រោះវាអាចជាឱកាសសម្រាប់ក្លាយជាម្ចាស់រង្វាន់ធំៗលើកក្រោយៗទៀត។

ប្រសាសន៍កញ្ញាសាយ ចាន់រ័ត្ន៖ « អតិថិជនគួរប្រើប្រាស់នូវសេវាកម្មរបស់វីងទាំងអស់គ្នា ដូចថ្ងៃនេះខ្ញុំត្រូវម៉ាស៊ីនបោកខោអាវ ថ្ងៃក្រោយគឺអាចជារូបអ្នកពួកគាត់»។

អតិថិជនម្នាក់ក្នុងចំណោមអតិថិជនទាំង 21នាក់ ដែលបានឈ្នះរង្វាន់ទូរទឹកកពីកម្មវិធី “ធ្វើប្រតិបត្តិការ ដើម្បីឈ្នះរង្វាន់” របស់ធនាគារឯកទេសវីង គឺលោកហ៊ន់ វិច្ឆរ៉ា បានឱ្យដឹងថា ការប្រើប្រាស់កម្មវិធីស្មាតហ្វូនវីង មិនត្រឹមតែផ្តល់ភាពងាយស្រួល រហ័ស មិនធ្វើឱ្យខាតពេលវេលាប៉ុណ្ណោះទេ វាថែមទាំងធ្វើឱ្យអតិថិជន ចេះប្រើប្រាស់នូវឧបករណ៍ទំនើបៗដូចជា៖ ទូរសព្ទដៃក្នុងការធ្វើប្រតិបត្តិការទូទាត់សេវាកម្មផ្សេងៗ ជាដើម។

បុរសវ័យ 29ឆ្នាំ ម្នាក់នេះ មានទីលំនៅក្នុងសង្កាត់ព្រែកកំពិស ខណ្ឌដង្កោ រាជធានីភ្នំពេញ បានចែករំលែកពីបទពិសោធន៍របស់ខ្លួនយ៉ាងដូច្នេះថា៖«ល្អមែនទែន នៅពេលដែលវីងបាននាំចូលនូវបច្ចេកវិទ្យានេះ។ [វាធ្វើ] ឱ្យប្រជាពលរដ្ឋខ្មែរប្រើកម្មវិធីនេះធ្វើងាយរហ័ស ហើយងាយស្រួលយើងអត់ខាតពេល ងាយស្រួលរហ័សទាន់ចិត្តអ៊ីចឹង ព្រោះកាលណាយើង ប្រើបច្ចេកវិទ្យានេះទៅ ធ្វើឱ្យយើងកាន់តែមានចំណេះដឹងបន្ថែម ដើម្បីប្រើបច្ចេកវិទ្យាថ្មីទំនើប[ផ្សេង]បន្តទៀត»។

បច្ចេកវិទ្យាហរិញ្ញវត្ថុ (FinTech) មានដូចជាកម្មវិធីទូរស័ព្ទដៃ បាននឹងទទួលបានការពេញនិយមពីសំណាក់អ្នកប្រើប្រាស់គណនីធនាគារបច្ចុប្បន្ន ដោយសារតែវាផ្តល់ភាពងាយស្រួល រហ័ស ក្នុងការប្រតិបត្តិការហរិញ្ញវត្ថុនានា។ ធនាគារឯកទេសវីងបានឲ្យដឹងថា ធនាគាររបស់ខ្លួនទទួលបានអតិថិជនប្រមាណជាង 4លាននាក់ ដែលកំពុងប្រើប្រាស់សេវាកម្មរបស់ធនាគារមួយនេះ។ ក្នុងនោះដែរ មានអតិថិជនប្រមាណជាជាង 1លាននាក់ ដែលបានធ្វើការដោនឡូត និងប្រើប្រាស់កម្មវិធីស្មាតហ្វូនវីង ដែលជាផ្នែកមួយនៃបច្ចេកវិទ្យា ហិរញ្ញវត្ថុ សម្រាប់ធ្វើប្រតិបត្តិការទូទាត់ដោយមិនប្រើសាច់ប្រាក់។

ដោយមើលឃើញនូវការគាំទ្ររបស់អតិថិជន វីងបានបង្កើតជាកម្មវិធីប្រូម៉ូសិនជាច្រើន ដូចជាកម្មវិធី “ធ្វើប្រតិបត្តិការដើម្បីឈ្នះរង្វាន់” ដើម្បីថ្លែងអំណរគុណទៅដល់អតិថិជនទាំងអស់ដែលបានប្រើប្រាស់ សេវាកម្មរបស់ធនាគារ។ កម្មវិធីប្រម៉ូសិននេះ គឺសម្រាប់តែអតិថិជនវីង ដែលប្រើប្រាស់កម្មវិធីស្មាតហ្វូនវីង ដើម្បីធ្វើប្រតិបត្តិការដូចជា ផ្ទេរប្រាក់ពីគណនីទៅគណនី ផ្ទេរប្រាក់ពីគណនីទៅកាន់លេខទូរស័ព្ទ ផ្ទេរប្រាក់ ទៅក្រៅប្រទេស បញ្ចូលទឹកប្រាក់ទូរស័ព្ទ ទូទាត់វិក្កយបត្រ និងដកប្រាក់ជាដើម។

កម្មវិធីចាប់រង្វាន់នេះ នឹងធ្វើឡើងជាបន្តបន្ទាប់ នៅថ្ងៃទី28 ខែមករា និងថ្ងៃទី7 ខែមីនា ឆ្នាំ2019 ខាងមុខនេះ ដែលធនាគារឯកទេសវីងគ្រោងផ្តល់រង្វាន់ធំៗជាច្រើនទៀត ក្នុងនោះរួមមានម៉ូតូ Zoomer X ទូរទស្សន៍ ទូរទឹកកក និងម៉ាស៊ីនបោកខោអាវ។

សម្រាប់ព័ត៌មានបន្ថែម៖ https://bit.ly/2FPx0Yj

January 29, 2019

ខំដាំដើមផ្កាអង្គារសិល្ប៍ឱ្យហើយទៅ បន្តិចទៀតនឹងលែងមានច្រើនហើយ

ផ្កាអង្គារសិល្ប៍ ជាផ្កាដ៏មានប្រជាប្រិយភាពបំផុតនៅក្នុងឱកាសរដូវកាលបុណ្យចូលឆ្នាំចិន-វៀតណាម ព្រោះផ្កានេះត្រូវបានគេជឿថា ជាផ្កាដែលមានឥទ្ធិពលល្អសម្រាប់នាំមកនូវសេចក្តីសុខ ហើយបញ្ចៀសរឿងរ៉ាវអាក្រក់ដែលអ្នកដទៃប៉ងមកលើយើងឱ្យក្លាយជាលាភ។

នៅប៉ុន្មានថ្ងៃនេះ អាជីវកររកស៊ីលក់មែកដើមផ្កាមួយនេះនៅក្នុងឱកាសបុណ្យចូលឆ្នាំប្រពៃណីចិន-វៀតណាម បានសម្រុកប្រមូលទិញដើមផ្កាអង្គារសិល្ប៍ពីខេត្តឆ្ងាយៗ ជាពិសេសខេត្តពោធិ៍សាត់ ដែលជាតំបន់សម្បូរព្រៃភ្នំ និងជាកន្លែងល្អសម្រាប់ការដុះលូតលាស់របស់ដើមផ្កាអង្គារសិល្ប៍។

ស្របពេលដែលអាជីវករកំពុងមមាញឹកក្នុងការដឹកជញ្ជូន លោក តុលា ដែលជាអាជីករម្នាក់ក្នុងចំណោមអាជីវករជាច្រើននាក់ផ្សេងទៀតនៅក្នុងទីក្រុងភ្នំពេញ បានត្អូញត្អែរថា អាជីវកម្មលក់មែកដើមផ្កាអង្គារសិល្ប៍បច្ចុប្បន្ននេះមិនដូចពីមុននោះទេ ព្រោះមានឧបសគ្គជាច្រើនដែលធ្វើឱ្យពិបាកលក់។

លោក តុលា បាននិយាយថា ដោយសារតែបច្ចុប្បន្ននេះ ដីភ្នំ និងដីដែលប្រជាពលរដ្ឋតែងតែទៅកាប់ផ្កាអង្គារសិល្ប៍បានក្លាយទៅជាចម្ការ និងជាកម្មសិទ្ធិរបស់ក្រុមហ៊ុនឯកជនអស់ទៅហើយ ធ្វើឱ្យពួកគាត់មានការលំបាកក្នុងការចូលទៅកាប់ ឬកន្លែងខ្លះត្រូវគេឈូសឆាយអស់ទៀតផង។

អាជីវករដដែលបានលើកឡើងផងដែរថា ដោយចំនួនដើមផ្កាអង្គារសិល្ប៍ចេះតែហោចទៅៗ ធ្វើឱ្យអ្នកស្វែងរកមែកដើមផ្កាមួយនេះត្រូវចំណាយសោហ៊ុយកាន់តែច្រើនឡើងដើម្បីធ្វើដំណើរទៅក្នុងតំបន់ជ្រៅៗ និងឆ្ងាយទៅៗដើម្បីកាប់យកមែកណាដែលមានផ្កាល្អៗមកលក់ដែលធ្វើឱ្យតម្លៃដើមកើនឡើង និងការប្រកួតប្រជែងកាន់តែខ្លាំងធ្វើឱ្យយើងលក់នៅលើទីផ្សារមិនសូវបានថ្លៃ។

របរលក់មែកដើមផ្កាអង្គារសិល្ប៍នេះ ថ្វីដ្បិតតែមើលទៅឃើញរាងកាក់កបខ្លាំងមែន តែទន្ទឹមនឹងការមើលឃើញរបស់មនុស្សទូទៅ វាក៏មានផលវិបាកមិនតិចដែរ ព្រោះក្រៅពីពិបាកស្វែងរកដើមផ្កានេះមកលក់ហើយនោះ គេអាចលក់វាបានតែមួយរដូវកាលនេះតែប៉ុណ្ណោះក្នុងមួយឆ្នាំ ប្រសិនបើលក់មិនអស់ត្រូវទុកដាក់ថែទាំរហូតដល់ឆ្នាំថ្មីទើបអាចលក់ទៀតបាន៕

January 29, 2019

ក្រុម ស៊ាន ពិសិដ្ឋ គ្រងជើងឯក ខណៈក្រុម PCO FC ម្ចាស់ជើងឯកឆ្នាំចាស់បានត្រឹមលេខ4

បាត់ដំបង ៖ក្រុម ស៊ាន ពិសិដ្ឋ បានគ្រងតំណែងជើងឯកក្នុងព្រឹត្តិការណ៍ការប្រកួតនៃក្របខណ្ឌពានរង្វាន់ Tiger Street Football Festival 2019 មណ្ឌលខេត្តបាត់ដំបង ក្រោយពីយកឈ្នះលើក្រុម Tiger Night ក្នុងលទ្ធផល 3ទល់0 នៅវគ្គផ្តាច់ព្រ័ត្រនាយប់ថ្ងៃទី27 ខែមករា ឆ្នាំ2019នេះ នៅពហុកីឡដ្ឋានស្តាតចាស់វាលបែកចាន ទីរួមខេត្តបាត់ដំបង។ ចំណែកក្រុម PCO FC ម្ចាស់ជើងឯកឆ្នាំចាស់បានត្រឹមតែលេខ4 ក្រោយពីចាញ់ក្រុម Fox Zone FC ជាលទ្ធផល1ទល់2 នៅវគ្គផ្តាច់ព្រ័ត្រដូចគ្នា។

សម្រាប់រង្វាន់ក្រុមជើងឯកប្រចាំមណ្ឌលខេត្តបាត់ដំបង គឺក្រុមស៊ាន ពិសិដ្ឋ ទទួលបានប្រាក់រង្វាន់ 15០០ដុល្លារ ក្រុម Tiger Night ជើងឯករងបានទៅលើក្រុម ប្រាក់រង្វាន់ 1០០០ដុល្លារ ក្រុមចំណាត់ថ្នាក់លេខ3បានទៅលើក្រុម Fox Zone FC “A” ប្រាក់រង្វាន់5០០ដុល្លារ ក្រុមចំណាត់ថ្នាក់លេខ4 បានទៅលើក្រុម PCO FC ប្រាក់រង្វាន់2០០ ដុល្លារ ។

ដោយឡែកសម្រាប់ខេត្តបាត់ដំបងដែលជាមណ្ឌលទី4នេះ គណៈកម្មាធិការរៀបចំការប្រកួតយកតែ9ក្រុម រួមមានក្រុម Norea Team ក្រុម Ochar FC ក្រុម Tiger Night ក្រុម PCO FC ក្រុម ខ្លាចាស់ “A” ក្រុម Fox Zone FC “A” ក្រុម ឌី ស៊ី ស៊ី ក្រុម យុវជនទួលតាឯក “B” និងក្រុមស៊ាន ពិសិដ្ឋ ដើម្បីទៅចូលរួមការប្រកួតវគ្គផ្តាច់ព្រ័ត្រទូទាំងប្រទេស នៅរាជធានីភ្នំពេញ ថ្ងៃទី16 និងទី17 មីនា 2019 ខាងមុខនេះ ជាពិសេសមានឱកាសជួបផ្ទាល់ជាមួយកំពូលតារាបាល់ទាត់អន្តរជាតិ គឺកីឡាករបាល់ទាត់ Ronaldinho។

សម្រាប់ការប្រកួតជម្រុះក្នុងកម្មវិធី Tiger street Football Festival 2019 នឹងធ្វើឡើងនៅមណ្ឌលបន្ទាប់ទៀតគឺក្រុងប៉ោយប៉ែត នៅថ្ងៃទី2-3 ខែកុម្ភៈ ឆ្នាំ2019 នៅបរិវេណផ្សាររាត្រី ជិតកាស៊ីណូផ្កាយ5 គណៈកម្មាធិការរៀបចំការប្រកួតយកតែ6ក្រុម ។

បន្ទាប់ពីការប្រកួតជ្រើសរើសជើងឯក Tiger street Football Festival 2019 ប្រចាំមណ្ឌលខេត្តបាត់ដំបងបានបញ្ចាប់មក យើងក៏មានកម្មវិធីប្រគំតន្ត្រីកាន់តែធំជាងមុនឆាកតន្ត្រីកាន់តែ ទំនើប និងមានក្លឹបទឹកកកថៃហ្គ័រគ្រីស្តាល់ ភ្លើងពណ៌ចម្រុះ នឹងមានការអញ្ជើញចូលរួមសម្តែងពី សំណាក់តារាល្បីប្រចាំ ព្រះរាជាណាចក្រកម្ពុជារួម លោក ព្រាប សុវត្ថិ កញ្ញា ឱក សុគន្ធកញ្ញា កញ្ញា សួស វីហ្សា លោក សូណូ លោក វង្ស តារារតនា Khmeng Khmer និងឌីជេ Maily។

ស្រាបៀរថៃហ្គ័រជាស្រាបៀរដែលមានគុណភាពខ្ពស់លំដាប់ថ្នាក់អន្តរជាតិមានដើមកំណើតតាំងពីឆ្នាំ1932នៅប្រទសសិង្ហបុរីនិងមានលក់នៅច្រើនជាង70ប្រទេសនៅទូទាំងពិភពលោក ហើយស្រាបៀរថៃហ្គ័រឈ្នះពានរង្វាន់លំដាប់ថ្នាក់ អន្តរជាតិច្រើនជាង40មេដាយផ្នែករសជាតិ និងគុណភាព។

សូមចូលទៅកាន់ទំព័រហ្វេសប៊ុកផ្លូវការ របស់ស្រាបៀរថៃហ្គ័រ៖ www.facebook.com/TigerBeerKH

ពិសាដោយការទទួលខុសត្រូវ៕

January 29, 2019

តើធ្វើយ៉ាងណាឱ្យ “មនុស្សដែលយើងស្រឡាញ់នៅជាមួយយើងរហូតតទៅ?”

តើធ្វើយ៉ាងណាឱ្យ “មនុស្សដែលយើងស្រឡាញ់នៅជាមួយយើងរហូតតទៅ?” អាចរកចម្លើយបានពីរឿងខ្លីខាងក្រោមនេះ…

“នៅជាមួយគ្នារហូតតទៅ” នៅពេលនិយាយអំពីរឿងនេះហើយ យើងត្រូវបែរមកគិតថា តើនឹងត្រូវធ្វើយ៉ាងណាទើបអាចរស់នៅជាមួយមនុស្សដែលយើងស្រឡាញ់បានរហូតតទៅ?

នៅក្នុងរឿងខ្លីនេះ យើងឃើញថា សង្ឃតូចកំពុងតែពោលពាក្យលាសិស្សច្បងដែលឈ្មោះ សៀវស៊ូ បន្ទាប់ពីនោះក៏ងាកមុខមកសួរព្រះគ្រូថា “ព្រះគ្រូគិតថា តើអាត្មា និងសិស្សច្បង សៀវស៊ូ នឹងបាននៅលេងជាមួយគ្នារហូតតទៅឬទេ?”

ព្រះគ្រូសម្លឹងមើលសង្ឃតូច ហើយឆ្លើយថា “ជីវិត គឺជាអ្វីដែលមិនទៀងទាត់ គ្មានអ្វីដែលពិតប្រាកដនោះទេ…3ឆ្នាំ 5ឆ្នាំក៏ត្រូវតែព្យាយាមដំណើរទៅមុខឱ្យបានល្អបំផុត តែពេលនិយាយដល់ពាក្យថា “រហូតតទៅ” វិញនោះ មើលទៅវាដូចជាបង្ខំចិត្តបន្តិចហើយណា៎…”

គ្រាន់តែសង្ឃតូចបានឮដូច្នោះភ្លាម ក៏ចាប់ផ្ដើមធ្វើមុខស្រងូត ព្រមទាំងឆ្លើយទៅវិញថា “ចុះបើអាត្មាចង់បង្ខំចិត្ត?”

នៅពេលព្រះគ្រូមើលឃើញថា សង្ឃតូចភ្នែកឡើងក្រហម រកកលចង់ស្រក់ទឹកភ្នែកហើយនោះ ក៏ឆ្លើយទៅសង្ឃតូចវិញក្នុងទំនងមិនចង់បំបាក់ផ្លូវចិត្តថា “អ៊ីចឹងត្រូវធ្វើល្អជាមួយគេម្នាក់នោះឱ្យច្រើនឡើង ឱ្យច្រើនឡើងទៀត ធ្វើបានបែបហ្នឹងហើយ អាចនឹងធ្វើឱ្យរស់នៅក្បែរគ្នារហូតតទៅបាន…”

សង្ឃតូចឆ្លើយឡើងភ្លាមថា “កូណា!”

ពាក្យថា “រហូតតទៅ” នេះ ការពិតទៅ វានឹងវែងឆ្ងាយប៉ុនណាទៅ? តែ មិនថានឹងវែងឆ្ងាយប៉ុនណាក៏ដោយ ក៏ត្រូវតែធ្វើល្អជាមួយគេឱ្យបានច្រើនបំផុតតាមដែលអាចធ្វើបានដែរ មិនថាអ៊ីចឹងហ្អេ៎?

នៅក្នុងជីវិតពិត ក៏ដូចគ្នាដែរ ការធ្វើល្អជាមួយអ្នកដទៃ គឺជារឿងដែលល្អ ទោះជាគេម្នាក់នោះបានដឹង ឬមិនបានដឹងក៏ដោយ តែថ្ងៃណាមួយ រឿងល្អៗក៏នឹងឆ្លុះបញ្ចាំងមកដល់ខ្លួនយើងវិញបែបមិនដឹងខ្លួនមិនខាន…គិតថា ជាការធ្វើល្អដើម្បីសេចក្ដីសុខរបស់ខ្លួនឯងទៅចុះ!!។

ទិទីតំតាតូ

January 28, 2019

Author: វល័ក្ខ