វល័ក្ខ - La Reine Media

ការទូទាត់តាម E-commerce មានទំហំទឹកប្រាក់ជាង 450ពាន់លានរៀលនៅឆ្នាំ 2017

ថ្វីដ្បិតតែកម្ពុជាកំពុងស្ថិតនៅលើផ្លូវឆ្ពោះទៅរកការកសាងច្បាប់ E-commerce ដែលផ្នែកឯកជនកំពុងទន្ទឹងរង់ចាំជាយូរមកហើយមែន ប៉ុន្តែការទូទាត់សាច់ប្រាក់ និងអាជីវកម្ម E-commerce ហាក់មាននិន្នាការពេញនិយមខ្លាំងចំពោះទីផ្សារកម្ពុជា។ នេះបើយោងតាមរបាយការណ៍របស់ធនាគារជាតិនៃកម្ពុជា។

របាយការណ៍ធនាគារជាតិនៃកម្ពុជាបានបង្ហាញឱ្យឃើញថា ចំនួនប្រតិបត្តិការជា E-commerce មានចំនួន 819,539ដង ដែលមានទឹកប្រាក់ប្រតិបត្តិការចំនួន 450, 996លានរៀល។ ប្រតិបត្តិករហិរញ្ញវត្ថុរំពឹងថា E-commerce នឹងបន្តរីកចម្រើនបន្ថែមទៀត ខណៈពេលដែលស្ថានភាពរបស់ប្រជាជនកាន់តែរវល់ខ្លាំង។

បណ្ឌិត សូ ផនណារី អនុប្រធានប្រតិបតិ្ត និងជាប្រធានក្រុមមន្ត្រីប្រតិបតិ្តការនៅធនាគារអេស៊ីលីដាបានឱ្យដឹងថា E-commerce មានការកើនឡើងនាពេលបច្ចុប្បន្ននេះ ដោយអ្នកទិញ និងអ្នកលក់មិនចាំបាច់ជួបមុខគ្នានោះទេ។ អ្នកទិញ អាចពិនិត្យមើលប្រភេទទំនិញដែលខ្លួនចង់បាន រួចឆែកមើលតម្លៃរបស់ផលិតផល។ បើក្នុងករណីគេព្រមព្រៀងគ្នា ទំនិញទាំងនោះនឹងត្រូវបញ្ជូនទៅដល់ផ្ទះ ហើយការបង់ប្រាក់នឹងត្រូវទូទាត់តាម VISA card, Master Card, ATM cardដោយឆូតជាមួយម៉ាស៊ីនឆូតកាតជាដើម ឬក៏ភ្ជាប់ mobile banking ដោយគ្រាន់តែប្រើជាមួយលេខទូរស័ព្ទ ឬតាម Internet Banking ដោយចំណាយតាមចំនួនតម្លៃដែលបានព្រមព្រៀងគ្នាប៉ុណ្ណោះ។

បណ្ឌិត សូ ផនណារី បញ្ជាក់ថា៖ “ខ្ញុំយល់ថានៅពេលស្ថានភាពកាន់តែរវល់ខ្លាំង E-commerce ក៏កាន់តែមានប្រជាប្រិយខ្លាំងដែរ ដោយសារវាមានភាពងាយស្រួលក្នុងការទូទាត់សាច់ប្រាក់ និងទទួលបានទំនិញ។ ក្រសួងពាណិជ្ជកម្មបានឱ្យដឹងថា ខ្លួនកំពុងព្យាយាមស្នើសុំជប៉ុនឱ្យជួយឧបត្ថម្ភដល់ការរៀបចំសេចក្តីព្រាងច្បាប់ស្តីពីការធ្វើពាណិជ្ជកម្មតាមប្រព័ន្ធអេឡិចត្រូនិក (E-Commerce) ស្របពេលដែលដំណើរការអាជីវកម្មនេះកំពុងមាននិន្នាការរីកចម្រើន។

របាយការណ៍របស់ធនាគារជាតិនៃកម្ពុជាបានបង្ហាញថា គ្រឹះស្ថានធនាគារនិងហិរញ្ញវត្ថុបានចេញផ្សាយប័ណ្ណឥណពន្ធ ប័ណ្ណឥណទាន ប័ណ្ណ ATM ប័ណ្ណPrepaid និងបានដាក់ឱ្យប្រើប្រាស់ម៉ាស៊ីន ATM ម៉ាស៊ីន POS ម៉ាស៊ីន Kiosk ព្រមទាំងសេវាទូទាត់តាមធនាគារចល័ត និងសេវាធនាគារតាមអ៊ីនធើណិត ដើម្បីសម្រួលដល់អតិថិជនក្នុងការប្រើប្រាស់សេវាទូទាត់សងប្រាក់ឱ្យកាន់តែមានប្រសិទ្ធភាព។ គិតត្រឹមដំណាច់ឆ្នាំ2017 មានធនាគារនិងគ្រឹះស្ថានហិរញ្ញវត្ថុចំនួន 15បានដាក់ឱ្យដំណើរការ Mobile Banking និង Internet Banking នេះ។

ក្រសួងប្រៃសណីយ៍ និងទូរគមនាគមន៍ បានផ្សព្វផ្សាយរបាយការណ៍របស់ខ្លួនប្រចាំឆ្នាំ2017 ដោយបង្ហាញឱ្យឃើញថា អ្នកប្រើប្រាស់ទូរស័ព្ទចល័តនៅក្នុងប្រទេសកម្ពុជាបានកើនខ្ពស់ជាងចំនួនប្រជាជនសរុបទៅទៀត គឺមានប្រមាណ 19លាននាក់ ស្មើនឹងអត្រា 125ភាគរយធៀបនឹងចំនួនប្រជាជនកម្ពុជាសរុប។ ក្នុងចំណោមអ្នកប្រើប្រាស់ទូរស័ព្ទចល័តនេះ មានអ្នកភ្ជាប់សេវាអ៊ីនធើណិតតាមទូរស័ព្ទដៃចំនួនច្រើនរហូតដល់ទៅ 8.5លានគណនី។

តាមរយៈតួលេខនេះ វាបានបង្ហាញឱ្យឃើញថា អ្នកប្រើទូរស័ព្ទស្មាតហ្វួនមានចំនួនកាន់តែកើនឡើងដែលជានិន្នាការមួយបញ្ជាក់ឱ្យឃើញពីការរីកចម្រើននៃបច្ចេកវិទ្យានៅកម្ពុជា។ ក្រសួងប្រៃសណីយ៍ និងទូរគមនាគមន៍បានបង្ហាញថា ការរីកចម្រើននេះបណ្តាលមកពីការរីកចម្រើននៃបច្ចេកវិទ្យាជំនាន់ទី (4G/LTE)ដែលត្រូវបានឱ្យដាក់ដំណើរការនៅរាជធានី-ខេត្តទាំង25 គ្របដណ្តប់លើផ្ទៃដីស្ទើរតែ 60ភាគរយនៃប្រទេសកម្ពុជាទាំងមូល ក៏ដូចជាការកើនឡើងនៃក្រុមហ៊ុនរោងចក្រសហគ្រាស និងការប្រកួតប្រជែងតម្លៃសេវាប្រើប្រាស់មានតម្លៃសមរម្យផងដែរ៕

February 16, 2018

ចក្រភពអង់គ្លេសចាប់អារម្មណ៍លើការបណ្តុះបណ្តាលបច្ចេកទេសនៅកម្ពុជា

នាប៉ុន្មានឆ្នាំចុងក្រោយនេះ ពិភពលោកមានការវិវឌ្ឍកាន់តែខ្លាំង ហើយវិស័យបច្ចេកវិទ្យា និងបច្ចេកទេសបានក្លាយជាផ្នែកដ៏សំខាន់មួយដែលមិនអាចខ្វះបានក្នុងការអភិវឌ្ឍសង្គម។ ប្រទេសណាដែលមានធនធានមនុស្សច្រើនលើជំនាញបច្ចេកទេស ប្រទេសនោះនឹងសម្បូរទៅដោយចង្វាក់ផលិតកម្ម និងការវិនិយោគ។

នៅពាក់កណ្តាលខែកុម្ភៈនេះ លោក Edward Vaizey បេសកជនពិសេសទទួលបន្ទុកផ្នែកពាណិជ្ជកម្មរបស់នាយករដ្ឋមន្ត្រីអង់គ្លេសប្រចាំនៅប្រទេសកម្ពុជា ឡាវ និងវៀតណាម បានលើកឡើងថា អង់គ្លេសនឹងជួយជ្រោមជ្រែងដល់កម្ពុជាក្នុងកិច្ចសហការរៀបចំកម្មវិធីបណ្តុះបណ្តាលបច្ចេកទេស និងវិជ្ជាជីវៈ ក្នុងគោលបំណងជំរុញឱ្យវិស័យដែលមានសក្តានុពលមួយនេះមានគុណភាពកាន់តែខ្ពស់។ នាពេលបច្ចុប្បន្ននេះ កម្ពុជានៅមានកង្វះខាតមួយចំនួនពាក់ព័ន្ធនឹងការបណ្តុះបណ្តាលធនធានមនុស្សផ្នែកបច្ចេកវិទ្យា ហេតុនេះអង់គ្លេសនឹងចូលរួមរៀបចំកម្មវិធីសិក្សា ហើយរួមចំណែកក្នុងការធ្វើកំណែទម្រង់កម្មវិធីសិក្សា និងអភិវឌ្ឍផ្នែកនេះនៅជំហានបន្តបន្ទាប់ទៀត។

រដ្ឋលេខាធិការក្រសួងការងារ និងបណ្តុះបណ្តាលវិជ្ជាជីវៈ ឯកឧត្តម ពេជ សោភ័ន បានលើកឡើងថា កិច្ចសហការបង្កើតគម្រោងរួមគ្នានេះមានសារៈសំខាន់ខ្លាំងណាស់សម្រាប់អភិវឌ្ឍវិស័យអប់រំផ្នែកបច្ចេកទេស និងវិជ្ជាជីវៈ។ តាមរយៈកម្មវិធីនេះ យើងនឹងធ្វើឱ្យការសិក្សាទាំងអស់មានការឯកភាពគ្នា ហើយឆ្លើយតបទៅនឹងទីផ្សារការងារដែលកំពុងមានសម្ទុះខ្លាំងផ្នែកបច្ចេកទេសនេះ។

ឯកឧត្តមរដ្ឋលេខាធិការ បានលើកឡើងថា ដើម្បីឈានទៅដល់គោលដៅក្លាយជាប្រទេសមានចំណូលមធ្យមកម្រិតខ្ពស់នៅឆ្នាំ2030 កម្ពុជាត្រូវការកម្មវិធីបណ្តុះបណ្តាលបច្ចេកទេសវិជ្ជាជីវៈ ប្រកបដោយប្រសិទ្ធភាព និងវិជ្ជាជីវៈច្បាស់លាស់ដើម្បីយកមកអភិវឌ្ឍធនធានមនុស្ស៕

February 15, 2018

ដើមច័ន្ទន៍ក្រឹស្នាខ្មែរចាប់ផ្តើមមានទីផ្សារក្រៅប្រទេសឡើងវិញហើយ

ដើមច័ន្ទន៍ក្រឹស្នាត្រូវបានដាំដុះតាំងពីសម័យបុរាណកាលមក ប៉ុន្តែត្រូវបានគេបោះបង់ចោល អស់រយៈពេលជាច្រើនឆ្នាំកន្លងមកហើយដោយ-សារកង្វះទីផ្សារនាំចេញ។ ដោយមើលឃើញពីគុណប្រយោជន៍ដើមច័ន្ទន៍ក្រឹស្នានេះ ក្រុមហ៊ុនថៃមួយបានបោះទុនវិនិយោគក្នុងទឹកប្រាក់100លានដុល្លារ ដើម្បីកែច្នៃដើមឈើក្រអូបខាងលើសម្រាប់នាំចេញទៅទីផ្សារនានានៅលើពិភពលោក។

លោកស្រី នួន ប៊ុនណា ម្ចាស់ចម្ការដើមច័ន្ទន៍ក្រឹស្នាកម្ពុជាមានប្រសាសន៍ថា ក្នុងរយៈពេល10ឆ្នាំកន្លងមកនេះ កម្ពុជាបានដាំដុះដើមច័ន្ទន៍ក្រឹស្នាក្រអូបជាច្រើនលានដើម ប៉ុន្តែពុំមានបច្ចេកទេសកែច្នៃជាផលិតផលផ្សេងៗសម្រាប់នាំចេញទៅទីផ្សារក្រៅប្រទេសនោះទេដោយសារកង្វះធនធានមនុស្សសម្រាប់ការងារកែច្នៃដើមឈើក្រអូបនេះ និងដោយសារការលូតលាស់របស់ដើមច័ន្ទន៍ក្រឹស្នាត្រូវប្រើពេលយូរ និងមិនសូវមានគុណភាព ហើយលទ្ធផលទទួលបានមានកម្រិតទាបដែលមិនអាចផ្តល់និរន្តរភាពក្នុងការផ្គត់ផ្គង់ទីផ្សារផងនោះបានធ្វើឱ្យអ្នកដាំមួយចំនួនបាក់ទឹកចិត្ត។

ប៉ុន្តែដោយសារអត្ថប្រយោជន៍ដ៏ច្រើនសន្ធឹកសន្ធាប់របស់វា លោកស្រីបានសហការជាមួយក្រុមហ៊ុនថៃឈ្មោះថា First Capital Global Co Ltd ដើម្បីកែច្នៃនាំចេញទៅកាន់ប្រទេសថៃ និងលក់បន្តទៅប្រទេសអ៊ឺរ៉ុប និងអាស៊ី ជាពិសេសប្រទេសចិន។ លោកស្រីជឿជាក់ថា គម្រោងនេះពិតជាមានសារៈសំខាន់ណាស់សម្រាប់ឧស្សាហកម្មដើមច័ន្ទន៍ក្រឹស្នានៅកម្ពុជាដើម្បីបង្កើនគុណភាពឱ្យស្របតាមបទដ្ឋានស្តង់ដារអន្តរជាតិ ហើយគម្រោងនេះនឹងជួយបង្កើនប្រាក់ចំណូលដល់កសិករដែលដាំដើមច័ន្ទន៍ក្រឹស្នាក៏ដូចជារួមចំណែកលើកកម្ពស់សេដ្ឋកិច្ចជាតិកម្ពុជាដែរ។ “ខ្ញុំសង្ឃឹមថា តាមរយៈគម្រោងបង្កើនគុណភាពនេះ នឹងជួយឱ្យប្រទេសកម្ពុជាក្លាយជាប្រទេសនាំចេញដើមច័ន្ទន៍ក្រឹស្នាមួយក្នុងចំណោមប្រទេសដទៃទៀត នាថ្ងៃអនាគត និងជួយបង្កើតម៉ាកយីហោរបស់កម្ពុជាផងដែរ។

ចំណែកលោកស្រី កែវ សុគន្ធា នាយិកាក្រុមហ៊ុនធូបច័ន្ទន៍ក្រឹស្នាខ្មែរមានប្រសាសន៍ថា ក្រុមហ៊ុនលោកស្រី និងក្រុមហ៊ុន First Capital Group Co Ltd នឹងសហការបង្កើតគម្រោងរួមគ្នាមួយបង្កើតរោងចក្រដែលមានបច្ចេកវិទ្យាទំនើបដើម្បីចម្រាញ់ប្រេងច័ន្ទន៍ក្រឹស្នាចំនួន 1,000,000ដើម កែច្នៃទៅជាផលិតផលផ្សេងៗសម្រាប់នាំចេញទៅកាន់ទីផ្សារក្នុងតំបន់ និងទីផ្សារអន្តរជាតិ។

ពាក់ព័ន្ធនឹងករណីនេះលោក សៀន ហ្គុ ប្រធានក្រុមហ៊ុន First Capital Global Co Ltd មានប្រសាសន៍ថា First Capital Global គឺជាក្រុមហ៊ុនហិរញ្ញវត្ថុអន្តរជាតិ ដែលមានទីស្នាក់ការកណ្តាលស្ថិតនៅប្រទេសថៃ ហើយត្រូវបានគេស្គាល់ជាទូទៅនៅក្នុងតំបន់អាស៊ាន។ លោកថា ក្នុងដំណាក់កាលទី1នេះ ដើមច័ន្ទន៍ក្រឹស្នាទាំងអស់នឹងត្រូវប្រើប្រាស់ជាផលិតផលប្រេងច័ន្ទន៍ក្រឹស្នាកម្ពុជា (Cambodia Agarwood oil) មានគុណភាពខ្ពស់ដែលនឹងធ្វើឱ្យកម្ពុជាក្លាយជាប្រទេសដែលមានឈ្មោះបោះសំឡេងក្នុងការផលិតប្រេងច័ន្ទន៍ក្រឹស្នានៅលើទីផ្សារអន្តរជាតិ តាមរយៈការកែច្នៃដោយប្រើបច្ចេកវិទ្យាដែលមិនប៉ះពាល់ទៅដល់បរិស្ថាន។

លោកថា រយៈពេលប៉ុន្មានឆ្នាំកន្លងមកនេះ ក្រុមហ៊ុនបានយកចិត្តទុកដាក់លើការស្រាវជ្រាវបច្ចេកវិទ្យា និងឧបករណ៍សម្រាប់ប្រើប្រាស់ដើម្បីជាជំនួយសុខភាព។ ក្រុមហ៊ុនមានទស្សនវិស័យរួមគ្នាដើម្បីជួយដល់កសិករ និងផ្សព្វផ្សាយពីដើមច័ន្ទន៍ក្រឹស្នាកម្ពុជាទៅកាន់ទីផ្សារពិភពលោក “ខ្ញុំសង្ឃឹមថា ក្រុមកសិករកម្ពុជានឹងមានអនាគតភ្លឺស្វាង និងមានឱកាសល្អច្រើនទៀតនាឆ្នាំខាងមុខ។

ក្នុងឱកាសអញ្ជើញជាអធិបតីក្នុងពិធីផ្សព្វផ្សាយការបើកចំហទីផ្សារច័ន្ទន៍ក្រឹស្នា និងបង្កើតរោងចក្រចម្រាញ់ប្រេងច័ន្ទន៍ក្រឹស្នាតាមបច្ចេកវិទ្យាទំនើប និងពិធីចុះហត្ថលេខាលើកិច្ចព្រមព្រៀងពាណិជ្ជកម្ម និងគ្រប់គ្រងច័ន្ទន៍ក្រឹស្នារវាងក្រុមហ៊ុនកម្ពុជា-ថៃ កាលពីសប្តាហ៍មុន ឯកឧត្តម ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្ម បានចាត់ទុកព្រឹត្តិការណ៍នេះថា ជាវឌ្ឍនភាពថ្មីសម្រាប់វិស័យពាណិជ្ជកម្ម និងជាការបង្ហាញអំពីទំនុកចិត្តរបស់វិនិយោគិន មកលើការដឹកនាំរបស់រាជរដ្ឋាភិបាលកម្ពុជា។ ឯកឧត្តមរដ្ឋមន្ត្រីបានបន្តទៀតថា រោងចក្រចម្រាញ់ប្រេងច័ន្ទន៍ក្រឹស្នាដំបូងនេះនឹងជំរុញទីផ្សារសម្រាប់ផលិតផលខ្លឹមច័ន្ទន៍ក្រឹស្នានៅកម្ពុជា និងបង្កើតឱកាសការងារសម្រាប់ប្រជាជនសំដៅចូលរួមកាត់បន្ថយភាពក្រីក្រ និងជំរុញកំណើនសេដ្ឋកិច្ចជាតិជាមួយរាជរដ្ឋាភិបាល។ ព្រឹត្តិការណ៍នេះក៏នឹងរួមចំណែកអភិវឌ្ឍសហគ្រាសធុនតូច និងមធ្យមនៅកម្ពុជា ព្រមទាំងជួយជំរុញទំហំពាណិជ្ជកម្មទ្វេភាគីរវាងកម្ពុជា និងថៃឡង់ដ៏ ឱ្យកាន់តែមានសម្ទុះខ្លាំងក្លាថែមទៀតទាំងបច្ចុប្បន្ន និងអនាគត។

ឯកឧត្ដមបានមានប្រសាសន៍ថា “ពាណិជ្ជកម្មច័ន្ទន៍ក្រឹស្នាមាននៅកម្ពុជាតាំងពីសម័យបុរាណ ហើយមានតម្រូវការខ្ពស់សម្រាប់ទីផ្សារនៃប្រទេសអារ៉ាប់។ បច្ចុប្បន្នកម្ពុជាមានដើមច័ន្ទន៍ក្រឹស្នាប្រមាណជាង 1លានដើម ហើយផលិតផលដែលចម្រាញ់ចេញពីរោងចក្រថ្មីនេះនឹងមានលក្ខណៈស្តង់ដារអន្តរជាតិអាចឆ្លើយតបតម្រូវការទីផ្សារក្នុងស្រុក និងពិភពលោកបាន។

គួរបញ្ជាក់ថា ក្រៅពីធ្វើជាធូបហើយ ដើមច័ន្ទន៍ក្រឹស្នាត្រូវបានគេចម្រាញ់ចេញជាប្រេងច្នៃ ជាផលិតផលផ្សេងៗទៀត ដូចជាកែច្នៃធ្វើជាទឹកអប់ ច្នៃធ្វើសាប៊ូក្រអូបសម្រាប់ដុសខ្លួន ធ្វើជាតែឆុងមានក្លិនឈ្ងុយ កែច្នៃជាប្រេងសម្រាប់ម៉ាស្សា ប្រើប្រាស់នៅក្នុងកន្លែងស្ទីមសោណា ជំនួយដល់ការដកដង្ហើម និងប្រើប្រាស់ជាវត្ថុធាតុដើមសម្រាប់បង្កើតបានជាផលិតផលជាច្រើនមុខផ្សេងទៀត៕

February 15, 2018

ក្លិបទឹកកករបស់ Tiger Crystal អង្រួនបេះដូងអ្នកសៀមរាបត្រជាក់ពេញបេះដូង

ខេត្តសៀមរាប៖ ក្រៅពីកម្មវិធីប្រគំតន្ត្រីយក្សរបស់ស្រាបៀរថៃហ្គ័រ Tiger Street Football Festival 2018 បានប្រព្រឹត្តធ្វើឡើងយ៉ាងគគ្រឹកគគ្រេងទាំងពីរយប់កាលពីថ្ងៃទី ១០ និង ១១ ខែកុម្ភៈ ឆ្នាំ ២០១៨ ក្នុងខេត្តសៀមរាប មានការរៀបចំក្លិបទឹកកកដ៏ស្រស់ស្អាត ដែលមានសីតុណ្ហភាពត្រជាក់ខ្លាំងដកសូនអង្សាសេ ជាដែលទស្សនីយភាពប្លែកចម្លែងអារម្មណ៍ ដែលបានទាក់ទាញភ្ញៀវក្នុងស្រុក និងក្រៅស្រុកជាច្រើនចូលទស្សនាក្លិបទឹកកកដ៏ត្រជាក់អស្ចារ្យនេះ ជាពិសេសបានក្រេបរសជាតិនៃស្រាបៀរ Tiger Crystal ដ៏ត្រជាក់ពេញបេះដូង ខណៈពេលកំពុងតែស្តាប់តន្ត្រី និងបទចម្រៀងពិរោះៗដែលមានការចូលរួមសម្តែងពីឌីជេល្បីៗ និងក្រុមតារាចម្រៀង Original Song ។

ចំពោះសកម្មភាពផ្សេងៗនៃព្រឹត្តិការណ៍ Tiger Street Football Festival ២០១៨ នៅខេត្តសៀមរាប សូមចូលទៅកាន់ទំព័រហ្វេសប៊ុកផ្លូវការរបស់ស្រាបៀរថៃហ្គ័រ៖ www.facebook.com/TigerBeerKH

#TSFF2018
សូមពិសាដោយការទទួលខុសត្រូវ

February 15, 2018

ទទួលទានភេសជ្ជៈ ក្រូចឆ្មារ និងទឹកឃ្មុំក្តៅឧណ្ឌៗរាល់ព្រឹក ល្អចំពោះសុខភាព

ការយកចិត្តទុកដាក់ចំពោះសុខភាពគឺជារឿងសំខាន់ មិនថាអ្នកស្ថិតនៅក្នុងវ័យណានោះទេ។ ដោយឡែកទស្សនាវដ្តី ឡារ៉ែន ធ្លាប់បានជម្រាបជូនពីអត្ថប្រយោជន៍របស់ផ្លែក្រូចឆ្មារ និងទឹកឃ្មុំដែលមានគុណប្រយោជន៍ចំពោះសុខភាពស្បែក សម្រស់ និងសារពាង្គកាយជាច្រើនអត្ថបទរួចមកហើយ នៅពេលនេះសូមងាកមកយល់ដឹងពីភេសជ្ជៈក្រូចឆ្មារ និងទឹកឃ្មុំល្អចំពោះសុខភាពវិញម្តង។

ឡារ៉ែន សូមណែនាំអំពីការទទួលទានភេសជ្ជៈ ក្រូចឆ្មារ និងទឹកឃ្មុំក្តៅឧណ្ហៗរាល់ព្រឹក ដែលធ្វើឱ្យសុខភាពរបស់អ្នកមានភាពល្អប្រសើរឡើង និងមិនងាយមានជំងឺឱកាសនិយមកើតឡើងលើរូបអ្នកឡើយ។

ការទទួលទានភេសជ្ជៈក្រូចឆ្មារ និងទឹកឃ្មុំក្តៅឧណ្ហៗរាល់ព្រឹក ជាទង្វើដែលហុចផលល្អដល់សុខភាពដូចជា៖

1/ ជួយដល់ប្រព័ន្ធរំលាយអាហារ
ក្រូចឆ្មារ និងទឹកឃ្មុំ អាចប្រមូលជាតិពុលចេញពីក្នុងក្រពះរបស់អ្នកបានយ៉ាងល្អ។ ប្រសិនបើអ្នកទទួលទានអាហារច្រើនហួសកម្រិតនៅពេលយប់ ឬទទួលទានសារជាតិខ្លាញ់ច្រើន នោះអ្នកគួរតែទទួលទានទឹកក្តៅឧណ្ហៗលាយជាមួយក្រូចឆ្មារ និងទឹកឃ្មុំ ព្រោះវាអាចជួយលាងសម្អាតក្រពះរបស់អ្នកបានយ៉ាងល្អ និងមិនប៉ះពាល់ដល់សុខភាពរបស់អ្នក។

2/ បន្សាបជាតិពុល និងបញ្ចុះទឹកនោម
ការពិសាទឹកក្តៅឧណ្ហៗជាមួយក្រូចឆ្មារ និងទឹកឃ្មុំ នៅពេលព្រឹកគឺជួយបន្សាបជាតិពុលចេញពីក្នុងខ្លួន ជាពិសេស វាបានដើរតួនាទីយ៉ាងសំខាន់ក្នុងការបង្កើនអត្រាទឹកនោម និងជួយសម្រួលដល់ទឹកនោមឱ្យមានសុខភាពល្អផងដែរ។

3/ ជួយឱ្យដកដង្ហើមបានស្រស់ថ្លា
ដូចអ្នកបានដឹងហើយថា ក្លិនមាត់វាតែងតែកើតមានឡើងនៅពេលក្រោកពីដំណេកពេលព្រឹក ប៉ុន្តែប្រសិនបើអ្នកទទួលទានទឹកក្តៅ លាយជាមួយក្រូចឆ្មារ និងទឹកឃ្មុំ វាជួយសម្រួលដល់ក្លិនមាត់របស់អ្នកធ្វើឱ្យខ្យល់ដង្ហើមមានភាពស្រស់ថ្លា។ បន្ថែមពីនេះទៅទៀត វាអាចសម្លាប់មេរោគក្នុងមាត់បានថែមទៀតផង។

4/ ជួយឱ្យស្បែកភ្លឺថ្លា
ដោយសារតែទឹកឃ្មុំ និងក្រូចឆ្មារ មានសារធាតុបំប៉នជាច្រើន ជួយឱ្យស្បែកភ្លឺថ្លាដូចបំណង ព្រោះវាបានទៅជម្រុះជាតិខ្លាញ់នៅក្នុងស្បែករបស់អ្នក។ ជាពិសេសទៀតនោះ វាជួយការពារការកើតមុនធំៗ និងធ្វើឱ្យស្បែករបស់អ្នកម៉ដ្ឋរលោង។

5/ សម្រកទម្ងន់
ចំពោះចំណុចនេះ មនុស្សមួយចំនួនធំតែងគិតថាការទទួលទានទឹកក្តៅឧណ្ហៗជាមួយក្រូចឆ្មារ និងទឹកឃ្មុំបែបនេះ អាចជួយស្រកទម្ងន់បាន ប៉ុន្តែមិនមានភស្តុតាងវិទ្យាសាស្ត្រណាមួយបានបញ្ជាក់នោះទេ។ ទន្ទឹមនឹងមិនមានភស្តុតាងវិទ្យាសាស្ត្របានបង្ហាញក៏ដោយ ក៏វាមិនបានធ្វើឱ្យមនុស្សទាំងអស់បញ្ឈប់នូវវិធីស្រកទម្ងន់បែបនេះឡើយ ពោលគឺពួកគេនៅតែនិយមទទួលទានភេសជ្ជៈប្រភេទនេះដដែរ ព្រោះពួកគេគិតថាវាអាចជួយសម្រកទម្ងន់បានយ៉ាងល្អពិតមែន។

6/ ជួយឱ្យប្រព័ន្ធភាពស៊ាំរឹងមាំ
អ្នកជំនាញធ្លាប់បានបកស្រាយថា ការទទួលទានទឹកក្តៅឧណ្ហៗជាមួយក្រូចឆ្មារ និងទឹកឃ្មុំ នៅពេលព្រឹកជួយឱ្យប្រព័ន្ធភាពស៊ាំក្នុងរាងកាយរឹងមាំ។ ចំពោះទឹកឃ្មុំ មានសារធាតុប្រឆាំងនឹងប្រតិកម្មអុកស៊ីតកម្ម ហើយក្រូចឆ្មារសម្បូរទៅដោយជាតិវីតាមីន C ដែលជួយប្រឆាំងអុកស៊ីតកម្ម ថែមទាំងធ្វើឱ្យរាងកាយរបស់អ្នកមានសភាពស្រឡូនស្អាតថែមទៀតផង៕

February 15, 2018

ប្រវត្តិនៃពិធីបុណ្យចូលឆ្នាំចិន

ជារៀងរាល់ឆ្នាំប្រជាពលរដ្ឋខ្មែរយើងដែលជាប់សែស្រឡាយជាកូនចិននៅកម្ពុជា តែងតែនាំគ្នាប្រារព្ធពិធីបុណ្យចូលឆ្នាំថ្មីតាមប្រពៃណីចិនមិនដែរខានឡើយ ប៉ុន្តែអ្នកខ្លះធ្វើទៅតាមទម្លាប់ដែលដូនតាកុងម៉ាធ្វើតៗគ្នា ដោយមិនសូវយល់ពីអត្ថន័យនៃបុណ្យចូលឆ្នាំចិននេះប៉ុន្មានឡើយ។

បុណ្យចូលឆ្នាំចិនឬហៅម្យ៉ាងទៀតថា «បុណ្យនានិទាឃរដូវ» គឺជាថ្ងៃឈប់សម្រាកដ៏សំខាន់បំផុតសម្រាប់ជនជាតិចិន។ មានប្រជាជនមួយចំនួន ជាពិសេសជនជាតិចិននៅក្រៅប្រទេស បានហៅពិធីបុណ្យនេះថា បុណ្យចូលឆ្នាំចន្ទគតិថ្មី។ តាមប្រពៃណី ពិធីបុណ្យនេះចាប់ផ្ដើមនៅថ្ងៃទី1 នៃខែទី1តាមចន្ទគតិ ក្នុងប្រតិទិនចិន ហើយបញ្ចប់ទៅវិញ នៅថ្ងៃទី15 ដែលគេហៅថ្ងៃនេះថា ពិធីបុណ្យបង្ហោះគោម។ ពេលល្ងាច នៅថ្ងៃបុណ្យចូលឆ្នាំចិនគេឱ្យឈ្មោះថា ជូស៊ី។ ពាក្យនេះមានន័យថា ពេលល្ងាចឆ្លងឆ្នាំ។

ប្រតិទិនចិនតាមចន្ទគតិ និងសុរិយគតិ គឺជាគោលមួយសម្រាប់កំណត់កាលបរិច្ឆេទនៃពិធីបុណ្យចូលឆ្នាំចិន។ ប្រតិទិននេះ ក៏ត្រូវបានប្រើនៅក្នុងប្រទេសដែលយល់ព្រមទទួល ឬក៏បានទទួលឥទ្ធិពលពីវប្បធម៌នៃជនជាតិហាន (ជាពិសេសប្រជាជនតៃវ៉ាន់, ជនជាតិកូរ៉េ, ជនជាតិជប៉ុន និងជនជាតិយួន)។

យោងទៅតាមរឿងនិទាន និងរឿងព្រេង ការចាប់ផ្ដើមនៃពិធីបុណ្យចូលឆ្នាំចិន បានផ្ដើមឡើងជាមួយការវាយប្រយុទ្ធប្រឆាំងជាមួយសត្វក្នុងទេវកថា ដែលមានឈ្មោះថា នៀន មានន័យថា “ឆ្នាំ” ជាភាសាចិន។ នៅថ្ងៃទី1 ក្នុងឆ្នាំថ្មី នៀន បានមកកាប់សម្លាប់ពួកបសុសត្វ សូម្បីតែអ្នកភូមិក៏ដោយ ជាពិសេសគឺពួកក្មេង។ ដើម្បីការពារខ្លួន ពួកអ្នកភូមិបានដាក់ចំណីអាហារនៅមុខផ្ទះរបស់ពួកគេជារៀងរាល់ដើមឆ្នាំ។ គេមានជំនឿថា បន្ទាប់ពី នៀន បានស៊ីចំណីអាហារ ដែលពួកគេដាក់ឱ្យរួចហើយ វានឹងមិនធ្វើបាប ឬកាប់សម្លាប់ប្រជាជនទៀតទេ។ គ្រាមួយ អ្នកភូមិបានឃើញ នៀន មានភាពភ័យខ្លាច ជាមួយនឹងក្មេងៗ ដែលស្លៀកពាក់ពណ៌ក្រហម រួចហើយអ្នកភូមិក៏នាំគ្នាយល់ថា នៀន ខ្លាចពណ៌ក្រហម។ ហេតុនេះហើយ នៅពេលដែលឆ្នាំថ្មីមកដល់ អ្នកភូមិនាំគ្នាបំពាក់គោមពណ៌ក្រហម និងបិតក្រដាសពណ៌ក្រហមនៅតាមទ្វារ និងបង្អួចផ្ទះរៀងៗខ្លួន។

អ្នកភូមិក៏បានប្រើផាវ ដើម្បីបណ្ដេញ នៀន ឱ្យទៅឆ្ងាយពីភូមិរបស់ពួកគេផងដែរ។ បន្ទាប់ពីពេលនោះមក នៀន ពុំបានមកក្នុងភូមិម្ដងទៀតឡើយ។នៅចុងក្រោយ ហុងជុនឡាវស៊ូ ជាព្រះសង្ឃសាសនាតាវបុរាណម្នាក់ បានចាប់សត្វ នៀន នោះ។ សត្វ នៀន ក៏ខ្លាចទៅជាយានជំនិះ របស់ព្រះសង្ឃហុងជុនឡាវស៊ូ ទៅ។

អំពីជំនឿផ្សេងៗរបស់បងប្អូនជនជាតិចិនក្នុងថ្ងៃចូលឆ្នាំចិន

ក្នុងពីធីបុណ្យចូលឆ្នាំចិន ឬក៏ពីធីផ្សេងៗជាជំនឿរបស់បងប្អូនជាប់សែស្រឡាយចិន មានការគោរពប្រណិប័តនូវជំនឿផ្សេងៗជាច្រើនក្នុងនោះមានការបិទយ័ន្តនៅមុខផ្ទះ ក្នុងផ្ទះ មានការដុតផាវ មានការលោតម៉ុងសាយ មានការសែនព្រេន មានការដុតក្រដាស ដុតធូបនៅព្រះវិហារ ការនាំយកអំពៅខ្មៅ និងស្លឹកមៀន និងការតាំងផ្កាអង្គាសីលក្នុងផ្ទះជាដើម ។ល។

ជំនឿ និងតំណមក្នុងថ្ងៃបុណ្យចូលឆ្នាំចិន

តាមប្រវត្តិសាស្ត្រចិន មានជំនឿលើការគោរពបុណ្យចូលឆ្នាំថ្មីនេះយ៉ាងខ្លាំង។ គេមានតំណមជាច្រើននៅក្នុងអំឡុងចូលឆ្នាំ3ថ្ងៃនេះ ជាពិសេសថ្ងៃទី1 ឫហៅថា ថ្ងៃឈឺអុិច។ ក្នុងរយ:ពេល3ថ្ងៃនេះ គេចាត់ទុកជាថ្ងៃពិសេសបំផុតដែលមិនត្រូវធ្វើអ្វីល្អក់កកនាំឱ្យប៉ះពាល់ដល់មង្គល ឬដល់ឆ្នាំថ្មីឡើយ។ គេត្រូវធ្វើឱ្យសប្បាយនាំសិរីសួស្តីចូលខ្លួន និងក្រុមគ្រួសារ។

តំណមយំ

ក្នុងអំឡុងបុណ្យចូលឆ្នាំថ្មីជនជាតិចិនមានតំណមមិនឱ្យកើតរឿងយំសោកសៅនោះទេ ពីព្រោះវាអាចនាំមកនូវរឿងអពមង្គលដល់ឆ្នាំថ្មីរហូតពេញមួយឆ្នាំ។ តំណមនេះសូម្បីតែកូនចៅដែលរឹងរូសក៏ឪពុកម្តាយ ឬមនុស្សចាស់មិនវាយប្រៀនប្រដៅដែរ គឺអត់ទ្រាំរហូតចប់បុណ្យចូលឆ្នាំថ្មីសិន។

តែងខ្លួនស្អាតៗតែមិនគួរកក់សក់

ការស្លៀកពាក់ខោអាវថ្មី និងតែងខ្លួនស្អាតបាទជារឿងសំខាន់បំផុតសម្រាប់មនុស្សគ្រប់រូបក្នុងថ្ងៃទទួលឆ្នាំថ្មី។ ទោះបីយ៉ាងណាក្នុងអំឡុងពេលនេះ គេមានតំណមមួយគឺហាមកក់សក់ ប៉ុន្តែកន្លែងដទៃៗទៀតអាចធ្វើការសម្អាតបានធម្មតា ពីព្រោះថា ការកក់សក់គេមានជំនឿថាហាក់បីដូចជាការលាងជម្រះជោគសំណាងចេញពីខ្លួនដូច្នោះដែរ។ ចំពោះសម្លៀកបំពាក់ពណ៌ក្រហមជាទីពេញនិយមបំផុត ដែលគេប្រើសម្រាប់ស្លៀកពាក់ក្នុងអំឡុងចូលឆ្នាំចិន។ ពណ៌នេះគេចាត់ទុកជាពណ៌ងូវហេងនាំជោគលាភ និងសិរីសួស្តី។ សម្រាប់ក្មេងៗ ឬមនុស្សនៅលីវ គេតែងឱ្យអាំងប៉ាវ ដែលជាកញ្ចប់លុយពណ៌ក្រហម ព្រមទាំងក្រដាសប្រាក់ថ្មីៗ ដើម្បីទទួលជោគលាភសម្រាប់ឆ្នាំថ្មីផងដែរ។

ហាមចូលបន្ទប់របស់អ្នកដទៃ

ការចូលទៅរកនរណាម្នាក់ក្នុងបន្ទប់ដេករបស់គេក្នុងថ្ងែបុណ្យចូលឆ្នាំចិន ចាត់ទុកថាជាជោគសំណាងអាក្រក់។ ដូច្នេះទោះបីអ្នកមានរោគជំងឺដែលត្រូវចូលទៅសួរសុខទុក្ខ ក៏ចាំបាច់ត្រូវចេញមកអង្គុយក្នុងបន្ទប់ទទួលភ្ញៀវដែរ។ មិនគួរប្រើកាំបិត ឬកន្ត្រៃក្នុងថ្ងៃបុណ្យចូលឆ្នាំថ្មីនោះទេ ព្រោះគេមានជំនឿថា នេះជាការកាត់ជោគលាភ ហើយបើមានមុតដៃជើងផង គឺកាន់តែជួបរឿងអាក្រក់ថែមទៀត។

មិនឱ្យបែកចាន ឬកែវ

ក្នុងថ្ងៃនេះគេមានការប្រយ័ត្នប្រយែងចំពោះការកាន់ចាន ឬកែវខ្លាំងណាស់ ព្រោះបើមានបង្កឱ្យប្រេះស្រាំ ឬធ្លាក់ បែកជាការនាំឱ្យបាត់បង់ជោគលាភ ហើយជីវិតក្នុងឆ្នាំនោះនឹងជួបតែរឿងប្រេះឆាពុំសូវមានសេចក្តីសុខឡើយ៕

February 14, 2018

អ្នកវិនិយោគជប៉ុនគ្រោងធ្វើទស្សនកិច្ចស្វែងយល់វិស័យសេវាកម្មនៅកម្ពុជា

ក្រុមមន្ត្រីអង្គការពាណិជ្ជកម្មក្រៅស្រុកជប៉ុន ឈ្មោះថា JETRO បានអះអាងថា វិនិយោគិនរបស់ខ្លួនជាច្រើននាក់នឹងមកធ្វើទស្សនកិច្ចនៅប្រទេសកម្ពុជានៅសប្តាហ៍ក្រោយ ដើម្បីស្វែងយល់ពីវិស័យសេវាកម្មមុននឹងបោះទុនវិនិយោគ។

លោក ម៉ាសាហ្ស៊ី កូណូ (Masashi Kono) ដែលដឹកនាំក្រុមគណប្រតិភូចូលជួបពិភាក្សាការងារជាមួយឯកឧត្តម ប៉ាន សូរស័ក្តិ រដ្ឋមន្ត្រីពាណិជ្ជកម្មកម្ពុជាកាលពីម្សិលមិញបានលើកឡើងថា នៅសប្ដាហ៍ក្រោយអង្គការ JETRO នឹងដឹកនាំថ្នាក់ដឹកនាំក្រុមហ៊ុនជប៉ុនមួយក្រុមមកទស្សនកិច្ចនៅកម្ពុជា ដើម្បីសិក្សាស្វែងយល់អំពីវិស័យសេវាកម្មនៅកម្ពុជា ដែលរួមមានភោជនីយដ្ឋាន បដិសណ្ឋារកិច្ច និងទេសចរណ៍។

ជំនួបដ៏កម្រនោះ ក៏មានការពិភាក្សាលើការងារមួយចំនួនដែល JETRO កំពុងតែអនុវត្ត ជាពិសេសការសម្របសម្រួល និងជំរុញការវិនិយោគដោយក្រុមហ៊ុនជប៉ុននៅកម្ពុជាក្នុងគោលដៅជួយបង្កើតការងារដល់ប្រជាជនកម្ពុជាឱ្យបានកាន់តែច្រើនឡើង និងចូលរួមលើកកម្ពស់សេដ្ឋកិច្ចកម្ពុជាឱ្យកាន់តែល្អប្រសើរឡើងផងដែរ។

ជាការឆ្លើយតប ឯកឧត្តម ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្ម បានសម្ដែងការស្វាគមន៍ដល់ក្រុមហ៊ុនជប៉ុនដែលតែងតែនាំនូវស្ដង់ដារល្អៗមកកម្ពុជា។ ឯកឧត្តមបានកត់សម្គាល់ថា ការរីកដុះដាលរបស់ភោជនីយដ្ឋានជប៉ុន ជាពិសេសដែលបានចូលរួមក្នុងការលើកកម្ពស់សុវត្ថិភាពចំណីអាហារនៅកម្ពុជាផងដែរ៕

February 14, 2018

ប្រតិកម្ម 9យ៉ាងរបស់រាងកាយ ដែលអ្នកគិតថាជារឿងប្រក្រតី… តែមិនប្រក្រតីទេ

ទំព័រសុខភាពលេខនេះ ឡារ៉ែន មានខ្លឹមសារល្អៗ ពាក់ព័ន្ធនឹងសុខភាពរាងកាយដែលមិត្តអ្នកអានអាចនឹងមិនធ្លាប់បានដឹងពីមុនមកជម្រាបជូន។

ជាប្រក្រតីរាងកាយរបស់មនុស្សយើងមានប្រតិកម្មជាច្រើនដែលមនុស្សភាគច្រើនគិតថា វាជារឿងប្រក្រតីធម្មតាដែលកើតឡើងនៅក្នុងជីវិតប្រចាំថ្ងៃតាមធម្មជាតិ ដូចជា ការស្ងាប និងការកណ្ដាស់ជាដើម ទាំងអស់នេះវាជារឿងអស្ចារ្យម្យ៉ាងរបស់រាងកាយមនុស្សយើង តែការពិតវាជាយន្តការមួយក្នុងការការពារខ្លួនរបស់រាងកាយអ្នកហ្នឹងឯង ទើបថ្ងៃនេះ ឡារ៉ែន សូមនាំប្រតិកម្ម9យ៉ាងរបស់រាងកាយមនុស្សយើងមកជម្រាបជូនមិត្តអ្នកអានទាំងអស់គ្នាបានដឹង។

1/ កណ្ដាស់៖ ជាប្រក្រតីអ្នកនឹងកណ្ដាស់នៅពេលច្រមុះរបស់អ្នកមានសារធាតុបង្កប្រតិកម្មចាញ់អ្វីម្យ៉ាង ដូចជា ធូលីដីក្លិនឆួល ឬអ្វីម្យ៉ាងដែលប៉ះពាល់សាច់ភ្នាសច្រមុះខ្លាំងជ្រុលពេក ដូច្នេះទើបការកណ្ដាស់ប្រៀបដូចជាការកម្ចាត់សំរាមចេញពីរាងកាយដែរ។

2/ ស្ងាប៖ ជាប្រតិកម្មម្យ៉ាងដែលរាងកាយធ្វើឡើងដើម្បីឱ្យខួរក្បាលត្រជាក់ចុះ បន្ទាប់ពីខួរក្បាលបានទទួលកម្ដៅខ្លាំងជ្រុលពេក។

3/ ព្រឺសម្បុរ (ព្រឺរោម)៖ វាជាការបន្ថយបរិមាណកម្ដៅនៅក្នុងរាងកាយតាមរយៈរន្ធរោម ដើម្បីជាការផ្ដល់ភាពកក់ក្ដៅចំពោះរាងកាយក្នុងសភាពអាកាសធាតុមិនអំណោយផល។

4/ ភ្ញាក់កន្ត្រាក់ពេលគេងលក់៖ ជាអាការដែលពេលអ្នកកំពុងគេងលក់ទៅហើយនោះ សុខៗស្រាប់តែកើតអាការភ្ញាក់កន្ត្រាក់ភ្លាមឡើងតែម្ដង។ ជាការកន្ត្រាក់របស់សាច់ដុំ ដែលជួនកាលវាអាចកន្ត្រាក់ខ្លាំងរហូតដល់អ្នកខ្លះសឹងតែធ្លាក់ពីលើគ្រែផងក៏មាន។ វាជាលទ្ធផលមកពីក្រោយពេលរាងកាយលង់លក់ទៅ ចង្វាក់នៃការដកដង្ហើមនឹងធ្លាក់ចុះទាបភ្លាមៗ ហើយខណៈពេលជាមួយគ្នា ជីពចរក៏នឹងលោតយឺតដែរ រួមទាំងសាច់ដុំក៏បន្ធូរខ្លួនដែរផងនោះ ដូច្នេះទើបខួរក្បាលត្រូវធ្វើឱ្យរាងកាយស្វាហាប់ឡើងវិញ ដើម្បីមិនឱ្យប្រព័ន្ធផ្សេងៗធ្វើការយឺតរហូតដល់ឈប់ធ្វើការ ទើបខួរក្បាលបញ្ជូនការងារធ្វើឱ្យរាងកាយអង្រួនឡើងហ្នឹងឯង។ អាចនិយាយបានថា នេះជាភាពអស្ចារ្យមួយរបស់ខួក្បាលមនុស្សយើង។

5/ ទឹកភ្នែក៖ ក្រៅពីការបំពេញតួនាទីការពារមិនឱ្យវត្ថុចម្លែកផ្សេងៗចូលមកក្នុងកែវភ្នែកហើយនោះ ទឹកភ្នែកថែមទាំងជាឧបករណ៍ការពារខាងអារម្មណ៍ទៀតផង ដោយអ្នកវិទ្យាសាស្ត្រជឿថា ក្នុងស្ថានការណ៍ដែលតានតឹង រាងកាយនឹងសាងចំណាប់អារម្មណ៍ទៅកន្លែងផ្សេង ទើបធ្វើឱ្យកែវភ្នែកក្រហាយ និងយំស្រក់ទឹកភ្នែកចេញមក។

6/ ស្បែកឡើងផុយ៖ ក្រោយពីរាងកាយ ឬស្បែកមនុស្សយើងត្រូវទឹក ឬត្រាំក្នុងទឹកអស់រយៈពេលយូរ គេសង្កេតឃើញថា ស្បែកឡើងជ្រួញផុយ ជាពិសេសនៅលើដៃនិងជើង។ វាជារឿងដែលកើតឡើងបាន បើសិនជារាងកាយបានទទួលភាពទទឹកសើមក្នុងបរិមាណខ្ពស់ ដូច្នេះស្បែកនឹងចាប់ផ្ដើមសម្រួលខ្លួនភ្លាម ដើម្បីឱ្យអាចចាប់កាន់វត្ថុរាបស្មើរលោងៗបានយ៉ាងងាយ។

7/ ការបាត់បង់ការចងចាំ៖ ច្រើនតែកើតឡើងក្រោយពីបានជួបហេតុការណ៍អាក្រក់បំផុត ដូច្នេះទើបខួរក្បាលធ្វើការលុបការចងចាំនោះចោល។

8/ ត្អើក៖ ការទទួលទានអាហារយ៉ាងរហ័សលេបអាហារដុំធំៗ ឬទទួលទានច្រើនជ្រុលពេក នឹងហុចផលរំខានប្រព័ន្ធប្រសាទ Pneumogastric បន្ទាប់ពីនោះប្រព័ន្ធប្រសាទនឹងតភ្ជាប់មករកក្រពៈ និងក្បាំងខ្យល់របស់អ្នកធ្វើឱ្យកើតការត្អើកឡើង។

9/ ការពន្យឺត ឬពត់ខ្លួន៖ តាមសញ្ជាតិញាណអ្នកតែងតែពន្យឺត ឬពត់ខ្លួនដើម្បីត្រៀមភាពប្រុងប្រៀបសម្រាប់រាងកាយ តែក្នុងខណៈពេលជាមួយគ្នានោះ ការពន្យឺតសាច់ដុំក៏ជួយស្ដារចរន្តឈាមរត់ និងជួយបង្កើនអារម្មណ៍ឱ្យរាងកាយមានភាពស្វាហាប់ផងដែរ៕

February 14, 2018

ផ្លែឪឡឹកសម្បកលឿងកំពុងទទួលបានការគាំទ្រខ្លាំងនៅលើទីផ្សារ

ឪឡឹកលឿង គឺជាប្រភេទផ្លែឈើម្យ៉ាងដែលមានសម្បកខាងក្រៅពណ៌លឿង និងសាច់ខាងក្នុងពណ៌ក្រហម និងមានសាច់ហាប់ណែនផ្អែមឆ្ងាញ់ ឃើញហើយគួរឱ្យចង់ទទួលទាន ដោយសារវាត្រូវបានគេដាំតាមបច្ចេកទេសធម្មជាតិសុទ្ធសាធដែលគ្មានប្រើសារធាតុគីមីឡើយ។

លោក ផែង វណ្ណៈ ម្ចាស់កសិដ្ឋានសម្តេចយសដំណាក់ក្រាញ់ មានទីតាំងនៅភូមិអន្សាក្តាម ឃុំស្នាអន្សា ស្រុកក្រគរ ខេត្តពោធិ៍សាត់ មានប្រសាសន៍ថា ពូជឪឡឹកប្រភេទថ្មីនេះត្រូវបាននាំចូលមកពីប្រទេសតៃវ៉ាន់ តាំងពីឆ្នាំ2010មក ហើយបានធ្វើការសាកល្បងដាំដុះនៅក្នុងប្រទេសកម្ពុជាយើង ដោយសារមើលឃើញថា កម្ពុជា និងចិនមានអាកាសធាតុត្រជាក់-ក្តៅប្រហាក់ប្រហែលគ្នាដែលអាចអំណោយផលក្នុងការដាំដុះដំណាំកសិកម្មមួយនេះបាន។

លោកបន្តទៀតថា ក្រោយពីការសាកល្បងដាំ និងថែទាំដោយយកចិត្តទុកដាក់រួចមក ឪឡឹកលឿងក៏ទទួលបានផលដូចការគ្រោងទុកពិតមែន ដោយប្រើបច្ចេកទេសដាំដុះតាមរបៀបធម្មជាតិ និងប្រើតែជីលាមកសត្វ និងជីកំប៉ុសប៉ុណ្ណោះ ធ្វើឱ្យឪឡឹកមានផ្លែធំ និងមានសាច់ផ្អែមឆ្ងាញ់ និងមានការគាំទ្រខ្លាំងនៅលើទីផ្សារ ពិសេសទីផ្សារបន្លែធម្មជាតិ ដូចជាសួនបន្លែធម្មជាតិ(Natural Garden) ផ្សារសេដាក់កសិដ្ឋានខ្មែរ និងផ្សារអាល្លឺម៉ង់នៅម្តុំទួលទំពូងជាដើម។ល។ ចំណែកតម្លៃរបស់វាក៏ថ្លៃជាងឪឡឹកដែលដាំតាមបច្ចេកទេសគីមីដែលគេដាក់លក់នៅលើទីផ្សារនានាដែរ។

ចំពោះវិធីសាស្ត្រដាំដុះវិញ មិនមានលក្ខណៈស្មុគស្មាញ ឬខុសគ្នាច្រើនពីការដាំឪឡឹកក្នុងស្រុកយើងនោះទេ ពោលគឺមុននឹងដាំ គេត្រូវបណ្តុះកូនចោលនៅក្នុងកន្ទោង ឬក្នុងថង់រយៈពេល 7ថ្ងៃ ទៅ10ថ្ងៃជាមុនសិន។ ក្នុងអំឡុងពេលបណ្តុះកូន កសិករត្រូវភ្ជួរដីហាលឱ្យស្ងួតល្អរួចយកជីលាមកគោ ឬជីកំប៉ុសដែលផ្សំឡើងពីរុក្ខជាតិផ្សេងៗទៅបាចពីលើដីឱ្យសព្វហើយហាលចោលឱ្យស្ងួតល្អដើម្បីសម្លាប់មេរោគ រួចហើយទើបភ្ជួរត្រឡប់លុបជីនោះ និងភ្ជួរលើកជារងដោយទុកចន្លោះពីគ្នាប្រមាណជា 3ម៉ែត្រ។

ក្រោយពីលើកជារងរួច គេចាប់ផ្តើមយកកូនឪឡឹកទៅបង្កាត់ពូជ ឬបំបៅជាមុនសិន ទើបយកទៅដាក់ដាំដោយទុកចម្ងាយពីមួយគុម្ពទៅមួយគុម្ពចំនួនមួយម៉ែត្រ និងដាក់ដាំក្នុងមួយគុម្ពតែមួយដើមប៉ុណ្ណោះ។ អំឡុងពេលដាំនោះ កសិករត្រូវស្រោចទឹកជារៀងរាល់ថ្ងៃ ស្រោចតិច ឬច្រើន គឺអាស្រ័យលើកត្តាអាកាសធាតុក្តៅ ឬត្រជាក់។ ក្រោយពីចាប់ផ្តើមដាក់ដាំរួចហើយ ពេលឪឡឹកមានអាយុកន្លះខែត្រូវដាក់ជីនៅតាមគុម្ពម្តងទៀត និងថែទាំបាញ់ថ្នាំផ្សំពីធម្មជាតិដើម្បីការពារសត្វល្អិតជាប្រចាំ កុំឱ្យសត្វល្អិតមកយាយីធ្វើឱ្យមិនសូវទទួលបានផលល្អ។ លោកបានបញ្ជាក់ថា “បើដាំតាមធម្មជាតិឪឡឹកមិនបានផ្លែធំទេ គឺមានទម្ងន់ប្រហែលជា 1គីឡូក្រាមទៅ 1.5គីឡូក្រាមប៉ុណ្ណោះ ប៉ុន្តែបើចេះបំបៅបង្កាត់ពូជវិញ ឪឡឹកនឹងមានទម្ងន់ចន្លោះពី4 ទៅ7គីឡូក្រាមឯណោះក្នុងមួយផ្លែ។

ក្រោយពីដាក់ដាំបានត្រឹមរយៈពេលតែមួយខែ ឪឡឹកនឹងចាប់ផ្តើមចេញផ្កា និងផ្លែ រហូតដល់អាយុមួយខែកន្លះទើបផ្លែឪឡឹកទុំអាចបេះលក់បាន ដោយក្នុង1ហិកតាដែលមានប្រមាណជា 3,600គុម្ពនោះ គេអាចប្រមូលផលបានប្រមាណជា 40តោនដោយលក់បោះដុំក្នុងមួយគីឡូក្រាមបានតម្លៃ 2,000 – 2,500រៀល ឬមានតម្លៃប្រហាក់ប្រហែល 8,000រៀល ទៅ10,000រៀលក្នុងមួយផ្លែ។ បន្ទាប់ពីប្រមូលផលបានប្រហែលជា 10ថ្ងៃ ឪឡឹកនឹងត្រូវងាប់ដើមអស់ តែគេនៅអាចរក្សាទុកផ្លែឪឡឹកប្រភេទនេះបានរហូត 2 ទៅ3សប្តាហ៍។

ម្ចាស់កសិដ្ឋានខាងលើបានអះអាងថា ឪឡឹកប្រភេទនេះនៅស្រុកយើងគឺ ដាំបានគ្រប់រដូវកាលមិនមែនសម្រាប់តែរដូវក្តៅ ឬត្រជាក់នោះទេ ហើយទទួលបានផលល្អដូចគ្នា ប៉ុន្តែត្រូវមានការថែទាំយ៉ាងយកចិត្តទុកដាក់ ពិសេសគឺត្រូវបូមទឹកដាក់ និងការពារសត្វល្អិតចង្រៃជាប្រចាំ។ ប៉ុន្តែសម្រាប់កសិដ្ឋានខាងលើវិញគឺ ដាំតែពីររដូវប៉ុណ្ណោះ ដោយអាចបេះលក់បានចំពេលរដូវចូលឆ្នាំចិន និងចូលឆ្នាំខ្មែរតែម្ដង ព្រោះជាខែដែលមានតម្រូវការក្នុងការសែនព្រេនដូនតា ដែលលក់ដាច់ខ្លាំង និងមានតម្លៃខ្ពស់ទៀតផង៕

February 14, 2018

ក្រុមហ៊ុនសាធារណរដ្ឋកូរ៉េ នឹងនាំបច្ចេកវិទ្យាចូលមកក្នុងវិស័យកសិកម្ម

ក្រសួងកសិកម្ម រុក្ខាប្រមាញ់ និងនេសាទបានចុះកិច្ចព្រមព្រៀងលើអនុស្សរណៈយោគយល់គ្នា ជាមួយក្រសួងដែនដី ហេដ្ឋារចនាសម្ព័ន្ធ ដឹកជញ្ជូន និងក្រុមហ៊ុននៃសាធារណរដ្ឋកូរ៉េ ដើម្បីពង្រឹងកិច្ចសហប្រតិបត្តិការ និងបើកច្រកសម្រាប់ការអនុវត្តគម្រោងស្តីពីប្រព័ន្ធបច្ចេកវិទ្យាព័ត៌មានកសិកម្ម និងការធ្វើផែនទីកំណត់តំបន់ដាំដុះ។ នេះបើយោងតាមក្រសួងកសិកម្ម រុក្ខាប្រមាញ់ និងនេសាទកម្ពុជា។

ឯកឧត្តម វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ និងលោក Ahn Jong-ho តំណាងក្រសួងដែនដី ហេដ្ឋារចនាសម្ព័ន្ធដឹកជញ្ជូននៃសាធារណរដ្ឋកូរ៉េបានចុះហត្ថលេខារួមគ្នាលើអនុស្សរណៈថ្មីមួយដើម្បីបើកផ្លូវឱ្យមានការអភិវឌ្ឍបច្ចេកវិទ្យាក្នុងវិស័យកសិកម្មនៅប្រទេសកម្ពុជានាពេលអនាគត។ បន្ទាប់ពីពិធីចុះហត្ថលេខារួច ឯកឧត្តម វេង សាខុន បានបញ្ជាក់ថា កិច្ចព្រមព្រៀងថ្មីមួយនេះមានអត្ថប្រយោជន៍ច្រើនណាស់ដល់ប្រទេសកម្ពុជាក្នុងការបង្កើនកិច្ចសហប្រតិបត្តិការជាមួយសាធារណរដ្ឋកូរ៉េ សម្រាប់អភិវឌ្ឍលើវិស័យកសិកម្មដែលជាវិស័យមួយមានអាទិភាពក្នុងការទ្រទ្រង់ ឬជំរុញកំណើនសេដ្ឋកិច្ចជាតិទាំងក្នុងពេលបច្ចុប្បន្នក៏ដូចជាពេលអនាគតផងដែរ។

បច្ចេកវិទ្យាកសិកម្មជាធាតុមួយមិនអាចខ្វះបានក្នុងសម័យទំនើបនេះ ដើម្បីធានាដល់ការគ្រប់គ្រងផលិតភាពកសិកម្ម ឆ្លើយតបទៅនឹងតម្រូវការរបស់សង្គម ដែលមាននិន្នាការកើនឡើងជាលំដាប់ ស្របនឹងកំណើនសេដ្ឋកិច្ចនៃប្រទេសកម្ពុជា ដែលទាក់ទាញវិនិយោគពីប្រទេសសំខាន់ៗ ជាពិសេសកំណើនភ្ញៀវទេសចរ បានធ្វើឲ្យតម្រូវការផលិតផលកសិកម្មកើនឡើងជាលំដាប់។ យោងតាមការអះអាងរបស់រដ្ឋមន្ត្រីកសិកម្ម។

ឯកឧត្តមរដ្ឋមន្ត្រី បានបញ្ជាក់ថា៖“ការរៀបចំប្រព័ន្ធបច្ចេកវិទ្យាព័ត៌មានកសិកម្ម និងការធ្វើផែនទីកំណត់តំបន់ដាំដុះដែលទទួលបានការគាំទ្រពីសាធារណរដ្ឋកូរ៉េ គឺមានអត្ថប្រយោជន៍យ៉ាងខ្លាំងក្នុងការរៀបចំផែនការការងារដាំដុះដំណាំ ដោយជ្រើសរើសពូជដំណាំ ស្របតាមគុណភាពដី ទឹក ក្សេត្របរិស្ថាន និងជាពិសេសស្របទៅតាមតម្រូវការទីផ្សារក្នុងស្រុកក៏ដូចជាទីផ្សារនាំចេញ។

ឯកឧត្តម រដ្ឋមន្ត្រី បានបន្ថែមថា៖ “ការកំណត់ផែនទីដាំដុះបានសុក្រឹត និងត្រឹមត្រូវល្អនោះគឺជាព័ត៌មានគន្លឹះដ៏សំខាន់មួយសម្រាប់វិនិយោគិនដើម្បីធ្វើការសម្រេចចិត្តដាក់ទុនវិនិយោគលើការដាំដុះឱ្យត្រូវតាមស្ថានភាព និងគុណភាពដី។

លោក Ahn Jong-ho តំណាងក្រសួងដែនដីហេដ្ឋារចនាសម្ព័ន្ធដឹកជញ្ជូន និងក្រុមហ៊ុននៃសាធារណរដ្ឋកូរ៉េ ថ្លែងថា កម្ពុជាសម្បូរធនធានកសិកម្មដែលមានសក្តានុពលក្នុងការអភិវឌ្ឍ ដោយឡែកកូរ៉េសម្បូរទៅដោយបច្ចេកវិទ្យាទំនើបក្នុងវិស័យកសិកម្មដូច្នេះប្រសិនបើកម្មវត្ថុពីរនេះរួមបញ្ចូលគ្នានោះ វិស័យកសិកម្មកម្ពុជាប្រាកដជាមានការអភិវឌ្ឍលឿនជាមិនខាននាពេលអនាគត។

លោកបានបញ្ជាក់ថា ប្រព័ន្ធបច្ចេកវិទ្យាព័ត៌មានកសិកម្ម និងការធ្វើផែនទីកំណត់តំបន់ដាំដុះ នឹងចូលរួមចំណែកយ៉ាងធំធេងក្នុងការអភិវឌ្ឍវិស័យកសិកម្មរបស់កម្ពុជានាពេលអនាគតដ៏ខ្លី។ ហើយក្រុមហ៊ុនសន្យាថានឹងប្រើប្រាស់បច្ចេកវិទ្យាទំនើបៗក្នុងការអនុវត្តគម្រោងនេះ ធ្វើយ៉ាងណាឱ្យទទួលបានលទ្ធផលល្អប្រសើរតាមអ្វីដែលរាជរដ្ឋាភិបាលក៏ដូចជាក្រសួងកសិកម្ម រុក្ខាប្រមាញ់ និងនេសាទរំពឹងទុក។

កន្លងទៅថ្មីៗ ក្រុមហ៊ុនមកពីសាធារណរដ្ឋកូរ៉េបានបង្កើនកិច្ចសហប្រតិបត្តិការជាមួយក្រសួងកសិកម្ម រុក្ខាប្រមាញ់ និងនេសាទ មិនត្រឹមតែលើការដាំដុះផលិតផលកសិកម្មនោះទេ ក្រុមហ៊ុនកូរ៉េក៏មានបំណងនាំចេញផលិតផលកសិកម្មពីកម្ពុជាដូចជាគ្រាប់ស្វាយចន្ទី និងផ្លែស្វាយកែវរមៀតជាដើម។ ទោះជាបែបនេះក្តី ក៏នៅតែមិនទាន់មានការនាំចេញផ្លូវការណាមួយបានធ្វើឡើងនោះទេរហូតមកដល់ពេលនេះ៕

February 14, 2018

Author: វល័ក្ខ