វល័ក្ខ - La Reine Media

ការប្រគំតន្ត្រី Tiger Street Football Festival 2018 មានការគាំទ្រខ្លាំងពីអ្នកប៉ោយប៉ែត

ប៉ោយប៉ែត៖ បន្ទាប់ពីទទួលបានបទពិសោធន៍ថ្មីនៃការប្រកួតបាលទាត់ហ្វូតសាលដ៏អស្ចារ្យ ដែលរៀបចំដោយក្រុមហ៊ុនស្រាបៀរថៃហ្គ័រ ដោយមាន 50ក្រុមចូលរួមនោះ គឺពិតជាស្វិតស្វាញ និងជក់ចិត្តបំផុតសម្រាប់អ្នករស់នៅទឹកដីជាយដែននេះ។

អ្វីដែលធ្វើឲ្យអ្នកក្រុងប៉ោយប៉ែតកាន់តែរំភើបនោះគឺ ការប្រគំតន្ត្រីយក្ស Tiger Street Football Festival 2018 ជាមួយឆាកតន្ត្រីពោរពេញទៅដោយគំនិតច្នៃប្រឌិតបែបកុងតឺន័រ ផ្ទាំង LED និងភ្លើងព៌ណដ៏ស្រស់ស្អាត បានទាក់ទាញទស្សនិកជនឱ្យមកទស្សនាយ៉ាងច្រើនកុះករ ពេញទីលានផ្សារាត្រីជិតសណ្ឋាគារផ្កាយ 5ក្រុងប៉ោយប៉ែត។

មិនតែប៉ុណ្ណោះ ភាពពុះកញ្ជ្រោលនៃការគាំទ្ររបស់បងប្អូនក្រោយការបង្ហាញវត្តមានរបស់តារាចម្រៀងជួរមុខល្បីៗដូចជា កញ្ញា ឳក សុគន្ធកញ្ញា លោក Zono លោក ណុប បាយ៉ារឹទ្ធ លោក Step និង កញ្ញា រ៉េត ស៊ូហ្សាណា។ លើសពីនេះទៅទៀត អ្នកគាំទ្រទាំងអស់ក៏ទទួលបានកម្មវិធីលក់ជូនជាពិសេសសម្រាប់ការជាវស្រាបៀរ ថៃហ្គ័រ មកទទួលទានបណ្តើរ និងទស្សនាការប្រគំតន្ត្រី Tiger Street Football Festival 2018។

សូមជម្រាបថា បទពិសោធន៍ដ៏អស្ចារ្យនៃការប្រកួតបាល់ទាត់ និងការប្រគំតន្រី្ត Tiger Street Football Festival 2018 នេះនឹងបន្តដំណើរទៅចែកជូនបងប្អូនដែលរស់នៅទឹកដីខេត្តកំពង់ចាម នៅថ្ងៃទី24 និង 25 ខែកុម្ភៈ ខាងមុខនេះ។

ចំពោះសកម្មភាពផ្សេងៗនៃព្រឹត្តិការណ៍ Tiger Street Football Festival 2018 ប្រចាំមណ្ឌលប៉ោយប៉ែត សូមចូលទៅកាន់ទំព័រហ្វេសប៊ុកផ្លូវការរបស់ស្រាបៀរថៃហ្គ័រ៖ www.facebook.com/TigerBeerKH

#TSFF2018
សូមពិសាដោយការទទួលខុសត្រូវ

February 21, 2018

ធនាគារិកមានសុទិដ្ឋិនិយមចំពោះស្ថានភាពហិរញ្ញវត្ថុ ខណៈតម្លៃកសិផលងើបឡើងវិញ

ធនាគារិកដ៏ល្បីឈ្មោះនៅកម្ពុជាបានបង្ហាញនូវសុទិដ្ឋិនិយមចំពោះកំណើននៃតម្រូវការហិរញ្ញវត្ថុក្នុងឆ្នាំ2018នេះ ស្របពេលមានសញ្ញាណងើបឡើងវិញនៃតម្រូវការ និងតម្លៃកសិផលស្ទើរគ្រប់ប្រភេទចាប់តាំងពីដើមឆ្នាំ2018នេះ។

តម្លៃកសិផល មានអង្ករ ដំឡូងមីជាដើម បានធ្លាក់ចុះនាប៉ុន្មានឆ្នាំចុងក្រោយនេះដល់កម្រិតទាបដែលបានបង្កជាក្តីកង្វល់ដល់ប្រជាកសិករចំពោះការបាត់បង់ប្រាក់ចំណូល ការលក់ផលិតផលមិនបានចំណេញ និងតម្រូវការទីផ្សារខាងក្រៅស្ថិតក្នុងភាពមិនច្បាស់លាស់។

បណ្ឌិត សូ ផនណារី អនុប្រធានប្រតិបតិ្ត និងជា ប្រធានមន្ត្រីប្រតិបតិ្តការនៅធនាគារអេស៊ីលីដាបានអះអាងថា តម្លៃកសិផលបានងើបឡើងវិញ ក្នុងរយៈពេលចុងក្រោយនេះដែលជាសញ្ញាវិជ្ជមានមួយសម្រាប់តម្រូវការហិរញ្ញវត្ថុទៅថ្ងៃអនាគត។ ធនាគារអេស៊ីលីដា បានកំណត់អត្រាកំណើនប្រចាំឆ្នាំរបស់ខ្លួនសម្រាប់ឆ្នាំ2018 ត្រឹមតែ 8%ប៉ុណ្ណោះ ធៀបនឹងឆ្នាំ2017។

តាមរយៈការកំណត់អត្រាកំណើននេះ មន្ត្រីជាន់ខ្ពស់នៃធនាគារពាណិជ្ជធំជាងគេមួយនេះបានមើលឃើញនូវមូលហេតុដែលខ្លួនអាចសម្រេចគោលដៅនៃកំណើននេះបាន។

បណ្ឌិត សូ ផនណារី អះអាងថា៖ “អ្វីដែលយើងមើលឃើញ កាលណាតម្លៃកសិផលងើបឡើងវិញ តម្រូវការហិរញ្ញវត្ថុក៏មានច្រើនដែរ ព្រោះប្រជាជនត្រូវការទុនសម្រាប់ពង្រីកការដាំដុះ។

បណ្ឌិត សូ ផនណារី បន្ថែមទៀតថា “ក្តីរំពឹងចំពោះកំណើនតម្រូវការហិរញ្ញវត្ថុច្រើន គឺការរីកលូតលាស់នៃសហគ្រាសខ្នាតតូច និងមធ្យមនេះឯង។

ធនាគារជាតិនៃកម្ពុជាបានបង្ហាញឱ្យដឹងថា កាលពីឆ្នាំ2017 កន្លងទៅ ការផ្តល់ប្រាក់កម្ចីដល់វិស័យកសិកម្ម រុក្ខាប្រមាញ់ និង នេសាទ មានទំហំ10.3% ក្នុងចំណោមកម្ចីឥណទានសរុបពីធនាគារនៅកម្ពុជា ខណៈមីក្រូហិរញ្ញវត្ថុទាំងអស់នៅកម្ពុជាបានទម្លាក់ប្រាក់កម្ចីរហូតដល់ទៅ 30%នៃឥណទានរបស់ខ្លួនទៅដល់វិស័យកសិកម្ម។ តម្លៃចំណិតដំឡូងមីស្ងួត បានហក់ឡើងពីប្រមាណ 100រៀលក្នុងមួយគីឡូក្រាមកាលពីរដូវកាលមុន ទៅដល់ 400រៀលក្នុង1គីឡូក្រាមក្នុងរដូវកាលនេះ។ នេះបើយោងតាម ឯកឧត្តម វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ។

ជាមួយគ្នានេះ ការនាំចេញអង្កររបស់កម្ពុជាទៅកាន់ទីផ្សារអន្តរជាតិបានកើនឡើងខ្ពស់មិនធ្លាប់មានរហូតដល់ 28.30% ក្នុងខែមករា ឆ្នាំ2018 ធៀបនឹងរយៈពេលដូចគ្នាកាលពីឆ្នាំ2017។ នេះបើយោងតាមទិន្នន័យនាំចេញអង្ករពីលេខាធិការដ្ឋានច្រកចេញចូលតែមួយសម្រាប់បំពេញបែបបទការនាំចេញអង្ករ។ ទិន្នន័យនាំចេញនោះបានបង្ហាញឱ្យឃើញថា ការនាំចេញនៅក្នុងខែមករា ឆ្នាំ2018 នេះ មានបរិមាណ 62,623តោន ខណៈការនាំចេញអង្ករកាលពីខែមករាឆ្នាំ2017 មានបរិមាណត្រឹមតែ 48,820តោនប៉ុណ្ណោះ៕

February 21, 2018

អាហារូបករណ៍អាស៊ានរបស់ CIMB នាំមកនូវឱកាសសិក្សានៅសាកលវិទ្យាល័យល្បីៗ ជុំវិញពិភពលោក ដល់និស្សិតកម្ពុជា

ភ្នំពេញ៖ ដោយការបន្តប្តេជ្ញាចិត្តលើការការអភិវឌ្ឍសមត្ថភាពយុវជន ក្នុងតំបន់អាស៊ាន ស៊ីអាយអិម៊បី គ្រុប (CIMB Group) ផ្តល់នូវអាហារូបករណ៍ 100% សម្រាប់ការសិក្សាថ្នាក់បរិញ្ញាបត្រ នៅគ្រប់សាកលវិទ្យាល័យល្បីឈ្មោះ នៅជុំវិញពិភពលោក។ ចាប់ពីឥឡូវនេះ រហូតដល់ថ្ងៃទី5 ខែមីនា ឆ្នាំ2018 អាហារូបករណ៍អាស៊ានរបស់ CIMB បើកទទួលពាក្យស្នើសុំអាហារូបករណ៍ សម្រាប់សិស្សនិស្សិតខ្មែរទាំងអស់ ដែលទើបតែបញ្ចប់ថ្នាក់ទី12 ឬកំពុង់សិក្សាថ្នាក់បរិញ្ញាបត្រ និងមានអាយុក្រោម 24ឆ្នាំ។ អាហារូបករណ៍នេះ ផ្តល់ជូនដល់សិស្សនិស្សិត ដែលមានអាយុក្រោម24ឆ្នាំ ស្ថិតក្នុងតំបន់អាស៊ាន រួមមានប្រទេសកម្ពុជា ម៉ាឡេស៊ី ឥណ្ឌូនេស៊ី សិង្ហបុរី ថៃ វៀតណាម និងហ្វីលីពីន។ សិស្សនិស្សិតទាំងអស់ អាចជ្រើសរើសមុខវិជ្ជាសិក្សាណាមួយក៏បាន ដែលខ្លួនពេញចិត្ត សម្រាប់ការដាក់ពាក្យស្នើសុំអាហារូបករណ៍របស់ CIMB។

អាហារូបករណ៍អាស៊ានរបស់ CIMB ផ្តល់ជំនួយឧបត្ថម្ភពេញលេញ 100% រួមមានថ្លៃសិក្សា សំបុត្រយន្តហោះ កន្លែងស្នាក់នៅ ដំណើរកម្សាន្តមកស្រុកកំណើត សេវាធានារ៉ាប់រង ព្រមទាំងថ្លៃចំណាយផ្សេងៗផងដែរ។ មិនតែប៉ុណ្ណោះ អត្ថប្រយោជន៍ដ៏សំខាន់សម្រាប់និស្សិត គឺឱកាសការងារជាបុគ្គលិកហាត់ការ និងពេញសិទ្ធិ ក្នុងចំណោមសាខារបស់ CIMB Group ទូទាំងតំបន់ ទាំងអំឡុងពេល និងក្រោយពេលបញ្ចប់ការសិក្សា។ ក្រៅពីនេះ និស្សិតអាហារូបករណ៍ ទទួលបានការយកចិត្តទុកដាក់ និងតម្រង់ទិសពីធនាគារ CIMB សម្រាប់ការសិក្សា និងការបណ្តុះបណ្តាល ដែលជាឱកាសភ្ជាប់ទំនាក់ទំនង ជាមួយបុគ្គលិក និងគណៈគ្រប់គ្រងជាន់ខ្ពស់ រួមទាំងការចូលរួមក្នុងកម្មវិធីតំបន់អាស៊ាននានា របស់ CIMB ទៀតផង។

ដើម្បីរួមចំណែកលើកកម្ពស់សមត្ថភាពយុវជនជំនាន់ក្រោយ ក្នុងតំបន់អាស៊ាន ធនាគារ CIMB ដែលជាផ្នែកមួយរបស់ស៊ីអាយអិមប៊ី គ្រុប បាននាំយក និងបន្តខិតខំផ្សព្វផ្សាយយ៉ាងសកម្ម ដល់សិស្សនិស្សិតកម្ពុជា អំពីអាហារូបករណ៍អាស៊ានរបស់ CIMB។ លោកស្រី អ៊ុំ ចិន្តាភក្តី ជានាយិកាធនធានមនុស្ស របស់ធនាគារ CIMB បានមានប្រសាសន៍ថា៖ «អាហារូបករណ៍របស់ CIMB នេះ គឺជាឱកាសមាស សម្រាប់សិស្សនិស្សិតខ្មែរ ដើម្បីចាប់យកឱកាសសិក្សានៅសាកលវិទ្យាល័យល្បីៗ និងឱកាសការងារនៅ CIMB។ ការអភិវឌ្ឍធនធានមនុស្សជំនាន់ក្រោយនេះ នឹងគាំទ្រដល់ការរីកចម្រើនរបស់ប្រទេសកម្ពុជា ក៏ដូចជាតំបន់អាស៊ានទាំងមូល ស្របតាមចក្ខុវិស័យរបស់ CIMB Group។ តាងនាមឱ្យ CIMB Group នៅកម្ពុជា ខ្ញុំសូមលើកទឹកចិត្តដល់សិស្សនិស្សិតខ្មែរទាំងអស់ ចូលរួមដាក់ពាក្យស្នើសុំអាហារូបករណ៍នេះ ហើយនេះគឺជាមោទនភាពរបស់ប្រទេសកម្ពុជា ដែលមាននិស្សិតខ្មែរយើងកន្លង បានប្រឡងជាប់កម្មវិធីអាហារូបករណ៍នេះ»។

កន្លងមក មាននិស្សិតខ្មែរឆ្នើមមួយរូបផងដែរ ក្នុងចំណោមនិស្សិតក្នុងបណ្តាប្រទេសតំបន់អាស៊ានដទៃទៀត ដែលទទួលបានអាហារូបករណ៍របស់ CIMB នេះ។ យុវត្តី ងួន ពញ្ញានាត ដែលកំពុងសិក្សានៅសាកលវិទ្យាល័យ McGill នៃប្រទេសកាណាដា បានឲ្យដឹងថា៖ «ឥឡូវនេះ ខ្ញុំពិតជាពេញចិត្តការសិក្សារបស់ខ្ញុំ នៅទីនេះ ជាមួយនឹងគុណភាពអប់រំស្តង់ដារពិភពលោក រួមទាំងបរិយាកាសថ្មីៗ ដែលខ្ញុំបានរៀនសូត្រពីនេះ ហើយខ្ញុំសូមអរគុណ ដល់ស៊ីអាយអិមប៊ី ដែលផ្តល់ឲ្យខ្ញុំទទួលបានអាហារូបករណ៍ដ៏មានតម្លៃនេះ។ មិនតែប៉ុណ្ណោះ គ្រូតម្រង់ទិសរបស់ CIMB បានផ្តល់មធ្យោបាយ និងជួយគាំទ្រដល់ខ្ញុំយ៉ាងពេញទំហឹង លើការសម្រេចចិត្ត ទាក់ទងនឹងការសិក្សា និងអាជីព។ ខ្ញុំជឿជាក់ថា មិត្តនិស្សិតខ្មែរទាំងអស់ ក៏អាចទទួលបានអាហារូបករណ៍របស់ CIMB ផងដែរ»។

គួរបញ្ជាក់ផងដែរថា អាហារូបករណ៍តំបន់អាស៊ានរបស់ស៊ីអាយអិមប៊ី ផ្តល់ជូនមុខវិជ្ជាសិក្សាដ៏ទូលំទូលាយ រួមមានពាណិជ្ជកម្ម/ការគ្រប់គ្រង គណនេយ្យ ធនាគារ និងហិរញ្ញវត្ថុ សេដ្ឋកិច្ច ការចៃ្នប្រឌិត និងភាពជាសហគ្រិន ការគ្រប់គ្រងហានិភ័យ វិទ្យាសាស្ត្រនយោបាយ ទំនាក់ទំនងអន្តរជាតិ វិទ្យាសាស្ត្រកុំព្យូទ័រ ព័ត៌មានវិទ្យា ប្រព័ន្ធផ្សព្វផ្សាយឌីជីថល គណិតវិទ្យា វិទ្យាសាស្ត្រពិត ការស្រាវជ្រាវប្រតិបត្តិការ ទំនាក់ទំនង ច្បាប់ វិស្វកម្ម និងមុខវិជ្ជាដទៃទៀត។

អាហារូបករណ៍អាស៊ានរបស់ CIMB ឆ្នាំ2018 បើកទទួលពាក្យពីថ្ងៃនេះ រហូតដល់ថ្ងៃទី05 ខែមីនា ឆ្នាំ2018។ សម្រាប់លក្ខខណ្ឌដាក់ពាក្យស្នើសុំ និងព័ត៌មានបន្ថែម សូមចូលទៅកាន់គេហទំព័រ www.cimb.com/aseanscholarship៕

February 21, 2018

ស្ពានឆ្លងទន្លេមេគង្គថ្មី កំពង់ចាម-ត្បូងឃ្មុំនឹងសាងសង់ក្នុងតម្លៃ 57លានដុល្លារ

ស្ពានឆ្លងទន្លេមេគង្គថ្មីមួយទៀតភ្ជាប់ពីខេត្តកំពង់ចាម ទៅខេត្តត្បូងឃ្មុំបានចាប់ផ្តើមបើកការដ្ឋានសាងសង់នៅដើមខែកុម្ភៈនេះ ក្នុងតម្លៃ 57 លានដុល្លារ ដែលនឹងរួចរាល់ជាស្ថាពរក្នុងរយៈពេល 42ខែក្រោយ។

រដ្ឋមន្ត្រីក្រសួងសាធារណការ និងដឹកជញ្ជូន ឯកឧត្តមទេសរដ្ឋមន្ត្រី ស៊ុន ចាន់ថុល បានលើកឡើងថា គម្រោងសាងសង់ស្ពានថ្មីនេះ គឺចាប់ផ្តើមពីត្រើយខាងលិចដែលស្ថិតនៅភូមិបឹងដែរ ឃុំព្រែកកក់ ស្រុកស្ទឹងត្រង់ ខេត្តកំពង់ចាម ឆ្លងកាត់ទន្លេមេគង្គទៅត្រើយខាងកើត ដែលស្ថិតក្នុងភូមិក្តុលលើ ឃុំទ្រា ស្រុកក្រូចឆ្មារ ខេត្តត្បូងឃ្មុំ។ ស្ពាននេះមានប្រវែង 1,131ម៉ែត្រ មានទទឹង 13.50ម៉ែត្រដែលជាស្ពានប្រភេទបេតុងសរសៃដែក (Countinues Box Gider Bridge)។

ឯកឧត្តមទេសរដ្ឋមន្ត្រីបានបញ្ជាក់ផងដែរថា នៅលើស្ពានដែលមានទទឹងទំហំ 13.50ម៉ែត្រនេះ គឺបែងចែកជាផ្លូវរថយន្តប្រវែង 3.50ម៉ែត្រចំនួន 2គន្លង ផ្លូវម៉ូតូ 1.90ម៉ែត្រចំនួន 2គន្លង ផ្លូវថ្មើរជើង 1.10ម៉ែត្រចំនួន 2គន្លង និងបង្កាន់ដៃស្ពានចំនួន 0.25ម៉ែត្រសងខាង និងផ្ទៃខាងលើនៃស្ពានបេតុងនេះ គឺក្រាលដោយកៅស៊ូកម្រាស់ 5សង់ទីម៉ែត្រ។

រដ្ឋាភិបាលក៏មានគម្រោងសាងសង់កំណាត់ផ្លូវដែលភ្ជាប់ចុងទាំងសងខាងរបស់ស្ពាននេះផងដែរ ដែលមានប្រវែងសរុបទាំងសងខាង(ខាងលិច និងខាងកើត)ប្រវែង 8,323ម៉ែត្រផងដែរ ដោយក្នុងនោះមានផ្លូវមេតភ្ជាប់ទៅផ្លូវជាតិលេខ 71C ប្រវែង 3,869ម៉ែត្រ និងផ្លូវបែកខ្នែងប្រវែង 4,454ម៉ែត្រ ក្រាលថ្មីដោយចាក់កៅស៊ូ (DBST) 2ជាន់ ដែលបើគិតសរុបទាំងប្រវែងស្ពាន និងផ្លូវតភ្ជាប់ទាំងសងខាងផង គឺមានប្រវែង 9,454ម៉ែត្រ។

ស្ពានថ្មីនេះត្រូវបានសាងសង់ឡើងដោយគ្រោងចំណាយថវិកាប្រមាណ 57លានដុល្លារអាមេរិក ក្រោមហិរញ្ញប្បទានសម្បទានពីរដ្ឋាភិបាលចិន ជាមួយនឹងថវិកាបដិភាគរបស់រាជរដ្ឋាភិបាលកម្ពុជា។ គម្រោងនេះនឹងអនុវត្តសាងសង់ដោយក្រុមហ៊ុន Shanghai Construction Group ក្រោមការត្រួតពិនិត្យបច្ចេកទេសទេសដោយក្រុមហ៊ុន ក្វាងចូវវ៉ានអាន ដែលគម្រោងនេះជាយុទ្ធសាស្ត្រមួយយ៉ាងសំខាន់សម្រាប់ការតភ្ជាប់ទំនាក់ទំនងការដឹកជញ្ជូន និងការធ្វើដំណើររបស់ប្រជាជននៅត្រើយខាងកើត និងត្រើយខាងលិចនៃទន្លេមេគង្គ។

គួរបញ្ជាក់ថា គម្រោងស្ពានដ៏មានសក្តានុពលមួយនេះ គឺជាស្ពានទី 7 ហើយដែលសាងសង់ក្រោមហិរញ្ញប្បទានសម្បទានពីរដ្ឋាភិបាលចិន ដែលក្នុងនោះរួមមាន ស្ពានកោះធំ ស្ពានតាខ្មៅ ស្ពានជ្រោយចង្វារទី2 ស្ពានព្រែកក្តាម ស្ពានព្រែកតាមាក់ ស្ពានសេកុង និងស្ពានមេគង្គស្ទឹងត្រែង។ កន្លងមករដ្ឋាភិបាលចិនបានផ្តល់កម្ចីសាងសង់ផ្លូវបានចំនួន 2ពាន់គីឡូម៉ែត្រ ដែលកំពុងសាងសង់បានជិត 700គីឡូម៉ែត្រ និងគម្រោងសាងសង់មួយចំនួនទៀត ដែលកម្ចីនោះមានទំហំទឹកប្រាក់ជាង 2ពាន់លានដុល្លារអាមេរិក៕

February 21, 2018

ចង់ចេញរកស៊ី តែខ្វះទុន តើគួរខ្ចីលុយបន្ថែមពីធនាគារ ឬចាំសន្សំលុយគ្រប់?

ការបើកអាជីវកម្មថ្មីមួយ មិនថាអាជីវកម្មតូចមធ្យម ឬអាជីវកម្មធំនោះទេ គឺទាមទារឱ្យអាជីវករត្រូវមានប្រភពទុនឱ្យបានច្បាស់លាស់ជាមុន ចៀសវាងមានហានិភ័យហិរញ្ញវត្ថុណាមួយកើតឡើង មិនមានប្រាក់បម្រុងទុកខាតដំណាក់កាលដំបូងនាំឱ្យអាជីវកម្មបរាជ័យ។ ដូច្នេះសួរថាតើមុនចាប់ផ្តើមធ្វើអាជីវកម្មគួរត្រូវរង់ចាំសន្សំប្រាក់គ្រប់ចំនួនដោយខ្លួនឯង ឬត្រូវខ្ចីប្រាក់ពីធនាគារមកធ្វើដើមទុន?

លោក យ៉ត ណារ៉ូ ជាអាជីវករលក់ចាប់ហួយនៅក្នុងផ្សារអូឫស្សីមានប្រសាសន៍ថា វាអាស្រ័យ លើការយល់ឃើញរបស់ម្ចាស់អាជីវកម្មនីមួយៗ ទស្សនៈរបស់លោកយល់ថា បើមានឱកាសល្អគួរតែចាប់ផ្តើមធ្វើវា ហើយបើខ្វះទុនគួរតែខ្ចីពីធនាគារសិនទៅ មិនគួរត្រូវរង់ចាំសន្សំលុយខ្លួនឯងគ្រប់នោះទេ ព្រោះវាអាចបាត់បង់ឱកាសល្អនេះ។ និយាយចប់លោកសើចតិចៗហើយលោកបន្តថា នេះជាការយល់ឃើញរបស់ខ្ញុំ តែផ្ទុយទៅវិញ ខ្ញុំជាមនុស្សខ្លាចបំផុតក្នុងការខ្ចីលុយគេមករកស៊ី មិនថាចងការគេក្រៅ ឬខ្ចីពីធនាគារក៏ដូចជាគ្រឹះស្ថានមីក្រូហិរញវត្ថុនោះទេ ដោយហេតុថា ខ្ញុំមិនធ្លាប់មានបទពិសោធក្នុងការរៀបចំឯកសារលើការស្នើសុំកម្ចីពីធនាគារ សម្រាប់ខ្ញុំគិតថា វាពិបាកខ្លាំងសម្រាប់ការងារនេះហើយបើខ្ចីចងការគេក្រៅ ការប្រាក់ថ្លៃអាចរកមិនសល់នឹងបង់ការប្រាក់គេឡើយ។

លោកមានប្រសាសន៍ដូច្នេះថា “ខ្ញុំលក់ចាប់ហួយនេះ 10ឆ្នាំមកហើយ ខ្ញុំមិនដែលធ្លាប់ខ្ចីលុយគេទេ ដំបូងឡើយខ្ញុំលក់រាយធម្មតា តែឥឡូវខ្ញុំក៏មានបោះដុំផងដែរ ការខ្ចីលុយគេរកស៊ី ឬពង្រីកមុខរបរមិនមែនមិនល្អនោះទេ តែមកពីខ្ញុំមិនចង់ដាក់សម្ពាធលើខ្លួនឯង បើមុខរបរយើងដំណើរការមិនសូវល្អ ខ្លាចគេងមិនលក់ពិបាកចិត្តគិតច្រើន ព្រោះត្រូវរកលុយបង់ការផង និងសងដើមគេត្រឡប់ទៅគេវិញផង ដូច្នេះខ្ញុំក៏ធ្វើតាមតែលទ្ធភាពដែលខ្ញុំមានគ្រាន់តែវារាងយឺតបន្តិចទម្រាំយើងអាចសន្សំលុយខ្លួនឯងបានគ្រប់យកមកពង្រីកលើការលក់បោះដុំនេះ។

ក្រឡេកមើលរបររកស៊ីរបស់អ្នកស្រី មូល ដាវី ដែលជាអាជីវករផ្គត់ផ្គង់ជីកសិកម្ម និងសម្ភារកសិកម្ម មានទីតាំងនៅស្រុករតនមណ្ឌល ខេត្តបាត់ដំបងឯណោះវិញ អ្នកស្រីបានមានប្រសាសន៍ថា ដើមឡើយអ្នកស្រីមានប្រាក់សម្រាប់ទិញជីកសិកម្មពីក្រុមហ៊ុនមកលក់បន្តទៅឱ្យកសិករនៅក្នុងមូលដ្ឋាន ប៉ុន្តែមិនមែនជាអាជីវកម្មខ្នាតធំនោះទេ។

ដោយសារតែការចាប់ផ្តើមដំបូងត្រូវទិញតិចៗយកមកសាកល្បងលក់ធ្វើការស្ទាបស្ទង់ទីផ្សារជាមុនសិន ក្រែងលក់មិនដាច់ខ្លាចយកមកច្រើនធ្វើឱ្យយើងខាតទៅវិញក៏ច្រើន។ អ្នកស្រីបន្តថា ក្រោយពីលក់បានមួយរយៈ ការប្រើប្រាស់ជីកសិកម្មរបស់កសិករ កាន់តែមានតម្រូវការច្រើនឡើងៗ ដែលជាហេតុធ្វើឱ្យអ្នកស្រីខ្វះទុនពង្រីកអាជីវកម្ម ដូច្នេះចៀសមិនផុតពីការខ្ចីប្រាក់ពីធនាគារនោះឡើយ។

អ្នកស្រីបញ្ជាក់បន្ថែមដូច្នេះថា “កាលនោះបើសិនជាមិនខ្ចីធនាគារមកពង្រីកមុខរបររកស៊ីទេនោះ ប្រហែលជាអាជីវកម្មមិនរីកធំធាត់មកដល់សព្វថ្ងៃនេះឡើយ ប៉ុន្តែវាមិនស្រួលនោះទេ នៅពេលជំពាក់បំណុលធនាគារ គឺត្រូវប្រុងប្រយ័ត្នខ្លាំងទៅលើការចំណាយផ្សេងៗ បើពុំដូច្នេះទេ ការចាយវាយខ្ជះខ្ជាយភ្លេចខ្លួនតែបន្តិចបាត់ដើមបាត់ចុង ប្រាកដជារកប្រាក់សងធនាគារមិនបានទេ។

ឆ្លងកាត់បទពិសោធធ្វើអាជីវកម្មជាច្រើនឆ្នាំមកនេះ អ្នកស្រីបានផ្តល់ជាអនុសាសន៍ថា បើសិនខ្ចីប្រាក់គេមករកស៊ីក៏មិនមានបញ្ហាអ្វីដែរ ព្រោះយើងយកប្រាក់មកបង្កើតប្រាក់ បង្កើនអាជីវកម្មឱ្យកាន់តែរីកធំឡើង កុំយកប្រាក់មកចាយវាយគ្មានគោលដៅច្បាស់លាស់ បើមិនដូច្នោះទេ ទោះរកស៊ីចំណេញក៏រកលុយមកសងធនាគារវិញមិនគ្រប់ដែរ។

ជួបជាមួយលោក ណាង គីណាល់ នាយកប្រតិបត្តិទីផ្សារ និងទំនាក់ទំនងនៃគ្រឹះស្ថានមីក្រូហិរញ្ញវត្ថុ អេ.អឹម.ខេ មានប្រសាសន៍ថា ការធ្វើអាជីវកម្មមួយមិនសំខាន់ទៅលើមានប្រាក់គ្រប់ចំនួនដោយខ្លួនឯងឬខ្ចីប្រាក់ពីធនាគារ ឬគ្រឹះស្ថានមីក្រូហិរញ្ញវត្ថុ មកធ្វើជាប្រភពទុននោះទេ សំខាន់នៅត្រង់ថា តើអាជីវកម្មរបស់យើងពេលចាប់ផ្តើមដំណើរការ មានការគាំទ្រនៅលើទីផ្សារកម្រិតណា? ចៀសវាងពេលបើកដំណើរការហើយបរាជ័យទៅវិញនាំឱ្យខាតបង់ប្រាក់ ជួបបញ្ហាហានិភ័យហិរញ្ញវត្ថុនៅក្នុងគ្រួសារ។

យ៉ាងណានោះលោកគិតថា បើសិនជាមានប្រាក់គ្រប់ចំនួនសម្រាប់បើកអាជីវកម្មអ្វីមួយ គឺជាការប្រសើរហើយ ព្រោះថា មិនចាំបាច់គិតពីការសងត្រឡប់ទៅធនាគារនាំឱ្យខាតការប្រាក់។ ប៉ុន្តែសម្រាប់អាជីវកម្មភាគច្រើនពេលចាប់ផ្តើមដំណើរការតែងជួបការខ្វះខាតទុននៅពេលដែលមានការគាំទ្រលើទីផ្សារខ្លាំង ដែលទាមទារឱ្យវិនិយោគិន ឬអាជីវករត្រូវបង្ខំចិត្តស្វែងរកប្រភពទុនបន្ថែមមិនថាប្រភពទុនពីបងប្អូន មិត្តភ័ក្តិ ឬធនាគារនោះទេ សំខាន់ឱ្យតែយកប្រាក់នោះមកពង្រីកអាជីវកម្មបានដើម្បីបង្កើនប្រាក់ចំណេញ គឺជាការប្រសើរហើយ ចៀសវាងតែមួយគត់ គឺខ្ចីប្រាក់គេមកមិនដឹងថា ត្រូវយកមកធ្វើអ្វីឱ្យច្បាស់លាស់ ខុសពីពាក្យថាយកប្រាក់មកបង្កើតប្រាក់។

លោក គីណាល់ បញ្ជាក់ដូច្នេះ “បើសិនជាឱកាសហុចឱ្យហើយ យើងមិនគិតគូរក្នុងការចាប់ផ្តើមបង្កើតមុខរបរ ដោយហេតុផលថា គ្មានប្រាក់ នោះយើងនឹងបាត់ឱកាសមិនខាន ហើយថ្ងៃក្រោយទោះជាមានប្រាក់គ្រប់សម្រាប់ធ្វើវា តែបើសិនជាមិនមានឱកាសល្អ ក៏មិនអាចបើកដំណើរការអាជីវកម្មបានដោយរលូនដែរ។

ជាមួយគ្នានេះដែរលោកក៏បានផ្តល់អនុសាសន៍ថា ដើម្បីចៀសវាងហានិភ័យក្នុងការធ្វើអាជីវកម្ម អាជីវករ ឬវិនិយោគិនត្រូវធ្វើផែនការអាជីវកម្ម (Business Plan) ឱ្យបានច្បាស់លាស់ជាមុនសិន ដូចជាការសិក្សាស្រាវជ្រាវទីផ្សារថា តើអាជីវកម្មរបស់យើងមានការគាំទ្រខ្លាំងប៉ុនណានៅលើទីផ្សារ ព្រោះវាគឺជាវីធីសាស្ត្រល្អដែលដឹកនាំអាជីវកម្មរបស់យើងឱ្យឆ្ពោះទៅរកគោលដៅច្បាស់លាស់ និងជោគជ័យ។

លើសពីនេះមុននឹងធ្វើអាជីវកម្មក៏ត្រូវត្រៀមទុនបម្រុងខ្លះៗដែរ ដោយហេតុថា អាជីវកម្មអ្វីក៏ដោយមិនមែនសុទ្ធតែទទួលបានជោគជ័យនោះទេ ហើយបើជួបបញ្ហាហិរញ្ញវត្ថុយើងមានទុនបម្រុង យើងមិនលំបាកក្នុងការដោះស្រាយនោះទេ។ គួរបញ្ជាក់ថា សម្រាប់គ្រឹះស្ថានមីក្រូហិរញ្ញវត្ថុ AMK ក៏មានកម្ចីសម្រាប់ធ្វើអាជីវកម្មរហូតដល់ 50,000 ដុល្លារ អាស្រ័យទៅលើអាជីវកម្មតូច ឬមធ្យម៕

February 20, 2018

អាការគួរឱ្យបារម្ភបំផុត 7យ៉ាង ដែលឪពុកម្ដាយគួរនាំកូនទៅមន្ទីរពេទ្យភ្លាម

ខាងក្រោមនេះគឺជាអាការដ៏គួរឱ្យបារម្ភបំផុត7យ៉ាង ដែលឪពុកម្ដាយគួរនាំកូនទៅមន្ទីរពេទ្យឱ្យបានលឿនបំផុត ព្រោះបើសិនជាបណ្ដែតបណ្ដោយអាចនឹងយឺតពេល ហួសនឹងព្យាបាលទាន់ ហើយជួនកាលអាណាព្យាបាលមួយចំនួនអាចគិតថា ភាពខុសប្រក្រតីដែលកើតឡើងចំពោះកូនតូចនោះ អាចនឹងមើលទៅមិនមែនជារឿងអីធំដុំ តែការពិតសុទ្ធតែជារឿងមិនល្អទាំងអស់។

1/ ស្នាមដៅ ឬសន្លាកស្នាមក្រហមដែលកាន់តែរីកធំឡើង

ការដែលនៅលើរាងកាយរបស់កូនតូចមានស្នាមដៅ ឬសន្លាកស្នាមពណ៌ក្រហម ឬខ្មៅ ឬកន្លែងណាមួយមានពណ៌ខ្មៅជាង ឬភ្លឺជាងកន្លែងផ្សេងទៀតលើរាងកាយធំជាង 6មីល្លីម៉ែត្រនោះ វាមិនមែនជារឿងប្លែកឡើយ តែបើសិនជាទំហំរបស់វាកាន់តែរីកធំឡើង ពណ៌ក៏ប្រែប្រួលដែរនោះ វាជាការប្រែប្រួលដែលគួរឱ្យបារម្ភហើយ ដូច្នេះគួរប្រញាប់នាំកូនទៅជួបលោកគ្រូពេទ្យជំនាញភ្លាម។

2/ ជ្រុះសក់

សក់កូនជ្រុះច្រើនមិនមែនជារឿងខុសប្រក្រតីទេ តែបើជ្រុះច្រើនជ្រុលពេកអាចនឹងបង្ហាញថា រាងកាយរបស់កូនខ្វះវីតាមីនហើយ តែបើសក់ជូតមិនស្ងួត ឬស្បែកក្បាលកើតរោគផ្សិត ក៏អាចបណ្ដាលមកពីមូលហេតុផ្សេងបានដែរ ដូច្នេះវិធីដែលល្អបំផុតគឺ នាំកូនទៅជួបគ្រូពេទ្យដើម្បីពិនិត្យរកពីមូលហេតុពិតប្រាកដ។

3/ អារម្មណ៍ និងទង្វើមិននឹងនរ

ការចង់ញ៉ាំអាហារថយចុះ មានបញ្ហាក្នុងការគេង ឬពិបាកក្នុងការគេងលក់ ឬមិនសូវកម្រើកខ្លួន លែងសូវលេង ឬលែងរួសរាយដូចមុន ទាំងអស់នេះសុទ្ធតែជាមូលហេតុដែលត្រូវនាំកូនទៅជួបគ្រូពេទ្យ។

4/ ទំហំក្បាលធំឡើង

ការពិតទៅក្បាលរបស់កូនតូចនឹងត្រូវរីកធំឡើងជារៀងរាល់ខែហ្នឹងគឺជារឿងប្រក្រតី តែបើរីកធំលឿនជ្រុលពេក ឬធំបែបខុសសង្កេត ឬសង្កេតមើលទៅមានអាការតឹងៗនៅម្ដុំបរិវេណក្បាលរបស់កូននោះ អាចជាសញ្ញាដំបូងនៃការកើតជំងឺអាក្រក់ ដូចជា មហារីកខួរក្បាលជាដើម ដូច្នេះកុំបង្អង់យូរ ចូរប្រញាប់នាំកូនទៅជួបគ្រូពេទ្យជាបន្ទាន់។

5/ ស្ដាប់មិនសូវឮ

ពេលដែលឪពុកម្ដាយហៅឈ្មោះកូន តែកូនមិនសូវតបស្នងមកវិញ ហាក់ដូចជាមិនបានឮ ទាំងអាការនេះកើតឡើងបែបភ្លាមៗ បែបសុខៗស្រាប់តែដូចជាកូនត្រចៀកធ្ងន់ ឬក៏កើតអាការបែបហ្នឹងមកយូរហើយនោះ កូនអាចនឹងមានបញ្ហាខាងការស្ដាប់ឮ អាចនឹងទៅរួចដែលថា ប្រព័ន្ធប្រសាទត្រចៀកបាត់បង់សមត្ថភាព ឬមានអ្វីបិទជិតនៅខាងក្នុង ដែលលោកឪពុកអ្នកម្ដាយនឹងបានដឹងច្បាស់តាមរយៈការពិភាក្សាជាមួយគ្រូពេទ្យ ដើម្បីរកមូលហេតុ និងព្យាបាលកូនជាបន្ត។

6/ ស្រេកទឹកជាប់ជានិច្ច

ការពិតទៅធាតុអាកាសក្ដៅដូចនៅក្នុងប្រទេសយើង អាចនិយាយបានថា ជារឿងប្រក្រតីខ្លាំងណាស់ដែលក្មេងៗនឹងស្រេកទឹកញឹកញាប់នោះ តែបើសិនកូនស្រេកទឹកញឹកញាប់រហូតខុសពីធម្មតារៀងរាល់15នាទីម្ដង ឬញ៉ាំទឹកចូលទៅម្ដងច្រើនៗនោះ បង្ហាញថា កូនអាចនឹងមានបញ្ហាសុខភាពបង្កប់នៅក្នុងរាងកាយក៏អាចថាបានដែរ ដូច្នេះគួរតែនាំកូនទៅឱ្យពេទ្យពិនិត្យមើលពីមូលហេតុឱ្យបានច្បាស់លាស់។

7/ ស្រមុកឮខ្លាំងៗ

ទារកកើតដំបូងអាចនឹងគេងស្រមុកគឺជារឿងប្រក្រតី តែបើស្រមុកឮខ្លាំងខុសពីធម្មតា ឬធំហើយនៅតែមិនបាត់ស្រមុកទៀតនោះ មូលហេតុអាចបណ្ដាលមកពីការកើតប្រតិកម្មចាញ់អ្វីមួយ ឬអាចនឹងជាសញ្ញារបស់ការឆ្លងមេរោគអ្វីម្យ៉ាងក៏ថាបានដែរ។ ក្រៅពីនេះអាចដោយសារតែកូនមានក្រពេញថមស៊ីលធំ ក្រពេញអៈឌីណយដ៍ធំ និងភាពធាត់ក៏ជាបច្ច័យមួយដែរ តែករណីដែលធ្ងន់ធ្ងរ ដូចជា មានភាពខុសប្រក្រតីរបស់គ្រោងសាងនៃប្រព័ន្ធដកដង្ហើម ឬមកពីភាពខុសប្រក្រតីខាងពូជអម្បូរក៏មាន ដូច្នេះអាណាព្យាបាលគួរតែនាំកូនតូចទៅឱ្យគ្រូពេទ្យពិនិត្យរកមូលហេតុឱ្យបានច្បាស់ទើបជាការល្អ។

ទោះជាអាការមួយចំនួនមើលទៅប្រក្រតីក្នុងខ្សែភ្នែកមនុស្សធំដូចយើងមែន តែនៅពេលដែលវាជារឿងសុខភាពរបស់កូនតូចជាទីស្រឡាញ់នោះ លោកឪពុអ្នកម្ដាយគួរតែប្រញាប់ប្រញាល់បន្តិច ប្រសើរជាងនាំកូនទៅជួបគ្រូពេទ្យមិនទាន់ពេល៕

February 20, 2018

កម្ពុជានឹងចរចាបង្កើនរថយន្តដឹកជញ្ជូនជាមួយប្រទេសជិតខាង

រាជរដ្ឋាភិបាលកម្ពុជាគ្រោងចរចាជាមួយប្រទេសជិតខាងបង្កើនចំនួនរថយន្តដឹកជញ្ជូនឆ្លងដែនឱ្យកាន់តែច្រើនបន្ថែមទៀតដើម្បីឆ្លើយតបចំពោះតម្រូវការកើនឡើងសម្រាប់ដឹកទំនិញឆ្លងដែន។

បច្ចុប្បន្នកម្ពុជាបានព្រមព្រៀងជាមួយប្រទេសជាប់ព្រំដែនរបស់ខ្លួន ដោយអនុញ្ញាតឲ្យរថយន្តឆ្លងដែនប្រមាណជាជិត 700គ្រឿងប៉ុណ្ណោះក្នុងមួយថ្ងៃ ដោយក្នុងនោះរថយន្តឆ្លងដែនជាមួយឡាវមាន 40គ្រឿង ប្រទេសថៃ 150គ្រឿង និង ប្រទេសវៀតណាម 500គ្រឿង។ នេះបើតាមប្រសាសន៍ ឯកឧត្តមទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន។

ក្នុងឱកាសជួបប្រជុំជាមួយភាគីពាក់ព័ន្ធក្នុងវិស័យដឹកជញ្ជូននាពេលកន្លងទៅ ឯកឧត្តម បានអះអាងថា ក្រសួងសាធារណការ និងដឹកជញ្ជូនកំពុងចរចាជាមួយប្រទេសជិតខាងដើម្បីបង្កើនចំនួនរថយន្តឆ្លងដែនឱ្យបានច្រើនបន្ថែមទៀត ឱ្យឆ្លើយតបទៅនឹងកំណើននៃការធ្វើដំណើរ ក៏ដូចជាការដឹកជញ្ជូនទំនិញឆ្លងកាត់ព្រំដែនផងដែរ។ ឯកឧត្តមបានបញ្ជាក់យ៉ាងច្បាស់ថា “យើងកំពុងចរចាជាមួយប្រទេសជិតខាង ដើម្បីបង្កើនចំនួនរថយន្តឆ្លងដែនបន្ថែមទៀត។

ឧកញ៉ា ឈឹម សុកន ប្រធានក្រុមប្រឹក្សាភិបាលសមាគមដឹកជញ្ជូនផ្លូវគោកបានឱ្យដឹងថា រឿងដឹកជញ្ជូននេះ ក្រសួងត្រូវថ្លឹងថ្លែងឱ្យបានច្បាស់លាស់មុនឈានទៅដល់កិច្ចព្រមព្រៀងថ្មី ព្រោះសព្វថ្ងៃការដឹកជញ្ជូនបានគ្របដណ្តប់លើទិដ្ឋភាពដឹកទំនិញ និងដឹកអ្នកដំណើរ។

ឧកញ៉ា ឈឹម សុកន បានអះអាងថា ការដឹកជញ្ជូនរបស់កម្ពុជាទៅកាន់ប្រទេសវៀតណាម ឬថៃគឺមានចំនួនតិចតួចបំផុត ខណៈការដឹកជញ្ជូនពីប្រទេសទាំងពីរនោះចូលមកកម្ពុជាវិញ មានចំនួនច្រើន ជាពិសេសគ្រប់ដណ្តប់លើទិដ្ឋភាពដឹកអ្នកដំណើរសម្រាប់វិស័យទេសចរណ៍តែម្តង។

ឧកញ៉ា ឈឹម សុកន បញ្ជាក់ថា៖ “ការដឹកជញ្ជូនមានភាពសំខាន់ណាស់សម្រាប់សេដ្ឋកិច្ចទៅវិញទៅមក ប៉ុន្តែកម្ពុជាធ្វើបានតិចណាស់ក្នុងពេលកន្លងមក ហើយការដឹកជញ្ជូនរបស់គេមកកម្ពុជាវិញមានច្រើនណាស់ ជាពិសេសបំផុតនោះ គឺការដឹកជញ្ជូនអ្នកដំណើរតែម្តង។

ទំហំពាណិជ្ជកម្មរវាងកម្ពុជា និងប្រទេសជិតខាង (ថៃ និងវៀតណាម)មានជិត10ពាន់លានដុល្លារក្នុងឆ្នាំ2017កន្លងទៅ ដោយក្នុងនោះទំហំពាណិជ្ជកម្មរវាងកម្ពុជា និងវៀតណាម មានទឹកប្រាក់ចំនួន 3.8ពាន់លានដុល្លារអាមេរិក កើនឡើង 25% បើប្រៀបធៀបនឹងឆ្នាំ2016កន្លងទៅ។ តួលេខនេះត្រូវបានបង្ហាញក្នុងជំនួបទ្វេភាគីរវាង សម្ដេចតេជោ ហ៊ុន សែន និងនាយករដ្ឋមន្ត្រីនៃប្រទេសសង្គមនិយមវៀតណាម ង្វៀន សួនហ្វ៊ុក កាលពីរសៀលថ្ងៃទី10 ខែមករាកន្លងទៅ។

ទំហំពាណិជ្ជកម្មរវាងប្រទេសកម្ពុជា និងថៃក្នុងឆ្នាំ2017កន្លងមក មានរហូតដល់ប្រមាណ5.5ពាន់លានដុល្លារអាមេរិក ដែលចំនួននេះមានការកើនឡើងប្រមាណ 10ភាគរយ បើប្រៀបធៀបនឹងឆ្នាំ2016។ នេះបើយោងតាមតួលេខដែលបានផ្សព្វផ្សាយក្នុងជំនួបរវាងសម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា និងឯកឧត្ដម ប្រាយុទ្ធ ចាន់អូឆា នាយករដ្ឋមន្ត្រីនៃព្រះរាជាណាចក្រថៃ កាលពីថ្ងៃទី10 ខែមករា ឆ្នាំ2018 ដូចគ្នា៕

February 20, 2018

លោក Valverde ទទួលស្គាល់ថា លោកមានការបារម្ភពេល Barca ប៉ះ Chelsea រាត្រីនេះ

ក្រុម Barcelona ពិតជាចង់គេចឱ្យផុតពីការជួបជាមួយនឹងក្រុម Chelsea ក្នុងក្របខ័ណ្ឌ Champions League វគ្គ 16ក្រុមចុងក្រោយ។ នេះបើយោងទៅតាមការបញ្ជាក់របស់អ្នកចាត់ការទូទៅរបស់ពួកគេ។

លោក Ernesto Valverde ដែលបារម្ភពីទម្រង់លេងដ៏មិនគួរឱ្យជឿដែលត្រូវបានបង្ហាញដោយក្រុមរបស់អង់គ្លេសក្នុងយុទ្ធនាការនៅរដូវកាលនេះ។ ក្រុម Chelsea បានបញ្ចប់ដោយស្ថិតក្នុងចំណាត់ថ្នាក់លេខ2 ក្នុងពូល C បន្ទាប់ពីក្រុម Roma ដែលស្ថិតក្នុងចំណាត់ថ្នាក់លេខ3 នៅលើតារាង Serie A ដោយសារតែចាញ់គ្រាប់បាល់នៅក្រៅទឹកដី។

ដោយឡែកក្រុម Barca របស់លោក Valverde បានបញ្ចប់ដោយការនាំមុខ 3ពិន្ទុដាច់លើក្រុម Juventus ដើម្បីឈរលើលេខ1 ក្នុងពូល D និងបានបញ្ជាក់យ៉ាងច្បាស់ថា លោកនឹងរីករាយប្រសិនបើចំណាត់ថ្នាក់មានភាពបញ្ច្រាស់ផ្ទុយពីនេះ។ លោក Valverde បានឱ្យដឹងថា៖ «យើងពិតជាចង់ឱ្យក្រុម Chelsea បញ្ចប់ក្នុងចំណាត់ថ្នាក់លេខ1 ក្នុងពូលរបស់ពួកគេ ហេតុនេះយើងនឹងមិនបានប្រកួតជាមួយពួកគេឡើយ។ ពួកគេជាម្ចាស់ជើងឯកក្របខ័ណ្ឌ Premier League ដែលជាក្រុមដ៏ខ្លាំងមួយ។

ក្រុមអង់គ្លេសនៅឆ្នាំនេះ កំពុងតែស្ថិតក្នុងទម្រង់លេងដ៏ល្អអស្ចារ្យ ពោលគឺខ្លាំងជាងឆ្នាំមុនៗទៅទៀត»។ គ្រូបង្វឹករូបនេះបានប្រាប់បន្តទៀតថា៖ «Chelsea អាចនឹងស្ថិតក្នុងកម្រិតលេងដ៏ខ្លាំងដូចគ្នា។ យើងដឹងបែបនោះ ដោយសារតែអង់គ្លេស មានក្របខ័ណ្ឌលីកដ៏ខ្លាំងមួយ។ ពួកគេនឹងត្រៀមរួចជាស្រេចដើម្បីធ្វើការប្រកួត»។ ក្រុមទាំងពីរ មិនធ្លាប់បានជួបគ្នាសោះក្នុងក្របខ័ណ្ឌ Champions League បើគិតចាប់តាំងពី Chelsea បានកត់ត្រាជ័យជម្នះក្នុងលទ្ធផលទាំងពីរជើង 3-2 លើក្រុម Barcelona ក្នុងដំណើរឆ្ពោះទៅកាន់ការលើកពាននេះកាលពីឆ្នាំ2012។

Chelsea បានកម្តៅសាច់ដុំសម្រាប់ការប្រកួតនៅរាត្រីនេះ តាមរយៈការយកឈ្នះលើក្រុម Hull City ក្នុងលទ្ធផល 4-០ ក្នុងការប្រកួតពាន FA Cup កាលពីថ្ងៃសុក្រ ខណៈដែល Barcelona បានផ្តួលក្រុម Eibar 2-0 ក្នុងក្របខ័ណ្ឌ La Liga កាលពីថ្ងៃសៅរ៍។ ការប្រកួតនេះនឹងចាប់ផ្តើមនៅម៉ោង2:45ទៀបភ្លឺ៕

ប្រភពពី៖ The Guardian

February 20, 2018

ការផ្ទេរប្រាក់ចេញពីកម្ពុជាកើនឡើងខ្លាំងក្នុងឆ្នាំ2017

ការផ្ទេរប្រាក់ចេញពីកម្ពុជាបានកើនឡើងយ៉ាងខ្លាំងក្នុងឆ្នាំ2017កន្លងទៅ ធៀបនឹងឆ្នាំ2016 ប៉ុន្តែអ្នកជំនាញផ្នែកហិរញ្ញវត្ថុអះអាងថា វាជារឿងសាមញ្ញចំពោះប្រទេសដែលពឹងផ្អែកលើការនាំចូលច្រើន ដើម្បីបំពេញតម្រូវការដល់ការប្រើប្រាស់នៅក្នុងប្រទេស ហើយវាគ្មានសញ្ញាណអ្វីគួរឱ្យបារម្ភនោះទេ។

របាយការណ៍របស់ធនាគារជាតិនៃកម្ពុជាបានបង្ហាញថា ការផ្ទេរប្រាក់មានចំនួន 2,052 ប្រតិបត្តិការដោយក្នុងនោះការផ្ទេរប្រាក់ចេញមានចំនួន 1,296 ប្រតិបត្តិការ ស្មើនឹងចំនួនទឹកប្រាក់ 2.2 ប៊ីលានដុល្លារសហរដ្ឋអាមេរិក រីឯការផ្ទេរប្រាក់ចូលមានចំនួន 751 ប្រតិបត្តិការ ស្មើនឹង 0.7 ប៊ីលានដុល្លារ។

ចំនួននៃប្រតិបត្តិការផ្ទេរប្រាក់ចេញពីកម្ពុជាបានកើនឡើងយ៉ាងគំហុករហូតដល់ប្រមាណ0.7 ប៊ីលានដុល្លារអាមេរិក ធៀបនឹងឆ្នាំ2016 ដែលមានត្រឹមតែប្រមាណ 1.5ប៊ីលានដុល្លារមេរិក។

ទិន្នន័យដដែលបានបង្ហាញថា ការផ្ទេរប្រាក់ចូលប្រទេសកម្ពុជាមានកំណើនប្រមាណ 0.2ប៊ីលានដុល្លារអាមេរិក។

បណ្ឌិត អុិន ចាន់នីអ៊ីន ចាន់នី ប្រធាននាយកប្រតិបត្តិនៃធនាគារ អេស៊ីលីដា ភីអិលស៊ី (ACLEDA Bank Plc) បានពន្យល់ថា ទោះបីជាការផ្ទេរប្រាក់ចេញពីប្រទេសកម្ពុជាមានចំនួនច្រើនក្នុងរយៈពេលនេះ ក៏ដោយ ក៏មិនមានសញ្ញាណណាមួយគួរឱ្យបារម្ភនោះទេ ព្រោះការផ្ទេរប្រាក់ចេញនេះជាប់ពាក់ព័ន្ធនឹងសកម្មភាពពាណិជ្ជកម្មរបស់កម្ពុជាជាមួយពិភពលោក។

បណ្ឌិត អុិន ចាន់នី បានបន្តថា កម្ពុជាត្រូវផ្ទេរប្រាក់ចេញទៅកាន់ទីផ្សារអន្តរជាតិដើម្បីទូទាត់ថ្លៃទំនិញ ជាពិសេសវត្ថុធាតុដើមសម្រាប់ផលិតផលវាយនភណ្ឌ ដែលកម្ពុជាត្រូវនាំចូលទាំងស្រុង។

បណ្ឌិត អុិន ចាន់នី បញ្ជាក់ថា៖ “វាមិនមានអ្វីគួរឱ្យបារម្ភនោះទេ ព្រោះកម្ពុជាត្រូវទូទាត់សងថ្លៃនាំចូលទំនិញ។ និយាយជារួម វាជារឿងធម្មតាសម្រាប់ផ្នែកពាណិជ្ជកម្ម ហើយវាគ្មានឥទ្ធិពលអ្វីផ្សេងក្រៅពីនោះទេ។

កម្ពុជាមានទំនាក់ទំនងពាណិជ្ជកម្មជាមួយបណ្តាប្រទេសដែលមានសេដ្ឋកិច្ចរីកចម្រើនដូចជាសហរដ្ឋអាមេរិក កាណាដា ចក្រភពអង់គ្លេស ជប៉ុន សហភាពអឺរ៉ុប សាធារណរដ្ឋកូរ៉េ និង សាធារណរដ្ឋប្រជាមានិតចិន ព្រមទាំងបណ្តាប្រទេសក្នុងតំបន់ ជាពិសេសប្រទេសជិតខាង។ ក្នុងរយៈពេលបីឆ្នាំចុងក្រោយនេះ សាធារណរដ្ឋប្រជាមានិតចិន បានបង្កើនសកម្មភាពវិនិយោគយ៉ាងខ្លាំងនៅប្រទេសកម្ពុជា និងគ្របដណ្តប់លើសើ្ទរគ្រប់វិស័យ។

ជាមួយដំណើរទស្សនកិច្ចជាញឹកញាប់របស់ថ្នាក់ដឹកនាំចិន ភាគីកម្ពុជា និងចិនបានព្រមព្រៀងគ្នាក្នុងការបង្កើនទំហំពាណិជ្ជកម្មទ្វេភាគី រហូតដល់ 6ប៊ីលានដុល្លារនៅឆ្នាំ2020ខាងមុខ។ នេះបើយោងតាមសេចក្តីប្រកាសព័ត៌មានរួម រវាងកម្ពុជា-ចិន កាលពីថ្ងៃទី11 ខែមករា ឆ្នាំ2017។ កម្ពុជានាំចូលផលិតផលសំខាន់ៗពីប្រទេសចិន ដូចជា សម្ភារសំណង់ វត្ថុធាតុដើមសម្រាប់វិស័យវាយនភណ្ឌ ផ្លែឈើ និងផលិតផលជាច្រើនប្រភេទទៀត។

សហរដ្ឋអាមេរិកទទួលទិញផលិតផលសម្លៀកបំពាក់ច្រើនជាងគេ បើប្រៀបធៀបនឹងប្រទេសក្នុងតំបន់ និងទូទាំងពិភពលោកទាំងមូល។

ការនាំចេញរបស់កម្ពុជាទៅកាន់ទីផ្សារសហរដ្ឋអាមេរិកដែលជាដៃគូពាណិជ្ជកម្មទិញទំនិញធំបំផុតទីពីររបស់កម្ពុជា បានបង្ហាញពីការកើនឡើងគួរឱ្យកត់សម្គាល់នៅឆ្នាំ2017 បើប្រៀបធៀបកាលពីឆ្នាំ2016កន្លងទៅ។

ទិន្នន័យក្រសួងពាណិជ្ជកម្មសហរដ្ឋអាមេរិកបានបង្ហាញថា ប្រទេសកម្ពុជាបាននាំចេញមុខទំនិញនានាទៅលក់នៅសហរដ្ឋអាមេរិកក្នុងឆ្នាំ2017 សម្រេចបានក្នុងចំនួនទឹកប្រាក់ 3,064លានដុល្លារអាមេរិក បានកើនឡើងអត្រាជិត 9% បើធៀបនឹងការនាំចេញកាលពីឆ្នាំ2016ដែលសម្រេចបានក្នុងទឹកប្រាក់2,814លានដុល្លារអាមេរិក។ ទំនិញដែលនាំចេញពីកម្ពុជាទៅទីផ្សារអាមេរិកភាគច្រើនជាផលិតផលវាយនភណ្ឌ កាត់ដេរ និងស្បែកជើង ព្រមទាំងប្រភេទទំនិញកាបូបធ្វើដំណើរ និងកាបូបយួរដៃ។

បើប្រៀបធៀបនឹងតំបន់វិញ សហរដ្ឋអាមេរិកគឺជាទីផ្សារធំបំផុតលំដាប់ទី2 សម្រាប់កម្ពុជាបន្ទាប់ពីទីផ្សារសហគមន៍អឺរ៉ុប ក្នុងនោះសហរដ្ឋអាមេរិកបានស្រូបយកផលិតផលដែលមានមូលដ្ឋានផលិតនៅកម្ពុជាក្នុងរង្វង់ពី20% ទៅ30%នៃចំនួនទំនិញសរុប។

កាលពីឆ្នាំមុន រដ្ឋាភិបាលសហរដ្ឋអាមេរិកបានផ្តល់ការអនុគ្រោះពន្ធពាណិជ្ជកម្មទាំងស្រុង ដល់ប្រទេសកម្ពុជា សម្រាប់ប្រភេទកាបូបយូរដៃអ្នកដំណើរដែលចូលទៅកាន់ទីផ្សាររបស់ខ្លួន ដែលនេះគឺជាផ្នែកមួយជំរុញឱ្យការនាំចេញរបស់កម្ពុជាទៅសហរដ្ឋអាមេរិក មានសម្ទុះកើនឡើង៕ការផ្ទេរប្រាក់ចេញពីកម្ពុជាកើនឡើងខ្លាំងក្នុងឆ្នាំ2017