វល័ក្ខ - La Reine Media

វិស័យកសិកម្មកម្ពុជាត្រូវការវិស្វករកសិកម្មដើម្បីទ្រទ្រង់ផលិតកម្ម

ខណៈពេលដែលវិស័យកសិកម្មកម្ពុជាកំពុងប្រឈមនឹងការធ្លាក់ចុះនូវកម្លាំងពលកម្ម អ្នកជំនាញក្នុងវិស័យកសិកម្មកំពុងរៀបចំគម្រោងកំណត់តំបន់ដាំដុះទៅតាមប្រភេទដំណាំ និង សក្តានុពលដី ក៏ដូចជាប្រព័ន្ធគ្រប់គ្រងតាមបច្ចេកវិទ្យាឱ្យមានលក្ខណៈល្អប្រសើរ ដើម្បីធានាប្រសិទ្ធភាពក្នុងការដាំដុះ។

កម្លាំងពលកម្មក្នុងវិស័យកសិកម្មនឹងបន្តធ្លាក់ចុះជាបន្តបន្ទាប់ រហូតនៅត្រឹមប្រមាណតែ 29%ប៉ុណ្ណោះនាទសវត្សរ៍ក្រោយនេះ ហើយធនធានមនុស្សក្នុងវិស័យកសិកម្មថែមទាំងត្រូវការអ្នកជំនាញខ្ពស់ទៀតផងនៅថ្ងៃអនាគត ទើបអាចឆ្លើយតបនឹងទំហំការងារដែលធ្លាប់ដោះស្រាយដោយប្រជាជនប្រមាណ 80%នៃអត្រាប្រជាជនសរុបបាន។ នេះបើយោងតាមក្រសួងកសិកម្ម រុក្ខាប្រមាញ់ និងនេសាទ។

ឯកឧត្តម វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ បានលើកឡើងថា កម្លាំងពលកម្មកសិកម្មបាននិងកំពុងមានការធ្លាក់ចុះជាបន្តបន្ទាប់ ហើយតាមការព្យាកររបស់ក្រសួងបានបង្ហាញថា កម្លាំងពលកម្មនេះនឹងអាចធ្លាក់ចុះមកនៅត្រឹម 29% នៅឆ្នាំ2030 និងធ្លាក់ដល់ 22% នៅឆ្នាំ2050។ របាយការណ៍របស់ក្រសួងកសិកម្ម បានបង្ហាញឱ្យឃើញថា កម្លាំងពលកម្មក្នុងវិស័យកសិកម្មបានធ្លាក់ចុះយ៉ាងគំហុកពី80% នៅឆ្នាំ1993 និង60%នៅឆ្នាំ2005 និងបានធ្លាក់ចុះមកជិត 40%នៅឆ្នាំ2017ដែលទើបកន្លងផុតទៅថ្មីៗនេះ។

មូលហេតុដែលបណ្តាលឱ្យធ្លាក់ចុះកម្លាំងពលកម្មក្នុងវិស័យនេះ គឺបណ្តាលមកពីកសិករខ្នាតតូចរកចំណូលបានពីរបរកសិកម្មស្ថិតនៅថេរ ឬតិចជាងមុន ដែលមិនអាចទ្រទ្រង់នឹងជីវភាពរបស់ខ្លួនក្នុងស្ថានភាពសេដ្ឋកិច្ចជាតិនាពេលបច្ចុប្បន្នបាន។ កត្តានេះបានជំរុញឱ្យកសិករបោះបង់របរកសិកម្ម បែរទៅធ្វើចំណាកស្រុកស្វែងរកការងារដែលទទួលបានចំណូលប្រសើរជាង។

ចរន្តនៃការបន្តធ្លាក់ចុះកម្លាំងពលកម្មក្នុងវិស័យកសិកម្មនេះអាចនឹងបង្កជាក្តីបារម្ភដល់លទ្ធភាពកម្ពុជាក្នុងការអភិវឌ្ឍវិស័យកសិកម្ម ដែលគេតែងចាត់ទុកជាក្បាលម៉ាស៊ីនសេដ្ឋកិច្ច និង ទ្រទ្រង់កំណើនសេដ្ឋកិច្ចប្រកបដោយនិរន្តរភាពនោះ។

របាយការណ៍ក្រសួងកសិកម្ម បានឱ្យដឹងថា កម្លាំងពលកម្មក្នុងវិស័យនេះកាលពីឆ្នាំ2009 មានចំនួន 57.6%នៃពលកម្មសរុប។ អត្រាកម្លាំងពលកម្មបានថយចុះមកត្រឹមតែ 54.8% នៅឆ្នាំ 2010 និងបន្តថយចុះមកនៅត្រឹម 48.7% នៅឆ្នាំ2013។

ឯកឧត្តម វេង សាខុន បានបញ្ជាក់៖ “កសិកម្មនៅប្រទេសកម្ពុជាបាននិងកំពុងប្រែក្លាយពីរបៀបធ្វើកសិកម្មជាលក្ខណៈគ្រួសារ កសិកម្មតាមបែបប្រពៃណី មកធ្វើកសិកម្មតាមបែបប្រពលវប្បកម្ម និងទំនើបកម្មកសិកម្មវិញម្ដង។

ក្រសួងកសិកម្ម រុក្ខាប្រមាញ់ និងនេសាទនឹងបញ្ចប់ការរៀបចំផែនទីបឋមនៃការកំណត់តំបន់ដាំដុះនៅកម្ពុជាឱ្យបានមុនពាក់កណ្តាលខែមីនា ឆ្នាំ2018 ក្នុងគោលបំណងរៀបចំការចាត់ចំណាត់ថ្នាក់ដី គុណភាពដីក្សេត្របរិស្ថាន និងប្រភពទឹកឱ្យសមស្របតាមប្រភេទដំណាំ ដើម្បីឆ្លើយតបចំពោះតម្រូវការទីផ្សារក្នុងស្រុក ក៏ដូចជាទីផ្សារនាំចេញដែរ។ នេះបើតាមការអះអាងរបស់ថ្នាក់ដឹកនាំនៃអគ្គនាយកដ្ឋានកសិកម្ម។

នៅរសៀលថ្ងៃទី21 ខែកុម្ភៈ ឆ្នាំ2018 មន្ត្រីក្រសួងកសិកម្ម រុក្ខាប្រមាញ់ និងនេសាទបានរៀបចំកិច្ចប្រជុំលើកទី2 នៃគណៈកម្មាធិការកំណត់តំបន់ដាំដុះរបស់ក្រសួងកសិកម្ម រុក្ខាប្រមាញ់ និងនេសាទ ដឹកនាំដោយឯកឧត្តម ឡោ រស្មី អនុរដ្ឋលេខាធិការនៃក្រសួងកសិកម្ម។ នេះបើតាមការបញ្ជាក់របស់ឯកឧត្តម ហ៊ាន វណ្ណហន ប្រតិភូរាជរដ្ឋាភិបាលទទួលបន្ទុកអគ្គនាយកដ្ឋានកសិកម្ម។

ឯកឧត្តម ហ៊ាន វណ្ណហន បញ្ជាក់ថា៖ “ការងារកំណត់តំបន់ដាំដុះ (ដំណាំនីមួយៗសមស្របនៅកន្លែងណា) ជាសកម្មភាពគាំទ្រភាពជោគជ័យបេសកកម្មរបស់អគ្គនាយកដ្ឋានកសិកម្ម ដែលត្រូវបំពេញដោយការួមគ្នារវាងនាយកដ្ឋានគ្រប់គ្រងធនធានដី ដំណាំស្រូវ ដំណាំឧស្សាហកម្ម សាកវប្បកម្មដំណាំរួមផ្សំ និងមន្ទីរពិសោធកសិកម្មជាតិ។

គួរបញ្ជាក់ដែរថា យោងតាមកិច្ចប្រជុំរបស់មន្ត្រីជំនាញកសិកម្ម បានឯកភាពគ្នាទៅលើចំណុចសំខាន់ៗជាច្រើនរួមមានដូចជា៖

1) រៀបចំការកំណត់ជាបឋមនូវតំបន់ដាំដុះដោយផ្អែកលើទិន្នន័យពាក់ព័ន្ធដែលមានស្រាប់ ក្នុងនោះទិន្នន័យចំណាត់ថ្នាក់ដីរបស់លោក ក្រូឃ័រនិងប៉ារ៉ាមែត្រចំនួន 5 ដែលផ្តល់ភាពសមស្របដល់ការលូតលាស់នៃដំណាំដែលរួមមាន ប្រភេទដីជម្រាលដី រយៈកម្ពស់ កម្ពស់ទឹកភ្លៀង និងបច្ចុប្បន្នភាពនៃការប្រើប្រាស់ដី។ ការកំណត់នេះ មិនកំណត់លើតំបន់អភិរក្ស និងតំបន់ព្រៃ។

2) ដំណាំអាទិភាពដែលជ្រើសរើសត្រូវផ្អែកលើមុខដំណាំដែល៖

ក)កំពុងមានការពង្រីកផ្ទៃដី

ខ)ដែលកំណត់ក្នុងគោលនយោបាយជាតិ

គ)អាចនឹងផ្តល់ផលចំណេញខ្ពស់ដល់កសិករ

ឃ)ដែលមិនមានសក្តានុពលប៉ះពាល់ធនធានដី។ ផ្អែកលើគោលការណ៍នេះ អង្គប្រជុំ បានសម្រេចយកមុខដំណាំស្រូវ ស្រូវចម្ការ ស្រូវឡើងទឹក ស្វាយចន្ទី ម្រេច ពោត ស្វាយ ទុរេន និងការ៉ុត។

3) ពេលវេលា ត្រូវកំណត់ឱ្យនាយកដ្ឋានដំណាំទាំង 3 ផ្តល់ព័ត៌មានបច្ចេកទេសតាមទម្រង់នៃគោលការណ៍ក្នុងចំណុច 2ខាងលើឱ្យបានមួយមុខដំណាំដែលបានឯកភាពក្នុងរយៈពេល 3ថ្ងៃ ចាប់ពីថ្ងៃនេះជូនដំណឹងទៅនាយកដ្ឋានគ្រប់គ្រងធនធានដី ដើម្បីនាយកដ្ឋាននោះចាត់ការបញ្ចូលក្នុងកម្មវិធីរៀបចំផែនទី។ មន្ទីរពិសោធកសិកម្មជាតិជាជំនួយការក្នុងការវិភាគភាពសមស្របចំពោះទីតាំង និងមុខដំណាំ។

4) រៀបចំគម្រោងផែនការសកម្មភាពពេញលេញរយៈពេល 1ឆ្នាំ (អាចត្រូវការធនធានច្រើន) ឬរយៈពេល 3ឆ្នាំ (អាចត្រូវការធនធានថវិកាតិចជាង)ដោយសកម្មភាពនោះនឹងឈានដល់ការកំណត់តំបន់ដាំដុះមួយកាន់តែមានភាពឥតខ្ចោះខ្ពស់ឡើងដោយផ្អែកលើបច្ចុប្បន្នភាពនៃការវិភាគដីនៅទូទាំងប្រទេសកម្ពុជាឡើងវិញ។ គម្រោងនឹងបញ្ចូលពីសម្ភារការិយាល័យ ឧបករណ៍ថតរូបពីអាកាស រថយន្ត ការបណ្តុះបណ្តាលធនធានមនុស្ស ថ្លៃប្រតិបត្តិការ ជាដើម៕

February 28, 2018

លោក ដួង វិរៈសិទ្ធ បង្ហាញសមត្ថភាពមិនគួឲ្យជឿនៅលើឆាកតន្រី្ត Tiger Street Football Festival 2018

កំពង់ចាម៖ បន្ទាប់ពីទស្សនាការប្រកួតបាលទាត់ដ៏ស្វិតស្វាញ និងជក់ចិត្តនៃក្របខ័ណ្ឌពានរង្វាន់ Tiger Street Football Festival 2018 បងប្អូនដែលរស់នៅក្នុងខេត្តកំពង់ចាម ក៏ទទួលបាននូវភាពសប្បាយរីករាយពីការប្រគំតន្ត្រី Tiger Street Football Festival 2018 ជាមួយនឹងឆាកបែបកុងធើន័រ និងវត្តមានតារាចម្រៀងល្បីៗជាច្រើនរូប។ ជាពិសេសលោក ដួង វិរៈសិទ្ធ បានបង្ហាញសមត្ថភាពដ៏អស្ចារ្យមួយដែលបងប្អូនអ្នកគាំទ្រនឹកស្មានមិនដល់។

អ្វីដែលធ្វើឲ្យបងប្អូននៅខេត្តកំពង់ចាមចាប់អារម្មណ៍ខ្លាំងនោះនៅពេលលោក ដួង វិរៈសិទ្ធ ដើរចេញមកមានស្ពាយហ្គីតាសូឡូមកជាមួយ។ មិនតែប៉ុណ្ណោះ លោកបានបកស្រាយបទចម្រៀងបណ្តើរ និងលេងហ្គីតាបណ្តើរ។ ហើយមើលទៅតារាចម្រៀងប្រចាំផលិតកម្មហង្សមាសរូបនេះ បង្ហាញភាពប៉ិនប្រសព្វក្នុងការលេងហ្គីតាហាក់បីដូចជាអ្នកលេងអាជីពអញ្ចឹង។

សូមបញ្ជាក់ថា សម្រាប់រត្តមានរបស់លោក ដួង វិរៈសិទ្ធ ចំនួន៥បទ គឺច្រៀងជាមួយនឹងការលេងហ្គីតាទាំងអស់ ខណៈដែលការប្រគំតន្ត្រី Tiger Street Football Festival 2018 ប្រចាំមណ្ឌលកំពង់ចាមនេះ ក៏មានវត្តមាន កញ្ញា ពេជ្យ សោភា កញ្ញា ទេព បូព្រឹក្ស លោក G-Devid លោក ឃុន វត្ថា ហើយមានការផ្សាយផ្ទាល់ពីសា្ថនីយ៍ទូរទស្សន៍រស្មីហង្សមាសផងដែរ។

ចំពោះសកម្មភាពផ្សេងៗនៃការប្រគំតន្ត្រី Tiger street Football Festival 2018 នៅខេត្តកំពង់ចាម សូមចូលទៅកាន់ទំព័រហ្វេសប៊ុកផ្លូវការរបស់ស្រាបៀរថៃហ្គ័រ៖ www.facebook.com/TigerBeerKH
#TSFF2018

សូមពិសាដោយការទទួលខុសត្រូវ

February 27, 2018

Apple ជាប់ចំណាត់ថ្នាក់លេខ1 ជាក្រុមហ៊ុនមានភាពច្នៃបង្កើតថ្មីខ្ពស់បំផុតនៅឆ្នាំ2018

ទស្សនាវដ្ដីដ៏ល្បីរបស់អាមេរិក Fast Company ដែលផ្ដោតសំខាន់ទៅលើ Business Media Brand បានចេញផ្សាយនាថ្មីៗនេះថា Apple ជាក្រុមហ៊ុនដែលមានភាពច្នៃប្រឌិត ឬច្នៃបង្កើតថ្មីខ្ពស់បំផុតនៅក្នុងឆ្នាំ2018។

តាមការបញ្ជាក់ពីទស្សនាវដ្ដីខាងលើនេះ បានឱ្យដឹងថា ក្រុមហ៊ុន Apple ដែលទទួលបាននាមជាក្រុមហ៊ុនមានភាពច្នៃបង្កើតថ្មីខ្ពស់បំផុតនេះ ដោយសារតែក្រុមហ៊ុន Apple បានបង្កើតនូវផលិត-

ផលថ្មី3 គឺ AirPod, AR និង iPhone X។ កាលពីឆ្នាំមុន Apple ឈរនៅលេខរៀងទី4 ប៉ុន្តែសម្រាប់ឆ្នាំនេះ Fast Company ហ៊ានផ្ដល់ចំណាត់ថ្នាក់លេខ1 ឱ្យ Apple ក៏ព្រោះតែមានវត្តមាន AirPods, Apple Watch Series 3, ARKi និងiPhone Xដែលផលិតផលទាំងនេះគឺជាការបង្កើតថ្មីទាំងអស់។ ក្រៅពីផលិតផលទាំងអស់នេះ Apple នៅមានបច្ចេកវិទ្យាថ្មីៗជាច្រើនទៀត ដែលសុទ្ធសឹងតែជាការបង្កើតថ្មីទាំងអស់។

គួរបញ្ជាក់ផងដែរថា Fast Company បានផ្ដល់ចំណាត់ថ្នាក់លេខរៀងទី2 ទៅឱ្យក្រុមហ៊ុន Netflix លេខ3 ទៅឱ្យក្រុមហ៊ុន Square លេខ4 ទៅឱ្យក្រុមហ៊ុន Tencent និងលេខ5 គឺក្រុមហ៊ុន Amazon៕

February 27, 2018

ប្រាសាទ ដាវីន កាន់តែផ្អែមល្ហែមជាមួយ អាឡិចដាហ្វី

តាមរយៈបណ្ដាញទំនាក់ទំនងសង្គមហ្វេសប៊ុករបស់តារាបង្ហាញម៉ូដ និងសម្ដែងប្រុស លោក ចន អាឡិចដាហ្វី ដែលត្រូវជាប្អូនប្រុសរបស់លោក ចន អាឡិចហ្សូរ៉ា នោះ បានបង្ហោះវីដេអូជាមួយតារាបង្ហាញម៉ូដស្រី ប្រាសាទ ដាវីន ដែលតាមរយៈវីដេអូរយៈពេលមិនដល់ 1នាទីនោះ គេមើលឃើញថា អ្នកទាំងពីរបានបង្ហាញពីភាពផ្អែមល្ហែម ដោយការប្រឡែងថើបគ្នាយ៉ាងល្អូកល្អិន និងរីករាយនៅលើម៉ូតូកង់បី ខណៈពេលកំពុងតែធ្វើដំណើរ។

យ៉ាងណាមិញ តារាប្រុសវ័យក្មេងរូបនេះ បានរៀបរាប់ជាសារយ៉ាងផ្អែមល្ហែមនៅលើអ៊ីនស្ដាក្រាមរបស់រូបលោកថា «អរគុណព្រះជាម្ចាស់ដែលបាននាំនារីដ៏ស្រស់សោភា (ដែលមិនមែនស្រស់ស្អាតតែរូបរាងខាងក្រៅ ) មកកាន់ពិភពលោកដ៏អស្ចារ្យនេះ #penhbesdoung (ពេញបេះដូង)» ក្នុងនោះផងដែរ សារយ៉ាងផ្អែមជាងទឹកឃ្មុំនេះបានធ្វើឱ្យមហាជនកាន់តែសង្ស័យជាខ្លាំងចំពោះទំនាក់ទំនងជិតស្និទ្ធស្អិតល្មួតរបស់អ្នកទាំងពីរ។

គួររំឭកផងដែរថា កន្លងទៅថ្មីៗនេះ តារាប្រុស ដាហ្វី ធ្លាប់បានបង្ហាញរូបថតពីរសន្លឹកនៅលើហ្វេសប៊ុកដែលគេមើលឃើញថា តារាស្រី ប្រាសាទ ដាវីន កំពុងជិះលើស្មារបស់តួប្រុស ចន អាឡិចដាហ្វី ក្នុងឈុតប៊ីគីនីដ៏សែនសិចស៊ី។ បើទោះជាអ្នកនាងជាស្រីមេម៉ាយកូនមួយក្តី ក៏អ្នកនាងនៅតែមានរូបរាងស្អាតស្រឡូនមិនចាញ់ក្រមុំៗឡើយ នេះក៏ព្រោះតែអ្នកនាងបានហាត់យោហ្គាដែលជាកីឡាកាយវប្បកម្មថ្មីសម្រាប់នារីៗ ក៏អាចជាហេតុបណ្ដាលឱ្យ ដាហ្វី សម្លឹងឃើញរូបនាងផងដែរ៕

Thanks God that bring this beautiful girl(not just outside but inside) to this amazing world #penhbesdoung @davinprasath💙😘😘
A post shared by John AlexDuffy (@du7fy) on Feb 25, 2018 at 8:39pm PST

February 27, 2018

PSG ជឿជាក់ថា Neymar នឹងជាសះស្បើយទាន់ពេលប៉ះក្រុម Real Madrid

Paris Saint-Germain កំពុងតែត្រៀមសម្រាប់ការប្រកួតមួយឱ្យទាន់ពេលវេលាដើម្បីអាចធ្វើឱ្យ Neymar ត្រៀមលក្ខណៈរួចរាល់សម្រាប់ការប្រកួតដ៏សំខាន់ក្នុងក្របខ័ណ្ឌ Champions League ជាមួយនឹងក្រុម Real Madrid នៅសប្តាហ៍ក្រោយ បន្ទាប់ពីរូបគេបានរងរបួសកជើង នៅពេលប្រកួតជាមួយនឹងក្រុម Marseille កាលពីថ្ងៃអាទិត្យ។

តារាឆ្នើមអន្តរជាតិប្រេស៊ីលរូបនេះ ត្រូវបានសែងចេញពីទីលានទាំងទឹកភ្នែក នៅពេលជិតបញ្ចប់ការប្រកួតក្នុងពេលក្រុម PSG ទទួលជ័យជម្នះ 3-០ លើគូប្រជែងដ៏ខ្លាំងរបស់ពួកគេ នាកីឡដ្ឋាន Parc des Princes ក្រោយពីរូបគេបានក្រឡាច់កជើង និងដួលនៅលើទីលានទាំងការឈឺចាប់។

លោក Unai Emery គ្រូបង្វឹករបស់ក្រុម PSG បាននិយាយបន្ទាប់ពីការប្រកួតនេះថា ការត្រួតពិនិត្យជាបឋមក្នុងបន្ទប់ផ្លាស់ប្តូរសម្លៀកបំពាក់ បានបង្ហាញថា Neymar ក្រឡាច់កជើងរបស់គេ។ កាសែត Le Parisien បានចេញផ្សាយថា ខ្សែប្រយុទ្ធវ័យ 26ឆ្នាំរូបនេះបានទទួលការពិនិត្យអាការបន្ថែមទៀតនៅឯមន្ទីរពេទ្យ ក្បែរទីក្រុងប៉ារីស កាលពីព្រឹកថ្ងៃចន្ទ ខណៈដែលការធ្វើតេស្តបានបង្ហាញថា រូបគេមិនរងរបួសធ្ងន់ធ្ងរឡើយ។

បន្ទាប់ពីការប្រកួតកាលពីថ្ងៃអាទិត្យ ខ្សែការពារ Thiago Silva របស់ PSG បាននិយាយថា៖ «ខ្ញុំមិនមែនជាវេជ្ជបណ្ឌិតឡើយ ប៉ុន្តែខ្ញុំគិតថា Neymar នឹងមិនអាចចូលលេងនៅថ្ងៃពុធនេះនៅពេលដែលក្រុម PSG ត្រូវប្រកួតជាមួយនឹងក្រុម Marseille ម្តងទៀតក្នុងពាន French Cup បានឡើយ។ រូបគេត្រូវតែសម្រាក»៕

ប្រភពពី៖ Channel News Asia

February 27, 2018

ដំណាំកាហ្វេ ងាយស្រួលថែទាំ និងមិនបារម្ភពីទីផ្សារលក់ចេញ

និន្នាការនៃការទទួលទានកាហ្វេរបស់ប្រជាជនខ្មែរកាន់តែមានចំនួនច្រើនឡើងៗ មិនថាតែនៅរាជធានីភ្នំពេញ និងនៅតាមទីប្រជុំជនក្នុងបណ្តាខេត្តផ្សេងៗនោះទេ ធ្វើឱ្យទីផ្សារកាហ្វេក្នុងស្រុកកាន់តែមានតម្រូវការច្រើនឡើងៗដែរ។

លោក ប៊ូ សុភាព ម្ចាស់រមណីយដ្ឋានចម្ការកាហ្វេមានប្រសាសន៍ថា បច្ចុប្បន្ននិន្នាការនៃការទទួលទានកាហ្វេពិតជាមានចំនួនច្រើនឡើងៗប្រាកដមែន ហើយតម្រូវការកុម្ម៉ង់ទិញគ្រាប់កាហ្វេក៏មានកាន់តែច្រើនឡើងៗដូចគ្នាដែរ ទាំងកុម្ម៉ង់ទិញក្នុងស្រុក និងក្រៅស្រុក ដែលនេះជាកត្តាជំរុញឱ្យកសិករមួយចំនួនពង្រីកការដាំដុះរបស់ខ្លួនបន្ថែម ហើយកសិករនៅតាមបណ្តាខេត្តមួយចំនួនទៀតក៏បានផ្លាស់ប្តូរឈប់ដាំដំណាំស្វាយ ឬកៅស៊ូដោយងាកមកដាំកាហ្វេជាហូរហែផងដែរ ដូចជាខេត្តមណ្ឌលគិរី រតនគិរី និងកំពង់ចាមជាដើម។

លោកបញ្ជាក់ថា បច្ចុប្បន្នលោកបានពង្រីកការដាំដុះកាហ្វេបានចំនួន 28ហិកតា ដែលមានទីតាំងស្ថិតនៅក្នុងភូមិចំការតែ ឃុំស្ពានមានជ័យ ក្រុងសែនមនោរម្យ ផ្លូវឆ្ពោះទៅទឹកជ្រោះប៊ូស្រាមានចម្ងាយប្រមាណជា 3.5គីឡូម៉ែត្រពីទីរួមខេត្តមណ្ឌលគិរី ដែលមានទេសចរទៅកម្សាន្ត និងទិញកាហ្វេទុកទទួលទានជាលក្ខណៈគ្រួសារជាហូរហែហើយក្រៅពីនោះមានអតិថិជនតាមបណ្តាខេត្តផ្សេងៗបានកុម្ម៉ង់ទិញជាប្រចាំទៀតផង ដែលមានតម្លៃ 20ដុល្លារក្នុងមួយគីឡូក្រាម។ ក្រៅតែពីទីផ្សារក្នុងស្រុកហើយ លោកក៏បានផ្គត់ផ្គង់ទៅឱ្យអតិថិជននៅក្រៅស្រុកទៀតផង ដូចជានៅសហរដ្ឋអាមេរិក ចិនតៃវ៉ាន់ និងកូរ៉េខាងត្បូងជាដើម ប៉ុន្តែចំនួនផ្គត់ផ្គង់ទៅក្រៅស្រុកមិនសូវច្រើនដូចនៅក្នុងស្រុកទេដោយសារតែទម្លាប់នៃការទទួលទានកាហ្វេរបស់ប្រជាជនខ្មែរយើងកាន់តែមានច្រើនឡើងៗហ្នឹងឯង។

កាហ្វេដែលលោកដាំនោះមានពីរប្រភេទ គឺរ៉ូបូស្តា(Robosta) និងអារ៉ាប៊ីកា(Arabica) ប៉ុន្តែប្រភេទដែលងាយស្រួលដាំ និងងាយស្រួលថែទាំនោះ គឺពូជRobosta ដោយសារនីវ៉ូទឹកនៅខេត្តមណ្ឌលគិរីទាបជាងនៅតំបន់ជាប់មាត់សមុទ្រ។

ជាមួយគ្នានេះ លោក ចៅ ស៊ីហូវ អ្នកបច្ចេកទេសប្រចាំរមណីយដ្ឋានកាហ្វេខាងលើបានឱ្យដឹងដែរថា មុននឹងដាំ គេត្រូវយកគ្រាប់កាហ្វេទៅបណ្តុះជាកូនជាមុន រហូតដល់កូនកាហ្វេមានអាយុប្រហែល5 ទៅ6ខែ។ ខណៈពេលកូនកាហ្វេចេញស្លឹកចំនួន6 ឬ7សន្លឹក គេចាប់ផ្តើមយកកូនកាហ្វេទៅដាក់ដាំក្នុងរណ្តៅដែលមានទំហំ 4ម៉ែត្របួនជ្រុង និងជម្រៅ 0.5ម៉ែត្រ ដោយដាំឃ្លាតពីគ្នាចន្លោះ 4ម៉ែត្រ4ជ្រុងពីដើមមួយទៅដើមមួយ(ជារាងការ៉េ)។

អ្នកបច្ចេកទេសខាងលើបន្តថា មុននឹងដាំគេត្រូវជីករណ្តៅទុក រួចហាលឱ្យស្ងួត ដើម្បីសម្លាប់មេរោគក្នុងដីជាមុន រួចហើយទើបគេយកជីលាមកគោមកដាក់ទ្រាប់បាតរណ្តៅ បន្ទាប់មកទើបគេចាប់ផ្តើមដាក់ដាំតែម្តង ដែលក្នុងមួយហិកតា ប្រើកូនដាំបានចន្លោះពី900 ទៅជាង1,000ដើម ជាទូទៅត្រូវចំណាយថ្លៃដាំចន្លោះពីជាង 1,000 ទៅ2,000ដុល្លារក្នុងមួយហិកតា។ ក្រោយពីដាំដុះរួច យើងមិនសូវជាពិបាកថែទាំប៉ុន្មានទេ បើសិនជារដូវវស្សាផង មិនបាច់ស្រោចទឹកទេ តែបើរដូវប្រាំងវិញ ត្រូវស្រោចទឹករយៈពេល7-10ថ្ងៃម្តង រហូតដល់ដើមកាហ្វេឡើងកម្ពស់បានជិត 2ម៉ែត្រ ទើបគេត្រូវក្តិចត្រួយវាចេញ កុំឱ្យដើមកាហ្វេលូតខ្ពស់ពេក ងាយស្រួលថែទាំ និងបេះផ្លែវា។ យ៉ាងណាក៏ដោយ ការដាំកាហ្វេទាមទារឱ្យកសិករថែទាំខ្លាំងចំពោះសត្វល្អិតចង្រៃ ជាពិសេសចៃ និងសត្វខ្មូត។

ជាទូទៅដើមកាហ្វេចាប់ផ្តើមឱ្យផលនៅពេលវាមានអាយុ2 ឬ2ឆ្នាំជាង ប៉ុន្តែនៅពេលកាហ្វេចេញផ្លែដំបូងគេមិនទុកគ្រាប់បេះនៅពេលទុំទេ ពោលគឺកសិករត្រូវដើរកាត់គ្រាប់នោះទម្លាក់ចោល ដើម្បីឱ្យដើមកាហ្វេនៅមានកម្លាំង និងលូតលាស់បានល្អ រហូតដល់កាហ្វេអាយុបាន3-4ឆ្នាំ ទើបវាចាប់ផ្តើមឱ្យផលពេញលេញ ដែលក្នុងមួយហិកតាគេអាចបេះប្រមូលបានពី3 ទៅ5តោនក្នុងមួយឆ្នាំ។ ដើមកាហ្វេឱ្យផលរយៈពេលវែង មានអាយុចាប់ពីជាង20ឆ្នាំ ទៅ30ឆ្នាំ ប៉ុន្តែនៅពេលដែលដើមកាហ្វេចាស់ គេនឹងកាប់ដើមចោល ទុកប្រវែងប្រហែលជាកន្លះម៉ែត្រពីដី ហើយថែទាំជាថ្មីឡើងវិញបន្តទៀត។ កាហ្វេនឹងផ្តល់ផលម្តងទៀតនៅអំឡុងពីរឆ្នាំបន្ទាប់ពីកាប់ដើមចោលលើកដំបូងហើយ៕

February 27, 2018

អ្នកគួរខ្ចីប្រាក់ពីគ្រឹះស្ថានមីក្រូហិរញ្ញវត្ថុ ដែលទទួលបានអាជ្ញាប័ណ្ណពីធនាគារជាតិនៃកម្ពុជា និងគោរពតាមគោលការណ៍ការពារអតិថិជន ទើបជាជម្រើសដ៏ល្អបំផុតក្នុងការចាកផុតពីបំណុលវ័ណ្ឌក

February 27, 2018

កម្ពុជាត្រូវការមគ្គុទេ្ទសក៍ទេសចរណ៍ជាង1ម៉ឺននាក់ទៀតនៅឆ្នាំ2020

ដោយសារកំណើនទេសចរបរទេសដែលចូលមកទស្សនាកម្សាន្តក្នុងប្រទេសកម្ពុជាកាន់តែច្រើនឡើងៗពីមួយឆ្នាំទៅមួយឆ្នាំ បានធ្វើឱ្យកម្ពុជាមានតម្រូវការមគ្គុទេសក៍ទេសចរណ៍ជាង1ម៉ឺននាក់បន្ថែមទៀតសម្រាប់បម្រើក្នុងវិស័យនេះ។

ក្នុងឱកាសអញ្ជើញជួបសំណេះសំណាលជាមួយសិក្ខាកាមមគ្គុទ្ទេសក៍ទេសចរណ៍ថ្នាក់តំបន់សៀមរាប និងតំបន់ជុំវិញជំនាន់ទី24 កាលពីចុងសប្តាហ៍មុន ឯកឧត្តម ថោង ខុន រដ្ឋមន្ត្រីក្រសួងទេសចរណ៍បានលើកឡើងថា មគ្គុទ្ទេសក៍ទេសចរណ៍ជាទូតនាំសារនូវវប្បធម៌ អរិយធម៌ និងកិត្យានុភាពរបស់ជាតិទៅកាន់ភ្ញៀវទេសចរដោយផ្ទាល់ ក្នុងនោះឯកឧត្តមរដ្ឋមន្ត្រីបានលើកឡើងពីទស្សនទានដែលថា «អត្តសញ្ញាណរបស់អ្នកជាអនាគតរបស់អ្នក» គឺសំដៅឱ្យមគ្គុទ្ទេសក៍ទេសចរណ៍ខិតខំពង្រឹងសមត្ថភាព ចំណេះដឹង ជំនាញ ក្រមសីលធម៌វិជ្ជាជីវៈ និងមានអត្តចរិតស្លូតបូត ចូលរួមចំណែកលើកកម្ពស់អត្តសញ្ញាណជាតិ ដែលនឹងនាំមកនូវអនាគតប្រសើរដល់ប្រជាពលរដ្ឋ និងការអភិវឌ្ឍវិស័យទេសចរណ៍កម្ពុជាប្រកបដោយនិរន្តរភាព និងការទទួលខុសត្រូវ។

ឯកឧត្តមបានផ្តាំផ្ញើដល់សិក្ខាកាមទាំងអស់ត្រូវខិតខំពង្រឹងសមត្ថភាពរបស់ខ្លួនបន្ថែមទៀត និងគោរពឱ្យបាននូវក្រមប្រតិបត្តិវិជ្ជាជីវៈ និងក្រមសីលធម៌វិជ្ជាជីវៈមគ្គុទ្ទេសក៍ទេសចរណ៍ នៅពេលប្រកបវិជ្ជាជីវៈមគ្គុទ្ទេសក៍ទេសចរណ៍ និងចៀសវាងឱ្យបាននូវរាល់សកម្មភាពទាំងឡាយណា ដែលប្រាសចាកពីសីលធម៌សង្គម និងអនុក្រឹត្យស្តីពីមគ្គុទ្ទេសក៍ទេសចរណ៍។

សូមរំឭកថា វិស័យទេសចរណ៍កម្ពុជាបានចូលរួមចំណែកប្រមាណ 12% នៃផលិតផលក្នុងស្រុកសរុប (GDP) និងមានការរីកចម្រើនយ៉ាងឆាប់រហ័ស ដោយនៅក្នុងឆ្នាំ2017 កន្លងទៅ កម្ពុជាទទួលបានទេសចរអន្តរជាតិប្រមាណ 5,6លាននាក់ ក្នុងកំណើន 11.8%។ តាមការព្យាករ ទេសចរអន្តរជាតិប្រមាណ 7លាននាក់ នៅឆ្នាំ2020 ឧស្សាហកម្មទេសចរណ៍នឹងបង្កើតឱកាសការងារផ្ទាល់ប្រមាណ 1លាននាក់ និងប្រមាណ 1.2លាននាក់ នៅឆ្នាំ2025 ព្រមទាំងប្រមាណ 1,7លាននាក់ នៅឆ្នាំ2030។

បច្ចុប្បន្ន កម្ពុជាមានមគ្គុទ្ទេសក៍ទេសចរណ៍ជាង 5,000នាក់ និងមានតម្រូវការប្រមាណ 1ម៉ឺននាក់បន្ថែមទៀត ដើម្បីឆ្លើយតបនឹងកំណើនទេសចរជាង7លាននាក់ នៅឆ្នាំ2020៕

February 26, 2018

10ប្រទេសដែលមានអ្នកប្រើ Facebook ច្រើនជាងគេបំផុតនៅដើមឆ្នាំ 2018

បច្ចុប្បន្ន Facebook ត្រូវបានគេទទួលស្គាល់ថា ជាបណ្ដាញសង្គមដ៏ធំ និងមានប្រជាប្រិយភាពមួយដែលមានអ្នកប្រើប្រាស់ច្រើនជាងគេបំផុតរហូតដល់ជាង 2,1ពាន់លាននាក់ ហើយតួលេខនៃការកើនឡើងនេះ ត្រូវបាន Facebook បង្ហាញឱ្យដឹងថា មិនមែនជាពលរដ្ឋអាមេរិកនោះទេ។

ប៉ុន្មានខែមុន អាមេរិក ជាប់ជាប្រទេសមួយដែលមានអ្នកប្រើ Facebook ច្រើនជាងគេបំផុត ប៉ុន្តែសម្រាប់ដើមឆ្នាំ2018 នេះ មិនមែនអាមេរិកទៀតទេ។ តើលោកអ្នកចង់ដឹងទេថា ប្រទេសណាដែលមានអ្នកប្រើ Facebook ច្រើនជាងគេ?

យោងតាមទិន្នន័យរបស់ Facebook និងស្ថាប័នស្រាវជ្រាវ Statista បានឱ្យដឹងថា ឥណ្ឌាបានក្លាយជាប្រទេសដែលមានចំនួនអ្នកប្រើ Facebook ច្រើនជាងគេបំផុត គិតត្រឹមដើមឆ្នាំ 2018 ដោយបានរុញច្រានអាមេរិកឱ្យទៅឈរនៅលេខរៀងទី2។

នៅក្នុងរបាយការណ៍បានបង្ហាញថា ចំនួនអ្នកប្រើ Facebook នៅក្នុងប្រទេសឥណ្ឌាបានកើនឡើងរហូតដល់ជាង 250លាននាក់ ខណៈដែលសហរដ្ឋអាមេរិកមានត្រឹមតែ 230លាននាក់ប៉ុណ្ណោះ។ ចំណែកប្រទេសដែលឈរនៅលេខរៀងទី3 គឺប្រទេសប្រេស៊ីល មានចំនួនអ្នកប្រើ 130លាននាក់ រីឯប្រទេសអង់គ្លេសគឺស្ថិតនៅលេខរៀងទី10។

ខាងក្រោមនេះជាតារាងបង្ហាញពីប្រទេសទាំង 10 ដែលមានអ្នកប្រើប្រាស់ Facebook ច្រើនជាងគេ៖

February 26, 2018

តើធ្វើដូចម្តេចដើម្បីក្លាយជាភ្នាក់ងារអចលនវត្ថុស្របច្បាប់ដោយមិនបាច់បើកក្រុមហ៊ុន?

បច្ចុប្បន្នទោះបីក្រសួងសេដ្ឋកិច្ច និងហិរញ្ញវត្ថុបានចេញសេចក្តីប្រកាស និងអំពាវនាវឱ្យភ្នាក់ងារអចលនវត្ថុ និងក្រុមហ៊ុនទាំងអស់ទៅសុំអាជ្ញាប័ណ្ណជាក្រុមហ៊ុនអចលនវត្ថុស្របច្បាប់ ឬសុំវិញ្ញាបនបត្រវិជ្ជាជីវៈអ្នកជំនាញភ្នាក់ងារអចលនវត្ថុស្របច្បាប់ក៏ដោយ ក៏ប៉ុន្តែនៅមានភ្នាក់ងារអចលនវត្ថុ និងក្រុមហ៊ុនមួយចំនួនមិនទាន់បានបំពេញកាតព្វកិច្ចដើម្បីក្លាយជាភ្នាក់ងារអចលនវត្ថុ និងជាក្រុមហ៊ុនស្របច្បាប់នៅឡើយទេ។ ចំណែកឯបុគ្គលឯកជនដែលរកស៊ីធ្វើជាភ្នាក់ងារនាំភ្ញៀវទិញ-លក់-ជួលអចលនវត្ថុដែលមិនមានក្រុមហ៊ុនត្រឹមត្រូវក៏មានច្រើនណាស់ដែរនៅលើទីផ្សារនេះ។

ពាក់ព័ន្ធករណីនេះលោកឧកញ៉ា ចេង ខេង អគ្គនាយកក្រុមហ៊ុន CPL បានមានប្រសាសន៍ថាៈ សម្រាប់នៅប្រទេសជិតខាងគេបានអនុវត្តគ្រប់ជ្រុងជ្រោយរួចទៅហើយ ហើយក៏ទទួលបានជោគជ័យផងដែរ ពិសេសនៅប្រទេសម៉ាឡេស៊ី និងសាំងហ្គាពួរ ប៉ុន្តែចំពោះប្រទេសកម្ពុជានៅតែមានភ្នាក់ងារអចលនវត្ថុជាច្រើនមិនទាន់មានវិញ្ញាបនបត្រវិជ្ជាជីវៈនៅឡើយ ដោយសារការបើកក្រុមហ៊ុនត្រូវការចំណាយដើមទុនច្រើនទៅលើការរៀបចំឯកសារ ការជ្រើសរើសធនធានមនុស្សដែលមានជំនាញផ្សេងៗ ដូចជាគណនេយ្យ រដ្ឋបាល ទីផ្សារផ្នែកលក់ ជាពិសេសអ្នកជំនាញខាងនាំភ្ញៀវទិញលក់-ជួលអចលនវត្ថុនេះតែម្តង លើសពីនេះភ្នាក់ងារត្រូវស្នើសុំច្បាប់ពីក្រសួងពាក់ព័ន្ធផ្សេងៗដែលធ្វើឱ្យមានការលំបាក និងជួបភាពស្មុគស្មាញច្រើន។ ដើម្បីរួមចំណែកក្នុងវិស័យអចលនវត្ថុ ក្រុមហ៊ុន CPL មានគោលការណ៍មួយចំនួនដែលអាចជួយឱ្យភ្នាក់ងារអចលនវត្ថុដែលគ្មានវិញ្ញាបនបត្រវិជ្ជាជីវៈអាចវិវឌ្ឍខ្លួនទៅជាភ្នាក់ងារអចលនវត្ថុដែលមានគុណវុឌ្ឍិល្អប្រសើរ មានជំនាញច្បាស់លាស់ទៅលើការបំពេញការងាររបស់ខ្លួនប្រកបដោយវិជ្ជាជីវៈ ទទួលបានទំនុកចិត្តនៅលើទីផ្សារ និងទទួលបានភាពជោគជ័យលើការងាររបស់ខ្លួន។

ជាក់ស្ដែងនៅកម្ពុជាគេសង្កេតឃើញថា ភ្នាក់ងារអចលនវត្ថុមួយចំនួននៅតែមិនទាន់មានការយល់ដឹងពីច្បាប់ថាត្រូវធ្វើយ៉ាងណាដើម្បីទទួលបានវិញ្ញាបនបត្រវិជ្ជាជីវៈ? ធ្វើយ៉ាងណាឱ្យមានការជឿជាក់ពីអតិថិជននៅឡើយទេ។ ករណីនេះក្រុមហ៊ុន CPL មានគោលការណ៍មួយចំនួនដើម្បីបណ្តុះបណ្តាលពួកគេឱ្យយល់ដឹងពីច្បាប់ ក្រមសីលធម៌វិជ្ជាជីវៈ និងកម្រៃសេវាដែលយើងត្រូវយកពីអតិថិជនទៅតាមប្រកាសរបស់ក្រសួងសេដ្ឋកិច្ច និងហិរញ្ញវត្ថុដែលបានចែងកាលពីឆ្នាំកន្លងទៅ។

លោកបានបន្តថា បច្ចុប្បន្នភ្នាក់ងារអចលនវត្ថុមាននៅពាសពេញប្រទេសកម្ពុជា មិនថានៅក្នុងក្រុងភ្នំពេញ ឬនៅតាមបណ្តាខេត្តផ្សេងៗនោះទេ ហើយពួកគាត់គ្រប់គ្នាសុទ្ធតែចង់ក្លាយទៅជាភ្នាក់ងារអចលនវត្ថុដែលទទួលស្គាល់ដោយច្បាប់ត្រឹមត្រូវផងដែរ ប៉ុន្តែស្ថិតនៅត្រង់ថា ពួកគាត់មិនដឹងថាត្រូវធ្វើតាមវិធីណា?

ក្រុមហ៊ុនរបស់លោកមានរៀបចំវគ្គបណ្តុះបណ្តាលផ្សេងៗជាច្រើនដែលអនុញ្ញាតឱ្យភ្នាក់ងារអចលនវត្ថុបានចូលរួមសិក្សាលើវគ្គបណ្តុះបណ្តាលនេះដោយឥតគិតថ្លៃ ហើយក្រោយពីបញ្ចប់វគ្គបណ្តុះបណ្តាលនេះ ភ្នាក់ងារអចលនវត្ថុទាំងនោះនឹងយល់ដឹងពីវិជ្ជាជីវៈផ្នែកទិញ-លក់-ជួលអចលនវត្ថុកាន់តែច្បាស់ បន្ទាប់មកក្រុមហ៊ុននឹងអនុញ្ញាតឱ្យពួកគេដាក់ពាក្យចូលជាសមាជិកភ្នាក់ងារអចលនវត្ថុរបស់ក្រុមហ៊ុន។ បើពួកគាត់ពិតជាមានបំណងចង់ចូលរួមជាមួយក្រុមហ៊ុន គឺយើងតម្រូវឱ្យពួកគាត់ត្រូវទៅស្នើសុំវិញ្ញាបនបត្រវិជ្ជាជីវៈអ្នកជំនាញអចលនវត្ថុ ពីក្រសួងសេដ្ឋកិច្ច និងហិរញ្ញវត្ថុក្រោមឈ្មោះក្រុមហ៊ុន CPL។

លើសពីនេះក្រុមហ៊ុនក៏មានយុទ្ធសាស្ត្រ និងគោលដៅដើម្បីជួយឱ្យពួកគាត់ទទួលបានជោគជ័យក្នុងវិស័យមួយនេះផងដែរ។ លោកបញ្ជាក់ថា ជំនាញដែលសំខាន់ក្នុងវិស័យអចលនវត្ថុមានតែ 2ប៉ុណ្ណោះ នោះគឺៈ ជំនាញចុះយកព័ត៌មានអចលនវត្ថុដែលម្ចាស់ដាក់លក់ និងជំនាញណែនាំអចលនវត្ថុទៅឱ្យអ្នកដែលមានតម្រូវការទិញអចលនវត្ថុ។ ក្នុងនាមជាភ្នាក់ងារជំនាញអចលនវត្ថុ ពួកគាត់ត្រូវដឹងច្បាស់ថា ខ្លួនមានជំនាញអ្វីពិតប្រាកដ។

បើសិនជាគាត់មានជំនាញក្នុងការចុះយកព័ត៌មានអចលនវត្ថុ ក្រុមហ៊ុននឹងបង្វឹកគាត់ឱ្យដឹងពីគន្លឹះសំខាន់ៗក្នុងការរៀបចំព័ត៌មានអចលនវត្ថុនោះប្រកបដោយភាពទាក់ទាញ ល្អស្អាត មិនរញ៉េរញ៉ៃ អត្ថប្រយោជន៍របស់អចលនវត្ថុ និងភាពចំណេញក្រោយពីការទិញអចលនវត្ថុនេះ។ លោកបន្ថែមថាក្រោយពេលដែលភ្នាក់ងារអចលនវត្ថុទទួលបាន និងរៀបចំព័ត៌មានគ្រប់ជ្រុងជ្រោយអស់ហើយ ភ្នាក់ងារជំនាញអចលនវត្ថុត្រូវចេះធ្វើទីផ្សារដោយធ្វើការផ្សព្វផ្សាយព័ត៌មានទាំងនេះទៅកាន់សមាជិកផ្សេងៗទៀត ដែលមានក្រុមហ៊ុនរាប់រយ និងមានភ្នាក់ងារអចលនវត្ថុរាប់ពាន់នាក់ផ្សេងទៀតដើម្បីឱ្យពួកគេជួយលក់នូវអ្វីដែលយើងមាន ដោយប្រើប្រាស់គ្រប់ប្រព័ន្ធទំនាក់ទំនង និងប្រព័ន្ធផ្សព្វផ្សាយផ្សេងៗក្នុងការធ្វើឱ្យព័ត៌មាននេះទៅដល់ដៃអតិថិជនដែលមានតម្រូវការទិញពិតប្រាកដ។

ក្រៅពីគន្លឹះសម្រាប់ជំនាញយកព័ត៌មានអចលនវត្ថុ ក្រុមហ៊ុនCPLក៏មានវិធីសាស្ត្របន្ថែមសំខាន់ៗសម្រាប់ភ្នាក់ងារដែលអាចធ្វើឱ្យពួកគាត់មានជំនាញណែនាំអចលនវត្ថុទៅដល់អ្នកដែលមានតម្រូវការទិញអចលនវត្ថុផងដែរ ដើម្បីឱ្យពួកគាត់ក្លាយទៅជាភ្នាក់ងារដែលមានជំនាញលក់អចលនវត្ថុដោយពិតប្រាកដ។ ក្រុមហ៊ុននឹងបង្ហាញពួកគាត់នូវវិធីសាស្ត្រក្នុងការនិយាយទៅកាន់អតិថិជនដើម្បីឱ្យមានការចាប់អារម្មណ៍ ពន្យល់ណែនាំពីអត្ថប្រយោជន៍លក្ខណៈពិសេសរបស់អចលនវត្ថុនោះទៅកាន់អ្នកទិញ ក៏ដូចជាការចរចាផ្សេងៗដែលទាក់ទងនឹងតម្លៃ។ នៅពេលដែលមានការទិញ-លក់កើតឡើងភ្នាក់ងារអចលនវត្ថុនឹងត្រូវបានទទួលប្រាក់កម្រៃជើងសាស្របទៅតាមច្បាប់កំណត់ ចំពោះករណីដែលមានការចូលរួមពីភ្នាក់ងារដទៃ ប្រាក់កម្រៃជើងសានឹងត្រូវចែកឱ្យមានសមធម៌ មានការសប្បាយចិត្តទាំងអស់គ្នា ទើបអាចធ្វើការចុះសម្រុងគ្នាបានយូរអង្វែង និងទទួលបានទំនុកចិត្តកាន់តែខ្ពស់ពីអតិថិជន ព្រមទាំងមានកេរ្តិ៍ឈ្មោះល្អ ដោយចៀសវាងដាច់ខាតការដណ្តើមផលប្រយោជន៍គ្នា។

លោកមានប្រសាសន៍ថា “លក្ខណៈពិសេសរបស់ក្រុមហ៊ុនCPLគឺៈ ក្រុមហ៊ុនមានប្រព័ន្ធគ្រប់គ្រងច្បាស់លាស់ដើម្បីធ្វើឱ្យភ្នាក់ងារទាំងអស់ទទួលបានជោគជ័យ ស្របទៅតាមច្បាប់ និងចែករំលែកផលប្រយោជន៍ដោយយុត្តិធម៌។ ក្នុងនោះដែរ ក្រុមហ៊ុនមានគោលការណ៍បែងចែកចំណាត់ថ្នាក់ការងារទៅតាមចំណេះដឹង និងតួនាទីរបស់ភ្នាក់ងារនីមួយៗ ហើយអត្ថប្រយោជន៍ក៏បែងចែកទៅតាមនោះដែរ មានន័យថា អ្នកខំធ្វើការច្រើនទទួលបានអត្ថប្រយោជន៍ ឬភាគលាភកាន់តែច្រើន ដោយមិនលម្អៀងទៅកាន់អ្នកណាមួយឡើយ។ លើសពីនេះក្រុមហ៊ុនក៏មានគោលការណ៍លើកទឹកចិត្តបន្ថែមទៀត មិនមែនមានតែការបែងចែកប្រាក់សេវាកម្រៃជើងសាមួយមុខនោះទេ គឺពួកគាត់អាចមានឱកាសបានទៅចូលរួមវគ្គបណ្តុះបណ្តាលទាំងក្នុង និងក្រៅប្រទេសដើម្បីបង្កើនចំណេះដឹងជំនាញវិជ្ជាជីវៈ ដែលអាចជាឱកាសសម្រាប់ពួកគាត់មានពេលវេលាដើរកម្សាន្តនៅក្រៅប្រទេសផងដែរ។

មកទល់ពេលបច្ចុប្បន្ននេះក្រុមហ៊ុន CPL មានបុគ្គលិកជាង100 នាក់ និងមានផែនការរើសបុគ្គលិកឱ្យបាន5,000នាក់ទូទាំង 25ខេត្តក្រុងដើម្បីធ្វើជាក្រុមហ៊ុនភ្នាក់ងារអចលនវត្ថុដ៏ធំមួយនៅកម្ពុជា៕

February 26, 2018

Author: វល័ក្ខ