វល័ក្ខ - La Reine Media

ពិព័រណ៍ «លើកកម្ពស់ឯករាជ្យភាពក្នុងការចូលរួមរបស់ជនពិការក្នុងសង្កម»

ភ្នំពេញ៖ អង្គការមជ្ឈមណ្ឌលជីវិតរស់នៅដោយឯករាជ្យនៃជនពិការភ្នំពេញ មានកិត្តិយសធ្វើជាម្ចាស់ផ្ទះទទួលរៀបចំកម្មវិធីវិធីពិព័រណ៍អន្តរជាតិមានឈ្មោះថា «ពិព័រណ៍បណ្ដាញបេះដូងតែមួយនៃជនពិការអាស៊ីឆ្នាំ 2018 នៅកម្ពុជា» នៅក្នុងព្រះរាជាណាចក្រកម្ពុជា ក្រោមអធិបតីភាពដ៏ខ្ពង់ខ្ពស់របស់ ឯកឧត្តម វង សូត រដ្ឋមន្ត្រីក្រសួងសង្គមកិច្ច អតីតយុទ្ធជន និងយុវនីតិសម្បទា ដើម្បីចូលរួមលើកកម្ពស់សិទ្ធិ និងការចូលរួមដោយស្មើភាពរបស់ជនពិការគ្រប់សកម្មភាពសង្គម ជាមួយរាជរដ្ឋាភិបាលកម្ពុជា ក្រោមការដឹកនាំប្រកបដោយគតិបណ្ឌិតរបស់ សម្ដេចអគ្គមហាសេនាបតី តេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា។

ពិព័រណ៍នេះ មានកិច្ចសហការរៀបចំ និងអញ្ជើញចូលរួមពីមិត្តភក្តិមានពិការភាព និងគ្មានពិការភាព មកពី6 ប្រទេស ដូចជា៖ ជប៉ុន សាធារណៈរដ្ឋកូរ៉េ ម៉ុងហ្គោលី ណេប៉ាល់ ប៉ាគីស្ថាន និងតៃវ៉ាន់។

March 1, 2018

កំហុសគឺជាមគ្គុទេសក៍នាំឱ្យជីវិតជោគជ័យ

នៅលើពិភពលោកយើងនេះគ្មានមនុស្សណាម្នាក់អាចគេចផុតពីកំហុសបានទេ តែអ្វីដែលសំខាន់គឺការគ្រប់គ្រងកាលៈទេសៈ និងមានសេចក្តីក្លាហានគ្រប់គ្រាន់ក្នុងការកែច្នៃកំហុសដែលយើងមាននោះឱ្យក្លាយជាប្រយោជន៍សម្រាប់ការរស់នៅ និងប្រកបការងារ។

លោក ចាស្ទីន ដារ៉ា អ៊ុប សាស្ត្រាចារ្យនៃសាកលវិទ្យាល័យបញ្ញាសាស្ត្រកម្ពុជា បានលើកឡើងថា មនុស្សម្នាក់ៗត្រូវតែរៀនឱ្យបានច្រើនពីកំហុសដែលបានកើតឡើង នៅពេលដែលយើងធ្វើខុស យើងនឹងបានស្គាល់រឿងថ្មីមួយបន្ថែមទៀត ដូច្នេះត្រូវក្លាហានទទួលយករឿងថ្មីដែលមានតម្លៃសម្រាប់ជីវិតខ្លួនឯងនោះដោយកុំខ្លាចខុស ព្រោះវានឹងក្លាយជាមេរៀនជីវិតដែលធ្វើឱ្យយើងយល់កាន់តែច្បាស់។ នៅពេលដែលយើងខ្លាចខុស យើងនឹងមិនហ៊ានធ្វើអ្វីទាល់តែសោះ បន្ទាប់មកជីវិតនឹងមិនអាចទទួលបានសមិទ្ធផលថ្មីនៃការអភិវឌ្ឍនោះទេ។

លោក ចាស្ទីន ដារ៉ា អ៊ុប បាននិយាយថា ៖ “កុំខ្លាចកំហុស ខុសចុះ កាន់តែខុសកាន់តែល្អ តែសូមកុំឱ្យខុសក្នុងរឿងដដែល។ មនុស្សម្នាក់ៗអាចរៀនបានច្រើនណាស់ពីកំហុស ចាប់ផ្តើមពីចំណុចខុសទើបរកត្រូវឃើញ យើងនឹងចេះអភិវឌ្ឍខ្លួនឯង យើងនឹងមិនបណ្តោយឱ្យកំហុសនោះកើតឡើងម្តងទៀតឡើយ។

សាស្ត្រាចារ្យ ខាងលើបានលើកជាឧទាហរណ៍ថា ពេលខ្លះប្រសិនបើយើងមានគោលដៅច្បាស់លាស់ដើម្បីធ្វើអ្វីមួយឱ្យល្អប្រសើរហើយ យើងនឹងមិនខ្លាចខុសនោះទេ។ ជាឧទាហរណ៍ លោក Thomas Edison ជាអ្នកដែលរកឃើញអំពូលភ្លើងអគ្គិសនីមុនគេបង្អស់លើពិភពលោកបានលើកឡើងថា វាមិនមែនជាកំហុសទេដែលគាត់បរាជ័យជាង 10,000ដងនោះ តែវាគ្រាន់តែជាការរកឃើញវិធី 10,000យ៉ាងដែលមិនអាចដំណើរការបានតែប៉ុណ្ណោះ ហើយទីបំផុត វិធីចុងក្រោយរបស់គាត់បានធ្វើឱ្យគាត់ទទួលជោគជ័យ។ ប្រសិនបើគ្មានកំហុសទាំងអស់នោះទេ មនុស្សក៏មិនអាចមានអំពូលភ្លើងសម្រាប់បំភ្លឺរហូតដល់ពេលបច្ចុប្បន្ននេះដែរ។

ស្រដៀងគ្នានេះដែរ លោក ថៃ វណ្ណថា នាយកក្រុមហ៊ុនថតរូប @home Photography បានលើកឡើងថា មនុស្សទាំងអស់គ្នាតែងតែមានពេលវេលាធ្វើល្អ សប្បាយចិត្ត និងមានការពិបាកចិត្ត តែអ្វីដែលយើងអាចធ្វើបាន គឺចេះប្រើប្រាស់វិធីគ្រប់គ្រងភាពសោកសៅនោះឱ្យបានល្អ។ នៅពេលដែលយើងធ្វើអ្វីមួយ ហើយយើងគិតថាកំពុងមានកំហុស យើងនឹងមានអារម្មណ៍ថាបាក់ទឹកចិត្ត ឬមានអារម្មណ៍ថាពិបាកចិត្តខ្លាំង ដែលក្នុងពេលនេះវាជាដំណាក់កាលមួយអាចធ្វើឱ្យយើងធ្លាក់ដុនដាបទៅក្នុងសេចក្តីទុក្ខយូរអង្វែង ឬអាចជះផលប៉ះពាល់ជាច្រើនដល់ជីវិត។

លោក ថៃ វណ្ណថា បាននិយាយថា ៖ “មនុស្សយើងម្នាក់ៗមានមុខតែមួយ តែអាចបង្ហាញទឹកមុខបានច្រើនយ៉ាង ដែលពេលខ្លះយើងបង្ហាញទឹកមុខសប្បាយចិត្ត បង្ហាញភាពរីករាយទៅកាន់អ្នកដទៃ បង្ហាញទឹកមុខស្រងូតស្រងាត់ តែជាក់ស្តែងនៅពេលដែលយើងសោកសៅ គឺមានតែយើងខ្លួនឯងម្នាក់គត់ដែលដឹងច្បាស់ ហេតុនេះយើងត្រូវតែចេះប្រើអារម្មណ៍គ្រប់គ្រងភាពសោកសៅនោះឱ្យបាន។

បើតាម លោក ថៃ វណ្ណថា មនុស្សម្នាក់ៗមានសិទ្ធិកើតទុក្ខ ដែលពេលខ្លះជួបនឹងកំហុសដែលមិនអាចចៀសបាន តែអ្វីដែលសំខាន់គឺយើងត្រូវហ៊ានប្រឈមមុខជាមួយវា ហើយចាត់ទុកថាវាជាបទពិសោធយ៉ាងល្អសម្រាប់ជីវិត ព្រោះរឿងរ៉ាវទាំងអស់នេះ សំខាន់ខ្លាំងណាស់សម្រាប់ការរស់នៅ។ ការដកស្រង់យកបទពិសោធនៃវិបត្តិនៅក្នុងជីវិត ជាមេរៀនដែលគ្មានសាលាបង្រៀន ហើយវាក៏ជារឿងដែលធ្វើឱ្យមនុស្សកាន់តែក្លាហាន និងរឹងមាំឡើងផងដែរ។ កុំខ្លាច ឬកុំបណ្តោយខ្លួនឱ្យដុនដាបតាមកំហុស តែត្រូវប្រើវាឱ្យក្លាយជាមេរៀនសំខាន់ដែលអាចផ្តល់ជាបទពិសោធឱ្យជនជំនាន់ក្រោយបានដឹង និងស្គាល់ ចៀសវាងការខាតពេលជាមួយវាម្តងហើយម្តងទៀត ដែលពេលខ្លះកំហុស គឺជាមគ្គុទេសក៍នាំឱ្យជីវិតជោគជ័យ៕

March 1, 2018

Neymar នឹងត្រូវអវត្តមានពេលប៉ះ Real ខណៈ PSG បញ្ជូនរូបគេឱ្យទៅវះកាត់នៅប្រេស៊ីល

តារាឆ្នើមអន្តរជាតិប្រេស៊ីល Neymar របស់ក្លិប Paris Saint-Germain នឹងត្រូវទទួលការវះកាត់ប្រអប់ជើងដែលរងរបួសនៅចុងសប្តាហ៍នេះក្នុងប្រទេសប្រេស៊ីល ខណៈដែលរូបគេនឹងត្រូវអវត្តមានក្នុងពេលក្រុមរបស់គេប៉ះជាមួយនឹងក្រុម Real Madrid ក្នុងការប្រកួតក្របខ័ណ្ឌ Champions League នៅពាក់កណ្តាលសប្តាហ៍ក្រោយ។

ខ្សែប្រយុទ្ធវ័យ 26ឆ្នាំរូបនេះ បានរងរបួសបាក់ឆ្អឹងប្រអប់ជើង និងគ្រេចកជើងរបស់គេ អំឡុងពេលក្រុម PSG បានយកឈ្នះលើក្រុម Marseille ក្នុងលទ្ធផល 3-០ កាលពីថ្ងៃអាទិត្យ។ Neymar បានចាកចេញពីទីលានទាំងទឹកភ្នែក ហើយក្រោយពីបានធ្វើការពិភាក្សាជាមួយនឹងគ្រូបង្វឹកនៃក្រុមជម្រើសជាតិប្រេស៊ីល បច្ចុប្បន្នវាមានភាពច្បាស់លាស់ហើយថា រូបគេត្រូវតែទទួលការវះកាត់។

សេចក្តីថ្លែងការណ៍មួយនៅលើគេហទំព័ររបស់ក្លិប បានឱ្យដឹងកាលពីថ្ងៃពុធថា៖ «ក្រោយពីការព្យាបាលរយៈពេល 3ថ្ងៃដំបូង ក្រោមការត្រួតពិនិត្យយ៉ាងយកចិត្តទុកដាក់ ការពិភាក្សារួមគ្នាមួយត្រូវបានធ្វើឡើងរវាងទាំងបុគ្គលិកគ្រូពេទ្យពីក្លិប Paris Saint-Germain និងក្រុមជម្រើសជាតិប្រេស៊ីល»។ PSG បានបន្ថែមទៀតថា៖ «ដោយផ្អែកទៅលើស្ថានភាពរបស់កីឡាកររូបនេះត្រូវបានគេសម្រេចថា Neymar Jr នឹងទៅទទួលយកការវះកាត់ក្នុងប្រទេសប្រេស៊ីល នៅចុងសប្តាហ៍នេះ។

រូបគេនឹងត្រូវវះកាត់ដោយលោកវេជ្ជបណ្ឌិត Rodrigo Lasmar រួមជាមួយនឹងលោក Saillant ដែលតំណាងឱ្យក្លិប PSG។ នៅមុនពេលការប្រកាសរបស់ក្លិប PSG ឪពុករបស់ Neymar បាននិយាយថា៖ «PSG ដឹងថា ពួកគេនឹងមិនអាចដាក់ក្តីសង្ឃឹមលើ Neymar បានឡើយសម្រាប់ការប្រកួតពេលខាងមុខនេះ។ ការព្យាបាលរបស់គេនឹងមានរយៈពេលពី6 ទៅ 8សប្តាហ៍ មិនថា មានការវះកាត់ ឬអត់ក៏ដោយ»៕

ប្រភពពី៖ Daily Mail

March 1, 2018

ជម្រើសដំបូងនៃពានរង្វាន់អចលនទ្រព្យកម្ពុជាប្រចាំឆ្នាំ 2018 របស់ក្រុមហ៊ុន PropertyGuru

កាលពីថ្ងៃទី20 ខែកុម្ភៈ ឆ្នាំ 2018 គណៈកម្មការវាយតម្លៃឯករាជ្យនៃកម្មវិធីប្រគល់ពានរង្វាន់អចលនទ្រព្យកម្ពុជារបស់ក្រុមហ៊ុន PropertyGuruបានបង្ហាញឈ្មោះអ្នកជាប់ក្នុងបញ្ជីជម្រើសដំបូងសម្រាប់កម្មវិធីប្រគល់ពានរង្វាន់អចលនទ្រព្យកម្ពុជារបស់ក្រុមហ៊ុន PropertyGuru តំណាងដោយ ក្រុមហ៊ុន KHI ដូចខាងក្រោម ។

– ពានរង្វាន់ផ្នែកអភិវឌ្ឍន៍/អ្នកអភិវឌ្ឍន៍ល្អបំផុត
Borey Peng Huoth Group Creed Asia (Cambodia) Co., Ltd និង Triple Gem Assets Co., Ltd។
– ការទទួលស្គាល់ពិសេសក្នុងការអភិវឌ្ឍប្រកបដោយនិរន្តរភាព
Creed Asia (Cambodia) Co., Ltd. និង Triple Gem Assets Co., Ltd។
ពានរង្វាន់ផ្នែកអភិវឌ្ឍន៍ (លំនៅដ្ឋាន)ការអភិវឌ្ឍខុនដូលំដាប់ខ្ពស់ល្អបំផុត (ភ្នំពេញ) CEO KT Pacific និង One Park។
– ការអភិវឌ្ឍខុនដូតម្លៃសមរម្យល្អបំផុត (ភ្នំពេញ)
Star Polaris 23 និង The Parkway។
– ការអភិវឌ្ឍលំនៅដ្ឋានល្អបំផុត (ភ្នំពេញ)
ARATA Garden Residences, Borey The Mekong Royal, Star Platinum Euro Ville និង Star Platinum Rosato។
– ការអភិវឌ្ឍលំនៅដ្ឋានល្អបំផុត (ព្រះសីហនុ)
The Seagate Suite។
– ពានរង្វាន់ផ្នែកអភិវឌ្ឍន៍ (ពាណិជ្ជកម្ម)
– ការអភិវឌ្ឍការិយាល័យល្អបំផុត
CEO KT Pacific Construction និង TheParkway
– ការអភិវឌ្ឍលក់រាយល្អបំផុត
Eden Garden ,Center Euro Park និង The Seagate Suite។
– ការអភិវឌ្ឍការប្រើប្រាស់ចម្រុះល្អបំផុត
CEO KT Pacific ,Greater Euro Ville, The Parkway, The Seagate Suite។
– សេវាកម្មអាផាតមិនល្អបំផុត
CEO KT Pacific, Mansion51 Hotel & Apartment, Tronum។
– ពានរង្វាន់សម្រាប់ការឌីហ្សាញ
– ស្ថាបត្យកម្មឌីហ្សាញខុនដូល្អបំផុត
CEO KT Pacific, Star Polaris 23, The Parkway។
– ការឌីហ្សាញផ្នែកខាងក្នុងខុនដូល្អបំផុត
CEO KT Pacific, Star Polaris 23 ។
– ស្ថាបត្យកម្មឌីហ្សាញលំនៅដ្ឋានល្អបំផុត
ARATA Garden Residences, Borey The Mekong Royal, Star Platinum Euro Ville, Star Platinum Rosato។
– ការឌីហ្សាញផ្នែកខាងក្នុងលំនៅដ្ឋានល្អបំផុត
Star Platinum Euro Ville, Star Platinum Rosato។
– ស្ថាបត្យកម្មឌីហ្សាញលក់រាយល្អបំផុត
Eden Garden, NORO Mall, The Heritage Walk។
– ការឌីហ្សាញផ្នែកខាងក្នុងលក់រាយល្អបំផុត
NORO Mall ដោយ NI Development Co., Ltd.
– ស្ថាបត្យកម្មឌីហ្សាញការិយាល័យល្អបំផុត
Chief Tower និង The Parkway។
– ការឌីហ្សាញផ្នែកខាងក្នុងអាផាតមិនល្អបំផុត
Mansion51 Hotel & Apartment និង Tronum
– ស្ថាបត្យកម្មឌីហ្សាញទេសភាពផ្ទះល្អបំផុត
ARATA Garden Residences, Borey The Mekong Royal, Star Platinum Euro Ville និងStar Platinum Rosato។
– ស្ថាបត្យកម្មឌីហ្សាញទេសភាពលក់រាយល្អបំផុត Eden Garden, Euro Park និង NORO Mall។
– ស្ថាបត្យកម្មឌីហ្សាញទេសភាពប្រើប្រាស់ចម្រុះល្អបំផុត
CEO KT Pacific, Greater Euro Ville, One Park ដោយ GRED និង The Parkway ។
– ពានរង្វាន់ពិសេស
– ការអភិវឌ្ឍឌីហ្សាញសកលល្អបំផុត។ Eden Garden ដោយ Phnom Penh City Center។ការទទួលស្គាល់ពិសេសពីអង្គការ CARE សម្រាប់ការអនុវត្តសំណង់វិជ្ជមាន។ អ្នកឈ្នះនឹងត្រូវប្រកាសនៅក្នុងពិធីលៀងសាយភោជន៍នាថ្ងៃទី16 ខែមីនា ឆ្នាំ 2018។ ការទទួលស្គាល់ពិសេសសម្រាប់សំណង់សាធារណៈ។ អ្នកឈ្នះនឹងត្រូវប្រកាសនៅក្នុងពិធីលៀងសាយភោជន៍នាថ្ងៃទី16 ខែមីនា ឆ្នាំ 2018។

ជម្រើសនៃការបោះពុម្ពផ្សាយ Cambodia Real Estate Personality of the Year លោកហ៊ុន ចាន់សាន ស្ថាបនិក នាយកឌីហ្សាញ និងស្ថាបត្យករចម្បង Re-Edge Architecture + Design៕

March 1, 2018

ដើមឆ្នាំ2018នេះ កម្ពុជាទទួលបានរោងចក្របរទេស17 ចូលមកវិនិយោគបន្ថែមទៀត

ទោះបីជាកម្ពុជាត្រូវបានគេដឹងថា ជិតផុតកូតាលើកលែងពន្ធ100% ក្នុងការនាំផលិតផលរោងចក្រចេញទៅទីផ្សារអ៊ឺរ៉ុបក្ដី ក៏វិនិយោគិនបរទេសនៅបន្តចូលមកបណ្តាក់ទុនលើវិស័យវាយនភណ្ឌជាច្រើនបន្ថែមទៀតគួរកត់សម្គាល់។ គិតត្រឹមខែកុម្ភៈ ដើមឆ្នាំ2018នេះ កម្ពុជាទទួលបានការចុះបញ្ជីសាងសង់រោងចក្រចំនួន 17កន្លែងបន្ថែមទៀត។

យោងតាមរបាយការណ៍របស់ក្រុមប្រឹក្សាអភិវឌ្ឍន៍កម្ពុជា(CDC) បានឱ្យដឹងថា ត្រឹមរយៈពេលជាង 1ខែ ដើមឆ្នាំ2018 កម្ពុជាបានទទួលវិនិយោគិនសាងសង់រោងចក្រវាយនភណ្ឌ និងផ្សេងៗទៀតចំនួន 17 បន្ថែមទៀតក្នុងនោះរួមមាន៖

1.គម្រោងបង្កើតរោងចក្រផលិតស្បែកជើងរបស់ក្រុមហ៊ុន “GRAND ORIENTAL FOOTWEAR INTERNATIONAL CO., LTD” មានទីតាំងវិនិយោគស្ថិតនៅផ្លូវជាតិលេខ4 ភូមិព្រៃពពេល ឃុំពើក ស្រុកអង្គស្នួល ខេត្តកណ្តាល មានទុនវិនិយោគប្រមាណ 4.51លានដុល្លារអាមេរិក និងអាចបង្កើតការងារបានចំនួន 1,575កន្លែង។

2.ក្រុមហ៊ុន “SANYO PACKAGE ASIA (CAMBODIA) CO., LTD” គម្រោងបង្កើតរោងចក្រផលិតផលិតផលពីក្រដាសមានទីតាំងវិនិយោគស្ថិតនៅដីឡូត៍លេខ142 ភូមិលំ សង្កាត់កន្ទោក ខណ្ឌពោធិ៍សែនជ័យ រាជធានីភ្នំពេញក្រោមទុនវិនិយោគប្រមាណ 2.22លានដុល្លារអាមេរិក និងអាចបង្កើតការងារបានចំនួន 76កន្លែង។

3.ក្រុមហ៊ុន “METRO LIFESTYLE DEVELOPMENT CO., LTD” គម្រោងបង្កើតមជ្ឈមណ្ឌលពាណិជ្ជកម្មមានទីតាំងវិនិយោគស្ថិតនៅភូមិមណ្ឌលII សង្កាត់ស្វាយដង្គំ ក្រុងសៀមរាប ខេត្តសៀមរាបមានទុនវិនិយោគប្រមាណ 19.49 លានដុល្លារអាមេរិក និងអាចបង្កើតការងារបានចំនួន 135កន្លែង។

4.ក្រុមហ៊ុន “GLOBAL HOUSE (CAMBODIA) CO., LTD” គម្រោងបង្កើតមជ្ឈមណ្ឌលពាណិជ្ជកម្ម មានទីតាំងវិនិយោគស្ថិតនៅភូមិបាយ៉ាប សង្កាត់ភ្នំពេញថ្មី ខណ្ឌសែនសុខ រាជធានីភ្នំពេញ មានទុនវិនិយោគចំនួន 10លានដុល្លារអាមេរិក និងអាចបង្កើតការងារបានចំនួន 2,000កន្លែង។

5.ក្រុមហ៊ុន “RED BOAT ENTERPRISE CO., LTD” គម្រោងបង្កើតរោងចក្រកែច្នៃផ្លែឈើ និងកែច្នៃម្ហូបអាហារ (ត្រី Anchovies ទឹកត្រី និងស្ករត្នោត )មានទីតាំងវិនិយោគស្ថិតនៅភូមិ1 ឃុំទំនប់រលក ស្រុកស្ទឹងហាវ ខេត្តព្រះសីហនុ មានទុនវិនិយោគប្រមាណ 2.83លានដុល្លារអាមេរិក និងអាចបង្កើតការងារបានចំនួន 384កន្លែង។

6.គម្រោងបង្កើតរោងចក្រផលិតបារីរបស់ក្រុមហ៊ុន “XIANG GANG TOBACCO (CAMBODIA) CO., LTD” ដែលមានទីតាំងវិនិយោគស្ថិតនៅភូមិស្រុកធំ ឃុំជើងកើប ស្រុកកណ្តាលស្ទឹង ខេត្តកណ្តាល មានទុនវិនិយោគប្រមាណ 2.29លានដុល្លារអាមេរិក និងអាចបង្កើតការងារបានចំនួន 312កន្លែង។

7.ក្រុមហ៊ុន “EMAX ELECTRIC CO., LTD” ជាគម្រោងបង្កើតរោងចក្រផ្គុំដំឡើងត្រង់ស្វូអគ្គិសនី និងសម្ភារអគ្គិសនីផ្សេងៗ ដែលមានទីតាំងវិនិយោគស្ថិតនៅដីឡូត៍លេខ 34994 ស្ថិតនៅភូមិភា សង្កាត់ប្រទះឡាង ខណ្ឌដង្កោ រាជធានីភ្នំពេញ មានទុនវិនិយោគប្រមាណ 3.57លានដុល្លារអាមេរិក និងអាចបង្កើតការងារបានចំនួន 205កន្លែង។

8.គម្រោងបង្កើតរោងចក្រផលិតខ្សែរូត និងគ្រឿងបន្សំសម្លៀកបំពាក់របស់ក្រុមហ៊ុន “TH ZIPPER & METAL ACCESSORY (CAMBODIA) CO., LTD” មានទីតាំងវិនិយោគស្ថិតនៅភូមិតានៃ ឃុំតានៃ (អតីតឃុំជើងព្រៃ) ស្រុកព្រៃនប់ ខេត្តព្រះសីហនុ មានទុនវិនិយោគប្រមាណ 13.75លានដុល្លារអាមេរិក និងអាចបង្កើតការងារបានចំនួន 669កន្លែង។

9.គម្រោងបង្កើតរោងចក្រកាត់ដេរសម្លៀកបំពាក់ របស់ក្រុមហ៊ុន “SISOPHON HONG SENG SPORTSWEAR CO., LTD” មានទីតាំងវិនិយោគស្ថិតនៅផ្លូវ៧មករា ភូមិដីឡូត៍ សង្កាត់ទឹកថ្លា ក្រុងសិរីសោភ័ណ ខេត្តបន្ទាយមានជ័យ មានទុនវិនិយោគចំនួន 10លានដុល្លារអាមេរិក និងអាចបង្កើតការងារបានចំនួន 2,035កន្លែង។

10.គម្រោងបង្កើតរោងចក្រកាត់ដេរសម្លៀកបំពាក់នាំចេញ និងបោះពុម្ពបម្រើឱ្យឧស្សាហកម្មនាំចេញរបស់ក្រុមហ៊ុន “QIAN QUN HUANG JIA CO., LTD” មានទីតាំងវិនិយោគស្ថិតនៅភូមិចម្ការ

ឪឡឹក សង្កាត់កាកាប ខណ្ឌពោធិ៍សែនជ័យ រាជធានីភ្នំពេញ មានទុនវិនិយោគប្រមាណ 5.20លានដុល្លារអាមេរិក និងអាចបង្កើតការងារបានចំនួន 1.574កន្លែង។

11.ក្រុមហ៊ុន “JS LEATHER COLLECTION PHNOM PENH CO, LTD” គម្រោងបង្កើតរោងចក្រផលិតកាបូបគ្រប់ប្រភេទ ដែលមានទីតាំងវិនិយោគស្ថិតនៅភូមិព្រៃល្ង សង្កាត់ចោមចៅ ខណ្ឌពោធិ៍សែនជ័យ រាជធានីភ្នំពេញ មានទុនវិនិយោគប្រមាណ 3.49លានដុល្លារអាមេរិក និងអាចបង្កើតការងារបានចំនួន 770កន្លែង។

12.ក្រុមហ៊ុន “NANWANG TRAVEL GOODS CO., LTD” គម្រោងបង្កើតរោងចក្រផលិតកាបូបគ្រប់ប្រភេទដែលមានទីតាំងវិនិយោគស្ថិតនៅផ្លូវជាតិលេខ4 ភូមិរំដួល ឃុំត្រពាំងគង ស្រុកសំរោងទងខេត្តកំពង់ស្ពឺ មានទុនវិនិយោគប្រមាណ 2.82លានដុល្លារអាមេរិក និងអាចបង្កើតការងារបានចំនួន 770កន្លែង។

13.ក្រុមហ៊ុន “MONTI APPAREL (CAMBODIA) CO., LTD” គម្រោងបង្កើតរោងចក្រកាត់ដេរសម្លៀកបំពាក់ដែលមានទីតាំងវិនិយោគស្ថិតនៅភូមិទួលពង្រ សង្កាត់ចោមចៅ ខណ្ឌពោធិ៍សែនជ័យ រាជធានីភ្នំពេញ មានទុនវិនិយោគប្រមាណ 2.37លានដុល្លារ និងអាចបង្កើតការងារបានចំនួន 859 កន្លែង។

14.ក្រុមហ៊ុន “CAMBODIAN CHAOTHUO MINING & METALLURGY CO., LTD.” គម្រោងបង្កើតរោងចក្រផលិតស្ពាន់ សារធាតុសំណ ស័ង្កសីនិងអាស៊ីតស៊ុលផួរិក មានទីតាំងវិនិយោគស្ថិតនៅក្នុងតំបន់សេដ្ឋកិច្ចពិសេសក្រុងព្រះសីហនុ ខេត្តព្រះសីហនុ មានទុនវិនិយោគចំនួន 30លានដុល្លារនិងអាចបង្កើតការងារបានចំនួន 440កន្លែង។

15.ក្រុមហ៊ុន “KING ELEPHANT CONSTRUCTION MATERIAL INDUSTRIAL CO., LTD.”គម្រោងបង្កើតរោងចក្រផលិតស៊ីម៉ង់ត៍មានទីតាំងវិនិយោគស្ថិតនៅក្នុងតំបន់សេដ្ឋកិច្ចពិសេសខេត្តព្រះសីហនុមានទុនវិនិយោគចំនួន 20.1លានដុល្លារអាមេរិក និងអាចបង្កើតការងារបានចំនួន 59កន្លែង។

16.ក្រុមហ៊ុន “HE YI TECHNOLOGY (CAMBODIA) PRINTING & PACKAGING CO., LTD.” គម្រោងបង្កើតរោងចក្រផលិតសម្ភារវេចខ្ចប់ កេសក្រដាសកាតុង ប្រអប់/ថង់ប្លាស្ទិក និងបោះពុម្ពលើសម្ភារវេចខ្ចប់មានទីតាំងវិនិយោគស្ថិតនៅក្នុងតំបន់សេដ្ឋកិច្ចពិសេសស្វាយរៀងហ្គីហ្គា រីសស៍ ខេត្តស្វាយរៀង មានទុនវិនិយោគចំនួន 5លានដុល្លារនិងអាចបង្កើតការងារបានចំនួន 483កន្លែង។

17.ក្រុមហ៊ុន “WEICHUANG COMMODITY (CAMBODIA) CO., LTD.” គម្រោងបង្កើតរោងចក្រផលិតវត្ថុអនុស្សាវរីយ៍មានទីតាំងវិនិយោគស្ថិតនៅក្នុងតំបន់សេដ្ឋកិច្ចពិសេសក្រុងព្រះសីហនុ ខេត្តព្រះសីហនុមានទុនវិនិយោគចំនួន 1លានដុល្លារនិងអាចបង្កើតការងារបានចំនួន 313កន្លែង៕

March 1, 2018

ក្រុមហ៊ុនចម្រោះទឹកស្អាតម៉ាឡេស៊ីត្រៀមផ្តល់សេវាកម្មទឹកស្អាតនៅជនបទ

ដោយមើលឃើញថា ប្រជាជនកម្ពុជានៅតាមទីជនបទភាគច្រើននៅមិនទាន់មានទឹកស្អាតប្រើប្រាស់នៅឡើយនោះ ក្រុមហ៊ុនចម្រោះទឹកស្អាតដ៏ធំមួយរបស់ប្រទេសម៉ាឡេស៊ីគ្រោងចូលមកផ្គត់ផ្គង់ទឹកស្អាតនៅតាមទីជនបទនានា ដើម្បីជួយលើកកម្ពស់សុខភាពប្រជាជន។

លោក Andrew Cheah ប្រធានក្រុមហ៊ុន Isza-SoliadWatermech JV មកពីប្រទេសម៉ាឡេស៊ីមានប្រសាសន៍ថា ក្រុមហ៊ុនរបស់លោកមានបំណងនាំចូលនូវប្រព័ន្ធចម្រោះទឹកខ្នាតតូច ដែលមានសមត្ថភាពចម្រោះទឹកដែលបូមពីក្រោមដី និងធ្វើឱ្យស្អាតបានប្រមាណ 5ម៉ែត្រត្រីគុណ(ម៉ែត្រគុប)ក្នុងមួយម៉ោងសម្រាប់លក់ឱ្យប្រជាពលរដ្ឋនៅតាមតំបន់ដាច់ស្រយាល ឬតំបន់ខ្វះខាតទឹកក្នុងតម្លៃថោក។ ជាមួយគ្នានេះ ក្រុមហ៊ុនលោកក៏មានបំណងវិនិយោគការយកខ្សាច់ទន្លេទៅលាងសម្អាត តាមលក្ខណៈបច្ចេកទេស សម្រាប់ផ្គត់ផ្គង់ឱ្យរោងចក្រផលិតទឹកស្អាតរដ្ឋ និងឯកជននៅកម្ពុជាផងដែរ ហើយក្រុមហ៊ុនក៏មានជំនាញផ្នែកធ្វើអាងប្រព្រឹត្តិកម្មទឹកកខ្វក់ចេញពីរោងចក្រថែមទៀតផង។

ឯកឧត្តម ទេសរដ្ឋមន្ត្រី ចម ប្រសិទ្ធ បានស្វាគមន៍ និងវាយតម្លៃខ្ពស់ចំពោះបច្ចេកទេសរបស់ក្រុមហ៊ុន ដោយបានជំរុញឱ្យការចុះហត្ថលេខាលើអនុស្សរណៈយោគយល់គ្នាឱ្យបានឆាប់ ពីព្រោះក្នុងចន្លោះពេលដែលរដ្ឋ ឬវិស័យឯកជនមិនទាន់មានលទ្ធភាពតបណ្តាញទឹកស្អាតតាមបំពង់ទៅដល់ផ្ទះរបស់ប្រជាពលរដ្ឋ ជាពិសេសតំបន់មាត់សមុទ្រ និងតំបន់ដាច់ស្រយាលនោះ ការប្រើប្រាស់ប្រព័ន្ធចម្រោះទឹកខ្នាតតូចនេះមានសារៈសំខាន់ណាស់ក្នុងការជួយឱ្យប្រជាពលរដ្ឋបានទទួលទឹកស្អាតប្រើប្រាស់ក្នុងកម្រិតអតិបរមា កាត់បន្ថយការប្រើប្រាស់ទឹកមិនស្អាតដែលនាំឱ្យកើតមានជម្ងឺដង្កាត់ផ្សេង។

ក្នុងនោះ ឯកឧត្តម ទេស រដ្ឋមន្ត្រី បានស្នើឱ្យតំណាងក្រុមហ៊ុនពិនិត្យលទ្ធភាព បង្កើតរោងចក្រផលិតឧបករណ៍នេះនៅកម្ពុជាតែម្តង ដើម្បីកាត់បន្ថយការចំណាយលើការដឹកជញ្ជូន និងជួយដល់ទីផ្សារការងារនៅកម្ពុជាផងដែរ៕

March 1, 2018

កូនមិនស្តាប់បង្គាប់កើតចេញពីមូលហេតុអ្វីខ្លះ?

អាណាព្យាបាលជាច្រើនតែងតែបន្ទោសដល់កូនតូចៗ ឬដាក់បន្ទុកតែលើស្ថាប័នអប់រំ តែពេលខ្លះមានរឿងជាច្រើនដែលអាណាព្យាបាលខ្លួនឯងកំពុងធ្វើខុសទាំងមិនដឹងខ្លួន។

គេហទំព័រអប់រំ Education World បានលើកឡើងថា កុមារតូចៗភាគច្រើនចាប់ផ្ដើមកសាងអត្តចរិតតាំងពីនៅវ័យក្មេងខ្ចីបំផុត ដែលពេលខ្លះអាណាព្យាបាលទាំងឡាយស្ទើរតែមិនជឿថា ក្មេងដែលមិនទាន់ទាំងចេះនិយាយផង អាចចេះសង្កេត រួមទាំងចាប់ផ្តើមកើតជាចរិតលក្ខណៈទៅហើយ។ អ្នកជំនាញផ្នែកអប់រំបានលើកឡើងថា ប្រសិនបើអាណាព្យាបាលមិនប្រុងប្រយ័ត្ន ហើយមានការធ្វេសប្រហែសនៅចំពោះមុខកូនតូចៗរបស់ខ្លួននោះ ពួកគេអាចនឹងចងចាំនូវរឿងទាំងអស់នោះទុក ហើយទទួលយករឿងអវិជ្ជមានទាំងអស់នោះតែម្ដង ដែលកត្តាទាំងនេះអាចធ្វើឱ្យអាណាព្យាបាលទាំងនោះឈឺក្បាលនៅថ្ងៃក្រោយបាន។

អ្នកជំនាញចិត្តសាស្ត្រកុមារបានណែនាំថា ប្រសិនបើកុមារ មានអត្តចរិតអវិជ្ជមានណាមួយដែលយើងគិតថាក្មេងមិនគួរធ្វើ យើងអាចសាកល្បងគិតពិចារណាទៅមើលថា តើសកម្មភាពនោះ យើងធ្លាប់ធ្វើដោយខ្លួនឯងដែរឬទេពីមុនមក? ព្រោះថា កុមារមិនចេះនិយាយក៏អាចរៀនយល់ដឹងបានដែរ។ អាណាព្យាបាលគួរសិក្សាពីវិធីសាស្ត្រដើម្បីបង្រៀនកូន និងកែប្រែចំណុចយល់ខុសមួយចំនួនដែលអាចប៉ះពាល់ដល់កុមារនៅថ្ងៃអនាគត។ ឪពុកម្តាយភាគច្រើនលើពិភពលោក តែងតែចាត់ទុកកុមារតូចៗថា ជាវ័យដែលនៅមិនទាន់ដឹងអី តែតាមពិតការគិតបែបនេះគឺខុសទាំងស្រុងចំពោះការអប់រំកូន។ មានអាណាព្យាបាលខ្លះបែរជាគិតថា កុមារគួរតែត្រូវបានបង្រៀនដូចមនុស្សធំ ឬធ្វើអ្វីៗតាមបែបផែនមនុស្សធំដើម្បីបង្រៀនកូនតូចៗ ដូចជាការបង្ខំឱ្យអានអត្ថបទដែលគ្មានរូបភាពសៀវភៅក្រាស់ៗ ឬបង្ខំឱ្យស្តាប់រឿងដ៏គួរឱ្យធុញទ្រាន់សម្រាប់ពួកគេជាដើម។ ហេតុផលនេះ កុមារដែលបង្ខំឱ្យរៀនលើសពីសមត្ថភាពរបស់ពួកគេប្រាកដជាមានប្រតិកម្មតបវិញ ឬប្រឆាំងជាមួយនឹងបំណងរបស់មនុស្សធំមិនខាន។

ម្យ៉ាងវិញទៀត កុមារ គឺជាវ័យដែលពូកែឆ្ងល់បំផុត ហើយអ្នកជំនាញអប់រំកុមារបានស្រាវជ្រាវរកឃើញថា កុមារអាយុក្រោម 6ឆ្នាំ អាចសួរច្រើនជាង 200សំណួរក្នុងមួយថ្ងៃ ព្រោះអ្វីគ្រប់យ៉ាងដែលគេជួបប្រទះសុទ្ធតែជារឿងដែលពួកគេមិនស្គាល់ ហើយជារឿងដែលពួកគេចង់ដឹងគ្រប់យ៉ាង។ នៅពេលនោះប្រសិនបើមនុស្សធំដែលអាចជាអាណាព្យាបាល ឬជាអ្នកនៅជុំវិញខ្លួនពួកគេមិនព្យាយាមឆ្លើយជាមួយនឹងសំណួរហើយបែរជាស្តីបន្ទោសដោយក្ដីរំខាន កុមារអាចនឹងឈប់សួរ បន្ទាប់មកគេក៏លែងចង់ស្វែងយល់ពីរឿងទាំងអស់នោះដែរ ហេតុនេះគេអាចនឹងក្លាយជាមនុស្សដែលមិនសូវសកម្ម ឬមិនសូវឆ្លាតនៅពេលគេធំឡើង។ ស្របនឹងបញ្ហានេះដែរ ប្រសិនបើអាណាព្យាបាលឆ្លើយសំណួរកុមារតូចឱ្យតែរួចពីមាត់ គឺស្មើនឹងគាត់បង្រៀនកុមារខុស ដែលជាហេតុធ្វើឱ្យកុមារក្លាយជាមនុស្សដែលធ្វើរឿងមិនត្រឹមត្រូវនៅថ្ងៃអនាគតបាន។

ជារួម សកម្មភាព និងការយល់ខុសរបស់មនុស្សធំ ដែលមិនយល់ពីការអប់រំកុមារ អាចកំណត់វាសនារបស់កុមារបាន ហើយកត្តានេះនឹងធ្វើឱ្យមនុស្សធំខ្លួនឯងឈឺក្បាលនៅថ្ងៃក្រោយ៕

February 28, 2018

Real Madrid ចាញ់ទាំងអាម៉ាស់នៅលើទឹកដី Espanyol មុនពេលប៉ះ PSG

ខ្សែប្រយុទ្ធ Gerard Moreno បានរកគ្រាប់បាល់ឈ្នះនៅនាទីទី93 ដែលធ្វើឱ្យក្រុម Espanyol ផ្តួលក្រុម Real Madrid ដែលជាម្ចាស់ជើងឯកក្របខ័ណ្ឌ La Liga ក្នុងលទ្ធផល 1-0 កាលពីថ្ងៃអង្គារ។

ការដណ្តើមបានជ័យជម្នះជាប់ៗគ្នារបស់ក្រុម Real Madrid ត្រូវបានបញ្ចប់ត្រឹម 5ប្រកួត ខណៈដែលការស៊ុតបាល់ពីចម្ងាយចូលទីយ៉ាងល្អរបស់ Moreno បានជួយឱ្យក្រុម Espanyol ដណ្តើមបានជ័យជម្នះជាលើកទី 1 របស់ពួកគេលើក្រុម Real ក្នុងចំណោមការជួបគ្នា 22លើកកន្លងមក។

លទ្ធផលនេះ មានន័យថា Real ស្ថិតក្នុងចំណាត់ថ្នាក់លេខ 3 ដោយដេញតាមពីក្រោយក្រុមកំពុងនាំមុខ Barcelona 14ពិន្ទុ ខណៈដែល Esp កំពុងតែស្ថិតក្នុងចំណាត់ថ្នាក់លេខ13 ដោយនាំមុខ 12ពិន្ទុលើក្រុមស្ថិតក្នុងតំបន់កាត់ចោល។ លទ្ធផលនេះក៏បានបង្ហាញថា ការត្រៀមលក្ខណៈផ្សេងៗរបស់ក្រុម Real Madrid សម្រាប់ការប្រកួតដ៏សំខាន់ក្នុងក្របខ័ណ្ឌ Champions League វគ្គ 16ក្រុមចុងក្រោយ ជើងទី2 ជាមួយនឹងក្រុមយក្សរបស់បារាំង Paris Saint-Germain បានបញ្ចប់ទាំងការខកចិត្ត។

ប្រយុទ្ធ Gareth Bale, Marco Asensio និងខ្សែបម្រើ Isco សុទ្ធសឹងបានជួបភាពត្រដាបត្រដួសក្នុងការបង្ហាញថ្វីជើងរបស់ពួកគេ ខណៈដែលតារាឆ្នើមទាំង 3 បានខ្ជះខ្ជាយឱកាសជាច្រើនក្នុងការបង្កើតឱ្យមានការចាប់អារម្មណ៍ នៅមុនពេលការប្រកួតដ៏សំខាន់ក្នុងក្របខ័ណ្ឌ Champions League នៅពាក់កណ្តាលសប្តាហ៍ក្រោយ។ ប៉ុន្តែ ទោះបីជាយ៉ាងណា លោក Zinedine Zidane មិនបានធ្វើការរិះគន់ទៅលើទម្រង់លេងរបស់ Bale ឬ កីឡាករផ្សេងទៀតឡើយ បន្ទាប់ពីការប្រកួតនេះ។

គ្រូបង្វឹករូបនេះបានឱ្យដឹងថា៖ «ប្រសិនបើអ្នកចាញ់នៅថ្ងៃនេះ វាដោយសារតែអ្វីៗមិនដំណើរការល្អ និងព្រោះហេតុផលជាច្រើន មិនមែនដោយសារតែកីឡាករម្នាក់ណាឡើយ»៕

ប្រភពពី៖ Sky Sports

February 28, 2018

Mane៖ ក្រុមណាក៏ Liverpool អាចផ្ដួលបានទាំងអស់

ខ្សែប្រយុទ្ធ Sadio Mane បានបញ្ជាក់ថា ក្រុម Liverpool «អាចផ្តួលក្រុមណាក៏បានក្នុងពិភពលោក» ខណៈដែលក្រុមរបស់លោក Jurgen Klopp កំពុងតែប្រជែងយកចំណាត់ថ្នាក់លេខ 2 នៅលើតារាងក្របខ័ណ្ឌ Premier League និងសម្លឹងកៅអីវគ្គ 8ក្រុមចុងក្រោយនៃក្របខ័ណ្ឌ Champions League។

Liverpool កំពុងតែស្ថិតក្នុងចំណាត់ថ្នាក់លេខ 3 នៅលើតារាង ដោយមាន 2ពិន្ទុតាមពីក្រោយក្រុម Manchester United ក្រោយពីចាញ់ត្រឹមតែ 1លើកគត់ក្នុងការប្រកួត 19លើកចុងក្រោយរបស់ពួកគេនៃក្របខ័ណ្ឌ Premier League និងកំពុងតែជឿជាក់ខ្ពស់ក្នុងការឈានទៅវគ្គបន្តនៃក្របខ័ណ្ឌអឺរ៉ុប ក្រោយពីបានផ្តួលក្រុម Porto 5-0 ក្នុងការប្រកួតជើងទី 1នៃវគ្គ 16ក្រុមចុងក្រោយរបស់ពួកគេ។

ក្រុមហង្សក្រហមរបស់លោក Klopp បានស៊ុតបាល់បញ្ចូលទីដល់ទៅ 103គ្រាប់ក្នុងរាល់យុទ្ធនាការទាំងអស់នៅរដូវកាលនេះ ខណៈដែលខ្សែប្រយុទ្ធរបស់ពួកគេដែលរួមមាន Mane, Mohamed Salah និង Roberto Firmino សុទ្ធសឹងអាចទម្លុះតំបន់ការពាររបស់គូបដិបក្ខបានយ៉ាងងាយស្រួល។

Mane បានប្រាប់គេហទំព័ររបស់ក្រុម Liverpool ថា៖ «ខ្ញុំមានអារម្មណ៍ថា ក្លិបនេះកំពុងតែធ្វើដំណើរទៅមុខក្នុងទិសដៅដ៏ត្រឹមត្រូវ។ Liverpool បានជួបការលំបាកអស់រយៈពេលជាច្រើនឆ្នាំ ប៉ុន្តែ រឿងទាំងនោះកើតឡើងក្នុងរាល់ក្លិបទាំងអស់ក្នុងពិភពលោក»។

តារាឆ្នើមអន្តរជាតិសេណេហ្គាល់រូបនេះបានបន្ថែមទៀតថា៖ «នៅពេលនេះ យើងកំពុងតែស្ថិតក្នុងទម្រង់លេងយ៉ាងល្អ ហេតុនេះរាល់អ្វីៗទាំងអស់គឺអាចទៅរួច។ ខ្ញុំគិតថា យើងបានរីកចម្រើនយ៉ាងខ្លាំង ក្នុងរយៈពេលប៉ុន្មានខែចុងក្រោយនេះ។ យើងដឹងថា ក្រុមណាក៏យើងអាចផ្តួលបានទាំងអស់ក្នុងពិភពលោកនេះ»៕

ប្រភពពី៖ Sport24

February 28, 2018

TVET កំពុងស្ថិតក្នុងតម្រូវការរបស់សង្គមនាពេលបច្ចុប្បន្ន និងអនាគត

ការបណ្តុះបណ្តាលបច្ចេកទេស និងវិជ្ជាជីវៈ (Technical and Vocational Education and Training ហៅកាត់ថា TVET) ជាផ្នែកមួយមិនអាចខ្វះបាននៅកម្ពុជា ព្រោះបច្ចុប្បន្ននេះសង្គមចាប់ផ្តើមត្រូវការធនធានមនុស្សកាន់តែច្រើនឡើងដើម្បីអភិវឌ្ឍលើផ្នែកឧស្សាហកម្ម និងសំណង់អគារជាដើម។

ឯកឧត្តម ពេជ សោភ័ន រដ្ឋលេខាធិការក្រសួងការងារ និងបណ្តុះបណ្តាលវិជ្ជាជីវៈ បានលើកឡើងថា TVET ជាប្រព័ន្ធសំខាន់មួយក្នុងទីផ្សាការងារនៅកម្ពុជា ក៏ដូចជាការអភិវឌ្ឍសង្គមទាំងមូលផងដែរ ព្រោះនៅពេលបច្ចុប្បន្ននេះ សំណង់អគារជាច្រើនបានរីកឡើង ខណៈកំណើននៃការវិនិយោគក៏សុទ្ធតែត្រូវការធនធានមនុស្សដើម្បីធ្វើការងារ។

យុវជនដែលទទួលបានការបណ្តុះបណ្តាលផ្នែកបច្ចេកទេស និងវិជ្ជាជីវៈ នៅកម្ពុជានាពេលបច្ចុប្បន្ននេះបានបង្កើនសមត្ថភាពរបស់ខ្លួនកាន់តែខ្លាំងឡើង ស្របតាមស្តង់ដារកំណត់ដោយនិយោជក និងផ្នែកឧស្សាហកម្ម ដូចជាជំនាញមេកានិក សំណង់ ធុរកិច្ច ព័ត៌មានវិទ្យា កម្មន្តសាល អគ្គិសនី ក្រឡឹង កែច្នៃម្ហូបអាហារ និងផ្នែកសេវាកម្មមួយចំនួនទៀត។

ឯកឧត្តម ពេជ សោភ័ន បានមានប្រសាសន៍ថា ៖“យុវជនកំពុងទទួលបានផលវិជ្ជមានពីប្រព័ន្ធ TVET នេះក៏ពិតមែន តែបើធៀបនឹងបណ្តាប្រទេសមួយចំនួនក្នុងតំបន់ គឺនៅមានភាពយឺតយ៉ាវខ្លះ ព្រោះសមត្ថភាពគ្រូបង្រៀននៅមានកម្រិត តែទោះជាយ៉ាងនេះក្តី ក្រសួងការងារបានបង្កើនកញ្ចប់ថវិកាដើម្បីធ្វើការបណ្តុះបណ្តាលសមត្ថភាពគ្រូ រួមទាំងកម្មវិធីសិក្សាឱ្យកាន់តែល្អឡើង សំដៅធ្វើយ៉ាងណាឱ្យសិស្ស និស្សិតមានជំនាញច្បាស់លាស់។

ឯកឧត្តមរដ្ឋលេខាធិការ បានលើកឡើងផងដែរថា ក្រសួងការងារបានខិតខំប្រឹងប្រែងក្នុងការសហការជាមួយនឹងដៃគូអភិវឌ្ឍនានា ដើម្បីជំរុញឱ្យវិស័យ TVET កាន់តែអភិវឌ្ឍខ្លាំងឡើង ហើយក្រសួងក៏មានយុទ្ធនាការជាច្រើនដើម្បីជំរុញឱ្យនិស្សិតជ្រើសរើសមុខវិជ្ជា TVET ជាអាជីពនៅថ្ងៃអនាគត ដើម្បីទទួលបានឱកាសការងារយ៉ាងសម្បូរបែបនៅពេលបច្ចុប្បន្ន និងថ្ងៃអនាគតផងដែរ។

នៅឆ្នាំសិក្សាថ្មីនេះ ក្រសួងការងារ និងបណ្តុះបណ្តាលវិជ្ជាជីវៈ បានផ្តល់អាហារូបករណ៍ជាច្រើនកន្លែងលើមុខវិជ្ជា បច្ចេកទេស និងវិជ្ជាជីវៈ ដើម្បីលើកទឹកចិត្តឱ្យសិស្សនៅទូទាំងប្រទេសទទួលបានឱកាសសិក្សាលើមុខវិជ្ជាដ៏មានសក្តានុពលនេះ។ ស្របជាមួយគ្នានេះដែរ ដៃគូអភិវឌ្ឍន៍ជាច្រើនបាននិងកំពុងបង្កើនកិច្ចសហការរៀបចំកម្មវិធីសិក្សា រួមទាំងសាង់សង់អគារសិក្សាទំនើបបន្ថែមទៀតផងដែរ។

លោក Norman LaRocque អ្នកឯកទេសអប់រំ របស់ធនាគារអភិវឌ្ឍន៍អាស៊ី ដែលហៅកាត់ថា ADB បានលើកឡើងថា ប្រព័ន្ធ TVET នៅកម្ពុជាត្រូវការការធ្វើកំណែទម្រង់ និងវិនិយោគបន្ថែមទៀតដើម្បីបំពេញចំណុចខ្វះខាតលទ្ធភាព គុណភាព និងសមត្ថភាពស្ថាប័ន សំដៅចូលរួមអភិវឌ្ឍកម្លាំងពលកម្មប្រកបដោយនិរន្តរភាព។ ដោយមើលឃើញពីបញ្ហានេះ ធនាគារពិភពលោកក៏បានបង្កើតគម្រោងមួយរួមជាមួយនឹងកម្ចីសម្បទានប្រមាណ30លានដុល្លារ សម្រាប់បង្កើនគុណភាពអប់រំបណ្តុះបណ្តាលបច្ចេកទេស និងវិជ្ជាជីវៈ (TVET) ដែលចាប់ផ្តើមដំណើរការតាំងពីឆ្នាំ2014 ហើយរំពឹងថានឹងបញ្ចប់គម្រោងទាំងស្រុងនៅខែធ្នូ ឆ្នាំ2019។

គម្រោងនេះនឹងដាក់ឱ្យអនុវត្តលើប្រព័ន្ធធានាគុណភាពបណ្តុះបណ្តាលបច្ចេកទេស និងវិជ្ជាជីវៈសាធារណៈដើម្បីឱ្យសិស្ស និស្សិតទទួលបានបទពិសោធផ្នែកឧស្សាហកម្ម។ ក្រុមប្រឹក្សាជំនាញតាមវិស័យដែលមានសមាសភាពជាសមាគមឧស្សាហកម្ម និងនិយោជកធំៗ ក្នុងវិស័យអាទិភាពចំនួន4ដូចជាសំណង់ ជួសជុលរថយន្ត ការងារអគ្គិសនី និងកម្មន្តសាល និងត្រូវបង្កើតឡើងដើម្បីជួយដល់ការអភិវឌ្ឍមណ្ឌលធនធាន ជំនាញជាក់លាក់ផងដែរ៕

February 28, 2018

Author: វល័ក្ខ