វល័ក្ខ - La Reine Media

គ្រាប់បាល់ដ៏ល្អរបស់ Matic បំពេញការវាយបកសម្រាប់ Man Utd លើទឹកដី Crystal Palace

Nemanja Matic បានបំពេញការវាយបកដ៏អស្ចារ្យសម្រាប់ក្រុម Manchester United ដែលដេញតាមពីក្រោយក្រុម Crystal Palace 2គ្រាប់ ខណៈដែលការស៊ុតបាល់បញ្ចូលទីយ៉ាងល្អរបស់ខ្សែបម្រើអន្តរជាតិស៊ែប៊ីរូបនេះ បានធ្វើឱ្យ Man Utd ទទួលជ័យជម្នះក្នុងលទ្ធផល 3-2 នៅលើទឹកដីក្រុម Crystal Palace កាលពីថ្ងៃចន្ទ។

ក្រុមរបស់លោក Jose Mourinho បានដេញតាមពីក្រោយគ្រាប់បាល់បើកឆាករបស់ខ្សែបម្រើ Andros Townsend និងគ្រាប់បាល់ក្នុងតង់ទី2 របស់ខ្សែការពារ Patrick van Aanholt នាកីឡដ្ឋាន Selhurst Park។

ប៉ុន្តែ ខ្សែការពារ Chris Smalling បានវាយបក 1គ្រាប់វិញសម្រាប់ក្រុម Man United មុននឹងខ្សែប្រយុទ្ធអន្តរជាតិបែលហ្ស៊ិក RomeluLukaku បានរកគ្រាប់បាល់តាមស្មើវិញនៅរយៈពេល 14នាទីចុងក្រោយ។ នៅពេលជិតបញ្ចប់ការប្រកួត ខ្សែបម្រើអន្តរជាតិស៊ែប៊ី Matic បានរកគ្រាប់បាល់បញ្ចូលទីជាលើកទី1 របស់គេបានសម្រេច ចាប់តាំងពីផ្ទេរមកពីក្លិប Chelsea កាលពីឆ្នាំមុន តាមរយៈការស៊ុតបាល់ពីចម្ងាយចូលទីយ៉ាងល្អឥតខ្ចោះ។

លទ្ធផលនេះ បានធ្វើឱ្យក្រុមរបស់លោក Mourinho ឡើងទៅឈរក្នុងចំណាត់ថ្នាក់លេខ2 ពីលើក្រុម Liverpool នៅលើតារាងក្របខ័ណ្ឌ Premier League នៅមុនពេលក្រុមយក្សរបស់អង់គ្លេសទាំង 2នេះត្រូវជួបគ្នានៅថ្ងៃសៅរ៍ខាងមុខនេះ។ លោក Mourinho បាននិយាយបន្ទាប់ពីបញ្ចប់ការប្រកួតថា៖ «ការវាយបកដេញតាមពីក្រោយ 2-0 នៅពេលប្រកួតជាមួយនឹងក្រុមមួយដែលកំពុងតែចង់បាន 3ពិន្ទុ វាពិតជាផ្តល់ឱ្យយើងនូវអារម្មណ៍ដ៏អស្ចារ្យមែន»៕

ប្រភពពី៖ Channel News Asia

March 6, 2018

IFAD ប្រកាសរំដោះប្រជាពលរដ្ឋឱ្យរួចផុតពីភាពក្រីក្រនៅត្រឹមឆ្នាំ2021

មូលនិធិអន្តរជាតិសម្រាប់ការអភិវឌ្ឍកសិកម្ម ហៅកាត់ជាភាសាអង់គ្លេសថា IFAD បានប្រកាសជាចំហថា នៅត្រឹមឆ្នាំ2021ខាងមុខ ស្ថាប័នអន្តរជាតិមួយនេះនឹងរំដោះប្រជាជនចំនួន120លាននាក់នៅជុំវិញពិភពលោករួមទាំងប្រទេសកម្ពុជាផងដែរនោះឱ្យរួចចាកផុតពីភាពក្រីក្រ។

នៅក្រោយកិច្ចប្រជុំប្រចាំឆ្នាំ2018 ក្រោមប្រធានបទ “ចាកចេញពីភាពផុយស្រួយឆ្ពោះទៅកាន់ភាពធន់ និងរឹងមាំរយៈពេលវែង៖ ការវិនិយោគលើសេដ្ឋកិច្ចជនបទប្រកបដោយចីរភាព” ដែលដឹកនាំដោយ IFAD អង្គប្រជុំបានឯកភាពរួមគ្នាដាក់ចេញនូវគោលការណ៍របៀបវារៈ ការងារថ្មីសម្រាប់ 3ឆ្នាំទៅមុខ ចាប់ពីឆ្នាំ2018 ដល់ឆ្នាំ2021 គឺ “ភារកិច្ចរបស់ IFAD ត្រឹមឆ្នាំ2030 នឹងមិនទុកចោល អ្នកណាម្នាក់ឱ្យបន្តស្ថិតក្នុងភាពក្រីក្រ និងបានឯកភាពគ្នាបង្កើតធនធានសម្រាប់ប្រតិបត្តិការរបស់ IFAD 2019-2021 ឱ្យបានដល់ 3.5 ប៊ីលានដុល្លារអាមេរិក និងរំដោះប្រជាជនជនបទចាកចេញពីភាពក្រីក្រឱ្យបានយ៉ាងតិច 120លាននាក់នៅត្រឹមឆ្នាំ2021។

ឯកឧត្តមបណ្ឌិតសភាចារ្យ អូន ព័ន្ឋមុនីរ័ត្ន ទេសរដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ បានថ្លែងនៅក្រោយកិច្ចប្រជុំនេះថា កម្ពុជាមានជំហរគាំទ្រពេញទំហឹងចំពោះប្រសិទ្ធភាពនៃហិរញ្ញប្បទានសហប្រតិបត្តិការកន្លងមករបស់ស្ថាប័នខាងលើនេះ និងទិសដៅការងារជាយុទ្ធសាស្ត្រដែល IFAD ត្រូវប្រកាន់យកសម្រាប់រយៈពេលមធ្យមទៅមុខ 2019-2021។ ក្នុងគោលដៅចូលរួមកាត់បន្ថយភាពក្រីក្រនេះ កម្ពុជាក៏បានប្រកាសបង្កើនវិភាគទានពីចំនួន 315,000ដុល្លារអាមេរិក ឱ្យកើនឡើងដល់ 450,000ដុល្លារអាមេរិក សម្រាប់គាំទ្រប្រតិបត្តិការនេះរយៈពេល 3ឆ្នាំទៅមុខ។

ក្នុងគោលដៅកាត់បន្ថយភាពក្រីក្រនេះ កម្ពុជាក៏បានលើកឡើងនូវទិសដៅជាយុទ្ធសាស្ត្រ នៃកិច្ចសហប្រតិបត្តិការ 2019-2021 រវាងរាជរដ្ឋាភិបាលកម្ពុជាជាមួយ IFAD ដើម្បីតម្រង់ទិសនៃប្រតិបត្តិការរបស់ IFAD ឱ្យឆ្លើយតបទៅតាមតម្រូវការអាទិភាពថ្មី ក្នុងដំណាក់កាលអភិវឌ្ឍន៍ថ្មីជាក់ស្តែងរបស់កម្ពុជា បន្ទាប់ពីបានក្លាយជាប្រទេសមានចំណូលមធ្យមកម្រិតទាប ឆ្ពោះទៅរកគោលដៅក្លាយជាប្រទេសមានចំណូលមធ្យមកម្រិតខ្ពស់នៅត្រឹមឆ្នាំ2030។

ឯកឧត្តម ហ្គីលបឺត ហុងបូ (H.E Gilbert Huongbo)ប្រធានមូលនិធិអន្តរជាតិសម្រាប់ការអភិវឌ្ឍន៍ IFAD បានថ្លែងគាំទ្រពេញទំហឹងចំពោះទិសដៅជាយុទ្ធសាស្ត្រនៃកិច្ចសហប្រតិបត្តិការដែលស្នើឡើងដោយភាគីកម្ពុជា ព្រមទាំងសន្យាពង្រីកទំហំកិច្ចសហប្រតិបត្តិការនៅកម្ពុជា ឱ្យកាន់តែធំជាងមុនទាំងសម្រាប់ឆ្នាំ2019-2021 និងទាំងសម្រាប់រយៈពេលវែងទៅមុខទៀតដែរ។

គួរបញ្ជាក់ថា កិច្ចការប្រឹងប្រែងរបស់រដ្ឋាភិបាលកម្ពុជាបានធ្វើឱ្យសម្រេចបាននូវកំណើនសេដ្ឋកិច្ចមួយដែលមានលក្ខណៈរឹងមាំក្នុងអត្រា 7%ក្នុងមួយឆ្នាំ ចាប់តាំងពីឆ្នាំ2014មក ហើយកំណើននេះនៅតែបន្តរឹងមាំក្នុងពេលមធ្យមទៅមុខ។ ចំណែកផលិតផលក្នុងស្រុករបស់ប្រជាជនម្នាក់ (GDP per Capita)បានកើនឡើងពី1,138ដុល្លារក្នុងមួយឆ្នាំនៅឆ្នាំ 2014ទៅ1,429ដុល្លារអាមេរិកនៅឆ្នាំ2017 និងអត្រានៃភាពក្រីក្រត្រូវបានកាត់បន្ថយពី 21.1%ក្នុងឆ្នាំ2010 មកនៅ13.5%នៅឆ្នាំ2014 ហើយកម្រិតនៃការធ្លាក់ចុះនេះសម្រេចបានល្បឿនលឿនជាងពីចំណូលរបស់គោលដៅអភិវឌ្ឍន៍សហស្សវត្សរ៍កម្ពុជា ដែលបានកំណត់នៅត្រឹម 19.5% ឆ្នាំ2010 និង13.8%ក្នុងឆ្នាំ2018នេះ។

ការធ្លាក់ចុះនៃអត្រាភាពក្រីក្រនេះ ស្របគ្នានឹងការវាយតម្លៃរបស់ធនាគារពិភពលោកផងដែរ ថាកម្ពុជាបានចាកផុតពីភាពក្រីក្រតោកយ៉ាក (Extreme Poverty)កាលពីឆ្នាំ2015កន្លងទៅនិងបានចាត់ជាប្រទេសដែលមានវឌ្ឍនភាពល្អជាងគេក្នុងតំបន់ ក្នុងការងារកាត់បន្ថយភាពក្រីក្ររបស់ខ្លួន។ ជាមួយគ្នានេះ មេគុណជីនីនៃការវាស់វិសមភាពប្រាក់ចំណូលក៏មានភាពប្រសើរឡើងជាលំដាប់ ដោយបានថយពី 0.41 ក្នុងឆ្នាំ2007 មកនៅ 0.29 ក្នុងឆ្នាំ2014 ដែលបង្ហាញថាគម្លាតរវាងអ្នកមាន និងអ្នកក្រកាន់តែរួមតូច។

យ៉ាងណាក៏ដោយការអនុវត្តផែនការយុទ្ធសាស្ត្រអភិវឌ្ឍន៍ជាតិ 2014 -2018 របស់ក្រសួងសេដ្ឋកិច្ចក្នុងរយៈពេលកន្លងមកនេះ ក៏ជួបប្រទះបញ្ហាប្រឈមសំខាន់ៗមួយចំនួនដែរ ក្នុងនោះការកាត់បន្ថយភាពក្រីក្រនៅមានភាពមិនស្មើគ្នាទៅតាមតំបន់នីមួយៗ ដែលតំបន់ខ្លះអត្រាភាពក្រីក្រធ្លាក់ចុះលឿនតំបន់ខ្លះអត្រាភាពក្រីក្រធ្លាក់ចុះយឺត ជាពិសេសនៅតាមតំបន់ជនបទដាច់ស្រយាល។ ដើម្បីដោះស្រាយបញ្ហានេះរដ្ឋាភិបាលនឹងខិតខំដោះស្រាយបន្ថែមទៀត ដូចជាការប្រែប្រួលអាកាសធាតុ បញ្ហាផលិតភាព ការអភិវឌ្ឍជំនាញ ការលើកកម្ពស់ភាពប្រកួតប្រជែង ការអភិវឌ្ឍធនធានមនុស្ស និងវិស័យព័ត៌មានវិទ្យា និងទូរគមនាគមន៍ជាដើម៕

March 6, 2018

CVEA នឹងរៀបចំវេទិកាស្ដីអំពី «ការកាន់កាប់អចលនវត្ថុដោយស្រប់ច្បាប់នៅកម្ពុជា» នាថ្ងៃទី22 មីនា នៅ CKCC

ភ្នំពេញ៖ សមាគមអ្នកវាយតម្លៃ និងភ្នាក់ងារអចលនវត្ថុកម្ពុជា (CVEA) នឹងរៀបចំវេទិកាស្ដីអំពី «ការកាន់កាប់អចលនវត្ថុដោយស្រប់ច្បាប់នៅកម្ពុជា» ដែលនឹងប្រព្រឹត្តទៅនៅថ្ងៃទី 22 ខែមីនា ឆ្នាំ 2018 ចាប់ពីម៉ោង 8:00 ដល់ម៉ោង 17:00 នៅមជ្ឍមណ្ឌលសហប្រតិបត្តិការកម្ពុជា-កូរ៉េ (CKCC)។

អ្នកចូលរួមក្នុងព្រឹត្តិការណ៍នេះ នឹងទទួលបានការសិក្សាស្វែងយល់អំពី នីតិវិធីនៃការផ្ទេរឈ្មោះអចលនទ្រព្យ ក្នុងប្លង់រឹង និងប្លង់ទន់, គុណសម្បត្តិ និងគុណវិបត្តិរបស់អចលនទ្រព្យក្នុងកម្រិតប្លង់រឹង និងប្លង់ទន់, នីតិវិធីក្នុងការគណនាពន្ធប្រថាប់ត្រា និងពន្ធអចលនវត្ថុប្រចាំឆ្នាំ រួមទាំងនីតិវិធីជាច្រើនទៀត ដែលពាក់ព័ន្ធនឹងអចលនវត្ថុ៕

March 6, 2018

សិស្សកម្ពុជាជាង 30% អាចប្រកួតប្រជែងផ្នែក STEM ជាអន្តរជាតិបាន

វិទ្យាសាស្ត្រ បច្ចេកវិទ្យា វិស្វកម្ម និងគណិតវិទ្យា (STEM) ជាផ្នែកដ៏សំខាន់មួយសម្រាប់កម្ពុជាព្រោះមុខវិជ្ជាទាំងអស់នេះជាអាជីពដែលកំពុងមានតម្រូវការខ្ពស់នៅក្នុងសង្គម។

ឯកឧត្តមបណ្ឌិតសភាចារ្យ ហង់ ជួនណារ៉ុនរដ្ឋមន្ត្រីក្រសួងអប់រំ យុវជន និងកីឡា បានលើកឡើងថា STEM ជាមុខវិជ្ជាមួយមានសារៈសំខាន់ខ្លាំងណាស់សម្រាប់កម្ពុជា នេះបើមើលទៅលើស្ថានភាពសង្គមនាពេលបច្ចុប្បន្ន ព្រោះថា សម័យនេះបច្ចេកវិទ្យាមានការអភិវឌ្ឍលឿន ខណៈកម្ពុជាមានប្រជាជនវ័យក្មេងច្រើន។ ស្របជាមួយនឹងស្ថានភាពនេះ យើងឃើញថា យុវជនវ័យក្មេងកម្ពុជាប្រមាណជាង 30% នៅតាមសាលាអាចមានសមត្ថភាពប្រកួតប្រជែងបានជាអន្តរជាតិ ហើយក្នុងនោះមានអ្នកខ្លះពូកែជាងសិស្សប្រទេសដទៃទៀតផង។

ទន្ទឹមនឹងនេះ យើងក៏នៅមានកត្តាប្រឈមមួយចំនួនផងដែរ គឺ សិស្សប្រមាណជា 70% ផ្សេងទៀត សមត្ថភាពនៅមានកម្រិតនៅឡើយ តែក្រសួងអប់រំក៏បានដោះស្រាយបញ្ហាទាំងអស់នេះតាមរយៈការបណ្តុះបណ្តាលគ្រូដែលមានជំនាញឱ្យកាន់តែច្រើន ពង្រឹងវិធីសាស្ត្របង្រៀន បង្កើតសាលាជំនាន់ថ្មី និងបង្កើនភាពទាក់ទាញដល់សិស្សឱ្យចាប់អារម្មណ៍កម្មវិធី STEM នេះកាន់តែច្រើន។

ឯកឧត្តម ហង់ ជួនណារ៉ុន បានមានប្រសាសន៍ថា ៖ “យើងបង្កើតសាលាជំនាន់ថ្មីដោយដាក់ឱ្យមានឧបករណ៍ពិសោធជាក់ស្តែង ដើម្បីឱ្យសិស្សបានយល់ច្បាស់ពីតម្លៃនៃមុខវិជ្ជា STEM និងយល់ថា ការសិក្សាមុខវិជ្ជានេះជារឿងមានប្រយោជន៍ អាចដោះស្រាយបញ្ហានៃការរស់នៅប្រចាំថ្ងៃបាន ហើយមានភាពគួរឱ្យចង់រៀន និងមិនអផ្សុកទេ។

ឯកឧត្តមរដ្ឋមន្ត្រី បានមានប្រសាសន៍ផងដែរថា បច្ចុប្បន្ននេះ មុខវិជ្ជា STEM មានលក្ខណៈកាន់តែប្រសើរឡើងនៅកម្ពុជា ព្រោះបើយើងក្រឡេកមើលកាលពី 5ឆ្នាំមុន នៅកម្ពុជាមិនសូវមានអ្នកណាចាប់អារម្មណ៍រឿង STEM នៅឡើយទេ តែនៅពេលបច្ចុប្បន្ននេះ មនុស្សគ្រប់គ្នាកំពុងចាប់អារម្មណ៍ ហើយសូម្បីតែអ្នកសារព័ត៌មានក៏ចាប់ផ្តើមយល់អំពី STEM ដែរ។

រដ្ឋមន្ត្រីក្រសួងអប់រំ បានបញ្ជាក់ផងដែរថា បច្ចុប្បន្ននេះ តាមរយៈសាលាគំរូមួយចំនួនសិស្សបានអនុវត្តទ្រឹស្តីរបស់ខ្លួនដើម្បីយកមកប្រើប្រាស់បានយ៉ាងច្រើន។ ជាក់ស្ដែង នៅសាលាស៊ីសុវត្តិ សិស្សអាចចេះផលិតសាប៊ូ ចេះជួសជុលម៉ាស៊ីនត្រជាក់ និងផលិតឧបករណ៍ជាច្រើនទៀត ដែលទាំងអស់នេះសុទ្ធតែជាលទ្ធផលចេញពីមេរៀនរបស់ STEM ទាំងអស់។ ម្យ៉ាងវិញទៀត ថ្វីដ្បិតតែនៅជនបទ សិស្សមិនទាន់មានសមត្ថភាពខ្លាំងដូចនៅទីក្រុងក៏ដោយ តែយើងបានបង្កើតសាលាគំរូចំនួនប្រមាណជា 200កន្លែងនៅគ្រប់ខេត្ត ដែលអាចអនុញ្ញាតឱ្យសិស្សមានឧបករណ៍គ្រប់គ្រាន់សម្រាប់ប្រើប្រាស់។ លើសពីនេះទៅទៀត ក្រសួងអប់រំក៏បានផលិតវីដេអូរបស់លោកគ្រូ-អ្នកគ្រូឆ្នើម ដែលមានទេពកោសល្យ និងចំណេះដឹងខ្ពស់ដើម្បីធ្វើការផ្សព្វផ្សាយពីវិធីសាស្ត្របង្រៀនយ៉ាងទូលំទូលាយទៅកាន់សាធារណជន ជាពិសេសគឺសិស្សានុសិស្ស និងលោកគ្រូ-អ្នកគ្រូនៅទូទាំងប្រទេស៕

March 6, 2018

មុខងារ Explore Feed ត្រូវបានដកចេញពីកម្ពុជាទាំងស្រុង

អាមេរិក៖ កាលពីសប្ដាហ៍មុន Facebook បានប្រកាសនូវដំណឹងល្អមួយ គឺការធ្វើតេស្ដមុខងារ Explore Feed ត្រូវបានបញ្ចប់ ហើយជាក់ស្ដែងនៅថ្ងៃនេះ គេសង្កេតឃើញថា មុខងារ Explore Feed នៅលើ Facebook កម្ពុជាត្រូវបានដកចេញទាំងស្រុង ប៉ុន្តែសម្រាប់នៅលើ App មាននៅសល់ខ្លះ។

ការដកចេញនូវមុខងារ Explore Feed នេះ បានធ្វើឱ្យអ្នកប្រើប្រាស់បណ្ដាញសង្គមមានការសប្បាយចិត្ត ព្រោះថាមិនចាំបាច់ត្រូវជ្រើសរើសបើក News Feed ឬក៏ Explore Feed នោះទេ ជាពិសេសគឺសម្រាប់អ្នកមាន Facebook Page ធំៗតែម្ដង។

កាលពីដើមខែមីនានេះ បណ្ដាញសង្គមយក្ស Facebook បានប្រកាសថា ខ្លួននឹងបញ្ចប់ការងារធ្វើតេស្ដទៅលើមុខងារ Explore Feed ទាំងក្នុង 6ប្រទេស ដោយក្នុងនោះមានកម្ពុជាមួយផងដែរ ហើយការបញ្ចប់ការធ្វើតេស្ដ ព្រមជាមួយការដកចេញនូវមុខងារ Explore Feed នេះ ដោយសារតែលទ្ធផលដែលទទួលបានមិនគាប់ប្រសើរ។

គួរបញ្ជាក់ផងដែរថា ចាប់តាំងពី Facebook ធ្វើតេស្តមុខងារ Explore Feed បានធ្វើឱ្យអ្នករកប្រាក់តាមរយៈ Instant Articles ជួបការលំបាក ដោយថយនូវប្រាក់ចំណូល ព្រោះ Facebook បានចែកការ Post នៅលើ Page ផ្សេង និងនៅលើ Timeline ផ្សេង៕

March 6, 2018

មណ្ឌលខេត្តកណ្តាលរកឃើញជើងខ្លាំង៣ក្រុមឡើងទៅវគ្គផ្តាច់ព្រ័ត្រហើយ

កណ្តាល៖ ពិតជាស្វិតស្វាញមែនទែនសម្រាបការប្រកួតបាល់ទាត់ Tiger Street Football Festival 2018 ប្រចាំខេត្តកណ្តាល ដែលជាមណ្ឌលទី7 ទម្រាំរកឃើញក្រុមម្ចាស់ជើងឯក ដោយក្នុងវគ្គពាក់កណ្តាលផ្តាច់ព្រ័ត្រក្រុមទាំង 4សុទ្ធតែលេងបន្ថែមម៉ោងទាំងអស់។ ចំពោះក្រុម គោសមុទ្យ ដែលជាក្រុមជើងឯក ក្រោយពីយកឈ្នះលើក្រុម DM FC ក្នុងលទ្ធផល 3ទល់នឹង2 ។

មុនឈានមកដល់វគ្គផ្ដាច់ព្រ័ត្រនេះ ក្រុម គោសមុទ្រ បានយកឈ្នះលើក្រុម ហនុមានស្វាយរលំ ខណៈដែលក្រុមទាំង2 ត្រូវប្រកួតបន្ថែមម៉ោង 2ដង នៅសល់កីឡាករម្ខាង៣នាក់ ទើបរកឃើញក្រុមឈ្នះ ដោយលទ្ធផល 3 ទល់និង 2 ។

ចំណែកឯក្រុម DM FC បានយកឈ្នះលើក្រុម យុវជនថ្មី ដោយពិបាកបំផុតព្រោះក្រុមទាំង2នេះបានប្រកួតយ៉ាងស្វិតស្វាញ តតាំងគ្នា និងបន្ថែមម៉ោងដល់ទៅ៣ដល់ នៅសល់កីឡាករម្ខាងតែ2នាក់ប៉ុណ្ណោះ ទើបក្រុម DM FC អាចយកឈ្នះលើក្រុម យុវជនថ្មី ក្នុងលទ្ធផល 5 ទល់និង 4។ ដោយលទ្ធផលនេះ ជាហេតុធ្វើឲ្យក្រុមចាញ់ទាំងពីរ ហនុមានស្វាយរលុំ ត្រូវប្រកួតជាមួយក្រុម យុវជនថ្មី ដើម្បីស្វែងរក លេខ3 និង លេខ4។ ជាលទ្ធផល ក្រុម យុវជនថ្មី ដណ្តើមបានលេខ3 ក្រោយឈ្នះ ក្រុម ហនុមានស្វាយរលំ 7ទល់និង 3 ។

សម្រាបក្រុមជើងឯកប្រចាំមណ្ឌលខេត្តកណ្តាល ក្រុម គោសមុទ្រ ទទួលបានរង្វាន់ 10000ដុល្លារ និងស្រាបៀរថៃហ្គ័រ 10កេស ក្រុមជើងឯករង បានទៅលើក្រុម DM FC ទទួកបានរង្វាន់ 700ដុល្លារ និងស្រាបៀរថៃហ្គ័រ 10កេស ក្រុមចំណាត់ថ្នាក់លេខ3 បានទៅលើក្រុម យុវជនថ្មី ប្រាក់រង្វាន់ 350ដុល្លារ និងស្រាបៀរថៃហ្គ័រ 5កេស និងក្រុមចំណាត់ថ្នាក់លេខ4បានទៅលើ ហនុមានស្វាយរលុំ ប្រាក់រង្វាន់ 100ដុល្លារ និងស្រាបៀរថៃហ្គ័រ 5កេស។

ដោយឡែក សម្រាប់ខេត្តកណ្តាល ដែលជាមណ្ឌលទី7នេះ គណៈកម្មាធិការរៀបចំការប្រកួត យកតែ3ក្រុមតែប៉ណ្ណោះ ដើម្បីឲ្យទៅចូលរួមការប្រកួតវគ្គផ្តាច់ព្រ័ត្រទូទាំងប្រទេស នៅរាជធានីភ្នំពេញ ថ្ងៃទី10 និងទី11 មីនា 2018 ខាងមុខនេះ។

ចំពោះព័ត៌មានលម្អិតបន្ថែមអំពី Tiger Street Football Festival 2018 សូមចូលទៅកាន់ទំព័រហ្វេសប៊ុកផ្លូវការរបស់ស្រាបៀរថៃហ្គ័រ៖www.facebook.com/TigerBeerKH

#TSFF2018

សូមពិសាដោយការទទួលខុសត្រូវ

March 6, 2018

យុវវ័យត្រូវមានឯករាជភាពក្នុងការស្វែងរក និងស្គាល់ខ្លួនឯងឱ្យច្បាស់

នៅកម្ពុជា មានយុវជនជាច្រើនបាន និងកំពុងធ្វើការងារមិនត្រូវជំនាញ ឬផ្លាស់ប្តូរពីមួយកន្លែងទៅមួយកន្លែងទៀត ដែលពេលខ្លះបញ្ហានេះធ្វើឱ្យពួកគេមានភាពយឺតយ៉ាវក្នុងការស្វែងរកភាពថ្កុំថ្កើងសម្រាប់ខ្លួនឯង និងសង្គម។

ពិធីការិនីដែលកំពុងមានភាពល្បីល្បាញក្នុងចំណោមយុវវ័យ និងជាមនុស្សម្នាក់ដែលគេគ្រប់គ្នាស្គាល់ថាជាអ្នកដែលធ្វើការងារស្និទ្ធជាមួយនឹងយុវវ័យ គឺកញ្ញា នាង សុវាតនា បានលើកឡើងថា យុវជនគួរចំណាយពេលវេលាឱ្យបានច្រើនដើម្បីស្វែងរក និងស្គាល់ខ្លួនឯងឱ្យច្បាស់ ព្រោះថា នៅពេលដែលយើងចាប់ផ្តើមមានឯករាជភាពចំពោះខ្លួនឯង នោះយើងនឹងចាប់ផ្តើមមានការសម្រេចចិត្តខ្ពស់លើការកំណត់ជោគវាសនាដោយខ្លួនឯង។ ចំណុចនេះអាចធ្វើឱ្យយុវវ័យគាត់អាចដឹងពីអ្វីដែលគាត់ត្រូវធ្វើ ហើយព្យាយាមធ្វើប្រកបដោយភាពច្នៃប្រឌិតរបស់គាត់ផ្ទាល់ដែលដោយសារកត្តានេះហើយទើបគេជំរុញឱ្យក្មេងដើរស្វែងយល់ឱ្យបានច្រើន។

កញ្ញា នាង សុវាតនា បាននិយាយថា ៖ “នាសម័យនេះបច្ចេកវិទ្យាមានការរីកចម្រើន ហើយមនុស្សជាច្រើនក៏សុទ្ធតែអាចប្រើភាសាអង់គ្លេសបានល្អ ហេតុនេះពួកគេអាចមានឱកាសច្រើនក្នុងការស្វែងយល់ពីប្រភពចំណេះដឹងជាច្រើនទៀតពីគ្រប់ទីកន្លែង។

កញ្ញា សុវាតនា បានលើកឡើងផងដែរថា ការផ្តល់សិទ្ធិដល់ក្មេងៗក្នុងការសម្រេចចិត្ត ក៏ត្រូវការការចូលរួមពីអាណាព្យាបាលផងដែរ ព្រោះថា ប្រសិនបើអាណាព្យាបាលមិនផ្តល់សិទ្ធិ ឬក្តោបក្តាប់សិទ្ធិលើវាសនាកូនដោយខ្លួនគាត់ផ្ទាល់ នៅពេលនោះកូនរបស់គាត់នឹងមិនមានទម្លាប់ក្នុងការដោះស្រាយ ឬសម្រេចចិត្តលើដំណើរជីវិតខ្លួនឯងនោះទេ។ ការស្គាល់ខ្លួនឯង គឺជារឿងសំខាន់ណាស់សម្រាប់មនុស្សម្នាក់ៗ ហើយដើម្បីប្រើប្រាស់សក្តានុពលរបស់ខ្លួនឱ្យអស់លទ្ធភាព យុវវ័យគួរស្វែងរកចំណេះដឹងបន្ថែមពីគ្រប់ទីកន្លែងដើម្បីអភិវឌ្ឍសមត្ថភាពរបស់ខ្លួនឱ្យខ្លាំង។

និស្សិតពូកែរបស់កម្ពុជាដែលធ្លាប់បានឆ្លងកាត់កម្មសិក្សាជាច្រើនប្រទេស កញ្ញា ណារ៉ា សុខេមា បានលើកឡើងថា តាមពិតទៅយុវជនកម្ពុជាក៏អាចមានឱកាសច្រើនក្នុងការស្វែងរកប្រភពចំណេះដឹងពីគ្រប់ទីកន្លែងនៅក្នុងពិភពលោក ព្រោះថា បច្ចុប្បន្ននេះនិស្សិតជាច្រើនកំពុងធ្វើការប្រកួតប្រជែងចំណេះដឹងជាមួយនឹងបណ្តាប្រទេសដទៃ ដើម្បីទទួលបានឱកាសទៅសិក្សានៅបរទេស ឬទទួលបានឱកាសក្នុងការស្វែងយល់នៅក្នុងប្រទេសអភិវឌ្ឍនានា។ នៅពេលដែលយុវជនអាចទទួលបានឱកាសទាំងអស់នោះ គាត់នឹងបានឃើញពីប្រភព

ព័ត៌មានជាច្រើនដែលពេលខ្លះ វាជាគ្រឿងផ្សំដែលជំរុញគាត់ឱ្យក្លាយជាមនុស្សខ្លាំង ដែលចំណេះដឹងទាំងអស់នោះគាត់មិនធ្លាប់ជួបពីមុនមកឡើយ។

កញ្ញា ណារ៉ា សុខេមា និស្សិតពូកែរបស់កម្ពុជាដែលបានទៅសិក្សាច្រើនប្រទេស

កញ្ញា ណារ៉ា សុខេមា បានលើកឡើងថា៖ “យុវជនកម្ពុជា គួរតែកំណត់ក្តីសុបិន្តខ្លួនឯងឱ្យច្បាស់ ហើយកុំខ្លាចនឹងការប្រកួតប្រជែងទៅសិក្សានៅបរទេស ហើយកុំខ្លាចជាមួយការស្វែងរកភាពល្អប្រសើរ។ ប្រសិនបើយើងមានការតាំងចិត្ត ហើយមានសេចក្តីក្លាហានដើម្បីបង្កើតភាពតស៊ូដណ្តើមឱកាសសម្រាប់អភិវឌ្ឍខ្លួនឯងជាមួយនឹងការធ្វើកម្មសិក្សានៅបរទេស យើងអាចនឹងធ្វើវាបាននៅថ្ងៃណាមួយ។

កញ្ញា ខេមា បានលើកឡើងផងដែរថា តាមពិតទៅការប្រកួតប្រជែងនានាត្រូវការកម្លាំងចិត្ត និងការតាំងចិត្តឱ្យបានច្បាស់លាស់។ ការប្រកួតប្រជែងមួយចំនួនមិនលំបាកក្នុងការដាក់ពាក្យពេកនោះទេ តែមានមនុស្សជាច្រើនមិនដាក់ ហើយអ្នកដែលហ៊ានគឺទទួលបានឱកាសខ្ពស់ដើម្បីទទួលភាពជោគជ័យ។ ការព្យាយាមពង្រឹងសេចក្តីក្លាហាន ដើម្បីស្វែងរកនូវអ្វីដែលខ្លួនចង់ធ្វើគឺជារឿងមួយសំខាន់ដែលអាចជំរុញរូបគេឱ្យក្លាយជាមនុស្សម្នាក់ប្រកបដោយភាពអភិវឌ្ឍ។

លោក ស៊ាង សុបញ្ញា ស្ថាបនិកសាលា Cam Asean បានលើកឡើងក្នុងកម្មវិធី The Perspectives Cambodia ថា យុវជនកម្ពុជាម្នាក់ៗគួរបើកចិត្តឱ្យទួលាយហើយតាំងចិត្តថាយើងរស់នៅក្នុងពិភពលោកមួយដែលធំទូលាយ ហេតុនេះយើងត្រូវតែខិតខំប្រឹងប្រែងឱ្យក្លាយជាប្រជាជនសកល។ លោកបញ្ជាក់ថា នៅពេលដែលយុវជនមានចំណេះដឹងខ្ពស់ ហើយច្បាស់លាស់ជាសកល នោះយើងនឹងអាចឈោងចាប់ការងារសំខាន់ៗនៅក្រៅប្រទេសបាន។ ការខិតខំប្រឹងប្រែង ដោយស្វែងរកសក្តានុពលខ្លួនឯងឱ្យច្បាស់ បន្ទាប់មកកំណត់ទិសដៅឱ្យជាក់លាក់មួយ អាចជួយយុវជនឱ្យក្លាយជាអ្នកជំនាញម្នាក់សម្រាប់ពិភពលោកក៏អាចថាបានដែរ។

លោក ស៊ាង សុបញ្ញា បាននិយាយថា ៖ “បើចង់ក្លាយជាមនុស្សដែលត្រូវបានគេទទួលស្គាល់ជាអន្តរជាតិនោះ យើងគួរតែស្វែងរកឱ្យឃើញនូវអ្វីដែលយើងចង់ធ្វើ បន្ទាប់មកអភិវឌ្ឍវាឱ្យបានច្បាស់លាស់។ ប្រសិនបើរៀនភាសា គឺរៀនឱ្យចេះច្បាស់ទាល់តែនិយាយ សរសេរ និងអានច្បាស់លាស់ប្រើការបានដូចអ្នកជំនាញ ហើយប្រសិនបើចាប់ជំនាញណាមួយ គឺខំប្រឹងប្រែងឱ្យអស់លទ្ធភាពដើម្បីក្លាយជាមនុស្សច្បាស់លាស់លើជំនាញនោះ។

ស្ថាបនិកគ្រឹះស្ថានអប់រំ ខាងលើបានលើកឡើងផងដែរថា ប្រជាជនកម្ពុជាក៏អាចក្លាយជាប្រជាជនសកលបានដែរ បើសិនយើងទាំងអស់គ្នាខិតខំប្រឹងប្រែងដើម្បីអភិវឌ្ឍខ្លួនឯង ហើយយល់ច្បាស់ពីតួនាទីរបស់ខ្លួនក្នុងការចូលរួមចំណែកអភិវឌ្ឍសង្គមក្នុងតំបន់ តាមរយៈការប្រើប្រាស់សមត្ថភាពជំនាញរបស់យើងទាំងអស់គ្នា៕

March 5, 2018

FACEBOOK នឹងដកមុខងារ Explore Feed ចេញ ក្នុងពេលឆាប់ៗនេះ

Facebook បានចេញសេចក្តីប្រកាសនៅលើគេហទំព៍ររបស់ខ្លួនកាលពីពេលថ្មីៗនេះថានឹងបញ្ចប់ការធ្វើតេស្តលើមុខងារ Explore Feed ដែលកន្លងមក Facebook បានធ្វើការ Update នូវមុខងារ ជាច្រើន ដើម្បីធ្វើឱ្យអ្នកប្រើប្រាស់មានភាពងាយស្រួល ក៏ប៉ុន្តែមិនប្រាកដថាការ Update រាល់មុខងារនីមួយៗនោះសុទ្ធតែទទួលបានជោគជ័យ និងមានការគាំទ្រពីអ្នកប្រើប្រាស់ទាំងអស់ឡើយ។

ជាក់ស្តែងកាលពីខែតុលាឆ្នាំ 2017 Facebook បានដាក់មុខងារ Explore Feed ចេញឱ្យប្រើប្រាស់ជាផ្លូវការ ដែលជាមុខងារមួយសម្រាប់ប្រមូលផ្តុំរាល់ព័ត៌មានដែលផុសចេញពី Page។

សូមបញ្ជាក់ដែរថាដំបូងឡើយ រាល់គ្រប់ព័ត៌មានទាំងអស់ដែលផុសចេញពី Account និងផុសចេញពី Page ធ្វើឱ្យអ្នកប្រើប្រាស់បានឃើញនៅក្នុងមុខងារ News Feed តែមួយ។

ការសម្រេចដាក់ចេញឱ្យប្រើប្រាស់នូវមុខងារ Explore Feed នេះមិនត្រូវបានទទួលការគាំទ្រពីអ្នកប្រើប្រាស់នោះទេ ព្រោះថា អ្នកប្រើប្រាស់ភាគច្រើនមិនបានដឹង និងស្គាល់នូវមុខងារ ថ្មីមួយនេះ ម្យ៉ាងទៀតមុខងារមួយនេះគឺជាមុខងារសម្រាប់តែ Page របស់ក្រុមហ៊ុនផុសនូវព័ត៌មាន និងការផ្សព្វផ្សាយពីទំនិញ និងសេវាកម្មរបស់ខ្លួន ដែលធ្វើឱ្យអ្នកប្រើប្រាស់មានរម្មណ៍ធុញ។

ដោយសារតែមិនសូវមានការគាំទ្រលើមុខងារមួយនេះ ទើបក្នុងពេលថ្មីៗនេះ Facebook បានប្រកាសដកនូវមុខងារ Explore Feed ចេញ៕

March 5, 2018

វិធីរកប្រាក់ចំណេញពីអចលនទ្រព្យ

ការទិញអចលនទ្រព្យដីធ្លី ឬផ្ទះល្វែងទុកសម្រាប់លក់ទៅវិញ ជួនកាលបានប្រាក់ចំណេញច្រើន ហើយជួនកាលមិនបានប្រាក់ចំណេញ តែថែមទាំងខាតបង់ធ្ងន់ធ្ងរទៀតផង។ ដូច្នេះតើយើងគួរទិញអចលនទ្រព្យបែបណា ឬពេលណាទើបលក់បានប្រាក់ចំណេញត្រឡប់មកវិញច្រើន?

លោក អាំ សុផល ស្ថាបនិកក្រុមហ៊ុន CamboHome & City Development Co., Ltd មានប្រសាសន៍ថា បើចង់ទិញអចលនទ្រព្យបានផលចំណេញច្រើនត្រូវចេះមើលទស្សនវិស័យនៃការអភិវឌ្ឍរបស់រដ្ឋាភិបាល ជាបទពិសោធ នៅពេលរដ្ឋាភិបាលមានគម្រោងអភិវឌ្ឍន៍ហេដ្ឋារចនាសម្ព័ន្ធនៅទីតាំងណាមួយ ដីនៅតំបន់នោះពិតជាឡើងថ្លៃជាមិនខាន។ លោកថាបច្ចុប្បន្ន និន្នាការនៃការពុះដីឡូត៍លក់កំពុងកើតមានយ៉ាងសកម្មនៅតំបន់ជាយក្រុង ហើយប្រសិនបើចង់បានប្រាក់ចំណេញគួរមើលពីទីតាំងណាដែលជាគម្រោងអភិវឌ្ឍន៍របស់រដ្ឋាភិបាល

ជាមុនសិន។ ក្រៅពីនេះអ្នកទិញដីក៏គួរមើលគម្រោងអភិវឌ្ឍន៍ធំៗរបស់អ្នកវិនិយោគដែលចូលមកបណ្តាក់ទុនសាងសង់សំណង់អគារខុនដូផ្ទះល្វែងឬផ្សារទំនើបនានានៅតំបន់ជាយក្រុងដែលជាកត្តាធ្វើឱ្យដីនៅតំបន់នោះឡើងថ្លៃ “ខ្ញុំធ្លាប់បានទិញដីជាយក្រុងមួយកន្លែង ក្រោយមកតំបន់នោះត្រូវបានគេអភិវឌ្ឍទៅជាផ្សារទំនើប ដែលមានមនុស្សចូលទៅរស់នៅច្រើនឡើង ធ្វើឱ្យដីដែលខ្ញុំទិញនោះឡើងថ្លៃទ្វេដងមិនគួរឱ្យជឿ។

មួយវិញទៀតអ្នកទិញដីគួរស្វែងរកទីតាំងដីនៅធូរថ្លៃ ដូចជាដីមិនទាន់អភិវឌ្ឍន៍ដែលមិនទាន់ មានហេដ្ឋារចនាសម្ព័ន្ធល្អ ពេលទិញរួចហើយត្រូវធ្វើការអភិវឌ្ឍតំបន់នោះឱ្យក្លាយទៅជាទីប្រជុំជន មានផ្សារ មានសាលារៀន ពិសេសមានផ្លូវងាយស្រួលក្នុងការធ្វើដំណើរដែលជាលក្ខណៈពិសេសធ្វើឱ្យដីតំបន់នោះឡើងថ្លៃខ្លាំង។ ប៉ុន្តែយ៉ាងណានោះ គេត្រូវសិក្សាផ្លូវច្បាប់ឱ្យបានល្អិតល្អន់ជាមុនសិនចៀសវាងទិញដីដែលកំពុងមានវិវាទ ដីដែលកំពុងជាប់បញ្ចាំប្លង់នៅធនាគារ ព្រោះអាចជួបហានិភ័យផ្សេងៗកើតឡើងនាំខាតបង់។

ចំណែកអ្នកនាង លឹម មករា ប្រធានក្រុមប្រឹក្សាភិបាលនៃក្រុមហ៊ុនរតនាការ រៀលធី បាននិយាយស្រដៀងនេះដែរថា មុននឹងសម្រេចចិត្តទិញដីគឺយើងគួរពិចារណាឱ្យបានច្បាស់លាស់ជាមុន ព្រោះថា ការទិញដីយើងត្រូវចំណាយប្រាក់ច្រើន មុននឹងបានប្រាក់ចំណេញត្រឡប់មកវិញ ឬមិនអ៊ីចឹងទេនាំឱ្យខាតបង់ប្រាក់ច្រើនសន្ធឹកសន្ធាប់។ ដើម្បីឱ្យបានប្រាក់ចំណេញច្រើន យើងត្រូវចេះតាមដានព័ត៌មានគម្រោងអភិវឌ្ឍន៍របស់រដ្ឋាភិបាល និងវិស័យឯកជន។

ចំណុចនេះអ្នកនាងបានលើកជាឧទាហរណ៍ ដីនៅខាងលិចក្រុងភ្នំពេញ ដីនៅតំបន់ EAONទី2 និងផ្លូវ 60ម៉ែត្រភាគខាងត្បូងរាជធានីភ្នំពេញ ដើមឡើយមិនសូវមានអ្នកចាប់អារម្មណ៍ទេ តែនៅពេលគម្រោងអភិវឌ្ឍន៍រដ្ឋ និងឯកជនចូលទៅដល់ ដីនៅទីតាំងខាងលើបានឡើងថ្លៃខ្ពស់ នឹកស្មានមិនដល់។ ក្រៅពីកត្តាសំខាន់ខាងលើ អ្នកនាង លឹម មករា បានបន្ថែមថា ដើម្បីទិញដីបានប្រាក់ចំណេញច្រើន អ្នកវិនិយោគគួរមានបណ្តាញច្រើនចែករំលែកព័ត៌មានអំពីការលក់ដីទៅវិញទៅមក ហើយវិភាគ ឬពិភាក្សារួមគ្នារកឱ្យឃើញថា ដីណាមានសក្តានុពល ដីណាមិនមានសក្តានុពល ចាំយើងសម្រេចចិត្តទិញជាក្រោយ។ បើមានប្រាក់ គួររង់ចាំទិញដីណាដែលម្ចាស់ត្រូវការលក់ប្រញាប់ខ្លាំង យើងនឹងអាចទិញបានក្នុងតម្លៃថោក ហើយលក់ទៅវិញនឹងបានចំណេញច្រើន ។

ចំណែកលោក សូត្រ សារ៉ន ប្រធានផ្នែកគម្រោង The Seagate Suit នៅខេត្តកំពង់សោមមានប្រសាសន៍ថា ការរីកចម្រើនវិស័យអចលនទ្រព្យនៅកម្ពុជា គឺដោយសារប្រជាជនមានប្រាក់ចំណូលកាន់តែខ្ពស់ ខណៈដែលសេដ្ឋកិច្ចកម្ពុជាមានកំណើនរឹងមាំថេរ ហើយរដ្ឋាភិបាលមានទិសដៅកែប្រែសេដ្ឋកិច្ចពីប្រទេសមានចំណូលមធ្យមកម្រិតទាបទៅជាប្រទេសមានចំណូលមធ្យមកម្រិតខ្ពស់នៅឆ្នាំ2030។ លោកបន្ថែមថា ដើម្បីបានប្រាក់ចំណេញមកវិញ អ្នកវិនិយោគគួរចេះសម្លឹងមើលទីតាំងណាដែលល្អជាមុនសិន ពិសេសទិញដីនៅលើទីតាំងដែលមិនទាន់កែច្នៃ ឬដីនៅទីតាំងដែលនឹងមានគម្រោងអភិវឌ្ឍន៍ធំៗ ទើបបានប្រាក់ចំណេញលឿនត្រឡប់មកវិញ។ ឧទាហរណ៍ដូចជា គម្រោងខុនដូ The Seagate Suit នៅកំពង់សោម មានអតិថិជនគាំទ្រច្រើនគឺដោយសារអតិថិជនគិតថាតំបន់នោះនឹងមានមជ្ឈមណ្ឌលពាណិជ្ជកម្មក្នុងពេលឆាប់ៗ ខាងមុខនេះ។

ប្រសិនបើមានប្រាក់ច្រើនដោយខ្លួនឯង មិនមែនជាប្រាក់ខ្ចីគេនោះ គួរចេះឆក់ឱកាសទិញដីនៅពេលមានវិបត្តិសេដ្ឋកិច្ច ឬទិញដីនៅពេលជិតបោះឆ្នោតដែលមានមនុស្សចង់លក់ច្រើន ដូចជាគេច្រើនលើកឡើងថា “ជ្រុលទិញដី គឺទិញនៅពេលគេចង់លក់ ហើយបើជ្រុលលក់ត្រូវលក់នៅពេលគេចង់ទិញ ហើយបើចង់បានចំណេញកាន់តែច្រើន គឺត្រូវទុកយូរបន្តិច” ព្រោះថាអ្វីៗមានភាពប្រែប្រួលតែដីមិនប្រែប្រួលទេ ដូចជាចំនួនប្រជាជនកាន់តែកើនឡើងឥតឈប់ឈរ តែដីមិនកើនឡើងទេ ដូច្នេះតម្រូវការដីកើតមានកាន់តែច្រើន តែកាលណាតម្រូវការមានច្រើន តម្លៃក៏កាន់តែឡើងថ្លៃដែរ៕

March 5, 2018

HEINEKEN នាំយកកីឡាករបាល់ទាត់អន្តរជាតិល្បីល្បាញឈ្មោះ RUUD VAN NISTELROOY និងពានរង្វាន់ក្របខ័ណ្ឌ UEFA CHAMPIONS LEAGUE មកកាន់កម្ពុជា

រាជធានីភ្នំពេញ៖ កម្មវិធីដំណើរទេសចរណ៍ពានរង្វាន់ក្របខ័ណ្ឌ UEFA Champions League ដែលនាំជូនដោយស្រាបៀរ Heineken® នឹងនាំយកកីឡាករជើងចាស់លោក Ruud van Nistelrooy ខ្សែប្រយុទ្ធរបស់ក្លិប Manchester United និងក្លិប Real Madrid មកកាន់ប្រទេសកម្ពុជា។

កម្មវិធីដំណើរទេសចរណ៍នេះផ្តល់ឱ្យអ្នកគាំទ្រកីឡាបាល់ទាត់នៅជុំវិញពិភពលោកមានឱកាសកាន់តែស្និទ្ធស្នាលជាមួយវីរបុរសជើងឯក និងពានរង្វាន់ក្របខ័ណ្ឌ UEFA Champions League ។ ក្នុងប្រវត្តិសាស្ត្រដប់មួយឆ្នាំរបស់ខ្លួនកម្មកម្មវិធីដំណើរទេសចរណ៍នេះបានទៅដល់ ២៦ ប្រទេសនៅទូទាំងទ្វីបអាហ្វ្រិក អាស៊ី និងអាមេរិកខាងត្បូងហើយខាងជើង និងដំណើរទេសចរណ៍នៅឆ្នាំនេះក្រោមប្រធានបទ “ចែករំលែកភាពរំភើបរីករាយ ចែករំលែកពានរង្វាន់” នឹងមកដល់ប្រទេសកម្ពុជាចាប់ពីថ្ងៃទី ២ ដល់ថ្ងៃទី ៤ ខែមេសា ឆ្នាំ ២០១៨ ខាងមុខនេះ។

ស្រាបៀរ Heineken® ជឿជាក់ថា គ្រប់ការប្រកួតបាល់ទាត់ក្របខ័ណ្ឌ UEFA Champions League ផ្តល់ភាពរំភើបរីករាយ និងអារម្មណ៍រំជើបរំជួល។ ការប្រកួតនីមួយៗគឺដូចជាកម្មវិធីដែលមិនអាចទាយទុកជាមុនបាន និងប្រកួតផ្ទាល់ដោយកីឡាករឆ្នើមបំផុតនៅលើពិភពលោក។ កម្មវិធីដំណើរទេសចរណ៍ពានរង្វាន់ក្របខ័ណ្ឌ UEFA Champions League ឆ្នាំ ២០១៨ ដែលនាំជូនដោយស្រាបៀរ Heineken® អនុញ្ញាតឱ្យអ្នកគាំទ្រនៅជុំវិញពិភពលោកមានឱកាសចូលរួមផ្ទាល់ក្នុងការទស្សនាការប្រកួតដ៏រំភើបតាមរយៈយុទ្ធនាការ ក្រោមប្រធានបទ “ចែករំលែកភាពរំភើបរីករាយ ចែករំលែកពានរង្វាន់” របស់ស្រាបៀរ Heineken®។

ជាផ្នែកមួយនៃយុទ្ធនាការទូទាំងពិភពលោក កម្មវិធីដំណើរទេសចរណ៍ពានរង្វាន់ក្របខ័ណ្ឌ UEFA Champions League ឆ្នាំ ២០១៨ ដែលនាំជូនដោយស្រាបៀរ Heineken®នឹងធ្វើឡើងនៅប្រទេសកម្ពុជាចាប់ពីថ្ងៃទី ២ ដល់ថ្ងៃទី ៤ ខែមេសា ឆ្នាំ ២០១៨ ។ សម្រាប់រយៈពេលបីថ្ងៃ ក្រុមអ្នកគាំទ្រមានឱកាសដ៏កម្រក្នុងការថតរូបជាមួយនឹងពានរង្វាន់ដ៏ល្បីល្បាញនេះ ជួបផ្ទាល់ជាមួយ Ruud van Nistelrooy និងទទួលបទពិសោធន៍ដ៏រំភើបនៃដំណើរទស្សនកិច្ចនេះ។

លោក Ruud van Nistelrooy ត្រូវបានចាត់ទុកថាជាកីឡាករដ៏ឆ្នើមបំផុតម្នាក់ក្នុងជំនាន់របស់គាត់ដោយស៊ុតបញ្ចូលទីបាន ១៥០ គ្រាប់ក្នុង ២១៩ ប្រកួតសម្រាប់ក្រុម Manchester United និងជាកីឡាករស៊ុតបញ្ចូលទីច្រើនជាងគេក្នុងកំណត់ត្រាបាល់ទាត់អឺរ៉ុបរបស់ក្លិប និងជាកីឡាករស៊ុតបាល់បញ្ចូលទីច្រើនជាងគេបីសម័យកាលក្នុងក្របខ័ណ្ឌ UEFA Champions League ។ លោក Ruud van Nistelrooy មានទំនាក់ទំនងជាប្រវត្តិសាស្ត្រជាមួយនឹងក្របខ័ណ្ឌ UEFA Champions League និងដើរតួយ៉ាងសំខាន់ក្នុងការបង្ហាញនូវមហិច្ឆិតាចំពោះការប្រកួតនេះ។

លោក Roland Bala នាយកគ្រប់គ្រងនៃក្រុមហ៊ុនស្រាបៀរ Heineken ប្រចាំប្រទេសកម្ពុជា បានសម្តែងនូវភាពរីករាយយ៉ាងខ្លាំងចំពោះដំណើរទស្សនកិច្ចនៅកម្ពុជា៖ “ស្រាបៀរ Heineken®មានកិត្តិយសយ៉ាងក្រៃលែងក្នុងការនាំកម្មវិធីដំណើរទេសចរណ៍ពានរង្វាន់ក្របខ័ណ្ឌ UEFA Champions League មកកាន់ប្រទេសកម្ពុជា។ យើងបានប្រកួតប្រជែងជាមួយបណ្តាប្រទេសជាង ១៩២ សម្រាប់ឱកាសនេះ ហើយទីបំផុតបានបញ្ចុះបញ្ចូលអ្នករាល់គ្នាក្នុងការធ្វើឱ្យកម្ពុជាជាអាទិភាពចម្បងដោយសារតែការគាំទ្រយ៉ាងច្រើនចំពោះកីឡាបាល់ទាត់អន្តរជាតិ។ ដោយសារតែកម្មវិធីដំណើរទេសចរណ៍ពានរង្វាន់នេះមិនដែលធ្លាប់ធ្វើឡើងនៅទីនេះ ស្រាបៀរ Heineken® បានយល់ព្រមផ្តល់ការគាំទ្រយ៉ាងពេញទំហឹងដល់អ្នកគាំទ្របាល់ទាត់កម្ពុជា និងកីឡាករដែលមានទេពកោសល្យ។ នេះគឺជាបទពិសោធន៍វិសេសវិសាលមួយសម្រាប់អ្នកគាំទ្រកម្ពុជាចំពោះក្របខ័ណ្ឌ UEFA Champions League ដើម្បីបានឃើញផ្ទាល់នូវពានរង្វាន់ដ៏ល្បីល្បាញនេះ និងជួបផ្ទាល់ជាមួយ Ruud van Nistelrooy។ គោលបំណងរបស់យើងគឺធ្វើឲ្យអ្នកគាំទ្រដែលមិនមានឱកាសអាចទទួលបាននូវបទពិសោធន៍រំភើបរីករាយ និងអារម្មណ៍រំជើបរំជួលចំពោះការប្រកួតក្របខ័ណ្ឌ UEFA Champions League ។ យើងក៏ចង់លើកស្ទួយវិស័យកីឡាបាល់ទាត់របស់កម្ពុជានៅលើឆាកអន្តរជាតិ។

ឆ្នាំនេះ កម្មវិធីដំណើរទេសចរណ៍ពានរង្វាន់ក្របខ័ណ្ឌ UEFA Champions League ដែលនាំជូនដោយស្រាបៀរ Heineken®នឹងធ្វើឡើងនៅប្រទេសម៉ិកស៊ិក កូតឌីវ័រ ប៉ារ៉ាហ្គាយ កម្ពុជា ម៉ាឡេស៊ី និងអេត្យូពី។

ព័ត៌មានបន្ថែមអំពីកម្មវិធីដំណើរទេសចរណ៍ពានរង្វាន់ក្របខ័ណ្ឌយូហ្វាឆែមពានលីកនៅក្នុងប្រទេសកម្ពុជានិងឱកាសសម្រាប់អ្នកគាំទ្រចូលរួមក្នុងសកម្មភាពផ្សេងៗនឹងធ្វើការចេញផ្សាយក្នុងពេលឆាប់ៗនេះ។ ចំពោះព័ត៌មានលម្អិត សូមចូលមើលគេហទំព័រ www.facebook.com/Heineken

សូមរីករាយទទួលទានស្រាបៀរ Heineken ដោយទទួលខុសត្រូវ

March 5, 2018

Author: វល័ក្ខ