វល័ក្ខ - La Reine Media

ថ្ងៃដំបូងនៃវគ្គផ្តាច់ព្រ័ត្រទូទាំងប្រទេស Tiger Street Football Festival ទទួលការចាប់អារម្មណ៍ខ្លាំង

រាជធានីភ្នំពេញ៖ការប្រកួតថ្ងៃដំបូងនៃវគ្គផ្តាច់ព្រ័ត្រទូទាំងប្រទេសនៃក្របខ័ណ្ឌ Tiger Street Football Festival 2018 នៅរាជធានីភ្នំពេញទទួលបានការចាប់អារម្មណ៍ខ្លាំងពីទស្សនិកជនដោយមានវត្តមានវីរបុរសក្រុមបិសាចក្រហមលោក Ryan Giggs និងកីឡាករឆ្នើមបំផុតមកពីមណ្ឌលទាំង៨ ។

លើសពីនេះ ក្រុមការងារស្រាបៀរថៃហ្គ័របានរៀបចំឲ្យមានការប្រកួតមិត្តភាពមួយ ដោយជ្រើសយកកីឡាករម្នាក់ តំណាងក្រុមជើងឯកប្រចាំមណ្ឌលនីមួយៗ ហើយបែងចែកជា២ក្រុមដើម្បីប្រកួតលក្ខណៈមិត្តភាព។

ការប្រកួតជម្រើសកីឡាករទាំង២ក្រុម ទទួលបានការណែនាំ នឹងពិនិត្យដាក់ពិន្ទុផ្ទាល់ដោយ លោក Ryan Giggs ដើម្បីស្វែងរកកីឡាករឆ្នើមក្នុងការប្រកួតនេះ និងទទួលបានរង្វាន់ពិសេសពីក្រុមហ៊ុនស្រាបៀរថៃហ្គ័រ។ ជាលទ្ធផល កីឡាករឆ្នើមបានទៅលើយុវជនម្នាក់ដែលជាសមាជិកក្រុម Home Sport Original ហើយក្រុមនេះគឺជាម្ចាស់ជើងឯកប្រចាំរាជធានីភ្នំពេញផងដែរ។

សូមបញ្ជាក់ថា វីរបុរសក្រុមបិសាចក្រហម Ryan Giggs មកកម្ពុជារយៈពេល២ថ្ងៃ ដើម្បីចូលរួមជាទូតសុឆន្ទៈផ្សព្វផ្សាយកម្មវិធី Tiger Street Football Festival 2018 ដែលនឹងចែករំលែកបទពិសោធន៍លេងបាល់ទាត់ និងផ្តល់ឱកាសចុះហត្ថលេខា ថតរូបជាមួយអ្នកគាំងទ្រផងដែរ។

ចង់ដឹងថាតើនៅថ្ងៃទីពីរ លោក Ryan Giggs នឹងមានសកម្មភាពពិសេសអ្វីខ្លះ? សូមបន្តតាមដានទាំងអស់គ្នា។

ចំពោះព័ត៌មានលម្អិតអំពីវគ្គផ្តាច់ព្រ័ត្រ Tiger Street Football Festival 2018 សូមចូលទៅកាន់ទំព័រហ្វេសប៊ុកផ្លូវការរបស់ស្រាបៀរថៃហ្គ័រ៖ www.facebook.com/TigerBeerKH

#TSFF2018
សូមពិសាថៃហ្គ័រដោយការទទួលខុសត្រូវ

March 11, 2018

វីដេអូអប់រំខ្លី ភាគទី២ ‌«គុណសម្បត្តិខ្ចីលុយពីគ្រឹះស្ថានមីក្រូហិរញ្ញវត្ថុ»

អ្នកនឹងទទួលបានអត្ថប្រយោជន៍ជាច្រើនដូចជា ការប្រាក់សមរម្យ ផ្តល់ប្រឹក្សាយោបល់ពីការរៀបចំហិរញ្ញវត្ថុ និងសន្សំលុយក្នុងគ្រួសារ មានធានារ៉ារប់រងលើសុខភាពពេលឈឺ ជាពិសេសនៅពេលមានបញ្ហាបង់សង នឹងមានអ្នកពិគ្រោះយោបល់ជាមួយនឹងដំណោះស្រាយដ៏សមស្រប នៅពេលខ្ចីប្រាក់ពីគ្រឹះស្ថានមីក្រូហិរញ្ញវត្ថុ ដែលទទួលបានអាជ្ញាប័ណ្ណពីធនាគារជាតិនៃកម្ពុជា និងគោរពតាមគោលការណ៍ការពារអតិថិជន៕

March 11, 2018

Mark Zuckerberg ទទួលបានលុយជិត 500លានដុល្លារពីការលក់ហ៊ុន Facebook

សហស្ថាបនិក និងជានាយកប្រតិបត្តិបណ្ដាញទំនាក់ទំនងសង្គមធំជាងគេ លើពិភពលោក Facebook Inc លោក Mark Zuckerberg ត្រូវបានគេដឹងថា ថ្មីៗនេះបានលក់ភាគហ៊ុន Facebook ផ្ទាល់ខ្លួនយ៉ាងច្រើនសន្ធឹកដើម្បីយកលុយទៅទំនុកបម្រុងក្នុងការវិនិយោគលើក្រុមហ៊ុនថ្មីមួយទៀត។ នេះបើយោងតាមការចេញផ្សាយរបស់សារព័ត៌មាន Reuters។

តាមការចុះផ្សាយរបស់ Reuters បានឱ្យដឹងថា កាលពីខែកុម្ភៈ កន្លងទៅនេះកំពូលមហាសេដ្ឋីវ័យក្មេង Mark Zuckerberg បានលក់ភាគហ៊ុនរបស់ខ្លួនចំនួន 2ដង ដោយលើកទី1លក់ចំនួន 685,000ហ៊ុន ដោយទទួលបានប្រាក់ចំនួន 125.4លានដុល្លារអាមេរិក និងលើកទី2 លក់ 2.7លានហ៊ុនថែមទៀតដោយសរុបទាំងពីរលើកទទួលបានប្រាក់ 482.2លានដុល្លារអាមេរិក។

លុយដែលបានពីការលក់ភាគហ៊ុនទាំងពីរលើកនេះ មិនត្រូវបានលោក Mark Zuckerberg បញ្ជាក់ថា យកទៅធ្វើអ្វីនោះទេ ប៉ុន្តែខាងក្រុមអ្នកឃ្លាំមើលបានលើកឡើងថា លុយទាំងអស់នោះ គឺ Mark Zuckerberg យកទៅវិនិយោគបន្ថែមទៅលើក្រុមហ៊ុន Chan Zuckerberg Initiative ដែលបង្កើតឡើងដោយលោកជាមួយនឹងភរិយា ហើយក្រុមហ៊ុនមួយនេះ គឺផ្ដោតសំខាន់លើការអភិវឌ្ឍផ្នែកវិទ្យាសាស្ត្រអប់រំ និងវិស្វកម្ម។

កាលពីខែកញ្ញា ឆ្នាំ2017 លោក Mark Zuckerberg បានប្រកាសថា លោកនឹងលក់ភាគហ៊ុនដែលមាននៅក្នុងបណ្ដាញសង្គម Facebook ចន្លោះពី 35 ទៅ 75លានហ៊ុន នៅក្នុងរយៈពេល 18ខែបន្ទាប់ ដែលតាមការប៉ាន់ប្រមាណអាចប្រមូលប្រាក់បានរហូតដល់ 13ពាន់លានដុល្លារអាមេរិក។

គួរបញ្ជាក់ដែរថា លោក Mark Zuckerberg គឺជាបុគ្គលតែម្នាក់គត់ ដែលមានភាគហ៊ុន Facebook ច្រើនជាងគេ ដោយកាលពីឆ្នាំ2016 លោកបានលក់ភាគហ៊ុនដោយទទួលបានលុយ 1.6ពាន់លានដុល្លារអាមេរិកម្ដងរួចមកហើយ៕

March 9, 2018

ការសាងអត្តសញ្ញាណផ្ទាល់ខ្លួន ជារឿងសំខាន់សម្រាប់អាជីវកម្មសម័យថ្មី

ការសាងអត្តសញ្ញាណផ្ទាល់ខ្លួន ឬសាងម៉ាកសញ្ញាផ្ទាល់ខ្លួន (personal branding) ជារឿងសំខាន់មួយសម្រាប់ម្ចាស់អាជីវកម្មសម័យថ្មី ជាពិសេសអាជីវកម្មដែលរកស៊ីតាមប្រព័ន្ធអេឡិចត្រូនិក (e-commerce) ដែលទាមទារឱ្យមានចំណាប់អារម្មណ៍ខ្លាំងពីអតិថិជន។

លោក ហាក់ គីមថុង ស្ថាបនិក និងជានាយក Kumnit Creative បានលើកឡើងថា សម្រាប់អ្នកធ្វើអាជីវកម្មចាំបាច់ត្រូវតែមានកេរ្តិ៍ឈ្មោះល្អ និងមានអត្តសញ្ញាណច្បាស់លាស់សម្រាប់ឱ្យអតិថិជនបានស្គាល់ពីភាពខ្លាំងរបស់ខ្លួន។ អ្នករកស៊ីត្រូវចេះវិនិយោគខ្លួនឯងក្នុងរយៈពេលយូរ ជាមួយនឹងការសាងកេរ្តិ៍ឈ្មោះឱ្យបានល្អ រួមទាំងទំនាក់ទំនងទូលំទូលាយមុនពេលបង្ហាញផលិតផលរបស់ខ្លួនទៅកាន់អតិថិជន ព្រោះថា នៅពេលដែលអតិថិជនបានស្គាល់ពីភាពខ្លាំងរបស់យើងច្បាស់លាស់ យើងនឹងទទួលបានការជឿទុកចិត្តលើផលិតផលរបស់យើងកាន់តែខ្លាំងឡើងដូចគ្នា។

លោក ហាក់ គីមថុង បាននិយាយថា ៖ “អ្នកដែលចង់ធ្វើអាជីវកម្ម គួរមានគោលដៅច្បាស់លាស់ក្នុងការផ្សព្វផ្សាយឱ្យសាធារណជនមើលឃើញពីចំណុចពិសេសរបស់ខ្លួនយូរអង្វែង ហើយត្រូវដាក់ផែនការក្នុងការធ្វើវា រហូតទទួលបានចំណាប់អារម្មណ៍ច្រើនពីអតិថិជនគោលដៅរបស់ខ្លួន។

លោក ហាក់ គីមថុង បានលើកឡើងផងដែរថា មានមនុស្សជាច្រើន ជាពិសេសអ្នករកស៊ីតាមបណ្តាញអនឡាញដែលគាត់ផ្សព្វផ្សាយតែពីផលិតផលខ្លាំងពេក បែរជាធ្វើឱ្យគាត់ក្លាយជាមនុស្សគួរឱ្យរំខាន ឬមិនសូវមានអ្នកចាប់អារម្មណ៍ទៅវិញ។ បញ្ហានេះ មកពីអតិថិជនរបស់គាត់មិនទាន់ស្គាល់ និងទុកចិត្តគាត់នៅឡើយ ហើយពេលខ្លះថែមទាំងបង្ហាញនូវការមិនចូលចិត្តទៀតផង។ ជាជម្រើសល្អសម្រាប់ពួកគាត់ គឺគាត់អាចសាកល្បងបង្ហាញអំពីខ្លួនគាត់ជាមុនសិន បន្ទាប់មកតាមរយៈកេរ្តិ៍ឈ្មោះល្អរបស់គាត់ គាត់អាចនឹងមានឥទ្ធិពលសម្រាប់ការណែនាំដល់អតិថិជនឱ្យប្រើប្រាស់ផលិតផល ឬសេវាដែលគាត់កំពុងធ្វើអាជីវកម្មនោះបានយ៉ាងមានប្រសិទ្ធភាព។

បង្ហាញលើចំណុចនេះដែរ លោក ម៉ៅ វិបុលអគ្គនាយកហាងកាហ្វេ Brewhouse បានលើកឡើងថា កេរ្តិ៍ឈ្មោះផ្ទាល់ខ្លួនពិតជាសំខាន់ណាស់សម្រាប់អ្នកធ្វើអាជីវកម្ម ព្រោះថា នៅពេលដែលយើងមានឈ្មោះល្អ អតិថិជននឹងទុកចិត្ត និងគាំទ្រយើងច្រើន ប្រសិនបើសេវាកម្ម ឬផលិតផលរបស់យើងមានគុណភាពល្អ។ ម្យ៉ាងវិញទៀត ក្រៅពីទទួលបានចំណាប់អារម្មណ៍ពីអតិថិជនហើយ ការមានកេរ្តិ៍ឈ្មោះល្អ បូករួមទាំងមានគម្រោងអាជីវកម្មល្អផង អាចធ្វើឱ្យយើងមានភាពងាយស្រួលក្នុងការស្វែងរកដៃគូអាជីវកម្ម ឬប្រភពទុនបន្ថែមទៀតផង។

លោក ម៉ៅ វិបុល បាននិយាយថា ៖ “នៅពេលដែលយើងចាប់ផ្តើមអាជីវកម្មដំបូង យើងចាំបាច់ត្រូវធ្វើការប្រមូលទុនជាមុនសិន ប្រសិនបើយើងមានឈ្មោះមិនសូវល្អ យើងក៏មិនអាចប្រមូលទុន ឬស្វែងរកដៃគូបានល្អដែរ ផ្ទុយមកវិញប្រសិនបើយើងមានភាពច្បាស់លាស់ យើងនឹងក្លាយជាមនុស្សដែលអាចដោះស្រាយបញ្ហាអាជីវកម្មបានយ៉ាងងាយស្រួល។

សហគ្រិនខាងលើបានលើកឡើងផងដែរថា បើនិយាយពីការដោះស្រាយបញ្ហាទុនធ្វើអាជីវកម្ម គឺគេគិតពីទុនដែលមាននៅក្នុងដៃ និងទុនដែលមិនទាន់មាននៅក្នុងដៃ។ ទុនដែលមិនទាន់មាននៅក្នុងដៃ គឺជាទុនបង្វិលដែលយើងទទួលបានពីសាច់ញាតិដែលស្និទ្ធស្នាលបំផុត ឬប្រភពមួយចំនួនទៀតដែលចុងក្រោយអាចជាកម្ចីធនាគារ ប្រសិនបើយើងមានឈ្មោះល្អ និងគម្រោងអាជីវកម្មល្អយើងនឹងអាចទទួលបានការទុកចិត្ត ហើយទទួលបានទុននោះយ៉ាងងាយ។ ហេតុនេះហើយ ទើបអ្នកធ្វើអាជីវកម្មចាំបាច់ត្រូវតែរក្សាឱ្យបាននូវភាពស្មោះត្រង់ និងភាពច្បាស់លាស់ស្របពេលដែលយើង មានគំនិតអាជីវកម្មល្អហើយដែរ៕

March 9, 2018

ធនាគារ CIMB បានរៀបចំកម្មវិធីទិវានារីអន្តរជាតិ ក្រោមកិច្ចឧបត្ថម្ភដ៏ខ្ពង់ខ្ពស់ពី ក្រសួងកិច្ចការនារី ដើម្បីជាការលើកកម្ពស់សមត្ថភាព និងការចូលរួមរបស់ស្ត្រី ក្នុងស្ថាប័ន

ភ្នំពេញ៖ នៅថ្ងៃទី07 ខែមីនា ឆ្នាំ2018 ធនាគារ ស៊ីអាយអិមប៊ី ភីអិលស៊ី (ធនាគារ CIMB) បានរៀបចំកម្មវិធីអបអរសាទរព្រឹត្តិការណ៍ ទិវានារីអន្តរជាតិ 08មីនា ខួបលើកទី107 ក្រោមប្រធានបទ «ស្ត្រីរួមគ្នារក្សាសន្តិភាព ដើម្បីអភិវឌ្ឍន៍ជាតិ» ដោយមានការអញ្ជើញចូលរួមក្រោមអធិបតីភាពរបស់លោកជំទាវ ញ៉ែម មរកត អនុរដ្ឋលេខាធិការក្រសួងកិច្ចការនារី រួមជាមួយគណៈគ្រប់គ្រងជាន់ខ្ពស់ និងបុគ្គលិកគ្រប់លំដាប់របស់ធនាគារ CIMB ប្រមាណជាង 80នាក់ផងដែរ។

ក្រោមកិច្ចឧបត្ថមដ៏ខ្ពង់ខ្ពស់ពីសំណាក់ក្រសួងកិច្ចការនារី បានញ៉ាំងឱ្យកម្មវិធីទាំងមូលកាន់តែមានភាពអស្ចារ្យ និងអធិកអធមក្រៃលែង បង្កលក្ខណៈដល់បុគ្គលិកគ្រប់រូបដែលបានអញ្ជើញចូលរួម អាចស្វែងយល់កាន់តែច្បាស់ ពីសារៈសំខាន់របស់ស្ត្រី ក្នុងការអភិវឌ្ឍសង្គមជាតិ ក៏ដូចជាការលើកកម្ពស់សមភាពយេនឌ័រ និងការដោះស្រាយបញ្ហានានារបស់ស្ត្រីទូទាំងប្រទេសកម្ពុជា។

ថ្លែងក្នុងកម្មវិធីដ៏ឱឡារិកនេះ លោក ប៊ុន យីន ប្រធាននាយកប្រតិបត្តិរបស់ធនាគារ CIMB បានឲ្យដឹងថា៖ «យើងរៀបចំកម្មវិធីទិវានារីអន្តរជាតិនេះឡើង ដើម្បីចូលរួមអបអរដល់ស្ត្រី នៅទូទាំងពិភពលោក ក៏ដូចជាប្រទេសកម្ពុជា ហើយជាពិសេសបង្ហាញពីការថ្លែងអំណរគុណដល់និយោជិតជាស្ត្រីរបស់ធនាគារយើង។ ធនាគារ CIMB បានលើកទឹកចិត្ត និងលើកកម្ពស់ការអភិវឌ្ឍសមត្ថភាពស្ត្រី ក្នុងវិស័យធនាគារ។ យើងខ្ញុំមាននិយោជិតស្ត្រី រហូតដល់ 55% នៃចំនួនបុគ្គលិកសរុបរបស់ធនាគារ CIMB ដែលជាផ្នែកមួយយ៉ាងសំខាន់ធ្វើឱ្យសេវាកម្មបម្រើអតិថិជនកាន់តែល្អបំផុតចំពោះអតិថិជនរបស់យើង»។

ក្នុងនាមជាតំណាងដ៏ខ្ពង់ខ្ពស់របស់លោកជំទាវ រដ្ឋមន្ត្រីក្រសួងកិច្ចការនារី លោកជំទាវ ញ៉ែម មរកត អនុរដ្ឋលេខាធិការ ក្រសួងកិច្ចនារី បានផ្តល់អនុសាសន៍ នៅក្នុងកម្មវិធីនេះថា៖ «ស្ត្រីគឺជាឆ្អឹងខ្នងនៃប្រទេសជាតិ និងជាកម្លាំងចលករមួយដ៏សំខាន់ សម្រាប់ជំរុញឱ្យប្រទេសជាតិទទួលបាននូវការអភិវឌ្ឍ រីកចម្រើន វឌ្ឍនភាព ស្ថេរភាព និងសន្តិភាព។ បច្ចុប្បន្ន មានស្ត្រីកាន់ច្រើនដែលពោពេញទៅដោយសមត្ថភាព និងភាពជោគជ័យនៅក្នុងជីវិត នៅលើមុខជំនួញ និងការងារ។ ខ្ញុំសូមកោតសរសើរដល់ធនាគារ CIMB ចំពោះកិច្ចខិតខំប្រឹងប្រែងរបស់ខ្លួន ក្នុងការលើកកម្ពស់ការចូលរួមរបស់ស្ត្រី នៅក្នុងជួរថ្នាក់ដឹកនាំរបស់ធនាគារ ដែលរួមមានគណៈគ្រប់គ្រងជាស្ត្រី រហូតដល់ 4នាក់ ក្នុងចំណោមគណៈគ្រប់គ្រងទាំង11នាក់»។

ជាមួយគ្នានេះ លោកជំទាវបានបញ្ជាក់ផងដែរថា ការចូលរួមរបស់ក្រសួងកិច្ចការនារី ក្នុងព្រឹត្តិការណ៍អបអរសសាទរទិវានារីអន្តរជាតិ ជាមួយធនាគារ CIMB នេះ គឺជាលើកដំបូងហើយ ដែលក្រសួងប្រាព្ធធ្វើជាមួយក្រុមហ៊ុនមកវិស័យឯកជន។ ហើយក្រសួងកិច្ចការនារីសង្ឃឹមថា នឹងមានកម្មវិធីបែបនេះកាន់តែធំជាងនេះ ជាមួយធនាគារ CIMB ក៏ដូចជានឹងមានការចូលរួមកាន់តែច្រើនឡើង ពីស្ថាប័ន និងក្រុមហ៊ុននានា ក្នុងការលើកកម្ពស់ និងលើកទឹកចិត្តស្ត្រី នៅក្នុងស្ថាប័នការងារ ដែលស្ត្រីមានតួនាទីយ៉ាងសំខាន់ ក្នុងកិច្ចអភិវឌ្ឍន៍សង្គមជាតិ។

គួរបញ្ជាក់ផងដែរ ទិវាអន្តរជាតិនារី 8មីនា ជាទិវាសកលមួយ ដែលរំលឹកអំពីវីរភាពនៃការតស៊ូរបស់នារី នៅទូទាំងសកលលោក ដើម្បីទាមទារឲ្យមានការលើកកម្ពស់ស្ថានភាព ជីវភាព សិទ្ធិសេរីភាព ឋានៈ តួនាទីរបស់ស្ត្រី នៅក្នុងសង្គម។

ជារៀងរាល់ឆ្នាំ នៅតាមបណ្តាប្រទេសនីមួយៗ តែងតែលើកយកប្រធានបទផ្សេងៗគ្នា ដែលទាក់ទងនឹងស្ត្រី ដើម្បីដាក់ចេញជាសកម្មភាព ឱញយស្របទៅនឹងបរិបទរបស់ប្រទេសនីមួយៗ ហើយដោយឡែក ប្រធានបទ «ស្ត្រីរួមគ្នារក្សាសន្តិភាព ដើម្បីអភិវឌ្ឍន៍ជាតិ» ត្រូវបានលើកឡើងដើម្បីឆ្លុះបញ្ចាំងពីតថភាពបច្ចុប្បន្នក្នុង សង្គម នៃព្រះរាជាណាចក្រកម្ពុជា ដែលយកចិត្តទុកដាក់ខ្ពស់លើសិទ្ធិសេរីភាព និងការចូលរួមដោយស្មើភាពក្នុងភារកិច្ច កសាងសង្គមរបស់ស្ត្រី។ ជាមួយគ្នានេះ ធនាគារ CIMB ដែលជាធនាគារពាណិជ្ជថ្នាក់តំបន់ឈានមុខគេ នៅប្រទេសកម្ពុជា មានមោទនភាព ដែលតែងតែលើកកម្ពស់សមត្ថភាពបុគ្គលិកជនជាតិខ្មែរ ជាពិសេសលើកទឹកចិត្តដល់បុគ្គលិកស្ត្រី ក្នុងវិស័យធនាគារ៕

March 9, 2018

Tiger Street Football Festival 2018 នៅមណ្ឌលភ្នំពេញពោរពេញទៅដោយក្រុមខ្លាំង និងជក់ចិត្តបំផុត

ភ្នំពេញ៖ ព្រឹត្តិការណ៍ Tiger Street Football Festival 2018 នៅមណ្ឌលភ្នំពេញគឺពោរពេញទៅដោយក្រុមខ្លាំងៗ ហើយការប្រកួតកាន់តែស្វិតស្វាញ ខណៈដែលការប្រកួតថ្ងៃដំបូងនេះក្រុមនីមួយៗបានបញ្ចេញនូវបច្ចេកទេសយ៉ាងប៉ិនប្រសប់នៅលើទីលានហ្វូតសាល Tiger Street នៅមុខបរិវេណសាលមហោស្រពកោះពេជ្រ។

នេះជាមណ្ឌលចុងក្រោយនៃព្រឹត្តិការណ៍ Tiger Street Football Festival 2018 មុនពេលឈានចូលដល់វគ្គផ្ដាច់ព្រ័ត្រទូទាំងប្រទេសនៅថ្ងៃទី10-11 ខែមីនា ឆ្នាំ2018នេះ។ នៅមណ្ឌលភ្នំពេញក្រុមទាំង 116នឹងត្រូវធ្វើការប្រកួតរហូតដល់ទៅ៣ថ្ងៃឯណោះ ទើបអាចស្វែងរកក្រុមទាំង 12ឈានទៅវគ្គផ្ដាច់ព្រ័ត្រទូទាំងប្រទេសបាន។

លើសពីនេះក្រុមចូលរួមទាំងអស់សុទ្ធតែជាក្រុមជើងខ្លាំង ពោរពេញដោយបទពិសោធន៍ក្នុងការប្រកួតលក្ខណៈហ្វូតសាលលើក្ដារនេះ ដែលក្រុមល្បីៗចុះឈ្មោះចូលរួមប្រកួតដូចជា៖ ក្រុមការពារតំណែងជើងឯក Victory Youth FC, ដូនពេញ FC, Home Sport FC, Pisnoka FC, Daniel FC, អាណាចក្របៃតង, ឆន្ទៈកីឡា, និងក្រុម Rolling FC ជាដើម។ អ្វីដែលធ្វើឱ្យអ្នកគាំទ្រកាន់តែចាប់អារម្មណ៍ក្នុងការប្រកួតមណ្ឌលនេះមួយទៀតនោះ គឺពួកគេអាចនឹងបានឃើញបច្ចេកទេសពីកីឡាករបរទេស ព្រោះថាក្រុមនៅភ្នំពេញភាគច្រើនតែងតែមានលាយកីឡាករបរទេស។

ចំពោះប្រាក់រង្វាន់សម្រាប់មណ្ឌលនេះវិញ ក្រុមលេខ1 បាន1500ដុល្លារ លេខ2 បាន1000ដុល្លារ លេខ3 បាន500ដុល្លារ និងក្រុមលេខ4 បាន200ដុល្លារ។ ការប្រកួតជ្រើសយក12ក្រុមឡើងទៅវគ្គផ្ដាច់ព្រ័ត្រ ដណ្ដើមប្រាក់រង្វាន់ធំទូទាំងប្រទេស 15000ដុល្លារ និងបានថតរូបជាមួយវីរបុរសក្រុមបិសាចក្រហម Manchester United គឺលោក Ryan Giggs ថែមទៀត។

សូមរង់ចាំតាមដានទាំងអស់តើក្រុមណាជាម្ចាស់ជើងឯកប្រចាំមណ្ឌលរាជធានីភ្នំពេញ។

ចំពោះព័ត៌មានលម្អិតបន្ថែមអំពី Tiger Street Football Festival 2018 សូមចូលទៅកាន់ទំព័រហ្វេសប៊ុកផ្លូវការរបស់ស្រាបៀរថៃហ្គ័រ៖www.facebook.com/TigerBeerKH

#TSFF2018
សូមពិសាដោយការទទួលខុសត្រូវ

March 9, 2018

ក្តីបារម្ភលើគុណភាពសំណង់នៅតែមានសម្រាប់កម្ពុជា

រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់បានសម្ដែងក្តីបារម្ភចំពោះគុណភាពសំណង់ដែលបាន និងកំពុងសាងសង់ដែលមិនទាន់អាចគ្រប់គ្រងបានទាំងស្រុងនៅឡើយ និងបានអំពាវនាវដល់អ្នកអភិវឌ្ឍន៍វិស័យសំណង់ទាំងអស់ឱ្យរួមគ្នាផ្តោតការយកចិត្តទុកដាក់លើគុណភាពសំណង់នៅកម្ពុជាផង។

ឯកឧត្តម ទេសរដ្ឋមន្ត្រី ជា សុផារ៉ា រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ បានអះអាងថា រឿងរ៉ាវក្នុងវិស័យសំណង់ត្រូវបានធ្វើយ៉ាងល្អប្រសើរច្រើនមកហើយ ប៉ុន្តែរឿងដែលនៅសេសសល់តិចតួចទាក់ទងនឹងការគ្រប់គ្រងគុណភាព នៅតែជាបញ្ហាចោទនៅឡើយ។

ឯកឧត្តម ជា សុផារ៉ា បញ្ជាក់ថា៖ “នៅសេសសល់បញ្ហាដែលយើងត្រូវរួមគ្នាធ្វើគឺ បង្កើនគុណភាពដែលចាត់ទុកថា វានៅតែជាបញ្ហានៅឡើយ។ ការបង្កើនគុណភាពនេះ កន្លងមកយើងឃើញថា លក្ខណៈ និងសោភ័ណភាពយើងមានហើយ ប៉ុន្តែនៅខ្វះចន្លោះខ្លះត្រង់ការត្រួតពិនិត្យគុណភាព។

ឯកឧត្តម ទេសរដ្ឋមន្ត្រីក៏បានសំណូមពរឱ្យក្រុមហ៊ុនអភិវឌ្ឍន៍លំនៅឋានទាំងអស់បង្កើនការត្រួតពិនិត្យគុណភាពសំណង់ឱ្យបានច្បាស់លាស់ដើម្បីផ្តល់នូវសុវត្ថិភាព និងផាសុកភាពដល់ពលរដ្ឋដែលជាអតិថិជនទិញនូវសំណង់សម្រាប់ស្នាក់នៅ។ ឯកឧត្តម បញ្ជាក់ថា៖ “សំណូមពររបស់ខ្ញុំនៅពេលនេះ គឺសុំឱ្យជួយពិនិត្យបង្កើនគុណភាពសំដៅផាសុកភាព។ វាជាការអៀនខ្មាស់ណាស់ឧទាហរណ៍ថាពេលយើងធ្វើរួច វាបាក់ ឬស្រុត ដែលអាចប៉ះពាល់ដល់សេចក្តីសុខ សុវត្ថិភាពរបស់ប្រជាពលរដ្ឋ។

របាយការណ៍ក្រសួងសេដ្ឋកិច្ច និងហិរញ្ញវត្ថុបានបង្ហាញឱ្យឃើញថា គិតត្រឹម 7ឆ្នាំចុងក្រោយនេះ ចាប់ពីឆ្នាំ2010 រហូតមកដល់ខែកញ្ញា ឆ្នាំ2017 ក្រសួងសេដ្ឋកិច្ច បានផ្តល់អាជ្ញាប័ណ្ណជូនក្រុមហ៊ុនអភិវឌ្ឍន៍លំនៅឋាន សរុបចំនួន 213គម្រោង ដែលមានទុនវិនិយោគសរុបប្រមាណ 3,375លានដុល្លារអាមេរិក។ ក្នុងចំណោមគម្រោងដែលទទួលបានអាជ្ញាប័ណ្ណទាំងអស់ ក្នុងនោះគម្រោងបុរីមានចំនួន 132គម្រោង ស្មើនឹង 31,997ខ្នងផ្ទះ និងអគារសហកម្មសិទ្ធិមានចំនួន 81គម្រោង ស្មើនឹង 29,612 យូនីត។

វិស័យសំណង់ គឺជាវិស័យស្នូលដ៏សំខាន់មួយនៃការផ្លាស់ប្តូរនៅក្នុងប្រទេសកម្ពុជា ហើយមកទល់បច្ចុប្បន្ននេះ ឧស្សាហកម្មសំណង់នៅប្រទេសកម្ពុជាបានបង្កើតរហូតដល់ប្រមាណ 1ភាគ10 នៃផលិតផលក្នុងស្រុកសរុបរបស់ប្រទេស និងបានបង្កើតការងារដោយផ្ទាល់ និងមិនផ្ទាល់សម្រាប់ប្រជាពលរដ្ឋជាច្រើន។ នេះបើយោងតាមក្រសួងសេដ្ឋកិច្ច និងហិរញ្ញវត្ថុ។ នៅក្នុងពិធីសន្និបាតបូកសរុបការងារប្រចាំឆ្នាំ 2017 និងលើកទិសដៅផែនការការងារសម្រាប់ឆ្នាំ2018 លោកឧកញ៉ា លី ហួរ ប្រធានសមាគមអ្នកអភិវឌ្ឍន៍លំនៅឋានកម្ពុជា បានលើកឡើងថា បន្ទាប់ពីបានបង្កើតឡើងកាលពីចុងឆ្នាំ2015 សមាគមនេះបានសម្រេចជោគជ័យលើកិច្ចការជាច្រើន ដូចជា ជួយដោះស្រាយបញ្ហាពន្ធដារជាមួយក្រសួងសេដ្ឋកិច្ច និងហិរញ្ញវត្ថុ ជួយសម្របសម្រួលទាក់ទងនឹងបណ្តាញអគ្គិសនីជាមួយអាជ្ញាធរអគ្គិសនីកម្ពុជា បណ្តាញទឹកស្អាត និងបណ្តាញហេដ្ឋារចនាសម្ព័ន្ធជាមួយក្រសួងរៀបចំដែនដី នគរូបនីយកម្ម និងសំណង់ និងការងារពាក់ព័ន្ធការអភិវឌ្ឍលំនៅឋានជាច្រើនទៀត៕

March 9, 2018

Tiger Street Football Festival 2018 ប្រចាំមណ្ឌលភ្នំពេញបានបើកការប្រកួតហើយ

ការប្រកួតវគ្គជម្រុះនៃពានរង្វាន់ Tiger Street Football Festival 2018 នៅមណ្ឌលរាជធានីភ្នំពេញមានរហូតដល់ទៅ 116 ក្រុម ដែលបានដាក់ពាក្យចូលរួមនេះ បានបើកការប្រកួតជាផ្លូវការណ៍ហើយនាព្រឹកថ្ងៃទី07 ខែមីនា ម្សិលមិញនេះ នៅបវិវេណសួនច្បារមុខសាលមហោស្រពកោះពេជ្រ។

ថ្លែងក្នុងពិធីបើក លោក ទុយ វិច្ឆិកា តំណាងសហព័ន្ធកីឡាបាល់ទាត់កម្ពុជា បានមានប្រសាសន៍ថា នេះគឺជាលើកទី6ហើយ ដែលក្រុមហ៊ុនស្រាបៀរថៃហ្គ័របានរៀបចំកម្មវិធីដ៏អស្ចារ្យក្នុងការផ្តល់ឱកាសដល់ប្អូនៗយុវជនដែលស្រលាញ់កីឡាបាល់បញ្ចេញសមត្ថភាព ប្រកួតប្រជែងដណ្តើមពាន់រង្វាន់ ហើយជាធម្មតាការប្រកួតតែងតែចង់ទទួលបានជ័យជំនះ ប៉ុន្តែយ៉ាងណាក៏ដោយ សហព័ន្ធកីឡាបាល់ទាត់ និងក្រុមហ៊ុនស្រាបៀរថៃហ្គ័រ តែងតែសង្កត់ធ្ងន់លើកការគោរពវិន័យ ហើយសង្ឃឹមថាប្រកាន់ភ្ជាប់នូវស្មារតីកីឡា លេងដោយ Fair Play គោរពពេលវេលា គោរពអាជ្ញាកណ្តាល និងអ្នករៀបចំកម្មវិធី។

ទន្ទឹមនឹងនោះផងដែរ លោក Moon Yoo នាយកផ្នែកទីផ្សារនៃក្រុមហ៊ុនស្រាបៀរថៃហ្គ័រ បានមានប្រសាសន៍ថា Tiger Street Football Festival 2018 បានវិលត្រឡប់មកវិញហើយ មិនតែប៉ុណ្ណោះ ព្រឹត្តិការណ៍កាន់តែធំជាងមុន និងមានមណ្ឌលប្រកួតរហូតដល់ 8 ទីតាំង ក្រុមចូលរួមប្រកួតដល់ទៅជាង500 ក្រុម កីឡាករសរុបជាង 3500 នាក់ និងមានប្រាក់រង្វាន់ដ៏ច្រើនសរុប 50000 $ ។ មិនតែប៉ុណ្ណោះក្រុមដែលប្រជែងបានកៅអីទៅចូលរួមប្រកួតវគ្គផ្តាច់ព្រ័តនៅរាជធានីភ្នំពេញ នឹងមានឱកាសជួបផ្ទាល់ជាមួយកំពូលតារាបាល់ទាត់អន្តរជាតិ Ryan Giggs នៅថ្ងៃប្រកួតផ្តាច់ព្រ័ត្រ។ សូមកីឡាករទាំងបញ្ចេញសមត្ថភាពឱ្យអស់នៅលើទីលានថៃហ្ក័រនេះ។ សូមបញ្ជាក់ថា នៅមណ្ឌលរាជធានីភ្នំពេញដែលជាមណ្ឌលចុងក្រោយនេះ គណៈកម្មាធិការយក 12 ក្រុមដើម្បីឡើងទៅវគ្គផ្តាច់ព្រ័ត្រនៅថ្ងៃទី 10 និង 11 ខែមីនា ឆ្នាំ 2018 នេះ ៕

សូមរង់ចាំតាមដានទាំងអស់គ្នា ថាតើក្រុមណាជាម្ចាស់ជើងឯកប្រចាំមណ្ឌលរាជធានីភ្នំពេញ។ ចំពោះព័ត៌មានលម្អិតបន្ថែមអំពី Tiger Street Football Festival 2018 សូមចូលទៅកាន់ទំព័រហ្វេសប៊ុកផ្លូវការរបស់ស្រាបៀរថៃហ្គ័រ៖www.facebook.com/TigerBeerKH

#TSFF2018

សូមពិសាដោយការទទួលខុសត្រូវ….

March 8, 2018

“8មីនា ទិវាស្ត្រីពិភពលោក” ឧត្តមភាពនៃស្ត្រីកម្ពុជាទាក់ទងនឹងគ្រួសារ

ស្ត្រីគឺជាសសរទ្រូងសុភមង្គលដែលគ្រួសារនីមួយៗមិនអាចខ្វះបាន ព្រោះស្ត្រីអាចដើរតួជាម្តាយល្អម្នាក់ទាំងនៅក្នុងសង្គម ក្នុងក្រុមហ៊ុន និងក៏ដូចជានៅក្នុងក្រុមគ្រួសារដែលមានតួនាទីមើលថែក្មេងៗជំនាន់ក្រោយ បុគ្គលិក ក៏ដូចជាកូនៗរបស់ខ្លួនដែរ។

មានពាក្យស្លោកមួយពោលថា “បុរសជាអ្នកដឹក ស្ត្រីជាអ្នកនាំ” ស្ត្រីអាចធ្វើរឿងជាច្រើនក្នុងពេលតែមួយបាន ស្ត្រីមានភាពអត់ធ្មត់ខ្លាំងជាងបុរស ជាហេតុដែលនាំឱ្យស្ត្រីអាចជម្នះឧបសគ្គបានគ្រប់យ៉ាង និងអាចបត់បែនបានគ្រប់កាលៈទេសៈ។

អគ្គនាយិកាក្រុមហ៊ុន D’ Furniture លោកជំទាវ តាំង ហ្គិចលៀង បានលើកឡើងថា ស្ត្រីមានតួនាទីសំខាន់ខ្លាំងណាស់សម្រាប់គ្រួសាររបស់ខ្លួន ស្ត្រីអាចធ្វើឱ្យគ្រួសារមានសុភមង្គល ជួយលើការងារអប់រំ មើលថែទាំបុត្រធីតា និងការតម្រង់ទិសដល់បុត្រធីតាសម្រាប់ថ្ងៃអនាគត ស្ត្រីអាចមានលទ្ធភាពក្នុងការជួយដល់កិច្ចការរបស់ស្វាមី ក្រៅពីនេះស្ត្រីក៏ជាអ្នកដែលអាចធ្វើឱ្យមនុស្សជុំវិញខ្លួនមានភាពរីករាយ និងមានស្នាមញញឹមគ្រប់ពេល។ លោកជំទាវបញ្ជាក់ផងដែរថា ប្រសិនបើយើងចេះបែងចែកពេលវេលាបានច្បាស់លាស់ នោះយើងនឹងក្លាយជាបុគ្គលសំខាន់សម្រាប់មនុស្សគ្រប់គ្នា។

លោកជំទាវ តាំង ហ្គិចលៀង បានមានប្រសាសន៍ថា៖ “ការរក្សាតុល្យភាពរវាងគ្រួសារ និងការធ្វើអាជីវកម្ម ក៏ដូចជាការរក្សាទំនាក់ទំនងល្អជាមួយមិត្តភ័ក្តិគឺជារឿងសំខាន់សម្រាប់ស្ត្រី ហេតុនេះហើយទើបនាងខ្ញុំចំណាយពេលជារៀងរាល់ព្រឹកសម្រាប់ការរៀបចំ និងមើលការខុសត្រូវលើរបបអាហារកូនៗ ហើយជូនពួកគាត់ទៅសាលារៀន បន្ទាប់មកត្រូវទៅក្រុមហ៊ុនរៀបចំចាត់ចែងការងារ ចំណែកពេលបាយថ្ងៃត្រង់ជាពេលវេលាសម្រាប់ជួបជាមួយមិត្តភ័ក្តិ ពេលល្ងាចជាពេលវេលាសម្រាប់ផ្តល់ជូនឪពុកម្តាយ ចំពោះថ្ងៃសៅរ៍ និងថ្ងៃអាទិត្យ គឺជាពេលវេលាដ៏ល្អសម្រាប់កំដរកូនៗ និងស្វាមី។

លោកជំទាវ បានបញ្ជាក់ផងដែរថា ប្រសិនបើយើងអាចបែងចែកពេលវេលាបានល្អសម្រាប់អ្នកទាំងអស់គ្នា យើងនឹងទទួលបាននូវទំនាក់ទំនងល្អ ភាពស្និទ្ធស្នាល ហើយថែមទាំងអាចធ្វើឱ្យអ្នករាល់គ្នាទទួលបាននូវភាពរីករាយគ្រប់ពេលវេលា។ មានមនុស្សមួយចំនួនទទួលបានជោគជ័យក្នុងអាជីវកម្ម តែមិនទទួលបានជោគជ័យក្នុងជីវិតគ្រួសារនោះទេ ព្រោះពួកគាត់អាចគិតតែមួយផ្នែក ដោយមិនបានធ្វើការបែងចែកពេលវេលាឱ្យបានល្អ។

សម្រាប់លោកជំទាវ គឺប្រើប្រាស់ភាពជាអ្នកដឹកនាំក្នុងភាពជាម្តាយសម្រាប់មនុស្សគ្រប់គ្នា ព្រោះអ្នកនៅជុំវិញខ្លួនយើងសុទ្ធតែជាមនុស្សសំខាន់។ ភាពជាម្តាយគឺត្រូវតែយកចិត្តទុកដាក់ចំពោះកូនៗទាំងអស់គ្នា ហើយព្យាយាមប្រើភាពទន់ភ្លន់ដើម្បីអប់រំ ណែនាំ និងតម្រង់ទិសដល់កូនៗឱ្យបានល្អ។ បុគ្គលិកនៅក្នុងក្រុមហ៊ុនទាំងអស់ក៏ចាត់ទុកថាជាកូន បងប្អូនសាច់ញាតិក៏រាប់ថាជាកូន ហេតុនេះយើងត្រូវដឹងឱ្យច្បាស់ថា វាសនារបស់អ្នកទាំងអស់នោះគឺនៅក្នុងដៃរបស់យើង យើងត្រូវតែខិតខំប្រឹងប្រែងឱ្យអស់លទ្ធភាពក្នុងការរៀបចំ ចាត់ចែង និងផ្តល់ក្តីស្រឡាញ់ ផ្តល់គំនិតវិជ្ជមានដើម្បីឱ្យអ្នកទាំងអស់គ្នាទទួលបាននូវភាពកក់ក្តៅ។ ការដឹកនាំបែបនេះអាចធ្វើឱ្យស្ត្រីក្លាយជាមនុស្សដ៏គួរឱ្យគោរពស្រឡាញ់ពីក្រុមគ្រួសារផង ពីបុគ្គលិកក្រោមបង្គាប់ផង និងពីមិត្តភ័ក្តិផងដែរ។

លោកជំទាវបានលើកឡើងផងដែរថា នៅក្នុងជីវិតប្តីប្រពន្ធតែងតែមានរឿងឈ្លោះប្រកែកគ្នាខានមិនបាន នៅពេលដែលយើងឈ្លោះគ្នាអត់មានផលចំណេញទេ ផ្ទុយទៅវិញយើងទាំង2នាក់ប្តីប្រពន្ធខាតបង់ច្រើន ខាតទាំងពេលវេលា ខាតទាំងអារម្មណ៍ខឹងមួម៉ៅ ប៉ុន្តែលោកជំទាវបានប្រាប់ថា មានថ្នាំម្យ៉ាងសម្រាប់បន្សាបកំហឹងបាននោះគឺ ក្តីអាណិតក្នុងនាមយើងជាភរិយាល្អត្រូវចេះអត់ឱន អធ្យាស្រ័យដោយប្រើមនោសញ្ចេតនា ក្តីអាណិត និងក្តីស្រឡាញ់ជាធំ គឺប្រើនយោបាយម្តាយស្រឡាញ់កូន ព្រោះជាក់ស្តែងបើយើងខឹងកូនយើង គឺខឹងតែមួយភ្លែតទេ ចុះហេតុអីចំពោះស្វាមីរបស់យើង ជាមនុស្សដែលយើងស្រឡាញ់ខ្លាំងបំផុតនោះ យើងមិនអាចលើកលែងឱ្យគាត់បាន? យើងត្រូវគិតឡើងវិញថា រឿងរ៉ាវអ្វីខ្លះដែលធ្វើឱ្យយើងឈ្លោះគ្នា ជួនកាលរឿងខ្លះវាជារឿងតូចបំផុត ពាក់ព័ន្ធនឹងការទាមទាររបស់យើងខ្ពស់ពីស្វាមីពេកទេដឹង? យើងត្រូវព្យាយាមហាត់ពត់ខ្លួនឯងឡើងវិញ ដោយកាត់បន្ថយការទាមទារ ព្យាយាមសម្របខ្លួនក្នុងការរស់នៅជាមួយគ្នា ហើយត្រូវចេះធ្វើហីខ្លះទើបបាន ទើបមិនធ្វើឱ្យយើងឈ្លោះគ្នាច្រើន ហើយប្រសិនបើកំហុស នោះកើតឡើងដោយសារខ្លួនយើងវិញ កុំខ្លាចពាក្យថាសុំទោស មិនមែនការសុំទោស ធ្វើឱ្យយើងអន់នោះទេ តែផ្ទុយទៅវិញវាបានផ្តល់តម្លៃកាន់តែខ្លាំងដល់ខ្លួនយើងថែមទៀតផង ព្រោះពាក្យសុំទោសចំពោះអ្នកដទៃវាជាការបញ្ជាក់ពីការទទួលខុសត្រូវខ្ពស់របស់យើង។

លោកជំទាវបានមានប្រសាសន៍ថា នៅក្នុងសង្គមយើងបច្ចុប្បន្ន យើងសង្កេតឃើញថាជីវិតគ្រួសារក្មេងៗជំនាន់ក្រោយ ពួកគាត់មិនសូវចេះអត់ធ្មត់ក្នុងការរស់នៅជាមួយគ្នាទេ អត្រានៃការលែងលះមានចំនួនច្រើន ដែលបញ្ហានេះកើតឡើងដោយសារការមិនព្រមព្យាយាមសម្របខ្លួនក្នុងការរស់នៅជាមួយគ្នា ព្រោះតែពួកគាត់ ភាគច្រើនកើតមកមិនបានឆ្លងកាត់ការលំបាក ឪពុកម្តាយគាត់ជាអ្នកធូរធារមានលុយកាក់ផ្គត់ផ្គត់ជួយដល់គាត់គ្រប់រឿង ដូច្នេះពួកគាត់មិនយល់ទេពាក្យថា ទ្រាំ និងទ្រាំដើម្បីអ្វី ជាហេតុធ្វើឱ្យពួកគាត់បែកគ្នា។

លោកជំទាវបញ្ជាក់ថា “មកទល់បច្ចុប្បន្ននេះខ្ញុំបានជួយប្តីប្រពន្ធ4គូដែលប្រុងដឹកដៃគ្នាទៅលែងលះ បន្ទាប់ពីជួបជាមួយខ្ញុំរួចមក ខ្ញុំបានសួរនាំ និងផ្តល់យោបល់ល្អៗ បានធ្វើឱ្យពួកគាត់ភ្ញាក់ខ្លួនពីទង្វើរបស់គាត់កន្លងមក ហើយសម្រេចចិត្តផ្លាស់ប្ដូរចិត្តពីការលែងលះ មករួមរស់នៅជាមួយគ្នាឡើងវិញ។ លោកជំទាវបានបន្តថា “អ្វីដែលខ្ញុំសប្បាយចិត្តជាងគេ គឺខ្ញុំមានមុខរបរមួយ អត់ចំណេញប្រាក់ទេ តែជាមុខរបរដែលខ្ញុំស្រឡាញ់ជាងគេ គឺការលើកទឹកចិត្តអ្នកដទៃ និងបានជួយគេជារៀងរាល់ថ្ងៃ។

ចំពោះការអប់រំដល់បុត្រធីតា លោកជំទាវបានមានប្រសាសន៍ថា យើងត្រូវមានវិធីសាស្ត្រក្នុងការនិយាយជាមួយពួកគាត់ លោកជំទាវបន្តថា “កូនខ្ញុំអាយុ8ឆ្នាំ ខ្ញុំព្យាយាមនិយាយជាមួយគាត់មិនឱ្យលើស10នាទីទេ ព្រោះបើយើងនិយាយយូរជាងនេះគាត់នឹងស្តាប់មិនចូលទេ” យើងត្រូវមានចិត្តសាស្ត្រក្នុងការនិយាយជាមួយពួកគាត់ដោយធ្វើយ៉ាងណាឱ្យគាត់ចាត់ទុកយើងជាមិត្តភ័ក្តិជិតស្និទ្ធ ទើបគាត់អាចប្រាប់យើងនូវរឿងគ្រប់យ៉ាងរបស់គាត់បាន ដូច្នេះបន្ទាប់ពីយើងបានដឹងរឿងរ៉ាវរបស់គាត់ហើយ យើងនឹងរិះរកវិធីដើម្បីជួយដោះស្រាយគាត់មួយជំហានម្តងៗ គឺមិនអាចធ្វើដោយបង្ខំបានទេ។

សហគ្រិនស្រ្តីកម្ពុជា ថតរូបជុំគ្នានៅក្នុងកម្មវិធីមួយ

ជាចំណងដៃសម្រាប់ថ្ងៃ8 មិនានេះ លោកជំទាវក៏បានផ្តល់អនុសាសន៍ដល់ស្ត្រីទាំងឡាយ ឱ្យចេះស្រឡាញ់ខ្លួនឯងឱ្យបានច្រើន កុំធ្វើបាបខ្លួនឯងដោយការខឹង ព្រោះការខឹងធ្វើឱ្យយើងខូចអារម្មណ៍ខូចទាំងសម្រស់ ខូចទាំងសុខភាព ខូចទាំងមនោសញ្ចេតនាដែលយើងខំសាងពីមុនមក។ ត្រូវចាំថាស្ត្រីគឺជាបេះដូងរបស់គ្រួសារ ដូច្នេះយើងត្រូវតែធ្វើជាអ្នកបង្កើតនូវសកម្មភាពល្អៗដើម្បីឱ្យគ្រួសារទទួលបាននូវសេចក្តីសុខសុភមង្គល យើងត្រូវតែមានភាពទន់ភ្លន់ ក្រមិចក្រមើម ញ៉េះញ៉ោះ លួងលោមដើម្បីផ្លាស់ប្តូរបរិយាកាសអាប់អួឱ្យទៅជារីករាយ វាមិនមែនជាភាពអៀនខ្មាស់ដែលយើងត្រូវធ្វើដូច្នេះនោះទេ តែផ្ទុយទៅវិញ វាជាតួនាទីរបស់យើងដែលជាភរិយាក្នុងនាមជាមនុស្សស្រី ព្រោះធម្មជាតិរបស់មនុស្សប្រុសទូទៅមិនអាចធ្វើចំណុចនេះបានល្អដូចយើងជាស្ត្រីឡើយ។ ដូច្នេះស្ត្រីត្រូវដឹងខ្លួនឯងថា តួនាទីរបស់យើង គឺជាអ្នកផ្តល់សេចក្តីសុខសុភមង្គលដល់មនុស្សជុំវិញខ្លួន មិនមែនត្រូវរង់ចាំឱ្យគេជាអ្នកផ្តល់សេចក្តីសុខសុភមង្គលមកឱ្យយើងវិញនោះទេ បើយើងគិតដូច្នេះនោះគ្រួសាររបស់យើងនឹងមិនមានសេចក្តីសុខនោះឡើយ៕

March 8, 2018

“8មីនា ទិវាស្ត្រីពិភពលោក” ឧត្តមភាពនៃស្ត្រីកម្ពុជាទាក់ទងនឹងមុខជំនួញ

ចំពោះការធ្វើអាជីវកម្មនាពេលបច្ចុប្បន្ន យើងសង្កេតឃើញថា ស្ត្រីចាប់ផ្តើមមានភាពក្លាហាន ចេញប្រឡូកក្នុងការដឹកនាំធ្វើជំនួញ មិនចាញ់បុរសប៉ុន្មានទេ ភាគច្រើនជាប្រភេទអាជីវកម្មធុនតូច និងមធ្យម។

លោកជំទាវ ឧកញ៉ា លីម ឈីវហូរ ជាប្រធានក្រុមប្រឹក្សាភិបាល ក្រុមហ៊ុនតំបន់សេដ្ឋកិច្ចពិសេសភ្នំពេញ បានលើកឡើងថា មនុស្សស្រីត្រូវមានក្តីស្រមៃរបស់ខ្លួន ហើយក្តីស្រមៃនឹងក្លាយជាការពិតនៅពេលដែលយើងបានខិតខំប្រឹងប្រែង និងព្យាយាមឱ្យអស់ពីសមត្ថភាព មិនរួញរា តស៊ូអត់ធ្មត់ និងជម្នះគ្រប់ឧបសគ្គទាំងឡាយ។ ពីមុនលោកជំទាវក៏ជាមនុស្សស្រីដ៏សាមញ្ញម្នាក់ដែរ តែដោយសារក្តីស្រមៃទើបធ្វើឱ្យលោកជំទាវក្លាយជាសហគ្រិនស្ត្រីម្នាក់ និងជាគំរូរបស់ស្ត្រីជាច្រើននៅកម្ពុជាដូចសព្វថ្ងៃនេះ។ ដើម្បីសម្រេចបានជោគជ័យក្នុងជំនួញ លោកជំទាវបានលើកឡើងថាស្ត្រីគ្រប់រូបគួរចាប់ផ្តើមពីការបង្កើតក្តីស្រមៃរបស់ខ្លួនជាមុនសិន ហើយត្រូវរៀនសូត្រ និងកសាងខ្លួននៅក្នុងស្ថាប័នណាមួយឱ្យមានបទពិសោធជាមូលដ្ឋានគ្រឹះ បន្ទាប់មកត្រូវចាប់ផ្តើមបង្កើតមុខរបរដោយខ្លួនឯងពីដើមទុនបន្តិចបន្តួច ប្រកបដោយទំនុកចិត្ត និងការជឿជាក់លើខ្លួនឯងជាមួយភាពអំណត់អត់ធ្មត់ និងការបូជាលះបង់។

លោកជំទាវបានបន្ថែមទៀតថា នៅពេលដំណាក់កាលនីមួយៗត្រូវបានអនុវត្ត នោះអ្នកនឹងយល់ថាជំហានឈានទៅរកភាពជោគជ័យបានខិតចូលមកដល់។ ទោះជាយ៉ាងណាក៏ដោយ លោកជំទាវតែងតែចែករំលែកបទពិសោធនៃភាពជោគជ័យនេះទៅដល់មនុស្សដែលនៅជុំវិញខ្លួន មិនថាសាច់ញាតិ មិត្តភ័ក្តិ ឬក៏បុគ្គលិកដែលធ្វើការជាមួយលោកជំទាវនោះទេ គឺតាមរយៈដំបូន្មាន និងការណែនាំបង្ហាត់បង្រៀនពីវិធីសាស្ត្រក្នុងការធ្វើជំនួញ និងវិធីសាស្ត្រនៃការដោះស្រាយបញ្ហាផ្សេង។

លោកជំទាវ ឧកញ៉ា លីម ឈីវហូរ មានប្រសាសន៍ថា៖ “ពីសម័យមុន ស្ត្រីមិនសូវបានចូលសាលារៀនទេ ស្ត្រីភាគច្រើនគឺជាមេផ្ទះ ហើយពឹងផ្អែកទៅលើរបរចិញ្ចឹមជីវិតដោយសារប្តី ដែលជាហេតុធ្វើឱ្យខ្ញុំចង់បង្ហាញដល់ស្ត្រីគ្រប់គ្នាឱ្យឃើញថា សម័យមុនបានកន្លងហួសទៅហើយ អតីតកាលគឺជាមេរៀនដែលបង្រៀនមនុស្សឱ្យចេះកែលម្អនូវការខ្វះខាត និងស្វែងរកគំនិតថ្មីៗ និងបង្កើតនូវអ្វីដែលថ្មីមានភាពច្នៃប្រឌិត និងរីកចម្រើនល្អប្រសើរជាងមុន។

លោកជំទាវបានបន្ថែមផងដែរថា ការជ្រោមជ្រែងពីស្វាមីជាកត្តាល្អមួយផ្នែក ប៉ុន្តែការបង្អាក់បំភ័យពីស្វាមីគឺជាកត្តាមិនល្អ តែលោកជំទាវយល់ថា ការលើកទឹកចិត្ត ឬការបង្អាក់ទឹកចិត្តគ្រាន់តែជាកត្តាខាងក្រៅប៉ុណ្ណោះ សំខាន់ស្ត្រីខ្លួនឯងផ្ទាល់ដែលគួរគិតថា តើខ្លួនត្រូវទៅទីណា ដើម្បីសម្រេចអ្វី ដើម្បីខ្លួនឯងឬយ៉ាងណា? ស្ត្រីខ្លួនឯងជាអ្នកកំណត់គោលដៅដែលខ្លួនចង់ទៅ មិនថាមានឧបសគ្គ ឬការជំរុញនោះទេ ស្ត្រីគួរផ្តោតទៅរកគោលដៅនោះដោយសារការសម្រេចចិត្តដ៏ត្រឹមត្រូវមួយដែលថ្លឹងថ្លែងរកហេតុ និងផល ដូច្នេះកត្តាដែលជះឥទ្ធិពលពីខាងក្រៅនឹងមិនអាចជាការរាំងស្ទះបានឡើយ។

ចំពោះលក្ខណៈពិសេសរបស់ស្ត្រីក្នុងការធ្វើអាជីវកម្ម លោកជំទាវ បានណែនាំដល់ស្ត្រីកម្ពុជាទូទៅថា សម្រស់ខាងក្រៅពិតជាសំខាន់ ដូច្នេះការធ្វើខ្លួនឱ្យល្អ តុបតែងខ្លួនឱ្យបានស្អាតសមរម្យក៏ជាផ្នែកដែលឆ្លុះបញ្ជាំងពីការចេះរៀបចំទុកដាក់របស់ស្ត្រីពីតម្លៃ និងភាពថ្លៃថ្នូររបស់ស្ត្រីយើងដែរ។

ការចេះប្រើប្រាស់ពាក្យសម្តីផ្អែមល្ហែម ទន់ភ្លន់សមរម្យតាមទីកន្លែង និងពេលវេលាគឺជាចំណុចសំខាន់មួយដែលស្ត្រីគួរចាប់អារម្មណ៍ព្រោះសម្តីដែលនិយាយចេញមកហើយ គឺមិនអាចលេបទុកវិញបានទេ ដូច្នេះសម្តីរបស់អ្នកធ្វើអាជីវកម្មពិតជាមានតម្លៃណាស់។ ការរួសរាយរាក់ទាក់ និងមានទំនាក់ទំនងល្អជាមួយដៃគូសហការការងារ ក៏ជាផ្នែកចាំបាច់មួយដែរព្រោះថា ទំនាក់ទំនងដែលកសាងបានល្អអាចនឹងនាំជាផលប្រយោជន៍ផ្សេងៗនាពេលអនាគត។

ចំណែកភាពប្រឈមរបស់ស្ត្រីក្នុងការធ្វើជំនួញវិញ លោកជំទាវបានបញ្ជាក់ផងដែរថា ពេលចេញធ្វើជំនួញ ស្ត្រីភាគច្រើនតែងជួបប្រទះការលំបាកជាច្រើនដូចជា ការមិនឱ្យតម្លៃពីភាគីបុរស ដែលពួកគាត់ភាគច្រើនគិតថាស្ត្រីជាភេទដែលមានកម្លាំងទន់ខ្សោយ និងមានចិត្តទន់ជ្រាយ មានការលំបាកក្នុងការធ្វើដំណើរ មិនថាពេលថ្ងៃ ឬយប់អាធ្រាត្រ សម្រាប់អ្នកមានគ្រួសារវិញ ពេលខ្លះទទួលរងការប្រចែប្រចណ្ឌពីស្វាមី ព្រមទាំងមានពាក្យមិនល្អពីគ្រួសារខាងស្វាមីទៀតផង ដោយសារតែខ្វះពេលវេលាមើលថែទាំគ្រួសារ។ ជាឧទាហរណ៍មួយដែលជារឿងរបស់នាងខ្ញុំផ្ទាល់ កាលពីបួនដប់ឆ្នាំមុននៅពេលដែលនាងខ្ញុំរៀបចំតំបន់សេដ្ឋកិច្ចពិសេស មតិភាគច្រើនខាងអ្នកជំនួញប្រុសៗបាននិយាយថា “ខ្លួនស្រីសោះមិនដឹងជាធ្វើតំបន់សេដ្ឋកិច្ចអីទេ?” ដែលពាក្យសម្តីនោះធ្វើឱ្យនាងខ្ញុំកាន់តែខិតខំប្រឹងប្រែងបង្ហាញឱ្យពួកគាត់ដែលជាបុរសទាំងនោះមើលឃើញថា ស្ត្រីម្នាក់នេះនឹងសាងតំបន់សេដ្ឋកិច្ចពិសេសឱ្យបាន ហើយបច្ចុប្បន្ននេះតំបន់សេដ្ឋកិច្ចពិសេសភ្នំពេញរបស់នាងខ្ញុំកំពុងតែមានសក្តានុពលយ៉ាងក្រៃលែង និងមានការគាំទ្រពីបណ្តាប្រទេសជាច្រើនដូចជា ជប៉ុន អាមេរិក ថៃ ម៉ាឡេស៊ី សាំង-ហ្កាពួរ និងបណ្តាប្រទេសជាច្រើនទៀត។ សរុបមក បើទោះជាមានបញ្ហាប្រឈមអ្វីកើតឡើងក៏ដោយ គឺយើងត្រូវដោះស្រាយម្តងមួយៗនឹងនៅតែដើរតម្រង់ទៅរកទិសដៅរបស់យើងដែលបានកំណត់រួចហើយនោះជានិច្ច។

ជាអនុសាសន៍ចំពោះស្ត្រីទូទៅនាថ្ងៃ8 មីនាដែលជា “ទិវាស្ត្រីពិភពលោក” នៅកម្ពុជានោះ លោកជំទាវឧកញ៉ា លីម ឈីវហូរ បានមានប្រសាសន៍លើកទឹកចិត្តដល់ស្ត្រីគ្រប់រូបថា ក្នុងនាមជាស្ត្រី យើងអាចធ្វើការងារបានច្រើនមុខដូចបុរសដែរ ដូច្នេះកម្លាំងចិត្តគឺជារឿងសំខាន់ដែលស្ត្រីគ្រប់រូបត្រូវតែចេះលើកទឹកចិត្តខ្លួនឯង ដោយមិនត្រូវរង់ចាំឱ្យមនុស្សជុំវិញខ្លួនមកលើកទឹកចិត្តយើងនោះទេនៅពេលចាប់ផ្តើមអាជីវកម្ម។ ទោះបីជាមានឧបសគ្គអ្វីក៏ដោយ ត្រូវគិតថា បញ្ហាតែងមានដំណោះស្រាយ ត្រូវធ្វើចិត្តឱ្យត្រជាក់ និងព្យាយាមរកវិធីដោះស្រាយឱ្យបានល្អ៕

March 8, 2018

Author: វល័ក្ខ