វល័ក្ខ - La Reine Media

Samsung៖ ការបញ្ជាទិញ Galaxy S9 ទាបជាងការរំពឹងទុក តែខ្ពស់ជាង Galaxy S8

បើគិតចាប់តាំងពីថ្ងៃប្រកាសបង្ហាញខ្លួនរហូតមកដល់ពេលនេះ គឺមានរយៈពេលច្រើនថ្ងៃមកហើយ ប៉ុន្តែក្រុមហ៊ុន Samsung នៅមិនទាន់បានបង្ហាញពីតួលេខនៃការបញ្ជាទិញទុកមុន (Pre-orders) របស់ស្មាតហ្វូន Galaxy S9 នៅឡើយទេ។

ថ្មីៗនេះ ក្រុមហ៊ុនបច្ចេកវិទ្យាដ៏ធំជាងគេរបស់កូរ៉េខាងត្បូងមួយនេះបានប្រាប់ទីភ្នាក់ងារព័ត៌មាន Yonhap News ថា ការបញ្ជាទិញទុកមុននូវម៉ូដែលSamsung Galaxy S9 ទទួលបានទាបជាងការរំពឹងទុក ប៉ុន្តែបើធៀបនឹងម៉ូដែលមុនៗវិញឃើញថា ទទួលបានខ្ពស់ជាង។ “យើង (Samsung) ជឿជាក់ថា ការបញ្ជាទិញទុកមុនរបស់ Galaxy S9 ទំនងជាទទួលបានទាបជាងការរំពឹងទុក ប៉ុន្តែអ្វីដែលមិនធ្វើឱ្យយើងអស់សង្ឃឹមនោះគឺ តួលេខនៃការបញ្ជាទិញគឺ ច្រើនជាងម៉ូដែល Galaxy S8”។ នេះជាសម្ដីរបស់អ្នកនាំពាក្យក្រុមហ៊ុន Samsung ដែលបានថ្លែងប្រាប់ Yonhap News។

គួរបញ្ជាក់ផងដែរថា កាលពីក្រុមហ៊ុន Samsung បានប្រកាសដាក់ឱ្យបញ្ជាទិញទុកមុននូវម៉ូដែល Galaxy S8 គឺអតិថិជន Samsung បាននាំគ្នាសម្រុកទិញយ៉ាងច្រើនសន្ធឹកសន្ធាប់រហូតបំបែកកំណត់ត្រា ដែលទទួលបានរហូតដល់ 550,000 គ្រឿងក្នុងរយៈពេលតែ 2ថ្ងៃប៉ុណ្ណោះ ដែលបើប្រៀបធៀបនឹងម៉ូដែល Galaxy S7 វិញ គឺទទួលបានត្រឹមតែ 200,000គ្រឿងប៉ុណ្ណោះក្នុងរយៈពេលដល់ទៅ 1សប្ដាហ៍ឯណោះ៕

March 14, 2018

ជយលាភីតស៊ូមតិ ហេង សុវណ្ណមុនីនុត៖ “ទោះកាលៈទេសៈណាក៏ដោយ កុំបោះបង់ការតស៊ូ…”

“តស៊ូគង់បានសម្រេច” នេះជាពាក្យមួយឃ្លាដែលមនុស្សជាច្រើនតែងតែលើកឡើងជាញឹកញាប់ ហើយជាពាក្យមួយឃ្លាដែលមនុស្សសឹងតែគ្រប់គ្នាតែងធ្លាប់បានឮ តែពេលខ្លះក៏មិនសូវមានការយកចិត្តទុកដាក់ និងដើរកន្លងរំលងទៅទៀតផង។ តែពាក្យមួយឃ្លានេះ បើយើងគិតសាដើមឡើងវិញនោះ វាអាចធ្វើឱ្យមនុស្សជាច្រើនទទួលបានជោគជ័យ រួមទាំងយុវតីអ្នកតស៊ូមតិឈ្មោះ ហេង សុវណ្ណមុនីនុត ផងដែរ។

កញ្ញា ហេង សុវណ្ណមុនីនុត ថ្មីៗនេះទើបនឹងទទួលបានពានរង្វាន់ជយលាភីនៃការជជែកពិភាក្សាឆ្នាំ2018 នៃសាកលវិទ្យាល័យ ន័រតុន និងជាយុវជនលេចធ្លោមួយរូបផ្នែកតស៊ូមតិ និងការជជែកពិភាក្សាជាសាធារណៈ។ យុវតីមាឌល្អិត តែពោរពេញដោយវោហារស័ព្ទប្រកបដោយហេតុផលរូបនេះ ធ្លាប់ឆ្លងកាត់ការហ្វឹកហាត់សមត្ថភាព ភាពហត់នឿយ និងបរាជ័យជាច្រើនលើកទម្រាំបានកាន់ពានរង្វាន់ដ៏ធំមួយនេះ។ ការហ្វឹកហាត់ និងមានគំនិតសុទិដ្ឋិនិយមមនុស្សម្នាក់ៗតែងតែមានគំនិត និងក្តីស្រមៃផ្សេងៗពីគ្នាទៅតាមបរិយាកាសជុំវិញខ្លួន ទេពកោសល្យ និងចំណេះដឹង ហើយផ្លូវឆ្ពោះទៅកាន់ក្តីស្រមៃនោះ ពេលខ្លះអាចធ្វើបានដោយរលូន និងពេលខ្លះត្រូវការការតស៊ូខ្លាំងបំផុតដើម្បីជម្នះ ឧបសគ្គ។ សម្រាប់កញ្ញា មុនីនុត វិញ គឺបានដាក់ក្តីស្រមៃតាំងពីក្មេងមកថា ត្រូវតែទទួលបានពានរង្វាន់ផ្នែកតស៊ូមតិ ឬនិយាយជាសាធារណៈ យ៉ាងហោចណាស់ក៏ 1ដែរ ក្នុងដំណើរជីវិតជានិស្សិតសាកលវិទ្យាល័យ តែអ្វីៗមិនមែនងាយស្រួលដូចការគិតទាំងស្រុងនោះទេ។

កញ្ញា ហេង សុវណ្ណមុនីនុត ថតរូបជុំគ្នាជាមួយអ្នកទទួលជ័យលាភីផ្សេងទៀត (រូបឆ្វេង)

កម្លាំងជំរុញនៃក្តីស្រមៃបានរុញច្រានគាត់ឱ្យដើរចូលទៅរកការប្រកួត និងសិក្សាវគ្គតស៊ូមតិជាច្រើន ហើយស្របពេលជាមួយគ្នានេះដែរ គាត់ក៏បានខិតខំប្រឹងប្រែងចំណាយពេលវេលាហ្វឹកហាត់ការនិយាយជាច្រើនខែ មុនការប្រកួតសំខាន់ៗមកដល់ម្តងៗ តែអ្វីដែលធ្វើឱ្យគាត់ខកចិត្ត គឺការប្រកួតលើកដំបូងរបស់គាត់មិនទទួលបានជោគជ័យល្អនោះទេ។ ស្ថិតក្នុងស្ថានភាពបែបនេះ មនុស្សជាច្រើនប្រហែលជាអាចបោះបង់ចោលក្តីស្រមៃ ហើយខ្លះទៀតអាចអស់សង្ឃឹមក្នុងការតស៊ូ តែសម្រាប់យុវតីដែលពោរពេញដោយក្តីស្រមៃរូបនេះ បែរជាអាចបង្វែរការខកចិត្តនេះឱ្យក្លាយមកជាមេរៀនសម្រាប់ជីវិតដើម្បីបន្តការអភិវឌ្ឍសមត្ថភាពរបស់ខ្លួនទៅវិញ។

ការខិតខំប្រឹងប្រែងរាប់ខែ ខណៈពេលដែលទឹកចិត្តកំពុងតែមានសម្ទុះ និងធ្លាក់ក្នុងស្ថានភាពបរាជ័យដោយមិនអស់ចិត្តនោះ គឺជាការវាយប្រហារយ៉ាងធ្ងន់ធ្ងរមួយសម្រាប់កញ្ញាមុនីនុត។ តែស្ថិតក្នុងស្ថានភាពបែបនេះ គាត់មិនបានបណ្តោយឱ្យស្ថានភាពមិនល្អនោះមកកែប្រែវាសនារបស់គាត់ឡើយ។ ជាដំណោះស្រាយគាត់បានសម្រាកមួយរយៈពេលខ្លី បន្ទាប់មកក៏ចាប់ផ្តើមមើលឡើងវិញនូវដំណើរការនៃការខិតខំប្រឹងប្រែងជាមួយនឹងការស្វែងរកចំណុចខ្លាំង និងចំណុចខ្សោយរបស់ខ្លួនក្នុងការប្រកួត។

ការសម្រាកនេះបានធ្វើឱ្យគាត់កាន់តែរឹងមាំ ហើយរកឃើញនូវចំណុចជាច្រើនដែលត្រូវកែលម្អ ហើយអ្វីដែលកាន់តែសំខាន់ទៅទៀតនោះ គឺគាត់បានព្យាយាមសាកល្បងចូលរួមប្រកួតកាន់តែច្រើនឡើង។

កញ្ញា ហេង សុវណ្ណមុនីនុត បាននិយាយថា៖ “ខ្ញុំហ្វឹកហាត់សមត្ថភាពដើម្បីព្យាយាមអភិវឌ្ឍលើទេពកោសល្យដែលមានពីកំណើតលើការនិយាយជាសាធារណៈ ហើយដើម្បីសាកល្បងសមត្ថភាព ខ្ញុំបានព្យាយាមគ្រប់លទ្ធភាពដើម្បីចូលរួមប្រកួត ហេតុនេះចាញ់ ឬឈ្នះ មិនមែនជារឿងសំខាន់ខ្លាំងនោះទេ តែអ្វីដែលត្រូវផ្តោត គឺការអភិវឌ្ឍខ្លួនឯងជោគជ័យ និងការអភិវឌ្ឍមនុស្សជាច្រើនសុទ្ធតែបានដឹងថា ការបរាជ័យគឺជាមេរៀនដ៏សំខាន់ដើម្បីទទួលបានភាពជោគជ័យ ស្ថានភាពរបស់កញ្ញាមុនីនុតក៏ដូចគ្នាដែរ។ បន្ទាប់ពីបានរៀនសូត្រពីមេរៀនជាច្រើននៃក្ដីបរាជ័យរួចមក គាត់បានព្យាយាមអភិវឌ្ឍមិនឱ្យកំហុសដដែលៗកើតមានឡើងទៀតឡើយ។ នៅពេលដែលគាត់ប្រកួតកាន់តែច្រើនគាត់ទទួលបានមេរៀនកាន់តែច្រើន។ ក្នុងការប្រកួតខ្លះមិនអាចឈានទៅដល់ដំណាក់កាលកំពូលបានមែន តែគាត់ក៏អាចឈ្នះការប្រកួតជម្រុះបានខ្លះដែរ ដោយកម្មវិធីខ្លះគាត់បានឈ្នះដល់វគ្គពាក់កណ្តាលផ្តាច់ព្រ័ត្រ ហើយការប្រកួតខ្លះទៀតគាត់អាចឈ្នះដល់វគ្គជម្រុះសំខាន់ៗទៀតផង។

ជាបន្តបន្ទាប់ ដោយការតស៊ូជាមួយនឹងបញ្ហាជាច្រើន គាត់កាន់តែមានភាពចាស់ទុំ ហើយក៏បានក្លាយជាមនុស្សដែលពោរពេញដោយភាពរឹងមាំ មុននឹងក្លាយជាម្ចាស់ពាន។ កញ្ញាតែងតែគិតថា ការប្រកួតប្រជែងគឺហាក់បីដូចជាឱកាសដែលល្អបំផុតដើម្បីប្រឡូកចូលទៅក្នុងពិភពជាក់ស្តែងនៃការរស់នៅ ហើយក៏ជាដំណាក់កាលល្អបំផុតដើម្បីអភិវឌ្ឍសមត្ថភាពរបស់ខ្លួនផងដែរ ព្រោះថា ការប្រកួតក្នុងកម្មវិធីថ្មីៗអាចធ្វើឱ្យគាត់ទទួលបានចំណេះដឹងពីប្រធានបទថ្មីៗ និងមានគំនិតកាន់តែទូលំទូលាយឡើងលើបញ្ហាសង្គមនានាដែលត្រូវបានកំណត់ឡើង។

ស្មារតីក្នុងក្រុមក៏ជារឿងសំខាន់មួយដែរ ដែលគាត់ទទួលបានពីគ្រប់ការប្រកួត។ ភាពជោគជ័យរបស់យុវតីខាងលើ គឺការសម្របសម្រួលដ៏ល្អមួយនៅក្នុងក្រុមដែលសាមគ្គីភាពនេះជាចំណុចខ្លាំងប្រកបដោយភាពសុទិដ្ឋិនិយមដើម្បីតតាំងជាមួយនឹងក្រុមម្ខាងទៀតនៅលើផ្លូវឆ្ពោះទៅកាន់ភាពជោគជ័យ។ ទីបំផុត នាពេលថ្មីៗនេះ កញ្ញា ហេង សុវណ្ណមុនីនុត បានទទួលពានរង្វាន់និយាយជាសាធារណៈពីសាកលវិទ្យាល័យ ដែលជាការប្រកួតដ៏សំខាន់ និងឆ្លងកាត់វគ្គជម្រុះជាច្រើនជាមួយនឹងនិស្សិតនៅក្នុងមហាវិទ្យាល័យដែលមានចំនួនរាប់ម៉ឺននាក់៕

March 14, 2018

ប្រកាសស្តីពីការកែសម្រួលវិធាន និងនីតិវិធីគ្រប់គ្រងប្រមូលពន្ធប៉ាតង់បង្កក្តីបារម្ភដល់សហគ្រាសអាជីវកម្ម

ក្រោយពីក្រសួងសេដ្ឋកិច្ច និងហិរញ្ញវត្ថុចេញសេចក្ដីប្រកាសថ្មីមួយទៀតស្ដីពីការកែសម្រួលការប្រមូលពន្ធប៉ាតង់ ដែលអះអាងពីបំណងកែសម្រួលវិធាន និងនីតិវិធីគ្រប់គ្រងប្រមូលពន្ធប៉ាតង់លើសកម្មភាពអាជីវកម្មរបស់អ្នកជាប់ពន្ធ ដើម្បីគ្រប់គ្រង និងប្រមូលចំណូលពន្ធឱ្យមានប្រសិទ្ធភាពរួចមកនោះ សមាគមអាជីវកម្មក្នុងស្រុកបានសម្ដែងក្តីបារម្ភចំពោះផលលំបាកផ្នែកហិរញ្ញវត្ថុ។

ឯកឧត្តម ទេសរដ្ឋមន្ត្រី អូន ព័ន្ធមុនីរ័ត្ន រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ បានចេញប្រកាសថ្មីមួយ ចុះថ្ងៃទី26 ខែកុម្ភៈ ឆ្នាំ2018 ដោយមានគោលដៅកែសម្រួលវិធាន និងនីតិវិធី គ្រប់គ្រងប្រមូលពន្ធប៉ាតង់ដែលមានចែងក្នុងប្រកាសស្តីពីវិធាន និងនីតិវិធីគ្រប់គ្រងប្រមូលពន្ធប៉ាតង់ ស្របតាមការរីកចម្រើននៃសេដ្ឋកិច្ចរបស់ព្រះរាជាណាចក្រកម្ពុជា ដែលបានចេញកាលពីថ្ងៃទី25 ខែធ្នូ ឆ្នាំ2015។

ប្រកាសនោះអះអាងថា កម្មវត្ថុនៃពន្ធប៉ាតង់គឺជាពន្ធប្រចាំឆ្នាំ ដែលត្រូវបានកំណត់លើសកម្មភាពអាជីវកម្ម ដោយផ្អែកលើប្រភេទអ្នកជាប់ពន្ធ និងកម្រិតផលរបរ។ តាមខ្លឹមសារនៃប្រកាសនោះ ក្រសួងសេដ្ឋកិច្ច និងហិរញ្ញវត្ថុបានកំណត់បែបបទនៃការបង់ពន្ធ ជា 4ផ្នែកខុសៗគ្នាដូចខាងក្រោម៖

1) អ្នកជាប់ពន្ធដែលមានសកម្មភាពអាជីវកម្មច្រើន ត្រូវបង់ពន្ធប៉ាតង់ផ្សេងគ្នាទៅតាមសកម្មភាពនៃអាជីវកម្មនីមួយ។ ឧទាហរណ៍៖ អ្នកជាប់ពន្ធម្នាក់ដែលមានសកម្មភាពអាជីវកម្ម នីហរ័ណអាហរ័ណ ដឹកជញ្ជូន និងសណ្ឋាគារត្រូវបង់ពន្ធប៉ាតង់សម្រាប់ 3សកម្មភាពផ្សេងគ្នា។

2) សកម្មភាពជាឧបសម្ព័ន្ធនានានៃសកម្មភាពអាជីវកម្មត្រូវបានចាត់ទុកថាជាសកម្មភាពអាជីវកម្មតែមួយ។ ឧទាហរណ៍ សណ្ឋាគារដទៃដែលជាឧបសម្ព័ន្ធនៃសកម្មភាពសណ្ឋាគារដែលស្ថិតក្រោមការគ្រប់គ្រងផ្ទាល់របស់អ្នកជាប់ពន្ធតែមួយ និងស្ថិតក្នុងទីតាំងរួមជាមួយសណ្ឋាគារត្រូវបង់ពន្ធប៉ាតង់តែមួយ។

3) អ្នកជាប់ពន្ធដែលមានសាខា ឃ្លាំង រោងចក្រ រោងជាង សម្រាប់សកម្មភាពអាជីកម្មតែមួយ នៅក្នុងរាជធានី-ខេត្តតែមួយ ត្រូវបង់ពន្ធប៉ាតង់តែមួយ។

និង 4) អ្នកជាប់ពន្ធដែលមានសកម្មភាពអាជីវកម្មនៅក្នុងរាជធានី-ខេត្តផ្សេងគ្នា ត្រូវបង់ពន្ធប៉ាតង់ទៅតាមរាជធានី-ខេត្តដែលអាជីវកម្មនោះស្ថិតនៅ។

ជាមួយគ្នានេះ កម្រិតប្រាក់ពន្ធប៉ាតង់ដែលត្រូវបង់ ត្រូវបានកំណត់ដូចតទៅៈ

1) អ្នកជាប់ពន្ធតូច ត្រូវបង់ពន្ធប៉ាតង់ប្រចាំឆ្នាំចំនួន 40ម៉ឺនរៀល។

2) អ្នកជាប់ពន្ធមធ្យម ត្រូវបង់ពន្ធប៉ាតង់ប្រចាំឆ្នាំចំនួន 1លាន 2សែនរៀល។ និង3) អ្នកជាប់ពន្ធធំដែលមានផលរបរ លើសពី 4,000លានរៀល ដល់ 1ម៉ឺនលានរៀល ត្រូវបង់

ពន្ធប៉ាតង់ប្រចាំឆ្នាំចំនួន 3លានរៀល។ រីឯអ្នកមានផលរបរលើសពី 1ម៉ឺនលានរៀល ត្រូវបង់ពន្ធប៉ាតង់ប្រចាំឆ្នាំចំនួន 5លានរៀល។

អ្នកជាប់ពន្ធដែលមានសាខា ឃ្លាំង រោងចក្រ រោងជាងសម្រាប់សកម្មភាពអាជីវកម្មតែមួយដែលស្ថិតនៅតាមរាជធានី-ខេត្តផ្សេងគ្នា ត្រូវបង់ពន្ធប៉ាតង់ អប្បបរមាសម្រាប់ប្រភេទអ្នកជាប់ពន្ធនីមួយៗ ទៅតាមរាជធានី-ខេត្តដែលអាជីវកម្មនោះស្ថិតនៅ។

សេចក្ដីប្រកាសនោះក៏បានចែងដែរថា ពន្ធប៉ាតង់ត្រូវបង់ក្នុងអំឡុងពេលចាប់ពីថ្ងៃទី1 ខែមករាដល់ថ្ងៃទី31 ខែមីនា ជារៀងរាល់ឆ្នាំ។ ប្រកាសក្រសួងសេដ្ឋកិច្ច និងហិរញ្ញវត្ថុ ចុះថ្ងៃទី 24 ខែមករា ឆ្នាំ2018នេះ បានកំណត់ថា អ្នកជាប់ពន្ធតាមរបបស្វ័យប្រកាសត្រូវបានបែងចែកជា 3ប្រភេទគឺអ្នកជាប់ពន្ធតូច អ្នកជាប់ពន្ធមធ្យម និងអ្នកជាប់ពន្ធធំ ដោយអ្នកជាប់ពន្ធតូច គឺជាសហគ្រាសឯកត្តបុគ្គលឬសហគ្រាសសហកម្មសិទ្ធិ មានផលរបរប្រចាំឆ្នាំចាប់ពី 250លានរៀល ដល់ 700លានរៀល។

ដោយឡែក អ្នកជាប់ពន្ធមធ្យមជាសហគ្រាសដែលមានផលរបរប្រចាំឆ្នាំលើសពី 700លានរៀលដល់ 4,000លានរៀល និងអ្នកជាប់ពន្ធធំជាសហគ្រាសដែលមានផលរបរប្រចាំឆ្នាំ លើសពី 4,000លានរៀល ឬបុត្រសម្ព័ន្ធរបស់ក្រុមហ៊ុនពហុជាតិសាខាក្រុមហ៊ុនបរទេស ឬសហគ្រាសដែលបានចុះបញ្ជីជាគម្រោងវិនិយោគដែលមានលក្ខណសម្បត្តិគ្រប់គ្រាន់។

លោកឧកញ៉ា តែ តាំងប៉រ ប្រធានសម្ព័ន្ធសហគ្រាសធុនតូច និងមធ្យមកម្ពុជាបានឱ្យដឹងថា លោកមិនទាន់បានឃើញ និងដឹងពីខ្លឹមសារនៃសេចក្ដីប្រកាសថ្មីស្តីពីការកែសម្រួលវិធាន និងនីតិវិធីប្រមូលពន្ធប៉ាតង់នោះនៅឡើយទេប៉ុន្តែលោកឧកញ៉ាហាក់បានសម្តែងនូវក្តីបារម្ភរួចទៅហើយចំពោះផលលំបាកដែលនឹងកើតឡើងពីការបន្ថែមវិធានទៀតនេះ។

លោកឧកញ៉ាបានអះអាងថា “បើធ្វើតឹងតែងពេក សហគ្រាសធុនតូច និងមធ្យមក្នុងស្រុកនឹងស្លាប់អស់ហើយ!”៕

March 14, 2018

លោក Conte៖ Chelsea ត្រូវតែត្រៀមឈឺចាប់នៅលើទឹកដីក្រុម Barcelona

ក្រុមតោខៀវ Chelsea ត្រូវតែត្រៀមទទួលឱ្យបាននូវរាល់ការ «ឈឺចាប់» ទាំងឡាយនៅលើទឹកដីក្រុម Barcelona នៅរាត្រីថ្ងៃពុធស្អែកនេះ ប្រសិនបើពួកគេចង់ទទួលបានឱកាសមួយក្នុងការឈានទៅដល់វគ្គ 8ក្រុមចុងក្រោយនៃក្របខ័ណ្ឌ Champions League។ នេះបើយោងទៅតាមការបញ្ជាក់របស់លោក Antonio Conte ដែលជាគ្រូបង្វឹក។

ក្រុម Barcelona បានរកគ្រាប់បាល់តាមស្មើនៅនាទីទី75 តាមរយៈគ្រាប់បាល់របស់ខ្សែប្រយុទ្ធ Lionel Messi ដើម្បីលុបចោលគ្រាប់បាល់បើកឆាករបស់ Willian នៅដើមតង់ទី2 ក្នុងការប្រកួតជើងទី1 នៃវគ្គ 16ក្រុមចុងក្រោយ រវាងក្រុមទាំងពីរនៅឯកីឡដ្ឋាន Stamford Bridge កាលពីខែមុន។

លោក Conte បានបញ្ជាក់ថា ក្រុមរបស់លោកអាចនឹងប្រឈមមុខនឹងការងារដ៏ធំមួយនៅពេលប្រកួតជាមួយនឹងក្រុមម្ចាស់ជើងឯកទ្វីប 5សម័យកាល Barcelona នាកីឡដ្ឋាន Nou Camp។ លោក Conte បានប្រាប់គេហទំព័ររបស់ក្លិប Chelsea ថា៖ យើងត្រូវតែលេងឱ្យបានល្អ ប៉ុន្តែនៅពេលដែលអ្នកត្រូវប្រកួតជាមួយនឹងក្រុមខ្លាំង ដែលខ្ញុំគិតថា ជាក្រុមមួយក្នុងចំណោមក្រុមដ៏ខ្លាំងបំផុតរបស់ពិភពលោកនោះ អ្នកត្រូវតែត្រៀមឱ្យបានរួចរាល់ក្នុងការទទួលយកការឈឺចាប់។

ក្នុងពេលជាមួយគ្នានេះ យើងធ្លាប់ធ្វើបានរួចទៅហើយនៅក្នុងជើងទី1 ដោយកាលណោះយើងបានលេងយ៉ាងល្អឥតខ្ចោះ។

គ្រូបង្វឹកសញ្ជាតិអ៊ីតាលីរូបនេះបានបន្ថែមទៀតថា៖ «នេះមិនមែនជាក្រុម Chelsea ដែលមានបទពិសោធច្រើនឡើយ យើងមានកីឡាករជាច្រើនដែលកំពុងតែលេងក្នុងរដូវកាលទី1 និងទី2 របស់ពួកគេក្នុងក្របខ័ណ្ឌ Champions League»។ ការប្រកួតនេះនឹងចាប់ផ្តើមនៅម៉ោង2:45ទៀបភ្លឺ៕

ប្រភពពី៖ Reuters

March 13, 2018

លោក Pellegrino ត្រូវបានបណ្តេញពីក្លិប Southampton ក្រោយចាញ់ជាបន្តបន្ទាប់

ក្លិប Southampton បានបណ្តេញលោក Mauricio Pellegrino ក្រោយពីការដណ្តើមបានជ័យជម្នះត្រឹមតែ1លើកគត់ក្នុងចំណោមការប្រកួត 17លើកនៃក្របខ័ណ្ឌ Premier League ដែលបានធ្វើឱ្យពួកគេស្ថិតក្នុងភាពជ្រួលច្របល់ក្នុងការប្រជែងគេចឱ្យផុតក្នុងតំបន់កាត់ចោល ខណៈនៅសល់ការប្រកួតត្រឹមតែ 8ប្រកួតទៀតប៉ុណ្ណោះនៅរដូវកាលនេះ។

ក្លិបនេះកំពុងតែស្វែងរកការតែងតាំងគ្រូបង្វឹកថ្មីភ្លាមៗ ជាលើកទិ3 ក្នុងរយៈពេលជិត 2ឆ្នាំ ជាពិសេសឱ្យបានមុនការប្រកួតពាន FA Cup វគ្គ 8ក្រុមចុងក្រោយ នៅលើទឹកដីក្រុម Wigan Athletic កាលពីថ្ងៃអាទិត្យ។ ប៉ុន្តែទោះបីជាយ៉ាងណា ពួកគេនៅតែមានពេលវេលាច្រើនក្នុងការរកគ្រូបង្វឹកជំនួសកន្លែងរបស់លោក Pellegrino សញ្ជាតិអាហ្សង់ទីន ដោយសារតែពួកគេមិនមានការប្រកួតក្នុងក្របខ័ណ្ឌលីក រហូតដល់ចុងខែនេះ ពោលគឺនៅលើទឹកដីក្រុម West Ham ថ្ងៃទី31 ខែមីនា។

Southampton ដែលកំពុងតែនាំមុខត្រឹមតែ 1ពិន្ទុគត់លើក្រុមបាតតារាងទាំង 3ក្នុងខណៈនេះនឹងប្រឈមមុខនឹងការប្រជែងដ៏តានតឹងមួយ ខណៈដែលពួកគេនៅសល់ការប្រកួតលើទឹកដីខ្លួនឯងត្រឹមតែ 3ប្រកួតទៀតប៉ុណ្ណោះ ក្នុងនោះរាប់បញ្ចូលទាំងការធ្វើជាម្ចាស់ផ្ទះទទួលក្រុម Chelsea និង Manchester City ផងដែរ។

លោក Pellegrino បានចូលកាន់តំណែងនាកីឡដ្ឋាន St Mary’s ក្នុងកិច្ចសន្យារយៈពេល 3ឆ្នាំ កាលពីខែមិថុនា ឆ្នាំមុន ប៉ុន្តែ ក្លិប Southampton បានប្រកាសក្នុងសេចក្តីថ្លែងការណ៍មួយថា ពួកគេបានចែកផ្លូវគ្នាជាមួយនឹងគ្រូបង្វឹកវ័យ 46ឆ្នាំរុបនេះហើយ ខណៈដែលក្លិបនាំមុខត្រឹមតែ 1ចំណាត់ថ្នាក់ និង 1ពិន្ទុប៉ុណ្ណោះពីលើក្រុមស្ថិតក្នុងតំបន់កាត់ចោល។ សេចក្តីថ្លែងការណ៍នេះបានបន្ថែមទៀតថា៖ «ក្លិបនឹងសម្លឹងរកការតែងតាំងអ្នកចាត់ការទូទៅថ្មីម្នាក់ឱ្យបានឆាប់តាមដែលអាចខណៈដែលការស្វែងរកគ្រូបង្វឹកដែលត្រូវជំនួសដំណើរការរួចជាស្រេច»៕

ប្រភពពី៖ The Guardian

March 13, 2018

លោក Pochettino សង្ឃឹមថា បញ្ហារបួសរបស់ Kane មិនធ្ងន់ធ្ងរឡើយ ក្រោយផ្តួល Bournemouth

លោក Mauricio Pochettino សង្ឃឹមថា បញ្ហារបួសកជើងរបស់ខ្សែប្រយុទ្ធ Harry Kane មិនមានកម្រិតធ្ងន់ធ្ងរឡើយ ក្រោយពីតារាឆ្នើមរូបនេះត្រូវបានបង្ខំចិត្តប្តូរចេញក្នុងតង់ទី1 ក្នុងពេលក្រុមខ្លួនTottenham ទទួលជ័យជម្នះ ក្នុងលទ្ធផល 4-1 នៅលើទឹកដីក្រុម Bournemouth កាលពីថ្ងៃអាទិត្យ។

ខ្សែប្រយុទ្ធអន្តរជាតិអង់គ្លេស Kane នឹងត្រូវចូលទទួលការពិនិត្យសុខភាពនៅថ្ងៃចន្ទនេះ ក្រោយពីបានរងរបួសនៅកីឡដ្ឋាន Vitality។

ស្របពេលដែលលោក Gareth Southgate អ្នកចាត់ការទូទៅរបស់ក្រុមជម្រើសជាតិអង់គ្លេសនឹងត្រូវជ្រើសរើសសមាជិកក្រុមរបស់ខ្លួនសម្រាប់ការប្រកួតមិត្តភាពអន្តរជាតិជាមួយនឹងក្រុមជម្រើសជាតិហូឡង់ និងអ៊ីតាលី នៅមុនពេលក្រុម Spurs ត្រូវធ្វើការប្រកួតពាន FA Cup វគ្គ8ក្រុមចុងក្រោយជាមួយនឹងក្រុម Swansea នាសប្តាហ៍ក្រោយដែរ ដោយ Kane អាចនឹងប្រឈមមុខនឹងការអវត្តមានក្នុងរយៈពេលដ៏យូរមួយសម្រាប់ទាំងក្លិប និងប្រទេសរបស់គេ។ ទោះបីជាយ៉ាងណា លោក Pochettino គ្រូបង្វឹករបស់ក្រុម Spurs បានបញ្ជាក់ថា វាឆាប់ពេកហើយក្នុងការដឹងពីទំហំនៃបញ្ហារបួសនេះ ដែលជាការរងរបួសត្រង់ជង្គង់ដែល Kane ធ្លាប់បានជួបកាលពីលើកមុន។ នៅពេលដែលត្រូវបានចោទសួរអំពីស្ថានភាពរបស់ខ្សែប្រយុទ្ធដែលរកបានគ្រាប់បាល់ច្រើនជាងគេរបស់ក្របខ័ណ្ឌ Premier League រូបនេះ លោក Pochettino បានឆ្លើយថា៖ «យើងត្រូវតែរង់ចាំរហូតដល់ថ្ងៃស្អែកនេះ ពីព្រោះយើងត្រូវតែធ្វើការពិនិត្យមើលជង្គង់របស់គេ»។

គ្រូបង្វឹកសញ្ជាតិអាហ្សង់ទីនរូបនេះបានបន្ថែមទៀតថា៖ «ពិតណាស់ រូបគេបានរងរបួសដែលវាជាបញ្ហារបួសនៅត្រង់ជង្គង់ដូចដែលរូបគេធ្លាប់បានជួបប្រទះកាលពីលើកមុនដែរ។ ប៉ុន្តែ យើងសង្ឃឹមថា វាមិនមែនជាបញ្ហាធំឡើយ។ រូបគេមានអារម្មណ៍មិនស្រួលនៅត្រង់របួសនោះ នៅពេលដែលរូបគេរត់ និងឈឺរមួលត្រង់ជង្គង់ ដែលធ្វើឱ្យរូបគេមិនអាចលេងបន្តនៅលើទីលានបាន»៕

ប្រភពពី៖ Talksport

March 12, 2018

លោក Wenger ទទួលបានការជឿជាក់កាន់តែធំ នៅពេលដែល Arsenal លត់ Watford ចាស់ដៃ

លោក Arsene Wenger បានអះអាងថា ស្មារតីរបស់ក្រុម Arsenal បានជួយឱ្យពួកគេឆ្លងផុតដំណាក់កាលដ៏ជ្រួលច្របល់មួយ ក្រោយពីដណ្តើមបានជ័យជម្នះក្នុងលទ្ធផល 3-០ លើក្រុម Watford កាលពីថ្ងៃអាទិត្យ ដើម្បីកាត់បន្ថយសម្ពាធពីលោកគ្រូបង្វឹកដែលស្ថិតក្រោមការរិះគន់រូបនេះ។

លោក Wenger កំពុងតែប្រយុទ្ធដើម្បីសង្គ្រោះការងាររបស់លោក ហើយការដណ្តើមបានជ័យជម្នះក្នុងលទ្ធផល 2-០ នៅលើទឹកដីក្រុម AC Milan ក្នុងការប្រកួតក្របខ័ណ្ឌ Europa League កាលពីថ្ងៃព្រហស្បតិ៍ បានជួយឱ្យគ្រូបង្វឹកសញ្ជាតិបារាំងរូបនេះ មានការធូរស្រាលពីការរិះគន់ឥតឈប់ឈរដែលលោកបានជួបប្រទះនៅក្នុងរដូវកាលនេះ។

ដើម្បីរក្សាភាពខ្លាំងរបស់ខ្លួនពីការដណ្តើមបានជ័យជម្នះក្នុងការប្រកួតវគ្គ 16ក្រុមចុងក្រោយ នាកីឡដ្ឋាន San Siro ក្រុមរបស់លោក Wenger បានបញ្ចប់ការរងបរាជ័យជាប់ៗគ្នាក្នុងការប្រកួតក្របខ័ណ្ឌ Premier League ត្រឹម 3ប្រកួត ក្រោយពីបានបង្ហាញពីទម្រង់លេងដ៏រឹងមាំនៅកីឡដ្ឋាន Emirates រួចមក។ គ្រាប់បាល់ស៊ុតបញ្ចូលទីពីសំណាក់កីឡាករ ShkodranMustafi, Pierre-EmerickAubameyang និង HenrikhMkhitaryan បានជួយឱ្យក្រុមរបស់លោក Wenger ដណ្តើមបានជ័យជម្នះក្នុងក្របខ័ណ្ឌលីកជាលើកទី1 ចាប់តាំងពីផ្តួលក្រុម Everton ក្នុងលទ្ធផល 5-1 កាលពីខែកុម្ភៈ។

លោក Wenger បានឱ្យដឹងថា៖ «យើងមានពេលវេលាដ៏ខកចិត្តមួយ ហើយអ្នកគាំទ្ររបស់យើងក៏បានរងគ្រោះដូចយើងផងដែរ។ ប៉ុន្តែ ការងាររបស់យើងគឺការបង្ហាញពីទម្រង់លេងឱ្យបានល្អ និងលេងប្រកបដោយភាពស៊ីចង្វាក់គ្នា ក៏ដូចជាធ្វើឱ្យអ្នកគាំទ្រជឿជាក់លើក្រុមរបស់យើងម្តងទៀតដែរ»៕

ប្រភពពី៖ Channel News Asia

March 12, 2018

អ្នកពូកែសន្សំឯកសារ ភាគច្រើន អាចបង្កើតស្នាដៃថ្មីដោយខ្លួនឯងបាន

នៅក្នុងដំណើរជីវិតនៃការសិក្សា មនុស្សម្នាក់ៗតែងតែចង់ក្លាយជាបុគ្គលដែលមានតម្លៃសម្រាប់មនុស្សទូទៅ ឬចង់ក្លាយជាមនុស្សដែលមានប្រយោជន៍សម្រាប់សាធារណជន។ ការបង្កើតស្នាដៃថ្មីលើការសិក្សាស្រាវជ្រាវ ឬការចងក្រងជាឯកសារសម្រាប់មនុស្សជំនាន់ថ្មីជារឿងសំខាន់មួយដែលរុញច្រានពួកគេឱ្យក្លាយជាមនុស្សដែលមានការទទួលស្គាល់ពីមនុស្សជុំវិញខ្លួន និងសង្គម។

លោកតាបណ្ឌិត កុល ផេង សាកលវិទ្យាធិការនៃសាកលវិទ្យាល័យបញ្ញាសាស្ត្រ បានលើកឡើងនៅក្នុងកម្មវិធីមាគ៌ាបុគ្គលឆ្នើមថា អ្នកសិក្សា ឬបុគ្គលដែលពូកែរក្សាទុកឯកសារសំខាន់ៗពីការរៀនសូត្រ គឺជាមនុស្សដែលអាចរកឃើញនូវប្រយោជន៍យ៉ាងច្រើនសម្រាប់ខ្លួនឯង។ អ្នកចូលចិត្តសន្សំឯកសារ ក៏ជាអ្នកដែលចូលចិត្តកត់ត្រានូវអ្វីដែលខ្លួនបានរៀនសូត្រទុកដែរ ហេតុនេះនៅពេលដែលពួកគេចងក្រងឯកសារសំខាន់ៗទាំងអស់នោះចូលគ្នា ពួកគេនឹងអាចបង្កើតស្នាដៃថ្មីមួយ ឬកម្រងឯកសារមួយសម្រាប់ជាការសិក្សារៀនសូត្រខ្លួនឯង និងសម្រាប់មនុស្សជាច្រើនផ្សេងទៀតដែលកំពុងត្រូវការប្រភពឯកសារសម្រាប់ស្រាវជ្រាវផងដែរ។

លោកតាបណ្ឌិត កុល ផេង បានមានប្រសាសន៍ថា ៖ “អ្នករៀនដែលល្អ គេតែងតែកត់ទុកនូវអ្វីដែលគេបានឃើញ បានឮ ឬបានដឹងពីគ្រប់មជ្ឈដ្ឋាន។ ប្រភពចំណេះដឹងទាំងអស់នោះ នៅពេលដែលយើងកត់ទុកបានច្រើន វានឹងក្លាយជារបស់មានតម្លៃ។

អ្នកស្រាវជ្រាវ អ្នកនិពន្ធ និងរៀបរៀងសទ្ទានុក្រមពាក្យខ្មែរទំនើប លោក ឈិន សីហា បានលើកឡើងថា ការរក្សាទុកឯកសារគឺជារឿងសំខាន់ខ្លាំងណាស់សម្រាប់អ្នកសិក្សាស្រាវជ្រាវ ព្រោះថា នៅលើពិភពលោកយើងនេះមានឯកសារច្រើនរាប់មិនអស់ តែមិនប្រាកដថាឯកសារ មានតម្លៃទាំងអស់នោះទេ។ ហេតុនេះសម្រាប់អ្នកស្រាវជ្រាវគេតែងតែដកស្រង់យកចំណុចដែលគេត្រូវការទុកទាំងអស់ បន្ទាប់មកទើបគេចែកបណ្តុំឯកសារនោះជាប្រភេទទៅតាមជំនាញនីមួយៗ។

លោក ឈិន សីហា បាននិយាយថា៖ “ការបែងចែកប្រភពឯកសារជាផ្នែកៗឱ្យមានសណ្តាប់ធ្នាប់មានប្រយោជន៍ខ្លាំងណាស់ ព្រោះវាធ្វើឱ្យយើងមានភាពងាយស្រួលក្នុងការស្វែងរក និងយកមកអាន ហើយវាក៏អាចក្លាយជាប្រភពទុនសម្រាប់ចងក្រងឱ្យក្លាយជាបណ្តុំឯកសារសម្រាប់មនុស្សទូទៅផងដែរ។

លោក សីហា បានលើកឡើងផងដែរថា ឯកសារមួយចំនួនដែលយើងគិតថាល្អ យើងក៏ចាំបាច់ត្រូវរក្សាវាទុកផងដែរ ព្រោះថ្ងៃណាមួយវាអាចក្លាយជាទិន្នន័យ ឬចំណុចដែលត្រូវការជាក់ជាមិនខាន។ ម្យ៉ាងវិញទៀត ទិន្នន័យចាស់ៗដែលមាននៅក្នុងដៃអាចជាប្រភពយ៉ាងសំខាន់មួយក្នុងការធ្វើជាឯកសារយោង ភ័ស្តុតាង ឬអាចធ្វើជាប្រភពនៃឯកសារសម្រាប់ប្រៀបធៀបជាមួយនឹងស្ថានភាពជាក់ស្តែងដែលកើតមាននៅថ្ងៃណាមួយ។ គ្រប់ការវិភាគ និងការសរសេរចេញជាឯកសារថ្មី គឺត្រូវការបំផុតនូវឯកសារចាស់ៗដែលមាននៅក្នុងដៃ។

អ្នកសិក្សាដែលស្រឡាញ់ការស្រាវជ្រាវ លោក សោម ចន្ទសុធា បានលើកឡើងថា សម្រាប់លោកជាអ្នកតស៊ូមតិ លោកតែងតែស្វែងរកប្រភពជាច្រើនសម្រាប់ធ្វើជាអំណះអំណាងនៅពេលជជែកពិភាក្សា ហើយពេលខ្លះប្រសិនបើគ្មានប្រភពឯកសារច្រើនទេនោះ យើងអាចនឹងមានការលំបាកក្នុងការដកស្រង់យកប្រភពដែលគួរទុកចិត្តបាន ហើយមានការលំបាកក្នុងការស្វែងរកចំណុចគាំទ្រឱ្យបានទូលំទូលាយ។ ហេតុនេះលោកតែងតែរក្សាទុកនូវឯកសារទាំងអស់ដែលលោកបានជួបប្រសិនបើលោកគិតថា វាមានតម្លៃគ្រប់គ្រាន់សម្រាប់ការប្រើប្រាស់លើការនិយាយជាសាធារណៈ។

លោក សោម ចន្ទសុធា បាននិយាយថា៖ “មិនថាព្រឹត្តិបត្រព័ត៌មាន ឬប្រភពព័ត៌មានជា PDF នោះទេ ខ្ញុំតែងតែរក្សាទុកជានិច្ចនៅតាមផ្នែកសំខាន់ៗព្រោះជាចំណុចខ្លាំងដែលពេលខ្លះយើងមាន តែអ្នកដទៃទៀតមិនប្រាកដថាមាននោះទេ។

លោក សុធា បានលើកឡើងផងដែរថា ប្រភពព័ត៌មានពិតជាសំខាន់ខ្លាំងណាស់ សម្រាប់មនុស្សគ្រប់គ្នា ព្រោះកាលណាយើងមានព័ត៌មានច្បាស់លាស់ យើងអាចមានមូលដ្ឋាននៃគំនិតល្អក្នុងការប្រើប្រាស់តាមគ្រប់លក្ខខណ្ឌ៕

March 12, 2018

វីរបុរសបាល់ទាត់ RYAN GIGGS រីករាយដំណើរទស្សនកិច្ចនៅរោងចក្រថៃហ្គ័រ

កាលពីព្រឹកថ្ងៃទី 11 ខែមីនា ឆ្នាំ2018 លោក Roland Bala អគ្គនាយកគ្រប់គ្រងក្រុមហ៊ុនស្រាបៀរថៃហ្គ័រប្រចាំកម្ពុជាបានស្វាគមន៍វីរបុរសបាល់ទាត់អន្តរជាតិលោក Ryan Giggs ក្នុងដំណើរទស្សនកិច្ចពិសេសនៅរោងចក្រផលិតស្រាបៀរថៃហ្គ័រ។

ក្នុងអំឡុងពេលថ្លែងសុន្ទរកថាដែលជាផ្នែកមួយនៃដំណើរទស្សនកិច្ចនេះ លោក Roland Bala បានសម្តែងនូវអំណរគុណចំពោះលោក Ryan Giggs ដែលបានសម្រេចចិត្តធ្វើជាទូតសុឆន្ទៈផ្សព្វផ្សាយកម្មវិធី Tiger Street Football Festival 2018 ដោយលើកឡើងថា៖ “ថ្ងៃនេះខ្ញុំមានមោទនភាពណាស់ដែលបានស្វាគមន៍យ៉ាងកក់ក្តៅចំពោះលោក Ryan Giggs ដែលជាកំពូលតារាដ៏អស្ចារ្យបំផុតរបស់ក្លិប Manchester United មកកាន់រោងចក្រផលិតស្រាបៀររបស់យើងខ្ញុំដើម្បីជួប និងស្វាគមន៍បុគ្គលិក និងភ្ញៀវពិសេសរបស់យើង។ តាងនាមឱ្យក្រុមហ៊ុនស្រាបៀរថៃហ្គ័រ ខ្ញុំសូមអរគុណដល់លោក Ryan Giggs ដែលបានមកកម្ពុជាដើម្បីគាំទ្រដល់ Tiger Street Football Festival 2018 ក្នុងរដូវកាលទី6នេះ និងលើកទឹកចិត្តដល់កីឡាករបាល់ទាត់ និងអ្នកគាំទ្រក្នុងប្រទេសនេះ។

ក្នុងឱកាសនោះកំពូលតារាបាល់ទាត់រូបនេះបានមានប្រសាសន៍សរសើរ និងបញ្ជាក់ពីការប្តេជ្ញាចិត្តរបស់លោកក្នុងការលើកកម្ពស់វិស័យកីឡានៅជុំវិញពិភពលោក ដែលបង្ហាញថា គំនិតផ្តួចផ្តើមវិជ្ជមានក្នុងការរៀបចំកម្មវិធី Tiger Street Football Festival គឺជាវេទិកាដ៏ល្អប្រសើរមួយសម្រាប់អភិវឌ្ឍអ្នកទេពកោសល្យខាងបាល់ទាត់ជំនាន់ក្រោយនៅក្នុងប្រទេសកម្ពុជា។ បន្ទាប់ពីការណែនាំ និងការជួបស្វាគមន៍ជាមួយថ្នាក់គ្រប់គ្រងជាន់ខ្ពស់ បុគ្គលិកប្រតិបត្តិ និងភ្ញៀវពិសេស លោក Ryan Giggs ត្រូវបាននាំទៅទស្សនារោងចក្រផលិតស្រាបៀរ ដែលជាកន្លែងលោកមានការចាប់អារម្មណ៍យ៉ាងខ្លាំងចំពោះការពង្រីកខ្សែចង្វាក់ផលិតកម្ម និងបច្ចេកវិជ្ជាទំនើបក្នុងការផលិតស្រាបៀរ។

ជាមួយគ្នានេះ ក៏មានវគ្គបង្វឹកពិសេសជាមួយបុគ្គលិក និងភ្ញៀវនៅរោងចក្រ ដែលលោក Ryan Giggs បានចែករំលែកដំបូន្មាន និងតិចនិចល្អៗផ្អែកលើបទពិសោធន៍របស់លោក ដែលជាកីឡាករទទួលបានពានរង្វាន់ច្រើនជាងគេបំផុតមិនដែលធ្លាប់មាននៅក្នុងក្របខ័ណ្ឌលីគអង់គ្លេស Premier League ។

បន្ទាប់ពីកម្មវិធីចុះហត្ថលេខា និងរូបថតជាមួយនឹងថ្នាក់គ្រប់គ្រង បុគ្គលិកនិងភ្ញៀវពិសេសលោក Ryan Giggs បានលើកទឹកចិត្តអ្នករាល់គ្នាឱ្យចូលរួមជាមួយលោកនៅក្នុងវគ្គផ្តាច់ព្រ័ត្រនៃពានរង្វាន់ក្របខ័ណ្ឌ Tiger Street Football Festival 2018 ដែលនឹងប្រព្រឹត្តធ្វើឡើងនៅពេលរសៀលនៅខាងមុខបរិវេណសាលមហោស្រពកោះពេជ្រ។ ចំពោះព័ត៌មានលម្អិតអំពីវគ្គផ្តាច់ព្រ័ត្រ Tiger Street Football Festival 2018 សូមចូលទៅកាន់ទំព័រហ្វេសប៊ុកផ្លូវការរបស់ស្រាបៀរថៃហ្គ័រ៖ www.facebook.com/TigerBeerKH#TSFF2018 ។ សូមពិសាស្រាបៀរថៃហ្គ័រដោយការទទួលខុសត្រូវ…!

March 11, 2018

សន្និសីទសារព័ត៌មានស្តីពី TIGER STREET FOOTBALL FESTIVAL 2018 ជាមួយតារាបាល់ទាត់ RYAN GIGGS

សន្និសីទសារព័ត៌មាន ដើម្បីប្រកាសបង្ហាញដល់សាធារណជនថា លោក Ryan Giggs ជាកំពូលតារាបាល់ទាត់ដ៏ល្បីល្បាញរបស់ក្លិបបិសាចក្រហម Manchester United មកកាន់តួនាទីជាទូតសុឆន្ទៈ ផ្សព្វផ្សាយកម្មវិធី Tiger Street Football Festival 2018 នៅកម្ពុជា នៅថ្ងៃទី10 ខែមីនា ឆ្នាំ2018។

លោក Roland Bala អគ្គនាយកគ្រប់គ្រងនៃក្រុមហ៊ុនស្រាបៀរថៃហ្គ័រ ប្រចាំប្រទេសកម្ពុជា និងលោក ម៉ៃ តុលា អគ្គលេខាធិការរង និងជានាយកបច្ចេកទេសនៃសហព័ន្ធកីឡាបាល់ទាត់កម្ពុជា (FFC) បានចូលរួមជាអធិបតីដ៏ខ្ពង់ខ្ពស់ ក្នុងពិធីសន្និសីទសារព័ត៌មាននេះ និងបានស្វាគមន៍លោក Ryan Giggs មកកាន់កម្ពុជា។

លោក Riyan Giggs គឺជាកីឡាករទទួលបាន ពានរង្វាន់ច្រើនជាងគេបំផុតនៅក្នុងក្របខ័ណ្ឌលីគអង់គ្លេស Premier League និងបានបង្ហាញខ្លួន ក្នុងការប្រកួតជាច្រើនលើក និងបានឈ្នះ ពានរង្វាន់កិត្តិយស ច្រើនជាងកីឡាករផ្សេងទៀត ក្នុងប្រវត្តិសាស្ត្រដ៏អស្ចារ្យ របស់ក្លិប Manchester United និងនៅខែកុម្ភៈឆ្នាំ 2018 ត្រូវបានតែងតាំង ជាអ្នកចាត់ការ ដឹកនាំក្រុមជម្រើសជាតិវេលស៍។

ក្នុងឱកាសសន្និសីទកាសែត កំពូលតារាបាល់ទាត់ ដ៏ល្បីល្បាញរូបនេះ បានមានប្រសាសន៍ថា “ខ្ញុំរីករាយ និងរំភើបណាស់ ដែលត្រូវបានជ្រើសតាំង ជាទូតសុឆន្ទះផ្សព្វផ្សាយ កម្មវិធី Tiger Street Football Festival 2018 ពីព្រោះនេះជាឱកាស សម្រាប់ខ្ញុំចែករំលែក និងផ្លាស់ប្តូរបទពិសោធន៍ ជំនាញ និងបច្ចេកទេស លេងបាល់ទាត់របស់ខ្ញុំ ជាមួយកីឡាករបាល់ទាត់ មានទេពកោសល្យ នៅព្រះរាណាចក្រកម្ពុជា”។

លោក Roland Bala នាយកគ្រប់គ្រងនៃក្រុមហ៊ុនស្រាបៀរថៃហ្គ័រ ប្រចាំប្រទេសកម្ពុជា បានមានប្រសាសន៍ថា ៖ “វាគឺជាបទពិសោធដ៏កម្រមួយ សម្រាប់កីឡាករ និងអ្នកគាំទ្រកម្ពុជា ដែលបានជួបលោក Riyan Giggs នៅក្នុងវគ្គផ្តាច់ព្រ័ត្រ នៃពានរង្វាន់ក្របខ័ណ្ឌ Tiger Street Football Festival 2018 នៅចុងសប្តាហ៍នេះ។ Tiger Street Football Festival គឺជាកម្មវិធីប្រកួតកីឡាបាល់ទាត់ ដ៏ធំបំផុតនៅក្នុងប្រទេស ហើយនេះជាឆ្នាំទីប្រាំមួយ ដែលបានទទួលបានជោគជ័យ។

កម្មវិធីនេះត្រូវបានរៀបចំឡើងដោយក្រុមហ៊ុនស្រាបៀរថៃហ្គ័រ ដើម្បីលើកកម្ពស់សកម្មភាពកីឡា និងជាវេទិកាមួយសម្រាប់កីឡាករបញ្ចេញទេពកោសល្យរបស់ខ្លួន។ ក្រុមកីឡាករជាង 500 ក្រុមបានចូលរួម ក្នុងវគ្គជម្រុះប្រកួតប្រជែង ជាមួយនឹងក្រុមជើងខ្លាំង ដើម្បីដណ្តើមយកជើងឯក ក្នុងវគ្គផ្តាច់ព្រ័ត្រទូទាំងប្រទេស នៅក្នុងរាជធានីភ្នំពេញ នៅខាងមុខបរិវេណ សាលមហោស្រពកោះពេជ្រ នៅថ្ងៃទី 10 និងទី 11 ខែមីនានេះ៕

March 11, 2018

Author: វល័ក្ខ