វល័ក្ខ - La Reine Media

Eden Garden នៅភ្នំពេញស៊ីធីសេនធ័រ បានក្លាយជាម្ចាស់ជ័យលាភី នៅក្នុងកម្មវិធីប្រកួតពានរង្វាន់អចលនទ្រព្យកម្ពុជាឆ្នាំ 2018

គម្រោងថ្មីជាងគេរបស់ក្រុមហ៊ុនភ្នំពេញស៊ីធីសេនធ័រ គឺ Eden Garden បានក្លាយជាជ័យលាភីនៅក្នុងកម្មវិធីពានរង្វាន់អចលនទ្រព្យកម្ពុជាឆ្នាំ2018 ដែលរៀបចំឡើងដោយក្រុមហ៊ុន PropertyGuru កាលពីរាត្រីថ្ងៃទី16 ខែមីនា ឆ្នាំ2018 នៅសណ្ឋាគារ សូហ្វីតែល ភូគីត្រា ភ្នំពេញ ក្រោមការចូលរួមពីសំណាក់បណ្តាក្រុមហ៊ុនអចលនទ្រព្យ និងអភិវឌ្ឍគម្រោងសាងសង់ជាច្រើន។

គម្រោងហាងលក់ទំនិញ និងភោជនីយដ្ឋាន ដែលមានទំហំជាង 21,000ម៉ែត្រការ៉េ មួយនេះ បានឈ្នះពានរង្វាន់ល្អបំផុតជា “ គម្រោងអភិវឌ្ឍន៍អាជីវកម្មល្អបំផុត និងគម្រោងអភិវឌ្ឍន៍ដែលរចនាឡើងលក្ខណៈសកលល្អបំផុត” (Best Retail Development and Best Universal Design Development) ព្រមទាំងទទួលបានរង្វាន់ ” Best Retail Landscape Architectural Design និង Best Retail Architectural Design” ក្នុងចំណាត់ថ្នាក់ Highly Commended ។

«ពួកយើងមានកិត្តិយសខ្លាំងណាស់ ដែលបានឈ្នះពានរង្វាន់ក្នុងរាត្រីនេះ។ យើងបានខិតខំប្រឹងប្រែង និងចំណាយពេលវេលាជាច្រើន ដើម្បីធានាឱ្យបានថាគម្រោង Eden Garden នឹងត្រូវបានសាងសង់ឡើងតាមការរំពឹងទុក។ ការទទួលបានពានរង្វាន់ទាំងនេះ គឺជាការបញ្ជាក់ពីកិច្ចខិតខំប្រឹងប្រែងរបស់យើង ដែលចង់ឲ្យប្រជាពលរដ្ឋរស់នៅក្នុងទីក្រុងភ្នំពេញ ទទួលបានបែបផែនជីវិតមួយកាន់តែទំនីប និងទាន់សម័យ»។ នេះជាការលើកឡើងរបស់លោក Faz Ghotbi នាយកក្រុមហ៊ុន Eden Garden (Cambodia) Co. , Ltd.។

លោបានបន្ថែមទៀតថា «នៅ Eden Garden ពួកយើងបានជ្រើសរើសហាងដោយប្រុងប្រយ័ត្នដើម្បីបំពេញតម្រូវការអតិថិជនឱ្យគាត់ទទួលបានបទពិសោធន៍ប្លែកៗពីភោជនីយដ្ឋានទាំងនោះ ហើយអតិថិជនរបស់យើង គឺផ្តោតទៅលើប្រជាពលរដ្ឋក្នុងតំបន់ ជនបរទេស និងអ្នកទេសចរជាតិ និងអន្តរជាតិ សម្រាប់ពួគគាត់មកលំហែកាយផងដែរ»។

មានហាងទំនិញ និងភោជនីយដ្ឋានល្បីៗជាច្រើនដែលកំពុងរៀបចំដំណើរការឆាប់ៗនៅ Eden Garden ក្នុងនោះមានដូចជាហាងកាហ្វេ Starbucks ដែលបើកដំណើរការកាលពីថ្ងៃសៅរ៍សប្តាហ៍មុន។ ក្រៅពីនេះយើងក៏មានភោជនីយដ្ឋាន S&P Thai Restaurant & Bakery របស់ប្រទេសថៃ, Steps, Say Chiizu, Kyoka Sushi, ហាងផ្កា Rosemary Flowerbar, ហាងលក់សម្ភារៈកីឡា Fan Sports Store, ឱសថស្ថាន Help, ភោជនីយដ្ឋានបបរកង្កែប Geylang Frog Porridge និងហាងផ្សេងទៀតកំពុងចាប់ផ្តើមដំណើរការជាបន្តបន្ទាប់ផងដែរ។ លើសពីនេះទៀត ផ្សារទំនើប SUPERSTORE, រោងភាពយន្ត LEGEND និងក្លឹបកំសាន្ត EPIC សាខាទីពីរ ក៏នឹងត្រូវបានបើកដំណើរការជាផ្លូវការ នៅអំឡុងខែឧសភា ឬ មិថុនាខាងមុខនេះផងដែរ។

ឆ័ត្រដែលមានគ្រោងខ្ពស់នៅ Eden Garden ដែលទទួលបានគំនិតរចនាពីកន្លែងកំសាន្ត Clarke Quay របស់ប្រទេសសិង្ហបុរី បានធ្វើឱ្យមានការទាក់ទាញយ៉ាងពិសេសនៅពេលរាត្រី ដោយមានភ្លើង7ពណ៌ចាំងឆ្លាស់គ្នា។ ទីធ្លាបើកទូលាយ មានផ្លូវថ្មើរជើង និងកន្លែងអង្គុយសម្រាកលំហែកាយ ព្រមជាមួយដើមឈើខ្ពស់បៃតង ស្វាគមន៍យ៉ាងកក់ក្តៅដល់អ្នកមកកំសាន្តនៅទីនេះ។ ទាំងនេះគឺជាទិដ្ឋភាពដ៏ថ្មី នៅរាជធានីភ្នំពេញ។

ភ្នំពេញស៊ីធីសេនធ័រ ដែលមានទីតាំងស្ថិតនៅចំកណ្តាលនៃរាជធានីនៃប្រទេសកម្ពុជា ដែលមានផ្ទៃដី 111.6 ហិកតា មានគម្រោងអភិវឌ្ឍន៍ជាច្រើនដែលកំពុងសាងសង់ជាបន្តបន្ទាប់។ កាលពីឆ្នាំមុន ភ្នំពេញស៊ីធីសេនធ័រ បានទទួលជ័យជំនះទៅលើគម្រោងលំនៅដ្ឋាន Residence90 ជាគម្រោងលំនៅដ្ឋានរចនាឡើងប្រកបដោយស្ថាបត្យកម្មល្អបំផុត, គម្រោង The Edge ជាអគារពាណិជ្ជកម្មដែលមានហាងលក់ទំនិញ ដែលកំពុងចាប់ផ្តើមសាងសង់ និងចុងក្រោយគឺអគារ The Vanguard ដែលជាការិយាល័យថ្មីដែលមានលក្ខណៈទំនើប និងទាន់សម័យរបស់ក្រុមហ៊ុនភ្នំពេញស៊ីធីសេនធ័រ។

លោក Alex Lau នាយកក្រុមហ៊ុន ភ្នំពេញស៊ីធីសេនធ័រ បានមានប្រសាសន៍ថា៖ “ភ្នំពេញស៊ីធីសេនធ័រ មានបំណងចង់ក្លាយទៅជាអ្នកអភិវឌ្ឍន៍ឈានមុខគេ តាមរយៈការបង្កើតសហគមន៍មួយប្រកបដោយនិរន្តភាព, មានភាពច្នៃប្រឌិតដ៏សម្បូរបែបរួមបញ្ចូលគ្នានៅក្នុងតំបន់។ យើងមិនមែនគ្រាន់តែជាអ្នកអភិវឌ្ឍន៍អចលនទ្រព្យប៉ុណ្ណោះទេ ប៉ុន្តែយើងជាអ្នករៀបចំគម្រោងផែនការនគរូបនីយកម្មទីក្រុង និងជាអ្នកអភិវឌ្ឍន៍មេសម្រាប់ការអភិវឌ្ឍន៍គម្រោងភ្នំពេញស៊ីធីសេនធ័រដ៏សំខាន់របស់យើង។ ” លោកបានបន្ថែមថា “ពួកយើងបានចាប់ផ្តើមគម្រោងនេះឡីង នៅពេលដែលយើងសម្លឹងឃើញឱកាសល្អខាងផ្នែកភោជនីយដ្ឋាន និងហាងភេសជ្ជៈ ដែលកំពុងតែមានសន្ទុះកើនឡើងក្នុងពេលបច្ចុប្បន្ននេះ” ។

ភ្នំពេញ ស៊ីធីសេនធ័រ ដែលមានទីតាំងស្ថិតនៅចំកណ្តាលនៃរាជធានីភ្នំពេញ គឺជាគោលដៅដ៏ល្អសម្រាប់ប្រជាពលរដ្ឋក្នុងស្រុក និងជនបរទេស ហើយក៏ជាកន្លែងដែលមានអគារធ្វើអាជីវកម្មទំនើបៗ ប្រកបដោយមានភាពច្នៃប្រឌិត និងទាន់សម័យ។ លើសពីនេះទៀត ហេដ្ឋារចនាសម្ពន្ធ និងប្រព័ន្ធចរាចរណ៍គឺត្រូវបានសាងសង់ និងរៀបចំយ៉ាងយកចិត្តទុកដាក់ ដើម្បីការរស់នៅ និងការធ្វើដំណើរមានសុវត្ថិភាពខ្ពស់។ វត្តមានរបស់កន្លែងកម្សាន្តដែលបើកដំណើរការ 24ម៉ោង Eden Garden នឹងបន្ថែមនូវគុណតម្លៃដ៏វិសេសនៅក្នុងទីក្រុងអភិវឌ្ឍន៍ថ្មី ភ្នំពេញស៊ីធីសេនធ័រ ដ៏ធំមួយនេះ ៕

March 17, 2018

គ្រឹះស្ថានអង្គររកចំណូលបានជាង 100លានដុល្លារពីភ្ញៀវទេសចរ

វិស័យទេសចរណ៍គឺជាឧស្សាហកម្មគ្មានផ្សែង ឬមានផ្សែងតិចតួចដែលអាចរកចំណូលចូលជាតិបានរាប់លានដុល្លារក្នុងមួយឆ្នាំៗ ជាក់ស្តែងនៅរយៈពេលពេញមួយឆ្នាំ2017កន្លងទៅនោះ គ្រឹះស្ថានអង្គររកចំណូលបានចំនួនជាង 100លានដុល្លារ អាមេរិកពីការលក់សំបុត្រជូនភ្ញៀវទេសចរ។

យោងតាមសេចក្តីប្រកាសព័ត៌មានរបស់គ្រឹះស្ថានអង្គរកាលពីសប្តាហ៍មុននេះបានឱ្យដឹងថា ក្នុងឆ្នាំ2017កន្លងទៅ គ្រឹះស្ថានអង្គរលក់សំបុត្រជូនភ្ញៀវទេសចរអន្តរជាតិបានចំនួន 2.45លាននាក់មានកំណើន11.8% ធៀបនឹងឆ្នាំ2016 និងទទួលបានចំណូលសរុបចំនួន 108លានដុល្លារអាមេរិក មានកំណើន72.5% ធៀបនឹងពេលដូចគ្នាក្នុងឆ្នាំ2016។

ដើម្បីទាក់ទាញភ្ញៀវទេសចរ គ្រឹះស្ថានអង្គរបានដាក់ឱ្យដំណើរការនូវប្រព័ន្ធព័ត៌មានវិទ្យាថ្មី ដែលសម្រួលដល់ការផ្តល់សេវាលក់ប័ណ្ណជូនភ្ញៀវទេសចរអន្តរជាតិឱ្យកាន់តែមានភាពងាយស្រួលឡើង ក៏ដូចជាការបង្កើនប្រសិទ្ធភាពក្នុងការគ្រប់គ្រងការលក់ប័ណ្ណឱ្យកាន់តែប្រសើរឡើងថែមទៀតដែរ។ គ្រឹះស្ថានអង្គរបានដាក់ឱ្យដំណើរការនូវការទូទាត់ការទិញប័ណ្ណចូលទស្សនារមណីយដ្ឋានអង្គរតាមរយៈប្រព័ន្ធអេឡិចត្រូនិកពីខែសីហា ឆ្នាំ2017មក ដោយភ្ញៀវទេសចរអន្តរជាតិអាចប្រើប្រាស់ប័ណ្ណឥណទាន (Credit Card) ឬប័ណ្ណឥណពន្ធ(Debit Card) ដូចជា Visa Card, Master Card, Union Pay JCB និងDiners Club ជាដើម។

ក្នុងកិច្ចប្រជុំក្រុមប្រឹក្សាភិបាលអាណត្តិទី1 លើកទី7 របស់គ្រឹះស្ថានអង្គរក្រោមអធិបតីភាពឯកឧត្តម អូន ព័ន្ធមុនីរ័ត្ន ទេសរដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហរិញ្ញវត្ថុ និងឯកឧត្តម ថោង ខុន រដ្ឋមន្ត្រីក្រសួងទេសចរណ៍បានដាក់គោលការណ៍បន្ថែមមួយចំនួនទៀតក្នុងការបង្កើនប្រសិទ្ធភាពនៃការផ្តល់សេវាការលក់ប័ណ្ណឱ្យកាន់តែប្រសើរឡើងថែមទៀត ក្នុងនោះគ្រឹះស្ថានអង្គរបាននិងកំពុងធ្វើទំនើបកម្មប្រព័ន្ធលក់ប័ណ្ណរបស់ខ្លួនឱ្យកាន់តែទំនើបថែមឡើងទៀតឱ្យស្របតាមស្តង់ដារអន្តរជាតិ ដែលនឹងអាចផ្តល់នូវតួលេខនៃការលក់ប័ណ្ណបានភ្លាមៗ (Real Time) សម្រាប់ជាការបង្ហាញនូវភាពច្បាស់លាស់ក្នុងការគ្រប់គ្រងទិន្នន័យ ធានាបាននូវតម្លាភាព និងគណនេយ្យភាពផងដែរ។

គួរបញ្ជាក់ថា នៅត្រីមាសទី2 ឆ្នាំ2018ខាងមុខ គ្រឹះស្ថានអង្គរក៏គ្រោងនឹងដាក់ឱ្យដំណើរការការលក់សំបុត្រតាមអនឡាញ(Online)ផងដែរ ដោយការលក់សំបុត្រតាមអនឡាញនេះនឹងធ្វើឱ្យភ្ញៀវទេសចរមានភាពងាយស្រួលអាចទិញសំបុត្របាននៅពេលណា និងនៅទីកន្លែងណាក៏បាន។

ពាក់ព័ន្ធនឹងករណីនេះ លោក ហូ វណ្ឌី ប្រធានក្រុមហ៊ុនទេសចរណ៍ World Express Co.,Ltd បានថ្លែងគាំទ្រចំពោះចំណាត់ការរដ្ឋាភិបាលក្នុងការដាក់ឱ្យដំណើការលក់សំបុត្រតាមប្រព័ន្ធអនឡាញនេះ ព្រោះវាបានផ្តល់នូវភាពងាយស្រួលទៅដល់អ្នកទេសចរដែលពួកគេអាចទិញសំបុត្របានគ្រប់ពេលវេលា និងគ្រប់ទីកន្លែងដែលជាគោលនយោបាយមួយទាក់ទាញភ្ញៀវទេសចរអន្តរជាតិឱ្យចូលមកទស្សនាកម្ពុជាយើងកាន់តែច្រើនឡើង។

លោកមានប្រសាសន៍ថា កន្លងមកភ្ញៀវទេសចរដែលចង់ចូលមកកម្ពុជា លុះត្រាតែមកទិញសំបុត្រនៅទីនោះផ្ទាល់ ឬទិញតាមរយៈភ្នាក់ងារទេសចរណ៍ តែនៅពេលដាក់ដំណើរការលក់សំបុត្រតាមអនឡាញនេះ ភាពស្មុគស្មាញទាំងឡាយនឹងត្រូវលុបបំបាត់អស់ជាមិនខាន។

ដើម្បីឆ្លុះបញ្ចាំងឱ្យឃើញពីការយកចិត្តទុកដាក់ និងការគិតគូរបន្ថែមទៀតរបស់រាជរដ្ឋាភិបាល ក្នុងការជួយដោះស្រាយបញ្ហាហិរញ្ញវត្ថុរបស់មន្ទីរពេទ្យគន្ធបុប្ផា រាជរដ្ឋាភិបាលបានសម្រេចផ្តល់ថវិកាឧបត្ថម្ភបន្ថែមជូនដល់មូលនិធិគន្ធបុប្ផា ដោយប្រើប្រាស់ចំណូលដែលទទួលបានពីការដំឡើងថ្លៃប័ណ្ណចូលទស្សនារមណីយដ្ឋានអង្គរចំពោះភ្ញៀវទេសចរបរទេសក្នុងមួយនាក់ 2ដុល្លារ ជូនដល់មូលនិធិគន្ធបុប្ផាដែលក្នុងឆ្នាំ2017កន្លងទៅ ឧបត្ថម្ភបានចំនួន 4.34លានដុល្លារអាមេរិក។

សូមបញ្ជាក់ថា ក្នុងឆ្នាំ2017កន្លងទៅ កម្ពុជាទទួលបានភ្ញៀវទេសចរអន្តរជាតិចំនួនជាង 5.6 លាននាក់ កើនឡើង11.8% និងភ្ញៀវទេសចរក្នុងស្រុកមានចំនួន11លាននាក់បានរួមចំណែកប្រមាណ 14ភាគរយ នៃផលិតផលក្នុងស្រុកសរុបរបស់ប្រទេសកម្ពុជា៕

March 17, 2018

ចម្ការម្នាស់ទឹកឃ្មុំ 1ហិកតា បានប្រាក់ចំណេញជិត1ម៉ឺនដុល្លារក្នុងមួយឆ្នាំ

ម្នាស់ទឹកឃ្មុំ គឺជាប្រភេទបន្លែផ្លែឈើដែលប្រជាជនខ្មែរនិយមទទួលទានធ្វើជាបង្អែមលាងមាត់ក្រោយពេលបាយ ធ្វើជាអាហារសម្រន់នៅពេលថ្ងៃ និងអាចច្នៃធ្វើម្ហូប និងបង្អែមមានរសជាតិឆ្ងាញ់ពិសាទៀតផង។

កសិករដាំម្នាស់នៅភូមិអូរឬស្សីកណ្តាល ឃុំអូរឬស្សីកណ្តាល ស្រុកសៀមបូក ខេត្តស្ទឹងត្រែង លោកសាយ ពន្លឺ បានផ្តល់សម្ភាសថា គ្រួសារលោកចាប់ផ្តើមប្រកបរបរដាំម្នាស់អស់រយៈពេល 10ឆ្នាំមកហើយ មកទល់ពេលបច្ចុប្បន្ន លោកបានដាំដុះនៅលើផ្ទៃដីចំនួន 10ហិកតា ហើយគ្រោងនឹងពង្រីកចំនួន 15ហិកតាបន្ថែមទៀតនៅឆ្នាំក្រោយ(2019)។

លោកថា ម្នាស់មួយហិកតាគេអាចដាំបានចន្លោះពី 25,000កូន ទៅ30,000កូន ដោយលើកជារងចន្លោះ1.2ម៉ែត្រ ទៅ1.5ម៉ែត្រពីគ្នា ហើយដាំឃ្លាតគ្នាពីមួយដើមទៅមួយដើមចន្លោះ 3.5តឹកទៅ4តឹក។

ក្នុងម្នាស់មួយដើម ផ្តល់ផលតែមួយផ្លែប៉ុណ្ណោះ ដែលមានទម្ងន់ចាប់ពី 1គីឡូ ទៅដល់3គីឡូក្រាម ទៅតាមផ្លែតូច ឬផ្លែធំ ហើយលក់ក្នុងតម្លៃបោះដុំបានតម្លៃ 3,500រៀល ទៅ4,000រៀលក្នុងមួយគីឡូក្រាម។ យ៉ាងណាក៏ដោយលោកថា “បើគិតតាមចំនួនដើម និងតម្លៃលក់នៅលើទីផ្សារ យើងឃើញថា បានច្រើនម៉ឺនដុល្លារដែរក្នុងមួយហិកតាៗ ប៉ុន្តែជាក់ស្តែងវិញចំណេញប្រហែលតែ 8,000ដុល្លារទៅមួយ 10,000ដុល្លារប៉ុណ្ណោះក្នុងមួយហិកតា។

ម្នាស់គេអាចដាំបានគ្រប់រដូវ មិនថារដូវវស្សា ឬរដូវប្រាំងនោះទេ សំខាន់ឱ្យតែមានទឹកស្រោច ប៉ុន្តែកសិករខាងលើបានអះអាងថា ដើម្បីឱ្យដើមម្នាស់លូតលាស់បានល្អ គេច្រើនដាំនៅរដូវប្រាំង ហើយស្រោចទឹកជាប់ជាប្រចាំ ដើមលូតលាស់បានល្អជាងដាំនៅរដូវវស្សា ព្រោះថា រដូវវស្សាភ្លៀងធ្លាក់ច្រើនពេក ម្នាស់មិនសូវលូតលាស់ល្អទេ។

លោក ពន្លឺ បានលើកឡើងពីបច្ចេកទេសដាំដុះម្នាស់ថា មុននឹងដាំកសិករត្រូវធ្វើដីឱ្យបានស្ងួតល្អជាមុន ពិសេសត្រូវភ្ជួរដីឱ្យបាន 3ដងមុននឹងលើកជារង ដើម្បីឱ្យស្មៅងាប់អស់ ពិសេសដើមស្បូវ បើសិនជាមានដើមស្បូវវានឹងបឺតយកជីជាតិអស់ មិនអាចឱ្យដើមម្នាស់រីកលូតលាស់បានល្អនោះទេ។

ក្រោយពីលើកជារងរួច គេត្រូវយកជីអាចម៍គោទៅដាក់លើរងនីមួយៗ រួចទើបយកថង់ប្លាស្ទិកទៅក្រាលពីលើដើម្បីការពារស្មៅ ការពារសត្វល្អិត និងអាចរក្សាសំណើមបានយូរ។ ក្រោយពីក្រាលកៅស៊ូប្លាស្ទិករួច កសិករនឹងចាប់ផ្តើមយកកូនម្នាស់ទៅដាក់ដាំលើរងនីមួយៗ ដោយដាក់ដាំឃ្លាតពីគ្នាចន្លោះពី 3.5តឹក ទៅ4តឹកក្នុងមួយដើម។ ម្នាស់ត្រូវការស្រោចទឹកជាប្រចាំនៅរដូវប្រាំង តែបើសិនជាមានភ្លៀងធ្លាក់វិញ គេត្រូវស្រោចទឹករយៈពេល5 ឬ7ថ្ងៃម្តង។

លោកថា កាលពីសម័យមុន កសិករមិនទាន់មានបច្ចេកទេសដាំដុះទំនើបនោះទេ កសិករច្រើនបូមទឹកបង្ហូរដាក់តាមរងនីមួយៗ ដោយត្រូវចំណាយថវិកាច្រើនក្នុងការទិញប្រេងបូមទឹក ប៉ុន្តែតាមបច្ចេកទេសថ្មីនេះ គេប្រើទុយោសម្រក់ទឹកជំនួសវិញ ដោយក្នុងមួយហិកតាត្រូវចំណាយប្រាក់ប្រមាណជា 2,500ដុល្លារ ទៅ3,000ដុល្លារ ប៉ុន្តែអាចប្រើបានចាប់ពី 8ឆ្នាំ ទៅដល់20ឆ្នាំ និងចំណេញថវិកាពេលស្រោចទឹកម្តងៗ ដោយត្រូវចំណាយប្រាក់ទិញសាំងអស់ត្រឹមតែ 4,000រៀលប៉ុណ្ណោះក្នុងមួយថ្ងៃ។

ម្នាស់មិនលំបាកថែទាំ និងការពារសត្វល្អិតចង្រៃនោះទេ ដោយគេការពារតែសត្វម្រើមព្រះ និងខ្យងក្រហមកុំឱ្យមកស៊ីលំអងផ្ការបស់វា ហើយថែទាំដាក់ជី និងទឹកជាប្រចាំតែប៉ុណ្ណោះ។ ម្នាស់នឹងដុះលូតលាស់បានល្អ ចាប់ពីពេលដាំលើកដំបូងរហូតដល់ពេលប្រមូលផលត្រូវចំណាយពេល 12ខែ។

លោកថា កន្លងមកទីផ្សារលក់ចេញ គឺម្នាស់មិនមានការលំបាកនោះទេ ដោយលោកបានដាក់លក់ឱ្យអ្នកទេសចរដែលធ្វើដំណើរទៅលេងខេត្តរតនគីរីនិងខេត្តស្ទឹងត្រែងក៏អស់ប្រមាណជា 70% ទៅ 80%ទៅហើយ នៅសល់មួយចំនួនទើបផ្គត់ផ្គង់ទៅឱ្យទីផ្សារធម្មជាតិនៅក្នុងទីក្រុងភ្នំពេញ ប៉ុន្តែក្រោយពីកើតជម្លោះព្រំដែនកម្ពុជា-ឡាវមក ភ្ញៀវទេសចរមិនសូវធ្វើដំណើរឆ្លងកាត់ទីនោះទៀតទេ ដែលរឿងនេះជាកត្តាធ្វើឱ្យផ្លែម្នាស់ជួបកង្វះទីផ្សារលក់ចេញ ដោយត្រូវត្រៀមយកមកលក់បន្ថែមទៀតនៅក្នុងទីក្រុងភ្នំពេញ។

តែទោះជាយ៉ាងណា ចំពោះកសិករខាងលើវិញ លោកគ្រោងនឹងពង្រីកកសិដ្ឋានដាំម្នាស់របស់ខ្លួនឱ្យបានដល់ចំនួន 50ហិកតានៅពេលខាងមុខ ហើយលោកមានគម្រោងថានឹងសហការជាមួយកសិករផ្សេងទៀតដើម្បីទទួលទិញផ្លែម្នាស់យកមកធ្វើសិប្បកម្មផលិតទឹកម្នាស់សម្រាប់លក់ចេញនៅលើទីផ្សារបន្ថែមទៀត៕

March 17, 2018

ឯកឧត្តម ស៊ូ សុជាតិ៖ ផ្សារមូលបត្រ គឺជាសរសៃឈាមសេដ្ឋកិច្ចជាតិ

ផ្សារភាគហ៊ុនត្រូវបានបង្កើតឡើងតាំងពីខែកក្កដា ឆ្នាំ2011 ហើយរហូតមកទល់ពេលបច្ចុប្បន្នមានក្រុមហ៊ុនធំៗចំនួន5 បានចុះបញ្ជីសហការចូលរួមគាំទ្រជាផ្លូវការដែលជាចលករជំរុញឱ្យផ្សារភាគហ៊ុននៅកម្ពុជាកាន់តែរីកចម្រើនទៅមុខ។

ឯកឧត្តម ស៊ូ សុជាតិ អគ្គនាយកនៃគណៈកម្មការមូលបត្រកម្ពុជាមានប្រសាសន៍ក្នុងពិធីពិព័រណ៍ផ្សារភាគហ៊ុន “My First Stock” កាលពីចុងសប្តាហ៍មុនបានឱ្យដឹងថា ការចូលរួមក្នុងផ្សារមូលបត្រមិនត្រឹមតែជាជម្រើសវិនិយោគដ៏មានសក្តានុពលក្នុងផែនការហិរញ្ញវត្ថុគ្រួសារ និងផ្ទាល់ខ្លួនប៉ុណ្ណោះទេតែថែមទាំងជាការចូលរួមក្នុងការអភិវឌ្ឍសេដ្ឋកិច្ចជាតិ ដោយហេតុថា ទីផ្សារមូលបត្រ គឺជាសរសៃឈាមសេដ្ឋកិច្ចដែលមានភាពរស់រវើកតាមរយៈការចល័តនូវមូលធនទំហំតូច និងធំនៅក្នុងសេដ្ឋកិច្ចទៅដល់បុគ្គលដែលមានតម្រូវការសាច់ប្រាក់។

ឯកឧត្តមបន្តថា ព្រមជាមួយនឹងការចូលរួមអភិវឌ្ឍសេដ្ឋកិច្ចជាតិ សាធារណជន ឬវិនិយោគិនក៏ទទួលបាននូវអត្ថប្រយោជន៍ជាច្រើនផ្សេងទៀតដែរ ដូចជាជម្រើសក្នុងការវិនិយោគ ការកាត់បន្ថយហានិភ័យនៅក្នុងការវិនិយោគ ទទួលបានចំណេញមូលធនតាមរយៈការទិញ-លក់មូលបត្រ មានសិទ្ធិក្នុងការបំប្លែងជាសាច់ប្រាក់ ព្រមទាំងបង្កើនឱកាសការងារក្នុងស្រុកនៅពេលដែលក្រុមហ៊ុនទទួលបានដើមទុនរយៈពេលវែងដើម្បីពង្រីកនូវប្រតិបត្តិការអាជីវកម្មផ្ទាល់ខ្លួនទៀតផង។

ដោយឡែក ឯកឧត្តម ហុង សុហួរ អគ្គនាយកនៃក្រុមហ៊ុនផ្សារមូលបត្រកម្ពុជាក៏បានលើកឡើងដែរថា នៅដើមឆ្នាំ2018នេះផ្សារមូលបត្រកម្ពុជាបានរៀបចំដាក់ឱ្យដំណើរការនូវវិធីសាស្ត្រជួញដូរតាមរយៈការចរចាទីផ្សារ និងការដំឡើងដែនកំណត់ 5% ទៅ10% និងការដាក់ឱ្យអនុវត្តវិធានប្រតិបត្តិការរបស់ ផ.ម.ក ពាក់ព័ន្ធមូលបត្របំណុល។ ស្របតាមកំណើននៃការប្រើប្រាស់ទូរស័ព្ទចល័តទំនើប និងអ៊ីនធើណិត ក្រុមហ៊ុននឹងរៀបចំឱ្យមានការជួញដូរតាមអនឡាញនៅពេលឆាប់ៗខាងមុខនេះ។

ឯកឧត្តមបានបញ្ជាក់ដូច្នេះថា “ការទិញលក់តាមប្រព័ន្ធអនឡាញនឹងផ្តល់ភាពងាយស្រួល និងសេរីភាពដល់វិនិយោគិនក្នុងការជួញដូរដោយផ្ទាល់នៅលើទីផ្សារ និងវិសាលភាពនៃការផ្សព្វផ្សាយព័ត៌មានទាន់ពេលវេលា។ ហើយដើម្បីឱ្យសាធារណជនក៏ដូចជាវិនិយោគិនអាចទទួលបានព័ត៌មានដោយងាយស្រួល អំពីផ្សារភាគហ៊ុន ផ្សារមូលបត្រកម្ពុជាបានបង្កើតគេហទំព័រ PhsarHun.com និងកម្មវិធីឈ្មោះថា “ផ្សារហ៊ុន App” ដែលអនុញ្ញាតឱ្យសាធារណជនយល់ដឹងពីការវិនិយោគភាគហ៊ុនដែលមានភាពងាយស្រួលជាងមុន។

កម្មវិធីផ្សារភាគហ៊ុនបានដាក់បញ្ចូលព័ត៌មានចាំបាច់អំពីក្រុមហ៊ុនចុះបញ្ជីថ្លៃភាគហ៊ុន និងទិន្នន័យទីផ្សារជាក់ស្តែងភ្លាមៗ សៀវភៅអេឡិចត្រូនិក និងឯកសារផ្សេងៗសម្រាប់ដោនឡូតដោយមិនគិតថ្លៃ។ ព័ត៌មានទាន់ហេតុការណ៍ និងអត្ថបទល្អៗរួមទាំងការវិភាគ Chat room សម្រាប់សាធារណជនពិភាក្សាគ្នាអំពីបញ្ហានានា។ល។

ឯកឧត្តមបណ្ឌិត ហ៊ាន សាហ៊ីប រដ្ឋលេខាធិការក្រសួងសេដ្ឋកិច្ច និងហរិញ្ញវត្ថុ និងជាប្រធានក្រុមប្រឹក្សាភិបាលនៃក្រុមហ៊ុនផ្សារមូលបត្រកម្ពុជាបានលើកឡើងថា បទពិសោធនៃការចាប់ផ្តើមទីផ្សារភាគហ៊ុននៅបរទេសក្នុងដំណាក់កាលដំបូងគឺជាការលំបាកដែលតម្រូវឱ្យមានការខិតខំ ធ្វើយ៉ាងណាឱ្យផ្សារមួយនេះបានដំណើការនូវតួនាទីដ៏សំខាន់មួយក្នុងការកៀងគរមូលធនការជំរុញការវិនិយោគរីកលូតលាស់របស់វិស័យឯកជនដោយពិតប្រាកដ។

ទន្ទឹមនឹងការរីកចម្រើន ផ្សារភាគហ៊ុនក៏កើតឡើងនូវសញ្ញាប័ណ្ណសាជីវកម្ម និងទីផ្សារសញ្ញាប័ណ្ណរដ្ឋដែលនឹងលេចចេញជារូបរាងឡើងនៅឆ្នាំ2019 ខាងមុខ ស្របតាមទិសដៅនៃការអភិវឌ្ឍទីផ្សារហិរញ្ញវត្ថុនៅកម្ពុជា។

ជារួម ការផ្សព្វផ្សាយសញ្ញាប័ណ្ណរដ្ឋ និងជួយដល់ការរីកចម្រើនមួយកម្រិតទៀតនៃវិស័យមូលបត្រក៏ដូចជាវិស័យហិរញ្ញវត្ថុទាំងមូលផងដែរ។ ក្រៅពីនេះផ្សារមូលបត្រកម្ពុជាក៏បានខិតខំអភិវឌ្ឍកម្មវិធីជាច្រើនទៀតដើម្បីជួយដល់សហគ្រាសធុនតូច និងមធ្យម បង្កើនសកម្មភាពជួញដូរតាមប្រព័ន្ធទូរស័ព្ទដៃ ទីផ្សារ និងការរៀបចំផ្សារមូលបត្រក្នុងកិច្ចប្រឹងប្រែងយ៉ាងសកម្មធ្វើឱ្យផ្សារមូលបត្រកាន់តែរីកធំធាត់វិវឌ្ឍទៅមុខយ៉ាងលឿន និងកាន់តែមានសក្តានុពលទៅមុខ។

នៅក្នុងពិព័រណ៍កាលពីសប្តាហ៍មុននេះ គេឃើញមានក្រុមហ៊ុនចំនួន5 បានចូលរួមសហការជាមួយផ្សារភាគហ៊ុនដែលក្រុមហ៊ុនទាំងនោះរួមមាន រដ្ឋាករទឹកស្វយ័តក្រុងភ្នំពេញ ក្រុមហ៊ុន ហ្គ្រេន ធ្វីន អ៊ីនធឺណេសូណល (ខេមបូឌា) ភីអិលស៊ី កំពង់ផែស្វយ័តភ្នំពេញ ក្រុមហ៊ុនភ្នំពេញ អេសអ៊ីហ្សិត ភីអិលស៊ី និងកំពង់ផែស្វយ័តព្រះសីហនុ ដោយមានការសហការពី Park Café និងកាសែតឡារ៉ែនពាណិជ្ជផងដែរ។

ចំណែកក្រុមហ៊ុនមូលបត្រមាន4 គឺក្រុមហ៊ុនមូលបត្រ អេសប៊ីអាយ រ៉ូយ៉ាល់ ស៊ីឃ្យូរីធី ក្រុមហ៊ុនមូលបត្រ យាន់តា ស៊ីឃ្យូរីធី (ខេមបូឌា) ក្រុមហ៊ុនមូលបត្រកម្ពុជា ស៊ីឃ្យូរីធី និងក្រុមហ៊ុនមូលបត្រ ហ្គោលឌិនហ្វ័រឈូន(ខេមបូឌា) ស៊ីឃ្យូរីធី៕

March 17, 2018

ដបទឹកដោះ Hegen ចុះ MOU ជាមួយវេបសាយ Alibaba លើកិច្ចសហប្រត្តិ បត្តិការណ៍យុទ្ធសាស្ត្រ

ជាមួយនឹងការចុះអនុស្សរណៈយោគយល់កាលពីដើមសប្ដាហ៍ទី2នៃខែមីនា ឆ្នាំ2018 នៅប្រទេសសឹង្ហបុរី ដោយការចុះហត្ថលេខារវាង Alibaba Group Corporate ដែលមានទីស្នាក់កណ្តាលនៅទីក្រុង ហានចូវ ប្រទេសចិន ដែលតំណាងដោយ លោកស្រី អ៊ីវ៉ន បុក និងលោកស្រី អាន ជើ ប្រធានជាន់ខ្ពស់នៃនាយកដ្ឋានទំនិញលក់ដាច់របស់ Tmall Fast Moving Consumer Goods កន្លងទៅ នៅលើកិច្ចសហការណ៍នេះ បានបង្កើតឱកាសដ៏ល្អប្រសើរដល់ក្រុមហ៊ុនទាំងពីរធ្វើការរួមគ្នាដើម្បីបង្កើតយុទ្ធសាស្ត្រអាជីវកម្ម ដែលនាំឱ្យដបទឹកដោះ Hegen ចូលទីផ្សារប្រទេសចិន ជាប្រភេទផលិតផលទារកលំដាប់ខ្ពស់។

អនុស្សារណនេះ មានគោលបំណង បង្កើនតម្រូវការផលិតផលលំដាប់ខ្ពស់ និងបង្កើនការលក់ និងការរីកចម្រើនដ៏គួរកត់សម្គាល់របស់ដបទឹកដោះ Hegen នៅក្នុងទីផ្សារចិន និងទីផ្សារពិភពលោក។ Hegen និង Tmall នឹងចាប់ដៃគ្នាអភិវឌ្ឍយុទ្ធសាស្ត្រ ដើម្បីពង្រឹងការលក់តាមរយៈ Online បទពិសោធន៍ពីអតិថិជន និងការច្នៃប្រឌិតដ៏ប៉ិនប្រសប់របស់ Hegen។

លោកស្រី អ៊ី វ៉ន បានលើកឡើងថា ៖ អនុស្សារណនេះបានឆ្លុះបញ្ចាំងឱ្យឃើញពីកិច្ចខិតខំប្រឹងប្រែងរបស់ Hegen ក្នុងការលើកកម្ពស់ការបំបៅកូនដោយទឹកដោះនៅក្នុងប្រទេសចិន និងជាឱកាសក្នុងការអប់រំ និងគាំទ្រអ្នកម្តាយ ដែលបំបៅកូនដោយទឹកដោះ តួរយ៉ាងដូចជា ការបង្កើនឱ្យមាននូវយុទ្ធនាការណ៍ចលនាអ្នកម្តាយ Hegen ដែលធ្វើឱ្យអ្នកម្តាយដែលរវល់ការងារនៅខាងក្រៅ មិនមានអារម្មណ៍ខុសឆ្គងពេលកំពុងធ្វើការ ព្រោះគាត់នៅតែអាចបំបៅកូនជាទីស្រលាញ់របស់គាត់បាន។

ក្នុងគម្រោងសង្គម និងសហគមន៍របស់កិច្ចសហប្រត្តិបត្តិការណ៍នេះ រួមមានយ៉ាងហោចណាស់ សិក្ខាសាលាចំនួន 12 ដោយ Hegen ស្តីពីការបំបៅកូន ដោយទឹកដោះ និងកម្មវិធីទីផ្សារ Online និងកម្មវិធីផ្សេងៗទៀតរៀបចំដោយ Tmall ។ Hegen មានកិត្តិយសក្នុងនាមជា ផលិតផលសឹង្ហបុរីមុនគេបង្អស់ដែលក្លាយជាដៃគូរផ្តាច់មុខរបស់ Tmall។

ចាប់ពី Hegen ដាក់លក់នៅ Tmall កាលពី 1ឆ្នាំកន្លះមុនមក បច្ចុប្បន្ន Hegen គឺ ជាផលិតផលដែលលក់ដាច់បំផុតក្នុងផ្នែកដប ទឹកដោះទារក និងកុមារ។ គួរកត់សម្គាល់ដែរថា Hegen មានវត្តមាននៅក្នុងប្រទេសកម្ពុជាតាំងពីខែ តុលា ឆ្នាំ 2017 ហើយបច្ចុប្បន្ន កំពុងទទួលបានការចាប់អារម្មណ៍ពីសំណាក់មាតាបិតាដែលមានកូនតូច លើមុខងារជាច្រើនមិនគួរឱ្យជឿរបស់ផលិតផលនេះ។ លក់ដុំ និងរាយ 017 888 191៕

March 17, 2018

វិធីសាស្ត្រអភិវឌ្ឍន៍សមត្ថភាព ដែលមានស្រាប់ ឱ្យខ្លាំងឡើង

ក្លាយជាមនុស្សដែលមានសមត្ថភាពខ្លាំង និងមានសក្តានុពល គឺជាក្តីប្រាថ្នារបស់មនុស្សគ្រប់រូប ជាពិសេសអ្នកដែលចូលចិត្តវិនិយោគជីវិតរបស់ខ្លួនជាមួយនឹងការអប់រំ។

អតីតជាសិស្សពូកែក្នុងប្រទេសផ្នែករូបវិទ្យា និងជាគ្រូបង្រៀនគណិតវិទ្យា លោក ចេង បូរិទ្ធ បានលើកឡើងថា មនុស្សម្នាក់ៗអាចមានសមត្ថភាពខ្លាំង និងមានសក្តានុពលខ្ពស់លើជំនាញផ្សេងៗគ្នា ប៉ុន្តែពេលខ្លះប្រសិនបើពួកគេមិនបានប្រើប្រាស់គ្រប់លទ្ធភាពដើម្បីអភិវឌ្ឍទេពកោសល្យពីកំណើតទេនោះ គេនឹងមិនអាចក្លាយជាមនុស្សខ្លាំងបានឡើយ។

មានអ្នកខ្លះដោយសារតែមិនយល់ពីតម្លៃនៃការជ្រើសរើសជំនាញសិក្សានៅមហាវិទ្យាល័យ បានសម្រេចចិត្តខុសធ្វើឱ្យបាត់បង់ឱកាសអភិវឌ្ឍន៍ភាពខ្លាំងរបស់ខ្លួនថែមទៀត ដែលកត្តាទាំងអស់នេះបានធ្វើឱ្យពួកគេត្រូវចំណាយពេលវេលាច្រើនដើម្បីអភិវឌ្ឍលើជំនាញដែលមានការរីកចម្រើនយឺត ហើយអាចដើរមិនទាន់អ្នកដែលគេមានទេពកោសល្យស្រាប់លើជំនាញដែលខ្លួនកំពុងធ្វើនោះទៀតផង។

លោក ចេង បូរិទ្ធ បានលើកឡើងថា៖ “ការអភិវឌ្ឍសមត្ថភាពអាចធ្វើទៅបានល្អ លុះត្រាតែពួកគេស្វែងរកឱ្យឃើញនូវអ្វីដែលពួកគេចង់ធ្វើ ហើយឧស្សាហ៍អនុវត្តជារឿយៗនូវសកម្មភាពនោះរហូតក្លាយជាអ្នកជំនាញ។

លោក បូរិទ្ធ បានលើកឡើងផងដែរថា ជាឧទាហរណ៍ ប្រសិនបើយើងស្រឡាញ់ការសិក្សាផ្នែកភាសា យើងត្រូវអានឱ្យច្រើន រហូតដល់យើងក្លាយជាអ្នកជំនាញដែលដឹងពីវិធីប្រើប្រាស់ពាក្យនៃភាសានោះ បន្ទាប់មកយើងនឹងអាចក្លាយជាមនុស្សដែលមានភាពខ្លាំងផ្នែកភាសា មិនថាតែអង់គ្លេស ថៃ ឬភាសាដទៃទៀតនោះទេ។ ចំពោះរូបវិទ្យា ឬគណិតវិទ្យាវិញ ក៏ចាំបាច់ត្រូវតែមានការអភិវឌ្ឍសមត្ថភាពតាមរយៈការដោះស្រាយលំហាត់លំបាកៗជាច្រើនដំណាក់កាល រហូតទទួលចងចាំច្បាស់ពីល្បិច និងគន្លឹះសំខាន់ៗដែលឧស្សាហ៍ចេញ។ វីធីនេះអាចធ្វើឱ្យយើងក្លាយជាមនុស្សដែលដោះស្រាយលំហាត់បានលឿនជាងគេ និងជាអ្នកដែលយកវាទៅប្រើប្រាស់សម្រាប់ជាប្រយោជន៍ក្នុងការរស់នៅបានច្រើនផងដែរ ហើយចំពោះការងារវិញក៏ដូចគ្នាដែរ នៅពេលដែលយើងឧស្សាហ៍ធ្វើវា យើងនឹងក្លាយជាអ្នកជំនាញដែលអាចដោះស្រាយបញ្ហាបានយ៉ាងប្រសើរ។

ស្រដៀងគ្នានេះដែរ លោក លី សុភារិទ្ធ វិស្វករនៃក្រុមហ៊ុនឯកជនមួយបានលើកឡើងថា ដើម្បីអភិវឌ្ឍសមត្ថភាពបានល្អ លុះត្រាតែយើងចេះប្រើប្រាស់មូលដ្ឋានគ្រឹះនៃចំណេះដឹងទាំងអស់ទៅបូករួមជាមួយនឹងទ្រឹស្តីសំខាន់ៗមួយចំនួនទៀតដែលយើងបានដឹង ឬច្នៃយកទៅប្រើប្រាស់តាមវិធីដែលយើងជួបប្រទះប្រចាំថ្ងៃ។ នៅពេលដែលយើងយល់ច្បាស់ពីមូលដ្ឋានគ្រឹះនៃជំនាញហើយ យើងនឹងមានភាពងាយស្រួលក្នុងការបំបែកក្បួននោះទៅជាវិធីសាស្ត្រ ហើយវានឹងក្លាយជាវិធីងាយៗសម្រាប់ខ្លួនឯង។

លោក លី សុភារិទ្ធ បានលើកឡើងថា៖ “នៅពេលដែលយើងជាអ្នកភ្លេង ហើយទៅមើលវិស្វករ យើងនឹងមានអារម្មណ៍ថា គម្រោងនីមួយៗមានលក្ខណៈសាំញ៉ាំ ហើយរញ៉េរញ៉ៃ តែសម្រាប់វិស្វករដោយសារតែគេមានមូលដ្ឋានគ្រឹះក្នុងការមើលប្លង់រួមទាំងគម្រោងនានានោះ គេគិតថាវាជារឿងងាយស្រួលបំផុត។ តែសម្រាប់វិស្វករវិញ បើគាត់ទៅលេងភ្លេង ឬមើលអក្សរភ្លេងវិញប្រាកដជាពិបាក ព្រោះគាត់មិនមានមូលដ្ឋានគ្រឹះផ្នែកនោះទេ។

វិស្វករខាងលើបានលើកឡើងផងដែរថា ការកត់ត្រា ក៏ជាវិធីយ៉ាងសំខាន់ផងដែរក្នុងការអភិវឌ្ឍសមត្ថភាពឱ្យក្លាយជាមនុស្សខ្លាំងផ្នែកការងារ ឬការសិក្សា ព្រោះថា នៅពេលដែលយើងមានមូលដ្ឋានគ្រឹះច្បាស់លាស់លើផ្នែកណាមួយហើយយើងនឹងអាចយកវាមកអនុវត្តបាន។

ក្នុងដំណើរការនៃការអនុវត្តគម្រោងទាំងអស់នោះ ជាទូទៅ ឧបសគ្គ និងកត្តាប្រឈមមួយចំនួនប្រាកដជាអាចកើតមានឡើងជាក់ជាមិនខាន ហេតុនេះការកត់ត្រានូវបញ្ហា និងកំណត់សម្គាល់លើវិធីសាស្ត្រឆ្លាតវៃតិចៗ អាចធ្វើឱ្យយើងក្លាយជាមនុស្សខ្លាំងជាងអ្នកដទៃ ព្រោះយើងបានគ្រប់គ្រងល្បិចសំខាន់ៗដែលធ្វើឱ្យការងារដំណើរការទៅលឿន ហើយថែមទាំងទទួលបានលទ្ធផលល្អទៀតផង៕

March 16, 2018

អេ អឹម ខេ ធ្វើទំនើបកម្មប្រព័ន្ធស្វីច (SWITCH) ថ្មីដើម្បីឆ្លើយតបទៅនឹងកំណើនសេចក្តីត្រូវការសេវាហិរញ្ញវត្ថុរបស់អតិថិជន

ភ្នំពេញ៖ គ្រឹះស្ថានមីក្រូហិរញ្ញវត្ថុ អេ អឹម ខេ ភីអិលស៊ី នឹងធ្វើទំនើបកម្មប្រព័ន្ធស្វីច (SWITCH) ថ្មី Smart Vista ទូទាំងប្រទេស ចាប់ពីថ្ងៃទី26 មីនា 2018 នេះតទៅ។ ការធ្វើទំនើបកម្មប្រព័ន្ធស្វីច (SWITCH) ថ្មីនេះ គឺក្នុងគោលបំណង ផ្តល់សេវាជូនអតិថិជនរបស់យើងកាន់តែលឿនរហ័សទាន់ចិត្តជាងមុន មានទំនុកចិត្ត និងសុវត្ថិភាពខ្ពស់ ជាពិសេសជួយ កាត់បន្ថយការកត់ត្រាដោយដៃនៅតាមភ្នាក់ងារ ផ្តល់ភាពងាយស្រួល និងធ្វើប្រតិបត្តិការមានប្រសិទ្ធភាពជាងមុន។

ដើម្បីទុកពេលឱ្យ ក្រុមការងារបស់យើងធ្វើកិច្ចការនេះបានយ៉ាងរលូន នៅមុនថ្ងៃដែលប្រព័ន្ធនេះត្រូវបានផ្លាស់ប្តូរ អេ អឹម ខេ នឹងផ្អាកសេវានៅតាម ការិយាល័យ ម៉ាស៊ីន ATM/CDM និងភ្នាក់ងារ ចំនួន 3ថ្ងៃ គឺចាប់ពីម៉ោង 6ល្ងាចថ្ងៃទី23 ដល់ ម៉ោង6ព្រឹកថ្ងៃទី26 មីនា 2018។ រាល់ប្រតិបត្តិការទាំងអស់នឹងដំណើរការជាធម្មតាវិញ ចាប់ពីថ្ងៃទី26 មីនា ឆ្នាំ2018 តទៅ។

គួរឱ្យកត់សម្គាល់ដែរថា ក្នុងរយៈពេលប៉ុន្មានឆ្នាំចុងក្រោយនេះ អតិថិជនរបស់ អេ អឹម ខេ មានការកើនឡើងជាលំដាប់។ ពោលគឺនៅក្នុងឆ្នាំ 2015 អេ អឹម ខេ មានអតិថិជនត្រឹមតែជាង 48ម៉ឺននាក់ប៉ុណ្ណោះ ប៉ុន្តែចំនួនអតិថិជនមានការកើនឡើងរហូតដល់ជាង 58ម៉ឺននាក់ក្នុងឆ្នាំ2016។ គិតត្រឹមខែមីនា 2018 នេះ អតិថិជន អេ អឹម ខេ បានកើនឡើងរហូតដល់ជាង 68ម៉ឺននាក់។

បើយោងតាមលោក ហួត សុខា ប្រធាននាយកប្រតិបត្តិអាជីវកម្ម (សន្សំ និងបណ្តាញ)បានឲ្យដឹងថា កត្តាអតិថិជន កើនឡើងពីមួយឆ្នាំទៅមួយឆ្នាំក៏ជាចំណែកមួយដែលធ្វើឲ្យយើងផ្លាស់ប្តូរប្រព័ន្ធនេះផងដែរ។ លោក សុខា បានលើកឡើងថា ដើម្បីឆ្លើយតបទៅនឹងការរីកចម្រើនរបស់បច្ចេកវិទ្យារបស់ពិភពលោក និងជាពិសេសដើម្បីធ្វើឲ្យប្រព័ន្ធប្រតិបត្តិការរបស់យើងមានប្រសិទ្ធភាពជាងមុន កាត់បន្ថយការចំណាយ និងដើម្បីបំពេញតម្រូវការអតិថិជន ការវិនិយោគទៅលើបច្ចេកវិទ្យាថ្មីៗជាជម្រើសរបស់យើង។ លោកបានបញ្ជាក់ដូច្នេះថា ការផ្លាស់ប្តូរមកប្រើប្រព័ន្ធស្វីច (SWITCH) ថ្មី Smart Vista នេះវានឹងធ្វើឲ្យប្រព័ន្ធប្រតិបត្តិការ អេ អឹម ខេ មានសមត្ថភាព ខ្ពស់ជាងមុន មានភាពងាយស្រួល និងបត់បែន ជាពិសេសវានឹងផ្តល់ឱកាសឲ្យយើងបន្ថែមបណ្តាញបានច្រើនជាងមុន ក៏ដូចជាការបង្កើតផលិតផល និងសេវាកម្មថ្មីៗទៀតផង។ លោក សុខា សង្ឃឹមថា តាមរយៈប្រព័ន្ធថ្មី នេះភ្នាក់ងារ អេ អឹម ខេ នឹងទទួលអត្ថប្រយោជន៍កាន់តែច្រើន តាមរយៈការបង្កើនផលិតភាពការងារបានប្រសើរជាងមុន មិនតម្រូវអោយគាត់ធ្វើប្រតិបត្តិការដែលកត់ត្រាដោយដៃ និងអាចទទួលបាន ភាពងាយស្រួលជាច្រើនផ្សេងទៀត។

អេ អឹម ខេ គឺជាគ្រឹះស្ថានមីក្រូហិរញ្ញវត្ថុ ដែលឈានមុខគេលើវិសាលភាពប្រតិបត្តិការ និងចំនួនអតិថិជនប្រាក់កម្ចី។ គិតត្រឹម ខែមីនា ឆ្នាំ2018 នេះ អេ អឹម ខេ មានវិសាលភាពប្រតិបត្តិការគ្របដណ្តប់ 89% នៃចំនួនភូមិសរុបទូទាំង ប្រទេស មានបុគ្គលិកសរុបជាង 2.500នាក់ អតិថិជនសរុបជាង 68ម៉ឺននាក់ ជាមួយនឹងផលបត្រប្រាក់កម្ចីជាង213 លានដុល្លារអាមេរិក ជាមួយការិយាល័យប្រតិបត្តិការចំនួន 150 កន្លែង និង មានភ្នាក់ងារជាង 3.000កន្លែង នៅទូទាំងប្រទេស។ អេ អឹម ខេ មានផលិតផល និង សេវាកម្មជាច្រើន កំពុងផ្តល់ជូនអតិថិជន ដូចជា សេវាប្រាក់កម្ចី ប្រាក់សន្សំ ផ្ទេរប្រាក់ សេវាទូទាត់វិក្កយបត្រ ធានារ៉ាប់រងខ្នាតតូច ធនាគារចល័ត សេវាបើកប្រាក់បៀវត្សរ៍ ម៉ាស៊ីនដក និងដាក់ប្រាក់ ដោយស្វ័យប្រវត្តិ (ATM/CDM)៕

March 16, 2018

សារៈសំខាន់នៃការចាយប្រាក់រៀលសម្រាប់កម្ពុជា

ប្រាក់រៀលខ្មែរត្រូវបានដាក់ឱ្យចរាចរឡើងវិញ នៅលើទីផ្សារក្នុងប្រទេសកម្ពុជា ចាប់តាំងពីថ្ងៃទី20 ខែមិនា ឆ្នាំ1980កន្លងមក បន្ទាប់ពីការអាក់ខានចរាចរអស់រយៈពេលជាច្រើនឆ្នាំ ក្រោយពីកើតមានសង្គ្រាមក្នុងប្រទេស។ បច្ចុប្បន្នយើងសង្កេតឃើញថា ការចាយប្រាក់រៀលរបស់ប្រជាជនខ្មែរនៅមិនទាន់មានភាពទូលំទូលាយគ្រប់ទីកន្លែងនោះទេ ភាពច្រើនជាប្រជាជនសាមញ្ញដែលមានជីវភាពមធ្យម និងក្រោមមធ្យមអាចចាយប្រាក់រៀលលើស50%បើធៀបនឹងប្រាក់ដុល្លារ។

តើការចាយប្រាក់រៀលមានសារៈសំខាន់ដល់ប្រទេសជាតិយើងដូចម្តេចខ្លះ?

លោកបណ្ឌិត ឃូ វុឍ្ឍី អគ្គនាយករងបច្ចេកទេស និងជាប្រធាននាយកដ្ឋានស្រាវជ្រាវសេដ្ឋកិច្ច និងសហប្រតិបត្តិការអន្តរជាតិ នៃធនាគារជាតិនៃកម្ពុជាមានប្រសាសន៍ថា ដើម្បីជំរុញឱ្យមានការប្រើប្រាស់ប្រាក់រៀលកាន់តែទូលំទូលាយ ធនាគារជាតិតែង រៀបចំកម្មវិធីទិវាប្រាករៀល ដើម្បីអបអរសាទរការដាក់ឱ្យចរាចរប្រាក់រៀលឡើងវិញរៀងរាល់ថ្ងៃទី20 ខែមីនា ជារៀងរាល់ឆ្នាំ ដែលការធ្វើឡើងនេះដើម្បីឱ្យមានការចូលរួមពីគ្រប់ភាគីពាក់ព័ន្ធ ទាំងភាគីរដ្ឋាភិបាលនិងវិស័យឯកជន ព្រមទាំងសាធារណជនអាចបានចូលរួមក្នុងកម្មវិធីខាងលើ ដើម្បីយល់ដឹងពីវឌ្ឍនភាពថ្មីៗ ដែលរាជរដ្ឋាភិបាល និងធនាគារជាតិកំពុងយកចិត្តទុកដាក់ខិតខំប្រឹងប្រែងធ្វើកន្លងមក សម្រាប់លើកកម្ពស់ប្រាក់រៀលខ្មែរ បង្កើនការយល់ដឹងទៅដល់សាធារណជនក្នុងការប្រើប្រាស់ប្រាក់រៀលឱ្យបានកាន់តែទូលំទូលាយ។

ធនាគារជាតិនៃកម្ពុជាក៏បានបង្កើតជាសៀវភៅអប់រំ និងចំណេះដឹងអំពីសារៈសំខាន់នៃការប្រើប្រាស់ប្រាក់រៀល (Booklet) ដែលមានអត្ថប្រយោជន៍ជាច្រើន ដូចជាការរក្សាស្ថិរភាពតម្លៃ កាត់បន្ថយថ្លៃដើមលើការចំណាយប្រតិបតិ្តការ ជំរុញពាណិជ្ជកម្មនិងការវិនិយោគ លើកកម្ពស់ហេដ្ឋារចនាសម្ព័ន្ធសុខមាលពសង្គម ជំរុញបរិយាប័ន្នហិរញ្ញវត្ថុ គរពូនប្រាក់បម្រុងអន្តរជាតិ ចំណូលបោះពុម្ពក្រដាសប្រាក់ បង្ការការក្លែងក្រដាសប្រាក់ជាដើម។ល។

លោកបណ្ឌិត មានប្រសាសន៍ថា ក្រសួងពាណិជ្ជកម្មក៏បានជំរុញទៅដល់ហាងលក់ទំនិញគ្រប់ប្រភេទឱ្យបិទតម្លៃទំនិញជាប្រាក់រៀល ដើម្បីឱ្យប្រជាពលរដ្ឋខ្មែរងាយស្រួលទិញទំនិញជាប្រាក់រៀល។ លើសពីនេះកាលពីឆ្នាំ2017 ធនាគារជាតិក៏បានចេញសេចក្តីប្រកាសដល់គ្រប់ធនាគារ និងគ្រឹះស្ថានមីក្រូហិរញ្ញវត្ថុឱ្យផ្តល់កម្ចីជាប្រាក់រៀលយ៉ាងហោចឱ្យបាន10%នៃប្រាក់កម្ចីសរុប ដែលសេចក្តីប្រកាសនេះត្រូវកំណត់ពេលអនុវត្តឱ្យបានត្រឹមចុងឆ្នាំ2019ខាងមុខ។ ធនាគារជាតិក៏បានលើកទឹកចិត្តក្នុងការកាត់បន្ថយថ្លៃដើមក្នុងការផ្ទេរប្រាកផ្សេងៗ “យើងបានជួយសម្រួលច្រើនមែនទែន ពេលណាឆ្លងកាត់ធនាគារជាតិ យើងជួយឱ្យការចំណាយថ្លៃដើមប្រតិបត្តិការទាបជាងប្រាក់ដុល្លារ។

មួយវិញទៀតធនាគារជាតិ ក៏បានផ្តល់ប្រតិបត្តិការផ្តល់សន្ទនីយភាពជាប្រាក់រៀល ដោយមានការធានាក្នុងការដាក់ឱ្យធនាគារពាណិជ្ជ និងគ្រឹះស្ថានមីក្រូហិរញ្ញវត្ថុដាក់ដេញថ្លៃប្រាក់រៀលជារៀងរាល់ខែ ដោយកំណត់អត្រាការប្រាក់ទាបសមស្រប ដើម្បីយកប្រាក់រៀលទៅធ្វើប្រតិបត្តិការផ្សេង។ តាមរយៈប្រតិបត្តិការនេះ ធនាគារជាតិបានលើកទឹកចិត្តឱ្យគ្រឹះស្ថានទាំងអស់អាចយកប្រាក់ដុល្លារមកតម្កល់ដើម្បីយកប្រាក់រៀលទៅប្រើប្រាស់នៅក្នុងប្រតិបត្តិការរបស់ខ្លួន។

ធនាគារជាតិនៃកម្ពុជាបានលើកទឹកចិត្តដល់អ្នកប្រើប្រាស់ទាំងឡាយ ដោយលោកបានបញ្ជាក់ដូច្នេះថា “អ៊ីចឹងកន្លងមកយើងបានបោះពុម្ពក្រដាសប្រាក់ថ្មីៗដើម្បីជំនួសក្រដាសប្រាក់ចាស់ៗ ដើម្បីបង្កើនសុវត្ថិភាព បង្កើនសោភ័ណភាព និងមានគុណភាពល្អជាងមុន” ហើយធនាគារជាតិក៏មានបើកឱ្យប្រជាពលរដ្ឋអាចយកក្រដាសប្រាក់ចាស់ៗមកដូរយកក្រដាស់ប្រាក់ថ្មីដោយឥតគិតថ្លៃនៅរៀងរាល់ម៉ោងធ្វើការផងដែរ។

ក្រៅពីការលើកទឹកចិត្តឱ្យមានការចាយប្រាក់រៀលនៅក្នុងប្រទេសឱ្យបានកាន់តែច្រើនធនាគារជាតិ ក៏បានសហការជាមួយធនាគារកណ្តាលចិននៅខេត្តគ័ងស៊ី ក្នុងការផ្លាស់ប្តូរប្រាក់រៀល និងប្រាក់យន់ចិន ហើយកំពុងសិក្សាជាមួយធនាគារកណ្តាលថៃនៅពេលខាងមុខ។ លោកថា ការធ្វើដូច្នេះ គឺជាយុទ្ឋសាស្ត្រមួយក្នុងការពង្រីកវិសាលភាពនៃចរាចរណ៍ប្រាក់រៀល របស់អ្នកនាំចេញ និងអ្នកនាំចូល និងជួយសម្រួលដល់អ្នកវិនិយោគបរទេស កុំឱ្យមានការខាតបង់ចំពោះអត្រាប្តូរប្រាក់ ដោយអ្នកវិនិយោគចិន ឬថៃ មិនចាំបាច់យកប្រាក់យន់ឬប្រាក់បាតថៃ ទៅប្តូរយកដុល្លារជាមុននោះទេ តែអាចប្តូរជាមួយប្រាក់រៀលបានតែម្តង។

ក្រោយពីការប្រកាស និងដាក់វិធានការឱ្យចរាចរប្រាក់រៀលនេះ នៅតាមបណ្តាហាងលក់ទំនិញផ្សេងៗ គេសង្កេតឃើញថា ម្ចាស់ហាងបានអនុវត្តដោយបានបិទថ្លៃទំនិញជាប្រាក់រៀលកាន់តែច្រើនឡើងៗដូចជានៅហាងលក់នំបុ័ង Tous Les Jours និងផ្សារទំនើប អ៊ីអន(AEON) ក៏ដូចជាផ្សារទំនើបឡាក់គី (Lucky Super Market) ជាដើម។ល។ មកទល់បច្ចុប្បន្នការចាយប្រាក់រៀល មានកំណើនកើនឡើងគួរឱ្យកត់សម្គាល់ ក្នុងនោះភាគច្រើនចាយដោយប្រជាពលរដ្ឋជនបទ និងពលរដ្ឋមានចំណូលមធ្យម និងសហគ្រាសខ្នាតតូច និងមធ្យមផងដែរ។

ដោយឡែកសម្រាប់អ្នកវិនិយោគធំៗដូចជា អ្នកជំនួញផ្នែកពាណិជ្ជកម្ម និងអចលនទ្រព្យជាដើមគឺពួកគាត់ភាគច្រើនចាយជាប្រាក់ដុល្លារ ប៉ុន្តែទោះយ៉ាងនោះក្តីការចាយប្រាក់រៀលក្នុងជីវភាពប្រចាំថ្ងៃនៅតែមានចំនួនច្រើនជាង 50% បើធៀបជាមួយប្រាក់ដុល្លារ ដែលកំពុងចរាចរនៅលើទីផ្សារក្នុងប្រទេសកម្ពុជានាពេលបច្ចុប្បន្ន។

លោកបណ្ឌិត មានប្រសាសន៍ថាប្រសិនបើប្រជាពលរដ្ឋយើងផ្លាស់ប្តូរទម្លាប់ពីការចាយប្រាក់ដុល្លារមកចាយប្រាក់រៀលសុទ្ធ៖ ទី1ធ្វើឱ្យយើងចំណេញលើ (Seigniorage) គឺចំណេញ លើតម្លៃនៃការបោះពុម្ព ឧទាហរណ៍តម្លៃចារិកលើក្រដាសប្រាក់ 10,000 រៀល យើងចំណាយ ថ្លៃដើមនៃការបោះពុម្ពអស់ 10 រៀល ចឹងនៅសល់ 9,990 រៀលគឺជាការចំណេញ (Seigniorage) ដូច្នេះបើយើងបោះពុម្ពប្រាក់រៀល ហើយយើងចាយប្រាក់រៀលកាន់តែច្រើនធ្វើឱ្យរដ្ឋាភិបាលយើងចំណេញកាន់តែច្រើន ដែលយើងត្រូវយកប្រាក់ចំណេញនេះទៅជួយលើការចំណាយលើវិស័យអាទិភាពនានា ដូចជាវិស័យសុខាភិបាល វិស័យអប់រំ និងហេដ្ឋារចនាសម្ព័ន្ធផ្សេង។

ទី2 គឺគោលការណ៍ជាលក្ខណៈម៉ាក្រូ មានន័យថាប្រសិនបើយើងចាយប្រាក់រៀល ធនាគារជាតិអាចពង្រឹងការអនុវត្តគោលនយោបាយរូបិយវត្ថុឧទាហរណ៍ប្រសិនបើមាន អតិផរណាប្រែប្រួលខ្លាំងធនាគារជាតិអាចបញ្ចុះបានដោយមានប្រសិទ្ធភាព ឬបើសិនជាស្ថានភាពសេដ្ឋកិច្ចយើងជាប់គាំងហើយថវិការដ្ឋាភិបាលមានកំណត់ ហើយបើយើងចាយលុយរៀល ធនាគារជាតិអាចជួយស្ថានភាពហ្នឹងបាន ដូចជាអ្វីដែលកើតឡើងនៅសហរដ្ឋអាមេរិក និងអឺរ៉ុបក្នុងអំឡុងពេល និងក្រោយពេលមានវិបត្តិហិរញ្ញវត្ថុសកល។

ទី3 បើយើងចាយប្រាក់រៀលសុទ្ធ ធនាគារជាតិអាចបញ្ចុះអត្រាការប្រាក់លើប្រាក់កម្ចីបាន ព្រោះពេលនោះធនាគារពាណិជ្ជ និងមីក្រូហិរញ្ញវត្ថុទាំងអស់នឹងផ្តល់កម្ចីជាប្រាក់រៀល ដែលធនាគារជាតិជាអ្នកបោះពុម្ពប្រាក់រៀល អ៊ីចឹងធនាគារជាតិ មានឥទ្ធិពលធ្វើឱ្យអត្រាការប្រាក់របស់ធនាគារពាណិជ្ជ និងមីក្រូហិរញ្ញវត្ថុទាំងអស់ថយចុះបាន។

ទី4 ការចាយប្រាក់រៀលគឺបង្ហាញពីអធិបតេយ្យភាពជាតិ ព្រោះបើយើងចាយប្រាក់ដុល្លារ ហើយបើប្រាក់ដុល្លារមានបញ្ហា ឫបាត់បង់តម្លៃ វានឹងធ្វើឱ្យប៉ះពាល់ដល់សេដ្ឋកិច្ច និងប្រទេសជាតិរបស់យើង ឧទាហរណ៍ បើយើងនាំចេញទំនិញជាប្រាក់ដុល្លារ ហើយប្រាក់ដុល្លារឡើងថ្លៃដូច្នេះវានឹងធ្វើឱ្យទំនិញរបស់យើងឡើងថ្លៃ ជាក់ស្តែងសេដ្ឋកិច្ចយើងល្អ តែដោយសារយើងចាយលុយគេ ធ្វើឱ្យយើងអាចរងឥទ្ធិពលពីគេទោះបីស្ថានភាពសេដ្ឋកិច្ចក្នុងស្រុកល្អប្រសើរក៏ដោយ។

ដើម្បីលើកកម្ពស់ និងជំរុញឱ្យមានការចាយប្រាក់រៀលកាន់តែច្រើនឡើង ឆ្នាំនេះធនាគារជាតិនៃកម្ពុជា ក៏នឹងរៀបចំប្រារព្ធទិវាប្រាក់រៀលចាប់ផ្តើមពីម៉ោង8ព្រឹក ដល់ម៉ោង 10 ថ្ងៃទី20 ខែមិនា ឆ្នាំ2018 នៅមជ្ឈមណ្ឌលសហប្រតិបត្តិការកម្ពុជា-កូរ៉េ(CKCC) នៃសាកលវិទ្យាល័យភូមិន្ទភ្នំពេញ ក្រោមអធិបតីភាពឯកឧត្តម ស៊ុំ សន្និសិទ្ធ ទេសាភិបាលរងធនាគារជាតិនៃកម្ពុជា។

ពិធីនេះនឹងមានការចូលរួមពីតំណាងមជ្ឈមណ្ឌលពាណិជ្ជកម្មគ្រឹះស្ថានធនាគារ និងហិរញ្ញវត្ថុ និងវិទ្យាស្ថាស្រាវជ្រាវ នៃទីភ្នាក់ងារសហប្រតិបត្តិការអន្តរជាតិជប៉ុន (JICA Research Institute) ដែលកម្មវិធីនេះនឹងបង្ហាញពីវឌ្ឍនភាពនៃការប្រើប្រាស់ប្រាក់រៀលបញ្ហាប្រឈម និងទស្សនវិស័យនាពេលអនាគត។

តំណាងស្ថាប័នសាធារណៈ និងវិស័យឯកជន ក៏នឹងអញ្ជើញចូលរួមក្នុងកម្មវិធីនេះ ហើយនឹងបើកឱ្យសាធារណជនចូលរួមដោយសេរីផងដែរ៕

March 16, 2018

វិស័យភតិសន្យារីកចម្រើនយ៉ាងឆាប់ រហ័សនៅប្រទេសកម្ពុជា

ធនាគារជាតិនៃកម្ពុជា បានបង្ហាញឱ្យឃើញនូវវឌ្ឍនភាពនៃវិស័យភតិសន្យាហិរញ្ញវត្ថុក្នុងរយៈពេលចុងក្រោយនេះ ខណៈដែលអ្នកផ្តល់សេវាភតិសន្យា បានកត់សម្គាល់ឃើញថា តម្រូវការកើនឡើងក្នុងបរិបទសេដ្ឋកិច្ចរីកចម្រើន បាននាំទៅដល់តម្រូវការសេវាភតិសន្យានេះ។

ធនាគារជាតិនៃកម្ពុជា បានកត់សម្គាល់ថា វិស័យភតិសន្យាហិរញ្ញវត្ថុជាវិស័យថ្មីមួយនៅក្នុងសេដ្ឋកិច្ចកម្ពុជា ប៉ុន្តែវិស័យនេះមានការរីកចម្រើនគួរឱ្យកត់សម្គាល់។ រដ្ឋសភាកម្ពុជា បានអនុម័តសេចក្ដីស្នើច្បាប់ស្ដីពីភតិសន្យា កាលពីថ្ងៃទី6 ខែកក្កដា ឆ្នាំ2015។ ច្បាប់ភតិសន្យានេះមាន 4ជំពូក និង11មាត្រា។

យោងតាមរបាយការណ៍ ធនាគារជាតិនៃកម្ពុជា បច្ចុប្បន្នក្រុមហ៊ុនភតិសន្យាហិរញ្ញវត្ថុមានចំនួន 11កន្លែងបានផ្តល់សេវាភតិសន្យាលើចលនទ្រព្យ រួមមាន៖ ម៉ូតូ រថយន្ត គ្រឿងយន្តប្រើប្រាស់ក្នុងវិស័យកសិកម្ម គ្រឿងចក្រសាងសង់ គ្រឿងអេឡិចត្រូនិក គ្រឿងសង្ហារិម សម្ភារប្រើប្រាស់ក្នុងគ្រួសារ និង ចលនវត្ថុផ្សេងៗទៀតដល់អតិថិជន។ របាយការណ៍ដដែលបានបង្ហាញថា វិស័យចម្បងៗ ដែលទទួលបានសេវាភតិសន្យា ហិរញ្ញវត្ថុរួមមាន កសិកម្ម25% ក្រុមគ្រួសារ40% ពាណិជ្ជកម្ម10% និងសំណង់10%។ ទ្រព្យសកម្មសរុបក្នុងវិស័យនេះបានកើនឡើង19.5% ដល់0.7ទ្រីលានរៀល (ក្នុងរយៈពេលឆ្នាំលើឆ្នាំ) និង ឥណទានភតិសន្យាហិរញ្ញវត្ថុសរុបបានកើនឡើង1.8% ដល់0.5ទ្រីលានរៀល និងមានអតិថិជនចំនួន 67,791នាក់។

ធនាគារជាតិបានបញ្ជាក់ថា៖ “តម្រូវការប្រើប្រាស់របស់អតិថិជន បានជំរុញឱ្យទីផ្សារភតិសន្យាហិរញ្ញវត្ថុទទួលបានការចាប់អារម្មណ៍ពីវិនិយោគិនទាំងក្នុង និងក្រៅប្រទេស។ ធនាគារអេស៊ីលីដាដែលបានផ្តល់សេវាភតិសន្យាដល់អតិថិជនរបស់ខ្លួន បានបង្ហាញហេតុផលមួយចំនួនដែលបណ្តាលឱ្យវិស័យនេះទទួលបានការគាំទ្រយ៉ាងឆាប់ពីអ្នកមានតម្រូវការហិរញ្ញវត្ថុ។

លោកស្រីបណ្ឌិត សូ ផនណារី អនុប្រធានប្រតិបតិ្ត និងជាប្រធានមន្ត្រីប្រតិបតិ្តការ នៅធនាគារអេស៊ីលីដា បានអះអាងថា កំណើនក្នុងវិស័យចម្បងៗនៃសេដ្ឋកិច្ចកម្ពុជាពីមួយឆ្នាំទៅមួយឆ្នាំ គួបផ្សំនឹងស្ថានភាពល្អប្រសើរនៃសេដ្ឋកិច្ចពិភពលោក និងក្នុងតំបន់ និងការបន្តអនុវត្តជំរុញកំណើនសេដ្ឋកិច្ចរបស់រាជរដ្ឋាភិបាលនៅតាមវិស័យនីមួយៗបានធ្វើឱ្យវិស័យភតិសន្យាហិរញ្ញវត្ថុមានការរីកចម្រើនឆាប់រហ័ស និងគួរឱ្យកត់សម្គាល់តាមរយៈការពង្រីកសេវាលើចលនទ្រព្យ ដូចជារថយន្ដ ម៉ូតូ គ្រឿងយន្ដប្រើប្រាស់ក្នុងវិស័យកសិកម្ម គ្រឿងចក្រសំណង់ គ្រឿងអេឡិចត្រូនិក គ្រឿងសង្ហារិម សម្ភារប្រើប្រាស់ក្នុងគ្រួសារ និងសម្ភារផ្សេងៗទៀត តាមតម្រូវការប្រើប្រាស់របស់អតិថិជន។

លោកស្រីបណ្ឌិតបានអះអាងថា ភតិសន្យាហិរញ្ញវត្ថុរបស់ធនាគារ អេស៊ីលីដា ភីអិលស៊ី ត្រូវបានផ្តល់ជូនអតិថិជនជាលក្ខណៈឯកត្តជន និងនីតិបុគ្គលដើម្បីផ្តល់ជម្រើសថ្មីដល់អ្នកប្រើប្រាស់ផ្ទាល់ខ្លួន អាជីវករ ពាណិជ្ជករ និងក្រុមហ៊ុនក្នុងប្រទេសកម្ពុជាមានលទ្ធភាពពង្រីកអាជីវកម្ម ឬប្រើប្រាស់ផ្ទាល់ខ្លួន។

លោកស្រីបណ្ឌិតបានបន្ថែមថា ភតិសន្យាហិរញ្ញវត្ថុត្រូវបានផ្តល់ជូនអតិថិជនជាប្រាក់រៀល និងប្រាក់ដុល្លារអាមេរិក និងថ្លៃដើមចលនវត្ថុជួល ផ្អែកទៅតាមតម្រូវការជាក់ស្តែងរបស់អតិថិជនដែលទំហំអតិបរមាមានរហូតដល់ 250,000ដុល្លារអាមេរិកក្នុងមួយឯកតាចលនវត្ថុ។ រយៈពេលជួលអប្បបរមា 12ខែ និងអតិបរមាមិនលើសពីអាយុកាលនៃចលនវត្ថុដែលត្រូវជួល។

លោកស្រីបណ្ឌិត សូ ផនណារី បានអះអាងថា៖ “ដោយសារកំណើនតម្រូវការប្រើប្រាស់របស់អតិថិជន បានជំរុញឱ្យវិនិយោគិនទាំងក្នុង និងក្រៅប្រទេសមានការចាប់អារម្មណ៍ និងវិនិយោគលើទីផ្សារភតិសន្យាហិរញ្ញវត្ថុនៅកម្ពុជា”៕

March 16, 2018

កម្ពុជាត្រូវការលំនៅឋានលក្ខណៈគ្រួសារជិត100 ម៉ឺនខ្នងទៀតនៅត្រឹមឆ្នាំ2030

ទោះបីការផ្គត់ផ្គង់សំណង់អគារលំនៅឋាន បានរីកដុះដាលព្រោងព្រាត នៅរយៈពេលប៉ុន្មានឆ្នាំចុងក្រោយនេះក៏ដោយ ប៉ុន្តែតម្រូវការនៃការស្នាក់នៅផ្ទះផ្ទាល់ខ្លួន នៅតែមានការកើនឡើង បន្តទៀតទៅថ្ងៃអនាគត ដែលនៅត្រឹមឆ្នាំ2030 យ៉ាងហោចណាស់ក៏ត្រូវការ 80ម៉ឺនខ្នងបន្ថែមទៀតដើម្បីផ្គត់ផ្គង់លើតម្រូវការទីផ្សារលំនៅឋាននៅកម្ពុជា។

ឯកឧត្តម ប៉ែន សុផល រដ្ឋលេខាធិការក្រសួងរៀបចំដែនដី នគរូបនីយកម្ម និងសំណង់ មានប្រសាសន៍ថា ជាមួយនឹងកំណើនសេដ្ឋកិច្ចដែលអាចរក្សាបានក្នុងរង្វង់ចន្លោះ7%ជារៀងរាល់ឆ្នាំនោះវិស័យនគរូបនីយកម្មក៏បានកើនឡើងយ៉ាងឆាប់រហ័សផងដែរ ព្រោះថា បើផ្អែកតាមការសិក្សារបស់ក្រសួងអំពីក្របខ័ណ្ឌយុទ្ធសាស្ត្រអភិវឌ្ឍន៍ទីក្រុងនៅកម្ពុជាបានរកឃើញថា ចំនួនប្រជាជនរស់នៅក្នុងរាជធានីនិងទីប្រជុំជនកាលពីឆ្នាំ 2014 មានចំនួន 4.5លាននាក់ ស្មើនឹង 27.1ភាគរយ នឹងបន្តកើនឡើងដល់ 7.92លាននាក់នៅឆ្នាំ 2030 ស្មើនឹង 44ភាគរយ នៃចំនួនប្រជាជនកម្ពុជាសរុប។

ទិន្នន័យនៃការសិក្សាស្រាវជ្រាវខាងលើ បានរកឃើញថា ក្នុងរយៈពេល 15ឆ្នាំទៀត រាប់គិតចាប់ពីឆ្នាំ 2015 ដល់ 2030 ខាងមុខនេះ តម្រូវការលំនៅឋានសម្រាប់រាជធានី និងទីប្រជុំជនមានប្រមាណ 80ម៉ឺនលំនៅឋាន បន្ថែមទៀត ដែលគិតជាមធ្យមមានតម្រូវការប្រមាណជា 5ម៉ឺនលំនៅឋាន ក្នុងមួយឆ្នាំ។

ឆ្លើយតបនឹងបញ្ហានេះក្រសួងរៀបចំដែនដីនគរូបនីយកម្ម និងសំណង់ បាននិងកំពុងជំរុញការអនុវត្តគោលនយោបាយជាតិស្តីពីការរៀបចំដែនដីក្នុងការកសាងផែនការរៀបចំដែនដីប្លង់គោល និងផែនការប្រើប្រាស់ដីគ្រប់កម្រិត និងគោលនយោបាយជាតិស្តីពីលំនៅឋាន ពិសេសលំនៅឋាន ដែលមានតម្លៃសមរម្យជូនមន្ត្រីរាជការ កងកម្លាំងប្រដាប់អាវុធ និងប្រជាពលរដ្ឋដែលមានប្រាក់ចំណូលមធ្យម ប្រាក់ចំណូលទាប និងជនងាយរងគ្រោះ ដើម្បីធានាការអភិវឌ្ឍប្រកបដោយចីរភាព និងសមធម៌ ។

គួរបញ្ជាក់ផងដែរថា កាលពីឆ្នាំ2017កន្លងទៅ ការវិនិយោគវិស័យសំណង់បានកើនឡើងជាង 22% ដែលមានតម្លៃទឹកប្រាក់ប៉ាន់ស្មានប្រមាណចំនួនជាង6,428 លានដុល្លារ លើគម្រោង 3,052 ខណៈដែលឆ្នាំ2016មានត្រឹម 5,256 លានដុល្លារអាមេរិកតែប៉ុណ្ណោះ៕

March 16, 2018

Author: វល័ក្ខ