វល័ក្ខ - La Reine Media

កត្តាអ្វីខ្លះដែលធ្វើឱ្យជនបរទេសបោះទុន វិនិយោគលើវិស័យសំណង់នៅកម្ពុជា?

បច្ចុប្បន្នគេសង្កេតឃើញថា វិស័យសំណង់នៅកម្ពុជាមានការរីកចម្រើនកាន់តែខ្លាំងឡើងៗ ដោយសារវិនិយោគិនក្នុងស្រុក និងវិនិយោគិនបរទេសដែលបានចូលមកបណ្តាក់ទុនលើវិស័យនេះកាន់តែច្រើនឡើងៗនាប៉ុន្មានឆ្នាំចុងក្រោយនេះ។

លោក ទូច សំណាង អគ្គនាយករងក្រុមហ៊ុន OCIC មានប្រសាសន៍ថា កត្តាដែលធ្វើឱ្យបរទេសចូលមកវិនិយោគទុនលើវិស័យសំណង់កាន់តែច្រើននៅកម្ពុជានារយៈពេលប៉ុន្មានឆ្នាំចុងក្រោយនេះ គឺដោយសារតែគោលនយោបាយរដ្ឋាភិបាលក្នុងការផ្តល់សិទ្ធិឱ្យជនបរទេសអាចទិញផ្ទះចាប់ពីជាន់ទី2ឡើងទៅ ហើយអ្វីដែលពិសេសជាងនេះទៀត គឺថា តម្លៃដីនៅក្នុងប្រទេសកម្ពុជាមានតម្លៃទាបជាងប្រទេសជិតខាងក្នុងតំបន់ ដូចជាប្រទេសម៉ាឡេស៊ី ថៃ និងវៀតណាមជាដើម ដែលធ្វើឱ្យវិនិយោគិនបរទេសមានឱកាសរកប្រាក់ចំណេញបានច្រើនជាង។

លោកបានមានប្រសាសន៍ថា ការចូលមកវិនិយោគលើវិស័យសំណង់នេះ ភាគច្រើនមិនប៉ះពាល់ដល់វិនិយោគិនក្នុងស្រុកនោះទេដោយបានចែកដាច់គ្នាជាពីរដែលភាគច្រើនវិនិយោគិនក្នុងស្រុកវិនិយោគទៅលើសំណង់ផ្ទះល្វែងនៅតាមបុរី ឬខុនដូលក្ខណៈជាផ្ទះដាច់ពីគ្នា(Single house)ដើម្បីលក់ជូនអតិថិជនជាប្រជាពលរដ្ឋខ្មែរនៅក្នុងស្រុកប៉ុណ្ណោះ។ ចំណែកវិនិយោគិនបរទេសភាគច្រើនវិនិយោគលើសំណង់អគារខុនដូខ្ពស់ៗមានកម្ពស់ច្រើនជាន់ ដោយភាគច្រើនសំដៅដល់អតិថិជននៅក្រៅស្រុកទិញទុកលក់បន្តដើម្បីស្វែងរកប្រាក់ចំណេញនៅពេលក្រោយ។

ទោះយ៉ាងណា លោកបានថ្លែងប្រាប់ពីក្តីបារម្ភថា ទៅថ្ងៃអនាគតបើសិនជាសំណង់អគារខ្ពស់ៗរបស់បរទេសដែលបានដាក់ទិញ-លក់ដើម្បីរកប្រាក់ចំណេញបន្តគ្នានោះ អាចនឹងជួបវិបត្តិ(មានតែបន្ទប់អគារតែមិនមានមនុស្សស្នាក់នៅ) យកល្អគួរវិនិយោគទៅជាផ្សារទំនើប លក់ដូរទំនិញផ្សេងៗវិញប្រសើរជាង។ សម្រាប់ការសង់អគារខ្ពស់ៗនេះក៏អាចប៉ះពាល់ដល់ហេដ្ឋារចនាសម្ព័ន្ធនាំឱ្យមានការលំបាកក្នុងការធ្វើដំណើរផងដែរ “ជាធម្មតាមិនថាតែនៅប្រទេសកម្ពុជាទេ នៅប្រទេសណាក៏ដូចប្រទេសណាដែរ នៅពេលដែលមានអគារខ្ពស់ៗរីកលូតលាស់ច្រើនដូច្នេះ វាតែងប៉ះពាល់ដល់ការធ្វើចរាចរនៅលើដងផ្លូវដោយនឹងជួបការកកស្ទះជាអន្លើៗដោយចៀសមិនផុតនោះទេ ប៉ុន្តែយ៉ាងណារដ្ឋាភិបាលបានដោះស្រាយជាបន្តបន្ទាប់ផងដែរ តាមរយៈការសាងសង់ស្ពានអាកាសនានា និងការធ្វើផ្លូវក្រវាត់ក្រុង ការពង្រឹងផ្លូវមួយចំនួនទៀតក្នុងភូមិសាស្ត្ររាជធានីភ្នំពេញ ជាដើម។

ជាមួយគ្នានេះ ឯកឧត្តមបណ្ឌិត ឡៅ ទិព្វសីហា ប្រធាននាយកដ្ឋានសំណង់នៃក្រសួងរៀបចំដែនដី នគរូបនីយកម្ម និងសំណង់មានប្រសាសន៍ថា ការចូលមកវិនិយោគនៅកម្ពុជារបស់ជនបរទេសលើវិស័យសំណង់នេះ ដោយសារកម្ពុជាមានប្រព័ន្ធច្បាប់រឹងមាំ មានស្ថេរភាពនយោបាយ និងកំណើនសេដ្ឋកិច្ចថេរ 7%ជារៀងរាល់ឆ្នាំក្នុងរយៈពេល 2ទសវត្សរ៍ចុងក្រោយនេះ។ វិស័យសំណង់ភាគច្រើនដែលបរទេសចូលមកបណ្តាក់ទុន គឺការសាងសង់សំណង់អគារខ្ពស់ៗ ខុនដូ ផ្សារទំនើប អគារពាណិជ្ជកម្ម សំណង់សណ្ឋាគារ និងរោងចក្រជាដើម ហើយក្នុងចំណោមជនបរទេសទាំងនោះ វិនិយោគិនចិនមានចំនួនច្រើនជាងគេដែលអាចផ្លាស់ប្តូរមុខមាត់ទីក្រុងភ្នំពេញឱ្យកាន់តែមានភាពទាក់ទាញឡើង។

ឯកឧត្តមបានលើកឡើងថា គិតចាប់តាំងពីឆ្នាំ 2000 ដល់ឆ្នាំ2017កន្លងទៅ វិនិយោគិនបរទេសបានចូលមកបណ្តាក់ទុន នាំមុខគេលើវិស័យសំណង់នៅកម្ពុជា គឺជាជាតិចិនដែលបោះទុនវិនិយោគសរុបមានចំនួន 2,086លានដុល្លារ លើ 128គម្រោងដែលមានផ្ទៃក្រឡាសាងសង់សរុបចំនួនជាង 7លានម៉ែត្រការ៉េ។ ចំណែកវិនិយោគិននាំមុខទី2 គឺកូរ៉េដែលបានបោះទុនវិនិយោគសរុបចំនួន 1,640លានដុល្លារ លើ 49គម្រោង ដែលមានផ្ទៃក្រឡាសាងសង់សរុបចំនួន 3លាន7សែនម៉ែត្រការ៉េ។

ទី3 គឺវិនិយោគិនជនជាតិជប៉ុន មាន 38គម្រោង លើផ្ទៃដីសាងសង់ជាង7 សែនម៉ែត្រការ៉េ ទុនវិនិយោគសរុបចំនួន 246លានដុល្លារ។ ទី4 គឺវិនិយោគិនថៃបោះទុន169លានដុល្លារ សាងសង់សំណង់ចំនួន 28គម្រោង នៅលើផ្ទៃដីសរុបជាង 4សែនម៉ែត្រការ៉េ។ និងទី5 គឺវិនិយោគិនសិង្ហបុរីបោះទុនសរុបចំនួន 158លានដុល្លារ សាងសង់សំណង់ចំនួន 10គម្រោង នៅលើផ្ទៃដីសរុបចំនួន 4សែនម៉ែត្រការ៉េ។

ឯកឧត្តមបានមានប្រសាសន៍ទៀតថា វិស័យសំណង់គឺជាសសរស្តម្ភសេដ្ឋកិច្ចដ៏មានសក្តានុពលមួយក្នុងចំណោមវិស័យ 3ផ្សេងទៀត មានដូចជាវិស័យឧស្សាហកម្មកាត់ដេរ វិស័យកសិកម្ម និងវិស័យទេសចរណ៍៕

March 21, 2018

ស្ងាត់ៗ Huawei បង្ហាញស្មាតហ្វូនស៊េរីថ្មីពីរម៉ូដែលត្រកូល Y ឆ្នាំ 2018

ភ្នំពេញ៖ បន្ទាប់ពីភាពជោគជ័យរបស់ស្មាតហ្វូនអេក្រង់លាត កាមេរ៉ា 4 គ្រាប់ Huawei Nova 2i ក្រុមហ៊ុនHuawei បានបង្ហាញសាកល្បងនូវវត្តមាន ស្មាតហ្វូនស៊េរីថ្មីត្រកូល Y ឆ្នាំ 2018 ក្នុងចំណោមតារាល្បីៗ និង អ្នកសារព័ត៌មាន កាលពីចុងសប្តាហ៏មុន។ កម្មវិធី “ការសាកល្បងប្រើប្រាស់លើកដំបូងស្មាតហ្វូនស៊េរីថ្មី Huawei Y9 2018 និង Huawei Y7 Pro 2018” ប្រព្រឹត្តិទៅនៅឯទីស្នាក់ការក្រុមហ៊ុន Huawei ផ្ទាល់ ដែលមានភ្ញៀវកិត្តិយស តារាល្បីៗ និងមិត្តអ្នកសារព័ត៌មាន សរុបជាង 40នាក់។

ថ្លែងក្នុងកម្មវិធីពិសេសនេះ លោក អែម យុទ្ធូ ប្រធានផ្នែកទីផ្សារជាន់ខ្ពស់ ប្រចាំ Huawei កម្ពុជាបានឲ្យដឹងថា ស្មាតហ្វូនជំនាន់ថ្មី ដែល ក្រុមហ៊ុន Huawei បានបង្ហាញនោះមានពីរម៉ូដែលគឺ Huawei Y7 Pro 2018 បំពាក់កាមេរ៉ា 3គ្រាប់ និង Huawei Y9 2018 បំពាក់កាមេរ៉ា 4គ្រាប់ ជាមួយនឹងសមត្ថភាពដ៏អស្ចារ្យ លើសពីតម្លៃ នឹកស្មានមិនដល់។ ដៃម្ខាងកំពុងតេស្តY7 Pro 2018 និងដៃម្ខាងទៀត លើក Y9 2018 ថតរូប Selfie លោក Vid Cooler និង វណ្ណ ផល្លី តារាចម្រៀងផលិតកម្មហង្សមាស បានសរសើរមិនដាច់ពីមាត់ថា “ស្មាតហ្វូន Huawei Y9 2018 និង Huawei Y7 Pro 2018 ពិតជាស្រស់ស្អាត ឡួយ អេក្រង់ធំទូលាយ ហើយកាមេរ៉ាថតរូបច្បាស់កប់។

ចំណែកឯ អ្នកសារព័ត៌មានស្រី វ៉ាយ វត្តី វិញលាន់មាត់ថា “ស្មាតហ្វូនស៊េរីថ្មី Y Series នេះ ត្រូវចិត្តបងស្តូក ចាំមើលឲ្យតែចេញលក់ភ្លាម នឹងជាវភ្លេត! ស្រឡាញ់ណាស់។

ស្មាតហ្វូន Huawei Y9 2018 គឺជាកំពូលស្មាតហ្វូនដែលផលិតតាមស្ដង់ដា និងស្របតាមតម្រូវការអ្នកប្រើប្រាស់ ជាពិសេសគុណភាពនៃការផលិត តួរខ្លួនស្រោបដោយលោហៈ អេក្រង់លាតដែលមានទំហំ 5.93” កម្រិត Aspect Ratio 18:9 និងកម្រិតបង្ហាញ Full HD + FullView Display បំពាក់កាមេរ៉ាភ្លោះ ខាងមុខទំហំ 16MP+2MP និងខាងក្រោយទំហំ 13MP+2MP មានកម្លាំងថ្មធំ 4000mAh ប្រើបន្ទះឈីប Kirin 659 ប្រព័ន្ធ Android 8.0 (Oreo) ចេញពីប្រអប់ស្រាប់ ជាមួយនឹង RAM 3 GB និង ROM 32GB និងបន្ថែមមកនូវសេនស័រ ស្កេនម្រាមដៃលឿន ព្រមទាំងមុខងារដោះសោរ ដោយប្រើទម្រង់មុខផងដែរ។ កាន់តែអែម Huawei Y9 2018 មានជើងទម្ររដាក់ស៊ីមបានពីរ និង Micro SD card 1 (256G) និង ច្ចេកវិទ្យា Screenshot ដោយប្រើម្រាមដៃបីអូសចុះក្រោម (Three Finger Screen Shoot) ថែមទៀតផង។

ចំណែកឯ Y7 Pro 2018 ក៏ឡូយដែរ វាមានរូបរាងស្រស់ស្អា បំពាក់អេក្រង់លាតទំហំ 5.99” ដែលមានកម្រិតបង្ហាញ HD+ FullView Display ប្រើន្ទះឈីប Snapdragon 450 មាន RAM 3GB និង ROM 32GB ថ្មទំហំ 3,000mAh ដំណើរការដោយ Android Oreo។ ម្យ៉ាងវិញទៀត ក៏មានកាមេរ៉ាភ្លោះ នៅខាងក្រោយផងដែរ មានទំហំ 13MP+2MP រីឯកាមេរ៉ាមុខទំហំ 8MP ជាមួយនឹង Selfie Tonning Flash, AR lens រួមទាំងកម្មវិធី Multiple Photo Taking Mode។ ក្រៅពីនេះ Y7 Pro 2018 បំពាក់មុខងារដោះសោរ ដោយប្រើទម្រង់មុខ រហ័សទាន់ចិត្ត។ កាន់តែអែម Huawei Y9 2018 មានជើងទម្ររដាក់ស៊ីមបានពីរ និង Micro SD card 1 (256G) និង ច្ចេកវិទ្យា Screenshot ដោយប្រើម្រាមដៃបីអូសចុះក្រោម (Three Finger Screen Shoot) ថែមទៀតផង។

Huawei Y7 pro 2018 និង Huawei Y9 2018 នឹងមានវត្តមាននៅលើទីផ្សារកម្ពុជាក្នុងពេលឆាប់ៗនេះ ជាមួយនឹង តម្លៃដ៏ភ្ញាក់ផ្ទើល និងកាដូថែមជាទីគាប់ចិត្ត។ ព័ត៌មានប្រូម៉ូសិនថ្មី៖ ទិញ Huawei nova 2i ភ្លាមឈ្នះរង្វាន់ធំ ឡេបថប់ Huawei Matebook X អតិថិជនដែលបានជាវស្មាតហ្វូន Huawei Nova 2i ចាប់ពីថ្ងៃផ្សាយដំណឹងតាម ផេកផ្លូវការ Huawei Mobile (KH) អាចចូលរួមផ្សងសំណាង កម្មវិធីចាប់ឆ្នោតរបស់ក្រុមហ៊ុន Huawei “WOW WOW! Buy & Win ឈ្នះអស់ស្ទះ WOW WOW! ទិញ ឈ្នះ” បានដោយគ្រាន់តែអនុវត្តន៏តាម លក្ខខណ្ឌ និងការណែនាំខាងដូចខាងក្រោមនេះ៖

1- Screen Shot IMEI ឬថតរូប Warranty Card ដែលមានបិត IMEI នៃទូរស័ព្ទ Huawei Nova2i របស់លោកអ្នកដែលទើបបានទិញ ហើយធ្វើការ Comment ជារូបភាពខាងក្រោមនេះ រឺ ផ្ញើសារជារូបភាព តាម Inbox របស់ Huawei Mobile (KH)

2- ការចាប់រង្វាន់នេះ ដោយផ្សាយផ្ទាល់(Live) តាម Huawei Mobile (KH) ធ្វើឡើងរៀងរាល់ 1 សប្តាហ៍ម្តង វេលាចន្លោះម៉ោង 4:30 ទៅ 5:30 ល្ងាច!

3- ការចូលរួមផ្សងសំណាងឈ្នះរង្វាន់នេះ បានតែអតិថិជនដែលបានទិញស្មាតហ្វូន Huawei Nova 2i ចាប់ពីថ្ងៃប្រកាសនេះតែប៉ុណ្ណោះ

4- ក្រុមហ៊ុនរក្សាសិទ្ធិក្នុងការពិនិត្យលេខ IMEIs ថាជាផលិតផលផ្លូវការ រឺមិនផ្លូវការ រឺអនុវត្តសមស្របតាម រឺមិនស្របតាមលក្ខខណ្ឌ !!

5- កម្មវិធីនេះ ចាប់ផ្តើមពីថ្ងៃនេះ ដោយចាប់ឆ្នោត 4 ដង ក្នុង 1 សប្តាហ៍ម្តង រហូតដល់ចុងខែមេសា ! ប្រញ៉ាប់ឡើងរង្វាន់មានកំណត់ !!

កាលវិភាគការចាប់ឆ្នោតផ្សងសំណាង ដែលផ្សាយផ្ទាល់ Live តាម Huawei Mobile (KH) មានដូចខាងក្រោម:

(1) ការចាប់រង្វាន់ លើកទី 1 ថ្ងៃ 27 មីនា 2018 នៅក្រុមហ៊ុន Huawei ដោយផ្ទាល់

(2) ការចាប់រង្វាន់ លើកទី 2 ថ្ងៃ 03 មេសា 2018 នៅ Huawei Showroom ផ្សារទំនើបសូរិយាជាន់ទី 3

(3) ការចាប់រង្វាន់លើកទី 3 ថ្ងៃ 10 មេសា 2018 នៅ Huawei Showroom ផ្សារទំនើបសុវណ្ណាជាន់ទី 4

(4) ការចាប់ឆ្នោត លើកទី 4 ថ្ងៃ 24 មេសា 2018 នៅ ក្រុមហ៊ុន Huawei ដោយផ្ទាល់

** IMEI ដែលមានសិទ្ធិចូលរួមក្នុងការចាប់ឆ្នោតផ្សងសំណាង គឺបានតែ IMEI ពីផលិតផលនាំចលូផ្លូវការដែលមានត្រាក្រុមហ៊ុនលើប្រអប់ និងមានបណ្ណ័ធានាត្រឹមត្រូវ ប៉ុណ្ណោះ

** រយៈពេលផុតកំណត់ទទួល IMEIs គឺ 1 ថ្ងៃ មុនថ្ងៃចាប់ឆ្នោត នៃសប្តាហ៍នីមួយៗ

** អតិថិជនមានសិទ្ធិឈ្នះរង្វាន់ច្រើនដង ផ្ញើ IMEI កាន់តែច្រើន មានឱកាសឈ្នះរង្វាន់កាន់តែច្រើន

** IMEI ដែលផ្ញើមកហើយមិនទាន់ឈ្នះរង្វាន់ក្នុងការចាប់ឆ្នោតលើកទី 1 ក៍មានឱកាសឈ្នះរង្វាន់ក្នុងការចាប់ឆ្នោតផ្សងសំណាងសប្តាហ៍ក្រោយៗទៀត។

March 21, 2018

បណ្ឌិត តាន់ មុនីវណ្ណ៖ ជោគជ័យរបស់មនុស្សមិនមែនបានមកដោយភាពចៃដន្យ

មនុស្សម្នាក់ៗតែងតែមានក្តីប្រាថ្នាចង់ក្លាយទៅជាអ្នកមានដូចៗគ្នា ទោះជាកើតក្នុងត្រកូលវណ្ណៈណាក៏ដោយ តែងប្រាថ្នាចង់មានធនធានទ្រព្យសម្បត្តិស្តុកស្តម្ភ ប៉ុន្តែធនធានទាំងនោះមិនមែនកើតឡើងដោយភាពចៃដន្យនោះទេ ឧទារហណ៍ដូចជាលោកបណ្ឌិត តាន់ មុនីវណ្ណ ជាក្មេងឆ្លងកាត់សង្គ្រាម និងគ្រួសារគ្មានបន្សល់អ្វីទុកឱ្យក្រៅពីបាតដៃទាំងពីរនោះទេ ប៉ុន្តែដោយភាពតស៊ូ និងចេះឆក់ឱកាស លោកបានក្លាយជាអគ្គនាយកក្រុមហ៊ុនជាច្រើន។

ក្រឡេកមើលបច្ចុប្បន្នកាល លោក តាន់ មុនីវណ្ណ ត្រូវបានគេស្គាល់គ្រប់ៗគ្នាថាជាអគ្គនាយករងក្រុមហ៊ុន ម៉ុង ឬទ្ធី គ្រុប និងជាអនុប្រធានសភាពាណិជ្ជកម្មកម្ពុជាដ៏លេចធ្លោម្នាក់។ នេះគ្រាន់តែជាការងារមួយចំណែកនៃជីវិតរបស់លោកតែប៉ុណ្ណោះ បើនិយាយពី ក្រុមហ៊ុន ម៉ុង ឬទ្ធី គ្រុបតែមួយគឺមានក្រុមហ៊ុនបុត្រសម្ព័ន្ធជាង 10ទៅហើយ ក្នុងនោះមានដូចជាក្រុមហ៊ុនចម្ការដូងប្រេង ក្រុមហ៊ុនចម្ការកៅស៊ូ ក្រុមហ៊ុនចិញ្ចឹមជ្រូក ចិញ្ចឹមសត្វ ក្រុមហ៊ុនកំពង់ផែឯកជន ក្រុមហ៊ុនសំណង់ក្មេងវត្ត ក្រុមហ៊ុននាំចូលសម្ភារគ្រឿងចក្រជាដើម។

ក្រៅពីក្រុមហ៊ុនដែលទទួលគ្រប់គ្រងជួយឪពុកក្មេក (លោក ឧកញ៉ា ម៉ុង ឬទ្ធី) លោកបណ្ឌិត តាន់ មុនីវណ្ណ ក៏មានក្រុមហ៊ុនផ្ទាល់ខ្លួនជិត 10ផ្សេងទៀតដែរ មានដូចជាក្រុមហ៊ុនប្រឹក្សាយោបល់ធុរកិច្ច ក្រុមហ៊ុនមេធាវីប្រឹក្សាផ្នែកច្បាប់ ក្រុមហ៊ុននាំចេញ-នាំចូល ក្រុមហ៊ុនរើសពលករទៅធ្វើការក្រៅប្រទេស ក្រុមហ៊ុនជ្រើសរើសបុគ្គលិក ក្រុមហ៊ុនបកប្រែភាសាជាដើម ដែលភាគច្រើនមានដៃគូជាមួយអ្នកជំនួញបរទេសច្រើនជាងដៃគូក្នុងស្រុក។ ថ្មីៗនេះលោកបានសហការជាមួយអ្នកជំនួញបរទេសម្នាក់ បង្កើតផ្សារ One dollar ចែកចាយសម្ភារប្រើប្រាស់ អាហារ និងភេសជ្ជៈនៅលើទីផ្សារកម្ពុជាទៀតផង។

លោកបណ្ឌិត តាន់ មុនីវណ្ណ ចូលរួមក្នុងកម្មវិធីពិគ្រោះយោបល់អំពី ការកសាងទំនាក់ទំនងសេដ្ធកិច្ចអាស៊ានឥណ្ឌានៅប្រទេសឥណ្ឌា។

ចំណែកការងារជាអនុប្រធានសភាពាណិជ្ជកម្មកម្ពុជាវិញ លោកត្រូវបានតែងតាំងជាសមាជិកក្រុមប្រឹក្សាពាណិជ្ជកម្មកម្ពុជា-ថៃ(Thai Cambodia Business council) សមាជិកក្រុមប្រឹក្សាពាណិជ្ជកម្មចិន-អាស៊ាន (China Asean Business council) សមាជិកក្រុមប្រឹក្សាភិបាលសមាគមពាណិជ្ជកម្មអាស៊ីអាគ្នេយ៍ (Association of South East Asia Business Council) និងជាសមាជិកក្រុមប្រឹក្សាពាណិជ្ជកម្មអាស៊ានឥណ្ឌា (Asean-Indian Business Council) ផងដែរ។ ក្នុងទស្សនវិស័យវែងឆ្ងាយក្រោមគំនិតផ្តួចផ្តើមរបស់ឯកឧត្តម ហ៊ុន ម៉ាណែត និងក្នុងនាមជាសភាពាណិជ្ជកម្មកម្ពុជា លោកត្រូវបានចាត់តាំងឱ្យទទួលបន្ទុកផ្នែកច្បាប់ ដើម្បីបង្កើតការិយាល័យសភាពាណិជ្ជកម្មក្រៅប្រទេស ក្នុងគោលដៅទំនាក់ទំនងពាណិជ្ជកម្មក្រៅប្រទេសឱ្យបានកាន់តែច្រើនថែមទៀត។

ការិយាល័យនេះនឹងបង្កើតក្នុងប្រទេស ឬរដ្ឋទាំងឡាយណា ដែលមានប្រជាពលរដ្ឋខ្មែររស់នៅច្រើន ដោយបច្ចុប្បន្នលោកបានសរសេរច្បាប់ និងអនុក្រឹត្យ រួចរាល់ហើយ នៅរង់ចាំតែពេលវេលាបង្កើតការិយាល័យតំណាងសភាពាណិជ្ជកម្មក្រៅ ប្រទេសមកដល់តែប៉ុណ្ណោះ។

លោកបណ្ឌិត តាន់ មុនីវណ្ណ ថតរូបជាមួយភរិយា
ក្នុងកម្មវិធីបុណ្យនៃក្តីស្រឡាញ់ឆ្នាំ2018

បន្ថែមពីលើនេះទៀតលោកក៏ជាសមាជិកសមាគមអ្នកសាងសង់អាស៊ាន ជាទីប្រឹក្សាជាន់ខ្ពស់ (Senior Adviser) នៃសមាគមអភិវឌ្ឍន៍លំនៅដ្ឋាន ជាអគ្គលេខាធិការសមាគមអ្នកសាងសង់កម្ពុជា ជាទីប្រឹក្សាភិបាលសមាគមស្ត្រីកម្ពុជា និងជាក្រុមប្រឹក្សាបណ្តុះបណ្តាលថ្នាក់ជាតិ (National Training Board) របស់ទីស្តីការគណៈរដ្ឋមន្ត្រីផងដែរ។

ប្រវត្តិពីកុមារភាព និងផលលំបាកក្នុងសម័យសង្គ្រាមទោះបីបច្ចុប្បន្ន លោកមានភាពជោគជ័យក្នុងជីវិតដូច្នេះក៏ដោយ បើក្រឡេកមើលអតីតកាល លោកគឺជាកុមារកំព្រាម្នាក់ ដែលម្តាយស្លាប់ចោលក្នុងសម័យប៉ុលពត មានជីវិតលំបាកស្ទើរបរិយាយមិនកើត ចុះហេតុអ្វីបានជាលោកមានជីវិតជោគជ័យដូច្នេះ?កុមារា តាន់ មុនីវណ្ណ ចាប់កំណើតនៅក្នុងក្រុងភ្នំពេញ អំឡុងឆ្នាំ1973 ដោយមានឪពុកជាខ្មែរកាត់ចិន និងមានម្តាយជាបារាំងកាត់វៀតណាម ប៉ុន្តែក្រោយពីចាប់កំណើតមិនបានប៉ុន្មានឆ្នាំផង វិនាសកម្មបានចូលមកដល់ ទីក្រុងភ្នំពេញត្រូវបានពួកខ្មែរក្រហមចូលកាន់កាប់ លោកត្រូវបានពួកវាជម្លៀសទៅរស់នៅ ភូមិផ្ទះវាល ឃុំព្រៃដំបូក ស្រុកស្រីសន្ធរ ខេត្តកំពង់ចាម។

ដោយសារគោលនយោបាយសម្លាប់អ្នកចេះដឹង ក្រុមកម្មាភិបាលខ្មែរក្រហម បានប្រកាសរកអ្នកចេះដឹង ម្តាយលោកក៏ចូលធ្វើការជាអ្នកបកប្រែ បានប្រហែល3ទៅ4ខែ ម្តាយលោកត្រូវគេយកទៅសម្លាប់ចោល។ ជីវិតជាកូនកំព្រារស់នៅជួបការលំបាកស្ទើរធ្លាក់ដល់ចំណុចសូន្យ ចាប់ពីពេលនោះមកគ្រួសារមិនដែលស្គាល់ឡើយ ថាបានបាយឆ្អែតមួយពេល គឺហូបតែបបរ និងបាយលាយក្តួចឬបាយលាយពោតប៉ុណ្ណោះ។

និយាយទាំងក្តុកក្តួលអួលដើមក លោក មុនីវណ្ណ បានរំឭកថាទោះជាកាលណោះលោកនៅតូចក៏ដោយតែនៅចាំបានខ្លះៗថា កាលគ្រាមួយនោះគ្រួសារគ្មានអ្វីហូបក៏ប្រមែប្រមូលអង្ករបានកន្លះកំប៉ុង ដាំបាយឱ្យយាយទួតហូប ដើម្បីឱ្យគាត់បានឆ្អែតដោយគិតថាគាត់ចាស់ហើយ ហើយនៅពេលយាយហូបបាយជ្រុះមួយគ្រាប់ លោកក៏រើសមកហូបវិញស្គាល់បាយជាតិព្រះមេ គឺមានរសជាតិផ្អែមឆ្ងាញ់ពេញក្នុងមាត់។

ជីវវិតជួបការលំបាក លំបាកស្ទើររៀបរាប់មិនចេញមិនដូចសម័យនេះទេ យុវជនសម័យនេះលំបាកត្រឹមគ្មានម៉ូតូជិះទៅរៀន ពិបាករកការងារធ្វើ ពិបាករកការងារដែលមានប្រាក់ខែច្រើន ពិបាកគ្មានលុយទិញឡានថ្លៃៗ ឬពិបាកមិនបានប្រើទូរស័ព្ទទំនើប ប៉ុន្តែសម្រាប់រូបលោកគឺខុសគ្នា និយាយសឹងតែស្រក់ទឹកភ្នែក ពិបាកក្នុងសង្គ្រាម ពិបាករកអ្វីមកប្រដូចមិនបាន គឺពិបាកគ្មានអីហូបតែម្តង បើយករឿងនេះមកថតកុនជាសាច់រឿងវិញអ្នកណាមើលក៏យំដែរ។

ជីវិតតស៊ូក្រោយសម័យប៉ុល ពត និងការសិក្សាកាលខ្ញុំនៅតូចអាយុប្រហែល10ឆ្នាំខ្ញុំរើសសម្បកដបលក់មួយថ្ងៃរកបានពី 3ទៅ5រៀល បន្ទាប់មកឪពុករត់កាណូតដខ្ញុំក៏ទិញស្ករគ្រាប់ពីផ្សារចាស់ទៅលក់នៅឯស្រុក បានចំណេញច្រើនមួយស្បោង3រៀល (ប្រហែល3ដុល្លារបច្ចុប្បន្ន) ហើយទិញ10ស្បោងយកទៅលក់ មួយថ្ងៃលក់អស់ប្រហែល30% បានលុយវិញ90រៀល គិតទៅស្ករគ្រាប់ចំណេញច្រើនណាស់គុណនឹង10ឯណោះ។ ខ្ញុំចាំថាអ្នកស្រុកខ្ញុំស្គាល់ខ្ញុំច្បាស់ណាស់ ខ្ញុំឈ្មោះ ខួច ដោយសារថ្ពាល់ខួច កាលណោះខ្ញុំដើររើសដើមឆៃថាវដែលគេបោះចោលយកទៅជ្រក់ ដើរលក់បានលុយមួយចំណែកទៀត ហើយធ្វើការរែកទឹកមួយថ្ងៃ40អម្រែកក៏មាន។

ពេលរៀនចប់ថ្នាក់ទី3 មកដល់ភ្នំពេញខ្ញុំក៏លំបាកដែរ តែគ្រាន់តែថាខ្ញុំមានគំនិតជាអ្នករកស៊ីតាំងពីក្មេង ខ្ញុំឆ្ងល់ខ្លួនឯងដែរ កាលណោះខ្ញុំគ្មានចំណេះដឹងខ្ពង់ខ្ពស់អ្វីទេ តែចេះរកស៊ីតាំងពីតូច។ ពេលមកដល់ភ្នំពេញដំបូងឡើយខ្ញុំមកនៅជាមួយម្តាយមីងនៅអូរឬស្សីជួយលក់ស្បែកជើង ដើរលក់ឆ្នោតផង លក់កាសែតផង គ្មានលុយកាក់ទេគ្រាន់តែខោរហែកគូទ យកទៅឱ្យជាងដេរសាប់ៗរហូតជាងលែងសាប់ឱ្យដោយសាររហែកច្រើនពេក ពេលខ្លះខ្ញុំអង្គុយស្រក់ទឹកភ្នែកម្នាក់ឯងអាណិតខ្លួន ព្រោះគ្រាន់តែខោស្លៀកទៅរៀនក៏គ្មាន។

ដល់ពេលខ្ញុំអាយុជិត20ឆ្នាំខ្ញុំធ្វើជាអ្នកកួកជេម៉ូតូ ឡាន កួកជេដី ធ្វើត្បូងជាដើម រហូតដល់អាយុ20ជាង ខ្ញុំសល់លុយជាង10ម៉ឺនដុល្លារស្មើនឹងជាង10លានដុល្លារធៀបសម័យបច្ចុប្បន្ន។ ដូច្នេះមុនខ្ញុំការជាមួយកូនលោកឧកញ៉ាខ្ញុំសល់លុយរាប់សែនដុល្លាររួចទៅហើយ មានលុយទិញឡាន ទិញផ្ទះ ទាំងនេះមិនមែនជាការចៃដន្យទេតែជាការប្រឹងប្រែងរបស់ខ្ញុំ។

គួររំឭកថា ពេលមកដល់ភ្នំពេញ លោកចូលរៀននៅសាលាចតុមុខ បន្តមកសាលាស៊ីសុវត្ថិ ហើយបានចូលបន្តនៅសាកលវិទ្យាល័យនីតិសាស្ត្រនិងវិទ្យាសាស្ត្រសេដ្ឋកិច្ច បន្ទាប់មកចូលទៅថ្នាក់ MBM, MBA, ថ្នាក់MASTER ចូលដល់ PHD ច្បាប់ និងបន្ត DBA ចុងក្រោយចូលទៅ DPA ហើយបន្ទាប់មក ចូលធ្វើការងារមកទល់សព្វថ្ងៃនេះ ដែលសព្វថ្ងៃលោកក៏ជាមេធាវី សមាជិកនៃគណៈមេធាវីកម្ពុជា និងបង្កើតក្រុមហ៊ុនមេធាវីអន្តរជាតិផងដែរ។ ក្រោយពីរៀបការរួចលោកក៏ប្តូរអាជីពពីអ្នកច្បាប់មកជាអ្នកជំនួញវិញ យ៉ាងណាលោកសប្បាយចិត្តក្នុងការចូលរូមពិភាក្សាផ្នែកច្បាប់ផ្សេងៗ និងចូលរួមធ្វើជាសហប្រធានក្រុមការងារផ្សេងៗក្នុងនាមតំណាងឱ្យសមាគមនានា។

ទោះជាលោករៀបការរួចហើយក៏ដោយ ក៏លោកនៅតែទៅរៀនបន្ត និងមិនសូវបានជុំគ្រួសារទេទោះសៅរ៍-អាទិត្យក្តីតែលោកបានបំពេញភារកិច្ចជាស្វាមី ជាឪពុកដ៏ល្អឱ្យគ្រួសាររស់នៅបានសុខដុមរមនា។ ចំណុចនេះលោកក៏បានអរគុណទៅដល់ឧត្តមភរិយា ដែលបានអនុញ្ញាតផ្តល់ពេលវេលាឱ្យលោកបានធ្វើការ បានរៀនសូត្រ បានជួយដល់សង្គមមកទល់សព្វថ្ងៃ។

ការចូលរួមជួយលើកកម្ពស់ការងារសង្គមទោះជាមានការងារច្រើនរាប់មិនអស់ក៏ដោយ ក៏លោកតែងតែបានចូលរួមក្នុងសកម្មភាពសង្គមជារឿយៗ ដូចជាចូលរួមធ្វើជាវាគ្មិនក្នុងកម្មវិធីជាច្រើន ដែលលោកតែងផ្តល់អនុសាសន៍ ក្នុងការជំរុញអភិវឌ្ឍន៍សមត្ថភាព ជួយដល់សហគ្រិនក្នុងស្រុកឱ្យមានសមត្ថភាពកាន់តែខ្លាំងឡើង ឱ្យពួកគេយល់ច្បាស់ពីរបៀបធ្វើពាណិជ្ជកម្ម ឬស្វែងរកគ្រូពូកែៗមកជួយពួកគេសម្រាប់បណ្តុះបណ្តាលបន្ថែមលើកិច្ចការជំនួញ។

ក្រៅពីនេះ លោកក៏តែងតែបានផ្តល់អនុសាសន៍ល្អៗដល់យុវជនជានិស្សិតជំនាន់ក្រោយ ឱ្យចេះតស៊ូក្នុងការរៀនសូត្រ ចេះបង្កើតឱកាសការងារ បណ្តុះគំនិតលើកិច្ចការជំនួញដើម្បីជោគជ័យទៅថ្ងៃអនាគត។

តាមរយៈវោហោរស័ព្ទដ៏ទាក់ទាញនៅក្នុងវេទិកាសាធារណៈនានា បានធ្វើឱ្យកេរ្តិ៍ឈ្មោះលោកកាន់តែល្បីសុសសាយឡើង “ខ្ញុំឡើងធ្វើជាវាគ្មិនម្តងៗខ្ញុំសប្បាយចិត្តណាស់ ព្រោះខ្ញុំបានចែករំលែកចំណេះដឹងបន្តតទៅទៀត។ ដូច្នេះយុវជន ឬនិស្សិតគួរតែចូលរួមស្តាប់វាគ្មិនពូកែៗឱ្យបានច្រើន។

របៀបក្នុងការគ្រប់គ្រងអាជីវកម្មសំនួរសួរថា លោកមានក្រុមហ៊ុនច្រើន ហើយក៏បានចំណាយពេលជាមួយការងារសង្គមច្រើនរាប់មិនអស់ដូចនេះ តើលោកអាចគ្រប់គ្រងក្រុមហ៊ុនផ្ទាល់ខ្លួនឱ្យដំណើរការល្អដូចម្តេចទៅ? ត្រង់នេះលោកបានឆ្លើយដោយមិនស្ទាក់ស្ទើរឡើយថា ការគ្រប់គ្រងក្រុមហ៊ុនដោយជោគជ័យ គឺត្រូវមានធនធានមនុស្សពូកែៗ មានអ្នកទុកចិត្ត មានក្រុមប្រឹក្សាផ្សេងៗគ្នាទៅតាមក្រុមហ៊ុននីមួយៗ ដែលមានការបែងចែកការទទួលខុសត្រូវផ្សេងៗគ្នា ទាំងការសម្រេចចិត្តការងារ សម្រេចចិត្តលើផ្នែកហិរញ្ញវត្ថុ ការរកធនឧបត្ថម្ភជាដើម។ ចំណែករូបលោកមិនមែនជាអ្នកដឹកនាំដោយផ្ទាល់នោះទេ លោកគ្រាន់ជាអ្នកបង្កើតក្រុមហ៊ុនមួយឡើងហើយជ្រើសរើសអ្នកពូកែៗមកធ្វើការងារ មកដឹកនាំជំនួសជាការស្រេច។

លោកបញ្ជាក់ដូច្នេះថា “ជាធម្មតាមានក្រុមហ៊ុនច្រើនវាពិបាកជាងក្រុមហ៊ុនតែមួយ ប៉ុន្តែពេលមានក្រុមហ៊ុនច្រើនវាជួយគ្នាទៅវិញទៅមក ប៉ុន្តែសម្រាប់មនុស្សម្នាក់មានក្រុមហ៊ុនតែមួយក៏បានដែរ ឱ្យតែគាត់យល់ថាចំណូលប៉ុណ្ណឹងវាគ្រប់គ្រាន់។ បើយើងយល់ថា ការបង្កើតអ្វីមួយដែលខ្លួនឯងគ្រប់គ្រងមិនបាន យើងមិនគួរបង្កើតវាទេ។

ក្រុមហ៊ុនខ្លះ បើសិនជាមានលទ្ធភាពទាំងដើមទុន ទាំងធនធានមនុស្ស មានទំនាក់ទំនង និងមានដៃគូល្អច្រើន កាន់តែប្រសើរ។ ឧទាហរណ៍ក្រុមហ៊ុនចម្ការដូងប្រេងរបស់ក្រុមហ៊ុន ម៉ុង ឬទ្ធី មានដៃគូជាជនជាតិថៃ ជនជាតិថៃនោះមានក្រុមហ៊ុនផ្ទាល់ខ្លួនជាង200ក្រុមហ៊ុនផ្សេងទៀតហើយសួរថាតួអង្គគាត់តែម្នាក់ធ្វើកើតដែរឬទេ? ចម្លើយគឺ បើក្រឡេកមើលលោក Jack Ma ជាប្រធានក្រុមហ៊ុន Alibaba គ្រុបមានក្រុមហ៊ុនរាប់មិនអស់ ដូចគ្នាអ៊ីចឹងដែរ ព្រោះសម័យនេះ ភាគច្រើនគេធ្វើការតាមប្រព័ន្ធ (System) យើងធ្វើទៅតាមប្រព័ន្ធការងារបែបសម័យទំនើប ដូច្នេះតិចឬច្រើនអាស្រ័យលើយើងហ៊ានជ្រើសរើសធនធានមនុស្ស រើសអ្នកពូកែ អ្នកទុកចិត្តមកធ្វើការជំនួសយើង ឬយ៉ាងណា?

ត្រង់នេះលោកបញ្ជាក់ថា បើសិនក្រុមហ៊ុនមួយយើងជាអ្នកអនុវត្តផ្ទាល់ ធ្វើការដោយខ្លួនឯង គ្រប់គ្រងក្រុមហ៊ុនតែមួយសឹងមិនបានផង បើក្រុមហ៊ុននោះតូចមិនសូវមានបញ្ហាទេ ប៉ុន្តែបើក្រុមហ៊ុនធំវិញគឺធ្វើមិនបានតែម្តង។ បើក្រុមហ៊ុនធំគឺយើងត្រូវតែទុកចិត្តទៅលើធនធានមនុស្ស រើសធនធានមនុស្សដែលមានសមត្ថភាពមកគ្រប់គ្រងជំនួសយើង ដោយយើងគ្រាន់តែជាអ្នកឃ្លាំមើល ចាំតាមដានដាក់កម្មវិធីប៉ុណ្ណោះមិនចាំបាច់ធ្វើខ្លួនឯងទេ។ ជួលមនុស្សតែម្នាក់មកធ្វើប្រតិបត្តិការ ហើយជួលមនុស្សមួយក្រុមមកតាមដានប្រតិបត្តិការគឺជាការប្រសើរហើយ។ ដូច្នេះខ្លួនឯងគ្រាន់តែអង្គុយចាំស្តាប់ និងពិនិត្យរបាយការណ៍លទ្ធផល និងកែលម្អតែប៉ុណ្ណោះ។

ប៉ុន្តែទោះជាយ៉ាងណានៅក្នុងការងារផ្ទាល់ខ្លួន យើងមិនត្រូវដើរចោលនោះទេ ទោះបីយើងចំណាយពេលវេលាខាងក្រៅច្រើនក៏ដោយ ជាដំបូងយើងត្រូវរៀបចំស្ថាប័នរបស់យើងឱ្យបានរៀបរយជាមុនសិន បណ្តុះបណ្តាលបុគ្គលិកផ្ទៃក្នុងរបស់យើងឱ្យមានចំណេះដឹង មានសមត្ថភាពគ្រប់គ្រាន់ ឱ្យពួកគាត់ធ្វើការបានល្អប្រសើរជំនួសយើង។

លោកថា អ្នកខ្លះបើកក្រុមហ៊ុនមួយអត់ហ៊ានជួលគេមកធ្វើ ពោលគឺធ្វើដោយខ្លួនឯង វាពិតជាលំបាកជាងបើកក្រុមហ៊ុន10ទៅទៀត។ គេមានក្រុមហ៊ុន10 ជួនកាលគេមិនលំបាកទេ បើគេហ៊ានជួលមនុស្សមកប្រើ ហើយបើសិនគេមានដៃគូល្អថែមទៀតកាន់តែប្រសើរ។ ដៃគូមិនមែនសំដៅតែអ្នកមានលុយទេ អ្នកជំនួញដែលឆ្លាតគឺគេរកដៃគូដែលមានពេលវេលាធ្វើការជាមួយគ្នា មានជំនាញចំណេះដឹង និងស្មោះត្រង់ចំពោះគ្នា ដូច្នេះទោះមានក្រុមហ៊ុន10-20 ឬមានដល់50ក្រុមហ៊ុនក៏យើងមិនខ្វល់ដែរ “ខ្ញុំឧទាហរណ៍ផ្សារ One Dollar ខ្ញុំមិនបាច់ហត់ទេខ្ញុំមានដៃគូបរទេស គេជាអ្នកធ្វើខ្ញុំទុកពេលតាមដានរបាយការណ៍គឺគ្រប់គ្រាន់ហើយព្រោះថាលំហូរសាច់ប្រាក់ផ្សេងៗគ្រប់គ្រងដោយប្រព័ន្ធ (System) មិនអាចបាត់សាច់ប្រាក់នោះទេ ដូច្នេះពេលខ្លះយើងធ្វើការតាមអនឡាញក៏បាន។ ទោះយ៉ាងណាឧបសគ្គមិនមែនថាអត់ទេ វាតែងតែកើតមានជារឿយៗ ប៉ុន្តែអ្វីគ្រប់យ៉ាងយើងមានគោលការណ៍ច្បាស់លាស់ យើងហ៊ានធ្វើ យើងនឹងមិនខ្លាចបញ្ហានោះទ។

មហិច្ឆតា និងទស្សនវិស័យទោះមានការងារច្រើនដូច្នេះក្តី ក៏លោកនៅតែមានមហិច្ឆតាបង្កើតក្រុមហ៊ុនផ្សេងៗទៀតទៅថ្ងៃអនាគត។ សម្រាប់ទស្សនវិស័យនៅពេលខាងមុខបើលោកមានទុនហើយរកបានដៃគូល្អ លោកនៅតែបើកក្រុមហ៊ុនបន្តទៀត ចំណែកដើមទុននិយាយឱ្យចំទៅ អ្នកដែលមិនខ្វះទុនគឺជាអ្នកដែលមិនរកស៊ី សម្រាប់អ្នករកស៊ីធំៗទុននោះមិនចេះគ្រប់ទាល់តែសោះ អ្នករកស៊ីកាន់តែធំខ្ចីលុយគេកាន់តែច្រើន។

ពេលខ្លះយើងខ្វះទុនយើងអត់អាចធ្វើការបានទេ ប៉ុន្តែបើយើងធ្វើឱ្យក្រុមហ៊ុនមានកេរ្តិ៍ឈ្មោះល្បី យើងធ្វើឱ្យក្រុមហ៊ុនជោគជ័យ ក្រុមហ៊ុនដែលមានគុណធម៌ សុជីវធម៌ត្រឹមត្រូវជួយដល់សង្គមបានច្រើននោះ គឺទុនខ្លះមិនចាំបាច់ចេញក៏មានដែរ ហើយបើមានផែនការអាជីវកម្មត្រឹមត្រូវ ធនាគារចាំជួយផ្តល់ទុនទៀតផង មិនចាំបាច់យកប្លង់ដីទៅដាក់ទេ។ ឧទាហរណ៏ ក្រុមហ៊ុនអាហារ និងភេសជ្ជៈរបស់លោក មានធនាគារឱ្យខ្ចីលុយរួចទៅហើយមិនបាច់ប្រើទុនបង្វិលផ្ទាល់ខ្លួននោះទេ គ្រាន់តែចំណាយតិចតួចសម្រាប់ធ្វើប្រតិបត្តិការប៉ុណ្ណោះ។

លោក មុនីវណ្ណ គឺជាមនុស្សម្នាក់ ដែលមិនឱ្យមានពេលទំនេរដល់ទៅមួយម៉ោងនោះទេ ទោះជាធ្វើកិច្ចការជំនួញ ហាត់កីឡា រៀនសូត្រ ឬធ្វើកិច្ចការសង្គមផ្សេងៗលោកមិនឱ្យខ្លួនឯងទំនេរដាច់ខាត។ លោកអំពាវនាវទៅដល់យុវជនត្រូវខំប្រឹងរៀនសូត្រ ក្រេបយកចំណេះដឹង ក្លាយជាមនុស្សពូកែនៅក្នុងគ្រួសារ ជួយដល់គ្រួសារ និងសង្គមជាតិទាំងមូល ដើម្បីរួមគ្នាឱ្យសង្គមជាតិយើងបានរីកចម្រើនទៅមុខ។

ជាមួយគ្នានេះ លោកក៏សុំអំពាវនាវ ឱ្យអ្នកមានលុយមានចំណេះដឹង ជួយបរិច្ចាគដល់សង្គម ទោះជាបរិច្ចាគជាធនធានចំណេះដឹងក៏ដោយ។ ការកសាងសង្គមមួយ មនុស្សម្នាក់មិនអាចធ្វើបាននោះទេ លុះត្រាតែយើងរួមគ្នាធ្វើ ទើបសង្គមយើងបានសម្បូរសប្បាយ និងរីកចម្រើនដូចអរិយប្រទេស៕

លោកបណ្ឌិត តាន់ មុនីវណ្ណទទួលគ្រឿង ឥស្សរិយសថ្នាក់មហាសិរីវឌ្ឍន៍

លោកបណ្ឌិត តាន់ មុនីវណ្ណ ឡើងថ្លែងសន្ទរកថា ក្នុងកម្មវិធីភាពជាអ្នកដឹកនាំនៅតាមមហាវិទ្យាល័យ

លោកបណ្ឌិត តាន់ មុនីវណ្ណអញ្ជើញទៅចូលរួមកម្មវិធីកិច្ចប្រជុំអាស៊ាន ឥណ្ឌា ជាមួយគណៈប្រតិភូកម្ពុជា2018នៅប្រទេសឥណ្ឌា

លោកបណ្ឌិត តាន់ មុនីវណ្ណទទួលមេដាយ ពីតំណាងអភិបាលទីក្រុងអុកស្វើត

March 21, 2018

ឯកឧត្តម គង់ វិបុល៖ អ្នកប្រកាសពន្ធ 99% ប្រើវិក្កយបត្រមិនត្រឹមត្រូវ

អគ្គនាយកពន្ធដារនៃក្រសួងសេដ្ឋកិច្ច និងហិរញ្ញវត្ថុបានលើកឡើងថា អ្នកជាប់ពន្ធស្ទើរតែទាំងអស់នៅកម្ពុជាច្រើនរៀបចំវិក្កយបត្របង់ពន្ធមិនបានត្រឹមត្រូវតាមផលរបរដែលខ្លួនប្រកបអាជីវកម្ម។

ការថ្លែងរបស់ឯកឧត្តម គង់ វិបុល ប្រតិភូរាជរដ្ឋាភិបាលទទួលបន្ទុកជាអគ្គនាយកពន្ធដារបានធ្វើឡើងក្នុងសិក្ខា-សាលាប្រចាំឆ្នាំស្តីពី កាតព្វកិច្ច និងរបៀបបំពេញលិខិតប្រកាសពន្ធលើប្រាក់ចំណូលប្រចាំឆ្នាំ ព្រមទាំងបច្ចុប្បន្នភាពបទប្បញ្ញត្តិថ្មីៗស្តីពីពន្ធដារ ដែលមានអ្នកចូលរួមជាង1,000នាក់ ដោយភាគច្រើនជាគណនេយ្យករមកពីបណ្តាក្រុមហ៊ុនសហគ្រាស និងសមាគមក្នុងស្រុក។

ឯកឧត្តម គង់ វិបុល បានបញ្ជាក់ថា នៅក្នុងដំណើរការទូទាត់សាច់ប្រាក់ក្នុងវិក្កយបត្រ ម្ចាស់អាជីវកម្មមិនបានភ្ជាប់មកជាមួយនូវប្រភេទពន្ធអាករដែលមាននៅក្នុងសេវាកម្មរបស់ខ្លួនឱ្យបានគ្រប់គ្រាន់ និងត្រឹមត្រូវតាមប្រភេទពន្ធត្រូវបង់នោះទេដោយក្រុមហ៊ុន ឬម្ចាស់អាជីវកម្មបានដាក់ត្រឹមតែពន្ធអាករធម្មតាប៉ុណ្ណោះ ប៉ុន្តែនៅក្នុងនោះមានអាករពិសេសផ្សេងៗទៀតជាច្រើន ដែលមិនត្រូវបានបញ្ចូលក្នុងវិក្កយបត្រ ដើម្បីធានានូវតម្លាភាពឱ្យបានច្បាស់លាស់។

ឯកឧត្តម ប្រតិភូរាជរដ្ឋាភិបាល បានលើកឧទាហរណ៍ថា ការលក់ម្ហូបអាហារក្នុងភោជនីយដ្ឋាន មិនជាប់អាករបំភ្លឺសាធារណៈនោះទេ ប៉ុន្តែការលក់បារី សូម្បីតែមួយកញ្ចប់ក៏ត្រូវជាប់អាករពិសេសផ្សេងទៀតដែរ ហើយបើមានបម្រើសេវាកម្មកម្សាន្តមានភ្លេងជាដើម គឺត្រូវជាប់អាករពិសេសមួយទៀត គឺអាករកម្សាន្ត (Entertainment Tax) តែដល់ពេលប្រកាស គ្មានទេពន្ធអាករទាំងអស់នេះ ដោយមានចេតនាគេចពីពន្ធពិសេសទាំងអស់នេះ តាមរយៈការកែច្នៃរបៀបនៃការប្រកាសពន្ធ។

ឯកឧត្តម គង់ វិបុល បញ្ជាក់ថា៖ “នៅក្នុងការរៀបចំវិក្កយបត្រ ខ្ញុំសង្កេតឃើញថា វិក្កយបត្រស្ទើរតែ 99% នៃវិក្កយបត្រដែលមានសព្វថ្ងៃនេះ មិនបានឆ្លុះបញ្ចាំងនូវការពិតនោះទេ។

ឯកឧត្តម គង់ វិបុល ក៏បានលើកឡើងដែរថា ដើម្បីឱ្យស្របគ្នាចំពោះការប្រកាសពន្ធទាំងនោះ ម្ចាស់អាជីវកម្ម ឬម្ចាស់ក្រុមហ៊ុនត្រូវបន្ថយផលរបររបស់ខ្លួន។ ពេលបន្ថយផលរបរ ពន្ធអាករត្រូវបង់ក៏ត្រូវតិចតាមនោះ ហើយអ្វីផ្សេងៗទៀត ក៏ត្រូវតែតិច ឬបន្ថយតាមនោះដែរ។

ដើម្បីធានានូវតម្លាភាពក្នុងការប្រកាសពន្ធ អគ្គនាយកដ្ឋានពន្ធដារត្រៀមដាក់ឱ្យដំណើរការការប្រកាសពន្ធតាមអនឡាញ ដែលពេលនោះហើយ តម្លាភាពក៏ត្រូវបានធានាកាន់តែប្រសើរ ជាងពេលបច្ចុប្បន្ននេះដែរ។ នេះបើតាមការបញ្ជាក់របស់ឯកឧត្តម គង់ វិបុល។ យោងតាមរបាយការណ៍របស់អគ្គនាយកដ្ឋានពន្ធដារ ក្រោយការអនុវត្តមធ្យោបាយប្រមូលពន្ធតាមរបបស្វ័យប្រកាស ដែលបានដាក់ឱ្យអនុវត្តចាប់តាំងពីឆ្នាំ2016មក ឃើញថាចំណូលនៅក្នុងវិស័យពន្ធដារបានកើនឡើងជាបន្តបន្ទាប់ ដោយមានប្រមាណ 1,800លានដុល្លារ នៅក្នុងឆ្នាំ2016 និងប្រមាណ 1,900លានដុល្លារនៅឆ្នាំ2017កន្លងទៅ ព្រមទាំងការរំពឹងទុកប្រមាណ 2,000លានដុល្លារក្នុងឆ្នាំ2018នេះ។

ក្រសួងសេដ្ឋកិច្ច និងហិរញ្ញវត្ថុបានផ្តាស់ប្តូររបៀបកំណត់ការប្រមូលពន្ធជាបន្តបន្ទាប់ចាប់តាំងពីឆ្នាំ2015 កន្លងមក ដោយប្តូរពីការបង់ពន្ធតាមរបបម៉ៅការមកជាការបង់ពន្ធតាមរបបស្វ័យប្រកាស ឬរបបពិតវិញ។ ក្នុងប្រកាសកាលពីឆ្នាំ2015នោះ បានកំណត់អ្នកជាប់ពន្ធតាមប្រភេទអ្នកជាប់ពន្ធតូច មធ្យម និងធំ។

ក្រសួងសេដ្ឋកិច្ច និងហិរញ្ញវត្ថុក៏បានចេញសេចក្ដីប្រកាសចុងក្រោយ ចុះថ្ងៃទី24 ខែមករា ឆ្នាំ2018នេះ ដោយបានកំណត់ជាថ្មីចំពោះអ្នកជាប់ពន្ធតាមរបបស្វ័យប្រកាសត្រូវបានបែងចែកជា 3ប្រភេទ គឺអ្នកជាប់ពន្ធតូច អ្នកជាប់ពន្ធមធ្យម និង អ្នកជាប់ពន្ធធំ។

សម្រាប់អ្នកជាប់ពន្ធតូច គឺកំណត់នៅដដែលធៀបនឹងសេចក្ដីប្រកាសដែលចេញកាលពីចុងឆ្នាំ2015 ដោយអ្នកជាប់ពន្ធតូច គឺជាសហគ្រាសឯកបុគ្គល ឬសហគ្រាសសហកម្មសិទ្ធិ មានផលរបរប្រចាំឆ្នាំចាប់ពី 250លានរៀល ដល់700លានរៀល។ ដោយឡែកអ្នកជាប់ពន្ធមធ្យម ត្រូវបានដំឡើងចំនួនទឹកប្រាក់អតិបរមាពី 2,000លានរៀលរហូតដល់4,000លានរៀល។

សេចក្ដីប្រកាសចុងក្រោយនោះបានបង្ហាញថា អ្នកជាប់ពន្ធមធ្យមត្រូវបានកំណត់ថា សហគ្រាសដែលមានផលរបរប្រចាំឆ្នាំលើសពី 700លានរៀលដល់ 4,000លានរៀល ខណៈដែលប្រកាសកាលពីចុងឆ្នាំ2015 បានកំណត់ថា អ្នកជាប់ពន្ធមធ្យម ជាសហគ្រាសដែលមានផលរបរប្រចាំឆ្នាំលើសពី700លានរៀល ដល់2,000លានរៀល និងជាសហគ្រាសដែលបានចុះបញ្ជីជានីតិបុគ្គលគឺជាអ្នកជាប់ពន្ធមធ្យម។

ប្រកាសនោះបានកំណត់ផងដែរថា អ្នកជាប់ពន្ធធំត្រូវបានកំណត់ដំឡើងទឹកប្រាក់អតិបរមារហូតដល់4,000លានរៀល។ សេចក្ដីប្រកាសនោះក៏បានបង្ហាញថា អ្នកជាប់ពន្ធធំជាសហគ្រាសដែលមានផលរបរប្រចាំឆ្នាំ លើសពី 4,000លានរៀល ឬបុត្រសម្ព័ន្ធរបស់ក្រុមហ៊ុនពហុជាតិ សាខាក្រុមហ៊ុនបរទេស ឬសហគ្រាសដែលបានចុះបញ្ជីជាគម្រោងវិនិយោគដែលមានលក្ខណសម្បត្តិគ្រប់គ្រាន់៕

March 20, 2018

តើប្រាក់រៀលខ្មែរចាប់ផ្តើមចរាចរលើទីផ្សារតាំងពីពេលណាមក?

ប្រជាពលរដ្ឋខ្មែរគ្រប់រូបសុទ្ធតែមានក្រដាសប្រាក់រៀលទុកនៅក្នុងផ្ទះ និងដាក់តាមខ្លួនសម្រាប់ការចំណាយចាយវាយផ្សេងៗទៅតាមតម្រូវការ តែទោះជាយ៉ាងនេះក្ដី ក៏ប្រជាជនខ្មែរមួយចំនួននៅមិនទាន់បានដឹងច្បាស់ពីការកកើតនៃក្រដាសប្រាក់រៀលខ្មែរ និងប្រវត្តិនៃការចាប់ផ្តើមដាក់ឱ្យចរាចរនៅលើទីផ្សារតាំងពីពេលណាមកឡើយ។

ទាក់ទងនឹងប្រវត្តិនៃការកកើតប្រាក់រៀលនេះលោកបណ្ឌិត ឃូ វុឍ្ឍី អគ្គនាយករងបច្ចេកទេស និងជាប្រធាននាយកដ្ឋានស្រាវជ្រាវសេដ្ឋកិច្ច និងសហប្រតិបត្តិការអន្តរជាតិនៃធនាគារជាតិនៃកម្ពុជាមានប្រសាសន៍ថា នៅឆ្នាំ1863 បារាំងបានចូលមកធ្វើអាណានិគមលើប្រទេសកម្ពុជា ហើយនៅឆ្នាំ1875 បារាំងបានផ្តល់សិទ្ធិពិសេសទៅឱ្យធនាគារឥណ្ឌូចិន ដែលជាធនាគារពាណិជ្ជមួយរបស់បារាំងដើម្បីបោះពុម្ពលុយឱ្យប្រទេសក្នុងតំបន់ឥណ្ឌូចិនទាំងមូលប្រើប្រាស់រួមគ្នា ដែលការចាប់ផ្តើមបោះពុម្ពលើកដំបូងឡើយ គឺបោះជាកាស (កាក់ដែលមានប្រហោងបួនជ្រុងនៅចំកណ្ដាល)ដែលមានឈ្មោះថា ព្យ៉ាស់(Piastre) ហើយចាប់ពីឆ្នាំ1891ធនាគារឥណ្ឌូចិនបានបោះផ្សាយជាក្រដាសប្រាក់ដោយដាក់ឱ្យប្រើប្រាស់រូបិយវត្ថុរួមគ្នា 3ប្រទេសគឺ កម្ពុជា វៀតណាម និងឡាវ ដែលស្ថិតនៅក្រោមអាណានិគមរបស់បារាំងដូចគ្នា។

នាពេលនោះឈ្មោះក្រដាសប្រាក់ប្រើរួមគ្នានោះគឺ ព្យ៉ាស់(Piastre) ប៉ុន្តែក៏មានឯកតាលុយទៅតាមប្រទេសនីមួយៗដូចជារៀល (កម្ពុជា)ដុង(វៀតណាម) គីប(ឡាវ)ផងដែរ ដូច្នេះឈ្មោះលុយរៀលនេះ គឺចាប់ផ្តើមមានមុនការបង្កើតធនាគារជាតិនៃកម្ពុជាទៅទៀត។ នៅឆ្នាំ1948 បារាំងបានដកសិទ្ធិពីធនាគារឥណ្ឌូចិនឈប់ឱ្យបោះពុម្ពក្រដាសប្រាក់ទៀតហើយ និងបន្ទាប់មកនៅឆ្នាំ1952 បារាំងបានបង្កើតវិទ្យាស្ថានបោះផ្សាយនៃរដ្ឋកម្ពុជា-វៀតណាម-ឡាវដែលមានស្នាក់ការកណ្តាលនៅទីក្រុងភ្នំពេញ (ជិតស្ពាននាគក្បែររមណីយដ្ឋានវត្តភ្នំ)ដើម្បីបោះផ្សាយរូបិយវត្ថុសម្រាប់ប្រើប្រាស់នៅក្នុងប្រទេសទាំងបី។

ក្រោយពេលដែលអតីតព្រះមហាក្សត្រ ព្រះបរមរតនកោដ្ឋ ព្រះបាទ នរោត្ដម សីហនុ ធ្វើការទាមទារឯករាជ្យនៅថ្ងៃទី9 ខែវិច្ឆិកា ឆ្នាំ1953 រួចមក នៅឆ្នាំ1954 ប្រទេសកម្ពុជាទទួលបានឯករាជ្យពេញលេញពីអាណានិគមនិយមបារាំង ហើយចាប់ផ្តើមបង្កើតធនាគារកណ្តាលជារបស់ខ្លួនឯងលើកដំបូងក្នុងប្រវត្តិសាស្ត្រនៅថ្ងៃទី23 ខែធ្នូ ឆ្នាំ1954 និងបានធ្វើការបោះពុម្ពប្រាក់រៀលដោយចាប់ផ្ដើមដាក់ឱ្យធ្វើចរាចរណ៍ឡើងវិញសាជាថ្មីនៅខែកញ្ញា ឆ្នាំ1955។

ចាប់ពីពេលនោះមកកម្ពុជាអាចកំណត់ដោយខ្លួនឯងនូវតម្លៃរូបិយវត្ថុជាតិ និងបរិមាណរូបិយវត្ថុដែលត្រូវបោះផ្សាយ ព្រមទាំងគោលនយោបាយពាណិជ្ជកម្មជាតិជាដើម។ ប៉ុន្តែក្រោយមកការធ្វើចរាចរណ៍ក្រដាសប្រាក់ត្រូវបានអាក់ខានក្នុងការប្រើប្រាស់ នៅពេលដែលប្រទេសកម្ពុជាបានធ្លាក់ទៅក្នុងរបបខ្មែរក្រហមប៉ុលពត(ក្នុងឆ្នាំ1975) ដែលបានលុបបំបាត់ការប្រើប្រាស់ប្រាក់រៀលទាំងស្រុង។

តែជាក់ស្តែង ក្នុងសម័យប៉ុលពតក៏មានការបោះពុម្ពក្រដាសប្រាក់ផងដែរ តែដោយការពិភាក្សាគ្នា និងការឯកភាពដែលមានទស្សនៈថា “លុយគឺជាប្រភពនៃការកេងប្រវ័ញ្ច និងជិះជាន់” ទើបនៅក្នុងសម័យប៉ុលពត ក្រដាសប្រាក់មិនត្រូវបានដាក់ឱ្យប្រើប្រាស់នោះឡើយ ក្រោមហេតុផលលុបបំបាត់វណ្ណៈអ្នកមាន និងអ្នកក្រ ទើបធ្វើឱ្យការប្រើប្រាស់រូបិយវត្ថុប្រាក់រៀលត្រូវបានអវត្តមានជាបណ្ដោះអាសន្នដោយបរិយាយ។

ក្រោយពីរបបប៉ុល ពតត្រូវបានផ្ដួលរំលំនៅឆ្នាំ1979 ប្រាក់រៀលត្រូវបានដាក់ឱ្យចរាចរឡើងវិញនៅថ្ងៃទី20 ខែមីនា ឆ្នាំ1980មកទល់បច្ចុប្បន្ន ហើយត្រូវបានធ្វើឱ្យល្អប្រសើរឡើងវិញជាលំដាប់ ដោយមានរូបភាពវីរបុរសខ្មែរ និងប្រជាជន និងសកម្មភាពអភិវឌ្ឍន៍សេដ្ឋកិច្ចដើម្បីជំរុញសាមគ្គីភាពជាតិ។

លោកឃូ វុឍ្ឍី បញ្ជាក់ថា ប្រាក់រៀលមានសារៈសំខាន់ណាស់ សម្រាប់បង្ហាញពីអធិបតេយ្យភាពរូបិយវត្ថុ ហើយរូបិយវត្ថុក៏ពាំនាំនូវសារនានាទៅដល់ប្រជាពលរដ្ឋ ដូចជាបង្ហាញពីស្នាដៃថ្នាក់ដឹកនាំ សក្តានុពលពាណិជ្ជកម្ម និងភាពរីកចម្រើនសេដ្ឋកិច្ច និងវប្បធម៌ជាតិជាដើម ជាក់ស្ដែងរូបភាពនៃស្នាមញញឹមរបស់នារីកសិករដែលកំពុងច្រូតស្រូវ រំលេចនៅលើផ្នែកខាងក្រោយនៃក្រដាសប្រាក់ 2,000រៀល គឺជាការឆ្លុះបញ្ចាំងពីសារៈសំខាន់នៃវិស័យកសិកម្មរបស់កម្ពុជានាគ្រប់សម័យកាល។ នៅផ្ទៃខាងមុខមានរូបប្រាសាទព្រះវិហារដែលចុះក្នុងបញ្ជីបេតិកភណ្ឌពិភពលោករបស់អង្គការយូណេស្កូ នៅឆ្នាំ2008 ដែលបង្ហាញពីប្រវត្តិសាស្ត្រដ៏រុងរឿង និងវប្បធម៌ដ៏ល្បីល្បាញរបស់កម្ពុជា។ ប៉ុន្តែរហូតមកទល់នឹងពេលបច្ចុប្បន្ននេះ ធនាគារជាតិបានធ្វើបច្ចុប្បន្នភាព ឬទំនើបកម្មក្រដាសប្រាក់រៀលគ្រប់ប្រភេទជាថ្មី ដោយក្រដាសប្រាក់រៀលថ្មីទាំងឡាយសុទ្ធតែមានបង្កប់លក្ខណៈពិសេសដូចជា បច្ចេកវិទ្យា Holograms រូបផុស ខ្សែបង្កប់សុវត្ថិភាពអក្សរពុម្ពតូចៗ និងសរសៃអំបោះឆ្មារនៅលើក្រដាសប្រាក់រៀលចាប់ពី 10,000រៀលឡើងទៅ។

នៅលើក្រដាសប្រាក់ 100,000 (មួយសែន) រៀល មានបង្កប់លក្ខណៈពិសេស 37មុខ និងនៅលើក្រដាស 10,000រៀល 20,000រៀល និង 50,000រៀលមានលក្ខណៈពិសេសបង្កប់ជាង 30មុខ។ ក្រដាសប្រាក់ថ្មីទាំងនេះ ក៏មានលក្ខណៈពិសេសដែលជួយដល់អ្នកពិការភ្នែកឱ្យបានដឹងផងដែរ។ ក្រដាសប្រាក់ 5,000រៀល 10,000រៀល 20,000រៀល និង 100,000រៀលសុទ្ធតែមានតួអក្សរប្រៃល៍ (Braille) សម្រាប់អ្នកពិការភ្នែកស្ទាប ចំណែកក្រដាសប្រាក់ដែលមានតម្លៃទាបជាងនេះ គឺបានបោះពុម្ពក្នុងទំហំខុសៗគ្នាដើម្បីជួយឱ្យជនពិការភ្នែកស្រួលចំណាំផងដែរ៕

ក្រដាសប្រាក់សម័យព្រះរាជាណាចក្រកម្ពុជា (1956-1970)

ក្រដាសប្រាក់សម័យសាធារណរដ្ឋខ្មែរ (1970-1975)

ក្រដាសប្រាក់សម័យសាធារណរដ្ឋប្រជាមានិតកម្ពុជា (1979-1991) បោះពុម្ពឆ្នាំ 1980

ក្រដាសប្រាក់សម័យព្រះរាជាណាចក្រកម្ពុជា (2000-2008)

March 20, 2018

គម្រោងអចលនទ្រព្យថ្មីៗបន្តបង្ហាញខ្លួន ខណៈការអភិវឌ្ឍជាក់ស្តែងស្ថិតក្នុងភាពអាថ៌កំបាំង

គម្រោងសាងសង់អគារខ្ពស់ៗនៅរាជធានីភ្នំពេញនៅតែបន្តផ្សព្វផ្សាយ និងបង្ហាញគម្រោងថ្មីៗក្នុងទីផ្សារអចលនទ្រព្យកម្ពុជាដដែលទោះបីជាគម្រោងខ្លះត្រូវប្រកាសពន្យារពេលម្តងហើយម្តងទៀត គម្រោងខ្លះមិនដំណើរការតែម្តង និងគម្រោងខ្លះបានធ្វើដំណើរទៅមុខតាមការគ្រោងទុកក៏ដោយ។

អគារពាណិជ្ជកម្មភ្លោះកម្ពស់ 62ជាន់ដែលត្រូវបានប្រសិទ្ធនាមថា អគារ Royal One ដែលជាការវិនិយោគរួមគ្នារវាងក្រុមហ៊ុន OTK Royal One Co.,Ltd របស់អ្នកឧកញ៉ា គិត ធាង និងក្រុមហ៊ុនសំណង់មកពីតៃវ៉ាន់Huashi Group គ្រោងនឹងចំណាយទុនវិនិយោគ 150លានដុល្លារ ត្រូវបានចុះហត្ថលេខាដោយថ្នាក់ដឹកនាំនៃក្រុមហ៊ុនទាំងពីរ និងគ្មានវត្តមានថ្នាក់ដឹកនាំក្រសួងណាម្នាក់ចូលរួមឡើយ។

បន្ទាប់ពីការចុះហត្ថលេខាជាមួយដៃគូវិនិយោគរួចមក អ្នកឧកញ៉ា គិត ធាង អគ្គនាយកក្រុមហ៊ុន OTK Royal One Co.,Ltd បានប្រាប់អ្នកយកព័ត៌មានប្រកបដោយភាពជឿជាក់ថា មុនការប្រកាសគម្រោងមួយនេះក្រុមហ៊ុនរបស់លោកឧកញ៉ាបានធ្វើទីផ្សាររួចស្រេចទៅហើយ ដូចនេះលោកឧកញ៉ាហាក់គ្មានសេចក្តីព្រួយបារម្ភចំពោះការដំណើរការទៅមុខរបស់គម្រោងមួយនេះទេ។

នៅពេលអ្នកសារព័ត៌មានបានសាកសួរអំពីអនាគតរបស់គម្រោងអគារមួយនេះ ស្របពេលដែលគម្រោងខ្លះត្រូវបានលុបចោល គម្រោងខ្លះត្រូវផ្អាក និងគម្រោងខ្លះទៀតកំពុងអភិវឌ្ឍយ៉ាងយឺតៗនោះ អ្នកឧកញ៉ា គិត ធាង បានអះអាងថា រហូតមកដល់ពេលចុះហត្ថលេខាជាមួយក្រុមហ៊ុនដៃគូ ក្តីសង្ឃឹមចំពោះគម្រោងអគារភ្លោះមួយនេះគឺស្មើនឹង 50% អាចដំណើរការទៅមុខរួច។

ឧកញ៉ា គិត ធាង និយាយថា៖ “ធម្មតាការរកស៊ីនីមួយៗ មានគំនិតខុសៗគ្នា អ្នកខ្លះធ្វើទៅប៉ះពាល់នឹងបញ្ហាហិរញ្ញវត្ថុ ការជ្រើសរើសទីផ្សារមិនត្រឹមត្រូវ ឬប្រហែលគេធ្វើរួចទើបរកទីផ្សារក៏មិនដឹង ឬអ្វីមួយផ្សេងទៀតដែលខ្ញុំមិនដឹង ប៉ុន្តែពួកខ្ញុំវិញ គឺរៀបចំរកទីផ្សារឱ្យហើយ មុននឹងចាប់ផ្តើមកសាង។

បើតាមការអះអាងរបស់ អ្នកឧកញ៉ា គិត ធាង អគារពាណិជ្ជកម្មភ្លោះ Royal One នេះគ្រោងនឹងចាប់ផ្តើមបុកគ្រឹះនៅចុងត្រីមាសទី3 ឆ្នាំ2018នេះ ដោយនឹងបញ្ចប់ការសាងសង់ទាំងស្រុងនៅឆ្នាំ 2021ខាងមុខនេះ។ រហូតមកដល់ពេលនេះ មានគម្រោងធំៗជាច្រើនមិនទាន់បញ្ចប់ការសាងសង់ មិនទាន់ចាប់ផ្តើមសាងសង់ និងគម្រោងខ្លះទៀតត្រូវបានប្រកាសពន្យារពេលម្តងហើយម្តងទៀត ដែលបង្ហាញឱ្យឃើញពីភាពមិនរលួនទៅមុខនៃវិស័យអចលនទ្រព្យនៅកម្ពុជា។

អ្នកជំនាញមួយចំនួនក្នុងវិស័យអចលនទ្រព្យ ហាក់មិនហ៊ានបញ្ចេញយោបល់ចំពោះស្ថានភាពទីផ្សារអចលនទ្រព្យនៅកម្ពុជានេះទេ៕

March 20, 2018

អ្នកបង់ពន្ធនឹងលែងបារម្ភពីសុវត្ថិភាពឯកសារ ក្រោយមានកម្មវិធីត្រួតពិនិត្យឯកសារតាមទូរស័ព្ទដៃ

សុវត្ថិភាពនៃឯកសារសវនកម្ម គឺជារឿងសំខាន់មួយដែលអ្នកបង់ពន្ធ និងជាពិសេសម្ចាស់អាជីវកម្មដែលជាប់ពន្ធកំពុងមានការយកចិត្តទុកដាក់ខ្លាំង ខណៈមានអ្នកខ្លះធ្លាប់ជួបបញ្ហាប្រឈមជាច្រើនដោយសារតែឯកសារសវនកម្មរបស់ខ្លួនមិនត្រូវបានទទួលស្គាល់ដោយអាជ្ញាធររបស់រដ្ឋ។

ដើម្បីដោះស្រាយបញ្ហាទាំងអស់នេះ អគ្គនាយកដ្ឋានពន្ធដារបានដាក់ឱ្យប្រើប្រាស់នូវកម្មវិធីទូរស័ព្ទដៃដើម្បីត្រួតពិនិត្យលិខិតសវនកម្មពន្ធដារដែលមានឈ្មោះថា GDT Audit Check ក្នុងគោលបំណងជួយអ្នកដែលត្រូវបង់ពន្ធទាំងអស់ឱ្យមានភាពងាយស្រួលក្នុងការកំណត់ថា លិខិតដែលគាត់មាននោះ ត្រឹមត្រូវ ឬក្លែងក្លាយ?។

ប្រតិភូរាជរដ្ឋាភិបាលទទួលបន្ទុកអគ្គនាយកដ្ឋានពន្ធដារ ឯកឧត្តម គង់ វិបុល បានលើកឡើងថា អ្នកជាប់ពន្ធទាំងអស់អាចទាញយក (download) កម្មវិធី GDT Audit Check ពី Appstore សម្រាប់ប្រព័ន្ធ ios ឬ Playstore សម្រាប់ប្រព័ន្ធ Android ក្នុងទូរស័ព្ទដៃបាន ដោយគ្រាន់តែបំពេញព័ត៌មានមួយចំនួនតាមការណែនាំក្នុងកម្មវិធីដែលមានស្រាប់។ អគ្គនាយកដ្ឋានពន្ធដារបានដាក់ចេញ និងលើកទឹកចិត្តអ្នកជាប់ពន្ធឱ្យសហការប្រើប្រាស់កម្មវិធីនេះ ដើម្បីចួលរួមពង្រឹកការអនុវត្តច្បាប់ និងបទប្បញ្ញត្តិស្តីពីសារពើពន្ធ និងចៀសវាងចាញ់បោកជនខិលខូចមួយចំនួន។

ឯកឧត្តម គង់ វិបុល បានមានប្រសាសន៍ថា៖ «គ្រប់អង្គភាពទាំងអស់ត្រូវខិតខំប្រឹងប្រែងពង្រឹងការអនុវត្តច្បាប់វិន័យការងារ និងត្រូវមានភាពទន់ភ្លន់ តែម៉ឺងម៉ាត់ ដោយផ្អែកលើទិដ្ឋភាពច្បាប់ក្នុងការឆ្លើយតបទៅកាន់អ្នកជាប់ពន្ធឱ្យអ្នកជាប់ពន្ធមានការរីករាយទទួលយក និងស្ម័គ្រចិត្តបង់ពន្ធគ្រប់ៗគ្នា ធ្វើយ៉ាងណាកាត់បន្ថយជាអតិបរមា ឬមិនឱ្យអ្នកជាប់ពន្ធមានការរអ៊ូរទាំ»។

គួរបញ្ជាក់ថា កម្មវិធីត្រួតពិនិត្យលិខិតសវនកម្មនេះ ជាកម្មវិធីដែលអ្នកប្រើប្រាស់ ឬអ្នកជាប់ពន្ធទាំងអស់អាចធ្វើការត្រួតពិនិត្យលិខិតសវនកម្មតាមរយៈការស្គែនលើ QR Code ដែលមានលើលិខិតឧទ្ទេសនាមរបស់អគ្គនាយកដ្ឋានពន្ធដារ ដែលវាជាប្រព័ន្ធមួយក្នុងការបង្កើនទំនុកចិត្តដល់អ្នកជាប់ពន្ធបានយ៉ាងប្រសើរ៕

March 20, 2018

ហេតុអ្វីនៅលើអេក្រង់ផ្សាយពាណិជ្ជកម្មរបស់ iPhone ឬ iPad បង្ហាញម៉ោង 9:41 AM?

លោកអ្នកប្រហែលជាមិនធ្លាប់បានចាប់អារម្មណ៍នោះទេ ទៅលើផ្ទាំងផ្សព្វផ្សាយពាណិជ្ជកម្មរបស់ Apple ដែលបង្ហាញម៉ោង 9:42 AM ប៉ុន្តែបើសិនជាអ្នកងាកក្រឡេកទៅមើលរាល់ឧបករណ៍របស់ Apple នោះលោកអ្នកនឹងឃើញពីចំណុចនេះមិនខាន។

ជាទូទៅ នៅលើអេក្រង់របស់ iPhone តែងតែបង្ហាញម៉ោង 9:42 AM ប៉ុន្តែពុំមាននរណាម្នាក់ដឹងពីមូលហេតុនោះទេ ក្រោយមកទើបបុគ្គលិកជាន់ខ្ពស់ Apple បានពន្យល់ប្រាប់ពីមូលហេតុ។

យោងតាមការចុះផ្សាយរបស់សារព័ត៌មាន Business Insider បានឱ្យដឹងថា ដំបូងឡើយ Apple បង្ហាញផ្ទាំងផ្សាយពាណិជ្ជកម្ម ជាមួយនឹងម៉ោង 9:41 AM ប៉ុន្តែក្រោយមក ចាប់ពីឆ្នាំ2010 ស្រាប់តែប្ដូរទៅជា 9:42 AM វិញ។

លោក Scott Forstall អតីតមេធំ iOS បានបង្ហើបឱ្យដឹងថា ម៉ោង 9 គឺជាម៉ោងដែល Apple ប្រកាសបង្ហាញផលិតផលថ្មី ហើយ 41 ឬ 42នាទីនោះ គឺចង់បញ្ជាក់ដល់អ្នកដែលបានចូលរួមនៅក្នុងព្រឹត្តិការណ៍ថា ការបង្ហាញផលិតផលថ្មីគឺត្រូវធ្វើឡើងនៅក្នុងរយៈពេល 40នាទី ឬលើសនេះបន្តិចបន្តូច ដូច្នេះហើយទើបកំណត់យក 41 ឬ 42នាទី។

ទម្លាប់នេះគឺបានចាប់ផ្ដើមតាំងពីលោក Steve Jobs ធ្វើបទបង្ហាញ iPhone ដំបូងបំផុតនៅឆ្នាំ 2007 ចំណែក 42នាទី គឺជាពេលវេលាដែល Steve Jobs ធ្វើបទបង្ហាញ។ នៅឆ្នាំ2010 នៅលើអេក្រង់ iPhone និង iPad ត្រូវបានប្ដូរពី 9:42 AM មកជា 9:41 AM វិញ៕

March 20, 2018

រោងចក្រខ្នាតធំនៅកម្ពុជាមានជាង 1,500ស្ថាប័ន និងផ្តល់ការងារជិត 1លាននាក់

គិតត្រឹមដំណាច់ឆ្នាំ2017កន្លងទៅ កម្ពុជាមានរោងចក្រខ្នាតធំប្រមាណជាជាង 1,500រោងចក្រដែលបានចុះបញ្ជី និងផ្តល់ការងារដល់ពលរដ្ឋខ្មែរចំនួនប្រមាណជាង 98ម៉ឺននាក់ នេះបើតាមរបាយការណ៍របស់ក្រសួងឧស្សាហកម្ម និងសិប្បកម្ម។

ឯកឧត្តម ចម ប្រសិទ្ធ ទេសរដ្ឋមន្ត្រី រដ្ឋមន្ត្រីក្រសួងឧស្សាហកម្ម និងសិប្បកម្មបានមានប្រសាសន៍នៅក្នុងពិធីបិទសន្និបាតបូកសរុបលទ្ធផលការងារឆ្នាំ2017 និងលើកទិសដៅការងារឆ្នាំ2018 បានឱ្យដឹងថា គិតត្រឹមដំណាច់ឆ្នាំ2017 រោងចក្រខ្នាតធំដែលបានចុះបញ្ជីមានចំនួនសរុប 1,522 រោងចក្រ ស្មើនឹង 137% ធៀបនឹងឆ្នាំ2013។

ក្នុងនោះផ្នែកឧស្សាហកម្មតម្បាញ កាត់ដេរសម្លៀកបំពាក់ ស្បែកជើង និងកាបូបមានចំនួន 1,031រោងចក្រ ស្មើនឹង129% ដែលបានផ្តល់ការងារដល់ពលរដ្ឋខ្មែរសរុបមានចំនួន 982,203 នាក់ ស្មើនឹង143% ប្រៀបធៀបនឹងឆ្នាំ2013។ ចំណែកឯសហគ្រាសធុនតូច មធ្យម និងសិប្បកម្មមានចំនួនសរុប 155,640មូលដ្ឋាន ស្មើនឹង130% បើធៀបនឹងឆ្នាំ2013 ហើយបានផ្តល់ការងារជូនប្រជាពលរដ្ឋបានចំនួនប្រមាណ 1,106,745នាក់ ស្មើនឹង229% ធៀបនឹងរយៈពេលដូចគ្នាខាងលើនេះ។

ចំណុចនេះឯកឧត្តមទេសរដ្ឋមន្ត្រីបានទាញការចាប់អារម្មណ៍ថា ក្នុងទិដ្ឋភាពបច្ចុប្បន្ន កម្ពុជាកំពុងតែផ្លាស់ប្តូររចនាសម្ព័ន្ធសេដ្ឋកិច្ចពីប្រទេសដែលពឹងផ្អែកលើវិស័យកសិកម្មទៅជាប្រទេសពឹងផ្អែកលើវិស័យឧស្សាហកម្ម និងសេវាកម្ម ជាក់ស្តែងតាមតួលេខបង្ហាញថា វិស័យឧស្សាហកម្មបានចូលរួមចំណែកនៃកំណើនផលទុនសរុបក្នុងស្រុកមានការកើនឡើងជារៀងរាល់ឆ្នាំ គឺពីទំហំ 24.1% នៅឆ្នាំ2013 ដល់ទំហំ 30.9%នៅឆ្នាំ 2017 ស្របពេលដែលវិស័យកសិកម្មមានទំហំ 24.9% នៅឆ្នាំ2017 ។

ប្រការនេះធ្វើឱ្យកម្ពុជាប្រែក្លាយពីប្រទេសមានចំណូលទាប ទៅជាប្រទេសមានចំណូលមធ្យមកម្រិតទាប និងកំពុងបន្តដំណើរឈានទៅក្លាយជាប្រទេសមានចំណូលមធ្យមកម្រិតខ្ពស់នៅឆ្នាំ2030៕

March 20, 2018

ក្លិប Real ក្លិប Barcelona និងក្លិប PSG នាំគ្នាប្រជែងទិញ Salah ក្នុងតម្លៃខ្លួន 200លានផោន

ក្លិប Liverpool នឹងត្រូវប្រឈមមុខនឹងការតស៊ូជាមួយនឹងតម្លៃខ្លួនជាកំណត់ត្រាពិភពលោកចំនួន 200លានផោន (ស្មើនឹង 280.5លានដុល្លារអាមេរិក) ដើម្បីរក្សាទុកខ្សែប្រយុទ្ធដែលកំពុងតែឡើងទម្រង់លេងខ្លាំង Mohamed Salah ខណៈ ក្លិប Real Madrid ក្លិបBarcelona និងParis Saint-Germain សុទ្ធសឹងតែចង់បានខ្សែប្រយុទ្ធអន្តរជាតិអេហ្ស៊ីបរូបនេះ។

Salah ដែលកំពុងតែជួបរដូវកាលយ៉ាងល្អឥតខ្ចោះរបស់គេជាមួយនឹងក្លិប Liverpool តាមរយៈការរកគ្រាប់បាល់បញ្ចូលទីបាន 37គ្រាប់ ក្នុងការប្រកួត 43លើកសម្រាប់ក្លិប និងប្រទេសរបស់គេ ហើយការបង្ហាញពីទម្រង់លេងយ៉ាងល្អរបស់គេបានផ្តល់នូវការចាប់អារម្មណ៍យ៉ាងខ្លាំងពីសំណាក់ក្លិបយក្សៗប្រចាំតំបន់អឺរ៉ុប។

លោក Jurgen Klopp គ្រូបង្វឹករបស់ក្រុម Liverpool នឹងត្រូវតែច្រានចោលការផ្តល់តម្លៃខ្លួនជាកំណត់ត្រាពិភពលោកទាំងអស់ ដើម្បីរក្សាទុកតារាឆ្នើមរបស់ខ្លួន។ ក្លិប Liverpool បានចាញ់ក្នុងការប្រជែងមួយរួចស្រេចទៅហើយ ខណៈដែលពួកគេមិនមានជម្រើសអ្វីក្រៅពីការលក់ខ្សែបម្រើដ៏មានឥទ្ធិពល Philippe Coutinho ទៅឱ្យក្លិប Barcelona ឡើយ ក្រោយពីក្លិបយក្សរបស់អេស្ប៉ាញមួយនេះ បានផ្តល់តម្លៃខ្លួន 145លានផោន។ ហេតុនេះ រឿងមួយនេះអាចនឹងមានលក្ខណៈដូចគ្នាទៅនឹង Salah វ័យ 25ឆ្នាំនេះដែរ។

ក្លិបយក្សៗទាំង3ប្រចាំតំបន់អឺរ៉ុប ជឿជាក់ថា ក្រុមហ៊ុន Fenway Sports Group ម្ចាស់ក្លិប Liverpool នឹងមិនអាចច្រានចោលនូវសំណើមួយដែលនឹងមានចំនួនច្រើនជាង 198លានផោន ដែលក្លិប PSG បានចំណាយទិញ Neymar កាលពីរដូវក្តៅមុនឡើយ។ Liverpool បានចំណាយប្រាក់ត្រឹមតែ 34.3លានផោនប៉ុណ្ណោះសម្រាប់ការផ្ទេរ Salah ពីក្លិប Roma កាលពីរដូវក្តៅមុន៕

ប្រភពពី៖ The Sun

March 20, 2018

Author: វល័ក្ខ