Author: ធឿន មករា

មិនទាន់បានចេញលក់ផង តម្លៃ Google Pixel 5 ត្រូវគេដឹងមុនបាត់ទៅហើយ!
ស្មាតហ្វូនជំនាន់ទី5 របស់ Google គឺម៉ូដែល Pixel 5 ត្រូវបានប្រភពច្បាស់ការណ៍មួយទម្លាយឱ្យដឹងពីតម្លៃរបស់វា មុននឹងក្រុមហ៊ុនប្រកាសចេញលក់លើទីផ្សារទៅទៀត។ សម្រាប់ Pixel 5 មាន 5G មេម៉ូរី 128GB គឺ 699ដុល្លារ។
ប្រភេទ 5G នឹងបំពាក់មកជាមួយនឹងបន្ទះឈីប Snapdragon 765G RAM 8GB/128 មេម៉ូរីមានកាមេរ៉ាក្រោយ2 ជាមួយនឹងសេនស័រ 12.2MP +16MP Ultra wide-angle និងកាមេរ៉ាមុខ 1គ្រាប់ 8MP។ អេក្រង់ 90Hz មានមុខងារកាពារសឹកឆ្កូត Gorilla Glass 6កម្រិត IP68 និងមានបំពាក់បច្ចេកវិទ្យាសាកភ្លើងល្បឿនលឿន។
ជាមួយគ្នានោះដែរ ម៉ូដែល 1ទៀតគឺ Pixel 4a(5G) ក៏ត្រូវបានក្រុមហ៊ុនបង្ហើបឱ្យដឹងខ្លះៗហើយដែរថា នឹងមានលក្ខណសម្បតិ្តប្រហាក់ប្រហែលគ្នា តែបំពាក់បន្ទះឈីបលេខខុសគ្នា។
សម្រាប់រឿងមួយ ដែលរាងដូចជាធ្វើឱ្យមិនសូវជាពេញចិត្តនោះគឺថា តម្លៃដ៏ខ្ពស់បែបហ្នឹង(699ដុល្លារ) និងលក្ខណសម្បត្តិផ្សេងទៀតរបស់វាដែលមានត្រឹមប៉ុណ្ណឹង ហាក់ដូចជាមិនលើសស្មាតហ្វូនតម្លៃជាង 200ដុល្លារផង បើធៀបគ្នាហើយនោះ។ តែយ៉ាងណា ចំណុចខ្លាំងមួយរបស់ Pixel គឺកាមេរ៉ាដែលបានអាប់ឌែតបន្ថែម ធ្វើឱ្យសមត្ថភាពថតរូប និងវីដេអូ អាចប្រជែងជាមួយស្មាតហ្វូនដទៃដែលមានកាមេរ៉ា3 ឬ 4គ្រាប់បាន៕
September 28, 2020
ព្រលានយន្តហោះទំនើបបំផុត Changi Airport នៅសិង្ហបុរី ដាក់ឱ្យរ៉ូបូតដំណើរការ ផ្នែកសម្អាត 3ប្រភេទផ្សេងគ្នា
ថ្មីៗនេះព្រលានយន្តហោះធំជាងគេ និងទំនើបជាងគេ របស់ប្រទេសសិង្ហបុរី បានប្រកាសដាក់ឱ្យដំណើរការម៉ាស៊ីនសម្អាតស្វ័យប្រវត្តិ ដែលរចនាឡើងដោយមានរូបរាងជា រ៉ូបូត ដោយចែកជាកម្រិតសមត្ថភាពទាំង5 របស់វា និងបន្តចែកជា 3ប្រភេទទៀតគឺ ប្រភេទប្រមូល និងសម្អាតទូទៅ, ប្រភេទអាចលើកទម្ងន់បានច្រើនបំផុត 660គីឡូក្រាម និងប្រភេទផ្តល់ព័ត៌មានទូទៅ។
យោងតាមវេបសាយផ្លូវការរបស់ changiairport បានរំលេចមុខងារទំនើបៗខ្លះ ពីម៉ាស៊ីនសម្អាតស្វ័យប្រវត្តិខាងលើមានដូចជា៖ ប្រភេទទី1 អ្នកធ្វើដំណើរអាចចុចនៅលើខ្លួនរបស់រ៉ូបូត ឬស្គែន QR Code រួចហើយវានឹងលោតចូលគេហទំព័រមួយ ដែលមានរៀបរាប់ពីសំណួរដែលអ្នកចង់បាន។ ទី2 ជាប្រភេទអាចផ្ទុកសំណល់ អាចលើកអីវ៉ាន់ និងសម្អាតបាន ដោយអ្នកគ្រាន់តែឈរក្បែរវា ហើយបញ្ជាឱ្យវាលើកជាការស្រេច និងទី3 ជាប្រភេទផ្តល់ព័ត៌មានទូទៅ៕
September 28, 2020
បងៗស្រ្តីមេផ្ទះដឹងទេ បន្លែផ្លែឈើ និងអាហារណាខ្លះដែលមិនចាំបាច់ដាក់ចូលទូទឹកកក
បើសួរថា ទូទឹកកកផ្ទះអ្នកណាខ្លះពេញណែនរកកន្លែងដាក់របស់មិនគ្រាន់ សូមលើកដៃឡើង! ធានាថាបងៗស្រ្តីមេផ្ទះទាំងឡាយច្បាស់ជានាំគ្នាលើកដៃឡើងព្រឹបៗមិនខាន ចំណែកអ្នកគ្រូ ឆវី វិញសូមលើកដៃទាំងពីរឡើងតែម្ដង ព្រោះជាមនុស្សចូលចិត្តធ្វើម្ហូប ទើបមានរបស់របរ និងគ្រឿងគ្រៅទុកក្នុងទូទឹកកកច្រើនណាស់។ ដូច្នេះថ្ងៃនេះអ្នកគ្រូ ឆវី សុំនិយាយពីរឿងរបស់របរដែលមិនចាំបាច់ត្រូវរក្សាទុកក្នុងទូទឹកកក(តែនាងខ្ញុំទុក)ម្ដង ដោយសារតែមូលហេតុថា កាលពីម្សិលមិញនាងខ្ញុំប្រុងយករបស់របរដែលទើបទិញមកពីផ្សារទៅទុកក្នុងទូទឹកកក តែពេលបើកទ្វារទូទឹកកកឡើង ក៏ស្រាប់តែភ្ញាក់ឱ្យព្រើតតែម្ដង ព្រោះស្ទើរតែគ្មាននៅសល់ប្រឡោះសម្រាប់ទុកឡើយ ទើបធ្វើឱ្យនឹកឃើញថា មានអាហារ និងបន្លែផ្លែឈើខ្លះអាចទុកក្រៅទូទឹកកកក៏បានដែរ។
1 . ទឹកឃ្មុំ ៈ យើងអាចទុកនៅក្រៅទូទឹកកកបាន ទោះជាបើកប្រើហើយក៏ដោយ គ្រាន់តែបិទកគម្របដបឱ្យជិតជាការស្រេច។ អ្នកគ្រូ ឆវី ធ្លាប់ទុកទឹកឃ្មុំទាំងនៅក្រៅ និងក្នុងទូទឹកកកហើយ លទ្ធផលឃើញថា ដបទឹកឃ្មុំដែលដាក់នៅក្រៅទូទឹកកកមានស្រមោចលួចចូលទៅស៊ីទឹកឃ្មុំ ព្រោះតែបិទគម្របមិនជិត។ ចំណែកឯដបទឹកឃ្មុំដែលទុកនៅក្នុងទូទឹកកកក៏មានបញ្ហាដែរ គឺពេលយកចេញមកប្រើការ បែរជាខាប់រឹងចាក់មិនចេញ។ នៅពេលវាដូច្នេះ សូមណែនាំឱ្យទុកនៅក្រៅទូទឹកកក ដោយត្រូវជូតដបឱ្យស្អាត បិទគម្របឱ្យជិត ហើយទុកនៅក្នុងចង្រ្កានបាយវិញប្រសើរជាង។
2 . ផ្លែប៉ោម ៈ បើទុកក្នុងទូទឹកកកច្រើនថ្ងៃ ពេលយកមកចិតញ៉ាំ រសជាតិនឹងប្រែប្រួល មិនដូចផ្លែដែលមិនទុកក្នុងទូទឹកកកនោះទេ។ អ្នកគ្រូ ឆវីមិនប្រាកដក្នុងចិត្ត ក៏ចិតមួយផ្លែទៀត រសជាតិប្រែប្រួលដូចគ្នាដដែល។ ចាប់តាំងពីពេលនោះមក អ្នកគ្រូក៏ទុកផ្លែប៉ោមនៅក្នុងកញ្ច្រែង ហើយដាក់លើតុបាយ ដែលធ្វើឱ្យរសជាតិនឹងនៅស្រស់ឆ្ងាញ់ដូចមុន មិនប្រែប្រួលឡើយ ថែមទាំងងាយមើលឃើញ និងដូចជាគ្រឿងលម្អតុបាយទៀតផង តែបើចិតរួចហើយញ៉ាំមិនអស់ អ្នកគ្រូ ឆវី សូមណែនាំឱ្យដាក់ក្នុងស្បោងហើយទុកក្នុងទូទឹកកកណា៎ចា៎ស។
3 . ខ្ទឹមក្រហម ខ្ទឹមស និងខ្ទឹមបារាំង ៈ អាចដាក់ក្នុងកញ្រ្ចែងទុកក្នុងចង្រ្កានបាយបាន ចំណែកអ្នកគ្រូ ឆវី វិញ ចូលចិត្តទិញបែបគេចងជាបាច់ៗមកព្យួរទុកក្នុងចង្រ្កានបាយ។ ធ្លាប់ភ្លេចខ្លួនយកទៅទុកក្នុងទូទឹកកកដែរ ស្រាប់តែមានផ្សិតដុះឡើងជិត ព្រោះធាតុអាកាសក្នុងទូទឹកកកមានសំណើម។ តែបើបកសម្បកហើយប្រើមិនអស់ គួររក្សាទុកក្នុងប្រអប់ បិទគម្របឱ្យជិតណែនកុំឱ្យក្លិនវាទៅចូលក្នុងអាហារផ្សេងទៀតក្នុងទូទឹកកក។
4 . ទឹកស៊ីអ៊ីវ ទឹកត្រី-ល- ៈ យើងត្រូវបើកប្រើស្ទើរតែរាល់ថ្ងៃ ទើបមិនចាំបាច់ត្រូវទុកក្នុងទូទឹកកកទេ តែអ្នកគ្រូ ឆវីសូមសង្កត់ធ្ងន់លើភាពស្អាតបាតមានអនាម័យ ទើបបន្ទាប់ពីប្រើហើយ ត្រូវជូតដបឱ្យស្អាត និងបិទគម្របឱ្យជិត តែប៉ុណ្ណឹងក៏អស្ចារ្យទៅហើយ។

5 . ប្រេងឆា និងប្រេងប្រភេទផ្សេងៗ ៈ មិនបាច់ទុកក្នុងទូទឹកកកទេ។ អ្នកគ្រូ ឆវី ធ្លាប់យកទៅទុកក្នុងហ្នុងហើយ ដល់ពេលយកចេញមកប្រើ ស្រាប់តែឃើញមានដូចជាកករសៗដូចស៊ុតសរបស់មាន់ពេញមួយដបតែម្ដង និងថែមទាំងចាក់មិនចេញ ត្រូវទុកចោលនៅខាងក្រៅឡើងយូរទម្រាំនឹងប្រើបាន ធ្វើឱ្យអស់អារម្មណ៍ លែងចង់ធ្វើម្ហូបតែម្ដង។
6 . មើមដំឡូងជ្វា ដំឡូងបារាំង ដំឡូងឈើ មើមត្រាវ ៈ ក៏មិនចាំបាច់ដាក់ចូលក្នុងទូទឹកកកដែរ គ្រាន់តែដាក់ក្នុងកញ្រ្ចែងទុកក្នុងចង្រ្កានបាយទៅបានហើយ ធ្វើឱ្យមើមវានៅស្រស់ល្អផង តែបើដាក់ក្នុងទូទឹកកក សម្បកវានឹងទន់ ថែមទាំងបើសិនជាមានស្នាមបែក ឬមុតរយះផងនោះ នឹងធ្វើឱ្យឆាប់ស្អុយរលួយ ឬឡើងខ្មៅទៀតផង។
7 . ត្រឡាច ល្ពៅ -ល- ៈ អាចរក្សាទុកនៅក្រៅទូទឹកកកបាន លើកលែងតែហាន់ជាដុំៗ ឬចំណិតៗហើយ សឹមយកបន្ទះប្លាស្ទិកមករុំខ្ចប់ឱ្យជិតស្អាត រួចយកទៅទុកក្នុងទូទឹកកកចុះ។
8 . តែ ឬម្សៅកាហ្វេ ៈ មិនគួរដាក់ក្នុងទូទឹកកកទេ លើកលែងត្រូវការបំបាត់ក្លិនរបស់វា។ យើងអាចប្រើស្លឹកតែស្ងួត និងម្សៅកាហ្វេដើម្បីកម្ចាត់ក្លិនមិនល្អនៅក្នុងទូទឹកកកបាន តែយើងលែងអាចយកវាមកឆុងញ៉ាំបានហើយ ព្រោះក្លិនវាបានប្រែប្រួលអស់ហើយ។
9 . អាហារកំប៉ុងដែលមិនទាន់បើកញ៉ាំ ៈ (លើកលែងតែមានបញ្ជាក់ថា ត្រូវតែដាក់ក្នុងទូទឹកកក) និងក្នុងករណីយបើកកំប៉ុងប្រើហើយ គួរចាក់ចេញមកទុកនៅក្នុងភាជនៈ(ចាន ឬថង់-ល-)ផ្សេង មិនគួរទុកនៅក្នុងកំប៉ុងទៀតទេ ព្រោះកំប៉ុងអាចកើតច្រែះបាន។
ការពិត នៅមានរបស់ជាច្រើនប្រភេទទៀតដែលអាចរក្សាទុកនៅក្រៅទូទឹកកកបាន តែអ្វីដែលប្រាកដនោះគឺ ចង់ទុកនៅក្នុង ឬក្រៅទូទឹកកកក៏ដោយ យើងគួរតែសម្អាតវាឱ្យបានស្អាត ព្រោះវានឹងជួយពន្យារអាយុរបស់អាហារ ឬវត្ថុទាំងនោះបានកាន់តែយូរឡើង៕
September 28, 2020
បើដឹងចំណុចខ្លាំងអស្ចារ្យទាំងនេះបន្ថែមទៀត…ទើបដឹងថា Galaxy Note 20 និង Galaxy Note 20 Ultra ពិតស័ក្តិសមជាមហាអំណាចស្មាតហ្វូនគ្មានគូប្រៀបមែន…!!
ឡូយកប់ម៉ងណា៎…!! មហាអំណាចស្មាតហ្វូនគ្មានពីរក្នុងលោកក៏បានប្រើ…ហើយប្រូម៉ូសិនថែមកប់ពីក្រុមហ៊ុន សាមសុង ក៏បានទៀត…!!
(ភ្នំពេញ) ថ្ងៃទី ២៨ ខែកញ្ញា ឆ្នាំ២០២០៖ កុំអាល័យតែត្រែតត្រត…បង្អង់យូរអី…! កម្មវិធីប្រូម៉ូសិនថែមជូនដ៏ពិសេសអស្ចារ្យបំផុតពីក្រុមហ៊ុន សាមសុង នៅសល់តែ តែប៉ុន្មានថ្ងៃទៀតទេប៉ុណ្ណោះ! មានន័យថារាល់ការទិញ Samsung Galaxy Note 20 ឬ Galaxy Note 20 Ultra ចាប់ពីថ្ងៃនេះរហូតដល់ថ្ងៃទី ៣០ ខែកញ្ញា ឆ្នាំ ២០២០ អតិថិជនទាំងអស់នឹងទទួលបានការថែមជូន គូប៉ុងចាក់ប្រេងឥន្ធៈតម្លៃ ៥០ ដុល្លារ ភ្លាមៗ តែម្តង…!!
តាមពិតទៅ Samsung Galaxy Note 20 ឬ Galaxy Note 20 Ultra គឺត្រូវបានបង្កើតឡើងយ៉ាងល្អឥតខ្ចោះដើម្បីឆ្លើយតប និងបំពេញតាមតម្រូវការរបស់អ្នកប្រើប្រាស់ស្មាតហ្វូនទាំងអស់ដោយផ្តល់ជូននូវភាពអស្ចារ្យសម្រាប់ការកម្សាន្តឥតដែនកំណត់ (The Power to Play) ព្រមទាំងភាពអស្ចារ្យសម្រាប់ការងារប្រកបដោយភាពឆ្លាតវៃ…រហ័ស…និងមានប្រសិទ្ធភាពបំផុតសម្រាប់យុគសម័យបច្ចេកវិទ្យា Ai របស់ក្រុមហ៊ុន សាមសុង នេះ!
ឥឡូវនេះក្រុមហ៊ុននឹងធ្វើការបង្ហាញជូននូវមុខងារសំខាន់អស្ចារ្យបន្ថែមទៀតដែលឆ្លុះបញ្ចំាងពីអនុភាពនៃ កម្សាន្តឥតដែនកំណត់ ( The Power to Play) និងភាពអស្ចារ្យសម្រាប់ការងារ (The Power to Work) ដូចខាងក្រោមនេះ៖
* The Power to Work
– Google Duo: កម្មវិធីនេះគឺត្រូវបានដំឡើងមកស្រាប់យ៉ាងពិសេសលើមហាអំណាចស្មាតហ្វូន Samsung Galaxy Note 20 ឬ Galaxy Note 20 Ultra ដែលផ្តល់នូវភាពងាយស្រួលក្នុងការតេ (Video Call) ជាក្រុមជាលក្ខណៈការងារ…ការសិក្សា…និងកិច្ចប្រជុំនានា…បានរហូតដល់ 32 នាក់!! ជាពិសេសគឺវាស័ក្តិសម និងល្អបំផុតសម្រាប់ការរក្សាគម្លាតសុវត្ថិភាពសង្គមនេះតែម្តង! មានន័យថាទោះជាយើងនៅឆ្ងាយពីគា្នយ៉ាងណាក៏អាចនៅជិតគា្ន…ឃើញគ្នា…និងបំពេញការងារផ្សេងៗបានដោយជោគជ័យផងដែរ…!
– Samsung Dex: គឺជាការភ្ជាប់ (Connect) ពី Galaxy Note 20 ឬ Galaxy Note 20 Ultra ទៅកាន់ទូរទស្សន៍បានយ៉ាងលឿន និងរលូនបំផុត…!! ដូច្នេះលោកអ្នកអាចយកអេក្រង់ទូរទស្សន៍ធ្វើជាអេក្រង់ទី ២ បានយ៉ាងងាយស្រួលបំផុត…! អ៊ីចឹងបើកមើលវីដេអូប្រជុំ…ឬវីដេអូមេរៀន ផង និងអាចធ្វើការកត់ត្រា (Note) ផង…! ឡូយអស់ស្ទះម៉ង…!!
* The Power to Play
– Camera: ជាមួយនឹង PRO-GRADE CAMERA លោកអ្នកអាចថតវីដូអូ PRO-GRADE VIDEO កម្រិត 8K 120 frames per second (120fps) ជាមួយនឹង Pro-quality, Pro movie-effect បានយ៉ាងច្បាស់…លម្អិត…ត្រជាក់ភ្នែក…ប្លែក…ឡូយផងដែរ! ក្នុងចំណុចនេះលោកអ្នកធ្លាប់ជាបានដឹងខ្លះហើយថាជាមួយនឹងការ Snap យករូបភាពចេញពី វីដេអូ 8K ក្នុងទំហំ 33 MP…!
ម្យ៉ាងវិញទៀតប្រសិនបើលោកអ្នកចង់ថតរូបសន្លឹកគឺកាន់តែអស្ចារ្យថែមទៀត! ទោះជាប្លង់រូបដែលលោកអ្នកចង់ថតខ្សោយពន្លឺយ៉ាងណាក៏ Galaxy Note 20 ឬ Galaxy Note 20 Ultra ក៏នៅតែអាចផ្តិតយករូបថតចេញមកបានច្បាស់ល្អឥតខ្ចោះផងដែរ!
– Battery: បើនិយាយពីថាមពលថ្មវិញគឺពិតជាអស្ចារ្យណាស់…! ជាមួយនឹងកម្លាំងថ្ម 4300 mAh (Galaxy Note 20), 4500 mAh (Galaxy Note 20 Ultra) ព្រមទាំងបច្ចេកវិទ្យា Super-Fast Charging លោកអ្នកនឹងទទួលបានថាមពលថ្មជាង 50% ដោយប្រើពេលតែ 30 នាទីប៉ុណ្ណោះ! តែប៉ុណ្ណេះអាចកំដរលោកអ្នកបានមួយថ្ងៃពេញតែម្តង!
* មានបំពាក់ស៊ីមអេឡិចត្រូនិច (e-Sim)
– មានជម្រើសច្រើនសម្រាប់អ្នកប្រើប្រាស់! លោកអ្នកអាចប្រើ Nano SIM Card ទាំង 2 ក៏បាន ឬប្រើ Nano SIM 1 + e-SIM ដោយអាចឱ្យយើងបន្ថែមមេម៉ូរីបានផងដែរ)! ដូច្នេះមិនចាំបាច់ចំណាយពេលកាត់ SIM និងញាត់ SIM ចេញចូលច្រើនដែលនាំឱ្យខាតពេល ឬគួរឱ្យធុញទ្រាន់នោះទេ!
ចង់ទទួលបានបទពិសោធន៍ដ៏អស្ចារ្យគ្មានគូប្រៀបពីមហាអំណាចស្មាតហ្វូន…ប្រសិទ្ធភាពការងារកាន់តែរហ័សឆ្លាតវៃដោយជោគជ័យ…និងការកម្សាន្តឥតដែនកំណត់… Samsung Galaxy Note 20 | Galaxy Note 20 Ultra គឺជាជម្រើសតែមួយគត់គ្មានពីរសម្រាប់លោកអ្នក…!!
សម្រាប់ព័ត៌មានបន្ថែមលោកអ្នកអាចអញ្ជើញទៅប៉ះផ្ទាល់ ឬធ្វើការសាកសួរនៅតាមហាងដេប៉ូចែកចាយផលិតផល សាមសុង ទាំងអស់ដែលនៅជិតលោកអ្នកបំផុតទូទាំងប្រទេស ឬក៏ធ្វើការទំនាក់ទំនងសេវាបម្រើអតិថិជនតាមរយៈលេខទូរស័ព្ទឥតគិតថ្លៃ៖ 1800-203232!
September 28, 2020
កូនមិនព្រមទៅសាលារៀន ឪពុកម្ដាយគួរធ្វើយ៉ាងណា?
មិនព្រមទៅសាលារៀន…ក្មេងជំនាន់ថ្មីនេះមានបញ្ហានេះកាន់តែច្រើនឡើងជារៀងរាល់ឆ្នាំ នេះក៏ដោយសារតែឪពុកម្ដាយចិញ្ចឹមកូនឱ្យរស់នៅស្រួល និងនៅចាំជួយកូនស្ទើរតែគ្រប់រឿង ខណៈពេលជាមួយគ្នាឪពុកម្ដាយខ្លះក៏មានការបង្ខំ ឬប្រញាប់បញ្ជូនឱ្យឆាប់ទៅសាលារៀនពេក ដោយមិនមើលពីសមត្ថភាពរបស់ក្មេងជាចម្បង។ ព្យាយាមបង្ខំ ឬជំរុញឱ្យក្មេងអានសៀវភៅ ឱ្យសរសេរអក្សរច្រើនៗតាំងពីអាយុ 4 – 5ឆ្នាំ ឱ្យគិតលេខឱ្យបាន…ហើយបើយ៉ាងហ្នឹងៗ តើមិនឱ្យក្មេងយំចង់តែនៅផ្ទះ មិនចង់ទៅសាលាយ៉ាងម៉េចនឹងបាន?
ក្មេងមិនចង់ទៅសាលារៀនមានមូលហេតុមកពីអ្វី?
1 . វិតក្កកង្វល់ ខ្លាចការព្រាត់ប្រាសពីឪពុកម្ដាយ ខ្លាចប៉ាម៉ាក់លែងស្រឡាញ់។
2 . រៀនអក្សមិនទាន់ រៀនមិនយល់ គ្រូដាក់ទណ្ឌកម្មធ្ងន់។
3 . លេងជាមួយពួកម៉ាកមិនសប្បាយ ចូលជាមួយមិត្តភ័ក្តិ និងគ្រូមិនចុះ មិនចេះសម្របខ្លួន។
4 . ការចិញ្ចឹមថែទាំដែលបណ្ដោយតាមចិត្តកូន ឬធ្វើជំនួសកូនច្រើនពេក រហូតដល់ក្មេងធ្លាប់ខ្លួននឹងទង្វើតាមចិត្តខ្លួនឯង។
5 . មិនទាន់មានជំនាញគ្រឹះលើផ្នែកការលេង ការនៅរួមជាមួយអ្នកដទៃ និងការកែបញ្ហាចំពោះមុខ។
កូនមិនព្រមទៅសាលារៀន គួរធ្វើយ៉ាងណាទើបល្អ?
1 . កែសម្រួលវិធីការចិញ្ចឹមថែទាំ ឱ្យចេះជួយខ្លួនឯង និងចេះជួយធ្វើការងារផ្ទះសួនរួម ដោយមានឪពុកម្ដាយនៅក្បែរ ចាំលើកទឹកចិត្ត តែមិនធ្វើជំនួសកូនទាំងអស់នោះទេ។
2 . បង្ហាត់ជំនាញគ្រឹះលើផ្នែកការលេង និងការរស់នៅរួមជាមួយអ្នកដទៃ។
3 . ឱ្យទៅសាលារៀនរាល់ថ្ងៃដោយមិនចាំបាច់ត្រូវឱ្យឈប់ ដោយសុំជំនួយពីគ្រូៗឱ្យមកនៅចាំទទួលនៅកន្លែងទទួលក្មេង ដើម្បីធ្វើឱ្យរយៈពេលបែកគ្នាពេលជូនទៅដល់សាលាខ្លីបំផុត។
4 . ជួយកូនឱ្យបានលេងជាមួយមិត្តភ័ក្ដិនៅសាលាឱ្យបានច្រើន។
5 . ទៅទទួលមកផ្ទះវិញឱ្យចំពេលវេលា។
ពេលព្រឹកមិនគួរអប់រំប្រដៅដាស់តឿនច្រើនទេ នៅពេលក្មេងមានអាកប្បកិរិយាយឺតយ៉ាវ ស្ពឹកស្រពន់។ បើមិនព្រមងូតទឹក ក៏មិនអីដែរ តែត្រូវទៅសាលា ឬបើមិនព្រមញ៉ាំបាយ ក៏យកបាយដាក់ប្រអប់ទៅ។ ខណៈពេលធ្វើដំណើរ ចូរនាំនិយាយពីរឿងសប្បាយៗ ដូចជារៀបផែនការថា នឹងធ្វើអ្វីនៅពេលល្ងាច ជាដើម។ កុំចាប់អារម្មណ៍នឹងពាក្យសម្ដីដដែលៗរបស់កូន កុំខឹង និងកុំធុញទ្រាន់ និងបើនៅតែមិនបានផលល្អទៀតនោះ ចូរទៅប្រឹក្សាជាមួយគ្រូពេទ្យចិត្តសាស្រ្តកុមារ៕
September 28, 2020
បច្ចេកវិទ្យាទំនើបឆ្លាតវៃ AI ត្រូវបានបំពាក់លើម៉ាស៊ីនបោកគក់ LG ទ្វារពីមុខជំនាន់ចុងក្រោយ
ក្រុមហ៊ុនអេឡិចត្រូនិច LG កំពុងពង្រីកលទ្ធភាពនៃម៉ាស៊ីនបោកគក់ផ្នែកខាងមុខប្រកបដោយភាពច្នៃប្រឌិតរបស់ខ្លួនជាមួយនឹង ThinQ AI ដែលដំណើរការដោយ Direct Drive ដែលជាកម្មសិទ្ធិរបស់ក្រុមហ៊ុនផ្ទាល់ទៅកាន់ទីផ្សារពិភពលោកអោយបានកាន់តែច្រើននៅចុងឆ្នាំនេះ។ ជាមួយនឹងអត្ថប្រយោជន៍នៃម៉ាស៊ីនបោកគក់ AI DD ថ្មីនេះ គឺអាចផ្តល់ជូននូវការសំអាតយ៉ាងល្អនិងមានប្រសិទ្ធភាពខ្ពស់ ដោយកំណត់នូវទំងន់និងប្រភេទសាច់ក្រណាត់នៃបន្នីមួយៗដើម្បីផ្តល់នូវលទ្ធផលបោកគក់បានលឿននិងប្រសើរជាងមុន ជាមួយនឹងមុខងារជាច្រើនដូចខាងក្រោមនេះ។
បច្ចេកវិទ្យាទំនើបឆ្លាតវៃ AI DD
ជាមុខងារឆ្លាតវៃដែលជ្រើសរើសនូវចលនាបោកគក់ដ៏ប្រសើរបំផុតសម្រាប់ការថែរក្សាសម្លៀកបំពាក់របស់លោកអ្នកអោយនៅតែស្អាតថ្មី 18% បន្ថែមទៀត។
តើមុខងារ AI DD ដំណើរការដូចម្តេច?
មុខងារ AI DDTH នៅក្នុងម៉ាស៊ីនបោកគក់មិនត្រឹមតែរកឃើញទម្ងន់សម្លៀកបំពាក់ប៉ុណ្ណោះទេ ថែមទាំងពិនិត្យឃើញប្រភេទនៃសាច់ក្រណាត់ ហើយវានឹងជ្រើសរើសចលនានៃការបោកគក់ល្អបំផុតសម្រាប់សម្លៀកបំពាក់ដោយខ្លួនឯងដូច្នេះអ្នកមិនចាំបាច់ស្មុគស្មាញក្នុងការជ្រើសរើសមុខងារក្នុងការបោកគក់ទៀតនោះទេ។
មុខងារស្ទីម Steam
បច្ចេកវិទ្យា LG Steam+TH ជួយបំបាត់អាឡែរហ្សីរហូតដល់ 99.9% ដូចជាធូលីតូចៗដែលនៅជាប់នឹងសាច់ក្រណាត់ដែលអាចបង្កឱ្យមានអាឡែរហ្សី ឬ បញ្ហាផ្លូវដង្ហើម និងជួយកាត់បន្ថយស្នាមជ្រួញលើសម្លៀកបំពាក់បានរហូតដល់ 30%។
TurboWash™360º
តើអ្នកដឹងទេថាមុខងារ TurboWash™360º នឹងផ្ដល់អោយការបោកគក់សម្លៀកបំពាក់បានស្អាត និងជួយកាត់បន្ថយការខូចសាច់ក្រណាត់ហើយលឿនក្នុងរយៈពេលត្រឹមតែ 39នាទីប៉ុណ្ណោះ។
បោកផងសម្ងួតផងក្នុងពេលតែមួយ ( Washer Dryer)
ដោយសារតែម៉ូឌែលនេះភ្ជាប់មកទាំងការបោកគក់ និងការសម្ងួតសម្លៀកបំពាក់នៅក្នុងម៉ាស៊ីនតែមួយ ដូច្នេះវាធ្វើអោយចំណេញទីកន្លែងទុកដាក់ នឹងសន្សំសំចៃប្រាក់ថែមទៀតផង។

មុខងារបោកគក់ 6 Motion Direct Drive
បច្ចេកវិទ្យាម៉ាស៊ីនបោកគក់ 6 ចលនាសម្របទៅតាមសាច់ក្រណាត់គ្រប់ប្រភេទដែលអាចសម្អាតបានស្អាតល្អប្រៀបដូចបោកគក់ដោយដៃផ្ទាល់អញ្ចឹងដែរ។
កម្មវិធី Smart ThinQ
Smart ThinQ ប្រើដើម្បីបញ្ជាម៉ាស៊ីនបោកគក់តាមរយៈ Wi-Fi និងប្រើបញ្ជាពីចំងាយឆ្ងាយក៏បានដូចគ្នា។ កម្មវិធី NFC ប្រើសំរាប់បញ្ជាម៉ាស៊ីនបោកដោយមិនប្រើ Wi-Fi តែត្រូវប្រើនៅកែ្បរម៉ាស៊ីនបោក (អាចប្រើបានតែសម្រាប់ស្មាតហ្វូន Android ប៉ុណ្ណោះ) ។
September 28, 2020
អាមេរិក ដាស់តឿន ឱ្យគ្រប់គ្នាប្រយ័ត្នស្ថានីយអវកាសអន្តរជាតិរបស់ ចិន
ស្ថានីយអវកាសអន្តរជាតិដែលមានឈ្មោះថា «Tiangong» កំពុងត្រូវបានសាងសង់ ដោយមានការចូលរួមពីប្រទេសចំនួន17 ក្នុងនោះរួមមានទាំង ចិន បារាំង អាល្លឺម៉ង់ និងជប៉ុនផងដែរ។ ចិន រំពឹងថា ខ្លួននឹងអាចប្រតិបត្តិការស្ថានីយអវកាសនេះ ត្រឹមឆ្នាំ2022។ រីឯស្ថានីយអវកាសអន្តរជាតិ (ISS) របស់អាមេរិក ដែលត្រូវបានបាញ់បង្ហោះក្នុងឆ្នាំ1998 ធ្វើជាមន្ទីរពិសោធន៍វិទ្យាសាស្រ្តអវកាស ត្រូវបានរំពឹងថា នឹងបញ្ចប់ប្រតិបត្តិការក្នុងឆ្នាំ2030 ចំណែកដៃគូដែលចូលរួមក្នុងប្រតិបត្តិការនេះ រួមមានដូចជា រុស្ស៊ី ជប៉ុន អឺរ៉ុប និងកាណាដាជាដើម។
បន្ទាប់ពីទទួលបានដំណឹងខាងលើ លោក Jim Bridenstine ប្រធានអង្គការ NASA បានថ្លែងព្រមានទៅកាន់សភាអាមេរិក កាលពីថ្ងៃទី23 ខែកញ្ញា ឆ្នាំ2020 អំពីភាពឈានមុខរបស់ស្ថានីយអវកាសចិន។ លោកបានថ្លែងថា៖ «ខ្ញុំសូមប្រាប់អ្នកនូវរឿង1 ដែលខ្ញុំពិតជាមានការព្រួយបារម្ភខ្លាំងណាស់ ហើយនោះគឺជាអ្វី ដែលកំពុងខិតជិតមកដល់ហើយ គឺនៅពេលស្ថានីយអវកាសអន្តរជាតិ នោះនឹងបញ្ចប់អាយុកាលប្រើប្រាស់ ដូច្នេះដើម្បីអាចឱ្យអាមេរិក បន្តមានវត្តមាននៅលើគន្លងផែនដី យើងត្រូវតែរៀបចំស្ថានីយអវកាសថ្មី»។
លោក Jim Bridenstine បន្តថា៖ «យើងចង់ឃើញការបង្កើតដៃគូរវាងរដ្ឋ និងឯកជន ដែលអង្គការ NASA អាចចុះកិច្ចព្រមព្រៀងជាមួយក្រុមហ៊ុននានា ដូច្នេះយើងអាចរក្សាវត្តមានមនុស្សជាអចិន្រ្តៃយ៍លើគន្លងផែនដីបាន»។ ជាមួយគ្នានេះ មេអង្គការ NASA បានលើកឡើងពីចិនថា ប្រទេសនេះកំពុងសង់ស្ថានីយអវកាសអន្តរជាតិ និងមិនតែប៉ុណ្ណោះការអភិវឌ្ឍនេះ គឺមានការចូលរួមពីប្រទេសដៃគូអាមេរិកទៀតផង។ «វានឹងក្លាយជាសោកនាដកម្ម ប្រសិនបើយើងបោះបង់គន្លងផែនដីនេះចោល»៕
September 28, 2020
Samsung Galaxy S20 Fan Edition ជាស្មាតហ្វូនកម្លាំងខ្លាំង តែតម្លៃទាបជាង S20 ធម្មតា
កាលពីយប់ថ្ងៃទី24 កញ្ញាកន្លងទៅ ក្រុមហ៊ុន សាមសុង បានបង្ហាញចេញផ្លូវការនូវស្មាតហ្វូនម៉ូដែលពិសេសគឺ Galaxy S20 Fan Edition ដោយវាមានបូកបញ្ចូលលក្ខណសម្បត្តិពិសេសៗលើស Galaxy S20 ដែលចេញកាលពីដើមឆ្នាំ និងមានតម្លៃទាបជាងទៀតផង។
ការកុម្ម៉ង់ទិញ S20 FE លើទីផ្សារមួយចំនួនបានបើកទទួលកាលពីថ្ងៃទី23 ខែកញ្ញាតទៅ ហើយសម្រាប់នៅអាមេរិកមានលក់ផ្ដាច់មុខតែប្រភេទ 5G ក្នុងតម្លៃ 699ដុល្លារប៉ុណ្ណោះ ឯនៅទីផ្សារចក្រភពអង់គ្លេស មានទាំងប្រភេទ 4G និង 5G ដោយប្រភេទ 4G តម្លៃ 599ផោន ( 763ដុល្លារ) និងប្រភេទ 5G តម្លៃ 699ផោន ( 890ដុល្លារ)។
លក្ខណសម្បតិ្តត្រួសៗលើ Galaxy S20 FE គឺមានចែកចេញជាប្រភេទ 4G និងប្រភេទ 5G ដែលប្រភេទ 4G ប្រើប្រាស់ឈីប Exynos 990 និងប្រភេទ 5G ប្រើប្រាស់ឈីប Snapdragon 865។ ម៉ូដែលទាំង2 មាន RAM ប្រភេទ LPDDR5 ទំហំ 6GB ដូចគ្នា និងប្រើប្រាស់អង្គផ្ទុក UFS 3.0 ទំហំ 128GB មានរន្ធដោតមេម៉ូរីបានទំហំដល់ 1TB។
អេក្រង់របស់ S20 FE មានចោះរន្ធតូចចំកណ្ដាលសម្រាប់បំពាក់កាមេរ៉ាទំហំ 32MP ដែលមាន Aperture f/2.2 ហើយវាមានបង្កប់ទ្រនាប់ស្គែនម្រាមដៃលើអេក្រង់ ដែលមានទំហំ 6.5អ៊ីញ ជាប្រភេទ Super AMOLED អាចបង្ហាញរូបភាពក្នុងកម្រិត FHD+ មាន Refresh Rate 120Hz និងគាំទ្រនូវ HDR 10+ ហើយអេក្រង់នេះការពារដោយកញ្ចក់ Gorilla Glass 3។
កាមេរ៉ាខាងក្រោយ 3គ្រាប់ ដែលកាមេរ៉ាមេទំហំ 12MP មានបច្ចេកវិទ្យា Dual-Pixel និងមានបច្ចេកវិទ្យារក្សាលំនឹង OIS ហើយមាន Aperture f/1.8។ កាមេរ៉ាបន្ទាប់ជា Ultrawide ទំហំ 12MP ដែលមាន Aperture f/2.2 និងចុងក្រោយជាកាមេរ៉ា Telephoto ទំហំ 8MP ដែលអាច Zoom Optical 3ដង និង Zoom Digital បាន 30ដង ហើយមាន Aperture f/2.4។ វាមានថ្មទំហំ 4500mAh អាចសាកថ្មបាន 25វ៉ាត់ និងសាកថ្មឥតប្រើខ្សែបានកម្លាំង 15វ៉ាត់ និងមានមុខងារ Wireless PowerShare ទុកសាកថ្មឱ្យឧបករណ៍ដទៃបានដែរ។

ក្នុងប្រអប់មានដុំសាកកម្លាំងត្រឹម 15វ៉ាត់ប៉ុណ្ណោះ និងនៅមានចំណុចពិសេសផ្សេងទៀត ដូចជារន្ធបំពងសំឡេងស្ទេរីអូ AKG ជាមួយបច្ចេកវិទ្យាសំឡេង Dolby, សមត្ថភាពធន់នឹងទឹក និងធូលីដីកម្រិត IP68 និងប្រើប្រាស់ USB-C ជាមួយ USB 3.2 ជាដើមទៀតផង៕
September 28, 2020
ប្រតិបត្តិការសម្រកទម្ងន់ក្រោយពេលប្រសូតបុត្ររួច
ស្រ្តីដែលទើបឆ្លងទន្លេរួចជាច្រើននាក់បានរអ៊ូឱ្យស្ដាប់ពាក់ព័ន្ធនឹងទម្ងន់ខ្លួនដែលមើលទៅដូចជាគ្មានសញ្ញាថានឹងស្រកចុះងាយៗនោះឡើយ ធ្វើឱ្យពួកគេពិបាកចិត្តខ្លាំង រហូតលែងចង់ញ៉ាំបាយទៀតផង។ នេះគឺជាបញ្ហាធំមួយរបស់ស្រ្តីដែលទើបប្រសូតបុត្ររួចគ្រប់រូប តែមិនចាំបាច់បារម្ភទេ ព្រោះអ្នកគ្រូ ឆវី មានវិធីគ្រប់គ្រងទម្ងន់ខ្លួនដោយមិនចាំបាច់វេទនាខ្លួនមកជម្រាបជូន ដោយគ្រាន់តែកែសម្រួលនិស្ស័យក្នុងការទទួលទានក៏អាចសម្រកទម្ងន់ខ្លួនបានដែរ។
– ញ៉ាំអាហារយ៉ាងមានតុល្យភាព ៈ គ្រប់គ្រងចំណែក និងបរិមាណអាហារពពួកបាយ និងម្សៅ បន្លែ ផ្លែឈើ ត្រី សណ្ដែក ស៊ុត ផ្សិត តៅហ៊ូ ផលិតផលធ្វើអំពីទឹកដោះ និងខ្លាញ់ ញ៉ាំឱ្យស័ក្តិសមល្មមក្នុងមួយថ្ងៃៗ។
– ញ៉ាំអាហារធម្មជាតិ មិនកែច្នៃ ៈ ដូចជា គ្រាប់ធញ្ញជាតិផ្សេងៗ បាយអង្ករសម្រូប ពោត មើមត្រាវ ដំឡូង សណ្ដែកខ្មៅ សណ្ដែកក្រហម និងគ្រាប់ធញ្ញជាតិដែលមានប្រេង ញ៉ាំតែល្មមសមរម្យដើម្បីជាប្រភពផ្ដល់ថាមពល វីតាមីន សារធាតុរ៉ែ និងកាកសរសៃអាហារ។
– ញ៉ាំបន្លែ និងផ្លែឈើដែលមានរសជាតិមិនផ្អែមខ្លាំង និងគ្រប់ 5ពណ៌ ៈ គឺពណ៌ស្វាយ ក្រហម បៃតង ស លឿងទុំ ដើម្បីបន្ថែមវីតាមីន សារធាតុរ៉ែ និងគីមីធម្មជាតិ សារធាតុគ្រាប់ពណ៌ក្នុងបន្លែផ្លែឈើបង្កើនប្រព័ន្ធការពារជំងឺ។
– ចេះញ៉ាំ ៈ គឺចេះចៀសវាងពីអាហារដែលមានខ្លាញ់ច្រើន ផ្អែមខ្លាំង និងប្រៃខ្លាំង ចេះញ៉ាំឱ្យតិច និងចេះតមមិនញ៉ាំតែម្ដង។
– ញ៉ាំអាហារល្មមតែឆ្អែត ៈ ក្នុងមួយពេលៗ មិនបរិភោគច្រើនជ្រុលពេក។ ទទួលទានបែប បន្លែ ៈ បាយ ៈ ក្រុមអាហារមានប្រូតេអ៊ីន = 2 ៈ 1 ៈ 1 ។
– ញ៉ាំអាហារពេលព្រឹករាល់ថ្ងៃ ៈ អាហារពេលព្រឹក គឺជាពេលអាហារចម្បងដ៏សំខាន់ ត្រូវទទួលទានរាល់ថ្ងៃ ដើម្បីចែកចាយបរិមាណថាមពលអាហារឱ្យស័ក្តិសមនឹងតម្រូវការរបស់រាងកាយ ក្រៅពីនោះនៅជួយឱ្យរាងកាយមិនឃ្លានខ្លាំងនៅពេលរសៀល និងគ្រប់គ្រងអាហារពេលល្ងាច ដោយញ៉ាំតែបន្តិចបន្តួច។
– ញ៉ាំអាហារពេលល្ងាចតាំងពីថ្ងៃ ៈ ពេលសម្រាប់អាហារល្ងាច គួរញ៉ាំមុនយ៉ាងតិច 4ម៉ោងមុនពេលចូលគេង ព្រោះមិនដូច្នោះទេ អំឡុងពេលគេងលក់ ប្រព័ន្ធប្រសាទនឹងបញ្ជាឱ្យរាងកាយសម្រាក ដូច្នេះអាហារដែលញ៉ាំចូលទៅមុននឹងបន្តិចនឹងត្រូវរំលាយ និងក្លាយជាជាតិខ្លាញ់ប្រមូលសន្សំក្នុងរាងកាយ។
បានដឹងបែបនេះហើយ ក៏ត្រូវតែប្រតិបត្តិតាមយ៉ាងម៉ឺងម៉ាត់ផង ដើម្បីស្រ្តីជាម្ដាយវ័យក្មេងថ្មោងថ្មីទាំងឡាយមានរូបរាងស្វែលស្អាតគ្រប់ៗគ្នា និងអាចគ្រប់គ្រងបេះដូងស្វាមីជាប់ក្នុងដៃរហូត៕
September 28, 2020
Google Maps អាប់ឌែតថ្មី អាចឱ្យលោកអ្នកដឹងពីព័ត៌មាន កូវីដ-19 ដោយគ្រាន់តែចុចលើមុខងារស្រួលៗខាងក្រោមនេះ
”COVID-19 layer” នឹងក្លាយជាមុខងារថ្មី 1ទៀតនៅលើកម្មវិធី Google Maps ដែលក្រុមហ៊ុនបានធ្វើការចុះផ្សាយនៅលើប្លុករបស់ខ្លួនកាលពីពេលថ្មីៗនេះ។
ប្រភពច្បាស់ការណ៍ខាងលើ ក៏បានបញ្ជាក់បន្ថែមទៀតថា រាល់ទិន្នន័យដែលយកមកដាក់លើមុខងារថ្មីនេះ បានមកពីរបាយការណ៍ជាក់លាក់របស់ WHO, ស្ថាប័នសុខាភិបាលផ្លូវការជាច្រើន របស់ប្រទេសដែលមាននៅក្នុងតារាងនៃកម្មវិធី Google និងបានមកពីភ្នាក់ងារពិសេសនៃស្ថាប័នសុខាភិបាលគ្រប់អង្គភាព។
គោលបំណងនៃការធ្វើកំណែអាប់ដែតបន្ថែមនេះ Google ចង់ឱ្យអ្នកប្រើប្រាស់ទទួលបានព័ត៌មានជាក់លាក់នៅកន្លែងតែមួយ និងបង្ការខ្លួនកុំឱ្យឆ្លងវីរុស ពេលចង់ទៅកន្លែងណាមួយ។ រីឯរបៀបប្រើងាយៗគឺ
-បើពណ៌ប្រផេះ គឺតិចជាង 1នាក់
-បើពណ៌លឿង គឺនឹងមានចាប់ពី 1 ដល់ 10នាក់
-បើពណ៌ទឹកក្រូច គឺនឹងមានចាប់ពី 10 ទៅ 20នាក់
-បើពណ៌ទឹកក្រូចចាស់ គឺនឹងមានចាប់ពី 20 ទៅ 30នាក់
-បើពណ៌ក្រហម គឺចាប់ពី 30 ទៅ 40នាក់
ហើយបើពណ៌ក្រហមក្រម៉ៅវិញ គឺចាប់ពី 40នាក់ឡើងទៅ។
មុខងារនេះអាចអាប់ឌែតបាន ទាំងលើ iOS និង Android៕

September 28, 2020