Author: ធឿន មករា

  • ភាពខុសប្លែករវាងទឹកដោះម្ដាយ និងម្សៅទឹកដោះគោ

    ភាពខុសប្លែករវាងទឹកដោះម្ដាយ និងម្សៅទឹកដោះគោ

    ថ្ងៃនេះ អ្នកគ្រូ ឆវី សូមនាំមកជូននូវរឿងរ៉ាវរបស់ “ទឹកដោះម្ដាយ” ដែលមិនមែនជារឿងឆ្ងាយពីខ្លួនយើងឡើយ ព្រោះយើងគ្រប់គ្នាប្រហែលជាសុទ្ធតែធ្លាប់បៅទឹកដោះម្ដាយរួចមកហើយសឹងតែទាំងអស់គ្នា និងទោះជាពេលនេះយើងនៅមិនទាន់មានបុត្រក៏ដោយ តែនាពេលអនាគត វាក៏មិនប្រាកដដែរ ជួនកាលយើងអាចនឹងបានឃើញមុខកូនតូចរបស់យើងក៏ថាបានដែរ ដូច្នេះវាមិនមែនជារឿងអីខុសទាស់ឡើយ បើសិនជាយើងបានដឹងពីរឿងទាំងអស់នេះទុកជាមុននោះ មានទេស្រីៗយើង?។

    ហេតុផលដែលអ្នកម្ដាយមួយចំនួននិយមឱ្យកូនបៅទឹកដោះគោ(ម្សៅទឹកដោះគោ) ព្រោះតែគិតថា ក្រៅពីវាងាយស្រួលហើយ ម្សៅទឹកដោះគោ ក៏ជាទឹកដោះដូចគ្នាដែរ ហេងស៊យថ្លៃជាងទៀតផង ដូច្នេះបញ្ជាក់ថា វាត្រូវតែមានគុណប្រយោជន៍លំដាប់លេខ1 មិនខាន។ ដោយសារដូច្នេះហើយ ទើបថ្ងៃនេះ អ្នកគ្រូ ឆវី នឹងនាំយកព័ត៌មានលម្អិតមកប្រៀបធៀបឱ្យទាំងអស់គ្នាបានឃើញច្បាស់ៗតែម្ដងអំពីភាពខុសប្លែកគ្នារវាងទឹកដោះម្ដាយ និងម្សៅទឹកដោះគោ។

    ភាពខុសប្លែកគ្នារវាងទឹកដោះម្ដាយ និងម្សៅទឹកដោះគោ

    មកដល់ត្រង់នេះ អ្នកម្ដាយជាច្រើននាក់ប្រហែលជាដឹងខ្លះៗហើយថា តើទឹកដោះម្ដាយល្អប៉ុនណា មែនទេអ្នកម្ដាយដែលកំពុងបំបៅដោះកូនទាំងឡាយ?៕

  • បាក់ឆ្អឹង (Bone fracture) និងការសង្រ្គោះបឋម!

    បាក់ឆ្អឹង (Bone fracture) និងការសង្រ្គោះបឋម!

    បាក់ឆ្អឹង គឺការមានស្នាមដាច់ ស្នាមបែក ឬមានភាពមិនតជាប់គ្នារបស់សាច់ឆ្អឹង ជាសភាវដែលជួបប្រទះញឹកញាប់នៅលើកុមារ និងមនុស្សធំ។ ភាគច្រើនៗបណ្ដាលមកពីគ្រោះថ្នាក់ឧប្បត្តិហេតុដែលមានកម្លាំងប៉ះខ្លាំងរហូតដល់ធ្វើឱ្យឆ្អឹងបាក់ និងបង្កឱ្យកើតអាការឈឺចុកចាប់ ហើម កម្រើក ឬធ្វើចលនាមិនបាន ឬធ្វើចលនាបានដោយខុសប្រក្រតី។ នាពេលបច្ចុប្បន្ននេះការព្យាបាលឆ្អឹងបាក់មានភាពទំនើបជាងមុនឆ្ងាយណាស់ អាចព្យាបាលឱ្យជា និងប្រើប្រាស់បានឡើងវិញក្នុងរយៈពេលដ៏ខ្លី មិនចាំបាច់ពិការដោយសារភាពខុសពីទម្រង់ដើម ឬឆ្អឹងវែងខ្លីដូចកាលពីមុនទៀតឡើយ។

    មូលហេតុរបស់ការបាក់ឆ្អឹង

    ជាប្រក្រតី ឆ្អឹងក្នុងផ្នែកនីមួយៗក្នុងរាងកាយមានភាពរឹងមាំ និងមានតួនាទីទប់ទល់នឹងកម្លាំងប៉ះបុកពីការធ្វើកិច្ចការងារផ្សេង​ៗបានយ៉ាងល្អ តែបើសិនជាបានទទួលកម្លាំងបុកប៉ះយ៉ាងខ្លាំងក្លា ឆ្អឹងក៏អាចបែក និងបាក់បានដែរ ដោយមានមូលហេតុដូចតទៅ ៈ

    – ជួបឧប្បត្តិហេតុ ដូចជា ដួល រថយន្តបុក រថយន្តក្រឡាប់ ដែលបណ្ដាលឱ្យរងរបួសធ្ងន់ធ្ងរ។

    – ការលេងកីឡាធ្ងន់ៗ ខ្លាំងៗ។

    – ត្រូវវាយ ឬត្រូវរងកម្លាំងបោកប៉ះខ្លាំងក្លា។

    – ធ្លាក់ពីលើទីខ្ពស់ ឬធ្លាក់មកបោកប៉ះនឹងកន្លែងដែលរឹងខ្លាំង។

    – នៅលើមនុស្សចាស់ អ្នកជំងឺពុកឆ្អឹង ឬអ្នកជំងឺមហារីកប្រភេទខ្លះ ពេលប៉ះនឹងកម្លាំងបោកប៉ះត្រឹមតែបន្តិចបន្តួច ក៏អាចបណ្ដាលឱ្យបាក់ឆ្អឹងបានដែរ(ភាគច្រើនឆ្អឹងភ្លៅ ឬឆ្អឹងត្រគាក)។

    អាការរបស់ការបាក់ឆ្អឹង

    – មានការឈឺចាប់នៅត្រង់ឆ្អឹងដែលបាក់ ឬនៅជុំវិញកន្លែងដែលរងរបួស។

    – មានអាការហើមជុំវិញកន្លែងដែលឆ្អឹងបាក់ មានស្នាមជាំខៀវ និងអាចមានឈាមហូរចេញមក។

    – ផ្នែកដែលបាក់ អាចមានលក្ខណៈខុសរូបរាង ខុសទម្រង់ដើមក្រោយការរងរបួស ដូចជា ដៃជើងកោងង ខ្លីវែងជាងខាងដែលប្រក្រតី ឬវៀចរមួលខុសប្រក្រតី។

    – អ្នកខ្លះអាចមានឆ្អឹងដែលបាក់ចាក់ធ្លុះសាច់ចេញមក។

    – មិនអាចកម្រើក ឬប្រើការកន្លែងដែលមានការបាក់ឆ្អឹងនោះបាន។

    – អាចមានឮសូរសំឡេងបាក់ឆ្អឹងនៅពេលរងឧប្បត្តិហេតុ និងជួនកាលបើសាកល្បងសង្កត់ស្រាលៗ អាចឮសូរសំឡេងឆ្អឹងសង្កៀតគ្នា។

    ការធ្វើបឋមព្យាបាលអាការឆ្អឹងបាក់

    ជាមធ្យម មនុស្សយើងនឹងធ្លាប់ទទួលរងការបាក់ឆ្អឹងប្រមាណជា 2ដងក្នុងមួយជីវិត ទោះជានៅក្នុងប្រទេសដែលអភិវឌ្ឍន៍ហើយក៏ដោយ ដូច្នេះទើបវាមិនមែនជារឿងដែលកើតឡើងដោយកម្រនោះទេ។ នៅពេលវាដូច្នេះ យើងគួរផ្ដល់ភាពសំខាន់ក្នុងការរៀនយល់ដឹងពីវិធីការធ្វើបឋមព្យាបាលអាការបាក់ឆ្អឹងយ៉ាងត្រឹមត្រូវដើម្បីទុកជួយសង្រ្គោះខ្លួនឯង ក្រុមគ្រួសារ ឬអ្នកដទៃដែលធ្លាក់ក្នុងស្ថានការណ៍អាសន្នបែបនេះ។

    1 . វាយតម្លៃបរិវេណដែលរងរបួស ព្រោះមុខរបួសពីឧប្បត្តិហេតុមិនបានធានាថា សុទ្ធតែមើលឃើញឆ្អឹងបាក់ទាំងអស់នោះទេ ជាពិសេសនៅលើក្បាល ឆ្អឹងខ្នង ឬឆ្អឹងត្រគាកទាល់តែមានការថត X-Ray ទើបបញ្ជាក់បានច្បាស់ តែបើសិនសង្ស័យថា មានឆ្អឹងបាក់ ឬប្រេះនៅត្រង់បរិវេណទាំងនោះ មិនគួរធ្វើការបំផ្លាស់ទីជនរងគ្រោះជាដាច់ខាត។

    2 . ទូរស័ព្ទហៅរថយន្តសង្រ្គោះឱ្យបានលឿនបំផុត បើសិនឃើញមានមុខរបួសធ្ងន់ធ្ងរ និងគិតថា ប្រហែលជាមានឆ្អឹងបាក់។

    3 . បើឃើញមានចេញឈាម ចូរធ្វើការឃាត់ឈាមជាមុនជានិច្ច មិនថាឆ្អឹងនឹងបាក់ឬក៏អត់នោះទេ ព្រោះថា ការដែលឈាមហូរចេញមកពីសរសៃឈាមធំនឹងធ្វើឱ្យជនរងគ្រោះស្លាប់ក្នុងរយៈពេលតែប៉ុន្មាននាទីប៉ុណ្ណោះ។

    4 . តាំងស្មារតី និងពិនិត្យមើលខ្លាចក្រែងជនរងគ្រោះមានអាការភិតភ័យរហូតគាំងបេះដូង ព្រោះប្រតិកម្មភាគច្រើនរបស់ជនរងគ្រោះដែលគេតែងសង្កេតឃើញគឺ មានអារម្មណ៍ភិតភ័យខ្លាំង ភ្ញាក់ផ្អើល និងសន្លប់បាត់ស្មារតី។ អ្នកជួយសង្គ្រោះគួរនិយាយយ៉ាងជឿជាក់ថា ឡានពេទ្យជិតមកដល់ហើយ និងអ្វីគ្រប់យ៉ាងនឹងមានសុវត្ថិភាព។

    ដំបូន្មានសំខាន់ដែលលោកអ្នកចាំបាច់ត្រូវដឹង

    – បើចាំបាច់ត្រូវដោះសម្លៀកបំពាក់ជនរងគ្រោះចេញ គួរប្រើវិធីកាត់តាមគែមថ្នេរខោ ឬអាវ ដោយឱ្យជនរងគ្រោះនៅដេកស្ងៀម ដើម្បីកាត់បន្ថយការធ្វើចលនាឱ្យនៅតិចបំផុត។

    -បើឆ្អឹងបាក់ធ្លុះចេញមកក្រៅសាច់ ហាមទាញឆ្អឹងចូលទៅវិញ ព្រោះនឹងធ្វើឱ្យមេរោគ និងវត្ថុកខ្វក់ផ្សេងៗពីខាងក្រៅចូលទៅក្នុងមុខរបួស តែគួរប្រើក្រណាត់ស្អាតបិទមុខរបួស ហើយចងអប និងរង់ចាំរថយន្តសង្រ្គោះ។

    – ក្នុងករណីជនរងគ្រោះបាក់ឆ្អឹងនៅត្រង់ភ្លៅ ឆ្អឹងខ្នង ក្បាល ឬក ឬឆ្អឹងត្រគាក មិនគួរធ្វើចលនារាងកាយជនរងគ្រោះជាដាច់ខាត និងរង់ចាំរហូតរថយន្តសង្រ្គោះមកដល់ ព្រោះការធ្វើចលនាដែលខុសវិធី នឹងធ្វើឱ្យកន្លែងរបួសកាន់តែធ្ងន់ធ្ងរឡើង។

    – តមឱ្យជនរងគ្រោះញ៉ាំទឹក ឬចំណីអាហារ រហូតទាល់តែដល់ដៃគ្រូពេទ្យ ព្រោះជនរងគ្រោះខ្លះអាចចាំបាច់ត្រូវធ្វើការវះកាត់​ ភ្លាមៗ៕

  • នៅពេលកូនតូចឈានចូលខែទី 12 (អាយុ 1ឆ្នាំ)

    នៅពេលកូនតូចឈានចូលខែទី 12 (អាយុ 1ឆ្នាំ)

    ខែទី 12

    លក្ខណៈរបស់កូនតូច

    នៅពេលកូនអាយុជិតគ្រប់ 1ឆ្នាំ ភាពរពឹសរបស់កូនក៏រឹតតែខ្លាំងក្លាទ្វេគុណឡើងដែរ ទោះជាក្មេងខ្លះនៅមិនទាន់អាចដើរបានក៏ដោយ តែក៏អាចវារបានលឿនរហូតឪពុកម្ដាយដេញតាមចាប់មិនទាន់ក៏មាន។ កាលនៅជាក្មេងតូច ការចិញ្ចឹមមើលថែក្មេងប្រុស និងក្មេងស្រីមិនទាន់មានភាពខុសប្លែកពីគ្នាប៉ុន្មានឡើយ តែពេលមកដល់វ័យនេះ នឹងហាក់ដូចជាមើលឃើញច្បាស់លាស់ហើយ ដូចជា ក្មេងប្រុសនឹងមានសញ្ញារពឹសចេញឱ្យឃើញយ៉ាងច្បាស់តែម្ដង ធ្វើចលនារហ័សរហួន ចំណែកក្មេងស្រីនឹងហាក់ដូចជារាងនឹងធឹងបន្តិច ខ្លាំងទៅខាងបញ្ចេញសំឡេង ចង់និយាយស្ដីច្រើនជាង ដែលទាំងអស់នេះជាវិវឌ្ឍនាការប្រក្រតីរបស់ក្មេង។

    វ័យនេះ ក្ដីចង់ដឹងចង់ឃើញកើនឡើងកាន់តែច្រើន ដូច្នេះអ្នកម្ដាយហាមភ្លេចខ្លួនជាដាច់ខាត មិនថាតែតោងឡើងជណ្ដើរ មួលបើកចង្រ្កានហ្គាស ទាញឌុយភ្លើង បើកគម្របដបលេង សុទ្ធតែជារឿងដែលគួរឱ្យចាប់អារម្មណ៍សម្រាប់កូនតូចទាំងអស់។

    ដល់វ័យត្រូវប្ដូរទឹកដោះឱ្យហើយ

    អ្នកម្ដាយគួរចាប់ផ្ដើមប្ដូរពីទឹកដោះគោម្សៅទៅជាទឹកដោះគោប្រអប់បានហើយ ដោយឱ្យបឺតពីប្រអប់ដោយបំពង់បឺតតែម្ដង ឬចាក់ដាក់កែវញ៉ាំក៏បាន ព្រមទាំងចាប់ផ្ដើម(ឱ្យផ្ដាច់)ឱ្យឈប់រវល់ជាមួយដបទឹកដោះគោបានហើយ។ នៅពេលកូនធ្វើបានសម្រេច ក៏កុំភ្លេចសរសើរ និងបញ្ចេញកាយវិការត្រេកអរឱ្យកូនបានឃើញផង កូននឹងមានមោទនភាព។ វិធីផ្ដាច់ដបទឹកដោះគោគឺ ដំបូងៗអ្នកម្ដាយគួរគេងជាមួយកូន និយាយរឿងនិទានឱ្យកូនស្ដាប់ ឬបំពេរកូនរហូតដល់គេងលក់ ព្រោះបើមានអ្នកម្ដាយនៅគេងជាមួយ កូនច្រើនតែមិននឹកឃើញដបទឹកដោះគោទេ។ នៅពេលធ្វើដូច្នេះបានមួយរយៈពេលហើយ ចូរយកដបទឹកដោះគោទៅលាក់ទុកកុំឱ្យកូនឃើញរហូតតែម្ដង។

    នៅពេលកូនមិនព្រមញ៉ាំបាយ

    ប្រយោជន៍ដែលបានមកពីបាយគឺ ម្សៅ និងជាតិស្ករ និងប្រូតេអ៊ីន ឬញ៉ាំនំប៉័ង និងគុយទាវក៏ទទួលបានម្សៅ និងជាតិស្ករដូចគ្នា ចំណែកត្រី ស៊ុត និងសាច់សត្វវិញផ្ដល់ប្រូតេអ៊ីនច្រើនជាងបាយ ដូច្នេះទោះជាកូនមិនព្រមញ៉ាំបាយមែន តែបើបានអាហារផ្សេងគ្រប់គ្រាន់ក៏មិនមានបញ្ហាអ្វីដែរ តែបើមិនព្រមញ៉ាំបាយ ហើយញ៉ាំតែនំពេញមួយថ្ងៃដែលមានតែម្សៅ និងស្ករក្នុងបរិមាណច្រើន នឹងធ្វើឱ្យកូនឆ្អែត មិនចង់ញ៉ាំបាយ ធ្វើឱ្យខ្វះសារធាតុអាហារ។ បើកូនមានទម្លាប់បែបនេះ ចូរបបួលកូនវារ ឬរត់លេង ឬលេងបិទពួនដេញចាប់ឱ្យបានច្រើន នោះកូនក៏នឹងញ៉ាំបាយបានច្រើនឡើងដោយឯកឯង ដោយអ្នកម្ដាយមិនចាំបាច់បង្ខំឡើយ ព្រោះការដែលកូនបានរត់លេងច្រើននេះ វាប្រៀបដូចជាការហាត់ប្រាណម្យ៉ាងដែរ។ ឯក្មេងដែលឪពុក ម្ដាយ តា យាយតឹងរ៉ឹងខ្លាំង មិនសូវបណ្ដោយឱ្យចេញទៅរត់លេងក្រៅផ្ទះ ច្រើនតែជាក្មេងដែលស្ពឹកស្រពន់ មិនសូវញ៉ាំ មិនសូវមានកម្លាំង និងឈឺញឹកញាប់។ តែយ៉ាងណាក៏ដោយ អ្នកម្ដាយត្រូវចេះសង្កេតមើលថា តើកូនមិនព្រមញ៉ាំបាយដោយសារអ្វី ទើបអាចកែបញ្ហាបានត្រូវ។

    អាការដែលអាចកើតឡើង

    . ធ្មេញកូននៅមិនទាន់ដុះឡើង

    ទោះជាដឹងថា ក្មេងខ្លះឆាប់ដុះធ្មេញ និងក្មេងខ្លះក្រដុះធ្មេញក៏ដោយ តែបើកូនអាយុមួយខួបហើយនៅមិនទាន់ឃើញមានធ្មេញផុសឡើងមួយគ្រាប់ណាសោះនោះ ឪពុកម្ដាយប្រហែលជានឹកកង្វល់ចិត្តមិនតិចឡើយ។ ការពិតទៅ កូនមានធ្មេញនៅក្រោមអញ្ចាញរួចរាល់ហើយ គ្រាន់តែក្រផុសឡើងមកលើសាច់អញ្ចាញប៉ុណ្ណោះ ដូច្នេះអ្នកម្ដាយមិនគួរនឹកកង្វល់ច្រើនពេកឡើយ គួររង់ចាំពេលវេលាបន្តិចទៀត។ មិនគួរទិញថ្នាំវីតាមីនបន្ថែមមកឱ្យកូនញ៉ាំដោយមិនបានប្រយ័ត្នប្រយែងនោះឡើយ ព្រោះនឹងធ្វើឱ្យកូនបានទទួលវីតាមីនច្រើនជ្រុល រហូតកើតអាការធុញទ្រាន់ទឹកដោះគោ ចង់ញ៉ាំតែទឹក ទឹកផ្លែឈើ និងអាចមានអាការជ្រៀតជ្រែកផ្សេងទៀតដូចជា ក្អួតចង្អោរ ហើមពោះ នោមច្រើន និងញឹកញាប់ ទាល់តែឈប់ឱ្យញ៉ាំវីតាមីនទើបបាត់ជាដើម ហើយការឱ្យកូនញ៉ាំកាល់ស្យូម ក៏មិនបានជួយឱ្យធ្មេញឆាប់ដុះឡើងដែរ។

    វិវឌ្ឍនាការរបស់កូន

    – រាងកាយ

    . ឡើងចុះជណ្ដើរកាន់តែពូកែឡើង។

    . ចេះរុញរបស់ផ្សេងៗចេញឆ្ងាយពីខ្លួនបាន។

    . ក្មេងខ្លះអាចដោះខោខ្លួនឯងបានហើយ។

    . ចេះប្រើដៃចាប់នេះ ចាប់នោះបានកាន់តែពូកែឡើង។

    . អាចកាន់វត្ថុ2 នៅក្នុងដៃតែម្ខាងបាន។

    . ចេះចាប់ស្លាបព្រាដើម្បីដួសអាហារដាក់ចូលមាត់បានខ្លះហើយ។

    . ព្យយាមចាប់របស់របរបង្វិលលេង និងចូលចិត្តមើលរបស់ដែលវិលបាន។

    – សង្គមជុំវិញខ្លួន

    . ចេះធ្វើត្រាប់តាមអាកប្បកិរិយាមនុស្សធំបានច្រើនឡើង។

    . ចេះនិយាយមួយម៉ាត់ៗបានច្រើនឡើង តែក្មេងស្រីនឹងឆាប់ចេះនិយាយជាងក្មេងប្រុស។

    . ដឹងពីអារម្មណ៍របស់អ្នកដទៃបានច្រើនឡើង។

    . ខ្លាចមនុស្សមិនដែលស្គាល់(ប្លែកមុខ) និងទីកន្លែងថ្មីៗ ប្លែកៗដែលមិនធ្លាប់ស្គាល់។

    . យល់ដឹងពីហ្គេមដែលកំពុងលេងច្រើនជាងមុន និងចេះលេងហ្គេមបានច្រើនមុខហើយ។

    . កាន់តែចេះបដិសេធការញ៉ាំខ្លាំងជាងមុន និងចាប់ផ្ដើមហួងហែងរបស់លេងខ្លះៗហើយ។

    – លេងជាមួយកូនឱ្យបានញឹកញាប់

    . គួរឱ្យកូនហាត់ដើរដោយខ្លួនឯង ដោយរៀបចំបរិវេណជុំវិញទីនោះឱ្យមានសុវត្ថិភាព កុំឱ្យកូនមានគ្រោះថ្នាក់នៅពេលដួល។ របស់ជ្រុងៗ ស្រួចៗត្រូវប្រមូលទុកឱ្យអស់។ ពេលរៀបចំទីកន្លែងរួចហើយ មិនចាំបាច់ដើរតាមកូនគ្រប់ពេលនោះទេ កូនដួលខ្លះ អីខ្លះគឺជារឿងធម្មតាបើមានកម្រាលព្រំពីក្រោម តែដែលត្រូវប្រយ័ត្នគឺ កម្រាលឥដ្ឋ ឬក្ដារឈើ។

    . អ្នកម្ដាយគួរឧស្សាហ៍និយាយឈ្មោះអវយវៈផ្សេងៗឱ្យកូនបានស្ដាប់ ព្រមទាំងចង្អុលបង្ហាញផង ដើម្បីកូនបានរៀនយល់ដឹងអំពីរាងកាយរបស់ខ្លួនឯងច្រើនឡើង។

    . កុំនិយាយពាក្យថា “កុំ” ជាមួយកូនតូចគ្រប់តែរឿងពេកបើជារឿងដែលមិនមានគ្រោះថ្នាក់ ឧស្សាហ៍ឱ្យកូនបានធ្វើដោយខ្លួនឯង ដើម្បីឱ្យកូនបានរៀនយល់ដឹង៕

  • Google Pixel 4a 5G និង Pixel 5 ចេញលក់ហើយ តម្លៃចាប់ផ្តើមពី $500 និង​ $700

    Google Pixel 4a 5G និង Pixel 5 ចេញលក់ហើយ តម្លៃចាប់ផ្តើមពី $500 និង​ $700

    ក្រុមហ៊ុន Google ទើបនឹង​ប្រកាស​ចេញ​ស្មា​ត​ហ្វូ​ន​ជំនាន់​ចុងក្រោយ​របស់ខ្លួន ដែលមាន​ឈ្មោះថា Pixel 4a និង​ប្រភេទ 4a ( 5G) និង Pixel 5 ដែលមាន​តម្លៃ​ចាប់ផ្តើម​ពី 500ដុល្លារ និង  700ដុល្លារ ព្រមទាំង​មានលក្ខណពិសេសរៀងៗខ្លួន ដូច​មាន​រៀបរាប់​ខាងក្រោម៖

    *លក្ខណសម្បត្តិ Pixel 4a 5G

    ស្មា​ត​ហ្វូ​ន 5G ដំបូង​របស់ Google នេះ អាច​ថា​ពិសេស​ជាងគេ វា​មាន​បំពាក់​អេក្រង់​ទំហំ​ធំ​ជាង 6.2អ៊ី​ញ និង​ប្រើប្រាស់​ឈី​ប​កម្លាំង​ខ្លាំង​ជាង Snapdragon 765G ដែលមាន​ភ្ជាប់​មក​នូវ​សេវា 5G ផងដែរ។ លើសពីនេះ វា​មាន​បន្ថែម​កាមេរ៉ា​ក្រោយ 1គ្រាប់​ទៀត​ជា​ប្រភេទ Ultrawide ទំហំ 8MP និង​មាន​ថ្ម ធំ​ជាង​មុន ទំហំ 3885mAh ដែលមាន​បច្ចេកវិទ្យា​សាក​ថ្ម​លឿន 18W វ៉ា​ត់​ម៉ោង​ក្នុង​ប្រអប់​ទៀតផង។

    តួខ្លួន​របស់​ទូរស័ព្ទ​ផលិត​ចេញពី​សារធាតុ​ប្លា​ស្ទិ​ក និង​មាន​ទ្រនាប់​ស្គែ​ន​ម្រាមដៃ​នៅ​ផ្នែក​ខាងក្រោយ។ ការ​ឌី​ហ្សា​ញ​រូបរាង​គឺ ចោះ​អេក្រង់​ខាងមុខ​ដដែល ផ្នែក​លើ​ខាងឆ្វេង មាន​ទំហំ 8MP។ កាមេរ៉ា​មេ​ខាងក្រោយ​មាន​ទំហំ 12.2 MP។ Pixel 4a 5G នឹង​ចេញលក់​ជាមួយ​ប្រព័ន្ធ​ប្រតិបត្តិការ Android 11 ដែល​ដំ​ឡើងមក​ស្រាប់ ហើយនឹង​មាន​រន្ធ​កាស 3.5mm មកជា​មួយ​ផងដែរ។

    Pixel 4a 5G នឹងមាន​តម្លៃ​ចាប់ពី 499ដុល្លារ នៅ​សហរដ្ឋអាមេរិក ចំណែក​នៅ​ទីផ្សារ​អឺរ៉ុប ទំហំ 128GB នឹងមាន​តម្លៃ​ចាប់ពី 499អឺរ៉ូ និង 499ផោន​ដ៍។ បញ្ជាក់ដែរថា ចំណុច​ខុសគ្នា​រវាង Pixel 4a 5G ជាមួយនឹង Pixel 4a ធម្មតា​គឺ អេក្រង់ ថ្ម និង​សេវា 5G និង​តម្លៃ។

    សូម​ទស្សនា​វីដេអូ​ខាងក្រោម៖

    *លក្ខណសម្បត្តិ Pixel 5

    ចំណែក​ស្មា​ត​ហ្វូ​ន Pixel 5 ឯណេះ​វិញ បំពាក់​ដោយ​អេក្រង់​ទំហំ 6អ៊ី​ញ ដែលជា​ប្រភេទ OLED មាន​កម្រិត​បង្ហាញ 1080×2340 ភិ​កសែ​ល ដោយមាន Refresh Rate 90Hz គាំទ្រ​ដោយ HDR និង​មាន​ការពារ​ដោយ​កញ្ចក់ Gorilla Glass 6។ ដំណើរការ​ដោយ​បន្ទះ​ឈី​ប Snapdragon 765G គាំទ្រ​ត្រឹម​សេវា 5G ប្រភេទ Sub-6GHz ប៉ុណ្ណោះ។

    Pixel 5 នឹងមាន​បំពាក់ RAM ធំ​គឺ 8GB/ 128GB មេម៉ូរី។ Pixel 5 ក៏​នៅតែមាន​ទ្រនាប់​ស្គែ​ន​ម្រាមដៃ​បំពាក់​នៅ​ផ្នែក​ខាងក្រោយ​នៃ​ទូរស័ព្ទ មិន​បង្កប់​ក្រោម​អេក្រង់​ឡើយ។

    កាមេរ៉ា 2គ្រាប់ ខាងក្រោយ​មាន3 មាន​ទំហំ 12.2MP, មាន Aperture f/1.7 ជាមួយ​មុខងារ Dual Pixel PDAF និង​មាន​មុខងារ​រក្សា​លំនឹង OIS និង EIS ផងដែរ អាច​ថត​វីដេអូ 4K/60fps និង 1080P/240fpsជា​កាមេរ៉ា​មេ។ 1ទៀត​ជា​កាមេរ៉ា​ប្រភេទ Ultrawide ទំហំ 16MP អាច​ថតរូប​ភាព​ទំហំ 107ដឺ​ក្រេ និង​មាន Aperture f/2.2។

    សម្រាប់​កាមេរ៉ា Selfie មាន​ទំហំ ៨MP មាន Aperture f/2.0 ដែល​អាច​ថត​វីដេអូ​បាន​កម្រិត 1080P/30fps។ ថ្ម​របស់ Pixel 5 មាន​ទំហំ 4080 mAh មក​ជាមួយនឹង​ដុំ​សាក​កម្លាំង 18W វ៉ា​ត់ និង​មុខងារ​សាក​ថ្ម​ឥត​ប្រើ​ខ្សែ និង​អាច​សាក​ថ្ម​ឱ្យ​ឧបករណ៍​ដទៃទៀត​ដោយ​មិន​ប្រើ​ខ្សែ​បាន​ផងដែរ។

    Pixel 5 មាន​សមត្ថភាព​ការពារ​ទឹក និង​ធូលី​ដី​កម្រិត IP68 និង​មាន​តួខ្លួន ផលិត​ពី​សារធាតុ​អាលុយមីញ៉ូម​កែច្នៃ​ឡើងវិញ 100%។

    Google Pixel 5 នឹងមាន​ដាក់លក់​ក្នុងតម្លៃ​ចាប់ពី 628អឺរ៉ូ នៅ​តំបន់​អឺរ៉ុប រីឯ​តម្លៃ​ចន្លោះ​ពី 599ដុល្លារ ទៅ 629ដុល្លារ នឹងមាន​លក់​នៅលើ​ទីផ្សារ​អាមេរិក៕

    សូម​ទស្សនា​វីដេអូ​ខាងក្រោម៖

  • Messi រិះគន់មិនសំចៃមាត់ ព្រោះចង់ឱ្យក្លិបរីកចម្រើន

    Messi រិះគន់មិនសំចៃមាត់ ព្រោះចង់ឱ្យក្លិបរីកចម្រើន

    ខ្សែប្រយុទ្ធ​ក្លិប Barcelona កីឡាករ Lionel Messi បាន​និយាយ​កាលពីពេលថ្មីៗនេះ​ថា មូលហេតុ​ដែល​លោក​រិះគន់​ក្លិប​កន្លងមកនេះ គឺ​ដោយសារតែ​រូបលោក ចង់បង្ហាញ​ពី​បញ្ហា​នៅក្នុង​ក្លិប​នេះ​តែប៉ុណ្ណោះ។

    កីឡាករ​រូបនេះ បាន​បន្ថែមថា ដូចដែល​យើង​បានដឹងហើយថា ក្លិប Barcelona មួយរយៈ​ចុងក្រោយ​នេះ មានការ​ធ្លាក់ចុះ​យ៉ាងខ្លាំង មូលហេតុ គឺ​ដោយសារ​តែមាន​បញ្ហា​នៅក្នុង​ក្លិប​ជាច្រើន ដែល​មិនមាន​ការដោះស្រាយ ជាក់ស្តែង​ដូចជា​កីឡាករ​មួយចំនួន មិន​ពេញ​ចិត្តនឹង​ក្លិប តែ​មិនមាន​នរណាម្នាក់​ហ៊ាន​ចេញមុខ​រិះគន់ ទើប​ក្លិប​បន្ត​ធ្លាក់ចុះ​បែបនេះ។

    គួរ​រំឭក​ឡើងវិញ​ដែរ​ថា ក្លិប FC Barcelona បាន​ធ្លាក់​ចេញពី​ពាន La Liga និង UEFA Champions League នៃ​រដូវ​កាល​ឆ្នាំ2020នេះ ដែល​ធ្វើឱ្យ​ក្លិប មិនបាន​ទទួលពាន​អ្វី​ទាល់តែសោះ​នៅ​ឆ្នាំ2020 រហូតដល់ Messi ស្ទើរតែ​នឹង​ដើរ​ចេញពី​ក្លិប​ថែម​ទៀតផង ដោយសារតែ​រឿង​មិន​ពេញ​ចិត្តនឹង​ក្លិប​នេះឯង៕

  • Bayern Munchen ឆ្នាំនេះ ដើរប្រមូលពាននៅអឺរ៉ុបបាន 5ហើយ

    Bayern Munchen ឆ្នាំនេះ ដើរប្រមូលពាននៅអឺរ៉ុបបាន 5ហើយ

    កាលពីពេលថ្មីៗនេះ ក្លិប​បាល់ទាត់ Bayern Munich បាន​យកឈ្នះ​ក្រុម Borussia Dortmund ដោយ​លទ្ធផល 3ទល់នឹង2 នៅ​វគ្គ​ផ្តាច់ព្រ័ត្រ ពានរង្វាន់ German Super Cup។

    នេះ គឺជា​ពាន​ទី5 ហើយ សម្រាប់​ឆ្នាំ2020 នេះ ដែល​ក្រុមបាល់ទាត់ Bayern Munich បានឈ្នះ ដោយពាន​ទាំង5 កន្លងមកនេះ រួមមាន  Bundesliga, DFB-Pokal, German Super Cup, UEFA Super Cup និង Champions League៕

  • ចៃដន្យណាស់! ហ្គេមពី ៨ ឆ្នាំមុនមានរបៀបលេងបង្កើតនូវជំងឺមួយឲ្យឆ្លងនៅទូទាំងពិភពលោក ស្រដៀងកូវីដ ១៩

    ចៃដន្យណាស់! ហ្គេមពី ៨ ឆ្នាំមុនមានរបៀបលេងបង្កើតនូវជំងឺមួយឲ្យឆ្លងនៅទូទាំងពិភពលោក ស្រដៀងកូវីដ ១៩

    ហ្គេម Plauge Inc. បាន​កើនឡើង​ចំនួន​ទាញយក​ច្រើនសន្ធឹក​ក្នុងប្រទេស​ចិន​ក្រោយ​ផ្ទុះ​នូវ​កូ​វីដ១៩ កាលពី​ចុងខែ​មករា ២០២០ កន្លងទៅ។ Plague Inc. គឺជា​ហ្គេម​ដែលមាន​របៀប​លេង​បង្កើត​នូវ​ជំងឺ​មួយ​ឲ្យ​ឆ្លង​នៅ​ទូទាំង​ពិភពលោក។

    អ្នកបង្កើត​ហ្គេម Plague Inc. ឈ្មោះថា Jame Vaughan និង​ជា​ស្ថាបនិក Ndemic Creations បាន​និយាយថា៖ “៨ ឆ្នាំមុន ខ្ញុំ​មិនដែល​បាន​ស្រមៃ​ទេ​ថា​ពិភពលោក​ខាងក្រៅ អាច​នឹង​ដូចនឹង​ហ្គេម Plague Inc. ឬ​ស្រមៃ​ថា​មាន​មនុស្ស​លេង Plague Inc. ច្រើន​បែបនេះ” នាពេលនេះ Ndemic Creations ដែលជា​អ្នក​ផលិត​ហ្គេម​នេះ បាន​បន្ថែម​នូវ Mode លេង​ថ្មី​ចូលទៅក្នុង​ហ្គេម Plague Inc. ដែល​អាច​ឲ្យ​អ្នកលេង​បញ្ឈប់​នូវ​ជំងឺ​រាតត្បាត។

    រីឯ​លោក Ndemic Creations ផ្ទាល់​ក៏បាន​បរិច្ចាគ​ទឹកប្រាក់ ២៥០ ០០០ ដុល្លារ ដើម្បី​ប្រយុទ្ធ​ប្រឆាំងនឹង​កូ​វីដ១៩ បន្ទាប់​ពិ​រីក​រាលដាល​នៃ​កើតឡើង​មែនទែន នៃ​វីរុស​កូ​វីដ១៩៕

  • គម្រោងបុរី Chankiri Palm Creek ជាគំរូនៃការរចនាផ្ទះប្រកបដោយការ “គិតគូរពីតម្រូវការអ្នករស់នៅជាចម្បង

    គម្រោងបុរី Chankiri Palm Creek ជាគំរូនៃការរចនាផ្ទះប្រកបដោយការ “គិតគូរពីតម្រូវការអ្នករស់នៅជាចម្បង

    រាជធានីភ្នំពេញ ថ្ងៃទី 05 ខែតុលា ឆ្នាំ 2020 – ស្របពេលដែល​​គម្រោង​បុរី ខុនដូ និង​គម្រោង​អភិវឌ្ឍ អចលនទ្រព្យ​ផ្សេងទៀតកំពុង​រីកដុះដាល​ពេញ​ទីក្រុងភ្នំពេញ និង​បណ្ដា​ក្រុង​ផ្សេងទៀត នៅក្នុងប្រទេស កម្ពុជា​ក្នុងរយៈកាលជា​ច្រើនឆ្នាំមកនេះ អតិថិជនគ្រប់រូប អាច​មានការ​ពិបាក​​ក្នុងការ​​បែង​ចែក ​​ឲ្យ​ឃើញពីភាព​ខុស​គ្នា​នៃគម្រោង និងក្រុមហ៊ុនអចលនទ្រព្យ ទាំងនោះ ។

    យោង​តាម​ការ​​សិក្សា​មួយកាលពីពេលថ្មីៗនេះ ដែលចេញផ្សាយ​ដោយ​ក្រុមហ៊ុន Urbanland បានឲ្យឃើញថា ប្រជាពលរដ្ឋ​កម្ពុជា​​កំពុង​ចាប់ផ្ដើម​គិត​គូរ​កាន់តែ​ខ្លាំង អំពីការ​បង្កើន​លទ្ធភាព​ប្រើប្រាស់​លំនៅដ្ឋាន ​របស់​ខ្លួនសម្រាប់​ការ​រស់នៅ តាំងពីក្នុង​ផ្ទះ​រហូតដល់ក្រៅផ្ទះ ជាជាង​ការ​ផ្ដោត​តែទៅលើសោភ័ណភាព ខាង​ក្រៅ។

    ទន្ទឹមនឹងនេះ ពួកគាត់ក៏ចង់​បាន​ការ​រចនា​ផ្ទះ ដែលមានភាពសាមញ្ញ និងទំនើប​​ជាងមុន លើសពី ការ​រចនា​ម៉ូតផ្ទះដែលមើលទៅសើរៗ ពោលគឺចង់បានលំនៅដ្ឋានដែល​ស្រស់ស្អាត​ ​អាចបំពេញបំណង ផ្ទាល់ខ្លួន និងតម្រូវការ​​ក្នុងការ​ប្រើប្រាស់​ជាក់ស្ដែង   ហើយជួយបន្ថែម គុណតម្លៃ​ដល់គុណភាពជីវិត​របស់ ពួកគាត់ថែមទៀតផង មិនមែនធ្វើ​ឲ្យ​បានត្រឹមតែ​​​ចាប់ អារម្មណ៍ប៉ុណ្ណោះទេ។   ​

    ការ​សិក្សានោះ​ក៏បានបង្ហាញដែរថា អតិថិជន​កំពុង​សំឡឹង​ចង់បាន​ការ​ផ្ដល់ជូនបន្ថែមទៀត ​លើសពីអ្វី ដែល​​គម្រោង​បុរីនាពេល​បច្ចុប្បន្ន​​កំពុង​ផ្ដល់​ឲ្យ​។ ក្នុងនោះ មានការ​បារម្ភ​ជាពិសេស​ចំពោះ​ក្រុមហ៊ុន​ប្រឹង​ សាង​សង់​លំនៅដ្ឋានបញ្ជ្រៀត​គ្នា ដើម្បី​បង្កើនប្រាក់ចំណេញ​ ហើយ​គិត​គូរតិចតួច​ជុំវិញការ​រចនា​ផ្នែក​ ​ខាង​ក្នុង​​លំនៅដ្ឋាន ឬការ​ប្រើប្រាស់​ទីធ្លាខាង​ក្រៅ។

    តាមរយៈការ​សិក្សា ដែលមានការ​ចែក​រំលែក​យ៉ាងទូលំទូលាយ​នៅតាម​ប្រព័ន្ធផ្សព្វផ្សាយ និងភាគីពាក់ ព័ន្ធនៅក្នុងវិស័យអចលនទ្រព្យ​ ក្រុមហ៊ុន Urbanland បាន​កំណត់ឃើញពី​កត្តា​ពិចារណា​សំខាន់ៗមួយ ចំនួន ​សម្រាប់អ្នកទិញលំនៅដ្ឋាន​នៅកម្ពូជា ហើយ​នៅពេលនេះ កំពុង​សាងសង់​​គម្រោង​បុរី មួយ​កន្លែង នៅភាគ​ខាង​ត្បូង​រាជធានីភ្នំពេញ ដែលមានឈ្មោះថា “Chankiri Palm Creek” ដើម្បីបំពេញ​តាម ការរំពឹងទុក និង​ការវិវត្តន៍នៃតម្រូវការរស់នៅ​របស់​ប្រជាជនកម្រិតជីវភាពមធ្យមដែលមាន “សេចក្ដី ប្រាថ្នា​ខ្ពស់​​ក្នុងជីវិត” ដែលជា ​អ្នក​រស់នៅធំដឹង​ក្ដី ក្នុងជំនាន់​ក្រោយ​សង្គ្រាម។

    នាយក​ក្រុមហ៊ុន Urbanland លោក កាំង ហុក ដែលកាលពីពេលថ្មីៗ​​ បានឈ្នះរង្វាន់ “បុគ្គលិកលក្ខណៈឆ្នើមក្នុងវិស័យ​អចលនទ្រព្យ​ប្រចាំឆ្នាំ” (Real Estate Personality of the Year) ពីកម្មវិធី PropertyGuru មានប្រសាសន៍ថា៖ “នៅបុរី ចន្ទគីរី (Chankiri) យើង​រចនា​​ផ្ទះ​ដោយ​យកចិត្ត ទុកដាក់លើតម្រូវការរបស់មនុស្សជាចម្បង ដោយ​បង្កើត​ឲ្យ​មានទីធ្លា សួនច្បារដែល​ផ្ដល់​លទ្ធភាព​​ឲ្យ​ ប្រជាពលរដ្ឋ​ក្នុង​សហគមន៍អាច​រស់នៅដោយសុខដុមរមនា និង​ផ្សារភ្ជាប់ជីវិតរស់នៅជាមួយធម្មជាតិ បានថែមទៀតផង។ យើង​សូមស្វាគមន៍សហគមន៍របស់យើង ក្នុងការ​បោះជំហានទៅ​រក​​ការ​រស់នៅ​ដែល ​ប្រសើរ​ជាងមុន”។

    តាមរយៈគម្រោង​អចលនទ្រព្យ​​ ដែលឈ្នះពានរង្វាន់នានា ដូចជាគម្រោង​ Raintree និងគម្រោង​ Embassy Central នៅរាជធានីភ្នំពេញ និង​គម្រោង​ Treeline Urban Resort នៅខេត្ត​ សៀម​រាប ​ជាដើមដែលបាន​បញ្ចប់​​ដោយជោគជ័យ ចាប់តាំងពីក្រុមហ៊ុនត្រូវបានបង្កើតឡើង​កាលពីឆ្នាំ ២០១៣ មក​នោះ ក្រុមហ៊ុន Urbanland កំពុង​​បង្កើត​នូវ​បទដ្ឋាន គុណភាពកាន់តែខ្ពស់ថែមទៀតជាមួយនឹង​ គម្រោង Chankiri Palm Creek ហើយ​លោក កាំង ហុក បាន​ និយាយថា គម្រោងនេះជា​សក្ខីភាព ​បង្ហាញពី​ចក្ខុវិស័យរបស់​លោកក្នុងការ​រចនា​ផ្ទះដែល “យកចិត្តទុកដាក់ពីតម្រូវការ​មនុស្សជាចម្បង​” ហើយដែល​អាច​លើក​កម្ពស់គុណភាព​នៃជីវិត​រស់នៅរបស់ប្រជាពលរដ្ឋ​បាន។

    លោក កាំង ហុក មានប្រសាសន៍ថា៖ “យើង​ចំណាយពេល​ពាក់កណ្ដាលនៃជីវិត​របស់យើងនៅក្នុង​ផ្ទះ ហើយ​បានផ្សារភ្ជាប់ទំនាក់ទំនងយ៉ាងជិត​ស្និទ្ធ​ជាមួយ​ទីធ្លាដែលយើង​រស់នៅ។ ដូច្នេះ ការ​កែលម្អទីធ្លា​ដែល ​យើង​​រស់នៅនឹង​ជួយលើក​កម្ពស់​ជីវិត​រស់នៅ​របស់យើង​បានយ៉ាង​ច្រើន”។​

    លោក​បានបន្តថា៖ “ការ​សិក្សា​​​​ស្រាវជ្រាវដ៏ស៊ីជម្រៅនេះ បានជួយ​ផ្ដល់នូវ​ចំណេះ​ដឹង និងគុណប្រយោជន៍ យ៉ាង​ច្រើនដល់ក្រុមការងារ។ ចំណេះដឹងទាំងនេះ​​កំពុង​ត្រូវបាន​បញ្ចូល ជា​បន្ត​បន្ទាប់ទៅ​ក្នុង​ការគិតគូរ និង​ដំណើរការ​នៃការ​រចនា​ផ្ទះ ហើយអាចជួយ​ឲ្យ​យើង​ប្រមូលផ្ដុំ នូវរបកគំហើញថ្មីៗ និងល្អប្រសើរទៅលើ ផ្នែកជាច្រើន ក្នុងការ​​រចនាគម្រោង​បុរី”។​

    លោកបន្ថែមថា៖ “យើង​ផ្ដល់អាទិភាព​ចំពោះអ្វី​ដែល​ប្រជាពលរដ្ឋ​យកចិត្តទុកដាក់ខ្លាំងបំផុត ពោលគឺ សន្តិសុខ និង​សុវត្ថិភាព ការ​ប្រើប្រាស់​ផ្នែក​ខាង​ក្នុង​ផ្ទះ ការ​រស់នៅជា​សហគមន៍ និង​ភាព​ជា​ផ្នែក​មួយ នៃ​សហគមន៍​ ហើយ​យើង​បញ្ចូល​នូវធាតុផ្សំ​​ធម្មជាតិ​ផ្សេងៗ ដោយ​មានការ​គិត​គូ​រយ៉ាង​ល្អិត​ល្អន់​ជុំវិញ ​លំហូរពន្លឺធម្មជាតិ និង​ខ្យល់​អាកាស នៅក្នុងគេហដ្ឋាននីមួយៗ”។

    នៅគម្រោង Chankiri Palm Creek ការ​រចនាផ្នែក​ខាង​ក្នុង​ផ្ទះ​មានមុខងារច្បាស់លាស់​ និងអាច បត់បែនតាមតម្រូវការ និងការផ្លាស់ប្តូររបស់ក្រុមគ្រួសារ នៅពេលអនាគត ពោលគឺផ្នែកផ្សេងៗនៃផ្ទះ អាចបម្លែង ពីបន្ទប់ទារក ទៅជាបន្ទប់ក្មេងលេង បន្ទប់ធ្វើការ ឬទៅជា​ទីកន្លែងស្ងប់ស្ងាត់សម្រាប់ ​ឪពុក​ម្ដាយ​ ដែល មានវ័យចំណាស់​​អាច​គេង​សម្រាក​ពេលថ្ងៃបាន។

    ទីធ្លា​ខាង​ក្រៅផ្ដោត​លើ​ការ​បង្កើត​ទីធ្លាសហគមន៍ ដែលមានធម្មជាតិ និងរុក្ខជាតិបៃតង មានម្លប់ ត្រឈឹងត្រឈៃ ហើយ​អាច​ប្រើប្រាស់បានពីសំណាក់មនុស្ស​គ្រប់​ជំនាន់នៅក្នុង សហគមន៍នោះ ដោយមាន ការបូកបញ្ចូលនូវ សួន​សម្រាប់ក្មេងលេង អមជាមួយនឹង​ទីធ្លា​ខាង​ក្រៅ​ដែលមានម្លប់ សម្រាប់ អ្នកមាន​ វ័យចំណាស់ ដែល​ចង់ធ្វើការ​ប្រាស្រ័យទាក់ទង​ជាមួយនឹង​មិត្តភក្ដិ និង​អ្នកជិត​ខាង​របស់ខ្លួន ក្នុង បរិយាកាសត្រជាក់ និង​ស្រស់ស្រាយ។

    ទន្ទឹមនឹងនេះ ខាងបុរីក៏មាន​ផែនការ​សម្រាប់​ធ្វើ​សួន​​ដំណាំ​ ដែល​អ្នករស់នៅអាច​មកជុំគ្នា ហើយ​ដាំ ដំណាំ​ហូប​ផ្លែ ឬ​បន្លែបង្ការនានា – បង្រៀនកូនៗជាទីស្រឡាញ់របស់ខ្លួន​ឲ្យ​ស្វែងយល់ពីធម្មជាតិ​ ហើយ​ក៏​ អាច​ផ្ដល់​ជា​កសិផល​ស្រស់​ៗ សម្រាប់​សហគមន៍ ក៏ដូចជាបង្កើត​ស្មារតី​រួបរួមគ្នា​សម្រាប់ ផល​ប្រយោជន៍ រួមផងដែរ។

    លោក​ កាំង ហុកបាន​បន្តទៀតថា៖ គោលដៅសំខាន់របស់ក្រុមការងារយើងនៅ Urbanland គឺការបង្កើត នូវកន្លែងដ៏កក់ក្ដៅ ដែលអាចឲ្យគ្រួសារនីមួយៗអាចរស់នៅដោយសុខដុមរមនា និងចែករំលែកនូវ សុភមង្គល និងឧបសគ្គក្នុងជីវិតរួមគ្នាក្រោមដំបូលតែមួយ។ យើងទទួលបានការជំរុញទឹកចិត្តដោយ ឆន្ទៈរបស់យើង ដែលក្នុងនោះយើងជឿជាក់ថា ប្រជាពលរដ្ឋខ្មែរគ្រប់រូប មិនថាក្នុងកម្រិតជីវភាព បែបណាក្ដី គឺពួកគាត់ស័ក្ដិសមនឹងរស់នៅទីកន្លែងដែលមានការរចនាស្របតាមតម្រូវការផ្ទាល់ខ្លួន របស់ពួកគាត់យ៉ាងពិតប្រាកដ ដោយមិនតម្រូវឲ្យគាត់សម្របរបៀបរស់នៅរបស់ខ្លួនទៅតាមកន្លែង រស់នៅឡើយ។

    សម្រាប់ការចាប់អារម្មណ៍លើគម្រោងបុរី Chankiri Palm Creek សូមចូលទៅកាន់គេហទំព័រ [https://urbanlandasia.com/projects/chankiri-palm-creek] ដែលអ្នក​អាច​ចុះឈ្មោះ ដើម្បីបាន ស្វែ​ង យល់ព័តមានលម្អិតអំពីគម្រោងនេះ៕

  • សារធាតុអាហារដែលចាំបាច់ដើម្បីសុខភាពបុរស ៈ បង្កើនភាពរឹងមាំ ស្រស់ថ្លា ក្នុងវ័យកំលោះ និងវ័យធ្វើការ

    សារធាតុអាហារដែលចាំបាច់ដើម្បីសុខភាពបុរស ៈ បង្កើនភាពរឹងមាំ ស្រស់ថ្លា ក្នុងវ័យកំលោះ និងវ័យធ្វើការ

    អ្នកកំលោះតូច កំលោះធំវ័យកំពុងធ្វើការក្នុងយុគសម័យបច្ចុប្បន្ននេះត្រូវធ្វើការងារយ៉ាងមមាញឹក ដើម្បីបំពេញតម្រូវការក្នុងជីវភាពប្រចាំថ្ងៃដែលកាន់តែច្រើនឡើងៗជារៀងរាល់ថ្ងៃ និងតាមឱ្យទាន់ស្ថានការណ៍សេដ្ឋកិច្ចនាពេលបច្ចុប្បន្ន ដូច្នេះប្រាកដណាស់ ការធ្វើការដ៏ធ្ងន់ធ្ងរបែបនេះនឹងធ្វើឱ្យសុខភាពរាងកាយសម្រួលសភាពមិនទាន់ វានឹងហុចផលឱ្យរាងកាយយើងចាប់ផ្ដើមទ្រុឌទ្រោម និងបង្ហាញអាការចេញមក ដូចជា ៈ

    – ភ្ញាក់ឡើងពេលព្រលឹម មុនមាត់មិនស្រស់ថ្លា មិនក្លៀវក្លាស្វាហាប់ ដូចគេងមិនបានឆ្អែត។

    – យើងភ្ញាក់ហើយ តែអាប្អូនប្រុសមិនភ្ញាក់មកគោរពទង់ជាតិដូចសព្វដង។

    – ពេលខ្លះ គ្មានតម្រូវការខាងផ្លូវភេទ។

    – មានបរិមាណទឹកមេជីវិតតិច។

    – ផ្ទៃមុនមិនស្រស់ថ្លា ខ្មៅស្រអាប់ កើតមុន ឬងាយកើតដំបៅក្លាយ។

    – ឈឺថ្កាត់ មិនស្រួលខ្លួន ងាយកើតផ្ដាសាយ ឬដែលគេហៅងាយៗថា ប្រព័ន្ធប្រឆាំងជំងឺចុះខ្សោយ។

    – ខួរក្បាលមិនរស់រវើក គិតការងារមិនសូវចេញ។

    – ជ្រុះសក់ ស្បែកស្ងួត ក្រចកដៃជើងផុយស្រួយ ងាយដាច់រហែក ឆាប់ឡើងកន្ទាលត្រអាក។

    – ពេលយប់ ដល់ម៉ោងគេង ក៏គេងមិនសូវលក់។

    – មានអារម្មណ៍ធុញៗ មិនចង់ធ្វើការងារ។

    នៅពេលបុរសៗយើងបានសាកល្បងពិនិត្យមើលហើយឃើញថា មានអាការស្រដៀងៗនឹងអ្វីដែលបានរៀបរាប់មកខាងលើនោះដែរ នោះគឺជាសញ្ញាដែលបញ្ជាក់ប្រាប់ថា រាងកាយរបស់អ្នកត្រូវការវីតាមីនបំប៉នដែលចាំបាច់មកជួយបន្ថែមឱ្យមានសុខភាពដែលល្អប្រសើរឡើងហើយ។

    ដូច្នេះវីតាមីន និងសារធាតុរ៉ែចាំបាច់ៗដែលចង់ឱ្យអ្នកកំលោះទាំងឡាយបានស្គាល់នោះគឺ ៈ

    សារធាតុរ៉ែ ស័ង្កសី (zinc)

    ស័ង្កសីជាសារធាតុរ៉ែអាហារបន្ថែមដែលប្រទះឃើញមានច្រើនក្នុងធម្មជាតិ គឺគ្រំអយស្ទ័រ ឬដែលអ្នកខ្លះហៅថា ជាថ្នាំប៉ូវផ្លូវភេទហ្នឹងឯង ដោយបរិមាណដែលគួរទទួលទានក្នុងមួយថ្ងៃ មិនគួរលើសពី 30 – 40 mg នោះទេ។ សារធាតុរ៉ែអាហារបន្ថែមមួយនេះ អាចជួយជួសជុលរាងកាយ ជាពិសេសកោសិកាតូចៗក្នុងរាងកាយដែលត្រូវការសារធាតុរ៉ែប្រភេទនេះខ្លាំង ដូចជាស្បែក សក់ ក្រចក និងទឹកមេជីវិតនឹងរីកចម្រើនធំធាត់បានល្អ។ សម្រាប់បុរសៗដែលត្រូវការចង់បានបុត្រ ក៏គួរជ្រើសរើសយកសារធាតុរ៉ែនេះមកបំប៉នរាងកាយ។

    វីតាមីន B រួម (Vitamin B)

    ជាវីតាមីនដែលចាំបាច់របស់រាងកាយមួយប្រភេទទៀត ព្រោះជាអ្នកជួសជុល និងបំប៉នចុងប្រព័ន្ធប្រសាទទាំងអស់របស់រាងកាយឱ្យមានប្រសិទ្ធភាព និងធ្វើការបានល្អខ្លាំងឡើង ជាពិសេសនៅពេលមានការតបស្នងល្អប្រសើរឡើង កោសិកាទាំងឡាយក៏នឹងធ្វើការបានល្អ តបស្នងបានរហ័ស ស្រស់ស្រាយ ជាពិសេសចុងប្រព័ន្ធប្រសាទខួរក្បាល ធ្វើឱ្យមានអារម្មណ៍ធូរស្រាល មិនធុញថប់តានតឹង ខួរក្បាលគិតអ្វីបានលឿន។ ជាពិសេសបំផុត វីតាមីន B9 (Folic) និងវីតាមីន B12 ជាផ្នែកផ្គុំដ៏សំខាន់របស់ប្រព័ន្ធសាងសរសៃឈាម ព្រោះនៅពេលសរសៃឈាមក្នុងរាងកាយរឹងមាំខ្លាំងឡើង វានឹងហុចផលឱ្យកោសិកាក្នុងរាងកាយបានទទួលសារធាតុអាហារពីសរសៃឈាមបានពេញលេញ ធ្វើឱ្យប្រសិទ្ធភាពក្នុងការធ្វើការងារផ្សេងៗរបស់កោសិកាកាន់តែល្អឡើងដូចគ្នា។

    វីតាមីន C (Vitamin C)

    ជាវីតាមីនដែលពួកយើងស្គាល់យ៉ាងច្បាស់ ព្រោះមុខនាទីការងារចម្បងរបស់វាគឺ ជាវីតាមីនដែលជួយបង្កើនការធ្វើការងាររបស់ប្រព័ន្ធប្រឆាំងជំងឺក្នុងរាងកាយឱ្យធ្វើការតស៊ូជាមួយមេរោគដែលចូលមកធ្វើបាបរាងកាយ ដែលយើងអាចសង្កេតឃើញតាមរយៈ

    ការមានសុខភាពរឹងមាំ មិនសូវកើតផ្ដាសាយ ឬងាយឈឺថ្កាត់ដោយសារសភាវធាតុអាកាសប្រែប្រួល ហើយគុណសម្បត្តិរបស់វីតាមីន C ថែមទាំងជាមូលដ្ឋានគ្រឹះក្នុងការសាង និងផ្លាស់កោសិកាស្បែកថ្មីរបស់ខូឡាជេនក្នុងរាងកាយ ដូច្នេះអ្នកដែលជ្រើសរើសទទួលទានវីតាមីន C ជាប្រចាំនឹងធ្វើឱ្យផ្ទៃមុខស្រស់ថ្លាផូរផង់។

    វីតាមីន E (Vitamin E)

    ជាវីតាមីនដែលប្រឆាំងអនុមូលឥស្សរៈដ៏ល្អមួយប្រភេទទៀត ធ្វើឱ្យផ្នែកផ្សេងៗក្នុងរាងកាយពន្យារភាពចុះខ្សោយសមត្ថភាព ឬនិយាយងាយៗថា ធ្វើឱ្យកោសិកាក្នុងរាងកាយក្រចាស់(មិនងាយឆាប់ចាស់) និងរឹតតែធ្វើការងារបានល្អឡើង នៅពេលបានធ្វើការគូគ្នាជាមួយវីតាមីន C នឹងរឹតតែហុចផលធ្វើឱ្យមនុស្សក្រចាស់ និងតតាំងអនុមូលឥស្សរៈបានកាន់តែខ្លាំងទ្វេឡើង។

    ដូច្នេះ បើវីតាមីនទាំង 4ប្រភេទនេះអាចមកនៅក្នុងគ្រាប់ថ្នាំតែមួយ វានឹងក្លាយជាអាហារបន្ថែមដ៏ល្អមួយប្រភេទទៀតដែលផលិតឡើងដើម្បីបង្កើនភាពសុខសប្បាយដល់មនុស្សប្រុសជាខ្លាំង និងស័ក្តិសមចំពោះជីវិតមនុស្សប្រុស ធ្វើឱ្យមានសុខភាពរាងកាយរឹងមាំ ក្លៀវក្លាស្វាហាប់ អារម្មណ៍ស្រស់ស្រាយ មុខមាត់ស្រស់ថ្លា មើលទៅស្អាតរៀងរាល់ព្រឹក កាត់បន្ថយបញ្ហា និងឧបសគ្គរំខានចិត្តក្នុងរឿងសុខភាព អាចភ្ញាក់ទៅធ្វើការបានយ៉ាងជឿជាក់ក្នុងចិត្តឥតហ្មងសៅ៕

  • សាមសុង Side By Side…ផ្ទុកអាហារបានច្រើន…ផ្ទៃខាងក្នុងធំទូលាយ…រក្សាភាពស្រស់បានយូរ…សន្សំសំចៃថាមពលបានខ្ពស់បំផុត…!!

    សាមសុង Side By Side…ផ្ទុកអាហារបានច្រើន…ផ្ទៃខាងក្នុងធំទូលាយ…រក្សាភាពស្រស់បានយូរ…សន្សំសំចៃថាមពលបានខ្ពស់បំផុត…!!

    ទូទឹកកកទំនើប សាមសុង Side By Side រចនាឡើងយ៉ាងល្អឥតខ្ចោះសម្រាប់ជីវិតសម័យថ្មីដ៏ឆ្លាតវៃ!!

    (ភ្នំពេញ) ថ្ងៃទី ០៥ ខែតុលា ឆ្នំាំ ២០២០៖ ស្របតាមស្ថានភាពបច្ចុប្បន្នដ៏មមាញឹករបស់លោកអ្នក…និងស្ថានការណ៍រក្សាសុវត្ថិភាព…ការផ្ទុកបន្លែ…ផ្លែឈើ…ត្រីសាច់…ភេសជ្ជៈ…និងម្ហូបអាហារក្នុងទូទឹកកកឱ្យបានច្រើនជាមួយនឹងការរក្សាភាពស្រស់បានយូរថ្ងៃនោះគឺជារឿងដែលសំខាន់បំផុតមិនអាចខ្វះបាននៅក្នុងជីវិតរបស់លោកអ្នក!

    ឥឡូវនេះសូមណែនាំទូទឹកកក សាមសុង Side By Side ដ៏ទំនើបទាន់សម័យ និងល្អស័ក្តិសមបំផុតសម្រាប់គ្រួសារដ៏ឆ្លាតវៃសម័យថ្មីដែលជួយឱ្យការរស់នៅប្រកបដោយផាសុកភាព និងមានភាពងាយស្រួលបំផុត! ព្រោះទូទឹកកក សាមសុង Side By Side មាន៖

    – រាងស្អាតទាក់ទាញ

    – ពណ៌កាលីបស៊ីវីល័យ

    – ផ្ទៃខាងក្នុងធំទូលាយផ្ទុកបានច្រើនបំផុត (ចំណុះទឹករហូតដល់ 617 លីត្រ នៃផ្ទៃខាងក្នុង)

    – ផ្នែកក្លាសេពិសេស FlexZone™៖ អាចធ្វើការកំណត់សីតុណ្ហភាព…ភាពត្រជាក់តាមផ្នែកនីមួយៗ និងតាមប្រភេទនៃរបស់ដែលលោកអ្នកត្រូវការរក្សាទុកបាន 4 ជម្រើស! មានន័យថាលោកអ្នកអាចកំណត់សីតុណ្ហភាពសម្រាប់សាច់ដែលអ្នកចង់រក្សាទុកយូរ ភេសជ្ជៈដែលត្រូវការឱ្យត្រជាក់លឿន សីតុណ្ហភាពត្រឹមត្រូវដែលធ្វើឱ្យបន្លែផ្លែឈើស្រស់បានយូរ និងរក្សារសជាតិដ៏ឈ្ងុយឆ្ងាញ់របស់ម្ហូបអាហារឱ្យនៅដដែល!

    – បច្ចេកវិទ្យា អ៊ីនវើទ័រលើកំប្រេះស័រ (Compressor) ជួយឱ្យទូទឹកកកស៊ីភ្លើងតិច គ្មានសំឡេងរំខាន ព្រមទាំងធ្វើឱ្យទូទឹកកកជាប់ធន់ ប្រើបានយូរឆ្នាំរហូតដល់ទៅ 21 ឆ្នាំ ឯណោះ!

    – ប្រព័ន្ធបន្សុទ្ធខ្យល់ Deodorizing Filter ជួយស្រូបច្រោះយកក្លិនមិនល្អទាំងអស់ក្នុងទូទឹកកកចេញបានយ៉ាងល្អឥតខ្ចោះ…ធ្វើឱ្យអាហារនៅតែមានរសជាតិឆ្ងាញ់…!!

    ហើយអ្វីដែលកាន់តែពិសេសនោះគឺក្រុមហ៊ុននឹងផ្តល់ជូននូវការធានារហូតដល់រយៈពេល 10 ឆ្នាំថែមទៀតផងទៅលើកំប្រេះស័រ! ឡូយហ្អេ៎…!! អ៊ីចឹងចង់បានជីវិតរស់នៅដែលស្រស់ថ្លា និងមានសុខភាពល្អ…ប្រញាប់ទិញទូទឹកកក សាមសុង Side By Side មួយគ្រឿងឥឡូវនេះភ្លាមទៅណា៎…!!

    ដើម្បីចង់ជ្រាបឱ្យកាន់តែច្បាស់សូមអញ្ចើញមកទស្សនាដោយផ្ទាល់នៅតាមបណ្តាហាងទំនើប សាមសុង ឬតាមដេប៉ូចែកចាយបន្តដែលនៅជិតលោកអ្នកបំផុត។ សម្រាប់ព័ត៌មានបន្ថែមលោកអ្នកក៏អាចទំនាក់ទំនងមកកាន់សេវាបម្រើអតិថិជនដោយឥតគិតថ្លៃតាមរយៈលេខ៖ 1800 203 232 !!