ធឿន មករា - La Reine Media

PSG ហាក់ស្រពេចស្រពិលនៅឡើយចំពោះ Mbappe

ខ្សែប្រយុទ្ធ Kylian Mbappe កំពុងតែហាក់ខ្វល់ខ្វាយ អំពីអនាគតរបស់ខ្លួនឯងខ្លាំង ដោយសារតែក្លិបរបស់គេ Paris Saint Germain មិនទាន់បានចរចា ដើម្បីបន្តកុងត្រាថ្មីជាមួយរូបគេនៅឡើយ ខណៈដែលកុងត្រានៅសល់មិនដល់ 1រដូវកាលទៀតផង។

បើនិយាយអំពីកីឡាករវ័យក្មេងរូបនេះ វាហាក់មិនបញ្ហាឡើយ សម្រាប់សមត្ថភាពរបស់គេ ក្នុងការទៅលេងនៅក្លិបល្បីៗលំដាប់ពិភពលោកណាមួយក៏បាន។ ក៏ប៉ុន្តែ គេគ្រាន់តែមិនទាន់ច្បាស់លាស៉អំពីអនាគត ឬគោលដៅបន្ទាប់តែប៉ុណ្ណោះ ពីព្រោះកីឡាករម្នាក់ៗត្រូវការយកបេះដូងមកលេងឱ្យអស់ពីសមត្ថភាព។ ដូចនេះប្រសិនបើត្រូវចេញ ឬនៅយ៉ាងណា យ៉ាងហោចណាស់ ក៏គេបានត្រៀមចិត្តទុកជាមុនខ្លះៗដែរ។

គួរឱ្យដឹងដែរថា មានក្លិបជាច្រើន បានបង្ហាញចំណាប់អារម្មណ៍ ចំពោះកីឡាករសញ្ជាតិបារាំងរូបនេះ តែសាមីក្លិបរបស់គេហាក់ធ្វើឱ្យក្លិបផ្សេងៗទាំងនោះខ្លាចរអា មិនហ៊ានសួរនាំ ព្រោះខ្លាចត្រូវបដិសេធថា មិនលក់៕

June 9, 2021

សម័យកូវីដ Bayern Munich ហ៊ានទិញខ្សែបម្រើម្នាក់ ក្នុងតម្លៃខ្ពស់ មកពី AT Madrid

Saúl Ñíguez Esclápez កីឡាករខ្សែបម្រើក្លិប Atletico Madrid ត្រូវបានគេអះអាងថា នឹងផ្ទេរទៅកាន់ក្លិបថ្មី គឺ Bayern Munich សម្រាប់រដូវកាលក្រោយនេះ តែនៅមិនទាន់ប្រកាសជាផ្លូវការនៅឡើយទេ ដោយរង់ចាំដល់ថ្ងៃផុតកុងត្រារដូវកាលនេះសិន។

ការប្រកាសនេះ វាហាក់ផ្ទុយស្រឡះពីការរំពឹងទុក ដោយសារតែពីមុនមានលេចឮព័ត៌មានថា ខ្សែបម្រើរូបនេះ នឹងទៅលេងនៅ Manchester United ក្នុងរដូវកាលថ្មី។ តែ ទោះជាយ៉ាងណាក្តី យើងនៅតែមិនដឹងពីមូលហេតុដែល ManU សម្រេចចិត្ត មិនយករូបគេវិញនេះនៅឡើយ។

ចំពោះតម្លៃខ្លួនវិញ ត្រូវបានគេដឹងថា Saúl Ñíguez ទទួលបានតម្លៃខ្លួនជាង 100លានដុល្លារ ដែលជាតម្លៃខ្លួនដែលហាក់ដូចជាថ្លៃបន្តិច សម្រាប់រដូវកាលកូវីដបែបនេះ៕

June 9, 2021

ប្រសើរជាងប្រកួតដំបូង កម្ពុជា ចាញ់ អ៊ីរ៉ាក់ ដោយលទ្ធផល 4ទល់នឹង1

ការប្រកួតវគ្គជម្រុះ FIFA WORLD CUP QATAR 2022 ប្រចាំពូល C រវាងកម្ពុជា នឹងអ៊ីរ៉ាក់ នៅកីឡដ្ឋាន Al Muharraq នៅក្នុងទឹកដីកណ្តាល (ប្រទេសបារ៉ែន) នាថ្ងៃទី7 ខែមិថុនា ឆ្នាំ 2021 នេះ បានបញ្ចប់ទៅហើយ ដោយកម្ពុជា បានចាញ់ក្រុមខ្លាំង អ៊ីរ៉ាក់ ដោយលទ្ធផល 4ទល់នឹង1។

ក្នុងប្រកួតទី2 របស់កម្ពុជា នៅលើទឹកដីកណ្តាលនេះ ក្រុមអ៊ីរ៉ាក់ បាននាំមុខ 1គ្រាប់ភ្លាមៗ ក្រោយសំឡេងកញ្ចែទើបចាប់ផ្តើមប្រកួត មិនទាន់ទាំងបានកន្លះនាទីផង ដោយថ្វីជើងរបស់កីឡាករលេខ18 មុននឹងបន្ថែម 1គ្រាប់ទៀត នៅនាទីទី23 ដោយកីឡាករលេខ13 ហើយនៅនាទីទី27 កីឡាករលេខ6 បានបន្ថែម 1គ្រាប់ចុងក្រោយ មុននឹងបញ្ចប់វគ្គទី1 ដោយលទ្ធផល 3ទល់នឹង1។

ចូលដល់វគ្គទី2 ក្រុមកម្ពុជា បានចាប់ផ្ដើមដោយទម្រង់លេងគួរឱ្យកត់សម្គាល់ ដោយបានគ្រប់គ្រងបាល់ច្រើនជាងក្រុមខ្លាំង អ៊ីរ៉ាក់ ក្នុងនោះរកបាន 1គ្រាប់ដោយកីឡាករ សឿយ វិសាល នៅនាទីទី55 បន្ទាប់ពីនោះ ក្រុមអ៊ីរ៉ង់ ក៏ហាក់មិនបន្ធូរដៃឡើយ ដោយរកគ្រាប់បាល់ 1គ្រាប់សងវិញ នៅវិនាទីចុងក្រោយនៃការប្រកួត ធ្វើឱ្យលទ្ធផលបញ្ចប់ការប្រកួត គឺកម្ពុជា ចាញ់អ៊ីរ៉ាក់ 4ទល់នឹង1៕

June 9, 2021

នារីទាន់សម័យ៖ បន្ថែមភាពជឿជាក់ដល់ខ្លួនឯង មុនចេញទៅចូលរួមពិធី

Big event ឬឱកាសពិសេសផ្សេងៗ នឹងលែងជាបញ្ហាកង្វល់ចិត្តតទៅទៀតហើយ បើអ្នកមាន Beauty Tips ល្អៗសម្រាប់ទប់ទល់នឹងហេតុការណ៍ ឬឱកាសពិសេសៗ ខណៈពេលដែលអ្នកដើរចូលទៅក្នុង Ballroom ដែលពោរពេញទៅដោយនារីស្អាតៗជាច្រើននោះ។ យើងមានគន្លឹះល្អៗ 2ចំណុច ដែលអ្នកគួរដឹង មុននឹងដល់ថ្ងៃចូលរួមពិធី : ចំណុចទី1 កុំទៅនឹកស្រមៃ ចង់ធ្វើឱ្យដូចតារាបង្ហាញម៉ូដ នៅក្នុងទស្សនាវដ្តីឱ្យសោះ ព្រោះវាមើលទៅស្អាតឥតខ្ចោះលើសពីការពិតខ្លាំងពេក រហូតអាចធ្វើឱ្យអ្នកឯទៀត មិនហ៊ានចូលជិត និងចំណុចទី 2 គឺសាកល្បងធ្វើតាមវិធីល្អៗ ដូចខាងក្រោមនេះ…:

1.ខាត់ស្បែក ដើម្បីភាពភ្លឺរលោងចែងចាំង

ប្រាកដណាស់ថា រឿងដំបូងគេ ដែលអ្នកឯទៀត គេនឹងងាកមកសម្លឹងមើលអ្នកនោះគឺ ស្បែកដែលស្អាត ស្រស់ថ្លា ភ្លឺរលោង។ ចូរខាត់ស្បែកជារាងរង្វង់ៗយ៉ាងថ្នមដៃ ទូទាំងរាងកាយ ១សប្តាហ៍ 1 – 2ដង។ សាកល្បងជ្រើសរើស ប្រើឡេខាត់ស្បែក ក្លិនណាដែលអ្នកចូលចិត្ត ឬបើចង់បានភាពធូរស្រាលសប្បាយអារម្មណ៍ សូមសាកល្បងជ្រើសរើសយកក្លិនLavender ក្លិនChamomile ឬក្លិនMint ក៏ជួយឱ្យ អ្នកមានអារម្មណ៍ស្រស់ថ្លា ព្រមជាមួយនឹងការទទួលបានស្បែកស្អាតស្រស់ថ្លា ជារង្វាន់ទៀតផង។

2.កក់សក់ 1ថ្ងៃ មុនដល់ថ្ងៃចូលរួមពិធី

តើអ្នកធ្លាប់មានអារម្មណ៍ដឹងទេថា ពេលកក់សក់ហើយថ្មីៗ សក់ច្រើនតែឡើងសំពោង និងមិនសូវភ្លឺរលោងរំសាយឡើយ ដោយសារតែយើងទើបតែលាងជាតិប្រេងស្រោបសរសៃសក់ចេញអស់ហ្នឹងឯង។ ដូច្នេះការកក់សក់ 1ថ្ងៃមុន អាចជួយឱ្យ អ្នកតុបតែងម៉ូដសក់បានងាយស្រួល និងសក់ ក៏ភ្លឺរលោងស្អាតដូចធម្មជាតិ តែបើសិនជាភ្លេច ឬខកខាននោះ អាចប្រើជំនួយការ ដូចជាប្រេងលាបសក់ ឬស្ប្រៃយ៍ តែងម៉ូដសក់ក៏បាន។

3.ធ្វើ Mask មុខពីផ្លែត្រសក់ត្រជាក់ៗ បិទក្រោមភ្នែក

ដោយសារតែភាពប្រញាប់ប្រញាប់ ជួនកាលអ្នក អាចគេងសម្រាកមិនបានគ្រប់គ្រាន់ ធ្វើឱ្យរង្វង់ភ្នែកឡើងខ្មៅ ស្រអាប់ និងជាំ ដូច្នេះចូរសាកល្បងប្រើបន្ទះចំណិតផ្លែត្រសក់ត្រជាក់ៗ ឬយកផ្លែត្រសក់ មកច្របាច់យកទឹក ហើយយកសំលី មកជ្រលក់ រួចត្រាំក្នងទឹកកកឱ្យត្រជាក់ មុននឹងយកមកបិទ ធ្វើជា Mask ពីលើត្របកភ្នែក ជួយបន្ធូរបន្ថយភាពជាំខ្មៅជុំវិញកែវភ្នែក និងថែមទាំងជាការសម្រាកបន្ធូរអារម្មណ៍នឿយហត់ ដែលមានពេញ 1ថ្ងៃមកហើយនោះទៀតផង។

4.លាបម្សៅ Primer មុនតែងមុខ

ដូចដែលយើងបានប្រាប់រួចហើយ ការតុបតែងមុខ សម្រាប់ទៅចូលរួមពិធីអ្វីមួយ ត្រឹមតែស្បែកមុខស្រស់ៗ មិនគ្រប់គ្រាន់ទេ ព្រោះណាមួយកម្ដៅ ណាមួយបរិស្ថានខ្យល់អាកាសផង បើសិនជាចង់ឱ្យផ្ទៃមុខដ៏ល្អឥតខ្ចោះរបស់អ្នក នៅដិតស្អាត ជាប់រហូតដល់ចប់កម្មវិធីនោះ សាកល្បងបន្ថែមភាពរាបម៉ដ្ឋរលោងឱ្យផ្ទៃមុខ ដោយម្សៅ Primer។

5.ជ្រើសរើស រវាងភ្នែក និងមាត់

បញ្ហាមួយរបស់នារីដែលចូលចិត្តតុបតែងមុខមាត់ បែបពេញទំហឹង ពេលទៅចូលរួមកម្មវិធីនោះគឺ ច្រើនតែតុបតែងពេញទាំងផ្ទៃមុខ ភ្នែក និងបបូរមាត់ ដែលមើលទៅហើយ ពេលខ្លះក៏មិនដឹងដែរថា តើត្រូវមើលពីត្រង់ណាមុនឡើយ…សូមសាកល្បងនឹកស្រមៃដល់នារីម្នាក់ ដែលលាបភ្នែកពណ៌ខៀវ ហើយពេលមើលចុះមកក្រោម ក៏ត្រូវភ្ញាក់ព្រើត ដែលបបូរមាត់ មានពណ៌ក្រហមចែស!…ឥលូវ លោកអ្នក ប្រហែលជាស្រមៃឃើញ រូបភាពដែលយើងចង់ប្រាប់ហើយមើលទៅ ដូច្នេះសូមឱ្យកញ្ញាៗទាំងឡាយ ចាំឱ្យបានច្បាស់ក្នុងចិត្តថា ពេលអ្នកត្រូវការឱ្យខ្លួនអ្នក មើលទៅស្អាតលេចធ្លោនោះ ចូរជ្រើសរើសតែ 1ចំណុចនៅលើផ្ទៃមុខបានហើយ នោះអ្នកនឹងមើលទៅ ឃើញស្អាតបែបមានលំដាប់មិនខាន៕

June 4, 2021

តិចនិក បន្ថែមភាពផ្អែមល្ហែមដល់ “ជីវិតគូ”

រវាងគូស្នេហ៍ ឬស្វាមីភរិយា ក្រៅពីមាន “ការដឹងចិត្តគ្នាទៅវិញទៅមក” ជាគោលការណ៍សំខាន់ហើយនោះ ការថែបំប៉នសេចក្តីស្នេហា ឱ្យផ្អែមល្ហែមត្រជាក់ត្រជុំ ក៏ជាបច្ច័យមួយ ដែលជួយឱ្យសម្ព័ន្ធភាពកាន់តែស្អិតល្មួតឡើងទៀតដែរ ដែលរឿងខ្លះអាចត្រូវរង់ចាំឱ្យមានឱកាសល្អៗជាមុនសិន ក្នុងការសាងភាពរំភើបចិត្ត តែក៏នៅមានតិចនិកជាច្រើនទៀត ដែលអាចបង្កើនភាពផ្អែមល្ហែម ឱ្យក្តីស្នេហាត្រជាក់ពេញបេះដូង បានជារៀងរាល់ថ្ងៃដែរ។

ដូចជាការឱប ថើបគ្នា មុនពេលចេញទៅធ្វើការ រហូតទៅដល់ការប្រើភាសាកាយ ក្នុងស្ថានការណ៍ផ្សេងៗ ដូចជា ខ្សែភ្នែកបារម្ភ ចាប់ក្តោបបាតដៃ ទះស្មាថ្នមៗ ឬសូម្បីតែការនែបនិត្យ នៅក្នុងរង្វង់ដៃឱបរបស់គូស្នេហ៍ ក្នុងពេលអង្គុយមើលទូរទស្សន៍ជាមួយគ្នាក៏ដោយ ទាំងអស់នេះ មិនត្រឹមតែផ្តល់នូវអារម្មណ៍រ៉ូមែនទិកប៉ុណ្ណោះទេ តែវានៅផ្តល់នូវភាពកក់ក្តៅក្នុងចិត្ត យ៉ាងមិនគួរឱ្យជឿទៀតផង។

ក្រៅពីនេះ ការរកពេលវេលាក្នុងការចម្អិនម្ហូបអាហារថ្មីៗ ឬនំឆ្ងាញ់ៗ ទុក Surprise គូស្នេហ៍ ពេលត្រឡប់មកដល់ផ្ទះវិញក៏ជាការបង្ហាញនូវភាពស្និទ្ធស្នាល និងយកចិត្តទុកដាក់ចំពោះគ្នាមួយដែរ។

រួមទាំងការនិយាយសរសើរគូស្នេហ៍នៅក្នុងឱកាសផ្សេងៗ ដូចជា គេ/នាង តែងខ្លួនបានស្អាត ឬសង្ហាជាពិសេស ឬការសម្តែងក្តីសោមនស្សរីករាយ ចំពោះជោគជ័យក្នុងតួនាទីការងាររបស់គូស្នេហ៍ជាដើម។ ការសម្តែងភាពស្មោះស្ម័គ្រ ដោយពាក្យសម្តីបែបវិជ្ជមានទាំងនេះ គឺជាអ្វីមួយ ដែលគួរឱ្យស្រឡាញ់ និងថែមទាំងជាការផ្តល់នូវកម្លាំងចិត្ត និងជួយសាងនូវភាពជឿជាក់ដល់គូស្នេហ៍ បានកាន់តែខ្លាំងឡើងផងដែរ។

ហើយនិងការមានពេលវេលា សម្រាប់និយាយចែករំលែកទុក្ខ – សុខ ក្នុង 1ថ្ងៃៗរួមគ្នា ទាំងរឿងដែលគួរឱ្យចាប់អារម្មណ៍ ឬជជែកពិភក្សាគ្នា ពីបញ្ហាដែលម្នាក់ៗជួបប្រទះមក ជួយគ្នាគិតបន្ធូរបន្ថយ សម្រាលឧបសគ្គទាំងនោះ ឱ្យវារំលងផុតទៅ នៅលើគ្រឹះនៃការមានហេតុផល ស្មោះត្រង់ និងស្មោះស្ម័គ្រ។ មនុស្សជាច្រើននិយាយថា នេះ គឺជាការជួយបន្ថែមកម្លាំងចិត្តដ៏ល្អ និងស្គាល់ពីភាពយកចិត្តទុកដាក់រវាងគ្នាទៀតផង។

អ្វីដែលសំខាន់ គឺកុំភ្លេចខ្លួន បណ្តោយឱ្យបណ្តាញប្រព័ន្ធសង្គមអនឡាញ ឬ Social Network ចូលមកមានតួនាទីក្នុងជីវិតប្រចាំថ្ងៃ ច្រើនជ្រុលពេក រហូតដល់ខ្វះការប្រើពេលវេលានៅជុំគ្នា ជាមួយគូស្នេហ៍ឱ្យសោះ ព្រោះវាអាចនឹងធ្វើឱ្យកើតភាពនឿយណាយ ឆ្ងាយពីគ្នា និងកើតមានចន្លោះប្រហោង រវាងសម្ព័ន្ធភាពបាន។

ក្តីស្នេហ៍ដែលរឹងមាំ ផ្អែមល្ហែម សូមកុំភ្លេចការយកចិត្តទុកដាក់ ចំពោះគ្នាទៅវិញទៅមក ព្រោះវាជាកូនសោសំខាន់ ក្នុងការធ្វើឱ្យក្តីស្នេហា មើលទៅនៅតែថ្មី និងរំភើបញាប់ញ័រជាប់ជានិច្ច៕

June 4, 2021

AFF Suzuki Cup នឹងចាប់ផ្ដើម ចាប់ឆ្នោតចែកពូល នៅខែក្រោយនេះ

សហព័ន្ធកីឡាបាល់ទាត់អាស៊ាន ឬ AFF ប្រកាសឱ្យដឹងជាផ្លូវការ អំពីថ្ងៃចាប់ឆ្នោតចែកពូល នៃពានរង្វាន់ AFF Suzuki Cup 2020 នៅទីក្រុងកួឡាឡាំពួ កាលពីថ្ងៃទី2 ខែមិថុនា ឆ្នាំ2021 ដោយសហព័ន្ធបាល់ទាត់ក្នុងតំបន់មួយនេះ បានបញ្ជាក់នៅថ្ងៃទី2 ថា ការចាប់ឆ្នោតចែកពូលនៃពានរង្វាន់ AFF Suzuki Cup 2020 នេះ នឹងធ្វើឡើងនៅថ្ងៃអង្គារ ទី10 ខែសីហា ឆ្នាំ2021។ សម្រាប់ព័ត៌មានលម្ពិតនៃការចាប់ឆ្នោត រួមទាំងទីកន្លែង និងរូបមន្តប្រកួត ក៏នឹងត្រូវប្រកាសនៅក្នុងកម្មវិធីចាប់ឆ្នោតចែកពូលនេះដែរ។

ឯកឧត្តម ខៀវ សាម៉េត ប្រធានសហព័ន្ធកីឡាបាល់ទាត់អាស៊ាន (AFF) មានប្រសាសន៍ថា «យើងមានសេចក្តីសោមនស្សរីករាយ សូមប្រកាសប្រាប់ពីកាលបរិច្ឆេទនៃការចាប់ឆ្នោតចែកពូលជាផ្លូវការ សម្រាប់ការប្រកួតឆ្នាំនេះ។ ខណៈដែល AFF មានគោលបំណងយ៉ាងមុតមាំ ក្នុងការរៀបចំការប្រកួត ក្រោមរូបមន្តពេញលេញមួយ និងមានកាលវិភាគរបស់ខ្លួន រួមទាំងការប្រកួតក្នុងទឹកដី(Home) និងក្រៅទឹកដី(Away) នៅគ្រប់ដំណាក់កាលនៃការប្រកួត ប៉ុន្តែយើងក៏ទទួលស្គាល់នូវតម្រូវការនៃការស្រាវជ្រាវ និងត្រៀមសម្រាប់ផលប៉ះពាល់ពីការរាតត្បាតនៃជំងឺកូវីដ-19 ដែលអាចរាប់បញ្ចូលនៃជម្រើសរូបមន្តផ្សេងទៀត ការប្រើប្រាស់ទឹកដីកណ្តាល (Centralized Venues) រួមមួយ សម្រាប់ព្រឹត្តិការណ៍នេះ ដែលនឹងត្រូវធ្វើឡើងនៅខែកក្កដា»។

គួរឱ្យដឹងដែរថា ពានរង្វាន់មួយនេះ គ្រោងនឹងធ្វើឡើង កាលពីចុងឆ្នាំ2020 កន្លងទៅ តែដោយសារតែជំងឺរាតត្បាតកូវីដ-19 បានធ្វើឱ្យពានរង្វាន់ធំបំផុតប្រចាំតំបន់អាស៊ានមួយនេះ បានផ្លាស់ប្តូរកាលបរិច្ឆេទ រហូតចុងក្រោយនេះ គឺគ្រោងនឹងធ្វើឡើងនៅថ្ងៃទី5 ខែធ្នូ ឆ្នាំ2021 ដល់ថ្ងៃទី1 ខែមករា ឆ្នាំ2022៕

June 3, 2021

លោក Lee Tea Hoon ចូលដឹកនាំក្រុមក្រសួងការពារជាតិ

លោក លី ទែ ហ៊ុន អតីតគ្រូបង្វឹកជម្រើសជាតិកម្ពុជា ត្រូវបានក្លិបបាល់ទាត់ក្រសួងការពារជាតិ ប្រកាសតែងតាំង និងចុះកុងត្រាជាផ្លូវការ ក្នុងកម្មវិធីសន្និសីទកាសែតមួយរបស់ក្លិប កាលពីព្រឹកថ្ងៃទី1 ខែមិថុនា ឆ្នាំ2021នេះ។

ជាមួយនឹងកុងត្រាថ្មីនេះ អតីតគ្រូបង្វឹកជម្រើសជាតិកម្ពុជា ដែលជោគជ័យខ្លាំងបំផុតរូបនេះ នឹងកាន់តួនាទីជាអ្នកដឹកនាំក្រុមមួយនេះ ដែលគ្រូបង្វឹកនៅតែជា លោក ហោ សុខហេង ដដែល។ ចំពោះរយៈពេលកុងត្រា ខាងក្លិបមិនបានបញ្ចេញឱ្យដឹងនៅឡើយទេ។

គួរឱ្យដឹងដែរថា បុរសសញ្ជាតិកូរ៉េខាងត្បូង វ័យ 59ឆ្នាំរូបនេះ ធ្លាប់ដឹកនាំក្រុមជម្រើសជាតិកម្ពុជា ចាប់ពីឆ្នាំ2010 រហូតដល់ឆ្នាំ2017 លុះពីឆ្នាំ2018 ដល់2019 លោកបានទៅធ្វើជានាយកបច្ចេកទេសរបស់ Hoang Anh Gia Lai FC ដែលជាក្លិបបាល់ទាត់ល្បីមួយរបស់វៀតណាម និងត្រឡប់មកដឹកនាំក្រុម TIFFY ARMY នៅពេលនេះ៕

June 3, 2021

goWave នាំមកជូនលោកអ្នកដោយធនាគារ អអេចប៊ីខេមបូឌា ដើម្បីកែលម្អចំណេះដឹង ផ្នែកហិរញ្ញវត្ថុ ក្នុងចំណោមយុវជនខ្មែរ តាមរយៈដំណោះស្រាយតាមប្រព័ន្ធឌីជីថល

ធនាគារ អ អេច ប៊ី ខេមបូឌា សូមណែនាំកម្មវិធី goWave by RHB – ជាប្រព័ន្ធមាតិកាកម្មវិធីផ្សព្វផ្សាយ តាមប្រព័ន្ធឌីជីថលគ្រប់ជ្រុងជ្រោយ ដែលបានបង្កើតឡើង ដើម្បីលើកកម្ពស់បន្ថែមទៀត នូវចំណេះដឹងផ្នែកហិរញ្ញវត្ថុ ក្នុងចំណោមយុវជនកម្ពុជា តាមរយៈអត្ថបទខ្លីៗដ៏មានអត្ថប្រយោជន៍ វីដេអូខាប់ស៊ុល ហើយឧបរកណ៍ហិរញ្ញវត្ថុទៀតសោត មានការរីកសាយភាយទៅក្នុងបណ្តុំព័ត៌មានឌីជីថល ដូចជាតាមរយៈគេហទំព័ររបស់ខ្លួន ក៏ដូចជាតាមប្រព័ន្ធកម្មវិធីបណ្តាញសង្គមផ្សេងៗផងដែរ។

“កម្មវិធី goWave by RHB ធ្វើការណែនាំ សម្របសម្រួល និងផ្តល់អំណាចដល់យុវជនកម្ពុជា ឆ្ពោះទៅរកការសម្រេចបានគោលដៅហិរញ្ញវត្ថុរបស់ពួកគេ។ គំនិតផ្តួចផ្តើមនេះកំពុងត្រូវបានរៀបចំឡើងជា 3ដំណាក់កាល – ចាប់ផ្តើមជាមួយនឹងគេហទំព័រកម្មវិធី goWave by RHB។ បន្ទាប់មកនឹងមានកម្មវិធី goWave Lite Mobile App ដែលផ្តល់នូវការរួមបញ្ចូលប្រព័ន្ធធនាគារ ដែលបានកែលម្អ ហើយនៅទីបំផុត មានការផ្តល់ជូន ផលិតផលធនាគារ 1ឈុតពេញ ដោយបំពេញទាំងស្រុងនូវសេវាកម្មគ្រប់ជ្រុងជ្រោយរបស់យើងដែលផ្តល់ជូនសម្រាប់ប្រជាជនកម្ពុជាវ័យក្មេង។ នេះបើតាមការលើកឡើងរបស់លោក Wong Kee Poh នាយកប្រតិបត្តិ និងជាអគ្គនាយករបស់ធនាគារ អ អេច ប៊ី ខេមបូឌា។

ក្នុងមុខងារជាមជ្ឈមណ្ឌលហិរញ្ញវត្ថុផ្ទាល់ខ្លួនគ្រប់យ៉ាងក្នុងប្រព័ន្ធតែមួយ កម្មវិធី goWave by RHB អនុញ្ញាតឱ្យអ្នកប្រើប្រាស់មានទំនាក់ទំនងជាមួយកម្មវិធី chatbot ស្វ័យប្រវត្តិ តាមរយៈបណ្តាញសង្គមហ្វេសប៊ុក ដោយផ្តល់ឱ្យពួកគេនូវព័ត៌មានថ្មីៗបំផុតនៅលើ គេហទំព័រ បណ្តាញសង្គមឌីជីថល និងការណែនាំអំពីអំណានដែលពាក់ព័ន្ធ។ លើសពីនោះទៅទៀត សិក្ខាសាលាតាមប្រព័ន្ធអ៊ីនធើណិត ក៏អាចត្រូវបានរៀបចំធ្វើឡើងដោយអ្នកដឹកនាំគោលគំនិតគន្លឹះក្នុងបណ្តាញសង្គម ដើម្បីពិភាក្សាអំពីប្រធានបទហិរញ្ញវត្ថុដ៏គួរឱ្យចាប់អារម្មណ៍ និងមានប្រយោជន៍។

លោក Wong បានបន្ថែមថា “គំនិតផ្តួចផ្តើមនេះ លើកឡើងអំពីទស្សនៈយល់ឃើញ រយៈពេលវែង ឆ្ពោះទៅរកការរៀបចំយុវជនជំនាន់ថ្មី ដោយផ្តល់ឱ្យពួកគេនូវការអប់រំ មធ្យោបាយ និងដំណោះស្រាយ ដែលចាំបាច់ដើម្បី ឱ្យពួកគេធ្វើការសម្រេចចិត្តផ្នែកហិរញ្ញវត្ថុ នៅក្នុងជីវិតមនុស្សពេញវ័យរបស់ពួកគេ។

ក្នុងចំណោមលក្ខណៈពិសេស និងប្រធានបទជាច្រើន ដែលមានផ្តល់ជូនតាមរយៈកម្មវិធី goWave by RHB រួមមាន៖ ហិរញ្ញវត្ថុ (Finance 101) ការសន្សំ និងថវិកា (Save and Budget) បែបផែនជីវិតរស់នៅ (Lifestyle) កម្ចី (Borrow) ការវិនិយោគ (Invest) ក៏ដូចជាមធ្យោបាយនានា ដើម្បីជួយអ្នកនៅក្នុងការរៀបចំផែនការហិរញ្ញវត្ថុរបស់អ្នក។

តាមរយៈការបើកសម្ពោធក្នុងកម្មវិធីបណ្តាញសារព័ត៌មានសង្គមតាមអ៊ីនធើណិត ពិសេសតែ 1គ្មាន2 កម្មវិធី goWave by RHB គឺជាប្រព័ន្ធកម្មវិធីសហគមន៍ឌីជីថល ដែលគូសបញ្ជាក់ពីការប្តេជ្ញាចិត្តរបស់ធនាគារ អ អេច ប៊ី ខេមបូឌា នៅក្នុងការជំរុញកិច្ចខិតខំប្រឹងប្រែងនៅក្នុងផ្នែកឌីជីថលនីយកម្ម ក្នុងក្របខ័ណ្ឌវិស័យឧស្សាហកម្មហិរញ្ញវត្ថុនៅក្នុងប្រទេស។

សម្រាប់ព័ត៌មានបន្ថែមស្តីពីកម្មវិធី goWave by RHB សូមចូលទៅកាន់៖ http://www.gowave.rhbgroup.com.kh ឬទាក់ទង៖

អ្នកទទួលបន្ទុក ៖ Imran Mahmud

ទូរស័ព្ទ ៖ +855 15799754

អ៊ីមែល ៖ [email protected]

ព្រឹត្តិការណ៍ ៖ ការបើកសម្ពោធកម្មវិធី goWave by RHB របស់ធនាគារ អ អេច ប៊ី ខេមបូឌា

ព័ត៌មានលម្អិតការបើកសម្ពោធ

ចំណងជើង	ការបើកសម្ពោធកម្មវិធី goWave by RHB របស់ធនាគារ អ អេច ប៊ី ខេមបូឌា
ក្រុមហ៊ុន	ធនាគារ អ អេច ប៊ី
កាលបរិច្ឆេទ	២ មិថុនា ២០២១
ម៉ោង	២：៣០រសៀល
តំណភ្ជាប់តាមអ៊ីនធើណិត	https://live.irlty.com/gowave-virtual-media-launch/login
អ្នកចូលរួម	1. Mr Wong – Country Head / CEO 2. Mr Leong – Head of Retail 3. Mr Nhim Borey- Head of Branch 4. Ms Po Siim – Head of Product Development
គេហទំព័រ	www.gowave.rhbgroup.com.kh

អំពីធនាគារ អ អេច ប៊ី ខេមបូឌា

ធនាគារ អ អេច ប៊ី (ខេមបូឌា) ម.ក ដែលបានបង្កើតឡើងនៅថ្ងៃទី9 ខែកក្កដា ឆ្នាំ2008 ត្រូវបានចុះបញ្ជីនៅក្រសួងពាណិជ្ជកម្ម ដែលមានលេខចុះបញ្ជី 00001812 និងទទួលបានអាជ្ញាប័ណ្ណធនាគារ ពីធនាគារជាតិកម្ពុជា (ហៅកាត់ថា “ធ.ជ.ក.” ឬ “ធនាគារកណ្តាល”) នៅថ្ងៃទី3 ខែតុលា ឆ្នាំ2008។

នៅថ្ងៃទី31 ខែមករា ឆ្នាំ2020 ធនាគារបានប្តូរឈ្មោះរបស់ខ្លួនទៅជាធនាគារ អ អេច ប៊ី (ខេមបូឌា) ម.ក។ ធនាគារនេះគឺជាបុត្រសម្ព័ន្ធគ្រប់គ្រងផ្តាច់មុខរបស់ធនាគារ RHB Bank Berhad និងក្រុមហ៊ុនមហាជនទទួលខុសត្រូវមានកម្រិត បង្កើតឡើងនៅក្នុងប្រទេសម៉ាឡេស៊ី ហើយក្រុមហ៊ុនមេធំបំផុត គឺក្រុមហ៊ុនធនាគារ RHB Banking Group ស្របតាមរចនាសម្ព័ន្ធសាជីវកម្មក្រុមហ៊ុន ដែលចូលជាធរមានចាប់ពីថ្ងៃទី13 ខែមិថុនា ឆ្នាំ2016។

ធនាគារនេះ គឺជាធនាគារពាណិជ្ជមួយ ហើយដំណើរការក្រោមច្បាប់កម្ពុជា ស្តីពីសហគ្រាសពាណិជ្ជកម្ម និងបទប្បញ្ញត្តិរបស់ធនាគារជាតិនៃកម្ពុជា (ធនាគារកណ្តាល)។

ការិយាល័យចុះបញ្ជីរបស់ធនាគារ បច្ចុប្បន្ននេះមានទីតាំងនៅអគារជាន់ទី1 ជាន់ឡៅតឿ ជាន់ទី2 និងជាន់ទី9 ផ្លូវ110 កែងផ្លូវ108 ភូមិ3 សង្កាត់ស្រះចក ខណ្ឌដូនពេញ រាជធានីភ្នំពេញ។

កម្មវីធីនេះត្រូវបានប្រព្រឹត្តឡើងនៅថ្ងៃទី ២ខែមិថុនា អ្នកចូលរួមទាំងអស់ស្ថិតក្នុងការទទួលខុសត្រូវដេាយការពាក់ម៉ាស់ និងរក្សាគម្លាតពីគ្នា៕

https://www.facebook.com/goWavebyRHB

June 2, 2021

ព័ត៌មានផ្លូវការ David Alaba ទទួលបានកុងត្រា 5ឆ្នាំ នៅ Real Madrid

David Alaba ខ្សែការពារវ័យក្មេងរបស់ក្លិប Bayern Munich បានលាចេញពីក្លិប ដែលខ្លួនធ្លាប់លេងឱ្យជាង ១០ឆ្នាំ ផ្លាស់ទៅលេង Real Madrid ហើយ នេះបើតាមការបង្ហោះព័ត៌មានរបស់ក្លិប Real Madrid កាលពីពេលថ្មីៗនេះ។

បើតាមការបញ្ជាក់ពី Real Madrid កីឡាករសញ្ជាតិអូទ្រីសរូបនេះ នឹងទទួលបានកុងត្រារយៈពេលវែង ដល់ទៅ 5ឆ្នាំនៅទីនោះ ដោយសារតែគេនៅមានវ័យក្មេង ពេញកម្លាំង ដែលអាចនឹងជួយក្លិបបានច្រើន។

ចំពោះតម្លៃពលកម្មវិញ ខ្សែការពារវ័យ 28ឆ្នាំ David Alaba ត្រូវបានគេដឹងថា នឹងទទួលបានតម្លៃខ្លួន 15លានដុល្លារ ក្នុង 1ឆ្នាំរហូតដល់ឆ្នាំ2026 ហើយចំពោះការផ្ទេរមកកាន់ Real Madrid នេះ គឺមិនមានតម្លៃខ្លួនឡើយ ព្រោះគេនឹងផុតកុងត្រាពី Bayern Munich នាចុងខែមិថុនានេះហើយ៕

June 2, 2021

League Cup ពានរង្វាន់ថ្មីមួយទៀតរបស់កម្ពុជា នឹងចាប់ប្រកួតពីថ្ងៃទី5 ដល់ 27មិថុនា

ពានរង្វាន់ដ៏ថ្មីសន្លាងមួយ របស់គណៈកម្មការរៀបចំការប្រកួតបាល់ទាត់កម្ពុជា ដែលមានឈ្មោះថា League Cup គ្រោងនឹងធ្វើឡើងចាប់ពីថ្ងៃទី5 ខែមិថុនា រហូតដល់ថ្ងៃទី27 មិថុនា ឆ្នាំ2021 ដោយមានក្លិបចូលរួមចំនួន8 មកពីលីគកំពូលកម្ពុជា និងលីគទី2 កម្ពុជា។

ក្លិបមកពីលីគកំពូលកម្ពុជា មានចំនួន 6ក្រុម រួមមាន វិសាខា, ព្រះខ័នរាជស្វាយរៀង, ភ្នំពេញក្រោន, ក្រសួងការពារជាតិ។ ក្លិបមកពីលីគទី2 កម្ពុជា មាន 2ក្រុម គឺ ISI ដង្កោសែនជ័យ និងសាលាបាល់ទាត់ជាតិបាទី។

ចំពោះរូបមន្តការប្រកួត ត្រូវបានគេដឹងថា នឹងចែកចេញជា 2ពូល ដោយប្រកួតសន្សំពិន្ទុ មុននឹងរើសយក 2ក្រុមកំពូលតារាង មកប្រកួតខ្វែងគ្នាដើម្បីដណ្តើមជើងឯក។ គួរឱ្យដឹងដែរថា ពានរង្វាន់នេះ គ្រោងនឹងធ្វើឡើងជារៀងរាល់ឆ្នាំ ដោយគ្រោងនឹងបន្ថែមក្រុមចូលរួមប្រកួត និងប្តូររូបមន្តប្រកួតជារៀងរាល់ឆ្នាំទៀតផង៕

June 2, 2021

Author: ធឿន មករា