Author: ធឿន មករា

តើអ្វីនឹងកើតឡើង បើសិននៅសុខៗស្រាប់តែឃើញសរសៃសក់ពណ៌សលេចធ្លោឡើង?…ប្រហែលជាទប់ចិត្តមិនបានក្នុងការដកវាចេញឡើយ…តែមនុស្សជាច្រើនអាចនឹងត្រូវថ្លឹងថ្លែងក្នុងចិត្តខ្លះដែរ ព្រោះធ្លាប់បានឮពាក្យចាស់ៗនិយាយថា ការដកសក់ស្កូវ 1សរសៃ វានឹងដុះឡើង 1សរសៃ(ដកមិនចេះអស់) តែហ្នឹងគ្រាន់តែជា “ពាក្យនិយាយតៗគ្នា” ដែលគ្មានភ័ស្តុតាងខាងវិទ្យាសាស្រ្តមកធានាឡើយ ហើយអ៊ីចឹង ចម្លើយដែលពិតប្រាកដនោះគឺអ្វី?

“រឿងពិត” ដែលនឹងកើតឡើងពេលយើងដកសក់ស្កូវ

1 . សក់កំបុត៖ បើដកសរសៃសក់ ឬសរសៃរោមណាមួយយ៉ាងរហ័សចេញពីស្បែក មិនថានៅលើផ្នែកណាមួយនៃរាងកាយនោះឡើយ គឺជាការរុកកួនរំខានស្បែកឱ្យបែក ឬអាចធ្វើឱ្យសាច់ភ្នាសនៅម្ដុំសរសៃសក់នោះខូចខាត និងអាចហុចផលប៉ះពាល់ដល់ឫសសក់ទៀតផង។ វេជ្ជបណ្ឌិតជំនាញខាងស្បែក អធិប្បាយថា ការរុកកួនរំខានស្បែកបែបនេះ មានផលអាក្រក់ច្រើនណាស់ ជាពិសេសបញ្ហាដែលជួបប្រទះច្រើនបំផុតក៏គឺ រោមកំបុត ឬសក់កំបុត ព្រោះបើសាច់ភ្នាសស្បែកខូចខាត នៅពេលសរសៃសក់ដុះឡើងថ្មី នឹងមិនអាចងើបចេញផុតពីក្រោមស្រទាប់ស្បែកបានឡើយ ហើយនឹងដុះលូតលាស់នៅខាងក្នុងនោះ ក្លាយជាសរសៃសក់កំបុតនៅទីបំផុត។

រោម ឬសរសៃសក់កំបុតអាចបង្កឱ្យកើតអាការឈឺក្រហាយស្បែក ចំណែកនៅលើអ្នកដែលមានសរសៃរោម ឬសក់រាងរឹងៗ អាចនឹងធ្វើឱ្យកើតមានអាការរលាកក្លាយជាពងបែក និងឈឹខ្លាំងទៀតផង។

2 . សក់ស្ដើង ៖ ពេលកញ្ឆក់សរសៃសក់ស្កូវចេញខ្លាំងៗ អាចហុចផលឱ្យស្បែកក្បាល និងឫសសក់ខូចខាតអស់ខ្លះ។ វេជ្ជបណ្ឌិតជំនាញដដែលរៀបរាប់ថា វិនាទីនៃការឈឺចាប់ដែលត្រូវកញ្ឆក់ដកសក់ស្កូវនោះ អាចជាពេលវេលាដែលសរសៃឈាមក្រហមពង្រីកខ្លួនបញ្ចេញប្រតិកម្មជាមួយភាពឈឺចាប់ត្រឹមតែបន្តិចបន្តួចដែលរាងកាយបានទទួល និងហុចផលទៅដល់ឫសសក់។

ទោះជាអ្វីដែលអាចកើតឡើងតិចបំផុតមែន តែបើលោកអ្នកដក ទាញ ឬកញ្ឆក់សក់ស្កូវជាប់ៗគ្នាខ្លាំងៗ ការឈឺចាប់ដែលកើតឡើងចំពោះស្បែកក្បាលនេះក៏អាចធ្វើឱ្យសក់ដុះមកស្ដើង ក្រវែង ឬអាចលែងមានសក់ស្កូវថ្មីៗឡើងមកទៀតតែម្ដងក៏មាន។

3 . ខាតពេលវេលា(ដកទៅ ក៏អត់ប្រយោជន៍) ៖ ការដកសក់ស្កូវមិនមានកើតប្រយោជន៍អ្វីឡើយ ក្រៅតែពីកែបញ្ហាបានតែម្ដងម្កាលប៉ុណ្ណោះ ព្រោះក្រោយពីលោកអ្នកចាត់ការទាញដកសក់ពណ៌សនោះចេញហើយ វដ្តរបស់ឫសសក់នឹង Reset ឡើងវិញដោយខ្លួនឯង ហើយសរសៃសក់ថ្មីក៏នឹងដុះឡើងមកជំនួសនៅទីតាំងចាស់ ដោយនៅតែជាសក់ពណ៌សដដែល ដោយសារតែកោសិកាពណ៌នៅក្នុងឫសសក់បានងាប់បាត់ទៅហើយហ្នឹងឯង ទើបសក់ដែលដុះមកថ្មីនោះខ្វះពណ៌ ធ្វើឱ្យក្លាយជាសក់ស្កូវ(ពណ៌ស)ដោយគ្មានថ្ងៃវិលត្រឡប់មកជាសក់ពណ៌ខ្មៅវិញឡើយ។

វេជ្ជបណ្ឌិតជំនាញដដែលថែមទាំងបានបញ្ជាក់ទៀតថា គឺជារឿងដែលគួរឱ្យសោកស្ដាយណាស់ ដែលមិនមានការរកឃើញថា តើមានអាហារប្រភេទពិសេសណា ឬអាហារបំប៉នពិសេសប្រភេទណាដែលអាចបំប៉នដើម្បីពន្យារ ឬទប់ស្កាត់ការកើតសក់ស្កូវបានឡើយ។

ដូច្នេះ វិធីការពារកុំឱ្យសក់ឡើងពណ៌ស ឬស្កូវមុនអាយុ ឬពន្យារការកើតសក់ស្កូវនោះ គឺការចៀសវាងពីបច្ច័យដែលជាដើមហេតុ មិនថាតែការមិនជក់បារី ហើយបែរមកយកចិត្តទុកដាក់លើអាហារការហូបចុក និងគេងលក់សម្រាកឱ្យបានគ្រប់គ្រាន់ ថែទាំសភាពផ្លូវចិត្ត កុំឱ្យភាពឆាប់ខឹងមួម៉ៅច្រើនមកកាត់បន្ថយទាំងសុខភាពកាយ និងចិត្ត៕

ខណៈដែលប្រទេសយើងកំពុងប្រឈមនឹងសភាវអាកាសធាតុដែលក្ដៅហប់ហួតហែងដោយសារតែសីតុណ្ហភាពដែលកើនខ្ពស់ឡើង ដែលអាចធ្វើឱ្យកើតរោគភ័យផ្សេងៗឡើងបាននោះ ជាហេតុធ្វើឱ្យយើងត្រូវមើលថែទាំសុខភាពរបស់អ្នកដែលស្ថិតនៅក្នុងក្រុមប្រថុយនឹងការកើតរោគភ័យផ្សេងៗ ដូចជា អ្នកមានជំងឺប្រចាំកាយ កូនក្មេង ស្រ្តីមានគភ៌ និងជាពិសេសមនុស្សចាស់ សុទ្ធតែជាក្រុមដែលត្រូវផ្ដល់ភាពសំខាន់ជាពិសេស ដោយសារតែជាក្រុមមនុស្សដែលមានសុខភាពរាងកាយមិនសូវរឹងមាំ ងាយនឹងឈឺថ្កាត់ជាងមនុស្សក្នុងវ័យកំលោះក្រមុំបើសិនជាត្រូវប្រឈមនឹងធាតុអាកាសក្ដៅយូរៗទៅ។

លោកគ្រូពេទ្យជំនាញផ្នែកជំងឺមនុស្សចាស់ជរា បានឱ្យដឹងថា ក្នុងអំឡុងពេលដែលប្រទេសយើងត្រូវប្រឈមនឹងសភាវធាតុអាកាសក្ដៅហប់ហួតហែងដូចសព្វថ្ងៃនេះ ជំងឺដែលមនុស្សចាស់ត្រូវប្រយ័ត្នប្រយែង និងជួបប្រទះញឹកញាប់នោះមានដូចជា៖

1 . ជំងឺខ្យល់គដោយសារកម្ដៅ ឬហ៊ីតស្រ្តូក(Heat Stroke)

ជំងឺខ្យល់គដោយសារកម្ដៅ បណ្ដាលមកពីការដែលមនុស្សចាស់ស្ថិតនៅក្នុងសភាពបរិស្ថានដែលមានសីតុណ្ហភាពខ្ពស់ និងបានទទួលកម្ដៅខ្លាំងជ្រុលពេក បណ្ដាលឱ្យការធ្វើការងាររបស់ប្រព័ន្ធឈាមរត់ និងប្រព័ន្ធខួរក្បាលខុសប្រក្រតី ដែលសញ្ញាដាស់តឿនដ៏សំខាន់របស់ជំងឺហ៊ីតស្រ្តូកនេះគឺ គ្មានចេញញើស មុខឡើងក្រហម ខ្លួនប្រាណក្ដៅឡើងជារឿយៗ មានអារម្មណ៍ស្រេកទឹកខ្លាំអ វិលមុខ ឈឺក្បាល ក្អួតចង្អោរ ដកដង្ហើមដង្ហក់ សាច់ដុំឡើងរឹង ភាំងៗ ប្រស្រីភ្នែករីកធំ អារម្មណ៍ដឹងខ្លួនថយចុះ អាចប្រកាច់ និងបាត់ស្មារតី។ បើមិនបានទទួលការជួយសង្រ្គោះយ៉ាងត្រឹមត្រូវទាន់ពេលវេលាទេនោះ បេះដូងអាចនឹងឈប់ធ្វើការ និងអាចបណ្ដាលឱ្យស្លាប់បាន។

សម្រាប់ការការពារ និងមើលថែទាំមនុស្សចាស់ គឺមិនគួរបណ្ដោយឱ្យស្ថិតនៅក្រោមកម្ដៅថ្ងៃនាពេលថ្ងៃត្រង់ ឬចៀសវាងពីធ្វើកិច្ចការងារនៅកណ្ដាលវាលក្នុងអំឡុងពេលរសៀលរហូតដល់ម៉ោង 4ល្ងាច តែបើមានភាពចាំបាច់ចៀសមិនរួចដែលត្រូវតែប៉ះពាល់នឹងកម្ដៅថ្ងៃនោះ គួរប្រើកន្សែងពោះគោជ្រលក់ទឹកជូតខ្លួនដម្បីបន្ថយកម្ដៅក្នុងខ្លួន និងគួរក្រេបទឹកបរិសុទ្ធឱ្យបានញឹកញាប់បំផុតក្នុងថ្ងៃដែលធាតុអាកាសក្ដៅខ្លាំង ពាក់វ៉ែនតាការពារពន្លឺថ្ងៃ និងបាំងឆត្រមុនពេលចេញពីផ្ទះ គួរស្លៀកសម្លៀកបំពាក់ដែលមានពណ៌ស្រាលៗ ធំទូលាយ ស្ដើងៗស្រាលៗ និងអាចបំភាយកម្ដៅ និងការពារកម្ដៅថ្ងៃបាន។

2 . ជំងឺរាករូស

ក្នុងអំឡុងអាកាសធាតុក្ដៅៗបែបនេះ មេរោគផ្សេងៗនឹងរីកធំធាត់យ៉ាងល្អ ជាពិសេសចំណីអាហារនឹងឆាប់ជូរផ្អូមជាងប្រក្រតី ដែលបើសិនញ៉ាំចំណីអាហារមិនស្អាត អាការរាករូសនឹងកើតឡើងបានយ៉ាងងាយ។ ឯវិធីការពារគឺ គួរប្រកាន់ខ្ជាប់គោលការណ៍ញ៉ាំអាហារក្ដៅៗ មានស្លាបព្រាសម្រាប់ដួសម្ហូបដោយឡែក លាងសម្អាតដៃដើម្បីកាត់បន្ថយការឆ្លងមេរោគ និងមិនញ៉ាំអាហារដែលទុកចោលយូរ ឬបើទទួលទានមិនអស់ គួររក្សាទុកនៅក្នុងទូទឹកកក ដើម្បីកុំឱ្យអាហារនោះជូរផ្អូម។

3 . ជំងឺស្បែកឈឺក្រហាយផ្សា ក្រហម ឡើងកន្ទួល

ជំងឺស្បែកកើតឡើងពីការប៉ះពាល់នឹងកម្ដៅថ្ងៃរយៈពេលយូរដោយគ្មានវត្ថុការពារ នឹងធ្វើឱ្យស្បែករបស់មនុស្សចាស់កើតអាការក្ដៅខ្លោច ក្រហាយផ្សា និងឡើងកន្ទួល ដូច្នេះគួរទទួលទានទឹកឱ្យបានច្រើនជាងប្រក្រតី ដើម្បីសាងភាពស្រស់ថ្លា និងសំណើមដល់ស្បែក និងលាបឃ្រីមការពារកម្ដៅថ្ងៃមុនចេញទៅប៉ះពន្លឺ​ថ្ងៃប្រមាណ 20នាទី និងគួរលាបថែមទៀតរៀងរាល់ 2 – 4ម៉ោងម្ដង ដើម្បីការពារស្បែកពីកម្ដៅថ្ងៃ។

ទាំងអស់នេះការមើលថែទាំមនុស្សចាស់គួរយកចិត្តទុកដាក់លើរឿងសុខភាពគ្រប់ផ្នែកដោយការរៀបចំទីកន្លែងឱ្យមានខ្យល់អាកាសចេញចូលស័ក្តិសមសម្រាប់មនុស្សចាស់ ចៀសវាងភាពសើមផ្អាប់ ព្រោះអាចជាប្រភពបណ្ដុះមេរោគ និងធ្វើឱ្យមិនស្រួលខ្លួន ក្រៅពីនេះ ត្រូវមើលថែទាំសភាវខាងអារម្មណ៍របស់មនុស្សចាស់ ដោយត្រូវមើលថែយ៉ាងចិត្តត្រជាក់ រួមទាំងសាងបរិយាកាសឱ្យស្រស់ថ្លារីករាយជាប់ជានិច្ច និងបើសង្កេតឃើញមានអាការខុសប្រក្រតីណាមួយរបស់មនុស្សចាស់ដែលបង្កដោយជំងឺអ្វីម្យ៉ាងនោះ គួរប្រញាប់នាំទៅជួបគ្រូពេទ្យដើម្បីព្យាបាល និងរិះរកវិធីការពាររួមគ្នា៕

រឹតតែអាកាសធាតុក្ដៅខ្លាំង រឹតតែធ្វើឱ្យយើងចង់តែនៅក្នុងទីកន្លែងត្រជាក់ៗ តែបើសិនជាមានញើសចេញពេញមួយថ្ងៃហើយនោះ ប្រហែលជាគ្មានអ្វីដែលធ្វើឱ្យយើងមានអារម្មណ៍ស្រស់ថ្លាជាងការបានងូតទឹកឡើយ តែក៏មានពេលខ្លះដែលយើងអាចនឹងត្រូវរង់ចាំសិនដែរ ទោះជាក្ដៅបែកញើសស្អិតខ្លួនប៉ុនណាក៏ដោយ ព្រោះអាចនឹងកើតផលអាក្រក់ដល់រាងកាយបាន។

តើពេលណាដែលយើងមិនគួរងូតទឹក?

1. ទើបតែមកពីក្ដៅ/ជួបធាតុអាកាសក្ដៅហប់​ ឬក្ដៅខ្លាំង : ជាពិសេសអ្នកដែលមានសម្ពាធឈាមទាប ការងូតទឹកភ្លាមៗក្រោយពេលប៉ះនឹងធាតុអាកាសក្ដៅ ស្បែកកំពុងនៅក្ដៅភាយនៅឡើយ បើសិនងូតទឹកភ្លាមៗ អាចធ្វើឱ្យរាងកាយសម្រួលសីតុណ្ហភាពលឿនជ្រុលពេក រហូតធ្វើឱ្យប្រថុយនឹងការកើតខ្យល់គបាត់បង់ស្មារតីបាន ដូច្នេះគួរអង្គុយសម្រាកនៅក្នុងបន្ទប់ ឬទីម្លប់រហូតទាល់តែបាត់ក្ដៅជាមុនសិន សឹមទៅងូតទឹកទើបប្រសើរជាង។
2. ក្រោយទទួលទានអាហាររួច : ក្រោយទទួលទានអាហារ លោហិតភាគច្រើននឹងហូរទៅបំពេញនៅឯប្រព័ន្ធរំលាយអាហារ បើសិនទៅងូតទឹកនៅពេលហ្នឹង ក៏នឹងត្រូវមានលោហិតមួយចំណែកបែងចែកទៅចិញ្ចឹមអវយវៈផ្នែកផ្សេងៗផងដែរ ធ្វើឱ្យប្រព័ន្ធរំលាយអាហារធ្វើការមិនបានពេញទំហឹង អាចហើមពោះ ឬអាហារមិនរំលាយជាដើម។
3. ក្រោយហាត់ប្រាណ : គួរឱ្យចម្លែកចិត្តដែរ ដែលឃើញមនុស្សជាច្រើន ពេលហាត់ប្រាណយ៉ាងជោកជាំរួច ក៏ដើរទៅងូតទឹកតែម្ដង…។ ការពិតវិញ យើងគួរអង្គុយសម្រាកឱ្យបាត់ហត់សិន ឬឱ្យខ្លួនប្រាណស្ងួតញើសល្មមសមរម្យសិន រួចសឹមទៅងូតទឹក ព្រោះការងូតទឹកក្រោយហាត់ប្រាណយ៉ាងជោកជាំហើយភ្លាមៗ អាចជាហេតុបណ្ដាលឱ្យលោហិតទៅចិញ្ចឹមបេះដូង និងខួរក្បាលបានមិនគ្រប់គ្រាន់ក្នុងអំឡុងពេលងូតទឹក និងបណ្ដាលឱ្យកើតខ្យល់គបាត់បង់ស្មារតីបាន។
4. ក្រោយញ៉ាំគ្រឿងស្រវឹង : ក្រោយញ៉ាំ(ភេសជ្ជៈមានជាតិអាល់កុល) ជាតិអាល់កុលនឹងទៅទប់ស្កាត់ការធ្វើការរបស់ថ្លើម ធ្វើឱ្យការបញ្ចេញជាតិគ្លុយកូសចេញមកក្នុងក្រសែឈាមថយចុះ តែអំឡុងពេលងូតទឹក រាងកាយនឹងត្រូវការគ្លុយកូសរឹតតែច្រើនឡើង ដូច្នេះហើយទើបការងូតទឹកក្រោយញ៉ាំគ្រឿងស្រវឹង ធ្វើឱ្យបរិមាណជាតិស្ករនៅក្នុងឈាមមិនគ្រប់គ្រាន់ ធ្វើឱ្យប្រថុយនឹងការកើតអាការវិលមុខ ងងឹតមុខ ស្រវាំងភ្នែក រាងកាយគ្មានកម្លាំងកំហែង និងប្រថុយនឹងការខ្យល់គដួលក្នុងបន្ទប់ទឹកបាន។
5. ពេលឈឺ មានគ្រុនក្ដៅខ្លួន : ប្រហែលជាបានដឹងទាំងអស់គ្នារួចមកហើយថា អ្នកជំងឺដែលមានអាការគ្រុនក្ដៅខ្លួនគួរតែជូតខ្លួនដើម្បីសម្អាតខ្លួនប្រាណសិន​រហូតទាល់តែអាការគ្រុនក្ដៅខ្លួនថយចុះ។ មិនមែនដោយសារតែអ្នកជំងឺគ្មានកម្លាំងទៅងូតទឹកនោះទេ តែដោយសារតែអំឡុងពេលដែលយើងមានជំងឺ សីតុណ្ហភាពរាងកាយនឹងឡើងខ្ពស់ដល់ 38 – 40អង្សាC និងធ្វើឱ្យបរិមាណដុតបំផ្លាញកម្ដៅក្នុងរាងកាយកើនឡើង 20% ទើបធ្វើឱ្យរាងកាយហាក់ដូចជាចុះទន់ខ្សោយ បើសិនងូតទឹក អាចកើតគ្រោះថ្នាក់ដល់រាងកាយ ងងឹតមុខ ស្រវាំងភ្នែក បាត់បង់ស្មារតី រហូតដល់ប្រកាច់ទៀតផង៕

នៅពេលមិនស្រួលខ្លួន ឬឈឺថ្កាត់ យើងតែងភាវនាសុំកុំឱ្យឈឺ-ក តែភាគច្រើន មុននឹងគ្រុនក្ដៅខ្លួន វាច្រើនតែកើតមានអាការឈឺ-កជាសញ្ញាដាស់តឿនដំបូងគេជានិច្ច។ មិនថាអ្នកណាៗក៏មិនចង់ឈឺ-កដែរ ព្រោះគ្រប់ៗគ្នាបានដឹងពីភាពពិបាកវេទនាដែលជួនកាល និយាយឮៗក៏មិនបាន ពេលខ្លះសំឡេងផ្លាស់ប្ដូរ ញ៉ាំអាហារមិនឆ្ងាញ់ និងដែលសំខាន់ គឺខានបានញ៉ាំអាហារឆ្ងាញ់មួយគំនរទៀត។

ព្រោះនៅក្នុងបំពង់កមានបំពង់អាហារដែលបញ្ជូនអាហារពីមាត់ចូលទៅរកក្រពះ និងពោះវៀនដើម្បីធ្វើការរំលាយ ដូច្នេះនៅពេលណាដែលឈឺ-ក រឿងសំខាន់គឺកុំរុកគួនរំខានបរិវេណខាងក្នុងបំពង់កខ្លាំងពេក ព្រោះបំពង់កអាចនឹងកំពុងរលាក ទើបធ្វើឱ្យយើងខានបានញ៉ាំអាហារដែលប្រក្រតីយើងអាចញ៉ាំបានយ៉ាងសប្បាយៗ។ ដូច្នេះបើចង់ឱ្យអាការឈឺ-កនេះឆាប់ជា ឬធូរស្រាលឡើងនោះ ចូរនាំគ្នាញ៉ាំអាហារខាងក្រោមនេះវិញប្រសើរជាង៖

1 . ទឹកដោះគោ ៖ អំឡុងពេលឈឺ-ក អាចធ្វើឱ្យយើងមិនសូវបានញ៉ាំអ្វីច្រើនទេ ដូច្នេះ ទឹកដោះគោគឺជាអាហារមួយក្នុងចំណោមអាហាររាវដែលមានគុណតម្លៃខាងសារធាតុអាហារច្រើន និងថែមទាំងកាត់បន្ថយភាពប្រថុយប្រថានក្នុងការខ្វះជាតិទឹកដែលអ្នកឈឺ-កជាច្រើននាក់អាចត្រូវប្រឈម(មិនសូវចង់ញ៉ាំទឹក ព្រោះឈឺ-ក)។ ក្រៅពីបានទទួលប្រូតេអ៊ីនពេញៗហើយ នៅជួយឱ្យឆាប់ឆ្អែតពោះទៀតផង។

កុំភ្លេច ជ្រើសរើសញ៉ាំទឹកដោះគោក្ដៅឧណ្ហៗ ដើម្បីកុំឱ្យឈឺក្រហាយសាច់ភ្នាសក្នុងបំពង់ក។

2 . ស៊ុបមីគៀវ ៖ បើនៅប្រទេសក្រៅ អាចនឹងជ្រើសរើ់សទទួលទានអាហារប្រភេទសរសៃៗទន់ៗ ដូចជាសរសៃមីផាស្តា រ៉ាវីអូលី ជាដើម តែបើនៅស្រុកយើង ស៊ុបមីគៀវ គឺជាអាហារដែលងាយស្រួលទំពា ងាយស្រួលលេប ហើយទឹកស៊ុបក្ដៅៗថែមទាំងជួយធ្វើឱ្យស្រឡះបំពង់កទៀតផង។ តែ សូមចៀសវាងគៀវបំពង និងខ្ទឹមបំពង ព្រោះអាចរឹតតែធ្វើឱ្យអាការឈឺ-កកាន់តែយ៉ាប់យ៉ឺនឡើង។

3 . បបរសាមចូក ៖ គ្មានអាហារសម្រាប់អ្នកជំងឺណាដែលល្អជាងបបរសាមចូកឡើយ ព្រោះអង្ករជាខាបូហាយដ្រេតដ៏សំខាន់ដែលជួយឱ្យកម្លាំងថាមពលអាចទៅជាមួយយើងបានពេញមួយថ្ងៃ និងថែមទាំងមិនឈឺក្រហាយបំពង់ក ឬធ្វើឱ្យឈឺ-កដូចបាយស្រួយផ្សេងៗទៀតផង។ បើសិនជាធុញទ្រាន់បបរធម្មតា ក៏អាចប្ដូរមកជាបបរសាមចូកបាន ដោយជ្រើសរើសយករសជាតិដែលមិនប្រៃខ្លាំង ដាក់សាច់ជ្រូកកិនម៉ដ្ឋ វានឹងជួយបង្កើនសារធាតុអាហារក្នុងអាហារមួយចាននោះឱ្យគ្រប់ 5ប្រភេទក្រុមបានយ៉ាងងាយ(និងកុំដាក់ខ្ទឹមបំពង)។

4 . ស៊ុតស្រុស ៖ ក្នុងអំឡុងពេលដែលរាងកាយត្រូវការប្រូតេអ៊ីនដើម្បីបន្ថយអាការឈឺ-កឱ្យបានលឿននោះ ស៊ុតក្រឡុកចៀន ស៊ុតចៀនជ័រព្នៅអាចមិនមែនជាជម្រើសដែលល្អបំផុតនោះទេ ឯស៊ុតស្ងោរក៏អាចនឹងស្ងួតរហូតពិបាកនឹងលេបផងដែរ តែបើសិនជាស៊ុតស្រុសដែលមានលក្ខណៈខាប់ៗទន់ៗ និងងាយស្រួលលេបវិញនោះ អាចនឹងធ្វើឱ្យយើងញ៉ាំស៊ុតបានយ៉ាងមានសេចក្ដីសុខខ្លាំងឡើង។ ក្រៅពីនេះ ស៊ុតថែមទាំងជាអាហារដែលពោរពេញដោយគុនតម្លៃខាងសារធាតុអាហារជាច្រើន មិនថាតែប្រូតេអ៊ីន វីតាមីនA, B5, B2 ស័ង្កសី និងជាតិខ្លាញ់ល្អទៀតផង។

5 . ផ្លែឈើក្រឡុក ៖ ជាប្រក្រតី យើងនឹងណែនាំឱ្យញ៉ាំផ្លែឈើជាចំណិតស្រស់ៗខ្លាំងជាង តែបើសិនជាកំពុងឈឺ-ក ការយកផ្លែឈើស្រស់ទៅកិនក្រឡុកឱ្យម៉ដ្ឋ(ទាំងកាក)ក៏ជាវិធីមួយដែលជួយឱ្យលោកអ្នកបានទទួលវីតាមីនពីផ្លែឈើកាន់តែងាយស្រួលឡើងក្នុងខណៈដែលលោកអ្នកនៅមានអាការឈឺ-ក។ តែរឿងសំខាន់ដែលត្រូវធ្វើនោះគឺ ត្រូវកិនក្រឡុកផ្លែឈើជាមួយកាក(ហាមដាក់ទឹកកក) ហាមញែកចេញ ឬស្រង់យកកាកចេញជាដាច់ខាត មិនដូច្នោះទេ លោកអ្នកនឹងទទួលបានត្រឹមតែជាតិស្ករសុទ្ធៗ ដោយនឹងទទួលបានវីតាមីនតិចបំផុត។

6 . ទឹកស្ងោរឆ្អឹងស៊ុប ៖ គ្មានទឹកស៊ុបណានឹងឆ្ងាញ់ ហុតស្រួលបំពង់កស្មើនឹងទឹកស៊ុបដែលស្ងោររម្ងាស់ពីឆ្អឹងសត្វឡើយ។ ក្រៅពីរសជាតិឈ្ងុយឆ្ងាញ់តាមធម្មជាតិដោយមិនចាំបាច់ថែមគ្រឿងហើយនោះ ការហុតទឹកស៊ុបក្ដៅឧណ្ហៗនៅជួយកាត់បន្ថយអាការរលាក ហើមនៅក្នុងបំពង់ក និងថែមទាំងជួយកាត់បន្ថយអាការប្រថុយប្រថានក្នុងការឆ្លងមេរោគបានទៀតផង៕