Author: ធឿន មករា

គ្រឿងសម្អាង និងការថែរក្សាសម្ផស្សដែលត្រូវហាមឃាត់ក្នុងអំឡុងពេលមានគភ៌
ការផ្លាស់ប្តូរប្រែប្រួលរបស់ស្រ្តីមានគភ៌ថ្មោងថ្មីដែលមើលឃើញច្បាស់នោះគឺ រូបរាងរបស់ដែលចេះតែរីកធំឡើងជារៀងរាល់ខែ អាចធ្វើឱ្យអ្នកដែលទើបតែតាំងគភ៌ជាលើកដំបូងលែងមានភាពជឿជាក់លើខ្លួនឯង រួមទាំងផ្ទៃមុខ សាច់ស្បែករបស់ខ្លួនក៏អាចនឹងប្រែប្រួលទៅតាមនោះដែរ តែអ្វីដែលសំខាន់នោះគឺ អ្នកមានគភ៌លើកដំបូងអាចមិនសូវមានទំនុកចិត្តលើផលិតផលគ្រឿងសម្អាងដែលកំពុងប្រើនោះថា តើវាមានសុវត្ថិភាពចំពោះកូនសម្លាញ់ដែលនៅក្នុងផ្ទៃ ឬក៏អត់? ដូច្នេះថ្ងៃនេះយើងនាំគ្នាមកមើលទាំងអស់គ្នាថា តើផលិតផលថែរក្សាសម្ផស្សណាខ្លះដែលត្រូវហាមឃាត់ក្នុងខណៈមានគភ៌។
1.គ្រីមថែបំប៉នស្បែក
មិនគួរប្រើគ្រឿងសម្អាងដែលស្ថិតក្នុងក្រុម Whitening និងផលិតផលបំបាត់មុន ស្នាមអុច ស្នាមជាំខ្មៅផ្សេងៗ និងដែលមានគ្រោះថ្នាក់បំផុតនោះគឺ Retinol ឬអាស៊ីតវីតាមីន A ដោយសារតែវាអាចជ្រាបចូលទៅក្នុងក្រសែឈាម និងអាចបណ្តាលឱ្យទារកនៅក្នុងគភ៌រលូត ឬពិការបាន តែពពួកគ្រីមការពារកំដៅថ្ងៃអាចនៅប្រើបាន។
2 . ថ្នាំព្យាបាលមុន
ព្រោះការព្យាបាលមុននឹងមានសារធាតុ Roaccutane ដែលមានប្រសិទ្ធភាពក្នុងការព្យាបាលខ្ពស់ ទើបចាំបាច់ត្រូវស្ថិតនៅក្រោមការគ្រប់គ្រងរបស់ពេទ្យយ៉ាងតឹងរ៉ឹង និងហាមប្រើប្រាស់នៅលើស្ត្រីមានគភ៌ ដោយសារតែថ្នាំមួយនេះអាចបង្កឱ្យមានគ្រោះថ្នាក់ដល់ទារកក្នុងគភ៌ និងត្រូវបញ្ឈប់ការប្រើប្រាស់ថ្នាំប្រភេទនេះប្រមាណជា 1 – 2 ខែជាមុនសិន ទើបអាចមានគភ៌បាន។
3 . ការជ្រលក់ពណ៌សក់ លាបពណ៌សក់ ពន្យឺតសក់ ឬអ៊ុតសក់
អ្វីទាំងអស់នេះ មានសារធាតុម្យ៉ាងដែលអាចនឹងធ្វើឱ្យយើងកើតអាការប្រតិកម្មចាញ់បាន ដូចជាថា បើយើងកើតប្រតិកម្មចាញ់ និងមានស្នាមរបួស ឬដំបៅនៅលើស្បែកក្បាល វាអាចនឹងធ្វើឱ្យកើតការឆ្លងមេរោគរាលដាលកាន់តែលឿនឡើង ស្រួលមិនស្រួលអាចនឹងហុចផលអាក្រក់ដល់កូននៅក្នុងគភ៌ទៀតផង ដូច្នេះទើបយើងមិនណែនាំឱ្យស្រ្តីមានគភ៌ទៅធ្វើពណ៌សក់ក្នុងអំឡុងពេលនោះឡើយ។
4 . ខាត់ស្បែកមុខ និងស្បែកដងខ្លួន
ជាពិសេសការខាត់ស្បែកដោយសារធាតុគីមី អាចធ្វើឱ្យកើតប្រតិកម្មចាញ់ និងឡើងកន្ទួល ឬជួនកាលអាចនឹងឆ្លងមេរោគបានដោយងាយបើស្ត្រីមានគភ៌មានរបួស ឬដំបៅនៅតាមរាងកាយផងនោះ។ ដូច្នេះយើងសូមណែនាំថា បើអ្នកមានគភ៌ចង់ខាត់ ឬធ្វើម៉ាស្សាដងខ្លួននោះ គួរប្រឹក្សាជាមួយគ្រូពេទ្យជាមុនសិន ព្រោះសារធាតុមួយចំនួននៅក្នុងផលិតផលទាំងនោះអាចនឹងធ្វើឱ្យរលាកក្រហាយ និងមានផលប៉ះពាល់ដល់កូនក្នុងផ្ទៃបានយ៉ាងងាយ។
5 . ធ្វើម៉ាស្សាមុខដោយឧបករណ៍
ដែលមានទាំង អាល់ត្រាសូនិក បេប៊ីហ្វេស ភ្លើងពណ៌ផ្សេងៗ ព្រោះតារាងដែកឆក់អគ្គិសនី នឹងហុចផលធ្វើឱ្យគភ៌រលូតបាន។ ទាំងអស់នេះរួមទាំងគ្រឿងប្រើប្រាស់អគ្គិសនីផ្សេងៗទៀតផង ដូចជា ប្រដាប់ផ្លុំសក់ ប្រដាប់បឺតធូលីដី ឆ្នាំងម៉ៃក្រូវេហ្វ និងអ្វីក៏ដោយដែលមានម៉ូទ័រ ឬឌីណាម៉ូភ្លើង អ្នកគភ៌គួរតែនៅឱ្យឆ្ងាយៗពីរបស់ទាំងអស់នោះ។
6 . លាបពណ៌ក្រចក
សារធាតុគីមីនៅក្នុងថ្នាំលាបក្រចកនឹងមានផលប៉ះពាល់ដល់វិវឌ្ឍនាការរបស់ទារកនៅក្នុងផ្ទៃ និងសូម្បីតែកូនង៉ាដែលទើបនឹងកើតក៏ដោយ។
7 . ចាក់ Botox
ការចាក់សារធាតុនេះចូលទៅក្នុងស្បែក នឹងធ្វើឱ្យសាច់ដុំពិការ លែងធ្វើការ ជារឿងដែលត្រូវបានហាមជាដាច់ខាត សម្រាប់ស្រ្តីមានគភ៌ទាំងឡាយ។
8 . ស្ពង់ចំហាយទឹក និងសាវណា
ធ្វើឱ្យរាងកាយរបស់អ្នកមានផ្ទៃពោះបាត់បង់ជាតិទឹកក្នុងអំឡុងពេលនោះ ទើបមិនគួរធ្វើសាវណាក្នុងអំឡុងពេលមានគភ៌ឡើយ ព្រោះអាចនឹងធ្វើឱ្យកើតខ្យល់គ វឹលមុខបានយ៉ាងងាយបំផុត។ ក្រៅពីនេះនៅមានការសិក្សាស្រាវជ្រាវមួយទៀតបានប្រាប់ថា ក្រោយពីចំហុយសាវណាបានប្រមាណជា 1 – 2 ម៉ោងមក នឹងធ្វើឱ្យ IQ របស់យើងធ្លាក់ចុះទៀតផង ដោយសារតែការបាត់បង់ជាតិទឹកក្នុងរាងកាយហ្នឹងឯង។
មូលហេតុផ្សេងៗទាំងអស់នេះអាចធ្វើឱ្យអ្នកមានផ្ទៃពោះមើលថែទាំកូននៅក្នុងផ្ទៃបានយ៉ាងមានសុវត្ថិភាព តែយ៉ាងណាក៏ដោយ ក៏ស្រ្តីមានគភ៌ត្រូវតែស៊ូទ្រាំដែរ ដើម្បីឱ្យជីវិតដ៏តូចមួយដែលនៅក្នុងខ្លួនរបស់អ្នកមានសុខភាពល្អ នៅពេលបើកភ្នែកមើលពិភពលោកនេះ៕
November 18, 2020
Samsung ចេញលក់អេក្រង់ Monitor ឆ្លាតវៃ2 អាចធ្វើជា TV ក៏បាន ធ្វើជាអេក្រង់កុំព្យូទ័រក៏បាន
កាលពីខែវិច្ឆិកា ចុងឆ្នាំ 2020 ក្រុមហ៊ុន Samsung បានប្រកាសចេញផលិតផលរបស់ខ្លួនបន្ថែមទៀត ដែលវាជា Smart Monitor ចំនួន 2ម៉ូដែល គឺ M5 និង M7 ដែលបំពាក់មកជាមួយសេវាកម្មកម្សាន្ត រាប់មិនអស់។
សម្រាប់ម៉ូដែលទាំង2 ខុសគ្នាតែកម្រិត និងទំហំអេក្រង់ប៉ុណ្ណោះ គឺ M5 ទំហំ 27អ៊ិញ តម្លៃ 230ដុល្លារ ឯទំហំ 32អ៊ិញ តម្លៃ 280ដុល្លារ និង M7 ទំហំ 32អ៊ិញ ប្រភេទ 4K តម្លៃជាង 400ដុល្លារ។
Smart Monitor ទាំង2 ដំណើរការដោយប្រព័ន្ធ OS ផ្ទាល់ របស់ Samsung’s Tizen OS អាចភ្ជាប់ជាមួយសេវាកម្មសម្រាប់ជំនួយក្នុងការងារប្រចាំថ្ងៃ ដូចជា កម្មវិធី Microsoft Office 365 និងសេវាកម្មកម្សាន្តជាច្រើន ដូចជា ភ្ជាប់ Wi-Fi បាន, មានមុខងារគាំទ្រ TV streaming apps និងសេវាកម្ម AirPlay 2 របស់ Apple, មានរន្ធដោត HDR10 Stream ភ្ជាប់ជាមួយកម្មវិធី Netflix, Hulu, AppleTV, YouTube និងតំណភ្ជាប់ផ្សេងទៀត ដោយមិនចាំបាច់បន្ថែម Hardware ច្រើន។ លោកអ្នកក៏អាចដំឡើង Apps ដោយផ្ទាល់លើវា ដូច Play Store អ៊ីចឹងដែរ។ ឧទាហរណ៍៖ Samsung Health App ជាដើម។
សម្រាប់ម៉ូដែល M7 ជាជម្រើសថ្លៃជាង និងសម្បូរបែបជាង M5 ។ បន្ថែមពីលើអ្វី ដែលមានលើ M5 អេក្រង់ M7 មានរន្ធ HDMI 2.0 ចំនួន2 និងរន្ធដោតភ្ជាប់ទៅកុំព្យូទ័រយួរដៃ បានតាមរយៈ USB-Type C វាអាចឱ្យអ្នកមើលវីដេអូ, Data transfer, និងសាកភ្លើងល្បឿនលឿន ជាមួយនឹងដុំសាក 65W ។
លោកអ្នកអាចបញ្ជាទិញឥឡូវនេះបាន លើវេបសាយ Samsung សម្រាប់ទីផ្សារបើកលក់ដំបូងមាន 3ប្រទេស គឺ អាមេរិក, កាណាដា និងចិន។ ឯម៉ូដែល M7 នឹងចេញលក់នៅខែធ្នូ ឆ្នាំ2020 ហើយនឹងលក់ទូទាំងពិភពលោកតែម្ដង៕
សូមទស្សនាវីដេអូខាងក្រោម៖
November 18, 2020
ប្រយោជន៍ល្អៗផ្សេងទៀតរបស់វត្ថុប្រើប្រាស់ក្នុងផ្ទះដែលបងៗស្រ្តីមេផ្ទះគួរដឹង…
វត្ថុ និងរបស់របរនៅក្នុងផ្ទះជាច្រើនដែលយើងប្រើប្រាស់រាល់ថ្ងៃ ជាពិសេសគ្រឿងផ្សំអាហារ និងវត្ថុប្រើប្រាស់នៅក្នុងផ្ទះបាយ ជួនកាលបងៗស្ត្រីមេផ្ទះទាំងឡាយអាចនឹងមិនបានដឹងពីគុណប្រយោជន៍ល្អៗផ្សេងទៀតរបស់វត្ថុទាំងនោះឡើយ ដូច្នេះថ្ងៃនេះ អ្នកគ្រូឆវីនឹងជម្រាបជូនបងៗស្ត្រីមេផ្ទះទាំងអស់អំពីគុណប្រយោជន៍ល្អៗមួយផ្សេងទៀតរបស់វត្ថុទាំងនោះ ដែលធានាថា នៅពេលបានដឹងហើយ បងៗច្បាស់ជាលាន់មាត់ថា វ៉ាវ!! មិនខាន។
1 . កាកកាហ្វេស្រស់
អ្នកដែលឈ្លក់វង្វេងនឹងក្លិន និងរសជាតិរបស់កាហ្វេស្រស់ ហើយច្រើនតែឆុងកាហ្វេស្រស់ញ៉ាំដោយខ្លួនឯងនៅផ្ទះជាប្រចាំនោះ ចាប់ពីពេលនេះតទៅ សូមកុំអាលបោះកាកកាហ្វេស្រស់នោះចោលអី ព្រោះយើងអាចយកវាមកដាក់ក្នុងកែវ ឬកូនចាន ហើយយកទៅដាក់នៅក្នុងទូទឹកកកដើម្បីបំបាត់ក្លិនអាប់ និងក្លិនចំណីអាហារនៅក្នុងទូទឹកកកបាន។ ចូរឧស្សាហ៍ដូរកាកកាហ្វេថ្មីរៀងរាល់ 2 សប្តាហ៍ម្តង ដើម្បីឱ្យក្លិនក្នុងទូទឹកកកនៅតែស្រស់ថ្លាជានិច្ច។
2 . ទឹកខ្មេះ–ស
ទឹកខ្មេះ-សនៅក្នុងចង្រ្កានបាយក៏ជាទឹកថ្នាំលាងសម្អាតវត្ថុប្រើប្រាស់ផ្សេងៗដ៏ល្អអស្ចារ្យមួយ មិនចាញ់ទឹកសាប៊ូលាងសម្អាតប្រភេទផ្សេងទៀតដែលមានដាក់លក់នៅក្នុងផ្សារឡើយ។ យើងអាចយកវាមកជូតកញ្ចក់ឱ្យថ្លាភ្លឺរលោង ឬយកមកលាងសម្អាតស្នាមក្អែលខ្មៅនៅក្នុងបន្ទប់ទឹកក៏បាន ឬអាចប្រើជូតសម្អាតរបស់ប្រើប្រាស់ដែលធ្វើពីដែកអុីណុក ឬក៏លាងសម្អាតអាងងូតទឹក ព្រមទាំងប្រើសម្រាប់បោកសម្អាតវាំងននដែលបាំងក្នុងបន្ទប់ទឹកដែលមានស្នាមក្អែលខ្មៅបានយ៉ាងស្អាតទៀតផង។
3 . ទឹកកក
អាចជាវិធីដែលមើលទៅរាងចម្លែកបន្តិច តែភាពត្រជាក់របស់ទឹកកកអាចជួយទប់ស្កាត់ភាពកខ្វក់មិនឱ្យរីករាលដាលពាសពេញលូបង្ហូរទឹកស្អុយនៅក្នុងផ្ទះបាន។ បន្ទាប់ពីចាក់បង្ហូរទឹកកក ឬទឹកត្រជាក់ចូលទៅក្នុងលូទឹកបង្ហូរទឹកស្អុយនោះហើយ លោកអ្នកគួរចាក់ទឹកក្រូចឆ្មារ រួមទាំងសម្បក ឬទឹកខ្មេះចូលទៅក្នុងលូទឹកនោះទៀតផង ដើម្បីបំបាត់ក្លិន និងត្រូវធ្វើបែបហ្នឹងរៀងរាល់ 2-3សប្តាហ៍ម្តង ទើបជាការប្រសើរ។
4 . ក្រដាសកាសែត
ក្រៅពីក្រដាសកាសែតអាចប្រើសម្រាប់ជូតកញ្ចក់បានយ៉ាងស្អាតភ្លឺថ្លាគ្មាននៅសល់ស្នាមប្រឡាក់ហើយនោះ ក្រដាសកាសែតនៅអាចជួយបំបាត់ក្លិនអាប់នៅក្នុងកាបូប ឬស្បែកជើង និងអាចលុបបំបាត់ក្លិនស្អុយក្នុងធុងសំរាមបានទៀតផង។ វិធីប្រើការ ក៏ងាយបំផុតទៀត គ្រាន់តែញីច្របាច់ក្រដាសកាសែតឱ្យមូរចូលគ្នាមួយដុំ រួចញាត់ចូលទៅក្នុងស្បែកជើង កាបូប ឬធុងសំរាមដែលមានក្លិនស្អុយនោះ រួចទុកចោលដើម្បីឱ្យវាបឺតយកក្លិនស្អុយទាំងនោះចេញឱ្យអស់។ តែបើសិនជាវានៅតែស្អុយទៀត ចូរប្តូរក្រដាសកាសែតថ្មីជារឿយៗ រហូតទាល់តែក្លិនរលាយបាត់អស់។
5 . ចង្រ្កានម៉ៃក្រូវេហ្វ
តើបងៗស្ត្រីមេផ្ទះទាំងអស់ដឹងទេថា ចង្រ្កានម៉ៃក្រូវេហ្វអាចសម្លាប់មេរោគក្នុងក្រណាត់អេប៉ុងលាងចានរបស់យើងបានស្អាតហ្មត់ចត់ដល់ទៅ 99.99% ឯណោះ។ គ្រាន់តែបោកសម្អាតក្រណាត់អេប៉ុងលាងចាននោះដោយទឹកស្អាត ហើយយកទៅដាក់ចំហុយស្អួតនៅក្នុងចង្រ្កានម៉ៃក្រូវេហ្វប្រមាណជា 3នាទី(តែត្រូវមើលឱ្យច្បាស់ផងថា ក្រណាត់អេប៉ុងនោះគ្មានលាយជាតិលោហ) ហើយក្រៅពីនេះយើងនៅអាចយកជ្រុញឈើទៅសម្លាប់មេរោគដោយវិធីដូចគ្នានេះបានដែរ។
6 . បន្ទាប់ពីការប្រើចង្រ្កានម៉ៃក្រូវេហ្វរួចហើយ
យើងត្រូវសម្អាតចង្រ្កានម៉ៃក្រូវេហ្វនោះម្តង ដោយចាក់ទឹកចូលក្នុងកូនចានតូចមួយ ហើយច្របាច់ទឹកក្រូចឆ្មារចូល និងដាក់សម្បកវាចូលទៅផង បន្ទាប់ពីនោះក៏យកទៅដាក់ចំហុយស្ងួតនៅក្នុងចង្រ្កានម៉ៃក្រូវេហ្វនោះប្រមាណជា 5នាទីដោយមិនបាច់បិទគម្របឡើយ។ នៅពេលគ្រប់ 5នាទីហើយ ចូរយកក្រណាត់ស្អាតមកជូតស្នាមកខ្វក់ដែលដិតជាប់នៅខាងក្នុងចង្រ្កានម៉ៃក្រូវេហ្វនោះឱ្យស្អាត តែប៉ុណ្ណឹងក្លិនអាហារ និងស្នាមកខ្វក់ដែលប្រឡាក់ជាប់ស្អិតទាំងប៉ុន្មាននឹងរលាយបាត់អស់ជាមិនខាន។
នៅមានរបស់របរជាច្រើនទៀតដែលមានគុណប្រយោជន៍ល្អៗផ្សេងទៀតក្រៅពីគុណប្រយោជន៍ចម្បងរបស់វា…ដូច្នេះសូមបងៗស្រ្តីមេផ្ទះទាំងអស់រង់ចាំតាមដាននៅលេខក្រោយទៀត៕
November 18, 2020
វិធី 7យ៉ាង សាងភាពឆ្លាតវៃដល់កូនតាំងពីនៅក្នុងផ្ទៃ
វិធីមើលថែទាំខ្លួនក្នុងអំឡុងពេលមានគភ៌របស់អ្នកម្តាយហុចផលដល់ភាពឆ្លាតវាងវៃខាងសតិបញ្ញារបស់កូនតូចនៅក្នុងគភ៌។ ខាងក្រោមនេះគឺវិធី 7យ៉ាងក្នុងការសាងភាពឆ្លាតវៃដល់កូនតូចដែលនៅក្នុងផ្ទៃ…តើមានអ្វីខ្លះនោះសូមតាមដានដូចតទៅ។
1 . ធ្វើអារម្មណ៍ឱ្យល្អស្រស់ស្រាយជានិច្ច : ដើម្បីឱ្យរាងកាយបានបញ្ចេញសារធាតុនៃសេចក្តីសុខចេញមក និងបញ្ជូនបន្តទៅដល់កូន ធ្វើឱ្យកូនមានការវិវឌ្ឍដែលល្អទាំងខួរក្បាល(IQ) និងអារម្មណ៍(EQ) តែបើស្រ្តីមានគភ៌មានអារម្មណ៍មួម៉ៅធុញថប់ច្រើនវិញនោះ រាងកាយនឹងបញ្ចេញសារធាតុ អាឌ្រីណាលីន ជំនួសវិញ ដែលនឹងហុចផលដល់កូននៅពេលកើតមក ក្លាយជាក្មេងងង៉ក់យំរករឿងច្រើន ពិបាកចិញ្ចឹម និងមានវិវឌ្ឍនាការយឺត។
2 . ទទួលទានអាហារឱ្យបានសមរម្យ : ជាពិសេសអាហារដែលសម្បូរទៅដោយអាស៊ីតខ្លាញ់មិនកក ដូចជា DHA , AA និងARA ដែលមានច្រើននៅក្នុងសាច់ត្រីសមុទ្រផ្សេងៗ ដែលជាអង្គប្រកបសំខាន់មួយរបស់សាច់ខួរក្បាលរបស់កូនដល់ទៅ 60% ។
3 . ហាត់ប្រាណ : ពេលស្ត្រីមានគភ៌ហាត់ប្រាណ កូននៅក្នុងផ្ទៃក៏នឹងធ្វើចលនាតាមចង្វាក់ការហាត់ប្រាណរបស់អ្នកម្តាយដែរ ដែលការធ្វើចលនានេះនឹងជួយជំរុញប្រព័ន្ធសរសៃប្រសាទរបស់កូនឱ្យវិវឌ្ឍបានល្អឡើង។
4 . អង្អែលក្បាលពោះ : នឹងជួយជំរុញប្រព័ន្ធសរសៃប្រសាទ និងខួរក្បាលផ្នែកទទួលដឹងពីអារម្មណ៍របស់កូនឱ្យមានការវិវឌ្ឍកាន់តែល្អឡើង។ ដោយទិចនិកងាយៗ គឺចូរអង្អែលក្បាលពោះខ្លួនឯងជារាងរង្វង់មូល ទៅ-មកពីខាងណាមុនក៏បានដែរ។
5 . និយាយលេងជាមួយកូនក្នុងគភ៌ឱ្យបានញឹកញាប់ : ប្រព័ន្ធប្រសាទការស្តាប់របស់កូននឹងចាប់ផ្តើមធ្វើការនៅពេលដែលគភ៌របស់អ្នកមានអាយុបានប្រមាណជា 5ខែ។ ការនិយាយលេងជាមួយកូនដោយសំឡេងដ៏ទន់ភ្លន់ ប្រយោគដដែលៗនឹងជួយឱ្យប្រព័ន្ធសរសៃប្រសាទ និងខួរក្បាលដែលគ្រប់គ្រងការឮ នឹងវិវឌ្ឍល្អឡើង និងត្រៀមខ្លួនជាស្រេចសម្រាប់ការឮក្រោយពេលប្រសូតចេញមកហើយ។
6 . ស្តាប់បទភ្លេងសប្បាយៗ : មិនថាស្ត្រីមានគភ៌ស្តាប់បទភ្លេងអ្វីក៏ដោយ កូនតូចក៏នឹងបានស្តាប់តាមនោះដែរ បើរឹតតែជាបទភ្លេងបែបសប្បាយៗ ឬបទភ្លេងក្លាស់ស៊ិកផងនោះ នឹងរឹតតែជួយជំរុញឱ្យបណ្តាញប្រព័ន្ធប្រសាទដែលធ្វើការពាក់ព័ន្ធនឹងការស្តាប់ឮរបស់កូនតូច វិវឌ្ឍកាន់តែល្អឡើង ហើយនៅពេលដែលកូនប្រសូតចេញមកនឹងមានសមត្ថភាពខាងការរៀងលំដាប់ការគិតនៅក្នុងខួរក្បាល មានអារម្មណ៍ធូរស្រាល និងចងចាំរឿងរ៉ាវផ្សេងៗបានល្អទៀតផង។
7 . បញ្ចាំងភ្លើងចំក្បាលពោះ : នៅពេលដែលគភ៌មានអាយុបាន 7ខែ កូនតូចអាចប្រិចភ្នែកបានហើយ។ ការបញ្ចាំងភ្លើងចំក្បាលពោះខ្លួនឯង នឹងធ្វើឱ្យកោសិកាខួរក្បាល និងសរសៃប្រសាទផ្នែកទទួលរូបភាព និងការមើលឃើញរបស់កូនតូចមានការវិវឌ្ឍកាន់តែល្អឡើង និងត្រៀមខ្លួនជាស្រេចសម្រាប់ការមើលឃើញក្រោយពេលកើតចេញមក៕
November 18, 2020
ម៉ាឡេស៊ី ប្រឈមនឹងការធ្លាក់ ចេញពីពានរង្វាន់ធំៗ នាឆ្នាំ2021 ខាងមុខនេះ
លោក Stewart Ramalingang ប្រធានសមាគមបាល់ទាត់ម៉ាឡេស៊ី សម្តែងការព្រួយបារម្ភទៅនឹងបញ្ហាកូវីដ-19 ដែលអាចប៉ះពាល់ទៅនឹងក្រុមជម្រើសជាតិម៉ាឡេស៊ី ដែលត្រៀមចូលរួមក្នុងការប្រកួតធំៗនានា ជាច្រើននាក្នុងឆ្នាំ2021 ខាងមុខនេះ។
ស្ថានភាពនៃការផ្ទុះឡើងនៃរលកទី2 កូវីដ-19 នៅក្នុងប្រទេសម៉ាឡេស៊ី កំពុងតែកើនឡើង ដោយមានមនុស្សឆ្លង ច្រើនពាន់នាក់ក្នុង 1ថ្ងៃ ហើយរដ្ឋាភិបាលប្រទេសនេះ បានសម្រេចចិត្ត បិទប្រទេសដោយមិនអនុញ្ញាត ឱ្យចាកចេញពីប្រទេសនេះឡើយ។ ក្នុងនោះដែរ មិនថាកីឡាករផ្សេងៗ ឬកីឡាករបាល់ទាត់ឡើយ គឺមិនត្រូវបានអនុញ្ញាតដូចគ្នា។
គួរឱ្យដឹងដែរថា ប្រសិនបើម៉ាឡេស៊ី នៅតែប្រកាន់វិធានការនេះដល់ឆ្នាំ2021 ខាងមុខ ក្រុមជម្រើសជាតិម៉ាឡេស៊ី នឹងត្រូវដកខ្លួនចេញពីពានរង្វាន់ធំៗជាច្រើន ដែលមានដូចជា វគ្គជម្រុះ World Cup, ពាន AFF Suzuki Cup និងពាន AFC U19 ជាដើម៕
November 17, 2020
ជម្រើសជាតិអង់គ្លេស នឹងអវត្តមានខ្សែប្រយុទ្ធ Macus Rashford រហូតចប់ពាន Nations League
គ្រូបង្វឹកជម្រើសជាតិអង់គ្លេស បានដកកីឡាករ Macus Rashford ចេញពីបញ្ជីឈ្មោះកីឡាករចុងក្រោយដើម្បីត្រៀមលេងក្នុងពាន Nations League ដោយសារតែកីឡាកររបស់ក្លិប Manchester United រូបនេះរងរបួស។
Rashford បានអវត្តមានពីការប្រកួតមិត្តភាពរបស់អង់គ្លេស ដែលលេងទល់នឹងសាធារណរដ្ឋអៀរឡង់ កាលពីថ្ងៃសុក្រកន្លងទៅនេះ។ ក្រោយមកសមាគមបាល់ទាត់អង់គ្លេស បានប្រកាសជាផ្លូវការថា កីឡាកររូបនេះនឹងអវត្តមានពីប្រកួត UEFA Nations League ដែលនឹងលេងទល់ បែលហ្ស៊ិក និងអ៊ីស្លង់។
គួរឱ្យដឹងដែរថា កាលពីការប្រកួតលើកមុន ទល់នឹងក្រុម បែលហ្ស៊ិក Rashford ក៏បានរកគ្រាប់បាល់បាន 1គ្រាប់ដែរ។ កីឡាករវ័យ 23ឆ្នាំ ខាងលើ ធ្លាប់បានជាប់ជម្រើសជាតិអាយុក្រោម 16ឆ្នាំតាំងពីឆ្នាំ2012 ហើយឡើងមកឈុតធំនៅឆ្នាំ2016 ដោយបង្ហាញខ្លួនបាន 47ប្រកួត និងរកគ្រាប់បាល់បាន 14គ្រាប់៕
November 17, 2020
បង្ហាត់ជំនាញចាំបាច់ខ្លះដល់កូន មុនចូលរៀន…
បន្ទាប់ពីកូនតូចបានរៀនយល់ដឹងខ្លះៗជាបន្តបន្ទាប់ក្នុងអំឡុងពេល 1ឆ្នាំដំបូងហើយ ពេលឆ្លងចូលដល់ឆ្នាំទី 2-3 យើងអាចនិយាយបានថា ជាអំឡុងពេលនៃការសន្សំចំណេះដឹងផ្សេងៗ និងរំលាយចំណេះដឹងទាំងនោះឱ្យចូលជាមួយនឹងសមត្ថភាពរបស់កុមារ និងបង្កឱ្យកើតជាជំនាញផ្សេងៗដែលចាំបាច់ត្រូវប្រើពេលចូលសាលារៀនលើកដំបូងបំផុតក្នុងជីវិតរបស់គេ។
នៅក្នុងវ័យនេះ គឺជាអំឡុងពេលមួយសំខាន់ណាស់ដែលអ្នកម្តាយត្រូវបង្ហាត់បង្រៀនរឿងជាច្រើនដល់កូន ជាពិសេសបំផុតជំនាញផ្សេងៗដែលត្រូវប្រើពេលនៅក្នុងសាលា…តើមានអ្វីខ្លះនោះ? សូមតាមដានដូចតទៅ ៖
- ការចែករំលែក ៈ ដើម្បីឱ្យកូនបានស្គាល់ពីភាពមានទឹកចិត្ត និងចេះចែករំលែកការលេងជាមួយមិត្តភក្តិយ៉ាងមានសេចក្តីសុខ និងប្រកបដោយសុវត្ថិភាព។
- ការចេះជួយខ្លួនឯង ៈ ដូចជាការចេះស្លៀកពាក់ខោអាវ ពាក់ស្រោមជើង ពាក់ស្បែកជើងដោយខ្លួនឯង ជាដើម។
- ការធ្វើបានតាមបញ្ជាស្រួលៗរបស់អ្នកគ្រូ ៈ ដូចជាយកសៀវភៅទៅដាក់លើតុ ប្រមូលសៀវភៅដាក់ចូលកាបូប-ល- ។
- ការហាត់ឆ្លើយតប ពេលមានសិស្សដទៃមកនិយាយជាមួយ។
- បង្ហាត់ឱ្យចេះស្តាប់គ្រូ និងឆ្លើយតប។
- អាចនៅជាមួយសាច់ញាតិ ឬអ្នកមើលថែបានដោយមិនស្រែកយំ ក្នុងអំឡុងពេលដែលម្តាយមិននៅ។
- ចេះថែទាំ និងសម្អាតរាងកាយបានដោយខ្លួនឯង។
- ចេះប្រាប់ ពេលចង់ចូលបន្ទប់ទឹក ឬចង់បត់ជើងធំ។
- ចេះប្រាប់ឈ្មោះពិត និងឈ្មោះលេងរបស់ខ្លួនឯងបាន រួមទាំងស្គាល់ឈ្មោះរបស់ឪពុកម្តាយទៀតផង។
- អាចអង្គុយធ្វើកិច្ចការរបស់សាលាយ៉ាងស្ងាត់ស្ងៀមបានច្រើននាទី។
ជំនាញទាំងអស់ខាងលើនេះ គឺជាអ្វីដែលអ្នកម្តាយត្រូវបង្ហាត់ឱ្យកូនចេះ និងដឹងតាំងពីពេលនៅផ្ទះឱ្យហើយជាស្រេច ដោយត្រូវចាប់ផ្តើមបង្ហាត់ម្តងបន្តិចៗ ប្រមាណជា 3-4 ខែមុនពេលដែលកូនត្រូវចូលសាលារៀនលើកដំបូង ដើម្បីពេលដល់ថ្ងៃកូនចូលរៀនមែនទែន កូននឹងបានដើរចូលសាលាយ៉ាងពើងទ្រូង និងជឿជាក់លើខ្លួនឯងយ៉ាងខ្លាំងថា ច្បាស់ជាគ្មានបញ្ហាអ្វីទាំងអស់ ហើយអ្នកម្ដាយខ្លួនឯងក៏សប្បាយចិត្ត និងមិនមានការបារម្ភ៕
November 17, 2020
វិធីរៀបចំបន្ទប់ធ្វើការនៅក្នុងផ្ទះយ៉ាងក្លាសស៊ិក និងមានស្តាយល៍
បើលោកអ្នកសម្លឹងមើលទៅតុធ្វើការក្នុងផ្ទះរបស់ខ្លួនឯងនៅពេលនេះ ហើយឃើញសុទ្ធតែគំនរឯកសារគរយ៉ាងគ្មានរបៀប ធុងសំរាមដែលពេញទៅដោយកម្ទេចក្រដាស តុដាក់ម៉ាស៊ីនព្រីនធើរ៍សុទ្ធតែធូលីដី និងតង្កៀបកៀបក្រដាសឯកសារនៅរាយប៉ាយពេញលើ់តុ-ល និងល។ ពេលមើលឃើញបែបហ្នឹងហើយ តើអ្នកនឹងមានអារម្មណ៍ចង់ធ្វើការខ្លាំងប៉ុនណាទៅ?។ បែបមិនចង់ សូម្បីតែដាក់គូទអង្គុយផង កុំថាឡើយដល់ទៅធ្វើការ មែនទេ?។
អូខេ!បើដូច្នេះកុំបង្អង់យូរ ចូរប្រញាប់ចាត់ការបន្ទប់ធ្វើការរបស់លោកអ្នកជាថ្មី តាមវិធីរៀបចំបន្ទប់ធ្វើការយ៉ាងក្លាសស៊ិកដូចខាងក្រោមនេះ ៖
-ប្រើប្រាស់ទីកន្លែងឱ្យបានត្រឹមត្រូវ
មិនសំខាន់លើបន្ទប់ធ្វើការក្នុងផ្ទះនោះមានទីធ្លាធំ ឬក៏តូចឡើយ តែការចាត់ការរៀបចំបន្ទប់ធ្វើការឱ្យមើលទៅគួរឱ្យចូលអង្គុយនោះ វាសំខាន់លើការចេះប្រើប្រាស់ទីកន្លែងឱ្យបានត្រឹមត្រូវទៅវិញទេ។ បើបន្ទប់ធ្វើការរបស់អ្នកមិនសូវជាធំទូលាយប៉ុន្មានទេនោះ គួរជ្រើសរើសប្រើតុកៅអីដែលមានខ្នាតតូចល្មម រកតុណាដែលមានថតច្រើន ដើម្បីទុកដាក់ឯកសារទៅតាមប្រភេទរបស់វា ឬបើមានទូសម្រាប់ដាក់ឯកសារស្រាប់ហើយនោះ អាចយកម៉ាស៊ីនព្រីនធើរ៍ទៅដាក់លើខ្នងទូឯកសារនោះក៏បានដែរ និងព្យាយាមរៀបចំតុធ្វើការឱ្យមានរបៀបរៀបរយជានិច្ច រួមទាំងព្យាយាមបោសជូតសម្អាតបន្ទប់ធ្វើការឱ្យបានស្អាតបាតរៀងរាល់ថ្ងៃផង។
-រៀបចំទុកដាក់របស់សំខាន់ៗនៅក្បែរដៃ
ក្រោយពីអង្គុយចុះនៅលើកៅអី និងចាប់ផ្តើមធ្វើការហើយនោះ ជឿថា គ្រប់គ្នាច្បាស់ជាមិនចង់ក្រោកដើរទៅយកនេះយកនោះញឹកញាប់ឡើយ ព្រោះវាអាចនឹងធ្វើឱ្យខូចសមាធិក្នុងការធ្វើការ ដូច្នេះរបស់របរដែលចាំបាច់សម្រាប់ការធ្វើការ ដូចជា ក្រដាស់រ៉ាម ទូរស័ព្ទដៃ ទូរស័ព្ទលើតុ – ល – គួរតែដាក់នៅក្បែរខ្លួន ងាយស្រួលឈោងចាប់យកមកធ្វើការ និងបើអាចទៅរួចគួររកនំបារាំង នំប៊ីស្គីត ទឹកតែ ឬទឹកក្រូចមកដាក់ជិតខ្លួនផង ទុកសម្រាប់ពេលនឹកឃ្លាន ឬពេលមានអារម្មណ៍ធុញថប់ អាចញ៉ាំលេងបន្ធូរបន្ថយអារម្មណ៍បាន។
-សម្រួលបរិយាកាសក្នុងបន្ទប់ឱ្យស្រឡះសប្បាយ
បន្ទប់ធ្វើការដែលមើលទៅងងឹត និងហប់ ប្រហែលជាមិនគួរឱ្យចង់ចូលទៅអង្គុយធ្វើការប៉ុន្មានទេ…ដូច្នេះគួរសម្លឹងរកមើលកន្លែងបញ្ចេញខ្យល់អាកាសឱ្យបន្ទប់ធ្វើការផង ដូចជា បើបន្ទប់ធ្វើការរបស់លោកអ្នកមានមាត់បង្អួច ថ្ងៃណាមេឃស្រឡះត្រជាក់ល្អ ក៏បើកបង្អួចឱ្យខ្យល់អាកាសបានចេញ-ចូលត្រជាក់ស្រួលខ្លួនផង ឬបើថ្ងៃណាមេឃក្តៅហប់ ក៏បើកម៉ាស៊ីនត្រជាក់ ឬកង្ហារក៏បាន និងរកផើង ឬថូរផ្កាស្រស់ៗមកដាក់តាំងលម្អ ព្រមទាំងបាញ់ស្រ្បៃយ៍ក្រអូបក្នុងបន្ទប់ធ្វើការ ដើម្បីឱ្យមានបរិយាកាសស្រស់ថ្លា និងខួរក្បាលបានស្រឡះល្អស្រួលខ្លួនផង៕
November 17, 2020
ជួយកូនឱ្យរៀនយល់ដឹងតាមរយៈការធ្វើកិច្ចការផ្ទះ
លោកឪពុកអ្នកម្តាយខ្លះអាចនឹងកើតអាការមិនត្រូវចិត្តភ្លាមៗតែម្ដង នៅពេលដែលកូនកំពុងធ្វើកិច្ចការផ្ទះហើយទាក់ ឬរអាក់រអួលក្នុងចំណុចដែលខ្លួនគិតថា “ងាយ” ឬជួនកាលកូនធ្វើខុសដោយសារតែគេមិនទាន់បានសង្កេតឃើញចំណុចអ្វីម៉្យាងនោះ ឪពុកម្ដាយក៏ស្រាប់តែបញ្ចេញអាការខឹងដាច់ក្បាល ដាច់កន្ទុយ ធ្វើហាក់ដូចជាអ្វីៗលែងអាចកែខៃបានអ៊ីចឹង។ បណ្ដាលឱ្យបរិយាកាសក្នុងការធ្វើកិច្ចការផ្ទះរបស់កូន ប្រែទៅជាស្រងូតស្រងាត់ដូចគ្នានឹងបេះដូងរបស់កូនដែលត្រូវស្វិតទ្រោមអស់ដែរ។
បើមិនចង់ឱ្យអំឡុងពេលនៃការធ្វើកិច្ចការផ្ទះក្លាយជាអំឡុងពេលដ៏អាក្រក់សម្រាប់ទាំងខ្លួនលោកអ្នក និងកូនសម្លាញ់របស់យើងនោះ ពេលនេះទស្សនាវដ្តី ឡារ៉ែនមានអត្តបទស្រាវជ្រាវវិភាគមួយដែលនឹងណែនាំអំពីវិធីធ្វើឱ្យម៉ោងធ្វើកិច្ចការផ្ទះរបស់កូនក្លាយជាម៉ោងនៃការរៀនយល់ដឹងដ៏ល្អមកជម្រាបជូន ព្រោះអ្នកវិភាគស្រាវជ្រាវបានរកឃើញថា ការដែលឪពុកម្តាយ “សម្លឹងមើលអ្វីជុំវិញខ្លួនក្នុងន័យល្អ ចិត្តត្រជាក់ៗ ផ្តល់នូវការគាំទ្រ និងផ្តល់នូវតម្លៃចំពោះការរៀនយល់ដឹង” នោះវានឹងក្លាយទៅជាជំនួយដ៏សំខាន់មួយដែលធ្វើឱ្យកុមារ “បានរៀនចេះដឹង” យ៉ាងពិតៗពីទម្រង់ហ្វឹកហាត់ទាំងអស់នោះ។
ផ្ទុយទៅវិញ ការដែលឪពុកម្តាយសម្លឹងឃើញកិច្ចការផ្ទះរបស់កូនគ្រាន់តែជាអ្វីមួយដែលត្រូវធ្វើឱ្យតែរួចៗពីដៃ ឬក៏ដាច់ខាតត្រូវតែធ្វើចេញមកឱ្យបានល្អស្អាតជ្រុលពេក លើសសមត្ថភាពរបស់ក្មេង(ដោយការបញ្ជាឱ្យសរសេតាម ឬឪពុកម្តាយធ្វើជំនួស) ដើម្បីឱ្យបានពិន្ទុល្អៗពីលោកគ្រូនោះ ទាំងអស់នេះគឺជាការទាញកូនឱ្យធ្លាក់ក្នុងរង្វង់នៃការរៀនសូត្រដែលមិនត្រឹមត្រូវទៅវិញទេ។
ការវិភាគស្រាវជ្រាវមួយនេះបានសិក្សាពីការប្រព្រឹត្តរបស់កុមារថ្នាក់បឋមទី4 ហើយនិងអាណាព្យាបាលចំនួន 135នាក់ ដោយអ្នកស្រាវជ្រាវមកពីមហាវិទ្យាល័យ Bengurion ប្រទេស អ៊ីស្រាអែល ដែលលោកវេជ្ជបណ្ឌឹត Idit Kartz ជាម្ចាស់នៃការងារវិភាគស្រាវជ្រាវនេះបានរៀបរាប់ថា ៖
“ឪពុកម្តាយអាចបង្កើតទំនោរចិត្តដល់កូនក្នុងការធ្វើកិច្ចការផ្ទះបានដោយការយល់ព្រមឱ្យកូនៗធ្វើកិច្ចការផ្ទះដោយខ្លួនឯង មិនចូលទៅលូកលាន់ជ្រុលហួសពេក រួមទាំងមើលរំលងការខុសឆ្គងបន្តិចបន្តួចរបស់កូនខ្លះផង បើវាជាការធ្វើឱ្យកុមារសប្បាយរីករាយក្នុងការធ្វើកិច្ចការផ្ទះរបស់គេនោះ”
ក្រៅពីនោះ ការរៀបចំបរិយាកាសខាងក្នុងផ្ទះឱ្យមានភាពទាក់ទាញដល់ការចង់ធ្វើកិច្ចការផ្ទះរបស់កុមារ គឺជារឿងល្អប្រសើរមួយ ព្រោះបើបរិយាកាសល្អ មានឧបករណ៏សម្រាប់រៀនគ្រប់គ្រាន់ កុមារនឹងមានអារម្មណ៍ថា មានចិត្តចង់រៀន ចង់ធ្វើជាមិនខាន៕
November 17, 2020
បន្លែ-ផ្លែឈើ 8មុខដែលគួរញ៉ាំទាំងសម្បក
បន្លែផ្លែឈើជាច្រើនប្រភេទដែលយើងតាំងចិត្តចង់ញ៉ាំដើម្បីឱ្យទទួលបានវីតាមីន និងសារធាតុរ៉ែដែលមានប្រយោជន៍ដល់រាងកាយ តែបែរជាមិនបានដឹងខ្លួនឡើយថា បានបំផ្លាញអ្វីល្អៗ មានប្រយោជន៍ជាច្រើនដែលធម្មជាតិផ្ដល់ឱ្យមកចោលអស់ដោយការ “បក ឬចិតសម្បក” ចោលហ្នឹងឯង។
តើមានបន្លែផ្លែឈើប្រភេទណាខ្លះដែលយើងគួរញ៉ាំទាំងសម្បក…តោះ! យើងទៅមើលទាំងអស់គ្នា។
ផ្លែត្របែក : ត្របែកជាផ្លែឈើដែលមានវីតាមីនC ខ្ពស់ និងដែលសម្បករបស់ត្របែកក៏ជាប្រភពនៃវីតាមីនល្អៗជាច្រើនដូចគ្នា ដូច្នេះបើញ៉ាំផ្លែត្របែកទាំងសម្បកបាន នឹងធ្វើឱ្យយើងទទួលបានវីតាមីនដែលមានប្រយោជន៍ចំពោះរាងកាយកាន់តែច្រើនឡើងដូចគ្នាដែរ។
មើមការ៉ុត : មើមការ៉ុតមានសារធាតុបេតាឃែរ៉ូធីនខ្ពស់ និងថែមទាំងមានច្រើននៅនឹងសម្បកទៀតផង។ បើជាការ៉ុតមើមធំៗដែលមានសម្បកអាចនឹងក្រាស់ ឬមិនស្អាតគួរទទួលទានផងនោះ អ្នកខ្លះអាចនឹងមិនចង់ញ៉ាំទាំងសម្បកឡើយ តែបើសិនជាកូនមើមការ៉ុតតូចៗ ឬមើមការ៉ុតខ្ចីៗ តូចៗវិញនោះ ក៏ញ៉ាំទាំងសម្បកតែម្ដងទៅ។
ផ្លែប៉េងប៉ោះ : មុខម្ហូបខ្លះ អាចត្រូវបកសម្បកផ្លែប៉េងប៉ោះចេញ។ ទោះជាសាច់ប៉ងប៉ោះទន់ខ្លាំងប៉ុនណាក៏ដោយ តែចង់ប្រាប់ថា បើយកមកញ៉ាំទាំងឆៅស្រស់ៗ ឬដាក់ចូលទៅស្ងោរ ទៅឆាក្នុងខ្ទះ ឬឆ្នាំងដោយមិនបាច់បកសម្បកបាន ក៏នឹងល្អខ្លាំងណាស់ ព្រោះសម្បករបស់ផ្លែប៉េងប៉ោះជាប្រភពរួមនៃវីតាមីនC បេតាឃែរ៉ូធីន និងឡៃខូពីន ជាពិសេសពេលផ្លែប៉េងប៉ោះទុំ ឡៃខូពីននឹងរឹតតែច្រើនឡើងទៀតផង បើមិនបានញ៉ាំទាំងសម្បក ច្បាស់ជាស្ដាយខ្លាំងណាស់។
ផ្លែសារី : អ្នកខ្លះចូលចិត្តញ៉ាំផ្លែសារីបែបបកសម្បកអស់ តែឡារ៉ែនសូមប្រាប់ថា នៅក្នុងសម្បករបស់ផ្លែសារីមានវីតាមីនC ខ្ពស់ណាស់ និងថែមទាំងមានសារធាតុប្រឆាំងមហារីក និងជួយបញ្ចុះកូឡេស្តេរ៉ូលក្នុងរាងកាយទៀតផង ដូច្នេះលើកក្រោយ បើញ៉ាំផ្លែសារី គ្រាន់តែលាងឱ្យស្អាត រួចហាន់ជាចំណិត ហើយញ៉ាំតែម្ដងទៅ។
ផ្លែប៉ោម : ផ្លែឈើកំពូលល្បីល្បាញដែលមនុស្សជាច្រើនចិតសម្បកចោលយ៉ាងគ្មានស្ដាយស្រណោះ ព្រោះមិនចូលចិតញ៉ាំសម្បកខ្លះទៅ ឬសម្បកមិនគួរឱ្យញ៉ាំខ្លះទៅក៏មាន តែ ក្រៅពីការចិតសម្បកហើយ នឹងធ្វើឱ្យសាច់ផ្លែប៉ោមឆាប់ឡើងខ្មៅហើយនោះ នៅធ្វើឱ្យផ្លែប៉ោមបាត់បង់វីតាមីនល្អៗអស់ជាច្រើនទៀតផង ដូចជា ឃ្វើស៊ីធីន ដែលជួយការពារជំងឺសរសៃឈាម និងបេះដូង វីតាមីនC និងត្រៃធើរពីនណយដ៍ដែលជួយការពារមហារីក ជាដើម។
ផ្លែត្រប់វែង(ពណ៌ស្វាយ) : សម្បករបស់ផ្លែត្រប់វែងមានសារធាតុដែលហៅថា ណាស៊ូនីន ដែលជួយការពារឱ្យបេះដូងរឹងមាំ ហើយសារធាតុមួយនេះនៅតែមាន ទោះជាឆ្លងកាត់ការចម្អិនដោយកម្ដៅហើយក៏ដោយ ដូច្នេះបើចិត្តសម្បកចោលមុនទទួលទាន ប្រហែលជាមិនទទួលបានសារធាតុអាហារល្អៗបែបនេះឡើយ។
ផ្លែត្រសក់ : មនុស្សជាច្រើនចូលចិត្តញ៉ាំផ្លែត្រសក់បែបចិត្តសម្បកចេញដូចគ្នា។ ការពិតទៅសម្បករបស់ត្រសក់មានជាតិកាកសរសៃខ្ពស់ ជួយឱ្យប្រព័ន្ធបន្ទោបង់ដំណើរការយ៉ាងប្រក្រតី ដែលអាចការពារអាការទល់លាមក និងមហារីកពោះវៀនធំបាន។
មើមដំឡូងបារាំង : 100 ទាំង 100 ចិត្តសម្បកមើមដំឡូងបារាំងចោលទាំងអស់ តែ ដឹងទេថា សម្បករបស់ដំឡូងបារាំងពេញទៅដោយប៉ូតាស្យូម និងសារធាតុដែក ដែលភាគច្រើនស្ថិតនៅក្នុងសម្បកទាំងនោះ។ លើកក្រោយបើសម្បកមើមដំឡូងបារាំងមិនក្រាស់ជ្រុលពេកទេនោះ សាកល្បងទទួលទានទាំងសម្បកមើលម្ដងក៏ល្អម្យ៉ាងដែរ៕
November 17, 2020