Author: ធឿន មករា

រយៈពេល 5ខែ ទុនវិនិយោគសំណង់មានចំនួន 4,362លានដុល្លារ
ភ្នំពេញៈ រយៈពេល5ខែដើមឆ្នាំនេះទុនវិនិយោគលើវិស័យសំណង់មានទំហំទឹកប្រាក់4,362លានដុល្លារអាមេរិកកើនឡើង20ភាគរយបើធៀបរយៈពេលដូចគ្នាកាលពីឆ្នាំមុន។
លោក ប៉ែន សុផល រដ្ឋលេខាធិការក្រសួងរៀបចំដែនដី នគរូបនីយកម្ម និងសំណង់បានថ្លែងថា ទុនវិនិយោគក្នុងវិស័យសំណង់បន្តកើនឡើងជាក់ស្តែងទុនវិនិយោគកាលពីឆ្នាំមុនមានទំហំទឹកប្រាក់ជាង8ពាន់លានដុល្លារអាមេរិកហើយក្នុងរយៈពេល5ខែដើមឆ្នាំនេះទុនវិនិយោគក្នុងវិស័យនេះបានកើនដល់4,362លានដុល្លារអាមេរិក។ លោកបន្តថា វិស័យសំណង់បានផ្តល់ការងារដល់ប្រជាពលរដ្ឋប្រមាណ20ម៉ឺននាក់ក្នុងមួយថ្ងៃជាមួយនឹងកំណើនសេដ្ឋកិច្ចប្រកបដោយភាពរឹងមាំ វិស័យនេះនឹងបន្តរីកចម្រើនបន្ថែមទៀត។
លោករដ្ឋលេខាធិការបានបន្តថា ស្របពេលនឹងការរីកចម្រើននេះក្រុមហ៊ុនដែលធ្វើអាជីវកម្មលើវិស័យនេះ និងបានចុះបញ្ជីនៅក្រសួងរៀបចំដែនដី នគរូបនីយកម្ម និងសំណង់កើនដល់1,022ក្រុមហ៊ុន ក្នុងនោះក្រុមហ៊ុនសិក្សាគម្រោងប្លង់មានចំនួន42ក្រុមហ៊ុនសាងសង់មានចំនួន980។ នៅទូទាំងប្រទេសមានស្ថាបត្យករសរុប2,500នាក់ និងមានវិស្វករចំនួន3ម៉ឺននាក់។
លោក គីម ហ៊ាង ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជាបានថ្លែងអបអរសាទរចំពោះទុនវិនិយោគលើវិស័យនេះដែលបាននិងកំពុងបន្តកើនឡើង ប៉ុន្តែលោកបានសួរពីទំហំទឹកប្រាក់ពិតប្រាកដ ដែលហូរចូលមកក្នុងវិស័យនេះថាតើមានប៉ុន្មានភាគរយពិតប្រាកដ ព្រោះអ្នកវិនិយោគខ្លះបានបំប៉ោងទឹកប្រាក់វិនិយោគរបស់ពួកគេ៕
June 17, 2017
Ronaldo ត្រៀមចាកចេញពីក្លិប Real Madrid
ខ្សែប្រយុទ្ធ Cristiano Ronaldo របស់ Real Madrid ចង់ចាកចេញពីក្លិបនេះ និងទឹកដីអេស្ប៉ាញក្រោយពីរូបគេត្រូវបានចោទប្រកាន់ពីបទបន្លំមិនបំពេញកាតព្វកិច្ចបង់ពន្ធនៅក្នុងប្រទេសនេះ។ នេះបើយោងតាមការចេញផ្សាយព័ត៌មានមួយនៅលើកាសែតកីឡាប្រចាំថ្ងៃរបស់ព័រទុយហ្គាល់ A Bola កាលពីថ្ងៃសុក្រ។
កាសែតនេះ បានចេញផ្សាយពីរឿងរ៉ាវទាក់ទងនឹង Ronaldo ដោយផ្អែកទៅលើមូលដ្ឋាននៃប្រភពដ៏គួរឲ្យជឿជាក់មួយ ហើយថាតារាឆ្នើមប្រចាំឆ្នាំរបស់ពិភពលោក4សម័យកាលវ័យ32ឆ្នាំរូបនេះបានធ្វើការសម្រេចចិត្តរបស់គេរួចជាស្រេចហើយក្នុងការស្នើសុំក្លិប Real Madrid ដើម្បីចាកចេញ។ វាត្រូវបានគេបញ្ជាក់ថា Ronaldo ពិតជាខកចិត្ត និងមិនពេញចិត្តលើការចោទប្រកាន់ផ្សេងៗប្រឆាំងនឹងរូបគេនេះឡើយ។ ដោយឡែកប្រភពព័ត៌មានមួយផ្សេងទៀតក៏បានចេញផ្សាយដូចគ្នានេះផងដែរ។ ភ្នាក់ងារតំណាងឲ្យ Ronaldo មិនអាចទាក់ទងដើម្បីសុំការបកស្រាយបានភ្លាមៗឡើយ។ រដ្ឋអាជ្ញារបស់ប្រទេសអេស្ប៉ាញបានដាក់ពាក្យបណ្តឹងប្រឆាំងនឹងកីឡាកររូបនេះ ដោយចោទប្រកាន់ថារូបគេមិនគោរពកាតព្វកិច្ចបង់ពន្ធជូនរដ្ឋក្នុងទឹកប្រាក់14.7លានអឺរ៉ូ (ស្មើនឹង16.5លានដុល្លារអាមេរិក)តាមរយៈការលាក់បាំងចំណូលពីការលក់សិទ្ធិរូបភាពរបស់គេនៅចន្លោះឆ្នាំ2011 និងឆ្នាំ2014។ Ronaldo បានបដិសេធពីការប្រព្រឹត្តកំហុសទាំងអស់។
ក្លិប Real Madrid កាលពីថ្ងៃព្រហស្បតិ៍ បានបញ្ជាក់ថា ពួកគេជឿជាក់ថាខ្សែប្រយុទ្ធអន្តរជាតិព័រទុយហ្គាល់រូបនេះ បានប្រពឹត្តយ៉ាងស្របច្បាប់។ Real Madrid មិនអាចទាក់ទងបានភ្លាមៗឡើយកាលពីថ្ងៃសុក្រ ដើម្បីសុំការរបកស្រាយលើប្រភពព័ត៌មានទាំងនេះ៕
June 17, 2017
សម្លប្រហើរម្សៅ
សម្លប្រហើរម្សៅ គ្រាន់តែឮឈ្មោះក៏ចង់ទទួលទានបាត់ទៅហើយ ព្រោះវាជាមុខម្ហូបដ៏ល្បីរបស់ប្រជាជនកម្ពុជាយើងតាំងពីយូរណាស់មកហើយ។ ទោះជាមុខម្ហូបនេះមានគ្រឿងផ្សំច្រើនមុខ និងមានរបៀបចម្អិនស្មុគស្មាញបន្តិចមែន តែបន្ទាប់ពីមុខម្ហូបនេះចម្អិនឆ្អិនវិញនោះគឺពិតជាគាប់ចិត្តសមាជិកនៅក្នុងផ្ទះជាមិនខាន។ ដូច្នេះ សូមស្ត្រីមេផ្ទះទាំងអស់រីករាយជាមួយនឹងការស្វែងយកពីគ្រឿងផ្សំ និងរបៀបធ្វើសម្លប្រហើរម្សៅនេះទាំងអស់គ្នា ជាមួយនឹងអ្នកស្រី Sakorak Thonn ដូចតទៅ។
+ គ្រឿងផ្សំ
* ត្រីផ្ទក់អាំង
* កំពឹស
* ត្រីឆ្អើរបុក
* ពងត្រី
* ប្រហុកចិញ្ច្រាំ
* អង្ករ 3ស្លាបព្រាបាយ (ត្រាំទឹក រួចបុក)
* គ្រឿងបុក (គល់ស្លឹកគ្រៃ ជីលីងល័ក្ខ រមៀត ខ្ជាយ និងខ្លឹមស)
* បន្លែ ៈ ល្ពៅ ត្រាវ ផ្សិតម្ជុល ផ្សិតបំបើង ត្រួយល្ពៅ ស្លឹកងប់ ស្លឹកបាស ផ្ទី ពោត ននោង និងម្ទេស
* គ្រឿងផ្សំរសជាតិ
+ របៀបចម្អិន
ជាដំបូងត្រូវដាក់ដាំទឹកនៅក្នុងឆ្នាំងឱ្យពុះជាមុនសិន រួចសឹមបង់ប្រហុកចិញ្ច្រាំចូល ហើយកូរឱ្យចេញជាតិល្អ សឹមបន្តដោយដាក់បន្លែគ្រប់មុខដូចជា ល្ពៅ ត្រាវ ផ្សិតបំបើង ពោត និងននោងចូលទៅក្នុងឆ្នាំង។ បន្ទាប់មកដាក់សាច់ត្រីផ្ទក់អាំងដែលបានបេះរួច ត្រីឆ្អើរបុក កំពឹសចូលទៅក្នុងឆ្នាំរួចបន្ថែមគ្រឿងផ្សំរសជាតិចូល។ បង់មើមខ្ជាយចូល និងយកស្លឹកគ្រៃមកញីឱ្យចេញក្លិន រួចបង់ចូលទៅក្នុងទឹកសម្ល បន្ទាប់មកដាក់បន្លែប្រភេទស្លឹកដូចជា ត្រួយល្ពៅ ផ្សិតម្ជុល ស្លឹកងប់ ស្លឹកបាសស្លឹកផ្ទី និងពងត្រីចូល ហើយបន្ថែមដោយគ្រឿងដែលបុកហើយ និងអង្ករចូលជាបន្តទៀត។ ពេលដែលទឹកសម្លពុះ សឹមកូរសម្លបន្តិចហើយបង់ដុំស៊ុបខ្នរចូល ដើម្បីបង្កើនរសជាតិនៃសម្លឱ្យកាន់តែឈ្ងុយឆ្ងាញ់ឡើងមួយកម្រិតទៀត។ ជាចុងក្រោយដាក់ម្ទេសគ្រាប់ចូលរួចកូរឱ្យសព្វជាការស្រេច៕
June 17, 2017
ទីបំផុតទូរស័ព្ទ Nokia ប្រើប្រព័ន្ធ Android បើកសម្ពោធនៅកម្ពុជាហើយ!!
បន្ទាប់ពីបង្ហាញខ្លួនកាលពីដើមឆ្នាំ ក្នុងពិព័រណ៍ Mobile World Congress នៅទីក្រុងបាសេឡូណា ទូរស័ព្ទស៊េរីថ្មីប្រើប្រាស់ប្រព័ន្ធប្រតិបត្តិការ Android របស់ក្រុមហ៊ុន Nokia បានបើកសម្ពោធជាផ្លូវការហើយក្នុងទីផ្សារកម្ពុជា កាលពីល្ងាចថ្ងៃទី 14 ខែមិថុនា ឆ្នាំ 2017 ម្សិលមិញនេះ។
Nokia បានបង្ហាញរាល់ស្មាតហ្វូន Android ថ្មីៗទាំងអស់ រួមមានទូរស័ព្ទ Nokia3 Nokia5 និង Nokia6 ហើយក្នុងនោះទូរស័ព្ទស៊េរីចាស់តែផ្លាស់ប្ដូរជំនាន់ថ្មី Nokia 3310 ឆ្នាំ 2017 ក៏មានវត្តមានក្នុងកម្មវិធីនោះដែរ។ អ្នកតំណាងក្រុមហ៊ុន Nokia កម្ពុជា ឱ្យដឹងថា ក្រុមហ៊ុននឹងដាក់លក់ Nokia3 និង 3310 ក្នុងទីផ្សារស្រុកខ្មែរនៅចុងខែមិថុនានេះ ចំណែកទូរស័ព្ទ Nokia5 និង Nokia6 នឹងចាប់ផ្តើមដាក់លក់នៅពាក់កណ្ដាលខែកញ្ញាខាងមុខ។
ទូរស័ព្ទ Nokia3 ប្រើអេក្រង់ IPS HD ទំហំ 5.0 អ៊ីញ ស្រោបដោយផ្ទៃកញ្ចក់ Corning® Gorilla® និងមានស្រទាប់អេក្រង់ប្រភេទ Polarised ធ្វើឱ្យមានចំណាំងផ្លាតតិច ដែលផ្តល់នូវរូបភាពកាន់តែច្បាស់ល្អ ទោះបីស្ថិតនៅក្រោមពន្លឺថ្ងៃខ្លាំងក៏ដោយហើយវាក៏មានកាមេរ៉ាមុខក្រោយទំហំ 8MP ដូចគ្នា និងមាន 4 ពណ៌ខុសៗគ្នា គឺ ខ្មៅ ទឹកប្រាក់ ខៀវ និងទង់ដែង។
សម្រាប់ទូរស័ព្ទ Nokia5 អេក្រង់ធំទំហំ 5.2 អ៊ីញ ប្រភេទ IPS HD ដំណើរការដោយអង្គប្រតិបត្តិការ Qualcomm® Snapdragon ™ 430 មានកាមេរ៉ាក្រោយទំហំ 13MP បំពាក់មុខងារ Auto Focus និងមានភ្លើង Flash ពីរ រួមទាំងកាមេរ៉ាមុខទំហំ 8MP កម្រិតចាប់រូបភាព 84 ដឺក្រេដែលធ្វើឱ្យការថតរូបបែបស៊ែលហ្វ៊ីរបស់លោកអ្នកកាន់តែធំទូលាយ និងភ្លឺច្បាស់ត្រជាក់ភ្នែកពិសេសវាមានមុខងារចាប់រូបភាពបានល្អទាំងនៅកន្លែងភ្លឺ និងទីងងឹត។ Nokia5 មាន 4 ពណ៌ខុសៗគ្នាគឺ ខ្មៅ ទឹកប្រាក់ ខៀវ និងទង់ដែង។
ស្មាតហ្វូនចុងក្រោយ គឺ Nokia6 ដែលវាមានអេក្រង់ធំជាងគេ ទំហំ 5.5 អ៊ីញ Full HD និងមានតួខ្លួនផលិតចេញពីលោហធាតុអាលុយមីញ៉ូមកម្រិត 6000 មីល្លីម៉ែត្រដែលស័ក្តិសមបំផុតសម្រាប់អ្នកដែលចង់បានទូរស័ព្ទដែលរឹងមាំជាមួយកម្មវិធីកម្សាន្តយ៉ាងច្រើនសម្បូរបែប។
វាបំពាក់ដោយប្រព័ន្ធសំឡេងឆ្លាតវៃមានរន្ធសំឡេងចំនួន 2 ដែលអាចឱ្យអ្នកប្រើប្រាស់ទទួលបាននូវសំឡេងឮច្បាស់ល្អ ខណៈដែលប្រព័ន្ធសំឡេង Dolby Atmos® នឹងផ្តល់នូវបទពិសោធការកម្សាន្តផ្នែកភាពយន្តដ៏អស្ចារ្យមួយទៀតដែលពុំធ្លាប់មាន។
ទូរស័ព្ទនេះប្រើបន្ទះឈីប Qualcomm® Snapdragon ™ 430 និងអង្គក្រាហ្វិកQualcomm® Adreno™ 505 ផ្តល់តុល្យភាពរវាងការប្រើប្រាស់ និងថាមពលថ្មបានល្អប្រើបានរយៈពេលយូរ។ Nokia6 មាន 4 ពណ៌ខុសៗគ្នាគឺ ខ្មៅ ទឹកប្រាក់ ខៀវនិងទង់ដែង។
ដោយឡែកទូរស័ព្ទមួយចុងក្រោយគេនេះ គឺ Nokia 3310 ចាស់ផ្លាស់ប្ដូររូបរាងថ្មីស៊េរីឆ្នាំ 2017 ជាមួយនឹងរូបរាងស្តើងស្រាលជាទូរស័ព្ទដែលលក់ដាច់បំផុតមួយក្នុងប្រវត្តិសាស្ត្ររបស់ Nokia។ 3310 ត្រូវបានផលិតជាថ្មីជាមួយកំណែប្រែថ្មី ជាមួយនឹងពណ៌ស្រស់ស្អាតការរចនាមានលក្ខណៈទំនើបពិសេស កាន់ថ្មបានយូរ ដោយអាចនិយាយបានរហូតដល់ 22 ម៉ោង និងទុកចោលបានដល់ទៅមួយខែ។
អ្នកប្រើប្រាស់អាចផ្ញើសារ និយាយបានពេញមួយថ្ងៃ ថតរូប ស្តាប់ចម្រៀង និងលេងហ្គេមពស់ដ៏ល្បីល្បាញជាថ្មីម្តងទៀតដោយប្រើថាមពលថ្មតែមួយ។ ជាមួយនឹងសមត្ថភាពកាន់ថ្មបានយូររហូតដល់ពេញមួយខែ Nokia 3310 មានអ្វីគ្រប់យ៉ាងដែលលោកអ្នកធ្លាប់ស្គាល់ និងស្រឡាញ់ ដូចជាមានស៊ុមផលិតពីប៉ូលីកាបូនរលោងទាន់សម័យជាដើម៕

June 15, 2017
កម្ពុជា ផ្តួលអាហ្វហ្គានីស្ថាន ដើម្បីជួយឱ្យលោក Vitorino ស្គាល់រសជាតិឈ្នះជាលើកទី1
អ្នកចាំទី ស៊ូ យ៉ាទី បានក្លាយជាកីឡាករឆ្នើមប្រចាំការប្រកួត ខណៈខ្សែបម្រើ ប្រាក់ មុន្នីឧត្តម បានរកគ្រាប់បាល់ឈ្នះដើម្បីជួយឱ្យក្រុមបាល់ទាត់ជម្រើសជាតិកម្ពុជាបានបង្កើតការភ្ញាក់ផ្អើលផ្សេងៗ តាមរយៈការយកឈ្នះលើក្រុមបាល់ទាត់ជម្រើសជាតិអាហ្វហ្គានីស្ថាន ក្នុងលទ្ធផល 1-០ ក្នុងការប្រកួតជម្រុះពូល C សម្រាប់ព្រឹត្តិការណ៍ AFC Asian Cup នាពហុកីឡដ្ឋានជាតិអូឡាំពិក កាលពីល្ងាចថ្ងៃអង្គារម្សិលមិញ។
ក្រោយពីបានរងបរាជ័យ3ប្រកួតជាប់ៗគ្នា លោក Leonardo Vitorino បានដឹកនាំក្រុមកម្ពុជាចូលធ្វើការប្រកួតកាលពីថ្ងៃម្សិលមិញទាំងមានសម្ពាធដ៏ច្រើន ប៉ុន្តែក្រុមម្ចាស់ផ្ទះហាក់បានចាប់ផ្តើមយ៉ាងល្អក្នុងការប្រកួតនេះ ដោយពួកគេមានឱកាសល្អជាច្រើនដងក្នុងតង់ទី1 តែធ្វើមិនបានសម្រេច។
ក្រោយពីបង្ហាញពីទម្រង់លេងយ៉ាងរឹងមាំក្នុងតំបន់ការពារ ពិសេសការបំពេញតួនាទីយ៉ាងល្អរបស់ ស៊ូ យ៉ាទី ការប្រកួតនេះបានបញ្ចប់ក្នុងលទ្ធផលស្មើ ០-០ ក្នុងតង់ទីមួយ ប៉ុន្តែនៅតង់ទី2 នៅនាទីទី60 ក្នុងពេលដែលកំពុងតែប្រទាញប្រទង់នៅពីមុខទី អ្នកចាំទីរបស់អាហ្វហ្គានីស្ថាន បានទាត់បាល់ចេញមិនបានល្អ ធ្វើឲ្យបាល់នោះខ្ទាតទៅចំនឹងជើងរបស់ ប្រាក់ មុន្នីឧត្តម របស់ក្លិបស្វាយរៀង ចូលទីតែម្តង។ គ្រាប់បាល់នេះ បានបង្កើតឲ្យមានការអបអរយ៉ាងខ្លាំងក្លា ទាំងគ្រូបង្វឹក កីឡាករ និងអ្នកគាំទ្រនៅកីឡដ្ឋានផ្ទាល់ដែលមានចំនួនជិត5០០០០ម៉ឺននាក់។ ជ័យជម្នះនេះ អាចនឹងលុបចោលនូវការរិះគន់ផ្សេងៗ ក៏ដូចជាកាត់បន្ថយសម្ពាធទៅលើលោកគ្រូបង្វឹក Vitorino សញ្ជាតិប្រេស៊ីលនោះដែរ ក្រោយពីក្រុមកម្ពុជា មិនស្គាល់ឈ្នះសោះក្រោមការដឹកនាំ3ប្រកួតដំបូងរបស់លោក។
ក្រោយពីការទទួលជ័យជម្នះដ៏រីករាយនេះ បច្ចុប្បន្នក្រុមជម្រើសជាតិកម្ពុជា កំពុងតែស្ថិតក្នុងចំណាត់ថ្នាក់លេខ2 ដោយមាន 3ពិន្ទុ ក្រោយពីក្រុមកំពុងនាំមុខក្នុងពូល គឺហ្ស៊កដានី ដែលបានបញ្ចប់ត្រឹមលទ្ធផលស្មើ ០-០ លើក្រុមស្ថិតក្នុងចំណាត់ថ្នាក់លេខ3 វៀតណាម ក្នុងការប្រកួតនាថ្ងៃដដែលនោះដែរ។
ជ័យជម្នះនេះដែរក៏នឹងផ្តល់នូវការជឿជាក់មួយដល់ក្រុមកម្ពុជា មុននឹងក្រុមដែលមានរហស្សនាមថា គោព្រៃមួយនេះ ត្រូវធ្វើដំណើរទៅជួបជើងខ្លាំងវៀតណាម នាថ្ងៃទី5 ខែកញ្ញា ឆ្នាំ2017 សម្រាប់ការប្រកួតបន្ទាប់៕
https://www.youtube.com/watch?v=hqh9rVsFXxY
June 14, 2017
គ្រូបង្វឹកកម្ពុជាបង្ហាញពីការគ្មានសម្ពាធ មុនពេលប៉ះអាហ្វហ្គានីស្ថាន ល្ងាចនេះ
លោក Leonardo Vitorino គ្រូបង្វឹកនៃក្រុមបាល់ទាត់ជម្រើសជាតិកម្ពុជាបានបង្ហាញថា លោកមិនមានសម្ពាធអ្វីឡើយ នៅពេលក្រុមរបស់លោកត្រូវធ្វើការប្រកួតជម្រុះក្នុងពូល E ក្នុងព្រឹត្តិការណ៍ AFC Asian Cup ឆ្នាំ2019 ជាមួយនឹងក្រុមជម្រើសជាតិអាហ្វហ្គានីស្ថាន នាពហុកីឡដ្ឋានជាតិអូឡាំពិក នៅល្ងាចថ្ងៃនេះ។
គ្រូបង្វឹកសញ្ជាតិប្រេស៊ីលរូបនេះ បានបញ្ជាក់នៅក្នុងសន្និសីទសារព័ត៌មានមួយ កាលពីថ្ងៃម្សិលមិញថា លោកមិនមែនមកដឹកនាំដើម្បីរាប់តែការឈ្នះ និងចាញ់ ឬក៏ផ្តោតទៅលើការដឹកនាំរយៈពេលខ្លីនោះទេ ប៉ុន្តែលោកមានតួនាទីក្នុងការសម្រេចគោលដៅជាយុទ្ធសាស្ត្រ ដើម្បីកសាងអនាគតសម្រាប់កីឡាបាល់ទាត់របស់ព្រះរាជាណាចក្រមួយនេះ។ ការប្រកួតដ៏សំខាន់នេះ ដែលត្រូវបានរំពឹងទុកថា នឹងទាក់ទាញអ្នកគាំទ្រមកអ្នកទស្សនាយ៉ាងច្រើនកុះករនោះ នឹងចាប់ផ្តើមប្រកួតនៅម៉ោង 6:30ល្ងាចតទៅ។
បើទោះបីជាសម្ពាធផ្សេងៗកំពុងតែស្ថិតនៅលើរូបលោក Vitorino ក្នុងការដណ្តើមយកលទ្ធផលជាវិជ្ជមានមួយឱ្យបាន ក្រោយពីការរងបរាជ័យ3លើកជាប់ៗគ្នាក្រោមស្នាដៃក្រុមជម្រើសជាតិហ្ស៊កដានី ឥណ្ឌា និងឥណ្ឌូនេស៊ី ក្នុងរយៈពេល3ខែកន្លងមកនេះក៏ដោយ ក៏អតីតគ្រូបង្វឹករបស់ក្លិបឡាវ Lanexang United F.C. រូបនេះបានបញ្ជាក់យ៉ាងច្បាស់ដែរថា កម្ពុជាកំពុងតែស្ថិតនៅផ្លូវដ៏ត្រឹមត្រូវហើយ ដោយលោកបានបញ្ជាក់ថា៖ «ខ្ញុំមកទីនេះមិនមែនមករាប់ការឈ្នះ និងចាញ់នោះទេ ប៉ុន្តែយើងមានគោលដៅរយៈពេលវែងរហូតដល់ឆ្នាំ2023 ដែលកម្ពុជាត្រូវធ្វើជាម្ចាស់ផ្ទះក្នុងការប្រកួតកីឡាស៊ីហ្គេម។ កម្ពុជា ស្ថិតនៅផ្លូវដ៏ត្រឹមត្រូវហើយ។ ក្នុងកីឡាបាល់ទាត់ ពេលខ្លះយើងយំ ប៉ុន្តែទៅថ្ងៃអនាគត យើងនឹងរីករាយជាមួយគ្នា»។
ក្រុមជម្រើសជាតិកម្ពុជា នឹងឈានទៅកាន់ការប្រកួតនេះ ក្រោយពីចាញ់ក្នុងការប្រកួតជម្រុះបើកឆាករបស់ខ្លួនក្រោមស្នាដៃក្រុមជម្រើសជាតិហ្ស៊កដានី ក្នុងលទ្ធផល 7-០ កាលពីចុងខែមីនា ហើយពួកគេក៏ទើបតែរងបរាជ័យក្នុងផ្ទះខ្លួនឯង 2-០ ក្នុងការប្រកួតមិត្តភាពជាមួយនឹងក្រុមជម្រើសជាតិឥណ្ឌូនេស៊ី កាលពីថ្ងៃព្រហស្បតិ៍ សប្តាហ៍មុនផងដែរ។
ក្រុមជម្រើសជាតិកម្ពុជា និងអាហ្វហ្គានីស្ថាន ធ្លាប់ជួបគ្នា2លើកកាលពីឆ្នាំ2015 ក្នុងវគ្គជម្រុះ World Cup ដោយកម្ពុជា បានចាញ់ក្នុងផ្ទះខ្លួនឯង 1-០ មុននឹងបន្តចាញ់ 3-០ ពេលប្រកួតជើងទី2៕
June 13, 2017
ប្រជាជននៅលើ “អគារប៊ុលឌិងស” រើចេញជិតអស់ហើយ
បន្ទាប់ពីមានការជួបជុំហូបនំបញ្ចុករវាងអាជ្ញាធរដែលមានការចូលរួមពីសំណាក់ឯកឧត្ដមជា សុផារ៉ា ទេសរដ្ឋមន្រ្ដី និងជារដ្ឋមន្រ្ដីក្រសួងរៀបចំដែនដី នគរូបនីយកម្ម និងសំណង់ ជាមួយប្រជាពលរដ្ឋអតីតរស់នៅលើ ”អគារប៊ុលឌិងស” កាលពីថ្ងៃទី10 រួចមក គេសង្កេតឃើញថា ប្រជាពលរដ្ឋកាន់តែមានការញាប់ដៃញាប់ជើងក្នុងរើជញ្ជូនសម្ភាររបស់ខ្លួនចេញពីបន្ទប់ដើម្បីទទួលបានប្រាក់សំណងឆាប់ៗ។
គិតចាប់ពីម៉ោង6 និង30នាទីល្ងាច ថ្ងៃទី12 ខែមិថុនា ឆ្នាំ2017 ប្រជាពលរដ្ឋជាម្ចាស់កម្មសិទ្ធិបន្ទប់ចំនួន 343 ក្នុងចំនួនបន្ទប់សរុបទាំងអស់492 បានរើចេញដើម្បីទៅរកលំនៅដ្ឋានថ្មី និងបានទទួលប្រាក់ទូទាត់សំណងពីក្រុមហ៊ុនរួចរាល់ហើយ។
គួរបញ្ជាក់ដែរថា ដំណើរចាកចេញរបស់ប្រជាពលរដ្ឋដែលរស់នៅលើអគារប៊ុលឌិងសដើម្បីស្វែងរកលំនៅដ្ឋានថ្មី ត្រូវបានប្រព្រឹត្ដទៅដោយរលូន និងមានការសាទរពីប្រជាពលរដ្ឋជាច្រើន តែទោះជាយ៉ាងនេះក្ដី ក៏ប្រជាពលរដ្ឋទាំងនោះហាក់នៅមានអារម្មណ៍អាឡោះអាល័យដល់អគារដ៏កម្សត់មួយនេះដែលនឹងត្រូវបាត់រូបរាងចេញពីលើផែនទីទីក្រុងភ្នំពេញជារៀងរហូតនោះដែរ៕

June 13, 2017
AC Milan ផ្តួល Arsenal ដើម្បីចុះហត្ថលេខាជាមួយ Andre Silva
ក្លិប AC Milan បានប្រកាសពីការចុះហត្ថលេខាជាមួយនឹងខ្សែប្រយុទ្ធ Andre Silva មកពីក្លិប Portoរបស់ព័រទុយហ្គាល់ ក្នុងតម្លៃខ្លួន38លានអឺរ៉ូ (ស្មើនឹង42.5លានដុល្លារអាមេរិក)។
ខ្សែប្រយុទ្ធអន្តរជាតិព័រទុយហ្គាល់វ័យ21ឆ្នាំរូបនេះ បានទទួលការត្រួតពិនិត្យសុខភាពរបស់គេជាមួយនឹង AC Milan កាលពីថ្ងៃចន្ទរួចរាល់ហើយ មុនពេលបំពេញការផ្ទេររបស់គេជាផ្លូវការ។ តម្លៃខ្លួនសម្រាប់ Silva ដែលក៏ស្ថិតក្នុងការចាប់អារម្មណ៍ពីសំណាក់ក្លិប Arsenal និងបានស៊ុតបាល់បញ្ចូលទី21គ្រាប់សម្រាប់ Porto កាលពីរដូវកាលមុនផងដែរនោះ អាចនឹងកើនឡើងដល់4០លានអឺរ៉ូ។ នេះបើយោងតាមការប្រកាសរបស់ក្លិបព័រទុយហ្គាល់មួយនេះ នៅលើគេហទំព័ររបស់ពួកគេ។ Porto បានឲ្យដឹងក្នុងសេចក្តីថ្លែងការណ៍មួយថា៖ «Porto សូមជូនពរឲ្យ Andre Silva ជួបការរីករាយបំផុត និងទទួលជោគជ័យក្នុងកម្រិតអាជីព និងក្នុងកីឡាបាល់ទាត់ដោយមិនបំភ្លេចពីរបៀបដែលរូបគេតែងតែលះបង់រាល់អ្វីៗទាំងអស់សម្រាប់ក្លិបនេះឡើយ»។ Silva គឺជាកីឡាករចំណូលថ្មីទី4នៅរដូវក្តៅនេះ ខណៈដែល AC Milan បានបន្តធ្វើការជួសជុលក្រុមរបស់ខ្លួនក្រោមការកាន់កាប់របស់ម្ចាស់កម្មសិទ្ធិថ្មីជាជនជាតិចិន។
ក្លិប AC Milan ដែលបានបញ្ចប់ក្នុងចំណាត់ថ្នាក់លេខ6នៅលើតារាងក្របខ័ណ្ឌ Serie A កាលពីរដូវកាលមុននោះ បានទិញខ្សែការពារពីរនាក់រួចស្រេចហើយគឺ Ricardo Rodriguez និង Mateo Musacchio ពីក្លិប Wolfsburg និង Villarreal តាមលេខរៀង ស្របពេលដែលខ្សែបម្រើអន្តរជាតិកូតឌីវ័រក៏បានចូលរួមដែរ ក្រោយផ្ទេរមកពីក្លិប Atalanta៕
ប្រភពពី៖ Eurosport.com
June 13, 2017
ម៉ូដសំលៀកបំពាក់ទស្សនាវដ្តីលេខ 109 ប្រចាំខែ មិថុនា ឆ្នាំ 2017
June 12, 2017
កសិករថា ដាំសណ្តែកកួរងាយស្រួលថែទាំ និងឆាប់បានលុយមកវិញទៀតផង!
កសិករដាំសណ្តែកកួរ នៅតាមជាយក្រុងនិយាយថា បន្លែសណ្តែកកួរងាយស្រួលថែទាំជាងបន្លែផ្សេងទៀតណាស់ ហើយឆាប់ឱ្យផលទៀត ដោយចំណាយពេលដាំដុះត្រឹមតែកន្លះខែក៏អាចបេះផ្លែលក់បានហើយ និងបេះបានរាល់ថ្ងៃរហូតដល់ទៅ 2ខែឯណោះទើបដើមងាប់ទៅវិញ។
លោក ស៊ុំ សម្ផស្ស កសិកររស់នៅភូមិព្រែកអុងប៉ាង ឃុំព្រែកថ្មី ស្រុកស្អាង ខេត្តកណ្តាល បានប្រាប់ឱ្យដឹងថា លោកបានងាកមកដាំសណ្តែកកួរ 3-4ឆ្នាំមកហើយ ក្រោយពីសង្កេតឃើញថា ដំណាំនេះងាយស្រួលដាំជាងដំណាំបន្លែផ្សេងទៀត និងមានរយៈពេលដាំត្រឹមតែកន្លះខែ ហើយអាចបេះបានដល់ទៅជាង 2ខែ និងមានម៉ូយមកប្រមូលទិញដល់ចម្ការ ពុំចាំបាច់ដឹកយកទៅលក់នៅឯផ្សារដោយខ្លួនឯងទៀតផង។
កសិករខាងលើបន្តថា ដំបូងឡើយលោកដាំបន្លែផ្សេងៗច្រើនមុខដែរ ប៉ុន្តែដោយសារបានតម្លៃថោក និងពិបាកលក់នោះ ទើបលោកងាកមកដាំសណ្តែកកួរនេះវិញ ព្រោះងាយស្រួលដាំដុះ និងលក់បានថ្លៃគ្រាន់បើ ក៏សម្រេចចិត្តប្រែក្លាយផ្ទៃដីចំនួន 15អា ពីការដាំបន្លែចម្រុះមកដាំសណ្តែកកួរវិញម្តង។ លោកបញ្ជាក់បន្ថែមថា «ឆ្នាំនេះសណ្តែកកួរគឺនៅនឹងថ្លៃគ្រាន់បើ ក្នុង 1គីឡូក្រាមតម្លៃ 1500រៀលតាំងពីដើមដៃមកម្ល៉េះ ខុសពីឆ្នាំមុនតម្លៃត្រឹមតែ 800ទៅ 1000រៀលតែប៉ុណ្ណោះ ហើយក្នុង 1ថ្ងៃលោកអាចបេះបានជាមធ្យមបានពី 30ទៅ 40គីឡូក្រាមក្នុងមួយថ្ងៃ»។
ចំពោះការរៀបចំដាំដុះវិញគឺ មុនពេលដាំកសិករត្រូវតែភ្ជួរដីហាលចោលកន្លះខែឱ្យឆ្អិនដីល្អសិន ទើបឆូតជារងទំហំទទឹងប្រហែល 1ម៉ែត្រ ហើយយកកូនដើមសណ្តែកកួរមកដាក់ដាំ រួចយកមែកឬស្សីមកដោតធ្វើជាទ្រើង ចន្លោះពីគ្នា1ម៉ែត្រ និងយកមងចាស់ៗមកចងពីលើដើម្បីកុំឱ្យអស់មែកឬស្សីច្រើន និងឱ្យសណ្តែកវាងាយស្រួលតោងឡើងផង។ ក្រោយដាំរួចយើងត្រូវស្រោចទឹក 1ថ្ងៃ 2ដង គឺព្រឺក និងល្ងាច និងមើលថែទាំកុំឱ្យសត្វល្អិតចង្រៃ ឬដង្កូវមកស៊ីត្រួយរបស់វា ហើយនៅពេលដែលសណ្តែកកួរជិតបោះដៃឡើងទ្រើង យើងត្រូវស្រោចជីតាមគល់របស់វា ដើម្បីឱ្យវាលូតលាស់បានល្អ និងធន់នឹងជំងឺ។
បន្ទាប់ពីសណ្តែកកួរអាយុបាន 15ថ្ងៃ គឺយើងអាចបេះវាបានហើយ និងបេះបានរាល់ថ្ងៃ និងថែមទាំងអាចបេះបានដល់ទៅ 2ខែឯណោះ ទើបសណ្តែកចាស់ដើម យើងបោចដើមចេញ ហើយបាញ់ថ្នាំសម្លាប់ស្មៅ និងដាក់ដាំសាជាថ្មី។ លោកក៏បានបញ្ជាក់ផងដែរថា ចាប់តាំងពីប្តូរមកដាំសណ្តែកកួរនេះមក ជីវភាពគ្រួសាររបស់លោកគឺមានភាពល្អប្រសើរឡើងជាងមុនច្រើន ហើយដំណាំសណ្តែកកួរនេះពិតជាស្រួលដាំមែន ប៉ុន្តែក៏ត្រូវមើលថែទាំវាក្នុងរយៈពេល 15ថ្ងៃទៅ 20ថ្ងៃដែរ ទើបសណ្តែកចេញផ្កាផ្លែអាចប្រមូលផលបាន។
ចំណែកឯឈ្មួញកណ្តាលម្នាក់ ក្នុងចំណោមឈ្មួញជាច្រើនទៀត គឺអ្នកស្រី ឃុន មួយ ឆេង មានទីលំនៅភូមិព្រែកថ្មី ឃុំទឹកវិល ស្រុកស្អាង ខេត្តកណ្តាលបានឱ្យដឹងដែរថា មិនថាតែសណ្តែកកួរនោះទេគឺអ្នកស្រីទិញបន្លែគ្រប់ប្រភេទ និងចុះទិញដល់ចម្ការតែម្តង គឺប្រមូលទិញយកទៅលក់បោះដុំឱ្យម៉ូយនៅឯផ្សារនាគមាសភ្នំពេញ។ ឈ្មួញរូបនេះបានប្រាប់ដែរថា ឆ្នាំនេះតម្លៃសណ្តែកកួរគឺតម្លៃនៅនឹងគ្រាន់បើតាំងពីដើមដៃមក ដោយ 1គីឡូក្រាមអ្នកស្រីប្រមូលទិញក្នុងតម្លៃ 1500រៀល និងដឹកយកទៅលក់ក្នុងតម្លៃពី 1800ទៅ 2000រៀល ហើយជាមធ្យមក្នុង 1ថ្ងៃគឺទិញបានចន្លោះពី 1តោនទៅ 1តោនកន្លះដែរ ខុសពីឆ្នាំមុនដែលមានតម្លៃក្នុង 1គីឡូក្រាមត្រឹមតែ 800ទៅ 1000រៀលតែប៉ុណ្ណោះ៕
June 10, 2017