ដោយសារតែ ត្រសក់គឺជាបន្លែដែលសម្បូរទៅដោយវីតាមីន C កាល់ស្យូម ស៊ីលីកា និងប៉ូតាស្យូម ដូច្នេះហើយបានជាមនុស្សមួយចំនួននិយមយកត្រសក់មកធ្វើជាឱសថប្រចាំត្រកូលក្នុងការថែទាំស្បែកឱ្យស្រស់ស្អាត និងសក់រលើបរលោងគ្រប់ពេលវេលា។ ត្រសក់មិនគ្រាន់តែល្អចំពោះស្បែកមុខប៉ុណ្ណោះទេ វានៅមានអត្ថប្រយោជន៍ផ្សេងៗជាច្រើនទៀតដែលអ្នកមិនបានដឹង។ ដូច្នេះសូមមកស្វែងយល់ពីអត្ថប្រយោជន៍របស់ផ្លែត្រសក់ដូចតទៅ។
1/ ត្រសក់បំបាត់អាការហើមភ្នែក និងភ្នែករូង
ចំពោះសុភាពនារីដែលអង្គុយនៅពីមុខកុំព្យូទ័រពេញមួយថ្ងៃរហូត នឹងប្រឈមជាមួយនឹងអាការផ្សាភ្នែក ហើមភ្នែកដូចខ្លាឃ្មុំផេនដា និងភ្នែករ៉ូងជ្រៅដូចមិនបានគេងគ្រប់គ្រាន់ ហើយនៅពេលត្រឡប់មកដល់ផ្ទះវិញបើបានចិតចំណិតផ្លែត្រសក់ជាបន្ទះស្តើងៗ យកមកបិទនៅលើត្របកភ្នែកប្រមាណជា20នាទីនោះ ជាតិអំបិលរ៉ែដែលមាននៅក្នុងផ្លែត្រសក់នឹងជ្រាបចូលទៅក្នុងស្បែក ជួយសម្រាលអាការហើមភ្នែកបានយ៉ាងមានប្រសិទ្ធភាព។ បើបានធ្វើជាប្រចាំរាល់ថ្ងៃ ស្បែកនៅជុំវិញភ្នែក ខ្លាញ់ និងស្នាមជ្រីវជ្រួញនៅជុំវិញភ្នែកក៏មិនហ៊ានមកក្បែររូបអ្នកទៀតដែរ។
ហើយបើបានទទួលទានទឹកផ្លែត្រសក់ នឹងមានប្រសិទ្ធភាពនៅក្នុងការបញ្ចេញទឹកនោម ជាថ្នាំបញ្ចុះ និងជួយលាងជាតិពុលចេញពីរាងកាយថែមទៀតផង។
2/ វិធីប្តូរត្រសក់ឱ្យក្លាយជាឱសថឌីថក់ព្យាបាលស្បែកមុខ
ឱសថ ឬទឹកថ្នាំឌីថក់ដែលជាថ្នាំបន្សាបជាតិពុល គឺអាចធ្វើបានយ៉ាងងាយបំផុតដោយគ្រាន់តែគាបច្របាច់យកទឹកត្រសក់ 1ផ្លែលាយជាមួយនឹងទឹកខ្ញីច្របាច់ស្រស់ៗ ប៉ុន្តែត្រូវទទួលទានក្រោយភ្ញាក់ពីគេងភ្លាមៗ ពីព្រោះការឌីថក់ដែលទទួលបានលទ្ធផលល្អត្រូវធ្វើនៅពេលពោះទទេមិនទាន់ទទួលទានអ្វីសោះ។
បើចេញទៅហាលថ្ងៃក្តៅរហូតទាល់តែផ្សារោលស្បែកនោះ អ្នកត្រូវច្របាច់យកទឹកត្រសក់លាយជាមួយឡេជំនួយស្បែកកន្លះស្លាបព្រាកាហ្វេមកលាបលើកន្លែងដែលមានស្នាមរោលខ្លោចនោះ។ វានឹងជួយឱ្យស្បែករបស់អ្នកឡើងត្រជាក់វិញ ហើយវីតាមីន D ដែលបានពីត្រសក់នឹងផ្តល់នូវសំណើមយ៉ាងល្អដល់ស្បែក ជួយកាត់បន្ថយភាពផ្សាក្រហាយបានយ៉ាងមានប្រសិទ្ធភាព និងទាន់ចិត្ត៕
