ធឿន មករា - La Reine Media

ផ្សារ Makro នឹងបើកដំណើរការនាពាក់កណ្ដាលខែធ្នូនេះ

ផ្សារលក់ទំនិញដ៏ធំលំដាប់អន្ដរជាតិ Makro ដែលមានទីតាំងក្នុងតំបន់អភិវឌ្ឍន៍ទីក្រុងរណបពោងពាយ របស់អ្នកឧកញ៉ា លី យ៉ុងផាត់ ស្ថិតក្នុងសង្កាត់ភ្នំពេញថ្មី ខណ្ឌសែនសុខ ក្បែរផ្សារទំនើប អុីអន ទី2 នឹងបើកដំណើរការជាផ្លូវការនៅថ្ងៃទី17 ខែវិច្ឆិកា ខាងមុខនេះហើយ។

ផ្សារទំនើបលំដាប់អន្ដរជាតិនេះនឹងមានលក់ទំនិញជាច្រើនប្រភេទទាំងការលក់បោះដុំ និងលក់រាយ។ Makro ដែលត្រូវបានអភិវឌ្ឍន៍នៅលើផ្ទៃដី5ហិកតានេះ ជាក្រុមហ៊ុនមួយស្ថិតក្នុងចំណោមក្រុមហ៊ុនបុត្រសម្ព័ន្ធរបស់ក្រុមហ៊ុនស៊ីភី គ្រុប ដែលជាក្រុមហ៊ុនកសិពាណិជ្ជកម្មធំជាងគេរបស់ប្រទេសថៃ សហការជាមួយក្រុមហ៊ុន L.Y.P Group របស់អ្នកឧកញ៉ា លី យ៉ុងផាត់។

លោកស្រី ស៊ុឆាដា អ៊ីធីចារូគូស អគ្គនាយកក្រុមហ៊ុន ស្យាម ម៉ាក្រូ បានលើកឡើងថា វាជាមោទនភាពបំផុតសម្រាប់ទីផ្សារដ៏ធំនេះ ដែលបានបើកសាខាដំបូងនៅក្នុងព្រះរាជាណាចក្រកម្ពុជា បន្ទាប់ពីទទួលការគាំទ្រជាខ្លាំងពីប្រជាជនថៃរយៈពេល30ឆ្នាំកន្លងមក៕

December 6, 2017

ពិព័រណ៍ឧស្សាហកម្មសំណង់កម្ពុជា ឆ្នាំ2017

សមាគមអ្នកសាងសង់កម្ពុជា កាលពីចុងសប្តាហ៍កន្លងមកបានរៀបចំពិព័រណ៍ឧស្សាហកម្មសំណង់កម្ពុជា ឆ្នាំ2017 ដែលបានប្រព្រឹត្ដទៅនៅមជ្ឈមណ្ឌលកោះពេជ្រ ចំនួនបីថ្ងៃ គឺចាប់ពីថ្ងៃទី30 ខែវិច្ឆិកា ដល់ថ្ងៃទី02 ខែធ្នូ ឆ្នាំ2017។ កម្មវិធីនេះមានការអញ្ជើញចូលរួមជាគណៈអធិបតីពីសំណាក់ ឯកឧត្ដម ជា សុផារ៉ា ទេសរដ្ឋមន្ដ្រី រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ ព្រមទាំងលោកឧកញ៉ា ពុង ឃាវសែ ប្រធានសមាគមអ្នកសាងសង់កម្ពុជា។

ពិព័រណ៍ឧស្សាហកម្មសំណង់កម្ពុជា ឆ្នាំ2017 នេះគេសង្កេតឃើញមានការចូលរួមពីក្រុមហ៊ុនធំៗកម្រិតស្ដង់ដារអន្ដរជាតិជាច្រើន ដែលមានដូចជា ក្រុមហ៊ុនផ្គត់ផ្គង់គ្រឿងចក្រ សម្ភារសំណង់ និងគ្រឿងអគ្គិសនីជាដើម៕

December 6, 2017

ការប្រមូលផលស្រូវនៅរដូវកាលនេះនឹងកើនដល់ជាង10លានតោន

ផ្អែកលើសណ្ឋានដី និងអាកាសធាតុមានភាពអំណោយផលជាងឆ្នាំមុន មន្ត្រីជាន់ខ្ពស់នៃក្រសួងកសិកម្ម រុក្ខាប្រមាញ់ និងនេសាទ រំពឹងថា ការប្រមូលផលស្រូវក្នុងឆ្នាំនេះនឹងកើនលើសឆ្នាំមុន ស្របពេលដែលទីផ្សារអន្តរជាតិកំពុងមានតម្រូវការខ្លាំង និងតម្លៃបានប្រសើរជាងមុន។

រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ ឯកឧត្តម វេង សាខុន បានថ្លែងថា ទិន្នផលស្រូវឆ្នាំនេះនឹងកើនដល់ជាង10លានតោន ខណៈឆ្នាំមុនការប្រមូលផលស្រូវ បានប្រមាណជាង 9,950,000តោនដោយសារការដាំដុះដំណាំស្រូវឆ្នាំនេះសម្រេចលើសផែនការចំនួន6,45ហិកតា។ ឯកឧត្តមបន្តថា ផ្ទៃដីដាំដុះស្រូវឆ្នាំនេះមានទំហំ 2,657,768ហិកតា និងប្រមូលផលបានចំនួន1,022,478ហិកតា។

រហូតមកទល់ពេលនេះទិន្នផលស្រូវប្រមូលបានមានចំនួន3,361,164តោន ហើយទិន្នផលជាមធ្យមប្រមូលបានគឺចំនួន 3,263គីឡូក្រាមក្នុងមួយហិកតា។

ឯកឧត្តមរដ្ឋមន្ត្រីបានបន្តថា ផលស្រូវប្រមូលបាននាឆ្នាំនេះភាគច្រើនជាប្រភេទស្រូវក្រអូប ជាការផលិតសម្រាប់តម្រង់ទិសសម្រាប់ការនាំចេញ។ តម្លៃស្រូវក្រអូបឆ្នាំនេះមានតម្លៃចន្លោះពី1,000ទៅ1,3000រៀល និងស្រូវធម្មតាមានតម្លៃចន្លោះពី 800 ទៅ 900រៀលក្នុងមួយគីឡូក្រាម។

មន្ត្រីជំនាញកសិកម្មនិយាយថា ដើម្បីឱ្យទិន្នផលស្រូវមានការកើនឡើងកសិករគួរចេះផ្លាស់ពូជដំណាំដែលស៊ាំដីយូរឆ្នាំ មកជាប្រភេទដំណាំស្រូវប្រភេទថ្មីដែលអាចជួយលើកគុណភាពដីផង និងជួយឱ្យផលដំណាំកាន់តែប្រសើរ។ ជាក់ស្ថែងដូចជាក្រុមអ្នកជំនាញចិន ដែលនាំពូជស្រូវប្រភេទថ្មីមកដាំសាកល្បងនៅលើដីកម្ពុជាបានទទួលជោគជ័យជាងខ្លាំង ដោយសារបានទិន្នផលខ្ពស់ជាស្រូវធម្មតា៕

December 6, 2017

សហគ្រាសក្នុងស្រុកកាន់តែច្រើននឹងចូលរួមពិធីបុណ្យសមុទ្រ

នៅរយៈពេលប្រមាណជាង2សប្តាហ៍ទៀតការរៀបចំបុណ្យសមុទ្រនឹងឈានចូលលើកទី6 ដើម្បីជាការរួមចំណែកអបអរសាទរឆ្នេរសមុទ្រកម្ពុជាត្រូវបានបញ្ចូលជាសមាជិកនៃក្លិបឆ្នេរសមុទ្រស្អាតបំផុតក្នុងពិភពលោកកាលពីឆ្នាំ2011។

ចាប់តាំងពីពេលនោះមក សកម្មភាពប្រចាំឆ្នាំត្រូវបានរៀបចំឡើងជាបន្តបន្ទាប់ដើម្បីរួមចំណែកទាក់ទាញដល់ភ្ញៀវទេសចរជាតិ និងអន្តរជាតិឱ្យទៅទស្សនាតំបន់ឆ្នេរ ហើយសកម្មភាពពាណិជ្ជកម្ម ក៏ត្រូវបានលើកកម្ពស់ដោយផ្សារភ្ជាប់ផលិតផលក្នុងស្រុកទៅនឹងផលិតផលនាំចូលពីបរទេស។

សម្រាប់ពិធីបុណ្យសមុទ្រឆ្នាំ2017 នេះនឹងត្រូវរៀបចំឡើងចាប់ពីថ្ងៃទី21-24 ខែធ្នូ ឆ្នាំ2017 នៅក្រុងកែប ដែលនេះជាលើកទី2 ហើយសម្រាប់ខេត្តដ៏តូចមួយនេះក្នុងការទទួលធ្វើជាម្ចាស់ផ្ទះ ខណៈអ្នករៀបចំកម្មវិធីនឹងរៀបចំស្តង់ពិព័រណ៍ចំនួន400 សម្រាប់តាំងបង្ហាញផលិតផលទាំងក្នុងស្រុក និងនាំចូល។

មន្ត្រីក្រសួងពាណិជ្ជកម្ម បានប្រាប់ឱ្យដឹងថា គណៈកម្មការនឹងរៀបចំពិព័រណ៍ដោយបែកចែកជាស្តង់សម្រាប់ផលិតផលក្នុងស្រុក និងនាំចូល។

លោក សុខ ដារិទ្ធិ ប្រធាននាយកដ្ឋានកិច្ចការពិព័រណ៍នៃអគ្គនាយកដ្ឋានជំរុញពាណិជ្ជកម្ម ក្រសួងពាណិជ្ជកម្ម បានស្នើឱ្យគណៈកម្មការរៀបចំបុណ្យសមុទ្រផ្តល់អាទិភាពដល់ក្រុមហ៊ុនក្នុងស្រុក ហើយស្តង់ត្រូវមានតម្លៃថោកសមរម្យ ពិសេសរំលេចឱ្យឃើញពីផលិតផលក្នុងស្រុកឱ្យបានច្រើនប្រភេទដែលជាផលិតផលមានសក្តានុពលរបស់កម្ពុជា។

ដើម្បីរៀបចំបុណ្យសមុទ្រនាពេលខាងមុខនេះឱ្យទទួលបានជោគជ័យ ឯកឧត្តម ថោង ខុន រដ្ឋមន្ត្រីក្រសួងទេសចរណ៍ ក៏បានស្នើឱ្យអាជ្ញារខេត្តជួយសម្របសម្រួល និងត្រៀមរៀបចំសណ្ឋាគារសម្រាប់ក្រុមសិល្បករដែលមកពីប្រទេសផ្សេងៗ។

ក្រសួងទេសចរណ៍ បានយកចិត្តទុកដាក់យ៉ាងខ្លាំងចំពោះការអភិវឌ្ឍទេសចរណ៍នៅតំបន់ឆ្នេរដែលជាទេសចរណ៍បែបធម្មជាតិ បន្ទាប់ពីវិស័យឯកជនធ្លាប់បានស្នើឱ្យមានការបង្កើតផលិតផលទេសចរណ៍ថ្មីៗបន្ថែមទៀត ដោយបង្វែរចេញពីផលិតផលទេសចរណ៍ទោល គឺ“ការផ្តោតលើទេសចរណ៍វប្បធម៌” នៅក្នុងខេត្តសៀមរាប។

ថ្នាក់ដឹកនាំក្រសួងទេសចរណ៍ បានបញ្ជាក់ថាព្រឹត្តិការណ៍បុណ្យសមុទ្រ លើកទី6 ដែលបានរៀបចំ
ឡើងក្នុងខេត្តព្រះសីហនុ កាលពីឆ្នាំ2016 មានភ្ញៀវទេសចរជាតិ-អន្តរជាតិចូលរួមទស្សនាប្រមាណ
ជាង 50ម៉ឺននាក់។

ស្ថិតិក្រសួងទេសចរណ៍ បង្ហាញថា ត្រឹមរយៈពេល9ខែ ឆ្នាំ2017 កម្ពុជាទទួលបានភ្ញៀវទេសចរអន្តរជាតិចំនួន 3,912,761នាក់ ដោយមានកំណើន 11.5% និងបាននាំមកនូវប្រាក់ចំណូលជាតិប្រមាណ3,400លានដុល្លារ បង្កើតឱកាសការងារដោយផ្ទាល់ប្រមាណជាង 62ម៉ឺននាក់ និងដោយប្រយោលរាប់សិបម៉ឺននាក់បន្ថែមទៀត ក្នុងនោះកម្លាំងពលកម្មជាស្ត្រីមានប្រមាណ 60%នៃកម្លាំងពលកម្មសរុប៕

December 6, 2017

Malindo Air ផ្តល់ជម្រើសបន្ថែមទៀតដល់អ្នកធ្វើដំណើរតាមផ្លូវអាកាស

ប្រតិបត្តិករធុរកិច្ចក្នុងវិស័យទេសចរណ៍ បានស្វាគមន៍ចំពោះវត្តមានក្រុមហ៊ុនអាកាសចរណ៍របស់ម៉ាឡេស៊ី ថ្មីមួយទៀតដែលបានភ្ជាប់ការហោះហើរត្រង់រវាងរាជធានីភ្នំពេញ និងទីក្រុងគូឡាឡាំពួរ ដែលជាទីក្រុងសំខាន់មួយក្នុងការទាក់ទាញភ្ញៀវទេសចរប្រចាំតំបន់អាស៊ាន ចាប់ពីខែធ្នូ ឆ្នាំ2017 នេះតទៅ។

ក្រុមហ៊ុនអាកាសចរណ៍ Malindo Air របស់ប្រទេសម៉ាឡេស៊ី បានចាប់ផ្តើមជើងហោះហើរជាផ្លូវការលើកដំបូងរបស់ខ្លួនមកកាន់ព្រលានយន្តហោះអន្តរជាតិភ្នំពេញ កាលពីថ្ងៃទី01 ខែធ្នូ ដោយបានដឹកអ្នកដំណើរចំនួន125នាក់ចាកចេញពីអាកាសយានដ្ឋានអន្តរជាតិគូឡាឡាំពួរ (KLIA) នៅវេលាម៉ោង 8:00 ព្រឹកដោយប្រើប្រាស់ពេល2ម៉ោង មុនពេលចុះចតនៅអាកាសយានដ្ឋានអន្តរជាតិភ្នំពេញ។

វត្តមានរបស់ក្រុមហ៊ុនថ្មីមកកាន់ទីផ្សារអ្នកដំណើរតាមផ្លូវអាកាសរបស់កម្ពុជា គឺជាការលើកមុខមាត់របស់អាកាសចរណ៍ម៉ាឡេស៊ី ក៏ដូចជាសាងទំនុកចិត្ត និងផ្តល់ជម្រើសសម្រាប់អ្នកដំណើរនៅកម្ពុជាផងដែរ។ នេះបើតាមការអះអាងរបស់ លោកស្រី ឆាយ ស៊ីវលីន ប្រធានសមាគមទីភ្នាក់ងារទេសចរណ៍កម្ពុជា (CATA)។

លោកស្រី ឆាយ ស៊ីវលីន បាននិយាយថា៖“យើងពិតជាមើលឃើញនូវភាពវិជ្ជមានសម្រាប់វិស័យទេសចរណ៍នៃប្រទេសកម្ពុជា នៅពេលមានក្រុមហ៊ុនអាកាសចរណ៍កាន់តែច្រើនពីតំបន់ដែលមានប្រជាប្រិយភ្ជាប់ការហោះហើរមកកាន់ប្រទេសកម្ពុជា”។

បើតាមប្រធានសមាគមរូបនេះ អ្នកដំណើរអន្តរជាតិពេញចិត្តការធ្វើដំណើរតាមច្រកនៃប្រទេសបីរួមមាន សិង្ហបុរី ម៉ាឡេស៊ី និងថៃ សម្រាប់ដំណើរមកកាន់តំបន់អាស៊ាន មុនភ្ជាប់ការហោះហើរទៅកាន់ប្រទេសមួយចំនួនទៀតក្នុងតំបន់។

លោកស្រី ឆាយ ស៊ីវលីន បានអះអាងដែរថាការភ្ជាប់ការហោះហើរពីក្រុមហ៊ុនថ្មីៗនេះ ក៏ផ្តល់ជម្រើសកាន់តែច្រើនផងដែរដល់ប្រជាជនខ្មែរ ដែលពេញចិត្តការធ្វើដំណើរទៅកាន់បរទេសសម្រាប់វិស្សមកាល។

លោក Chandran Rama Muthy នាយកប្រតិបត្តិក្រុមហ៊ុនអាកាសចរណ៍ Malindo Air បានឱ្យដឹងថា កម្ពុជាជាប្រទេសទី17ដែលក្រុមហ៊ុន Malindo Air ដាក់ឱ្យដំណើរការជើងហោះហើររបស់ខ្លួន ជាមួយរយៈពេលនៃការហោះហើរប្រហែល2ម៉ោងពីទីក្រុងរបស់ប្រទេសម៉ាឡេស៊ីមកកាន់រាជធានីភ្នំពេញ។

លោកបានបញ្ជាក់ថា៖“ទិសដៅដ៏ល្អសម្រាប់ដំណើរកម្សាន្ត និងការធ្វើដំណើរកម្សាន្តផ្លូវថ្មីនេះនឹងពង្រឹងដល់បណ្តាញរបស់យើងដោយមានអ្នកដំណើរកាន់តែច្រើនចូលមកទីក្រុងគូឡាឡាំពួរ ឬឆ្លងកាត់ទៅកាន់ទីក្រុងផ្សេងទៀត”។

លោក Eric Delobel នាយកប្រតិបត្តិនៃអាកាសយានដ្ឋានកម្ពុជា មានប្រសាសន៍ថា អ្នកដំណើរមកពីប្រទេសម៉ាឡេស៊ីបានកើនឡើងជាលំដាប់ហើយស្ថិតក្នុងចំណោមលំដាប់កំពូលទាំង5 នៅរាជធានីភ្នំពេញ។

លោក Eric Delobel បញ្ជាក់ថា៖“ជាមួយនឹងសេវាកម្មថ្មីនេះដែលដំណើរការដោយក្រុមហ៊ុន Malindo Air អ្នកដំណើរពីភ្នំពេញនឹងរីករាយជាមួយ7ជើងហោះហើរប្រចាំថ្ងៃទៅកាន់ទីក្រុងគូឡាឡាំពួរ។ យើងសង្ឃឹមថា ភាពជាដៃគូជិតស្និទ្ធជាមួយក្រុមហ៊ុនអាកាសចរណ៍ដែលរីកចម្រើនលឿនបំផុតមួយនៅក្នុងតំបន់ នឹងកាន់តែទាក់ទាញភ្ញៀវទេសចរ និងកាន់តែរីកចម្រើនថែមទៀតនាពេលអនាគត”៕

December 6, 2017

សេដ្ឋកិច្ចរបស់កម្ពុជានឹងនៅតែរក្សាបានភាពរឹងមាំ

យោងតាមរបាយការណ៍ថ្មីមួយរបស់ធនាគារពិភពលោក (World Bank) បានឱ្យដឹងថា កំណើននៃការនាំចេញស្បែកជើង គ្រឿងម៉ាស៊ីនបរិក្ខាអគ្គិសនី និងគ្រឿងបន្លាស់យានយន្ត បានជួយធ្វើឱ្យសេដ្ឋកិច្ចកម្ពុជារក្សាបាននូវភាពរឹងមាំ ខណៈដែលកំណើនមានការថមថយតិចតួចមកនៅត្រឹមអត្រា 6,8%ក្នុងឆ្នាំ2017 ធៀបនឹងឆ្នាំ2016 ដែលមានអត្រា7%។

របាយការណ៍បច្ចុប្បន្នភាពសេដ្ឋកិច្ចកម្ពុជាចុងក្រោយ ដែលបានផ្សព្វផ្សាយកាលពីពេលថ្មីៗនេះបានកត់សម្គាល់ថា ការនាំចេញសម្លៀកបំពាក់ និងផលិតផលវាយនភណ្ឌដទៃទៀតមានបរិមាណមធ្យម ក៏ប៉ុន្តែទស្សនវិស័យរយៈពេលមធ្យមនៅតែមានភាពវិជ្ជមាន ដោយសារកំណើនលើការនាំចេញច្រើនប្រភេទទំនិញ និងលំហូរចូលដ៏ល្អនៃវិនិយោគទុនផ្ទាល់ពីបរទេស។

លោកស្រី អ៊ីហ្គូណា ដូប្រាចា នាយិកាធនាគារពិភពលោក ប្រចាំកម្ពុជា បានមានប្រសាសន៍ថា៖ “ប្រទេសកម្ពុជាស្ថិតនៅត្រង់ចំណុចមួយដែលបោះជំហានឈានឡើងក្នុងខ្សែចង្វាក់តម្លៃនៃវិស័យកម្មន្តសាល (រោងចក្រផលិតសម្ភារផ្សេងៗ)។ ដើម្បីទទួលបានជោគជ័យក្នុងការបង្កើនការវិនិយោគ និងពង្រីកការនាំចេញច្រើនប្រភេទទំនិញ កម្ពុជាចាំបាច់ត្រូវធ្វើកំណែទម្រង់រចនាសម្ព័ន្ធឱ្យបានកាន់តែស៊ីជម្រៅជាងនេះបន្ថែមទៀត ដែលមានដូចជាដោះស្រាយថ្លៃចំណាយខ្ពស់លើអគ្គិសនី ការដឹកជញ្ជូន ព្រមទាំងគម្លាតនៃជំនាញផងដែរ”។

កំណើនសេដ្ឋកិច្ចពិតប្រាកដត្រូវបានគេរំពឹងថា នឹងនៅតែមានភាពរឹងមាំ គឺកើនឡើងដល់6,9% នៅក្នុងឆ្នាំ2018 ខាងមុខ។ ទោះបីជាយ៉ាងណា ការធ្លាក់ចុះដែលអាចកើតឡើងពីកំណើនសេដ្ឋកិច្ចក្នុងតំបន់ ជាពិសេស នៅក្នុងប្រទេសចិន និងភាពមិនប្រាកដប្រជាដែលអាចកើតមានឡើងទាក់ទងនឹងការបោះឆ្នោត នៅតែអាចបង្កនូវហានិភ័យចំពោះទស្សនវិស័យនេះដដែល។

អ្នកជំនាញសេដ្ឋកិច្ច បានផ្តល់អនុសាសន៍ថាដើម្បីទទួលបានអត្ថប្រយោជន៍ពេញលេញពីវិស័យទេសចរណ៍ កម្ពុជាត្រូវបង្កើនសក្តានុពលវិស័យទេសចរណ៍ តាមរយៈការបង្កើនតំបន់គោលដៅ និងផលិតផលសម្រាប់អ្នកទេសចរ និងតាមរយៈការតភ្ជាប់ទំនាក់ទំនងគ្រួសារនៅជនបទទៅនឹងខ្សែចង្វាក់ផ្គត់ផ្គង់វិស័យទេសចរណ៍។ លើសពីនេះត្រូវផ្តល់នូវការគាំទ្របន្ថែមទៀតដល់កសិករនានា ដែលទទួលរងផលប៉ះពាល់ដោយសារតែតម្លៃកសិផលធ្លាក់ថៃ្ល ហើយកំពុងតែខិតខំស្វែងរកឱកាសប្រសើរជាងនេះដើម្បីចូលទៅកាន់ទីផ្សារ និងបង្កើនផលិតកម្មឱ្យបានច្រើនប្រភេទទៀត៕

December 5, 2017

សហភាពសេដ្ឋកិច្ចអឺរ៉ុបអាស៊ីនឹងពង្រឹងទំនាក់ទំនងពាណិជ្ជកម្មជាមួយកម្ពុជា

ថ្នាក់ដឹកនាំក្រសួងពាណិជ្ជកម្មបានត្រៀមរៀបចំកិច្ចប្រជុំជាមួយគណៈប្រតិភូនៃសហភាពសេដ្ឋកិច្ចអឺរ៉ុបអាស៊ី (EAEU) នៅក្នុងសប្តាហ៍នេះ ដោយរំពឹងថាដំណើរទស្សនកិច្ចរបស់មន្ត្រីមកពីប្រទេសចំនួន5 នៃសហភាពសេដ្ឋកិច្ចអឺរ៉ុបអាស៊ី នឹងមើលឃើញពីផលិតផលមានសក្តានុពលសម្រាប់នាំចេញទៅកាន់ប្រទេសរបស់ខ្លួន។

សេចក្តីជូនដំណឹងរបស់ក្រសួងពាណិជ្ជកម្មកាលពីថ្ងៃទី30 ខែវិច្ឆិកា បានឱ្យដឹងថា ក្រសួងគ្រោងនឹងរៀបចំកិច្ចពិគ្រោះយោបល់ពាក់ព័ន្ធនឹងការធ្វើពាណិជ្ជកម្មជាមួយសហភាពសេដ្ឋកិច្ចអឺរ៉ុបអាស៊ី (EAEU) ដែលមានសមាជិកចំនួន 5 ប្រទេសរួមមាន រុស្ស៊ី បេឡារូស កាហ្សាក់ស្តង់ គីហ្ស៊ីស្តង់ និងអាមេនី ដែលជាទីផ្សារអន្តរជាតិដ៏មានសក្តានុពលមួយសម្រាប់ឱកាសពង្រីកទីផ្សារ និងពាណិជ្ជកម្មដ៏សម្បូរបែបដែលមានផលិតផលក្នុងស្រុកសរុប22,000ពាន់លានដុល្លារ ក្នុងឆ្នាំ2016 និងមានប្រជាជនសរុបជាង180លាននាក់។

ឯកឧត្តម ស៊ាង ថៃ អគ្គនាយកនៃអគ្គនាយកដ្ឋានជំរុញពាណិជ្ជកម្ម និងជាអ្នកនាំពាក្យក្រសួងពាណិជ្ជកម្ម បាននិយាយថា ដើម្បីពង្រីកទីផ្សារនាំចេញផលិតផលវាយនភណ្ឌ មានដូចជា សម្លៀកបំពាក់ និងស្បែកជើង ក្រសួងពាណិជ្ជកម្មនឹងខិតខំចរចាបើកច្រកទៅកាន់ទីផ្សារនៃប្រទេសទាំងនោះបន្ថែមទៀត ព្រោះកន្លងមកទំហំពាណិជ្ជកម្មរវាងកម្ពុជា និងទីផ្សារនៃប្រទេសទាំងនោះស្ថិតនៅតូចនៅឡើយ។

ឯកឧត្តមមានប្រសាសន៍ថា៖“យើងឃើញថាតម្រូវការទីផ្សារក្នុងប្រទេសទាំងនោះគឺដូចជាតម្រូវការនៃទីផ្សាររបស់អឺរ៉ុបដែរ។ យើងមិនអាចនាំបន្លែ និងផ្លែឈើផ្សេងៗទៅកាន់ទីនោះបានទេ”។

ក្នុងដំណើរទស្សនកិច្ច និងពិភាក្សាផ្នែកធុរកិច្ចនេះ ឯកឧត្តម ស៊ាង ថៃ រំពឹងថា គណៈប្រតិភូធុរកិច្ចនៃប្រទេសទាំងនោះនឹងមើលឃើញពីសក្តានុពលផលិតផលកម្ពុជាមួយចំនួនដើម្បីនាំចេញនៅថ្ងៃអនាគត។

បច្ចុប្បន្នកម្ពុជា កំពុងពឹងផ្អែកយ៉ាងខ្លាំងចំពោះការនាំចេញផលិតផលវាយនភណ្ឌទៅកាន់ទីផ្សារធំៗចំនួន2 គឺទីផ្សារសហគមន៍អឺរ៉ុប និងសហរដ្ឋអាមេរិក។ ទីផ្សារទាំងពីរនេះមានឥទ្ធិពលយ៉ាងខ្លាំងក្នុងការបញ្ជាទិញសម្លៀកបំពាក់ពីកម្ពុជា។ ក្រៅពីផលិតផលវាយនភណ្ឌ ផលិតផលកសិកម្មកម្ពុជា ដូចជាអង្ករក៏ត្រូវបាននាំចេញទៅកាន់ទីផ្សារដ៏ធំនេះដែរ។

របាយការណ៍របស់គណៈកម្មការអឺរ៉ុប ប្រចាំប្រទេសកម្ពុជា បានឱ្យដឹងថា ការនាំចេញផលិតផលកម្ពុជាទៅកាន់សហគមន៍អឺរ៉ុប កាលពីឆ្នាំ2016 គិតជាទឹកប្រាក់ 4,555លានដុល្លារ ដោយទឹកប្រាក់ច្រើនលើសលប់បានពីការនាំចេញសម្លៀកបំពាក់៕

December 5, 2017

ស្វែងយល់ពីសក្ដានុពលនៅតំបន់តាមបណ្តោយផ្លូវជាតិលេខ1

បន្ទាប់ពីផ្លូវជាតិលេខ1 បានធ្វើការអភិវឌ្ឍរួចមកគេសង្កេតឃើញមានអ្នកវិនិយោគជាច្រើនបានបង្វែរចំណាប់អារម្មណ៍ទៅធ្វើការអភិវឌ្ឍនៅទីនោះ ដែលជាហេតុធ្វើឱ្យស្ថានភាពតម្លៃអចលនទ្រព្យនៅទីនោះចាប់ផ្ដើមប្រែប្រួលខុសប្លែកពីមុន។

តើបច្ចុប្បន្នតំបន់នោះមានការប្រែប្រួលបែបណា? នៅក្នុងសប្តាហ៍នេះអ្នកយកព័ត៌មាននៃកាសែត ឡារ៉ែន ពាណិជ្ជ បានជួបជាមួយ លោក សន សៀប អគ្គនាយកក្រុមហ៊ុន Key Real Estate ដើម្បីជជែកពីសក្ដានុពល ក៏ដូចជាស្ថានភាពតម្លៃដីនៅតំបន់នោះ។

លោក សន សៀប អគ្គនាយកក្រុមហ៊ុន Key Real Estate

តើតំបន់មួយមានសក្ដានុពលលើវិស័យអចលនទ្រព្យត្រូវផ្អែកលើកត្តាអ្វីខ្លះ?

សក្ដានុពលអចលនទ្រព្យនៅក្នុងតំបន់មួយកើតឡើងបានត្រូវផ្អែកលើតម្រូវការជាចម្បង ដែលមានដូចជា តំបន់នោះត្រូវមានភាពទាក់ទាញធ្វើឱ្យមនុស្សចង់ទៅរស់នៅ ឬទៅប្រកបមុខរបរអ្វីមួយ ពិសេសអាចធ្វើពាណិជ្ជកម្មបាន។ ដើម្បីមានភាពទាក់ទាញ តំបន់នោះត្រូវតែមានហេដ្ឋារចនាសម្ព័ន្ធផ្លូវថ្នល់ល្អ មានសាលារៀន មន្ទីរពេទ្យ ផ្សារទំនើប និងកន្លែងកម្សាន្ដ ដែលជាសេវាកម្មប្រើប្រាស់ជាប្រចាំរបស់អ្នករស់នៅក្នុងតំបន់។

តើបច្ចុប្បន្នភាពនៃតំបន់ផ្លូវជាតិលេខ1 មានលក្ខណៈដូចម្ដេច?

បើយើងមើលទៅផ្លូវជាតិលេខ1កាលពីប៉ុន្មានឆ្នាំមុន ផ្លូវនេះមានទំហំតូច និងមិនទាន់មានកំពង់ផែថ្មីដំណើរការដូចសព្វថ្ងៃទេ ពិសេសមិនទាន់មានគម្រោងអភិវឌ្ឍន៍លំនៅឋាន ឬបុរីធំៗចាប់អារម្មណ៍ទៅអភិវឌ្ឍឡើយ។ បច្ចុប្បន្នផ្លូវជាតិលេខ1 គឺជាផ្លូវដ៏សំខាន់ដែលអភិវឌ្ឍក្រោមជំនួយរបស់ប្រទេសជប៉ុនសម្រាប់ធ្វើការដឹកជញ្ជូនទំនិញ ដែលជាចលករយ៉ាងសំខាន់ជួយជំរុញដល់កំណើនសេដ្ឋកិច្ចរបស់កម្ពុជា។ ផ្លូវដែលបែកចេញពីផ្លូវជាតិលេខ1 ដូចជាផ្លូវនៅមុខរោងចក្រស្រាបៀរ Tiger តភ្ជាប់ទៅស្ពានព្រែកសំរោង(ក្រុងតាខ្មៅ)សុទ្ធតែបានរួមចំណែកយ៉ាងសំខាន់ដល់ការលើកកម្ពស់វិស័យអចលនទ្រព្យនៅទីនោះ។

តើការអភិវឌ្ឍវិស័យអចលនទ្រព្យតាមបណ្តោយផ្លូវជាតិលេខ1 មានលក្ខណៈដូចម្ដេចដែរ?

បើតាមខ្ញុំគិត ល្បឿននៃការអភិវឌ្ឍគឺវាមានលក្ខណៈសន្សឹមៗដោយសារមានតំបន់ជាច្រើនផ្សេងទៀតនៅជុំវិញរាជធានីភ្នំពេញត្រូវការពង្រីកទៅមុខដូចគ្នាដែរ ដូច្នេះទើបធ្វើឱ្យមនុស្សមួយចំនួនដកចំណាប់អារម្មណ៍ខ្លះទៅកន្លែងផ្សេងដោយមិនផ្ដោតតែទៅលើផ្លូវជាតិលេខ1 នោះទេ។ ទោះជាយ៉ាងណាខ្ញុំយល់ថា ការរីកសាយភាយនៃការអភិវឌ្ឍសន្សឹមៗបែបនេះវាមានលក្ខណៈល្អប្រសើរជាងការរីកដោយគំហុក ព្រោះការរីកដោយគំហុក អាចមានការលំបាកដល់ការអភិវឌ្ឍដែលនាំឱ្យមានការលំបាកដល់ការរៀបចំប្លង់មេពុំសូវបានល្អ ហើយពេលខ្លះថែមទាំងជួបបញ្ហាពិបាកដោះស្រាយទៀតផង។

តើតម្លៃអចលនទ្រព្យនៅផ្លូវជាតិលេខ1 មានស្ថានភាពបែបណា?

បើពិនិត្យលើស្ថានភាពតម្លៃដីនាពេលបច្ចុប្បន្នយើងឃើញថា ដីនៅម្ដុំគៀនស្វាយអាចមានតម្លៃក្នុងរង្វង់100ដុល្លារក្នុងមួយម៉ែត្រការ៉េ ចំណែកម្ដុំវត្តនិរោធរង្សី តម្លៃអាចលោតដល់1,000ដុល្លារក្នុងមួយម៉ែត្រការ៉េនិងចាប់ពីវត្ដនិរោធរង្សីទៅដល់គល់ស្ពានព្រះមុនីវង្ស អាចមានតម្លៃចន្លោះពី1,000ដល់4,000ដុល្លារក្នុងមួយម៉ែត្រការ៉េ។

តើតំបន់នៅមាត់ទន្លេក្បែរផ្លូវជាតិលេខ1 មានសក្ដានុពលបែបណាដែរ?

ចំពោះខ្ញុំ ការអភិវឌ្ឍអចលនទ្រព្យនៅជាប់មាត់ទន្លេ ឬបឹងបួ នៅតែល្អសម្រាប់អ្នករស់នៅក្នុងការនាំមកនូវផាសុកភាព ព្រោះតំបន់នោះមានអាកាសធាតុបរិសុទ្ធ ដែលមនុស្សទូទៅតែងប្រាថ្នាចង់បាន។ ប្រសិនបើថ្ងៃក្រោយប្រជាជនខ្មែរមានការយល់ដឹងពីបញ្ហានេះកាន់តែច្រើន វានឹងជំរុញឱ្យមានតម្រូវការកាន់តែច្រើនបន្ថែមទៀត៕

December 5, 2017

ការធ្វើឱ្យប្រភពទុននៅក្នុងវិស័យកសិកម្មមានចលនាឡើងវិញគឺជារឿងចាំបាច់

ការធ្វើឱ្យមានចលនារស់រវើកក្នុងវិស័យផលិតកម្មដើម្បីទ្រទ្រង់កំណើនសេដ្ឋកិច្ច បង្កើតការងារ និងធានានិរន្តរភាពនៃការអភិវឌ្ឍ គឺជាផ្នែកមួយដ៏សំខាន់ក្នុងការផ្តួចផ្តើមបង្កើតឱ្យមានគម្រោងធានាឥណទាន Credit Guarantee Schemes ដែលរាជរដ្ឋាភិបាលកម្ពុជា តាមរយៈក្រសួងសេដ្ឋកិច្ច និងហិរញ្ញវត្ថុបានដាក់ទិសដៅរួចហើយសម្រាប់វិស័យកសិកម្ម និងសហគ្រាសធុនតូច និងមធ្យមនៅកម្ពុជា។

វិស័យកសិកម្មនៅកម្ពុជា ពិសេសស្រូវអង្ករ ត្រូវគេដឹងថាទទួលបានការចូលរួមទុនវិនិយោគយ៉ាងច្រើនគំហុក បន្ទាប់ពីរាជរដ្ឋាភិបាលប្រកាសដាក់ចេញនូវគោលនយោបាយស្រូវអង្ករ កាលពីចុងឆ្នាំ2010 ពោលគឺក្រោយរយៈពេល2ឆ្នាំបន្ទាប់ពីបរិមាណនៃការនាំចេញអង្ករទៅកាន់ទីផ្សារសហភាពអឺរ៉ុបទទួលបានជោគជ័យ ដោយបរិមាណនៃការនាំចេញបានកើនឡើងពី6,000តោនក្នុងឆ្នាំ2008 រហូតដល់រាប់ម៉ឺនតោននៅឆ្នាំបន្តបន្ទាប់។

ដោយមើលឃើញពីសក្តានុពលក្នុងការនាំចេញ និងការបង្កើតការងារតាមរយៈការដាំដុះស្រូវ កែច្នៃអង្ករ និងបង្កើតតម្លៃបន្ថែមពីផលិតផលអង្ករ រាជរដ្ឋាភិបាលបានសម្រេចដាក់ចេញនូវគោលនយោបាយស្រូវអង្ករដ៏ទាក់ទាញមួយ ដែលនៅពេលនោះហើយវិស័យហិរញ្ញវត្ថុឯកជន និងប្រតិបត្តិករឯកជនខ្លួនឯងមានរោងម៉ាស៊ីនជាដើម បានចូលរួមអភិវឌ្ឍន៍វិស័យនេះយ៉ាងសស្រោកសស្រាំ។

ទោះជាយ៉ាងដោយសារមានការប្រកួតប្រជែងខ្លាំងពីទីផ្សារខាងក្រៅ និងទំហំទីផ្សារកម្ពុជានៅមានកម្រិតនោះ បានធ្វើឱ្យតម្លៃស្រូវអង្ករមានការធ្លាក់ចុះខ្លះ និងធ្វើឱ្យអ្នកវិនិយោគក្នុងវិស័យនេះប្រឈមនឹងការលំបាកជាច្រើន។ លក្ខខណ្ឌផ្តល់កម្ចីងាយៗពីវិស័យហិរញ្ញវត្ថុឯកជន ត្រូវបានរឹតបន្តឹង និងចរន្តនៃការដួលរលំរោងម៉ាស៊ីន និងក្រុមហ៊ុននាំចេញធំៗខ្លះបានបន្ថែមការលំបាកដល់ការទទួលបានទុនសម្រាប់បម្រើឱ្យវិស័យកសិកម្មមួយនេះ។

ដោយមើលឃើញពីភាពយឺតយ៉ាវ ឬដើរថយក្រោយនេះ រាជរដ្ឋាភិបាលតាមរយៈក្រសួងសេដ្ឋកិច្ចនិងហិរញ្ញវត្ថុ បានផ្តួចផ្តើមបង្កើតគម្រោងធានាឥណទានថ្មីមួយដោយរំពឹងទៅលើការបង្កើតទំនុកចិត្តពីអ្នកផ្តល់ប្រាក់កម្ចីសម្រាប់វិស័យមួយនេះ។

ឯកឧត្តម ម៉ី វ៉ាន់ ប្រតិភូរាជរដ្ឋាភិបាលទទួលបន្ទុកជាអគ្គនាយកនៃអគ្គនាយកដ្ឋានឧស្សាហកម្ម ហិរញ្ញវត្ថុ នៃក្រសួងសេដ្ឋកិច្ច និងហិរញ្ញវត្ថុ បានលើកឡើងថា វិស័យកសិកម្មជាវិស័យទ្រទ្រង់សេដ្ឋកិច្ច និងបង្កើតការងារសំខាន់ៗមួយចំនួន ប៉ុន្តែវិស័យនេះបានប្រឈមនឹងការលំបាកដោយសារលទ្ធភាពដាក់ទ្រព្យដំកល់ទទួលបានកម្ចីត្រូវអស់។ ឯកឧត្តម បានអះអាងថា ដើម្បីរក្សាកំណើនសេដ្ឋកិច្ច និងបង្កើតការងារ គេមិនអាចទុកចោលឱ្យវិស័យហិរញ្ញវត្ថុឯកជនមិនធ្វើចលនានោះទេ។

ឯកឧត្តមបានបញ្ជាក់ថា៖“ធនាគារមាននៅសល់ទុនច្រើនណាស់ គាត់ចង់ផ្តល់ទុនទៅឱ្យសហគ្រាសធុនតូច និងមធ្យម ប៉ុន្តែគាត់គ្មានប្រភពនៃការធានាថាតើសហគ្រាសទាំងនោះយកទុនទៅហើយសងត្រឡប់មកវិញម្តេចបាន? ដូចនេះទើបគាត់ត្រូវការរដ្ឋាភិបាលគាំទ្ររឿងនេះ”។ ឯកឧត្តមបានបន្ថែមថា៖“យើងបានកំណត់គោលដៅគឺវិស័យកសិកម្ម។ កសិកម្ម គឺជាវិស័យមួយដែលអាចបង្កើតការងារបានច្រើនសម្រាប់ប្រជាពលរដ្ឋខ្មែរ ហើយវិស័យនេះក៏យើងជ្រើសរើសយកប្រភេទកសិកម្មដែរ ដោយយើងយកស្រូវ និងផ្នែកកសិកម្មផ្សេងៗមួយចំនួនទៀតដែលអាចបង្កើតការងារបានច្រើន ដូចជា ដំណាំកៅស៊ូ អំពៅ ពោត និងផ្នែកមួយចំនួនទៀតដែលប្រជាជនខ្មែរធ្វើជារៀងរាល់ឆ្នាំ និងជារៀងរាល់រដូវ”។

ថ្មីៗនេះក្រសួងពាណិជ្ជកម្ម ក៏បានបង្ហាញពីចេតនាក្នុងការបង្កើតគោលនយោបាយដំឡូងមីដោយយកគំរូតាមគោលនយោបាយស្រូវអង្ករ ដែលទាក់ទាញបានទុនវិនិយោគយ៉ាងច្រើនក្រោយការបង្កើតគោលនយោបាយជាផ្លូវការ។ អ្នកជំនាញធ្លាប់បានលើកឡើងថា ដំឡូងមីរបស់កម្ពុជាកំពុងតែពឹងផ្អែកលើទីផ្សារនៃប្រទេសជិតខាងប៉ុណ្ណោះ។

នៅឆ្នាំនេះវិស័យកសិកម្មហាក់មានសញ្ញាណវិជ្ជមានឡើងវិញ ទាំងតួលេខនៃការនាំចេញ និងតម្លៃទិញពីកសិករ៕

December 5, 2017

ប្រទេសណាខ្លះដែលអនុគ្រោះពន្ធនាំទំនិញចេញពីកម្ពុជា?

ភ្នំពេញ៖ ទំនិញសំខាន់ៗរបស់កម្ពុជាសម្រាប់នាំចេញទៅលក់នៅក្រៅប្រទេសរួមមាន ផលិតផលវាយនភណ្ឌ និងសម្លៀកបំពាក់ គ្រឿងអេឡិចត្រូនិក និងគ្រឿងបន្លាស់រថយន្ត កង់ ស្រូវ អង្ករ ដំឡូងមី គ្រាប់ស្វាយចន្ទី ម្រេច ស្ករ ជ័រកៅស៊ូ ផលិតផលនេសាទ និងផលិតផលកសិកម្មដទៃទៀត។

បើទោះបីកម្ពុជានៅមិនទាន់ទទួលបានការអនុគ្រោះពន្ធ100%ពីបណ្តាប្រទេសអភិវឌ្ឍន៍ក៏ដោយ ក៍ប៉ុន្តែប្រទេសទាំងនោះបានអនុគ្រោះពន្ធជាច្រើនដល់ការនាំចូលទំនិញពីកម្ពុជាផងដែរ ក្នុងនោះមានដូចជា ប្រទេសអូស្ត្រាលី ណូវ៉ែលហ្សេឡង់ ន័រវែស និងស្វ៊ីស បានផ្តល់នូវការអនុគ្រោះពន្ធទូទៅចំនួន100% សហគមន៍អ៊ឺរ៉ុបបានផ្តល់ចំនួន 99% កាណាដា 98.6% ជប៉ុន 97.7% ចិន 97% ហើយសហរដ្ឋអាមេរិកបានផ្តល់ត្រឹមតែ 82.6% ប៉ុណ្ណោះ។

ដើម្បីភ្ជាប់ទំនាក់ទំនងសេដ្ឋកិច្ចឱ្យកាន់តែប្រសើរ នៅព្រឹកថ្ងៃទី17 ម្សិលមិញ ក្រសួងពាណិជ្ជកម្មកម្ពុជាក្នុងនាមជាម្ចាស់ផ្ទះបានរៀបចំកិច្ចប្រជុំថ្នាក់តំបន់ (អាស៊ីប៉ាស៊ីហ្វិក និងការ៊ីបៀន) ដោយមានតំណាងអង្គការសហប្រជាជាតិ និងអង្គការពាណិជ្ជកម្មពិភពលោក (WTO)ចូលរួមផងដែរ។

កិច្ចប្រជុំនេះក៏មានការចូលរួមពីប្រតិភូមកពីបណ្តាប្រទេសជាសមាជិកអង្គការ OIF រួមមាន បារាំង ប៉េណាំង វៀតណាម ហៃទី និងឡាវ ព្រមទាំងតំណាងអង្គការជាតិ និងអន្តរជាតិនានា ក្នុងគោលបំណងពិភាក្សា និងពិគ្រោះយោបល់អំពីកាលានុវត្តភាព បញ្ហាប្រឈម និងដំណោះស្រាយលើបញ្ហានានា ដូចជា ការលើកស្ទួយផលិតផលធ្វើពីកប្បាស វិស័យជលផល គោលដៅអភិវឌ្ឍន៍ប្រកបដោយចីរភាព និងប្រព័ន្ធអនុគ្រោះពាណិជ្ជកម្មមិនកំណត់ពន្ធគយ និងបរិមាណដែលមិនទាន់បានដោះស្រាយរួចស្រេចក្នុងសន្និសីទថ្នាក់រដ្ឋមន្ត្រីលើកទី11 នៅពេលខាងមុខ។

លោក សាអ៊ីដ អ៊ែល ហាជីមី (Said El HACHIMI) ទីប្រឹក្សាផ្នែកព័ត៌មាន និងទំនាក់ទំនងខាងក្រៅប្រទេសរបស់អង្គការ WTO បានថ្លែងក្នុងសន្និសីទនោះថា ក្នុងពិភពលោកដែលប្រកបដោយចីរភាពមិនប្រាកដប្រជា ភាសាបារាំងជាផ្នែកមួយនៃកម្លាំងចលករក្នុងការជំរុញបណ្តាប្រទេសសមាជិកអង្គការWTO ឱ្យបានដើរតួនាទីជាយុទ្ធសាស្ត្រក្នុងទំនាក់ទំនងទ្វេភាគី លើវិស័យបរិស្ថាន ពាណិជ្ជកម្ម និងបញ្ហាផ្សេងៗទៀត រវាងប្រទេសអភិវឌ្ឍន៍ ប្រទេសកំពុងអភិវឌ្ឍន៍ និងប្រទេសអភិវឌ្ឍន៍តិចតួចនៅក្នុងពិភពលោក។ ហើយបញ្ហាទាក់ទងវិស័យកសិកម្ម បច្ចេកវិទ្យា យានយន្ត និងការធ្វើពាណិជ្ជកម្ម ផលិតផលអេឡិចត្រូនិក សហគ្រាសធុនតូច និងមធ្យម នឹងត្រូវលើកយកទៅពិភាក្សាបន្តទៀតនៅសន្និសីទថ្នាក់រដ្ឋមន្ត្រីលើកទី11 ក្រោមក្របខ័ណ្ឌអង្គការWTO នៅប្រទេសអាហ្សង់ទីន នៅចុងឆ្នាំ2017នេះ៕

October 18, 2017

Author: ធឿន មករា