ធឿន មករា - La Reine Media

ពៅ លីដា ហ៊ឺហារជាមួយ រថយន្តតម្លៃជិត24ម៉ឺនដុល្លារ នៅក្នុងឱកាសបុណ្យចូលឆ្នាំខ្មែរ

ទើបតែបានចំណាយលុយយ៉ាងច្រើនទិញមាសរាប់តម្លឹង ដែលជាគ្រឿងអលង្ការឈុតជូនអ្នកម្តាយជាទីស្រឡាញ់របស់ខ្លួនមិនទាន់បានប៉ុន្មានផង ស្រីស្រស់សម្បុរស្រអែម កញ្ញា ពៅ លីដា បានបង្ហាញពីភាពហ៊ឺហារនឹកស្មានមិនដល់មួយទៀតដោយកុម្ម៉ងទិញរថយន្តទំនើបម៉ាក Lexus ស៊េរីថ្មី ឆ្នាំ2018 ពណ៌សដ៏រលើបរលោងមួយទៀតជាមួយនឹងតម្លៃជិត24ម៉ឺនដុល្លារ។ ជាមួយនឹងការបង្ហាញពីភាពឡូយឆាយក្លាយជាម្ចាស់រថយន្តទំនើបមួយនេះ ពៅ លីដាបានលើកឡើងថា មិនមែនទិញដើម្បីបង្អួតភ្នែកញាតិនោះទេ ប៉ុន្តែវាជាការបំពេញក្ដីស្រមៃ និងសម្រាប់អបអរសាទរឆ្នាំថ្មីប្រពៃណីជាតិខ្មែរខាងមុខនេះ។ ជាការពិតណាស់ សម្រាប់កញ្ញា ពៅ លីដា ត្រូវបានមហាជនទូទៅ ទាំងនៅក្នុងស្រុក និងនៅក្រៅប្រទេស បានទទួលស្គាល់ថា កញ្ញាគឺជាតារាសម្ដែងស្រីមួយដួងដែលមានប្រជាប្រិយភាពខ្ពស់ ដែលសូម្បីតែអត្តចរិតក៏សុភាពរាបសាររួសរាយរាក់ទាក់ ផ្ទៃមុខពោរពេញទៅដោយស្នាមញញឹមពព្រាយ ដែលទាំងអស់នេះហើយ ជាដើមចមធ្វើឱ្យកេរ្តិ៍ឈ្មោះរបស់កញ្ញាមានភាពលេចធ្លោររហូតទទួលបានការសាទរពីសំណាក់បងប្អូនប្រជាជនខ្មែរដែលកំពុងរស់នៅតាមបណ្តាប្រទេសនានាអញ្ជើញរូបនាងទៅសម្ដែងនៅក្នុងឱកាសដ៏រីករាយជាច្រើនជាបន្តបន្ទាប់។ ជាក់ស្ដែងកាលពីពេលកន្លងទៅ ខណៈដែលការងារសម្ដែងខ្សែភាពយន្តភាគខ្មែរសម្រាប់ត្រៀមចាក់បញ្ចាំងនៅតាមបណ្តាស្ថានីយទូរទស្សន៍ ក៏ដូចជាខ្សែភាពយន្តខ្នាតធំផងដែរនោះ ពៅ លីដា ត្រូវបានកាត់បន្ថយពេលវេលាដ៏មមាញឹក ចាកចេញទៅសម្ដែងនៅឯសហរដ្ឋអាមេរិករយៈពេល3ខែប្រកបដោយភាពជោគជ័យគួរជាទីមោទនៈបំផុត។

កញ្ញា ពៅ លីដា បានលើកឡើងថា “ភាពជោគជ័យដែលខ្ញុំទទួលបានពីការចេញទៅសម្ដែងនៅលើទឹកដីសហរដ្ឋអាមេរិកលើកដំបូងក្នុងឆាកជីវិត កាលពីពេលកន្លងទៅនោះ ខ្ញុំពិតជារីករាយខ្លាំងស្ទើរមិនគួរឱ្យជឿ ព្រោះពួកគាត់ពិតជាបានផ្តល់នូវការរាក់ទាក់យ៉ាងកក់ក្ដៅជាពិសេស ឱ្យតម្លៃអ្នកសិល្បៈខ្មែរដែលចូលចិត្តនិយមសម្លៀកបំពាក់បែបប្រពៃណីខ្មែរតែម្ដង”។

ដោយឡែកពេលនេះ សូមងាកមកចាប់អារម្មណ៍ជាថ្មីម្ដងទៀតទៅលើកម្រិតជីវភាពក្រៅឆាក និងការប្រើប្រាស់សម្ភារនិយមរបស់ ពៅ លីដា វិញម្ដង ជឿថា ម្នាក់ៗសុទ្ធតែនាំគ្នាភ្ញាក់ផ្អើលមិនខាន ដែលក្រៅពីការទិញផ្ទះវីឡាថ្មី បើកមុខជំនួញផ្ទាល់ខ្លួននោះ ពៅ លីដា បានបង្ហាញរថយន្តថ្មីទំនើបថ្មីសន្លាងមួយគ្រឿងទៀតម៉ាក Lexus 570 ពណ៌ស ស៊េរីឆ្នាំ2018 ជាមួយនឹងតម្លៃប្រមាណជាង238,000ដុល្លារ។ យ៉ាងណាក៏ដោយ ចំពោះវត្តមានរថយន្តថ្មីនេះ ពៅ លីដា បានបញ្ជាក់ថា វាមិនមែនបានមកពីការជួយរបស់អ្នកមានណាម្នាក់នោះទេ ក្រៅតែពីការជួយលុយពីឪពុកម្តាយ បូកផ្សំនឹងលុយលក់រថយន្តចាស់ ជាមួយនឹងលុយដែលសន្សំបានពីការចេញច្រៀង និងសម្ដែងនៅក្រៅប្រទេសកាលពីពេលកន្លងទៅនោះ។ ពៅ លីដា ក៏បានបង្ហាញពីគម្រោងនៅក្នុងឱកាសបុណ្យចូលឆ្នាំខ្មែរខាងមុខនេះថា ក្រៅពីទៅវត្តប្រគេនបង្ហាន់ដល់ព្រះសង្ឃនៅវត្ត និងជូនសម្ភារប្រើប្រាស់ជូនដល់ដូនជី តាជីនោះ នាងរួមជាមួយនឹងគ្រួសារក៏មានគម្រោងចេញដើរកម្សាន្តនៅតាមមណ្ឌលកម្សាន្តមួយចំនួនទៀតផង ដោយប្រើរថយន្តថ្មីដែលទើបនឹងទិញនេះធ្វើជាយានជំនិះ៕

April 7, 2018

ទម្លាប់ល្អទាំង5 ដែលគួរអនុវត្តនៅក្នុងរដូវក្ដៅ

នៅក្នុងអំឡុងពេលដែលអាកាសធាតុក្ដៅ អាចធ្វើឱ្យអ្នកមានអារម្មណ៍ធុញទ្រាន់ជាមួយនឹងសភាព និងបរិយាកាសដ៏សែនក្ដៅតែម្ដង។ ការធ្វើដំណើរក្រោមកម្ដៅថ្ងៃ ក៏ជារឿងមួយដែលធ្វើឱ្យអ្នកខ្លាច និងមានអារម្មណ៍ថារំខានដល់ពេលវេលារបស់អ្នក ហើយក៏ធ្វើឱ្យអ្នកកើតមានអាការឈឺក្បាលផងដែរ។ អ្នកខ្លះទៀត មានអាការឈឺក្បាល ធ្ងន់ក្បាល នៅពេលដែលថ្ងៃក្ដៅខ្លាំងដោយមិនបានធ្វើការអង្កេតពីទម្លាប់រស់នៅប្រចាំថ្ងៃរបស់ខ្លួនឡើយ។ តើមានប៉ុន្មានអ្នកដែលបានដឹងថា នៅក្នុងរដូវក្ដៅ អ្នកគប្បីគួរតែមានទម្លាប់ល្អបែបណាខ្លះ ដើម្បីថែរក្សាសុខភាពរបស់អ្នកឱ្យបានល្អប្រសើរនោះ? ចម្លើយគឺមានងាយៗបំផុត ដែលអ្នកអាចធ្វើការឆ្លើយតបទៅនឹងសុខភាពរបស់អ្នក។ តោះ!! មកយល់ដឹងទាំងគ្នាអំពីទម្លាប់ល្អ ដែលអ្នកត្រូវធ្វើ ដើម្បីសុខភាពល្អនៅក្នុងរដូវក្តៅនេះ៖

1. ទម្លាប់ទទួលទានទឹកឱ្យបានច្រើន

អាកាសធាតុក្ដៅអាចធ្វើឱ្យរាងកាយបាត់បង់ជាតិទឹក ហើយជាពិសេសគឺធ្វើឱ្យអ្នកឆាប់បែកញើស និងបែកញើសច្រើន ដូច្នេះរាងកាយរបស់អ្នកត្រូវការជាតិទឹកមកបំពេញឡើងវិញ។ បើទោះបីជាអ្នកមិននិយមទទួលទានទឹកញឹកញាប់ក្ដី យ៉ាងតិចនៅក្នុងមួយថ្ងៃ អ្នកក៏ត្រូវទទួលទានទឹកឱ្យបាន8កែវដែរ។ អ្វីដែលសំខាន់ ដើម្បីទទួលបាននូវសុខភាពល្អ គឺអ្នកត្រូវទទួលទានទឹកស្អាត មិនគប្បីទទួលទានភេសជ្ជៈមានជាតិអាកុល ឬជាតិស្ករច្រើនពេកនោះទេ ក៏ប៉ុន្ដែសម្រាប់ទឹកផ្លែឈើស្រស់វិញ ក៏មិនត្រូវបានហាមឃាត់ដែរ តែអ្នកត្រូវធ្វើការកំណត់ថា បរិមាណប៉ុន្មានទើបសមល្មមចំពោះសុខភាពរបស់អ្នក។

2. ប្រើវ៉ែនតាខ្មៅរាល់ពេលស្ថិតក្រោមកម្ដៅថ្ងៃ

អំឡុងរដូវក្ដៅបែបនេះ ត្រូវមានភារកិច្ចធ្វើដំណើរទៅក្រៅ ឬធ្វើដំណើរឆ្ងាយក្រោមពន្លឺថ្ងៃនោះ យើងសូមណែនាំឱ្យអ្នកប្រើប្រាស់វ៉ែនតាខ្មៅសម្រាប់ការពារភ្នែករបស់អ្នកពីពន្លឺព្រះអាទិត្យ ពោលគឺកាំរស្មី UV។ វ៉ែនតាពណ៌ខ្មៅ ត្រូវបានគេផលិតឡើងដោយកញ្ចក់ដែលអាចការពារកាំរស្មី UV និង UVA ដែលអាចជួយការពារលម្អងធូលី និងពន្លឺ ព្រមទាំងជួយការពារស្បែកភ្នែកមិនឱ្យប៉ះទង្គិចនឹងកាំរស្មីព្រះអាទិត្យ និងកម្ដៅថ្ងៃ ដែលនាំឱ្យជាំខ្មៅនៅរង្វង់ភ្នែក។

3. គេងឱ្យបានគ្រប់គ្រាន់

ការគេងថ្ងៃអាចផ្ដល់កម្លាំងសម្រាប់ប្រព័ន្ធរាងកាយរបស់អ្នក ដែលអ្នកមិនអាចរស់នៅដោយគ្មានវាបាននោះទេ។ វាប្រៀបដូចជាអាហារ និងទឹកដែរ ដែលអ្នកមិនអាចខ្វះវាបានឡើយ ហើយក៏មិនអាចសងជំនួសវិញនៅថ្ងៃបន្ទាប់ទៀតបានដែរ។ រាងកាយរបស់អ្នកទាមទារការគេងបានគ្រប់គ្រាន់រៀងរាល់ថ្ងៃ ហើយរាងកាយនឹងដំណើរការបានល្អបំផុតនៅពេលដែលអ្នកគេងបានគ្រប់គ្រាន់ជារៀងរាល់ថ្ងៃ។ តែបើអាកាសធាតុក្ដៅ រាងកាយឆាប់នឿយហត់ខ្លាំង ចាំបាច់ត្រូវតែព្យាយាមគេងថ្ងៃ ឬគេងនៅពេលយប់ឱ្យបានគ្រប់គ្រាន់បំផុត ទើបល្អចំពោះសុខភាពរបស់អ្នក។

4. យកចិត្តទុកដាក់ក្នុងការទទួលទានអាហារ

គួរជ្រើសរើសអាហារដែលចម្អិនថ្មី និងភ្លាមៗ ហើយមានអនាម័យ ព្រោះថា វាជួយការពារការកើតជំងឺប្រព័ន្ធរំលាយអាហារ។ សម្រាប់អាហារដែលអ្នកគួរតែទទួលទាននាអំឡុងពេលរដូវក្ដៅមានដូចជា អាហារដែលកម្ចាត់ភាពក្ដៅពីក្នុងរាងកាយបាន ដូចជា ឪឡឹក ត្រសក់ស្រូវ មង្ឃុត ម្នាស់ និងដូងជាដើម។ ចំពោះបន្លែដែលគប្បីទទួលទាន រួមមាន ផ្ទី ស្ពៃខៀវ និងម្រះ ព្រោះវាអាចកម្ចាត់ភាពក្ដៅក្នុងរាងកាយ និងផ្ដល់មកវិញនូវសារធាតុចិញ្ចឹមផងដែរ។

5. យកចិត្តទុកដាក់ចំពោះគ្រីមលាបការពារកម្ដៅថ្ងៃ

អ្នកជំនាញមួយចំនួនបានណែនាំថា អ្នកគួរលាបគ្រីមការពារកម្ដៅថ្ងៃជារៀងរាល់ថ្ងៃ ប៉ុន្តែអ្នកជំនាញមួយចំនួនទៀតបានផ្តល់យោបល់ថា គួរលាបគ្រីមការពារកម្ដៅថ្ងៃនៅពេលណាដែលមានថ្ងៃក្តៅបានហើយ ព្រោះស្បែក
មានប្រព័ន្ធការពារពីធម្មជាតិរួចទៅហើយ ការលាបគ្រីមការពារកម្ដៅថ្ងៃច្រើនពេកធ្វើឱ្យប្រព័ន្ធការពារពីធម្មជាតិចុះអន់ខ្សោយ និងដំណើរការមិនបានល្អ។ ដូច្នេះនៅពេលដែលមានថ្ងៃក្តៅខ្លាំង អ្នកគួរលាបគ្រីមការពារកម្តៅថ្ងៃ ប៉ុន្តែនៅថ្ងៃណាដែលមេឃស្រទំពុំមានពន្លឺថ្ងៃក្តៅខ្លាំងនោះអ្នកគួរប្តូរមកលាបគ្រីមដែលផ្សំពីសារធាតុប្រឆាំងអុកស៊ីតកម្មវិញទើបជាការប្រសើរ ព្រោះការស្រាវជ្រាវបានឱ្យដឹងថាសារធាតុប្រឆាំងអុកស៊ីតកម្មក៏អាចកាត់បន្ថយភាពខូចខាតនៃស្បែកដែលបណ្តាលមកពីកម្តៅព្រះអាទិត្យបានផងដែរ៕

April 6, 2018

Feliz សណ្ឋាគារ ដែលបង្ហាញពីអត្តសញ្ញាណខ្មែរ ដល់ភ្ញៀវទេសចរគ្រប់ជាតិសាសន៍

សណ្ឋាគារ Feliz (Feliz Urban Hotel) ដែលមានន័យថា “រីករាយ” (តាមភាសាអេស្ប៉ាញ) គឺជាសណ្ឋាគារបែបខ្មែរ 100% ដែលមានម្ចាស់ជាជនជាតិខ្មែរ និងបុគ្គលិកបម្រើការងារទាំងអស់ជាជនជាតិខ្មែរ ហើយឈ្មោះរបស់សណ្ឋាគារនេះគឺផ្តល់នូវភាពកក់ក្តៅ និងអារម្មណ៍ប្រៀបដូចជាផ្ទះរបស់ខ្លួនដល់ភ្ញៀវទេសចរទាំងអស់ ដែលមកស្នាក់នៅក្នុងសណ្ឋាគារ Feliz។ សូមតាមដានជាបន្តជាមួយនឹងអត្ថបទលម្អិតពីសណ្ឋាគារបែបខ្មែរ-អាសីុ ដែលទើបតែបើកដំណើរការកាលពីពាក់កណ្តាលខែ8 ឆ្នាំ2017នេះដូចតទៅ។

សណ្ឋាគារ Feliz មានទីតាំងស្ថិតនៅអគារលេខ 3 ផ្លូវលេខ288 សង្កាត់បឹងកេងកង1 ខណ្ឌចំការមន រាជធានីភ្នំពេញ។ បើតាមកិច្ចសម្ភាសន៍ជាមួយនឹងលោក រាំង អារុណ ដែលជានាយកគ្រប់គ្រងនៃសណ្ឋាគារ Feliz បានឱ្យដឹងថា សណ្ឋាគារ Feliz ទើបតែបើកដំណើរការសាខាទី2របស់ខ្លួនមិនទាន់បាន1ឆ្នាំផង តែសណ្ឋាគារ Feliz បានទទួលនូវការគាំទ្រ និងការមកសា្នក់នៅពីសំណាក់ភ្ញៀវទេសចរជាតិ និងអន្តរជាតិជាច្រើនជារៀងរាល់ថ្ងៃ ដោយរាប់បញ្ចូលទាំងភ្ញៀវជនជាតិខ្មែរ (អ្នកជំនួញ) ភ្ញៀវជនជាតិអាស៊ី (ជនជាតិជប៉ុន និងជនជាតិកូរ៉េជាដើម) និងភ្ញៀវទេសចរមកពីប៉ែកបស្ចិមប្រទេស (ជនជាតិអូស្ត្រាលី និងជនជាតិកាណាដាជាដើម) ចំណែកឯសាខាទីមួយ ដែលមានឈ្មោះថា Feliz Hotel Café & Bar គឺជាភោជនីយដ្ឋាន ហាងកាហ្វេ និងមានកន្លែងស្នាក់បែបអន្តេវាសិកដ្ឋាន ដែលចែកចេញជា3ប្រភេទ គឺអន្តេវាសិកដ្ឋានសម្រាប់នារីៗ អន្តេវាសិកដ្ឋានសម្រាប់បុរសៗ និងអន្តេវាសិកដ្ឋានរួម ដែលមានទីតាំងនៅម្តុំបឹងកេងកង1 ជិតនឹងសាខាទី2ដែរ។

លោក អារុណ បានបន្ថែមទៀតថា សណ្ឋាគារមានបន្ទប់សរុបទាំងអស់36បន្ទប់ ដែលចែកចេញជា6ប្រភេទផ្សេងគ្នា ដើម្បីផ្តល់ជាជម្រើសដ៏សម្បូរបែបជូនភ្ញៀវជាតិ និងអន្តរជាតិគ្រប់លំដាប់ថ្នាក់ ក្នុងនោះមានប្រភេទបន្ទប់ដូចជា Superior King, Superior Queen, Deluxe King, Deluxe Queen, Connected Family សម្រាប់ការស្នាក់នៅជាលក្ខណៈគ្រួសារ និងបែបបន្ទប់Suite សម្រាប់អ្នកជំនួញដែលត្រូវការបន្ទប់ធ្វើការ និងបន្ទប់ទទួលភ្ញៀវដាច់ដោយឡែកពីបន្ទប់គេង។ លើសពីនោះទៀត លោកអ្នកក៏អាចមានជម្រើសជាមួយនឹងតម្លៃបន្ទប់ ដែលមានផ្តល់ជូនអាហារពេលព្រឹក និងតម្លៃបន្ទប់មិនមានបូករួមជាមួយនឹងអាហារពេលព្រឹក ដែលជាការផ្តល់ជូននូវជម្រើសកាន់តែល្អប្រសើរដល់ភ្ញៀវដែលមកសា្នក់នៅក្នុងសណ្ឋាគារ Feliz។ ភ្ញៀវដែលមកស្នាក់នៅសណ្ឋាគារ Feliz 99% គឺជាអ្នកទេសចរ ដែលមកស្នាក់នៅយ៉ាងតិចក៏ចំនួន2យប់ដែរដោយសារតែនៅម្តុំបឹងកេងកង គឺជាទីប្រជុំជនដែលអំណោយផលដល់ការស្នាក់នៅ (ស្ងប់ស្ងាត់) និងនៅចំកណ្តាលទីក្រុង ងាយស្រួលក្នុងការធ្វើដំណើរកម្សាន្តនៅក្នុងរាជធានីភ្នំពេញ និងទៅកាន់ទីរមណីយដ្ឋាននានា ហើយភ្ញៀវដែលស្នាក់នៅក្នុងសណ្ឋាគារ Feliz ក៏អាចទទួលបានសេវាកម្មដឹកអ្នកដំណើរពីព្រលានយន្តហោះមកសណ្ឋាគារ ពីសណ្ឋាគារទៅព្រលានយន្តហោះ និងការជូនដើរទស្សនានៅតាមរមណីយដ្ឋានប្រវត្តិសាស្ត្រនៅក្នុងរាជធានី និងនៅតាមបណ្តាខេត្តនានា ជាមួយនឹងរថយន្ត ឬក៏តុកតុក ដែលជាដៃគូយ៉ាងជិតស្និតរបស់សណ្ឋាគារ ដោយភ្ញៀវអាចមានទំនុកចិត្តក្នុងការធ្វើដំណើរដោយមិនមានការតំឡើងតម្លៃលើសតម្លៃទីផ្សារ និងអាចផ្តល់ការងារដល់អ្នកបើកតុកតុក និងអ្នកបើករថយន្តតាក់ស៊ី ដែលជាជនជាតិខ្មែរផងដែរ។

ភ្ញៀវដែលមកស្នាក់នៅសណ្ឋាគារ Feliz ក៏អាចរីករាយជាមួយនឹងសេវាម្ហូបអាហារនៅភោជនីយដ្ឋាន Amigo ដែលជាភោជនីយដ្ឋានបែបខ្មែរ-អាស៊ី និងបែបអាហារអឺរ៉ុប ស្ថិតនៅក្នុងសណ្ឋាគារ Feliz ផងដែរ ហើយភ្ញៀវទាំងអស់ក៏អាចឡើងទៅហែលទឹកលេងនៅអាងហែលទឹកដ៏ស្រស់ស្អាតនៅជាន់ខាងលើ អាចរីករាយជាមួយនឹងការទទួលទានអាហារនៅជាន់ស្កាយបារ ដែលអាចមើលឃើញទេសភាពដ៏ស្រស់ត្រកាលនៃរាជធានីភ្នំពេញ ជាពិសេសគឺអាចមើលទេសភាពពេលថ្ងៃរៀបអស្តង្គត់ គឺស្រស់ស្អាតខ្លាំងណាស់។ លើសពីនេះទៀត ភ្ញៀវទាំងអស់ក៏អាចប្រើប្រាស់កន្លែងហាត់ប្រាណ និងប្រើប្រាស់ប្រព័ន្ធអ៊ីនធើណែត ដែលមានល្បឿនលឿន រហូតដល់អាច Live វីដេអូបានដោយរលូនមិនមានទាក់ ឬរអាក់រអួលឡើយ ហើយលោកអ្នកក៏អាចចុះមកជាន់ក្រោមផ្ទាល់ដី ដើម្បីប្រើប្រាស់កុំព្យូទ័រ សម្រាប់ទំនាក់ទំនងគ្នា ឬធ្វើការងាររបស់លោកអ្នកបានដោយសេរី និងគ្រប់ពេលវេលាទៀតផង។

ភោជនីយដ្ឋាន Amigo ដែលមានន័យជាភាសាអេស្ប៉ាញថា “មិត្តសម្លាញ់” ជាភោជនីយដ្ឋានបម្រើអាហារបែបខ្មែរ បែបអាហារអាស៊ី និងបែបអាហារអឺរ៉ុបស្ថិតនៅក្នុងសណ្ឋាគារ Feliz បើកបម្រើអាហារទាំង3ពេល ពីម៉ោង6:30នាទីព្រឹកដល់ម៉ោង11យប់ ព្រមទាំងមានបម្រើស្រាក្រឡុក និងភេសជ្ជៈជាច្រើនមុខទៀត ដើម្បីបម្រើជូនភ្ញៀវជាតិ និងអន្តរជាតិជារៀងរាល់ថ្ងៃ។ ក្រៅពីបើកបម្រើអាហារទាំង3ពេល ភោជនីយដ្ឋាន Amigo ក៏មានទទួលរៀបចំកម្មវិធីតូចធំ ដូចជា កម្មវិធីខួបកំណើត កម្មវិធីជប់លៀង កម្មវិធីជួបជុំផ្សេងៗផងដែរ គឺអាចទទួលភ្ញៀវបានរហូតដល់70-80នាក់ ដែលអាចរៀបចំនៅក្នុងភោជនីយដ្ឋាន Amigo ផ្នែកខាងក្នុង និងនៅស្កាយបារខាងលើដំបូលក៏បាន៕

April 6, 2018

ឌី សូនីតា ទទួលបានឱកាសជាតារាស្រីកម្ពុជាតែម្នាក់គត់ចូលរួមសម្តែងក្នុងរឿង The Prey

The Prey គឺជាចំណងជើងខ្សែភាពយន្តខ្នាតធំលំដាប់អន្តរជាតិ ដែលត្រូវបានផលិតឡើងដោយផលិតកម្មកងចក្រភាពយន្ត ដែលធ្លាប់ទទួលបានជោគជ័យលើការផលិតរឿង JAILBREAK ទទួលបានពានរង្វាន់ចំនួន5។ ដោយឡែកសម្រាប់ខ្សែភាពយន្តខ្នាតធំលំដាប់អន្តរជាតិ The Prey នាពេលនេះ ផលិតករបានជ្រើសរើសយក កញ្ញា ឌី សូនីតា ដែលជាតារាស្រីកម្ពុជាតែម្នាក់គត់ឱ្យចូលរួមសម្ដែងរួមគ្នាជាមួយកំពូលតារាល្បីៗចំនួន3ប្រទេស រួមមាន ប្រទេសកម្ពុជា ប្រទេសថៃ និងប្រទេសចិន ជាមួយតំណែងជាតួឯកស្រីនៅក្នុងសាច់រឿង។

កញ្ញា ឌី សូនីតា ត្រូវបានក្លាយជាតារាស្រីដ៏សំខាន់នៅក្នុងខ្សែភាពយន្តខ្នាតធំលំដាប់អន្តរជាតិ ដែលមានចំណងជើងថា “The Prey” ដែលជាខ្សែភាពយន្តបែបស៊ើបអង្កេត វាយប្រហារគ្នាយ៉ាងគក្រើកតាំងពីដើមរហូតដល់ចប់ រវាងក្រុមឧក្រិដ្ឋជនអ្នកទោស និងប៉ូលីស។ នៅក្នុងខ្សែភាពយន្តដ៏អស្ចារ្យនេះផងដែរ កញ្ញា ឌី សូនីតា ត្រូវបានទទួលតំណែងជាតួអង្គស្រីតាមជួយរំដោះប៉ូលីសជនជាតិចិន ដែលសម្ដែងដោយលោក Gu Shang Wei ដែលជាអ្នកប្រដាល់ថ្នាក់ជាតិនៅប្រទេសចិនជាច្រើនឆ្នាំ និងជាតួឯកដ៏ល្បីឈ្មោះនៅក្នុងខ្សែភាពយន្ត BLOOD DESTINY ដែលក្លាយជាអ្នកទោសជាប់គុកនៅប្រទេសថៃ។

ស្រីស្រស់សម្បុរស្រអែម កញ្ញា ឌី សូនីតា បានបង្ហាញពីអារម្មណ៍រំភើបយ៉ាងដូច្នេះថា “ខ្ញុំពិតជារំភើបមែនទែន ដែលបានបង្ហាញវត្តមាននៅក្នុងខ្សែភាពយន្តលំដាប់អន្តរជាតិ ដែលនេះវាជាបទពិសោធថ្មីរបស់ខ្ញុំ។ ខ្ញុំនឹងព្យាយាមសម្ដែងឱ្យអស់ពីលទ្ធភាព ដើម្បីទទួលបានការគាំទ្រពីទស្សនិកជន”។ កញ្ញាបានបន្តទៀតថា “ខ្ញុំជឿជាក់ថា រឿងនេះនឹងទទួលបានការគាំទ្រច្រើនពីបងប្អូនទស្សនិកជន ព្រោះបើតាមសាច់រឿងដែលខ្ញុំបានមើលគឺពិតជាល្អបំផុត ហើយម្យ៉ាងទៀតទាំងអ្នកដឹកនាំសម្ដែងអ្នកកាន់ម៉ាស៊ីនថត សុទ្ធតែជាអ្នកជំនាញធ្លាប់ទទួលបានពានរង្វាន់ទាំងអស់”។

លោក Jimmy Henderson ដែលជាអ្នកដឹកនាំរឿង បានឱ្យដឹងថា ឈុតដំបូងដែលត្រូវចេញថតគឺត្រូវនៅក្នុងខេត្តកោះកុង ដែលជាតំបន់ព្រៃភ្នំ និងមានទឹកជ្រោះ។ ជាមួយគ្នានេះ លោកក៏បានបង្ហាញពីជំនឿជឿជាក់យ៉ាងមុតមាំថា រឿង The Prey នឹងទទួលបានជោគជ័យ ព្រោះផ្អែកតាមបទពិសោធកាលពីពេលកន្លងទៅ ជាពិសេសការទទួលបានជោគជ័យលើការបញ្ចាំងរឿង រឿង JAILBREAK ដែលបានបង្ហាញខ្លួននៅក្នុងសាលមហោស្រពអន្តរជាតិជាង20 រួមជាមួយនឹងការទទួលបានពានរង្វាន់ឆ្នើមចំនួន5។ ដូច្នេះសម្រាប់រឿង The Prey គឺមិនពិបាកក្នុងការគៀងគរប្រជាប្រិយភាពនោះទេ៕

April 6, 2018

អ៊ីចឹងតើ… បានជា ឱក សុគន្ធកញ្ញា មានលុយច្រើនម៉េស

ជាទូទៅមនុស្សភាគច្រើន មិនថានៅក្នុងប្រទេស ឬក៏នៅក្រៅប្រទេសនោះទេ សម្រាប់ ឱក សុគន្ធកញ្ញា ត្រូវបានគេស្គាល់យ៉ាងច្បាស់ណាស់ថា ជាកំពូលតារាចម្រៀងស្រីម្នាក់ដែលមានកេរ្តិ៍ឈ្មោះយ៉ាងល្បីល្បាញប្រចាំនៅក្នុងព្រះរាជាណាចក្រកម្ពុជា ហើយក៏ធ្លាប់ចេញទៅសម្ដែងនៅបរទេសជាច្រើនប្រទេសផងដែរ ហើយបើគិតជាអា-យុកាលដែលឈរជើងនៅលើវិថីសិល្បៈក្នុងនាមជាតារាចម្រៀងមិនតិចជាង10ឆ្នាំនោះទេ។ ប៉ុន្តែអ្វីដែលធ្វើឱ្យមហាជនមានការចាប់អារម្មណ៍នោះត្រង់ថា ជីវភាពរបស់នាងហាក់មានភាពធូរធាលេចធ្លោជាងមិត្តរួមជំនាន់ និងរួមដំបូលជាមួយគ្នា ខណៈដែល ពេជ្រ សោភា មានត្រឹមរថយន្តស៊េរីចាស់ម៉ាក Range Rover ពណ៌ខ្មៅស្រអាប់នោះ ដោយឡែក ឱក សុគន្ធកញ្ញា ប្ដូររថយន្តជាបន្តបន្ទាប់ ជាក់ស្ដែងដូចជាបច្ចុប្បន្ននេះ នាងបានប្ដូរមកជិះរថយន្តស៊េរីថ្មីទំនើប ពណ៌ខ្មៅរលើបដែលមានតម្លៃរាប់សិបម៉ឺនដុល្លារ។

មួយរយៈចុងក្រោយនេះ សម្រាប់កំពូលតារាចម្រៀង ឱក សុគន្ធកញ្ញា ត្រូវបានគេមើលឃើញថា បាននិងកំពុងតែសម្ញែងនូវភាពហ៊ឺហារឡូយឆាយរបស់ខ្លួនជាខ្លាំង មិនថាតែការឡើងសម្ដែងច្រៀងនៅលើឆាក ឬនៅក្រៅឆាកក្នុងនាមជាជីវិតឯកជននោះទេ ជាពិសេស ចាប់តាំងពីនាងបានភ្ជាប់ពាក្យដោយសម្ងាត់ជាមួយកូនប្រុសច្បងរបស់ថៅកែក្រុមហ៊ុនហង្សមាសតែម្ដង។ ការកត់សម្គាល់ទាំងនេះគឺត្រូវធ្វើឡើងតាមរយៈភាពជាក់ស្ដែងដែលទស្សនិកជនបានឃើញជាក់ច្បាស់នឹងភ្នែកតែម្ដង ដូចជា ការប្រើសម្ភារនិយម ការផ្លាស់ប្ដូររថយន្តទំនើបៗជាញឹកញាប់ ការប្រើគ្រឿងអលង្ការ ដែលមានតម្លៃថ្លៃ ជាពិសេសសូម្បីតែម៉ូដសម្លៀកបំពាក់ក៏នាងជួលជាងជំនាញសម្រាប់កាត់ដេរផ្ទាល់ខ្លួនដែរ ខុសប្លែកពីតារាស្រីរួមជំនាន់ និងកំពុងស្ថិតនៅក្នុងទ្រនំជាមួយគ្នា ដែលមានប្រើតែសម្ភារបែបដដែលៗជិះរថយន្តចាស់ស្ទើរតែចូលជួសជុលរាល់ខែទៅហើយនោះ។

យ៉ាងណាក៏ដោយ បើទោះជាការសង្កេតដោយផ្តោតទៅលើភាពឡូយឆាយ និងការចំណាយលុយទាំងខ្ទាស់សម្រាប់ផ្ទាល់ខ្លួនរបស់កំពូលតារាចម្រៀងល្បីឈ្មោះជាង10ឆ្នាំរូបនេះក៏ហាក់គ្មានសំឡេងរិះគន់ ឬភាពងឿងឆ្ងល់នោះឡើយ ខណៈដែលគេក៏បានដឹងផងដែរថា ចំណូលរបស់នាងដែលទទួលបានពីការងារអាជីពក៏ដូចជាការថតស្ប៉តប្រចាំផលិតផល ឬជាអ្នកតំណាងផលិតផលនានា ក៏ទទួលបានតម្លៃថ្លៃកប់ពពក។ ជាក់ស្ដែងគ្រាន់តែនាងចេញច្រៀង
សម្ដែងនៅតាមការប្រគំតន្ត្រីម្ដងៗគឺមានតម្លៃខ្លួនរាប់ពាន់ដុល្លារក្នុងមួយ Show ដែលយ៉ាងណាក៏មានតម្លៃ3,000-3,500ដុល្លារ សម្រាប់នៅតំបន់ក្នុងក្រុង ឬជាយក្រុង។ ដោយឡែកបើចំពោះការចេញតាមបណ្តាខេត្ត/ក្រុងឆ្ងាយៗវិញ គឺអាចមានតម្លៃចាប់ពី3,500-4,500 ដុល្លារឬអាចលើសពីនេះ ដែលវាអាស្រ័យទៅតាមការ
ចរចា ឬការចុះកុងត្រាក្នុងរយៈពេលវែង ឬខ្លី។

សូមបញ្ជាក់ផងដែរថា ចំពោះតម្លៃខ្លួននៃការចេញច្រៀង និងសម្ដែងនៅតាមបណ្តាខេត្ត/ក្រុងនានា ក្រៅពី ឱក សុគន្ធកញ្ញា, ពេជ្រ សោភា និងនាង មាស សុខសោភា ដែលជាកំពូលតារាចម្រៀងស្រីប្រចាំផលិតកម្មថោន គឺភាគច្រើនតារាចម្រៀងស្រីអាចទទួលបានមិនលើសពី2,000ដុល្លារ ឬតិចជាងនេះក៏មានដែរ៕

April 5, 2018

ស្ករ និងអំបិល តើមួយណាបំផ្លាញរាងកាយខ្លាំងជាង?

រាល់ថ្ងៃនេះ អ្នកតែងបានឮគេនិយាយថា ធ្វើអ្វីក៏ដោយ ចូររក្សាភាពល្មម រក្សាចំណុចកណ្ដាលឱ្យបាន(កុំជ្រុលពេក និងក៏កុំតិចពេកដែរ) ជាពិសេសក្នុងរឿងការទទួលទានអាហារ។ តែពេលនិយាយអំពីរឿងស្ករ និងអំបិលវិញ អ្នកក៏ធ្លាប់បានឮមកច្រើនដែរថា បើទទួលទានក្នុងបរិមាណច្រើនជ្រុលពេក នឹងហុចផលអាក្រក់ដល់រាងកាយរបស់អ្នក តែវាប្រាកដណាស់ថា ទាំងស្ករ និងអំបិលគឺសុទ្ធតែមានភាពសំខាន់ចំពោះរាងកាយរបស់អ្នក ដោយខួរក្បាលត្រូវការស្ករ ដើម្បីបង្កើនកម្លាំងថាមពល ឯសាច់ដុំក៏ត្រូវការអំបិលដើម្បីសាងតុល្យភាពជាដើម។ សាស្ត្រាចារ្យមកពីមហាវិទ្យាល័យ Touro College នៅទីក្រុងញីវយ៉កបាននិយាយថា ការទទួលទានស្ករ និងអំបិលច្រើនជ្រុលពេក នឹងហុចផលប៉ះពាល់ដល់សុខភាពរបស់អ្នកច្រើនណាស់ ដូច្នេះពេលនេះសូមមកមើលពីផលប៉ះពាល់ដល់រាងកាយដោយសារស្ករ និងអំបិលវិញប្រសើរជាង។

ស្ករ
បើអ្នកទទួលទានអាហារពីធម្មជាតិ អ្នកនឹងបានជាតិស្ករក្នុងបរិមាណមិនច្រើនប៉ុន្មានទេ។ អាហារធម្មជាតិដែលមានជាតិស្ករ ច្រើនតែមកពីផ្លែឈើ តែបញ្ហារបស់អ្នកស្ថិតនៅត្រង់ការទទួលទានជាតិស្ករដែលបានមកពីការចម្រាញ់ ហើយអ្នកបន្ថែមវាចូលទៅក្នុងអាហារដែលអ្នកទទួលទាន ដើម្បីបង្កើនរសជាតិ។

បើអ្នកសាកល្បងមកមើលអាហារធម្មជាតិ ដូចជា ទឹកដោះ និងទឹកផ្លែឈើ 100% វិញនោះ អាហារពពួកនេះមានជាតិស្ករពីធម្មជាតិ និងមានថាមពលមួយចំនួន ខណៈពេលជាមួយគ្នាក៏មានគុណតម្លៃខាងអាហារផ្សេងៗទៀតផងដែរ ដូចជាវីតាមីន សារធាតុរ៉ែប្រូតេអ៊ីនក្នុងទឹកដោះ និងប៉ូលីហ្វ៊ីណុលជាដើម។ ចំណែកភេសជ្ជៈដែលលាយស្ករ ដូចជា ទឹកក្រូចកំប៉ុង តែ ឬកាហ្វេទឹកដោះគោ ពពួកនេះច្រើនមានស្ករជាចម្បងខណៈដែលគុណតម្លៃខាងអាហារមានតិចតួចហើយពួកនំផ្សេងៗក៏ដូចគ្នាដែរ។ អាហារពពួកនេះគ្មានកាកសរសៃអាហារ ប្រូតេអីុន វីតាមីន ឬសារធាតុរ៉ែ ដែលមានប្រយោជន៍ដល់រាងកាយច្រើនទេ ដូច្នេះទើបមិនមែនជារឿងប្លែកឡើយដែលអ្នកទទួលទានរបស់ប្រភេទនេះចូលទៅច្រើនៗ នឹងកើតរោគធាត់ និងខ្វះសារធាតុអាហារដែលចាំបាច់។

អ្នកជំនាញខាងភោជនាហារមកពីរដ្ឋតិចសាស់បាននិយាយថា ស្ករគ្រប់ប្រភេទ មិនថាតែស្ករស ទឹកស្ករ ឬស្ករត្នោតនោះឡើយ សុទ្ធតែហុចផលដល់រាងកាយមិនខុសគ្នាឡើយ នោះគឺវានឹងទៅបង្កើនកម្រិតជាតិស្ករនៅក្នុងឈាមដែលជាហេតុនាំឱ្យមានការផលិតអីុនស៊ូលីន ហើយរាងកាយរបស់អ្នកនឹងបញ្ចេញអ៊ីនស៊ីលីននេះ ដើម្បីបណ្ដេញជាតិស្ករចេញពីក្នុងឈាមទៅកោសិកា ដើម្បីប្រើប្រាស់ក្នុងការផ្ដល់កម្លាំងថាមពល។ កម្មវិធីនេះក៏ជាកម្មវិធីទូទៅមួយរបស់រាងកាយដែរ តែបើសិនជាពេលណាអ្នកបរិភោគស្ករច្រើនជ្រុលពេក កម្មវិធីប្រមូលសន្សំជាតិខ្លាញ់នឹងធ្វើការច្រើនឡើង រឹតតែរាងកាយសាងអ៊ីនស៊ូលីនច្រើនឡើងពេលណា ក៏នឹងរឹតតែសន្សំខ្លាញ់ច្រើនឡើងពេលនោះដែរ លុះយូរថ្ងៃទៅក៏អភិវឌ្ឍទៅជារោគទឹកនោមផ្អែមប្រភេទទី2 ហើយនឹងបង្កើនភាពប្រថុយប្រថានដល់ការកើតរោគក្រលៀន រោគបេះដូង និងរោគសរសៃឈាមកកស្ទះទៀតផង។

ការដែលរាងកាយបានទទួលជាតិស្ករច្រើនជ្រុលពេក ជាពិសេសស្ករចម្រាញ់ នឹងធ្វើឱ្យប្រព័ន្ធការរំលាយបឺតជ្រាបអាហាររបស់អ្នកប្រែប្រួលទៅតាមនោះដែរ។ ការរលាកក្លាយនឹងងាយកើតឡើង និងនាំឆ្ពោះទៅរកជំងឺចង្រៃច្រើនយ៉ាង។ លោក Rachel Head អ្នកជំនាញការ ដែលធ្វើការស្រាវជ្រាវពាក់ព័ន្ធនឹងជំងឺទឹកនោមផ្អែមបានប្រាប់ថា មានការសិក្សាស្រាវជ្រាវមួយបានរកឃើញភាពពាក់ព័ន្ធគ្នារបស់ការបរិភោគស្ករច្រើនជ្រុលពេក ជាមួយនឹងការមានកម្រិតខ្លាញ់ក្នុងឈាមខុសប្រក្រតី លើសឈាម ជំងឺថ្លើមជំងឺប្រព័ន្ធរំលាយអាហារ និងជំងឺបេះដូង។

អំបិល
យើងនាំគ្នាមកមើលផលអាក្រក់ពីការបរិភោគអំបិលច្រើនជ្រុលពេក(ទទួលទានប្រៃ)វិញម្ដង។ ប្រាកដណាស់ថា រាងកាយរបស់អ្នកត្រូវការអំបិល ដើម្បីធ្វើការងារដែលតុល្យភាពរបស់កោសិកាក្នុងរាងកាយ តែអំបិលដែលច្រើនជ្រុលពេក ក៏ហុចផលប៉ះពាល់ដល់រាងកាយរបស់អ្នកបានដូចគ្នា។ អ្នកជំនាញការបាននិយាយថា សម្រាប់មនុស្សដែលមានសុខភាពល្អ ការបានទទួលអំបិលក្នុងបរិមាណមធ្យមដល់ច្រើនបន្តិចក៏ដោយក៏រាងកាយរបស់អ្នកចាត់ការបានដែរ តែបើសិនជាបានទទួលក្នុងបរិមាណដែលច្រើនជ្រុលពេកជាប់ៗគ្នារយៈពេលយូរនោះ វានឹងហុចផលប៉ះពាល់ដល់រាងកាយយ៉ាងពិតប្រាកដ។ មានការណែនាំថា អ្នកគួរទទួលទានអំបិលក្នុងមួយថ្ងៃឱ្យតិចជាង2,300មីល្លីក្រាម ឬប្រមាណជា1ស្លាបព្រាកាហ្វេតែប៉ុណ្ណោះ។ តែមនុស្សភាគច្រើននាំគ្នាបរិភោគប្រមាណជា 3,400មីល្លីក្រាមក្នុង1ថ្ងៃ។

អស់រយៈពេលជាច្រើនឆ្នាំមកហើយដែលអ្នកជំនាញការជឿថា សូដ្យូមធ្វើឱ្យកើតសភាវសម្ពាធឈាមឡើងខ្ពស់ និងការដែលអ្នកមិនអាចគ្រប់គ្រងសម្ពាធឈាមបាននោះ នឹងនាំឆ្ពោះទៅរកបញ្ហាសុខភាពជាច្រើន ទាំងជំងឺបេះដូងសរសៃឈាមកកស្ទះ និងរោគក្រលៀន។ វេជ្ជបណ្ឌិតជំនាញបាននិយាយថា រាងកាយរបស់មនុស្សមួយចំនួនមានភាពរហ័សជាមួយអំបិលណាស់ រឹតតែបើសិនជាអ្នកណាដែលមានសភាវសម្ពាធឈាមឡើងខ្ពស់ផងនោះ រឹតតែត្រូវប្រយ័ត្នខ្លាំង។ អាហារដែលអ្នកទទួលទានតាមភោជនីយដ្ឋានមានអំបិលច្រើន ក្រៅពីនោះនៅពេញទៅ
ដោយខ្លាញ់ និងផ្ដល់ថាមពលខ្ពស់ទៀតផង ដូច្នេះបើសុខភាពរបស់អ្នកមិនរឹងមាំ មានសភាវសម្ពាធឈាមឡើងខ្ពស់ផងនោះ គួរធ្វើម្ហូបអាហារដោយខ្លួនឯងទទួលទាននៅផ្ទះវិញប្រសើរជាង។

ដូច្នេះ បើចង់ឱ្យសរុបនោះគឺ មិនថាតែស្ករ ឬអំបិលនោះទេ បើទទួលទានក្នុងបរិមាណដែលច្រើនជ្រុលពេក គឺនឹងបណ្ដាលឱ្យមានគ្រោះថ្នាក់ដល់រាងកាយធ្ងន់ធ្ងរប៉ុនៗគ្នាហ្នឹងឯង៕

April 5, 2018

វិធីបោកសម្អាតខ្នើយ តើត្រូវបោកយ៉ាងណាឱ្យឡើងសស្អាតដូចថ្មី?

ខ្នើយកើយ គឺជាវត្ថុមួយដែលបងៗស្ត្រីមេផ្ទះ និងសមាជិកក្នុងគ្រួសារត្រូវតែប្រើប្រាស់រៀងរាល់ថ្ងៃ ហើយអ្វីដែលសំខាន់នោះ គឺខ្នើយត្រូវប៉ះនឹងផ្ទៃមុខរបស់អ្នកគ្រប់ពេលដែលអ្នកគេងសម្រាក ដូច្នេះហើយទើបអ្នកចាំបាច់ខ្លាំងណាស់ត្រូវតែឧស្សាហ៍បោកគក់សម្អាតឱ្យបានញឹកញាប់ ដើម្បីការពារវត្ថុកខ្វក់ផ្សេងៗទាំងនោះមិនឱ្យមកប៉ះដល់រាងកាយរបស់អ្នកបាន។

ការបោកសម្អាតខ្នើយកើយ និងខ្នើយគង គឺជារឿងសំខាន់មួយ តែសម្រាប់វិធីការថែទាំក៏មានភាពសំខាន់មិនចាញ់គ្នាប៉ុន្មានដែរ។ ខាងក្រោមនេះ គឺជាវិធីបោកសម្អាតខ្នើយតាមបែបផ្សេង ដែលបងៗស្ត្រីមេផ្ទះគួរតែយល់ដឹង ដើម្បីភាពស្អាតមានអនាម័យ និងសុខភាពល្អរបស់សមាជិកក្នុងគ្រួសារ និងខ្លួនឯងផ្ទាល់។

• ការបោកសម្អាតខ្នើយថ្មី
សម្រាប់ខ្នើយដែលទើបតែទិញមកថ្មីៗ ចាំបាច់ណាស់ត្រូវតែបោកសម្អាតជាមុនសិន មុននឹងយកមកប្រើ ដោយវិធីការបោកគក់ក៏អាចធ្វើឡើងដោយការប្រើម៉ាស៊ីនបោកគក់បានដែរ។ ដោយមុនដំបូងចូរយកម្សៅសាប៊ូប្រមាណជា 1កូនពែង លាយជាមួយទឹកថ្នាំដាក់ឱ្យស 1/2កូនពែង និងម្សៅបេកគីងសូដា 1/2កូនពែង ដាក់
ត្រាំនៅក្នុងទឹកក្ដៅរយៈពេល20នាទី រួចហើយសឹមយកទៅដាក់ចូលក្នុងម៉ាស៊ីនបោកគក់ ដើម្បីបោកតាមធម្មតា រួចហើយទើបយកទៅដាក់ហាលឱ្យស្ងួត។

• ការបោកសម្អាតខ្នើយធ្វើពីអេប៉ុង
គឺជាខ្នើយដែលមនុស្សជាច្រើនជ្រើសរើសប្រើ តែរឿងដែលសំខាន់នោះគឺ ដោយសារតែវាមិនអាចបោកសម្អាតដោយម៉ាស៊ីនបោកគក់បាន ដូច្នេះហើយទើបត្រូវបោកសម្អាតដោយការដោះស្រោមចេញមកបោកដោយឡែក និងសម្រាប់អេប៉ុងវិញអាចធ្វើការសម្អាតដោយការប្រើម៉ាស៊ីនបូមធូលីចេញ ហើយបន្ទាប់ពីនោះអាចប្រើផលិតផលកម្ចាត់ស្នាមប្រឡាក់ វែនីស ដើម្បីកម្ចាត់ស្នាមប្រឡាក់ផ្សេងៗ ហើយសឹមលាងចេញដោយទឹកស្អាត និងជូតផ្ដិតដោយកន្សែងពោះគោ រួចហើយទើបយកទៅដាក់ហាលថ្ងៃឱ្យស្ងួត។

• ការបោកសម្អាតខ្នើយដែលប្រឡាក់ញើសឡើងពណ៌លឿង
សម្រាប់ខ្នើយដែលប្រឡាក់ឡើងពណ៌លឿងនេះគឺជារឿងធំណាស់ តែក៏អាចចាត់ការបញ្ហានេះបានយ៉ាងងាយដែរ ដោយការយកខ្នើយនោះទៅដាក់ត្រាំនៅក្នុងទឹកក្ដៅ រួមទាំងដាក់ម្សៅសាប៊ូ 1ពែង ទឹកសាប៊ូលាងចានមួយពែង ម្សៅបូរែកស៍(អាចរកទិញបាននៅក្នុងហាង និងផ្សារទំនើប) 1/2ពែង ត្រាំទុកចោលរយៈពេល30នាទី រួច
ហើយទើបបោកគក់នឹងដៃតាមធម្មតា ឬដាក់បោកក្នុងម៉ាស៊ីនរហូតដល់ស្នាមលឿងៗទាំងនោះរលាយបាត់អស់។

• ការបោកសម្អាតខ្នើយដែលដុះផ្សិត
ខ្នើយដែលកខ្វក់ឡើងដុះផ្សិត គឺជារឿងធំមួយទៀតដែលចាំបាច់យ៉ាងខ្លាំងត្រូវតែយកចិត្តទុកដាក់ តែក៏អាចធ្វើការបោកសម្អាតបានដោយងាយដែរ ដោយចាប់ផ្ដើមពីការយកខ្នើយនោះមកដាក់ត្រាំនៅក្នុងទឹកក្ដៅ ហើយបន្ថែមទឹកថ្នាំហាយដ្រូជេន ភើរ៍អុកសាយដ៍(Hydrogen Peroxide) 1ពែង បន្ទាប់មកដាក់ទឹកសាជូរចូលទៅ 1/2ពែង រួចត្រាំទុកចោល។ បន្ទាប់ពីនោះមកទើបបន្ថែមម្សៅបេកគីងសូដា និងបន្ថែមទឹកសាជូរចូលទៅទៀត រួចហើយសឹមបន្តក់ទឹកប្រេងក្រអូបចូលទៅបន្តិច។ បន្ទាប់ពីកម្ចាត់មេរោគផ្សិតរួចហើយ ទើបយកទៅបោកសម្អាតតាមប្រក្រតី។

ចំណេះដឹងបន្ថែម
បងៗស្រីមេផ្ទះជាច្រើនតែងនឹកឆ្ងល់ថា ក្នុងការបោកសម្អាតក្រណាត់ផ្សេងៗ ហេតុអ្វីចាំបាច់ត្រូវកំណត់សីតុណ្ហភាពទឹក(ទឹកក្ដៅ)? ព្រោះថា ការបោកគក់ខោអាវ ឬក្រណាត់ផ្សេងៗដោយប្រើទឹកដែលមានសីតុណ្ហភាព 40 អង្សានោះគឺ ដោយសារតែទឹកក្ដៅមានប្រសិទ្ធភាពក្នុងការសម្លាប់មេរោគផ្សេងៗ រួមទាំងអាចកម្ចាត់ស្នាមប្រឡាក់ផ្សេងៗបានយ៉ាងល្អ ដែលនឹងធ្វើឱ្យយើងកាន់តែងាយបោកគក់សម្អាតបានកាន់តែស្អាតឡើង៕

April 4, 2018

ការបង្ហាញផលិតផលទឹកត្រចៀកកាំ Jin Soon និង Hong Soon

April 4, 2018

10 វិធីបន្ថយអាការក្អកឱ្យជាលឿនបំផុត

កើតជំងឺគ្រុនផ្ដាសាយ ហឺត ស្ងួតក ឆ្លងមេរោគក្នុងប្រព័ន្ធដកដង្ហើម ប្រតិកម្មចាញ់ ជក់បារី របេង បំពង់ខ្យល់រីក និងផលប៉ះពាល់ផ្សេងៗពីថ្នាំមួយចំនួន ទាំងអស់នេះគឺជាមូលហេតុដែលធ្វើឱ្យអ្នកកើតអាការក្អក ទាំងក្អកស្ងួត ក្អកមានស្លេស្ម៍ ឬក្អករ៉ាំរ៉ៃ ជាដើម តែមិនថាក្អកបែបណាក៏ដោយ ក៏វាសាងនូវក្ដីរំខានដល់អ្នករហូតទាំងយប់ទាំងថ្ងៃដែរ។ ពេលខ្លះក្អកឡើងក្រហមមុខ ហើយថែមទាំងក្អកនៅក្នុងទីសាធារណៈ ដូចជានៅក្នុងរថយន្តក្រុងជាដើម ក៏ខ្លាចគេឯងសម្លឹងមុខទៀតផង។ តែមិនអីទេ ឡារ៉ែន យល់ចិត្តលោកអ្នកចំពោះបញ្ហានេះ ទើបចង់សូមណែនាំពីវិធីបន្ថយអាការក្អកនេះឱ្យថយចុះយ៉ាងលឿនបំផុត ដែលទាំងងាយស្រួល និងបានផលល្អយ៉ាងពិតប្រាកដ។

1. ញ៉ាំទឹកឱ្យច្រើនឡើង
ចាប់ផ្ដើមងាយៗជាមួយនឹងការញ៉ាំទឹកក្នុងមួយថ្ងៃៗឱ្យបានច្រើនឡើង។ អ្នកណាដែលមានស្លេស្ម៍នៅក្នុងបំពង់ក ទឹកនឹងជួយរំលាយស្លេស្ម៍ឱ្យតិចចុះបាន ចំណែកអ្នកណាដែលមានអាការក្អកស្ងួតវិញ ទឹកក៏ជួយឱ្យមានសំណើមនៅក្នុងបំពង់កបានដែរ និងធ្វើឱ្យអាការឈឺក្រហាយក្នុងបំពង់កថយចុះបានដូចគ្នា។

2. ញ៉ាំទឹកក្ដៅឧណ្ហៗ
បើជ្រើសរើសយកការញ៉ាំទឹកឱ្យច្រើនឡើងហើយនោះ ក៏គួរជ្រើសរើសញ៉ាំទឹកក្ដៅឧណ្ហៗជំនួសការញ៉ាំទឹកត្រជាក់វិញ ព្រោះទឹកក្ដៅឧណ្ហៗនឹងជួយរំលាយស្លេស្ម៍ និងផ្ដល់សំណើមនៅក្នុងបំពង់កបានល្អជាងទឹកត្រជាក់។ ក្រៅពីនេះនៅអាចជ្រើសរើសញ៉ាំទឹកក្ដៅឧណ្ហៗលាយទឹកឃ្មុំ និងក្រូចឆ្មារក្នុងចន្លោះពេលថ្ងៃបានផងដែរ។

3. ងូតទឹកក្ដៅឧណ្ហៗ
ខាងក្នុងកក់ក្ដៅហើយ ខាងក្រៅក៏ត្រូវតែកក់ក្ដៅផងដែរ។ ការងូតទឹកក្ដៅឧណ្ហៗ ក្រៅពីនឹងជួយកាត់បន្ថយសំបោរបានហើយ នៅល្អចំពោះរាងកាយរបស់អ្នកកើតជំងឺផ្ដាសាយ និងកើតប្រតិកម្មចាញ់ផ្សេងៗបានទៀតផង។

4. បៀមថ្នាំបំបាត់ក្អក
កុំគិតថា អាការក្អកនឹងបាត់ទៅវិញដោយឯកឯងឱ្យសោះ។ បើកើតអាការក្អកជាប់ៗគ្នាឡើងកោងខ្លួនដូចបង្គា ក្អកឡើងមិត្តភក្តិជិតខាងធុញទ្រាន់ហើយនោះ គួរប្រញាប់រកថ្នាំបំបាត់ក្អកមកបៀមជាបន្ទាន់ ព្រោះក្នុងថ្នាំបំបាត់ក្អកនឹងមានផ្នែកផ្សំដែលនឹងជួយកាត់បន្ថយអាការក្រហាយនៅក្នុងបំពង់កបាន។

5. ប្រើម៉ាស៊ីនធ្វើឱ្យមានសំណើមក្នុងអាកាសធាតុ
ផ្ទះណាដែលបើកម៉ាស៊ីនត្រជាក់គេង ដល់ពេលយប់ជ្រៅ អាកាសធាតុអាចនឹងស្ងួតរហូតធ្វើឱ្យអាការក្អកធ្ងន់ធ្ងរឡើងជាងមុន ហើយទោះជាអាកាសធាតុនៅក្នុងផ្ទះអ្នកហាក់ដូចជាក្ដៅសើមស្រាប់ហើយក៏ដោយ តែសម្រាប់អ្នកជំងឺដែលមានអាការឈឺក្រហាយបំពង់កស្រាប់ហើយនោះ ធាតុអាកាសស្ងួតៗ ត្រជាក់ៗនឹងរឹតតែធ្វើឱ្យអាការក្អកកម្រើកធ្ងន់ធ្ងរឡើងជាងមុន និងអាចមានអាការតឹងច្រមុះរួមជាមួយផង ដូច្នេះបើសិនប្រើម៉ាស៊ីនធ្វើឱ្យមានសំណើមក្នុងបន្ទប់គេងផងនោះ ក៏នឹងជួយសម្រាលអាការក្អក និងឈឺក្រហាយបំពង់កបាន។
កំណត់សម្គាល់: ម៉ាស៊ីនធ្វើសំណើម ជាម៉ាស៊ីនដែលដោតភ្លើងអគ្គិសនីហើយមានចំហាយទឹកបាញ់ចេញមក អាចបន្ថែមភាពសើមនៅក្នុងអាកាសធាតុក្នុងបន្ទប់បាន(មន្ទីរពេទ្យមួយចំនួននឹងមានម៉ាស៊ីនបន្ថែមសំណើមនេះនៅក្នុងបន្ទប់អ្នកជំងឺ)។ វានឹងមានក្លិនក្រអូប ឬគ្មានក្លិន ស្រេចតែចំណង់ចំណូលចិត្ត តែបើជ្រើសរើសមានក្លិន ក៏នឹងជួយឱ្យគេងលក់ស្រួល ដូចជា ក្លិនផ្កាខាបូម៉ាយដ៍ ក្លិនផ្កាឡាវេនឌើរ ក៏នឹងជួយឱ្យអ្នកងាយគេងលក់ និងសម្រាកបានពេញទំហឹងទៀតផង។

6. តមជក់បារី
អ្នកណាដែលជក់បារី គួរតមជក់បារីដាច់ខាតក្នុងអំឡុងពេលដែលកើតអាការក្អក ព្រោះការជក់បារីនឹងធ្វើឱ្យក្រហាយបំពង់កកាន់តែខ្លាំងឡើង និងថែមទាំងអាចធ្វើឱ្យកើតស្លេស្ម៍ច្រើនឡើងបានទៀតផង(តែ ឡារ៉ែន ចង់ណែនាំឱ្យឈប់ជក់បារីតែម្ដងទៅល្អជាង)។ តែបើលោកអ្នកមិនមែនជាអ្នកជក់បារីទេនោះ ក៏គួរស្ថិតនៅឱ្យឆ្ងាយពីអ្នកជក់បារី ឬក្រុមមនុស្សដែលជក់បារីដូចគ្នា។

7. តមប្រើទឹកអប់ និងស្រៃយ៍ផ្សេងៗ
គ្រឿងផ្សំរបស់ទឹកអប់ និងស្រៃយ៍ផ្សេងៗ (រួមទាំងស្រៃយ៍ក្រអូបដែលបាញ់ក្នុងបន្ទប់ម៉ាស៊ីនត្រជាក់់ផង) ធ្វើឱ្យរន្ធច្រមុះកើតអាការស្ងួតក្រហាយ និងអាចជាមូលហេតុដែលធ្វើឱ្យកើតមានស្លេស្ម៍ច្រើនឡើង ឬក្អករ៉ាំរ៉ៃបាន។

8. ចៀសវាងពីធូលីដី និងផ្សែងផ្សេងៗ
ក្រៅពីទឹកអប់ និងស្រៃយ៍ហើយ អាកាសធាតុជុំវិញខ្លួន ដូចជា អាកាសធាតុស្ងួតៗពីម៉ាស៊ីនត្រជាក់ក្នុងការិយាល័យ ធូលីផ្សែងពីបំពង់សឺម៉ាំងឡាន ផ្សែងពីការចម្អិនម្ហូបអាហារ ធាតុអាកាសពុលទាំងអស់នេះអាចធ្វើឱ្យកើតអាការស្ងួតក្រហាយរន្ធច្រមុះ និងបំពង់កបាន ដូច្នេះខណៈដែលកើតអាការក្អក គួរពាក់ម៉ាសបាំងមាត់ និងច្រមុះដើម្បីការពារខ្លួនឯងពីធាតុអាកាសពុលទាំងនោះផង។

9. គេងសម្រាកឱ្យបានច្រើនឡើង
ភាគច្រើនទៅ អាការក្អកដែលអាក្រក់ទៅជារឿយៗ ឬមិនងាយជានោះ គឺដោយសារតែរាងកាយមិនមានពេលវេលាក្នុងការជួសជុលខ្លួនឯង ព្រោះអ្នកប្រើប្រាស់រាងកាយរបស់អ្នកធ្ងន់ធ្ងរជ្រុលពេក រហូតមានពេលសម្រាកតិចតួចបំផុតហ្នឹងឯង ដូច្នេះបើសិនដឹងខ្លួនថាឈឺ ក្អកខ្លាំង គួរប្រញាប់ចូលគេងតាំងពីក្បាលព្រលប់ តាំងពីធាតុអាកាសនៅមិនទាន់ត្រជាក់ខ្លាំង និងសម្រាកឱ្យបានគ្រប់គ្រាន់។

10. ទៅជួបគ្រូពេទ្យ
វិធីចុងក្រោយដែលអាចពឹងបាន គឺការទៅជួបលោកគ្រូពេទ្យឱ្យដឹងគ្នាតែម្ដងទៅ ព្រោះអាការក្អកដែលអ្នកកើតមកយូរហើយ និងធ្វើគ្រប់វិធីហើយក៏នៅតែមិនបាត់ទៀតនោះ អាចនឹងមិនមែនជាអាការក្អកធម្មតាៗនោះទេ អាចជាអាការដំបូងដែលជាសញ្ញាដាស់តឿនពីជំងឺគ្រោះថ្នាក់ផ្សេងៗដែលនឹងកើតនៅពេលក្រោយ ដូច្នេះការទៅជួបលោកគ្រូពេទ្យគឺជារឿងចាំបាច់បំផុតសម្រាប់នរណាក៏ដោយដែលមានអាការក្អកមិនធូរស្រាលសោះក្នុងរយៈពេល 1-2សប្ដាហ៍៕

April 4, 2018

ផលលំបាកនៃការរួមភេទញឹកញាប់

មានការលើកឡើងជាច្រើនពីលទ្ធផលដែលទទួលបានពីការរួមភេទ ដែលក្នុងនោះរួមមានទាំងគុណវិបត្ត និងគុណសម្បត្តិ។ នៅក្នុងនោះផងដែរ ក៏មានឯកសារខ្លះបានបង្ហាញពីភាពល្អប្រសើររបស់សុខភាពផងដែរខណៈដែលការរួមភេទត្រូវបានធ្វើឡើងស្របទៅតាមក្បួន និងសមស្របទៅនឹងពេលវេលា ក៏ដូចជាអាយុកាល។ ដោយឡែកពេលនេះ ដើម្បីជាជំនួយ និងជាការដាស់តឿន ឡារ៉ែន សូមបង្ហាញពីភាពអវិជ្ជមានដែលទទួលបានពីការរួមភេទញឹកញាប់។

ផ្អែកតាមឯកសារដែលសរសេរពីក្បួនសិច បានលើកឡើងថា មិនថាចំពោះតែស្ត្រី ឬបុរសនោះទេ ឱ្យតែមានអនុវត្តសិចច្រើនដងក្នុងរយៈពេលដ៏ខ្លី គឺសុទ្ធតែបាត់បង់នូវថាមពល ជាពិសេសសារជាតិទឹកពីក្នុងរាងកាយដូចគ្នា ហើយ
វានឹងបង្កឱ្យរាងកាយចុះខ្សោយ ថមថយនូវការចង់ចាំ ដែលបណ្តាលមកពីភាពខ្សោយរបស់ប្រព័ន្ធប្រសាទរបស់ខួរក្បាល។ អ្វីដែលរឹតតែសំខាន់ជាងនេះទៅទៀត វានឹងបង្កឱ្យមានភាពប៉ះពាល់ទៅដល់ ៖

• ខ្សោយប្រដាប់ភេទ ៖ ការរួមភេទជាញឹកញាប់ មិនថាចំពោះតែមនុស្សប្រុស ឬជាស្ត្រីនោះទេ សុទ្ធបង្កឱ្យមានការថមថយកម្លាំងដូចគ្នា ហើយវានឹងបង្កឱ្យការគ្រប់គ្រង់ស្មារតី និងប្រាជ្ញាចុះខ្សោយផងដែរ។ បន្ថែមពីនេះវាក៏បណ្តាលឱ្យសមត្ថភាពផ្លូវភេទមានការអនថយបន្តិចម្ដងៗដែលឈានទៅរកភាពអវិជ្ជមាននៃសម្ពន្ធផ្លូវភេទផងដែរ។

• ក្លាយជាឧបសគ្គដល់មុខងារផ្លូវភេទ ៖ ភាគច្រើន បុរសតែងមានចំណូលចិត្តធ្វើសកម្មភាពឡើងគ្រែជាមួយស្ត្រីជាដៃគូជាញឹកញាប់ ដែលមានពេលខ្លះ បានសម្រេចម្ដងហើយ ចងបន្តឱ្យបានលើកទី2ក្នុងគ្រាតែមួយក៏មានដែរ ដោយសារការយល់ឃើញថា ការរួមភេទនៅទឹកទី2វានឹងជួយពន្យារពេលក្នុងការបញ្ចេញទឹកកាមមកខាងក្រៅ។ សកម្មភាពទាំងនេះ វានឹងធ្វើឱ្យប៉ះពាល់ដល់ក្រពេញ និងប្រព័ន្ធបង្កើតទឹកកាម ដែលវាអាចឈានទៅរកភាពអវិជ្ជមានក្នុងការផលិតទឹកកាមនាពេលក្រោយ។

• មានបញ្ហាដល់ចង្កេះ ៖ នៅក្នុងឯកសារដដែលបានបង្ហាញថា ក្នុងករណីដែលបុរសឧស្សាហ៍ឡើងគ្រែជាមួយដៃគូជាញឹកញាប់នោះវាអាចនឹងធ្វើឱ្យរលាក់ដល់ប្រពេញប្រូស្តាត រលាកថងមេជីវិត ហើយអាចនឹងឈានទៅរកការកើតមានជំងឺផ្សេងៗទៀតក៏អាចថាបាន។ ក្រៅពីនេះ វាក៏អាចធ្វើឱ្យកើតមានសម្ពាធដល់ប្រដាប់ភេទធ្ងន់ធ្ងរផងដែរ ជាពិសេស ក្នុងករណីបុរសជាអ្នកធ្វើសកម្មភាពទៀតផងនោះ ក៏អាចប៉ះពាល់ដល់បញ្ហាចង្កេះទៀតផង។

• ថមថយកម្រិតភាពស្រើបស្រាល ៖ ទាំងបុរស ក៏ដូចជាស្ត្រីផងដែរ ជាធម្មតាសម្រាប់ការរួមភេទគ្រាដំបូង ឬទឹកទី1 គឺមានអារម្មណ៍រំភើបស្រើបស្រាលយ៉ាងអស្ចារ្យ ប៉ុន្តែក្នុងករណីព្យាយាមបង្កើតឱ្យមានទឹកទី2 ឬទឹកទី3 ច្បាស់ណាស់ថា ភាពស្រើបស្រាលនឹងបាត់បង់ មិនដូចជាភាពរំជើបរំជួលគ្រាទីមួយនោះឡើយ។ ផ្ទុយទៅវិញ វាថែមទាំងអាចធ្វើឱ្យប៉ះពាល់ដល់សតិអារម្មណ៍របស់ភាគីជាដៃគូម្ខាងទៀត ដោយសារតែភាពស្ងួតនៃប្រដាប់ភេទ ការធុញទ្រាន់ ដែលវាបង្កឡើងដោយកត្តាផ្លូវចិត្តជាចម្បង។

ក្រោយពីបានជ្រាបនូវចំណេះដឹងផ្លូវភេទខាងលើនេះហើយ តើលោកអ្នកមានអារម្មណ៍ចង់ប្រព្រឹត្តកាមច្រើនដងក្នុងគ្រាតែមួយនោះទៀតទេ? សូមធ្វើការពិចារណាដោយខ្លួនឯងតាមសម្រួលចុះណា …..៕

April 3, 2018

Author: ធឿន មករា