ធឿន មករា - La Reine Media

កញ្ញា ចាន់ នីកា មានទីផ្សារខ្លាំង ជាមួយតំណែងតារាទឹកភ្នែក

មុននេះ សម្រាប់តំណែងតារាសម្ដែងស្រីដែលល្បីឈ្មោះថាមានជំនាញផ្នែកខាងសម្រក់ទឹកភ្នែករហូតជាប់រហស្សនាមថាជាតារាជន់ជោរដោយទឹកភ្នែក គឺត្រូវធ្លាក់ទៅកញ្ញា នី មុន្នីនាថ ប៉ុន្តែពេលនេះ វាអាចដូចទៅនឹងពាក្យចាស់បុរាណដែលបានពោលថា រលកក្រោយច្រានរលកមុខ ហើយរុញផ្ទប់ទៅនឹងច្រាំងនោះហើយ ដ្បិតអីពេលនេះ តារាស្រីដែលមានជំនាញផ្នែកសម្រក់ទឹកភ្នែកនៅក្នុងការសម្ដែងត្រូវបានធ្លាក់ទៅលើតារាសម្ដែងស្រីវ័យក្មេងជំនាន់ក្រោយ គឺកញ្ញា ចាន់ នីកា វិញម្ដង។

តាមរយៈការខិតខំ និងព្យាយាមបង្ហាញពីសមត្ថភាពក្នុងនាមជាអ្នកអាជីពសិល្បៈនៅត្រឹមរយៈពេលប្រមាណជា2ឆ្នាំចុងក្រោយនេះ កញ្ញាចាន់ នីកា បានធ្វើឱ្យមានការចាប់អារម្មណ៍ពីសំណាក់មហាជនទូទៅជាច្រើន ជាពិសេសអ្នកដឹកនាំសម្ដែងខ្សែភាពយន្តផ្ទាល់តែម្ដង ទៅលើភាពប៉ិនប្រសប់នៃការសម្រក់ទឹកភ្នែកក្នុងនាមជាតារាសម្ដែងស្រីដែលនិយមភាពស្រគត់ស្រគំលំនាំតារាសម្ដែងជំនាន់មុន គឺកញ្ញា នី មុន្នីនាថ។ ជាក់ស្ដែង នាងមានស្នាដៃដូចជានៅក្នុងការសម្ដែង MV នៃបទចម្រៀង “បទមានន័យអី?” របស់ផលិតកម្ម អឹម (M Production), ខ្សែភាពយន្តភាគខ្មែរដែលចាក់បញ្ចាំងនៅលើកញ្ចក់ទូរទស្សន៍កងយោធពលខេមរភូមិន្ទ ប៉ុស្ដិ៍លេខ5 ដែលមានចំណងជើងថា “វេទមន្តស្នេហ៍” និងរឿង “ក្រមុំឆ្នាស់ប៉ះមេស្រុកឆ្នើម” ដែលកំពុង
ចាក់បញ្ចាំងនៅលើកញ្ចក់ទូរទស្សន៍របស់ស្ថានីយ៍ទូរទស្សន៍ PNN នាពេលបច្ចុប្បន្ននេះ។

ថ្លែងប្រាប់អ្នកយកព័ត៌មានរបស់ទស្សនាវដ្ដី ឡារ៉ែន កាលពីពេលកន្លងទៅនេះ កញ្ញា ចាន់នីកា បានលើកឡើងឱ្យដឹងថា ចំពោះការសម្ដែងមិនថាស្ថិតនៅក្នុងតំណែងជាតួអង្គយ៉ាងណានោះទេ ពោលមិនថាតួស្លូត កាចឆ្នាស់ តួឈ្នានីស ឬតួអង្គបែបសុភាពស្រគត់ស្រគំនោះទេ គឺកញ្ញាអាចមានលទ្ធភាពសម្ដែងបានទាំងអស់ ក៏ប៉ុន្តែអ្វីដែលជាចំណូលចិត្ត និងមានជំនាញខ្ពស់ជាងគេនោះ គឺការសម្រក់ទឹកភ្នែក ដ្បិតកញ្ញាបានដឹងច្បាស់ថា តួអង្គប្រភេទនេះ ហាក់មានភាពស័ក្ដិសមទៅនឹងសមត្ថភាពពីធម្មជាតិរបស់ខ្លួន។

ជាមួយនឹងការបង្ហើបប្រាប់ពីអារម្មណ៍ពិត
របស់ខ្លួនទៅលើចំណូលចិត្ត និងជំនាញនៃការសម្ដែងខាងលើនេះ ស្រីស្រស់សាច់ស មុខកូនកាត់ចិនរូបនេះក៏បានបញ្ជាក់ប្រាប់ពីការងារដែលខ្លួនកំពុងតែមាននៅក្នុងដៃផងដែរថា “សព្វថ្ងៃនេះ ការងារអីក៏ខ្ញុំទទួលដែរ មិនថាការងារជាតារាបង្ហាញម៉ូដ ពិធីការិនីសម្រាប់កម្មវិធីរបស់ក្រុមហ៊ុននានាជាលក្ខណៈឯកជន ឬជាការងារផ្នែកសម្ដែងនោះទេ គឺខ្ញុំទទួលយកទាំងអស់ កុំឱ្យតែប៉ះពាល់ការងារមុនៗដែលខ្ញុំបានទទួលធ្វើកុងត្រារួចរាល់ ដូចជា ប៉ះម៉ោងថតរឿងភាគសម្រាប់ត្រៀមចាក់បញ្ចាំងនៅ TV5 រឿង “ផ្កាព្រៃស្រទាប់មាស” និងនៅស្ថានីយ៍ទូរទស្សន៍ PNN គឺរឿង “ដួងចន្ទដួងចិត្ត”។

គួរបញ្ជាក់ផងដែរថា សម្រាប់ការងារសិល្បៈដែលកញ្ញា ចាន់ នីកា ធ្លាប់បានបង្ហាញសមត្ថភាពក្រៅពីការងារជាតារាបង្ហាញម៉ូដ គឺនៅមានដូចជា ការថត MV ការថតស្ប៉តឱ្យផលិផលនានាដូចជា ស្ប៉តទឹកបរិសុទ្ធវីតាល់ ស្ប៉តផលិតផលគ្រឿងអេឡិចត្រូនិច LG ស្ប៉តទឹកត្រចៀកកាំ និងស្ប៉តស្រាអាឡិចហ្សង់វីស្គីជាដើម។ ដោយឡែកសម្រាប់ការងារជាក់ស្ដែងនាពេលបច្ចុប្បន្ននេះ ក្រៅពីការងារផ្នែកសម្ដែងឱ្យខាងផលិតកម្ម “ចក្រវាឡពេជ្រ” សម្រាប់ត្រៀមចាក់បញ្ចាំងនៅស្ថានីយ៍ទូរទស្សន៍ខាងលើនេះ គឺនៅមានការងារជាពិធីការិនីប្រចាំកម្មវិធីកម្សាន្តប្រចាំសប្ដាហ៍របស់ TV Online ប្រចាំអង្គភាពព័ត៌មានរហ័ស Fresh News មួយទៀតគឺកម្មវិធី “ចង់ដឹងពីតារាក្រៅការងារសិល្បៈ” ជាដើម៕

April 10, 2018

រក្សាទុកថ្នាំពេទ្យ នៅក្នុងទូទឹកកក មានគ្រោះថ្នាក់ដែរឬទេ?

ឡារ៉ែន គិតថា ប្រហែលវាជាគំនិតរបស់មនុស្សជាច្រើនដែលគិតថា ចង់យកស្អីទៅដាក់ក្នុងទូទឹកកកក៏បានដែរ វានឹងធ្វើឱ្យរបស់ទាំងអស់នោះក្រផុតកំណត់ ព្រោះភាពត្រជាក់ក្នុងទូទឹកកកនឹងជួយថ្នមវត្ថុអស់ទាំងនោះឱ្យនៅបានយូរឡើង ដែលថាៗទៅ សម្រាប់វត្ថុជាច្រើនអាចនឹងត្រឹមត្រូវ តែបើសិនជារឿងរបស់ “ថ្នាំពេទ្យ” វិញ តើវានឹងពិតដូចដែលគេនាំគ្នាជឿហ្នឹងឬយ៉ាងណា? ខាងក្រោមនេះគឺជាចម្លើយ…។

រក្សាទុកថ្នាំពេទ្យនៅក្នុងទូទឹកកក
គឺជារឿងពិតមួយដែលអាចនិយាយបាន ធាតុអាកាសក្ដៅហប់អាចនឹងធ្វើឱ្យថ្នាំចុះខ្សោយប្រសិទ្ធភាពលឿនជាងប្រក្រតី តែក៏មិនបានមានន័យថា ការរក្សាទុកថ្នាំពេទ្យនៅក្នុងទូទឹកកកនឹងជួយបន្តអាយុរបស់ថ្នាំឱ្យទុកប្រើប្រាស់បានយូរឡើងដែរ ព្រោះក្រៅពីរក្សាទុកថ្នាំក្នុងកន្លែងដែលមានធាតុអាកាសត្រជាក់ខ្លាំងជ្រុលពេក អាចនឹងធ្វើឱ្យថ្នាំចុះខ្សោយប្រសិទ្ធភាពបានដូចគ្នាហើយនោះ នៅធ្វើឱ្យថ្នាំកើតសារធាតុពុលកើនឡើងបានទៀតផង ព្រោះនៅក្នុងទូទឹកកកក៏មានភាពសើមអាប់ខ្ពស់ដូចគ្នាដែរ ហើយភាពសើមអាប់នេះឯងដែលធ្វើឱ្យថ្នាំបាត់បង់ប្រសិទ្ធភាព។

លើកឧទាហរណ៍ដូចជា ថ្នាំអាស្ពីរីន នៅពេលប៉ះនឹងភាពសើមអាប់នៅក្នុងទូទឹកកកយូរៗទៅ អាចរលាយខ្លួនក្លាយជាអាស៊ីតសាលីស៊ីលិក និងអាស៊ីត អាសេទិក ដែលនឹងធ្វើឱ្យថ្នាំលែងមានប្រសិទ្ធភាព រួមទាំងធ្វើឱ្យកើតមានជាតិពុល ធ្វើឱ្យរាងកាយខ្វះអុកស៊ីហ្ស៊ែន ទៅជាប្រកាច់ និងបាត់បង់សតិស្មារតីបានទៀតផងបើរាងកាយទទួលក្នុងបរិមាណច្រើន។

ការរក្សាទុកដាក់ថ្នាំពេទ្យយ៉ាងត្រឹមត្រូវ
1. រក្សាទុកនៅក្នុងកន្លែងដែលមានខ្យល់អាកាសបក់ចេញចូលបានស្រួល មិនក្ដៅ មិនអាប់សើមជ្រុលពេក និងគ្មានពន្លឺថ្ងៃចាំងចូលដល់។

2. រៀបចំទុកដាក់តាមប្រភេទថ្នាំនីមួយៗរួមគ្នា និងអាចបែងចែកតាមប្រភេទរបស់ថ្នាំ ដូចជា ថ្នាំទឹក ឬថ្នាំគ្រាប់ ថ្នាំសម្រាប់លាបលើស្បែក ឬថ្នាំសម្រាប់លេបព្យាបាលក្នុងខ្លួន(ថ្នាំផ្សះ) ឬអាចបែងចែកតាមក្រុមថ្នាំដែលព្យាបាលអាការដូចគ្នា ដូចជា ថ្នាំបំបាត់ការឈឺចាប់(ឈឺក្បាល ឈឺពោះ ឈឺធ្មេញ) និងថ្នាំព្យាបាលរបួស ឬដំបៅជាដើម។

3. នៅពេលបានថ្នាំមក គួរពិនិត្យមើលថ្ងៃផុតកំណត់ ឬបើមិនដឹងទេ គួរសរសេរលើក្រដាសបិទលើដប ឬកញ្ចប់ថ្នាំនោះថា បានមកនៅថ្ងៃណា ហើយរកមើលព័ត៌មានថា ថ្នាំប្រភេទនោះអាចរក្សាទុកបានយូរប៉ុនណា(ភាគច្រើនបើឃើញមានតែថ្ងៃផលិត ចូររាប់ចាប់ពីថ្ងៃផលិតមក3ឆ្នាំទៀត នោះគឺថ្ងៃផុតកំណត់ហើយ តែទាំងអស់នេះអាស្រ័យលើប្រភេទរបស់ថ្នាំដែរ)។

4. រៀបចំការប្រើថ្នាំតាមលំដាប់ ពីថ្នាំដែលជិតផុតកំណត់មុនជានិច្ច។

5. នៅក្នុងទូថ្នាំ ឬប្រអប់ទុកដាក់ថ្នាំ គួរសរសេរបិទប្រាប់ពីប្រភេទថ្នាំឱ្យបានច្បាស់លាស់ ដើម្បីងាយក្នុងការចាប់យកមកប្រើ។

6. ថ្នាំដែលជាបន្ទះ មិនគួរកាត់ចេញមកជាគ្រាប់ ឬឆ្កឹះចេញពីបន្ទះនោះទេ គួររក្សាទុកទាំងបន្ទះ ដើម្បីទុកមើលថ្ងៃផុតកំណត់នៅលើបន្ទះនោះ។

7. បើថ្នាំនៅមិនទាន់ផុតថ្ងៃកំណត់ តែសង្កេតឃើញមានភាពខុសប្រក្រតីណាមួយដែលខុសប្លែកពីមុន ដូចជា ប្រែពណ៌ រូបរាងខុសពីមុន មានក្លិន និងរសជាតិប្លែកជាដើម-ល- មិនគួររក្សាទុកថ្នាំនោះទៀតទេ។

យ៉ាងណាក៏ដោយ ថ្នាំនីមួយៗអាចនឹងមានវិធីរក្សាទុកដាក់ខុសប្លែកពីគ្នា ដូច្នេះគួររកមើលវិធីថែរក្សាទុកថ្នាំនីមួយៗនោះនៅលើស្លាករបស់ផលិតផល ឬបើជាថ្នាំដែលគ្រូពេទ្យផ្សំមកឱ្យជាឈុតៗនោះ គួរតែទទួលទានតាមវេជ្ជបញ្ជាឱ្យអស់ កុំឈប់កណ្ដាលទីដែលនាំឱ្យថ្នាំនៅសល់ហើយគិតរក្សាថ្នាំនោះទុកដើម្បីលេបនៅពេលឈឺលើកក្រោយទៀតឱ្យសោះ ព្រោះក្រៅពីថ្នាំនោះអាចនឹងចុះខ្សោយប្រសិទ្ធភាពហើយនោះ នៅធ្វើឱ្យរាងកាយយើងឌឺថ្នាំ ដោយសារតែលេបមិនគ្រប់ចំនួនតាមគ្រូពេទ្យណែនាំទៀតផង៕

April 10, 2018

“ញ៉ាំថ្នាំមុនឱ្យហើយ ខ្លាចឈឺ” ធ្វើបែបហ្នឹងបានដែរឬទេ?

បច្ចុប្បន្ននេះធាតុអាកាសមិនទៀងទាត់ ខែភ្លៀងបែរជាក្ដៅហួតហែង ខែប្រាំងបែរជាមានភ្លៀងធ្លាក់ខុសពីធម្មតា ធ្វើឱ្យមនុស្សយើងងាយនឹងកើតជំងឺបំផុត។ សម្រាប់អ្នកខ្លះនៅពេលមានអារម្មណ៍ថា ខ្លួនហាក់ដូចជារកកលចង់ឈឺហើយនោះ ក៏ប្រញាប់ស្ទុះទៅរកថ្នាំមកលេបភ្លាមតែម្ដង ព្រោះតែជឿថា “ញ៉ាំថ្នាំស្ទាក់មុនឱ្យហើយ ខ្លាចឈឺ” តើរឿងនេះមានភាពពិតប្រាកដ និងអាចធ្វើបានដែរឬទេ? យើងនាំគ្នាទៅមើលចម្លើយទាំងអស់គ្នា…។

“ញ៉ាំថ្នាំស្ទាក់មុនឱ្យហើយ ខ្លាចឈឺ”
ជំនឿក្នុងរឿងនេះ “មិនមែនជារឿងពិត” នោះទេ ការលេបថ្នាំព្យាបាលទុកជាមុនក្រោយពីមានអារម្មណ៍ថា ខ្លួនរកកលឈឺ ឬក្រោយពីទទឹកភ្លៀង ឬត្រូវថ្ងៃខ្លាំងរយៈពេលយូរដែលធ្វើឱ្យប្រថុយប្រថានដល់ការកើតជំងឺគ្រុនផ្ដាសាយ ឬមិនស្រួលខ្លួននោះ មិនបានជួយការពាររោគាទាំងនោះមិនឱ្យកើតបានទេ ព្រោះថ្នាំទាំងនោះមិនមែនមានឫទ្ធិក្នុងការ “ការពារ” ទេ តែមានឫទ្ធិក្នុងការ “ព្យាបាល” ទៅតាមអាការរោគ ដូច្នេះគួរលេបថ្នាំទាំងនោះនៅពេលណាដែលមានអាការ ឬឈឺថ្កាត់ប៉ុណ្ណោះ។

ដូចជាថ្នាំ ប៉ារ៉ាសេតាម៉ុល មិនមែនមានឫទ្ធិបំបាត់រោគផ្ដាសាយដោយត្រង់នោះទេ តែមានឫទ្ធិសម្រាលអាការឈឺក្បាល ឈឺចុកចាប់តាមរាងកាយ បញ្ចុះកម្ដៅ ចំណែកថ្នាំព្យាបាលរោគផ្ដាសាយជាបន្ទះៗវិញនោះ ក៏ជាថ្នាំដែលមានចំណែកផ្សំរបស់ប៉ារ៉ាសេតាម៉ុល បូកជាមួយថ្នាំបន្ថយការហៀរសំបោរ ឬថ្នាំព្យាបាលប្រតិកម្មចាញ់ផ្សេងៗ ដែលនឹងបញ្ចេញឫទ្ធិដើម្បីសម្រាលអាការឈឺក្បាល បញ្ចុះកម្ដៅ តឹងច្រមុះ និងហៀរសំបោរហ្នឹងឯង។

ដូច្នេះបើសិនញ៉ាំថ្នាំទាំងនោះចូលទៅដោយមិនមានអាការទាំងនោះ ហើយថែមទាំងទទួលទានបែបហ្នឹងញឹកញាប់ទៀតផងនោះ ច្បាស់ជាមានគ្រោះថ្នាក់ដល់រាងកាយយ៉ាងពិតប្រាកដព្រោះការញ៉ាំថ្នាំផ្ដេសផ្ដាស់ ដោយមិនបានញ៉ាំតាមអាការដែលកើតឡើងពិតប្រាកដនោះ មានន័យថា លោកអ្នកកំពុងបានទទួលថ្នាំលើសកម្រិតហើយ ដែលវានឹងមានផលប៉ះពាល់ទៅដល់ថ្លើមដែលត្រូវតែធ្វើការកាន់តែខ្លាំងឡើង និងប្រថុយនឹងការកើតរោគរលាកថ្លើមនាពេលអនាគតទៀតផង។

តែបើសិនជាលោកអ្នកប្រាប់ថា លោកអ្នកមិនបានទទួលទានថ្នាំទាំងនោះញឹកញាប់ដល់ថ្នាក់នោះទេ វាក៏ប្រហែលជានឹងមិនកើតរោគរលាកថ្លើមនោះដែរ តែក៏សូមកុំភ្លេចចំណុចដំបូងដែលយើងបានប្រាប់ថា ការដែលញ៉ាំថ្នាំទាំងនោះ ដើម្បីស្ទាក់មិនឱ្យកើតជំងឺមិនអាចជួយការពារបាននោះទេ ដូច្នេះគួរតែបញ្ឈប់ទង្វើបែបហ្នឹងទៅប្រសើរជាង៕

April 10, 2018

មែនឬ… សក់ស្កូវ រឹតតែដក រឹតតែច្រើនឡើង?

ធ្លាប់បានឮមត្តភ័ក្តិ បងប្អូន ឬសូម្បីតែជាងធ្វើសក់ប្រាប់ដែរទេថា ពេលឃើញសក់ស្កូវហើយកុំដកចេញ ព្រោះនឹងធ្វើឱ្យសរសៃសក់នៅក្បែរនោះស្កូវតាមដែរ មិនតែប៉ុណ្ណោះអាចនឹងមានសក់ឡើងស្កូវពាសពេញក្បាលតែម្ដងក៏អាចថាបានដែរ ដូច្នេះហើយទើបមានអ្នកខ្លះត្រូវលួចកាត់ចោលខ្លះទៅលាបពណ៌ខ្មៅលប់ខ្លះទៅក៏មាន… តែរឿងពិតវិញវាយ៉ាងណាដែរ? ដូច្នេះកុំបង្អង់យូរ សូមតាមដានអត្ថបទនេះជាបន្ត…។

សក់ស្កូវ រឹតតែដក រឹតតែស្កូវឡើងច្រើន?
មិនពិតទេ ការដកសក់ស្កូវមិនមែនជាបច្ច័យក្នុងការបង្កើនចំនួនសរសៃសក់ដែលស្កូវឡើងពណ៌សនោះទេ។

សក់ស្កូវ ហេតុដូចម្ដេចបានកើតឡើង?
កើតឡើងពីគ្រាប់ពណ៌ (មេឡានីន) ដែលរាងកាយអ្នកសាងឡើង មាន 2 ពណ៌គឺ លឿងលាយក្រហម និងប្រផេះលាយខ្មៅ។ ប្រក្រតីឫសសក់នឹងផលិតគ្រាប់ពណ៌បានកាន់តែតិចទៅតាមអាយុរបស់មនុស្ស ដូច្នេះហើយទើបពេលមនុស្សអាយុច្រើនឡើងពណ៌សក់កាន់តែស្លេកឡើងៗជាសន្សឹមៗ រហូតក្លាយជាពណ៌ប្រផេះ ឬ-សតែម្ដងហ្នឹងឯង។

តើហេតុម៉េចបានសក់ជ្រុះ?
ជាប្រក្រតី សរសៃសក់មានចរន្តជីវិតរបស់វាស្រាប់ហើយ អាចរបូតជ្រុះបាន តែក៏មិនរបូតជ្រុះជានិរន្តរ៍ដែរ អាចដុះថែមឡើងមកជាថ្មីបានពីក្រពេញឫសសក់ដែលស្ថិតនៅខាងក្រោមស្បែកក្បាល។

ហេតុអីបានធ្លាប់ឃើញមានសក់2សរសៃដុះចេញមកពីចំណុចតែមួយ?
ឫសសក់ 1 សរសៃ សាងសក់បាន 1 សរសៃតឱ្យកាត់ ឬដកចេញក៏ដោយ ក៏យើងមិនអាចធ្វើឱ្យសរសៃសក់កើនឡើងបានដែរ តែដែលឃើញមានសក់ 2សរសៃដុះចេញមកពីចំណុចតែមួយនោះ អាចដោយសារតែត្រង់ចំណុចនោះមានក្រពេញឫសសក់ 2ចំណុចក៏មាន។

ទោះជាដកសក់ស្កូវចេញ ក៏មិនធ្វើឱ្យសក់ឡើងស្កូវថែមដែរ តែក៏មិនគួរដកចេញឡើយ
ព្រោះការដកសក់ញឹកញាប់ ជាពិសេសចំពោះអ្នកដែលមានសក់ស្កូវច្រើនរហូតដល់ត្រូវដកញឹកញាប់នោះ អាចធ្វើឱ្យក្រពេញឫសសក់ខូចខាត អាចធ្វើឱ្យលែងមានសក់ដុះឡើងមកថ្មីពីក្រពេញឫសសក់នោះ ធ្វើឱ្យសក់កាន់តែស្ដើង ឬក្បាលទំពែកមុនអាយុតែម្ដងក៏មាន៕

April 10, 2018

វិធីជួយសង្គ្រោះមនុស្សឱ្យរួចផុតពីការឆក់ខ្សែភ្លើង

ស្មេរបានអានព័ត៌មានមួយនៅក្នុងសារព័ត៌មានបរទេសដែលនិយាយអំពីកូនប្រុសអាយុ5ឆ្នាំម្នាក់បានជួយម្ដាយរបស់ខ្លួនដែលត្រូវខ្សែភ្លើងឆក់ឱ្យរួចរស់ជីវិតឡើងវិញដោយការ “ធាក់” ព្រោះធ្លាប់ឃើញនៅក្នុង ខ្សែភាពយន្តឯកសារនៅក្នុងទូរទស្សន៍។ អានចប់ហើយ ស្មេរមានអារម្មណ៍រំភើបចិត្ត និងនឹកស្ងើចសរសើរក្នុងចិត្តដែលក្មេងប្រុសតូចមួយមានចំណេះដឹងក្នុងរឿងការជួយសង្គ្រោះមនុស្សពីការឆក់ខ្សែភ្លើងបាន តែការធាក់ខ្លាំងៗនេះជាវិធីដែលត្រឹមត្រូវឬទេ? ឬមានវិធីផ្សេងទៀតដែលអាចជួយសង្គ្រោះអ្នកដែលត្រូវខ្សែភ្លើងឆក់បានដូចគ្នាដែរ? ដូច្នេះសូមនាំគ្នាតាមដានជាបន្ត។

វិធីជួយសង្គ្រោះពីការ “ឆក់ខ្សែភ្លើង”

ក្នុងករណីខ្លួនឯងត្រូវខ្សែភ្លើងឆក់
1. តាំងស្មារតី ប្រមូលកម្លាំងទាំងអស់ដែលមាន កញ្ឆក់ដៃ ជើង ឬអវយវៈណាដែលប៉ះនឹងវត្ថុដែលធ្វើឱ្យកើតការឆក់ចរន្តអគ្គិសនីចេញពីត្រង់នោះឱ្យបានខ្លាំងបំផុត តែបើមិនបានសម្រេចចូរស្រែកហៅឱ្យគេជួយយ៉ាខ្លាំងៗផុតសំឡេង។

2. កុំឱ្យអ្នកដែលចូលមកជួយប៉ះនឹងរាងកាយរបស់អ្នកដោយផ្ទាល់ជាដាច់ខាត ដូចជាចាប់ដៃ ឬចាប់ជើង មិនបានជាដាច់ខាត។

3. បើសិនជាសម្លឹងរកមើលវត្ថុអ្វីដែលមិនចម្លងចរន្តអគ្គិសនីបាន ដូចជា ឈើ ក្រណាត់ ជ័រ-ប្លាស្ទិក ចូរស្រែកប្រាប់អ្នកដទៃឱ្យយកវត្ថុនោះមកជួយកៀរ ឆ្កឹះ ឬកៀសខ្សែភ្លើងដែលចម្លងចរន្តអគ្គិសនីនោះចេញ ឬឱ្យគេយកក្រណាត់មកទាក់ចង្កេះអ្នក រួចទាញកញ្ឆក់ចេញពីត្រង់នោះមកឱ្យបាន។

4. បើមានអ្នកមកជួយហើយ តែមិនអាចធ្វើអ្វីបាន ចូរប្រាប់ឱ្យគេរកមើលបារ៉ែតភ្លើង ឬឌីហ្សង់ទ័រមេភ្លើងដើម្បីកាច់បិទចរន្តអគ្គិសនី។

ក្នុងករណីចូលទៅជួយអ្នកដែលត្រូវចរន្តអគ្គិសនីឆក់
1. កុំរហន់ចូលទៅជួយដោយការចាប់ប៉ះផ្នែកណាមួយនៃរាងកាយរបស់ជនរងគ្រោះ ដោយត្រង់ ចូររក្សាចម្ងាយឱ្យឆ្ងាយពីជនរងគ្រោះបន្តិចសង្កេតមើលឱ្យច្បាស់ថាដើមហេតុរបស់ចរន្តអគ្គិសនីដែលបណ្ដាលឱ្យឆក់ជនរងគ្រោះនោះចេញមកពីត្រង់ណា ហើយនៅឱ្យឆ្ងាយពីត្រង់នោះសិន។

2. បើសិននៅក្នុងផ្ទះ មិនបានពាក់ស្បែកជើង ចូររត់ទៅរកស្បែកជើងមកពាក់ជាមុនសិន កុំឱ្យជើងប៉ះនឹងដី ឬកម្រាលឥដ្ឋ។ បើគ្មានស្បែកជើង ចូរឈរនៅលើផ្ទាំងក្រណាត់ក្រាស់ៗ គំនរសៀវភៅ ឡាំងឈើ ឬឡាំងក្រដាសក៏បាន។

3. សម្លឹងរកមើលវត្ថុដែលមិនចម្លងចរន្តអគ្គិសនី ដូចជា ឈើ ក្រណាត់ ក្រដាសរឹង ខ្សែទុយោ ស្រោមដៃក្រាស់ៗ ឬខ្សែផ្សេងៗ (គ្រប់យ៉ាងត្រូវស្ងួតមិនសើមទឹក) អាចប្រើវត្ថុទាំងនោះកៀស ឬឆ្កឹះអ្វីដែលធ្វើឱ្យជនរងគ្រោះត្រូវអគ្គិសនីឆក់ចេញពីរាងកាយជនរងគ្រោះ (ដូចជាកៀសខ្សែភ្លើងចេញ ឆ្កឹះដៃ ឬជើងជនរងគ្រោះចេញពីបរិវេណដែលមានអគ្គិសនីឆក់នោះ ឬបើជនរងគ្រោះត្រូវចរន្តអគ្គិសនីឆក់ទូទាំងរាងកាយ ចូរប្រើក្រណាត់ស្ងួតរុំដៃខ្លួនឯងឱ្យក្រាស់រួចហើយច្រាន ឬចាប់ទាញកញ្ឆក់ខ្លួនជនរងគ្រោះចេញពីត្រង់នោះឱ្យខ្លាំង និងឆាប់រហ័ស (អ្នកជួយត្រូវពាក់ស្បែកជើងផងណា៎)។

4. បើសិនជាជ្រើសរើសជួយជនរងគ្រោះដោយការធាក់ ក៏អាចធ្វើបានដែរ តែបរិវេណជុំវិញជនរងគ្រោះនោះត្រូវតែជាទីធ្លាស្រឡះ។ ចូរឱ្យជនរងគ្រោះទម្លាក់ខ្លួនដេកជាមុនសិន ដើម្បីកុំឱ្យកើតមានគ្រោះថ្នាក់ផ្សេងទៀត។ មុននឹងធាក់ ត្រូវស្រែកប្រាប់ជនរងគ្រោះជាមុនសិនរួចសឹមធាក់ម្ដុំត្រគាកយ៉ាងរហ័ស និងខ្លាំងល្មមតែឱ្យរបូតផុតចេញពីទីនោះតែម្ដងក្នុងមួយជើង។ តែបើសិនជាអាចចៀសវាងបាន ចូរប្រើវិធីក្នុងចំណុចទី3 វិញប្រសើជាង ព្រោះវិធីនេះអាចធ្វើឱ្យជនរងគ្រោះទទួលរងរបួសថែមទៀតបាន។

5. ក្នុងករណីដែលប្រទះឃើញអ្នកត្រូវចរន្តអគ្គិសនីឆក់ក្នុងបរិវេណដែលប្រថុយប្រថានខ្លាំងពេក ដូចជាក្នុងបន្ទប់ទឹកដែលកម្រាលឥដ្ឋសើម ចូរត់ទៅកន្លែងប្រអប់ចែកចាយភ្លើងខាងក្នុងផ្ទះ (បារ៉ែត ឬឌីហ្សង់ទ័រ) ហើយកាច់កុងតាក់បិទភ្លាម រួចសាកល្បងបើកបិទអំពូលភ្លើងសាកមើល ដើម្បីឱ្យប្រាកដក្នុងចិត្តថា ចរន្តអគ្គិសនីត្រូវបានបិទទាំងស្រុងឬនៅ? រួចសឹមរត់ទៅជួយជនរងគ្រោះ។

6. នៅពេលជួយជនរងគ្រោះបានហើយ គួរពិនិត្យមើលថា តើគេនៅមានស្មារតីច្រើន ឬតិចប៉ុនណា។ បើនៅមានសតិស្មារតីគ្រប់គ្រាន់ចូរឱ្យគេគេងសម្រាក រួចពិនិត្យមើលតាមរាងកាយរបស់គេដោយត្រួសៗថា តើមានរងរបួសត្រង់ណាធ្ងន់ធ្ងរឬទេ? ភាគច្រើន អាចមានជ្រុះសក់ មានស្នាមក្រហមជាំនៅលើដៃជើង ដងខ្លួន ខ្នង និងបើមានពាក់ខ្សែកដែលធ្វើពីប្រាក់ ស្ពាន់ ឬមាស អាចមានស្នាមឆេះនៅលើស្បែកត្រង់កន្លែងនោះ និងនៅលើបាតជើងអាចមានស្នាមខ្លោចដូចឆេះភ្លើងដូច្នោះដែរ។

7. បើមានរបួស តែមិនសូវជាធ្ងន់ធ្ងរពេកនោះចូរប្រញាប់បញ្ជូនទៅមន្ទីរពេទ្យ តែបើជនរងគ្រោះបាត់បង់ស្មារតី ចូរប្រញាប់ទូរស័ព្ទហៅរថយន្តសង្គ្រោះ (ឡានពេទ្យ) ហើយក្នុងអំឡុងពេលនោះ បើជនរងគ្រោះបាត់ដង្ហើម (លែងដកដង្ហើម) ឬបេះដូងលែងដំណើរការ ចូរប្រញាប់ជួយសង្គ្រោះដោយការផ្លុំខ្យល់ចូលមាត់ដើម្បីសង្គ្រោះប្រព័ន្ធដកដង្ហើម ឬសង្កត់ដើមទ្រូងធ្វើចលនាបេះដូងជាប្រញាប់។ អ្វីដែលត្រូវមានឱ្យច្រើនបំផុតនៅពេលនោះគឺ ស្មារតី និងចំណេះដឹងគ្រឹះក្នុងរឿងចរន្តអគ្គិសនី ដើម្បីជួយសង្គ្រោះក្នុងករណីអាសន្នបន្ទាន់បែបនេះ៕

April 10, 2018

ជឿទៅ! នៅមានរឿងរបស់ “ចេកណាំវ៉ា” ជាច្រើនទៀតដែលអ្នកមិនធ្លាប់ដឹង

ចេកណាំវ៉ា ដំណាំហូបផ្លែពីបុរាណរបស់ខ្មែរយើងដែលចេញផ្លែបានគ្រប់រដូវ ចាស់ៗបុរាណតែងយកមកធ្វើជាអាហារបន្ថែមរួមជាមួយទឹកដោះម្ដាយសម្រាប់ទារក ឯមនុស្សចាស់វិញយកផ្លែចេកទុំជោរមកពិសា ដើម្បីសុខភាព តែមិត្តអ្នកអានដឹងឬទេថា ផ្លែឈើពីបុរាណមួយនេះមានបង្កប់ទៅដោយគុណតម្លៃដែលហួសពីយើងនឹកស្មានទៅទៀត។

1. ផ្លែចេកណាំវ៉ាញ៉ាំពេលនៅខ្ចីព្យាបាលរោគក្រពះ ព្រោះនៅក្នុងផ្លែចេកខ្ចីមានសារធាតុផ្ដល់នូវភាពចត់ដែលហៅថា “ថែមនីន” ជាជាតិអាស៊ីតស្រាលៗ មានឫទ្ធិក្នុងការស្រោបសាច់ក្រពះ និងពោះវៀន តែផ្លែចេកខ្ចីមិនអាចយកមកញ៉ាំឆៅបានភ្លាមៗនោះទេ ត្រូវយកមកចិតជាបន្ទះ ចំហុយស្ងួត និងយកមកកិនលម្អិតជាម្សៅជាមុនសិន។

2. ផ្លែចេកណាំវ៉ាញ៉ាំពេលស្រគាល ហៅថា ញ៉ាំពេលស្ទើរខ្ចីស្ទើរទុំ។ សម្បកមានពណ៌បៃតងលាយលឿង អាចយកមកញ៉ាំបានភ្លាមៗ ដោយក្នុងផ្លែចេកណាំវ៉ាស្រគាលនេះនឹងមានប៉ូតាស្យូមខ្ពស់ មានគុណសម្បត្តិជួយបំពេញជាតិប៉ូតាស្យូមដល់រាងកាយ និងព្យាបាលរោគរាករូសបានយ៉ាងមានប្រសិទ្ធភាព បន្ថែមជាតិកាកសរសៃជួយក្នុងការបន្ទោបង់ និងជួយស្រោបសាច់ក្រពះទៀតផង។

3. ផ្លែចេកណាំវ៉ាញ៉ាំពេលទុំ ជាផ្លែចេកដែលមានពណ៌លឿងស្រស់គួរឱ្យចង់ញ៉ាំ មានសារធាតុ ភែតទីន ដែលបន្ថែមកាកសរសៃ ឬបៃអូទិកពីធម្មជាតិ ធ្វើឱ្យអាចបន្ទោបង់បានស្រួលរាប់បានថាជាថ្នាំជួយក្នុងការបត់ជើងធំដ៏មានប្រសិទ្ធភាព។ ស័ក្តិសមនឹងអ្នកដែលកើតរោគទល់លាមក តែត្រូវទំពាឱ្យល្អិត ព្រោះនឹងមិនធ្វើឱ្យចុកឆ្អល់ពោះ។

4. ផ្លែចេកណាំវ៉ាញ៉ាំពេលទុំជោរ ជាផ្លែចេកដែលមានពណ៌លឿងចាស់ស្រអាប់ៗ សាច់ចេករាងដូចជាជ្រាយៗ ធ្វើឱ្យមនុស្សភាគច្រើនមិនសូវជាចង់ញ៉ាំប៉ុន្មានទេ តែផ្ទុយទៅវិញ ផ្លែចេកណាំវ៉ាទុំជោរនេះបែរជាមានប្រយោជន៍ច្រើនខ្លាំងណាស់ ទាំងជួយបង្កើនភាពប្រឆាំងជំងឺដល់រាងកាយ ធ្វើឱ្យមានបរិមាណគ្រាប់ឈាមសកើនឡើង ដោយសារតែសារធាតុ “Sermerik Fighter” ដែលជួយការពារពីកោសិកាដែលខុសប្រក្រតី ជាពិសេសផ្លែចេកដែលមានស្នាមអុចៗខ្មៅរឹតតែច្រើនរឹតតែល្អ។ សារធាតុអាហារនៅក្នុងផ្លែចេកណាំវ៉ា ប្រកបដោយប្រូតេអុីន កាបូហាយដ្រេត មានជាតិស្ករធម្មជាតិ3 ប្រភេទ គឺ ស៊ូខ្យូស ហ្វ្រុ៊ងថូស និងគ្លុយខូស ដូច្នេះរាងកាយយើងនឹងបានទទួលកម្លាំងថាមពល និងអាចនាំយកទៅប្រើបានភ្លាមៗ មានកាកសរសៃ មានវីតាមីន B1 B2 B3 B6 ម៉ាញេស្យូម និងប៉ូតាស្យូម។

គុណប្រយោជន៍របស់ផ្លែចេកណាំវ៉ា
ញ៉ាំផ្លែចេកណាំវ៉ាក្រោយភ្ញាក់ពីដំណេកភ្លាម រួចសឹមដុសសម្អាតធ្មេញ អាចកាត់បន្ថយក្លិនមាត់បាន ធ្វើបែបនេះបាន1សប្ដាហ៍ នឹងជួយសម្រួលកម្រិតជាតិស្ករក្នុងឈាម ជួយបន្ថយភាពចង់ញ៉ាំអាហារនេះនោះឥតឈប់បាន។ ញ៉ាំចេកហើយមានសេចក្ដីសុខខ្លាំងណាស់ ព្រោះបានជាតិស្ករហ្វ្រ៊ុតថូស ជាជាតិស្ករដែលមិនមែនជាអុីនស៊ូលីន ញ៉ាំមិនដល់5នាទីផងនឹងបានដឹងអំពីសេចក្ដីសុខ ព្រោះជាតិស្ករនឹងឡើងទៅដល់ខួរក្បាល ហើយរាងកាយអាចយកទៅប្រើការបានភ្លាមៗតែម្ដង។ កាត់បន្ថយអាការមួម៉ៅនៅពេលព្រឹក និងជួយបន្ថយអាការមួម៉ៅរបស់ស្ត្រីក្នុងអំឡុងពេលមានវដ្តរដូវ។ ក្រៅពីនោះ នៅជួយព្យាបាលរោគបាក់ទឹកចិត្តស្រងេះស្រងោច និងរោគតានតឹងផ្លូវចិត្តបានទៀតផង ព្រោះផ្លែចេកមានប្រូតេអុីនមួយប្រភេទដែលហៅថា “ធ្រីបតូហ្វេនត៍” ដែលជួយក្នុងការផលិតសារធាតុ សូឡាថូនីន ឬអ័រម៉ូននៃសេចក្ដីសុខដែលជួយសម្រាលអារម្មណ៍បានល្អ មានកាកសរសៃអាហារជួយឱ្យប្រព័ន្ធបន្ទោបង់ដំណើរការប្រក្រតី មានសារធាតុដែកជួយក្នុងការផលិតអុីម៉ូហ្គ្លោប៊ីននៅក្នុងឈាម ដើម្បីព្យាបាលសភាវលោហិតស្លេក ឬអ្នកដែលស្ថិតក្នុងសភាវខ្សោយខ្វះកម្លាំង។

សម្បកផ្លែចេកណាំវ៉ានឹងជួយសម្រាលអាការរមាស់ដែលបណ្ដាលមកពីសត្វល្អិតទិចខាំ កន្ទួលរមាស់បណ្ដាលមកពីសត្វមូសខាំ ដោយសារតែមានឫទ្ធិក្នុងការតតាំងនឹងមេរោគផ្សិត និងប្រឆាំងមេរោគបាក់តេរីដែលធ្វើឱ្យកើតជាខ្ទុះ ដោយគ្រាន់តែយកសម្បកចេកណាំវ៉ាទុំផ្នែកខាងក្នុងមកដុសលាបនៅត្រង់កន្លែងដែលរមាស់តែប៉ុណ្ណោះ។

ឃើញហើយមែនទេថា ចេកណាំវ៉ា ផ្លែឈើក្នុងស្រុកដែលងាយស្រួលរកបាននេះមានគុណតម្លៃមហាសាលចំពោះរាងកាយខ្លាំងណាស់ដូច្នេះចូរនាំគ្នាងាកមកញ៉ាំចេកណាំវ៉ាដើម្បីសុខភាពល្អទាំងអស់គ្នាវិញប្រសើរជាង៕

April 9, 2018

ជឿទៅ… ក្នុងឱកាសបុណ្យចូលឆ្នាំខ្មែរថ្មីនេះ បទចម្រៀង “មាន់ស្រែ” របស់ រ៉ាប៊ី ល្បីកប់

ទើបតែបានបញ្ចេញផ្សាយនៅលើបណ្តាញ Youtube មិនទាន់បានប៉ុន្មានផងនោះ បទចម្រៀងចង្វាក់ញាក់កន្ត្រាក់អារម្មណ៍ និងត្រៀមចេញ ដើម្បីអបអរសាទរនៅក្នុងឱកាសពិធីបុណ្យចូលឆ្នាំថ្មីប្រពៃណីជាតិខ្មែរខាងមុខនេះរបស់កំពូលតារាចម្រៀងស្រីវ័យក្មេងសាច់ម៉ដ្ឋស កញ្ញា រ៉ាប៊ី ត្រូវបានសាទរយ៉ាងកក់ក្ដៅពីសំណាក់អ្នកគាំទ្រ រហូតធ្លាយចេញទៅដល់បណ្តាប្រទេសមួយចំនួនទៀត ចម្លងយកទៅផ្សព្វផ្សាយបន្តគួរជាទីមោទន ក្នុងនោះសម្រាប់អ្នករស់នៅប្រទេសថៃគាំទ្រច្រើនជាងគេ។

ត្រឹមរយៈពេលមិនដល់2សប្ដាហ៍ផង សម្រាប់ការបង្ហោះបទចម្រៀង Original Song លក្ខណៈសំឡេង Audio “មាន់ស្រែ” របស់ស្រីស្រស់ រ៉ាប៊ីនៅលើបណ្តាញសង្គម YouTube មានអ្នកគាំទ្រចុចចូលស្តាប់យ៉ាងច្រើនកុះករស្ទើរមិនគួរឱ្យជឿរហូតដល់ជាង1លានកន្លះនាក់រួចបាត់ទៅហើយ។ ជាមួយនឹងការចុចចូលស្តាប់បទចម្រៀងថ្មីចង្វាក់ញាក់រាំបែកស្លុយ បែបសប្បាយៗប្រចាំឆ្នាំ2018របស់កំពូលតារាចម្រៀងស្រីវ័យក្មេងប្រចាំនៅក្នុងផលិតថោន ដែលធ្លាប់រងពាក្យចចាមអារ៉ាមថាមានសម្ពន្ធស្នេហាជាមួយតារាចម្រៀងប្រុស លោក សុគន្ធ ថេរ៉ាយុ ម្នាក់នេះក៏មានមនុស្សជាច្រើននាក់នាំគ្នាសរសេរ Comment ជាហូរហែថា បានត្រៀមខ្លួនរួចជាស្រេចក្នុងការចូលរាំលេងកម្សាន្តនៅក្នុងឱកាសចូលឆ្នាំថ្មីខាងមុខនេះ។ ជាថ្មីម្ដងទៀត កាលពីសប្ដាហ៍កន្លងទៅនេះ ជាការឆ្លើយតបទៅនឹងការចង់បាន និងក្ដីទន្ទឹងរបស់ប្រិយមិត្តស្នេហាវិស័យចម្រៀងក៏ដូចជាអ្នកគាំទ្ររបស់ខ្លួននោះ MV របស់បទចម្រៀង “មាន់ស្រែ” ដែលកំពុងទទួលបានការគាំទ្រខាងលើ រឹតតែធ្វើឱ្យបណ្តាញសង្គម YouTube មានភាពកក្រើករហូតគាំងម្ដងៗ ដោយសារតែមានអ្នកចូលមើលសកម្មភាព និងកាយវិការរាំដ៏រស់រវើករបស់កញ្ញា រ៉ាប៊ី រួមជាមួយក្រុមរាំប្រុសស្រីដ៏ស្រស់ស្អាតជាច្រើននាក់នៅតាមទីតាំងផ្សេងៗគ្នា ស្អាតៗ ប្លែកភ្នែកគួរឱ្យទាក់ទាញជាទីបំផុត។

ជាការសម្ដែងពីកិច្ចដឹងគុណចំពោះការគាំទ្រពីសំណាក់មហាជនខាងលើនេះ កញ្ញា រ៉ាប៊ី ក៏បានបង្ហាញពីក្ដីរំភើប និងរីករាយជាទីបំផុត រួមជាមួយនឹងការសន្យាព្យាយាមបង្កើតបទចម្រៀងថ្មីៗ ពីរោះៗ ប្រកបដោយភាពទាក់ទាញ ដើម្បីធ្វើយ៉ាងណាបម្រើអារម្មណ៍អ្នកគាំទ្រទាំងអស់ឱ្យមានក្ដីរីករាយជាមួយបទចម្រៀងរបស់ខ្លួនរហូតទៅ។

គួរបញ្ជាក់ផងដែរថា នៅក្នុងឱកាសពិធីបុណ្យចូលឆ្នាំថ្មីប្រពៃណីជាតិខ្មែរខាងមុខនេះ ក្រៅពីបទចម្រៀងដែលកំពុងទទួលបានការគាំទ្រ “មាន់ស្រែ” កញ្ញា រ៉ាប៊ី ក៏មានចម្រៀងពីរោះៗជាច្រើនបទទៀត ដែលក្នុងនោះមានបទខ្លះច្រៀងតែម្នាក់ឯង និងមួយចំនួនទៀតច្រៀងឆ្លើយឆ្លងគ្នា ជាក់ស្ដែងដូចជាបទ “ស្នេហ៍អើយស្នេហ៍” និងបទ “អ្នកបម្រើ007” ច្រៀងឆ្លើយឆ្លងជាមួយនាយ ពាក់មី និងបទ “ខ្ញុំមានបង្ខំឱ្យរាំណា” និងបទ “និយាយពីអី” ច្រៀងម្នាក់ឯង(មានអ្នករ៉េប) ជាដើម៕

សូមរីករាយទស្សនាវីដេអូខាងក្រោម៖

April 9, 2018

សញ្ញាបញ្ជាក់ពីអាការ កើតជំងឺខ្វះវីតាមីន E

1. អាការជ្រុះសក់
បើសិនជាអ្នកសម្គាល់ឃើញថា សក់របស់អ្នកជ្រុះច្រើន ឬសក់ទៅជាស្ងួតខ្លាំង មានន័យថា អ្នកមិនមានវីតាមីន E គ្រប់គ្រាន់ក្នុងរាងកាយឡើយ។ វីតាមីន E នឹងជួយសក់កាន់តែរឹងមាំ តាំងពីគល់រហូតដល់ចុង។ អាការកង្វះវីតាមីន E គឺជាការជ្រុះសក់លឿន ឬសក់ស្ងួតខ្លាំង។

2. កោសិកាគ្រាប់ឈាមក្រហមចុះទាប
កោសិកាគ្រាប់ឈាមក្រហម មានសារសំខាន់ណាស់សម្រាប់រាងកាយ ដូច្នេះ នៅពេលវាមានការចុះខ្សោយ ឬថយចុះចំនួននោះ គឺអាចដោយសារតែកង្វះវីតាមីន E នេះហើយ។ វីតាមីន E ផ្តល់ជាប្រូតេអីុនក្នុងកោសិកា ដែលអាចដឹកនាំអុកស៊ីហ៊ែ្សន តាយរយៈអេម៉ូគ្លូប៊ីនបាន។

3. ខ្សោយសាច់ដុំ
ទោះបីជាការខ្សោយសាច់ដុំ អាចជាសញ្ញាមួយរបស់ជំងឺអ្វីផ្សេងក៏ដោយ ក៏វាមិនអាចទាត់ចោល ឬមិនទាក់ទងនឹងជំងឺកង្វះវីតាមីន E ឡើយជាពិសេស អាការនេះកើតមានចំពោះក្មេងៗជំទង់ច្រើនតែម្តង។

4. កើតជំងឺភ្នែកឡើងបាយ
បើសិនជាអ្នកសម្គាល់ឃើញថា ភ្នែករបស់អ្នកប្រែទៅជាល្អក់ មានន័យថា អ្នកខ្វះវីតាមីន E ហើយ។ ជំងឺនេះអាចនឹងកើតឡើងលើភ្នែកទាំងសងខាងតែម្តង។ ដូច្នេះ អ្នកគប្បីគួរទទួលទានវីតាមីន E ឱ្យបានច្រើន តាមតែអាចធ្វើទៅបាន ឬទទួលទានថ្នាំតាមវេជ្ជបញ្ជារបស់គ្រូពេទ្យ។

5. ឧស្សាហ៍រមួលក្រពើ
អ្នកដែលខ្វះវីតាមីន E ក្នុងខ្លួន ក៏អាចកើតមានបញ្ហារមួលក្រពើបានដែរ ខណៈដែលពួកគេប្រើសាច់ដុំកំភួនជើងខ្លាំង ហើយវានឹងកើតឡើងជាញឹកញាប់។ បើសិនជាអ្នកសម្គាល់ឃើញបែបនេះច្រើនដង មានន័យថា រាងកាយរបស់អ្នកគឺត្រូវការវីតាមីន E បន្ថែមហើយ។

6. ស្បែកឆាប់ក្លាយ ឬមានរបួសក្រជាសះ
អ្នកអាចប្រាកដថា រាងកាយមានវីតាមីន Eគ្រប់គ្រាន់ ប្រសិនជារបួសអ្នកឆាប់ជាដូចធម្មតា។ តែបើពេលដែលកើតមានរបួស ហើយត្រូវការពេលយូរជាងធម្មតាក្នុងការជាសះវិញនោះ គឺជាសញ្ញាដែលរាងកាយប្រាប់ថា ខ្វះវីតាមីន E ហើយ។

7. ចុះខ្សោយសមត្ថភាពផ្លូវភេទ
អាការមួយផ្សេងទៀតនៃកង្វះវីតាមីន E គឺការថយចុះចំណង់ផ្លូវភេទ លើមនុស្សពេញវ័យ។ នៅពេលអ្នកយល់ថា មិនសូវមានចំណង់ផ្លូវភេទនោះ ចូរគិតដល់កង្វះវីតាមីន E ក្នុងខ្លួនរបស់អ្នកផង៕

April 9, 2018

G Mekong សណ្ឋាគារ ដ៏ប្រណីត បង្ហាញពីបែបបទរស់នៅ នៃប្រជាជនខ្មែរតាមដងទន្លេមេគង្គ

វិស័យសណ្ឋាគារនៅរាជធានីភ្នំពេញនាពេលបច្ចុប្បន្ននេះ គឺមានភាពរីកចម្រើន និងរីកដុះដាលដូចផ្សិតដោយសារតែតម្រូវការការស្នាក់នៅមានការកើនឡើង ហើយវិស័យទេសចរណ៍របស់ប្រទេសកម្ពុជាក៏មានការរីកចម្រើនយ៉ាងខ្លាំងផងដែរ។ ដោយមើលឃើញពីភាពរីកចម្រើននៃវិស័យទេសចរណ៍ និងវិស័យបដិសណ្ឋារកិច្ចនៅកម្ពុជា សណ្ឋាគារ G Mekong ដែលជាបុត្រសម្ពន្ធនៃ G Group Investmentត្រូវបានបង្កើតឡើងនៅថ្ងៃទី5 ខែមករា ឆ្នាំ2017 ដោយផ្តល់នូវសេវាកម្មដូចជា កន្លែងស្នាក់នៅ និងភោជនីយដ្ឋានជាដើម។

សណ្ឋាគារ G Mekong កំពុងបង្ហាញដល់ពិភពលោកទាំងមូលនូវអត្តសញ្ញាណខ្មែរ វប្បធម៌ និងអរិយធម៌ដ៏រុងរឿងរបស់ខ្មែរយើងដោយគ្រប់ការរចនា និងការតុបតែងលម្អនៅក្នុងសណ្ឋាគារនេះ គឺសុទ្ធតែជារបស់ខ្មែរ ច្នៃឡើងដោយដៃដូចជា ឧបករណ៍នេសាទបែបប្រពៃណីខ្មែរ ទូកចែវ រូបគំនូរ និងរូបសំណាក់របស់ខ្មែរជាច្រើនទៀត។ អ្វីដែលកាន់តែពិសេសទៅទៀតនោះនៅក្នុងសណ្ឋាគារ G Mekong ក៏មានសាលតាំងពិព័រណ៌រូបគំនូររបស់ខ្មែរ ព្រមទាំងរូបចម្លាក់ដ៏ប្រណីត ដែលជាស្នាដៃរបស់កូនខ្មែរពិតៗ ដើម្បីបង្ហាញដល់ភ្ញៀវទេសចរទាំងអស់ដែលបានមកស្នាក់នៅក្នុងសណ្ឋាគារឱ្យបានស្គាល់និងបានឃើញពីវប្បធម៌ និងអារិយធម៌របស់ខ្មែរយើងដោយផ្ទាល់ភ្នែក។ សណ្ឋាគារ G Mekong គឺពិតជាស្រស់ស្អាត និងប្លែកទាក់ភ្នែកណាស់ហើយបើពិនិត្យមើលពីវិសាលភាពនៃសណ្ឋាគារវិញគឺនឹកស្មានមិនដល់នោះទេ ពីព្រោះនៅខាងក្រៅមើលទៅដូចជាមានលក្ខណៈតូច តែពេលចូលមកដល់ខាងក្នុងគឺធំទូលាយខ្លាំងណាស់ជាមួយនឹងវិសាលភាពនៃអគារចំនួន2បញ្ចូលគ្នា និងមានរហូតដល់9ជាន់ ព្រមទាំងមានបន្ទប់រហូតដល់91បន្ទប់ ដែលមានជម្រើស5ប្រភេទបន្ទប់ផ្សេងៗគ្នាជូនដល់ភ្ញៀវទេសចរ និងអ្នកជំនួញដែលមកសា្នក់នៅក្នុងសណ្ឋាគារលំដាប់ផ្កាយ4នេះ។

ងាកមកចាប់អារម្មណ៍ផ្នែកភោជនីយដ្ឋានដែលស្ថិតនៅក្នុងសណ្ឋាគារវិញម្តង ភោជនីយដ្ឋាន G Star ដែលជាសាខាទី2បន្ទាប់ពីសាខាទី1ដែលស្ថិតនៅក្នុងបរិវេណកោះពេជ្រ គឺបើកបម្រើជូនអាហារទាំង3ពេល ដោយអាហារពេលព្រឹកចាប់បើកពីម៉ោង6ព្រឹក ដល់ម៉ោង10ព្រឹកអាហារពេលថ្ងៃត្រង់ចាប់បើកពីម៉ោង11ព្រឹកដល់ម៉ោង2រសៀល និងអាហារពេលល្ងាចពីម៉ោង6ល្ងាច ដល់ម៉ោង10យប់ ដែលបម្រើជូនអាហារបែបខ្មែរ បែបអឺរ៉ុប និងបែបចិន។ អាហារដែលទទួលបានការពេញនិយមជាងគេប្រចាំភោជនីយដ្ឋាន G Star មានដូចជា ឡុកឡាក់សាច់គោ អាម៉ុកត្រីខ្ចប់ស្លឹកចេក សម្លការីខៀវ សម្លការីក្រហមបែបខ្មែរ ស្តេកសាច់គោ ស្តេកសាច់ចៀម ស្តេកសាច់ជ្រូក និងស្តេកសាច់ត្រីសាល់ម៉ុន និងមីឆាឆាវហ្វាន់សាច់គោ។ ក្រៅពីអាហារនៅភោជនីយដ្ឋាន G Star ក៏មានជាប្រភេទភេសជ្ជៈមានជាតិអាល់កុល ហើយនឹងភេសជ្ជៈមិនមានជាតិអាល់កុលជាច្រើនជម្រើសទៀត ដែលភ្ញៀវទាំងអស់អាចជ្រើសរើសទទួលទានផ្ទាល់នៅក្នុងភោជនីយដ្ឋានដែលស្ថិតនៅជាន់ផ្ទាល់ដីនៃសណ្ឋាគារ ឬអាចឡើងទៅជាន់ទី7 ទទួលទានបណ្តើរហែលទឹកលេងបណ្តើរនៅឯ Pool Bar ក៏បាន។ ភេសជ្ជៈដេលទទួលបានការពេញនិយមជាង
គេនៅភោជនីយដ្ឋាន G Star មានដូចជា ស្រាក្រឡុកដែលជារូបមន្តក្រឡុកយ៉ាងពិសេសប្រចាំភោជនីយដ្ឋានគឺ ស្រាក្រឡុក G Star Blue Sky និងស្រាក្រឡុក Passion Corona៕

April 9, 2018

កាសែតឡារ៉ែន ពាណិជ្ជ លេខ 122

[easy_media_download url=”https://www.lareine.com.kh/wp-content/uploads/2018/04/LRPN_122-Final-For-Web.pdf” force_dl=”1″]

April 7, 2018

Author: ធឿន មករា