មិនថានរណាៗក៏ចង់បានកូនដែលឆ្លាតវាងវៃ រៀនពូកែ ធំឡើងក្លាយជាមនុស្សល្អ និងទទួលបានជោគជ័យក្នុងតួនាទីការងារដែរ តែរឿងទាំងអស់នេះក៏អាចនឹងអាស្រ័យលើការចិញ្ចឹមមើលថែយ៉ាងសំខាន់ដែរ។ យើងនាំគ្នាមកមើលថា តើគន្លឹះល្អៗ 4យ៉ាងក្នុងការចិញ្ចឹមកូនឱ្យក្លាយជាមនុស្សល្អឥតខ្ចោះមានអ្វីខ្លះ?
1. ធ្វើកិច្ចការផ្ទះ
លោកឪពុកអ្នកម្ដាយជាច្រើនៗតែចិញ្ចឹមកូនបែបបណ្ដោយតាមចិត្តកូនច្រើនជ្រុលពេក ដែលអ្នកគ្រូ ឆវី ក៏យល់ចិត្តដែរថា ព្រោះតែស្រឡាញ់ មិនចង់ឱ្យកូននឿយហត់ ចង់ឱ្យកូនយកចិត្តទុកដាក់តែលើការរៀនសូត្រ ទើបបណ្ដាឪពុកម្ដាយមាមីងតាយាយបណ្ដោយតាមចិត្តកូនចៅតាំងពីតូច មិនដែលឱ្យធ្វើការងារផ្ទះអ្វីឡើយ មានអ្នកធ្វើឱ្យគ្រប់យ៉ាង ដោយមិនបានដឹងឡើយថា រឿងទាំងអស់នោះនឹងធ្វើឱ្យក្មេងមានទម្លាប់និស្ស័យមិនល្អនៅពេលធំឡើងក្នុងវ័យត្រូវចូលសង្គមនឹងលំបាក។ការហាត់ឱ្យកូនធ្វើការងារផ្ទះ នឹងជួយឱ្យក្មេងមានភាពទទួលខុសត្រូវ ស្គាល់តួនាទីរបស់ខ្លួនឯងតាំងពីនៅតូច នៅពេលធំឡើងក៏នឹងអាចធ្វើការ-ងាររួមជាមួយអ្នកដទៃបានយ៉ាងគ្មានបញ្ហា។
2. បណ្ដោយតាមចិត្តបាន តែត្រូវមានហេតុផល
លោកឪពុកអ្នកម្ដាយជាច្រើននាក់ (រួមទាំងពូមីងអ៊ំតាយាយផងដែរ) នៅពេលមើលឃើញថា កូនចង់បានអ្វី ឬដឹងថាចៅត្រូវការអ្វីក៏ច្រើនតែទិញមកឱ្យបែបគ្មានហេតុផលអ្វីទាំងអស់មិនថារបស់នោះមានតម្លៃថ្លៃលើសភាពចាំបាច់ឬអត់ក៏ដោយ សុំត្រឹមតែអាល្អិតចង់បាន មិនយូរប៉ុន្មានវត្ថុនោះក៏នឹងត្រូវទិញមកឱ្យដល់ផ្ទះមិនខាន។ ការបណ្ដោយតាមចិត្តក្មេងខ្លាំងជ្រុលពេក អាចហុចផលអាក្រក់ដល់ក្មេងនាពេលអនាគតបាន ធ្វើឱ្យក្មេងមិនស្គាល់ការទប់សង្កត់ចិត្តមិនចេះអត់ទ្រាំ និងមិនស្គាល់ពាក្យថាគ្រប់គ្រាន់តែក៏មិនបានមានន័យថា នឹងហាមមិនឱ្យទិញអ្វីឱ្យកូននោះទេ គ្រាន់តែមុននឹងទិញ គួរឱ្យកូនទៅគិតជាមុនសិនថា ហេតុផលដែលត្រូវទិញនោះគឺអ្វី និងអាចនឹងសាកល្បងឱ្យកូនទៅស្វែងរកព័ត៌មានប្រៀបធៀបរវាងវត្ថុដែលចង់បានក្នុងម៉ាកយីហោនីមួយៗនោះវាខុសប្លែកគ្នាយ៉ាងណា? តម្លៃមួយណាថ្លៃជាង? ព្រោះអ្វី? រួចហើយសឹមមកប្រាប់ឪពុកម្ដាយ និងចាំទិញឱ្យកូន។ ដែលសំខាន់នោះគឺ វាថែមទាំងមានផលល្អចំពោះឪពុកម្ដាយទៀតផង ព្រោះពេលខ្លះ អ្វីដែលកូនចង់បាននោះ ឪពុកម្ដាយដូចរូបយើងអាចនឹងមិនដែលស្គាល់ពីមុនមកផងថា វាល្អ ឬមិនល្អយ៉ាងណានោះ?
3. បង្ហាត់ឱ្យកូនចេះចាយលុយ
ការចេះសន្សំលុយឱ្យបានច្រើនៗ គឺជារឿងល្អ តែពេលខ្លះលោកឪពុកអ្នក-ម្ដាយគួរតែបង្ហាត់ឱ្យកូនចេះចាយលុយខ្លះផង ដូចជា ថ្លៃនំបន្តិចបន្តួច ឬបង្ហាត់ឱ្យកូនសន្សំលុយដើម្បីរបស់ដែលខ្លួនគេចង់បានណាមួយក្រោយពីអធិប្បាយពីហេតុផលប្រាប់ឪពុកម្ដាយតាមចំណុចទី2 រួចហើយ។ ការបង្ហាត់ឱ្យកូនចេះចាយលុយបន្តិចបន្តួចនឹងជួយឱ្យកូនធំឡើងក្លាយជាមនុស្សចេះយល់ចិត្តអាណិតអាសូរអ្នកដទៃ និងស្គាល់ពីការឱ្យ និងការលះបង់។
4. ប្រើពេលវេលានៅរួមគ្នាជាគ្រួសារ
ឪពុកម្ដាយគួរប្រើពេលវេលារួមគ្នា ទៅដើរលេងជាមួយគ្នាជាគ្រួសារ ឬសូម្បីតែពេលនៅផ្ទះក៏ដោយគួរចាត់ចែងពេលវេលាសម្រាប់គ្រួសារដើម្បីជជែកគ្នា ឬធ្វើអ្វីមួយរួមគ្នា។ ក្មេងខ្លះនៅពេលចាប់ផ្ដើមធំឡើងក៏ច្រើនតែមានពិភពផ្ទាល់ខ្លួនរបស់គេ នៅតែក្នុងបន្ទប់ មិនចេញមកនិយាយស្ដីជាមួយមនុស្សក្នុងគ្រួសារ។ ការរៀបចំពេលវេលានៅជាមួយគ្នានឹងជួយរឹតចំណងសម្ពន្ធភាពរបស់សមាជិកគ្រប់គ្នាក្នុងគ្រួសារ ដូច្នេះទើបគួររកពេលវេលាធ្វើកិច្ចការងាររួមគ្នាឱ្យបានច្រើន។
កុំភ្លេចថា ពេលវេលាមួយខែៗ មួយឆ្នាំៗកន្លងផុតទៅឆាប់រហ័សណាស់ ថែមទាំងមិនអាចថយត្រឡប់ទៅវិញបានទៀតផង ដូច្នេះបើឪពុកម្ដាយប្រើពេលវេលារួមគ្នាមកតាំងពីកូននៅក្នុងផ្ទៃរហូតដល់ពេលកូនធំធាត់ឡើង ក៏នៅតែធ្វើដូចមុនដដែលនោះ នឹងធ្វើឱ្យកូនបានទទួលភាពកក់ក្ដៅពីឪពុកម្ដាយ ដែលវានឹងហុចផលល្អដល់ការរៀនយល់ដឹងរបស់ក្មេង ព្រោះនៅពេលផ្លូវចិត្តមានសេចក្ដីសុខហើយ ខួរក្បាលក៏នឹងអភិវឌ្ឍទៅតាមនោះដែរ៕
