ធឿន មករា - La Reine Media

បន្ទប់ផ្ទះបាយ Size Mini 4 បែប… តូចមែន តែមានគំនិតខ្ពស់

គេនាំគ្នានិយាយថា បន្ទប់ផ្ទះបាយ គឺជាបេះដូងចម្បងរបស់ផ្ទះ បើគ្មានបន្ទប់ផ្ទះបាយ ប្រហែលជាត្រូវទិញម្ហូបថង់មកទទួលទានរាល់ថ្ងៃមិនខាន តែតឱ្យជាម្ហូបអាហារថង់យ៉ាងណា ក៏ត្រូវតែមានបន្ទប់ផ្ទះបាយដដែលហ្នឹង! មែនទេ? ព្រោះណាមួយត្រូវលាងចាន-ក្បានទុកដាក់ កម្ដៅម្ហូបអាហារ និងការងារចង្ក្រានជើងឆ្នាំងមួយគំនរទៀត ដូច្នេះហើយទើបបន្ទប់ផ្ទះបាយចាំបាច់ណាស់សម្រាប់គ្រប់ផ្ទះ តែទំហំរបស់បន្ទប់ផ្ទះបាយមិនចាំបាច់ត្រូវតែធំជានិច្ចនោះទេ។ ដែលខំរៀបរាប់ហូរហែមកបែបនេះ មិនមែនមានអីធំដំុនោះទេ គ្រាន់តែចង់ឱ្យមិត្តអ្នកអានណាដែលផ្ទះមានទីធ្លាបន្ទប់ចង្ក្រានបាយមានកំណត់នោះ ងាកមករៀបចំតុបតែងបន្ទប់ផ្ទះបាយឱ្យបានស្អាតម្ដងជាមួយនឹង 4បែបនៃបន្ទប់ផ្ទះបាយទំហំតូច តែស្អាតៗតែប៉ុណ្ណោះ។

បែបទី1

បន្ទប់ចង្ក្រានបាយតូច តែមួយជ្រុង
បន្ទប់ផ្ទះបាយខ្នាតតូចក្នុងបរិយាកាសពណ៌ឈើធម្មជាតិ មានទីធ្លាប្រើប្រាស់ត្រឹមតែបន្តិចបន្តួច តែក៏មានឧបករណ៍គ្រប់សម្រាប់រាល់ការប្រើការ។ ដោយចាប់ផ្ដើមពីការច្នៃម៉ូដឱ្យក្លាយជាបន្ទប់ផ្ទះបាយតែមួយជ្រុងជាប់ជញ្ជាំង ក្រាលឥដ្ឋការ៉ូពណ៌ឈើធម្មជាតិ។ ខាងក្រោមតុដាក់ម៉ាស៊ីនបោកខោអាវខ្នាតមីនីសន្សំសំចៃទីកន្លែង អាងលាងចានតូចមួយ និងឆ្នាំងម៉ៃក្រូវេហ្វអាចដាក់នៅលើតុនៅក្នុងផ្ទះបាយក៏បាន។ ធ្វើបង្កាន់ដៃដែកអីុណុកជាប់ជញ្ជាំងទុកព្យួរឧបករណ៍ផ្ទះបាយដែលត្រូវប្រើជាប្រចាំ គ្រឿងបន្ថែមរសជាតិដាក់តម្រៀបជាជួរស្រេច និងទូជាប់ជញ្ជាំងសម្រាប់ទុកដាក់ចានក្បាន។

បែបទី2

តូច តែខ្លឹម
បើអ្នកណាស្នាក់អាស្រ័យនៅក្នុងបន្ទប់អាផាតមិន ឬខុនដូ ដែលទីធ្លាមានកំណត់នោះ ប្រាកដណាស់ថា បន្ទប់ផ្ទះបាយរបស់អ្នកច្បាស់ជាត្រូវប្រើការរួមជាមួយបន្ទប់ផ្សេងទៀត និងមិនបានបែងចែកទីកន្លែងប្រើការយ៉ាងច្បាស់លាស់ឡើយ ដោយចាត់ចែងទុកត្រឹមតែជ្រុងតូចមួយប៉ុណ្ណោះ។ មុនគេបង្អស់ គឺត្រូវកំណត់ទីធ្លាជាមុនសិន ទុកដាក់របស់គ្រប់យ៉ាងឱ្យទៅជិតជញ្ជាំងបំពាក់ទូព្យួរឧបករណ៍សម្រាប់ទុកដាក់ តុបាយម៉ូដបែបសាមញ្ញសមល្មមនឹងទីធ្លា លាក់ភាជនៈផ្សេងៗ និងឧបករណ៍គ្រប់យ៉ាងទុកនៅក្នុងទូ ដើម្បីភាពមានរបៀប និងមើលទៅស្អាតភ្នែកគួរឱ្យចង់ប្រើការរាល់ថ្ងៃ។

បែបទី3

បន្ទប់ផ្ទះបាយស្រឡះ សែនស្អាត
បន្ទប់ផ្ទះបាយរបស់មនុស្សវ័យក្លៀវក្លាសម្រាប់អ្នកដែលនិយមចូលចិត្តភាពស្រឡះ។ ស៊ីម៉ង់ត៍លាតគ្មានលាបពណ៌ គឺជាសម្ភារដែលបង្ហាញពីភាពសាមញ្ញបានគ្រប់ពេលវេលា។ គំនិតនេះ គឺយកស៊ីម៉ង់ត៍ធ្វើជាតុបាយនៅក្នុងផ្ទះបាយ ជ្រើសរើសបំពាក់ទូថ្នាក់សម្រាប់ដាក់របស់របរឱ្យស័ក្តិសម ដោយមានជាន់ថ្នាក់ធ្វើពីឈើនៅផ្នែកខាងក្រោម ខណៈដែលធ្នើរដាក់របស់របរផ្នែកខាងលើបើកចំហ ជួយឱ្យការចាប់យកឧបករណ៍ចម្អិនម្ហូបអាហារមានភាពងាយស្រួល និងឆាប់រហ័សឡើង។ ប្រើប្រាស់ទីធ្លាមិនច្រើន ត្រឹមតែជញ្ជាំងមួយខាង និងប្រើរួមគ្នាជាមួយបន្ទប់ទទួលទានអាហារ។

បែបទី4

តុកណ្ដាលបន្ទប់ក្នុងក្ដីស្រមៃ
សម្រាប់បន្ទប់ផ្ទះបាយខ្នាតតូច តែក៏ចង់មានតុនៅកណ្ដាលបន្ទប់ដែលអាចច្នៃប្រើប្រាស់បានយ៉ាងងាយស្រួលនោះ តុថ្មម៉ាបអាចជាជម្រើសដ៏ល្អមួយសម្រាប់ទាំងការទទួលទានអាហារពេលព្រឹកបែបងាយៗ និងជាតុសម្រាប់ត្រៀមរៀបចំម្ហូបអាហារទៀតផង។ ចំណែកតុសម្រាប់ត្រៀមអាហារវិញ ជាបែបមីនីស្ទូឌីយោ ស័ក្តិសមបំផុតសម្រាប់បន្ទប់ដែលមានទីធ្លាតូច គ្រប់យ៉ាងស្ថិតនៅក្នុងទូតែមួយ ទាំងអាងលាងចាន ចង្ក្រានម៉ៃក្រូវេហ្វទូទឹកកក និងធ្នើរថ្នាក់ៗដាក់របស់របរជាដើម៕

May 8, 2018

វិធីថែរក្សាប្រអប់ជើង នារដូវក្ដៅ ដែលអ្នកមិនគួរមើលរំលង

ការយកចិត្តទុក្ខដាក់ចំពោះស្បែកមុខ ដងខ្លួន សក់ និងក្រចក គឺជារឿងសំខាន់មួយហើយ តែសូមកុំភ្លេចថែរក្សាស្បែកប្រអប់ជើងរបស់អ្នកផង។ ស្បែកប្រអប់ជើងស្អាត ក៏ជារឿងសោមនស្សមួយដែលអ្នកនៅជុំវិញខ្លួនអ្នកស្ញើចសរសើរចំពោះអ្នកដែរ ព្រោះគេអាចសម្លឹងឃើញថា អ្នកជាមនុស្សម្នាក់ដែលឧស្សាហ៍ និងខ្វាយខ្វល់ពីសម្រស់របស់ខ្លួន។ ដោយឡែកទស្សនាវដ្តី ឡារ៉ែន សូមពាំនាំនូវវិធីសាស្ត្ររក្សាស្បែកប្រអប់ជើងនាអំឡុងពេលរដូវក្ដៅនេះដូចខាងក្រោមនេះ។

1. សម្អាតស្បែកប្រអប់ជើងជាប្រចាំថ្ងៃ
វិធីសាស្ត្រសម្អាតស្បែកប្រអប់ជើងឱ្យបានស្អាតបំផុត គឺត្រូវការលាងសម្អាតរាល់ថ្ងៃ មិនលឿនពេក ឬមិនប្រើច្រាស់រឹងមកត្រដុសស្បែកជើងរបស់អ្នកឡើយ ព្រោះវាមិនមែនជារឿងល្អនោះទេ ហើយការលាងសម្អាតមិនបានគ្រប់ជ្រុងជ្រោយអាចធ្វើឱ្យជាប់មេរោគបាក់តេរី និងបង្កឱ្យស្បែកងាយនឹងខូចខាតណាស់។ ម្យ៉ាងវិញទៀតសម្រាប់រដូវក្ដៅនេះ ស្បែករងាយរងការខូចខាតពីកម្ដៅថ្ងៃ និងធូលីដី ដូច្នេះហើយអ្នកគួរសម្អាតស្បែកប្រអប់ជើងជារៀងរាល់ថ្ងៃ។

2. បញ្ហាស្បែកជើង
ស្ថិតក្នុងអាកាសធាតុក្តៅហើយសើមមានន័យថា វាងាយនឹងធ្វើឱ្យមនុស្សយើងបែកញើសប្រអប់ជើង សើមស្បែកជើង ដែលជាហេតុនាំឱ្យមានការបង្ករោគដោយពពួកផ្សិត និងជំងឺផ្សេងៗទៀតបាន។ នៅតាមផ្លូវពោរពេញទៅដោយទឹកកខ្វក់ និងរបស់ស្មោកគ្រោគច្រើនណាស់ ដូច្នេះ វាអាចនឹងប្រឡាក់ស្បែកជើងរបស់អ្នកបាន។ ជាងនេះទៅទៀតភាពកខ្វក់ទាំងនោះ និងបណ្ដាលឱ្យអ្នកខ្មាសគេដោយសារក្លិន និងមើលទៅគគ្រិចប្រឡាក់-ប្រឡូក មុនពេលចូលកន្លែងធ្វើការរយៈពេលច្រើនម៉ោង ហើយត្រឡប់ទៅផ្ទះវិញជាមួយនឹងប្រអប់ជើងដែលហើម កខ្វក់ និងធំុក្លិនស្អុយថែមទៀត។ ហេតុដូច្នេះហើយ អ្នកត្រូវការសម្ងួតប្រអប់ជើងរបស់អ្នកឱ្យស្ងួតល្អជាមុនសិន មុនពេលពាក់ស្រោមជើង ឬស្បែកជើង។ មិនត្រូវពាក់ស្បែកជើងណាដែលហប់ពេក ឬប្រហោងធំៗ ដែលងាយសើមដល់ប្រអប់ជើងរបស់អ្នកនោះទេ។

3. លាងជើងនឹងទឹកក្តៅឧណ្ហៗ
ការលាងជើងនឹងទឹកក្ដៅឧណ្ហៗ គឺជួយសម្រាលអាការនឿយហត់ និងល្វើយបានយ៉ាងប្រសើរបំផុត។ លោកអ្នកអាចសាកល្បងលាងជើងជាមួយទឹកក្ដៅ ឬក៏លាយជាមួយតែក្រហម តែប៉ៃតង ដែលក្លិនរបស់តែជួយឱ្យមានអារម្មណ៍ស្រស់ស្រាយ ហើយធ្វើឱ្យស្បែកប្រអប់ជើងទន់ស្អាតផងដែរ។ ចំពោះការត្រាំជើងជាមួយទឹកក្ដៅ ជាវិធីសាស្ត្រថែរក្សាស្បែកប្រអប់ជើងដ៏ពេញនិយមបំផុតនៅប្រទេសកូរ៉េ ជប៉ុន និងចិន តែក៏សង្កេតឃើញថាបច្ចុប្បន្ននេះ គឺគេនិយមពាសពេញសាកលលោកតែម្តង។

4. ថែរក្សាប្រអប់ជើង
អនាម័យសុខភាពប្រអប់ជើងក៏ជារឿងសំខាន់មួយទៀត បើតាមបទពិសោធអ្នកជំនាញបានណែនាំថា ការប្រើប្រាស់ឡេលាបស្បែក ឬប្រេងច័ន្ទ ដើម្បីរក្សាអនាម័យប្រអប់ជើងក៏ជាកត្តាសំខាន់មួយដែរ ព្រោះស្បែកជើងដែលរលាកដោយសារកម្ដៅថ្ងៃ បណ្ដាលឱ្យខ្មៅ ហើយមានស្នាមជាំ ដែលជាហេតុធ្វើឱ្យស្បែកមើលទៅមិនស្អាត។ គប្បីក្រោយលាងសម្អាតប្រអប់ជើងរួច អ្នកត្រូវការលាបឡេលើស្បែកប្រអប់ជើង ដើម្បីរក្សាភាពសស្អាត និងម៉ដ្ឋរលោង។

5. ទទួលទានអាហារជំនួយស្បែក
ការទទួលទានអាហារត្រឹមត្រូវក៏ជាផ្នែកសំខាន់មួយនៃការថែរក្សាស្បែកប្រអប់ជើងរបស់អ្នកផងដែរ។ ប្រភេទអាហារដែលមានជាតិខ្លាញ់ទាបអាចជួយឱ្យស្បែកមានភាពក្មេងជាងវ័យបាន។ ចំពោះអាហារមានជាតិខ្លាញ់ គឺជារឿងសំខាន់ណាស់ចំពោះសុខភាពស្បែក ពោលគឺជួសជុលស្បែក ផ្តល់សំណើម និងផ្តល់ភាពស្អាតរលោង។ មិនតែប៉ុណ្ណោះ អាហារដែលមានជាតិប្រូតេអីុន ក៏ជាជម្រើសដ៏ល្អបំផុតបន្ទាប់ពីអាហារសម្បូរដោយជាតិខ្លាញ់ ជាពិសេសអាហារប្រភេទគ្រាប់ធញ្ញជាតិតែម្តង ព្រោះវាផ្ទុកទៅដោយជាតិប្រេងដ៏ល្អចំពោះស្បែក៕

May 7, 2018

ស្មាតហ្វូន Android 2018 ជាមួយ Feature និងលក្ខណសម្បត្តិ ដ៏ពេញនិយមនាពេលអនាគត

មនុស្សជាច្រើនប្រហែលជានិយាយថា “ស្មាតហ្វូនចាប់ផ្ដើមលែងមានអីថ្មីហើយ” បន្ទាប់ពីឆ្នាំដែលកន្លងៗទៅ ភាគ
ច្រើនមានតែស៊េរី និងម៉ូដដដែលៗ មិនខុសគ្នាប៉ុន្មានឡើយ។ តែក្នុងឆ្នាំ2018នេះ ក្រុមហ៊ុនផលិតស្មាតហ្វូនធំៗចាប់ផ្ដើមអភិវឌ្ឍលក្ខណសម្បត្តិ និង Feature ដែលប្លែកថ្មីៗចេញមកទៀតជាច្រើន ដែលនៅក្នុងឆ្នាំនេះ វានឹងក្លាយជាទិសដៅថ្មីរបស់ស្មាតហ្វូនសម្រាប់អនាគត។ តើមានអ្វីថ្មីខ្លះ យើងនាំគ្នាមកមើលដូចតទៅ។

អេក្រង់គ្មានគែម
ទោះជាធ្លាប់មានស្មាតហ្វូនអេក្រង់គ្មានគែមដំបូងគេគឺ Sharp Aquos Crystal ដែលបង្ហាញខ្លួនឡើងតាំងពីឆ្នាំ2014 ក៏ដោយ តែ Trend នេះទើបតែមកល្បីមែនទែននៅឆ្នាំ2016 ក្រោយពី Xiaomi Mi Mix បង្ហាញខ្លួនឡើង និងចាប់ផ្ដើមតាមគ្នាមកក្រោយបង្ហាញខ្លួន Samsung Galaxy S8 ជាមួយ Note 8 និង iPhone X ហ្នឹងឯង។ សម្រាប់ Feature គ្មានគែម ភាគច្រើននឹងចេញមកព្រមជាមួយទំហំ18ៈ9 មានចំណុចល្អត្រង់ដែលធ្វើឱ្យទូរស័ព្ទកាន់តែស្អាតខ្លាំងឡើង និងជួយឱ្យមានអេក្រង់កាន់តែធំឡើង តែតួគ្រឿងមិនធំតាម។ តែយ៉ាងណាក៏ដោយ ក៏នៅមានចំណុចមិនល្អដែលរង់ចាំការកែសម្រួលដែរ ដូចជា App មួយចំនួននៅមិនទាន់ Support ការបង្ហាញទិន្នន័យជាមួយអេក្រង់នេះ និងការមើលវីដេអូបែបបើកឱ្យពេញអេក្រង់ដែលអាចធ្វើឱ្យរូបភាពត្រូវ Crop បាត់អស់មួួយផ្នែក។

កាមេរ៉ាគូ (oo)
តពី Trend គ្មានគែមមក ក៏មាន Feature ដែលចេញមកមួយគូៗដូចជា Dual Camera ឬកាមេរ៉ាក្រោយមួយគូ (oo) ដែលសព្វថ្ងៃនេះចាប់ផ្ដើមមាននៅលើស្មាតហ្វូនស្ទើរតែគ្រប់ស៊េរីទៅហើយ ដូចជា Samsung ដែលទើបតែដាក់មកនៅក្នុង S9+ ថ្មីៗនេះឯង និងខាង Sony ក៏ចាប់ផ្ដើមបង្ហើប Feature នេះឱ្យឃើញដែរ ដែលគេរំពឹងថានឹងចេញមកនៅក្នុង “Sony Xperia XZ Pro” ដែលកំពុងនាំគ្នាល្បីថ្មីៗនេះឯង។ ចំណែកកាមេរ៉ាគូនៅទីនេះក៏មានន័យពីលេនស៍ពីរគ្រាប់ដែរ ចែកចេញជាលេនស៍ Telephoto និងលេនស៍ Wide ឬ Normal មកបំពាក់នៅជិតៗគ្នា ដោយការធ្វើការក៏នឹងឆ្លាស់គ្នាតាមការប្រើការ។

កាមេរ៉ាវីដេអូ Slow Motion
សម្រាប់ Feature នេះ គឺការថតវីដេអូបែបស្លូម៉ូស្សិន(រូបភាពយឺត) ដូចឈ្មោះហៅអ៊ីចឹងធ្វើឱ្យយើងសប្បាយជាមួយនឹងការថតវីដេអូកាន់តែខ្លាំងឡើង ហើយសម្រាប់ប្រែ៊នដ៍ដំបូងគេដែលធ្វើបាននោះគឺ Sony លើស៊េរី XZ1 កាលពីឆ្នាំទៅ ដែលអាចថតវីដេអូស្លូម៉ូស្សិនបែប 960fps ក្នុងមួយវិនាទី ក្នុងភាពលម្អិតច្បាស់កម្រិត HD (720p) រហូតកាលពីពេលថ្មីៗនេះខាង Samsung បានបង្ហាញ Galaxy S9 និង S9+ ដែលចេញមកព្រមជាមួយកាមេរ៉ា Slow Motion ដូចគ្នាដែរ ធ្វើឱ្យ Feature នេះត្រូវបានគេលើកមកនិយាយជាថ្មីម្ដងទៀត (ដោយសារកម្លាំងទីផ្សាររបស់ Samsung) តែមិនទាន់បានល្បីប៉ុន្មានផង ខាង Sony ក៏បង្អួត Feature ថតវីដេអូស្លូម៉ូស្សិនបែប 960fps ដែលមានភាពលម្អិតច្បាស់ Full HD (1080p) ចេញមកទៀតក្នុង XZ2 ដែលទើបបង្ហាញខ្លួនថ្មីៗនេះឯង។

RAM 6GB+
នាំគ្នាមកមើលផ្នែកលក្ខណសម្បត្តិវិញម្ដង។ បច្ចុប្បន្នស្មាតហ្វូនស្ទើរតែគ្រប់ស៊េរីតែងចេញមកព្រមជាមួយ RAM 4GB ឡើងតែម្ដង ដើម្បីការប្រើការដែលរលូនល្អ តែដោយសារតែមានទាំង App ដែលត្រូវប្រើRAMធំឡើង និងរួមជាមួយទង្វើរបស់អ្នកប្រើដែលចូលចិត្តបើក App ច្រើនដំណាលៗគ្នា(Multitasking) ធ្វើឱ្យត្រូវប្រើទំហំផ្ទុកក្នុងផ្នែកនេះច្រើនផងនោះ ទើបថ្មីៗនេះខាង Asus បានបង្ហាញខ្លួន Zenfone 5Z ដែលចេញមកព្រមជាមួយRAMឱ្យជ្រើសរើសដល់ទៅ 8GB តែម្ដង ចំណែកស៊េរីផ្សេងៗទៀតក៏ចេញមកព្រមជាមួយ RAM 6GB ដូចជា Samsung Galaxy S9+, LG V30S ThinQ និង Nokia 8 Sirocco ជាដើម ទើបក្លាយជាថា RAM ស្មាតហ្វូនសម័យថ្មីនេះត្រូវតែចេញមកព្រមជាមួយទំហំ 6GB ឡើងទៅតែម្ដង។

កន្លែងស្គែនខ្ចៅម្រាមដៃក្រោមអេក្រង់
ពេលនេះមានប្រែ៊នដ៍តែមួយគត់ដែលសម្រុកធ្វើ គឺ Vivo ដោយនៅក្នុងពិធីតាំងពិព័រណ៍ CES 2018 Vivo ក៏បានបង្ហាញគំរូដើមរួចរាល់ហើយនៅក្នុងស៊េរី Vivo X20 Plus UD បែបពេញលេញជាលើកដំបូង និងកាលពីពេលថ្មីៗនេះ ក៏មានបង្ហាញគំរូមួយម៉ូដែលទៀតក្នុងឈ្មោះថា “Apex” ដែលចេញមកព្រមជាមួយស្គែនស្នាមខ្ចៅម្រាមដៃក្រោមអេក្រង់ដូចគ្នា តែលើកនេះកន្លែងស្គែនធំទូលាយជាងមុនច្រើន និងក្រៅពីស្គែនស្នាមខ្ចៅម្រាមដៃក្រោមអេក្រង់ហើយ នៅចេញមកព្រមជាមួយអេក្រង់គ្មានគែមទៀតផង។

e-SIM
ទោះជានៅមិនទាន់មាននៅក្នុងស្មាតហ្វូនក៏ដោយ តែគេជឿថា នៅពេលខាងមុខនឹងប្រាកដជាមានមិនខានក្រោយពីខាង Apple បានញាត់ Feature នេះនៅក្នុង Apple Watch Series 3 ដែលបានដាក់លក់នៅក្នុងប្រទេសក្នុងតំបន់អា-ស៊ីរួចហើយ។ សម្រាប់ e-SIM នេះគឺជាស៊ីមកាតបែបថ្មី ដែលពីមុនធ្លាប់ជាឈិពក្នុងរូបរាងជាកាតខ្នាតតូចមួយ ឥឡូវប្ដូរមកជាឈិពបង្កប់នៅក្នុងឧបករណ៍តែម្ដង ហុចផលឱ្យឧបករណ៍នោះមិនអាចដោះប្ដូរស៊ីមកាតបានឡើយ តែជំនួសដោយចំណុចល្អមកវិញគឺ មិនចាំបាច់ធ្វើកន្លែងដាក់ស៊ីម-កាតនាំឱ្យខាតទីកន្លែង ធ្វើឱ្យអ្នកច្នៃម៉ូដស្មាតហ្វូន ឬឧបករណ៍ដទៃទៀតមានទីកន្លែងសម្រាប់ដាក់ Feature បន្ថែមបានកាន់តែច្រើនឡើង។

AI
ក្នុងឆ្នាំកន្លងទៅ យើងបានភ្ញាក់ផ្អើលជាមួយស្មាតហ្វូនដែលចេញមកព្រមជាមួយខួរក្បាលសិប្បនិម្មិត(Artificial Intelligence) ឬ AI នៅខាងក្នុង ដែលជួយឱ្យស្មាតហ្វូនមាន Feature ថ្មីៗតាមមកជាច្រើន ដោយតួនាទីដែលលេចធ្លោបំផុត ក៏ប្រហែលជាគេចមិនផុតពីរឿងកាមេរ៉ាដែលក្រៅតែពីជួយឱ្យថតរូបបានស្អាតហើយ នៅជួយធ្វើជាកែវភ្នែកវិសេសដែលអាចវិភាគវត្ថុនៅចំពីមុខបានទៀតផង ដូចជា Bixby នៅក្នុង Samsung Galaxy ឬការបកប្រែភាសាតាមរយៈកាមេរ៉ាដោយ Google Assistant នៅក្នុងស្មាតហ្វូន Android សឹងតែគ្រប់ម៉ូដែល ហើយខាង Apple ក៏មាន Siri ដែលនៅគូគ្នាជាមួយ iPhone តាំងពីណាពីណីមកហើយ ដោយវាជួយឱ្យយើងអាចបញ្ជាតាមរយៈសំឡេងបានតែម្ដង ធ្វើឱ្យការប្រើការស្មាតហ្វូនកាន់តែមានភាពសម្បូរបែបច្រើនឡើង ដែលនាពេលអនាគតនឹងរឹតតែសម្បូរបែបជាងនេះទៅទៀត។

AR
សម្រាប់ AR ឬ Augmented Reality ការបង្ហាញរូបភាពដូចរូបភាពពិតនៅក្នុងពិភពនៃការពិត ឬនិយាយងាយៗក៏គឺ Feature 3D Emoji ឬ Animoji ដែលយើងឃើញមាននៅក្នុង Galaxy S9/S9+ និង iPhone X ហ្នឹងឯង។ ដែលវានឹងដាក់រូបភាពពីលើរូបភាព Emoji បែប 3D លើផ្ទៃមុខរបស់យើងពិតតាមរយៈកាមេរ៉ាស្មាតហ្វូន។ ក្រៅពីផ្នែកនេះហើយ ក៏នៅមានការប្រើរួមជាមួយវ៉ែនតា Mixed Reality ឬ MR ផងដែរដែលជួយឱ្យមើលឃើញរូបភាព AR បានតាមរយៈភ្នែកខ្លួនយើងតែម្ដង ដោយមិនចាំបាច់មើលតាមរយៈអេក្រង់ស្មាតហ្វូនដូចពីមុនឡើយ។

ប្រព័ន្ធ Security ថ្មី
ប្រព័ន្ធ Security ឬ Feature ការពារសុវត្ថិភាពនៅទីនេះ គឺមានទាំង Feature ដោះសោ និងប្រព័ន្ធសុវត្ថិភាពផ្ទៃក្នុងដែលភាគច្រើនមាននៅក្នុងប្រព័ន្ធប្រតិបត្តិការស្រាប់ហើយ ដោយមានអាប់ឌែតថ្មីជារៀងរាល់ខែ។ តែមើលទៅហាក់ដូចជាមិនទាន់គ្រប់គ្រាន់នៅឡើយ បន្ទាប់ពីមួយរយៈកន្លងមកនេះមានរបាយការណ៍រឿងស្មាតហ្វូនត្រូវបានហ៊ែកជាញឹកញាប់នោះ ទើបមានការបង្ហាញស្មាតហ្វូនស៊េរីថ្មីដែលចេញមកព្រមជាមួយប្រព័ន្ធការពារសុវត្ថិភាពកម្រិតខ្ពស់ដូចជា SikurPhone ស្មាតហ្វូនសែស្រឡាយ Cryptocurrency ដែលចេញមកព្រមជាមួយ e-Wallet នៅក្នុងម៉ាស៊ីនជាមួយប្រព័ន្ធការពារសុវត្ថិភាពកម្រិតខ្ពស់ ដែលខាង Samsung ក៏មានបង្ហាញនៅក្នុង Galaxy Note 8 និង Galaxy S8 ស៊េរី Enterprise Edition (EE) ផងដែរ។ គេជឿថា ស្មាតហ្វូនស៊េរីថ្មីៗតទៅទៀតនឹងចេញមកព្រមជាមួយប្រព័ន្ធការពារសុវត្ថិភាពដែលកាន់តែរឹងមាំឡើងមិនខាន៕

May 7, 2018

អាថ៌កំបាំងនៃការថែរក្សាសក់បែបនារីឥណ្ឌា

ភាគច្រើនឱ្យតែនិយាយដល់ស្រីៗឥណ្ឌា យើងប្រាកដជាស្រមៃឃើញដល់សក់ដែលមានសភាពក្រាស់ វែងអន្លាយ ពណ៌ខ្មៅរលោង រួញបែបទឹករលកជាមិនខាន។ រហូតមកដល់ពេលបច្ចុប្បន្ននេះ រូបភាពនៃសក់បែបនេះក៏មានការប្រែប្រួលខ្លះ តែក៏មិនច្រើនពេកដែរ ព្រោះភាគច្រើននៃការផ្លាស់ប្តូរនោះគឺមានតែការប្តូរពីសភាពរួញបែបទឹករលកមកជាត្រង់ស្អាតវិញតែប៉ុណ្ណឹង។ អូខេ! បញ្ចប់ក្តីស្រមៃហើយងាកមកស្វែងរកការពិតនៃការថែរក្សាសក់របស់ក្រមុំឥណ្ឌាដែលមានសក់ស្រស់ស្អាត ដូចតទៅ៖

ប្រេងដូង: ធ្វើឱ្យសក់ទន់ រលោង ងាយស្រួលសិត មើលទៅភ្លឺរលោងស្អាត នារីឥណ្ឌាប្រគល់នាទីឱ្យទៅប្រេងដូង។

ប្រេងល្ហុងខ្វង: តួនាទីរបស់ប្រេងល្ហុងខ្វងដែលស្រីៗឥណ្ឌាទុកចិត្តបំផុតគឺ ធ្វើឱ្យសក់មានសុខភាពល្អ និងផ្តល់នូវភាពស្រស់ស្អាតដល់ស្បែកក្បាល។

សម្អាតសក់ដោយទឹកតែ: លាងសក់ជាមួយទឹកតែ(ពិសេសតែខ្មៅ) នឹងជួយឱ្យសក់លូតលាស់បានល្អ និងក្រាស់ល្អណាស់។

ការពារ និងព្យាបាល: ទោះសក់ខូច ឬមិនខូចក៏ដោយ ការព្យាបាលសក់តែងតែធ្វើឡើងជារៀងរាល់សប្តាហ៍។ មិនមានអ្វីច្រើនទេ គេពឹងផ្អែកតែលើប្រេងអូលីវ ទឹកក្រូចឆ្មារ និងប្រេងដូងប៉ុណ្ណោះ។ ទឹកក្រូចឆ្មារដើរតួជាអ្នកកម្ចាត់ប្រេងដែលលើស ខណៈដែលប្រេងដូង និងប្រេងអូលីវមាននាទីជាអ្នកបន្ថែមសំណើមឱ្យទៅស្បែកក្បាល និងធ្វើឱ្យសក់កាន់តែស្រស់ស្អាតឡើង។

ឆ្លាតវៃ: សំដៅដល់ភាពវៃឆ្លាតក្នុងការជ្រើសរើសសាប៊ូកក់សក់ណាដែលត្រូវនឹងសភាពសក់របស់ខ្លួន។ សារធាតុនីមួយៗសុទ្ធតែផ្តល់គុណប្រយោជន៍ទៅតាមប្រភេទរបស់វា អីុចឹងតើបានជាសម្រស់សក់ស្រីៗឥណ្ឌាមិនចាញ់ស្រីៗប្រទេសផ្សេងនោះទេ៕

May 7, 2018

ដំណាំ សាលាដ

សាលាដ ឬឈ្មោះខាងវិទ្យាសាស្រ្តហៅថា Lactuca sativaជារុក្ខជាតិដំណាំដែលមានដែនដីកំណើតទាំងនៅក្នុងទ្វីបអាស៊ី និងទ្វីបអឺរ៉ុប ជាដំណាំតែមួយរដូវ មានដើមធំខ្លី ស្លឹកញឹក និងលាស់ធំចេញពីថ្នាំងជាកញ្ចុំ អាចក្ដោបត្រួយ ឬមិនក្ដោបត្រួយក៏មាន។ មានលក្ខណៈរូបរាង និងពណ៌ខុសប្លែកពីគ្នា ដោយទាំងអស់នេះអាស្រ័យលើពូជរបស់វា ដោយពូជខ្លះអាចមានស្លឹកក្រាស់រឹង តែពូជខ្លះទៀតបែរជាមានស្លឹកទន់ស្រួយ មានពណ៌ត្រួយចេក រហូតទៅដល់ពណ៌បៃតងចាស់ ពណ៌ស្ករលាយក្រហម ពណ៌ក្រហម និងពណ៌ស្ករតែម្ដងជាដើម។ ក្រៅពីនេះ ដើមសាលាដនៅមានប្រព័ន្ធឫសកែវដែលអាចរីកលូតលាស់ចុះទៅក្នុងដីបានយ៉ាងឆាប់រហ័ស។ កញ្ចុំផ្កាមានរូបរាងបែប Panicle មានកម្ពស់ជាមធ្យមពី6-12សង្ទីម៉ែត្រ ប្រកបដោយផ្កាពី10-25ផ្កា/កញ្ចុំ។ ស្រទាប់ផ្កាមានពណ៌លឿង ឬពណ៌សលាយលឿង។ ផ្កានឹងរីកនៅពេលព្រឹក ជាពិសេសក្នុងអំឡុងពេលដែលមានសីតុណ្ហភាពទាប។

ការដាក់ដាំ
• ការត្រៀមដី: ភ្ជួរដាស់ដីឱ្យជ្រៅទៅក្រោមប្រមាណ30-40សង្ទីម៉ែត្រ រួចហាលដីទុកចោលឱ្យស្ងួត7-10ថ្ងៃ បន្ទាប់មករាស់កិនកម្ទេចដីឱ្យល្អិតមុននឹងដាក់ជីលាមកគោស្ងួតចូលទៅក្នុងដី ប្រមាណជា 2 – 3 ក្នុងទំហំដី 10 X 100 ម៉ែត្រ និងជីរូបមន្តស្មើ 15-15-15 បរិមាណ30-50គីឡូក្រាម រួចរាស់ត្រឡប់ឱ្យដីនិងជីចូលគ្នា បន្ទាប់មកទើបលើកជារងកម្ពស់ប្រមាណជា 30 សង្ទីម៉ែត្រ X ទទឹង120 សង្ទីម៉ែត្រ X បណ្ដោយដី។

• វិធីដាំ: ក្រោយពីត្រៀមរងរួចរាល់ហើយ ចូរគ្របពីលើដោយចំបើងស្ងួតស្ដើងៗ ស្រោចទឹកឱ្យជោក មុននឹងព្រោះគ្រាប់ពូជសាលាដប្រមាណជា300-500ក្រាម(3-5ខាំ)ក្នុងទំហំដីដូចខាងលើ និងព្រោះឱ្យសព្វលើរង រួចស្រោចទឹក1ដងទៀត។ នៅពេលកូនសាលាដចាប់ផ្ដើមលាស់មានស្លឹកពិត2-3សន្លឹក ចូរដកដើមណាដែលមិនសូវល្អ ឬដើមមិនសូវរឹងមាំចោល ដោយទុកចន្លោះ25 ពីមួយគុម្ពទៅមួយគុម្ព 25សង្ទីម៉ែត្រសម្រាប់ការដាំសាលាដស្លឹក និងទុកចន្លោះ 40 សង្ទីម៉ែត្រសម្រាប់ការដាំសាលាដពូជស្លឹកក្ដោបត្រួយ។

វិធីមើលថែទាំ
• ការស្រោចទឹក: ចូរស្រោចទឹករាល់ថ្ងៃឱ្យដល់គល់សាលាដ មួយថ្ងៃ2ដង ព្រឹក និងល្ងាច តែកុំស្រោចរហូតដល់បែកភក់។ បន្ទាប់ពីនោះក៏ប្ដូរមកស្រោចទឹកមួយថ្ងៃខានមួយថ្ងៃវិញ ហើយក្នុងរយៈពេលដែលបន្លែសាលាដកំពុងក្ដោបស្លឹកត្រួយ ចូរកុំស្រោចទឹកឱ្យត្រូវស្លឹកត្រួយ ព្រោះអាចនឹងធ្វើឱ្យកើតរោគរលួយស្លឹកបាន។

• ការដាក់ជី: ប្រើជីរូបមន្ត 46-0-0 ឬ 25-7-7 ក្រោយពេលដាក់ដាំហើយ7-10ថ្ងៃក្នុងអត្រា30-50គីឡូក្រាមក្នុងទំហំដី15 X 100 ម៉ែត្រ និងនៅពេលអាយុបានប្រមាណជា25-30ថ្ងៃ ចូបន្ថែមជីរូបមន្ត 16-16-16 ក្នុងអត្រា30-50គីឡូក្រាមដូចគ្នា។

• ការការពារ និងកម្ចាត់សត្រូវដំណាំ: ចូរបាញ់ទឹកចម្រាញ់ចេញពីរក្ខជាតិ ដូចជា ស្លឹកស្ដៅស្លឹកទន្ន្រានខែត្រ ស្លឹកម្រេច ឬស្បៃរឿងជាដើមទៅលើដើម និងស្លឹក ដើម្បីការពារសត្វដង្កូវមូរស្លឹក និងសត្វល្អិតចង្រៃផ្សេងៗ ដោយត្រូវបាញ់រៀងរាល់5-7ថ្ងៃម្ដង ឬអាចដាំដើមផ្កាស្បៃរឿងនៅតាមសងខាងរងផងក៏បាន។

វិធីប្រមូលផល
អាយុការប្រមូលផលបន្លែសាលាដ គឺប្រមាណជា40-50ថ្ងៃ (បន្ទាប់ពីពេលព្រោះគ្រាប់ពូជ)។ គួរជ្រើសរើសប្រមូលផលនៅពេលដែលស្លឹកសាលាដនៅខ្ចី ស្រួយ និងមិនស្វិត រឹង រីឯការរក្សាទុកវិញ គួរទុកដាក់នៅក្នុងកន្លែងដែលមានសីតុណ្ហភាពត្រជាក់ និង មិនត្រូវពន្លឺថ្ងៃ៕

May 7, 2018

អាថ៌កំបាំងសម្រស់ និងសុខភាពពីជំវិញពិភពលោក

ប្រជាជននៃប្រទេសនីមួយៗតែងមានអាថ៌កំបាំងរៀងៗខ្លួនក្នុងការថែរក្សាសម្រស់ និងសុខភាពរបស់ពួកគេ ដើម្បីឱ្យមើលទៅស្អាតទាក់ទាញខ្សែភ្នែកមនុស្សគ្រប់ៗគ្នា។ ខាងក្រោមនេះ ឡារ៉ែន សូមបង្ហើបជូននូវអាថ៌កំបាំងរបស់ប្រជាជនមកពី6ប្រទេសជុំវិញពិភពលោកមកជម្រាបជូនប្រិយមិត្តអ្នកអានទាំងអស់ពីអាថ៌កំបាំងនៃការថែរក្សាសម្រស់ និងសុខភាពរបស់ពួកគេ។

ជប៉ុន: ប្រជាជនជប៉ុនភាគច្រើនចូលចិត្តទទួលទានត្រី ផ្លែឈើ ហើយទទួលទានទឹកឱ្យបានច្រើន។ ពួកគេនិយមទទួលទានអាហារដោយប្រើចង្កឹះ ព្រោះវាអាចជួយឱ្យគេទទួលទានយឺតៗតាមសម្រួល ហើយទទួលទានបានតិចជាងការប្រើស្លាបព្រា។ មិនថាត្រី ផ្លែឈើ និងទឹកគឺសុទ្ធតែមានសារប្រយោជន៍ណាស់សម្រាប់សម្រស់ និងសុខភាពរបស់ពួកគេ។

ឥណ្ឌា: អ្នកដែលរស់នៅប្រទេសឥណ្ឌាចូលចិត្តអាហារបែបហឹរ និងរុក្ខជាតិផ្សំមួយចំនួនទៀតដែលសម្បូរទៅដោយសារធាតុចិញ្ចឹម និងវីតាមីន។ ប្រភេទអាហារអស់ទាំងនេះមានប្រយោជន៍ណាស់ចំពោះសុខភាព។

ចិន: ទិកនិចនៃការថែរក្សាសម្រស់ និងសុខភាពរបស់ប្រជាជនចិនគឺ ច្រើនតែសង្កត់ធ្ងន់ទៅលើមុខម្ហូបដែលទទួលទាន។ គេចូលចិត្តទទួលទានអាហារបែបចំហុយ ឬឆា ព្រោះគេចង់នៅឱ្យឆ្ងាយពីអាហារដែលមានជាតិស្ករខ្ពស់។ នៅតាមភោជនីយដ្ឋានក្នុងប្រទេសចិន បង្អែមដែលគេទទួលទានច្រើនតែជាបង្អែមដែលមានរស-ជាតិស្រាល ឬផ្លែឈើជាដើម។

អាល្លឺម៉ង់: ជាការពិតពួកគេចូលចិត្តសាច់ និងដំឡូងបារាំង ប៉ុន្តែពួកគេក៏តែងតែជ្រើសរើសនំបុ័ង ដែលមានជាតិសរសៃខ្ពស់ផងដែរ។ ពួកគេចូលចិត្ត Sauerkraut (ស្ពៃរសជាតិជូរ) ព្រោះវាអាចជួយការពារពួកគេពីជំងឺក្អក និងជំងឺផ្តា-សាយ។

បារាំង: ស្ត្រីបារាំងតែងយកចិត្តទុកដាក់ណាស់ចំពោះទម្លាប់នៃការថែរក្សាសម្រស់របស់ពួកគេហេតុដូច្នេះហើយបានជាពួកគេតែងតែប្រើម៉ាសបិទមុខ សម្អាត និងធ្វើអនាម័យស្បែកនិងការស្ប៉ាជាដើម។

ទួគី: អាហារដែលសម្បូរទៅដោយ Omega 3 fatty acids គ្រាប់ធុញ្ញជាតិ ព្រមទាំងអាហារផ្សេងទៀតដែលមានជាតិសរសៃខ្ពស់គឺ មានសារសំខាន់ណាស់សម្រាប់ប្រជាជនទួគី ព្រោះអាហារប្រភេទអស់ទាំងនេះអាចជួយកាត់បន្ថយកូឡេស្តូរ៉លមិនល្អនៅក្នុងរាងកាយ ធ្វើឱ្យពួកគេមានសុខភាពល្អ៕

May 7, 2018

ល្បិច11យ៉ាងដែលបុរសៗអាចលួចពីនារីៗ

បើនិយាយពីរបៀបនៃការតុបតែងខ្លួនរបស់នារីៗវិញ យើងសង្កេតឃើញថា មានច្រើនស្ទើររាប់មិនអស់នោះទេ ឯចំណែកបុរសៗវិញ ហាក់ដូចជាមិនសូវជាខ្វាយខ្វល់ពីការតុបតែងខ្លួនទាល់តែសោះ តែទោះជាយ៉ាងណាក្តីក្នុងនាមអ្នកជាបុរសម្នាក់ អ្នកក៏ត្រូវតែផ្តល់នូវភាពសង្ហាដល់ខ្លួនឯងដែរ។ សម្រាប់បុរសដែលត្រូវការភាពស្អាត ឡារ៉ែន ចង់ឱ្យអ្នកចេះលួចល្បិចខ្លះៗនៃការតុបតែងខ្លួនពីនារីៗ ហើយយើងជឿជាក់ថាល្បិចទាំងនោះ ប្រាកដជាអាចជួយអ្នកបាន។

1. បញ្ឈប់ការប្រើសាប៊ូដុសមុខច្របូកច្របល់គ្នា: បើនិយាយពីស្ត្រី ហាក់ដូចជាមានប្រភេទសាប៊ូផ្សេងៗគ្នាច្រើនណាស់សម្រាប់ប្រើប្រចាំថ្ងៃចំណែកបុរសវិញច្រើនតែប្រើសាប៊ូច្របូកច្របល់ចូលគ្នា ពេលខ្លះលាងមុខ ពេលខ្លះដុសខ្លួន ហើយពេលខ្លះទៀតអាចនឹងយកសាប៊ូកក់សក់មកដុសមុខផងក៏មាន។ ប្រសិនបើអ្នកពិតជាមានទម្លាប់ដូចខាងលើមែននោះ អ្នកត្រូវតែកែប្រែ ព្រោះ
សាប៊ូទាំងនោះអាចបណ្តាលឱ្យស្បែកមុខស្ងួត និងត្រូវបំផ្លាញ។ ត្រូវចងចាំថា មុខត្រូវសម្អាតដោយសាប៊ូសម្អាតមុខតែ1មុខគត់ មិនមែនសាប៊ូលាងដៃ ឬសាប៊ូដុសខ្លួននោះទេ។

2. ការពារស្បែកដោយ SPF ជារៀងរាល់ថ្ងៃ: ការសិក្សាបាននិយាយថា មានបុរសតិចតួចណាស់ដែលតែងតែការពារស្បែកពីកម្តៅថ្ងៃ បើប្រៀប-ធៀបជាមួយនារីៗ។ ការពិតទៅ មិនថាជាស្បែកមុខ ឬស្បែកដងខ្លួននោះទេគឺ ត្រូវតែថែរក្សាការពារឱ្យបានល្អ មិនថាដោយវិធីណានោះទេ។ការលាបឡេការពារកម្តៅថ្ងៃមិនមែនជារឿងអាម៉ាសនោះទេ តែវាថែមទាំងអាចជួយកាត់បន្ថយស្បែក ដែលមានសភាពជាំខ្មៅបានរហូតដល់ពាក់កណ្តាលទៀតផង។

3. សម្អាតសក់: ការអប់ ឬកក់សក់ឱ្យបានស្អាតជាប្រចាំ អាចជួយឱ្យសក់របស់អ្នកមានភាពទន់ភ្លឺរលោង និងមានសុខភាពល្អ ពិសេសនៅក្នុងអាកាសធាតុក្តៅអ្នកគួរតែយកចិត្តទុកដាក់ថែរក្សាវាឱ្យបានខ្លាំងជាងពេលធម្មតា ព្រោះអា-កាសធាតុក្តៅសក់ងាយនឹងទទួលរងនូវការបំផ្លាញជាងពេលណាទាំងអស់។

4. លាងសម្អាតគ្រឿងតុបតែង: នារីភាគច្រើនសុទ្ធតែបានដឹងថា ពួកគេត្រូវលាងសម្អាតគ្រឿងសម្អាងនៅលើផ្ទៃមុខរបស់គេឱ្យបានស្អាតសិនមុននឹងចូលគេង ប៉ុន្តែមិនដឹងថា តើបុរសមួយចំនួនបានដឹងដែរឬទេថា ជែល ប្រេងលាបសក់ឬស្ព្រៃយ៍បាញ់សក់ដែលខ្លួនប្រើនោះក៏អាចនឹងបង្កឱ្យថ្ងាស និងផ្ទៃមុខរបស់អ្នកកើតមុនបានដែរ។ ដូច្នេះមុនចូលគេងអ្នកត្រូវសម្អាតវាឱ្យបានស្អាតជាមុនសិន ដើម្បីចៀសវាងសារធាតុទាំងនោះមកបំផ្លាញសម្រស់របស់អ្នក។

5. កម្ចាត់ស្បែកចាស់ៗ: មនុស្សស្រីតែងកម្ចាត់ស្រទាប់ស្បែកចាស់ៗរបស់គេតាមវិធីផ្សេងគ្នាដូចជាការខាត់ស្បែកជាដើម ប៉ុន្តែប្រសិនបើអ្នកមិនចង់ធ្វើដូចពួកគាត់ទេនោះ អ្នកគ្រាន់តែឧស្សាហ៍ដុសខាត់ស្បែករបស់អ្នកដោយអេប៉ុង ឬស្បៃដុសខ្លួនធម្មតាៗក៏បាន តែត្រូវប្រាកដថាឧបករណ៍ទាំងនោះអាចកម្ចាត់ស្បែកងាប់ចាស់ៗចោលបាន។

6. បុរសក៏ត្រូវការបបូរមាត់ទន់រលោងដែរ: មិនថាការប្រើវិធីណានោះទេ អ្នកត្រូវតែធ្វើយ៉ាងណាការពារបបូរមាត់របស់អ្នកឱ្យគេចផុតពីសភាពគ្រើម ប្រះបែក ស្ងួត គ្មានសំណើម ហើយមានសភាពស្លេកស្លាំង។ សូមចាំទុកណាមិត្តៗសុភាពបុរសទាំងឡាយ បបូរមាត់ទន់មើលទៅរលោងស្អាតមិនមែនចាំបាច់តែសម្រាប់ស្រ្តីនោះទេ តែវាក៏សំខាន់ណាស់ដែរសម្រាប់អ្នក ដើម្បីទាញយកចំណាប់អារម្មណ៍ពីមនុស្សជុំវិញខ្លួន ពិសេសគឺនារីៗតែម្តង។

7. គិតឡើងវិញពីក្រែមកោរពុកមាត់ដែលអ្នកប្រើ: ពេលខ្លះអ្នកអាចនឹងមិនគិតដល់បញ្ហាដ៏តូចនេះនោះទេ ប៉ុន្តែអ្នកប្រហែលជាមិនទាន់ដឹងទេថា ជែលកោរពុកមាត់ធម្មតាៗដែលអ្នកប្រើប្រាស់រាល់ថ្ងៃផ្ទុកជាតិអាល់កុលច្រើន ដែលអាចបណ្តាលឱ្យស្បែករបស់អ្នកស្ងួត និងរោល។ ក្រែមកោរពុកមាត់ដែលល្អបំផុតសម្រាប់ការកោរពុកមាត់គួរតែជាក្រែមដែលមានផ្ទុកសារធាតុក្រែមខ្ពស់ និងអាចជួយឱ្យមានភាពទន់រលោង ងាយស្រួលក្នុងការកោរ។
8. ផ្តល់សំណើមដល់ផ្ទៃមុខ: ការប៉ះពាល់រាល់ថ្ងៃជាមួយកម្តៅថ្ងៃជាកត្តាមួយដែលធ្វើឱ្យស្បែកមុខរបស់អ្នកទទួលរងនូវការបំផ្លាញ ដូច្នេះអ្នកមិនត្រូវភ្លេចពីការផ្តល់សំណើមដល់ស្បែកមុខនោះទេ។ ជ្រើសរើសវិធីផ្សេងក្នុងការផ្តល់សំ-ណើមឱ្យស្បែកមុខរបស់អ្នកក៏បាន ឱ្យតែអ្នកពេញចិត្ត តែត្រូវធ្វើវាឱ្យប្រកបដោយប្រសិទ្ធភាព។

9. ពិនិត្យមើលទម្រង់ចិញ្ចើម: នោះមិនមែនមានន័យថា អ្នកត្រូវគូស ឬកោរចិញ្ចើមរបស់អ្នកឱ្យលេចចេញជារូបរាងតូចស្តើងដូចស្ត្រីនោះទេ តែអ្នកគួរតែពិនិត្យមើលប្រសិនរោមចិញ្ចើមរបស់អ្នកមើលទៅវែងជ្រុលពេល ក្រាស់ខ្លាំង ត្រង់ភ្លឹងគ្មានរាងអីបន្តិចសោះនោះ អ្នកក៏ត្រូវតែកែច្នៃវាបន្តិចដែរ។ ការកាត់រោមចិញ្ចើមដែលវែងខ្លាំងចេញ ការដករោមចិញ្ចើមចេញខ្លះ ដើម្បីឱ្យមើលឃើញរាងចិញ្ចើម វាមិនមែនជារឿងដែលត្រូវខ្មាសគេនោះទេ តែវាជាការល្អទៅវិញទេនៅពេលដែលអ្នកមានចិញ្ចើមមួយគូដ៏គួរឱ្យទាក់ទាញ។

10. ធ្មេញ និងខ្យល់ដកដង្ហើម: មិនត្រូវបណ្តោយឱ្យក្លិនមាត់ និងបញ្ហាសុខភាពមាត់ធ្មេញមកបំផ្លាញភាពជឿជាក់ក្នុងទំនាក់ទំនងរបស់អ្នកនោះទេ។ សូមចាំថាអ្នកត្រូវធ្វើការដុសសម្អាតធ្មេញឱ្យបានពីរដងក្នុងមួយថ្ងៃដើម្បីខ្យល់ដកដង្ហើមល្អ ធ្មេញសស្អាត និងគុណប្រយោជន៍ផ្សេងៗទៀត។

11. សម្អាតក្រចក: មិនចាំបាច់ត្រូវការតុបតែងអីច្រើនដូចនារីភេទនោះទេ ព្រោះបើនិយាយពីរឿងក្រចកជាមួយបុរសៗ វាជាការងាយស្រួលបំផុតក្នុងការថែរក្សាក្រចករបស់អ្នកឱ្យមើលទៅស្អាត ដោយគ្រាន់តែធ្វើការកាត់ រួស សម្អាតក្អែលនៅបរិវេណនោះចេញឱ្យបានស្អាតនោះជាការស្រេចបាត់ទៅហើយ៕

May 7, 2018

តោះ! ទៅទស្សនាផ្ទះចម្លែក នៅក្នុងប្រទេសហូឡង់ទាំងអស់គ្នា

ស្ថាបត្យករនីមួយៗតែងតែរិះរកគំនិតប្លែកៗ ដើម្បីគូរប្លង់ស្ថាបត្យកម្មសំណង់អគារលំនៅឋាន ឬអគារពាណិជ្ជកម្មនានា ដែលជាការបន្សល់ទុកនូវស្នាដៃ ក៏ដូចជាការចងចាំសម្រាប់ប្រជាជនរបស់ខ្លួន។ ពេលនេះយើងសូមនាំមិត្តអ្នកអានទាំងអស់ទៅទស្សនា និងស្វែងយល់ពីសំណង់ស្ថាត្យកម្មលំនៅឋានថ្មីមួយកន្លែងដែលមានលក្ខណៈខុសប្លែកពីសំណង់លំនៅឋានទូទៅ ហើយវារឹតតែអស្ចារ្យបំផុត ខណៈដែលសំណង់លំនៅឋានដែលស្ថិតនៅប្រទេសហូឡង់ មានឈ្មោះថាផ្ទះ Cube House ឬហៅជាភាសាហូឡង់ថា Kubuswoningen ត្រូវបានទាក់ទាញភ្ញៀវទេសចរឱ្យទៅទស្សនាជាហូរហែ។

Cube House គឺជាផ្ទះដែលមានលក្ខណៈច្នៃប្រឌិត ត្រូវបានសាងសង់ឡើងនៅទីក្រុង Rotterdam និង Helmond ប្រទេសហូឡង់។ ផ្ទះនេះត្រូវបានរចនាដោយស្ថាបត្យករ លោក Piet Blom ដែលផ្អែកលើគំនិតនៃ “ការរស់នៅលើកដំបូងនៃទីប្រជុំជន” ខណៈដែលលំនៅឋាននៅក្នុងទីក្រុងដែលមានដង់ស៊ីតេខ្ពស់នេះ មានទំហំសមស្របទៅនឹងទំហំដី ដោយរាប់បញ្ចូលពីគោលបំណងចម្បងធំៗរបស់វា ដើម្បីបង្កើនប្រសិទ្ធភាពទំហំនៅខាងក្នុងលំនៅឋាន។

ការរចនារបស់វិចិត្រករនេះ គឺជាតំណាងឱ្យភូមិមួយនៅក្នុងទីក្រុង ដែលផ្ទះនីមួយៗតំណាងឱ្យដើមឈើមួយដើម និងផ្ទះទាំងអស់គ្នាគឺជាព្រៃ។ គំនិតនៃផ្ទះ Cube នៅជុំវិញពិភពលោក គឺត្រូវបានធ្វើឱ្យប្រសើរជាអចិន្ត្រៃយ៍ មានដូចជាទីធ្លាផ្ទះ ទាំងការបែងចែកបន្ទប់នៅខាងក្នុង។ ការសាងសង់សាកល្បងចំនួនបីដង ដោយលើកដំបូងនៅក្នុងឆ្នាំ1974 និងនៅឆ្នាំ1977 ដែលមានផ្ទះចំនួន18 ត្រូវបានសាងសង់នៅក្នុងទីក្រុង Helmond។ ផ្ទះជាច្រើនតម្រូវឱ្យសាងសង់ពីឈើ ប៉ុន្តែមិនត្រូវបានគេដឹងនោះទេ។ ផ្ទះនៅ Rotterdam ត្រូវបានគេរចនាឡើងក្នុងឆ្នាំ1977 ក្នុងផែនការ55 ដែលក្នុងនោះផ្ទះចំនួន39 ត្រូវបានសាងសង់។ ផ្ទះ Cube ស្ថិតនៅក្នុងទីក្រុង Helmond បានហ៊ុមព័ទ្ធដោយរោងមហោស្រពមួយឈ្មោះថា Theatre Speelhuis។

ប្រជាពលរដ្ឋដែលរស់នៅក្នុងផ្ទះនេះ ត្រូវបានរំខានជាញឹកញាប់ដោយសារអ្នកធ្វើដំណើរឆ្លងកាត់ចង់ដឹង ចង់ឃើញ។ ម្ចាស់ផ្ទះម្នាក់បានសម្រេចចិត្តបើក “បង្ហាញផ្ទះគំរូ” ដើម្បីទាក់ទាញ និងផ្តល់ឱកាសឱ្យភ្ញៀវទេសចរមកចូលលេងកម្សាន្ត និងរស់នៅ។ ផ្ទះនេះមានបីជាន់រួមមាន ជាន់ទី1មានបន្ទប់ទទួលភ្ញៀវ និងផ្ទះបាយ ជាន់ទី2 មានបន្ទប់គេងពីរ និងបន្ទប់ទឹក និងជាន់ទី3 ខាងលើបង្អស់ត្រូវបានប្រើជាសួនច្បារតូចមួយ។

ជញ្ជាំង និងបង្អួចនៃផ្ទះនេះ ត្រូវបានគេធ្វើឱ្យមានរូបរាងកោងក្នុងកម្រិត54,7ដឺក្រេ។ ផ្ទៃដីសរុបនៃផ្ទះទាំងមូលមានទំហំប្រហែល100ម៉ែត្រការ៉េ។ នៅឆ្នាំ2006 សារមន្ទីរមួយត្រូវបានបើកនៅក្រោមផ្ទះនោះ ហើយនៅឆ្នាំ2009 ផ្ទះធំៗ ត្រូវបានបំលែងទៅជាសណ្ឋាគារ ហើយក្រោយមកត្រូវបានគ្រប់គ្រងដោយក្រុមហ៊ុនសណ្ឋាគារ Stayokay របស់ប្រទេសហូឡង់៕

May 7, 2018

ធ្វើដូចម្តេចដើម្បីឱ្យស្កប់ស្កល់ចំពោះរូបរាងរបស់ខ្លួន?

សព្វថ្ងៃនេះ គឺជាសម័យនៃការរស់នៅក្នុងពិភពលោកដ៏ទំនើប ហើយប្រហែលមិនខុសទេបើយើងនិយាយថា វាជាសម័យកាលមួយដែលមនុស្សជាច្រើនចង់សម្តែង និងបង្អួតភាពស្រស់ស្អាតដែលខ្លួនមានឱ្យទៅអ្នកដទៃបានឃើញ។ ទោះយ៉ាងណា ពាក្យចាស់បានពោលថា “មនុស្សយើងមិនអាចមានអ្នកណាល្អគ្រប់ទាំង10នោះទេ”។ បើទោះជាយ៉ាងណាក៏យើងគ្រប់គ្នា ជាពិសេសនារីៗទាំងឡាយតែងតែប្រាថ្នាចង់បាននូវរូបសម្រស់ដែលជាទីទាក់ទាញបំផុត។ ប្រាថា្នក៏ប្រាថា្នចុះ ហើយចង់ផ្លាស់ប្តូរក៏ផ្លាស់ប្តូរចុះ ប៉ុន្តែសូមធ្វើយ៉ាងណាកុំឱ្យជ្រុលពេក ត្រូវចេះស្កប់ស្កល់នូវអ្វីដែលអ្នកមានខ្លះផង កុំវង្វេងនឹងភាពចង់ស្អាតចង់ល្អជ្រុលរហូតក្លាយជាទុក្ខដល់ខ្លួនវិញឱ្យសោះ។ ដូច្នេះត្រូវធ្វើដូច-ម្តេចទៅ? សូមតាមដានអត្ថបទបន្ត។

ឈប់! ប្រៀបធៀបខ្លួនអ្នកជាមួយអ្នកដទៃ: អ្នកកាន់តែប្រៀបធៀបខ្លួនអ្នកជាមួយអ្នកផ្សេងច្រើនប៉ុណ្ណា គឺវានឹងធ្វើឱ្យអ្នកមានអារម្មណ៍ថាខ្លួនឯងអាក្រក់ច្រើនដូច្នេះដែរ។ ត្រូវប្រាប់ខ្លួនឯងថា មនុស្សយើងវាមិនដូចគ្នានោះទេ ហើយការយកខ្លួនទៅប្រៀបជាមួយអ្នកដទៃគឺជារឿងដែលគ្មានប្រយោជន៍បំផុត។ កុំរវល់តែតូចចិត្តនឹងដើមទ្រូងរបស់ខ្លួនដែលមើលទៅមានទំហំតូចពេលនៅជិតអ្នកមានដើមទ្រូងធំទ្រលុកទ្រលន់នោះទៀតអី សូមក្រឡេកភ្នែករបស់អ្នកមើលនារីផ្សេងទៀតដែលមានទំហំប្រហាក់ប្រហែលអ្នក នោះអ្នកនឹងស្ងប់ចិត្តវិញជាមិនខាន។

បញ្ឈប់គំនិតអវិជ្ជមានអំពីរាងកាយរបស់អ្នក: អ្នកស្រាវជ្រាវបានធ្វើការអះអាងថា ប្រសិនបើអ្នកនៅតែគិតអំពីអ្វីមួយថាជារឿងអាក្រក់គ្រប់ពេលវេលានោះ វានឹងនៅចាក់ឫសក្នុងគំនិតរបស់អ្នកយ៉ាងជាប់ ហើយជាលទ្ធផលដែលអ្នកទទួលបានគឺគ្មានអ្វីក្រៅពីការដែលធ្វើឱ្យខ្លួនឯងមានអារម្មណ៍មានភាពខ្វះខាតមិនចេះចប់មិនចេះហើយតែប៉ុណ្ណឹង។ ដូច្នេះដើម្បីឱ្យខ្លួនអ្នកមានអារម្មណ៍ពេញចិត្តចំពោះខ្លួនឯងនោះ អ្នកត្រូវឈប់មានគំនិតអវិជ្ជមានចំពោះខ្លួនឯង។ ការគិតវិជ្ជមាន ធ្វើឱ្យអ្នកចេះស្គាល់ពាក្យថា ស្កប់ស្កល់ ហើយក៏ជួយឱ្យមានភាពរីករាយខាងផ្លូវចិត្តផងដែរ។ ប្រសិនបើអ្នកអាចវាយដណ្តើមយកជ័យជម្នះលើគំនិតអវិជ្ជមានបាន នោះអ្នកនឹងមានការរីកចម្រើនឡើង។

រំឭកខ្លួនឯងពីចំណុចល្អដែលអ្នកមាន: ពេលនិយាយដល់ការបំបាត់ចោលគំនិតអវិជ្ជមានចំពោះខ្លួនឯង គឺត្រូវគិតដល់ចំណុចល្អដែលអ្នកមាន។ មិនចូលចិត្តទ្រង់ទ្រាយច្រមុះមែនទេ? ចឹងមើលស្បែកភ្លឺថ្លា រាងដែលស្រឡូនស្អាត សក់ភ្លឺរលោងដែលអ្នកមានវិញល្អជាង។ អន់ច្រមុះ បានស្បែក បានសក់ និងបានរាងយោងដែរ មានអីត្រូវបារម្ភ!!!

កុំភ្លេចអ្វីដែលមាននៅខាងក្នុង: កុំភ្លេចឱ្យសោះថា ភាពល្អស្អាតពិតប្រាកដរបស់មនុស្សម្នាក់ៗគឺស្ថិតនៅផ្នែកខាងក្នុងនៃចិត្តគំនិត ចរិយាមាយាទ ហើយភាពរីករាយរបស់មនុស្សម្នាក់ក៏មិនអាចបញ្ជាក់បានដោយគ្រាន់តែបានឃើញស្នាមញញឹមតែមួយមុខនោះដែរ។

ទទួលស្គាល់ខ្លួនឯង: កុំព្យាយាមផ្លាស់ប្តូរនូវអ្វីដែលមិនអាចផ្លាស់ប្តូរបានទៀតអី និយាយរួមព្រមទទួលយកនូវអ្វីដែលអ្នកមាន។ អ្នកខ្លះបានចំណាយពេលវេលា និងទ្រព្យសម្បត្តិអស់យ៉ាងច្រើន ដើម្បីកែខៃនូវអ្វីដែលមនុស្សភាគច្រើនតែងនិយាយថាមិនស្អាត ឬមិនសមអ៊ីចេះមិនសមអីុចុះ ប៉ុន្តែទីបំផុត មិនថាអ្នកខំកែខៃយ៉ាងណានោះទេ អ្នកនៅតែមិនអាចបំពេញចិត្តអ្នកទាំងនោះបានគ្រប់ជ្រុងជ្រោយនោះទេ៕

May 7, 2018

តោះ! ជិះរថយន្ដ Sky Bike ទស្សនាសម្រស់ទឹកសមុទ្រនាពេលថ្ងៃលិច

យើងជឿថាអ្នកដែលធ្លាប់ធ្វើដំណើរកម្សាន្ដទៅប្រទេសកូរ៉េខាងត្បូង គឺធ្លាប់បានប្រទះឃើញរថយន្ដ Sky Bike ដែលជាប្រភេទយានយន្ដតូចមួយស្រដៀងទៅនឹងរថភ្លើង ហើយជិះកម្សាន្ដអារម្មណ៍លេងនាពេលរសៀលថ្ងៃរៀបលិច គយគន់មើលរលកទឹកសមុទ្រភ្លេកៗប្រដេញគ្នាយ៉ាងសប្បាយក្អាកក្អាយ។ នៅក្នុងអំឡុងពេលរដូវស្លឹកឈើជ្រុះស្លឹកឈើតែងប្ដូរពណ៌យ៉ាងស្រស់ស្អាត គេសង្កេតឃើញមានភ្ញៀវទេសចរជាតិ និងអន្ដរជាតិជាច្រើននិយមជិះលេងកម្សាន្ដ ហើយបានពោលពាក្យសរសើរពីសម្រស់ទេសភាពនៅទីនោះថា ពិតជាស្រស់ស្អាតខ្លាំងណាស់ ប្រៀបបីដូចជាកំពុងតែស្ថិតនៅក្នុងស្ថានសួគ៌ពិតៗ។

ជាទូទៅ មានគូស្នេហ៍ជាច្រើនគូតែងចូលចិត្តជិះរថយន្ដ Sky Bike នេះខ្លាំងណាស់ គឺពួកគេពិតជារំភើបចិត្តខ្លាំងណាស់ ខណៈដែលបានឃើញទេសភាពជុំវិញខ្លួនដែលមានសភាពស្រស់ត្រកាលបែបនេះ។ សូមណែនាំអំពី Daecheon Sky Bike ឬមានឈ្មោះម្យ៉ាងទៀតថា Boryung Sky Bike គឺជាប្រភេទយានយន្ដផលិតថ្មី ដែលមានរូបរាងលក្ខណៈស្រដៀងទៅនឹងរថភ្លើង ដែលអ្នកអាចជិះកម្សាន្ដតាមដងឆ្នេរសមុទ្របាន។ ថ្មីៗនេះ ប្រទេសកូរ៉េខាងត្បូងមានគម្រោងរៀបចំកម្មវិធីដ៏ធំមួយ ដើម្បីអបអរនូវការគាំទ្ររថយន្ដ Sky Bike ថ្មីសន្លាងនោះគឺ Boryeong Mud Festival និងគ្រោងធ្វើឡើងជារៀងរាល់ឆ្នាំ នៅក្នុងខេត្តសុងឆង។ សូមជម្រាបបន្ថែមថា រថយន្ដ Sky Bike អាចជិះកម្សាន្ដបានត្រឹមតែមនុស្ស2ទៅ3នាក់តែប៉ុណ្ណោះព្រោះវាមានទំហំតូច និងអាចធ្វើឱ្យលោកអ្នកស្លុងអារម្មណ៍ជាមួយនឹងទឹកសមុទ្របានយ៉ាងល្អ។

ចំពោះតារាងតម្លៃសំបុត្រសម្រាប់មនុស្សពេញវ័យមានដូចជា ៖
• 2នាក់ /រថយន្ត : 22,000វ៉ុន
• 3នាក់ /រថយន្ដ : 26,000វ៉ុន
• 4នាក់ /រថយន្ត : 30,000វ៉ុន

សម្រាប់សំបុត្រកុមារដែលមានកម្ពស់មិនលើសពី120 CM គឺ ៖
• ក្មេង2នាក់ /រថយន្ដ : 24,000វ៉ុន
• ក្មេងម្នាក់ និងមនុស្សពេញវ័យ2នាក់ ទាំងអស់3នាក់ /រថយន្ដ : 28,000វ៉ុន
• កុមារ2នាក់មនុស្សពេញវ័យ /រថយន្ត : 26,000វ៉ុន
ការធ្វើដំណើរមកកាន់កន្លែងកម្សាន្ដមួយនេះមាន4គោលដៅគឺ៖

1. ជិះឡានក្រុងនៅស្ថានីយរថយន្តក្រុង Express Bus ទៅកាន់ស្ថានីយចំណតរថយន្តក្រុង Boryeong ហើយបន្ទាប់ឡើងឡានក្រុងលេខ100 ឬ101។ ចំណាយពេលជិះឡានក្រុងប្រហែល30នាទី ពី Fountain Plaza ទៅកាន់ Busan Junction ប្រហែល300ម៉ែត្របន្ថែមទៀត។

2. ជិះរថភ្លើងក្រោមដីទៅស្ថានីយ៍យ៉ុងសាន ដោយឡើងរថភ្លើងទៅសេមូល និង មូកាំងវ៉ា។

3. ចំពោះគោលដៅ KTX (ប្រព័ន្ធផ្លូវដែកល្បឿនលឿនបំផុត)គឺត្រូវជិះពីស្ថានីយ៍ Yongsan សូមទៅកាន់ស្ថានីយ៍ Cheonan Asan រួចផ្លាស់ទិសដៅទៅកាន់ស្ថានីយ៍ Daecheon។ ចំណាយពេលប្រហែលជា30នាទី បន្ទាប់មកដើរ300ម៉ែត្រមកឡើងរថយន្ដក្រុងលេខ100 ឬ101 ដើម្បីធ្វើដំណើរទៅបន្ដទីប្រជុំជនឌេហ្សូន ទាំងអស់ឆ្លងកាត់ស្លាកសញ្ញាទាំង6។

4. បើឡើងពីស្ថានីយចំណតរថយន្ដក្រុង Daejeon Seobu intercity bus terminal ចូរជិះរថយន្ដក្រុងទៅកាន់ផ្លូវ Boryeong Promenade បន្ទាប់មកជិះរថយន្ត Daecheon លេខ100 ឬ101៕

May 7, 2018

Author: ធឿន មករា