មនុស្សយើងកើតមកមានស្បែកមុខតែមួយដូច្នេះការថែរក្សាស្បែកមុខជារឿងចាំបាច់បំផុតដែលអ្នកត្រូវយកចិត្តទុកដាក់ ព្រោះថា បើស្បែកមុខមានការខូចខាតហើយនោះ អ្នកត្រូវចំណាយរយៈពេលយូរណាស់ ទើបធ្វើការព្យាបាលឱ្យវាមានសភាពស្រស់ស្អាតវិញបាន។ យ៉ាងណាមិញ ទស្សនាវដ្តី ឡារ៉ែន សូមណែនាំគន្លឹះងាយៗ ដែលអ្នកជំនាញបានណែនាំទុកជាទុនក្នុងការថែរក្សាស្បែកមុខប្រចាំថ្ងៃ។
1. គ្រឿងសម្អាង
នៅពេលមុនចូលគេង ចាំបាច់ត្រូវសម្អាតគ្រឿងសម្អាងចេញពីផ្ទៃមុខឱ្យបានហ្មត់ចត់ព្រោះស្បែករបស់អ្នកក៏ត្រូវការដកដង្ហើមដែរហើយគ្រឿងសម្អាង គឺជាបញ្ហាដ៏ធំដែលរាំងស្ទះរន្ធញើស មិនអាចឱ្យស្បែកមុខដកដង្ហើមបាន និងជាហេតុបង្កឱ្យកើតមុនទៀតផង។ មិនត្រូវមើលរំលងការខាត់ស្បែកមុខ1ដង ឬ2ដងក្នុងមួយសប្តាហ៍នោះទេ ពីព្រោះនេះជាវិធីកម្ចាត់ចោលនូវកោសិកាចាស់ៗ ជួយឱ្យស្បែកមុខភ្លឺរលោង និងស្រស់ថ្លា។
2. ពេលនៅក្រោមពន្លឺថ្ងៃ និងរបៀបថែរក្សាស្បែកមុខ
កុំភ្លេចប្រើឡេបម្រុងស្បែកមុខ ដើម្បីការពារពន្លឺថ្ងៃ យ៉ាងហោចណាស់ក៏ត្រូវប្រើក្រែមដែលមាន SPF50+ ដែរ ទើបអាចការពារស្បែករបស់អ្នកពីកាំរស្មីយូវីបាន (UVA និង UVB)។ ការប៉ះត្រូវកម្ដៅថ្ងៃខ្លាំង ធ្វើឱ្យស្បែកងាយនឹងឡើងជ្រីវជ្រួញ ឡើងស្នាមអុចខ្មៅ និងបញ្ហាស្បែកជាច្រើនទៀត។ អ្នកមិនគួរខកខានក្នុងការប្រើផលិតផលការពារពន្លឺថ្ងៃនោះទេ ទោះជាអាកាសធាតុក្តៅ ឬត្រជាក់ក៏ដោយ ហើយបើត្រូវប៉ះនឹងពន្លឺថ្ងៃខ្លាំង ដូចជា ទៅលេងសមុទ្រវិញនោះ អ្នកគួរជ្រើសរើសប្រើក្រែមលាបមុខ ដែលមាន SPF 30+ យ៉ាងតិច ទើបអាចការពារស្បែកមុខរបស់អ្នកពីកម្តៅថ្ងៃបានល្អ។
3. ទទួលទានចំណីអាហារល្អចំពោះស្បែកមុខ
ប្រយ័ត្នចំពោះការហូបចុក ហើយកុំភ្លេចទទួលទានអាហារស្រស់ៗឱ្យបានច្រើន ដូចជាបន្លែ ផ្លែឈើ និងអាហារសម្បូរដោយជីវជាតិចិញ្ចឹម។ អាហារជំនួយស្បែកឱ្យភ្លឺថ្លាមានដូចជា វីតាមីន C អាហារមានជាតិខ្លាញ់ទាប និងមានជាតិស្ករទាប។ អ្នកមិនគួរទទួលទានអាហារហឹរ អាហារផ្អាប់ អាហារប្រឡាក់ អាហារកំប៉ុង ឬអាហារបំពងច្រើនពេកនោះទេ ព្រោះអាហារទាំងនេះមិនល្អចំពោះសុខភាពស្បែកឡើយ។
4. បង្កើតទម្លាប់ហាត់ប្រាណឱ្យទៀងទាត់
ហាត់ប្រាណឱ្យបានទៀងទាត់ ទោះតិច ឬច្រើន ធ្ងន់ ឬស្រាលក្តី ដើម្បីជំរុញដល់ចរន្តឈាម និងបង្កើនល្បឿននៃការសម្អាតជាតិពុលចេញពីរាងកាយ។ អ្នកមិនចាំបាច់ប្រើផលិតផលលាបលើស្បែកមុខមុន ឬក្រោយពេលហាត់ប្រាណនោះទេ តែបន្ទាប់ពីងូតទឹកសម្អាតខ្លួនរួច អ្នកគួរលាបថូនឺរ ដើម្បីកាត់បន្ថយជាតិខ្លាញ់ និងខាត់ស្បែកមុខ រួចសឹមលាបឡេផ្តល់សំណើមតាមក្រោយ។
5. គេងឱ្យបានគ្រប់គ្រាន់
គេងឱ្យបានយ៉ាងតិច8ម៉ោងក្នុងមួយថ្ងៃ ពុំនោះទេអ្នកមិនបាច់ឆ្ងល់ទេថា តើរង្វង់ភ្នែកឡើងពណ៌ខ្មៅ ហើយភ្នែកឡើងស្លក់ដោយរបៀបណានោះទេ! សូមរំឭកម្តងទៀតថា កុំភ្លេចលាងមុខមុនពេលចូលគេងឱ្យសោះ ហើយសម្រាប់អ្នកដែលមានស្បែកស្ងួត អ្នកគួរលាបឡេផ្តល់សំណើមដល់ស្បែកមុខរបស់អ្នកបន្តិចមុននឹងចូលគេង។
6. ទទួលទានទឹកឱ្យគ្រប់គ្រាន់
រក្សាសំណើមឱ្យស្បែក ដោយការទទួលទានទឹកឱ្យបានគ្រប់គ្រាន់ គឺត្រូវទទួលទានទឹកយ៉ាងតិច8កែវក្នុងមួយថ្ងៃ។ បន្ថែមពីនេះ អ្នកគួរទទួលទានបន្លែ និងផ្លែឈើស្រស់ដែលសម្បូរដោយជាតិទឹកផងដែរ។ កុំភ្លេចលុបមុខដោយទឹកផ្កាកូលាប ដើម្បីជួយកាត់បន្ថយអាការហើមភ្នែកនិងរក្សាតុល្យភាព PH ព្រមទាំងផ្តល់នូវសំណើមដល់ស្បែកមុខថែមទៀតផង។
7. កម្ចាត់មុននៅលើផ្ទៃមុខ
លុបមុខនឹងទឹកក្តៅឧណ្ហៗ មួយថ្ងៃ3ដង ដោយម៉ាស្សាថ្នមៗជារង្វង់ និងប្រើហ្វូមដែលមានជាតិអាល់ហ្វាអីុដស្រុីលអាស៊ីដ។ បន្ទាប់ពីលាងមុខរួច អ្នកគួរទះម៉ាស្សាមុខថ្នមៗឱ្យស្ងួតជំនួសឱ្យការជូតនឹងកន្សែង ហើយត្រូវលាបឡេ ដែលមានជាតិបង់ហ្សូលភឺរ៉ុកស៊ីដ។ មិនត្រូវញេចមុននោះទេ ព្រោះវាអាចធ្វើឱ្យស្បែកមុខឡើងហើម ក្រហម និងបន្សល់ទុកស្នាមនៅលើផ្ទៃមុខរបស់អ្នក។ សម្រាប់អ្នកពាក់វ៉ែនតា គួរប្រាកដថា វ៉ែនតារបស់អ្នកស្អាត ដើម្បីការពារកុំឱ្យខ្លាញ់ជាប់នឹងរន្ធញើសត្រង់បរិវេណជុំវិញភ្នែក និងច្រមុះ។
8. ខាត់ស្បែក
ប្រើគ្រឿងផ្សំបែបធម្មជាតិ ដូចជា រមៀត ពន្លៃ ទឹកដោះគោ ឬក្រូចស្រស់ ដែលជារូបមន្តតាំងពីបុរាណមក។ កុំមើលរំលងវិធីធម្មជាតិទាំងនេះឱ្យសោះ ពីព្រោះវាមានប្រសិទ្ធភាពមិនចាញ់ផលិតផលគីមីនោះទេ ហើយថែមទាំងជួយឱ្យស្បែករបស់អ្នកអាចដកដង្ហើមបានស្រួលកាត់បន្ថយស្ត្រេស និងសម្រួលអារម្មណ៍របស់អ្នកបានល្អទៀតផង។
9. ស្ប៉ា
ទម្លាប់ស្ប៉ាជាប្រចាំ ជាពិសេសអ្នកដែលមានស្បែកស្ងួត គួរប្រើម៉ាសមុខផងទើបល្អ ហើយកុំភ្លេចលាងមុខនឹងទឹកក្តៅឧណ្ហៗមុននឹងចូលគេង។ សូមកុំមើលរំលងការម៉ាស្សាស្បែកមុខ ដោយប្រើប្រេងធម្មជាតិឱ្យសោះ ព្រោះនេះជាវិធីមួយជួយផ្តល់សារធាតុចិញ្ចឹមដល់ស្បែកមុខយ៉ាងល្អ ធ្វើឱ្យស្បែកភ្លឺថ្លា រលោង និងមិនងាយចាស់មុនអាយុទៀតផង។
10. កែទម្លាប់ខ្ជិលច្រអូសចេញ ហើយតាំងចិត្តជាថ្មី ដើម្បីភាពស្រស់ស្អាត
ចំណាយពេលវេលាសម្រាប់ថែរក្សាសម្រស់របស់អ្នកឱ្យបានទៀងទាត់ លៃយ៉ាងណាកុំឱ្យបញ្ហាស្ត្រេសមកដណ្តើមយកសម្រស់របស់អ្នកឱ្យសោះ ដូច្នេះអ្នកគួរឆ្លៀតចូលរួមសកម្មភាពដើម្បីសុខភាព ដូចជា ហាត់ប្រាណ ហាត់យូហ្គា ធ្វើលំហាត់ដង្ហើម ឬធ្វើសមាធិជាដើម។ មិនគួរមើលរំលងបរិវេណជុំវិញថ្គាម និងសាច់ដុំមុខរបស់អ្នកនោះទេ អ្នកគួរហាត់ប្រាណផ្ទៃមុខប្រមាណជា2ទៅ3នាទីក្នុងមួយថ្ងៃ នោះអ្នកនឹងមានស្បែកមុខស្រស់ស្អាត សាច់ចាំដូចក្រមុំ-កំលោះវ័យ18ឆ្នាំជាមិនខាន៕
