Author: ធឿន មករា

នឹងមានអ្វីកើតឡើង នៅពេលអ្នករស់នៅតែក្នុងកន្លែងដែលមានម្លប់រហូត?
ធាតុអាកាសក្ដៅហែងដូចនៅក្នុងប្រទេសយើងធ្វើឱ្យកំលោះៗ ក្រមុំៗជាច្រើននាំគ្នារត់ចូលទៅរកកន្លែងម្លប់ៗនៅក្នុងអគារ។
មនុស្សជាច្រើនចេញពីផ្ទះតាំងពីព្រះអាទិត្យមិនទាន់រះ និងនៅតែក្នុងអគារពេញមួយថ្ងៃរហូតដល់ពេលត្រឡប់ទៅផ្ទះវិញ ក៏នៅក្នុងរថយន្តទៀត ឬទម្រាំតែត្រឡប់ទៅផ្ទះវិញ ព្រះអាទិត្យលិចបាត់ទៅវិញក៏មាន។ អាជីពជាច្រើនត្រូវពាក់អាវធំ អាវដៃវែងក្រាស់ៗ បិទបាំងស្បែកពីកម្ដៅថ្ងៃ។ ថ្ងៃសៅរ៍-អាទិត្យក៏ជ្រើសរើសក្នុងការណាត់ជួបមិត្តភក្តិនៅពេលយប់ច្រើនជាងពេលថ្ងៃទៀតផង ដូច្នេះហើយទើបទង្វើទាំងអស់នេះក្លាយជាចំណុចមួយដែលពិសោធបានថា ទោះជាប្រទេសយើងមានពន្លឺថ្ងៃពេញមួយឆ្នាំទល់មួយឆ្នាំក៏ដោយ ក៏ប្រជាជនយើងជាច្រើននាក់នៅតែគេចចៀសពីការធ្វើឱ្យសាច់ស្បែកប៉ះនឹងកម្ដៅថ្ងៃដែរ ព្រោះតែការនិយមចូលចិត្តស្បែកសស្អាតខ្លាចខ្មៅ ខ្លាចកើតមហារីកស្បែក រហូតទៅដល់វិធីការរស់នៅដែលធ្វើឱ្យសាច់ និងស្បែកមិនសូវបានប៉ះពាល់នឹងពន្លឺថ្ងៃយ៉ាងគ្មានចេតនាជាដើមទៀតផង។
ឥឡូវនេះ យើងនាំគ្នាមកនិយាយពីរឿងរបស់ចំណុចមិនល្អដែលអាចកើតឡើងនៅពេលដែលអ្នករស់នៅតែក្នុងទីម្លប់វិញល្អជាង…។ នៅពេលណាក៏ដោយដែលសាច់ និងស្បែករបស់អ្នកស្ទើរតែមិនបានប៉ះនឹងពន្លឺព្រះអាទិត្យនាពេលព្រឹក និងប៉ះតែជាមួយពន្លឺភ្លើងនៅក្នុងអគាររាងកាយអ្នកអាចនឹងចូលឆ្ពោះទៅរកសភាវប្រថុយនឹងការស្ទើរវីតាមីន D (សភាវស្ទើរ គឺមិនខ្វះទេ តែមានតិចខ្លាំង រហូតសឹងតែមិនគ្រប់គ្រាន់) និងអ្វីដែលគួរឱ្យចម្លែកចិត្តនោះគឺ ក្នុងប្រទេសយើងដែលមានពន្លឺថ្ងៃពេញមួយឆ្នាំគ្រប់រដូវកាល តែបែរជានៅតែឃើញមានអ្នកស្ទើរវីតាមីន D ដ៏ច្រើនដដែល។
នៅពេលរាងកាយស្ថិតក្នុងសភាវស្ទើរ ឬខ្វះវីតាមីន D តើវានឹងកើតផលអាក្រក់ដល់រាងកាយមនុស្សយើងយ៉ាងណាខ្លះ?
ចាប់ផ្ដើមតាំងពីរឿងរបស់បណ្ដុំគ្រោងឆ្អឹង និងសាច់ដុំដែលអាចនឹងមិនរឹងមាំមួនពេញលេញស្មើនឹងអ្នកដែលបានទទួលវីតាមីន D ច្រើនគ្រប់គ្រាន់ ដូច្នេះទើបអាចនឹងមានសាច់ដុំមិនមាំមួនរហូតប្រថុយប្រថាននឹងការដួលញឹកញាប់ជាងប្រក្រតី។ ក្រៅពីនេះគេនៅរកឃើញទៀតថា វីតាមីន D ជាវីតាមីនដែលមានសម្ពន្ធជាមួយរោគមហារីកដល់ទៅ4ប្រភេទទៀតផង។
សម្រាប់អ្នកដែលគេចចៀសពីការប៉ះពាល់នឹងពន្លឺថ្ងៃ សំងំនៅតែក្នុងបន្ទប់ងងឹតៗដែលបិទបង្អួចគ្រប់ពេលវេលានោះ នៅមានភាពប្រថុយប្រថានក្នុងការខ្វះអ័រម៉ូនប្រភេទខ្លះ ព្រោះនៅក្នុងពន្លឺថ្ងៃពេលប៉ះនឹងស្បែកមនុស្សយើង វានឹងជួយជំរុញឱ្យរាងកាយសាងអ័រម៉ូនជាច្រើនប្រភេទឡើង មិនថាតែមេឡានីន ដែលជួយឱ្យអ្នកគេងលក់បានស្រួល ឬអ័រម៉ូនសេរ៉ូថូនីនដែលធ្វើឱ្យរាងកាយរបស់អ្នកមានអារម្មណ៍ថាមានសេចក្ដីសុខ ក្លៀវក្លាស្វាហាប់ (អ្នកដែលចូលចិត្តធ្វើការងារនៅកណ្ដាលទីវាលច្រើនតែជាមនុស្សរួសរាយស្រស់ស្រាយរាក់ទាក់ និងស្វាហាប់គ្រប់ពេលវេលា) ដូច្នេះហើយទើបអ្នកដែលមិនសូវប៉ះពាល់នឹងពន្លឺថ្ងៃអាចប្រថុយនឹងបញ្ហាគេងមិនសូវលក់ ពិបាកក្នុងការគេងលក់ ឬអាចដល់ថ្នាក់ប្រថុយប្រថាននឹងសភាវសោកសៅទៀតផង។
វិធីបន្ថែមវីតាមីន D ដល់រាងកាយអាចធ្វើបានយ៉ាងងាយៗ មិនលំបាកលំបិនឡើយ ដោយគ្រាន់តែចេញទៅខាងក្រៅអគារដើម្បីឱ្យស្បែករបស់អ្នកបានប៉ះជាមួយពន្លឺព្រះអាទិត្យនៅអំឡុងម៉ោង 9ៈ00 – 15ៈ00 រយៈពេល 5នាទីរៀងរាល់ថ្ងៃ នឹងជួយបន្ថែមវីតាមីន D ដល់រាងកាយបានច្រើនដល់ទៅ 90%។ ការឱ្យរាងកាយបានកែច្នៃវីតាមីន D ពីស្រទាប់ស្បែកដោយខ្លួនឯង គឺជាវិធីមួយដ៏មានប្រសិទ្ធភាពក្នុងការបន្ថែមវីតាមីន D ដល់រាងកាយខ្លាំងបំផុត។
យ៉ាងណាក៏ដោយ បើសិនអ្នកណានៅតែមានកង្វល់ក្នុងរឿងពន្លឺថ្ងៃដែលក្ដៅខ្លាំងជ្រុលពេកនៅក្នុងស្រុកយើង ដែលទោះជាលាបឡេការពារកម្ដៅថ្ងៃហើយក៏នៅតែមិនហ៊ានចេញទៅឱ្យស្បែកប៉ះនឹងពន្លឺថ្ងៃដោយត្រង់ទៀតនោះ សាកល្បងជ្រើសរើសប្រើវិធីបន្ថែមវីតាមីន D ដល់រាងកាយតាមរយៈអាហារការហូបចុកបាន ដោយមុខម្ហូបដែលមានវីតាមីន D មានដូចជា ខ្លាញ់ថ្លើមត្រីទឹកដោះគោស្រស់ ត្រីសាល់ម៉ុន ត្រីប្លាធូ ត្រីធូណា សាច់ហ៊ែម ស៊ុតមាន់ សាច់ជ្រូកចិញ្ច្រាំ សាច់មាន់ ផ្សិតចិន និងឈីសជាដើម តែការបន្ថែមវីតាមីន D ដោយការទទួលទានអាហារជួយឱ្យរាងកាយទទួលបានវីតាមីន D ត្រឹមតែ 10%ប៉ុណ្ណោះ។
ដូច្នេះ ការធ្វើកិច្ចការងារនៅខាងក្រៅផ្ទះខ្លះមិនថាតែចេញទៅដើរលេង លេងកីឡានៅទីវាលស្រោចដំណាំ ហាលខោអាវ ហែលទឹក ឬកិច្ចការងារផ្សេងៗទៀតក្នុងអំឡុងពេលថ្ងៃក្នុងរយៈពេលខ្លីៗត្រឹមតែ 5នាទីក្នុងមួយថ្ងៃ ក៏អាចជួយឱ្យលោកអ្នកមិនប្រថុយប្រថាននឹងសភាវស្ទើរវីតាមីន D បានដែរ៕
May 18, 2018
តោះទៅ Motor Café Live Bands ម្ហូបឆ្ងាញ់ពិសា ភេសជ្ជៈត្រជាក់ជាប់ចិត្ត
អស់រយៈពេលជាច្រើនឆ្នាំមកហើយដែល Motor Café ត្រូវបានគេស្គាល់ថា ជាភោជនីយដ្ឋានរាត្រីដ៏ទំនើប និងល្បីឈ្មោះនៅក្នុងរាជធានីភ្នំពេញ។ ដោយឡែកពេលនេះ Motor Café បានពង្រីកសាខាថ្មីមួយទៀតស្ថិតនៅអគារលេខ58 ផ្លូវ337 សង្កាត់បឹងកក់1 ខណ្ឌទួលគោក រាជធានីភ្នំពេញ ជាប់នឹងភោជនីយដ្ឋាន NEEDA ដោយបើកបម្រើចាប់ពីម៉ោង5ល្ងាចរហូតដល់ម៉ោង12យប់ ជាមួយនឹងម្ហូបអាហារសរុបប្រមាណ100មុខ ដោយផ្ដោតសំខាន់ទៅលើមុខម្ហូបបែបវេស្ទឺន ក៏ដូចជាភេសជ្ជៈចម្រុះសរុបប្រមាណជាង60មុខ។
អ្វីដែលជាលក្ខណៈពិសេសរបស់ Motor Café គឺក្រៅពីមានម្ហូបអាហារ និងភេសជ្ជៈយ៉ាងសម្បូរបែប ដែលពោរពេញទៅដោយរសជាតិឈ្ងុយឆ្ងាញ់ជាប់ចិត្ត ក្រោមការរង់ចាំទទួលស្វាគមន៍បម្រើពីសំណាក់បុគ្គលិកប្រុសស្រីជាច្រើននាក់ ដែលមានភាពរួសរាយរាក់ទាក់នោះ គឺការរចនាដេគ័រទាំងផ្នែកខាងក្នុង ក៏ដូចជាខាងក្រៅហាង ដែលមានលក្ខណៈបែបក្លាស៊ីក និងទាន់សម័យជាទីបំផុត ដោយផ្តោតសំខាន់ទៅលើគំនិតច្នៃប្រឌិតប្រៀបដូចជាកំពុងស្ថិតនៅក្នុងពិភពនៃទីលានប្រណាំងរថយន្តយ៉ាងដូច្នេះដែរ។ ក្លោងទ្វារនៃច្រកចូលមានដាក់តាំងលម្អនូវម៉ូតូធំម៉ាកល្បីតម្លៃរាប់ម៉ឺនដុល្លារ រួមជាមួយការយកបន្ទះដែកស្មិតមកច្នៃជាសម្បុកឃ្មុំ បន្ថែមដោយពន្លឺភ្លើងពណ៌ដ៏ស្រស់ស្អាត។ កៅអីអង្គុយ គឺជាប្រភេទកៅអីរថយន្ត ប្រណាំងពិតៗ តុមូលខ្នាតតូច និង Counter ក្រឡុកស្រា ត្រូវបានរចនាឡើងក្នុងរូបភាពជា កង់រថយន្ត នៅលើពិដានមានលម្អទៅដោយគ្រឿងបន្លាស់រថយន្តកែច្នៃគួរជាទីទាក់ទាញដោយឡែក ឆាកប្រគំតន្ត្រី ដែលមានក្រុមអ្នកចម្រៀង និងតន្ត្រីករអាជីពចំនួន3ក្រុម ជាជនជាតិហ្វីលីពីន និងជនជាតិខ្មែរ ឡើងប្រគំកំដរអារម្មណ៍អតិថិជននោះ ក៏ត្រូវបានរចនាឡើងក្នុងរូបភាពជាកុងទ័ររថយន្តប្រណីតផងដែរ ជាមួយនឹងការលម្អបន្ថែមដោយពន្លឺភ្លើងពណ៌ចម្រុះយ៉ាងស្រស់ស្អាត។
ចំពោះ Motor Café ដែលស្ថិតនៅទីតាំងខាងលើនេះ គឺទទួលបានការចាប់អារម្មណ៍គាំទ្រពីសំណាក់អតិថិជនជាខ្លាំង។ រាល់ម្ហូបអាហារទាំងអស់ត្រូវបានផ្សំពីវត្ថុធាតុដើមបែបធម្មជាតិហើយភាគច្រើននាំចូលពីបរទេស ដូចជា សាច់គោអូស្ត្រាលី សាច់គោអាមេរិក ត្រីសាល់ម៉ុន និងគ្រឿងសមុទ្រផ្សេងៗ ជាពិសេសដូចជាប្រភេទអយស្ទ័រ គឺត្រូវបាននាំចូលមកពីប្រទេសកាណាដា បារាំង និងសមុទ្រប៉ាស៊ីហ្វិក។ ចំពោះស្រាក្រហមត្រូវបាននាំចូលមកពីប្រទេសអូស្រ្តាលី បារាំង អាហ្សង់ទីន និងប្រទេសជីលី។ ដោយឡែកចំពោះប្រភេទស្រាវីស្គី គឺត្រូវបាននាំចូលមកពីប្រទេសបារាំង និងប្រទេសអាល្លឺម៉ង់ដែលជាប្រភពស្រាវីស្គីផ្ទាល់តែម្ដង។
ងាកមកចាប់អារម្មណ៍ជាមួយការផ្តល់សេវាកម្មពិសេសជាលក្ខណៈឯកជនវិញ Motor Café ក៏មានទទួលរៀបចំទទួលបម្រើផងដែរ ដូចជាការជួបជុំទទួលទានអាហារជាក្រុមនៅក្នុងបន្ទប់ VIP បិទជិត នៅជាន់ខាងលើ ដែលអាចទទួលសមាជិកបានរហូតដល់ទៅ16នាក់, បន្ទប់ VIPនៅជាន់ផ្ទាល់ដី អាចទទួលសមាជិកបានចំនួន10នាក់, សាឡុង VIP អាចទទួលបានសមាជិកចំនួន14នាក់ រួមជាមួយនឹងតុវែង VIP ចំនួន3ទីតាំងផ្សេងទៀត ដែលស្ថិតនៅពីមុខឆាកប្រគំតន្ត្រី។ ក្រៅពីនេះ ក៏មានទទួលរៀបចំកម្មវិធីខ្នាតធំ និងមធ្យមផងដែរ ដូចជា កម្មវិធីជប់លៀងកម្មវិធីខួបកំណើត ឬកម្មវិធីអបអរសាទរគម្រប់ខួបក្រុមហ៊ុន ឬខួបអាពាហ៍ពិពាហ៍ជាដើម ដែលអាចទទួលសមាជិកបានរហូតដល់ប្រមាណ150នាក់ ជាមួយនឹងការទទួលកុម្ម៉ង់មុខម្ហូបតាមតម្រូវការ ដូចជា មុខម្ហូបក្នុងបញ្ជីរាយនាមក្នុងសៀវភៅប្រចាំហាង ក៏ដូចជាអាហារប៊ូហ្វេផងដែរ។
គួរបញ្ជាក់ផងដែរថា Motor Café មាន2សាខា ដោយសាខាទី1ស្ថិតនៅអគារលេខ76 ផ្លូវសុធារស រាជធានីភ្នំពេញ ដែលអាចទាក់ទងបានតាមទូរស័ព្ទលេខ 010 999 717 / 096 9999 724 និងសាខាទី2ស្ថិតនៅអគារលេខ58 ផ្លូវ337 សង្កាត់បឹងកក់1 ខណ្ឌទួលគោក រាជធានីភ្នំពេញ។ សម្រាប់ការសាកសួរព័ត៌មានបន្ថែម ឬធ្វើការកក់ទីកន្លែងទុកជាមុន សូមទំនាក់ទំនងតាមរយៈទូរស័ព្ទលេខ ៖ 011 56 69 69 / 096 97 86 668 ឬតាមរយៈ Facebook: MOTOR CAFE៕

May 18, 2018
ប្រកាសអាសន្ន! គ្រោះថ្នាក់ពីការសាក់លើស្បែក
ការសាក់ស្បែកទៅតាមភាពពេញនិយម ឬតាមអបិយជំនឿរបស់បុគ្គល រមែងទទួលបានផលល្អ និងផលអាក្រក់ដែលអាចកើតឡើង។ ដូច្នេះសូមមកស្វែងយល់ពីគ្រោះថ្នាក់អាក្រក់ ដែលកើតឡើងពីការចាក់សាក់ ដែលមានដូចជា អាចឆ្លងមេរោគរលាកថ្លើមប្រភេទB ជំងឺឃ្លង់ និងជំងឺអេដស៍ជាដើម តែបើចង់កាន់តែច្បាស់ទៀតនោះសូមតាមដានជាមួយនឹងអត្ថបទលម្អិតដូចខាងក្រោមនេះ ៖
លោកគ្រូពេទ្យជំនាញខាងសុខភាពស្បែកបានប្រាប់ឱ្យដឹងថា ការសាក់ស្បែកជារូបភាព ឬជាខ្សែគូសវាសដែលមើលទៅមានក្បាច់ស្រស់ស្អាតដូចជា រូបខ្លា រូបផ្កា រូបអាថ័នអាគម ដែលកំពុងតែមានភាពពេញនិយម ហើយមានសាក់ពណ៌ខ្មៅ លើកលែងតែសាក់រូបភាពផ្សេងៗដែលមានពណ៌ចម្រុះដូចជា ពណ៌ខៀវ ក្រហម លឿង បៃតង ដើម្បីឱ្យមានភាពស្រស់ស្អាតនៅក្នុងការសាក់។ ការសាក់ស្បែកអាចធ្វើឱ្យឆ្លងនូវវីរុសរោគផ្សេងៗដែលគួរតែប្រយ័ត្នឱ្យមែនទែនព្រោះគ្រោះថ្នាក់ដែលបង្កដោយទឹកថ្នាំពណ៌ដែលយកមកសាក់នៅលើស្បែក នឹងធ្វើឱ្យស្បែកកើតមានការប្រតិកម្ម បណ្ដាលឱ្យស្បែកឡើងអាលែកហ្ស៊ី ហើយមានកន្ទួលពងក្រហមៗនៅលើស្បែក។ លើសពីនេះទៅទៀត វាក៏បង្កឱ្យមានភាពរមាស់នៅនឹងស្បែកក្បែរកន្លែងដែលមានស្នាមសាក់ប្រសិនបើមិនបានព្យាបាល ឬបើនៅតែបណ្ដែតបណ្ដោយយូរ អាចធ្វើឱ្យស្បែករោលកាន់តែខ្លាំងឡើងបាន។
ក្រៅពីនេះ ខណៈពេលដែលស្បែកត្រូវកម្ដៅថ្ងៃក្នុងរយៈពេលយូរ ឬជាញឹកញយ អាចបណ្ដាលឱ្យអ្នកកើតមានបញ្ហាស្បែកដូចជា កើតភ្លឺ ដែលអាចមើលឃើញថា ស្បែកកើតមានស្នាមសៗភ្លឺនៅត្រង់បរិវេណមានស្នាមសាក់ និងការចាក់សាក់ស្បែក បានហុចផលអាក្រក់ដូចជា ការឆ្លងមេរោគរលាកថ្លើមប្រភេទB រោគរបេង រោគឃ្លង់ និងឆ្លងជំងឺអេដស៍ជាដើម ដោយសារតែការប្រើម្ជុលសាក់ដែលមិនមានអនាម័យ មិនបានឆ្លងកាត់ការសម្លាប់មេរោគត្រឹមត្រូវ ឬការប្រើប្រាស់ម្ជុលសាក់រួមគ្នាជាដើម។
លោកគ្រូពេទ្យជំនាញខាងសុខភាពស្បែកក៏បានបញ្ជាក់បន្ថែមទៀតថា មុនពេលសម្រេចចិត្តចាក់សាក់នៅលើស្បែក អ្នកគួរតែពិចារណាចំពោះផលល្អ និងផលអាក្រក់ ដែលអាចកើតឡើងពីការចាក់សាក់ដូចពោលខាងលើជាមុនសិន ហើយត្រូវស្វែងរកព័ត៌មានលម្អិតពីកន្លែងចាក់សាក់ដែលមានអនាម័យត្រឹមត្រូវ និងមានជំនាញច្បាស់លាស់ រួមមានបច្ចេកទេសច្បាស់លាស់ដែលអាចទុកចិត្តបានមុនពេលធ្វើការសាក់ព្រោះថា នៅពេលដែលអ្នកសាក់នៅលើស្បែកហើយនោះ ហើយបើអ្នកមានអារម្មណ៍ចង់លុបសាក់ ឬមិនចូលចិត្តរូបសាក់ដែលបានសាក់រួចនោះ គឺនាំឱ្យមានបញ្ហា ឬពិបាកសាក់ម្តងហើយសាក់ម្តងទៀត នាំឱ្យឈឺសាច់ច្រើនដង ឬអាចមានបញ្ហាដល់សុខភាពស្បែក និងសុខភាពរាងកាយទៀតក៏អាចថាបានដែរ។ ស្បែកដែលបានសាក់រួចហើយ មិនអាចត្រឡប់មកមានសភាពដើមវិញបានទេ ដូច្នេះអ្នកគួរតែថែរក្សាស្បែកឱ្យបានល្អទើបជារឿងត្រឹមត្រូវ។ អ្នកគប្បីទៅពិនិត្យសុខភាពស្បែកឱ្យបានច្រើនដងទើបល្អ ព្រោះការលុបស្នាមសាក់នៅលើស្បែកដោយកាំរស្មីឡាស៊ែរ ក៏អាចបង្កឱ្យមានផ្លែសាច់ ដែលត្រូវបានហៅថា“Keloid” ជាផ្លែសាច់ដែលមានដំបៅ ហើយត្រូវចំណាយពេលព្យាបាល និងចំណាយអស់ថវិកាកាន់តែច្រើនថែមទៀតផងដែរ ឬអាចមានបញ្ហារហូតឈានដល់ការកើតមានជំងឺមហារីកស្បែកថែមទៀតផង៕

May 17, 2018
ភោជនីយដ្ឋាន NEEDA មកដល់ទួលគោកហើយ
ភោជនីដ្ឋាន NEEDA (សាខាទួលគោក) ស្ថិតនៅអគារលេខ58 ផ្លូវ337 សង្កាត់បឹងកក់1 ខណ្ឌទួលគោក រាជធានីភ្នំពេញ ចាប់បើកបម្រើជូនជារៀងរាល់ថ្ងៃ ពីម៉ោង7ព្រឹក ដល់ម៉ោង 11យប់។ អស់រយៈពេលជិត5ឆ្នាំមកហើយ ដែល NEEDA ត្រូវបានអតិថិជនទទួលស្គាល់ថា គឺជាភោជនីយដ្ឋាន ដែលផ្តល់ជូននូវអាហារបែបខ្មែរ-ថៃពិតៗ ពីសំណាក់មេចុងភៅជាជនជាតិខ្មែរ និងថៃ ដែលមានបទពិសោធន៍យូរឆ្នាំក្នុងការចម្អិនអាហារ ប្រកបដោយអនាម័យខ្ពស់ និងមានរសជាតិឆ្ងាញ់។ ភោជនីយដ្ឋាន NEEDA មានបម្រើជូនអាហារ3ពេលក្នុង1ថ្ងៃ ដែលមានមុខម្ហូបប្រមាណជាង100មុខ មានបង្អែម និងភេសជ្ជៈជាច្រើនប្រភេទ ដែលលោកអ្នកអាចធ្វើការកុម៉្មង់តាមតម្រូវការ។
ម្ហូបពិសេសៗនៅ NEEDA មានដូចជា ៖ មឿងខាំ ប៉ាកម៉ នីដា បុកល្ហុងថៃ ប្រហុកអាំងលើជ្រុញ សម្លម្ជូរគ្រឿង តុមយាំបង្កង សម្លប្រហើរ ឆាផ្កាខាត់ណាខៀវ និងឆាម្រះព្រៅ។ល។ មុខម្ហូបទាំងនេះ ប្រសិនបើលោកអ្នកបានទៅដល់ភោជនីយដ្ឋាន NEEDA ហើយ លោកអ្នកគួរតែសាកល្បង។
នៅទីនេះ លោកអ្នកអាចមានជម្រើសក្នុងការអង្គុយទទួលទានអាហារនៅខាងក្នុងបន្ទប់កញ្ចក់សថ្លាបិទជិត ឬនៅខាងក្រៅជាលក្ខណៈក្រុមគ្រួសារ ជួបជុំមិត្តភក្ដិ ឬបែបឯកជនផ្ទាល់ខ្លួនក៏បាន។
NEEDA មិនត្រឹមតែជាកន្លែងលក់ម្ហូបអាហារតែមួយមុខនោះទេ តែក៏ជាទីកន្លែងមួយដែលអាចជួបជុំពិភាក្សាការងារផងដែរ។ លោកអ្នកអាចប្រើប្រាសទីតាំង NEEDA ទាំងមូលសម្រាប់រៀបចំកម្មវិធីប្រជុំកម្រិត VIP និងពិធីជប់លៀងក៏បាន ដែលអាចទទួលភ្ញៀវបានប្រមាណ130នាក់។ បន្ថែមពីនេះ NEEDA ក៏មានរៀបចំជាអាហារប៊ូហ្វេទៅដល់គេហដ្ឋាន ឬកន្លែងធ្វើការជាដើម។
និយាយពីរឿងចំណតនៅភោជនីយដ្ឋាន NEEDA វិញ លោកអ្នកនឹងអស់ក្ដីកង្វល់ទៀតហើយ ធានាថាទីធ្លាចំណតធំទូលាយ ដែលអាចចតយានយន្តរបស់លោកអ្នកប្រកបដោយសុវត្ថិភាព។
នៅពេលដែលលោកអ្នកបានអញ្ជើញទៅដល់ទីតាំងខាងលើនេះហើយ ជឿជាក់ថាពិតជាទទួលបាននូវអារម្មណ៍ស្រស់ស្រាយជាមួយនឹងបរិយាកាសទាំងមូល ក្រោមការតុបតែងលម្អដែលមានភាពច្នៃប្រឌិតខ្អស់។ ចូលទៅដល់ខាងក្នុងភ្លាម លោកអ្នកកាន់តែមានអារម្មណ៍ថា ស្រឡះភ្នែកជាមួយនឹងការរចនាផ្ទៃជញ្ជាំងពណ៌សក្បុស លាយឡំនឹងពន្លឺចង្កៀងអគ្គិសនីដ៏ស្រទន់ ជាមួយនឹងតុ កៅអី សាឡុង ដែលមានពណ៌ស្រស់ស្រាយ! ហ៊ានធានាថា លោកអ្នកពិតជាប្លែកភ្នែកជាក់ជាមិនខាន។ លោកអ្នកអាចធ្វើការកក់ទីតាំងសម្រាប់កម្មវិធីផ្សេងៗ ឬសាកសួរព័ត៌មានបន្ថែមបានតាមរយៈទូរស័ព្ទលេខ ៖ 096 844 33 79 , 092 62 44 77 ឬតាមរយៈ Facebook : Needa Bar/Restaurant៕

May 17, 2018
អ្នកដឹងទេថា អាកាសធាតុក្ដៅបែបនេះ គួរតែងូតទឹកក្ដៅឧណ្ហៗ ឬទឹកត្រជាក់ល្អ?
អាកាសធាតុក្ដៅបានចូលមកដល់ទៀតហើយ ដែលចាប់ផ្ដើមតាំងពីខែមីនាមកម្ល៉េះ។ មានអ្នកខ្លះទៀត ចាប់ផ្ដើមមានអាការចាញ់អាកាសធាតុ កើតជំងឺគ្រុនក្ដៅជាដើម ហើយអ្នកខ្លះទៀតក៏ងាយនឹងផ្ដាសាយផងដែរ ដោយសារតែធូលីដីហ៊ុយនៅលើផ្លូវជារៀងរាល់ថ្ងៃ ក៏ដូចជា ការគួបផ្សំនៃការទទួលទានទឹកមិនបានគ្រប់គ្រាន់ជាដើម។
រដូវក្ដៅបែបនេះ តើមិត្តទាំងអស់គ្នាគួរជ្រើសរើសក្នុងការងូតទឹកក្ដៅ ឬទឹកត្រជាក់ទើបល្អសម្រាប់សុខភាព និងធ្វើឱ្យអារម្មណ៍ស្រស់ស្រាយឡើងវិញ? ថ្ងៃនេះទស្សនាវដ្តី ឡារ៉ែន សូមជម្រាបជូនពីអត្ថបទសុខភាពដ៏ល្អមួយសម្រាប់ថែទាំសុខភាពនៅក្នុងក្រុមគ្រួសាររបស់អ្នកក្នុងរដូវក្តៅ។
ការងូតទឹកក្ដៅ និងទឹកត្រជាក់
ទឹកក្ដៅដែលបានពោលខាងលើនេះ មិនបានសំដៅដល់ទឹកក្ដៅខ្លាំង ក្ដៅពុះ ឬក្ដៅរាប់រយអង្សារនោះទេ គឺយើងសំដៅ ទៅលើទឹកដែលមានសីតុណ្ហភាពក្ដៅឧណ្ហៗ ដែលស្ថិតនៅក្នុងកម្រិត37អង្សាសេ។ ប្រសិនបើអ្នកងូតទឹកឱ្យបុត្រធីតារបស់អ្នកនៅពេលព្រឹក ហើយដើរចូលមកក្នុងបន្ទប់ដែលមានម៉ាស៊ីនត្រជាក់ មានខ្យល់ត្រជាក់ នោះអ្នកគួរតែងូតទឹកក្ដៅនៅក្នុងសីតុណ្ហភាពចន្លោះពី38-39អង្សារ។ ការកំណត់កម្រិតទឹកក្ដៅ គឺទៅតាមចំណង់ចំណូលចិត្តរបស់មនុស្សម្នាក់ៗ អ្នកខ្លះទៀតនិយមងូតទឹកក្ដៅដល់ទៅ40អង្សាសេឯណោះ តែ ឡារ៉ែន សូមផ្តល់យោបល់ថា វាហាក់ដូចជា ក្ដៅពេកហើយ និងងាយធ្វើឱ្យរលាកស្បែក ធ្វើឱ្យស្បែកឡើងក្រហមថែមទៀតផង។
ចំពោះការងូតទឹកត្រជាក់ ក៏ត្រូវមានការកំណត់សីតុណ្ហភាពដូចគ្នាផងដែរ។ រាងកាយមនុស្សយើងមានសីតុណ្ហភាពនៅក្នុងខ្លួន37អង្សាសេ ទើបអាចបញ្ចុះកម្ដៅបានត្រឹមតែ10អង្សាសេតែប៉ុណ្ណោះ ពោលគឺនៅត្រឹម27អង្សាសេ។ អ្នកខ្លះទៀតបានប្រើប្រាស់ទឹកកកជាមួយទឹកធម្មតា ដើម្បីជួយឱ្យមានអារម្មណ៍ស្រស់ស្រាយ ត្រជាក់ស្រួលខ្លួន ក៏ប៉ុន្ដែការដែលងូតទឹកត្រជាក់ពេកក៏មិនល្អដែរ។ តើអ្នកគួរតែណែនាំកូនៗ និងសមាជិកក្នុងគ្រួសារឱ្យងូតទឹកនៅក្នុងសីតុណ្ហភាពបែបណាទើបល្អ? សូមពិចារណាលើចំណុចដូចខាងក្រោមនេះ។
គុណប្រយោជន៍នៃការងូតទឹកក្ដៅឧណ្ហៗ
ការងូតទឹកក្ដៅឧណ្ហៗ មានគុណប្រយោជន៍ជួយសម្រួលចលនាលំហូរឈាមនៅក្នុងសរសៃបានយ៉ាងប្រសើរ ឈាមអាចរត់ទៅកាន់គ្រប់សព្វកន្លែងនៃរាងកាយ និងជួយបន្ថយអាការហើមប្រអប់ជើង ហើមកជើង តែបានជួយសរសៃឈាមនៅផ្នែកខ្នងបានល្អ ក្រោយពេលដែលអ្នកត្រឡប់មកពីហាត់ប្រាណ រត់ ដើរ ឬបញ្ចេញកម្លាំងកាយជាដើម។
យ៉ាងណាមិញ អ្នកមិនគួរងូត ឬត្រាំទឹកក្ដៅក្នុងរយៈពេលយូរពេកនោះទេ ព្រោះវាអាចបណ្ដាលឱ្យស្បែករបស់អ្នកស្ងួត និងងាយខូចដោយសារកម្ដៅក្ដៅរបស់ទឹកនៅក្នុងរយៈពេលលើសកំណត់។ ខ្លះទៀត អាចបណ្ដាលឱ្យឈាមកក ឬស្ទះឈាម ដែលជាហេតុបណ្ដាលឱ្យប្រព័ន្ធប្រសាទចុះអន់ខ្សោយ និងងាយកើតមានចំពោះមនុស្សវ័យចំណាស់ ឬអ្នកដែលមានជំងឺលើសឈាម។
ដូច្នេះការងូតទឹកក្ដៅឧណ្ហៗ ស័ក្តិសមបំផុតចំពោះការថែរក្សាសុខភាពរាងកាយ ឬក្រោយពេលហាត់ប្រាណ ដើម្បីឱ្យសាច់ដុំបានសម្រាក និងជួយសម្រួលផ្លូវអារម្មណ៍មុនពេលចូលគេង។ សូមជម្រាបបន្ថែមថា លោកអ្នកអាចលាបក្រែមការពារស្បែកឱ្យកូនៗរបស់អ្នកមុនពេលងូតទឹកក្ដៅឧណ្ហៗ នោះក៏ជាការប្រសើរដែរ ដើម្បីឱ្យរន្ធរោមបើកចំហបានល្អ។
គុណប្រយោជន៍នៃការងូតទឹកត្រជាក់
ជាការពិតណាស់ទឹកដែលមានសីតុណ្ហភាពត្រជាក់ បានជួយដាស់ដំណើរការធ្វើការរបស់ប្រព័ន្ធប្រសាទឱ្យភ្ញាក់ឡើង ឱ្យរាងកាយមានអារម្មណ៍ស្រស់ស្រាយ ស្វាងពីសភាពល្វើយនឿយហត់អស់កម្លាំង ហើយក្រៅពីនោះក៏ជួយផ្ចិតរន្ធរោម បណ្ដឹងស្បែកឱ្យណែននៅក្នុងអំឡុងពេលងូតទឹក ហើយវាក៏បានជួយបន្ថែមឱ្យស្បែកមានសភាពទន់ល្មើយថែមទៀតផង។
ជាពិសេសចំពោះកុមារតូចៗ ការដែលអ្នកឱ្យកូនៗរបស់អ្នកងូតទឹកត្រជាក់ពេក ក៏អាចហុចផលមិនល្អចំពោះសុខភាពរាងកាយដូចគ្នាដែរ ជាពិសេស គឺការកក់សក់ជាមួយទឹកត្រជាក់ អាចបណ្ដាលឱ្យសក់ឆាប់ស្ងួត សក់ងាយខូច និងធ្វើឱ្យសុខភាពស្បែកក្បាល និងសក់ចុះអន់ខ្យោយហើយងាយកើតជំងឺផ្ដាសាយជាដើម។
ដូច្នេះការងូតទឹកត្រជាក់នៅពេលព្រឹក ជាវិធីសាស្ត្រដ៏ល្អមួយ និងសមស្របសម្រាប់រដូវក្ដៅនេះ តែក៏មិនអាចងូតទឹកត្រជាក់ជារៀងរាល់ថ្ងៃដែរ អ្នកគប្បីលាយជាមួយទឹកធម្មតា ឬលាយទឹកឱ្យមានសីតុណ្ហភាពសមល្មមទៅនឹងបរិយាកាសខាងក្រៅ។ ដូចដែរបានជម្រាបជូនខាងលើនេះ លោកអ្នកអាចពិចារណាបានហើយថា គប្បីគួរឱ្យកូនៗ និងសមាជិកក្នុងគ្រួសាររបស់អ្នកងូតទឹកក្នុងសីតុណ្ហភាពបែបបណាទើបល្អចំពោះសុខភាពនោះ៕

May 17, 2018
4សញ្ញាគ្រោះថ្នាក់នៃអាការ “បេះដូងគាំងភ្លាមៗ”
ទោះជាជំងឺមហារីក ជំងឺទឹកនោមផ្អែម ជំងឺថ្លើម ឬជំងឺក្រលៀន គឺជាជំងឺដ៏គួរឱ្យភ័យខ្លាចមែនក៏ដោយ តែមិនអាចប្រៀបធៀបជាមួយនឹងអាការ “បេះដូងគាំងភ្លាមៗ” បានឡើយ… ដែលមិនអាចប្រៀបបាននោះគឺ រយៈពេលដែលបង្ហាញអាការព្រោះភាគច្រើនមនុស្សទាំងឡាយច្រើនតែមិនបានដឹងខ្លួនមុនឡើយថា កំពុងតែកើតជំងឺបេះដូង ទើបមិនដឹងថា ខ្លួនកំពុងមានភាពប្រថុយប្រថានក្នុងការកើតអាការគាំងបេះដូងភ្លាមៗ ដូច្នេះទើបមិនមានការត្រៀមខ្លួនអ្វីទាំងអស់ ហើយមានពេលត្រឹមតែមិនប៉ុន្មាននាទីប៉ុណ្ណោះមុននឹងទៅដល់ដៃគ្រូពេទ្យ ធ្វើឱ្យឱកាសរស់រានមានជីវិតពីសភាវគាំងបេះដូងភ្លាមៗនេះមានតិចបំផុត។ ដូច្នេះថ្ងៃនេះទំព័រសុខភាពរបស់ទស្សនាវដ្ដី ឡារ៉ែន សូមនាំយកវិធីសង្កេតមើលបែបងាយៗថា តើខ្លួនអ្នក ឬអ្នកនៅជុំវិញខ្លួនអ្នកកំពុងស្ថិតក្នុងសភាវគាំងបេះដូងភ្លាមៗឬទេ? ព្រោះមិនថាខ្លួនអ្នក ឬអ្នកណាក៏ដោយសុទ្ធតែមានភាពប្រថុយប្រថានក្នុងការកើតអាការនេះទាំងអស់។
គោលការណ៍ងាយៗ ចូរនឹកដល់ពាក្យថា F A S T ជាប់ជានិច្ច
F = Face
ចង្វែកមាត់ម្ខាងនឹងធ្លាក់ចុះ(មើលទៅឃើញដូចរាងពេបមាត់ម្ខាង)ដោយមិនដឹងមូលហេតុ និងមិនអាចបញ្ជាឱ្យចង្វែកមាត់ត្រឡប់មកដូចដើមវិញបាន។
A = Arms
មិនអាចលើកដៃឡើងបានដំណាលគ្នាទាំងសងខាង ឬមិនអាចលើកដៃម្ខាងណាឡើងបាន។
S = Speech
វិធីការនិយាយ ការបញ្ចេញសំឡេងប្រែ-ប្រួល។ សុខៗ ក៏ចាប់ផ្ដើមនិយាយលែងច្បាស់ និយាយយឺតៗ ខុសទម្លាប់ ស្ដាប់មិនយល់។
T = Tongue
អណ្ដាតឡើងរឹង ឬអណ្ដាតអាចនឹងឡើងរមួល ដោយរាងកាយមិនអាចបញ្ជាទិសដៅរបស់អណ្ដាតបានឡើយ។
8 អាការដែលប្រថុយនឹងការ “គាំងបេះដូងភ្លាមៗ”
1. ញ័រដើមទ្រូង: បេះដូងលោតញាប់ មិនទៀងទាត់ ពេលខ្លះអាចមានអាការហត់ដង្ហក់រកកល់ខ្យល់គ។
2. ឆាប់ហត់: នៅក្នុងសភាពពិតវិញ អាការឆាប់ហត់ក៏មានច្រើនមូលហេតុដែរ តែក៏ជាអាការមួយក្នុងចំណោមអាការរបស់ជំងឺបេះដូងដូចគ្នា។ ជាអាការហត់ក្នុងលក្ខណៈឆាប់រហ័ស ដកដង្ហើមលឿន ពេលខ្លះដង្ហក់ស្ទើរតែនិយាយមិនកើត។ ត្រូវសង្កេតមើលផងថា តើមានសំឡេងខណៈពេលដកដង្ហើមដែរឬទេ?។ បើមានអាការឆាប់ហត់ជាប់ជាប្រចាំ គឺចូលក្នុងសញ្ញាប្រថុយនឹងជំងឺបេះដូងហើយ ត្រូវប្រញាប់ទៅជួបគ្រូពេទ្យដើម្បីធ្វើការពិនិត្យវិនិច្ឆ័យ និងរកវិធីព្យាបាលតទៅ។
3. ហើមជើង: នៅពេលការបឺតបាញ់ឈាមរបស់បេះដូងដំណើរការមិនល្អ ក៏អាចធ្វើឱ្យកើតអាការហើមជើងខុសប្រក្រតី ដែលពេលខ្លះក៏មិនដឹងពីមូលហេតុដែរ។
4. ចុកណែនក្នុងដើមទ្រូង: អាការចុកដើមទ្រូង ឬណែនដើមទ្រូងនេះ មនុស្សជាច្រើនអាចច្រឡំនឹងជំងឺទឹកអាស៊ីតក្នុងក្រពះហូរបញ្រ្ចាស់ ដោយសារតែពេលខ្លះក៏អាចមានអារម្មណ៍ថាឈឺចុក ឬចុករាលទៅដល់ដើមដៃបានដូចគ្នា។ លក្ខណៈរបស់ការចុកនឹងប្រៀបដូចមានអ្វីមកសង្កត់ពីលើដើមទ្រូង ដូច្នេះត្រូវចេះសង្កេត និងញែកអាការឱ្យបានត្រឹមត្រូវ។
5. ងងឹតមុខ វិល និងខ្យល់គរញឹកញាប់: ដោយសារតែបេះដូងមានការឈប់ដំណើរការ ទើបធ្វើឱ្យបាត់ស្មារតីមួយខណៈពេល។ បើកើតអាការបែបនេះញឹកញាប់ មិនគួរបណ្ដោយឡើយ ត្រូវប្រញាប់ទៅជួបគ្រូពេទ្យភ្លាមៗ។
6. ភ្ញាក់នៅពេលអធ្រាត្រ ព្រោះពិបាកដកដង្ហើម: ជួនកាលយើងក៏ត្រូវការខ្យល់ដកដង្ហើមច្រើនជាងប្រក្រតីដែរ ទើបធ្វើឱ្យគេងមិនបាន ជាហេតុធ្វើឱ្យត្រូវភ្ញាក់ឡើងនៅពេលយប់ជ្រៅដើម្បីដកដង្ហើម ឬក្អកឱ្យមានអារម្មណ៍ថាធូរស្រាលឡើង។
7. ពេលគេងផ្ងារហើយពិបាកដកដង្ហើម: គ្រប់ពេលដែលទម្លាក់ខ្លួនគេងរាបស្មើ ឬគេងផ្ងារ ច្រើនតែពិបាកដកដង្ហើម ឬមានអារម្មណ៍ណែនថប់រហូតដកដង្ហើមមិនប្រក្រតី។
8. ចូលចិត្តចូលបន្ទប់ទឹកកណ្ដាលយប់: បើភ្ញាក់ឡើងចូលបន្ទប់ទឹកនៅពេលយប់ជ្រៅដែលមិនមែនត្រឹមតែបត់ជើងតូច តែនៅមានអាការផ្សេងរួមជាមួយផងនោះ ត្រូវប្រញាប់ទៅជួបគ្រូពេទ្យដើម្បីពិនិត្យពីមូលហេតុនេះហើយ។
វិធីជួយសង្រ្គោះអ្នកដែលអាចធ្លាក់ក្នុងសភាវគាំងបេះដូងភ្លាមៗ
នៅពេលជារឿងដែលពាក់ព័ន្ធជាមួយបេះដូង“ភាពលឿនរហ័ស” គឺជារឿងសំខាន់។ ដំបូងគេអ្នកគួរប្រញាប់ប្រាប់ទៅបុគ្គលិកមន្ទីរពេទ្យ ឬអង្គភាពសង្រ្គោះបន្ទាន់ ឬហៅរថយន្តសង្គ្រោះដែលនៅជិតបំផុត ដើម្បីដឹកជនរងគ្រោះទៅមន្ទីរពេទ្យឱ្យបានលឿនបំផុត។ ក្នុងអំឡុងរង់ចាំការជួយសង្គ្រោះ គួរឱ្យជនរងគ្រោះគេងផ្ងារ បែរមុខទៅម្ខាង(ខាងណាក៏បាន) និងសង្កេតមើលអាការជាដំណាក់ៗ បើចាប់ផ្ដើមមានអាការបេះដូងលែងដើរហើយ ត្រូវប្រញាប់ធ្វើការជួយសង្គ្រោះដោយចលនា CPR ជាបន្ទាន់។
វិធីការពារសភាវគាំងបេះដូងភ្លាមៗ
មនុស្សជាច្រើនមានក្ដីប្រហែសក្នុងជីវិត មិនចូលទៅទទួលការពិនិត្យរាងកាយប្រចាំឆ្នាំឡើយព្រោះយល់ថា រាងកាយនៅមាំទាំល្អ គ្មានជំងឺដង្កាត់អ្វីឡើយ ហើយថែមទាំងហាត់ប្រាណជាប្រចាំទៀតផង តែជំងឺនេះក៏មិនមែនថាមិនដែលបង្ហាញសញ្ញាដាស់តឿនមុននោះឡើយ ព្រោះបើអ្នកមានអារម្មណ៍ថាឈឺចុក ឬណែនដើមទ្រូងខណៈពេលហាត់ប្រាណ ដើរ ឬរត់ឡើងជណ្ដើរច្រើនជាន់ រាំរែក ឬចាប់ផ្ដើមធ្វើកិច្ចការណាធ្ងន់ៗនោះគឺមានន័យថា អ្នកចាប់ផ្ដើមមានសុខភាពបេះដូងលែងមាំទាំហើយ ដូច្នេះគួរប្រញាប់ចូលទៅទទួលយកការត្រួតពិនិត្យបេះដូងជាបន្ទាន់។ ក្រៅពីនេះ រឿងអាហារការហូបចុកក៏សំខាន់ដែរ ព្រោះបើទទួលទានអាហារដែលបង្កឱ្យកើតមានខ្លាញ់ញ៉ុកណែនក្នុងសរសៃឈាមច្រើនជ្រុលពេក ដូចជា សាច់ជាប់ខ្លាញ់ អាហារដុតអាំងរួមទាំងនំបង្អែមដែលផ្អែមខ្លាំងផ្សេងៗនោះ វាក៏ជាមូលហេតុដែលបង្កើនភាពប្រថុយប្រថានក្នុងការកើតអាការគាំងបេះដូងទាន់ហន់បានដូចគ្នា៕
May 17, 2018
GRILLED MARINATED FRESH TUNA STEAK
មុខម្ហូប Grilled Marinated Fresh Tuna Steak ជាមុខម្ហូបបែបបារាំងមួយមុខទៀតរបស់ភោជនីយដ្ឋាន Amigo ដែលស្ថិតនៅក្នុងសណ្ឋាគារ Feliz ដែលជាមុខម្ហូបទទួលបាននូវការពេញនិយម និងគាំទ្រជាខ្លាំងពីសំណាក់អតិថិជនជាតិ និងអន្តរជាតិ។ ដូច្នេះ សូមក្រឡេកមកពិនិត្យមើលពីរបៀបធ្វើ និងគ្រឿងផ្សំ ដែលណែនាំដោយមេចុងភៅធំ លោក ធី វណ្ណថន ដូចតទៅ។
គ្រឿងផ្សំ
• ត្រីធូណា (កង់កណ្តាល) 200ក្រោម
• ជីវ៉ាន់ស៊ុយ
• គ្រាប់ជីវ៉ាន់ស៊ុយ
• ខ្ទឹមបារាំង
• ខ្ទឹមស
• ខ្ទឹមក្រហម
• ការ៉ុត
• ត្រពាំងបារាំង
• ត្រប់វែង
• សណ្តែកបៃតង
• ដំឡូងបារាំង
• គ្រឿងផ្សំរសជាតិ ៈ អំបិល ស្ករ ម្រេច
• ប៊័រ
• ស្រាស
• ទឹកដោះគោស្រស់
• Cream
• ទឹក Cream Sauce
របៀបធ្វើទឹក Cream Sauce
យកខ្ទឹមស ខ្ទឹមក្រហម និងខ្ទឹមបារាំងមកចិញ្ច្រាំឱ្យម៉ដ្ឋ រួចយកទៅឆាជាមួយប៊័រ និងបន្ថែមដោយស្រាសបន្តិច ទឹកដោះគោស្រស់ និង Cream មួយសន្ទុះជាការស្រេច។
របៀបធ្វើ ស្តេកត្រីធូណា
ដំបូងត្រូវយកត្រីធូណាមកលាងសម្អាតឱ្យស្អាតរួចទុកឱ្យស្រស់ទឹក។ យកជីវ៉ាន់ស៊ុយ គ្រាប់ជីវ៉ាន់ស៊ុយ ខ្ទឹមស ខ្ទឹមក្រហម និងខ្ទឹមបារាំងមកចិញ្ច្រាំឱ្យម៉ដ្ឋ រួចយកទៅប្រឡាក់ជាមួយនឹងត្រីធូណា ហើយផ្អាប់ទុករយៈពេល5នាទី ទើបយកត្រីធូណាទៅអាំងនៅលើបន្ទះអាំងសាច់ រយៈពេល10-15នាទីតាមចំណូលចិត្ត។ ចំណែកបន្លែសម្រាប់ទទួលទានជាមួយត្រីធូណាអាំងមានដូចជា ការ៉ុត ត្រពាំងបារាំង ត្រប់វែង សណ្តែកបៃតង និងដំឡូងបារាំងត្រូវយកទៅឆាជាមួយនឹងប៊័រ ដោយបើកភ្លើងតិចល្មម រួចបន្ថែមគ្រឿងផ្សំរសជាតិដូចជា អំបិល ស្ករ និងម្រេច កូរចូលគ្នាឱ្យសព្វល្អ ហើយដួសដាក់ក្នុងចានឱ្យមានរបៀប។ បន្ទាប់មកទើបដាក់ដុំត្រីធូណាអាំងពីលើ និងស្រោចដោយទឹក Cream Sauce ពីលើជាការស្រេច។ មុខម្ហូបនេះស័ក្តិសមទទួលទានជាមួយនឹងស្រាក្រហមគឺកាន់តែមានរសជាតិឆ្ងាញ់ពិសាឡើងថែមទៀត៕
May 17, 2018
លោក ខេម ស៊ូក្រាញននៀលនៅ ថោន ទោះស្ថិតក្នុងកាលៈទេសៈណាក៏ដោយ
មានតារាចម្រៀងប្រុស-ស្រីជាច្រើនណាស់ ដែលមានបំណងចង់ក្លាយជាតារាចម្រៀងស្របច្បាប់មានកុងត្រានៅក្នុងផលិតកម្មហង្សមាស ដែលជាក្រុមហ៊ុនដ៏ធំ និងល្បីឈ្មោះជាងគេនៅក្នុងព្រះរាជាណាចក្រកម្ពុជា។ ដោយឡែកសម្រាប់ការគិតនេះហាក់បញ្ច្រាសទិស និងផ្ទុយស្រឡះពីគំនិតរបស់កំពូលតារាចម្រៀងសំឡេងស្អក លោក ខេម ដែលបានអះអាង និងតាំងចិត្តមិនថាស្ថិតនៅក្នុងកាលៈទេសៈណានោះទេ លោកដាច់ខាតមិនចាកចោលផលិតកម្ម ថោន នោះទេ ព្រោះផលិតកម្មមួយនេះ បានផ្តល់ឱកាស និងសាងកេរ្តិ៍ឈ្មោះឱ្យលោកមានភាពល្បីល្បាញដល់សព្វថ្ងៃនេះ។
កំពូលតារាចម្រៀងប្រុស សំឡេងស្អកប្រចាំផលិតកម្ម ថោន លោក ប៉ុន សុណារិន ហៅ ខេម ដែលកំពុងល្បីលេចធ្លោជាមួយបទចម្រៀងច្រៀងឆ្លងឆ្លើយជាមួយ មាស សុខសោភា សម្រាប់ឱកាសបុណ្យចូលឆ្នាំ ក្រោមចំណងជើងថា “ឱ្យអត់ស្រឡះទៅ” នោះ បានចេញមុខអះអាងថា រូបលោកមិនមានគម្រោងប្ដូរទ្រនំចាស់ផ្លាស់ទៅទ្រនំថ្មី ដូចតារាល្បីៗមួយចំនួនឡើយ ព្រោះលោកគិតថា អាចមានកំណើតរហូតមកដល់ពេលនេះ គឺដោយសារតែផលិតកម្ម ថោន ដែលជាអ្នកផ្ដល់ឱ្យគ្រប់យ៉ាងទាំងអស់។
នៅក្នុងជំនួបជាមួយអ្នកសារព័ត៌មានកាលពីពេលកន្លងទៅនោះថា “ខ្ញុំឃើញហង្សមាស គាត់យកតារាល្បីៗទៅច្រើនមែន ព្រោះជាយុទ្ធសាស្ដ្ររបស់គាត់ ដោយសារគាត់មានកម្មវិធីប្រគំតន្ដ្រីច្រើន។ ចំពោះរូបខ្ញុំផ្ទាល់ ខ្ញុំចេញច្រៀងនៅរដូវក្ដៅតាំងពីខែតុលាម៉្លេះ រវល់ជាប់គ្នារហូត គ្រាន់តែកម្មវិធីខ្លះមិនផ្សាយផ្ទាល់(Live)។ មានគេសួរខ្ញុំដែរថា មានគម្រោងទៅណាដែរឬអត់? រឿងនេះខ្ញុំសូមបញ្ជាក់ថា សម្រាប់ពេលនេះ ខ្ញុំគ្មានបំណងថានឹងចេញពីថោន ទៅណាទេ ព្រោះអីមុនចូលថោន ខ្ញុំរកលុយទិញតែកង់កញ្ចាស់មួយជិះសឹងតែមិនបាន ប៉ុន្តែឥឡូវពេលនេះខ្ញុំមានផ្ទះនៅ មានឡានជិះដូចគេ គឺខ្ញុំអាចនិយាយបានថា ដោយសារ ថោន គាត់ឱ្យខ្ញុំចូលច្រៀង ទើបខ្ញុំមានអនាគតរហូតមានថ្ងៃនេះ។ អ៊ីចឹងខ្ញុំឯណាថាចង់ចេញពី ថោន ទៅចូលផលិតកម្មផ្សេងទៀតនោះ ខ្ញុំគិតហើយថា លើកលែងតែគាត់បញ្ឈប់ខ្ញុំលែងឱ្យច្រៀងតែម្ដង អាហ្នឹងចាំយើងគិតតទៅទៀត។ តែបើដូចពេលនេះ បើទោះជា ហង្សមាស ហៅ ក៏ខ្ញុំមិនទៅដែរ”។
គួរបញ្ជាក់ផងដែរថា សម្រាប់លោក ខេម បានផ្តើមចេញពីជីវិតជាអ្នករត់ម៉ូតូឌុប និងជាអ្នករកត្រី នៅខេត្តកំពង់ឆ្នាំង ដោយមានម្តាយចាស់ជរាជ្រកក្នុងដំបូលខ្ទមរខេករខាកដ៏តូចមួយតែប៉ុណ្ណោះ។ ប៉ុន្តែបន្ទាប់បានអភិវឌ្ឍខ្លួនមកជាតារាចម្រៀងរស់នៅលើដីក្រុងភ្នំពេញ ជាពិសេសក្រោយពេលលោកបានចូលជាតារាចម្រៀងនៅផលិតកម្ម ថោន ជីវិតរបស់លោក ព្រមទាំងសមាជិកគ្រួសារ ត្រូវបានផ្លាស់ប្ដូរមកជាល្អប្រសើរវិញ ដោយពេលនេះក្រៅពីមានផ្ទះវីឡា រថយន្តទំនើប លោក ខេម សល់លុយរាប់ម៉ឺនដុល្លារ សូម្បីតែស្នេហាក្រៅឆាករបស់លោក ក៏ត្រូវបានគេដឹងថាជានារីដ៏ស្រស់ស្អាត និងកំពុងរស់នៅប្រទេសបារាំងផងដែរ៕

May 17, 2018
ដំណាំ ប្រពាយ
បន្លែប្រពាយ ឬឈ្មោះខាងវិទ្យាសាស្ត្រហៅថា Psophocarpus tetragonolobus Linn ជារុក្ខជាតិប្រភេទវល្លិ៍ ដែលគ្មានសាច់ឈើ ដើមរបស់វាលូតតោងវារព័ទ្ធ មានលក្ខណៈជាស្លឹករៀងឆ្លាស់គ្នា មានស្លឹកតូច3សន្លឹក មានលក្ខណៈរាងពងក្រពើ គល់ស្លឹកមូល និងចុងស្លឹកស្រួចផ្កាមានលក្ខណៈតូចៗមានពណ៌សលាយស្វាយ ឯផ្លែជាបន្លែដែលមានរាងទ្រវែងមាន4ឆែកតាមបណ្ដោយផ្លែ ដែលមានប្រវែងប្រមាណពី10ទៅ12សង់ទីម៉ែត្រ ខាងក្នុងមានគ្រាប់មូលរលោង និងមានពណ៌ស។ ដើមប្រពាយអាចដាំបានពេញ1ឆ្នាំ មិនថារដូវណាក៏ដោយ។
បន្លែប្រពាយ គេអាចនាំយកផ្លែខ្ចីៗ ត្រួយ(ឬស្លឹកខ្ចី) និងផ្កាខ្ចីៗមកធ្វើជាអាហារបាន ហើយថែមទាំងមានគុណសម្បត្តិខាងថ្នាំបំបាត់អាការផ្សេងៗបាន ដូចជា ឫសប្រើសម្រាប់ថែបំប៉នរាងកាយ បំបាត់អាការទន់ខ្សោយអស់កម្លាំង បំបាត់អាការក្ដៅក្នុងស្រេកទឹក ព្យាបាលមុន និងរោគសើស្បែកប្រភេទខ្លះបានទៀតផង។
** ការដាំដុះ
• ការត្រៀមដី: ដើមប្រពាយជារុក្ខជាតិវល្លិ៍ដែលមានឫសចាក់ជ្រៅកម្រិតមធ្យម ដូច្នេះការត្រៀមដីគួរភ្ជួរដីឱ្យបានជ្រៅប្រមាណជា25-30សង់ទីម៉ែត្រ។ ហាលដីទុកចោលប្រមាណជា7ថ្ងៃ ដាក់ជីលាមកគោ ឬជីកំប៉ុស រួចជ្រួយដីឱ្យល្អិត លើកជារងដោយមានទុកផ្លូវដើរ និងត្រៀមដាំជាស្រេច។
• វិធីដាំដុះ: ការដាក់ដាំប្រើចម្ងាយពីដើមមួយទៅដើមមួយ60សង់ទីម៉ែត្រ និងចម្ងាយពីជួរមួយទៅជួរមួយ100សង់ទីម៉ែត្រ។ ប្រពាយគេនិយមដាំដោយគ្រាប់ បន្ទាប់ពីត្រៀមដីរួចរាល់ហើយ ចូរជីករន្ធដាក់ដាំតាមចម្ងាយដាំ ទម្លាក់គ្រាប់ពូជចូលក្នុងរន្ធនីមួយៗប្រមាណជា5គ្រាប់ ជម្រៅប្រមាណជា2សង់ទីម៉ែត្រ រោយដីគ្របពីលើស្ដើងៗ ហើយគ្របពីលើរងដោយចំបើងស្ងួត រួចស្រោចទឹកឱ្យសើមជោក។ បន្ទាប់ពីគ្រាប់ពូជលាស់ឡើងប្រមាណជា1-2សប្ដាហ៍ ចូរដកបំបែកចេញឱ្យនៅសល់ក្នុងមួយគុម្ពតែ3ដើម។
ចំណែកការធ្វើទ្រើងប្រពាយ មានវិធីធ្វើបានច្រើនបែប ដូចជា ទ្រើងទោល ដោតត្រង់គុម្ពប្រពាយទុកឱ្យដើមប្រពាយវារតោងឡើង ឬទ្រើងបែបគូ គឺដោតបង្គោលទ្រើងតាមបណ្ដោយរង ហើយចាប់ចុងបង្គោលទ្រើងចងជាគូៗ រួចយកសំណាញ់មកគ្របពីលើក៏បាន តែត្រូវឧស្សាហ៍ចាប់ចុងត្រួយដើមប្រពាយឱ្យព័ទ្ធនឹងបង្គោលទ្រើង ដើម្បីឱ្យដើមប្រពាយឆាប់ឡើងពេញទ្រើង។
** វិធីមើលថែទាំរក្សា
• ការស្រោចទឹក: ស្រោចទឹកមួយថ្ងៃ1-2ដង រៀងរាល់ថ្ងៃ។
• ការដាក់ជី: បន្ទាប់ពីដាក់ដាំបាន30ថ្ងៃរួចហើយ ចូរចាប់ផ្ដើមដាក់ជីកំប៉ុសសរីរាង្គក្នុងបរិមាណ100ក្រាមក្នុង1គុម្ព រៀងរាល់15ថ្ងៃ ឬអាស្រ័យលើភាពសម្បូរជីវជាតិរបស់ដី។
• ការការពារ និងការកម្ចាត់សត្រូវដំណាំ: ចូរបាញ់ទឹកត្រាំឱសថបុរាណបណ្ដេញសត្វល្អិតដែលត្រាំពីដើមស្ដៅរៀងរាល់7ថ្ងៃម្ដង ដើម្បីការពារ និងកម្ចាត់សត្រូវដំណាំ ដូចជា ដង្កូវស៊ីត្រួយ មេរោគក្រា ដង្កូវស៊ីក្ដិប និងក្នុងករណីដែលឃើញមានការឆ្លងរាលដាលរបស់ដង្កូវស៊ីត្រួយធ្ងន់ធ្ងរនោះ អាចបាញ់ទឹកត្រាំថ្នាំឆួល លាយជាមួយកាកស្ករត្នោតបន្ថែម ដោយបាញ់ក្នុងអំឡុងម៉ោង08ៈ00-09ៈ00ព្រឹក រៀងរាល់ថ្ងៃរហូតទាល់តែលែងមានការឆ្លងរាលដាល ហើយក្រៅពីនោះចូរឧស្សាហ៍កម្ចាត់ពពួកស្មៅ ដើម្បីកុំឱ្យកើតការដណ្ដើមទឹក និងជីវជាតិពីដី ហើយថែមទាំងអាចជាកន្លែងស្នាក់នៅរបស់សត្វល្អិតសត្រូវដំណាំទៀតផង។
** ការប្រមូលផល
នៅពេលដើមប្រពាយមានអាយុបាន70-80ថ្ងៃ ក៏អាចប្រមូលផលបានហើយ ដោយគួរបេះក្នុងអំឡុងពេលដែលថ្ងៃមិនសូវក្ដៅ ចង់បេះនៅពេលព្រឹក ឬពេលល្ងាចក៏បាន ព្រោះស្រទាប់ផ្លែប្រពាយហាក់ដូចជារាងស្ដើង បើបេះក្នុងអំឡុងពេលដែលថ្ងៃក្ដៅខ្លាំង នឹងធ្វើឱ្យស្រទាប់ផ្លែប្រពាយឆាប់ជាំ ហើយកន្ត្រក ឬកញ្ច្រែងដែលទុកដាក់ផ្លែប្រពាយនោះ ក៏គួរទ្រាប់ដោយស្លឹកចេកផង ដើម្បីការពារភាពស្រស់ខ្ចីរបស់ផ្លែប្រពាយ៕

May 11, 2018
តើដឹងទេថា ស្រីៗចំណាយពេលអស់ប៉ុន្មាន ដើម្បីសម្អិតសម្អាងសម្រស់ក្នុងមួយឆ្នាំៗ?
នារីៗមិនមែនគ្រាន់តែជាភេទមួយដែលចេះតែគិតច្រើនតែម្នាក់ឯងប៉ុណ្ណោះទេ តែថែមទាំងជាភេទនៃភាព “ប៉ិនកង្វល់” ទៀតផង ជាពិសេសក្នុងរឿងរូបសម្ផស្ស និងភាពស្រស់ស្អាតតែម្តង។ នារីៗកង្វល់រាប់ពាន់រាប់ម៉ឺនរាប់សែនមុខ សព្វបែបយ៉ាង តាំងពីខ្លាចមុខឡើងខ្លាញ់ ខ្លាចសក់ក្បាលកន្ទ្រីងកន្ទ្រើងខ្លាចកើតមុន ខ្លាចត្រគាកធំពេក ខ្លាចស្លៀកពាក់មិនស្អាតជាដើម។ តើក្នុងមួយឆ្នាំៗ នារីៗខាតបង់ពេលវេលាក្នុងរឿងទាំងនេះអស់ប៉ុន្មានទៅ? ជាមធ្យមក្នុង1ឆ្នាំនារីៗខាតពេលចំពោះរឿងនេះប្រមាណជា627ម៉ោង និង28នាទី ឬប៊ិសតែស្មើនឹងរយ:ពេល1ខែ នេះគឺជាលទ្ធផលនៃការពិនិត្យស្រាវជ្រាវរបស់ Invista ក្នុងវេបសាយ ដេលី មេល កាលពីពេលកន្លងមកនេះ។ លទ្ធផលនេះ បានមកពីការពិនិត្យស្រាវជ្រាវលើស្ត្រីជនជាតិអង់គ្លេសចំនួនជាង2,000នាក់ ក្នុងប្រធានបទថា តើពួកនាងមានកង្វល់ក្នុងរឿងអ្វីខ្លះ? ហើយតើរឿងណាស៊ីពេលច្រើនជាងគេបំផុត? បើមិត្តអ្នកអានដែលជាសុភាពនារីចង់ដឹងពីចម្លើយនោះ សូមតាមដានជាបន្តទៀត៖
ក្តីកង្វល់បែបនារីៗ ក្នុង1សប្តាហ៍ ៖
• កង្វល់ព្រោះមិនដឹងថា ត្រូវស្លៀកសម្លៀកបំពាក់បែបណា ចំណាយពេលអស់50នាទី។
• កង្វល់ថា តើសម្លៀកបំពាក់ដែលស្លៀកហើយនេះ មើលទៅស្អាតហើយឬនៅ ចំណាយពេលអស់1ម៉ោង32នាទី។
• កង្វល់ថា តើសម្លៀកបំពាក់ដែលស្លៀកហើយនេះ បិទបាំងក្បាលពោះបានល្អឬ អត់ ចំណាយពេលអស់1ម៉ោង26នាទី។
• កង្វល់ថា មិនដឹងជាស្លៀកឈុតក្នុងណាមួយល្អ ចំណាយពេលអស់39នាទី។
• កង្វល់ខ្លាចធាត់ ចំណាយពេលអស់1ម៉ោង46នាទី។
• កង្វល់ខ្លាចស្គមជ្រុលពេក ចំណាយពេលអស់22នាទី។
• កង្វល់ខ្លាចខ្លួនហើម ចំណាយពេលអស់1ម៉ោង1នាទី។
• កង្វល់រឿងដើមទ្រូងធំជ្រុលពេក ចំណាយពេលអស់37នាទី។
• កង្វល់រឿងដើមទ្រូងតូចពេក ចំណាយពេលអស់32នាទី។
• កង្វល់រឿងកើតស្នាមអុចខ្មៅ ចំណាយពេលអស់56នាទី។
• កង្វល់រឿងពណ៌ស្បែកមិនស្ថិតស្ថេរគង់វង្ស ចំណាយពេលអស់50នាទី។
• កង្វល់រឿងស្បែកខ្លួនប្រាណស្រអែមខ្មៅជ្រុលពេក/ស្រអែមស្ទើរ ចំណាយពេលអស់36នាទី។
• កង្វល់រឿងសក់កន្ទ្រីងកន្ទ្រើង/សក់ឡើងប្រេង ចំណាយពេលអស់57នាទី។
សរុបពេលវេលាកង្វល់ខ្វល់ខ្វាយក្នុងរឿងផ្សេងៗនេះក្នុងមួយសប្តាហ៍ ស្មើនឹង12ម៉ោង4នាទី។
ពេលរៀបតាមលំដាប់ហើយ នឹងមើលឃើញថា នារីៗកង្វល់រឿងខ្លាចធាត់ខ្លាំងជាងគេបំផុតបន្ទាប់មករឿងសម្លៀកបំពាក់ រឿងក្បាលពោះ និងរឿងហើមខ្លួនតាមលំដាប់រៀងមក។ ក្រៅពីនេះនៅបានរកឃើញទៀតថា បើសិនជាស្ថិតក្នុងឱកាសពិសេសណាមួយ ដូចជា មានការណាត់ជួបជាមួយមិត្តភក្តិ ពិធីជប់លៀងរួមសាច់ញាតិបងប្អូនផងនោះ ក្តីកង្វល់របស់ពួកនាងរឹតតែកើនទ្វេឡើងថែមទៀត មិនអាចរលុបបាត់ទៅណាឡើយ លុះត្រាណាតែពេលវេលាសំខាន់ៗនោះកន្លងផុតអស់ទៅ ។
ហ៊ឺ…! គិតហើយនឿយចិត្តមែនទែន នេះថ្នាក់នារីៗអ្នកដែលចូលរួមធ្វើការស្រាវជ្រាវនៅព្រមសារភាពថា ពួកនាងពិតជាខាតពេលក្នុងការខ្វល់ខ្វាយច្រើនបែបនោះប្រាកដមែន ចុះមិត្តអ្នកអានវិញមានកាកង្វល់ដូចអត្ថបទខាងលើនេះដែរឬទេ?
May 11, 2018