ធឿន មករា - La Reine Media

ឆ្អឹងជំនីជ្រូកដុតពិសេស ពីភោជនីយដ្ឋាន Motor Café

ឆ្អឹងជំនីជ្រូក ត្រូវបានគេយកទៅច្នៃធ្វើជាមុខម្ហូបយ៉ាងសម្បូរបែប ដែលក្នុងនោះរួមមានដូចជា សម្ល, ខ, អាំង, ស្ងោរ ឬចៀនជាដើម។ ប៉ុន្តែពេលនេះ ឆ្អឹងជំនីជ្រូកត្រូវបានអ្នកជំនាញផ្នែកដាំស្លប្រចាំនៅភោជនីយដ្ឋាន Motor Café សាខាទួលគោក ដែលកំពុងទទួលបានការគាំទ្រពីសំណាក់អតិថិជនយ៉ាងច្រើននោះ បានយកមកច្នៃធ្វើជាអាហារមួយមុខផ្សេងទៀត ពោរពេញទៅដោយរសជាតិឆ្លាញ់ប្លែក នោះគឺ “សាច់ឆ្អឹងជំនីជ្រូកដុតពិសេស”។ ចង់ដឹងទេថា មុខម្ហូបថ្មីមួយនេះមានភាពទាក់ទាញដល់កម្រិតណា សូមមកស្វែងយល់ទាំងអស់គ្នា។

គ្រឿងផ្សំ
• ឆ្អឹងជំនីជ្រូក
• ហ័រសិន សុស (Hoisin Sauce )
• ប៊ីប៊ីខ្យូ សុស (BBQ Sauce)
• ទឹកឃ្មុំ
• ប្រេងខ្យង
• អំបិល

វិធីធ្វើ
មុនដំបូងយកឆ្អឹងជំនីជ្រូកមកលាងឱ្យស្អាត រួចប្រឡាក់ជាមួយ ហ័រសិន សុស (Hoisin Sauce ) ប៊ីប៊ីខ្យូ សុស ទឹកឃ្មុំប្រេងខ្យង អំបិល រួចយកក្រដាសអាលុយមីញ៉ូមរុំជុំវិញឱ្យជិត ទើបយកទៅដុតក្នុងម៉ាស៊ីនដុត ជាមួយការកំណត់កម្ដៅ 180 oC (សម្រាប់អ្នកដែលមិនមានម៉ាស៊ីតដុត ក៏អាចដាក់ដុតក្នុងឆ្នាំងតាមបែបធម្មតាក៏បាន) ទុករយៈពេលប្រមាណ35នាទី។ បន្ទាប់មកទើបយកចេញមកក្រៅ បកក្រដាសដោយប្រុងប្រយ័ត្ន ដើម្បីត្រងទឹកដែលដក់នៅលើក្រដាសអាលុយមីញ៉ូម សម្រាប់ស្រោចពីលើសាច់ឆ្អឹងជំនីជ្រូក។ ជាចុងក្រោយ យកសាច់ឆ្អឹងជំនីជ្រូកដុតនោះមករៀបនៅលើចានជាមួយបន្លែដូចរូបភាពដែលបានបង្ហាញជូននៅលើទំព័រនេះ និងស្រោចដោយទឹកដុតសាច់ឆ្អឹងជំនីជ្រូកពីលើជាការស្រេច៕

June 4, 2018

ប្រយ័ត្ន! លេងទូរស័ព្ទដៃមុនពេលចូលគេង ប្រឈមនឹងជំងឺជាច្រើន

លេងទូរស័ព្ទដៃមុនពេលចូលគេងលើសពី2ម៉ោង គឺមានហានិភ័យគេងមិនលក់ ថែមទាំងនាំមកនូវរោគ និងជំងឺជាច្រើនថែមទៀតផង។ ប្រសិនបើអ្នកជាអ្នកដែលនិយមលេងទូរស័ព្ទដៃមុនពេលចូលគេ អ្នកគប្បីប្រយ័ត្នចំពោះជំងឺផ្សេងៗដូចជា ជំងឺធាត់ ជំងឺបេះដូង និងជំងឺទឹកនោមផ្អែមជាដើម។

មនុស្សជាច្រើនមានទង្វើលេងទូរស័ព្ទនៅលើគ្រែគេងជាប្រចាំ ចាប់តាំងពីបើកភ្នែកឡើងនៅពេលព្រឹក ក៏ទាញទូរស័ព្ទដៃមកឆែកមើលពីព័ត៌មានដែលមាននៅក្នុងបណ្ដាញសង្គម។ បើទោះបីជាទម្រេតខ្លួនគេងនៅពេលពាក់កណ្ដាលយប់ ក៏អ្នកនៅតែចាប់យកទូរស័ព្ទដៃមកមើលមុននឹងបិទភ្នែកគេងដែរ ឬមានមនុស្សមួយចំនួនទៀតលង់លក់ដោយមិនបានបិទទូរស័ព្ទតែម្ដងក៏មានដែរ។ តែនៅថ្ងៃនេះ ទស្សនាវដ្តី ឡារ៉ែន សូមរំឭកជាថ្មីម្ដងទៀតថា ទង្វើបែបនេះហើយ ដែលកំពុងតែគំរាមកំហែងសុខភាពរបស់មនុស្សយើងជាខ្លាំង។

អ្នកជំនាញខាងសុខភាពពិភពលោកបានសម្ដែងនូវក្ដីបារម្ភចំពោះរបៀបរស់នៅប្រចាំថ្ងៃនាពេលបច្ចុប្បន្ននេះដែលកំពុងជក់លេងទូរស័ព្ទដៃមុនពេលចូលគេងថា វាអាចបង្កឱ្យកើតមានបញ្ហាចំពោះសុខភាពបាន ដោយសារតែអេក្រង់ទូរស័ព្ទមានពណ៌ខៀវ (Blue Light) ជះពន្លឺមកប៉ះពាល់ដល់ការផលិតសារធាតុមេឡាតូនីនដែលជួយគ្រប់គ្រងការគេងលក់ និងក្រោកពីគេង។ ដូចនេះហើយ ការលេងទូរស័ព្ទដៃមុនពេលចូលគេងលើសពី2ម៉ោង នឹងធ្វើឱ្យខួរក្បាលដែលបានទទួលពន្លឺពណ៌ខៀវនៅក្នុងអំឡុងពេលពាក់កណ្ដាលយប់ បញ្ជាប្រាប់ថា ពេលនេះគឺជាពេលថ្ងៃត្រង់ ដែលជាហេតុហុចផលឱ្យកើតអាការគេមិនលក់ ឬគេងមិនស្ងប់នេះឡើង ហើយការលេងទូរស័ព្ទនៅក្នុងពេលពាក់កណ្ដាលយប់ ក៏បានហុចផលអាក្រក់ចំពោះខ្សែភ្នែកផងដែរ។

ទាំងអស់នេះគឺជាហានិភ័យដែលកើតឡើងចំពោះសុខភាពរបស់មនុស្សយើង ប្រសិនបើអ្នកគេងមិនលក់ ឬគេងមិនគ្រប់គ្រាន់ នឹងធ្វើឱ្យរាងកាយមានអារម្មណ៍ថា ល្វើយ អស់កម្លាំង ទន់ខ្សោយ នឿយហត់នៅអំឡុងពេលថ្ងៃ និងប្រព័ន្ធចងចាំកើតមានបញ្ហាជាដើម។ បញ្ហាទាំងនេះអាចប៉ះពាល់ដល់ការសិក្សា និងការធ្វើការងារជាប្រចាំថ្ងៃជាខ្លាំង ដោយសារតែខួរក្បាលមិនអាចដំណើរការបានយ៉ាងមានប្រសិទ្ធភាព។ អ្វីដែលសំខាន់ជាងនេះទៅទៀតនោះគឺ អាចបង្កគ្រោះថ្នាក់ដល់ខ្លួនឯង និងអ្នកដទៃថែមទៀតដូចជា កើតអាការងងុយគេងនៅពេលកំពុងបើកបរ ឬខណៈពេលកំពុងធ្វើការងារជាមួយគ្រឿងចក្រ។ ក្រៅពីនេះ ការសម្រាកមិនគ្រប់គ្រាន់ជាដើមហេតុនៃការកើតជំងឺជាច្រើនដូចជា ជំងឺធាត់ ( ដោយសារតែប្រព័ន្ធដុតបំផ្លាញជាតិខ្លាញ់នៅក្នុងរាងកាយដំណើរការមិនបានល្អគ្រប់គ្រាន់) ជំងឺទឹកនោមផ្អែម រោគបេះដូង ជំងឺលើសឈាម និងអាចប្រឈមនឹងបញ្ហាការប្រើប្រាស់គ្រឿងញៀន ឬគ្រឿងស្រវឹង ដើម្បីជួយដល់ការគេងមិនលក់ថែមទៀតផង។

អ្នកជំនាញសុខភាពពិភពលោក បានណែនាំឱ្យកាត់បន្ថយការលេងទូរស័ព្ទមុនពេលចូលគេងយ៉ាងហោចណាស់1ម៉ោង ដើម្បីឱ្យខ្សែភ្នែករបស់អ្នកបានសម្រាក ហើយរាងកាយរបស់អ្នកក៏បានសម្រាកបានដែរ។ ប្រសិនបើចាំបាច់ត្រូវការប្រើទូរស័ព្ទដៃខ្លាំងណាស់ អ្នកគប្បីប្រើឧបករណ៍ការពារពន្លឺពណ៌ខៀវ ដូចជា បន្ទះការពារភ្នែកបិតនៅលើអេក្រង់ទូរស័ព្ទ ឬប្រើប្រាស់កម្មវិធី Night Shift ដើម្បីជួយកាត់បន្ថយពន្លឺពណ៌ខៀវដែលបញ្ចេញមកពីអេក្រង់ទូរស័ព្ទ និងជួយកាត់បន្ថយការប្រឹងសម្លឹងរបស់ខ្សែភ្នែក ហើយធ្វើឱ្យអ្នកគេលង់បានស្រួល៕

June 4, 2018

ពេជ្រ អាវីហ្សា នៅតែមិនខ្វល់ពីការព្រមានថតឈុតស្រើបស្រាល

ជាច្រើនលើកច្រើនសារណាស់មកហើយ ដែលតារាស្រីមួយចំនួននិយមចូលចិត្តការតុបតែងខ្លួនបែបសិចស៊ីស្រើបស្រាល ក៏ដូចជាការថតរូបភាពបែបរោលរាលស៊ីអារម្មណ៍ តែងត្រូវបានទទួលការរិះគន់ធ្ងន់ៗពីសំណាក់មហាជន ជាពិសេស ការព្រមានចំៗពីសំណាក់ថ្នាក់ដឹកនាំក្រសួងវប្បធម៌ និងវិចិត្រសិល្បៈ រហូតមានការដាក់សម្ពាធមិនឱ្យបង្ហាញខ្លួនជាសាធារណៈ។

ជាក់ស្ដែងដូចជា នាង ដេននី ក្វាន់ ដែលទើបតែរួចផុតពីការដាក់សម្ពាធ ហាមមិនឱ្យបង្ហាញខ្លួននៅតាមកម្មវិធីកម្សាន្តនានាកាលពីដើមខែកន្លងទៅនេះ។ ដោយឡែកសម្រាប់ស្រីស្រស់ ពេជ្រ អាវីហ្សា ហាក់មិនបានខ្វាយខ្វល់ទៅនឹងហេតុការណ៍ដែលតារាស្រីទាំងនោះធ្លាប់ជួបប្រទះនោះទេ ហើយថែមទាំងបោះពាក្យសម្ដីថា នាងមិនបានព្រួយប្រាម្ភទៅនឹងសម្ពាធ ឬបម្រាមទាំងអស់នោះទេ សំខាន់គឺនាងគិតថាជាការងារសិល្បៈ ដែលវាគ្រាន់តែជាការសម្ដែងប៉ុណ្ណោះ។

ភ្ជាប់គ្នាទៅនឹងបញ្ហារបស់តារាស្រីខ្មែរមួយចំនួន ដែលនិយមភាពសិចស៊ី ចូលចិត្តការតុបតែងខ្លួនជាមួយសម្លៀកបំពាក់ខើចខ្លី បញ្ចេញសាច់ស្ទើរអាក្រាតរាងកាយនោះ គេសង្កេតឃើញថា តែងទទួលបាននូវការរិះគន់ពីមហាជនយ៉ាងខ្លាំង ហើយក៏ធ្លាប់មានប្រតិកម្មពីសំណាក់ថ្នាក់ដឹកនាំក្រសួងវប្បធម៌ និងវិចិត្រសិល្បៈជាញឹកញាប់ផងដែរ។ បើទោះជាបែបនេះក្ដី សម្រាប់តារាស្រីសាច់សកូនកាត់ចិន ពេជ្រ អាវីហ្សា ហាក់មិនបានញញើតនឹងហេតុការណ៍ទាំងអស់នេះឡើយ ដោយនាងនៅតែព្យាយាមបង្ហាញរូបភាពបែបស្រើបស្រាលដដែល មិនថាតែជារូបភាពសន្លឹក ឬការសម្ដែងនៅក្នុងឈុតឆាកកាយវិការខារ៉ាអូខេនោះទេ។

ឆ្លើយតបទៅនឹងសំណួររបស់អ្នកសារព័ត៌មានដែលបានចោទសួរថា តើកញ្ញាមិនភ័យខ្លាចទទួលសម្ពាធរបស់ក្រសួងទេឬ បានជានៅតែថតឈុតបែបសិចស៊ីមិនសំចៃដៃយ៉ាងនេះ?កញ្ញា អាវីហ្សា បានឆ្លើយយ៉ាងសឿងបឿងថា “អត់មានអីត្រូវភ័យ ត្រូវខ្លាចនោះទេបង ព្រោះខ្ញុំយល់ថាវាគ្រាន់តែជាសិល្បៈនៃការតុបតែង និងសម្ដែងឱ្យត្រូវអត្ថន័យសាច់រឿង ឬបទចម្រៀងតែប៉ុណ្ណោះ។ ការទទួលការរិះគន់ពីមហាជន ទាល់តែយើងស្លៀកពាក់ចេញដើរក្រៅពីរង្វង់សិល្បៈ ប៉ុន្តែនេះវាគ្រាន់តែជាការសម្ដែង ហើយកន្លងទៅក៏មានតារាស្រីគេសម្ដែងខ្លាំងជាងខ្ញុំក៏មាន រហូតមានអ្នកខ្លះអស់ម៉ាល្វែងលើក៏មានដែរ”។

សូមបញ្ជាក់ផងដែរថា កញ្ញា ពេជ្រ អាវីហ្សា គឺជាតារាសម្ដែងស្រីម្នាក់ដែលមានរូសម្រស់ស្អាតគួរជាទីទាក់ទាញ ហើយក៏ជាតារាស្រីដែលធ្លាប់ជួបរឿងអភ័ព្វផងដែរ ដូចជារឿងសង្សារវាយដំបែកមុខ ជាំមាត់ និងរឿងគ្រោះថ្នាក់ចរាចរណ៍ដោយសារគ្រឿងស្រវឹងជាដើម។ យ៉ាងណាក៏ដោយ រហូតមកដល់ពេលនេះ នាងនៅតែមានទស្សនិកជនចូលចិត្តអាណិតគាំទ្រដដែល ខណៈដែលការងារសិល្បៈអាជីពជាតារាសម្ដែងក៏នៅតែមានទីផ្សារគួរឱ្យកត់សម្គាល់៕

June 4, 2018

តោះ… មកភ្លក្សរសជាតិ ត្រីសាំបាក់ដុតប៊័រ ពីភោជនីយដ្ឋាន និដា ទាំងអស់គ្នា

ត្រីសាំបាក់ គឺជាប្រភេទត្រីទឹកប្រៃម្យ៉ាងដែលតែងត្រូវបានគេនិយមយកទៅច្នៃធ្វើជាមុខម្ហូបផ្សេងៗយ៉ាងមានឱជារស ដូចជា ចៀន អាំង ស្ងោរ ចំហុយ ឬដុតជាដើម។ ដោយឡែកពេលនេះ ត្រីដ៏មានរសជាតិប្រភេទនេះត្រូវបានអ្នកជំនាញផ្នែកធ្វើម្ហូបប្រចាំនៅភោជនីយដ្ឋាន និដា ដែលមានទីតាំងស្ថិតនៅអគារលេខ58 ផ្លូវ337 សង្កាត់បឹងកក់1 ខណ្ឌទួលគោក រាជធានីភ្នំពេញ យកមកធ្វើជាម្ហូបមួយមុខយ៉ាងឈ្ងុយឆ្ងាញ់គួរជាទីទាក់ទាញបំផុត នោះគឺ “ត្រីសាំបាក់ដុតប៊័រ”។ ចង់ដឹងទេថា មុខម្ហូបមួយនេះមានរសជាតិឈ្ងុយឆ្ងាញ់អស្ចារ្យដល់កម្រិតណានោះ សូមសាកល្បងភ្លក្សទាំងអស់គ្នា។

គ្រឿងផ្សំ
– ត្រីសាំបាក់
– ប៊័រ
– ម្ទេសទុំក្រហម
– ក្រូចឆ្មារ
– ការ៉ុត
– សាលាដ
– ជីរវ៉ាន់ស៊ុយ
– ទឹកជ្រលក់ (ឬអាចទឹកត្រី កោះកុង តាមចំណូលចិត្ត)
– រ៉ត់ឌី
– ម្រេច
– ស្រា-ស
– ទឹកស៊ីអីុវ-ស
– ប្រេងល្ង
– ប្រេងឆា
– គ្រឿងផ្សំរសជាតិ

របៀបធ្វើ
បន្ទាប់ពីជ្រើសរើសត្រីសាំបាក់ដែលមានសាច់ស្រស់ល្អ ហើយលាងសម្អាតរួចរាល់ហើយនោះ ត្រូវយកទៅឆូតសាច់ដូចក្នុងរូបភាព រួចយកទៅប្រឡាក់ជាមួយនឹងប៊័រ រួមជាមួយគ្រឿងផ្សំរសជាតិដូចដែលមានរៀបរាប់ជូនខាងលើនេះ ហើយទុកមួយអន្លើសិន។ កម្ដៅប្រេងឆាឱ្យក្ដៅ ហើយដាក់ត្រីបំពងឱ្យឆ្អិនល្មម ហើយស្រង់ចេញ។ បន្ទាប់មកយកក្រដាសសម្រាប់ដុតត្រី រុំត្រីឱ្យជិត និងបន្តយកទៅដុតដោយប្រើកម្ដៅភ្លើងក្ដៅល្មម ដើម្បីបន្ថែមក្លិនឈ្ងុយជាការស្រេច។ ដោយឡែកនៅពេលទទួលទាន លោកអ្នកក៏អាចទទួលទានជាមួយទឹកត្រី ឬទឹកជ្រលក់ផ្សេងទៀតបានតាមចំណង់-ចំណូលចិត្ត។ ត្រឹមតែប៉ុណ្ណឹងលោកអ្នកក៏អាចទទួលបានម្ហូបដ៏ឈ្ងុយឆ្ងាញ់សម្រាប់ទទួលទានរួមជាមួយមិត្តភក្ដិ ឬក្រុមគ្រួសារយ៉ាងរីករាយ ហើយបើចង់ដឹងកាន់តែច្បាស់ថាមុខម្ហូបត្រីសាំបាក់ដុតប៊័រមានរសជាតិដើមឆ្ងាញ់ដល់កម្រិតណានោះ អាចទៅទទួលទានដោយផ្ទាល់នៅភោជនីយដ្ឋាន និដា ដែលស្ថិតនៅអាសយដ្ឋានដូចបានជម្រាបជូនខាងលើ៕

June 2, 2018

ហេតុអីបានមនុស្សយើង គេងមមើ? តើត្រូវដាស់ឱ្យភ្ញាក់ឬទេ?

ទោះបីវាជារឿងគួរឱ្យខ្មាសអៀនដែលអ្នកខ្លះមានអាការគេងមមើនៅពេលយប់ ឬអ្នកខ្លះទៀតអាចនឹងនៅតែគេងមមើរហូត ទោះជាស្ថិតក្នុងវ័យមនុស្សធំហើយ និងមនុស្សគ្រប់រូបបានស្គាល់អាការគេងមមើនេះយ៉ាងច្បាស់ ទាំងកើតនៅលើខ្លួនឯង ឬឃើញមនុស្សក្បែរៗខ្លួនគេងមមើក៏ដោយ តែជឿថា មនុស្សជាច្រើនប្រហែលជានៅមិនទាន់បានដឹងពីមូលហេតុថា តើហេតុអីបានជាអ្នកគេងមមើ ក្រោកឡើងមកធ្វើនេះធ្វើនោះបានយ៉ាងច្រើន ហើយតើអ្នកគួរប្រតិបត្តិយ៉ាងណាជាមួយអ្នកគេងមមើ រួមទាំងវិធីការពារការគេងមមើនេះទៀតផង។ ដូច្នេះឃើញថា ទោះជាគ្រប់គ្នាបានស្គាល់អាការគេងមមើហើយមែន តែក៏នៅតែមិនទាន់ដឹងពីរឿងរ៉ាវរបស់ការគេងមមើជាច្រើនទៀតដែរ។

គេងមមើ បណ្ដាលមកពីអ្វី?
មូលហេតុរបស់ការគេងមមើនៅមិនទាន់អាចបញ្ជាក់បានយ៉ាងច្បាស់លាស់ថា បណ្ដាលមកពីអ្វីនោះឡើយ តែអាចសន្និដ្ឋានថា បណ្ដាលមកពីការគេងលក់មិនបានស្កប់ស្កល់ ត្រូវបានរុកកួនរំខានខណៈពេលគេង ភាពតានតឹងក្នុងអារម្មណ៍ វិតក្កកង្វល់ អាការគ្រុនក្ដៅមិនស្រួលខ្លួន ស្ថិតក្នុងសភាវសោកសៅ ស្រវឹងសល់ ឬផលប៉ះពាល់ដែលបណ្ដាលមកពីការប្រើថ្នាំរម្ងាប់សរសៃប្រសាទ។ល។ អ្នកជំងឺដែលមានរោគប្រចាំកាយ អាចមានភាពប្រថុយប្រថាននៅក្នុងការគេងមមើដែលបណ្ដាលមកពីអាការបន្ទាប់បន្សំរបស់ជំងឺផ្សេងៗដែលកំពុងកើត ដូចជា សភាវឈប់ដកដង្ហើមខណៈគេងលក់ អ្នកជំងឺដែលស្ថិតក្នុងសភាវងងុយគេងខ្លាំងជ្រុល ( Narcolepsy) ក្រុមអាការជើងនៅមិនសុខ ( Restless Legs Syndrome) ដែលធ្វើឱ្យអ្នកជំងឺមានអារម្មណ៍រំខានជើងរបស់ខ្លួនឯងរហូតគេងមិនសូវលក់ អ្នកជំងឺទឹករំលាយអាហារហូរបញ្ច្រាស់ ឬឈឺក្បាលម៉ៃក្រេនជាដើម។ ក្រៅពីនេះ តំណពូជក៏ជាផ្នែកមួយរបស់អាការគេងមមើដែរ ព្រោះបើមាននរណាម្នាក់ក្នុងក្រុមគ្រួសារមានអាការគេងមមើ នឹងធ្វើឱ្យអ្នកមានភាពប្រថុយប្រថានក្នុងការគេងមមើដែរខ្លាំងឡើងដល់ទៅ10ដង រួមទាំងរឿងរញ្ជួយចិត្តពីខាងក្រៅដែលជំរុញឱ្យកើតអាការគេងមមើបាន អាចមានតាំងពីការអានសៀវភៅ មើលភាពយន្តភ័យរន្ធត់ ឬរូបភាពគួរឱ្យខ្លាចមុនពេលគេងដែលធ្វើឱ្យខួរក្បាល និងផ្លូវចិត្តត្រូវរុកកួនរំខានរហូតធ្វើឱ្យគេងលក់មិនស្កប់ស្កល់ រហូតកើតអាការគេងមមើបានដូចគ្នា។

គេងមមើមានអាការយ៉ាងណា?
អ្នកដែលមានអាការគេងមមើនឹងចាប់ផ្ដើមក្រោយពីការគេងលក់ទៅហើយ 1 – 3ម៉ោង ឬកើតអាការគេងមមើក្នុងអំឡុងពេលគេងលក់ខ្លាំង។ អាការរបស់ការគេងមមើមានតាំងពីកើតឡើងបន្តិចបន្តួច ដូចជា ការនិយាយរអ៊ូៗពេលកំពុងគេងលក់ មមើយល់សប្តិកម្រើករាងកាយចុះឡើង ស្រែកវ៉ូសវ៉ាសខណៈទាំងភ្នែកកំពុងបិទ មានអារម្មណ៍ដូចស្ថិតក្នុងសភាវសើ្ទរលក់ស្ទើរភ្ញាក់ តែកម្រើករាងកាយមិនបានដូចខ្មោចសង្កត់ មមើនិយាយឥតឈប់ រហូតទៅដល់ក្រោកឡើងដើរទៅមក រើរបស់របរ និយាយតែម្នាក់ឯង និងធ្វើការងារផ្សេងៗជាដើម។ អ្នកខ្លះអាចដល់ថ្នាក់ងើបឡើងមកតុបតែងមុខមាត់ ឬញ៉ាំអាហារទៀតផង តែរយៈពេលនៃការមមើនឹងមិនសូវជាយូរប៉ុន្មានឡើយ ត្រឹមតែប៉ុន្មាននាទីប៉ុណ្ណោះ និងភាគច្រើនអ្នកគេងមមើអាចដើរត្រឡប់មកកន្លែងគេងវិញបានដោយខ្លួនឯង។

តើអ្នកគេងមមើមានគ្រោះថ្នាក់ដែរឬទេ?
ជាប្រក្រតី អាការគេងមមើច្រើនតែកើតឡើងក្នុងអំឡុងវ័យក្មេង ហើយនឹងបាត់ទៅវិញជាបណ្ដើរៗដោយឯកឯងនៅពេលធំឈានចូលវ័យជំទង់ តែក៏មានអ្នកខ្លះនៅតែមានអាការគេងមមើនៅក្នុងវ័យមនុស្សធំដែរ។ ការគេងមមើគ្រាន់តែជាភាពខុសប្រក្រតីមួយរបស់ការគេងលក់ប៉ុណ្ណោះគ្មានគ្រោះថ្នាក់អ្វីធ្ងន់ធ្ងរដល់រាងកាយនោះទេគ្រាន់តែគ្រោះថ្នាក់ដែលកើតឡើងអាចបណ្ដាលមកពីអាការដែលកើតឡើងក្រោយពីពេលគេងមមើ នោះគឺការចេញទៅដើរនៅក្នុងកន្លែងដែលគ្រោះថ្នាក់ ដូចជាប្រើប្រាស់កាំបិតនៅក្នុងចង្ក្រានបាយ មមើតោងចុះតាមមាត់បង្អួច ឬរានហាល ដើរចុះជណ្ដើរ បើកទ្វារដើរចេញទៅក្រៅផ្ទះជាដើម ដូច្នេះគួរតាមសង្កេតមើលយ៉ាងប្រុងប្រយ័ត្នពីអាកប្បកិរិយារបស់អ្នកគេងមមើឱ្យបានល្អ។

តើគួរដាស់អ្នកគេងមមើដែរឬទេ?
សំណួរនេះប្រហែលជាស្ថិតក្នុងក្ដីសង្ស័យរបស់មនុស្សជាច្រើនមិនខាន ហើយចម្លើយក៏គឺដាស់បាន! តែមិនគួរធ្វើឡើយ… ព្រោះគេអាចនឹងមិនភ្ញាក់ និងបើសិនជាគេភ្ញាក់វិញ អាចធ្វើឱ្យគេមានអាការមីងមាំង និងទម្រាំតែលង់លក់ទៅវិញម្ដងទៀតក៏ត្រូវប្រើពេលវេលាយូរជាងមុន ឬអាចនឹងគេងមិនលក់រហូតដល់ភ្លឺតែម្ដងក៏មាន ជាពិសេសក្មេងតូចអាចនឹងស្រែកយំរករឿងយូរទម្រាំនឹងគេងលក់ទៅវិញ ព្រោះអាចកើតក្ដីភ័យខ្លាចហ្នឹងឯង។ ដូច្នេះវិធីដែលល្អបំផុត គឺគួរប្រយ័ត្នប្រយែងអំពីសុវត្ថិភាពរបស់គេ ហើយព្យាយាមនាំគេត្រឡប់មកគេងនៅលើគ្រែវិញដោយមិនចាំបាច់ដាស់ឱ្យភ្ញាក់ឡើយ ដែលធ្វើឱ្យគេអាចគេងលក់បន្តទៅទៀតបានយ៉ាងងាយស្រួល។

ចំណុចប្រតិបត្តិចំពោះអ្នកដែលមានអាការគេងមមើជាប្រចាំ
ភាគច្រើនអាការគេងមមើមិនបានកើតឡើងម្ដង ឬពីរដង ហើយឈប់នោះទេ អាចនឹងកើតអាការគេងមមើនេះជារឿយៗប្រមាណជា2-4ដងក្នុងមួយសប្ដាហ៍ ឬអាចនឹងតិច ឬច្រើនជាងហ្នឹង។ អ្វីដែលអ្នកគួរធ្វើនោះគឺ កត់កំណត់ត្រាពេលគេចូលគេង និងពេលដែលគេចាប់ផ្ដើមមានអាការគេងមមើ បន្ទាប់ពីនោះនៅយប់តៗមកទៀត ចូរសាកល្បងដាស់ឱ្យគេភ្ញាក់មុនពេលដែលគេចាប់ផ្ដើមមានអាការមមើប្រមាណ 30នាទីហើយសឹមឱ្យគេគេងទៅវិញម្ដងទៀត។ វិធីនេះនឹងជួយកាត់បន្ថយអាការគេងមមើជាប្រចាំបាន៕

June 2, 2018

ចន ច័ន្ទលក្ខិណា សម្រេចចិត្តចាកចេញពីវិស័យសម្ដែង

បើនិយាយពីតារាសម្ដែងច្បាស់ណាស់ថា ចន ច័ន្ទលក្ខិណា ត្រូវបានក្លាយទៅជាតារាជួរមុខ និងមានកេរ្តិ៍ឈ្មោះបោះសំឡេងល្បីល្បាញ ជាមួយនឹងបទពិសោធន៍មិនក្រោម20ឆ្នាំនោះឡើយ។ រាល់សកម្មភាពនៃការសម្ដែងរបស់តារារូបនេះ ក៏តែងត្រូវបានទទួលការគាំទ្រពីសំណាក់ទស្សនិកជនមិនតិចនោះឡើយ ជាពិសេស ការសម្ដែងក្នុងឈុតឆាកកាចឆ្នាស់ ឈ្នានីសតែម្ដង រហូតធ្វើឱ្យអ្នកទស្សនាមិនសរសើរមិនបាន។ ប៉ុន្តែសម្រាប់រយៈពេលប៉ុន្មានឆ្នាំចុងក្រោយនេះ រូបភាពរបស់ ចន ច័ន្ទលក្ខិណា ហាក់ត្រូវបានរសាត់បាត់ឆ្ងាយពីវិស័យមួយនេះ ខណៈដែលមានការទម្លាយយ៉ាងច្បាស់មកថា នាងបានសម្រេចចិត្តដើរចាកចេញពីអាជីពជាង20ឆ្នាំនេះទាំងគ្មានអាល័យ។

នៅក្នុងដំណើរជីវិតជាអ្នកសិល្បៈជាង20ឆ្នាំកន្លងទៅនេះ ចន ច័ន្ទលក្ខិណា បានជួបប្រទះនឹងរឿងរ៉ាវជាច្រើនរាប់មិនអស់ រាប់ទាំងរឿងល្អ និងរឿងអាស្រូវផងដែរ ជាពិសេស ក្រោយពេលដែលនាងបានសម្រេចចិត្តបែកបាក់ជាមួយអតីតស្វាមីដែលជាអ្នកមានអាជីពក្នុងវិស័យសម្ដែងដូចគ្នា ក្រោមការលើកឡើងជាពាក្យចចាមអារ៉ាមថា មានអ្នកទី3ចូលជ្រៀតជ្រែកក្នុងសង្គមគ្រួសាររបស់នាង។ យ៉ាងណាក៏ដោយ បើទោះជានាងបានក្លាយទៅជាស្ត្រីមេម៉ាយរស់នៅជាមួយកូនស្រីក្ដី ប៉ុន្តែប្រជាប្រិយភាពរបស់នាងនៅតែអាចរក្សាបាននូវភាពល្បីល្បាញដដែល។ បន្ថែមពីនេះនាងថែមទាំងបានបង្កើតនូវមុខជំនួញផ្សេងៗទៀត ដើម្បីអាចទទួលបានចំណូលបន្ថែមពីលើការងារផ្នែកសិល្បៈ ដូចជា បើកហាង ចន ច័ន្ទ សាឡន និងលក់ផលិតផលតាមអនឡាញជាដើម។

ជាថ្មីម្ដងទៀត កំពូលតារាសម្ដែងដ៏ប៉ិនប្រសប់ចន ច័ន្ទលក្ខិណា បានបង្កើតព្រឹត្តិការណ៍ប្រវត្តិសាស្ត្រនៅក្នុងសង្គមសិល្បៈដោយការកាន់មុខតំណែងជាប្រធានសមាគមអ្នកសិល្បៈកម្ពុជា បន្តវេណពីលោក សុះ ម៉ាច ដែលជាប្រធានចាស់ធ្លាក់សន្លឹកឆ្នោតផងដែរ។ នៅក្នុងរយៈពេលនៃការទទួលយកតំណែងជាប្រធានសមាគមន៍អ្នកសិល្បៈនេះផងដែរ ចន ច័ន្ទលក្ខិណា បានលូកដៃជួយសម្រួលបញ្ហាមួយចំនួន ជាពិសេសបង្កើតជាមូលនិធិជួយដល់សិល្បករ សិល្បការិនី ដែលជួបប្រទះភាពខ្វះខាត និងបាត់បង់សមត្ថភាពជាដើម។

ដោយឡែកកាលពីពេលថ្មីៗនេះ ចន ច័ន្ទលក្ខិណា បានធ្វើឱ្យមហាជនភ្ញាក់ផ្អើលជាខ្លាំងខណៈដែលនាងបានបង្ហាញពីចេតនាចង់ដើរចេញពីអាជីពជាតារាសម្ដែង ដែលធ្លាប់មានអានុស្សាវរីយ៍ជាច្រើនឆ្នាំទាំងគ្មានភាពអាឡោះអាល័យ ដោយការសរសេរសារបង្ហោះនៅលើហ្វេសប៊ុក។ ជាមួយនឹងការសម្រេចចិត្តចាកចេញពីអាជីពសិល្បៈនាពេលនេះ ត្រូវបានកំពូលតារាសម្ដែងរូបនេះបញ្ជាក់ប្រាប់ថា គឺដោយសារតែមានភាពមមាញឹកជាមួយការធ្វើជំនួញផ្ទាល់ខ្លួន ក៏ដូចជា ជួយមើលមុខជំនួញស្វាមីទី2របស់នាង ហើយទុកពេលវេលាខ្លះដើម្បីធ្វើការស្វែងរកមូលនិធិសម្រាប់សិល្បករចាស់ជរា។ នៅក្នុងជំហាននៃការបញ្ចប់អាជីពរបស់ ចន ច័ន្ទ នាពេលនេះត្រូវបានគេកត់សម្គាល់ឃើញថា មានមហាជនមួយចំនួនបានសម្ដែងនូវភាពសោកស្តាយ ខណៈដែលបាត់បង់អ្នកដែលមានសមត្ថភាព និងទេពកោសល្យផ្នែកសម្ដែង៕

June 2, 2018

កាន់តែជក់មាត់ ជាមួយសម្ល យ៉េន តាហ៊ូ

យ៉េន តាហ៊ូ ជាឈ្មោះម្ហូបមួយមុខដែលត្រូវបានបង្កើតឡើងដោយអ្នកជំនាញផ្នែកដាំស្លប្រចាំនៅភោជនីយដ្ឋាន និដា ទួលគោក ក្រោមការរួមបញ្ចូលនូវវត្ថុធាតុដើម និងគ្រឿងផ្សំច្រើនប្រភេទ និងច្រើនដំណាក់កាល។ អ្វីដែលរឹតតែជាការគួរឱ្យចាប់អារម្មណ៍នោះត្រង់ថា យ៉េន តាហ៊ូ ត្រូវបានរួមបញ្ចូលជាមួយបន្លែដែលដុះនៅក្នុងសមុទ្រនោះ គឺផ្កាថ្មស្រស់។

គ្រឿងផ្សំ
– គ្រឿងសមុទ្រស្រស់
– ដុំឈាមមាន់
– ទឹកស៊ុបហឹរ
– ផ្កាថ្ម
– ត្រកួន
– ឃីនឆាយ
– ស្លឹកខ្ទឹម
– ទឹកស៊ីអីុវ-ស
– ទឹកក្រូចឆ្មារ
– ដុំតៅហ៊ូប្រៃ
– ម្ទេសដៃនាង
– ខ្ទឹមជ្រក់
– ខ្ទឹមស
– ម្ទេសម៉ាឡេក្រហម
– គ្រឿងផ្សំរសជាតិ

របៀបធ្វើ
ចំពោះវិធីសាស្រ្តក្នុងការចម្អិន ត្រូវបានអ្នកជំនាញបែងចែកចេញជា2ដំណាក់កាល។ ត្រូវធ្វើទឹកគ្រឿង ដោយយកម្ទេសម៉ាឡេក្រហម ខ្ទឹមស ខ្ទឹមជ្រក់ ម្ទេសដៃនាង ដុំតៅហ៊ូប្រៃ កិនបញ្ចូលគ្នាឱ្យក្លាយជាល្បាយតែមួយ រួចទុកមួយអន្លើ។ បន្ទាប់យកបន្លែស្រស់កាត់ឱ្យខ្លីល្មម ហើយយកទៅស្រុសជាមួយទឹកក្ដៅ ព្រមទាំងគ្រឿងសមុទ្រផងដែរ។ បន្ទាប់មកទៀតត្រូវយកគ្រឿងសមុទ្រ និងដុំឈាមមាន់ដាក់កូរបញ្ចូលគ្នាជាមួយនឹងទឹកគ្រឿងដែលបានរៀបចំចម្អិនរួចរាល់ខាងលើ ដោយបន្ថែមទឹកស៊ុបហឹរបន្តិច ហើយតម្លើងកម្ដៅភ្លើង ដោយបង់បន្លែចូល រួមលើកចេញពីភ្លើង (ក្នុងករណីដែលចង់បានទឹកសម្លច្រើន ត្រូវបន្ថែមទឹកស៊ុបហឹរបន្ថែម) ជាការស្រេច៕

June 2, 2018

ម៉ូដសម្លៀកបំពាក់នារីម៉ាក LOOKSWOMEN លេខ 122

June 2, 2018

អាការឈឺក្បាល ប្រាប់ពីជំងឺអ្វីខ្លះ?

អាការឈឺក្បាល ក្រៅពីហុចផលប៉ះពាល់ដល់រាងកាយហើយនោះ វានៅហុចផលប៉ះពាល់ចំពោះគុណភាពជីវិតយ៉ាងយ៉ាប់យឺនថែមទៀតផង។ អាការឈឺក្បាល កើតឡើងពីមូលហេតុដូចជា ការឈឺចាប់ ភាពតានតឹង ការបង្អត់អាហារ ការគេងមិនគ្រប់គ្រាន់ ការហាត់ប្រាណលើសកម្រិត ស្ថានភាពជុំវិញខ្លួនអាប់អួរ ការសម្របសម្រួលរាងកាយទៅតាមអាកាសធាតុផ្លាស់ប្ដូរមិនទាន់ជាដើម។

អាការឈឺក្បាល ត្រូវបានបែងចែកជាច្រើនប្រភេទ ដោយប្រភេទនីមួយមានមូលហេតុទៅតាមរោគ ជំងឺ និងការព្យាបាល ដោយការប្រើប្រាស់ថ្នាំ។ ដូច្នេះ អ្នកអាចសង្កេតពីខ្លួនឯងបានថា កំពុងមានអាការឈឺក្បាលបែបណា ដែលបង្ហាញឱ្យអ្នកឃើញពីចំណុចឈឺចាប់ជាចម្បងទើបអ្នកអាចសន្និដ្ឋានបានពីអាការដែលបណ្តាលឱ្យឈឺក្បាលជាប្រចាំ និងមិនប្រក្រតី។ សូមសង្កេតមើលតាមចំណុចដូចខាងក្រោមនេះ។

1. ឈឺក្បាលដោយសារភាពតានតឹង
យើងរមែងជួបជាញឹកញាប់បំផុត លក្ខណៈរោគគឺ ចាក់ ច្របាច់ ឬរួមរឹតយ៉ាងណែននៅក្នុងខួរក្បាល ហើយមានអារម្មណ៍ថាដូចមានអ្វីចាក់ដោតនៅចំហៀងក្បាលសងខាង។ អ្នកអាចទទួលទានថ្នាំបំបាត់អាការឈឺក្បាលតាមធម្មតាបាន ដូចជា ថ្នាំប៉ារ៉ាសេតាម៉ុល ឬប្រភេទថ្នាំបំបាត់ការឈឺចាប់ ដែលមិនមានផ្សំសារធាតុថ្នាំស្ទេរីលក៏បាន។ ក្នុងករណីដែលអ្នកឈឺក្បាលលើសពីរយៈពេល15ថ្ងៃ អ្នកអាចប្រើប្រាស់ថ្នាំប្រភេទពួក អីុប៊ុយ (Ibuprofen) ហើយប្រសិនបើឈឺលើសពី6ខែ អ្នកគប្បីទៅជួបគ្រូពេទ្យ ដើម្បីធ្វើការព្យាបាលជាបន្ទាន់។

2. អាការឈឺក្បាលខ្លាំង ឬ Migraine
អាការបែបនេះ ភាគច្រើនបានជួបប្រទះចំពោះស្ត្រី មានការពាក់ព័ន្ធជាមួយនឹងបញ្ហាវដ្តរដូវ និងមានបច្ច័យប៉ះទង្កិចជាច្រើនទៀតដូចជា ការចាំងពន្លឺ ថ្លង់សំឡេងខ្លាំង ឈឺក្បាលប្រកាំងមួយចំហៀងក្បាលបែបហឹងៗត្រចៀក និងអាចកើតមានអាការចង្អោរចង់ក្អួត ឬមានក្អួតមកជាមួយផងក៏មាន។ ករណីដែលអ្នកមានអាការឈឺចាប់រយៈពេល4-72ម៉ោង អាចប្រើប្រាស់ថ្នាំប៉ារ៉ាសេតាម៉ុល ឬទទួលទានថ្នាំបំបាត់អាការឈឺក្បាលតាមធម្មតា ឬមួយក៏ទៅពិគ្រោះយោបល់ជាមួយគ្រូពេទ្យ គឺកាន់តែប្រសើរ។

3. ករណីផ្សេងៗ
– ករណីឈឺក្បាលជាបណ្ដុំ ៖ មានអាការឈឺចាប់ច្រើនផ្នែកនៃរាងកាយ អាចនឹងឈឺចាប់ខ្លាំងក្លានៅក្នុងពេលវេលាដដែលៗប្រចាំថ្ងៃ រួមមានឈឺចាប់នៅបរិវេណភ្នែក ហើយភ្នែកកើតមានសភាពក្រហម និងហូរទឹកភ្នែកជាដើម។ អ្នកគួរតែទៅជួបគ្រូពេទ្យជំនាញ ដើម្បីធ្វើការព្យាបាល។

– ឈឺក្បាលដោយសារតែអាការរលាក ៖ អាការរោគកើតការឈឺចុកចាប់នៅម្ដុំក្ដោងច្រមុះថ្ពាល់ ថ្កោម និងបរិវេណត្រចៀកជាដើម។ បើមានការឈឺក្បាលដោយសារមូលហេតុបែបនេះ អ្នកគប្បីទៅជួបគ្រូពេទ្យជាបន្ទាប់ ដើម្បីទទួលបានការណែនាំ និងការព្យាបាលត្រឹមត្រូវ ហើយចៀសវាងការប្រើប្រាស់ថ្នាំបំបាត់ការឈឺចាប់ដោយខ្លួនឯង។

– ឈឺក្បាលដោយសារអ័រម៉ូន ៖ កើតចេញពីការប្រែប្រួលអ័រម៉ូននៅក្នុងរាងកាយស្ត្រី ដូចជាខណៈតាំងគ៌ភ អំឡុងពេលប្រើប្រាស់ថ្នាំពន្យារកំណើត ឬក្នុងអំឡុងវ័យ40ឆ្នាំឡើង។ អ្នកអាចលេបថ្នាំបំបាត់អាការឈឺចាប់ ដែលមិនមានផ្សំពីសារធាតុថ្នាំស្ទេរីល ឬទៅជួបគ្រូពេទ្យផ្ទាល់តែម្ដងក៏បាន។

ចំណាំ ៖ ប្រសិនបើអ្នកមានអាការឈឺក្បាលខ្លាំង សូមប្រញាប់ទៅជួបពិគ្រោះជាមួយគ្រូពេទ្យជំនាញជាបន្ទាន់ មុននឹងសម្រេចចិត្តប្រើប្រាស់ថ្នាំដោយមិនមានការចេញវេជ្ជបញ្ជា៕

June 2, 2018

រឿងដែលគួរដឹង មុននឹងតម “អាហារខ្លាញ់”

ទាំងអស់គ្នាប្រហែលជាបានដឹងច្បាស់ហើយថា បើចង់មានសុខភាពរឹងមាំល្អ និងចង់សម្រកទម្ងន់ឱ្យរាងរៅស្គមស្វែលស្អាត ស្លៀកពាក់ខោ-អាវលេខ M ឬលេខ S បាននោះ ត្រូវតែចេះតម(ឬកាត់បន្ថយ) ការទទួលទានអាហារខ្លាញ់តែមុននឹងតាំងចិត្តខំប្រឹងប្រែងតមពួកអាហារខ្លាញ់ៗយ៉ាងម៉ឺងម៉ាត់នោះ យើងគួរនាំគ្នាមកមើលពីដំបូន្មានល្អៗជាមុនសិនប្រសើរជាងថា តើអ្នកគួរត្រៀមខ្លួនយ៉ាងណា និងត្រូវតមអាហារខ្លាញ់យ៉ាងត្រឹមត្រូវយ៉ាងណាខ្លះ?

រឿងដែលត្រូវដឹងមុនតមអាហារខ្លាញ់
ដោយសារតែមានបុគ្គលិករបស់ទស្សនាវដ្តី ឡារ៉ែន ម្នាក់បានលើកប្រធានបទមួយមកជជែកគ្នាថា តើយើងត្រូវប្រើវិធីណាល្អក្នុងការឈប់ទទួលទានអាហារខ្លាញ់នោះ ទើបអ្នកគ្រូ ឆវីត្រូវលើកយកចំណុចគួរដឹងសម្រាប់ណែនាំដល់អ្នកដែលចង់សម្រកទម្ងន់ និងចង់មានសុខភាពរឹងមាំមកជម្រាបជូនដូចតទៅ ៖

1. រកមូលហេតុឱ្យឃើញជាមុនសិនថាតើអ្នកចង់កាត់បន្ថយ និងឈប់ញ៉ាំអាហារខ្លាញ់នេះដើម្បីអ្វី?
គឺដើម្បីសុខភាពល្អ! រឿងហ្នឹងអ្នកណាក៏គេដឹងដែរ តែគោលដៅក្នុងការកាត់បន្ថយរបស់អ្នកហ្នឹង គឺដើម្បីសុខភាពលើផ្នែកណាមួយ?
– រូបរាង?
– ទម្ងន់?
– ខ្លាចជំងឺដែលមកជាមួយភាពធាត់?
– ខ្លាចជាតិស្ករនៅក្នុងឈាមឡើងខ្ពស់ខុសប្រក្រតី?

ដែលត្រូវតែដឹងជាមុននោះក៏ព្រោះថា ហេតុនីមួយៗនោះ មានការកាត់បន្ថយមិនដូចគ្នាទេ និងជួនកាលការកត់បន្ថយអាហារខ្លាញ់ អាចនឹងមិនមែនជាការកែសម្រួលហេតុបញ្ហាទាំងនោះទៀតផង។

– ដូចអ្នកខ្លះ កាត់បន្ថយអាហារខ្លាញ់ ដើម្បីសម្រកទម្ងន់… ដោយមិនទាំងបានទទួលទានវាច្រើន និងមិនបានពិនិត្យមើលថា ឡើងទម្ងន់ដោយសារអ្វីឡើយ។

– អ្នកខ្លះត្រូវការកែសម្រួលរូបរាង តែអាផ្នែកដែលត្រូវការកែសម្រួលនោះវាមិនបានពាក់ព័ន្ធនឹងអាហារខ្លាញ់សោះ (ដូចជា ចង់ឱ្យសាច់ដុំដៃមាំមួន ក៏តមលែងទទួលទានអាហារខ្លាញ់… តែអត់ទៅហាត់ប្រាណ លើកដុំដែក ហើយអីុចឹងម៉េចសាច់ដុំដៃឡើងទៅកើត?)។

– អ្នកខ្លះត្រូវការបញ្ចុះជាតិខ្លាញ់ ដើម្បីសម្រកទម្ងន់ ទាំងដែលបច្ចុប្បន្នដឹងច្បាស់ហើយថា បើសម្រកខ្លាញ់ តែមិនបន្ថយជាតិស្ករ ទោះសម្រកយូរប៉ុនណាក៏មិនបានលទ្ធផលដែរ។

2. គោលការណ៍ពេទ្យសម័យទំនើប មិនបានឱ្យអត់អាហារខ្លាញ់នោះទេ
– ដោយសារខ្លាញ់គឺជាវត្ថុចាំបាច់ចំពោះរាងកាយ តែបានច្រើនពេកក៏មិនល្អ បានតិចពេកក៏មិនល្អ។

– បច្ចុប្បន្ននេះ (ការពិតទៅ តាំងពីឆ្នាំ1980ឯណោះ) វេជ្ជសាស្ត្រសម័យបច្ចុប្បន្ននេះ សង្កត់ធ្ងន់លើការទទួលទានអាហារយ៉ាងមានតុល្យភាព មិនសង្កត់ធ្ងន់លើការតម្រង់ទៅលើតែគុណប្រយោជន៍ ឬគុណវិបត្តិរបស់សារធាតុអាហារប្រភេទណាមួយនោះទេ។

– ឧទាហរណ៍ដូចជា អាហារក្រុមតំបន់មេឌីទែរ៉ាណេក៏មានជាតិខ្លាញ់ច្រើនគួរសមដែរ មិនមែនជាអាហារដែលមានជាតិខ្លាញ់ទាបឡើយ។

3. តើអ្នកត្រូវទទួលទានអាហារខ្លាញ់ប៉ុនណាដឹងឬនៅ?
អ្នកខ្លះចង់បន្ថយខ្លាញ់ តែមិនដឹងថា ខ្លួនឯងទទួលទានខ្លាញ់ប៉ុនណា? ដល់មិនដឹងថា ពីដំបូងអ្នកទទួលទានវាប៉ុនណា ធ្វើឱ្យពេលកាត់បន្ថយទៅហើយ ពិបាកវាយតម្លៃ ធ្វើឱ្យមិនអាចកំណត់គោលដៅបាន។

4. បន្ថយអាហារខ្លាញ់ តែត្រូវប្រយ័ត្នការបន្ថយខ្លាំងជ្រុលពេក
– គោលការណ៍នៃការតមអាហារខ្លាញ់ គឺត្រូវមិនតមរហូតដល់អត់ទទួលទានសោះនោះទេ…ព្រោះជាតិខ្លាញ់ក៏ជាវត្ថុមួយដែលរាងកាយត្រូវប្រើប្រាស់ដែរ។

– បើបន្ថយជាតិខ្លាញ់ខ្លាំង និងកំណត់កម្លាំងថាមពល រាងកាយនឹងសម្រួលខ្លួនចូលទៅនៅក្នុងក្រុមមនុស្សខ្វះអាហារបរិភោគ សាច់ដុំនឹងបាត់អស់ ហើយយូរទៅរាងកាយងាយនឹងត្រឡប់មកធាត់ជាថ្មីម្ដងទៀត។

5. ជាតិខ្លាញ់ដែលគួរបញ្ឈប់មែនទែននោះគឺ ខ្លាញ់ េ្រថនស៍ (Trans Fat)
ចំណែកខ្លាញ់ផ្សេងទៀត ដូចជា ខ្លាញ់ជ្រូកខ្លាញ់សត្វ ប្រេងដូង ប្រេងរុក្ខជាតិផ្សេងៗ ទទួលទានបាន តែត្រូវគ្រប់គ្រងបរិមាណយ៉ាងស័ក្តិសម៕

May 31, 2018

Author: ធឿន មករា