Author: ធឿន មករា
នៅពេលកូនតូចឈានចូលខែទី11
លក្ខណៈរបស់កូនតូច
• ធ្មេញរបស់កូនតូច
ក្មេងខ្លះដែលធ្មេញដុះឡើងខាងមុខ 2គ្រាប់លើ និង2គ្រាប់ក្រោមហើយ រយៈពេលនេះនឹងមានធ្មេញដុះឡើងខាងៗ 2គ្រាប់លើទៀត ក្លាយជាធ្មេញលើ4គ្រាប់ តែក្មេងខ្លះធ្មេញលើ 2គ្រាប់កណ្ដាលនៅមិនទាន់ដុះឡើង ធ្វើឱ្យមានប្រឡោះនៅកណ្ដាល។ តែយ៉ាងណាក៏ដោយ នៅទីបំផុតធ្មេញ 2គ្រាប់កណ្ដាលក៏នឹងដុះឡើង ហើយក្មេងនឹងមានធ្មេញលើ ធ្មេញក្រោមមួយយ៉ាងៗ 4គ្រាប់។• ពេលវេលាគេងរបស់កូន
ពេលវេលាគេងរបស់ក្មេងម្នាក់ៗខុសពីគ្នា។ វ័យនេះមានក្មេងចំនួនដ៏ច្រើនដែលធ្លាប់គេងពេលថ្ងៃ 2ដង ហើយនឹងបន្ថយបន្តិចម្ដងៗមកនៅសល់ត្រឹមតែមួយដង។ ក្មេងខ្លះគេងម្ដងៗកន្លះម៉ោង តែគេងញឹកញាប់មួយថ្ងៃ 3 – 4ដងក៏មាន។ ពេលភ្ញាក់ព្រឹកឡើងក៏ខុសគ្នាដែរ ក្មេងខ្លះបើកភ្នែកឡើងពេលម៉ោង6ព្រឹក លុះបានមឹមៗហើយក៏លក់បន្តដល់ម៉ោង 8 – 9ព្រឹក។ ក្មេងខ្លះគេងរហូតតាំងពីម៉ោង10យប់ដល់ម៉ោង8ព្រឹក។ ក្មេងអាចភ្ញាក់មកនោម ហើយលក់បន្តពេលបានបៅទឹកដោះហើយ តែក្មេងខ្លះគេងលក់ស្រួលទោះខោ ឬកន្ទបសើម រហូតផ្លាស់ឱ្យក៏មិនភ្ញាក់ដែរ។• ដល់ពេលញ៉ាំអាហារបន្ថែម
អាហារក្នុងវ័យនេះ ខុសគ្នាទៅតាមស្ថាន-ភាពជុំវិញខ្លួន និងតម្រូវការរបស់ក្មេង មិនមានការកំណត់ច្បាស់ៗថា ក្មេងក្នុងវ័យនេះត្រូវតែញ៉ាំបាយប៉ុន្មានកូនចាន ទឹកដោះគោប៉ុន្មានដបនោះទេ តារាងបញ្ជីអាហារបន្ថែមគ្រាន់តែជាការណែនាំសម្រាប់អ្នកម្ដាយប៉ុណ្ណោះ។ បើកូនមិនញ៉ាំអាហារដូចដែលបានណែនាំ តែកូននៅរឹង-ប៉ឹងមាំមួនល្អ ទម្ងន់ខ្លួនកើនឡើងជាមធ្យមក្នុងមួយថ្ងៃពី 5 – 10ក្រាម អ្នកម្ដាយក៏មិនចាំបាច់កង្វល់ឡើយ។ កូនក្នុងវ័យនេះគឺញ៉ាំអាហារបន្ថែម 2ពេល និងម្ហូបគួរសង្កត់ធ្ងន់លើស៊ុត សាច់ត្រី ឬសាច់សត្វកិនម៉ដ្ឋ ដើម្បីកុំឱ្យខ្វះប្រូតេអុីនពីសត្វ។ កូនវ័យនេះនៅឱ្យបៅទឹកដោះក្នុងមួយថ្ងៃមិនតិចជាង 500 cc(កន្លះលិត្រ) អ្វីដែលសំខាន់បំផុតក្នុងការឱ្យញ៉ាំអាហារគឺ “កុំបង្ខំ” គួរឱ្យកូនញ៉ាំយ៉ាងមានសេចក្ដីសុខ និងបន្ថែមបរិមាណសន្សឹមៗតាមតម្រូវការរបស់កូន មិនមែនថា អាយុកើនឡើង ត្រូវតែបន្ថែមអាហារឱ្យប៉ុននេះប៉ុននោះតាមក្នុងតារាងបញ្ជីឡើយ។• រឿងដែលត្រូវហាម
ឪពុកម្ដាយគួរបន្ទោសកូនពេលកូនធ្វើអ្វីដែលមិនល្អ ដូចជា កូនគប់នំប៉័ងដែលកាន់នៅក្នុងដៃទៅដី ឪពុកម្ដាយគួរធ្វើឱ្យកូនដឹងថា ធ្វើបែបហ្នឹងមិនល្អទេ។ លើកដំបូងគួរបន្ទោសដោយទឹកមុខនិងពាក្យសម្ដីថា “ធ្វើអុីចឹងអត់បានទេ” បើកូនធ្វើហាក់ដូចជាចង់ធ្វើទៀត ត្រូវស្រែកដាស់តឿនជាមុនថា “អត់បានទេណា៎”។ ដល់ពេលកូនយល់ពីអ្វីដែលម្ដាយហាម ហើយឈប់គប់នំប៉័ងលេង ម្ដាយត្រូវសរសើរថា “ល្អណាស់”។ សម្រាប់កូនតូចៗ អ្វីល្អ ឬមិនល្អមើលតាមរយៈទឹកមុខម្ដាយថា តើញញឹម ឬធ្វើមុខមាំ។ អ្នកម្ដាយខ្លះមិនបន្ទោស ព្រោះគិតថាទោះជាបន្ទោសទៅ ក៏កូនមិនដឹងរឿងអីដែរ។ ទោះជាកូននៅមិនទាន់ដឹងថា អ្វីល្អ អ្វីមិនល្អក៏ដោយ តែក៏កូនមានភាពឆាប់ដឹងពីអារម្មណ៍របស់ម្ដាយដែរ តែការធ្វើមុខមាំបន្ទោស សំឡេងបន្ទោសដើម្បីហាមកូនត្រូវយូរៗធ្វើម្ដងទើបបានផលល្អ និងជ្រើសរើសបន្ទោសតែក្នុងរឿងដែលគ្រោះថ្នាក់ប៉ុណ្ណោះ ហើយមិនគួរប្រើវិធីវាយទះតប់ ឬធ្វើឱ្យកូនឈឺសាច់ពេលធ្វើខុសនោះឡើយ។• ពេលកូនមានរបួស
បើកូនរអិលដួល ធ្លាក់ពីទីខ្ពស់ បោកក្បាលមានរបួស ចូរយកបង់រុំរបួសមកសង្កត់ពីលើស្នាម-របួស ហើយនាំទៅរកពេទ្យ។ បើមានរបួសរលាត់ដាច់ ឬមានឈាមហូរចេញមកសើមៗ ចូរលាងមុខរបួសនឹងសាប៊ូ ប្រើអាល់កុលជូតជុំវិញ ហើយប្រើថ្នាំក្រហមលាបលើមុខរបួស មិនបាច់បិទដោយបង់បិទរបួសទេ។• កូនធាត់លើសកម្រិត
មានទ្រឹស្ដីមួយនិយាយថា ចំនួនកោសិកាខ្លាញ់ក្រោមស្បែកនឹងត្រូវសាងឡើងក្នុងរយៈពេលមួយឆ្នាំដំបូង បើក្មេងណាធាត់ជ្រុលពេកមុនអាយុ1ឆ្នាំ ច្រើនតែនឹងក្លាយជាក្មេងងាយធាត់រហូតមួយជីវិត។ គួរថ្លឹងទម្ងន់កូនរៀងរាល់10ថ្ងៃម្ដង ទម្ងន់ខ្លួនកើនឡើងជាង200ក្រាម បានន័យថា ធាត់លឿនពេកហើយ ត្រូវគ្រប់គ្រងអាហារ ដូចជា បន្ថយអាហារពពួកម្សៅ ដូចជា បាយនំប៉័ង តែម្ហូបអាចនៅឱ្យញ៉ាំប៉ុនពីមុនបាន។• នៅពេលកូនថ្នឹកប្រើដៃឆ្វេង
អ្នកម្ដាយអាចសង្កេតឃើញថា នៅពេលកូនលេងរបស់លេង ហុចដៃមកទទួលនំដែលគេឱ្យពេលកាន់ស្លាបព្រា កូនតែងលើកដៃឆ្វេងឡើងមុនជានិច្ច ដែលនេះគឺជារឿងប្រក្រតីរបស់ក្មេងមិនមែនដោយសារតែប្រើដៃឆ្វេងច្រើន ទើបធ្វើឱ្យថ្នឹកដៃឆ្វេងនោះទេ។ អ្នកម្ដាយមិនគួរព្យាយាមឱ្យកូនឈប់ប្រើដៃឆ្វេង ហើយប្រើដៃស្ដាំម្ដងវិញឡើយ ព្រោះការថ្នឹកប្រើដៃឆ្វេង ឬស្ដាំវាជាលក្ខណៈដោយឡែករបស់ក្មេង មិនមែនជារឿងអាក្រក់នោះទេ។ មិនគួរស្ដីបន្ទោសកូន តែគួរបណ្ដោយឱ្យកូនប្រើដៃខាងដែលថ្នឹកនោះទៅ បើចង់ឱ្យហាត់សរសេរអក្សរដោយដៃស្ដាំ ចាំឱ្យហាត់ពេលកូនចូលសាលារៀនហើយក៏បាន។ ដូច្នេះមិនថាកូននឹងប្រើដៃខាងណាក៏ដោយ អ្នកម្ដាយគួរឱ្យកូនបានប្រើយ៉ាងពេញលេញ ទើបជាការគាំទ្រឱ្យកូនកើតមានភាពចង់ធ្វើអ្វីៗក៏ធ្វើដោយខ្លួនឯងបានល្អតទៅទៀត។វិវឌ្ឍនាការរបស់កូន
** រាងកាយ
• ប្រើដៃរុញខ្លួនឱ្យក្រោកឡើងមក និងឱនខ្លួនចុះពេលកំពុងឈរបាន។
• អង្គុយចោងហោងបានកាន់តែថ្នឹកខ្លាំងឡើង។
• ចាប់ខ្មៅដៃគូសវាសទៅមកបាន។
• ក្មេងខ្លះអាចទាញស្រោមជើងចេញពីជើងបានដោយខ្លួនឯង។
• ចេះប្រើដៃទាំងពីរធ្វើអ្វីៗមិនដូចគ្នាបានហើយ ដូចជា ដៃម្ខាងកាន់របស់លេងមួយដៃម្ខាងទៀតលេងរបស់លេង ឬគប់របស់លេងមួយទៀតបាន។** សង្គមជុំវិញខ្លួន
• ស្គាល់អត្ថន័យរបស់ពាក្យថា “ទេ”។
• កាន់តែពូកែបដិសេធអ្វីដែលខ្លួនឯងមិនត្រូវការខ្លាំងឡើង។
• ចេះធ្វើត្រាប់សំឡេងបានកាន់តែពូកែឡើងដូចជា និយាយពាក្យថា “ម៉ាក់ៗ” ឬ “តោះៗ” ជាដើម។
• ចេះស្ដាប់ពាក្យបញ្ជាច្រើនឡើង និងចេះបញ្ឈប់ទង្វើរបស់ខ្លួនឯងបាន។** លេងជាមួយកូនឱ្យបានញឹកញាប់
• កូនវ័យនេះចេះប្រើដៃបានថ្នឹកហើយ គួរលេងបោះបាល់ ហើយឱ្យកូនរត់តាមទៅយកបាល់មកវិញ ឬរកខ្មៅដៃពណ៌ឱ្យកាន់ និងសាកល្បងចាប់ដៃកូនគូសអូស ផាត់ពណ៌លើក្រដាស។
• កូនច្រើនតែចូលចិត្តលេងជាមួយរបស់របរប្រើប្រាស់ក្នុងផ្ទះខ្លាំងជាងរបស់លេងដែលទិញមកឱ្យ ក្មេងខ្លះចូលចិត្តមើលរូបភាព ជាពិសេសសៀវភៅដែលមានរូបភាពធំៗស្រួលមើល។
• បើកូនចាប់ផ្ដើមហាត់ដើរ ចូររកពេលនាំកូនទៅដើរនៅក្នុងបរិវេណសួនច្បារសាធារណៈផង៕
ភាពខុសប្លែករវាងទឹកដោះម្ដាយ និងម្សៅទឹកដោះគោ
ថ្ងៃនេះ អ្នកគ្រូ ឆវី សូមនាំមកជូននូវរឿងរ៉ាវរបស់ “ទឹកដោះម្ដាយ” ដែលមិនមែនជារឿងឆ្ងាយពីខ្លួនអ្នកឡើយ ព្រោះអ្នកគ្រប់គ្នាប្រហែលជាសុទ្ធតែធ្លាប់បៅទឹកដោះម្ដាយរួចមកហើយសឹងតែទាំងអស់គ្នា ហើយទោះជាពេលនេះអ្នកនៅមិនទាន់មានបុត្រក៏ដោយ តែនាពេលអនាគត វាក៏មិនប្រាកដដែរជួនកាលអ្នកអាចនឹងបានឃើញមុខកូនតូចរបស់អ្នកក៏ថាបានដែរ ដូច្នេះវាមិនមែនជារឿងអីខុសទាស់ឡើយ បើសិនជាអ្នកបានដឹងពីរឿងទាំងអស់នេះទុកជាមុននោះ មែនទេស្រីៗយើង?
ហេតុផលដែលអ្នកម្ដាយមួយចំនួននិយមឱ្យកូនបៅទឹកដោះគោ (ម្សៅទឹកដោះគោ) ព្រោះតែគិតថា ក្រៅពីវាងាយស្រួលហើយ ម្សៅទឹកដោះគោ ក៏ជាទឹកដោះដូចគ្នាដែរ ហេងស៊យថ្លៃជាងទៀតផង ដូច្នេះបញ្ជាក់ថា វាត្រូវតែមានគុណប្រយោជន៍លំដាប់លេខ1មិនខាន។ ដោយសារដូច្នេះហើយ ទើបថ្ងៃនេះ អ្នកគ្រូ ឆវី នឹងនាំយកព័ត៌មានលម្អិតមកប្រៀបធៀបឱ្យទាំងអស់គ្នាបានឃើញច្បាស់ៗតែម្ដងអំពីភាពខុសប្លែកគ្នារវាងទឹកដោះម្ដាយ និងម្សៅទឹកដោះគោ។
ភាពខុសប្លែកគ្នារវាងទឹកដោះម្ដាយ និងម្សៅទឹកដោះគោ
ចំណាំ
មកដល់ត្រង់នេះ អ្នកម្ដាយជាច្រើននាក់ប្រហែលជាដឹងខ្លះៗហើយថា តើទឹកដោះម្ដាយល្អប៉ុនណា មែនទេអ្នកម្ដាយដែលកំពុងបំបៅដោះកូនទាំងឡាយ?
ពេលខ្ញុំតាំងគភ៌ខែទី3
ពេលអាយុគភ៌ចូលមកដល់ខែទី3 ទារកក្នុងគភ៌នឹងមានទំហំប្រមាណជា2.5-3អីុញ និងទម្ងន់ប្រហែលជា15ក្រាមហើយ។ នៅក្នុងខែនេះទារកក្នុងគភ៌ចាប់ផ្ដើមមានវិវឌ្ឍនាការរបស់អាវយវៈផ្សេងៗដូចជា ប្រព័ន្ធឈាមរត់ ប្រព័ន្ធបន្ទោបង់ទឹកមូត្រចាប់ផ្ដើមធ្វើការ ថ្លើមចាប់ផ្ដើមសាងទឹក-ប្រមាត់ អវយវៈបន្តពូជចាប់ផ្ដើមចេញជារូបរាង តែនៅមិនទាន់អាចមើលឃើញបានច្បាស់ថា ជាភេទណានៅឡើយទេ។
ក្នុងខែទី3នៃការតាំងគភ៌នឹងមានការប្រែប្រួលផ្សេងៗដែលអាចមានអារម្មណ៍ដឹងបានដូចតទៅ ៖
– ឆាប់ល្វើយអស់កម្លាំង និងមានអារម្មណ៍ងងុយគេងញឹកញាប់ជាងប្រក្រតី។
– បត់ជើងតូចញឹកញាប់។
– ក្អួតចង្អោរ ឬមានអាការចាញ់កូន។
– ទល់លាមក។
– ហើមឆ្អល់ពោះ អាហារមិនរំលាយ ឈឺផ្សានៅម្ដុំចុងដង្ហើម។
– ធុញទ្រាន់អាហារ និងចង់ញ៉ាំអាហារប្រភេទផ្សេង។
– សុដន់ចាប់ផ្ដើមឡើងតឹង និងរីកធំឡើង ពណ៌ស្បែកនៅបរិវេណក្បាលសុដន់ឡើងស្រគាំ។
– ឈឺក្បាលម្ដងម្កាល។
– ឈឺក្បាលវិលមុខ កើតខ្យល់ញឹកញាប់ ស្រវាំងភ្នែក ដូច្នេះត្រូវប្រយ័ត្នប្រយែងឱ្យបានខ្លាំងឡើង។
– ទើសទែងធុញថប់ត្រង់ម្ដុំចង្កេះ។
– ឃ្លានញឹកញាប់ និងញ៉ាំច្រើនជាងមុន។
– អារម្មណ៍ប្រែប្រួល ឆាប់ទន់ជ្រាយ ដូចជាឆាប់យំជាដើម។រឿងដែលគ្រូពេទ្យឱ្យស្ត្រីមានគភ៌ធ្វើនៅក្នុងខែទី3នេះ មានដូចជា ៖
1. ការថ្លឹងទម្ងន់ខ្លួន និងវាស់សម្ពាធឈាម។
2. ពិនិត្យមើលជាតិស្ករ និងសារធាតុទឹករំអិលសក្នុងទឹកមូត្រ។
3. ស្ដាប់សំឡេងលោតរបស់បេះដូងទារក
នៅក្នុងគភ៌ ដែលអ្នកនឹងបានដឹងពីសំឡេងបេះដូងលោតរបស់កូនអ្នក។
4. ពិនិត្យមើលទំហំស្បូនថា មានទំហំប្រក្រតីឬទេ?
5.ពិនិត្យមើលកម្រិតរបស់ស្បូន ដោយការស្ទាបលើក្បាលពោះ។
6. ពិនិត្យមើលអាការហើម និងសរសៃឈាមត្បៀតនៅលើជើង និងបាតជើង។
7. ពិនិត្យអាការខុសប្រក្រតីផ្សេងៗ (បើមាន)។រឿងដែលត្រូវមើលថែទាំជាពិសេសក្នុងខែនេះគឺ អាការទល់លាមក។ ស្ត្រីមានគភ៌ដែលកំពុងតាំងគភ៌គួរទទួលទានអាហារដែលមានជាតិកាកសរសៃឱ្យបានច្រើនឡើង ញ៉ាំទឹកស្អាតឱ្យច្រើនឡើង និងគួរហាត់ប្រាណក្នុងឥរិយាបថដែលស័ក្តិសមក្នុងមួយថ្ងៃកន្លះម៉ោង។ ក្រៅពីអាការទល់លាមកហើយ អ្នកខ្លះអាចមានអាការហើមឆ្អល់ពោះដែលច្រើនតែបណ្ដាលមកពីអាការទល់លាមក ដូច្នេះទើបត្រូវព្យាបាលអាការទល់លាមកនេះឱ្យជា។ មិនគួរញ៉ាំអាហារឆ្អែតជ្រុលពេកក្នុងមួយពេលៗ និងមិនគួរញ៉ាំបែបប្រញាប់ឡើយ គួរទំពាអាហារយឺតៗ និងបន្ថយ ឬតមអាហារណាដែលអាចធ្វើឱ្យកើតហ្គាសក្នុងការរំលាយ ដូចជា ស្ពៃក្ដោបគ្រប់ប្រភេទ ខ្ទឹមបារាំង និងសណ្ដែកគ្រប់ប្រភេទ។
គួរបែងរំលែកការទទួលទានអាហារចេញជាពេលតូចៗ ជំនួសឱ្យការទទួលទានបែប3ពេលក្នុងមួយថ្ងៃ។ អាចនឹងបែងជា6-7ពេលក្នុងមួយថ្ងៃ ចំណែកពេលថ្ងៃ (ចន្លោះពេលបាយព្រឹក និងថ្ងៃត្រង់) អាចនឹងទទួលទានផ្លែឈើដែលមានជាតិកាកសរសៃច្រើន ឬញាំបន្លែស្លឹកបៃតង។ លុះពេលរសៀល(ចន្លោះពេលថ្ងៃត្រង់ និងល្ងាច)អាចនឹងរកផ្លែឈើ ឬអាហារចម្អាបដែលមានសារធាតុកាល់ស្យូមច្រើនៗមកទទួលទានជំនួយ។ ចំណែកពេលក្បាលព្រលប់ (ក្រោយពេលបាយល្ងាច និងមុនចូលគេង) បើមានអារម្មណ៍ឃ្លាន ស្ត្រីមានគភ៌អាចរកទឹកផ្លែឈើច្របាច់ស្រស់ៗ ផ្លែឈើប្រភេទខ្លះមកទទួលទាន ដូចជាចេកណាំវ៉ា ឬញ៉ាំទឹកដោះគោក្ដៅឧណ្ហៗមួយកែវ ដើម្បីជួយឱ្យពោះមិនទំនេររហូតដល់ឃ្លានខ្លាំងបាន៕
ស្នាដៃសិល្បៈតន្ត្រីថ្មីពីក្រុមតារាចម្រៀង TMS
បើគិតតាំងពីដើមឆ្នាំ រហូតមកដល់ពាក់កណ្តាលឆ្នាំ2018នេះ យើងឃើញថាមានទស្សនិកជនមួយចំនួនប្រាកដជាបានស្តាប់ ក៏ដូចជាទស្សនាវីដេអូចម្រៀងថ្មីៗរបស់ក្រុមតារាចម្រៀងប្រចាំ TMS ដោយមានការចាក់ផ្សាយតាមរយៈកញ្ចក់ទូរទស្សន៍ CBS ហើយតារាចម្រៀងទាំងអស់ក៏បានចេញសម្តែងតាមការប្រគំតន្ត្រីជាបន្តបន្ទាប់រួចមកហើយផងដែរ។ ដោយមានការជួយជ្រោមជ្រែងពីសំណាក់អ្នកនាង យុគ ចិន្តា ដែលជានាយកប្រតិបត្តិរបស់ TMS និងលោក Dennis Garcia Arce ដែលជាប្រធានផ្នែកតន្ត្រីរបស់ TMS បានខិតខំប្រមូលផ្តុំសិល្បករ និងសិល្បការិនីជាច្រើនមកជ្រកក្រោមដំបូលតែមួយ ដើម្បីហ្វឹកហាត់ និងដុសខាត់ទេពកោសល្យរបស់ពួកគេឱ្យកាន់តែប្រសើរឡើងមួយកម្រិតទៀត។ ចង់ដឹងថា តើតារាចម្រៀងប្រចាំ TMS មានបទចម្រៀងថ្មីៗ និងសកម្មភាពអ្វីខ្លះ តាំងពីចាប់ផ្តើមរហូតមកទល់ពាក់កណ្តាលឆ្នាំ2018នេះ? ដូច្នេះសូមបន្តការអានព័ត៌មានលម្អិតនៅបន្ទាត់ខាងក្រោមទាំងអស់គ្នា៖
1. សេម : តារាចម្រៀងដែលមានភាពរ៉ូមែនទិក និងតែងតែទាក់យកបេះដូងរបស់ទស្សនិកជនទាំងអស់រូបនេះ បានចេញនូវវីដេអូចម្រៀងនិពន្ធថ្មី ក្រោមចំណងជើងថា “ត្រចៀកស្រាល” និងបទ “សុំឱកាស” ដែលស្ថិតនៅក្រោមការគ្រប់គ្រង និងផលិតដោយ TMS។ ក្រៅពីនេះ លោក សេម ក៏បានចូលរួមសម្តែងនៅក្នុងខ្សែភាពយន្តមួយចំនួន ដែលភាពយន្តទាំងនោះក៏ត្រូវបានចាក់បញ្ចាំងនៅតាមរោងភាពយន្តនានាទូទាំងប្រទេសផងដែរ។
2. វណ្ណដា : តារាចម្រៀង R&B និង Hip-hop ម្នាក់ដែលកំពុងតែទទួលបានការគាំទ្រពីសំណាក់យុវវ័យនាពេលបច្ចុប្បន្ននេះ និងទើបតែបានចេញនូវវីដេអូចម្រៀងជាផ្លូវការក្រោមចំណងជើងថា “Start & Stop” ដែលបទនេះ បានទទួលនូវសន្ទុះគាំទ្រយ៉ាងខ្លាំង ដោយសារតែទឹកដមសំនៀងនៃការច្រៀង អត្ថន័យ ក៏ដូចជារូបភាពកាយវិការនៅក្នុងវីដេអូចម្រៀងដែលមានន័យជ្រាលជ្រៅធ្វើឱ្យចាក់ដោតដល់បេះដូងយុវវ័យ។
3. នាង ប្រាក់សុគន្ធ : តារាចម្រៀងដែលប្រិយមិត្តទាំងអស់គ្នាពិតជាបានស្គាល់ច្បាស់តាមរយៈសំឡេងដ៏ស្រទន់របស់គាត់។ សុគន្ធ ក៏បានចេញនូវវីដេអូចម្រៀងជាលើកដំបូងរបស់ខ្លួន ដែលស្ថិតនៅក្រោមការគ្រប់គ្រង និងផលិតរបស់ក្រុមហ៊ុន TMS ផងដែរនោះគឺបទ “ខូចចិត្តស្ងាត់ៗ”។ បទនេះដែរ ក៏ត្រូវបានចែករំលែក និងទទួលបានការគាំទ្រយ៉ាងច្រើនតាមរយៈបណ្តាញសង្គមនានាផងដែរ។
4. ស៊ីរ៉ា : ម្ចាស់បទ “ច្រណែនគេមិនមែនជាខ្ញុំ” បានចេញនូវវីដេអូចម្រៀងថ្មីរបស់ខ្លួនសម្រាប់ឆ្នាំ2018នេះ ដែលបទចម្រៀងនោះមានចំណងជើងថា “ដឹងថាស្រឡាញ់តែខ្វល់ពីអូនខ្លះផង” ដើម្បីជូនទៅដល់ប្រិយមិត្តរបស់នាង។ ស៊ីរ៉ា ក៏បានបន្តទៀតថា ខ្លួនកំពុងតែថតបទចម្រៀងថ្មី ដែលជាចង្វាក់ Pop Rock ដើម្បីត្រៀមចេញជាបន្តបន្ទាប់ផងដែរ។
5. អ្នកនាង ហង្ស សុជាតា : តារាចម្រៀងម្នាក់ដែលស្ថិតនៅក្នុងបេះដូងទស្សនិកជនជាយូរមកហើយនោះ ក៏បានចេញនូវវីដេអូចម្រៀងបទ “ស្អប់មនុស្សដែលធ្វើឱ្យអ្នកខូចចិត្ត” សម្រាប់ជាចំណីអារម្មណ៍ដល់ទស្សនិកជនរបស់ខ្លួន។ អ្នកនាងបានសន្យាថានឹងខិតខំនាំយកនូវអ្វីដែលថ្មីៗ និងប្លែកៗ ក៏ដូចជាបទចម្រៀងពីរោះៗ សម្រាប់ជាកាដូជូនទៅដល់ទស្សនិកជន ដែលតែងតែគាំទ្រអ្នកនាងកន្លងមកនេះ។
6. Vartey Ganiva : តារាចម្រៀងស្រីដែលនាងត្រូវបានសារព័ត៌មានបរទេសចុះផ្សាយថាជា “Cambodia’s Queen of Punk” បានចេញនូវវីដេអូចម្រៀងលើកដំបូងរបស់ខ្លួនក្រោមចំណងជើងថា “ស្អែកយើងបែកគ្នា” ដែលបទនេះរៀបរាប់ពីនារីទន់ខ្សោយម្នាក់ដែលមានភាពក្លាហានក្រោកឈរឡើងសុំបែកផ្លូវសេ្នហា ដែលពោរពេញទៅដោយការកុហកបោកប្រាស់។ Vartey ក៏នឹងមានបទចម្រៀងចង្វាក់ Punk និងបទចម្រៀងមនោសញ្ចេតនាថ្មីៗ សម្រាប់ចែកជូនទៅដល់ទស្សនិកជននាពេលឆាប់ៗខាងមុខនេះផងដែរ។
7. MC Bull : កន្លងទៅថ្មីៗនេះ MC Bull ក៏បានចេញនូវវីដេអូថ្មី សម្រាប់រាំលេងក្នុងឱកាសបុណ្យចូលឆ្នាំប្រពៃណីជាតិខ្មែរ តាមរយៈបទ “រាំតន្ទ្រំជើង”។ MC Bull បានបង្ហើបថា លោកកំពុងតែនិពន្ធ និងថតបទចម្រៀងថ្មីៗ ដើម្បីបំពេញនូវតម្រូវការទីផ្សារ និងអ្នកគាំទ្ររូបលោក ដែលត្រៀមចេញនាពេលឆាប់ៗខាងមុខនេះ។
8. ផាយ៉ត : ដែលគ្រប់គ្នាស្គាល់ថា ជាតារាចម្រៀងដែលមានប្រជាប្រិយ និងមានភាពក្រមិចក្រមើមនោះ លើកនេះលោកបានចេញនូវវីដេអូចម្រៀងថ្មីក្រោមចំណងជើងថា“រឿងអូន និងបង” ដែលជាបទចម្រៀងបែបមនោសញ្ចេតនាវិញម្តង។ លោកបន្តទៀតថាបទចម្រៀងថ្មីៗរបស់លោកដែលស្ថិតនៅក្រោមការគ្រប់គ្រងផលិតរបស់ក្រុមហ៊ុន TMS កំពុងតែរៀបចំ និងត្រៀមចេញជាបន្តបន្ទាប់ ដើម្បីកំដរអារម្មណ៍ទស្សនិកជន។
9. Ting Tong : សមាជិកថ្មីរបស់ TMS រូបនេះបានប្រាប់ថាវីដេអូចម្រៀងរបស់លោក ដែលមានចំណងជើងថា “ចាំចម្លើយ” ទើបតែចេញជាផ្លូវការថ្មីៗកន្លងមកនេះ។ លោក Ting Tong បង្ហើបថា ខ្លួនមានភាពកក់ក្តៅ និងមានទំនុកចិត្តក្នុងការចូលជាសមាជិករបស់ TMS ក៏ដូចជាការផលិតចម្រៀងថ្មីៗជាបន្តបន្ទាប់ទៀត។ អ្វីដែលពិសេសជាងនេះទៅទៀតនោះ Ting Tong ត្រូវបានអញ្ជើញជាតំណាងឱ្យប្រទេសកម្ពុជាចូលរួមក្នុងការប្រកួតចម្រៀងអន្តរជាតិមួយនាពេលខាងមុខនេះថែមទៀតផង។
វត្តមាន ក៏ដូចជាសកម្មភាពរបស់តារាចម្រៀង TMS មិនទាន់អស់នោះទេ! ក្រៅពីចេញនូវបទចម្រៀងថ្មីៗ ពួកគាត់ក៏បានចូលរួមក្នុងកម្មវិធីជាច្រើន ដូចជា កម្មវិធីសម្ពោធរឿង កិច្ចសម្ភាសន៍ និងកម្មវិធីធំៗមួយចំនួនទៀត។ ក្រោមការគ្រប់គ្រងផលិតរបស់ TMS នឹងព្យាយាមនាំយកនូវព្រឹត្តិការណ៍ប្លែកៗ ព្រមជាមួយបទចម្រៀងនិពន្ធថ្មី មកជូនទស្សនិកជន និងអ្នកគាំទ្រគ្រប់ស្រទាប់វណ្ណៈ។ កុំភ្លេច! រងចាំតាមដានសកម្មភាពតារារបស់ក្រុមហ៊ុន TMS ទាំងអស់គ្នាណា៎!
លោកអ្នកអាចស្វែងរកតារាជាច្រើនទៀតប្រចាំនៅ TMS ក៏ដូចជា CBS ដែលមានទេពកោសល្យ និងប្រកបដោយវិជ្ជាជីវៈ សម្រាប់ការថតខ្សែភាពយន្ត ថត Spot ពាណិជ្ជកម្ម បើកសម្ពោធផ្សេងៗ ឬជាអ្នកតំណាងឱ្យម៉ាកផលិតផលជាដើម។ ប្រិយមិត្តទាំងអស់ អាចទស្សនានូវវីដេអូបទចម្រៀងថ្មីៗរបស់ក្រុមតារាចម្រៀង TMS បានតាមរយៈ Facebook Page: TMS Cambodia និង YouTube Channel: CTN Official Channel៕
ចុចទឹកបង្គន់ហើយមិនបិទគម្របចានបង្គន់ ក៏មានគ្រោះថ្នាក់អាក្រក់ដល់សុខភាពដែរ!
អ្នកវិទ្យាសាស្ត្រមកពីមហាវិទ្យាល័យ Leeds University បានធ្វើការស្រាវជ្រាវចំពោះចានបង្គន់នៅក្នុងរយៈកម្ពស់10នីវពីគម្របមាត់បង្គន់សម្រាប់អង្គុយបន្ទោបង់ បានរកឃើញថា ខ្យល់ដែលបានវិលវល់នៅជាប់សាច់មាត់ចានបង្គន់នោះ មានជាប់ទៅដោយមេរោគមួយប្រភទដែលឱ្យឈ្មោះថា C.difficile ជាបាត់តេរីដែលគ្រោះថ្នាក់មួយប្រភេទជាប់មានមកជាមួយអាការជំងឺនៃរាងកាយរបស់យើង ដូចជា អាការក្អួតចង្អោរ និងរាកជាដើម។
បន្ទាប់ពីបង្គន់បានទម្លាក់របស់កខ្វក់ចេញទៅហើយនោះ បាក់តេរីដែលនៅទុំជាប់ក៏វិលវល់នៅក្នុងខ្យល់ ដែលត្រូវបានគេរកឃើញថាជាប្រភេទបាក់តេរីដែលបង្ករោគជំងឺយ៉ាងធ្ងន់ធ្ងរ និងអាចមានជីវិតរស់នៅបានយូរដល់ទៅ90វិនាទី ដែលរាប់ចាប់ពីពេលវេលាដែលអ្នកបានចុចទឹកបង្គន់។ ប្រសិនបើគិតជាមធ្យម រាល់ការចុចទឹកបង្គន់ម្ដង ដែលមានការប្រឡាក់ប្រឡូកជាមួយទឹកដែលមានជាប់បាក់តេរី នោះនឹងមានបាក់តេរីជាប់មកតាមខ្លួនចំនួន15-47នៃលម្អងបាក់តេរី ដែលបែកខ្ចាយទៅទុំជាប់តាមស្បែកនៃតំបន់ផ្សេងៗនៃរាងកាយរបស់អ្នក។ បើទោះបីជាអ្នកស្ថិតនៅទីតាំងជិត ឬឆ្ងាយពីបង្គន់ក្ដី ក៏នៅមានបាក់តេរីទាំងនោះមកតោងជាប់ស្បែករបស់អ្នកដូចគ្នាដែរ។ ពិតប្រាកដណាស់ តើអ្នកមានបានគិតទេថា បាក់តេរីអាក្រក់មួយបានតោងជាប់ច្រាស់ដុសធ្មេញ និងរបស់ប្រើប្រាស់ក្នុងបន្ទប់ទឹកដែលអ្នកប្រើប្រាស់សម្អាតខ្លួនប្រាណជារៀងរាល់ថ្ងៃដែរឬទេ? តើវាអាចទុំជាប់ច្រាស់ដុសធ្មេញបានយូរកម្រិតណាដែរទៅ?
អ្នកវិទ្យាសាស្ត្របានរកឃើញបន្ថែមពីការអធិប្បាយខាងលើថា បរិវេណដែលនៅជុំវិញចានបង្គន់ គម្របបង្គន់ និងផ្ទៃជញ្ជាំងបន្ទប់ទឹកគឺមានបាក់តេរីប្រភេទនេះ បានតោងជាប់គ្រប់ពេលវេលា ប្រសិនបើអ្នកចុចទឹកបង្គន់ដោយមិនបិទគម្របបង្គន់ ពោលគឺ បាក់តេរីមានឱកាសវិលវល់ជាប់នឹងបរិវេណបន្ទប់ទឹកបានយ៉ាងសប្បាយរីករាយ។ យ៉ាងណាក្ដីអ្នកវិទ្យាសាស្ត្របានធ្វើការណែនាំដល់ក្រុមមនុស្សទូទៅ ក្នុងការបិទគម្របចានបង្គន់គ្រប់ពេលវេលា មិនថាតែពេលចុចទឹកបង្គន់កម្ចាត់កាកសំណល់កខ្វក់ និងពេលវេលាមិនប្រើប្រាស់ក៏ដោយ ព្រោះគ្រាន់តែបិទគម្របចានបង្គន់ចោល នោះវាអាចសម្លាប់បាក់តេរីអាក្រក់ចំពោះសុខភាពរបស់អ្នកបានដល់ទៅ10ដងឯណោះ។ ជាការការពារ រាល់ពេលដែលអ្នកបន្ទោបង់ អ្នកគប្បីគួរតែបិទចានបង្គន់ ហើយចុចទឹកម្ដងជាមុនសិន ដើម្បីឱ្យមេរោគ ឬបាក់តេរីដែលជាប់នឹងចានបង្គន់បានសម្លាប់ដោយទឹកជាមុន។ សូមព្យាយាមសម្អាតមាត់ចានបង្គន់ឱ្យបានស្អាតមុនពេលបន្ទោបង់ ដោយភាពងាយស្រួលសម្រាប់អ្នក គឺអ្នកអាចបាញ់ទឹកថ្នាំខ្ពុលមាត់សម្លាប់បាក់តេរីនៅចានបង្គន់មុនពេលបន្ទោបង់ក៏បាន៕
ជំងឺរលាកពងស្វាស គ្រោះថ្នាក់អាក្រក់បំផុតដែលបុរសត្រូវប្រុងប្រយ័ត្ន
បុរសជាច្រើនប្រហែលមិនធ្លាប់គិតថា នៅក្នុងជីវិតនេះ អាចកើតមានជំងឺរលាកពងស្វាសឡើយ។ តែបើការពិតទៅ ជំងឺនេះអាចកើតបានចំពោះបុរសគ្រប់រូប ដោយសារតែកើតមានអាការរលាកនៅបរិវេណពងស្វាស និងកន្លាក់ជើងម្ដុំបរិវេណប្រដាប់ភេទរបស់បុរស។ ករណីកើតមានជំងឺរលាកពងស្វាសនេះ ក៏អាចហុចផលមិនល្អចំពោះការពិបាកនឹងមានកូនផងដែរ ប្រសិនបើ
ធ្ងន់ធ្ងរបំផុត ប្រហែលអាចនឹងមិនមានកូនតែម្ដង។ តើអាការរបស់ជំងឺនេះកើតឡើងបានដោយរបៀបណា? សូមតាមដានទាំងអស់គ្នាដូចខាងក្រោមនេះ៖មូលហេតុនៃការកើតជំងឺរលាកពងស្វាស
ជំងឺរលាកពងស្វាសកើតឡើងពីការឆ្លងមេរោគ: ភាគច្រើនបានជួបប្រទះចំពោះក្រុមមនុស្សយុវវ័យ ដែលបានឆ្លងមេរោគ Mump Virus ហើយមានអ្នកជំងឺប្រមាណជា20-30% ប្រឈមមុខនឹងកើតជំងឺរលាកពងស្វាស។ជំងឺរលាកពងស្វាសកើតពីបាក់តេរី ដែលបានឆ្លងពីមេរោគមកតាមផ្លូវភេទ: ដូចជា ជំងឺស្វាយប្រមេះ និងប្រមេះទឹកបាយជាដើម ហើយប្រហែលអាចបណ្ដាលមកពីការរលោកក្រពេញប្រូស្ដាតដែលកើតមានចំពោះបុរសៗមានអាយុ19-35ឆ្នាំ។
ជំងឺរលាកពងស្វាសឆ្លងពីបាក់តេរី ដែលកើតពីចេញជំងឺផ្សេងៗ: ហើយវារមែងជួបញឹកញាប់ចំពោះអ្នកជំងឺដែលបានជាប់មេរោគតាមរយៈប្រព័ន្ធបញ្ចេញចោល និងរកឃើញមានចំពោះក្រុមមនុស្សកើតជំងឺរបេង។
ជំងឺរលាកពងស្វាសកើតមានដោយសារអ្នកជំងឺឆ្លងមេរោគអេដស៍: ជាទូទៅអ្នកកើតជំងឺអេដស៍នឹងមានជំងឺជ្រាតជ្រែកចូលមកជាច្រើន ក្នុងនោះក៏មានជំងឺរលាកពងស្វាសផងដែរ។
ជំងឺរលាកពងស្វាស ដែលមិនឆ្លងពីមេរោគ: គឺកើតឡើងដោយសារការរលាកសរសៃឈាម ឬកើតពីការប្រើប្រាស់ថ្នាំមួយប្រភេទដែលបណ្ដាលឱ្យកើតមានការរលាក រួចហុចផលអាក្រក់ដល់ពងស្វាស។
អាការជំងឺរលាកពងស្វាស
អាការទូទៅតែងសង្កេតឃើញមាន កើតអាការហើម កណ្តួលក្រហមនៅបរិវេណពងស្វាសអាចមានតែម្ខាង ឬសងខាង ដែលអ្នកខ្លះទៀតកើតមានទាំងសងខាងតែម្ដង។ វាងាយឆ្លង និងកើតមានការរលាកដល់បំពង់បង្ហូរមេជីវិត រហូតដល់អ្នកខ្លះមានអាការឈឺចុកចាប់កន្លាក់ជើង និងឈឺចាប់បរិវេណប្រដាប់ភេទ ហើយចាក់ដល់ពងស្វាសផងដែរ។ អ្នកជំងឺគួរតែទៅជួបពេទ្យដើម្បីត្រួតពិនិត្យអាការរោគ និងព្យាបាលជំងឺបានទាន់ពេលវេលា។ ក្នុងករណីដែលបណ្ដែតបណ្ដោយទុកយូរ នោះអ្នកជំងឺអាចកើតមានអាការក្ដៅខ្លួនខ្លាំង ឡើងពងបែកនៅម្ដុំប្រដាប់ភេទ ហើយមានហូរឈាមតាមប្រដាប់ភេទ ព្រមទាំងហុចផលអាក្រក់ដល់មេជីវិតថែមទៀតផង។ប្រសិនបើអ្នកសង្ស័យថា មានអាការជំងឺខាងលើនេះ ត្រូវប្រញាប់ទៅមន្ទីរពេទ្យកុំឱ្យលើសពីរយៈពេល2ថ្ងៃឱ្យសោះ ព្រោះគ្រូពេទ្យងាយស្រួលក្នុងការព្យាបាលនៅដំណាក់កាលដំបូងបើមិនដូច្នោះទេ អ្នកអាចប្រឈមមុខនឹងការព្យាបាលដោយការវះកាត់។
វិធីការពារមិនឱ្យកើតជំងឺរលាកពងស្វាស
1. ចាក់វ៉ាក់សាំងការពារជំងឺស្រឡទែនតាំងពីកុមារ។
2. ប្រើស្រោមអនាម័យគ្រប់ពេលរួមភេទ ដើម្បីការពារខ្លួនអ្នកពីការឆ្លងរោគផ្សេងៗ។
3. ចៀសវាងការប្រើឱសថដោយមិនមានការអនុញ្ញាតិ និងមិនមានការពិនិត្យពីគ្រូពេទ្យ ដែលងាយហុយផលអាក្រក់ដល់រាងកាយ និងងាយកើតជំងឺផ្សេងៗទៀត។
4. ខណៈដែលបានដឹងខ្លួនថា ឆ្លងមេរោគជំងឺកាមរោគ ត្រូវប្រញាប់ទៅរកគ្រូពេទ្យជាបន្ទាន់៕
តើកាល់ស្យូម មានប្រយោជន៍យ៉ាងណាខ្លះជាមួយស្រ្តីមានគភ៌?
មានសារធាតុអាហារជាច្រើនដែលចាំបាច់ និងមានប្រយោជន៍យ៉ាងខ្លាំងចំពោះសុខភាពរាងកាយរបស់ស្រ្តីដែលកំពុងតាំងគភ៌។ ការពិតទៅ ការទទួលទានអាហារដែលល្អ និងមានប្រយោជន៍តាំងពីមុនពេលតាំងគភ៌ ក៏រឹតតែមានផលល្អចំពោះសុខភាពច្រើនដែរ ព្រោះការដែលរាងកាយបានទទួលសារធាតុអាហារល្អៗ ច្បាស់ជាហុចផលល្អដល់សុខភាពទាំងម្ដាយ និងទារកក្នុងគភ៌មិនខាន តែនៅមានរឿងមួយទៀតដែលមានផលយ៉ាងច្រើនដល់ការចម្រើនធំធាត់របស់រាងកាយ នោះគឺការបានទទួលទានអាហារដែលសម្បូរទៅដោយសារធាតុកាល់ស្យូម ព្រោះកាល់ស្យូមនឹងជួយសាងបន្ថែមលើផ្នែកដែលសឹករេចរឹល រួមទាំងជួយសាងបណ្ដុំឆ្អឹង និងធ្មេញឱ្យមានការរីកចម្រើនធំធាត់យ៉ាងរឹងមាំ។
កាល់ស្យូមមានប្រយោជន៍ចំពោះសុខភាព និងជាសារធាតុរ៉ែដែលចាំបាច់ត្រូវមានច្រើនបំផុតក្នុងរាងកាយ កាល់ស្យូមភាគច្រើនស្ថិតនៅក្នុងឆ្អឹង និងធ្មេញ កាល់ស្យូមមានភាពចាំបាច់ដល់ការធ្វើការងាររបស់ប្រព័ន្ធប្រសាទ ការបង្រួញខ្លួនរបស់សាច់ដុំ-ល- ក្រៅពីនេះកាល់ស្យូមនៅមានប្រយោជន៍ដល់ការបង្កកខ្លួនរបស់ឈាមនៅពេលកើតមានស្នាមរបួសលើរាងកាយទៀតផង។
កាល់ស្យូម និងស្រ្តីមានគភ៌
ប្រហែលជាបានដឹងរួចហើយថា នៅលើ
ស្រ្តីដែលកំពុងតាំងគភ៌ ការបានទទួលកាល់-ស្យូមគ្រប់គ្រាន់តាមតម្រូវការរបស់រាងកាយ នឹងជួយធ្វើឱ្យកម្មវិធីការធ្វើការងាររបស់គ្រប់ប្រព័ន្ធក្នុងរាងកាយដំណើរការទៅយ៉ាងល្អពេញលេញ ព្រោះមកដល់អំឡុងពេលមួយរបស់ការតាំងគភ៌ កាល់ស្យូមនឹងត្រូវបឺតយកទៅប្រើប្រាស់ក្នុងការសាងសាច់ សាងតួខ្លួន សាងឆ្អឹង និងធ្មេញរបស់ទារកក្នុងគភ៌ ដូច្នេះហើយទើប យើងបានឃើញថា ស្ត្រីដែលមានគភ៌ច្រើនតែមានអាការពុកធ្មេញកើតឡើង រួមទាំងរោគឆ្អឹងពុកផងដែរ ដោយសារតែកង្វះជាតិកាល់ស្យូមហ្នឹងឯង។ ដូច្នេះក្នុងមួយថ្ងៃៗនៃការទទួលទានអាហារ ស្រ្តីមានគភ៌គួរតែសង្កត់ធ្ងន់លើអាហារដែលមានជាតិកាល់ស្យូមរួមជាមួយផង ព្រោះវានឹងជួយឱ្យបរិមាណកាល់ស្យូមក្នុងរាងកាយមានគ្រប់គ្រាន់នឹងតម្រូវការរបស់ទាំងម្ដាយ និងកូនរបស់អ្នកផងដែរ។ស្រ្តីមានគភ៌ និងការខ្វះជាតិកាល់ស្យូម
ការធ្វើការងាររបស់សាច់ដុំ ប្រព័ន្ធប្រសាទ កម្មវិធីមេតាបូលីហ្ស៊ឹមរបស់កោសិកា នឹងធ្វើការខុសប្រក្រតី។
ឆ្អឹងនឹងស្ដើង និងផុយស្រួយ។
ចំពោះស្រ្តីមានគភ៌ដែលមានការខ្វះជាតិកាល់ស្យូមគ្រប់ពេលវេលា និងខ្វះក្នុងរយៈពេល យូរជាប់ៗគ្នា រឿងដែលនឹងកើតឡើងនោះគឺ នឹងធ្វើឱ្យកើតអាការសឹកពុកឆ្អឹងជានិរន្តរ៍។
លុះដល់អំឡុងពេលមួយរបស់វ័យ នៅ លើស្រ្តីមានគភ៌ ឬអ្នកដែលខ្វះជាតិកាល់ស្យូម នឹងធ្វើឱ្យកម្ពស់ថយចុះ។
ភាពរឹងមាំ ឬកម្លាំងពលំក្នុងការប្រឹងប្រសូតបុត្រនឹងថយចុះ ឬនៅលើស្រ្តីមួយចំនួនគ្មានកម្លាំងប្រឹងសោះតែម្ដង។ប្រភពអាហារដែលសម្បូរជាតិកាល់ស្យូម
ប្រភពអាហារដែលមានជាតិកាល់ស្យូម មានច្រើនប្រភេទណាស់ មិនថាតែកាល់ស្យូមដែលមាននៅក្នុងទឹកដោះដែលស្រ្តីមានគភ៌គួរតែទទួលទានជាមធ្យម 1-2កែវក្នុងមួយថ្ងៃ ព្រោះស្រ្តីមានគភ៌ត្រូវការកាល់ស្យូមច្រើនក្នុងមួយថ្ងៃៗដល់ទៅ 1,200មីល្លីក្រាមឯណោះ ដូច្នេះហើយទើបចាំបាច់ត្រូវបានទទួលពីអាហារដែលមានជាតិកាល់ស្យូមខ្ពស់។ សម្រាប់អាហារផ្សេងទៀតដែលជាប្រភពដ៏ល្អរបស់កាល់ស្យូមដែរនោះ មានដូចជាត្រីចង្វាមូល ត្រីតូចៗដែលញ៉ាំបានទាំងឆ្អឹង បន្លែស្លឹកបៃតង ដូចជាបន្លែ ខាត់ណា ប្រូខូលី គ្រាប់ល្ង ឬតៅហ៊ូដុំ ជាដើម។ល៕
ពិតទេ ទទួលទានសាច់ក្រហមរាល់ថ្ងៃ ហុចផលអាក្រក់ចំពោះសុខភាព?
បើយោងតាមការសិក្សាមួយធ្វើឡើងដោយអ្នកវិទ្យាសាស្ត្រសាកលវិទ្យាល័យ Harvard School of Public Health បានអះអាងថា ការទទួលទានសាច់ក្រហមកែច្នៃត្រឹមតែចំនួន2បន្ទះក្នុងមួយថ្ងៃអាចបង្កើនគ្រោះហានិភ័យកើតមានជំងឺបេះដូង និងជំងឺមហារីកដល់ទៅ20%។ នៅថ្ងៃនេះ ទស្សនាវដ្តី ឡារ៉ែនសូមជម្រាបជូនពីអត្ថបទសុខភាពសម្រាប់អ្នកដែលនិយមទទួលទានសាច់ក្រហមដែលបានកែច្នៃ និងនៅមានឈាមស្រស់ដូចជា សាច់គោ សាច់ចៀន និងសាច់ពពែជាដើម។
ការសិក្សានេះដែរក៏បានតាមដានពិនិត្យលើមនុស្សប្រុសស្រីជាង12ម៉ឺននាក់ និងចំណាយពេលអស់ជិត30ឆ្នាំបានរកឃើញទៀតថា ប្រសិនជាគេទទួលទានសាច់ក្រហមស្រស់(មិនកែច្នៃ)មួយបន្ទះជាមធ្យម អត្រាប្រឈមនឹងជំងឺខាងលើបានថយចុះមកនៅត្រឹម13%។ សាស្ត្រាចារ្យ Frank Hu អ្នកនិពន្ធជាន់ខ្ពស់មកពីសាកលវិទ្យាល័យ Harvard School of Public Health បានថ្លែងថា “លទ្ធផលនៃការសិក្សានេះបានផ្តល់ជាភស្តុតាងកាន់តែច្បាស់បន្ថែមទៀតដែលថា ការទទួលទានសាច់ក្រហមជារៀងរាល់ថ្ងៃ ជាពិសេសសាច់កែច្នៃជាអាហារសម្រេច គឺជាហេតុនៃការហុចផលអាក្រក់ចម្បងនៃការស្លាប់មុនអាយុ។ ផ្ទុយមកវិញ ការជ្រើសរើសយកប្រភពអាហារសម្បូរដោយប្រូតេអីុនផ្សេងទៀតមកជំនួសសាច់ក្រហមគឺអាចហុចផលវិជ្ជមានដល់សុខភាព”។ ការជំនួសសាច់ក្រហមដោយត្រីអាចកាត់បន្ថយគ្រោះថ្នាក់អាក្រក់នៃការស្លាប់មុនអាយុពីជំងឺបេះដូង និងមហារីកបានដល់ទៅ7% ខណៈបន្លែ និងបណ្តាផលិតផលធ្វើពីទឹកដោះដែលមានខ្លាញ់តិចអាចកាត់បន្ថយហានិភ័យបាន10%។ ចំណែកគ្រាប់ធញ្ញជាតិ និងពពួកសណ្តែកមានជាតិប្រេងវិញអាចកាត់បន្ថយហានិភ័យបានដល់ទៅ14%។
បើតាមទិន្ន័យនៃជំងឺមហារីកពិភពលោក WCRF បានស្នើជាយោបល់ថា មនុស្សទាំងអស់គួរចៀសវាងទទួលទានសាច់ក្រហមដែលកែច្នៃទុកបានយូរ ឬកំណត់ពីចំនួនដែលត្រូវទទួលទានក្នុងមួយសប្តាហ៍កុំឱ្យលើសពី500ក្រាម។
គួបញ្ជាក់ផងដែរថា លោកគ្រូពេទ្យ Rachel Thompson អនុប្រធានផ្នែកវិទ្យាសាស្ត្ររបស់មូលនិធិ WCRF បានបញ្ជាក់ថា “លទ្ធផលលើកនេះបានជួយពង្រឹងបន្ថែមនូវភស្តុតាងដែលបង្ហាញពីការជាប់ពាក់ព័ន្ធគ្នារវាងសាច់ក្រហម និងជំងឺរ៉ាំរ៉ៃ។ ជីវិតអាចត្រូវបានជួយសង្គ្រោះឱ្យផុតពីសេចក្តីស្លាប់ ប្រសិនបើលោកអ្នកជំនួសសាច់ក្រហមដោយបណ្តាអាហារសម្បូរប្រូតេអីុនផ្សេងៗមានដូចជា ត្រី បន្លែ បណ្តាសណ្តែកមានប្រេង និងសាច់មាន់ជាដើម”៕
អាការងងឹតមុខដួលទាំងជំហរ… គ្រោះថ្នាក់អាចដល់ស្លាប់បាន
អាការងងឹតមុខ គឺជាអាការដែលបាត់បង់ស្មារតីមួយភ្លែត និងអាចដួលទាំងជំហរ គឺជាការដួលបាត់បង់ស្មារតី ដែលមានតាំងពីខ្យល់គរធម្មតារហូតទៅដល់ខ្យល់គរដួលដោយសារតែភាពខុសប្រក្រតីកម្រិតធ្ងន់ធ្ងររបស់បេះដូង។
អាការងងឹតមុខដួលទាំងជំហរ ឬអាការខ្យល់គរបាត់ស្មារតី ជាអាការដែលជួបប្រទះញឹកញាប់ជាសភាវដែលរាងកាយបាត់បង់ការដឹងខ្លួន និងបាត់បង់កម្លាំងរបស់សាច់ដុំមួយខណៈពេល ដែលជាផលប៉ះពាល់បណ្ដាលមកពីឈាមដែលរត់ទៅចិញ្ចឹមមែកធាងនៃប្រព័ន្ធប្រសាទខួរក្បាលថយចុះ ដែលមានបច្ច័យពាក់ព័ន្ធពីបរិមាណឈាមដែលចេញពីបេះដូង និងកម្លាំងទប់ទល់របស់សរសៃឈាមទូទាំងរាងកាយ។ អាការងងឹតមុខដួលទាំងជំហរនេះ ច្រើនតែដឹងខ្លួនប្រក្រតីឡើងវិញដោយខ្លួនឯង និងអាចកើតដដែលៗឡើងទៀតបាន។
តាមរយៈការសិក្សាស្រាវជ្រាវនៅប្រទេសបានរកឃើញថា ស្ទើរ10%នៃអ្នកជំងឺដែលមកជួបគ្រូពេទ្យដើម្បីចូលព្យាបាល មានមនុស្សចាស់ជាង50% សុទ្ធតែធ្លាប់កើតអាការងងឹតមុខដួលទាំងជំហរនេះរួចមកហើយយ៉ាងតិចក៏1ដងដែរ។
អ្នកកើតអាការងងឹតមុខដួលទាំងជំហរដែលរកមូលហេតុមិនឃើញ មានអត្រាបាត់បង់ជីវិតក្នុងឆ្នាំដំបូងដែលកើតឡើងខ្ពស់ដល់ទៅ6%ដោយ4% បាត់បង់ជីវិតបែបទាន់ហន់ តែបើមានមូលហេតុមកពីជំងឺបេះដូងវិញ អត្រាបាត់បង់ជីវិតក្នុងឆ្នាំដំបូងដែលកើតនោះនឹងខ្ពស់ដល់ទៅ18%-33% ដោយ24% ជាការបាត់បង់ជីវិតបែបទាន់ហន់។
សម្រាប់អ្នកដែលប្រកបអាជីព ដូចជា បុគ្គលិកបើកបររថយន្ត អ្នកបើកយន្តហោះ កម្មករសំណង់ ឬអ្នកប្រតិបត្តិការជាមួយគ្រឿងចក្រ រឹតតែមានភាពប្រថុយប្រថានខ្ពស់ក្នុងស្លាប់បាត់បង់ជីវិតបន្ទាប់ពីកើតអាការងងឹតមុខដួលទាំងជំហរនេះ។
អាការងងឹតមុខដួលទាំងជំហរនេះអាចបែងចែកបានជា2ក្រុម គឺក្រុមដែលកើតអាការងងឹតមុខដួលទាំងជំហរ ដោយសារសភាវលោហិតធ្លាក់ចុះទាបមួយខណៈពេល តែមិនមែនជាជំងឺបេះដូង ឬហៅងាយៗថា អាការងងឹតមុខខ្យល់គទូទៅ ដោយសារតែរាងកាយទ្រាំទ្រជាមួយនឹងសភាពបរិស្ថានជុំវិញខ្លួនលែងបាន ដោយមានមូលហេតុមកពីភាពតានតឹងធុញថប់ សម្រាកមិនបានគ្រប់គ្រាន់ ឈរ ឬអង្គុយយូរហួសហេតុពេក។ ចំណែកមួយក្រុមទៀតគឺ អាការងងឹតមុខដួលទាំងជំហរ បណ្ដាលមកពីរោគបេះដូង និងសរសៃឈាម ដូចជា អត្រាលោតរបស់បេះដូងខុសប្រក្រតី និងការណែនស្ទះរបស់សរសៃឈាមជាដើម។
មូលហេតុរបស់ការកើតខ្យល់គស្ទើរតែបាត់ស្មារតី ឬបាត់ស្មារតីតែម្ដង មានច្រើនដូចតទៅ ៖
1. សភាវភ្ញាក់ផ្អើល ឬខូចចិត្តខ្លាំងក្លា
2. ក្អក ឬកណ្ដាស់ខ្លាំងជ្រុលពេក
3. ខណៈឈរបត់ជើងតូច ឬក្រោយពេលបត់ជើងតូចរួច បន្ទាប់ពីទ្រាំមកយូរ
4. ហាត់ប្រាណខ្លាំងជ្រុលពេក
5. បន្ទាប់ពីទទួលទានអាហារច្រើនហួសហេតុ
6. រលាកសរសៃប្រសាទខួរក្បាល
7. កើតជំងឺខួរក្បាលចុះខ្សោយ
8. ជំងឺ ផារគិនសុន (នៅលើអ្នកខ្លះដែលមានប្រព័ន្ធប្រសាទអត្តនោម័តិខុសប្រក្រតីរួមជាមួយផង)
9. ជំងឺទឹកនោមផ្អែម (នៅលើអ្នកជំងឺដែលសរសៃប្រសាទត្រូវបំផ្លាញដោយសារទឹកនោមផ្អែម)
10. ដោយសារថ្នាំប្រភេទខ្លះ ដូចជាទទួលទានថ្នាំបញ្ចុះសម្ពាធឈាមច្រើនជ្រុលពេក
11. ទទួលទានស្រាច្រើនជ្រុលពេក
12. ចំណុចកំណើតអគ្គិសនីរបស់បេះដូងចុះខ្សោយ
13. បាត់បង់ឈាមច្រើន ឬបាត់បង់ជាតិទឹកអស់ពីរាងកាយច្រើនជ្រុលពេកដូចជា រាករូសធ្ងន់ធ្ងរ និងក្អួតចង្អោរខ្លាំងក្លា
14. សភាវបេះដូងលោតខុសចង្វាក់យ៉ាងខ្លាំងក្លា
15. រោគសាច់ដុំបេះដូងក្រាស់ខុសប្រក្រតី
16. សភាវជាតិស្ករនៅក្នុងឈាមទាប ឬខ្ពស់ជ្រុលពេកវិធីប្រតិបត្តិនៅពេលកំពុងតែរកកលនឹងខ្យល់គបាត់ស្មារតី នៅពេលចាប់ផ្ដើមមានអាការ ចូរប្រញាប់រកកន្លែងសម្រាក ឬចាប់តោងអ្វីមួយទប់ខ្លួនឱ្យជាប់ និងតន្ត្រំជើង ដើម្បីឱ្យឈាមរត់ឆ្ពោះទៅបេះដូងបានច្រើនឡើង។ បើនៅតែមិនបានធូរស្រាល ចូរអង្គុយចុះ ហើយបើសិននៅតែមិនទាន់ធូរស្រាលទៀត ចូរគេងរាបនឹងដី ដើម្បីឱ្យឈាមហូរទៅចិញ្ចឹមខួរក្បាលបានច្រើនឡើង ព្រមទាំងអាចការពារការកើតខ្យល់គដួលទាំងជំហរបាន គឺអាចកាត់បន្ថយការកើតមានរបួសស្នាម បើសិនជាដួលបោកទៅដី ឬទៅបុក ឬប៉ះនឹងវត្ថុផ្សេងៗបានទៀតផង។
បើកំពុងបើកបររថយន្ត គួរតែចតរថយន្តភ្លាមហើយកាច់កៅអីទៅក្រោយឱ្យស្ថិតក្នុងឥរិយាបថគេងរាប។ បើស្ថិតនៅក្នុងរថយន្តដឹកអ្នកដំណើរគួររកកន្លែងអង្គុយ ឬគេងនៅក្នុងរថយន្តនោះហើយប្រញាប់ប្រាប់អ្នកជិតខាងថា ខ្លួនកំពុងរកកលខ្យល់គងងឹតមុខដួល។ មិនគួរប្រញាប់ចុះពីរថយន្តឡើយ ព្រោះអាចនឹងដួលបាត់ស្មារតីនៅត្រង់ជណ្ដើរចុះពីរថយន្ត នាំឱ្យកើតគ្រោះថ្នាក់បាន៕