ដើម្បីជួយឱ្យភ្នាក់ងារអចលនទ្រព្យនៅក្នុងរាជធានីភ្នំពេញក៏ដូចជានៅតាមខេត្តនានាមានជំនាញច្បាស់លាស់ក្នុងការលក់អចលនទ្រព្យប្រកបដោយវិជ្ជាជីវៈត្រឹមត្រូវ និងទទួលបានជោគជ័យ ក្រុមហ៊ុនស៊ីភីអែល ខេមបូឌា ប្រភើធី លីមីធីត (CPL) បានរៀបចំវគ្គបណ្តុះបណ្តាលជំនាញលក់អចលនទ្រព្យនេះជារៀងរាល់ខែ ហើយទទួលបានការចាប់អារម្មណ៍ និងចូលរូមពីសិក្ខាកាមជាច្រើនរហូតសឹងមិនមានកន្លែងអង្គុយទៀតផង។
លោកឧកញ៉ា ចេង ខេង អគ្គនាយកក្រុមហ៊ុន CPL និងជាប្រធានក្រុមប្រឹក្សាភិបាលសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា មានប្រសាសន៍ថា ដោយមើលឃើញថា វិស័យអចលនទ្រព្យនៅតែបន្តរីកចម្រើនទៅមុខឥតឈប់ឈរ ហើយភ្នាក់ងារមួយចំនួននៅតាមបណ្តាខេត្តនានានៅទូទាំងព្រះរាជាណាចក្រកម្ពុជានៅមិនទាន់មានជំនាញច្បាស់លាស់ក្នុងការក្លាយខ្លួនជាភ្នាក់ងារអចលនទ្រព្យឱ្យស្របតាមផ្លូវច្បាប់នៃព្រះរាជាណាចក្រកម្ពុជា ក្រុមហ៊ុន CPL បានរៀបចំវគ្គបណ្តុះបណ្តាលនេះឡើងដើម្បីឱ្យពួកគាត់មានចំណេះ និងជំនាញពិតប្រាកដក្នុងវិស័យនេះដើម្បីទទួលជោគជ័យគ្រប់ៗគ្នា។
លោកមានប្រសាសន៍ថា វគ្គបណ្តុះបណ្តាលនេះចាប់ផ្តើមរៀបចំឡើងនៅដើមឆ្នាំ2018 ដោយមានការចូលរួមពីសិក្ខាកាមដែលមានបំណងធ្វើជាភ្នាក់ងារអចលនទ្រព្យនៅក្នុងរាជធានីភ្នំពេញនិងតាមបណ្តាខេត្ត ហើយអ្វីដែលពិសេសជាងនេះទៀតនោះ គឺមានថៅកែពុះដីឡូត៍លក់ ឧកញ៉ា និងបណ្ឌិតមួយចំនួនក៏បានមកចូលរួមក្នុងវគ្គបណ្តុះបណ្តាលខាងលើនេះដែរ ដែលធ្វើឱ្យលោកឧកញ៉ាមានការភ្ញាក់ផ្អើល និងនឹកស្មានមិនដល់ថាមានការគាំទ្រដល់ថ្នាក់នេះឡើយ “គោលបំណងរបស់CPL គឺយើងគ្រាន់តែចង់ធ្វើការបណ្តុះបណ្តាលលើភ្នាក់ងារអចលនទ្រព្យដើម្បីឱ្យមានជំនាញត្រឹមត្រូវដើម្បីអាចផ្តល់សេវាកម្មក្នុងការលក់ជូនអតិថិជនឱ្យទទួលបានជោគជ័យប៉ុន្តែជាក់ស្តែង គឺមានទាំងថៅកែក្រុមហ៊ុនពុះដីឡូតិ៍ លោក-ឧកញ៉ា លោកបណ្ឌិត មកចូលរៀនវគ្គបណ្តុះបណ្តាលនេះកាន់តែច្រើនឡើងៗ រហូតគ្មានកន្លែងអង្គុយ និងមិនហ៊ានទាំងទទួលការកក់ឈ្មោះចូលរៀនទុកមុនទៀតផង”។
ចាប់ពីដើមឆ្នាំ2018 មកក្រុមហ៊ុនបណ្តុះបណ្តាលបាន 3វគ្គហើយ ដែលមានសិក្ខាកាមចូលរួមសរុបចំនួន 250នាក់។ ក្រោយពីបានទទួលការបណ្តុះបណ្តាលរួច មានសិក្ខាកាមជាច្រើនបានចេញទៅរកស៊ីធ្វើជាឈ្មួញកណ្តាលក្នុងការទិញ-លក់ដី និងទទួលបានជោគជ័យលើការងាររបស់ខ្លួនជាច្រើន ដោយលក់បានច្រើនកន្លែងផ្សេងៗគ្នា និងទទួលបានកម្រៃជើងសាច្រើនគួរឱ្យចាប់អារម្មណ៍ជាខ្លាំង។
ជំនាញដែលសិក្ខាកាមទទួលបានពីវគ្គបណ្តុះបណ្ដាលខាងលើ រួមមានការយល់ដឹងអំពីផ្លូវច្បាប់ពាក់ព័ន្ធក្នុងការទិញ-លក់អចលនទ្រព្យ ចៀសវាងការកើតមានបញ្ហាផ្សេងៗ ជំនាញចរចាក្នុងការលក់យ៉ាងមានប្រសិទ្ធភាព ជំនាញរៀបចំឯកសារមើលប្លង់កម្មសិទ្ធិដីធ្លី និងជំនាញវាយតម្លៃអចលនទ្រព្យជាដើម។ ត្រង់ចំណុចនេះលោកឧកញ៉ាបានបញ្ជាក់ថា ក្រុមហ៊ុនបានរៀបចំប្រព័ន្ធ(System) មួយនៅក្នុងកុំព្យូទ័រដែលជួយសម្រួលដល់ទាំងអ្នកលក់ និងអ្នកទិញ ដោយគ្រាន់តែវាយបញ្ចូលឈ្មោះទីតាំងដីត្រង់ចំណុចណាមួយ រួចហើយប្រព័ន្ធនោះនឹងបង្ហាញពីតម្លៃឱ្យអ្នកលក់ និងអ្នកទិញអាចទទួលយកបានទាំងសងខាងដោយមិនលម្អៀងដូចមាត់មនុស្សចេះតែថានោះទេ។ ជាធម្មតាយើងដឹងហើយថា អ្នកលក់ចង់បានតម្លៃខ្ពស់ ចំណែកអ្នកទិញចង់បានតម្លៃទាប ដូច្នេះដើម្បីឱ្យការចរចាលើការទិញ-លក់ឆាប់ត្រូវគ្នា ភាគីទាំងពីរអាចបញ្ចូលទីតាំងដីទៅក្នុងប្រព័ន្ធនេះ នឹងឆាប់រកចំណុចកណ្តាលត្រូវគ្នាបានឆាប់រហ័ស។
លោកឧកញ៉ាបញ្ជាក់ថា ក្រៅពីគ្រូបណ្តុះបណ្តាលវគ្គខាងលើហើយ ក្រុមហ៊ុនក៏មានដៃគូជាមួយក្រុមហ៊ុនជាច្រើននៅក្នុងតំបន់អាស៊ីដែលមានបទពិសោធខ្ពស់ និងយូរឆ្នាំដើម្បីផ្លាស់ប្តូរចំណេះ ជំនាញ និងបទពិសោធដល់បុគ្គលិក និងសិក្ខាកាមនៅវគ្គបន្តបន្ទាប់ទៀត ឱ្យពួកគេមានសមត្ថភាពកាន់តែខ្លាំងឡើងដូចបណ្តាប្រទេសនៅក្នុងតំបន់។
សិក្ខាកាមដែលបានចូលរួមវគ្គបណ្តុះបណ្តាលខាងលើ លោកបណ្ឌិត ជា ចំរើន មានបានប្រសាសន៍ថាទោះបីលោកមានសញ្ញាបត្របណ្ឌិត ធ្លាប់ធ្វើការងារធំៗជាច្រើនក៏ដោយ ក៏ប៉ុន្តែលោកនៅមិនទាន់មានជំនាញខាងទិញ-លក់ដីធ្លីនៅឡើយទេ ដែលនេះជាហេតុធ្វើឱ្យលោករួមនឹងសហការីជាច្រើននាក់សម្រេចចិត្តចូលរៀនវគ្គបណ្តុះបណ្តាលនេះ ដើម្បីបានយល់ដឹងកាន់តែច្បាស់ក្នុងការប្រកបរបរលើជំនាញអចលនទ្រព្យនេះ។ លោកបញ្ជាក់ដូច្នេះថា “ថ្វីដ្បិតតែខ្ញុំមានសញ្ញាបត្រដល់ថ្នាក់បណ្ឌិតក៏ដោយ ប៉ុន្តែនៅក្នុងអាជីវកម្មនេះវាមានជំនាញខុសពីជំនួញអាជីព ឬអាជីវកម្មផ្សេងៗទៀត។ នៅពេលដែលខ្ញុំចូលនិវត្តន៍ ខ្ញុំគិតថានឹងប្រើពេលវេលាដែលនៅសេសសល់សម្រាប់ចូលរួមការងារលើវិស័យអចលន-ទ្រព្យនេះនៅពេលបច្ចុប្បន្ន ក៏ដូចជាទៅអនាគត”។
លោកបានបន្ថែមថា សម្រាប់អាជីវកម្មនេះ គេផ្តោតលើចំណុចសំខាន់3 ទី1. សមត្ថភាព ទី2.គឺអាជីព ទី3.គឺសម្ព័ន្ធមេត្រីភាព។ សមត្ថភាពត្រូវមានធាតុផ្សំមួយចំនួនទៀត គឺចំណេះដឹង ទេពកោសល្យ និងគុណធម៌ ចំណែកអាជីព គឺផ្តោតលើមុខរបរ ព្រោះថា នៅពេលបន្តទៅទៀតយើងនឹងមានមុខរបរផ្នែកអចលនទ្រព្យ ទិញ លក់ ជូល ដីធ្លីផ្ទះសំបែង ហើយដើម្បីប្រកបអាជីពនេះបានលុះត្រាតែយើងមករៀនពីអ្នកដែលមានបទពិសោធជោគជ័យ លើអាជីពនេះពិសេស គឺលោកឧកញ៉ា ចេង ខេង តែម្តងដែលមានបទពិសោធជោគជ័យលើវិស័យនេះយូរឆ្នាំ ហើយលោកបានបើកវគ្គបណ្តុះបណ្តាលជំនាញនេះឡើងទុកសម្រាប់មនុស្សជំនាន់ក្រោយៗទៀតដើម្បីផ្តល់ការងារឱ្យពួកគេបានកាន់តែច្រើន។
លោកបានបញ្ជាក់ថា ការមកសិក្សាវគ្គនេះ សិក្ខាកាមទទួលបានចំណេះដឹងច្រើន ដូចជាចំណេះដឹងពីច្បាប់ វិធីសាស្ត្រវាយតម្លៃអចលនទ្រព្យ វិធីសាស្ត្រលក់អចលនទ្រព្យ វិធីសាស្ត្រ និងយុទ្ធសាស្ត្រទាក់ទាញឱ្យអតិថិជនចាប់អារម្មណ៍ទិញជាដើម ដូចជាថា តើហេតុអ្វីបានជាយើងត្រូវទិញដី ព្រោះយើងដឹងហើយថាដីទិញទុកអាចឡើងថ្លៃ តែបើទុកលុយយូរ លុយអាចចុះថោក៕
លោកឧកញ៉ា ចេង ខេង អគ្គនាយកក្រុមហ៊ុន CPL ក្រុមសិក្ខាកាមដែលបានចូលរួមវគ្គបណ្តុះបណ្តាលរបស់ក្រុមហ៊ុន CPL 
