Author: ធឿន មករា

ដឹងឬទេ កាហ្វេមានគុណប្រយោជន៍ និងគុណវិបត្តិអ្វីខ្លះ?
មនុស្សជាច្រើនអាចមិនដឹងថា កាហ្វេដែលអ្នកនាំគ្នាទទួលទានរៀងរាល់ថ្ងៃនេះមានទាំងប្រយោជន៍និងផ្ដល់គុណវិបត្តិដល់រាងកាយ ច្រើនយ៉ាងឡើយថ្ងៃនេះទំព័រសុខភាព ឡារ៉ែន សូមនាំប្រិយមិត្តអ្នកអានទៅស្គាល់ពីគុណប្រយោជន៍ និងគុណវិបត្តិរបស់កាហ្វេទាំងអស់គ្នា។
គុណប្រយោជន៍របស់កាហ្វេ
1. ជួយបន្ថយអត្រាការប្រថុយប្រថានក្នុងការកើតជំងឺទឹកនោមផ្អែមប្រភេទទី2 : ព្រោះនៅក្នុងកាហ្វេមានសារធាតុប្រឆាំងអនុមូលឥស្សរៈ និងសារធាតុគីនីនដែលជួយឱ្យរាងកាយអាចផលិតអីុនស៊ូលីនបានរឹតតែល្អឡើង ដូច្នេះអ្នកដែលកើតជំងឺទឹកនោមផ្អែមអាចសាកល្បងទទួលទានកាហ្វេលមើលបាន។
2. ជួយបន្ថយអត្រាការកើតសភាវភ្លេចភ្លាំង មិនសូវចងចាំបាន : ដោយកាហ្វេអីុនទៅបង្អាក់ ឬប្រឆាំងការផ្ដុំគ្នារបស់កូលេស្តេរ៉ូលដែលជាផលអាក្រក់ដល់រាងកាយ។
3. ជួយបន្ថយអត្រាការកើតរោគបេះដូង : ដោយជួយបន្ថយកូលេស្តេរ៉ូលក្នុងក្រសែឈាមការពារសរសៃឈាមឡើងរឹង និងជួយឱ្យឈាមហូរវិលបានល្អ។
4. ជំរុញចរន្តឈាមរត់នៅក្នុងខួរក្បាល : ក្លិនក្រអូបឈ្ងុយរបស់កាហ្វេនឹងជួយជំរុញឱ្យឈាមក្នុងខួរក្បាលហូរវិលរឹតតែល្អឡើង។
5. ជួយក្នុងការធ្វើការងាររបស់ប្រព័ន្ធរំលាយអាហារ : កាហ្វេអីុនពីកាហ្វេជួយសាងទឹករំលាយអាហារក្នុងក្រពះ និងថ្លើមបន្ថែម ដើម្បីដុតបំផ្លាញជាតិខ្លាញ់នៅក្នុងរាងកាយ។
6. ជួយរំលាយខ្លាញ់ : ដោយវានឹងចូលទៅជំរុញឱ្យខ្លាញ់បំបែកខ្លួន និងក្លាយជាកម្លាំងថាមពលជំនួសវិញ។
7. បង្កើនជាតិខ្លាញ់ល្អ : តាមរយៈការស្រាវជ្រាវបានរកឃើញថា ការទទួលទានកាហ្វេញឹកញាប់ នឹងជួយបង្កើនបរិមាណខ្លាញ់ល្អ ( HLD) ក្នុងរាងកាយបាន។
8. ជួយពន្យារភាពចុះខ្សោយរបស់រាងកាយ : ព្រោះការទទួលទានកាហ្វេដែលមានរសជាតិខាប់នឹងធ្វើឱ្យអុកស៊ីតកើតការបំបែកខ្លួនទើបកាត់បន្ថយការកើតមហារីក ជំរុញការដុតបំផ្លាញកម្លាំងថាមពល និងជួយឱ្យរាងកាយធ្វើការបានរឹតតែល្អឡើង និងស្រស់ស្រាយឡើង។
9. ជួយបំបាត់អាការឈឺក្បាល : ព្រោះកាហ្វេមានចំណែកផ្សំរបស់កាហ្វេអីុនដែលពង្រីកសរសៃឈាម រម្ងាប់អាការឈឺក្បាលបានដូចគ្នានឹងថ្នាំបំបាត់ការឈឺចាប់ដែរ ហើយថែមទាំងជួយដល់ការបត់ជើងតូច រំលាយជាតិខ្លាញ់ក្នុងសរសៃឈាម ដើម្បីមិនឱ្យមានជាតិខ្លាញ់ច្រើនជ្រុលពេក និងជួយសម្រាលអាការស្រវឹងស្រាសល់ពីយប់បានទៀតផង។
10. ជួយដាស់ភាពក្លៀវក្លាស្វាហាប់ : ព្រោះកាហ្វេអីុនមានគុណសម្បត្តិមិនខុសពីសារធាតុជំរុញល្អដែលអាចដាស់ភាពស្វាហាប់ឱ្យរាងកាយដែលកំពុងនឿយហត់ ឬល្វើយអស់កម្លាំងឱ្យរស់រវើកឡើងវិញបានក្នុងរយៈពេលដ៏ខ្លី។
គុណវិបត្តិរបស់កាហ្វេ
1. ធ្វើឱ្យសម្ពាធឈាមខ្ពស់ឡើង : លទ្ធផលនៃការវិភាគបានបង្ហាញថា ពេលទទួលទានកាហ្វេមួយកែវហើយ សម្ពាធឈាមនឹងកើនខ្ពស់ឡើងយូរដល់ទៅ12ម៉ោង ដូច្នេះក្រុមមនុស្សដែលកើតជំងឺលើសឈាមមិនគួរទទួលទានកាហ្វេខណៈពេលមានអារម្មណ៍តានតឹង ឬមានសម្ពាធពីការធ្វើការងារឡើយ។
2. កាហ្វេនឹងហុចផលប៉ះពាល់ដល់ការបឺតជ្រាបសារធាតុរ៉ែ : កាហ្វេអីុននឹងបញ្ចេញផលប៉ះពាល់ដល់ការបឺតជ្រាបយកសារធាតុរ៉ែរបស់ពោះវៀន ដូចជា កាល់ស្យូម ជាតិដែក និងស័ង្កសីជាដើម ដូច្នេះ ក្មេងៗមិនគួរញ៉ាំកាហ្វេឡើយ។
3. កាហ្វេនឹងធ្វើឱ្យអ្នកមានជំងឺក្រពះកាន់តែមានដំបៅធ្ងន់ធ្ងរឡើង : ដោយសារតែកាហ្វេនឹងធ្វើឱ្យក្រពះមានទឹករំលាយអាហារចេញមកច្រើនរហូតធ្វើឱ្យក្លាយជាដំបៅច្រើនឡើង ដូច្នេះអ្នកកើតជំងឺក្រពះមានដំបៅមិនគួរទទួលទានកាហ្វេច្រើនឡើយ ជាពិសេសក្នុងពេលដែលពោះទទេ។
4. កាហ្វេនឹងធ្វើឱ្យពុកឆ្អឹង : ដោយសារតែកាហ្វេអីុនមានគុណប្រយោជន៍ធ្វើឱ្យបញ្ចេញទឹកមូត្រច្រើនឡើង បើទទួលទានកាហ្វេរយៈពេលយូរនឹងធ្វើឱ្យបាត់បង់ជាតិកាល់ស្យូមទៅជាមួយទឹកមូត្រច្រើន រហូតធ្វើឱ្យឆ្អឹងពុក ជាពិសេសសម្រាប់ស្រ្តីក្នុងវ័យអស់រដូវ មិនគួរទទួលទានកាហ្វេច្រើនពេកឡើយ។
5. កាហ្វេមិនល្អសម្រាប់ស្រ្តីមានគភ៌ : ស្រ្តីមានគភ៌ បើទទួលទានកាហ្វេច្រើន នឹងធ្វើឱ្យទារកដែលនៅក្នុងគភ៌ធំធាត់មិនប្រក្រតី ឬអាចនឹងរលូតទៀតផង។
6. កាហ្វេនឹងបំផ្លាញវីតាមីន B1 : វីតាមីន B1 ជាវីតាមីនដែលរក្សាតុល្យភាព និងភាពស្ថិតស្ថេររបស់ប្រព័ន្ធប្រសាទ ដូច្នេះ អ្នកដែលខ្វះវីតាមីន B1 មិនគួរទទួលទានកាហ្វេឡើយ។ នៅពេលបានដឹងទាំងអស់គ្នាដូច្នេះហើយ សូមទទួលទានកាហ្វេឱ្យល្មមសមរម្យណាប្រិយមិត្តអ្នកអាន ព្រោះអ្វីក៏ដោយ ឱ្យតែលើសបរិមាណដែលសមរម្យល្មមហើយនោះ គឺសុទ្ធតែហុចគុណវិបត្តិឱ្យទាំងអស់៕
July 2, 2018
សិស្សដែលបារម្ភពីការមិនយល់បាតុភូត មេរៀននឹងលែងកង្វល់ជាមួយកម្មវិធី MoeYS App Scan
ពីមួយថ្ងៃទៅមួយថ្ងៃ ក្រសួងអប់រំ យុវជន និងកីឡា បានព្យាយាមជំរុញឱ្យសិស្សកាន់តែមានភាពងាយស្រួលក្នុងការសិក្សា តាមរយៈការបង្កើតក្លិបសិក្សា បង្ហាញការបង្រៀនតាមវីដេអូ បង្កើតសាលាធនធានសិក្សានៅតាមខេត្ត និងចែករំលែកឯកសារនៅក្នុងបណ្តាញសង្គមជាដើម។ នាពេលថ្មីៗនេះ ក្រសួងបានបោះមួយជំហានកាន់តែធំថែមទៀត តាមរយៈការបង្កើតជា Mobile Apps ដើម្បីឱ្យសិស្សកាន់តែមានភាពងាយស្រួលសិក្សា ហើយស្វែងយល់បានកាន់តែច្បាស់។
ដោយមើលឃើញពីភាពបត់បែននៃពិភពលោកក្នុងសម័យបច្ចេកវិទ្យា ស្របពេលដែលសិស្សជាច្រើននៅកម្ពុជាមាន Smart Phone ប្រើប្រាស់ ក្រសួងអប់រំ យុវជន និងកីឡា បានបង្កើតកម្មវិធីទូរស័ព្ទដៃមួយដែលមានឈ្មោះថា MoEYS App Scan ប្រើប្រាស់ប្រព័ន្ធបច្ចេកវិទ្យា AR (Argument Reality) ដែលអាចផ្តល់ការពន្យល់ជារូបភាព និងវីដេអូដែលមានចលនានៅលើរូបភាព ដោយសិស្សគ្រាន់តែ Scan លើរូបភាពដែលមានក្នុងកម្មវិធីសិក្សាគោលរបស់ក្រសួង។ កម្មវិធីនេះ ជំរុញឱ្យកាន់តែមានភាពងាយស្រួលដល់សិស្ស និងទាក់ទាញឱ្យមានភាពរីករាយក្នុងការសិក្សានៅកម្រិតមធ្យមសិក្សា ហើយថែមទាំងអាចជួយគ្រូបង្រៀនក៏ងាយស្រួលក្នុងការចាប់ចំណុចសំខាន់ៗពីកម្មវិធីដ៏មានសារៈសំខាន់ទាំងអស់នោះ។
អ្នកនាំពាក្យក្រសួងអប់រំ យុវជន និងកីឡា ឯកឧត្តម រស់ សាលីន បានលើកឡើងថា បន្ទាប់ពីសិស្សដែលប្រឡងមធ្យមសិក្សាទុតិយភូមិកាលពីឆ្នាំកន្លងទៅ ចាប់អារម្មណ៍ និងប្រើប្រាស់ច្រើនលើប្រព័ន្ធពង្រឹងសមត្ថភាព និងតេស្តសមត្ថភាពសិស្សថ្នាក់ទី12 រួចមក ឯកឧត្តមរដ្ឋមន្ត្រី ក្រសួងអប់រំ បានជំរុញឱ្យបន្តស្វែងរកបច្ចកវិទ្យាថ្មីៗដើម្បីសម្រួលដល់ការសិក្សា។ កម្មវិធីនេះនឹងជួយជំរុញបន្ថែមឱ្យសិ្សកាន់តែមានភាពងាយស្រួលក្នុងការស្វែងរក ព្រមទាំងអាចសិក្សាបានដោយខ្លួនឯង បន្ទាប់ពីមានមូលដ្ឋានខ្លះៗក្នុងការសិក្សាជាមួយគ្រូនៅសាលារៀនរួចមក។
ឯកឧត្តម រស់ សាលីន បាននិយាយថា៖ “ជាបឋមកម្មវិធីនេះអាចមានវីដេអូចំនួន 30មេរៀន ដែលមួយមុខវិជ្ជាមានចំនួន 10មេរៀន លើមុខវិជ្ជា3 គឺ រូបវិទ្យា គីមីវិទ្យា និងជីវវិទ្យា”។
បើតាមការបញ្ជាក់ជាផ្លូវការរបស់ក្រសួងអប់រំយុវជន និងកីឡា បានឱ្យដឹងថា កម្មវិធី MoEYS App Sacan ក៏មានដាក់បញ្ចូលកម្មវិធី ធ្វើតេស្តសាកល្បងសមត្ថភាពសម្រាប់សិស្សថ្នាក់ទី12លើមុខវិជ្ជាចំនួន5 រួមមាន គណិតវិទ្យា រូបវិទ្យាគីមីវិទ្យា ជីវវិទ្យា និងប្រវត្តិវិទ្យា។ ប្រព័ន្ធតេស្តសមត្ថភាព និងពង្រឹងសមត្ថភាពសិស្សថ្នាក់ទី12លើមុខវិជ្ជាចំនួន5 រួមមាន គណិតវិទ្យាមាន 214លំហាត់ គីមីវិទ្យាមាន 357លំហាត់ ជីវវិទ្យាមាន 265លំហាត់ រូបវិទ្យាមាន 95លំហាត់ និងប្រវត្តិវិទ្យាមានចំនួន 138សំណួរ។ កម្មវិធីនេះអាចដំណើរការបានជាមួយនឹងបណ្តាញ Android និងប្រព័ន្ធ iOS ផងដែរ៕
June 30, 2018
របរចិញ្ចឹមក្រួចឆាប់បានផល និងមានទីផ្សារលក់ចេញច្រើន
ការចិញ្ចឹមសត្វក្រួចគឺជារបរមួយថ្មីមួយដែលប្រជាពលរដ្ឋខ្មែរទើបចាប់ផ្តើមចិញ្ចឹមយកសាច់លក់នៅរយៈពេលប៉ុន្មានឆ្នាំចុងក្រោយនេះ ដោយសារតែការចិញ្ចឹមក្រួចឆាប់ទទួលបានផល និងងាយស្រួលលក់ចេញនៅតាមទីផ្សារនានា ដែលភាគច្រើនគេយកទៅអាំងលក់នៅតាមដងផ្លូវ និងលក់នៅតាមបណ្តាភោជនីយដ្ឋានផ្សេងៗទៀត។
លោក ឃុត សាវរី ម្ចាស់កសិដ្ឋានចិញ្ចឹមក្រួចនៅភូមិស្វាយធំ សង្កាត់អំពឹលក្រុងកំពត ខេត្តកំពតបានឱ្យដឹងថា លោកបានចាប់យករបរចិញ្ចឹមក្រួចនេះ អស់រយៈពេលប្រមាណជា 8ឆ្នាំមកហើយ ដោយមិនបានរៀនពីសាលាបច្ចេកទេស ឬរៀនបន្តពីអ្នកណាម្នាក់នោះទេ ពោលគឺលោកបានព្យាយាមចិញ្ចឹម និងបង្កាត់ពូជតាមការយល់ដឹងខ្លួនឯងជាច្រើនលើកច្រើនសា ទើបទទួលបានជោគជ័យ និងដឹងពីបច្ចេកទេសចិញ្ចឹមដោយខ្លួនឯង។
លោកនិយាយថា ដំបូងឡើយលោកបានឃើញគេចិញ្ចឹមនៅក្នុងខេត្តបាត់ដំបងពេលនោះលោកបានទិញពងក្រួចយកមកភ្ញាស់សាកល្បងចំនួន 4លើកជាបន្ត-បន្ទាប់ទើបទទួលបានលទ្ធផល។ ក្រោយពីដឹងពីបច្ចេកទេសចិញ្ចឹមហើយ លោកក៏បានទិញមេក្រួចយកមកចិញ្ចឹមដោយខ្លួនឯងដែលមានចំនួនកាន់តែច្រើនឡើងៗជាបន្តបន្ទាប់ រួចក៏ចាប់ផ្តើមបង្កើតជាកសិដ្ឋានដោយធ្វើទ្រុងចិញ្ចឹមឱ្យផុតពីដីដើម្បីការពារពីជំងឺផ្សេង។
ការចិញ្ចឹមក្រួចអាចមានចំនួនតិច ឬច្រើនអាស្រ័យទៅតាមទំហំដី ឬកសិដ្ឋានដែលយើងចង់បាន ប៉ុន្តែដើម្បីចិញ្ចឹមក្រួចឱ្យបានលទ្ធផលល្អ គេត្រូវចេះជ្រើសរើសយកពូជណាដែលមានមាឌធំៗមកទុកបង្កាត់ពូជជាឧទាហរណ៍មេក្រួចចំនួន80ក្បាលគេត្រូវដាក់ក្រួចឈ្មោលចំនួន20ក្បាលដើម្បីឱ្យវារស់នៅជាមួយគ្នាដើម្បីបន្តពូជចេញជាស៊ុតសម្រាប់យកមកភ្ញាស់ យកកូនចិញ្ចឹមយកសាច់លក់នៅលើទីផ្សារនេះ។
ដំណាក់កាលដំបូងគេដាក់វាឱ្យធ្វើការបង្កាត់ពូជ ដោយដាក់ក្រួចញីឱ្យនៅជាមួយក្រួចឈ្មោល និងថែទាំដោយការផ្តល់ចំណី និងផ្តល់ទឹកឱ្យបានគ្រប់គ្រាន់ ដែលចំណីរបស់វា គេអាចផលិតដោយខ្លួនឯងក៏បាន ឬរកទិញពីក្រុមហ៊ុនលក់ចំណីសត្វក៏បាន ហើយសម្អាតទីកន្លែងចិញ្ចឹមជាប្រចាំដើម្បីឱ្យក្រួចមានសុខភាពល្អ កុំឱ្យមានមេរោគដែលអាចបង្កទៅជាជំងឺផ្សេងៗបាន។ បន្ទាប់ពីវារស់នៅជាមួយគ្នាបានប្រមាណជា 1ខែ 20ថ្ងៃមក ក្រួចញីចាប់ផ្តើមផ្ដល់ស៊ុតជាបន្តបន្ទាប់ រួចហើយគេត្រូវជ្រើសរើសស៊ុតណាដែលល្អៗយកទៅដាក់នៅលើធ្នើរក្នុងទូភ្ញាស់ដែលគេរៀបចំទុកជាស្រេច ចំណែកទូភ្ញាស់ពងក្រួចនោះម្ចាស់កសិដ្ឋានចាំបាច់ត្រូវរៀបចំប្រព័ន្ធទឹក-ភ្លើងឱ្យបានល្អទុកជាមុន ដូចជាដាក់កង្ហារបឺតកម្ដៅចេញ នៅពេលដែលអាកាសធាតុក្តៅខ្លាំង និងត្រូវដាក់ធុងទឹកពីក្រោមដើម្បីឱ្យទូមានសំណើមហប់ជាប្រចាំ។ អំឡុងពេល 16ថ្ងៃក្រោយមកពងក្រួចចាប់ផ្តើមញាស់ ដែលពេលនោះគេត្រូវយកកូនក្រួចតូចៗទាំងនោះទៅដាក់ក្នុងទ្រុងមួយដាច់ដោយឡែក ធ្វើការថែទាំដាក់ទឹកដាក់ចំណីឱ្យរយៈពេលត្រឹមតែ 1ខែកន្លះក្រោយមកក្រួចនឹងធំធាត់អាចចាប់លក់បាន ដែលជាទូទៅក្រួច1ក្បាលមានតម្លៃចន្លោះពី 2,000 – 2,500រៀល។
កសិករខាងលើអះអាងថា មកទល់បច្ចុប្បន្នលោកបានបង្កើតកសិដ្ឋានយ៉ាងធំមួយក្នុងទីរួមខេត្តកំពតនោះ ដោយមួយថ្ងៃអាចផលិតក្រួចសាច់លក់ចេញបានប្រមាណជា400 ទៅ500ក្បាលក្នុងមួយថ្ងៃ នេះ សម្រាប់រដូវវស្សាដែលមិនសូវមានបុណ្យទានផ្សេងៗ រីឯនៅរដូវប្រាំងនៅពេលដែលសម្បូរបុណ្យទានច្រើន លោកអាចផលិតបានចំនួន600 ទៅ700ក្បាល ក្នុងមួយថ្ងៃសម្រាប់ចាប់លក់ទៅឱ្យម៉ូយដែលមានទាំងម៉ូយនៅក្នុងខេត្តកំពត បណ្តាខេត្តមួយចំនួនទៀត និងទីក្រុងភ្នំពេញផងដែរ។ ហើយដោយសារតែសាច់ក្រួចមានការកុម្ម៉ង់ទិញកាន់តែច្រើនឡើងៗ លោកបានសម្រេចបង្កើតកសិដ្ឋានធំមួយទៀតនៅក្រុងព្រះសីហនុ ដែលមានសមត្ថភាពផលិតក្រួចសាច់លក់បានចំនួនដល់ទៅ500 ទៅ600ក្បាលក្នុងមួយថ្ងៃសម្រាប់រដូវវស្សា ចំណែករដូវប្រាំងវិញលក់ចេញបានចន្លោះពី1,500 ទៅ2,000ក្បាលក៏មានដែរ។
លោកនិយាយថា របរចិញ្ចឹមក្រួចលក់នៅតែមានតម្រូវការនៅលើទីផ្សារ ដោយសារតែម៉ូយងាយស្រួលយកទៅអាំង ឬធ្វើម្ហូបលក់ និងទទួលបានការគាំទ្រខ្លាំងពីអតិថិជន ហើយនៅពេលឆាប់ៗលោក និងបង្កើតសាខាមួយទៀតនៅខេត្តសៀមរាបដើម្បីផ្គត់ផ្គង់ទីផ្សារនៅក្នុងខេត្តនោះឱ្យមានភាពងាយស្រួល និងមានមហិច្ឆតាបង្កើតឱ្យបានគ្រប់ខេត្ត-ក្រុងទៀតផង។ ជាមួយគ្នានេះ លោកអំពាវនាវដល់ប្រជាពលរដ្ឋខ្មែរសូមឱ្យជួយគាំទ្រផលិតផលក្នុងស្រុក ជាជាងគាំទ្រផលិតផលនាំចូលពីក្រៅប្រទេស ដើម្បីរួមចំណែកលើកកម្ពស់សេដ្ឋកិច្ចប្រជាពលរដ្ឋ ក៏ដូចជាការចូលរួមផ្តល់ការងារដល់ប្រជាពលរដ្ឋយើងឱ្យបានកាន់តែច្រើនឡើងៗផងដែរ៕
June 30, 2018
បច្ចេកវិទ្យាឌីជីថលត្រូវបានប្រើប្រាស់ជាយុទ្ធសាស្ត្រទីផ្សារ
បច្ចេកវិទ្យាឌីជីថលបានជំរុញឱ្យអ្វីៗនៅក្នុងប្រទេសកម្ពុជាមានការផ្លាស់ប្ដូរ។ បច្ចុប្បន្នយើងឃើញមានដំណើរការកម្មវិធីអនឡាញដោយប្រើប្រាស់ទូរស័ព្ទស្មាតហ្វូនជាច្រើនកើនឡើងជាបន្តបន្ទាប់ ហើយការប្រើប្រាស់បច្ចេកវិទ្យាតាមរយៈកម្មវិធីក្នុងទូរស័ព្ទដៃស្មាតហ្វូនលើអាជីវកម្មទូទាត់ប្រាក់ក្នុងរយៈពេលប៉ុន្មានឆ្នាំចុងក្រោយនេះទៀតសោត ក៏កំពុងតែមានប្រជាប្រិយភាពផងដែរ ព្រោះវាជួយសម្រួលដល់ការទិញទំនិញ ការវេរលុយ និងការបង់ថ្លៃសេវាកម្មផ្សេងៗជាដើម។ល។
ក្រៅពីនេះទៀតយើងឃើញមានធនាគារធំៗ ដូចជាធនាគារABA ធនាគារអេស៊ីលីដាជាដើម ក៏មានកម្មវិធីផ្សេងៗប្រើនៅលើទូរស័ព្ទដៃស្មាតហ្វូនដែលអតិថិជនរបស់ធនាគារអាចចូលមើលគណនីរបស់ខ្លួនបាន និងអាចទូទាត់សេវាកម្ម ដូចជាបង់ថ្លៃទឹកភ្លើង ថ្លៃតបណ្ដាញអុីនធើណិត ទិញទំនិញ បង់ថ្លៃសាលា បញ្ចូលទឹកប្រាក់តាមទូរស័ព្ទដៃ និងផ្ទេរប្រាក់ ជាដើមបានគ្រប់ពេលវេលា និងគ្រប់ទីកន្លែង។
ទាំងនេះសបញ្ជាក់ឱ្យឃើញថា យុទ្ធសាស្ត្រទីផ្សារតាមរយៈបច្ចេកវិទ្យាឌីជីថលស្មាតហ្វូនកំពុងតែមានប្រជាប្រិយភាពខ្លាំងនៅក្នុងប្រទេសកម្ពុជា ព្រោះវាមានភាពបត់បែន រហ័ស ងាយស្រួល និងមានសុវត្ថិភាព ដែលវាបានបង្ហាញពីសេដ្ឋកិច្ចកម្ពុជាក្នុងជំហានមួយឆ្ពោះទៅរកសេដ្ឋកិច្ចឌីជីថលដែលមានការផ្លាស់ប្ដូរ ការជឿនលឿន ច្នៃប្រឌិត និងប្រកបដោយបច្ចេកវិទ្យាថ្មី។
កម្មវិធី Pi Pay ក៏ដូចជា Aeon Wallet Cambodia គឺជាវេទិកាទូទាត់ប្រាក់ប្រកបដោយភាពច្នៃប្រឌិត និងមិនចាំបាច់ដាក់សាច់ប្រាក់តាមខ្លួននៅពេលប្រតិបត្តិការទូទាត់នោះទេ។ វាជាប្រព័ន្ធទូទាត់សាច់ប្រាក់តាម Mobile App ដែលអតិថិជនអាច Download ដាក់ក្នុងទូរស័ព្ទដៃដោយគ្រាន់តែបញ្ចូលប្រាក់នៅតាមបញ្ជរ Pi Pay ឫបញ្ជរ Aeon Wallet Cambodia ហើយបន្ទាប់មកក៏អាចធ្វើប្រតិបត្តិការទិញទំនិញ និងទូទាត់ប្រាក់ដោយមិនចាំបាច់ប្រើប្រាស់សាច់ប្រាក់ដែលធ្វើឱ្យអ្នកមានទំនុកចិត្ត និងសុវត្ថិភាព។
ផ្នែកធ្វើដំណើរវិញ យើងអាចធ្វើការហៅរ៉ឺម៉ក ឬតាក់ស៊ីជិះតាមរយៈកម្មវិធីរបស់ក្រុមហ៊ុននៅក្នុងប្រទេសកម្ពុជាដែលមានដូចជា PassApp, Grab Cambodia, Taxi Cambodia, We Go Taxi ជាដើម។ តាមរយៈទូរស័ព្ទដៃរបស់ពួកគេ អតិថិជនមានការពេញចិត្តជាមួយនឹងតម្លៃថោកគួរសមនៃសេវាកម្មនេះព្រោះគេអាចកំណត់គោលដៅធ្វើដំណើរ និងមើលឃើញពីចម្ងាយដែលពួកគេកំពុងជិះបានយ៉ាងងាយស្រួលផងដែរ។
អ្នកជំនាញទីផ្សារបានហៅការប្រើប្រាស់បច្ចេកវិទ្យាឌីជីថលរបស់ក្រុមហ៊ុនអាជីវកម្មនាពេលបច្ចុប្បន្នថា ជាយុទ្ធសាស្ត្រទីផ្សារ ពីព្រោះថា ការផ្តល់សេវាកម្មឱ្យដល់ដៃអតិថិជនតាមរយៈបច្ចេកវិទ្យាគឺជាយុទ្ធសាស្ត្ររបស់ក្រុមហ៊ុន ឬអាជីវកម្មនោះ ដោយសារនៅលើពិភពលោកបច្ចុប្បន្នគេផ្តោតទៅលើបច្ចេកវិទ្យាច្រើន ហើយកម្ពុជាយើងក៏គេសង្កេតឃើញថាមានកំណើនច្រើនគួរសមក្នុងការប្រើយុទ្ធសាស្ត្រទីផ្សារតាមរយៈបច្ចេកវិទ្យា ឌីជីថលនេះ។
លោក យក់ ចំរើនឫទ្ធិ អគ្គនាយកក្រុមហ៊ុនហ្វ័រតេបានពន្យល់យ៉ាងដូច្នេះថា៖ “ទីផ្សារប្រសិនបើគេយកមនុស្សម្នាក់ទាក់ទងអតិថិជនក្នុង1ថ្ងៃ បានអតិថិជនតែ3-5នាក់ប៉ុណ្ណោះ តែបើគេប្រើបច្ចេកវិទ្យា វិញអាចបានដល់ទៅមនុស្សរាប់ម៉ឺន រាប់សែននាក់ នេះជាយុទ្ធសាស្ត្រទីផ្សារមួយ ដែលយុទ្ធសាស្ត្រមួយនេះធ្វើឱ្យតម្លៃដើមធ្លាក់ទាប”។ លោកបន្តថា យុទ្ធសាស្ត្រទីផ្សារតាមរយៈបច្ចេកវិទ្យាឌីជីថលកំពុងតែមានកំណើន ព្រោះថាប្រជាជនកម្ពុជាមិនថាចាស់ ឬក្មេងនោះទេ នរណាៗក៏មានទូរស័ព្ទដៃស្មាតហ្វូនទំនើបៗប្រើដែរ សូម្បីតែពលរដ្ឋនៅទីជនបទ ព្រោះវាមានភាពងាយស្រួលខ្លាំងក្នុងការប្រើប្រាស់់ និងទាន់សម័យ លើកលែងតែអ្នកប្រើប្រាស់ទូរស័ព្ទធម្មតាដែលមិនមែនជា Smart Phone តែប៉ុណ្ណោះ។
លោក យក់ ចំរើនឫទ្ធិ អគ្គនាយកក្រុមហ៊ុន ហ្វ័រតេ
ទាក់ទងនឹងការប្រើប្រាស់គេហទំព័រហ្វេសប៊ុកវិញ ការប្រើប្រាស់បណ្ដាញសង្គមមួយនេះនៅប្រទេសកម្ពុជាមានលក្ខណៈពេញនិយមយ៉ាងខ្លាំង ដូច្នេះហើយទើបបណ្តាក្រុមហ៊ុនអាជីវកម្មជាច្រើនអាចប្រើប្រាស់បណ្ដាញនេះដើម្បីធ្វើការផ្សព្វផ្សាយអំពីទំនិញ និងសេវាកម្មរបស់ក្រុមហ៊ុនគេបាន ដូចជាការផ្តល់ព័ត៌មានទៅកាន់អតិថិជន កម្មវិធីប្រូម៉ូសិន ដំណោះស្រាយបញ្ហារបស់អតិថិជន ការលើកទឹកចិត្តដល់អតិថិជន ការណែនាំក្នុងការប្រើប្រាស់ផលិតផល និងសេវាកម្មផ្សេងៗទៀតដែលមានប្រយោជន៍ដល់ពួកគេ និងការធ្វើឱ្យអតិថិជនចុចគាំទ្រ ឬបញ្ចេញមតិយោបល់ ហើយនិងអនុញ្ញាតឱ្យអតិថិជនអាចទាញយកកម្មវិធីចូលមើល ឬប្រើប្រាស់សេវាកម្មរបស់ក្រុមហ៊ុនបានកាន់តែងាយស្រួលទៀតផង។
លោក យក់ ចំរើនឫទ្ធិ បានបញ្ជាក់ថា ចំពោះគេហទំព័រហ្វេសប៊ុកនេះ គេអាចប្រើប្រាស់ក្នុងយុទ្ធសាស្ត្របានច្រើនមុខ ដូចជាម៉ាកេធីងគឺ គេធ្វើយ៉ាងណាឱ្យអតិថិជនស្គាល់អំពីក្រុមហ៊ុនរបស់គេ ឯក្រុម sales វិញធ្វើយ៉ាងណាផ្សព្វផ្សាយលក់ផលិតផលរបស់ខ្លួនឱ្យបានច្រើន។ ដូច្នេះគេហទំព័រហ្វេសប៊ុកវាមានប្រយោជន៍ត្រង់ថាវាជា social media។ លោកបានបន្តទៀតថា ឱ្យតែមានការប្រាស្រ័យទាក់ទងគ្នាបាន គេអាចទំនាក់ទំនងព័ត៌មាន អាចផ្តល់ព័ត៌មានព្រោះវាមានតម្លៃថោក មិនចំណាយពេលវេលាច្រើនដូច្នេះតាមរយៈគេហទំព័រហ្វេសប៊ុកនេះ គឺងាយស្រួលបំផុត។ ក្នុងអត្ថប្រយោជន៍ផ្សេងៗច្រើនយ៉ាងទៀតការបង្កើតគេហទំព័រហ្វេសប៊ុកក្រៅពីសម្រាប់ផ្សព្វផ្សាយពីអាជីវកម្មរបស់ពួកគេ និងបង្កើនអតិថិជនហើយ គេអាចពង្រឹងអាជីវកម្មឱ្យក្រុមហ៊ុនរបស់គេកាន់តែរីកចម្រើនទៅមុខបានទៀតផង។
ជាក់ស្តែងការផ្សព្វផ្សាយតាមគេហទំព័រហ្វេសប៊ុករបស់ធនាគារមួយចំនួនធំដូចជា កម្មវិធី សេវាកម្មដែលបានបង្កើតថ្មីៗ ធនាគារទាំងនោះបានធ្វើការទាក់ទាញដល់អតិថិជនខ្លួនឱ្យងាកមកសាកល្បងប្រើប្រាស់នូវអ្វីដែលជាបច្ចេកវិទ្យាទំនើបរបស់ខ្លួន។
ក្នុងពេលបច្ចុប្បនេះថ្វីដ្បិតតែប្រព័ន្ធទូរស័ព្ទចល័តមិនទាន់មានសេវាគ្របដណ្ដប់នៅទូទាំងប្រទេសពេញលេញនៅឡើយជាពិសេសនៅតាមទីជនបទ ប៉ុន្តែក្រសួងប្រៃសណីយ៍ និងទូរគមនាគមន៍បាននឹងកំពុងបំពេញនូវប្រព័ន្ធទំនើបកម្មនៃបច្ចេកវិទ្យាឌីជីថលនេះឱ្យបានសព្វគ្រប់នៅឆ្នាំ2020។ នេះបើតាមប្រសាសន៍របស់ឯកឧត្ដម ត្រាំ អុីវតឹក រដ្ឋមន្ដ្រីក្រសួងប្រៃសណីយ៍ និងទូរគមនាគមន៍។
ចំពោះប្រព័ន្ធសេវាអុីនធើណិត 3Gវិញ នៅតាមទីក្រុង-ខេត្តនៅទូទាំងប្រទេស សេវាអុីនធើណិតមានល្បឿនតែ60% ហើយសម្រាប់សេវាអុីនណិត4G ដែលប្រើនៅតាមបណ្ដាជនបទមានសេវាល្បឿនលឿនបំផុតត្រឹមតែ 17%ប៉ុណ្ណោះ ចំណែកនៅទីក្រុងមានដល់57% ដូច្នេះរាជរដ្ឋាភិបាលត្រូវអន្ដរាគមន៍ និងធ្វើទំនើបកម្មលើវិស័យសេវាអុីនធើណិតនេះឱ្យមានភាពល្អប្រសើជាងនេះ ដោយសារការប្រើប្រាស់ប្រព័ន្ធសេវាអុីនធើណិតតាមទូរស័ព្ទវាអាចជួយដល់ចំណូលថវិកាជាតិផងដែរ។ តាមការដាក់សន្ទស្សន៍នៅឆ្នាំ2020 ប្រព័ន្ធអុីនធើណិតនឹងមានល្បឿនលឿននៅតាមទីក្រុងដល់100% ចំណែកនៅតាមជនបទនឹងមានល្បឿនលឿនប្រមាណ 80% ហើយនឹងមានប្រជាពលរដ្ឋខ្មែរប្រើប្រាស់គ្រប់ 100%នៅទូទាំងប្រទេស៕
June 29, 2018
នាយកប្រតិបត្តិក្រុមហ៊ុន Intel លាឈប់ពីតំណែង ក្រោយធ្លាយព័ត៌មានមានទំនាក់ទំនងជាមួយបុគ្គលិក
នាយកប្រតិបត្តិ (CEO) ក្រុមហ៊ុនផលិត Chip ដ៏ធំ និងល្បីល្បាញលំដាប់ពិភពលោក Intel បានលាឈប់ពីតំណែងភ្លាមៗ បន្ទាប់ពីក្រុមប្រឹក្សាភិបាលបានរកឃើញថា មានទំនាក់ទំនងកិច្ចសន្យាខុសច្បាប់ជាមួយនឹងបុគ្គលិកដែលល្មើសនឹងច្បាប់របស់ក្រុមហ៊ុន។
យោងតាមការចេញផ្សាយរបស់ទីភ្នាក់ងារព័ត៌មាន Reuters បានឱ្យដឹងថា នាយកប្រតិបត្តិក្រុមហ៊ុនផលិត Chip ធំជាងគេរបស់អាមេរិក លោក Brian Krzanich បានលាឈប់ពីតំណែង ដោយសារតែលោកបានល្មើសនឹងច្បាប់របស់ក្រុមហ៊ុន។
ក្រុមហ៊ុន Intel បានកំណត់ច្បាប់ថា រាប់ចាប់ពីតំណែងនាយក ឬប្រធានគ្រប់គ្រងឡើងទៅ គឺមិនអនុញ្ញាតឱ្យចុះកិច្ចសន្យាក្រៅផ្លូវច្បាប់ណាមួយជាមួយនឹងបុគ្គលិកឡើយ ហើយបើសិនជាក្រុមហ៊ុនរកឃើញថា មានបុគ្គលណាមួយល្មើសនឹងច្បាប់នេះ នឹងត្រូវបញ្ឈប់តួនាទីភ្លាម។
ពាក់ព័ន្ធនឹងករណីនេះ ខាងក្រុមហ៊ុន Intel មិនបានបង្ហាញព័ត៌មានលម្អិតទាក់ទងនឹងការល្មើសច្បាប់នេះឡើយ ដោយគ្រាន់តែបង្ហើបឱ្យដឹងថា លោក Robert Swan បច្ចុប្បន្នជាប្រធានហិរញ្ញវត្ថុ ត្រូវបានជ្រើសតាំងឱ្យឡើងកាន់តំណែងនាយកប្រតិបត្តិស្ដីទី ខណៈដែលពេលនេះ ក្រុមហ៊ុន Intel កំពុងតែស្វែងរកបុគ្គលដែលមានសមត្ថភាពទាំងនៅក្នុង និងក្រៅក្រុមហ៊ុនដើម្បីមកកាន់តំណែងនាយកប្រតិបត្តិនេះ។
គួរបញ្ជាក់ផងដែរថា លោក Krzanich វ័យ 58ឆ្នាំ ដែលជាវិស្វករអគ្គិសនី ត្រូវបានតែងតាំងជានាយកប្រតិបត្តិក្រុមហ៊ុន Intel កាលពីខែឧសភា ឆ្នាំ2013៕
June 29, 2018
ឈុតអាហារពេលថ្ងៃត្រង់សម្រាប់អ្នកធ្វើការ នៅភោជនីយដ្ឋាន IZA បែបជប៉ុន
កំពុងស្វែងរកកន្លែងទទួលទានអាហារពេលថ្ងៃត្រង់មែនទេ? ដោយសារតែភាពមមាញឹកនៃការងារ និងការកកស្ទះនៃចរា-ចរណ៍នៅក្នុងរាជធានីភ្នំពេញនាពេលបច្ចុប្បន្ននេះកាន់តែខ្លាំងឡើងជារៀងរាល់ថ្ងៃ បានធ្វើឱ្យបុគ្គលិកបម្រើការងារនៅក្នុងការិយាល័យកំពុងជួបនូវបញ្ហាពិបាកក្នុងការស្វែងរកកន្លែងទទួលទានអាហារពេលថ្ងៃត្រង់ ដែលមានទីតាំងល្អនៅចំកណ្តាលទីក្រុងភ្នំពេញជិតកន្លែងធ្វើការ ដែលផ្តល់នូវភាពងាយស្រួល និងមានបរិយាកាសល្អ ប្រកបដោយផាសុកភាព។ នៅពេលនេះភោជនីយដ្ឋានជប៉ុន IZA បានបើកដំណើរការបម្រើអាហារពេលថ្ងៃត្រង់ជាលក្ខណៈឈុតអាហារថ្ងៃត្រង់បែបជប៉ុនដ៏សម្បូរបែប និងប្រកបដោយឱជារស ចាប់ពីថ្ងៃទី10 ខែឧសភា ឆ្នាំ2018នេះតទៅហើយ។
គ្រាន់តែឮឈ្មោះភោជនីយដ្ឋាន IZA ដែលស្ថិតនៅជាន់ទី37 នៃអគារ Vattanac Capital ដែលជាភោជនីយដ្ឋានរបស់សណ្ឋាគារលំដាប់អន្តរជាតិ Rosewood ភ្នំពេញ នោះ លោកអ្នកប្រហែលជាគិតទៅដល់តម្លៃ និងភាពខ្ពង់ខ្ពស់លើសពីសមត្ថភាពរបស់លោកអ្នកក្នុងការមកទទួលទានអាហារនៅទីនេះ តែបើលោកអ្នកបានមកផ្ទាល់នៅភោជនីយដ្ឋាន លោកអ្នកនឹងបានទទួលនូវបទពិសោធន៍ថ្មីក្នុងការទទួលទានអាហារពេលថ្ងៃត្រង់ដ៏ស្រស់ស្រាយជាមួយនឹងការគយគន់ទេសភាពទីក្រុងភ្នំពេញ ដើម្បីរំសាយភាពស្មុគស្មាញពីការពាររបស់លោកអ្នកជាមួយនឹងតម្លៃដ៏សមរម្យ និងមានជម្រើសច្រើនបែប ទាំងបែបជប៉ុន100% (អាហារឆៅ) និងទាំងបែបអាសីុ (អាហារចម្អិនឆ្អិន)។ ដោយសារតែសម្លឹងឃើញពីផលវិបាកនៃការជ្រើសរើសកន្លែងទទួលទានអាហារពេលថ្ងៃត្រង់របស់បុគ្គលិកក្រុមហ៊ុន ភោជនីយដ្ឋាន IZA ដែលជាភោជនីយដ្ឋានបែបជប៉ុនស្ថិតនៅក្នុងសណ្ឋាគារ Rosewood ភ្នំពេញ បានបើកដំណើរការបម្រើជូនអាហារពេលថ្ងៃត្រង់ ជាលក្ខណៈឈុតដល់សាធារណជនទូទៅ បន្ថែមពីលើសេវាកម្មដែលមានស្រាប់ ដែលបម្រើជូននូវអាហារពេលល្ងាចដ៏រ៉ូមែនទិកជាមួយនឹងការទទួលទានអាហារបណ្តើរគយគន់ទេសភាពនាពេលរាត្រីនៅក្នុងរាជធានីភ្នំពេញបណ្តើរ ដែលបានដំណើរការតាំងពីដើមខែមករា ឆ្នាំ2018មកម្លេ៉ះ។ ឈុតអាហារពេលថ្ងៃត្រង់នៅភោជនីយដ្ឋាន IZA មានដូចជា IZA TOKUSEN CHIRASHI, SALMON AVOCADO CHIRASHI, BIFUTEKI DON, YAKITORI DON, SALMON TERIYAKI, KATSU CURRY RICE (បែបចម្អិនឆ្អិន) និង SUSHI GOZEN, SASHIMI GOZEN (បែបឆៅ) ដែលមានបម្រើជូនជាមួយនឹងឈុត Miso Soup, Garden Salad និងជ្រក់ (Pickles) ព្រមទាំងមានជាប្រភេទមីផងដែរ ដូចជា TOKYO TONKOTSU RAMEN, NINNIKU RAMEN, KARA MISO RAMEN, SHIO RAMEN, CURRY NAMBAN UDON (CURRY) និង DANDAN MAZE UDON ជាដើម។ ក្រៅពីអាហារថ្ងៃត្រង់ជាលក្ខណៈឈុត ដែលផ្តល់នូវជីវជាតិគ្រប់គ្រាន់ និងមានភាពងាយស្រួលដល់អតិថិជនហើយនោះ នៅភោជនីយដ្ឋាន IZA ក៏មានជាប្រភេទបង្អែមលៀងមាត់ជាប្រភេទនំខេក ការ៉េម និងភេសជ្ជៈជាច្រើនជម្រើសទៀតសម្រាប់ផ្តល់ជូនអតិថិជនផងដែរមានដូចជា ប្រភេទភេសជ្ជៈមិនមានជាតិអាល់កុល (តែក្តៅ និងតែទឹកកកបែបជប៉ុនជាច្រើនប្រភេទ) និងប្រភេទភេសជ្ជៈមានជាតិអាល់កុល ដូចជា ប្រភេទស្រាសាកេបែបជប៉ុន (រសជាតិដើមនៃស្រាជប៉ុនជាច្រើនជម្រើស) ស្រាបិទបែបជប៉ុន (Brewery: CRAFT BEER និង DRAUGHT BEER) និងប្រភេទស្រាដបជាច្រើនរសជាតិ និងចម្រើនជម្រើសទៀត ដែលស័ក្តិសមនឹងការទទួលទាននាពេលថ្ងៃត្រង់តែម្តង។
សូមបញ្ជាក់ផងដែរថា អាហារឈុតពេលថ្ងៃត្រង់ពីភោជនីយដ្ឋាន IZA គឺបើកបម្រើជូនអតិថិជនទាំងអស់ពីថ្ងៃចន្ទ ដល់ថ្ងៃសុក្រ ពីម៉ោង12ថ្ងៃត្រង់រហូតដល់ម៉ោង2:30នាទីថ្ងៃ។
សម្រាប់ព័ត៌មានបន្ថែម និងការកក់កន្លែងទុកមុន សូមទំនាក់ទំនងមកកាន់លេខទូរស័ព្ទ 023 936 866៕
June 28, 2018
5ចំណុចគួរយល់ដឹងមុននឹងទទួលទានផ្លែទុរេន
នៅអំឡុងពេលនេះ អាកាសធាតុនៅប្រទេសយើងពិតជាមានការប្រែប្រួលម្ដងក្ដៅ ម្ដងត្រជាក់ ម្ដងភ្លៀងមិនទៀងទាត់សោះ។ ការប្រែប្រួលនៃអាកាសធាតុ ក៏បានហុចផលប៉ះពាល់ដល់ប្រភេទផ្លែឈើដូចគ្នាដែរ គឺមិនមែនប៉ះពាល់តែមនុស្សយើងនោះទេ។ ជាក់ស្ដែង អាកាសធាតុក្ដៅ ផ្លែឈើដែលមានគុណភាព និងរសជាតិឆ្ងាញ់ជាងគេគឺ ផ្លែទុរេន។ ដោយសង្កេតឃើញថា អំឡុងពេលនេះជាខែដែលសម្បូរទៅដោយផ្លែទុរេនមានលក់នៅលើទីផ្សារព្រោងព្រៀត ទស្សនាវដ្តី ឡារ៉ែន សូមជម្រាបជូនពី5ចំណុច ដែលអ្នកគួរយល់ដឹងមុនទទួលទានផ្លែ ទុរេន ព្រោះបើអ្នកមិនដឹងច្បាស់វាអាចបង្កគ្រោះថ្នាក់ដល់សុខភាពរបស់អ្នកបាន។
1. ទុរេន ជាផ្លែឈើដែលមានកាឡូរីខ្ពស់ ព្រោះផ្លែទុរេន 4-6គ្រាប់ វាមានបរិមាណកាឡូរីដល់ទៅ 400កាឡូរី បើប្រៀបធៀបទៅស្មើនឹងគ្រឿងភេសជ្ជៈ 2កំប៉ុង ហើយស្មើនឹងបាយស 1ចានពេញៗតែម្តង។ ហេតុដូច្នេះហើយ ប្រសិនបើអ្នកជក់ចិត្តនឹងរសជាតិដ៏ឈ្ងុយឆ្ងាញ់របស់ផ្លែទុរេន រហូតដល់ទទួលទានជាច្រើនគ្រាប់នោះ អ្នកអាចនឹងឡើងគីឡូដោយមិនដឹងខ្លួន។
2. នៅក្នុងផ្លែទុរេន មានបរិមាណជាតិស្ករច្រើនដូចគ្នា ដូច្នេះហើយអ្នកដែលមានជំងឺទឹកនោមផ្អែម គួរតែចៀសវាងការទទួលទានផ្លែទុរេន។
3. ក្រៅពីអ្នកជំងឺទឹកនោមផ្អែមហើយ អ្នកជំងឺដែលមានរោគប្រចាំខ្លួនពាក់ព័ន្ធជាមួយនឹងរោគលើសឈាម បេះដូង សរសៃឈាម និងលើសជាតិខ្លាញ់ គប្បីទទួលទានផ្លែទុរេនក្នុងបរិមាណតិចតួចបំផុត។
4. ផ្លែទុរេន គឺជាប្រភេទផ្លែឈើដែលមានឥទ្ធិពលធ្វើឱ្យរាងកាយមនុស្សឡើងចំហាយក្ដៅខ្ពស់ បើទោះបីជាអ្នកទទួលទានតែ1គ្រាប់ ក៏វាអាចធ្វើឱ្យអ្នកក្ដៅបំពង់កបានដែរ។ ករណីដែលអ្នកទទួលទានផ្លែទុរេន លាយជាមួយគ្រឿងស្រវឹងដែលមានជាតិអាល់កុល មិនថាស្រា ឬស្រាបៀរ ឬគ្រឿងស្រវឹងផ្សេងៗក៏ដោយនោះ គឺវាកាន់តែបង្កឱ្យមានគ្រោះថ្នាក់ដល់រាងកាយរបស់អ្នកទ្វេដង។ រាងកាយរបស់អ្នកនឹងកើនកម្ដៅខ្លាំងឡើងៗ រហូតដល់អាចបាត់បង់ជីវិតបាន ដោយសារតែដកដង្ហើមមិនរួច។
5. ខណៈបានជ្រាបពីអត្ថប្រយោជន៍របស់ផ្លែទុរេន ដែលផ្ដល់នូវថាមពលយ៉ាងអនេកដល់រាងកាយ ដូចនេះនៅពេលណា ឬថ្ងៃណាមួយដែលអ្នកទទួលទានផ្លែទុរេន អ្នកគប្បីចៀសវាងទទួលទានអាហារផ្សេងៗទៀត ដែលមានកម្រិតថាមពលខ្ពស់ដូចគ្នា ដូចជាអាហារប្រភេទចៀនបំពង អាហារដែលមានផ្សំជាមួយខ្ទិះដូង និងអាហារសម្រន់ដែលមានជាតិខ្លាញ់ខ្ពស់ ឬអ្នកអាចកាត់បន្ថយបរិមាណអាហារទាំងអស់នោះឱ្យនៅតិចតួចក៏បានដែរ។ ករណីដែលអ្នកបានទទួលទានអាហារផ្សេងៗ និងផ្លែទុរេនស្របពេលជាមួយគ្នានោះ អ្នកគួរតែធ្វើលំហាត់ប្រាណដើម្បីដុតបំផ្លាញជាតិខ្លាញ់ដែលមាននៅក្នុងរាងកាយឱ្យបានល្អ ដើម្បីការពារអ្នកពីជំងឺធាត់ និងជំងឺអាក្រក់ផ្សេងៗទៀត។
ឡារ៉ែន មិនបានហាមមិនឱ្យទទួលទានផ្លែទុរេននោះទេ តែមុននឹងអ្នកទទួលទានផ្លែទុរេន សូមអ្នកពិចារណាលើ 5ចំណុចខាងលើជាមុនសិន ដើម្បីឱ្យច្បាស់នៅក្នុងចិត្តថា អ្នកគួរទទួលទានក្នុងកម្រិតមួយណាដែលមានភាពល្អប្រសើរចំពោះសុខភាព ហើយអ្នកមិនគួរបង្អត់ចិត្ត ហាមមាត់ ហាមអារម្មណ៍ខ្លួនឯងមិនឱ្យទទួលទានផ្លែទុរេននោះទេ។ តែករណីដែលអ្នកព្យាយាមហាត់ប្រាណជារៀងរាល់ថ្ងៃ នោះអ្នកនឹងសប្បាយចិត្តក្នុងការទទួលទានផ្លែទុរេន ដោយមិនបាច់ភ័យព្រួយពីហានិភ័យដែលកើតឡើងចំពោះសុខភាពនោះឡើយ៕
June 28, 2018
ដើម្បីសម្រេចគោលដៅអភិវឌ្ឍន៍វិស័យឧស្សាហកម្មកម្ពុជាត្រូវការអ្នកជំនាញជាច្រើន
ក្រោយពីការពង្រាយសាលារៀននៅតាមមូល-ដ្ឋាន កម្ពុជាបានបោះជំហានបន្តមួយផ្សេងទៀតទៅតំបន់ជនបទគឺការពង្រាយរោងចក្រសហគ្រាសដើម្បីសម្រេចបានតាមគោលដៅអភិវឌ្ឍន៍ស្របតាមគោលនយោបាយអភិវឌ្ឍន៍វិស័យឧស្សាហកម្មឆ្នាំ2025។
យុទ្ធសាស្រ្តយ៉ាងសំខាន់នេះត្រូវបានអ្នកជំនាញមើលឃើញថាអាចជួយសង្គមជាច្រើនទាំងផ្នែកម៉ាក្រូសេដ្ឋកិច្ច និងមីក្រូសេដ្ឋកិច្ច ដែលធ្វើឱ្យអ្នករកស៊ីមានភាពងាយស្រួលបញ្ជ្រាបខ្លួនឱ្យបានគ្រប់ទីកន្លែងក្នុងប្រទេស។ នៅពេលដែលសហគ្រាស និងចង្វាក់ផលិតកម្មសំខាន់ៗបានរីកលូតលាស់ទៅដល់តំបន់ជនបទ នោះប្រជាជនដែលមានកម្រិតមធ្យម និងអ្នកដែលទទួលបានការអប់រំខ្ពស់នៅក្នុងខេត្តនីមួយៗនឹងមានឱកាសចូលរួមបំពេញវិស័យការងារទាំងអស់នោះ ធ្វើឱ្យគាត់ទទួលបានចំណូលខ្ពស់ ហើយអាចកាត់បន្ថយការចំណាយបានយ៉ាងច្រើន។ នៅពេលដែលកម្រិតជីវភាពរបស់អ្នកមានចំណូលមធ្យមប្រសើរឡើង ចរន្តលុយដែលពួកគេចាយវាយមកវិញ នឹងធ្វើឱ្យទីផ្សារនៅក្នុងប្រទេសលើគ្រប់វិស័យមានការរីកលូតលាស់បានលឿន។ តែទោះជាយ៉ាងនេះក្តី គេសង្កេតឃើញថា គោលដៅមួយនេះអាចអនុវត្តបានល្អទៅបានលុះត្រាតែមានធនធានមនុស្សគ្រប់គ្រាន់ និងស្របទៅតាមទីផ្សារការងារនៅថ្ងៃអនាគត។
រដ្ឋមន្រ្តីក្រសួងពាណិជ្ជកម្ម ឯកឧត្តម ប៉ាន សូរ ស័ក្តិ បានលើកឡើងថា គោលនយោបាយអភិវឌ្ឍន៍វិស័យឧស្សាហកម្ម គឺផ្តោតសំខាន់លើការបង្កើតការងារជូនប្រជាជន ជាពិសេសគឺប្រជាជនវ័យក្មេងដែលមានជំនាញ និងសក្តានុពលខ្ពស់ដែលមានសមត្ថភាពចូលរួមក្នុងវិស័យឧស្សាហកម្មទំនើប។ ក្រៅពីនេះ វិស័យបច្ចេកវិទ្យា ព័ត៌មានវិទ្យាក៏មានជាផ្នែកមួយយ៉ាងសំខាន់ដែលកម្ពុជា កំពុងត្រូវការព្រោះបច្ចុប្បន្ននេះវិស័យពាណិជ្ជកម្មតាមអេឡិចត្រូនិកក៏កំពុងមានការរីកចម្រើនផងដែរ។
ឯកឧត្តម ប៉ាន សូរស័ក្តិ បានមានប្រសាសន៍ថា៖ “កម្ពុជាបានទទួលការវិនយោគពីក្រុមហ៊ុនធំៗជាច្រើនដូចជារោងចក្រផលិតគ្រឿងបន្លាស់រថយន្ត ខ្សែភ្លើង គ្រឿងអគ្គិសនី និងរោងចក្រជាច្រើនផ្សេងទៀតដែលទាមទារឱ្យមានអ្នកជំនាញ និងអាចស្រូបទាញការងារបានយ៉ាងច្រើន”។
ឯកឧត្តម ប៉ាន សូរស័ក្តិ បានលើកឡើងផងដែរថា ដើម្បីសម្រេចគោលនយោបាយអភិវឌ្ឍន៍ឧស្សាហកម្ម រដ្ឋាភិបាលត្រូវចំណាយទុនប្រមាណជាង12ពាន់លានដុល្លារ សម្រាប់រយៈពេល 10ឆ្នាំ (2015-2025) ដើម្បីវិនិយោគលើការបណ្តុះបណ្តាលវិជ្ជាជីវៈ និងហេដ្ឋារចនាសម្ព័ន្ធនានាដែលគាំទ្រដល់វិស័យឧស្សាហកម្ម។ ដោយក្នុងនោះ កម្ពុជាក៏នឹងបង្កើតតំបន់ចង្កោមសហគ្រាសធុនតូច និងមធ្យមដើម្បីជំរុញឱ្យវិស័យឧស្សាហកម្មទាំងខ្នាតតូច និងខ្នាតធំកាន់តែមានល្បឿនខ្លាំងឡើង។
រដ្ឋមន្ត្រីក្រសួងអប់រំ យុវជន និងកីឡា ឯកឧត្តម ហង់ ជួនណារ៉ុន បានលើកឡើងថា រដ្ឋាភិបាលបានដាក់ចេញនូវគោលនយោបាយអប់រំមុខវិជ្ជា វិទ្យាសាស្រ្ត បច្ចេកវិទ្យា វិស្វកម្ម និងគណិតវិទ្យា (STEM) ដើម្បីចូលរួមចំណែកឆ្លើយតបជាមួយនឹងទីផ្សារការងារក្នុងវិស័យឧស្សាហកម្មនៅកម្ពុជា។ STEM ជាផ្នែកយ៉ាងសំខាន់មួយដែលមានតម្រូវការទីផ្សារខ្ពស់នៅកម្ពុជាទាំងពេលបច្ចុប្បន្ន និងអនាគត។ ហើយជំនាញនេះក៏មានសារៈសំខាន់ខ្លាំងណាស់សម្រាប់ការអភិវឌ្ឍលើវិស័យសេដ្ឋកិច្ច ឧស្សាហកម្មនិងកសិ-ឧស្សាហកម្មនៅកម្ពុជា។
ឯកឧត្តម ហង់ ជួនណារ៉ុន បានមានប្រសាសន៍ថា ៖ “បច្ចុប្បន្ននេះកម្ពុជាបានព្យាយាមជំរុញឱ្យមុខវិជ្ជា STEM ស្ថិតក្នុងចំណាប់អារម្មណ៍របស់សិស្សហើយជ្រើសរើសមុខវិជ្ជានេះសម្រាប់ជាអាជីពនៅថ្ងៃអនាគត។ ក្រសួងអប់រំ បានរៀបចំកម្មវិធីជារៀងរាល់ឆ្នាំដើម្បីបំផុសឱ្យយុវជនមើលឃើញពីគុណសម្បត្តិរបស់មុខវិជ្ជា STEM ហើយគិតថាវាជាមុខវិជ្ជាដែលអាចជួយពួកគេ និងសង្គមបានយ៉ាងប្រសើរ”។
ឯកឧត្តមរដ្ឋមន្ត្រីបានលើកឡើងផងដែរថា ទោះបីជាយ៉ាងនេះក្ តីកម្ពុជាក៏នៅមានបញ្ហាប្រឈមមួយចំនួនដែរ ដែលយើងកំពុងដោះស្រាយដើម្បីឱ្យគុណភាពអប់រំឆ្លើយតបជាមួយនឹងទីផ្សារការងារដែលកំពុងត្រូវការ។ បញ្ហាទាំងអស់នោះមានដូចជាវិសមភាពនៃសិស្សដែលចេញពីសាលា មិនត្រូវគ្នាជាមួយទីផ្សារការងារជាក់ស្តែង បញ្ហាហេដ្ឋារចនាសម្ព័ន្ធនៅតាមទីជនបទ បញ្ហាសម្ភារបរិក្ខារពិសោធន៍ និងបញ្ហាស្តង់ដារគ្រូបង្រៀនជាដើម។
ជាដំណោះស្រាយនៃបញ្ហាទាំងអស់នេះក្រសួងអប់រំ បានពង្រឹងការបណ្តុះបណ្តាលសមត្ថភាពគ្រូបង្រៀន និងកែលម្អឡើងវិញនូវសៀវភៅសិក្សាដើម្បីឱ្យស្របតាមកម្មវិធីសិក្សាថ្មី។ លើសពីនេះទៅទៀតក្រសួងក៏បានបង្កើតសាលាជំនាន់ថ្មីដើម្បីផ្តល់ឱ្យសិស្សនូវបច្ចេកវិទ្យាទំនើបសម្រាប់សិក្សាលើវិស័យ STEM នេះឱ្យដល់គ្រប់ខេត្តក្រុងនៅកម្ពុជា។ ហើយក្នុងមួយឆ្នាំកម្ពុជាបានវិនិយោគទឹកប្រាក់ជាច្រើនសម្រាប់ការជំរុញលើវិស័យនេះឱ្យរីកដុះដាលខ្លាំងដោយក្នុងនោះយើងធ្វើការជួសជុល សាងសង់បន្ទប់ពិសោធន៍ បំពាក់កំុព្យូទ័រ និងឧបករណ៍បច្ចេកទេសជាច្រើនផ្សេងទៀតដើម្បីឱ្យសិស្សបានស្វែងយល់ និងចាប់អារម្មណ៍លើមុខវិជ្ជាដែលមានសារៈសំខាន់ទាំងអស់នេះ៕
June 28, 2018
សណ្ឋាគារ ជូលីណា ភ្នំពេញ សណ្ឋាគារដំបូងគេ ដែលសាងសង់យ៉ាងស្រស់ឆើតឆាយបំផុតក្នុងឆ្នាំ1993
កាលពីឆ្នាំ1993 ប្រទេសកម្ពុជាយើងនៅមិនទាន់មានស្ថិរភាពផ្នែកសន្តិភាពសង្គមនៅឡើយទេ តែនៅពេលនោះ សណ្ឋាគារ ជូលីណា ភ្នំពេញ (Juliana Phnom Penh Hotel) បានសាងសង់ឡើងនៅលើផ្ទៃដីទទេឱ្យចេញជារូបរាងសណ្ឋាគារដ៏ល្អប្រណីត និងស្រស់ឆើតឆាយបំផុតនៅពេលនោះ។ សណ្ឋាគារ ជូលីណា ភ្នំពេញ បានរំលេចរូបរាងដ៏ស្រស់សង្ហា ប្រៀបដូចជាទេវតាជប់និមិត្ត ធ្វើឱ្យប្រជាជនកម្ពុជា ក៏ដូចជាជនបរទេសដែលមកស្នាក់នៅ និងមកកម្សាន្តនៅប្រទេសកម្ពុជាមានការភ្ញាក់ផ្អើល និងចាប់អារម្មណ៍ជាខ្លាំង។ មកទល់ពេលនេះ សណ្ឋាគារ ជូលីណា ភ្នំពេញ នៅតែដក់ជាប់នៅក្នុងចិត្ត និងការចងចាំរបស់ប្រជាជនខ្មែរ ដោយសណ្ឋាគារនេះស្ថិតនៅចំកណ្តាលទីប្រជុំជនដ៏សំខាន់ និងពោរពេញដោយមនុស្សយ៉ាងច្រើនកុះករនៃរាជធានីភ្នំពេញ គឺនៅខាងក្រោយសាលាបឋមសិក្សា និងវិទ្យាល័យ បាក់ទូក តែម្តង។
សណ្ឋាគារ ជូលីណា ភ្នំពេញ បានបើក ដំណើរការ និងបម្រើលើវិស័យសណ្ឋាគារ និងភោជនីយដ្ឋានលំដាប់អន្តរជាតិ រយៈពេល 25ឆ្នាំមកហើយ ពោលគឺសណ្ឋាគារនេះបានសម្ពោធបើកដំណើរការតាំងពីថ្ងៃទី1 ខែកក្កដា ឆ្នាំ1993មកម្លេ៉ះ ដោយមានការគាំទ្រពីសំណាក់ភ្ញៀវជាតិ និងអន្តរជាតិពីគ្រប់ទិសទីនៃពិភពលោក ដូចជា ប្រជាជនមកពីតំបន់អាសីុ ដូចជា ប្រទេសចិន ថៃ សាំងហ្គាពួរ ម៉ាឡេសីុ និងភ្ញៀវទេសចរមកពីបណ្តាប្រទេសនៅប៉ែកអឺរ៉ុបជាដើម។
បើតាមបទសម្ភាសជាមួយនឹងលោក Sakchai Tangkoblap នាយកគ្រប់គ្រងនៃសណ្ឋាគារ ជូលីណា ភ្នំពេញ បានឱ្យដឹងថា សណ្ឋាគារដែលមានរចនាបទតុបតែងដ៏ស្រស់ស្អាតតាមបែបប្រពៃណីខូឡូនីល (Traditional Colonial) ទាំងរូបរាងខាងក្រៅ និងផ្ទៃលម្អខាងក្នុងគឺល្អប្រណីតខ្លាំងណាស់។ ជាមួយនឹងការលម្អដោយរុក្ខជាតិពណ៌បៃតងស្រស់ គ្រប់ទីកន្លែង និងលម្អដោយអំពូលភ្លើងគ្រីសស្តាល់តាមបែបទាន់សម័យ បានធ្វើសណ្ឋាគារ ជូលីណា ភ្នំពេញ លេចធ្លោតែម្តង ពេលដែលលោកអ្នកបានចូលទៅដល់ខាងក្នុងសណ្ឋាគារ លោកអ្នកនឹងទទួលបាននូវអារម្មណ៍ស្រស់ស្រាយ និងប្លែកភ្នែកជា-មួយនឹងការរចនាដ៏ល្អឯកគ្មានពីរ។ សណ្ឋាគារ ជូលីណា ភ្នំពេញ ផ្តល់នូវសេវាកម្មស្នាក់នៅ ដែលមានបន្ទប់រហូតដល់ទៅ100បន្ទប់ ដែលបែងចែកជា2ប្រភេទបន្ទប់ គឺបន្ទប់ Superior (បង្ហាញពីទេសភាពនៅខាងក្រោយនៃសណ្ឋា-គារ) និងបន្ទប់ Deluxe (បង្ហាញពីទេសភាពនៅខាងមុខអាងហែលទឹក) ដែលផ្តល់ជូនជាមួយនឹងអាហារពេលព្រឹកបែបប៊ូហ្វេដ៏សម្បូរបែប។ ក្រៅពីសេវាកម្មកន្លែងស្នាក់នៅ នៅក្នុងសណ្ឋាគារ ជូលីណា ភ្នំពេញ ក៏មានភោជនីយដ្ឋានចំនួន2ភោជនីយដ្ឋាន ក្នុងនោះមាន ភោជនីយដ្ឋានចិន ដែលមានវត្តមានបម្រើជូនអាហារបែបជនជាតិចិនដ៏ឆ្ងាញ់ពិសាតាំងពីឆ្នាំ1997មកមេ្ល៉ះ និងបើកបម្រើជូនអតិថិជនពីម៉ោង10ព្រឹករហូតដល់ម៉ោង10យប់ និងភោជនីយដ្ឋានមួយទៀត ជាភោជនីយដ្ឋានប៊ូហ្វេ ដែលមានអាហារកម្រិតអន្តរជាតិ គឺមានអាហារបែបបស្ចិមប្រទេស បែបអាសីុដ៏ល្បីល្បាញ (អាហារថៃ និងអាហារបែបខ្មែរ) ដោយបច្ចុប្បន្នបានបើកបម្រើអាហារប៊ូហ្វេពេលល្ងាចពីម៉ោង6ល្ងាចដល់ម៉ោង9យប់ (ឬអាចកក់ទុកមុនសម្រាប់លោកអ្នកដែលមានបំណងចង់មកទទួលទានអាហារប៊ូហ្វេនាពេលថ្ងៃត្រង់)។ សណ្ឋាគារ ជូលីណា ភ្នំពេញ ក៏មានបន្ទប់សម្រាប់រៀបចំកម្មវិធីខួបកំណើត កម្មវិធីជប់លៀង អង្គប្រជុំ សិក្ខាសាលាកម្រិតជាតិ និងអន្តរជាតិ ដោយខាងសណ្ឋាគារមានបន្ទប់ប្រជុំចំនួន3 និងមានកន្លែងសម្រាប់រៀបចំកម្មវិធីតូចធំយ៉ាងរីករាយចំនួន4កន្លែង ដើម្បីឱ្យអតិថិជនជ្រើសរើសរៀបចំកម្មវិធីរបស់ខ្លួនយ៉ាងពេញចិត្ត ដោយទទួលភ្ញៀវបានពី25នាក់ដល់300នាក់ ទៅតាមទីតាំងរៀបចំកម្មវិធី ដែលអតិថិជនជ្រើសរើស (បន្ទប់តូចទទួលភ្ញៀវបានពី40-50នាក់, បន្ទាប់ទំហំមធ្យមទទួលបានភ្ញៀវពី70-100នាក់ និងបន្ទប់ធំទទួលភ្ញៀវបានពី200-300នាក់)។ សម្រាប់លោកអ្នកដែលនិយមចូលចិត្តភាពស្ងប់ស្ងាតក្នុងការទទួលទានអាហារក៏ដូចជាការក្រេបនូវរសជាតិស្រាក្រឡុក និងស្រាក្រហម ស្រាវីស្គីដែលមានប្រភពដើមមកពីប្រទេសល្បីខាងផលិតស្រាដែលមានរសជាតិឆ្ងាញ់ និងមានគុណភាពខ្ពស់ នៅសណ្ឋាគារ ជូលីណា ភ្នំពេញ ក៏មានបារបែបទាន់សម័យ និងស្រស់ស្អាតទាក់ភ្នែកមួយកន្លែងផងដែរ ដែលស្ថិតនៅខាងស្តាំដៃ នៅពេលដែលលោកអ្នកអញ្ជើញចូលមកដល់កន្លែងទទួលភ្ញៀវផ្នែកខាងក្នុងនៃសណ្ឋាគារ។ Lobby Bar នៃសណ្ឋាគារ ជូលីណា ភ្នំពេញ បានបម្រើអតិថិជនទាំងអស់ពីម៉ោង5ល្ងាចដល់ពាក់កណ្តាលអធ្រាត្រ និងផ្តល់ជូន Happy Hour ដល់អតិថិជនពីម៉ោង5ល្ងាចដល់ម៉ោង6ល្ងាច។ ហើយលោកអ្នកក៏អាចរីករាយជាមួយនឹងការហែលទឹកលេង និងហាត់ប្រាណដើម្បីសុខភាព និងភាពស្រស់ស្អាត ដែលមកបម្រើជូនពីម៉ោង6ព្រឹកដល់ម៉ោង9យប់ និងបើកបន្ទប់ស្ទីម-សូណាលក្ខណៈឯកជនដ៏ស្ងប់ស្ងាត់ ស្រឡះអារម្មណ៍ ដែលបើកពីម៉ោង1ថ្ងៃដល់ម៉ោង9យប់។ សេវាកម្មនេះផ្តល់ជូនអតិថិជន ដែលមកស្នាក់នៅក្នុងសណ្ឋាគារ ជូលីណា ភ្នំពេញដោយឥតគិតថ្លៃ ហើយខាងសណ្ឋាគារក៏បើកស្វាគមន៍ដល់អតិថិជនគ្រប់ជាតិសាសន៍មកពីខាងក្រៅផងដែរ។ លើសពីនេះទៅទៀត សណ្ឋាគារ ជូលីណា ភ្នំពេញ ក៏មានកន្លែងម៉ាស្សាបែបថៃបុរាណដ៏ល្បីល្បាញ ដើម្បីបម្រើជូនអតិថិជនរបស់ខ្លួនផងដែរ គឺបើកពីម៉ោង10ព្រឹកដល់ម៉ោង10យប់ជារៀងរាល់ថ្ងៃ។
សម្រាប់ព័ត៌មានបន្ថែម សូមចូលទៅកាន់គេហទំព័រ www.julianahotels.com៕
លោក Sakchai Tangkoblap នាយកគ្រប់គ្រងនៃសណ្ឋាគារ ជូលីណា ភ្នំពេញ

June 27, 2018
ដល់រដូវភ្លៀងហើយ ស្វែងយល់ពីការមើលថែខ្លួនក្រោយពេលទទឹកភ្លៀង
ក្រោយពេលឈប់ធ្វើការ តើមានបានណាត់ជាមួយអ្នកណានៅទីណាឬទេចា៎ស? ព្រោះមុនងើបចេញពីតុធ្វើការ ឃើញខំប្រឹងតែងមុខតែងមាត់រៀបចំខ្លួនយ៉ាងស្អាត តែពេលចេញទៅ បែរជាជួបនឹងអូនភិរុណដែលបង្អុរចុះមកពីលើមេឃទៅវិញ។ ហ៊ឹស! ដល់ម៉ោងចេញពីធ្វើការពឹប ភ្លៀងធ្លាក់មកប្រាវ! ធ្វើឱ្យត្រូវទទឹកភ្លៀងជោក និងស្រួលមិនស្រួលកើតជំងឺផ្ដាសាយទៀតផង… ដូច្នេះ តើយើងត្រូវមើលថែទាំខ្លួនយ៉ាងណាពេលទទឹកទឹកភ្លៀង ដើម្បីកុំឱ្យជំងឺដង្កាត់សួររកមុខ?
1. ប្រញាប់ដោះសម្លៀកបំពាក់ដែលទទឹកទឹកភ្លៀងនោះចេញភ្លាម
រាងកាយដែលរងាញ័រញាក់ពីការទទឹកទឹកភ្លៀងដែលត្រជាក់ស្រេបនោះ ក្រោយពីត្រឡប់មកដល់ផ្ទះ គួរប្រញាប់ដោះសម្លៀកបំពាក់ដែលសើមជោកនោះចេញ ព្រោះទុកយូរអាចនឹងធ្វើឱ្យអ្នកកើតផ្ដាសាយ និងអាចកើតមានមេរោគផ្សិត ដោយសារការផ្អាប់របស់សម្លៀកបំពាក់ដែលទទឹកទឹកភ្លៀងយូរ ហើយសម្លៀកបំពាក់នោះក៏គួរតែរក្សាថែទាំដោយការប្រញាប់ដាក់បោកគក់សម្អាតភ្លាមៗដែរ។
2. ងូតទឹក កក់សក់ ដើម្បីជម្រះរាងកាយពីវត្ថុកខ្វក់ដែលអាចជាប់មកជាមួយទឹកភ្លៀង
ទឹកភ្លៀងដែលមកប៉ះនឹងរាងកាយរបស់អ្នក ក្រៅពីត្រជាក់ហើយ អាចនឹងមានវត្ថុកខ្វក់លាយឡូកឡំមកជាមួយ ដូច្នេះក្រោយពីទទឹកភ្លៀងហើយ គួរប្រញាប់កក់សក់ និងងូតទឹកដើម្បីសម្អាតរាងកាយ ដោយអាចនឹងងូតទឹកក្ដៅឧណ្ហៗ ដើម្បីផ្ដល់ភាពកក់ក្ដៅដល់រាងកាយឡើងវិញ ហើយខណៈពេលងូតទឹកគួរប្រើសាប៊ូដុសសម្អាតជើង(ជាពិសេសត្រឹមជង្គង់ចុះក្រោម)ឱ្យបានស្អាត ដើម្បីកម្ចាត់មេរោគ ឬវត្ថុកខ្វក់ដែលជាប់មកជាមួយទឹកដែលដក់ខណៈពេលភ្លៀង។
3. ធ្វើឱ្យរាងកាយស្ងួត មិនទទឹកសើម
ក្រោយពីងូតទឹករួច ចូរប្រញាប់ជូតសក់ក្បាល និងរាងកាយឱ្យស្ងួត កុំឱ្យទទឹកសើមខ្លួនយូរ រួចប្រញាប់ស្លៀកសម្លៀកបំពាក់ថ្មីដើម្បីធ្វើឱ្យរាងកាយមានអារម្មណ៍កក់ក្ដៅជាប់ជានិច្ច។
4. ធ្វើឱ្យរាងកាយកក់ក្ដៅ
តាមរយៈការដើរហាលភ្លៀង អាចធ្វើឱ្យរាងកាយបានទទួលភាពត្រជាក់ខ្លាំងហួសហេតុ ដូច្នេះគួរប្រញាប់ធ្វើឱ្យសីតុណ្ហភាពក្នុងរាងកាយកក់ក្ដៅឡើងវិញ ដូចជា ការញ៉ាំទឹកខ្ញីក្ដៅឧណ្ហៗមួយកែវ ដើម្បីធ្វើឱ្យរាងកាយមានអារម្មណ៍ធូរស្រាល និងឃ្លាតចាកឆ្ងាយពីអាការគ្រុនផ្ដាសាយ។
5. គេងសម្រាក និងគេងលក់ឱ្យបានគ្រប់គ្រាន់
បន្ទាប់ពីនឿយហត់ពីការដើរកាត់ខ្យល់កាត់ភ្លៀង ដើម្បីមកដល់កន្លែងស្នាក់នៅ ហើយដើម្បីឱ្យរាងកាយរឹងប៉ឹងឡើងវិញ និងត្រៀមជាស្រេចសម្រាប់ការចាប់ផ្ដើមជីវិតនៅថ្ងៃបន្ទាប់ទៀតនោះ អ្នកគួរប្រញាប់គេងសម្រាកឱ្យបានគ្រប់គ្រាន់។
6. ដាក់ឆ័ត្រ ឬអាវភ្លៀងតាមខ្លួន
ក្នុងអំឡុងរដូវភ្លៀងដែលអាចនឹងជួបជាមួយអូនភិរុណក្នុងអំឡុងពេលក្រោយម៉ោងចប់ពីការងារក្នុងមួយថ្ងៃៗនោះ អ្នកគួរតែដាក់ឆ័ត្រ ឬអាវភ្លៀងតូចមួយជាប់ខ្លួន ឬដាក់(ឆ័ត្របត់)នៅក្នុងកាបូបយួរ ដើម្បីត្រៀមជាស្រេចក្នុងការទប់ទល់នឹងដំណក់ទឹកភ្លៀងដែលអាចនឹងបង្អុរចុះមកដោយមិនបានណាត់ទុកជាមុន។
ទឹកភ្លៀងដែលធ្លាក់មកពីលើមេឃអាចធ្វើឱ្យគ្រប់គ្នាទទឹកខ្លួនប្រាណ និងរងាញ័រញាក់ ដូច្នេះវិធីការមើលថែទាំខ្លួនក្រោយពេលទទឹកភ្លៀង គឺជាវិធីមួយទៀតដែលធ្វើឱ្យអ្នកឃ្លាតចាកឆ្ងាយពីជំងឺគ្រុនផ្ដាសាយ ដែលអាចមកជាមួយទឹកភ្លៀងបាន ក្រៅពីសម្រាប់មើលថែទាំខ្លួនឯងហើយ អាចសាកល្បងនាំយកវិធីនេះទៅប្រើជាមួយមនុស្សដែលអង្គុយក្បែរអ្នក ដើម្បីជួយបន្ថែមភាពកក់ក្ដៅក្នុងរដូវភ្លៀង ដែលត្រជាក់បានទៀតផងចា៎ស អ្នកគ្រូ ឆវី ថា ច្បាស់ជាកាន់តែកក់ក្ដៅឡើងមិនខាន៕
June 27, 2018