Author: ធឿន មករា

អ្នកជំនាញអាជីវកម្មចូលរួមចែករំលែកយុទ្ធសាស្ត្រទីផ្សារ ដើម្បីជោគជ័យក្នុងជំនួញ
តើអ្វីទៅដែលហៅថា ដំណើរឆ្ពោះទៅទីផ្សារកម្ពុជាចុងក្រោយ? នេះជាសំណួរដ៏សំខាន់នៅក្នុងពិធីជួបជុំមួយរបស់សមាគមអ្នកទីផ្សារកម្ពុជាដែលមានសមាជិកប្រមាណជិត 500នាក់នៅ CJCC ដែលបានបើកការពិភាក្សាអំពីជំនួញ និងអាជីវកម្មដែលបាននិងកំពុងប្រមើលមើលថា តើត្រូវធ្វើយុទ្ធសាស្ត្រទីផ្សារយ៉ាងណាដើម្បីទទួលបានជោគជ័យ?
ចង់បើកអាជីវកម្ម ឬធ្វើជំនួញឱ្យទទួលបានជោគជ័យ ម្ចាស់អាជីវកម្មត្រូវតែស្ទង់មើលពីកម្លាំងរបស់ខ្លួនជាមុនសិន មុននឹងដំណើរការអាជីវកម្ម ឬមុខជំនួញរកសុីណាមួយនោះ ចៀសវាងកុំឱ្យអាជីវកម្មរបស់ខ្លួនប្រឈមនឹងការដួលរលំ។ បន្ទាប់មកទៀតម្ចាស់អាជីវកម្មគួរតែស្ទង់លើការចំណាយដើមទុន និងការរិះរកវិធីកាត់បន្ថយការចំណាយឱ្យបានច្រើនបំផុតតាមដែលអាចធ្វើទៅបាន។ នេះបើតាមប្រសាសន៍លោកឧកញ៉ា ជា ដែន ដែលគេស្គាល់ជាទូទៅថាជាឧកញ៉ាជីអូ ប្រធានសមាគមអ្នកទីផ្សារកម្ពុជា(MAC)។
លោកឧកញ៉ារូបនេះបានមានប្រសាសន៍ថា អ្វីដែលហៅថាដំណើរឆ្ពោះទៅទីផ្សារកម្ពុជា នៅក្នុងការពិភាក្សាដេញដោលពីបទពិសោធអ្នកដែលជោគជ័យ រួមទាំងការវិវឌ្ឍពីអាជីវកម្មបែបលក្ខណៈគ្រួសារ មកជាអាជីវកម្មបែបឌីជីថលផងដែរ។ លោកបានឱ្យដឹងថា៖“ទីផ្សារបច្ចុប្បន្នគេហៅថា 4.0 ពីមុនគេហៅថា 3.0 ការផ្លាស់ប្តូរពីអាជីវកម្មបែបលក្ខណៈគ្រួសារ មកជាបែបទំនើប បែបបច្ចេកវិជ្ជាឌីជីថល មានដូចជាស្មាតហ្វូនដែលអាចប្រើបានច្រើនកម្មវិធីជាដើម។ បន្ទាប់មកអ្នកចូលរួមក៏នឹងបានដឹងថា 4.0គឺការផ្លាស់ប្តូរពី4P មក4Cវិញ”។
យោងតាមទ្រឹស្តីម៉ាកេធីងគឺ (MARKETING MIX–THE4Ps AND 4Cs)4Ps ត្រូវបានប្រើនៅពេលសំដៅទៅលើទស្សនៈរបស់អាជីវកម្មមួយ ជំនួសឱ្យទស្សនៈរបស់អតិថិជន។ 4Pរួមមានផលិតផល តម្លៃទីតាំង និងការផ្សព្វផ្សាយ។ មានផ្នែកមួយផ្សេងទៀតអាចជួយលើទីផ្សារបានដែរ ហៅថា 4Cs។ អ្នកទីផ្សារប្រើ 4Cs នៅក្នុងការលាយបញ្ចូលគ្នានៃការងារផ្នែកទីផ្សារតាមមធ្យោបាយផ្តោតលើអតិថិជនកាន់តែច្រើនជាងការសម្លឹងមើលពីទិដ្ឋភាពនៃមុខជំនួញនីមួយ។ 4Cs នេះរួមមាន អតិថិជន តម្លៃ ភាពងាយស្រួល និងទំនាក់ទំនង។
លោក តេង ឫទ្ធី នាយកក្រុមហ៊ុន property investment បានផ្តល់ពីបទពិសោធរបស់លោកថា៖ “ចំពោះទីផ្សារ យើងបានដឹងទាំងអស់គ្នាហើយ ដែលអ្នកខ្លះមានលក្ខខណ្ឌក្នុងការធ្វើយុទ្ធសាស្ត្រទីផ្សារខុសៗគ្នា។ បើយើងនិយាយពីទីផ្សារ យើងនិយាយអំពីការប្រកួតប្រជែង” ពោលបើយើងធ្វើជំនួញ ឬសកម្មភាពអ្វីមួយលើទីផ្សារ យើងត្រូវសួរថាតើយើងបានអ្វីមកវិញ? ហើយបើយើងធ្វើវាឱ្យជោគជ័យបាន ទាល់តែយើងដឹងពីចរន្តនៃតម្រូវការទីផ្សារដែរ។ តម្រូវការរបស់វាទាក់ទងនឹងតម្លៃ និងតម្លៃដែលយើងចង់លក់ចំពោះរបស់ដែលមានតម្រូវការខ្ពស់ ដូច្នេះតម្លៃមិនអាចចេះតែដាក់បាននោះទេ។
លោកបន្តថា ការប្រកួតប្រជែង គឺជារឿងពិបាកពីព្រោះមនុស្សយើងបើចង់ប្រកួតប្រជែងឱ្យដល់កម្រិតថា យកឈ្នះឱ្យបាននោះ ប្រហែលជាត្រូវការអ្វីដែលប្លែកថ្មីពីគេហើយ។ ព្រោះថា ការឈ្នះមិនមែនធម្មតាទេ មិនងាយស្រួលទេ ដូចជាការរៀនសូត្រអុីចឹងដែរ។ បើរៀន គឺអាចរៀនបាន តែបើឱ្យពូកែគឺមិនអាចទៅរួចទេ វាជារឿងលំបាក។ វាអាស្រ័យនៅលើមូលដ្ឋានគ្រឹះច្រើន ដើម្បីឱ្យទទួលបានជោគជ័យ និងឈ្នះគេ។ “ដូច្នេះការធ្វើជំនួញមួយដើម្បីឱ្យជោគជ័យ ឬឱ្យឈ្នះគេនោះ នរណាក៏ចង់បានជំនួញជោគជ័យដែរ តែវិធីសាស្ត្រដែលថាធ្វើម៉េចឱ្យជោគជ័យ? វាទាល់តែអ្នកធ្លាប់ទទួលជោគជ័យ ឬអ្នកកំពុងតែដើរទៅរកភាពជោគជ័យទើបអាចប្រាប់ពីគន្លឺះជោគជ័យបាន។ វាជារឿងលំបាក តែយើងនឹងព្យាយាមដើរទៅរកភាពជោគជ័យទាំងអស់គ្នា”។
លោកជំទាវ ញឹក ដានី នាយិកាក្រុមហ៊ុន Mc Millanwoods បានមានប្រសាសន៍ថា ការនិយាយពីម៉ាកេធីង (Marketing) ក្រុមហ៊ុនមួយត្រូវគិតទៅដល់ការបង់ពន្ធជារឿងសំខាន់។ បើនិយាយពីរឿងពន្ធ ចាប់តាំងពីឆ្នាំ2015 មក ការអនុវត្តពន្ធមានការវិវឌ្ឍខ្លាំងមែនទែន។ ពោល វាមានការលម្អិតជាងមុនដែលក្រុមហ៊ុនខ្លះពុំបានយកចិត្តទុកដាក់លើបញ្ហានេះទេនៅពេលចាប់ផ្តើមរកស៊ី ដូច្នេះវានឹងមានការប៉ះពាល់ជាមួយនឹងបញ្ហាពន្ធនេះតែម្តង។ ម្ចាស់ក្រុមហ៊ុនត្រូវចាប់អារម្មណ៍រឿងនេះ។
លោក ហួត ជា នាយកក្រុមហ៊ុនហួតជា បានមានប្រសាសន៍ថា នេះជាលើកទីមួយហើយដែលលោកបានមកអង្គុយនៅទីនេះដើម្បីចែករំលែកបទពិសោធ។ អ្វីដែលជំរុញឱ្យលោកបង្កើត franchise ដំបូងពិសេស franchise ក្នុងស្រុកដែលពុំសូវជាមានការគាំទ្រផងនោះ គឺបើគ្មានគោលដៅច្បាស់លាស់ទេ អាជីវកម្មដែលយើងបានបើកនោះប្រៀបដូចជាមនុស្សដែលវង្វេងផ្លូវអុីចឹងដែរ ដែលចាំបាច់យើងត្រូវយកហានិភ័យ និងបញ្ហាដែលយើងមានមកប្រជុំគ្នាពិភាក្សាដោះស្រាយ ដើម្បីរកច្រកចេញ។
លោកបានបញ្ជាក់ថា អ្វីដែលលោកសម្រេចបាន គឺពង្រីកបាន 7សាខា ហើយលក់បានfranchises ចំនួន21 ដោយសម្ពោធបាន16 រួចហើយ។ យើងចាប់ផ្តើមតាំងពីរ៉ឺម៉កមួយ រហូតដល់បច្ចុប្បន្នយើងមានរថយន្តដឹកជញ្ជូនដល់ជាង 40គ្រឿងដើម្បីដឹកជញ្ជូនសម្ភារឱ្យអតិថិជនរបស់យើង។ នេះក៏ដោយសារក្រុមហ៊ុនមួយដែលបង្កើតឡើងត្រូវមានគោលដៅ និងបេសកកម្មច្បាស់លាស់ទើបអាចសម្រេចជោគជ័យបាន។
លោក សួរ ដេនី នាយកក្រុមហ៊ុន Car Lover បានផ្តល់បទពិសោធរបស់លោកថា តើធ្វើម៉េចឱ្យ franchise ក្នុងស្រុកដើរបានល្អ? ក្នុងគោលការណ៍របស់លោកគឺមិនទិញទេ franchise បរទេស ព្រោះចង់ឱ្យ franchise ក្នុងស្រុករីកចម្រើន ដោយសារខ្មែរយើងមានធនធានមនុស្ស មានអ្នកជំនាញ មានអ្នកមានបទពិសោធច្រើនគួរសម ដែលយើងអាចឱ្យមុខរបរ franchise ក្នុងស្រុកចំណេញអាចរស់បានសមរម្យដោយសុចរិតភាព។ លោកបានបន្តថា ដោយសារបច្ចុប្បន្នជាសម័យបច្ចេកវិទ្យាឌីជីថល តែមិនមែនសុទ្ធតែចំណេញផលប្រយោជន៍ពីឌីជីថលទាំងអស់ទេ ព្រោះថា បើយើងដើរមុនគេ ការប្រើប្រាស់ឌីជីថលនឹងចំណេញ តែបើយើងយឺតបន្តិចនោះ យើងបង្កើត businessដើម្បីតែបរាជ័យប៉ុណ្ណោះ។ ដូច្នេះទី1យើងត្រូវចេញផលិតផលថ្មីឱ្យទាន់ពេល-វេលា និងតាមតម្រូវការទីផ្សារ។ ទី2 ពង្រឹងសេវាអតិថិជននៅនឹងកន្លែង មានការធានា និងនាំចូលនូវផលិតផលមានគុណភាព។ ចំណុចទាំង2 នេះនឹងធ្វើឱ្យBrand(ម៉ាកសញ្ញា)របស់យើងនឹងមានដំណើរការល្អ និងមានការគាំទ្រពីអតិថិជន៕
July 6, 2018
ចិញ្ចឹមមាន់យកស៊ុតលក់ ចំណេញស្រួលជាងចិញ្ចឹមយកសាច់
ដោយសង្កេតឃើញថា ស៊ុតមាន់ភាគច្រើនត្រូវបាននាំចូលពីប្រទេសជិតខាង បុរសខ្មែរម្នាក់បានសម្រេចចិត្តលាឈប់ពីការងារដែលមានប្រាក់ខែខ្ទង់ពាន់ដុល្លារ មកធ្វើកសិដ្ឋានចិញ្ចឹមមាន់យកស៊ុតលក់ផ្ទាល់ខ្លួន ដោយទទួលបានការគាំទ្រយ៉ាងខ្លាំងនៅលើទីផ្សារ រហូតផ្គត់ផ្គង់សឹងតែមិនគ្រប់ឱ្យម៉ូយដែលកុម្ម៉ង់យកប្រចាំថ្ងៃទៀតផង។
លោក តាក់ សីហា ម្ចាស់កសិដ្ឋានចិញ្ចឹមមាន់យកស៊ុតមួយកន្លែងដែលស្ថិតក្នុងភូមិសុបិន្ត ឃុំត្រាចពង ស្រុកសំរោងទង ខេត្តកំពង់ស្ពឺមានប្រសាសន៍ថា លោកបានចាប់ផ្តើមចិញ្ចឹមមាន់យកពងនេះចាប់តាំងពីមេសា ឆ្នាំ2018មក ដោយទិញមេមាន់ចំនួន 6,000ក្បាល (មួយក្បាលតម្លៃ 2ម៉ឺនរៀល) យកមកបំប៉នចំណី និងថែទាំនៅក្នុងកសិដ្ឋានលើផ្ទៃដីទំហំជិតមួយហិកតា។ រយៈពេលមួយខែក្រោយមក មេមាន់ទាំងនោះក៏ចាប់ផ្តើមផ្ដល់ស៊ុតជាបន្តបន្ទាប់ ដោយមួយថ្ងៃលោកអាចប្រមូលស៊ុតបានចំនួនជាង 5,500គ្រាប់សម្រាប់ដឹកយកទៅលក់ឱ្យម៉ូយនៅលើទីផ្សារនានា ជាពិសេសផ្សារនៅក្នុងទីក្រុងភ្នំពេញ។ លោកបញ្ជាក់ថា “ការចិញ្ចឹមមាន់ អាស្រ័យលើម្ចាស់កសិដ្ឋាន បើសិនចង់ឆាប់បានផលត្រូវទិញមេមាន់ដែលធំៗស្រាប់យកមកបំប៉នតែក៏ត្រូវចំណាយលុយច្រើនដែរ តែបើមិនសូវមានលុយទេ អាចទិញកូនតូចៗយកមកចិញ្ចឹមយូរបន្តិចទើបអាចទទួលបានពងដូចគ្នា”។
លោកថា នៅលើទីផ្សារ ការលក់ពងមាន់មានតម្លៃខុសៗគ្នា ប៉ុន្តែសម្រាប់លោក លោកបោះឱ្យម៉ូយដុំដែលគេទទួលទិញច្រើនៗជារៀងរាល់ថ្ងៃដោយលក់ក្នុងតម្លៃ 300រៀលក្នុងមួយគ្រាប់ និង2ថ្ងៃត្រូវដឹកទៅឱ្យម៉ូយនៅឯក្រុងភ្នំពេញម្តង ប៉ុន្តែបច្ចុប្បន្នពងមាន់ដែលប្រមូលបានមិនទាន់គ្រប់ឱ្យម៉ូយដែលរង់ចាំទទួលទិញនៅលើទីផ្សារនៅឡើយទេ ជាហេតុធ្វើឱ្យលោកលៃលករកដើមទុនបន្ថែមទៀតសម្រាប់ពង្រីកកសិដ្ឋានឱ្យបានកាន់តែធំឡើង។ “មានការគាំទ្រច្រើនពីអតិថិជន ដោយសារតែប្រជាជនខ្មែរបច្ចុប្បន្នបានងាកមកគាំទ្រផលិតផលកសិកម្មក្នុងស្រុកកាន់តែច្រើនឡើងៗ ដើម្បីជួយលើកកម្ពស់សេដ្ឋកិច្ចគ្រួសារកសិករខ្មែរ និងអ្វីដែលសំខាន់នោះគឺពងមាន់ក្នុងស្រុក ពេលពងភ្លាម យកមកលក់ភ្លាម ដូច្នេះពងមានគុណភាពល្អជាងពងមាន់នាំចូល ព្រោះពងមាន់នាំចូលត្រូវចំណាយពេលដឹកមកយូរថ្ងៃ ទម្រាំបានមកដាក់លក់នៅលើទីផ្សារ”។
ចំពោះវិធិសាស្ត្រចិញ្ចឹមវិញ លោកប្រាប់ថា មុននឹងទិញមេមាន់មកចិញ្ចឹម គេត្រូវរៀបចំទ្រុងមាន់ធ្វើពីសំណាញ់ដែកឱ្យស្អាតរួចជាមុន ដើម្បីទុកដាក់មេមាន់ឱ្យផុតពីលើដីដើម្បីការពារ និងទប់ស្កាត់ជំងឺដង្កាត់ផ្សេងៗផង និងងាយស្រួលក្នុងការប្រមូលអាចម៍មាន់ទុកលក់ឱ្យកសិករធ្វើជាជីធម្មជាតិផង ដែលអាចម៍មាន់នេះ មួយបាវលក់បានតម្លៃ 5,000រៀលដែរ ហើយមួយថ្ងៃប្រមូលបាន10បាវ សម្រាប់ទុកជាប្រាក់ចំណាយទិញចំណីផ្គត់ផ្គង់មាន់ដែលមួយថ្ងៃៗត្រូវចំណាយអស់ប្រហែល 220ដុល្លារសម្រាប់មេមាន់ទាំង 6,000ក្បាលនេះ និងថ្លៃពលកម្មរបស់កម្មករ 4នាក់ដែលមើលថែទាំមាន់ផងដែរ។
ក្រៅពីធ្វើទ្រុងឱ្យស្អាតហើយនោះការចិញ្ចឹមមាន់នេះយើងត្រូវចេះចាក់ថ្នាំវ៉ាក់សាំងឱ្យមាន់ដើម្បីការពារពីជំងឺផ្សេងៗផងដែរ ជាពិសេសជំងឺរាក។ ពេលឃើញមាន់រាក ត្រូវចាក់ថ្នាំព្យាបាលភ្លាមតែម្ដង ព្រោះបើទុកចោលយូរ អាចបណ្ដាលឱ្យឆ្លងពីមាន់មួយទៅមាន់មួយបាន។
យ៉ាងណាក៏ដោយ លោកបានបញ្ជាក់ថា ការចិញ្ចឹមមាន់យកពងនេះ ចំណេញជាងចិញ្ចឹមមាន់យកសាច់ ដោយសារមានការគាំទ្រច្រើននៅលើទីផ្សារនាពេលបច្ចុប្បន្ន និងបើសិនមានការគាំទ្រច្រើនការចិញ្ចឹមមាន់យកពងលក់នេះក៏ទទួលបានផលចំណេញច្រើនតាមនោះដែរ និងដល់ពេលមេមាន់ចាស់ មានអាយុ1ឆ្នាំ 3ខែ គេអាចជម្រុះចោល ដោយអាចយកសាច់លក់ ដែលបានតម្លៃខ្ពស់ជាងមាន់ចិញ្ចឹមយកសាច់ធម្មតាទៀតផង ព្រោះមាន់ចិញ្ចឹមយកពងនេះមានសាច់ស្វិតជាងមាន់ចិញ្ចឹមយកសាច់ និងមានរសជាតិឆ្ងាញ់ជាងទៀតផង៕
July 6, 2018
ក្នុងទិសដៅទេសចរណ៍៖ ព្រលានយន្តហោះ ខេត្ត ព្រះសីហនុរំពឹងទទួលអ្នកដំណើរ 1លាននាក់ក្នុង1ឆ្នាំ
ខណៈដែលខេត្តព្រះសីហនុកំពុងទទួលបានការពេញនិយមសម្រាប់អ្នកទេសចរនៅក្នុងតំបន់កាន់តែច្រើនឡើងៗ និងនៅពេលដែលអគារអ្នកដំណើរចេញ-ចូលនៃព្រលានយន្តហោះ “អន្តរជាតិ” ខេត្តព្រះសីហនុបញ្ចប់គម្រោងជាស្ថាពរ អគារថ្មីនេះនឹងអាចទទួលអ្នកដំណើរក្នុងមួយឆ្នាំបានប្រមាណជាមួយលាននាក់។ នេះបើតាមការឱ្យដឹងពីឯកឧត្តមបណ្ឌិត ម៉ៅ ហាវណ្ណាល់ រដ្ឋលេខាធិការនៃរដ្ឋលេខាធិការដ្ឋានអាកាសចរស៊ីវិលកម្ពុជា។
ឯកឧត្តមបណ្ឌិតបានឱ្យដឹងថា ការជួសជុលស្ថានីយនេះ គឺជាផ្នែកមួយនៃផែនការដ៏មានមហិច្ឆតាមួយដោយក្រុមហ៊ុនអាកាសចរណ៍កម្ពុជាដែលជាក្រុមហ៊ុនគ្រប់គ្រងអាកាសយានដ្ឋានអន្តរជាតិនៅក្នុងព្រះរាជាណាចក្រកម្ពុជាក្នុងការកែប្រែព្រលានយន្តហោះដើម្បីត្រៀមសម្រាប់ការកើនឡើងនៃចរាចរណ៍អ្នកដំណើរ។ យើងបានចរចាជាមួយក្រុមហ៊ុនវិនិយោគសាងសង់ និងបានសាងសង់ក្នុងរយៈពេលជាងមួយឆ្នាំមកនេះនូវអគារថ្មីរបស់យើងដែលមានសោភណភាព និងបរិស្ថានល្អដើម្បីអាចទទួលអ្នកដំណើរបាន 1លាននាក់ក្នុងមួយឆ្នាំ ដោយសារអគារចាស់ពីមុនរបស់យើងទទួលភ្ញៀវបានត្រឹមតែ 20ម៉ឺននាក់ប៉ុណ្ណោះក្នុងមួយឆ្នាំ។
ឯកឧត្តមបណ្ឌិតមានប្រសាសន៍ថា ដោយសារការទស្សនកិច្ចរបស់នាយករដ្ឋមន្ត្រីរស្ស៊ី នៅកម្ពុជានាពេលកន្លងមក សម្ដេចនាយករដ្ឋមន្ត្រីបានសំណូម-ពរឱ្យប្រទេសរុស្ស៊ីបញ្ជូនភ្ញៀវទេសចររបស់ខ្លួនមកធ្វើទេសចរណ៍នៅព្រះរាជាណាចក្រកម្ពុជា ក៏ប៉ុន្តែជាការឆ្លើយតប លោកនាយករដ្ឋមន្ត្រីរុស្ស៊ីបានមានប្រសាសន៍ថា ភ្ញៀវទេសចររុស្ស៊ីចូលចិត្តតំបន់សមុទ្រដូច្នេះទាល់តែកម្ពុជាមានព្រលានយន្តហោះខ្នាតអន្តរជាតិនៅខេត្តដែលជាប់នឹងសមុទ្រ ទើបភ្ញៀវទេសចររុស្ស៊ីអាចធ្វើការហោះហើរត្រង់មកកាន់តំបន់ឆ្នេរសមុទ្ររបស់កម្ពុជាបានដោយងាយស្រួល។
យោងតាមសេចក្តីថ្លែងការណ៍របស់ក្រុមហ៊ុនគ្រប់គ្រងព្រលានយន្តហោះកម្ពុជាបានឱ្យដឹងថា កម្មវិធីកែលម្អព្រលានយន្តហោះនេះមានរួមបញ្ចូលការពង្រីកព្រលានយន្តហោះរហូតដល់ទៅ 80ភាគរយពីលើទំហំបច្ចុប្បន្នរបស់ខ្លួនដែលជា “ការជួសជុលឡើងវិញ” នៅតាមកន្លែងនានា (ជាពិសេសតំបន់ត្រួតពិនិត្យ កន្លែងស្នាក់នៅ និងតំបន់ទាមទារសំណង)និងការដំឡើងឧបករណ៍ថ្មី រួមទាំងប្រព័ន្ធគ្រប់គ្រងឥវ៉ាន់របស់អ្នកដំណើរផងដែរ។
ទាំងអស់នេះ គឺជាការបង្ហាញពីការប្តេជ្ញាចិត្តរបស់រដ្ឋាភិបាលកម្ពុជាក្នុងការធ្វើឱ្យប្រសើរឡើងនូវការដឹកជញ្ជូនផ្លូវអាកាសនៅក្នុងប្រទេស និងជាការបោះជំហានថ្មីមួយក្នុងដំណើរឆ្ពោះទៅរកការរួមចំណែកដល់សក្តានុពលនៃកំណើនសេដ្ឋកិច្ចទេសចរណ៍។
លោក ស៊ិន ចាន់សេរីវុត្ថា អ្នកនាំពាក្យនៃរដ្ឋលេខាធិការដ្ឋានអាកាសចរស៊ីវិល បានប្រាប់ឡារ៉ែនតាមទូរស័ព្ទថា ការជួសជុលស្ថានីយអ្នកដំណើរនេះឡើងវិញ គឺជាការពង្រីកអគារទទួលអ្នកដំណើរ ដោយសារការកើនឡើងនៃប្រជាប្រិយភាពរបស់ខេត្តព្រះសីហនុដែលជាគោលដៅទេសចរណ៍។ “គោលនយោបាយរបស់យើង គឺទាក់ទាញភ្ញៀវទេសចរឱ្យបានកាន់តែច្រើនឡើង ក៏ដូចជាការវិនិយោគនៅក្នុងខេត្តនេះ ហើយនៅក្នុងន័យនេះ ការជួសជុលព្រលានយន្តហោះ គឺជាគន្លឹះក្នុងការផ្តល់សេវាល្អប្រសើរ និងកាន់តែងាយស្រួល”។
លោកបានមានប្រសាសន៍ថា ជាសក្តានុពល ទី1 គឺយើងបានកែលម្អសោភណភាព ពង្រីកស្ថានីយអ្នកដំណើរចាស់ឱ្យទំនើបត្រូវតាមស្តង់ដារ និងប្រកបដោយផាសុកភាព។ ទី2 គឺទទួលអ្នកដំណើរឱ្យបានច្រើនជើងហោះហើរ ពោលគឺភ្ញៀវទេសចរនឹងកើនឡើងពី 250,000នាក់ ទៅ500,000នាក់តាមផ្លូវអាកាសនេះ។ នេះគឺស្ថិតនៅក្នុងកម្រិតមួយមិនទាន់ពេញខ្នាតស្តង់ដារនៅឡើយ។ ឥឡូវយើងស្វាគមន៍ និងពង្រីកព្រលានរបស់យើងឱ្យត្រូវស្តង់ដារ និងទូលាយជាងមុន យើងនឹងពិនិត្យជាបន្តទៀតនូវការកើនឡើងជាលំដាប់នៃការចរាចររបស់អ្នកដំណើរ។
យោងតាមរដ្ឋលេខាធិការដ្ឋានអាកាសចរស៊ីវីលបានឱ្យដឹងថា សព្វថ្ងៃព្រលានយន្តហោះអន្តរជាតិខេត្តព្រះសីហនុ ដែលមានប្រវែង 2,500ម៉ែត្រនេះមិនទាន់ឆ្លើយតបតាមតម្រូវឱ្យការហោះហើរ និងចុះចតរបស់យន្តហោះធុនធំបានទេ ដូច្នេះសព្វថ្ងៃព្រលាននេះទទួលបានត្រឹមតែយន្តហោះប្រភេទ Air bus 321 និងបូអុីង757 ក៏ប៉ុន្តែតម្រូវការឱ្យយន្តហោះធ្វើដំណើរផ្លូវឆ្ងាយប្រភេទយន្តហោះធំៗ មិនទាន់អាចចុះចតបាននៅឡើយ។
សូមបញ្ជាក់ថា បើតាមគម្រោង នៅដើមឆ្នាំ2019 ខាងមុខនេះ ការពង្រីកព្រលានប្រវែង 300ម៉ែត្របន្ថែមនឹងត្រូវបញ្ចប់ជាស្ថាពរនៅចុងឆ្នាំដដែលដែលអាចធ្វើឱ្យយន្តហោះធុនធំចុះចតបាន។ ដំណាក់កាលទី2 នឹងពង្រីកផ្លូវហោះហើរប្រវែង 500ម៉ែត្របន្ថែមទៀត ដែលនឹងធ្វើឱ្យផ្លូវរត់ហោះ(Runway)មានប្រវែងរហូតដល់ 3,300ម៉ែត្រ និងអាចឱ្យយន្តហោះប្រភេទធំៗចុះចតបានដូចការគ្រោងទុក។
បច្ចុប្បន្ន អាកាសយានដ្ឋានអន្តរជាតិខេត្តព្រះសីហនុ មានភ្ញៀវចូលមកតាមរដូវកាល ដោយនៅក្នុងរដូវ Low season មានជើងហោះហើរពី7 ទៅ10ជើងក្នុងមួយថ្ងៃ តែក្នុងរដូវ High season វិញនឹងមានរហូតទៅដល់ 15ជើងក្នុងមួយថ្ងៃ៕
July 5, 2018
សារធាតុអាហារល្អៗសម្រាប់កូនតូច ដែលបង្កប់នៅក្នុងពណ៌របស់បន្លែផ្លែឈើដែលអ្នកម្ដាយត្រូវដឹង
ម៉ឺនុយអាហាររបស់កូនតូច ក្នុងមួយថ្ងៃៗតាំងពីវ័យ6ខែឡើងទៅ គួរបានទទួលសារធាតុអាហារ ដែលសម្បូរបែប។ អាហារសម្រាប់ក្មេងតូចៗ ប្រាកដណាស់ត្រូវតែមានបន្លែ និងផ្លែឈើជាគ្រឿងផ្សំហើយមានឈ្មោះថាបន្លែផ្លែឈើ គឺពិតជាមានប្រយោជន៍ដល់រាងកាយខ្លាំងណាស់ តែបន្លែប្រភេទនីមួយៗ ពណ៌នីមួយៗសុទ្ធតែផ្ដល់នូវសារធាតុអាហារដែលល្អផ្សេងៗពីគ្នា។ តើកូនតូចរបស់អ្នកញ៉ាំបន្លែដែលមានពណ៌ផ្សេងៗគ្នានោះហើយនឹងបានទទួលសារធាតុសំខាន់អ្វីខ្លះ? ថ្ងៃនេះ ឡារ៉ែន នឹងញែកពណ៌របស់បន្លែផ្លែឈើជា 5ក្រុមពណ៌ ដើម្បីឱ្យអ្នកម្ដាយដឹងថា ក្នុងពណ៌នីមួយៗនោះផ្ដល់នូវសារធាតុអាហារល្អៗខុសប្លែកគ្នាយ៉ាងណាខ្លះ?
1. បន្លែផ្លែឈើពណ៌បៃតង
បន្លែ និងផ្លែឈើពណ៌បៃតងដែលអ្នកម្ដាយគួរនាំយកមកផ្សំធ្វើជាអាហារឱ្យកូន និងស័ក្តិសម សម្រាប់កូនមានដូចជា ប្រូខូលី ស្លឹកបាស ខាត់ណា ផ្ទី ផ្លែត្របែក ផ្លែទំពាំងបាយជូរបៃតង និងផ្លែប៉ោមពណ៌បៃតង។ល។ សារធាតុពណ៌ បៃតងនៅក្នុងបន្លែ និងផ្លែឈើទាំងនេះគឺខ្លូរ៉ូ ហ្វីល (Chlorophyll) មានគុណសម្បត្តិក្នុងការតតាំងការកើតមហារីកបានយ៉ាងល្អ។ បន្លែផ្លែឈើពណ៌បៃតងមានសារធាតុកាកសរសៃខ្ពស់ ជួយក្នុងរឿងបន្ទោបង់បានល្អ បន្ថយអាស៊ីតក្នុងក្រពះ និងជួយបន្ថយអាការប្រតិកម្មចាញ់ផ្សេងៗទៀតផង។ ពេលណាដែលកូនពិបាកក្នុងការបន្ទោបង់ ត្រូវរៀបចំមុខម្ហូបក្រុមនេះឱ្យញ៉ាំ។
2. បន្លែផ្លែឈើពណ៌ក្រហម
បន្លែ និងផ្លែឈើពណ៌ក្រហម ដែលអ្នកម្ដាយយកមកផ្សំជាអាហារឱ្យកូនតូចញ៉ាំ និងស័ក្តិសមជាមួយក្មេងៗមានដូចជា ផ្លែស្រ្តបឺរី ប៉េងប៉ោះឃែនបឺរី ផ្លែទទឹម ឪឡឹក ល្ហុងទុំ។ល។ បន្លែផ្លែឈើពណ៌ក្រហមមានសារធាតុឡៃខូពីន (Lycopene) និងបេតាសៃស៊ីន (Betacycin) ដោយសារធាតុទាំង2ប្រភេទនេះមានចំណែកសំខាន់ក្នុងការ មើលឃើញរបស់ក្មេងតូចៗ ជួយតតាំងជំងឺមហារីកផ្សេងៗបានយ៉ាងល្អ និងសំខាន់គឺ មានគុណសម្បត្តិក្នុងការប្រឆាំងរ៉ាឌីកាល់សេរី។
3. បន្លែផ្លែឈើពណ៌លឿង និងពណ៌លឿងទុំ
ក្រុមពណ៌លឿង និងពណ៌លឿងទុំដែលអ្នកម្ដាយយកមកផ្សំជាម្ហូបអាហារឱ្យកូនញ៉ាំជាញឹកញាប់មានដូចជា មើមការ៉ុត ផ្លែល្ពៅ ផ្លែពោតមានសារធាតុសំខាន់ៗដូចជា លូធីន (Lutein) ជួយការពារភាពចុះខ្សោយរបស់ប្រសាទកញ្ចក់ប្រស្រីភ្នែក ជួយឱ្យមើលឃើញច្បាស់នៅពេល យប់ និងមានសារធាតុ បេតាឃែរ៉ូធីន (Betacarotene) ជួយបន្ថយកម្រិតលូលេស្តេរ៉ូល ជួយឱ្យសាច់ស្បែកភ្លឺរលោង បន្ថយភាពចុះខ្សោយរបស់កោសិកាដែលបណ្ដាលមកពីរ៉ាឌីកាល់សេរី។
4. បន្លែផ្លែឈើពណ៌ស្វាយ
បន្លែ និងផ្លែឈើពណ៌ស្វាយដែលអ្នកម្ដាយតែងនាំយកមកធ្វើជាម្ហូបអាហារឱ្យកូនញ៉ាំ និងស័ក្តិសមជាមួយក្មេងតូចៗមានដូចជា ប្ល៊ែកបឺរី ប្ល៊ូបឺរី ស្ពៃក្ដោបពណ៌ស្វាយ ផ្លែទំពាំងបាយជូរពណ៌ស្វាយ មានសារធាតុ អ៊ែនថូសៃយ៉ានីន(Anthocyanin) មានគុណសម្បត្តិបំផ្លាញសារធាតុដែលបង្កឱ្យកើតមហារីក ជួយពង្រីកសរសៃឈាម ជួយបំប៉នសរសៃសក់ឱ្យខ្មៅក្រិបទៀតផង។
5. បន្លែផ្លែឈើពណ៌ ស
បន្លែ និងផ្លែឈើពណ៌សដែលអ្នកម្ដាយយកមកធ្វើជាអាហារឱ្យកូនតូចញ៉ាំ និងស័ក្តិសមជាមួយក្មេងតូចៗមានដូចជា ស្ពៃបូកគោ មើមឆៃថាវ ផ្កាស្ពៃ មើមខ្ទឹមស ផ្សិតម្ជុល និងគ្រាប់ល្ងស។ល។ បន្លែពណ៌សនេះនឹងផ្ដល់នូវសារធាតុ កាកសរសៃខ្ពស់ និងមានជារួមគឺ ប្រឆាំងរ៉ាឌីកាល់សេរី បង្កើនបរិមាណវីតាមីន E ក្នុងរាងកាយជាពិសេសក្រុមគ្រាប់ធញ្ញជាតិផ្ដល់នូវវីតាមីន និងប្រូតេអីុនខ្ពស់ល្អខ្លាំងណាស់សម្រាប់ក្មេង តូចៗ។
បន្លែ និងផ្លែឈើ ជាអាហារដែលល្អចំពោះក្មេងតូចៗខ្លាំងណាស់ តែក្នុងអំឡុងអាយុតិចជាង12ខែ អ្នកម្ដាយត្រូវសង្កត់លើការចម្អិនឱ្យឆ្អិនដោយសារតែប្រព័ន្ធតតាំងជំងឺផ្សេងៗរបស់រាងកាយកូននៅមិនទាន់ល្អគ្រប់គ្រាន់ បើឱ្យញ៉ាំបន្លែស្រស់ៗ អាចនឹងមានការប្រឡាក់ប្រឡូសដោយសត្វល្អិត មេរោគបាក់តេរី សារធាតុពុលពីជីផ្សេងៗ ឬថ្នាំសម្លាប់សត្វល្អិតជាដើម ធ្វើឱ្យកើតបញ្ហាដល់ប្រព័ន្ធសុខភាពរបស់កូនតូចបាន។ គោលការណ៍បរិភោគរបស់កូនក្នុងគ្រប់អំឡុងវ័យ គឺគួរតែបានញ៉ាំអាហារដែលសម្បូរបែប និងគ្រប់5ប្រភេទក្រុមរៀងរាល់ថ្ងៃ៕
July 5, 2018
នៅពេលដែលអ្នកម្ដាយតាំងគភ៌ផង ចិញ្ចឹមមើលថែកូនតូចផង…
មិនមែនជារឿងងាយស្រួលឡើយ សម្រាប់អ្នកម្ដាយដែលត្រូវមើលថែទាំកូនតូចវ័យកំពុងរពឹស ដំណាលគ្នានឹងការពពោះកូនមួយទៀតដែលនឹងក្លាយជាសមាជិកគ្រួសារថ្មីម្នាក់ទៀតនោះ តែក៏ហត់នឿយល្វើយកាយយ៉ាងមានសេចក្ដីសុខដែរ។ ថ្ងៃនេះ អ្នកគ្រូ ឆវី សូមនាំមកជម្រាបជូនបងៗ ដែលជាឧត្តមមាតាទាំងអស់នូវគន្លឹះល្អៗក្នុងការមើលថែទាំសុខភាពរបស់អនាគតអ្នកម្ដាយកូនញឹកដូចខាងក្រោមនេះ។
1. ធ្វើអ្វីថ្នមៗខ្លះផង
ថ្ងៃនេះបងៗលែងជាអ្នកម្ដាយរបស់អាល្អិតបងតែម្នាក់ឯងទៀតហើយ តែកំពុងតែមានសមាជិកថ្មីថែមមកម្នាក់ទៀតហើយ…អាល្អិតបងគេមិនថាអីទេ បើអ្នកម្ដាយនឹងបែងចែកពេលវេលាទៅឱ្យអាអូននៅក្នុងពោះខ្លះនោះ។ ទោះជាអ្នកម្ដាយនឹងមិនអាចលះបង់ទាំងពេលវេលា ទាំងសេចក្ដីស្រឡាញ់ទៅឱ្យអាល្អិតបងបានច្រើនដូចមុនក៏ដោយ តែក៏គេមិនបានមានអារម្មណ៍ថា ខ្វះអ្នកម្ដាយដែរ ដូច្នេះក៏សូមបន្ធូរៗដៃខ្លះទៅ ត្រូវប្រយ័ត្នកុំឱ្យគេលេងជាមួយអ្នកម្ដាយខ្លាំងៗពេក រាប់ថាជាការមើលថែទាំអាអូនតូចដែលនៅក្នុងពោះម្នាក់ទៀតហើយ។
2. ត្រូវរកជំនួយការដែលទុកចិត្តបាន
ព្រោះបងៗកំពុងតែតាំងគភ៌ ទើបចាំបាច់ត្រូវថែបំប៉ន មើលថែទាំខ្លួនឯង និងកូនតូចនៅក្នុងផ្ទៃ ទើបពេលខ្លះមិនអាចនឹងផ្ដល់ពេលវេលាបានពេញលេញដល់អាល្អិតបងបានដូចមុន ដែលទោះជាអ្នកម្ដាយចង់មើលថែទាំគេឱ្យបានល្អបំផុតក៏ដោយ តែក្នុងអំឡុងពេលនេះចាំបាច់បំផុតដែលអ្នកម្ដាយត្រូវតែរកអ្នកជួយម្នាក់មកនៅចាំជួយ អាចជាលោកតា លោកយាយ ឬអ្នកមើលថែក្មេង ដើម្បីនៅមើលថែទាំគេហើយអ្នកម្ដាយនឹងបាននៅឆ្ងាយបន្តិចយ៉ាងកក់ក្ដៅក្នុងចិត្ត ដែលនេះជាការល្អចំពោះសុខភាពទាំងអ្នកម្ដាយខ្លួនឯង និងអាអូនតូចដែលកំពុងគេងនៅក្នុងផ្ទៃផងដែរ។
3. យកចិត្តទុកដាក់រឿងសុខភាព និងថែទាំខ្លួន
ឯងយ៉ាងម៉ឺងម៉ាត់ក្រៅពីនឹងត្រូវមើលថែទាំកូនតូចដែលនៅក្នុងផ្ទៃ និងក្រៅផ្ទៃហើយនោះ អ្នកម្ដាយក៏កុំភ្លេចមើលថែទាំខ្លួនឯងដំណាលៗគ្នានឹងមើលថែទាំកូនតូចផង ព្រោះរឹតតែអ្នកម្ដាយមានសុខភាពដែលល្អបរិបូរមាំទាំខ្លាំងប៉ុនណា អាល្អិតតូចដែលនៅក្នុងគភ៌របស់អ្នកម្ដាយក៏នឹងល្អឥតខ្ចោះតាមនោះដែរ។
4. គេងលក់ និងសម្រាក
អ្នកម្ដាយអាចអាស្រ័យអំឡុងពេលគេងថ្ងៃរបស់អាល្អិតបង ដោយអាចគេងសម្រាកមួយស្រឡេតដំណាលៗជាមួយនឹងគេ និងមិនបាច់ទៅនឹកកង្វល់ចិត្តអ្វីទេអ្នកម្ដាយ ព្រោះយ៉ាងណាអ្នកម្ដាយក៏មានអ្នកជំនួយការនៅជួយមើលថែទាំអាល្អិតបងស្រាប់ហើយដូច្នេះអ្នកម្ដាយត្រូវតែគេងសម្រាកឱ្យបានច្រើនដើម្បីកូនក្នុងផ្ទៃ។
5. មើលថែទាំអាតូចនៅក្នុងផ្ទៃ និងអាធំនៅក្រៅផ្ទៃដំណាលៗគ្នា
ពេលខ្លះ ការមើលថែអាល្អិតទាំងនៅក្នុងផ្ទៃ និងក្រៅផ្ទៃរបស់អ្នកម្ដាយ ក៏អាចធ្វើឡើងដំណាលៗគ្នាបានដែរ ដូចជា ការអានរឿងនិទានឱ្យកូនស្ដាប់ ក៏អាចអានឱ្យគេទាំងពីរនាក់ស្ដាប់ក្នុងពេលជាមួយគ្នាបានដែរ។ ក្រៅពីនេះការលេង អ្នកម្ដាយក៏នៅអាចលេងជាមួយកូនទាំងពីរនាក់ដំណាលគ្នាបានផងដែរ។ អ្នកម្ដាយសាកល្បងប្រើតិចនិកនេះលមើល៍ ជាពិសេសបើសិនជាអាល្អិតដែលនៅក្រៅផ្ទៃជាក្មេងធំផងនោះ រឹតតែជាការល្អទៅទៀត គឺឱ្យគេសាកល្បងនិយាយលេងជាមួយប្អូន ស្ដាប់សំឡេងប្អូនរើហើយថែមទាំងអាចធ្វើជាអ្នកជំនួយការដ៏សំខាន់ម្នាក់របស់អ្នកម្ដាយបានទៀតផង។
6. ផ្លូវចិត្តរីករាយស្រឡះ
ស្នាមញញឹមរបស់ម្ដាយធ្វើឱ្យផ្ទះមួយនេះគួរឱ្យចង់រស់នៅ និងកក់ក្ដៅបំផុតសម្រាប់ក្មេងៗ។ សូមកុំភ្លេចថា សុខភាពផ្លូវចិត្តរបស់អ្នកម្ដាយមានផលដល់សភាវខាងអារម្មណ៍របស់កូនតូចខ្លាំងបំផុត ដូច្នេះសូមអ្នកម្ដាយកុំមានអារម្មណ៍មួម៉ៅក្ដៅក្រហាយអ្វីឡើយបើទោះជាមានពេលខ្លះអាល្អិតបងនឹងឌឺរឹងខ្លះ យំរករឿងខ្លះក៏ដោយ ក៏ចូរធ្វើអារម្មណ៍ឱ្យល្អ និងញញឹមជាប់ជានិច្ច។
ឃើញទេថា គន្លឹះល្អៗដែលបានជម្រាបជូននេះមិនមានអ្វីពិបាកឡើយ មែនទេបងៗស្រ្តីមានគភ៌ទាំងឡាយ? អ្នកគ្រូ ឆវី សូមជួយជាកម្លាំងចិត្តជូនដល់អ្នកម្ដាយទាំងអស់គ្នាណា៎ចា៎ស៕
July 5, 2018
នៅពេលកូនតូចឈានចូលខែទី12
លក្ខណៈរបស់កូនតូច
នៅពេលកូនអាយុជិតគ្រប់ 1ឆ្នាំ ភាពរពឹសរបស់កូនក៏រឹតតែខ្លាំងក្លាទ្វេគុណឡើងដែរ ទោះជាក្មេងខ្លះនៅមិនទាន់អាចដើរបានក៏ដោយ តែក៏អាចវារបានលឿនរហូតឪពុកម្ដាយដេញតាមចាប់មិនទាន់ក៏មាន។ កាលនៅជាក្មេងតូច ការចិញ្ចឹមមើលថែក្មេងប្រុស និងក្មេងស្រីមិនទាន់មានភាពខុសប្លែកពីគ្នាប៉ុន្មានឡើយ តែពេលមកដល់វ័យនេះ នឹងហាក់ដូចជាមើលឃើញច្បាស់លាស់ហើយ ដូចជា ក្មេងប្រុសនឹងមានសញ្ញារពឹសចេញឱ្យឃើញយ៉ាងច្បាស់តែម្ដងធ្វើចលនារហ័សរហួន ចំណែកក្មេងស្រីនឹងហាក់ដូចជារាងនឹងធឹងបន្តិច ខ្លាំងទៅខាងបញ្ចេញសំឡេង ចង់និយាយស្ដីច្រើនជាង ដែលទាំងអស់នេះជាវិវឌ្ឍនាការប្រក្រតីរបស់ក្មេង។ វ័យនេះ ក្ដីចង់ដឹងចង់ឃើញកើនឡើងកាន់តែច្រើន ដូច្នេះអ្នកម្ដាយហាមភ្លេចខ្លួនជាដាច់ខាត មិនថាតែតោងឡើងជណ្ដើរ មួលបើកចង្ក្រានហ្គាស ទាញឌុយភ្លើង បើកគម្របដបលេង សុទ្ធតែជារឿងដែលគួរឱ្យចាប់អារម្មណ៍សម្រាប់កូនតូចទាំងអស់។
ដល់វ័យត្រូវប្ដូរទឹកដោះឱ្យហើយ
អ្នកម្ដាយគួរចាប់ផ្ដើមប្ដូរពីទឹកដោះគោម្សៅទៅជាទឹកដោះគោប្រអប់បានហើយ ដោយឱ្យបឺតពីប្រអប់ដោយបំពង់បឺតតែម្ដង ឬចាក់ដាក់កែវញ៉ាំក៏បាន ព្រមទាំងចាប់ផ្ដើម(ឱ្យផ្ដាច់)ឱ្យឈប់រវល់ជាមួយដបទឹកដោះគោបានហើយ។ នៅពេលកូនធ្វើបានសម្រេច ក៏កុំភ្លេចសរសើរ និងបញ្ចេញកាយវិការត្រេកអរឱ្យកូនបានឃើញផង កូននឹងមានមោទនភាព។ វិធីផ្ដាច់ដបទឹកដោះគោគឺ ដំបូងៗអ្នកម្ដាយគួរគេងជាមួយកូននិយាយរឿងនិទានឱ្យកូនស្ដាប់ ឬបំពេរកូនរហូតដល់គេងលក់ ព្រោះបើមានអ្នកម្ដាយនៅគេងជាមួយ កូនច្រើនតែមិននឹកឃើញដបទឹកដោះគោទេ។ នៅពេលធ្វើដូច្នេះបានមួយរយៈពេលហើយ ចូរយកដបទឹកដោះគោទៅលាក់ទុកកុំឱ្យកូនឃើញរហូតតែម្ដង។
នៅពេលកូនមិនព្រមញ៉ាំបាយ
ប្រយោជន៍ដែលបានមកពីបាយគឺ ម្សៅ និងជាតិស្ករ និងប្រូតេអីុន ឬញ៉ាំនំប៉័ង និងគុយទាវក៏ទទួលបានម្សៅ និងជាតិស្ករដូចគ្នា ចំណែកត្រី ស៊ុត និងសាច់សត្វវិញផ្ដល់ប្រូតេអីុនច្រើនជាងបាយ ដូច្នេះទោះជាកូនមិនព្រមញ៉ាំបាយមែនតែបើបានអាហារផ្សេងគ្រប់គ្រាន់ក៏មិនមានបញ្ហាអ្វីដែរ តែបើមិនព្រមញ៉ាំបាយ ហើយញ៉ាំតែនំពេញមួយថ្ងៃដែលមានតែម្សៅ និងស្ករក្នុងបរិមាណច្រើន នឹងធ្វើឱ្យកូនឆ្អែត មិនចង់ញ៉ាំបាយធ្វើឱ្យខ្វះសារធាតុអាហារ។ បើកូនមានទម្លាប់បែបនេះ ចូរបបួលកូនវារ ឬរត់លេង ឬលេងបិទពួនដេញចាប់ឱ្យបានច្រើននោះកូនក៏នឹងញ៉ាំបាយបានច្រើនឡើងដោយឯកឯងដោយអ្នកម្ដាយមិនចាំបាច់បង្ខំឡើយព្រោះការដែលកូនបានរត់លេងច្រើននេះវាប្រៀបដូចជាការហាត់ប្រាណម្យ៉ាងដែរ។ ឯក្មេងដែលឪពុក ម្ដាយ តាយាយតឹងរ៉ឹងខ្លាំង មិនសូវបណ្ដោយឱ្យចេញទៅរត់លេងក្រៅផ្ទះ ច្រើនតែជាក្មេងដែលស្ពឹកស្រពន់ មិនសូវញ៉ាំ មិនសូវមានកម្លាំង និងឈឺញឹកញាប់។ តែយ៉ាងណាក៏ដោយ អ្នកម្ដាយត្រូវចេះសង្កេតមើលថា តើកូនមិនព្រមញ៉ាំបាយដោយសារអ្វី ទើបអាចកែបញ្ហាបានត្រូវ។
July 5, 2018
អតីតបេក្ខភាពបវរកញ្ញាផែនដី កញ្ញា អែម គន់ថង ងាកមកចាប់អាជីពជាតារាសម្ដែង
កញ្ញា អែម គន់ថង គឺជាអតីបរវកញ្ញាដែលបានជាប់ចំណាក់ថ្នាក់លេខ 2 កាលពីឆ្នាំ2016 ហើយក៏ជាអ្នកតំណាងឱ្យកម្ពុជា ចេញទៅប្រកួតដណ្ដើមតំណែងជាបវរកញ្ញាផែនដីកាលពីឆ្នាំ2017 នៅប្រទេសហ្វីលីពីន ក្រោមការចូលរួមពីបវរកញ្ញាអន្តរជាតិចម្រុះជាតិសាសន៍សរុបចំនួន86ប្រទេសផងដែរ។ រំឭកដល់គ្រានោះ បើទោះជាកញ្ញាមិនបានទទួលចំណាក់ថ្នាក់កំពូលផុតគេក៏ដោយ ប៉ុន្តែយ៉ាងហោចណាស់កញ្ញាក៏ត្រូវបានក្លាយជាបវរកញ្ញាកិត្តិយសប្រចាំប្រទេស ដែលបាននាំយកវប្បធម៌ខ្មែរ និងកេរ្តិ៍ឈ្មោះរបស់កម្ពុជាផ្សព្វផ្សាយនៅលើឆាកអន្តរជាតិដែរ។ ប៉ុន្តែពេលនេះ អ្វីដែលពាក់ព័ន្ធទៅនឹងប្រធានបទដែលត្រូវយកមកបរិយាយនាពេលនេះ គឺចំណូលចិត្តថ្មីរបស់ស្រីស្រស់រូបនេះ ប្រាថ្នាចង់ក្លាយខ្លួនជាតារាសម្ដែង បន្ថែមលើអាជីពជាតារាបង្ហាញម៉ូដដែលកំពុងមានទីផ្សារនាពេលបច្ចុប្បន្ននេះ។
ទើបតែបានឈានជើងចូលប្រឡូកនៅក្នុងវិស័យសិល្បៈត្រឹមប្រមាណជាង3ឆ្នាំប៉ុណ្ណោះតាមរយៈការប្រជ្រៀតខ្លួនចូលជាបេក្ខភាពបវរកញ្ញាប្រចាំឆ្នាំ2016 បន្ទាប់ពីកញ្ញាបានចាកឆ្ងាយស្រុកកំណើតនៅឯទឹកដីជាយសមុទ្រក្រុងព្រះសីហនុកាលពីអំឡុងឆ្នាំ2015។ នៅក្នុងរយៈពេលដ៏ខ្លីនេះ កញ្ញា អែម គន់ថង បានព្យាយាមកសាងកេរ្តិ៍ឈ្មោះយ៉ាងត្រចះត្រចង់រហូតបានក្លាយជាបវរកញ្ញាតំណាងកម្ពុជា ចេញទៅប្រកួតដណ្ដើមពានរង្វាន់បវរកញ្ញាផែនដីកាលពីឆ្នាំ2017។ នៅក្នុងរយៈពេលរួមគ្នាខាងលើនេះស្រីស្រស់ម្នាក់នេះក៏ទទួលបានទីផ្សារការងារពាក់ព័ន្ធទៅនឹងអាជីពគួរឱ្យកត់សម្គាល់ ដែលក្រៅពីមមាញឹកជាមួយអាជីពជាតារាបង្ហាញម៉ូដនៅក្នុងក្រុម Rising Star របស់ក្រុមហ៊ុន Arise Agency កញ្ញាក៏ជាប់រវល់ជាមួយនឹងការងារផ្សេងទៀតដូចជា ការថតស៉្បតផ្សព្វផ្សាយផលិតផលការថតសម្អាងការ ថតម៉ូដសម្លៀកបំពាក់ក៏ដូចជាថតឈុតចម្រៀងខារ៉ាអូខេជាដើម។ យ៉ាងណាក៏ដោយ បើទោះជាភាពមមាញឹកកំពុងតែហ៊ុមព័ទ្ធរាងកាយស្ទើរគ្មានពេលសម្រាកក្ដីប៉ុន្តែវាហាក់នៅមិនទាន់គ្រប់តម្រូវការ និងមហិច្ឆិតារបស់កញ្ញានៅឡើយ ខណៈដែលពេលនេះ គន់ថង បានបង្ហើបថា ចង់អភិវឌ្ឍខ្លួនក្លាយជាតារាសម្ដែងខ្សែភាពយន្តមួយទៀត។
ជួបជាមួយអ្នកយកព័ត៌មានប្រចាំនៅទស្សនាវដ្ដី ឡារ៉ែន បន្ទាប់ពីសម្រាកការងារថតម៉ូដសម្លៀកបំពាក់ LOOKSWOMEN កាលពីពេលកន្លងទៅនេះ កញ្ញា អែម គន់ថង បានបញ្ជាក់ប្រាប់យ៉ាងដូច្នេះថា “ការងារសិល្បៈសព្វថ្ងៃនេះខ្ញុំក៏ទទួលបានច្រើន និងរវល់ស្ទើររាល់ថ្ងៃតែម្ដងដែលសូម្បីតែការងារសិក្សាក៏ត្រូវបានសម្រេចផ្អាកមួយរយៈពេលសិនដែរ។ ការងារទាំងនោះភាគច្រើនជាប្រភេទដើរបង្ហាញម៉ូដ និងថតសម្អាងការ។ ប៉ុន្តែបើជាក្ដីប្រាថ្នារបស់ខ្ញុំផ្ទាល់ គឺនៅមានមួយទៀតដែលជាក្ដីស្រមៃរបស់ខ្ញុំតាំងពីក្មេង នោះគឺអាជីពជាតារាសម្ដែងខ្សែភាពយន្ត។ សព្វថ្ងៃនេះ ខ្ញុំកំពុងតែព្យាយាមហាត់សម្ដែងជាបណ្តើរៗ ហើយបើមានឱកាសគឺខ្ញុំនឹងចាប់ឱ្យជាប់តែម្ដង”។
គួរបញ្ជាក់ផងដែរថា ចូលមកដល់ពាក់កណ្តាលឆ្នាំ2018 នេះ កញ្ញា អែម គន់ថង ទើបតែមានអាយុ19ឆ្នាំ និងមានស្រុកកំណើតនៅក្រុងព្រះសីហនុ ដោយមានបងប្អូនចំនួន2នាក់ក្នុងនោះកញ្ញា គឺជាកូនស្រីពៅនៅក្នុងគ្រួសារ។ ដោយសារតែការស្រឡាញ់វិស័យសិល្បៈ គាប់ជួនជាមួយនឹងរូបសម្រស់ស្រស់ស្អាតពីធម្មជាតិផងដែរនោះ នៅក្នុងឆ្នាំ2015 កញ្ញា បានសម្រេចចាកចេញពីស្រុកកំណើត ហើយមកសាងកេរ្តិ៍ឈ្មោះនៅក្នុងវិស័យសិល្បៈតាមរយៈការចូលរួមប្រឡងបវវរកញ្ញាឯកប្រចាំឆ្នាំ2016 ជាមួយនឹងលទ្ធផលជាប់ចំណាត់ថ្នាក់លេខ2៕
July 5, 2018
ជនខិលខូចបានលួចលុយអ្នកប្រើតាមរយៈ App នៅក្នុង Play Store និង App Store
ពិតណាស់ក្រុមហ៊ុន Google និង Apple បានធ្វើការត្រួតពិនិត្យយ៉ាងហ្មត់ចត់មុននឹងអនុញ្ញាតឱ្យក្រុម Developer ដាក់បញ្ចូលកម្មវិធី (App) ចូលទៅក្នុង Play Store និង App Store ដើម្បីឱ្យប្រាកដថា កម្មវិធីទាំងនោះមិនត្រូវបានបង្កប់ ឬភ្ជាប់ជាមួយនូវមេរោគ ប៉ុន្តែតាមរយៈការស្រាវជ្រាវថ្មីបានរកឃើញថា មានក្រុមខិលខូចមួយចំនួនបានលួចលុយអ្នកប្រើប្រាស់តាមរយៈ App ដែលមាននៅក្នុង Play Store និង App Store។
របាយការណ៍ស្រាវជ្រាវថ្មីមួយរបស់ក្រុមហ៊ុនបង្កើតកម្មវិធីកម្ចាត់មេរោគ McAfee security បានឱ្យដឹងថា ថ្មីៗនេះមានអ្នកប្រើប្រាស់ជាច្រើនបានក្លាយជាជនរងគ្រោះ ដោយមានអ្នកខ្លះបានបាត់បង់លុយទៀតផង។
McAfee បានបញ្ជាក់ថា មានក្រុមខិលខូចបានបង្កើតកម្មវិធីដូចជា Ringtone Creators, Flashlights, QR code scanners ជាដើម និងបានដាក់ចូលទៅក្នុង Play Store និង App Store។ ក្រោយពេលអ្នកប្រើប្រាស់ទាញយកកម្មវិធីទាំងនោះមកប្រើជាដំបូងវាមិនទាន់ធ្វើសកម្មភាពនោះទេ ប៉ុន្តែក្រោយមកវាទាមទារឱ្យអ្នកប្រើប្រាស់ចុចប៊ូតុង Update, Subscription ឬប៊ូតុងផ្សេងៗទៀត បន្ទាប់មកវាតម្រូវឱ្យបង់ប្រាក់ ប៉ុន្តែវាមិនបានបញ្ជាក់ថា បង់ប្រាក់ទៅលើសេវាកម្មអ្វីនោះទេ។
ជាមួយគ្នានេះដែរ នៅពេលអ្នកប្រើប្រាស់ចុចប៊ូតុងដូចខាងលើ មេរោគដែលមាននៅក្នុងកម្មវិធីវាចាប់ផ្ដើមប្រមូលទិន្នន័យរបស់អ្នកប្រើប្រាស់ ហើយបើតាមការបញ្ជាក់របស់ McAfee គឺទិន្នន័យទាំងនោះត្រូវបានដាក់លក់នៅទីផ្សារងងឹតក្នុងតម្លៃដ៏ថ្លៃ។
ដោយសារតែកើតមានបញ្ហាទាំងនោះហើយ ទើប McAfee បានអំពាវនាវដល់អ្នកប្រើប្រាស់ទាំងអស់មេត្តាពិនិត្យទៅលើប្រភពនៃកម្មវិធីៗនីមួយៗមុននឹងទាញយកពី Play Store និង App Store៕
July 2, 2018
អគារភ្លោះខ្ពស់កប់ពពកនៅកម្ពុជាគ្រោងបុកគ្រឹះសាងសង់នៅចុងឆ្នាំនេះ
ទោះបីជាតម្រូវការអគារខ្ពស់ៗបានធ្លាក់ចុះបន្តិចនៅប៉ុន្មានខែក្នុងត្រីមាសចុងក្រោយនេះក៏ដោយ ក៏គេរំពឹងថា ថ្ងៃខាងមុខតម្រូវការនៃអគារខុនដូ ឬអគារពាណិជ្ជកម្មខ្ពស់ៗនៅតែមាន ដែលជាហេតុធ្វើឱ្យក្រុមហ៊ុនកូនខ្មែរក្នុងស្រុកសហការជាមួយវិនិយោគិនមកពីក្រៅប្រទេស ត្រៀមបុកគ្រឹះសាងសង់អគារកម្ពស់ 62ជាន់ នៅក្នុងខែកញ្ញា ឆ្នាំ2018 ខាងមុខនេះហើយ។
គម្រោងអគារភ្លោះដ៏ខ្ពស់ស្កឹមស្កៃនេះ មានការសហការវិនិយោគដោយក្រុមហ៊ុន Royal Group ជាមួយក្រុមហ៊ុន Huashi Group របស់វិនិយោគិនចិន និងសាងសង់ដោយក្រុមហ៊ុន Sichuan Huaxi Group។ ក្រុមហ៊ុន OTK Royal One ដែលជាបុត្រ-សម្ព័ន្ធរបស់ក្រុមហ៊ុន Royal Group ដែលតំណាងដោយលោកឧកញ៉ា គិត ធាង ប្រធានក្រុមហ៊ុន OTK Royal One ជាអ្នកវិនិយោគគម្រោងនេះ។
លោកឧកញ៉ា គិត ធាង បានមានប្រសាសន៍ឱ្យដឹងថា ការសាងសង់អគារខ្ពស់កប់ពពកនេះ នឹងចាប់-ផ្តើមនៅខែកញ្ញាខាងមុខនេះ និងគ្រោងចំណាយ-ពេលរយៈពេល 3ឆ្នាំដើម្បីបញ្ចប់គម្រោងនេះ។ អគារភ្លោះដែលមានឈ្មោះ Royal One នឹងដាក់ឱ្យប្រើ-ប្រាស់ចម្រុះសម្រាប់ជាសណ្ឋាគារ ខុនដូ ផ្សារទំនើប អគារការិយាល័យជាដើម។ អគារនេះនឹងមានកម្ពស់រហូតដល់62ជាន់ ទាំងអគារA និងអគារB ស្មើនឹងកម្ពស់230ម៉ែត្រ មានលំនៅឋាន 274Units និងការិយាល័យចំនួន 256បន្ទប់ មានទីតាំងនៅដីឡូត៍លេខ93 ផ្លូវលេខ114 កែងនឹងមហាវិថីមុនីវង្ស ដោយមានរចនាប័ទ្មយ៉ាងប្រណីត និងបំពាក់ឧបករណ៍ទំនើប។
លោកឧកញ៉ា ចេង ខេង អគ្គនាយកក្រុមហ៊ុន Hutton CPL បានមានប្រសាសន៍គាំទ្រចំពោះគម្រោងសាងសង់អគារខ្ពស់កប់ពពកនៅកម្ពុជាថា ជារឿងល្អប្រសើរសម្រាប់សេដ្ឋកិច្ចកម្ពុជា និងឆ្លុះបញ្ចាំងពីទំនុកចិត្តរបស់អ្នកវិនិយោគលើបរិយាកាសធុរកិច្ចនៅកម្ពុជា ខណៈដែលទីផ្សារអចលនទ្រព្យកំពុងមានភាពរីកចម្រើន ដោយវត្តមានអគារខ្ពស់ៗនឹងជួយលើកកម្ពស់មុខមាត់កម្ពុជាបន្ថែមទៀត។ លោកបន្តថា “ទីតាំងអគារភ្លោះដ៏ខ្ពស់នេះស្ថិតនៅទីតាំងកណ្តាលក្រុងដែលមានសក្តានុពល ដែលអាចបញ្ចៀសបាននូវការកកស្ទះចរាចរណ៍ មានការគាំទ្រ និងទាក់ទាញខ្លាំងពីអ្នកវិនិយោគ និងភ្ញៀវទេសចរអន្តរជាតិ ពិសេស និងអាចទទួលភ្ញៀវក្នុងឱកាសកម្ពុជាក្លាយជាម្ចាស់ផ្ទះកីឡាអាស៊ានហ្គេមនៅឆ្នាំ2023 ខាងមុខ”។
គួររំឭកថា គម្រោងលក់អគារខុនដូនៅត្រីមាសទី1 ឆ្នាំ2018 កន្លងទៅនេះបានធ្លាក់ចុះបន្តិចធៀបនឹងរយៈពេលដូចគ្នាកាលពីឆ្នាំ2017 ខណៈដែលតម្រូវការនៃការជួលអគារពាណិជ្ជកម្ម ហាក់មានភាពនៅទ្រឹង។ របាយការណ៍ស្រាវជ្រាវទីផ្សាររបស់ក្រុមហ៊ុន CBRE Cambodia បានបង្ហាញថា តម្លៃលក់ខុនដូប្រភេទមធ្យម និងប្រភេទប្រណីតបានថយចុះ2% ក្នុងត្រីមាសទី1 បើធៀបទៅនឹងត្រីមាសមុនៗ ស្របពេលដែលតម្លៃជាមធ្យមរបស់ខុនដូប្រភេទតម្លៃសមរម្យបានកើនឡើងចំនួន 7% ប្រចាំត្រីមាសទី1។
តម្លៃនៃការជួលរបស់ខុនដូប្រភេទមធ្យម និងប្រភេទប្រណីតស្ថិតក្នុងទីតាំងសំខាន់ត្រូវបានថយ-ចុះចំនួន3.8% ប្រចាំត្រីមាស ចំណែកតម្លៃជួលរបស់អគារការិយាល័យ និងទីតាំងពាណិជ្ជកម្មមានសភាពថេរក្នុងត្រីមាសទី1 នៃឆ្នាំ2018 បើប្រៀបធៀបទៅនឹងត្រីមាសមុន។ ហើយអត្រានៃការជួលអគារការិយាល័យសម្រាប់ត្រីមាសទី1 នៃឆ្នាំ2018 មានប្រមាណ 82.7%។
នៅត្រឹមដំណាច់ត្រីមាសទី1កន្លងទៅ ការផ្គត់ផ្គង់អគារខុនដូរមានការកើនឡើងដល់ជិត 10,000 យូនីតស្មើនឹង14% ហើយសម្រាប់រយៈពេលពេញមួយឆ្នាំ2018 ចំនួនខុនដូប្រមាណជា 12.000យូនីតបន្ថែមទៀតនឹងត្រូវបញ្ចប់គម្រោងសាងសង់របស់ខ្លួន។ ចំណែកការជួលអគារការិយាល័យនៅតែដំណើរការទៅមុខដែលបានកើនឡើងដល់ចំនួន 82.7% ទោះបីចំនួននៃការផ្គត់ផ្គង់មានការកើនឡើងក៏ដោយ។
បច្ចុប្បន្ននេះរាជធានីភ្នំពេញមានអគារខ្ពស់ៗជាច្រើនបានសាងសង់រួច និងដាក់ដំណើរការជាបណ្តើរៗហើយ ដូចជាអគារ Vattanac Capital កម្ពស់ 37ជាន់ អគារ OCIC កម្ពស់ 32ជាន់ និងអគារ ExchangeSquare របស់ក្រុមហ៊ុន Hong Kong Land ជាដើម៕
គម្រោងអគារភ្លោះខ្ពស់កប់ពពកនៅកម្ពុជា
July 2, 2018
កម្ពុជានឹងមានសាលាបណ្តុះបណ្តាល ជំនាញអចលនទ្រព្យនៅចុងឆ្នាំ2018
បើគ្មានការប្រែប្រួលទេនោះ សាលាបណ្តុះបណ្តាលជំនាញវិជ្ជាជីវៈដីធ្លី និងជំនាញលក់អចលន-ទ្រព្យ និងចាប់ផ្តើមទទួលសិស្សឱ្យចូលរៀនចាប់ពីខែសីហា ឆ្នាំ2018ខាងមុខនេះហើយ។ នេះបើតាមការឱ្យដឹងពីលោកបណ្ឌិត គីម ហ៊ាង ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា។
លោកបណ្ឌិតបានមានប្រសាសន៍នៅក្រោយពេលចុះអនុស្សរណៈយោគយល់គ្នាជាមួយលោកបណ្ឌិត ជួន រតនៈ សាកលវិទ្យាធិការនៃសាកលវិទ្យាល័យសេដ្ឋកិច្ច និងហិរញ្ញវត្ថុកាលពីសប្តាហ៍មុនថា ឆ្លងតាមការពិភាក្សាជាច្រើនលើកច្រើនសាអស់រយៈពេលជាយូរមក ភាគីទាំងពីរបានឯកភាព និងព្រមព្រៀងគ្នាបើកទទួលសិស្សឱ្យចូលរៀនវគ្គបណ្តុះបណ្តាលជំនាញដីធ្លី នៅថ្ងៃទី8 ខែសីហា ឆ្នាំ2018ខាងមុខនេះ ដើម្បីអបអរសាទរខួប10ឆ្នាំនៃការបង្កើតសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា។
លោកបន្តថា វគ្គសិក្សាដំបូងនេះ រំពឹងថា យ៉ាងហោចនឹងមាននិស្សិត និងអ្នកកំពុងបម្រើការងារលើវិស័យអចលនទ្រព្យចំនួន 500នាក់ចូលរៀនជាលើកដំបូងសម្រាប់ផ្តល់ជាមូលដ្ឋានគ្រឹះដើម្បីតម្រង់ទិសពួកគាត់ឱ្យមានជំនាញ ចំណេះដឹង និងវិជ្ជាជីវៈកាន់តែច្បាស់ក្នុងការបំពេញការងារឱ្យកាន់-តែប្រសើរឡើង។ ចំណែកនិស្សិតដែលចង់បម្រើការងារលើវិស័យអចលនទ្រព្យក៏ចាំបាច់ត្រូវចូលរៀនវគ្គសិក្សានេះបន្ថែមដែរ ដោយសារនៅថ្ងៃអនាគតដ៏ឆាប់ខាងមុខ ការជ្រើសរើសបុគ្គលិកចូលធ្វើការលើវិស័យដីធ្លីចាំបាច់តម្រូវឱ្យមានវិញ្ញាបនបត្រផ្នែកនេះជាចាំបាច់ “កន្លងមកអ្នកណាៗក៏អាចរកស៊ីក្នុងវិស័យដីធ្លីនេះបានដែរ ប៉ុន្តែចាប់ពីកម្ពុជាបង្កើតសាលានេះឡើង អ្នកមិនបានចូលរៀនមិនមានជំនាញវិជ្ជាជីវៈ មិនអាចធ្វើការលើវិស័យនេះបានទេ ដោយសារតែក្រុមហ៊ុនត្រូវការបុគ្គលិក ដែលមានជំនាញវិស័យដីធ្លីនេះជាចាំបាច់ បើសិនជាមិនមានសញ្ញាបត្រនេះទេ គឺគេមិនទទួលយកមកធ្វើការនោះឡើយ”។
ជាមួយគ្នានេះដែរ លោកបណ្ឌិត ជួន រតនៈ សាកលវិទ្យាធិការនៃសាកលវិទ្យាល័យសេដ្ឋកិច្ច និងហិរញ្ញវត្ថុមានប្រសាសន៍ថា វគ្គសិក្សាដំបូងនេះបង្រៀនដោយសាស្ត្រាចារ្យក្នុងស្រុកដែលមានបទពិសោធយូរឆ្នាំ និងមានចំណេះដឹងសិក្សាមកពីសាលាល្បីៗនៅក្រៅប្រទេស រួមនឹងជំនាញពាក់ព័ន្ធផ្លូវច្បាប់ដែលភាគច្រើនបង្រៀនដោយមេធាវីដែលមានជំនាញផ្នែកអចលនទ្រព្យនេះដែរ។ វគ្គសិក្សាថ្មីនេះរួមមាន 6មុខវិជ្ជា និងចែកជា 2វគ្គ គឺវគ្គ 75ម៉ោង និង120ម៉ោង ដែលបានរៀបចំរួចជាស្រេច និងបានឆ្លងកាត់ការពិភាក្សាជាមួយអ្នកជំនាញពាក់ព័ន្ធជាច្រើនលើកច្រើនសា ដែលនឹងជួយលើកកម្ពស់ធនធានមនុស្សឱ្យកាន់តែប្រសើរឡើង ផ្តល់នូវជំនាញវិជ្ជាជីវៈបន្ថែមទៀត សម្រាប់ផ្តល់ទំនុកចិត្តដល់អ្នកវិនិយោគនៅក្នុងស្រុក និងក្រៅស្រុក ក្នុងការវិនិយោគលើវិស័យដីធ្លីនៅក្នុងប្រទេសកម្ពុជា។
ឯកឧត្តម ម៉ី វ៉ាន់ ប្រតិភូរាជរដ្ឋាភិបាលទទួលបន្ទុកជាអគ្គនាយកនៃអគ្គនាយកដ្ឋានឧស្សាហកម្ម និងហិរញ្ញវត្ថុ នៃក្រសួងសេដ្ឋកិច្ច និងហិរញ្ញវត្ថុ បានហៅការចុះអនុស្សរណៈយោគយល់គ្នានេះថា ជាសមិទ្ធផលថ្មីមួយទៀតសម្រាប់វិស័យអចលនវត្ថុនៅកម្ពុជា។ ឯកឧត្តមបន្តថា យើងបានដឹងហើយថា សំណង់អគារខ្ពស់ៗ បុរីលំនៅឋាន និងសកម្មភាពពុះដីឡូត៍លក់បានរីកចម្រើនគួរឱ្យកត់សម្គាល់ជាខ្លាំងដែលបានជួយជំរុញកំណើនសេដ្ឋកិច្ចជាតិឱ្យកាន់តែប្រសើរឡើងក្នុងការកាត់បន្ថយអត្រាភាពក្រីក្រ ជួយឱ្យជីវភាពប្រជាពលរដ្ឋខ្មែរកាន់តែរីកចម្រើនឡើងជាលំដាប់ រហូតដល់ធនាគារអភិវឌ្ឍន៍អាស៊ីផ្តល់រហ័សនាមឱ្យថា ជាកូនខ្លាសេដ្ឋកិច្ចអាស៊ី “ក្រៅពីវិស័យវាយនភណ្ឌ ទេសចរណ៍ វិស័យអចលនវត្ថុគឺជាចលករដ៏សំខាន់ក្នុងការជួយជំរុញដល់កំណើនសេដ្ឋកិច្ចកម្ពុជាឱ្យនៅថេរចំនួន 7ភាគក្នុងរយៈពេលជាងមួយទសវត្សរ៍ចុងក្រោយនេះ”។
ឯកឧត្តមបន្តថា សាលាបណ្តុះបណ្តាលនេះ គឺជាបរិបទមួយថ្មីសម្រាប់វិស័យដីធ្លីនៅក្នុងប្រទេសកម្ពុជាដែលកំពុងតែរីកដុះដាលយ៉ាងខ្លាំងដែលទាមទារឱ្យអ្នកផ្តល់សេវាកម្មផ្នែកនេះ មានជំនាញ និងក្រមសីលធម៌ច្បាស់លាស់តាមរយៈវគ្គបណ្តុះបណ្តាលដែលគ្រោងនឹងចាប់ផ្តើមដំណើរការនៅខែសីហាឆាប់ៗខាងមុខ។ ឯកឧត្តមសង្កត់ធ្ងន់ថា“កន្លងមកក្រសួងធ្លាប់ចេញអាជ្ញាប័ណ្ណដល់ក្រុមហ៊ុនចំនួន150 នៅកម្ពុជាដែលមានរយៈពេល 3ឆ្នាំ ហើយនៅពេលផុតកំណត់អាជ្ញាប័ណ្ណ គាត់ត្រូវបន្តថ្មី គឺតម្រូវឱ្យគាត់មានវិញ្ញាបនបត្រឆ្លងកាត់ការសិក្សាច្បាស់លាស់ ដែលពួកគាត់ត្រូវមកចូលរៀនវគ្គថ្មីនេះទាំងអស់គ្នា ដើម្បីពង្រឹងសមត្ថភាព កែសម្រួលជំនាញវិជ្ជាជីវៈរបស់គាត់ និងដឹងពីក្រមសីលធម៌សម្រាប់អាជីព ដើម្បីផ្តល់ទំនុកចិត្តកាន់តែខ្ពស់ពីអតិថិជន ដែលនេះជាឱកាសមាស ឱកាសពេជ្រដែលជួយតម្រង់ទិសឱ្យគាត់មានសមត្ថភាពប្រសើរឡើង និងអាចមានការឡើងប្រាក់ខែពីក្រុមហ៊ុនបន្ថែមទៀតផង”។
កន្លងមក អ្នកណាក៏មានសិទ្ធិរកស៊ីអចលនទ្រព្យលក់ដីនេះដែរ មិនថាតែអ្នកជំនាញ ឬអ្នកម៉ូតូឌុបនោះទេ ប៉ុន្តែជួនកាលអ្នកខ្លះចំណាយពេលឥតប្រយោជន៍អ្នកខ្លះលក់បានក៏ទទួលបានប្រាក់កម្រៃជើងសាតែអ្នកខ្លះលក់បានហើយមិនទទួលបានប្រាក់កម្រៃជើងសា និងថែមទាំងមានរឿងដល់ខ្លួនឯងថែមទៀតដូច្នេះជំនាញនេះពិតជាមានសារៈសំខាន់ណាស់ដើម្បីផ្តល់ឱកាសឱ្យអ្នកមានបំណងរកស៊ីផ្នែកអចលនទ្រព្យ អាចមានឱកាសចូលរៀនមានចំណេះដឹងផ្នែកដីធ្លី កសាងមូលដ្ឋានគ្រឹះ សម្រាប់បំពេញការងារប្រកបដោយវិជ្ជាជីវៈពិតប្រាកដ ចូលរួមប្រកួតប្រជែងជាមួយអ្នកអាជីពនៅក្រៅប្រទេស។
គួរបញ្ជាក់ថា ប្រទេសកម្ពុជាបានដាក់គោលដៅរបស់ខ្លួនឱ្យក្លាយទៅជាប្រទេសមានចំណូលមធ្យមកម្រិតខ្ពស់នៅត្រឹមឆ្នាំ2030 ហើយនឹងក្លាយជាប្រទេសចំណូលខ្ពស់នៅឆ្នាំ2050 ដូច្នេះរាជរដ្ឋាភិបាលបានដាក់ចក្ខុវិស័យច្បាស់លាស់ ដើម្បីពង្រឹង និងបង្កើនចំណូលរបស់ប្រជាពលរដ្ឋឱ្យបានខ្ពស់។ ដើម្បីសម្រេចបានគោលដៅនេះ គ្រប់វិស័យទាំងអស់មិនថាវិស័យកសិកម្ម វិស័យទេសចរណ៍ ឬវិស័យវាយនភណ្ឌកាត់ដេរនោះទេ សូម្បីវិស័យអចលនទ្រព្យត្រូវតែមានសម្ទុះទៅមុខជាលំដាប់ ដើម្បីចូលរួមប្រកួតប្រជែងជាមួយប្រទេសក្នុងតំបន់អាស៊ាន។
យោងតាមទិន្នន័យក្រសួងរៀបចំដែនដី នគរូបនីយកម្ម និងសំណង់ ចាប់តាំងពីឆ្នាំ2000 ដល់ឆ្នាំ2017 ក្រសួងបានចេញអាជ្ញាប័ណ្ណដល់គម្រោងជាច្រើនដែលមានដើមទុនជាង 32,000លានដុល្លារដែលជាចំណែកមួយដ៏សំខាន់ក្នុងការជួយលើកស្ទួយកំណើនសេដ្ឋកិច្ចជាតិ៕
July 2, 2018