Author: ធឿន មករា

Derma Care គ្លីនិកជំនាញខាងថែរក្សាសម្រស់ និងស្បែក បំពាក់ដោយឧបករណ៍ទំនើប
គ្លីនិក Derma Care ដែលជាគ្លីនិកជំនាញខាងថែរក្សាសម្រស់ និងស្បែក បានបើកដំណើរការនៅក្នុងប្រទេសកម្ពុជាយើងតាំងពីឆ្នាំ2008មកម្ល៉េះ ដោយមានទីតាំងស្ថិតនៅកណ្តាលក្រុងភ្នំពេញ គឺស្ថិតនៅផ្ទះលេខ 161b មហាវិថីព្រះនរោត្តម សង្កាត់បឹងកេងកង 1 ខណ្ឌចំការមនរាជធានីភ្នំពេញ។ ដោយទទួលបានការគាំទ្រពីសំណាក់អតិថិជនក្នុងស្រុក និងក្រៅស្រុកជាច្រើន ជាពិសេសគឺតារាសិល្បៈល្បីៗតែម្តង(អតិថិជនជាង3,000នាក់ និង 30%នៃអតិថិជនសរុប ជាជនបរទេសដែលរស់នៅក្នុងប្រទេសកម្ពុជា)។
គ្លីនិក Derma Care ប្រមូលផ្តុំដោយអ្នកឯកទេសខាងស្បែក ដែលមានបទពិសោធច្បាស់លាស់ និងយូរឆ្នាំ ផ្តល់ជូននូវការពិគ្រោះយោបល់ និងការព្យាបាលយ៉ាងមានប្រសិទ្ធភាពដើម្បីផ្តល់នូវភាពស្រស់ស្អាត និងជួយការពារភាពចាស់ជាងវ័យជូនដល់អតិថិជនគ្រប់ជាតិសាសន៍ ជាមួយនឹងគ្រូពេទ្យឯកទេសពិតប្រាកដ។សេវាកម្មរបស់ គ្លីនិក Derma Care មានដូចជា ៖
– ឡាស៊ែរ បំបាត់ខ្លាញ់ បន្តឹងស្បែក
– ម៉ាស៊ីនសម្រករាង
– ឡាស៊ែរ បំបាក់មុខខ្មូត កាត់ប្រជ្រុយសាច់ដុះ ឫស
– ឡាស៊ែរ បន្តឹងស្បែកមុខ និងប្រហោងមុខ
– លើកបន្តឹងត្របកភ្នែកដោយម៉ាស៊ីនផ្លាស្មា
– ព្យាបាលមុន ដោយពន្លឺ LED
– ឡាស៊ែរ បង្រួមរន្ធរោម និងរន្ធញើស
– បញ្ជូលវីតាមីន ជំនួយស្បែកភ្លឺថ្លា
– ឡាស៊ែរ បំបាត់ជាំមុខ អាចម៍រុយ និងជួយឱ្យស្បែកភ្លឺថ្លា
– រំលាយខ្លាញ់ដោយម៉ាស៊ីន Ultra S
– ម៉ាស៊ីនជួយឱ្យស្បែកមុខក្មេងជាងវ័យ
– ឡាស៊ែរបាញ់លុបស្នាមសាក់
– ស្ប៉ាខ្លួន
– ម៉ាស៊ីនបន្តឹងស្បែកមុខ និងសម្រករាង
– ម៉ាស្សាមុខ
– ម៉ាស្សាព្យាបាលមុខ
– ឡាស៊ែរ បាញ់ជម្រុះរោម
– ថ្នាំចាក់ជំនួយឱ្យស្បែកសភ្លឺថ្លា និងក្មេងជាងវ័យ
– ស៊ីរ៉ូមវីតាមីន ជំនួយសុខភាព និងស្បែក
– ថ្នាំចាក់បំបាត់ភាពជ្រីវជ្រួញ
– ថ្នាំចាក់បំពេញសាច់
– ថ្នាំចាក់ជំនួយសុខភាព និងស្បែក
– វីតាមីនចាក់ជំនួយស្បែកមុខ
– ថ្នាំចាក់បំបាត់សង្វារ
– ថ្នាំចាក់រំលាយខ្លាញ់
– ព្យាបាលសក់ជ្រុះ
– ការចាក់ខ្សែអំបោះ
– សេវាបករោមលើដងខ្លួន និងផ្ទៃមុខជាដើម។
នៅគ្លីនិក Derma Care ក៏មានសេវាកម្មថែរក្សាសម្រស់ ដើម្បីជួយប្រឆាំងនឹងភាពចាស់ជាងវ័យផងដែរ ដោយការប្រឆាំងនឹងភាពចាស់ជាងវ័យនឹងផ្តល់នូវភាពជឿជាក់ដល់លោកអ្នកផ្តល់នូវសុខភាពផ្លូវចិត្តធ្វើឱ្យមានអាយុយឺនយូរព្រោះអាចជួយឱ្យរាងកាយជួសជុលការខូចខាតដែលបណ្តាលមកពីភាពចាស់ និងជួយឱ្យដំណើរការព្យាបាលប្រព្រឹត្តទៅលឿន និងប្រសើរជាងមុន។ ហើយរាល់ការព្រឹក្សា និងវិភាគពីស្ថានភាពស្បែករបស់អតិថិជន គ្លីនិក Derma Care តែងធ្វើការវិភាគឈាមយ៉ាងច្បាស់លាស់ជាមុន ព្រមជាមួយនឹងការព្យាបាល Stemcell, ការព្យាបាលដោយអូហ្សូន, ការព្យាបាលដោយ Colon hydrotherapy, PRP ឬ Stemcell សម្រាប់ការព្យាបាលឆ្អឹង និងសន្លាក់ផងដែរ។ នៅក្នុងគ្លីនិកដ៏ប្រណីតលំដាប់អន្តរជាតិមួយនេះ គឺមានបន្ទប់ពិគ្រោះយោបល់ចំនួន 3ដែលមានភាពធំទូលាយ និងបំពាក់ដោយឧបករណ៍ទំនើបៗនាំចូលពីបរទេស ដើម្បីពិនិត្យស្បែក និងធ្វើការព្យាបាលយ៉ាងត្រឹមត្រូវតាមក្បួនវេជ្ជសាស្រ្តទំនើប ព្រមទាំងបន្ទប់ព្យាបាល និងផ្តល់សេវាកម្មជូនអតិថិជនជាច្រើនទៀត ប្រកបដោយអនាម័យខ្ពស់ និងមានផាសុកភាព។ ហើយម៉ាស៊ីនអេឡិចត្រូនិក និងម៉ាស៊ីនបាញ់ឡាស៊ែររបស់គ្លីនិក Derma Careគឺសុទ្ធសឹងតែជាម៉ាស៊ីនថ្មីបំផុត និងល្អបំផុត ម៉ាក USFDA និងម៉ាក KFDA ដែលជាស្តង់ដាររបស់សហរដ្ឋអាមេរិក អាឡឺម៉ង់ អេស្ប៉ាញ អុីតាលី អុីស្រាអ៊ែល កូរ៉េ និងថៃ ដែលធានាដល់ការព្យាបាលស្បែកប្រកបដោយសុវត្ថិភាព និងទទួលបានប្រសិទ្ភាពដូចបំណងប្រាថ្នា។ គ្លីនិក Derma Care មានក្រុមគ្រូពេទ្យឯកទេសខាងស្បែក និងវេជ្ជបណ្ឌិតដែលមានឯកទេសជំនាញជាជនជាតិខ្មែរ, ថៃ និងកូរ៉េផងដែរ។
ផលិផលថែរក្សាសម្រស់ស្បែក និងព្យាបាលបញ្ហាស្បែកនៅគ្លីនិក Derma Care មានដូចជា ម៉ាក DrGL គឺជាផលិតផលថែរក្សាស្បែកដ៏ល្បីល្បាញរបស់លោកវេជ្ជបណ្ឌិត Dr.GeorgiaLee ដែលមានការទទួលស្គាល់ និងល្បីល្បាញទូទាំងពិភពលោក ស័ក្តិសមសម្រាប់ប្រភេទស្បែករបស់ប្រជនជននៅក្នុងតំបន់អាស៊ី។ ផលិតផលម៉ាក Face Inc គឺជាផលិតផលដំបូងសម្រាប់ស្បែក និងល្អបំផុតសម្រាប់ថែទាំស្បែក ជួយដោះស្រាយបញ្ហាទូទៅនៃស្បែក ដូចជា ស្បែកកើតមុន បំបាត់ស្នាមជាំ សម្រាប់ស្បែកខ្មៅស្រអាប់ និងស្បែកដែលមានស្នាមជ្រីវជ្រួញ ឱ្យស្រស់ស្អាតផូរផង់ឡើងវិញ។
សម្រាប់ព័ត៌មានបន្ថែមសូមទូរស័ព្ទទៅកាន់លេខ 088 606 8888 / 077 606 888 ឬចូលទៅកាន់ទំព័រFacebook: derma-care skin clinic / Instagram : dermacare.kh។
ទទួលបាននូវសម្រស់ស្បែកដ៏ស្រស់ស្អាតជាទីគាប់ចិត្តជាមួយនឹង គ្លីនិក Derma Care កម្ពុជា៕

July 16, 2018
កាសែតឡារ៉ែន ពាណិជ្ជ លេខ 134
[easy_media_download url=”https://www.lareine.com.kh/wp-content/uploads/2018/07/LRPN_134-Final-For-Web.pdf” force_dl=”1″]
July 14, 2018
ឃ្លាំងស្តុក និងឡសម្ងួតស្រូវខ្នាតធំនៅក្នុងខេត្តចំនួន2 ត្រៀមខ្លួនជួយកសិករក្នុងរដូវប្រមូលផល
ឃ្លាំងស្តុក និងឡសម្ងួតស្រូវចំនួន2 ត្រូវបានដាក់សម្ពោធឱ្យប្រើប្រាស់នៅក្នុងខេត្ត2 ផ្សេងគ្នា គឺខេត្តបាត់ដំបង និងខេត្តកំពង់ធំ ដែលឃ្លាំងស្តុកស្រូវ និងឡសម្ងួតទាំង2 នេះនឹងជួយដល់ប្រជាកសិករបានច្រើនក្នុងរដូវប្រមូលផលស្រូវខាងមុខនេះ។
ទី1-ឃ្លាំងស្តុកស្រូវចំនួន 5ម៉ឺនតោន និងឡសម្ងួតស្រូវដែលមានសមត្ថភាពសម្ងួតបាន1,500តោនក្នុងមួយថ្ងៃដែលធំជាងគេនៅក្នុងខេត្តកំពង់ធំ ស្ថិតក្រោមគម្រោងវិនិយោគពិសេសក្នុងទម្រង់ជាបំណុលរបស់រាជរដ្ឋាភិបាលកម្ពុជាជាមួយក្រុមហ៊ុនអេមរុរ៉ាយស៍(ខេមបូឌា) ខូអិលធីឌី តាមរបៀប“សាងសង់ប្រតិបត្តិការ-និងទូទាត់សំណង”(B.O.P.=Build, operate, and pay compensation)ក្នុងតម្លៃសរុបចំនួន 5លានដុល្លារអាមេរិកត្រូវបានដាក់ឱ្យដំណើរការនៅក្នុងខេត្តកំពង់ធំ។
ទី2-ឃ្លាំងស្តុកស្រូវដែលអាចស្តុកស្រូវបាន20ម៉ឺនតោន និងឡសម្ងួតដែលមានសមត្ថភាពសម្ងួតស្រូវបាន 3ពាន់តោនក្នុង1ថ្ងៃ ដែលជាឃ្លាំងស្តុកស្រូវ និងឡសម្ងួតខ្នាតធំជាងគេនៅកម្ពុជាស្ថិតក្រោមគម្រោងវិនិយោគពិសេសក្នុងទម្រង់ជាបំណុលរបស់រាជរដ្ឋាភិបាលកម្ពុជាជាមួយក្រុមហ៊ុនធនាគារស្រូវ (កម្ពុជា) ភីអិលស៊ី តាមរបៀប“សាងសង់-ប្រតិបត្តិការ-និងទូទាត់សំណង” (B.O.P) ក្នុងតម្លៃសរុបចំនួន 15លានដុល្លារអាមេរិកត្រូវបានដាក់ឱ្យដំណើរការនៅក្នុងខេត្តបាត់ដំបង។
លោក រស់ សីលវ៉ា អនុរដ្ឋលេខាធិការក្រសួងសេដ្ឋកិច្ច និងហិរញ្ញវត្ថុបានថ្លែងថា៖ “ឃ្លាំងស្តុកស្រូវរបស់ក្រុមហ៊ុន អេមរុរ៉ាយស៍ (ខេមបូឌា) ខូអិលធីឌី គឺជាសមិទ្ធផលថ្មីរបស់រាជរដ្ឋាភិបាលសម្រាប់ជាមជ្ឈមណ្ឌលប្រមូលទិញស្រូវ និងកិនកែច្នៃស្រូវ-អង្ករដែលមានលទ្ធភាពប្រមូលទិញស្រូវមួយភាគធំនៅក្នុងតំបន់ខេត្តកំពង់ធំ និងខេត្តព្រះវិហារ ពិតជារួមចំណែកយ៉ាងមានប្រសិទ្ធភាពដើម្បីដោះស្រាយបញ្ហាកង្វល់របស់កសិករ ជាពិសេសការធ្លាក់ចុះនៃតម្លៃស្រូវដោយគ្មានហេតុផល”។
លោកបន្តថា យន្តការអន្តរាគមន៍របស់រាជរដ្ឋាភិបាលដែលបានដាក់ចេញជាបន្តបន្ទាប់តាមរយៈធនាគារអភិវឌ្ឍន៍ជនបទ ជាប្រតិបត្តិការអនុវត្តគម្រោងឃ្លាំងស្តុក និងឡសម្ងួតស្រូវដែលនឹងបង្កើនការប្រមូលទិញស្រូវក្នុងបរិមាណច្រើន និងងាយស្រួលក្នុងការគ្រប់គ្រងស្តុកស្រូវនៅក្នុងតំបន់សំខាន់ៗ និងធ្វើឱ្យតម្លៃស្រូវរបស់កសិករល្អប្រសើរឡើងទៀតផង ជាពិសេសតម្លៃស្រូវសែនក្រអូបបានកើនឡើងដល់ប្រមាណ 1,200រៀល/គីឡូក្រាមនារដូវប្រមូលផលឆ្នាំ2017-2018 បើធៀបនឹងអំឡុងពេលដូចគ្នាកាលពីឆ្នាំមុនដែលបានប្រមាណតែ 900រៀល/គីឡូក្រាមប៉ុណ្ណោះ។
លោក កៅ ថាច អគ្គនាយកនៃធនាគារអភិវឌ្ឍន៍ជនបទ RDB(Rulral Development Bank of Cambodia)បានបញ្ជាក់ថា ដោយមានការគាំទ្រពីរាជរដ្ឋាភិបាល និងក្រសួងសេដ្ឋកិច្ច និងហិរញ្ញវត្ថុ តាមរយៈធនាគារអភិវឌ្ឍន៍ជនបទ បានធ្វើការទម្លាក់ឥណទានជាបន្តបន្ទាប់ដល់ក្រុមហ៊ុនប្រមូលទិញស្រូវ និងរោងម៉ាស៊ីនកិនស្រូវដើម្បីធ្វើការទិញស្រូវពីបងប្អូនប្រជាកសិករតាមតម្លៃទីផ្សារ ហើយតាមរយៈយន្តការនេះបានធ្វើឱ្យទីផ្សារស្រូវ និងតម្លៃស្រូវរបស់បងប្អូនមានស្ថិរភាព និងមានតម្លៃតាមស្តង់ដារឡើងវិញ។ ទន្ទឹមនេះ ដើម្បីដោះស្រាយលើបញ្ហាឃ្លាំងស្តុកស្រូវ និងឡសម្ងួតស្រូវខ្នាតធំ រាជរដ្ឋាភិបាលបានដាក់ចេញនូវយន្តការអន្តរាគមន៍ពិសេសក្នុងទម្រង់ជាបំណុល ដោយអនុញ្ញាតឱ្យវិស័យឯកជនទទួលគម្រោងធ្វើប្រតិបត្តិការសាងសង់ឃ្លាំងស្តុកស្រូវ និងឡសម្ងួតស្រូវ ដែលមានសមត្ថភាពគ្រប់គ្រាន់ក្នុងការស្រូបយកស្រូវរបស់បងប្អូននៅក្នុងតំបន់។
លោកសុង សារ៉ន អគ្គនាយកក្រុមហ៊ុនអេមរុរ៉ាយស៍បានថ្លែងប្រាប់ឡារ៉ែនថា ការដែលឃ្លាំងស្តុក និងឡសម្ងួតស្រូវនៅខេត្តកំពង់ធំមានទំហំតូចជាងឡសម្ងួត និងឃ្លាំងស្តុកនៅខេត្តបាត់ដំបងនោះ គឺទី1-ដោយសាររដ្ឋាភិបាលកំណត់តំបន់ គឺនៅតំបន់នេះការប្រមូលផលពីកសិករនឹងគ្រប់គ្រាន់សម្រាប់ទំហំឃ្លាំង និងឡសម្ងួតដែលបានដាក់ឱ្យប្រើប្រាស់នេះ។ ដូច្នេះយើងជាក្រុមហ៊ុនឯកជន ត្រូវអនុវត្តទៅតាមគម្រោងថវិការបស់រដ្ឋាភិបាល។ ទោះជាមានទំហំតូចជាងឡ និងឃ្លាំងនៅបាត់ដំបងមែន តែឡ និងឃ្លាំងនៅកំពង់ធំរបស់អេមរុរ៉ាយស៍នេះជាប់លេខរៀងទី2 ដែរ។
លោក សារ៉ន បានបន្តថា ការទទួលបានសមិទ្ធផលនេះ អេមរុរ៉ាយស៍មានក្តីរីករាយច្រើន៖ ទី1-ដោយសារឡ និងឃ្លាំងនេះមានបំពាក់បច្ចេកវិទ្យាទំនើបចុងក្រោយដែលមានលក្ខណៈស្វ័យប្រវត្តិ សូម្បីតែទូរស័ព្ទស្មាតក៏អាចចុចបញ្ជាបានដែរ។ ទី2-ការដែលឡសម្ងួតមានលក្ខណៈទំនើប គឺជួយកាត់បន្ថយថ្លៃដើមដោយមិនប្រើពលកម្មមនុស្សច្រើន។ ទី3-ជាការជួយរក និងបង្កើតទីផ្សារឱ្យកសិករមិនចាំបាច់ឱ្យគាត់ទៅលក់ដល់ប្រទេសថៃ ឬវៀតណាមទេ គឺយើងមានទីផ្សារនៅក្បែរគាត់។ ទី4-យើងបង្កើតក្រុមសហគមន៍ផលិត(មានជាង 50សហគមន៍)ដែលគាត់ផលិត រួចលក់ឱ្យឡសម្ងួតយើងដែលបច្ចុប្បន្នមាន 1ម៉ឺនគ្រួសារ និងគ្រោងបង្កើនឱ្យបាន10ម៉ឺនគ្រួសារ ដែលអាចផ្គត់ផ្គង់ការផលិតស្រូវមកឡសម្ងួតចំនួន 20ម៉ឺនតោនក្នុង1ឆ្នាំ(ដែលមួយឆ្នាំយើងអាចប្រមូលផលបាន 3ដង)។
ដោយឡែកឃ្លាំងស្តុកស្រូវទំហំ 200,000តោន និងឡសម្ងួតដែលមានសមត្ថភាពសម្ងួតស្រូវ3000តោនក្នុង1ថ្ងៃ ដែលជាឃ្លាំងស្តុកស្រូវ និងឡសម្ងួតខ្នាតធំជាងគេនៅកម្ពុជាដែលមានតម្លៃសរុបចំនួន 15លានដុល្លារអាមេរិកដែលមានលទ្ធភាពប្រមូលទិញស្រូវមួយភាគធំនៅតំបន់ភាគខាងលិចនៃប្រទេសក៏បានប្រកាសដាក់ឱ្យដំណើរការជាផ្លូវការដែរ ដោយលោក ជូ គឹមឡេង រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ។
លោក រដ្ឋលេខាធិការបានលើកទឹកចិត្តដល់វិស័យឯកជនឱ្យពង្រីកឃ្លាំងស្តុក និងឡសម្ងួតស្រូវឱ្យបានកាន់តែធំ និងមានលក្ខណៈស្តង់ដារក្នុងការរក្សាទុកស្រូវ-អង្ករឱ្យមានគុណភាពល្អ សំដៅធានាបាននូវស្ថិរភាពថ្លៃស្រូវ-អង្ករសម្រាប់បងប្អូនប្រជាកសិករ និងបម្រុងទុកស្រូវ-អង្ករគ្រប់គ្រាន់សម្រាប់បម្រើឱ្យការនាំចេញប្រកបដោយនិរន្តរភាពស្របតាមគោលនយោបាយរបស់រាជរដ្ឋាភិបាលក្នុងការនាំអង្ករចេញ1លានតោន។
យោងទៅលើសមិទ្ធផលទាំង2 នេះ ប្រជាកសិករក្នុងតំបន់នឹងធានារក្សាបាននូវតម្លៃស្រូវតាមទីផ្សារសម្រាប់រយៈពេលវែង និងដោះស្រាយបញ្ហាកង្វល់លើការខូចខាតស្រូវរបស់បងប្អូនបានទៀតផងហើយក្នុងនោះរួមទាំងការកាត់បន្ថយថ្លៃដើមផលិត និងតម្លៃដឹកជញ្ជូនរបស់កសិករមកកាន់ទីផ្សារទៀតផង៕
July 14, 2018
វិធីមើលថែទាំស្បែកក្នុងរដូវភ្លៀង
មួយរយៈនេះធាតុអាកាសងងឹតស្រទុំ ថ្ងៃខ្លះមានទាំងភ្លៀងធ្លាក់មកខ្លាំងទៀតផង ព្រះអាទិត្យមិនសូវជាបង្ហាញខ្លួនឱ្យឃើញដូចពេលរដូវក្តៅប៉ុន្មានទេ នារីៗជាច្រើននាំគ្នារអ៊ូរទាំពីភាពសើមប៉ប៉ិកប៉ប៉ាក់របស់ស្បែក និងបញ្ហាស្បែកដែលកើតឡើង ដូច្នេះថ្ងៃនេះ ឡារ៉ែន មានគន្លឹះល្អៗក្នុងការមើលថែទាំស្បែកស្អាតៗរបស់អ្នកក្នុងរដូវភ្លៀងបែបនេះមកជម្រាបជូនដូចខាងក្រោម៖
ធាតុអាកាសដែលអុកមម៉ុកងងឹតស្រទុំបែបនេះ មនុស្សជាច្រើនតែងយល់ច្រឡំថា មិនចាំបាច់ប្រើគ្រីមការពារកម្តៅថ្ងៃទេ ព្រោះមិនសូវមានពន្លឺថ្ងៃក្តៅខ្លាំងប៉ុន្មានឡើយ ថែមទាំងខ្លាចថា ស្បែកនឹងឡើងស្អិតប៉ប៉ិកប៉ប៉ាក់ទៀតផង តែការពិតវិញ ទោះជាគ្មានពន្លឺព្រះអាទិត្យមែន តែនៅក្នុងអំឡុងពេលថ្ងៃ ក៏នៅតែមានកាំរស្មី UV ដែលយើងមើលមិនឃើញចូលមកបំផ្លាញស្រ-ទាប់ស្បែកខាងក្នុង ដែលនាំឱ្យមានបញ្ហាស្លាកស្នាមមុនអាយុដែរ និងរួមទាំងកាំរស្មី UV ដែលចេញមកពីឧបករណ៍អគ្គិសនីទាំងឡាយដូចជាកុំព្យូទ័រ និងអំពូលភ្លើងជាដើម ដូច្នេះបើអ្នកធ្វេសប្រហែសមិនលាបគ្រីមការពារពន្លឺថ្ងៃនៅថ្ងៃណាមួយនោះ វាដូចជាការបើកឱកាសឱ្យកាំរស្មី UV ចូលមកដុតបំផ្លាញស្បែកដូច្នោះដែរ។ ឡារ៉ែន សូមណែនាំថា គួរជ្រើសរើសប្រើគ្រីមការពារពន្លឺថ្ងៃណាដែលអាចការពារបានទាំងកាំរស្មី UVA, UVB និងអនុមូលឥស្សរៈរៀងរាល់ពេលព្រឹកដោយជ្រើសរើសយករូបមន្តការពារទឹក មិនស្អិតប៉ប៉ិកប៉ប៉ាក់ស្បែកដែលនាំឱ្យរំខានចិត្ត។
ចំណែកនារីៗដែលត្រូវតុបតែងមុខទៅធ្វើការរៀងរាល់ថ្ងៃវិញ យើងសូមណែនាំថា គួរជ្រើស-រើសប្រើម្សៅ មេកអាប់ដែលមានរូបមន្តការពារទឹក ជាពិសេសបរិវេណកែវភ្នែក មិនដូច្នេះទេអាចនឹងបានក្លាយទៅជាភ្នែកខ្លាឃ្មុំភែនដាមិនខានហើយនៅពេលល្ងាចត្រូវលាងគ្រឿងសម្អាងឱ្យស្អាតហ្មត់ចត់ផង ព្រោះនៅក្នុងរដូវភ្លៀងងាយនឹងកើតមុនណាស់។ សម្អាតដោយឃ្លីនស៊ីងលាងគ្រឿងសម្អាង និងជ្រើសរើសប្រើហ្វូមលាងមុខណាដែលមិនធ្វើឱ្យស្បែកមុខស្ងួតក្រៀម។ បន្ទាប់ពីលាងសម្អាតផ្ទៃមុខហើយ អ្នកគួរជូតសម្អាតដោយថូននើរ៍ ដើម្បីសម្រួលសភាពស្បែកដែលអាចជ្រើសរើសប្រើបែបរូបមន្តកម្ចាត់សារធាតុពុលដែលនៅសេសសល់នៅលើផ្ទៃមុខ (Detoxifying Toner) ដើម្បីឱ្យស្បែកសម្រួលតុល្យភាព និងកម្ចាត់សារធាតុអនុមូលឥស្សរៈ ដើម្បីភាពស្រស់បស់ និងកាត់បន្ថយការកើតមុនពីកាកសំណល់ដែលនៅសេសសល់លើផ្ទៃមុខ និងបញ្ចប់ដោយការលាបគ្រីមថែបំប៉នស្បែកនៅពេលយប់ឱ្យនៅតែស្រស់ស្អាតសម្រាប់ព្រឹកថ្ងៃស្អែក។
ក្រៅពីនេះ មិនត្រូវបណ្តែតបណ្តោយក្នុងការមើលថែទាំសុខភាពរាងកាយ ដើម្បីឱ្យស្បែកស្អាតចេញមកពីខាងក្នុង ដោយការគេងសម្រាកឱ្យបានគ្រប់គ្រាន់ បរិភោគអាហារដែលមានគុណប្រយោជន៍ ដោយអាចទទួលទានវីតាមីន និងសារធាតុអំបិលរ៉ែ រួមទាំងការហាត់ប្រាណជាប់ជាប្រចាំ ហើយដែលសំខាន់នោះគឺគួរទទួលទានទឹកស្អាតក្នុងមួយថ្ងៃឱ្យបាន8-10កែវ ដោយក្រេបតិចៗជាប់រហូតពេញមួយថ្ងៃ ដើម្បីរក្សាភាពស្រស់បស់របស់ស្បែក៕
July 13, 2018
វត្ថុតុបតែងផ្ទះបង្កើនជោគលាភ បន្ថែមសេចក្ដីសុខក្នុងគ្រួសារ
និយាយពីការរៀបចំតុបតែងផ្ទះមកច្រើនលេខហើយ ថ្ងៃនេះ ឡារ៉ែន សូមនិយាយអំពីវត្ថុសិរីមង្គលក្នុងការយកមកដាក់តាំងលម្អនៅក្នុងផ្ទះ ដើម្បីបង្កើនសេចក្ដីសុខ បន្ថែមលាភសំណាងឱ្យក្រុមគ្រួសារចម្រុងចម្រើនរុងរឿងវិញម្ដង។
ការជ្រើសរើសវត្ថុតុបតែងលម្អផ្ទះ ជាទូទៅច្រើនតែជ្រើសរើសតាមការនិយមចូលចិត្ត និងឡៃហ្វ៍ស្តាយល៍របស់បុគ្គលម្នាក់ៗ ឬអ្នកខ្លះអាចនឹងជ្រើសរើសតាមស្តាយល៍របស់ផ្ទះ ដើម្បីឱ្យវត្ថុតុបតែងលម្អ និងផ្ទះមើលទៅស៊ីគ្នា ខណៈពេលជាមួយគ្នា អ្នកខ្លះក៏ជ្រើសរើសក្នុងការតុប-តែងដោយការរកវត្ថុសិរីមង្គលមកដាក់តាំង ដើម្បីបង្កើនទ្រព្យ បង្កើនបារមី ទាំងតាមជំនឿដែលជឿតៗគ្នាមក និងតាមជំនឿតាមសាស្រ្តាហុង-ស៊ុយ។ អត្ថបទខាងក្រោមនេះ ឡារ៉ែន សូមណែ-នាំមិត្តអ្នកអានទៅស្គាល់វត្ថុតុបតែងផ្ទះ ដែលមិនត្រឹមតែផ្ដល់នូវភាពស្រស់ស្អាតប៉ុណ្ណោះទេតែនៅមានអត្ថន័យល្អទៀតផង ដោយវត្ថុនីមួយៗបានទទួលនូវការនិយមយកមកដាក់តាំងលម្អផ្ទះជាយូរមកហើយ ដូច្នេះតើវត្ថុតុបតែងលម្អទាំងនោះមានអត្ថន័យអ្វីបង្កប់ខ្លះនោះ សូមអានជាបន្ត។
1. តុក្កតាឆ្មាបក់ដៃ
ម៉ានេគិ នេកុ ឬឆ្មាបក់ដៃ រូបចម្លាក់ឆ្មាតុក្កតាមុខមាត់គួរឱ្យស្រឡាញ់ គឺជារឿងតំណាលបុ-រាណរបស់វត្ត Gotokuji ក្នុងប្រទេសជប៉ុន។ ជនជាតិជប៉ុនជឿថា ឆ្មាគឺជាសត្វនាំលាភសំណាងជួយទាក់ទាញអតិថិជន និងភាពមានបាន។ ជំនឿដែលថានេះ មានឥទ្ធិពលលើមនុស្សម្នាទូទាំងពិភពលោក អ្នកទេសចរដែលមានឱកាសបានទៅលេងប្រទេសជប៉ុននិយមទិញឆ្មាបក់ដៃនេះមកដាក់តាំងលម្អផ្ទះដើម្បីបង្កើនលាភសំណាង និងបារមី។ក្រៅពីរូបចម្លាក់ឆ្មាហើយ ពណ៌ និងលក្ខណៈអាកប្បកិរិយារបស់ឆ្មាបក់ដៃនៅបានប្រាប់អំពីអត្ថន័យដែលផ្សេងៗពីគ្នាទៀតផង ដូចជា ឆ្មាបក់ដៃពណ៌សនឹងនាំមកនូវសេចក្ដីសុខ ឆ្មាបក់ដៃពណ៌ខ្មៅនឹងជួយការពារការឈឺថ្កាត់ ពណ៌បៃតង និងខៀវនឹងនាំមកនូវភាពជោគជ័យលើការងារ ពណ៌ក្រហមនឹងជួយការពាររឿងអាក្រក់ចង្រៃ ពណ៌មាសនឹងនាំមកនូវភាពមានបាន និងស្ថិតស្ថេរ ពណ៌ផ្កាឈូកជួយទាក់ទាញសេចក្ដីស្រឡាញ់ឱ្យចូលមកក្បែរខ្លួន។ អ្នកណាដែលចង់បង្កើនផ្នែកណាមួយដល់ជីវិត សាកល្បងរកឆ្មាបក់ដៃតាមពណ៌នីមួយៗមកដាក់តាំងលម្អផ្ទះបាន។
2. រូបតុក្កតាក្រុមគ្រួសារ
ផ្ទះដែលកក់ក្ដៅ ជាផ្ទះដែលមានសមាជិកក្នុងក្រុមគ្រួសាររស់នៅជួបជុំគ្នា តែសម្រាប់អ្នកនៅលីវដែលចាំបាច់ត្រូវបែកគ្រួសារ និងរស់នៅក្នុងផ្ទះតែម្នាក់ឯង បើត្រូវការគូជីវិត ឬចង់ចាប់ផ្ដើមកសាងគ្រួសារថ្មីនោះ “តុក្កតាក្រុមគ្រួសារ” គឺជាវត្ថុតុបតែងផ្ទះដែលនឹងជួយជំរុញឱ្យឆាប់បានលែងនៅលីវ ព្រោះការដាក់តាំងវត្ថុតុបតែងលម្អ ដែលបង្ហាញពីអត្ថន័យទៅដល់ក្រុមគ្រួសារនឹងធ្វើឱ្យមានអារម្មណ៍កក់ក្ដៅក្នុងចិត្ត បង្ហាញពីភាពត្រៀមរួចជាស្រេចក្នុងការមានគ្រួសារ។ ថាមពលទាំងអស់នេះនឹងជំរុញឱ្យកាន់តែឆាប់បានជួបគូជីវិតខ្លាំងឡើង។ ចំណែកផ្ទះណាដែលមានក្រុមគ្រួសាររស់នៅជួបជុំគ្នាស្រាប់ហើយ រូបចម្លាក់ក្រុមគ្រួសារនៅមានន័យពីសាមគ្គីភាព និងក្ដីស្រឡាញ់យ៉ាងស្អិតល្មួតទៀតផង។
3 សត្វកុកពណ៌ផ្កាឈូក (Flamingo)
សត្វកុកពណ៌ផ្កាឈូក ជាសត្វសិរីមង្គលដែលមានអត្ថន័យល្អស្មើនឹងសត្វនាគ និងសត្វតោដែរ ជាយានជំនិះរបស់អាទិទេពនៃភាពគង់វង្ស។ ជនជាតិចិនជឿថា បើមានរូបភាព ឬរូបចម្លាក់សត្វកុកពណ៌ផ្កាឈូកនៅក្នុងផ្ទះ នឹងជួយបង្កើនឱ្យសុខភាពរឹងប៉ឹង អ្នករស់នៅក្នុងផ្ទះអាយុវែង និងអត្ថន័យមួយទៀតគឺ មានភាពចម្រើនរុងរឿង ឬព្រេងវាសនា មុខនាទីការងារទៅមុខល្អរលូន និងបង្កើនការរៀនសូត្រឱ្យល្អ។ នៅពេលចង់ជូនពរឱ្យនរណាម្នាក់មានសុខភាពអាយុយឺនយូរ គេច្រើនតែយករូបភាព ឬរូបចម្លាក់សត្វកុកពណ៌ផ្កាឈូកទៅជូនជាវត្ថុអនុស្សាវរីយ៍។
4. ត្រីមួយគូ
ទីណាខ្វះសេចក្ដីស្រឡាញ់ និងគ្មានភាពសាមគ្គី ក៏ពិបាកនឹងមានសេចក្ដីសុខបានណាស់ដូច្នេះហើយទើបបើចង់បង្កើនជោគលាភសំណាង និងសេចក្ដីសុខ ត្រូវសាងសេចក្ដីស្រឡាញ់ និងសាមគ្គីភាពជាមុនសិន។ ការរៀបចំហុងស៊ុយផ្ទះបែបចិន គេនិយមប្រើប្រើសត្វត្រីជាវត្ថុជួយបង្កើនរឿងរបស់សម្ព័ន្ធភាពក្នុងក្រុមគ្រួសារ ជាថាមពលវិជ្ជមានឱ្យសមាជិកក្នុងក្រុមគ្រួសារស្រឡាញ់ចូលចិត្តគ្នាជាធ្លុងមួយ រស់នៅរួមគ្នាយ៉ាងស្រុះស្រួលដូចត្រីដែលតែងតែអាស្រ័យនៅជាគូៗ ជាហ្វូងៗ ឆ្លុះបញ្ចាំងឱ្យឃើញពីសេចក្ដីស្រឡាញ់ដែលត្រីទាំងពីរក្បាលមានចំពោះគ្នា និងឆ្លុះបញ្ចាំងឱ្យឃើញនូវគុណតម្លៃរបស់សម្ព័ន្ធភាពរបស់មនុស្សនៅក្នុងក្រុមគ្រួសារហ្នឹងឯង៕
July 13, 2018
ដាំដើមស្រកានាគងាយស្រួលថែទាំ និងមានអតិថិជនគាំទ្រច្រើននៅលើទីផ្សារ
ស្រកានាគជាប្រភេទដំណាំហូបផ្លែដែលកសិករចាប់ផ្តើមដាំដុះកាន់តែច្រើនឡើងៗនៅក្នុងប្រទេសកម្ពុជា ដោយសារដំណាំប្រភេទនេះកសិករងាយស្រួលថែទាំ ផ្តល់ផលយូរឆ្នាំ និងមានការគាំទ្រនៅលើទីផ្សារ។
លោក ឈិន ហុកថៃ កសិករដាំដើមស្រកានាគនៅក្នុងភូមិអូរបេង ឃុំមេសជ្រៃ ស្រុកស្ទឹងត្រង់ ខេត្តកំពង់ចាម មានប្រសាសន៍ថា លោកទើបតែចាប់ផ្តើមដាំស្រកានាគនៅលើផ្ទៃដីប្រមាណជា1ហិកតាក្នុងរយៈពេល 2ឆ្នាំមុននេះប៉ុណ្ណោះប៉ុន្តែស្រកានាគចាប់ផ្តើមឱ្យផលជាបណ្តើរៗហើយ ដោយក្នុងមួយគុម្ពអាចបេះផ្លែបានចំនួន 5គីឡូក្នុងរយៈពេលមួយឆ្នាំ “ស្រកា-នាគឱ្យផលតាំងពីមួយឆ្នាំដំបូងមកម៉្លេះប៉ុន្តែដំបូងឡើង វាឱ្យផលតិចតួចប៉ុណ្ណោះរហូតដល់ឆ្នាំទី2 ទើបវាចេញផ្លែច្រើនទៅៗលុះដល់់អាយុ 3ឆ្នាំ វាចាប់ផ្តើមឱ្យផ្លែពេញលេញតែម្ដង ដោយក្នុងមួយគុម្ពៗគេអាចប្រមូលផលបានចំនួន 20គីឡូក្រាម ឬលើសហ្នឹងទៅទៀតក្នុងមួយឆ្នាំ”។
ស្រកានាគផ្តល់ផលទាំងរដូវប្រាំង និងរដូវវស្សា ប៉ុន្តែវានឹងផ្លែច្រើននៅពេលដែលមានភ្លៀងធ្លាក់ខ្លាំង គឺចាប់ពីខែឧសភា រហូតដល់ខែតុលា ទើបវាចាប់ផ្តើមធ្លាក់ទិន្នផលចុះទៅវិញបន្តិចម្តងៗ ហើយបើកសិករនៅតែបន្តស្រោចទឹក វាក៏នៅតែផ្តល់ផលបន្តទៀត គ្រាន់តែមានចំនួនតិចតួចប៉ុណ្ណោះ។ លោកបន្តថា ក្រោយពីប្រមូលផលហើយ ផ្លែស្រកានាគខ្មែរមានម៉ូយមកទទួលទិញជាប្រចាំដល់ចម្ការតែម្តង ដោយក្នុងមួយគីឡូក្រាមបោះដុំបានតម្លៃ4,000រៀល ទៅ5,000រៀល ហើយគេយកទៅបោះដុំបន្តនៅលើទីផ្សារក្នុងតម្លៃ7,000រៀល ទៅ8,000រៀល និងម៉ូយយកទៅលក់រាយបន្តទៀតមួយគីឡូតម្លៃ10,000រៀល ទៅ12,000រៀល តាមតូចតាមធំ “ការលក់បានថ្លៃ ហើយមានម៉ូយទិញច្រើននេះ ដោយសារស្រកានាគខ្មែរដាំដុះតាមរបៀបធម្មជាតិមិនប្រើថ្នាំគីមី ហើយរសជាតិរបស់វាផ្អែមឆ្ងាញ់ ខុសពីស្រកានាគនាំចូលពីក្រៅប្រទេស ដូចជាស្រកានាគនាំមកពីវៀតណាម ឬថៃ”។
សម្រាប់បច្ចេកទេសដាំដុះ កសិករខាងលើបានផ្តល់មតិយោបល់ចែករំលែកថា មុននឹងដាំកសិករអាចភ្ជួរដីឱ្យងាប់ស្មៅជាមុនសិនក៏បាន ឬមិនបាច់ភ្ជួរដីជាមុនក៏បាន ដោយគ្រាន់តែដាំបង្គោលចម្ងាយពីគ្នា 3ម៉ែត្រ 4ជ្រុងស្មើៗគ្នាពីមួយគុម្ពទៅមួយគុម្ព ពេលដាំបង្គោលរួចហើយគេចាប់ផ្តើមជ្រំដីជុំវិញបង្គោលនោះ រួចកាច់ដើមស្រកានាគមកដោតដាំចំនួន 3 ទៅ4ដើមក្នុងមួយគុម្ព។ លុះដាំរួច កសិករត្រូវដាក់ជីបំប៉នកូនដើមស្រកានាគជាលើកដំបូង ហើយស្រោចទឹកដើម្បីឱ្យកូនស្រកានាគលូតលាស់បានល្អ នៅពេលស្រកានាគលូតលាស់ចាប់ឫសតោងបង្គោលឡើងហើយ គេអាចស្រោចទឹកក៏បាន ឬមិនបាច់ស្រោចទឹកក៏បាន ព្រោះថា ដើមស្រកានាគនេះធន់នឹងកម្តៅ និងមិនសូវត្រូវការទឹកនោះទេ ទោះជារដូវប្រាំងខ្លាំងក៏ដោយ តែវាក៏ចាញ់ទឹកដែរ ពិសេសគេមិនដែលដាំនៅលើដីដែលជាវាលបាតទំនាបទេ ព្រោះអាចនឹងមានដក់ទឹកពេលភ្លៀងធ្លាក់ខ្លាំង ធ្វើឱ្យដើមស្រកានាគរលួយងាប់ដើមអស់។
ស្រកានាគផ្តល់ផលយូរឆ្នាំចន្លោះពី15 ទៅ20ឆ្នាំ រស់បានយូរដូចដើមដំបងយក្សដែរ ប៉ុន្តែទុកយូរឆ្នាំពេកវានឹងដុះស៊ុបទ្រុបឡើងខ្លាំង ដែលពេលនោះគេត្រូវកាប់ឆ្ការរំលាយចោលដើម្បីរៀបចំការដាំដុះសាជាថ្មីឡើងវិញ។
ដោយសារឃើញពីតម្រូវការទីផ្សារផ្លែស្រកានាគធម្មជាតិនេះកើនឡើងខ្លាំងទើបកសិករនៅក្នុងឃុំមេសជ្រៃ ចាប់ផ្តើមដាំដើមស្រកានាគនេះកាន់តែច្រើនឡើងៗ និងដោយសារតែទីតាំងខាងលើជាប្រភេទដីក្រហមមានជីវជាតិខ្លាំង ដូច្នេះមិនបាច់ប្រើជី ក៏វាផ្តល់ផលអាចបេះផ្លែលក់ រកចំណូលបន្ថែមសម្រាប់ផ្គត់ផ្គង់ជីវភាពក្នុងគ្រួសារឱ្យកាន់តែប្រសើរឡើងៗបានដែរ៕
July 13, 2018
អនាគត ម៉ាស៊ីននឹងដណ្ដើមការងារមនុស្ស ហេតុនេះគ្រប់គ្នាត្រូវរៀន ជំនាញមួយចំនួនដើម្បីរក្សាលំនឹង
បច្ចុប្បន្ននេះ មនុស្សចាប់ផ្តើមប្រើប្រាស់ម៉ាស៊ីនកាន់តែច្រើនឡើងដើម្បីជំនួសការងាររបស់ខ្លួន ហើយការងារទាំងឡាយណាដែលមនុស្សអាចធ្វើដដែលៗ នឹងត្រូវជំនួសដោយគ្រឿងយន្តបំពាក់បច្ចេកវិទ្យា AI ទាំងស្រុងនៅថ្ងៃអនាគត។
ការងាររាប់លាននឹងត្រូវលុបបំបាត់ តែទោះជាយ៉ាងនេះក្តី ការងារជាច្រើនក៏នឹងកើតថ្មីបន្ថែមទៀតផងដែរ ដែលវាទាមទារឱ្យមនុស្សគ្រប់គ្នាត្រូវតែត្រៀមលក្ខណៈឱ្យបានល្អប្រសើរដើម្បីសិក្សាស្វែងយល់ពីតម្រូវការរបស់មនុស្សក្នុងពិភពការងារនៅថ្ងៃអនាគត។
ក្នុងកាលៈទេសៈនៃទីផ្សារការងារកំពុងប្រឈមនឹងបញ្ហានេះ មនុស្សជាច្រើនបានដាក់សំណួរថាតើមនុស្សគួរធ្វើអ្វីខ្លះដើម្បីដើរឱ្យទាន់សេដ្ឋកិច្ចដែលបានបត់បែនយ៉ាងលឿន ហើយយើងទាំងអស់គ្នាគួររៀបចំខ្លួនយ៉ាងណាដើម្បីរក្សាតម្លៃនៃជំនាញ ដែលយើងមានសម្រាប់ឈរជើងក្នុងពិភពលោកដែលកំពុងតែជំនួសដោយម៉ាស៊ីននេះ?
ដើម្បីដោះស្រាយបញ្ហាទាំងនេះអ្នកជំនាញការងារ និងព័ត៌មាន Guthrie Jensen បានបង្ហាញពីជំនាញមួយចំនួនដែលពិភពលោកត្រូវការសម្រាប់ឆ្នាំ2020 ខាងមុខនេះ ដែលជំនាញទាំងអស់នោះជាផ្នែកដែលម៉ាស៊ីនធ្វើមិនកើត ហើយយើងអាចនឹងក្លាយជាអ្នកគ្រប់គ្រងលើម៉ាស៊ីនទៅវិញ។ នៅពេលនោះវានឹងលែងក្លាយជាបញ្ហាទៀតហើយសម្រាប់អ្នកដែលអាចចាប់ឱកាសអភិវឌ្ឍសមត្ថ-ភាពសម្រាប់ពិភពលោកក្នុងយុគសម័យបច្ចេក-វិទ្យានេះ។
អ្នកជំនាញដដែលបានបង្ហាញផងដែរថា បដិវត្តន៍ឧស្សាហកម្មលើកទី4នេះ នឹងមានការប្រែប្រួលខ្លាំងលើអ្វីដែលមានស្រាប់ក្រោយពីមានបដិវត្តន៍ឧស្សាហកម្មលើកទី3 ដូចជាបច្ចេកវិទ្យា AI នឹងជំរុញឱ្យការងារទាំងឡាយដែលធ្លាប់ប្រើប្រាស់មនុស្ស រួមទាំងការឆ្លើយឆ្លងព័ត៌មានតាមទូរស័ព្ទផងដែរ។ ចំណែកឯប្រព័ន្ធនៃការធ្វើអាជីវកម្ម ទិញទំនិញ និងគ្រប់គ្រងរបស់របរតាមប្រព័ន្ធអុីនធើណិតហើយសេវាដឹកជញ្ជូនអាចនឹងប្រើប្រាស់ដោយប្រព័ន្ធគ្រប់គ្រងយានយន្តគ្មានមនុស្សបើក ស្របពេលដែលប្រព័ន្ធថាមពលក៏ត្រូវបានគេយកចិត្តទុកដាក់ដោយការប្រើប្រាស់ឡើងវិញផងដែរ។ ចំពោះប្រព័ន្ធវេជ្ជសាស្ត្រក៏នឹងត្រូវគ្រប់គ្រងដោយបច្ចេកវិទ្យា (nanotechnology) ដោយក្នុងនោះការវះកាត់ក៏នឹងអាចធ្វើឡើងដោយគ្រឿងម៉ាស៊ីនដែរ។ លើសពីនេះទៅទៀត វិស័យកសិកម្មក៏ប្រើប្រាស់បច្ចេកវិទ្យាគ្រប់គ្រងផងដែរ ខណៈពេលបច្ចុប្បន្ននេះប្រព័ន្ធមើលដំណាំនាពេលបច្ចុប្បន្នត្រូវបានគេប្រើប្រាស់ Drone និងឧបករណ៍ទំនើបដែលអាចតាមដានបានដោយប្រើប្រាស់ Mobile Apps។
ប្រឈមជាមួយនឹងបញ្ហានេះ អ្នកដែលកំពុងធ្វើការងារលើជំនាញនាពេលបច្ចុប្បន្នទាំងផ្នែកវេជ្ជសាស្ត្រ កសិកម្ម ការដឹកជញ្ជូន ឬអ្នកបម្រើការងារក្នុងវិស័យសេវាកម្ម និងផលិតកម្មមួយចំនួនអាចនឹងមានបញ្ហាបាត់បង់ការងារបើគាត់តាមមិនទាន់បច្ចេកវិទ្យា ព្រោះឧបករណ៍វៃឆ្លាតទាំងអស់នោះនឹងអាចមានសមត្ថភាពក្នុងការធ្វើការងារបានយ៉ាងលឿន មានប្រសិទ្ធភាព ហើយចំណាយតិចជាងការប្រើប្រាស់មនុស្ស។
អ្នកជំនាញខាងពាណិជ្ជកម្ម និងសេដ្ឋកិច្ចព័ត៌មានវិទ្យាក៏បានបង្ហាញផងដែរថា នៅឆ្នាំ2020 ឧស្សាហកម្មដែលនៅតែខ្លាំងលើពិភពលោកគឺ ទី1 បច្ចេកវិទ្យា ទី2 ការផ្តល់សេវាថែទាំមនុស្ស ទី3 បណ្តាញសង្គមឆ្លាតវៃ និងប្រព័ន្ធផ្សព្វផ្សាយបែបថ្មី ទី4 ការសិក្សាពីរបៀបធ្វើឱ្យជីវិតមានយូរអង្វែង និងទី5 គឺសេវាដោះស្រាយឆ្លាតវៃលើអាជីវកម្ម (Business Acumen)។ ហើយចំពោះការងារដែលមានតម្រូវការខ្ពស់វិញមានដូចជា អ្នកវិភាគទិន្នន័យ (data analysts) អ្នកជំនាញឱសថ និងការថែទាំសុខភាព អ្នកលក់ និងអ្នកជំនាញទីផ្សារ អ្នកប្រឹក្សាយោបល់សេវាអតិថិជន អ្នកវិភាគការគ្រប់គ្រង អ្នកជំនាញអភិវឌ្ឍកម្មវិធីកុំព្យូទ័រ អ្នកជំនាញច្នៃប្រឌិត និងការឌីហ្សាញ គ្រូបង្រៀន និងអ្នកធ្វើការងារក្នុងវិស័យគណនេយ្យ និងសវនកម្ម។
ដើម្បីឆ្លើយតបជាមួយនឹងការងារ និងវិស័យដែលកំពុងមានតម្រូវការខ្ពស់ទាំងអស់នេះ មនុស្សគ្រប់គ្នាចាំបាច់ត្រូវតែមានជំនាញគោលរបស់ខ្លួន និងជំនាញបន្ថែមដែលចាំបាច់មិនអាចខ្វះបានសម្រាប់អភិវឌ្ឍខ្លួនឯងឱ្យក្លាយជាមនុស្សខ្លាំងគ្រប់កាលៈទេសៈនៃការប្រែប្រួលរបស់ពិភពលោក។ ជំនាញទី1 គឺជំនាញដោះស្រាយបញ្ហាស្មុគស្មាញ និងប្រមើលមើលពីអនាគតនៃអាជីវកម្ម ដែលជំនាញនេះទាមទារឱ្យមានសមត្ថភាពខ្លាំងក្នុងការ-ដោះស្រាយ និងបង្កើតគំនិតថ្មីៗដែលបច្ចេកវិទ្យា AI មិនទាន់អាចធ្វើបាន។ ជំនាញទី2គឺជំនាញក្នុងការគិតស៊ីជម្រៅ (critical thinking) ជាជំនាញដែលមនុស្សអាចវិភាគទិន្នន័យដែលទទួលបានពីឧបករណ៍អេឡិចត្រូនិក ឬការស្រាវជ្រាវដើម្បីបកប្រែ និងប្រើប្រាស់ឱ្យបានត្រឹមត្រូវតាមស្ថានភាពជាក់ស្តែងនៃការរស់នៅ និងការធ្វើអាជីវកម្ម។ ជំនាញទី3 គឺជំនាញច្នៃប្រឌិត ដែលវាជាសមត្ថ-ភាពក្នុងការរុករករបកគំហើញថ្មីៗដែលអាចដោះ-ស្រាយបញ្ហាសំខាន់ៗរបស់មនុស្ស ហើយជំរុញឱ្យស្ថាប័នមានការអភិវឌ្ឍបានលឿននៅក្នុងពិភពលោកដែលពោរពេញដោយការប្រកួតប្រជែង។
ចំណែកឯជំនាញសំខាន់មួយផ្សេងទៀតដែលកំពុងស្ថិតក្នុងតម្រូវការរបស់មនុស្សគ្រប់សម័យកាលគឺជំនាញក្នុងការគ្រប់គ្រងមនុស្ស។ ថ្វីត្បិតតែពិភពលោកប្រើប្រាស់ម៉ាស៊ីនច្រើនក៏ពិតមែន តែពិភពលោកមិនអាចគ្មានមនុស្សធ្វើការនោះទេ ហេតុនេះជំនាញនេះចាំបាច់ក្នុងការជំរុញឱ្យការធ្វើការងារជាក្រុមអាចធ្វើទៅរលូន និងដល់គោលដៅលឿនជាផ្នែកនានា៕
July 13, 2018
កេណរី ហាងកាត់ដេរសម្លៀកបំពាក់ក្នុងក្ដីស្រមៃរបស់នារីគ្រប់រូប
ហាងកាត់ដេរ កេណរី បានបង្កើតឡើងក្នុងអំឡុងឆ្នាំ2014 ក្នុងគោលបំណងបង្ហាញពីស្នាដៃរបស់កូនខ្មែរ និងលើកតម្កើងវប្បធម៌ខ្មែរ។ ហាងកាត់ដេរសម្លៀកបំពាក់នារី កេណរី ប្រមូលផ្តុំដោយជាងច្នៃម៉ូដ និងជាងកាត់ដេរ ប្រកបដោយវិជ្ជាជីវៈ និងមានបទពិសោធខ្ពស់ ព្រមជាមួយនឹងអត្តចរិកទន់ភ្លន់ រួសរាយរាក់ទាក់ ដើម្បីបំពេញទៅតាមសេចក្តីត្រូវការរបស់អតិថិជនគ្រប់លំដាប់ជាន់ថ្នាក់។ ហើយហាងកាត់ដេរសម្លៀកបំពាក់ កេណរី បានប្រើប្រាស់សូត្រ ប៉ាក់ ក្រណាត់ និងសម្ភារ ដែលមាននៅក្នុងស្រុកផង និងនាំចូលពីបរទេសផង ដែលប្រកបដោយគុណភាពខ្ពស់ និងផ្តល់ជូននូវគ្រប់តម្រូវការដល់អតិថិជន ដែលក្នុងនោះ ហាង កេណរី ក៏មានសេវាកម្មស្វែងរកក្រណាត់ និងទិញក្រណាត់គ្រប់ប្រភេទជូនដល់អតិថិជនរបស់ខ្លួនផងដែរដើម្បីផ្តល់នូវភាពងាយស្រួលជូនដល់អតិថិជន។
សេវាកម្មរបស់ហាងកាត់ដេរសម្លៀកបំពាក់ កេណរី គឺផ្តោតដំបូងទៅលើពេលវេលា រហ័សទាន់ចិត្ត ហើយការច្នៃម៉ូដសម្លៀកបំពាក់គឺមិនធ្វើឱ្យស៊ាំម៉ូដនោះទេ ជាពិសេសសម្លៀកបំពាក់ប្រពៃណីខ្មែរ ព្រមទាំងមានឈុតបែបសម័យ រ៉ូបកូនក្រមុំ រ៉ូបរាត្រីសមោសរ និងឈុតធ្វើការជាដើម។ ហាងកាត់ដេរសម្លៀកបំពាក់ កេណរី បម្រើជូនអតិថិជនគ្រប់វ័យ គ្រប់មជ្ឈដ្ឋាន មិនថាជនជាតិខ្មែរ ឬក៏បរទេស។ ហាង កេណរី មិនត្រឹមតែជាហាងកាត់ដេរ ដែលទទួលកុម៉្មង់ម៉ូដនោះទេ ហាង កេណរី ក៏មានលក់ជាឈុតសម្លៀកបំពាក់ និងរ៉ូបស្រាប់ ជាលក្ខណៈ Collection ដែលមានទាំងឈុតប្រពៃណីខ្មែរ ឈុតរាត្រីសមោសរ អាវប៉ាក់ពណ៌ស ឈុតកូនក្មេងតូចៗ សម្រាប់ពាក់ចូលរួមគ្រប់កម្មវិធី ដែលសុទ្ធសឹងតែជាម៉ូដថ្មីៗទាន់សម័យ និងមានតម្លៃសមរម្យ។
ក្នុងឱកាសនេះដែរ ម្ចាស់ហាងកាត់ដេរសម្លៀកបំពាក់នារី កេណរី និងជាសហការីទាំងអស់ ក៏សូមអរគុណដល់អតិថិជនទាំងអស់ ដែលតែងតែគាំទ្រ និងជាវសម្លៀកបំពាក់ពីហាងកាត់ដេរសម្លៀកបំពាក់ កេណរី កន្លងមក ហើយហាងកាត់ដេរ កេណរី និងសហការីទាំងអស់នឹងនៅរង់ចាំទទួលស្វាគមន៍ដល់អតិថិជនថ្មីៗបន្ថែមទៀតផងដែរ។
សម្រាប់ព័ត៌មានបន្ថែម លោកអ្នកអាចទាក់ទងមកលេខ 095 702 742 / 023 52 33 777 ឬអាចអញ្ជើញមកកាន់ហាងកាត់ដេរសម្លៀកបំពាក់ កេណរី ដោយផ្ទាល់ ដែលស្ថិតនៅផ្ទះលេខ 17 ផ្លូវលេខ 308 ខាងក្រោយភោជនីយដ្ថាន ម្លិះ ឬហៅថា Bassac Lane៕
July 12, 2018
ភាពរឹងមាំផ្នែកផ្លូវចិត្តជំរុញកុមារឱ្យក្លាយជាមនុស្សខ្លាំង
កូនៗក្លាយជាមនុស្សមានជំនឿជាក់លើខ្លួនឯង និងមានសមត្ថភាពខ្ពស់ ជាបំណងប្រាថ្នាយ៉ាងធំរបស់អាណាព្យាបាល ព្រោះម្តាយឪពុកភាគច្រើនខិតខំប្រឹងប្រែងគ្រប់សព្វបែបយ៉ាងដើម្បីកូនៗ។ អ្នកស្រាវជ្រាវនៃស្ថាប័នអប់រំ Education World បានបញ្ជាក់ថា ការសិក្សាតែលើចំណេះដឹងក្នុងសាលាតែមួយមុខ មិនជំរុញកុមារឱ្យក្លាយជាមនុស្សដែលមានសមត្ថភាពខ្ពស់ និងរឹងមាំខ្លាំងនៅថ្ងៃអនាគតនោះទេ តែវាទាមទារឱ្យមានបំណិនសំខាន់ៗជាច្រើនទៀតដើម្បីជំរុញ។ ជាធម្មតា កុមារដែលរៀនពូកែ មិនមែនប្រាកដថាអាចនឹងក្លាយជាមនុស្សខ្លាំង ឬទទួលបានលទ្ធផលល្អក្នុងការងារ និងការ-រស់នៅនាថ្ងៃអនាគតនោះទេ ព្រោះមេរៀនក្នុងសាលាគ្រាន់តែជាមូលដ្ឋានគ្រឹះក្នុងការបណ្តុះបណ្តាលលើគំនិតមួយផ្នែកតែប៉ុណ្ណោះ តែពួកគេចាំបាច់ត្រូវសិក្សាពីផ្នែកសំខាន់ៗជាច្រើន ដើម្បីជំរុញភាពជាអ្នកដឹកនាំសិល្បៈក្នុងការដោះស្រាយបញ្ហា ពង្រឹងភាពអត់ធ្មត់ និងបង្កើនភាពចាស់ទុំដល់ពួកគេជាដើម។
ខាងក្រោមនេះជាជំនាញមួយចំនួនដែលអាចជំរុញកុមារឱ្យក្លាយជាមនុស្សដែលមានសមត្ថ-ភាព និងមានភាពច្នៃប្រឌិតខ្ពស់នៅពេលអនាគត។
1. កីឡាបង្រៀនមេរៀនជាច្រើនដោយមិនបាច់ទន្ទេញ
ស្ទើរគ្រប់សាលាទាំងអស់ ជាពិសេសនៅក្នុងប្រទេសអឺរ៉ុប ឬអាមេរិកជាដើម តែងតែជំរុញឱ្យកុមារតូចៗលេងកីឡា តាមរយៈការបង្កើតទីលានកីឡានៅក្នុងសាលា ផ្តល់អាហារូបករណ៍សម្រាប់សិស្សដែលពូកែលេងកីឡា និងលើកទឹកចិត្តតាមរយៈការបង្ហាញមុខកីឡាករឆ្នើមៗក្នុងទស្សនាវដ្តីរបស់សាលាជាដើម។
មូលហេតុសំខាន់ដែលសាលាទាំងអស់នោះបញ្ចូលកីឡាច្រើនប្រភេទនៅក្នុងសាលា ព្រោះវាជាផ្នែកយ៉ាងសំខាន់ក្នុងការអប់រំផ្លូវកាយ និងផ្លូវចិត្តដល់កុមារ និងយុវជន។ នៅក្នុងសម័យបច្ចេក-វិទ្យានេះ កុមារជាច្រើនមានបញ្ហាញៀនជាមួយនឹងឧបករណ៍អេឡិចត្រូនិក (smart devices) ដែលវាបានក្លាយជាក្តីបារម្ភធំមួយសម្រាប់អាណាព្យាបាលលើពិភពលោក។ កីឡា ជាផ្នែកយ៉ាងសំខាន់មួយក្នុងការកាត់បន្ថយភាពញៀនរបស់ក្មេងលើឧបករណ៍អេឡិចត្រូនិក ហើយថែមទាំងធ្វើឱ្យគេក្លាយជាមនុស្សដែលមានស្មារតីរឹងមាំ និងចេះអត់ធ្មត់ខ្ពស់ថែមទៀតផង។ កីឡាក៏អាចជួយកុមារឱ្យយល់ពីវិធីសាស្រ្តដោះស្រាយបញ្ហាជាក់ស្តែងក្នុងការរស់នៅ ចេះសាមគ្គីគ្នាធ្វើការងាររួម និងមានភាពជាអ្នកដឹកនាំខ្ពស់ក្នុងការសម្រេចគោលដៅ។
ចំពោះផ្នែកសំខាន់មួយទៀតដែលកុមារគួរតែលេងកីឡានោះ គឺវាអាចជំរុញពួកគេឱ្យមានចិត្តតស៊ូ ជម្នះរាល់ឧបសគ្គលំបាកៗជាច្រើនក្នុងការហ្វឹកហាត់ដើម្បីក្លាយជាកីឡាករដែលពោរពេញដោយទេពកោសល្យ ហើយដំណើរឆ្លងកាត់ឧបសគ្គនេះ នឹងបង្រៀនកុមារឱ្យចេះរង់ចាំ និងរំលត់ភាពឆេវឆាវបាន ដែលជំរុញឱ្យគេអាចនឹងក្លាយជាអ្នកដឹកនាំល្អនៅថ្ងៃអនាគត។

2. គំនូរ និងតន្ត្រីបង្រៀនកុមារឱ្យចេះផ្ចង់អារម្មណ៍បានល្អ
សិល្បៈ ជាផ្នែកដែលមិនអាចខ្វះបានសម្រាប់ជីវិតមនុស្សម្នាក់ៗ ព្រោះគ្មានមនុស្សណាមិនចូល-ចិត្តសិល្បៈនោះទេគ្រាន់តែការចូលចិត្តនោះស្ថិតក្នុងទម្រង់ខុសគ្នាតែប៉ុណ្ណោះ។
សម្រាប់កុមារ ការផ្តល់ឱកាសឱ្យពួកគេសិក្សាពីគំនូរ ជារឿងយ៉ាងល្អមួយក្នុងការជំរុញពួកគេឱ្យក្លាយជាមនុស្សខ្លាំង ព្រោះថាក្មេងៗជាធម្មតាចូលចិត្តរស់នៅក្នុងពិភពនៃការស្រមើស្រមៃ។ គំនូរជាកន្លែងដែលគេអាចបំពេញក្តីស្រមៃរបស់ខ្លួនជាមួយនឹងរូបភាពដែលគេបង្កើតឡើង និងពណ៌ផ្សេងៗដែលគេស្រឡាញ់។ នៅពេលកុមារចូលចិត្តគំនូរ មានន័យថាគេចូលចិត្តភាពស្ងប់ស្ងាត់ ហើយពេលពួកគេគូរគំនូរ ជាពេលដែលពួកគេអាចផ្ចង់អារម្មណ៍បានយ៉ាងល្អបំផុត។ នៅថ្ងៃអនាគតគេនឹងអាចក្លាយជាមនុស្សដែលចេះរៀបគម្រោងការបានល្អ ហើយមានភាពហ្មត់ចត់ និងស្មោះត្រង់ជា-មួយក្តីស្រមៃរបស់ខ្លួន។
ចំពោះតន្ត្រីវិញ ក៏ជាផ្នែកមួយយ៉ាងសំខាន់ផងដែរដែលជំរុញកុមារតូចៗឱ្យមានភាពរីករាយនិងយកចិត្តទុកដាក់ស្តាប់ហេតុផលខាងក្នុងខ្លួនរបស់ខ្លួនឯង ហើយថែមទាំងអាចគ្រប់គ្រងផ្លូវចិត្តបានល្អ។ ជាធម្មតា កុមារអាចផ្លាស់ប្តូរការគិតលឿនបំផុតក្នុងមួយថ្ងៃៗ តែសម្រាប់ក្មេងដែលបានទទួលការបណ្តុះបណ្តាលពីតន្ត្រីពួកគេអាចដាក់អារម្មណ៍ខ្លួនឯងយ៉ាងជ្រៅប្រកបដោយភាពអត់ធ្មត់ ដើម្បីស្តាប់អារម្មណ៍ខ្លួនឯង និងស្វែងយល់បានល្អពីបំណងជីវិតរបស់ខ្លួន។ ថ្វីដ្បិតតែពេលខ្លះកុមារមិនទាន់មានសមត្ថភាពគិតច្រើនក្នុងការសម្រេចលើសកម្មភាពផ្ទាល់ខ្លួនក៏ដោយ តែតន្ត្រីអាចជួយឱ្យគេក្លាយជាមនុស្សដែលមានភាពប្រយ័ត្នប្រយែងមានភាពស្ងប់ស្ងាត់ ហើយគិតល្អិតល្អន់ចំពោះរាល់សកម្មភាពរបស់ខ្លួន ដែលមើលទៅពួកគេដូចជាមនុស្សចាស់ទុំម្នាក់។
3. ចំណេះដឹងហិរញ្ញវត្ថុ ជួយឱ្យកុមារមានគំនិត
សហគ្រិនភាពការគិតគូរពីហិរញ្ញវត្ថុជាចំណុចសំខាន់មួយដែលកុមារត្រូវដឹង ព្រោះកុមារជាវ័យដែលចង់បានគ្រប់យ៉ាង ហើយរឿងអ្វីក៏ជារបស់ថ្មីសម្រាប់ពួកគេដែរ ហេតុនេះនៅពេលដើរបណ្ណាគារ ឬដើរផ្សារម្តងៗពួកគេតែងតែទារទិញរបស់របរគ្រប់យ៉ាង បើទោះបីជាពេលខ្លះរបស់ទាំងអស់នោះមិនសំខាន់សម្រាប់គេក៏ដោយ។ ហេតុនេះការបង្រៀនកុមារឱ្យយល់ពីវិធីសាស្រ្តគ្រប់គ្រងហិរញ្ញវត្ថុ តាមរយៈការបង្កើតទម្លាប់សន្សំលុយ ឬបង្ហាញវិធីរកលុយ ងាយៗដល់ពួកគេ អាចធ្វើឱ្យគេបង្វែរចំណង់ពីអវិជ្ជមានទៅជាចំណង់វិជ្ជមាន។ កុមារអាចនឹងលែងសូវទាររបស់របរច្រើនតាមតែចិត្តនឹកឃើញហើយ តែគេអាចនឹងចង់ធ្វើល្អឱ្យបានច្រើនដើម្បីទទួលរង្វាន់ពីឪពុកម្តាយដើម្បីសន្សំទិញរបស់ដែលគេចង់បាននោះ។
ម្យ៉ាងវិញទៀត ការបង្រៀនកូនតូចៗឱ្យចេះចាយវាយប្រកបដោយរបៀបរៀបរយ ក៏អាចជំរុញឱ្យគេក្លាយជាមនុស្សដែលមានការទទួលខុសត្រូវខ្ពស់លើរឿងលុយកាក់នៅថ្ងៃអនាគត ហើយថែមទាំងអាចមានគំនិតរកស៊ីបានល្អទៀតផង៕
July 12, 2018
NBC ប្រកាសឱ្យពលរដ្ឋប្រុងប្រយ័ត្នការប្រើកម្ចីខុសច្បាប់
ក្នុងគោលដៅចៀសវាងហានិភ័យក្នុងការប្រើប្រាស់កម្ចីពីក្រុមហ៊ុនខុសច្បាប់មួយចំនួន ធនាគារជាតិនៃកម្ពុជា បានចេញសេចក្តីប្រកាសថ្មីមួយកាលពីសប្តាហ៍មុន អំពាវនាវដល់ពលរដ្ឋកុំឱ្យជឿតាមការ-ឆបោក ឬលួងលោមរបស់ភ្នាក់ងារក្រុមហ៊ុនឥណទានខុសច្បាប់ដែលទើបមានវត្តមានថ្មីៗនៅលើទីផ្សារកម្ពុជា។
ខ្លឹមសារនៃសេចក្តីប្រកាសព័ត៌មានស្តីពីផលវិបាកនៃការប្រើកម្ចីខុសច្បាប់ បានឱ្យដឹងថា កន្លងទៅថ្មីៗក៏ដូចជាពេលបច្ចុប្បន្ននេះដែរ ធនាគារជាតិនៃកម្ពុជាបានកត់សម្គាល់ឃើញថា ថ្មីៗនេះក្រុមហ៊ុនឯកជនមួយចំនួនបានធ្វើការផ្សព្វផ្សាយជាសាធារណៈយ៉ាងសកម្មតាមរយៈបណ្តាញសង្គម ការចែកខិត្តប័ណ្ណ និងផ្ញើសារតាមទូរស័ព្ទជាដើម ដែលធ្វើឱ្យអ្នកប្រើប្រាស់កម្ចីជួបការលំបាកជាខ្លាំង។
ការទទួលយកកម្ចីពីក្រុមហ៊ុនខុសច្បាប់នេះនឹងបង្កផលលំបាកជាច្រើនដូចជា 1.អតិថិជនអាចប្រឈមនឹងបំណុលវ័ណ្ឌក ដោយសារអត្រាការប្រាក់ និងកម្រៃសេវាផ្សេងៗខ្ពស់ខ្លាំងជាងគ្រឹះស្ថានហិរញ្ញវត្ថុដែលស្របច្បាប់ និងការគណនាប្រាក់ពុំត្រឹមត្រូវតាមច្បាប់ និងបទប្បញ្ញត្តិ។ 2.អតិថិជនអាចប្រឈមនឹងការគំរាមកំហែង កៀបសង្កត់ គ្រោះថ្នាក់ ឬក្នុងរូបភាពផ្សេងៗដើម្បីបង្ខំឱ្យសងប្រាក់ដើម ការប្រាក់ និងប្រាក់ពិន័យដែលមិនសមហេតុផលទៅក្រុមហ៊ុនវិញ។ ម្យ៉ាងទៀត 3.ទ្រព្យធានារបស់អតិថិជនអាចត្រូវបានក្រុមហ៊ុន ឬអ្នកផ្តល់កម្ចីខុសច្បាប់នោះរឹបអូសដោយពុំបានឆ្លងកាត់ការសម្រេចពីតុលាការជាដើម។
ករណីនេះ ធនាគារជាតិនៃកម្ពុជា បាននិងកំពុងស្នើសុំការសហការពីអាជ្ញាធរពាក់ព័ន្ធដើម្បីចាត់វិធានការតាមផ្លូវច្បាប់ទៅលើក្រុមហ៊ុន ឬអ្នកផ្តល់កម្ចីខុសច្បាប់គ្រប់រូបភាពទាំងអស់ ដែលកំពុងធ្វើសកម្មភាពប្រាសចាកច្បាប់នៃព្រះរាជាណាចក្រកម្ពុជា។
ពាក់ព័ន្ធករណីនេះអ្នកស្រី វ៉ា ស្រីមុំ ប្រជាពលរដ្ឋរស់នៅក្នុងខណ្ឌពោធិ៍សែនជ័យ រាជធានីភ្នំពេញបានឱ្យដឹងថា ថ្មីៗនេះមានភ្នាក់ងារឥណទានថ្មីៗមួយចំនួន ពិសេសបុគ្គលិកក្រុមហ៊ុនឥណទានមួយដែលមានឈ្មោះថា ឈាង ហ្វុង បានដើរចែកខិត្ត-ប័ណ្ណ និងមានប័ណ្ណរបស់ខ្លួន ឱ្យទៅប្រជាពលរដ្ឋនៅតាមផ្ទះនីមួយៗ ហើយបានប្រាប់ថា ពួកគេជាភ្នាក់ងារឥណទានសម្រាប់ផ្ដល់លើតម្រូវការកម្ចីទូទៅ ឬកម្ចីសម្រាប់ទិញរថយន្ត និងទិញផ្ទះជាដើម ដោយអះអាងថា ពួកគេជាអ្នកមានជំនាញវិជ្ជាជីវៈ រក្សាការសម្ងាត់របស់អ្នកខ្ចី មានសុវត្ថិភាព ហើយផ្តល់ប្រាក់កម្ចីលឿន និងងាយស្រួលជាដើម។
អ្នកស្រីអះអាងថា ពលរដ្ឋនៅក្បែរលំនៅឋានរបស់អ្នកស្រីក្នុងភូមិត្រពាំងគល់ សង្កាត់កន្ទោកខណ្ឌពោធិ៍សែនជ័យនៅមិនទាន់មានអ្នកណាម្នាក់ហ៊ានខ្ចីប្រាក់ពីភ្នាក់ងារឥណទានដែលទើបមកដល់ថ្មីៗនោះឡើយ ដោយសារខ្លាចជាប់ការប្រាក់ខ្ពស់ ឬការប្រាក់ផ្គួបធ្វើឱ្យបំណុលកើនឡើងជារៀងរាល់ថ្ងៃលំបាកសង និងលំបាកដកខ្លួនចេញពីបំណុលរបស់គេ ដូចដែលស្ត្រីម្នាក់បានចាញ់បោកគេ ហើយផ្សព្វផ្សាយតាមបណ្តាញសង្គមហ្វេសប៊ុកកាលពីពេលកន្លងទៅនោះ។
លោក ណុប សូនី ប្រធានផ្នែកឥណទាននៃគ្រឹះស្ថានមីក្រូហិរញ្ញវត្ថុ ធីប៊ីប៊ី ខេមបូឌា ភីអិលស៊ីមានប្រសាសន៍ថា កន្លងមកលោកក៏ធ្លាប់ឮអតិថិជនត្អូញត្អែរជាបន្តបន្ទាប់ផងដែរ អំពីប្រតិបត្តិករឥណទាន និងក្រុមហ៊ុនឥណទានមួយចំនួនដែលដើរកៀងគរពលរដ្ឋឱ្យខ្ចីប្រាក់ រួចហើយគិតការប្រាក់ខ្ពស់រហូតដោះស្រាយបំណុលមិនរួច។ លោកថា ថ្មីៗនេះមានក្រុមហ៊ុនចិនមួយបានដើរផ្តល់កម្ចីឱ្យអាជីវករតូចតាច និងអ្នករត់ម៉ូតូឌុបមួយចំនួននៅតាមផ្សារឱ្យទទួលយកប្រាក់កម្ចីរបស់គេដោយមិនចាំបាច់មានទ្រព្យបញ្ចាំច្រើនទេ គ្រាន់តែធ្វើកិច្ចសន្យាខ្ចីប្រាក់ មានអត្តសញ្ញាណប័ណ្ណ មានកាតគ្រីម៉ូតូនោះនឹងអាចទទួលបានប្រាក់កម្ចីតែម្តង ដែលភាគច្រើនធ្វើកម្ចីក្រោម 1ពាន់ដុល្លារ។ ហើយជួនកាលខ្ចីច្រើនជាងនេះ គេគ្រាន់តែយកប្លង់ដី(ប្លង់ទន់)ធ្វើជាទ្រព្យបញ្ចាំ គឺអាចទទួលបានកម្ចីតែម្តង ដោយមិនចាំបាច់មានការទទួលស្គាល់ពីអាជ្ញាធរមានសមត្ថកិច្ចឡើយ។ “ខ្ញុំបានជួបលោកអ៊ំម្នាក់នៅផ្សារ គាត់ប្រាប់ថា ខ្ចីយូរៗទៅ ការប្រាក់ច្រើនជាងប្រាក់ដើម រហូតធ្វើឱ្យគាត់រកប្រាក់សងទៅឱ្យក្រុមហ៊ុនវិញមិនបាន ក៏សម្រេចចិត្តឈប់លក់ទំនិញក្នុងផ្សារ ហើយរត់គេចខ្លួនតែម្តង”។
លោក ណុប សូនី ប្រធានផ្នែកឥណទាននៃគ្រឹះស្ថានមីក្រូហិរញ្ញវត្ថុ ធីប៊ីប៊ី ខេមបូឌា ភីអិលស៊ី
លោកថា ករណីនេះ គេមិនដឹងថាក្រុមហ៊ុនឥណទានខុសច្បាប់ទាំងនោះ គណនារូបមន្តកំណត់ការប្រាក់តាមវិធីសាស្ត្រណាទេ ទើបខ្ចីយូរៗទៅ ការប្រាក់កើនឡើងច្រើនជាងប្រាក់ដើម រហូតធ្វើឱ្យអាជីវករមួយចំនួនបាត់បង់មុខរបរទទួលទានទៀតផង។ ករណីនេះលោកក៏សូមអំពាវនាវដល់ប្រជាពលរដ្ឋទាំងអស់ សូមឱ្យមានការប្រុងប្រយ័ត្នមុននឹងសម្រេចចិត្តទទួលយកកម្ចីពីក្រុមហ៊ុនដែលមិនស្គាល់ប្រវត្តិច្បាស់លាស់ ចៀសវាងជាប់បំណុលវ័ណ្ឌក រហូតមិនដោះរួច៕
ធនាគារជាតិនៃកម្ពុជា
July 12, 2018