Author: ធឿន មករា

ឆមាសទី1 ឆ្នាំ2018 ក្រសួងដែនដីអនុញ្ញាតគម្រោងសាងសង់ចំនួន 1,643គម្រោង កើនឡើង20%
ក្នុងរយៈពេល 6ខែ ដើមឆ្នាំ2018 ក្រសួងរៀបចំដែនដី នគរូបនីយកម្ម និងសំណង់រាជធានី-ខេត្ត បានផ្ដល់លិខិតអនុញ្ញាតគម្រោងសាងសង់ក្នុងតម្លៃប៉ាន់ស្មានជាង 2ពាន់ (2,153,211,118)លានដុល្លារលើចំនួន 1,643គម្រោង ដែលមានផ្ទៃក្រឡាសំណង់សរុបជាង 5លាន(5,352,422 )ម៉ែត្រការ៉េ។
របាយការណ៍ក្រសួងរៀបចំដែនដីបានបញ្ជាក់ឱ្យដឹងទៀតថា ទុនវិនិ-យោគរបស់វិស័យឯកជនមកពីបរទេសមានចំនួន 8ប្រទេស ស្មើនឹង 21គម្រោង ដែលមានផ្ទៃក្រឡាសំណង់សរុបជាង 92ម៉ឺន(928,267)ម៉ែត្រការ៉េ និងមានតម្លៃប៉ាន់ស្មានទុនវិនិយោគប្រមាណជាង 394លាន (394,332 ,300)ដុល្លារ។
គម្រោងទាំងនេះបានផ្ដល់ការងារដល់អ្នកជំនាញកម្មករប្រមាណ18ម៉ឺននាក់ក្នុង1ថ្ងៃ នៅទូទាំងប្រទេស ហើយបើគិតជាប្រាក់ឈ្នួល គឺម្នាក់ៗទទួលបានប្រមាណពី 400ដុល្លារ ទៅ2,500ដុល្លារអាមេរិក។ ទន្ទឹមនឹងនេះ វិស័យសំណង់បានបង្កើតការងារដល់ប្រជាពលរដ្ឋកម្ពុជាប្រមាណ25 ទៅ26ម៉ឺននាក់ក្នុង1ថ្ងៃ។ ដោយឡែកនៅរាជធានីភ្នំពេញ មានចំនួនកម្មករប្រមាណ12 ទៅ13ម៉ឺននាក់ក្នុង1ថ្ងៃ។
ឯកឧត្តម សេង ឡូត អ្នកនាំពាក្យក្រសួងដែនដីនគរូបនីយកម្ម និងសំណង់បានប្រាប់កាសែតឡារ៉ែនដោយបានព្យាករថា ការវិនិយោគលើវិស័យសំណង់នៅកម្ពុជានឹងកើនឡើងប្រមាណពី20 ទៅ30%ថែមទៀតនៅចុងឆ្នាំ2018 ខណៈនៅ 6ខែដើមឆ្នាំនេះ ទឹកប្រាក់វិនិយោគក្នុងវិស័យនេះ មានការកើនឡើងប្រមាណជា20% បើធៀបទៅនឹងឆ្នាំ2017។
ឯកឧត្តម សេង ឡូត អ្នកនាំពាក្យក្រសួងដែនដីនគរូបនីយកម្ម និងសំណង់
ឯកឧត្តមបានបញ្ជាក់ថា ផ្អែកតាមតួលេខក្រសួងជាគោល តួលេខដែលបានបង្ហាញដោយក្រសួង គឺជាតួលេខជាក់លាក់អាចយកទៅប្រើប្រាស់បាន ព្រោះតួលេខនោះបានចង្អុលបង្ហាញពីក្រុមហ៊ុនប្រកបអាជីវកម្មសំណង់ដែលបានចុះបញ្ចីនៅក្រសួងរៀបចំដែនដី នគរូបនីយកម្ម និងសំណង់ និងកំពុងមានសុពលភាពប្រតិបត្តិអាជីវកម្ម ក្នុងនោះមាន 324ក្រុមហ៊ុន ជាក្រុមហ៊ុនមកពីក្រៅប្រទេស ដូចជាចិន កូរ៉េ វៀតណាម ជប៉ុន និងថៃជាដើម។
វិស័យសំណង់ក៏បានរួមចំណែកយ៉ាងខ្លាំងក្នុងកំណើនសេដ្ឋកិច្ចជាតិឆ្នាំ2018 បើយោងតាមរបាយ-ការណ៍ឆមាសទី1 របស់ធនាគារជាតិនៃកម្ពុជាដែលចេញផ្សាយពេលថ្មីៗនេះបានបង្ហាញថា វិស័យសំណង់បានរួមចំណែក 11,5% បន្ទាប់ពីការនាំចេញដែលរួមចំណែក 11,6% និងទេសចរណ៍ 12,5%។ ទន្ទឹមនឹងនេះផលបត្រប្រាក់កម្ចីសម្រាប់វិស័យសំណង់ និងអចលនទ្រព្យក៏បានកើនឡើងផងដែរ។
បើយោងតាមរបាយការណ៍ដដែលនេះ បានឱ្យដឹងថា ក្នុងរយៈពេល 6ខែដំបូងនៃឆ្នាំ2018 ផលបត្រប្រាក់កម្ចីពីធនាគារ និងគ្រឹះស្ថានមីក្រូហិរញ្ញវត្ថុសរុប បានកើនឡើងរហូតដល់ 22.5ពាន់លានដុល្លារពោលគឺកើនឡើងរហូតដល់ 18,8%។ ក្នុងចំណោមពាណិជ្ជកម្មទាំងអស់ កម្ចីសម្រាប់វិស័យសំណង់ និងអចលនទ្រព្យ គឺស្មើនឹង16,5% នៃផលបត្រកម្ចីសរុបពីធនាគារ និង4% ពីគ្រឹះស្ថានមីក្រូហិរញ្ញវត្ថុ។
យោងតាមរបាយការណ៍ប្រចាំឆមាសទី1 របស់ធនាគារជាតិនៃកម្ពុជា (NBC) បានឱ្យដឹងថា ក្នុងចំណោមគម្រោងសាងសង់ទាំងអស់នោះ គម្រោងសំណង់លំនៅឋានមានចំណែក 85% ដោយភាគច្រើនជាគម្រោងសំណង់ថ្មី ផ្តោតលើសំណង់លំនៅឋានដែលមានតម្លៃទាបជាងមុន ដើម្បីផ្គត់ផ្គង់តម្រូវការរបស់ប្រជាជនដែលមានប្រាក់ចំណូលមធ្យម។ របាយការណ៍ធនាគារជាតិក៏បានបង្ហាញដែរថា ឥណទានដែលផ្តល់ឱ្យដល់វិស័យសំណង់បានកើនឡើង30% នៅឆមាសទីមួយឆ្នាំនេះ។ កម្ពុជាបានចំណាយទឹកប្រាក់ 502លានដុល្លារ ដើម្បីនាំចូលវត្ថុធាតុដើម និងសម្ភារសម្រាប់គាំទ្រដល់វិស័យសំណង់នៅឆមាសទីមួយ ឆ្នាំ2018 នេះ កើនឡើង6%ភាគរយ ពីទឹកប្រាក់ 474លានដុល្លារ។
លោក គីម ហ៊ាង ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជាបានលើកឡើងថា វិស័យសំណង់បានបនុ្តភាពរឹងមាំ ហើយមិនបានរងឥទ្ធិពលអវិជ្ជមានណាមួយពីព្រឹត្តការណ៍រសើបទាក់ទងនឹងការរៀបចំបោះឆ្នោតកាលពីចុងសប្តាហ៍មុននោះទេ។ លោកបន្តថា ការកើនឡើងនូវសូចនាករសំខាន់ៗរួមមានកំណើនឥណទាន កំណើនការនាំចូល និងកំណើនចំនួនគម្រោងសាងសង់ គឺជាសញ្ញាល្អឆ្លុះបញ្ចាំងថា វិនិយោគិនក្នុងវិស័យសំណង់នៅតែមានទំនុកចិត្តចំពោះវិស័យនេះ។ លោកបន្តថា៖“យើងជឿជាក់ថា នៅពេលដែលបោះឆ្នោតហើយនេះ វិស័យសំណង់នឹងបន្តកើនឡើងជាងនេះទៅទៀត និងយ៉ាងគំហុកទៀតផង”។
ដោយឡែកការប្រមូលពន្ធទៅលើវិស័យអចលនទ្រព្យ និងសំណង់មានការកើនឡើងយ៉ាងគួរឱ្យកត់សម្គាល់។ នេះបើយោងតាមឯកឧត្តម គង់ វិបុល ដែលជាប្រតិភូរាជរដ្ឋាភិបាលទទួលបន្ទុកអគ្គនាយក នៃអគ្គនាយកដ្ឋានពន្ធដារ ថ្លែងប្រាប់អ្នកសារព័ត៌មានទាក់ទងទៅនឹងវឌ្ឍនភាពនៃការប្រមូលចំណូលពន្ធដារក្នុងឆមាសទី1 នៃឆ្នាំ2018 ដែលសម្រេចបានរហូតដល់ 61.28ភាគរយនៃផែនការប្រចាំឆ្នាំ។
ឯកឧត្តម គង់ វិបុល ឱ្យដឹងថា ក្នុងចំណោមចំណូលពន្ធសរុបដែលមានចំនួនទឹកប្រាក់ប្រមាណ4,7ទ្រីលានរៀល ការប្រមូលពន្ធពីការផ្ទេរសិទ្ធិកាន់កាប់អចលនទ្រព្យ ពោលគឺពន្ធប្រថាប់ត្រាមានការ-កើនឡើងរហូតទៅដល់31% បើធៀបទៅនឹងរយៈពេលដូចគ្នាកាលពីឆ្នាំមុន។ “ជាក់ស្តែងណាស់ ដោយសារវិនិយោគិនមានជំនឿទុកចិត្តលើស្ថិរភាពនយោបាយ ក៏ដូចជាស្ថិរភាពម៉ាក្រូសេដ្ឋកិច្ចរបស់ប្រទេសកម្ពុជាដែលជាកត្តាជំរុញឱ្យមានការវិនិយោគទៅលើវិស័យសំណង់ និងអចលនទ្រព្យកាន់តែច្រើន”។ កត្តាទាំងអស់នេះហើយ ដែលបានបង្កើនទំនុកចិត្តជូនប្រជាពលរដ្ឋក៏ដូចជាវិនិយោគិនដើម្បីធ្វើអាជីវ-កម្មជាមួយដីធ្លីក៏ដូចជាលំនៅឋាន បើទោះបីនេះជារដូវកាលបោះឆ្នោតក៏ដោយ។
ឯកឧត្តម គង់ វិបុល ប្រតិភូរាជរដ្ឋាភិបាលទទួលបន្ទុកអគ្គនាយកនៃអគ្គនាយកដ្ឋានពន្ធដារ
ជាមួយគ្នានេះដែរ អគ្គនាយកដ្ឋានគយ និងរដ្ឋាករកម្ពុជាបានឱ្យដឹងថា ចំណូលគយ និងរដ្ឋាករសរុបប្រចាំឆមាសទី1 ឆ្នាំ2018 កើនឡើងប្រមាណ27,8% ដែលក្នុងនោះ ចំណូលពីគ្រឿងសំណង់កើនឡើងរហូតដល់ទៅ26,6% បើធៀបទៅនឹងរយៈពេលដូចគ្នាកាលពីឆ្នាំមុន៕
August 2, 2018
ហ៊ីម៉ាវ៉ារី ជាសណ្ឋាគារលំដាប់ផ្កាយ 4 និងអាផាតមិនលំដាប់ផ្កាយ 5 ប្រកបដោយទេសភាពបែបធម្មជាតិដ៏ស្រស់បំព្រង
សណ្ឋាគារ ហ៊ីម៉ាវ៉ារី ត្រូវបានកសាងឡើងតាំងពីចុងឆ្នាំ1997 ដើមឆ្នាំ1998 និងបានបើកសម្ពោធជាផ្លូវការនៅថ្ងៃទី20 ខែមិថុនា ឆ្នាំ2001 ហើយរហូតមកដល់ឆ្នាំ2005 ទើបសណ្ឋាគារលំដាប់ផ្កាយ4មួយនេះ បានប្តូរឈ្មោះមកជាសណ្ឋាគារ ហ៊ីម៉ាវ៉ារី ដែលមានអត្ថន័យជាភាសាជប៉ុនមានន័យថា “ផ្កាឈូករ័ត្ន” ដែលបញ្ជាក់ពីភាពកក់ក្តៅ និងភាពរួសរាយរាក់ទាក់ដល់ភ្ញៀវជាតិ និងអន្តរជាតិពីគ្រប់ទិសទីមកស្នាក់នៅក្នុងសណ្ឋាគារដ៏ល្អប្រណីត ប្រកបដោយសោភ័ណ្ឌភាពបែបធម្មជាតិដ៏ត្រជាក់ភ្នែក ជាមួយនឹងដើមឈើតូចធំពណ៌បៃតងស្រស់គ្រប់ទីកន្លែងតែម្តង
ជួបជាមួយនឹងលោក អេនឌ្រូ តេ អគ្គនាយកគ្រប់គ្រង សណ្ឋាគារ ហ៊ីម៉ាវ៉ារី បានឱ្យដឹងថា សណ្ឋាគារ ដែលរចនាឡើងតាមបែប Classic លាយជាមួយនឹងរចនាបទបែបខ្មែរមួយនេះ ផ្តល់នូវសេវាកម្មស្នាក់នៅបែបរយៈពេលខ្លី និងរយៈពេលវែង បែបជាសណ្ឋាគារផង និងជាអាផាតមិន (Apartment) ផង ដោយភ្ញៀវដែលមកស្នាក់នៅក្នុងសណ្ឋាគារ ហ៊ីម៉ាវ៉ារីភាគច្រើនគឺជាជនជាតិជប៉ុន ចិន អ្នកធ្វើការនៅតាមបណ្តាស្ថានទូតផ្សេងៗ អ្នកធ្វើការនៅក្នុងក្រសួង និងនៅជួររាជរដ្ឋាភិបាល ព្រមទាំងពីតាមបណ្តាអង្គការជាតិ និងអន្តរជាតិជាច្រើនទៀត ជាមួយនឹងការស្វាគមន៍ដ៏កក់ក្តៅ និងសេវាកម្មដ៏ល្អឥតខ្ចោះពីសំណាក់បុគ្គលិកប្រកបដោយវិជ្ជាជីវៈរបស់សណ្ឋាគារ។
លោក អេនឌ្រូ តេ អគ្គនាយកគ្រប់គ្រង សណ្ឋាគារ ហ៊ីម៉ាវ៉ារី
ភ្ញៀវដែលមកស្នាក់នៅក្នុងសណ្ឋាគារ ហ៊ីម៉ាវ៉ារី នឹងទទួលបាននូវសេវាកម្មរួមជាមួយនឹងការបម្រើអាហារពេលព្រឹកបែបប៊ូហ្វេដ៏សម្បូរបែបនៅក្នុងភោជនីយដ្ឋាន Oyster ដែលជាភោជនីយដ្ឋានស្ថិតនៅក្នុងសណ្ឋាគារ ហ៊ីម៉ាវ៉ារី ដែលបម្រើអាហារទាំង3ពេល គឺបើកបម្រើពីម៉ោង6ព្រឹកដល់ម៉ោង10កន្លះយប់ជារៀងរាល់ថ្ងៃ ដោយនៅពេលព្រឹកភោជនីយដ្ឋានលំដាប់អន្តរជាតិនេះមានបម្រើអាហារប៊ូហ្វេបែបចម្រុះជាតិសាសន៍ (International Buffet) ព្រមទាំងអាហារបែបខ្មែរជាច្រើនជម្រើសបែបសាំងហ្គាពួរដ៏ល្បីល្បាញ ដែលមានដូចជា Seafood Hor fun, សាតេ, ឡាក់សា, គុយទាវឆា, សាច់ និងគ្រឿងសមុទ្រជាច្រើនទៀត ដែលសុទ្ធសឹងតែស្រស់ៗ និងឈ្ងុយឆ្ងាញ់ជាប់ចិត្តព្រមទាំងអាហារពេលល្ងាចបែបអាឡាកាត់ផងដែរ។ ក្រៅពីនេះ ភ្ញៀវដែលស្នាក់នៅក្នុងសណ្ឋាគារ ហ៊ីម៉ាវ៉ារី ក៏អាចរីករាយជាមួយនឹងកន្លែងហាត់ប្រាណ ដើម្បីសុខភាព ដែលបើកពីម៉ោង6:30នាទីព្រឹកដល់ម៉ោង10យប់ និងការហែលទឹកលេងនៅក្នុងអាងទឹកដ៏ស្រស់ស្អាតនៅក្នុងសណ្ឋាគារ ដែលបម្រើជូនទាំងភ្ញៀវស្នាក់នៅ និងភ្ញៀវមកពីខាងក្រៅផងដែរ ដោយបើកពីម៉ោង6:30នាទីព្រឹកដល់ម៉ោង10យប់ដូចគ្នា។
នៅសណ្ឋាគារ ហ៊ីម៉ាវ៉ារី ក៏មានសេវាកម្មស្ប៉ាជូនដល់ភ្ញៀវទាំងអស់ផងដែរ ហើយនៅក្នុងសណ្ឋាគារលំដាប់ផ្កាយ4 និងអាផាតមិនលំដាប់ផ្កាយ5នេះ ក៏មានគ្លីនិកព្យាបាលជំងឺនៅខាងក្នុងសណ្ឋាគារផងដែរ ដើម្បីផ្តល់នូវភាពងាយស្រួល និងទំនុកចិត្តខ្ពស់ដល់ភ្ញៀវដែលមកស្នាក់នៅក្នុងសណ្ឋាគារគ្រប់រូប ព្រមទាំងមានហាងសាឡន អគារពាណិជ្ជកម្ម និងហាងលក់ទំនិញដ៏សម្បូរបែបផងដែរ។ សម្រាប់ភ្ញៀវដែលមានបំណងចង់ធ្វើដំណើរកម្សាន្តតាមទូក ឬតាមទីរមណីយដ្ឋានផ្សេងៗនៅក្នុងរាជធានីភ្នំពេញ សណ្ឋាគារ ហ៊ីម៉ាវ៉ារី ក៏មានដៃគូសហការយ៉ាងល្អជាមួយនឹងទូកជិះលេងកម្សាន្ត និងក្រុមហ៊ុនតាក់ស៊ីផ្សេងៗផងដែរ ដើម្បីផ្តល់នូវសេវាកម្មដ៏ល្អឥតខ្ចោះដល់ភ្ញៀវជាតិ និងអន្តរជាតិទាំងអស់។ នៅសណ្ឋាគារ ហ៊ីម៉ាវ៉ារី ក៏មានកន្លែងផលិតស្រាដោយខ្លួនឯងដ៏ឆ្ងាញ់ពិសា និងទទួលបាននូវការគាំទ្រជាខ្លាំងពីសំណាក់ភ្ញៀវជាតិ និងអន្តរជាតិ ដោយបើកបម្រើពីម៉ោង12ថ្ងៃត្រង់ ដល់ម៉ោង11យប់ ឬរហូតដល់អស់ភ្ញៀវដែលភ្ញៀវទាំងអស់អាចមានជម្រើសជាមួយនឹងការអង្គុយទទួលទានស្រានៅ Himawari Mirobrewery និងអាហារនៅបរិវេណខាងក្រៅដែលស្ថិតនៅផ្នែកខាងក្រោយនៃសណ្ឋាគារដោយទទួលទានបណ្តើរ គយគន់ទេសភាពតាមដងទន្លេបណ្តើរយ៉ាងរ៉ូមែនទិកបំផុត ជាមួយនឹងកម្មវិធី Happy Hour ពីម៉ោង4ល្ងាចដល់ម៉ោង8យប់។ ក្រៅពីមានភោជនីយដ្ឋានបែបអាហាខ្មែរ និងបែបសាំងហ្គាពួរយ៉ាងឆ្ងាញ់ពិសា នៅសណ្ឋាគារ ហ៊ីម៉ាវ៉ារី ក៏មានសាលសម្រាប់រៀបចំកម្មវិធីជប់លៀងតូចធំ រៀបចំសិក្ខាសាលា កម្មវិធីប្រជុំពិភាក្សាការងារ កម្មវិធីខួបកំណើត និងកម្មវិធីរៀបអាពាហ៍ពិពាហ៍ផងដែរ។
លោក អេនឌ្រូ តេ បានបន្តថា សណ្ឋាគារ ហ៊ីម៉ាវ៉ារី បានជាប់ឈ្មោះថាជាសណ្ឋាគារដែលជួយសង្គមជាច្រើន ទាំងការជួយបណ្តុះបណ្តាលធនធានមនុស្ស ដែលរាប់ទាំងបុគ្គលិកនៅក្នុងសណ្ឋាគារនេះផ្ទាល់ជាមួយនឹងការបើកនូវវគ្គបណ្តុះបណ្តាលជាច្រើន ដើម្បីបង្កើនចំណេះដឹង និងគុណភាពដល់បុគ្គលិកគ្រប់រូបដើម្បីបំពេញសេវាកម្មដល់ភ្ញៀវនឹងអតិថិជនឱ្យបានប្រសើរ។ ក្រៅពីជានាយកសណ្ឋាគារលោក អេនឌ្រូ តេ ក៏ជាអនុប្រធាននៃអង្គការ សង្គ្រោះបឋម សេនចនប្រចាំកម្ពុជា (St.Joh Phnom Penh) ដែលបានផ្តល់ការបង្រៀនពីវិធីសង្គ្រោះបន្ទាន់ដល់បុគ្គលិករបស់លោក ព្រមទាំងបណ្តាអង្គការជាតិ និងអន្តរជាតិ មជ្ឈមណ្ឌលកុមារកំព្រា និងសហគមន៍ក្រីក្រមួយចំនួនផងដែរ។ ក្រៅពីសកម្មភាពបណ្តុះបណ្តាលវិជ្ជាជីវៈផ្សេងៗ ដូចជា ការសង្គ្រោះបន្ទាន់ និងចំណេះដឹងស្តីពី បដិសណ្ឋារកិច្ច សណ្ឋាគារហ៊ីម៉ាវ៉ារី ក៏បានចូលរួមនៅក្នុងសកម្មភាព “ផ្តល់ឈាម” ជាមួយនឹងមជ្ឈមណ្ឌលផ្តល់ឈាមជាតិនៃកម្ពុជាផងដែរ។ ទន្នឹមនឹងនេះ សណ្ឋាគារហ៊ីម៉ាវ៉ារី ក៏បានទទួលនូវកិត្តិយស និងពានរង្វាន់ជាច្រើនអំពីសេវាកម្មល្អ សណ្ឋាគារដ៏ប្រណីត និងពានរង្វាន់ ភោជនីយដ្ឋានល្អមានអនាម័យអាហារប្រកបដោយឱជារសផងដែរ ដែលធ្វើឱ្យសណ្ឋាគារ ហ៊ីម៉ាវ៉ារី កាន់តែល្បីល្បាញនៅលើឆាកអន្តរជាតិ និងទទួលបាននូវការគាំទ្រពីសំណាក់ភ្ញៀវជាតិ និងអន្តរជាតិពីគ្រប់ទិសទី៕

July 24, 2018
អាហារដើម្បីសុខភាពសម្រាប់រដូវវស្សា
ជំងឺផ្ដាសាយកើតឡើងបានដោយសារមូលហេតុជាច្រើនដូចជា ការផ្លាស់ប្ដូរអាកាសធាតុញឹកញយ ម្ដងក្ដៅ ម្ដងត្រជាក់ ដែលធ្វើឱ្យរាងកាយប្រែប្រួលកម្ដៅទប់ទល់ជាមួយនឹងអាកាសធាតុខាងក្រៅមិនបានភ្លាមៗ ការឆ្លងរោគជំងឺពីមនុស្សនៅជុំវិញខ្លួន ការត្រូវទឹកភ្លៀង ការគេងមិនគ្រប់គ្រាន់ ទើបធ្វើឱ្យអង់ទីករការពារជំងឺរបស់អ្នកចុះខ្សោយ ធ្វើឱ្យងាយឆ្លងជំងឺ និងកើតជំងឺផ្ដាសាយ។ ប្រសិនបើអ្នកថែរក្សារាងកាយឱ្យរឹងមាំរហូត ហើយបើអ្នកកំពុងមានជំងឺផ្ដាសាយអ្នកត្រូវព្យាបាលខ្លួនដោយការលេបថ្នាំ ចាក់ថ្នាំ និងចាក់វ៉ាក់សាំងការពារជំងឺផ្ដាសាយឱ្យបានទាន់ពេលវេលាផងដែរ។ ខាងក្រោមនេះយើងសូមណែនាំអាហារសុខភាពសម្រាប់រដូវភ្លៀង ដែលអ្នកគួរទទួលទាន ដើម្បីប្រយោជន៍ដល់សុខភាពរបស់អ្នក មានដូចជា៖
1. ស៊ុបមាន់ក្ដៅៗ
ជួយកាត់បន្ថយការតឹងច្រមុះ ហើយបើបានបន្ថែមបន្លែចូលទៅដើម្បីបន្ថែមសារធាតុធ្វើឱ្យរាងកាយរឹងមាំមានសុខភាពល្អ ព្រមទាំងស៊ុបមានដែលរំងាស់ឱ្យយូរបន្ដិចនោះ នឹងធ្វើឱ្យប្រូតេអីុនរលាយទៅជាសារធាតុ Peptide ដែលជួយដំណើរការដល់ការថែរក្សាសីតុណ្ហភាពក្នុងរាងកាយបានយ៉ាងល្អ ហើយជួយបន្ថែមប្រូតេអីុនដល់រាងកាយថែមទៀតផង។
2. អាហារហើរ ព្រមទាំងផ្សំដោយគ្រឿងទេសជាច្រើនមុខ
គ្រឿងទេសដែលយកមកធ្វើជាអាហារដូចជា ខ្ទឹម ស្លឹកក្រៃ រំដេង ស្លឹកក្រូច ម្ទេស និងខ្ញីជាដើម វាអាចបំបាត់អាការផ្ដាសាយបាន ហើយអ្វីដែលសំខាន់នៅក្នុងគ្រឿងទេសទាំងអស់នេះគឺមានផ្ទុកដោយវីតាមីន C, វីតាមីន A, វីតាមីន D, កាល់ស្យូម, ធាតុ-ដែក និងជួយបំបាត់អាការតឹងច្រមុះ ធ្វើឱ្យដកដង្ហើមបានស្រួល។
3. ទឹកផ្លែឈើក្រឡុក
ពិសាទឹកផ្លែឈើក្រឡុកឱ្យបានច្រើនដើម្បីបន្ថែមវីតាមីន C នៅក្នុងរាងកាយ ដែលជួយកាត់បន្ថយកម្ដៅពីការកើតជំងឺគ្រុនផ្ដាសាយបាន បើមិនដូច្នោះទេចូរទទួលទានតែឆុងក្ដៅឧណ្ហៗ រួចបន្ថែមក្រូចឆ្មារ និងទឹកឃ្មុំក៏បានដែរ។
4. ផ្លែឈើអម្បូរក្រូច
ផ្លែឈើអម្បូរក្រូច គឺសុទ្ធតែមានវីតាមីន ខ្ពស់ ដែលអាចជួយព្យាបាល និងបន្ថយអាការគ្រុនក្ដៅ ព្រមទាំងជួយការពារការឆ្លងមេរោគគ្រុនផ្ដាសាយបាន។
5. អាហារផ្សេងៗដែលសម្បូរដោយវីតាមីន C និងសារធាតុប្រឆាំងអុកស៊ីតកម្ម
អាហារដែលមានវីតាមីន C ច្រើន គឺមាននៅក្នុងបន្លែផ្លែឈើដូចជា ផ្លែត្របែក ស្ត្រូបឺរី ម្នាស់ ស្ពៃក្ដោប ផ្លែក្រូច ការ៉ុត ទំពាំងបាយជូរ និងផ្លែល្ហុងជាដើម ដែលវាជួយជំរុញប្រព័ន្ធភាពស៊ាំដើម្បីការពារមេរោគ និងប្រឆាំអុកសីតកម្ម ដូចជា បេតារ៉ូទីន វីតាមីន A វីតាមីន C និងវីតាមីន E ដែលជួយកម្ចាស់មេរោគ ដែលចូលមកជ្រៀតជ្រែងនៅក្នុងរាងកាយ និងជួយការពារការឆ្លងមេរោគបានយ៉ាងល្អប្រសើរ។
6. យ៉ាអួ ឬទឹកដោះគោជូរ
វាជួយបន្ថែមមុខងាររបស់គោលិកាគ្រាប់ឈាមស និងជួយបន្ថែមសារធាតុការពារប្រឆាំងមេរោគបានផងដែរ ហើយការទទួលទានទឹកដោះគោជូររាល់ថ្ងៃ អាចជួយការពារជំងឺផ្ដាសាយ និងរោគចាញ់អាកាសធាតុបានទៀតផង៕
July 24, 2018
តើទីក្រុងបែបណាទើបអាចហៅថា ជាទីក្រុងដែលឆ្លាតបំផុតនៅលើពិភពលោកក្នុងឆ្នាំ2018?
មួយរយៈពេលចុងក្រោយនេះទីក្រុងឆ្លាតវៃ (Smart City) បានក្លាយជាប្រធានបទសំខាន់មួយសម្រាប់ប្រទេសអភិវឌ្ឍន៍នានាលើពិភពលោក ដោយក្នុងនោះតំបន់អាស៊ានក៏កំពុងជំរុញឱ្យសមាជិករបស់ខ្លួនធ្វើការអភិវឌ្ឍទីក្រុងសំខាន់ៗឱ្យក្លាយទៅជាទីក្រុងឆ្លាតវៃ ដើម្បីតភ្ជាប់ការអភិវឌ្ឍនៅក្នុងតំបន់ឱ្យបានល្អប្រសើរឡើងដែរ។
បើយោងតាមទិន្នន័យរបស់ស្ថាប័នវាយតម្លៃទីក្រុងឆ្លាតវៃ IESE Cities in Motion បានបង្ហាញថា ទីក្រុងដែលឆ្លាតវៃជាងគេនៅលើពិភពលោកក្នុងឆ្នាំ2018 នេះ គឺទីក្រុង New York ហើយទីក្រុងដែលជាប់លេខបន្តបន្ទាប់ទៀតនោះគឺទីក្រុងឡុងដ៍ និងទីក្រុងប៉ារីស។ ទីក្រុងទាំងនេះត្រូវបានគេរកឃើញថាបានបង្កើតរឿងសំខាន់ៗជាច្រើនដើម្បីអភិវឌ្ឍខ្លួនឱ្យក្លាយជាទីក្រុងឆ្លាតវៃ។ ចំណែកឯទីក្រុងឆ្លាតវៃបន្តបន្ទាប់ទៀតមានដូចជា ទីក្រុងតូក្យូ ទីក្រុង Keykjavik ប្រទេសសិង្ហបុរី ទីក្រុងសេអ៊ូល ទីក្រុងតូរ៉ុនតូ ទីក្រុងហុងកុង និងទីក្រុង Amsterdam ក៏ត្រូវបានគេចាត់ទុកថាជាតំបន់ដែលស្ថិតក្នុងចំណាប់អារម្មណ៍ខ្ពស់ផងដែរខាងផ្នែកឆ្លាតវៃ។
ទិន្នន័យដែលទទួលបានខាងលើនេះ គឺទទួលបានពីការវិភាគ និងវាយតម្លៃលើទីក្រុងចំនួន 165កន្លែងនៅក្នុងប្រទេសចំនួន 80 លើពិភពលោក។ ទិន្នន័យបានបង្ហាញថា ប្រទេសដែលមានការអភិវឌ្ឍខ្លាំង ហើយមានទីក្រុងឆ្លាតវៃភាគច្រើន គឺមានកូនសោគន្លឹះសំខាន់ៗដូចជា ទីក្រុងដែលមានការប្រើប្រាស់ធនធានប្រកបដោយចីរភាព ទីក្រុងដែលមានមូលធនមនុស្សច្រើន ទីក្រុងដែលមានសេវាសាធារណៈល្អចំពោះគ្រប់ប្រភេទមនុស្សទាំងអស់នៅក្នុងសង្គមចម្រុះជាតិសាសន៍ ទីក្រុងដែលមានសេដ្ឋកិច្ចដំណើរការល្អ ទីក្រុងដែលមានបច្ចេកវិទ្យាគ្រប់គ្រងបរិស្ថានល្អ និងជាទីក្រុងដែលមានអភិបាលកិច្ចល្អ។ លើសពីនេះទៅទៀត ទីក្រុងដែលអាចជាប់ឈ្មោះថា ជាទីក្រុងឆ្លាតវៃនៅក្នុងយុគសម័យថ្មីនេះ ក៏ជាទីក្រុងដែលមានការរៀបចំប្លង់គោលសម្រាប់ការអភិវឌ្ឍ និងពង្រីកខ្លួនបានល្អ ជាទីក្រុងដែលមានប្រព័ន្ធទូរគមនាគមន៍ និងការដឹកជញ្ជូនទាំងសាធារណៈ និងឯកជនបានល្អ។
ទិដ្ឋភាពនៃទីក្រុងដ៏ស្រស់ស្អាត វៃឆ្លាត និងមានលក្ខណៈទំនើប
ចំពោះចំណុចលម្អិតដែលស្ថាប័នខាងលើផ្តោតផងដែរនោះគឺ សមត្ថភាពរបស់ទីក្រុងឆ្នើមៗទាំងអស់នោះក្នុងការប្រើប្រាស់បច្ចេកវិទ្យាទំនើបក្នុងការដោះស្រាយបញ្ហារបស់ប្រជាជនឱ្យមានការរស់នៅស្រួល និងសមត្ថភាពក្នុងការគ្រប់គ្រងហានិភ័យសង្គមនានាតាមរយៈបច្ចេកវិទ្យា និងប្រព័ន្ធឆ្លាតវៃ ដូចជាការគ្រប់គ្រងឧក្រិដ្ឋកម្ម ឬប្រព័ន្ធសុវត្ថិភាពសម្រាប់ការរស់នៅ ដើម្បីជំរុញឱ្យមនុស្សកាន់តែចង់ចូលទៅរស់នៅ។
ងាកមកមើលស្ថានភាពជាក់ស្តែងដែលធ្វើឱ្យទីក្រុង ញូវយ៉ក ក្លាយជាទីក្រុងដែលជាប់លំដាប់ជាទីក្រុងឆ្លាតវៃបំផុតលើពិភពលោក គឺដោយសារតែទីក្រុងនេះជាទីក្រុងសេដ្ឋកិច្ចសំខាន់បំផុត ហើយវាក៏ជាទីក្រុងដែលមានគម្រោងអភិវឌ្ឍន៍យ៉ាងល្អិតល្អន់ទៅតាមដំណាក់កាលដែលសិក្សាយ៉ាងហ្មត់ចត់ពីផលប៉ះពាល់ និងផលចំណេញសម្រាប់អ្នករស់នៅគ្រប់គ្នា។ ចំណែកឯទីក្រុងឡុងដ៍ ដែលស្ថិតនៅក្នុងចំណាត់ថ្នាក់លេខ2វិញ គឺជាទីក្រុងដែលមានធនធានមនុស្សខ្លាំងៗច្រើនបំផុត ព្រោះទីក្រុងនេះសម្បូរទៅដោយសាលាពាណិជ្ជកម្ម និងសាកលវិទ្យាល័យល្អៗដែលល្បីល្បាញពេញពិភពលោក និងបើមើលទៅទីក្រុងប៉ារីសដែលឈរក្នុងចំណាត់ថ្នាក់លេខ3វិញនោះគឺ ជាទីក្រុងទេសចរណ៍ដ៏ទាក់ទាញមួយនៅក្នុងពិភពលោក ស្របពេលដែលទីក្រុងនេះមានប្រព័ន្ធដឹកជញ្ជូនល្អបំផុត ដូចជារថភ្លើងលឿនបំផុត ចំណែកផ្លូវសម្រាប់អ្នកជិះកង់ល្អបំផុត និងមានផ្លូវល្បឿនលឿនដែលប្រើប្រាស់បច្ចេកវិទ្យាយ៉ាងសុវត្ថិភាព។
ដើម្បីសម្រេចបាននូវចំណាត់ថ្នាក់ខ្ពស់ៗទាំងអស់នេះ ទីក្រុងនីមួយៗក៏ចាំបាច់មានការគួបផ្សំពីអ្នកគ្រប់គ្រងរដ្ឋបាលរបស់ទីក្រុងដែលពូកែ មានក្រុមហ៊ុនរីកចម្រើនច្រើននៅក្នុងទីក្រុង រួមទាំងមានក្រុមមនុស្សដែលពោរពេញដោយសមត្ថភាពក្នុងការអភិវឌ្ឍគុណភាពនៃការរស់នៅរបស់ប្រជាជនដោយរាប់បញ្ចូលទាំងប្រព័ន្ធរៀបចំល្អប្រសើរផ្នែកលំនៅឋានជាដើម។ ម្យ៉ាងវិញទៀត ការរៀបចំឱ្យទីក្រុងក្លាយជាទីចាំបាច់ដែលត្រូវជំរុញ និងលើកទឹកចិត្តឱ្យមាននវានុវត្តន៍ថ្មីៗដើម្បីដោះស្រាយបញ្ហារួមប្រកបដោយប្រសិទ្ធភាព និរន្តរភាព និងគុណភាពនៃការរស់នៅខ្ពស់៕
គំរូតាងដែលបង្ហាញពីលក្ខណៈរបស់ទីក្រុងឆ្លាតវៃមួយ
July 24, 2018
មជ្ឈមណ្ឌលមន្ទីរពិសោធន៍ឧស្សាហកម្មថ្មី នឹងបញ្ចប់ការសាងសង់នៅដំណាច់ឆ្នាំ2019
មន្ទីរពិសោធន៍ថ្មីមួយសម្រាប់ធ្វើតេស្តពិសោធផលិតផលក្នុងស្រុក និងចេញលិខិតបញ្ជាក់គុណភាពនាំចេញ នឹងបើកឱ្យដំណើរការនៅដំណាច់ឆ្នាំ2019ខាងមុខ។ នេះបើតាមការឱ្យដឹងពីឯកឧត្តម ចមប្រសិទ្ធ រដ្ឋមន្ត្រីក្រសួងឧស្សាហកម្ម និងសិប្បកម្ម។
ឯកឧត្ដម ចម ប្រសិទ្ធ បានឱ្យដឹងនៅក្នុងដំណើរទស្សនកិច្ចទៅទីតាំងមន្ទីរពិសោធន៍ដែលកំពុងត្រូវបានសាងសង់ដោយបានថ្លែងថា៖ “មន្ទីរពិសោធន៍នេះនឹងក្លាយជាមជ្ឈមណ្ឌលធំ និងទំនើបបំផុតមួយនៅកម្ពុជា និងជាមជ្ឈមណ្ឌលមន្ទីរពិសោធន៍ឧស្សាហកម្មទី2 នៅកម្ពុជា” ដោយការសាងសង់ត្រូវរំពឹងថា នឹងបញ្ចប់នៅចុងឆ្នាំ2019 ហើយវានឹងក្លាយជាគន្លឹះសំខាន់ក្នុងការជំរុញសេដ្ឋកិច្ច និងបង្កើតការងារ។
ឯកឧត្តម ចម ប្រសិទ្ធ ពិនិត្យមើលទីតាំងមន្ទីរពិសោធន៍ឧស្សាហកម្ម
បើតាមមន្ត្រីអ្នកនាំពាក្យក្រសួងបានឱ្យដឹងថា មជ្ឈមណ្ឌលមន្ទីរពិសោធន៍នេះនឹងស្ថិតនៅក្រោមវិទ្យាស្ថានស្តង់ដារកម្ពុជា(ISC ៖ The Institute of Standards of Cambodia) ហើយវានឹងត្រូវបានបំពាក់ដោយឧបករណ៍មន្ទីរពិសោធន៍ទំនើបៗដើម្បីពិសោធផលិតផលគ្រប់ប្រភេទសម្រាប់នាំចេញ និងធានាថា ផលិតផលទាំងនោះត្រឹមត្រូវតាមស្តង់ដារ
ជាតិ និងអន្តរជាតិ ហើយក៏អាចប្រកួតប្រជែងជាមួយនឹងផលិតផលផ្សេងៗទៀតបានដែរ។
លោក អ៊ុំ សុថា អ្នកនាំពាក្យក្រសួងឧស្សាហកម្ម និងសិប្បកម្ម បានប្រាប់គេហទំព័រឡារ៉ែនតាមទូរស័ព្ទថា ការពង្រីកសមត្ថភាពមជ្ឈមណ្ឌលមន្ទីរពិសោធន៍នេះបានចែងនៅក្នុងយុទ្ធសាស្ត្រចតុកោណដំណាក់កាលទី3 របស់រាជរដ្ឋាភិបាលអាណត្តិទី5 ក្នុងគោលបំណងចូលរួមចំណែកពង្រឹងគុណភាពផលិតផលរបស់ខ្មែរ។
លោកបន្តថា គោលការណ៍ដែលយើងទៅធ្វើ-ការប្រកួតប្រជែងខាងក្រៅ វាផ្តោតទៅលើគុណ-ភាពជាចម្បង ដូច្នេះដើម្បីឱ្យប្រាកដថា ទំនិញយើងត្រូវស្តង់ដារឬនៅ? យើងត្រូវលើកទឹកចិត្តផ្នែកឯកជន ធ្វើយ៉ាងណាឱ្យគាត់ងាកមកផលិតតាមស្តង់ដារ ដែលអាចជ្រៀតចូលទីផ្សារក្រៅប្រទេសក៏បាននិងប្រកួតប្រជែងក្នុងស្រុកក៏បាន គឺយើងត្រូវពង្រីកសមត្ថភាពក្នុងមន្ទីរពិសោធន៍ឧស្សាហកម្មកម្ពុជា។
លោកបញ្ជាក់ថា កន្លងមកយើងមានមន្ទីរពិសោធន៍ឧស្សាហកម្មចាស់ ស្ថិតនៅតាមបណ្តោយផ្លូវជាតិលេខ5 តែមានទំហំតូច និងឧបករណ៍ក៏មិនទំនើបដែរ។ ថ្វីដ្បិតតែមន្ទីរពិសោធន៍យើងត្រូវបានទទួលស្គាល់ពីស្ថាប័នពិសោធន៍អន្តរជាតិ ទទួលបានISOពីអង្គការស្តង់ដារអន្តរជាតិហើយថា មន្ទីរពិសោធន៍របស់យើងមានលទ្ធភាព សមត្ថភាពវាយតម្លៃ និងធ្វើពិសោធលើផលិតផលរបស់យើងបានមែនក្ដី តែនៅមិនទាន់ឆ្លើយតបទៅនឹងទំហំរោងចក្រ-សិប្បកម្មដែលកំពុងរីកចម្រើននាពេលសព្វថ្ងៃ-នេះទេ ព្រោះគ្រាន់តែរោងចក្រ យើងមានប្រមាណជាង1,600កន្លែង ឯសហគ្រាសធុនតូច និងមធ្យមមានប្រមាណជា10ម៉ឺន ដូច្នេះការពង្រីកមន្ទីរពិសោធន៍ថ្មីជាការចាំបាច់ណាស់។
លោកបន្តថា គម្រោងនេះថ្មី តែអង្គភាពមិនមែនថ្មីទេ ដែលថាថ្មីនោះគឺ ការពង្រីកសមត្ថភាពព្រោះមន្ទីរពិសោធន៍ថ្មីនេះនឹងត្រូវបានបង្កើតឡើងដោយមានកម្ពស់ 7ជាន់ ដែលមានសមត្ថភាពធំជាងមុន និងបំពាក់ដោយឧបករណ៍ទំនើបៗជាងបន្ទប់ពិសោធន៍ដែលមានស្រាប់នៅក្នុងខណ្ឌឫស្សីកែវនោះ និងប្រហែលជាត្រូវចំណាយច្រើនទៀតផង តែយើងក៏មានបណ្តាប្រទេសជាច្រើនចង់ជួយជាឧបករណ៍ពិសោធន៍ទំនើបៗដែរ ប៉ុន្តែដោយសារយើងមិនទាន់មានមន្ទីរពិសោធន៍ធំៗដែលអាចដាក់ឧបករណ៍ពិសោធន៍ទំនើបៗទាំងនោះបាន ទើបយើងត្រូវខិតខំរៀបចំទីតាំងថ្មីនេះសិន។
អ្នកនាំពាក្យក្រសួងរូបនោះបានបញ្ជាក់ទៀតថា៖ “គោលបំណងរបស់មជ្ឈមណ្ឌលមន្ទីរពិសោធន៍ថ្មីរបស់យើង គឺដើម្បីជួយដល់ក្រុមហ៊ុនផលិតកម្មក្នុងស្រុក ក្នុងវិស័យឧស្សាហកម្ម និងសិប្បកម្មទាំងមូល”។ លោកបានបន្ថែមថា រដ្ឋាភិបាលនឹងចាប់ផ្តើមធ្វើការចរចាជាមួយប្រទេសអ្នកទិញដើម្បីឱ្យពួកគេទទួលស្គាល់លទ្ធផលនៃមន្ទីរពិសោធន៍នេះ។
លោកបញ្ជាក់ថា មន្ទីរពិសោធន៍ថ្មីនេះនឹងត្រូវធ្វើឱ្យដំណើរការ តែរោងចក្រ-សហគ្រាសត្រូវបង់ថ្លៃសេវាតាមមុខទំនិញ ឬផលិតផលដែលខ្លួនបានផលិតប៉ុន្តែមានពេលខ្លះផលិតផលដែលត្រូវវិភាគយើងមិនទាមទារឱ្យមានការបង់ថ្លៃសេវាទេ ឧទាហរណ៍ដូចជាផលិតផលមានជាតិពុល ឬផលិតផលដែលយើងសង្ស័យ ក្រុមអធិការកិច្ចយើងនឹងចុះទៅធ្វើតែម្តង ក្នុងគោលដៅការពារផលប្រយោជន៍សាធារណៈ។
លោកបញ្ជាក់ថា មួយវិញទៀត វាគឺជាតម្រូវការមួយដែលយើងត្រូវធ្វើពិសោធឱ្យគេ និងជូនដល់វិស័យឯកជនក្នុងនាមជាអ្នកផ្តល់សេវាឱ្យអតិថិជនថា តើផលិតផលរបស់ពួកគេត្រូវតាមកម្រិតស្តង់ដារ និងមានគុណភាពគ្រប់គ្រាន់ឬទេ? គេត្រូវយកផលិតផលនោះទៅមន្ទីរពិសោធន៍ ដើម្បីគេទទួលបានវិញ្ញាបនបត្រដែលបញ្ជាក់ពីផលិតផលរបស់គេ។នៅពេលគេទទួលបានវិញ្ញាបនបត្របញ្ជាក់ពីគុណ-ភាពនៃផលិតផលពីមជ្ឈមណ្ឌលមន្ទីរពិសោធន៍យើងហើយ ផលិតផលរបស់ក្រុមហ៊ុន-សហគ្រាសទាំងនោះនឹងមានកម្រិតស្តង់ដារត្រឹមត្រូវតែម្តង។
លោកបានបន្ថែមថា វិស័យឯកជន គាត់នឹងលែងព្រួយបារម្ភពីបញ្ហានាំផលិតផលចេញទៀតហើយ ព្រោះផលិតផលដែលបានឆ្លងកាត់មន្ទីរពិសោធន៍ថ្មីនេះនឹងមានការទទួលស្គាល់ជាអន្តរជាតិ ដោយហេតុថា មន្ទីរពិសោធន៍ថ្មីរបស់យើងនេះមានការ-ទទួលស្គាល់ពីស្ថាប័នអន្តរជាតិរួចហើយ។ យើងកំពុងរង់ចាំមន្ទីរពិសោធន៍ថ្មីដែលយើងរំពឹងថា នឹងធ្វើឱ្យអ្វីៗកាន់តែមានភាពប្រសើរឡើង និងកាន់តែងាយស្រួលសម្រាប់យើង ព្រោះអ្វីៗដែលយើងរំពឹងទុក និងចាប់ផ្តើមធ្វើនេះ គឺក្នុងគោលបំណងជួយដល់វិស័យឯកជនក្នុងទិសដៅជំរុញការរីកចម្រើនសេដ្ឋកិច្ចរបស់ប្រទេសយើង៕
July 24, 2018
ឆ្នាំ2019 កម្ពុជានឹងជំរុញកំណើនផលិតកម្មបន្លែមានសុវត្ថិភាព និងគុណភាពខ្ពស់
នៅឆ្នាំ2019 ប្រទេសកម្ពុជានឹងផលិតបន្លែមានសុវត្ថិភាព និងគុណភាពខ្ពស់ចំនួន 60,000 តោន និងអង្ករក្រអូបចំនួន 15ម៉ឺនតោនក្នុងមួយឆ្នាំដូចមានចែងក្នុងផែនការលើកកម្ពស់ម្ហូបអាហាររបស់រដ្ឋាភិបាលឆ្នាំ2017-2019។ នេះបើតាមការឱ្យដឹងពីឯកឧត្តម វេង សាខុន រដ្ឋមន្ត្រីក្រសួងកសិកម្ម និងនេសាទ។
រដ្ឋមន្ត្រីក្រសួងកសិកម្មបាននិយាយថា កម្មវិធីរបស់រដ្ឋាភិបាលក្នុងការជំរុញទិន្នផលកសិកម្មកំពុងមានដំណើរការល្អក្នុងការសម្រេចបានគោលដៅរបស់ខ្លួន ប៉ុន្តែក៏បានអំពាវនាវដល់កសិករ និងក្រុមហ៊ុនឱ្យជំរុញទំនើបកម្ម និងគោរពតាមស្តង់ដារអន្តរជាតិនៃការអនុវត្តកសិកម្ម និងផលិតកម្មដើម្បីធានានូវជោគជ័យរបស់កម្មវិធី។
យោងតាមក្រសួងកសិកម្មបានឱ្យដឹងថា កម្មវិធី “ជំរុញការព្យាករស្បៀងអាហារ2017-2019”ដែលបានចាប់ផ្តើមកាលពីឆ្នាំមុនដើម្បីបង្កើនផលិតកម្មកសិកម្មនៅតាមខេត្តសំខាន់ៗចំនួន8 ត្រូវបានគេរំពឹងថា នឹងផលិតបន្លែគ្មានជាតិគីមីច្រើនជាង 5,000តោនក្នុងឆ្នាំ2018។ ពោលគឺកើនឡើង 2ដងធៀបនឹងទិន្នផលកាលពីឆ្នាំមុន។ កម្មវិធីនេះបានផ្តល់បន្លែគ្មានជាតិគីមី2,500តោនកាលពីឆ្នាំមុនដោយបានចុះបញ្ជីគ្រួសារចំនួន 820នៃគ្រួសារកសិករក្នុងស្រុក។
ដោយមានថវិកាចំនួន 20លានដុល្លារនោះ គំនិតផ្តួចផ្តើមនៃកម្មវិធីនេះ គឺដើម្បីបង្កើនផលិតកម្មបន្លែ និងស្រូវនៅតាមខេត្តសំខាន់ៗ ចំនួន8 រួមមានខេត្តកណ្តាល បាត់ដំបង ពោធិ៍សាត់ ព្រៃវែង កំពង់ចាមត្បូងឃ្មុំ កំពង់ធំ និងសៀមរាប។ ការចាប់ផ្តើមគម្រោងនេះដើម្បីជំរុញការផលិតអង្ករក្រអូប និងបន្លែសរីរាង្គកាត់បន្ថយការនាំចូលបន្លែពីក្រៅស្រុក និងបង្កើនប្រាក់ចំណូលសម្រាប់កសិករខ្នាតតូច។
ទោះយ៉ាងណាក៏ដោយ ដើម្បីសម្រេចបាននូវគោលដៅដ៏មានមហិច្ឆតារបស់កម្មវិធីនេះ លោករដ្ឋមន្ត្រីបាននិយាយថា កសិករ និងអ្នកផលិតត្រូវតែធ្វើតាមគោលការណ៍ណែនាំដែលចេញដោយរដ្ឋាភិបាល។ កសិករត្រូវខិតខំគោរពតាមគោលការណ៍អនុវត្តន៍កសិកម្មល្អ និងជំរុញឱ្យក្រុមហ៊ុនអនុវត្តគម្រោងធ្វើកសិកម្មតាមកិច្ចសន្យា។
ឯកឧត្តមបានបញ្ជាក់ថា៖ “ខ្សែសង្វាក់ផលិតកម្មទី2 ចាំបាច់ត្រូវធ្វើឱ្យប្រសើរឡើង ហើយអ្នកផលិតត្រូវពិចារណាកែលម្អស្តង់ដារវេចខ្ចប់ ដើម្បីបង្កើនតម្លៃផលិតផលរបស់យើង និងធ្វើឱ្យកាន់តែមានភាពល្អប្រសើរនៅបរទេស និងដើម្បីកាត់បន្ថយការពឹងផ្អែករបស់កម្ពុជាលើបន្លែដែលនាំចូល ជាមួយនឹងគោលដៅនៃផែនការនេះ នឹងផ្លាស់ប្តូរវិស័យកសិកម្មកម្ពុជាទៅជាឧស្សាហកម្មប្រកួតប្រជែងទំនើប និងធន់នឹងអាកាសធាតុ”។
ឯកឧត្តម ហ៊ាន វណ្ណហន អគ្គនាយកនៃអគ្គនាយកដ្ឋានកសិកម្មបានមានប្រសាសន៍ប្រាប់ឡារ៉ែនថា កម្មវិធីពិព័រណ៍បង្កើនគុណភាពផលិតផលកសិកម្មដែលបាន និងកំពុងធ្វើតាមបណ្តាខេត្តមួយចំនួននោះ គឺជាផ្នែកមួយនៃកម្មវិធី “គម្រោងជំរុញផលិតកម្មស្បៀងអាហារឆ្នាំ2017-2019”។ កម្មវិធីនេះបានបង្ហាញថា អ្នកផលិតក្នុងស្រុកកំពុងទទួលបានផលប្រយោជន៍ពីកម្មវិធី។ “ដោយផ្អែកលើបទពិសោធរបស់ខ្ញុំនៅឯពិព័រណ៍នេះ ខ្ញុំអាចមើលឃើញថា កម្មវិធីនេះកំពុងជួយបង្កើនគុណភាពផលិតផលកសិកម្មដែលអនុញ្ញាតឱ្យកសិករទទួលបានទីផ្សារថ្មី”។
ឯកឧត្តមមានប្រសាសន៍ពន្យល់ថា កម្មវិធីនេះនឹងជួយកាត់បន្ថយការពឹងផ្អែករបស់ប្រទេសកម្ពុជាទៅលើការនាំចូលបន្លែ ដោយតម្រូវការមិនត្រឹមតែសម្រាប់ផលិតផលសរីរាង្គប៉ុណ្ណោះទេ គឺនៅមានបន្លែសុវត្ថិភាពនៅក្នុងប្រទេសយើងដែលឥឡូវនេះក៏មានតម្លៃខ្ពស់ផងដែរ។ ឯកឧត្ដមបន្តថា កសិករកាន់តែច្រើនកំពុងអនុវត្តការងារកសិកម្មបានល្អដើម្បីការរីកលូតលាស់ផលិតផលសរីរាង្គមានគុណ-ភាព និងបន្លែមានសុវត្ថិភាព។
ឯកឧត្តមក៏បានបញ្ជាក់ប្រាប់កាសែតឡារ៉ែនទៀតថា ទីផ្សារសរីរាង្គកំពុងជួយបង្កើនការយល់ដឹង និងតម្រូវការបន្លែគ្មានជាតិគីមី។ ឯកឧត្ដមបានមានប្រសាសន៍ថា៖ “ទីផ្សារសរីរាង្គ គឺជាភ័ស្តុតាងបញ្ជាក់ថាបណ្តាខេត្តរបស់យើងអាចផលិតបន្លែដែលមានសុវត្ថិភាពបានហើយ ដែលទោះជាយ៉ាងណា វាក៏នឹងជួយយើងកាត់បន្ថយការនាំចូលបន្លែពីបរទេសដែរ”។
ឯកឧត្តមបន្ថែមថា បច្ចុប្បន្នកសិករកម្ពុជាតាមរយៈពិព័រណ៍ទីផ្សារសរីរាង្គនៃបណ្តាខេត្តមួយចំនួន រួមមានខេត្តកំពង់ចាម កណ្តាល និងព្រៃវែង ត្រូវបានគេរំពឹងថា នឹងផលិតបន្លែគ្មានជាតិគីមីបានច្រើនជាង5,000តោនក្នុងឆ្នាំ2018 ដូច្នេះក្នុងឆ្នាំ2019 ខាងមុខ តាមរយៈ“គម្រោងជំរុញផលិតកម្មស្បៀងអាហារឆ្នាំ2017-2019” ក្រសួងនឹងជំរុញការបង្កើនផលិតកម្មបន្លែដែលមានសុវត្ថិភាព និងគុណភាពខ្ពស់ឱ្យដល់ចំនួន 60,000 តោនក្នុងឆ្នាំ2019។
ឯកឧត្តម វេង សាខុន រដ្ឋមន្ដ្រីក្រសួងកសិកម្មបានមានប្រសាសន៍ថា៖កម្មវិធីព្យាករស្បៀងអាហារឆ្នាំ2017-2019 នឹងផ្តល់នូវការបញ្ចូលដ៏សំខាន់ដែលនឹងត្រូវប្រើសម្រាប់ធ្វើសេចក្តីព្រាងគោលនយោបាយជាតិសម្រាប់ការអភិវឌ្ឍវិស័យកសិកម្មរបស់ប្រទេសកម្ពុជាឆ្នាំ2019-2030។ លោកបានបញ្ជាក់ថា យុទ្ធសាស្ត្រនាពេលខាងមុខនេះនឹងស្វែងរកការធ្វើទំនើបកម្មឧស្សាហកម្ម និងបង្កើនការប្រកួតប្រជែង ចីរភាព និងភាពធន់ទ្រាំនឹងអាកាសធាតុ៕
July 24, 2018
វិធី9យ៉ាងការពារសុខភាពក្នុងរដូវវស្សា
ការការពារសុខភាពនៅក្នុងរដូវភ្លៀងឱ្យបានល្អ អាចជារឿងពិបាកសម្រាប់មនុស្សគ្រប់រូប ព្រោះថាអាកាសធាតុនៅក្នុងរដូវនេះងាយនឹងផ្លាស់ប្ដូរគ្រប់ពេល បន្តិចក៏ក្ដៅ បន្តិចក៏ភ្លៀង បន្តិចក៏ត្រជាក់ ទើបធ្វើឱ្យរាងកាយមិនអាចទទួលយកសភាពផ្លាស់ប្តូរបែបនេះបាន ធ្វើឱ្យមានជំងឺកើតឡើងទាល់តែបាន។ យកល្អ អ្នកគួរតែសាកល្បងថែរក្សាសុខភាពរបស់អ្នកតាមវិធីសាស្ត្រដូចខាងក្រោមនេះ។
1. ទទួលទានទឹកយ៉ាងតិចក្នុងមួយថ្ងៃ1.5លីត្រ
ក្នុងមួយថ្ងៃ អ្នកគួរតែទទួលទានទឹកយ៉ាងហោចណាស់មួយថ្ងៃ1.5លីត្រ ដើម្បីបំពេញជាតិទឹកទៅដល់សរសៃឈាម ហើយទឹកនឹងទៅជួយឱ្យរាងកាយមានតុល្យភាព និងជួយកាត់បន្ថយឱកាសនៃការឆ្លងមេរោគផ្សេងៗ ដែលចូលវាយឡុករាងកាយអ្នក។ ម្យ៉ាងទៀត ការទទួលទានបានគ្រប់គ្រាន់ នឹងជួយឱ្យរាងកាយមានតុល្យភាព មិនកើតជំងឺផ្ដាសាយបានដោយងាយថែមទៀតផង។
2. គេងឱ្យបានគ្រប់គ្រាន់មួយថ្ងៃពី6-8ម៉ោង
អ្នកគួរសម្រាក ឬគេងឱ្យបានគ្រប់គ្រាន់យ៉ាងហោចណាស់ពី6ទៅ8ម៉ោង ដើម្បីឱ្យរាងកាយមានឱកាសជួសជុលកោសិកាខូចខាតឡើងវិញ ខណៈពេលអ្នកកំពុងគេងលក់ តែប្រសិនបើអ្នកពិបាកគេង ឬគេងមិនសូវលក់វិញនោះ អ្នកគួរតែទទួលទានផ្លែចេកជាជំនួយ ព្រោះនៅក្នុងផ្លែចេកមានសារធាតុ Triptophane ដែលជួយឱ្យអ្នកឆាប់គេងលក់។
3. យកឆ័ត្រ និងអាវភ្លៀងដាក់តាមខ្លួនជានិច្ច
នៅក្នុងរដូវភ្លៀងបែបនេះ កុំភ្លេចយកឆ័ត្រ និងអាវភ្លៀងទៅតាមខ្លួនគ្រប់ពេលដែលអ្នកចេញទៅខាងក្រៅ ដើម្បីកុំឱ្យរាងកាយទទឹកទឹកភ្លៀងនៅពេលភ្លៀងធ្លាក់ ព្រោះវាជួយកាត់បន្ថយការកើតជំងឺគ្រុនក្ដៅ និងគ្រុនផ្ដាសាយបានផងដែរ។
4. រក្សាខ្លួនឱ្យស្ងួតជានិច្ច
ដើម្បីធ្វើឱ្យរាងកាយមានសីតុណ្ហភាពអាចទប់ទល់នឹងអាកាសធាតុខាងក្រៅបានល្អ មិនឱ្យកើតជំងឺផ្សេងៗដូចជា ជំងឺសើស្បែក និងរោគរលាកសួតបានដោយងាយ អ្នកត្រូវតែធ្វើខ្លួនឯងស្ងួតជានិច្ច។ នៅពេលអ្នកសើមទទឹកទឹកភ្លៀងថ្មីៗ អ្នកគួរតែឆាប់ប្ដូរសម្លៀកពំពាក់ឱ្យបានភ្លាមៗ ដើម្បីឱ្យរាងកាយមានភាពកក់ក្ដៅឡើងវិញ តែប៉ុណ្ណេះក៏ជួយការពារខ្លួនអ្នកពីជំងឺសើស្បែក និង រោគរលាកសួតបានហើយ។
5. មិនត្រូវដើរចូលកន្លែងដែលមានទឹកលិច
នៅកន្លែងមានទឹកលិច ចាត់ទុកថាជាកន្លែងដែលត្រូវហាមប្រាមតែម្ដង ព្រោះវាអាចបង្កឱ្យកើតមានជំងឺសើស្បែក ជំងឺថ្លើម និងរោគរលាកគ្រលៀន ដែលបង្កដោយទឹកកខ្វក់ដែលវាជាគ្រោះថ្នាក់មួយដែលគួរឱ្យបារម្ភបំផុតក្នុងរដូវភ្លៀងធ្លាក់។
6. ការពារកុំឱ្យមូសខាំ
នៅរដូវធ្លាក់ភ្លៀង មានសត្វមូសជាច្រើនដែលអាចបង្កជាជំងឺគ្រុនឈាមបានដូច្នេះហើយទើបអ្នកត្រូវកាពារកុំឱ្យមូសខាំ ដោយការគេងនៅក្នុងមុង ឬប្រើប្រាស់ថ្នាំបណ្ដេញមូសចេញពីលំនៅឋានរបស់អ្នក និងគួរស្លៀកពាក់ឱ្យបានជិតល្អផងដែរ។
7. ប្រើប្រេងលាបប្រភេទ Eucalyptus Oil
នៅពេលដែលអ្នកតឹងច្រមុះ ឬពិបាកក្នុងការដកដង្ហើម អ្នកគួរប្រើប្រេងលាបប្រភេទ Eucalyptus Oil លាបនៅលើបរិវេណទ្រូង ឬខ្នងរបស់អ្នក ដើម្បីឱ្យប្រព័ន្ធផ្លូវដង្ហើមរបស់អ្នកមានភាពងាយស្រួយឡើងវិញ។
8. ទទួលទានអាហារដែលចម្អិនឆ្អិនថ្មីៗ
អ្នកគួរតែជ្រើសរើសទទួលទានអាហារណាដែលចម្អិនឆ្អិនថ្មីក្ដៅៗ ដើម្បីការពារប្រព័ន្ធរំលាយអាហាររបស់អ្នកមិនឱ្យកើតមានជំងឺ ដែលបង្កដោយសារធាតុពុលដែលមាននៅក្នុ្ងងអាហារ។
9. ទទួលទានតែឱសថបុរាណក្ដៅឧណ្ហៗ
ជាប្រចាំ នៅថ្ងៃដែលមានភ្លៀងធ្លាក់ អាកាសធាតុតែងតែប្រែទៅជាត្រជាក់ខ្លាំង ដូច្នេះអ្នកគួរតែទទួលទានតែឱសថបុរាណក្ដៅឧណ្ហៗ 1 កែវ ដើម្បីឱ្យរាងកាយរបស់អ្នកមានសីតុណ្ហភាពធម្មតា ការពារជំងឺឆ្លង និងបាក់តេរី ដែលមកជាមួយនឹងទឹកភ្លៀង ហើយម្យ៉ាងទៀត ការទទួលទានទឹកតែក្តៅឧណ្ហៗ ក៏អាចជួយបន្ធូរបន្ថយភាពត្រជាក់បានយ៉ាងល្អផងដែរ៕
July 23, 2018
ដឹងទេថា រាងកាយមនុស្សមានឈាមប៉ុន្មានលីត្រ?
រាងកាយរបស់មនុស្សយើងនឹងរស់នៅបានក៏ដោយសារខ្យល់សម្រាប់ដកដង្ហើម អាហារ និងទឹកសម្រាប់ការរស់នៅរបស់ជីវិត តែការពិតក្រៅពីបច្ច័យទាំងអស់នេះដែលជាចំណែកផ្គុំចម្បងៗហើយនោះ រាងកាយរបស់យើងនៅត្រូវមានវត្ថុមួយទៀតនៅក្នុងរាងកាយរបស់យើងផងដែរ ទើបធ្វើឱ្យការរស់នៅរបស់ជីវិតដំណើរការទៅយ៉ាងល្អឥតខ្ចោះបំផុត នោះគឺប្រព័ន្ធឈាម។ រាងកាយនឹងត្រូវពឹងអាស្រ័យប្រព័ន្ធការហូរវិលរបស់ឈាម (ហៅថា ប្រព័ន្ធឈាមរត់) ធ្វើជាអ្នកចិញ្ចឹមអវយវៈគ្រប់ផ្នែករបស់រាងកាយ។
“ឈាម” ជាវត្ថុរាវ ប្រកបដោយទឹកឈាម គ្រាប់ឈាម កោសិកាគ្រាប់ឈាមក្រហម កោសិកាគ្រាប់ឈាមស។ រាងកាយរបស់យើងនឹងមានឈាមនៅខាងក្នុងប្រមាណជា5លីត្រ បើធៀបនឹងទម្ងន់ខ្លួនក៏ស្មើនឹង 7%-8% នៃទម្ងន់ខ្លួន។ បេះដូងជាអវយវៈដែលសំខាន់បំផុតក្នុងប្រព័ន្ធហូរវិលរបស់ឈាម មានតួនាទីបឺត បាញ់ឈាមទៅចិញ្ចឹមរាងកាយរបស់យើង ដូច្នេះឃើញទេថា បេះដូង របស់យើងទទួលមុខនាទីសំខាន់ និងធ្វើការធ្ងន់ក្នុងការបញ្ជូនឈាមទៅឱ្យរាងកាយ ទាំងយប់ ទាំងថ្ងៃ ជាប់រហូត24ម៉ោងមិនបានឈប់សម្រាកឡើយ ដូច្នេះការប្រណិប័តន៍ដ៏ល្អជាមួយបេះដូងរបស់យើងក៏គឺ ការបានគេងលក់សម្រាកយ៉ាងគ្រប់គ្រាន់ ព្រោះពេលដែលយើងគេងលក់ បេះដូងនឹងធ្វើការក្នុងចង្វាក់ដែលធូរស្រាល តែមិនបានឈប់ដើរទេ (បេះដូងឈប់ដើរ = ស្លាប់) គួរឱ្យអាណិតណាស់…។
ប្រព័ន្ធឈាមរត់នឹងមានតួនាទីនាំយកសារធាតុផ្សេងៗបញ្ជូនទៅទូទាំងរាងកាយ ដូចជា សារធាតុអាហារ ហ្គាសផ្សេងៗ សារធាតុរ៉ែ អ័រម៉ូន និងទទួលយកវត្ថុកាកសំណល់បញ្ជូនចេញពីរាងកាយដោយការដឹកជញ្ជូនទៅតាមសរសៃឈាម។ នៅក្នុងឈាមនឹងប្រកបទៅដោយវត្ថុរាវដែលហៅថា “ផ្លាស្មា” មានតួនាទីដឹកជញ្ជូនសារធាតុរ៉ែ អ័រម៉ូន អង់ទីគ័រ សារធាតុអាហារផ្សេងៗទៅក្នុងកោសិកាផ្សេងៗរបស់រាងកាយ និងទទួលយកវត្ថុសំណល់ពីកោសិកាហូរត្រឡប់ទៅតាមបំពង់ទឹករងៃ។ ចំណែកឈាមដែលជាវត្ថុរឹង គេហៅថាកម្ទេចឈាម គ្រប់ពេលដែលកើតមានរបួស កម្ទេចឈាមក៏នឹងបញ្ចេញសារធាតុគីមីឈ្មោះ “ហ្វៃប្រ៊ីន” ចេញមកបំពេញតួនាទីជួយធ្វើឱ្យឈាមបង្កកខ្លួននៅត្រង់មុខរបួស ដើម្បីទប់ឱ្យឈាមឈប់ហូរចេញ។
ឥឡូវនាំគ្នាមកថែបំប៉នឈាមរបស់យើងវិញប្រសើរជាង ៖
សារធាតុដែក : ចាំបាច់សម្រាប់ការផលិត ហេម៉ូហ្គោប៊ីន (គ្រាប់ឈាមក្រហម) ដែលជាផ្នែកផ្គុំសំខាន់របស់គ្រាប់ឈាមក្រហម ជាអ្នកដឹកនាំអុកស៊ីហ្ស៊ែនទៅចិញ្ចឹមអវយវៈ និងសាច់ជាលិកាទូទាំងរាងកាយ។ សារធាតុដែកមាននៅក្នុងបន្លែស្លឹកផ្ទី សណ្ដែកកួរ ផ្សិតចំបើង ស្លឹកជីរ និងស្លឹកម្រះព្រៅ។ល។
ហ្វូលេត : សំខាន់សម្រាប់ការផលិតកោសិកាគ្រាប់ឈាមក្រហម។ ហ្វូលេតមាននៅក្នុង មើមទំពាំងបារាំង ផ្កាគូឆាយ ស្លឹកបាស ស្ពៃក្ដោបគ្រាប់សណ្ដែកស្ងួត និងក្រូច។
វីតាមីន C : ជួយឱ្យរាងកាយបឺតជ្រាបយកហ្វូលេត និងសារធាតុដែកពីបន្លែផ្លែឈើបានល្អ។ វីតាមីនជូរៗមួយនេះនឹងមាននៅក្នុងផ្លែត្របែក ក្រូចឆ្មារ កន្ទួតព្រៃ ស្រ្តបឺរី ហើយក៏មាននៅក្នុងបន្លែពណ៌បៃតងដែលយកមកចម្អិនជាម្ហូបអាហារយ៉ាងឆ្ងាញ់ដែរគឺ ប្រូខូលី៕
July 23, 2018
កុំខ្លាចការប្រឡង ព្រោះវាជាពេលរីករាយដើម្បីបញ្ចេញសមត្ថភាព
បើគេចមិនផុតពីការរឹតបន្តឹងទេនោះ មានរឿងអ្វីត្រូវខ្លាចការប្រឡងបាក់ឌុប ព្រោះខ្លាចក៏ត្រូវតែប្រឡង ហើយមិនខ្លាចក៏ត្រូវតែចូលរួមប្រឡង ដើម្បីឆ្លងដំណាក់កាលយ៉ាងសំខាន់នេះដូចគ្នា។ការភ័យខ្លាចមុនប្រឡងមិនមែនជាដំណោះស្រាយល្អដើម្បីទទួលបានលទ្ធផលប្រកបដោយមោទនភាពសម្រាប់ខ្លួនឯង និងគ្រួសារនោះទេ តែការគ្រប់គ្រងអារម្មណ៍ ហើយងាកមករិះរកវិធីគិតឱ្យល្អទើបជាវិធីសាស្រ្តដើម្បីរុញច្រានឱ្យទទួលបានលទ្ធផលល្អ។
អតីតសិស្សនិទ្ទេស A យុវជន លឹម រស្មី បានលើកឡើងថា អ្នកណាក៏មានអារម្មណ៍ភ័យដែរនៅពេលប្រឡង គ្រាន់តែភ័យតិច ឬច្រើនតែប៉ុណ្ណោះព្រោះអ្វីដែលពួកគេបារម្ភគឺមិនទុកចិត្តលើសមត្ថភាពខ្លួនឯង និងបារម្ភថា ខ្លាចគ្រួដាក់លំហាត់មកមិនចេះ រួមទាំងកង្វល់ជាច្រើនទៀត។ ការព្រួយបារម្ភអាចធ្វើឱ្យយើងភ្លេចអស់ពីរូបមន្ត និងមានអារម្មណ៍ជ្រួលច្របល់ដែលធ្វើឱ្យរកនឹកមិនឃើញនូវអ្វីដែលធ្លាប់ចេះកន្លងមក ដែលនាំឱ្យយើងទទួលលទ្ធផលមិនបានល្អនៅពេលប្រឡង។ ហេតុនេះដើម្បី ដោះស្រាយ បេក្ខជនប្រឡងគួរចាប់ផ្តើមដើរដោយកុំមានអារម្មណ៍ថាភ័យ ព្រោះទោះជាយ៉ាងណាក៏គេចមិនផុតដែរ ហេតុនេះត្រូវតែប្រឈម។
យុវជន លឹម រស្មី បាននិយាយថា៖ “នៅពេលទទួលបានក្រដាសប្រឡងលើតុ អ្វីដែលត្រូវធ្វើមុនគេគឺប្រមូលអារម្មណ៍ដកដង្ហើមឱ្យវែងៗមើលវិញ្ញាសាឱ្យអស់ថា តើមានចំណុចសំខាន់ៗចំនួនប៉ុន្មាន? ហើយចំណាំថា តើលំហាត់ ឬសំណួរមួយណាដែលយើងចេះ និងចំណុចណាខ្លះដែលមិនសូវចេះ។ បន្ទាប់មកចាប់ផ្តើមធ្វើចំណុចដែលអាចធ្វើបានមុន និងដេញចុះទៅចំណុចដែលយើងមិនសូវចេះ”។
សិស្សពូកែខាងលើបានលើកឡើងផងដែរថាប្រសិនបើយើងអង្គុយតែភ័យ ហើយផ្តោតតែលើចំណុចដែលយើងមិនចេះ នោះវាកាន់តែធ្វើឱ្យយើងមិនអាចដោះស្រាយលំហាត់ទាន់ពេល និងខាតបង់ពេលវេលាច្រើនសម្រាប់ការប្រឡង។ ហេតុនេះការចាប់ផ្តើមធ្វើសំណួរណាដែលយើងយល់មុនដោយការប្រុងប្រយ័ត្នអាចជាវិធីមួយដើម្បីស្រោចស្រង់ស្ថានការណ៍បានខ្លះ ចំពោះមុខវិជ្ជាដែលយើងប្រឡង។ ម្យ៉ាងវិញទៀត នៅពេលដែលយើងដោះស្រាយលំហាត់ដែលយើងចេះហើយ យើងអាចមានអារម្មណ៍ថា ទុកចិត្តលើខ្លួនឯងច្រើនជាងមុន ដែលពេលខ្លះវាអាចធ្វើឱ្យយើងមានអារម្មណ៍មូលហើយនឹកឃើញនូវចំណុចនានាដែលឈានទៅដល់ការធ្វើលំហាត់មួយចំនួនផ្សេងទៀតដែលមិនទាន់អាចធ្វើបាន។ ក្រៅពីនេះ នៅពេលដែលយើងចាប់ផ្តើមប្រឡងសូមកុំខ្វល់ខ្វាយច្រើនពីមនុស្សដែលនៅជុំវិញខ្លួន ដូចជាអនុរក្ស ឬអ្នកត្រួតពិនិត្យអគារ ព្រោះយើងធ្វើដោយសមត្ថភាព ហេតុនេះមិនចាំបាច់ខ្វល់ខ្វាយច្រើននោះទេ សូមកុំបារម្ភ ហើយបន្តធ្វើលំហាត់នោះឱ្យចប់ និងយកចិត្តទុកដាក់តែលំហាត់ដែលមាននៅលើក្រដាសបានហើយ។
គ្រូផ្នែកគណិតវិទ្យា និងជាអតីតសិស្សពូកែទូទាំងប្រទេស លោក ចេង បូរិទ្ទ បានលើកឡើងថា សិស្សប្រឡងដែលភ័យ ភាគច្រើនមកពីគិតហួសពីការពិត និងមិនបានត្រៀមខ្លួនឱ្យបានល្អសម្រាប់ការប្រឡង។ វិធីល្អដែលមិនធ្វើឱ្យយើង ភ័យគឺ ត្រៀមខ្លួនឱ្យបានល្អមុនពេលប្រឡងដោយការរៀបចំសម្ភារចាំបាច់សម្រាប់ការប្រឡងឱ្យបានគ្រប់គ្រាន់ និងអនុវត្តលំហាត់ដែលធ្លាប់ប្រឡងឱ្យបានច្រើន។ នៅពេលដែលយើងស៊ាំជាមួយនឹងការធ្វើលំហាត់ ហើយនឹងអាចមានអារម្មណ៍ថា លែងសូវបារម្ភពីការប្រឡងហើយ ព្រោះវិញ្ញាសាប្រឡងមានស្តង់ដារស្រដៀងគ្នា និងមិនចេញទៅណាឆ្ងាយពីកម្រិតដែលយើងរៀនរាល់ថ្ងៃនេះទេ។
លោក ចេង បូរិទ្ទ បាននិយាយថា៖ “នៅពេលដែលយើងបានត្រៀមរួចរាល់ហើយ យើងនឹងលែងមានអារម្មណ៍ភ័យហើយ តែជំនួសមកវិញនូវអារម្មណ៍រំភើបសម្រាប់ការប្រឡង ព្រោះយើងដឹងខ្លួនឯងថា នេះជាពេលដែលត្រូវបញ្ចេញសមត្ថភាពឱ្យបានល្អ ហើយយើងប្រាកដជាអាចធ្វើវាបាន មិនមែនជារឿងដែលត្រូវភ័យនោះទេ”។
បន្ថែមពីលើនេះលោក បូរិទ្ទ បានលើកឡើងផងដែរថា ចំណុចដែលបេក្ខជនប្រឡងភាគច្រើនភ័យគឺតែងតែបារម្ភថា ការលំហាត់ប្រឡងដែលនឹងចេញវាអាចលំបាកខ្លាំងលើសពីសមត្ថភាពខ្លួន ឬអាចជាលំហាត់ដែលស្មុគស្មាញជាងអ្វីដែលខ្លួនធ្លាប់រៀន តែស្ថានភាពជាក់ស្តែងពេលខ្លះលំហាត់ពេលប្រឡងអាចមានលក្ខណៈងាយស្រួលជាងអ្វីដែលយើងរៀនផង។ ជាធម្មតានៅពេលដែលសិស្សរៀនជាប្រចាំថ្ងៃ គ្រូតែងតែស្វែងរក លំហាត់ខ្លាំងៗ និងស្មុគស្មាញដើម្បីឱ្យគាត់ចេះស្ទាត់នូវមេរៀននីមួយៗដែលក្រសួងដាក់ឱ្យរៀនតែពេលប្រឡងគឺអាចចេញត្រឹមលំហាត់មធ្យមដែលអ្នកទូទៅតាមទាន់មេរៀនអាចធ្វើបាន ហេតុនេះកុំបារម្ភ ឬភ័យទុកមុនតែត្រូវគិតថាវាជាពេលដ៏មានមោទនភាពសម្រាប់ការបញ្ចេញសមត្ថភាពពិតប្រាកដរបស់យើង៕
July 23, 2018
ត្រឹមរយៈពេល6ខែ ស្ថាប័នឥណទានជនបទចំនួន50 ត្រូវបានបិទទ្វារ
ត្រឹមតែរយៈពេល 6ខែដើមឆ្នាំ2018 ប្រតិបត្តិករឥណទានជនបទប្រមាណជា 50ស្ថាប័នត្រូវបានបិទទ្វារ ដោយមួយចំនួនត្រូវបង្ខំចិត្តបិទទ្វារដោយខ្លួនឯង ហើយមួយចំនួនទៀតត្រូវបានបិទទ្វារដោយធនាគារជាតិនៃកម្ពុជា ដោយសារមិនគោរពតាមលក្ខខណ្ឌដែលកំណត់ដោយច្បាប់។
ឯកឧត្តម ជា ចាន់តូ ទេសាភិបាលនៃធនាគារជាតិនៃកម្ពុជា បានមានប្រសាសន៍នៅក្នុងពិធីសរុបលទ្ធផលការងារឆមាសទី1 និងលើកទិសដៅការងារសម្រាប់ឆមាសទី2 ឆ្នាំ2018 បានឱ្យដឹងថា នៅឆមាសទី1នេះ គ្រឹះស្ថានឥណទានជនបទប្រមាណជា 50ស្ថាប័នដែលមិនគោរពច្បាប់ និងបទប្បញ្ញត្តិដែលមានជាធរមានរបស់កម្ពុជាត្រូវបានបិទទ្វារ ដែលក្នុងនោះមានគ្រឹះស្ថានមួយចំនួនបានបញ្ឈប់ដំណើរការដោយខ្លួនឯង និងគ្រឹះស្ថានផ្សេងទៀតត្រូវបានបញ្ឈប់ដោយធនាគារជាតិនៃកម្ពុជា។
ឯកឧត្តម ជា ចាន់តូ ទេសាភិបាលនៃធនាគារជាតិនៃកម្ពុជា
ឯកឧត្តមមានប្រសាសន៍បន្តថា លើសពីនេះអត្រាការប្រាក់ក្នុងវិស័យហិរញ្ញវត្ថុបានធ្លាក់ចុះ គួរឱ្យកត់សម្គាល់ពី34% ចំពោះឥណទានប្រាក់រៀល និង29% ចំពោះឥណទានជាប្រាក់ដុល្លារអាមេរិកតាំងពីឆ្នាំ2016 មកត្រឹម17.85% និង 17.15%តាមលំដាប់។ការធ្លាក់ចុះនេះបានផ្តល់ភាពអំណោយផលដល់ប្រជាកសិករ សហគ្រាសធុនតូច និងមធ្យមក្នុងការទទួលបានឥណទានពីវិស័យមីក្រូហិរញ្ញវត្ថុក្នុងកម្រិតសមស្របសម្រាប់លើកស្ទួយជីវភាពរស់នៅ និងកាត់បន្ថយភាពក្រីក្រ។ ម្យ៉ាងទៀតធនាគារជាតិនៃកម្ពុជា ក៏បានសហការជាមួយអាជ្ញាធរពាក់ព័ន្ធនានា ទប់ស្កាត់ការចរាចរការដោះដូរ Cryptocurrency និងកាសមួយចំនួនទៀតដែលមិនមានការអនុញ្ញាត ការផ្តល់កម្ចីអត្រាការប្រាក់ខ្ពស់របស់អ្នកផ្តល់កម្ចីខុសច្បាប់ដើម្បីការពារប្រជាពលរដ្ឋកុំឱ្យចាញ់បោក និងខាតបង់ដោយសារជនខិលខូចមួយចំនួនដែលបានដើរធ្វើសកម្មភាពបញ្ចុះបញ្ចូលប្រជាពលរដ្ឋឱ្យទទួលយកកម្ចីពីស្ថាប័នរបស់ខ្លួនក្នុងលក្ខខណ្ឌងាយស្រួល តែទារសងត្រឡប់មកវិញក្នុងអត្រាការប្រាក់ខ្ពស់លើសពីការកំណត់របស់ធនាគារជាតិ 18%ក្នុង1ឆ្នាំ។
គួរបញ្ជាក់ថា វិស័យធនាគារបានបន្តរួមចំណែកយ៉ាងសកម្មក្នុងការជំរុញកំណើនសេដ្ឋកិច្ចកម្ពុជាប្រកបដោយបរិយាប័ន្ន។ ឥណទានត្រូវបានផ្តល់ដល់គ្រប់វិស័យផ្សេងៗនៃសេដ្ឋកិច្ច ដោយបានកើនឡើងក្នុងអត្រា18.8% ក្នុងមួយឆ្នាំដែលជាកម្រិតសមស្របសម្រាប់គាំទ្រការរីកចម្រើនសកម្មភាពសេដ្ឋកិច្ច និងមិនបង្កផលប៉ះពាល់ដល់ស្ថិរភាពហិរញ្ញវត្ថុ។ កំណើនឥណទាននេះបានពឹងផ្អែកកាន់តែច្រើនលើកំណើនប្រាក់បញ្ញើក្នុងស្រុកមានចំនួន22%។ ទន្ទឹមនឹងនេះប្រជាពលរដ្ឋពេញវ័យដែលបានទទួលសេវាហិរញ្ញវត្ថុកើនឡើងដល់ 57% នៃប្រជាពលរដ្ឋពេញវ័យសរុបដែលគាំទ្រជាចម្បងដោយវិស័យមីក្រូហិរញ្ញវត្ថុ និងការរីកចម្រើននៃបច្ចេកវិទ្យាហិរញ្ញវត្ថុ។
ទោះជាយ៉ាងណា ដើម្បីបន្តអភិវឌ្ឍន៍វិស័យហិរញ្ញវត្ថុប្រកបដោយនិរន្តរភាព ការត្រួតពិនិត្យ និងបទប្បញ្ញតិ្តក៏ត្រូវបានលើកកម្ពស់ជាលំដាប់ ជាពិសេសលើការពង្រឹងភាពរឹងមាំនៃដើមទុនសន្ទនីយភាព និងការគ្រប់គ្រងហានិភ័យជាប្រព័ន្ធនានា ទន្ទឹមនឹងការពង្រឹងកិច្ចការពារអតិថិជនដែលតម្រូវឱ្យធនាគារជាតិមានវិធានការបន្ទាន់ក្នុងករណីឥណទានជនបទណាមួយដែលមិនគោរពច្បាប់ជាគោលការណ៍របស់ធនាគារជាតិដែលបានដាក់ឱ្យអនុវត្តកាលពីឆ្នាំកន្លងទៅ។
ជាមួយគ្នានេះលោក សាយ សូនី នាយកប្រតិបត្តិទីផ្សារនៃគ្រឹះស្ថានមីក្រូហិរញ្ញវត្ថុប្រាសាក់ មានប្រសាសន៍ទទួលស្គាល់ថា ពិតជាមានករណីបិទទ្វារគ្រឹះស្ថានឥណទានជាច្រើននៅតាមជនបទពិតប្រាកដមែននៅរយៈពេលប៉ុន្មានខែចុងក្រោយនេះ ដោយសារតែស្ថាប័នឥណទានទាំងនោះមិនគោរពតាមការណែនាំ និងគ្មានលទ្ធភាពគ្រប់គ្រាន់សម្រាប់បំពេញលក្ខខណ្ឌដែលកំណត់ដោយធនាគារជាតិ ដូចជាតម្រូវឱ្យមានដើមទុនគ្រប់ចំនួនជាដើម។ លើសពីនេះឥណទានជនបទមួយចំនួនមិនបានសិក្សាឱ្យបានស៊ីជម្រៅទៅលើតម្រូវការកម្ចីនោះទេ ថែមទាំងបញ្ចុះបញ្ចូលឱ្យប្រជាពលរដ្ឋទទួលយកប្រាក់កម្ចីកាន់តែច្រើន រួចហើយគិតអត្រាការប្រាក់ខ្ពស់លើសពីការកំណត់របស់ធនាគារជាតិនៃកម្ពុជាដែលបានកំណត់ត្រឹមតែ18% ក្នុងរយៈពេលមួយឆ្នាំនោះ ជាហេតុធ្វើឱ្យប្រជាពលរដ្ឋជាប់បំណុលវ័ណ្ឌកដោះស្រាយមិនរួច ត្រូវរត់ចោលកន្លែងលក់ដូរ និងជួនកាលលក់ដីសងគេក៏មាន ហើយជួនកាលរងការគំរាមកំហែងពីបុគ្គលិកឥណទានជនបទទាំងនោះថែមទៀត។ លោកបញ្ជាក់ថា “ធម្មតាមនុស្ស និងលុយនៅពេលដែលគាត់ត្រូវការ ហើយយើងឱ្យទៅតាមការស្នើសុំរបស់គាត់បាន គាត់ប្រាកដជាសប្បាយចិត្ត ប៉ុន្តែក្រោយពីទទួលបានរួច ទើបគាត់ជួបការលំបាកក្នុងការបង់សងត្រឡប់ទៅវិញ ដោយសារការប្រើរូបមន្តគិតទៅលើអត្រាការប្រាក់ខ្ពស់ រហូតដល់ថ្នាក់គ្មានប្រាក់សងទៀតផង”។
ករណីនេះ លោកគាំទ្រចំណាត់ការរបស់ធនាគារជាតិក្នុងការជួយបញ្ចៀសហានិភ័យរបស់ប្រជាពលរដ្ឋនៅតាមជនបទ ជួយលើកកម្ពស់សេដ្ឋកិច្ចរបស់ពួកគាត់ ពិសេសជួយឱ្យវិស័យហិរញ្ញវត្ថុនៅកម្ពុជាមានដំណើរការទៅមុខកាន់តែប្រសើរឡើងទៀតផង៕
July 23, 2018