Author: ធឿន មករា

ក្រូចពោធិ៍សាត់ខ្មែរ មានរសជាតិឆ្ងាញ់ លក់ដាច់ខ្លាំងនៅលើទីផ្សារ
ក្រូចពោធិ៍សាត់ខ្មែរ ជាប្រភេទផ្លែឈើដែលផ្តល់រសជាតិជូរអែមឆ្ងាញ់ មិនចាញ់ក្រូចនាំចូលពីបរទេសនោះទេ ហើយថែមទាំងសម្បូរដោយវីតាមីនល្អៗបំប៉នសុខភាពមនុស្សទៀតផង ដោយសារតែការដាំដុះដំណាំហូបផ្លែរបស់កសិករខ្មែរយើងមិនប្រើថ្នាំគីមីដូចផ្លែឈើនាំចូលពីប្រទេសជិតខាងហ្នឹងឯង។
អ្នកនាង សេង ឆាយដាឡែន ម្ចាស់ចម្ការក្រូចពោធិ៍សាត់ ដែលមានទីតាំងស្ថិតនៅក្នុងស្រុកវាលវែង ខេត្តពោធិ៍សាត់មានប្រសាសន៍ថា ដោយមើលឃើញពីតម្រូវការផ្លែឈើធម្មជាតិ របស់ប្រជាពលរដ្ឋខ្មែរ គ្រួសាររបស់អ្នកនាងបានចាប់ផ្តើមមុខរបរដាំក្រូចពោធិ៍សាត់តាំងពីឆ្នាំ2013 មក នៅលើផ្ទៃដីជិត 1ហិកតា ដើម្បីសាកល្បងប្រមូលផលលក់នៅលើទីផ្សារជាមុនសិន មុននឹងសម្រេចពង្រីកការដាំដុះបន្ថែម។ ដោយមានការគាំទ្រច្រើនពីអតិថិជន បានជំរុញឱ្យគ្រួសាររបស់អ្នកនាងសម្រេចបន្ថែមថវិកាពង្រីកការដាំដុះដំណាំក្រូចពោធិ៍សាត់នេះឱ្យបានកាន់តែច្រើនឡើងៗ ដែលមកទល់បច្ចុប្បន្ននេះមានទំហំសរុបប្រមាណជា 2ហិកតាហើយ និងទើបតែឱ្យផលពេញលេញក្នុងរយៈពេល1-2ឆ្នាំចុងក្រោយនេះឯង។
ដើមក្រូចពោធិ៍សាត់ខ្មែរដែលកំពុងឱផល
អ្នកនាង ដាឡែន បានឱ្យដឹងថា ក្រូចពោធិ៍សាត់ចាប់ផ្តើមឱ្យផលក្នុងអំឡុងខែមិនា ហើយអាចបេះបានច្រើនពេញលេញនៅខែកក្កដា ឬសីហា ដោយក្នុងមួយដើមគេអាចបេះបានប្រមាណពី 300 ទៅ400ផ្លែឯណោះ ហើយអាចបេះបានរហូតដល់ខែតុលាទើបអស់ផ្លែទៅវិញ ដែលសរុបទៅចំនួន 2ហិកតា នេះ កសិករអាចប្រមូលផលបានជាមធ្យមប្រមាណជា 100 ទៅ150ស្លឹកឯណោះ(1សឹ្លកស្មើនឹង10ផ្លូន 1ផ្លូនស្មើនឹង4ឡូ 1ឡូស្មើ12ផ្លែ)។ ម្ចាស់ចម្ការក្រូចពោធិ៍សាត់ខាងលើបញ្ជាក់ថា ដោយសារក្រូចមានរសជាតិជូរអែមឆ្ងាញ់ និងមិនមានសារធាតុគីមីផងនោះ បានធ្វើឱ្យក្រូចពោធិ៍សាត់ខ្មែរមានការគាំទ្រច្រើនពីអតិថិជននៅតាមបណ្តាខេត្តផ្សេងៗ ដូចជាខេត្តពោធិ៍សាត់ខ្លួនឯង កំពង់ឆ្នាំង កំពង់ស្ពឺ កំពង់សោម និងពិសេសអតិថិជននៅទីក្រុងភ្នំពេញ ដែលមានទាំងអតិថិជនទិញរាយ និងអតិថិជនទិញយកទៅលក់បន្តនៅតាមផ្សារ និងនៅតាមហាងបន្លែធម្មជាតិ ឬផ្សារទំនើបល្បីៗមួយចំនួន និងលក់តាមអនឡាញទៀតផង។ សម្រាប់តម្លៃបោះដុំវិញ ក្រូចពោធិ៍សាត់គេអាចលក់បានក្នុងតម្លៃ 9,500រៀលទៅ11,000រៀលក្នុងមួយឡូ នេះសម្រាប់តម្លៃបោះដុំ ហើយបើសិនយកទៅលក់រាយបន្ត គេអាចលក់បានក្នុងតម្លៃ 17,000រៀល ទៅ18,000រៀលក្នុងមួយឡូ។ ទោះជាវាមានតម្លៃថ្លៃជាងក្រូចនាំចូលពីប្រទេសជិតខាងបន្តិចក៏ពិតមែន ប៉ុន្តែក្រូចពោធិ៍សាត់ខ្មែរមានការគាំទ្រខ្លាំងពីប្រជាពលរដ្ឋខ្មែរ ព្រោះប្រមូលផលបានសឹងតែផ្គត់ផ្គង់មិនគ្រប់តម្រូវការរបស់ម៉ូយនៅលើទីផ្សារផង ហើយបើនៅតែមានការគាំទ្រច្រើនដូច្នេះ នារីម្ចាស់ចម្ការខាងលើនឹងពង្រីកផ្ទៃដីដាំដុះឱ្យបានចំនួនកាន់តែច្រើនថែមទៀតដែរ។
ចំពោះលក្ខណៈសម្គាល់វិញ ក្រូចពោធិ៍សាត់ខ្មែរមានលក្ខណៈខុសពីក្រូចនាំចូលពីបរទេស នៅត្រង់ថា ក្រូចខ្មែរមានសម្បកក្រាស់ មានផ្លែធំ-តូចនៅលាយឡំគ្នា មានពណ៌ខៀវលាយលឿងតិចៗនៅលើសម្បក តែសម្រាប់ក្រូចវៀតណាមវិញបើតូច គឺតូចស្មើ និងបើធំ គឺធំស្មើគ្នា ព្រោះគេមានបច្ចេកទេសដាំដុះបានល្អ ប៉ុន្តែភាគច្រើនមានប្រើសារធាតុគីមី ហើយមានសម្បុរសម្បកពណ៌ខៀវរលោងល្អ និងមានសម្បកស្តើង។
ក្រូចពោធិ៍សាត់ខ្មែរ កំពុងឱ្យផល
អ្នកនាង ដាឡែន អ្នកជំនាញខាងដំណាំក្រូចបានបញ្ជាក់ថា ក្រូចពោធិ៍សាត់មិនពិបាកដាំនិងថែទាំដូចដំណាំមួយចំនួនទៀតនោះទេ ប៉ុន្តែក្រូចត្រូវការដីដែលមានជីវជាតិល្អគួរសមដែរ ទើបដាំទៅដើមវាលូតលាស់បានល្អ និងឱ្យផ្លែច្រើន។
ចំពោះវិធីសាស្ត្រដាំដុះវិញ ដំបូងគេភ្ជួរដីជាមុនដើម្បីសម្លាប់ស្មៅ និងជួយឱ្យដីធូរនៅស្រទាប់លើៗធ្វើឱ្យសន្សើមធ្លាក់ចុះល្អទៅដល់ស្រទាប់ដីខាងក្រោម។ បន្ទាប់ពីភ្ជួរដីរួច គេកាប់រណ្តៅទំហំមួយម៉ែត្រ4ជ្រុង មានជម្រៅកន្លះម៉ែត្រ ឬមួយម៉ែត្រក៏បាន ដោយរណ្តៅនីមួយៗត្រូវឃ្លាតឆ្ងាយពីគ្នាចម្ងាយ 5ម៉ែត្រ។ បន្ទាប់ពីកាប់រណ្តៅ រួចគេអាចដាក់ជីធម្មជាតិ ដូចជាកូនឈើតូចៗលាយជាមួយជីលាមកសត្វជាការទ្រាប់បាតរណ្តៅ ទើបយកកូនដើមក្រូចពោធិ៍សាត់ដែលគេផ្សាំរួចទៅដាំនៅតាមរណ្តៅនីមួយៗ ហើយថែទាំដោយការស្រោចទឹក តែមិនបាច់ស្រោចជាប្រចាំទេ ដោយសារដើមក្រូចមិនសូវជាត្រូវការទឹកប៉ុន្មានឡើយគឺស្រោចទៅតាមលក្ខខណ្ឌអាកាសធាតុ។
កសិករកំពុងបេះក្រូចពោធិ៍សាត់ខ្មែរ
ក្រៅពីស្រោចទឹកហើយ គឺត្រូវជម្រះ ឬបាញ់ថ្នាំសម្លាប់ស្មៅចោល ហើយដាក់ជីធម្មជាតិបន្ថែមខ្លះៗទៀតធ្វើឱ្យកូនក្រូចលូតលាស់បានល្អ។ ត្រឹមតែរយៈពេល 2ឆ្នាំ វានឹងចាប់ផ្តើមឱ្យផល តែផ្លែដំបូងបានចំនួនត្រឹមតែ 3 – 4ផ្លែប៉ុណ្ណោះក្នុងមួយដើមៗ រហូតដល់ដើមក្រូចអាយុបាន 4ឆ្នាំទើបវាឱ្យផលបានពេញលេញ ដោយក្នុងមួយដើមៗគេអាចបេះបានចន្លោះពី300 ទៅ400ផ្លែ។
នៅពេលដែលវាធំ កសិករត្រូវចេះថែទាំ ដោយត្រូវកាត់ស្លឹក ឬមែកណាមិនល្អចោល ដើម្បីទុកឱ្យដើមមានកម្លាំងស្រូបយកជីវជាតិពីដីទៅចិញ្ចឹមមែកណាដែលល្អៗ ដើម្បីឱ្យវាហុចផលបានកាន់តែច្រើនឡើង។
ក្រូចពោធិ៍សាត់ខ្មែរ ដែលទើបប្រមូលផលបាន
អ្នកជំនាញខាងភោជនាហារបាននិយាយថាក្រូចពោធិ៍សាត់ជាផ្លែឈើប្រភេទល្អមួយ ដែលសម្បូរទៅដោយវីតាមីនC និងជាតិកាកសរសៃខ្ពស់ និងសម្បូរជាតិស្ករពីធម្មជាតិ ដែលជួយផ្តល់កម្លាំងថាមពលភ្លាមៗដល់អ្នកទទួលទាន។ ម្យ៉ាងទៀតក្រូចពោធិ៍សាត់មានផ្ទុកនូវសារធាតុ Limonin ឬ Limonin Glucoside និង Hesperidin សម្រាប់ទប់ស្កាត់ជំងឺមហារីក ហើយអាចទប់ស្កាត់ជំងឺបេះដូងទៀតផង ក្រៅពីនោះគេអាចយកសម្បកផ្លែក្រូចពោធិ៍សាត់ទៅហាលឱ្យស្ងួត ហើយហាន់ជាចំណិតតូចៗឆុងជំនួសស្លឹកតែទទួលទានរាល់ថ្ងៃ ព្រោះវាអាចជួយកាត់បន្ថយសារជាតិខ្លាញ់ដែលមានក្នុងសារពាង្គកាយរបស់មនុស្សយើងបានយ៉ាងល្អទៀតផង៕
August 8, 2018
សហគ្រិនវ័យក្មេងខ្មែរចំនួន 3រូបផ្តល់បទពិសោធអាជីវកម្ម
ក្នុងវេទិកាពិព័រណ៍ទេសចរណ៍ដើម្បីផ្សព្វផ្សាយពីផលិតផលទេសចរណ៍ និងចូលរួមជំរុញចលនាទេសចរណ៍ក្នុងស្រុកត្រូវបានសមាគមទីភ្នាក់ងារទេសចរណ៍កម្ពុជា ឬ CATA (The Cambodia Association of Travel Agents) លើកយកការផ្តល់គំនិតស្តីពីអាជីវកម្មរបស់សហគ្រិនល្បីៗ និងជោគជ័យមួយចំនួនមកបង្ហាញជូនដល់អ្នកចូលរួមទស្សនាពិព័រណ៍ ក្នុងប្រធានបទ “ការចាប់ផ្តើមជំនួញផ្ទាល់ខ្លួន” “Business Start Up”។
ក្នុងនោះសហគ្រិនវ័យក្មេងខ្មែរចំនួន 3រូបមានមុខរបរផ្សេងៗគ្នា ក៏ត្រូវបានអញ្ជើញឱ្យផ្តល់គំនិត និងបទពិសោធស្តីពីអាជីវកម្មរបស់ខ្លួនក្នុងប្រធានបទការចាប់ផ្តើមជំនួញផ្ទាល់ខ្លួន “Business Start Up” ដល់អាជីវករដែលមកចូលរួមក្នុងពិព័រណ៍ ក៏ដូចជាអ្នកមកទស្សនាដែលចង់ស្វែងរកបទពិសោធសម្រាប់ពង្រឹង និងជំរុញអាជីវកម្មរបស់ខ្លួនឱ្យកាន់តែទទួលបានទំនុកចិត្ត និងជោគជ័យក្នុងមុខជំនួញបន្ថែមទៀត។
សហគ្រិនវ័យក្មេងដំបូងគេ គឺអ្នកនាង រី ថានី ជាប្រធានគ្រប់គ្រងទូទៅនៅសិប្បកម្ម នរាអង្គរ (Norea Angkor Handicraft) ខេត្តសៀមរាបដែលជាសិប្បកម្មច្នៃម៉ូដចង្កៀងអំពូល ខ្នើយ វាំងននគ្រឿងសង្ហារិម និងគ្រឿងបរិក្ខារមួយចំនួនទៀតដែលផលិតដោយដៃសម្រាប់តុបតែងផ្ទះ សណ្ឋាគារ និងភោជនីយដ្ឋានទាំងបែបបុរាណ និងសម័យ។ អ្នកនាងថានី បានរៀបរាប់ថា ការចំណាកស្រុករបស់ពលរដ្ឋខ្មែរទៅក្រៅប្រទេសច្រើនពុំទទួលបានជំនាញត្រឡប់មកវិញទេ ទើបអ្នកនាងមានគំនិតបើកអាជីវកម្មច្នៃម៉ូដសម្ភារបរិក្ខារដែលរចនាម៉ូដពីសរសៃសូត្រខ្មែរនេះឡើង សម្រាប់ផ្ដល់ការងារនិងជំនាញថ្មីមួយដល់ពលរដ្ឋខ្មែរ។
អ្នកនាង រី ថានី ប្រធានគ្រប់គ្រងទូទៅនៅសិប្បកម្ម នរាអង្គរ
ម្ចាស់សិប្បកម្មវ័យ 29ឆ្នាំរូបនេះបានបញ្ជាក់ដូច្នេះថា៖ “ការផ្គត់ផ្គង់ក្នុងស្រុកភាគច្រើនក្នុងសណ្ឋាគារលំដាប់ផ្កាយប្រាំ ដោយឱ្យគេទទួលស្គាល់នូវផលិតផលរបស់យើងសិន ឱ្យគេយល់ពីផលិតផលខ្មែរ ទើបយើងធ្វើទៅតាមតម្រូវការ។ ម្យ៉ាងទៀតគឺចង់កាត់បន្ថយផលិតផលនាំចូល ដែលទី1 ប្រឈមការបែកបាក់ ទី2 កាត់បន្ថយចំណាយការលើការនាំចូល។ ដោយឡែកទៀតនោះ គឺចង់ឱ្យអតិថិជនទទួលស្គាល់ពីគុណភាពរបស់ខ្មែរថា អាចធ្វើបាន ព្រោះពីមុនច្រើនតែបរទេសជាអ្នកដឹកនាំបង្រៀនខ្មែរ ទើបយើងបង្កើតសិប្បកម្មនេះជាស្នាដៃខ្មែរ ផ្តួចផ្តើមនូវការប្រកួតប្រជែង បង្កើតផលិតផលឱ្យខ្មែរគាំទ្រ”។
បច្ចុប្បន្នសិប្បកម្ម នរាអង្គរ នេះមានបុគ្គលិក 30នាក់ សុទ្ធតែមានគំនិតច្នៃប្រឌិតខ្ពស់ដែលផ្គត់ផ្គង់ផលិតផលរបស់ខ្លួន និងដោយសារតែមានការគាំទ្រពីអតិថិជនក្នុងស្រុក និងបរទេសទើបធ្វើឱ្យម្ចាស់សិប្បកម្មវ័យក្មេងទទួលបានពានរង្វាន់សហគ្រិនឆ្នើមឆ្នាំ2018។
អ្នកនាង ថានី ឱ្យដឹងថា ទម្រាំឈរជើងបានមកទល់សព្វថ្ងៃនេះ អាជីវកម្ម នរាអង្គរ បានហែលឆ្លងក្ដីបរាជ័យក្នុងការរកស៊ីមិនក្រោម 10ដងឡើយ ហើយពេលដើរមកដល់ចំណុចនេះ នាងលែងមានគំនិតចុះចាញ់ដូចមុនទៀតហើយ តែថែមទាំងមានចិត្តតស៊ូទ្វេដងទៅទៀត ពីព្រោះបទពិសោធនៃការដួលហើយក្រោកឈរឡើងវិញនេះ គឺអាស្រ័យដោយការស្រឡាញ់ និងជឿជាក់លើអាជីវកម្មរបស់យើងជាមួយនឹងទិសដៅច្បាស់លាស់នោះទើបអាចងើបឡើងបាន និងបន្តដំណើរទៅមុខទៀតរហូតមកដល់បច្ចុប្បន្ន។
សហគ្រិនវ័យក្មេងទី2 មានអាយុត្រឹមតែ 27ឆ្នាំប៉ុណ្ណោះ គឺលោក ជា ឡង់ដា ជាស្ថាបនិក និងជាប្រធានក្រុមហ៊ុន“Bookmebus” និងក្លាយជាសហគ្រិនជោគជ័យម្នាក់ដែលមានបុគ្គលិក 17នាក់ ក្នុងនោះមានបរទេស 2នាក់ផងដែរ។ ដោយផ្តើមចេញពីការរង់ចាំរថយន្តត្រូវដ៏យូរក្នុងពេលធ្វើដំណើរទៅស្រុកម្តងៗ ធ្វើឱ្យសហគ្រិនរូបនេះយកបញ្ហានេះមកបង្កើតជាឱកាស គឺឱកាសបើកអាជីវកម្មផ្ទាល់ខ្លួន ជាក្រុមហ៊ុនទទួលកក់សំបុត្ររថយន្តក្រុង និងទូកតាមអនឡាញដែលបានបើកដំណើរការតាំងពីឆ្នាំ2015 មក។
លោក ជា ឡង់ដា ស្ថាបនិក និងជាប្រធានក្រុមហ៊ុន Bookmebus
លោក ឡង់ដា បានឱ្យដឹងថា៖ “ដោយសារតែការរង់ចាំធ្វើឱ្យខាតពេលវេលា យើងក៏ប្រើបច្ចេកវិទ្យាមានប្រព័ន្ធគ្រប់គ្រងត្រឹមត្រូវ ដោយយកព័ត៌មានមកដាក់ក្នុង online ពីទិសដៅ និងការចេញដំណើរច្បាស់លាស់ ធ្វើឱ្យក្រុមហ៊ុនដឹកអ្នកដំណើរជាង 40ក្រុមហ៊ុនបានបំពាក់បច្ចេកវិទ្យានេះ និងក្រុមហ៊ុនដឹកជញ្ជូនតាមទូក ហើយយើងគ្រោងបង្កើតសេវាកក់សំបុត្រយន្តហោះបន្ថែមទៀតផងដែរនាពេលខាងមុខ។ លោកថា ប្រាក់ចំណេញរបស់ក្រុមហ៊ុន គឺបានមកពីប្រាក់កម្រៃជើងសា (លុយកុំមីស្យុង)។ យើងក៏មានចំណែកជួយទាក់ទាញភ្ញៀវទេសចរមកស្រុកខ្មែរឱ្យមានការកើនឡើងជារៀងរាល់ឆ្នាំដែរ ព្រោះថាសំបុត្រធ្វើដំណើរ ទោះទិញមុន1ឆ្នាំ ក៏អាចលក់យកលុយពីភ្ញៀវបានដែរ”។
លោកបន្តថា ការទិញសំបុត្រតាមអនឡាញនេះ អតិថិជនមិនចាំបាច់មកទិញសំបុត្រដល់ក្រុមហ៊ុនទេ គឺគ្រាន់តែមានទូរស័ព្ទទំនើប និងកុំព្យូទ័រដែលអាចដំណើរការអុីនធើណិតបានជាការស្រេច។តាមរយៈWing, Smart Luy, Visa Card ឬប្រព័ន្ធដទៃទៀតពួកគេអាចពិនិត្យមើលជើងចេញដំណើរពេលវេលា និងបង់លុយលើវេបសាយ ឬអាចវេរលុយតាមអុីន-ធើណិតបាន។
លោក ឡង់ដា ធ្លាប់ត្រូវបានកម្មវិធីរបស់មហាសេដ្ឋីចិន Jack Ma ជ្រើសរើសយកទៅចូលរួមវគ្គបណ្តុះបណ្តាល eFounders នៅប្រទេសចិនដើម្បីស្វែងយល់ពីមូលដ្ឋានពាណិជ្ជកម្មអេឡិចត្រូនិក ប្រព័ន្ធបច្ចេកវិទ្យាដែលប្រែប្រួល និងមានឥទ្ធិពលនៅចិន ព្រមទាំងយល់ដឹងស៊ីជម្រៅអំពីគំនិតច្នៃប្រឌិតផ្នែកពាណិជ្ជកម្មអេឡិចត្រូនិកពីប្រទេសចិន និងជុំវិញពិភពលោកទៀតផង។
លោក ឡង់ដា ឱ្យដឹងថា ការធ្វើអាជីវកម្មមិនថាចាប់ផ្តើម 1ឆ្នាំ ឬដំណើរការ 5ឆ្នាំមកហើយក៏ដោយ ក៏នៅតែប្រឈមនឹងផលលំបាកដែរ ពីព្រោះយើងចង់បានលុយពីគេ ត្រូវធ្វើម៉េចឱ្យគេទិញផលិតផលយើង ហើយថែមទាំងមានការប្រកួតប្រជែងខ្លាំងទៀតផង ដូច្នេះយើងត្រូវមានការផ្លាស់ប្តូរ បើមិនផ្លាស់ប្តូរទៅតាមស្ថានភាពនៃការវិវឌ្ឍរបស់សង្គមទេ យើងនឹងជួបផលវិបាកមិនខាន ពីព្រោះការបើកអាជីវកម្ម មួយថ្ងៃៗត្រូវគិតធ្វើម៉េចឱ្យរីកចម្រើន ឱ្យរីកលូតលាស់ និងជោគជ័យ? តែបើយើងស្រឡាញ់អាជីវកម្មរបស់យើង យើងនឹងមានកម្លាំងចិត្តធ្វើ នោះគឺពិតជាជោគជ័យហើយ។
សហគ្រិនវ័យក្មេងទី3 លោក ទិត្យ សុធារ៉ា នៃអាជីវកម្ម Business Noir-Coffee បង្កើតឡើងនៅឆ្នាំ2013 ជាស្នាដៃកូនខ្មែរដែលចង់បង្ហាញដល់បរទេសថា ខ្មែរក៏អាចធ្វើបាន ដោយមាន 3សាខានៅខេត្តសៀមរាប។ ការចាប់ផ្តើមរបស់ស្ថាបនិកនិងជាម្ចាស់អាជីវកម្ម Noir-Coffee នេះបានផ្តើមចេញពីការធ្វើការឱ្យគេរយៈពេល 12ឆ្នាំ ទើបមានគោលបំណងច្បាស់លាស់ថា ចង់រកស៊ីខ្លួនឯង និងមានការជំរុញពីមិត្តភ័ក្តិដែលនាំឱ្យមានក្តីសង្ឃឹមថា ពិតជាអាចរកស៊ីបានហើយ។
លោក ទិត្យ សុធារ៉ា ម្ចាស់ហាងកាហ្វេ Noir-Coffee
សហគ្រិនដែលមានវ័យ 29ឆ្នាំរូបនេះបានបញ្ជាក់ថា៖ មូលហេតុដែលហាងរបស់លោកដាក់ឈ្មោះ Noir-Coffee ដោយសារតែលោកស្រឡាញ់ពណ៌ខ្មៅ ធ្វើឱ្យទីតាំងក៏រចនាពណ៌ខ្មៅដែរ តែទីតាំងទាំង3 រចនាខុសៗគ្នា ដោយច្នៃប្រឌិតបែបខ្មែរ ខាងមុខហាងក៏ដាក់ស្លាកសញ្ញាហាង Noir-Coffee ដោយភា្ជប់អក្សរ “ណ” សម្គាល់ថាម្ចាស់អាជីវកម្មជាខ្មែរដែរ។
លោក សុធារ៉ា បានបញ្ជាក់បន្ថែមថា កត្តាប្រឈមបញ្ហា និងផលលំបាក គឺតែងតែមាននៅក្នុងការចាប់ផ្តើមអាជីវកម្ម ព្រោះថា បើយើងធ្វើការងារឱ្យគេយើងគិតតែ1ទេ តែបើរកស៊ីខ្លួនឯងវិញ គិតដល់10ឯណោះ។ មកដល់ពេលនេះយើងមិនទាន់ហៅថាជោគជ័យទេ តែអាចចូលក្នុងទីផ្សារបាន ដោយសារតែការប្រកួតប្រជែងតែងតែមាន ដូច្នេះយើងត្រូវចេះផ្លាស់ប្តូរ និងធ្វើអ្វីដែលថ្មី ពោលត្រូវតែធ្វើឱ្យបានមុនគេ បន្ថែមនូវអ្វីដែលជាតម្រូវការរបស់អតិថិជន នូវអ្វីដែលថ្មី ប្លែក ដោយ update ឱ្យបានមុនគូប្រកួតប្រជែងជានិច្ច។
សរុបមក សម្រាប់ដំណើរការអាជីវកម្មដំបូងបំផុត អ្វីដែលពួកគាត់មាននោះ គឺគំនិត និងជំនឿចិត្តលើអ្វីដែលខ្លួនកំពុងធ្វើ ចំណែកដើមទុន និងជំនាញ ម្ចាស់អាជីវកម្មម្នាក់ៗអាចរក និងរៀនបន្ថែមបាន ឬអាចជួលអ្នកដទៃធ្វើក៏បានដែរ សំខាន់ត្រង់ថា តើអ្នកចង់បង្កើតអ្វី ឬចង់ផ្តល់អ្វីទៅឱ្យអ្នកដទៃតាមរយៈគំនិតរបស់អ្នកផ្ទាល់ហ្នឹងឯង៕
August 8, 2018
ការពិនិត្យសុខភាពដោយការបូមឈាម ត្រូវតមទឹក និងអាហារ មុនពេលបូម តើត្រូវដែរឬទេ?
ការណាត់ពិនិត្យសុខភាព ធ្វើតេស្ដឈាមស្វែងរករោគជំងឺផ្សេងៗ ម្នាក់ៗតែងតែនិយាយថា ត្រូវអត់អាហារ និងទឹក ដើម្បីឱ្យលិទ្ធផលតេស្ដឈាមមានប្រសិទ្ធភាព។ មនុស្សពេញវ័យគ្រប់រូប គួរតែទៅពិនិត្យសុខភាពឱ្យបានជាប់ជាប្រចាំ ទោះជាលោកអ្នកមានអារម្មណ៍ថា មានសុខភាពល្អក៏ដោយ។ គោលបំណងនៃការពិនិត្យសុខភាពជាប្រចាំនេះ គឺធ្វើឡើងដើម្បីស្វែងរកជំងឺផ្សេងៗ វាយតម្លៃការប្រឈមមុខនឹងជំងឺនាពេលអនាគត ណែនាំឱ្យចេះរបៀបថែទាំសុខភាពឱ្យបានល្អផ្តល់ការចាក់វ៉ាក់សាំងបង្ការ ឱ្យបានត្រឹមត្រូវតាមការកំណត់ ជួយឱ្យគ្រូពេទ្យធ្វើរោគវិនិច្ឆ័យបានឆាប់រហ័ស និងច្បាស់លាស់ ហើយទទួលបានទិន្នន័យនៃការពិនិត្យសុខភាពជាប្រចាំ។ ដូច្នេះហើយ តើការធ្វើតេស្ដឈាម គួរតែតមអាហារដូចមនុស្សគ្រប់គ្នាថា ដែរឬទេ? ទស្សនាវដ្តី ឡារ៉ែន សូមជម្រាបជូនប្រិយមិត្តអ្នកអានឱ្យបានជ្រាបដូចខាងក្រោម។
ការធ្វើតេស្ដឈាមរកជំងឺប្រភេទខាងក្រោមនេះ ត្រូវតមអាហារ និងទឹករយៈពេលលើសពី6ម៉ោង
• ពិនិត្យកម្រិតជាតិស្ករនៅក្នុងឈាមដូចជា តេស្ដទឹកនោមផ្អែម (លើកលែងតែការត្រួតពិនិត្យកម្រិតជាតិស្ករសមល្មម ឬអេម៉ូក្លូបិនអេដវិនស៊ី (HbA1c) ដែលអាចធ្វើតេស្ដឈាមបានដោយមិនចាំបាច់តមអាហារ និងទឹក)។
• ពិនិត្យរកជាតិខ្លាញ់ កូលេសស្ត្រូរ៉ល។
ការធ្វើតេស្ដឈាមរកជំងឺប្រភេទខាងក្រោមនេះ ដែលមិនចាំបាច់តមអាហារ និងទឹក
• ពិនិត្យកំហាប់ឈាម (ឈាមស ឈាមក្រហម អេម៉ូក្លូប៊ីន…)
• ពិនិត្យបរិមាណក្លាកេត (កោសិកាឈាម)
• ពិនិត្យភាពរឹងមាំនៃគ្រាប់ឈាម
• ពិនិត្យរកមេរោគអេដស៍
• ពិនិត្យរករោគថ្លើម និងតម្រងនោម
• ពិនិត្យក្រពេញទីរ៉ូអីុដ
• ពិនិត្យរកក្រុមឈាម
• ការបរិច្ចាគឈាម
ក៏ប៉ុន្ដែនៅមានការពិនិត្យសុខភាពដែលមិនចាំបាច់បូមឈាម ដែលត្រូវតមអាហារ និងទឹកដូចជា៖
• ការត្រួតពិនិត្យមើលអេកូប្រអប់ពោះ ត្រូវតមអាហារ ដើម្បីឱ្យបានមើលឃើញកាន់តែច្បាស់នៅក្នុងប្រអប់ពោះ។
• ការឆ្លុះអេកូក្រពះ និងពោះវៀន
• ការពិនិត្យតាមរយៈ X-ray កុំព្យូទ័រ ឬ CT Scan ដែលត្រូវចាក់សារធាតុជំនួយក្នុងការថតចូលក្នុងសរសៃឈាម ឱ្យតមទឹកតមអាហារក្រែងលោក្នុងករណីថា អ្នកជំងឺប្រតិកម្មចាញ់សារធាតុគីមីដែលបានចាក់ចូលទៅ និងបានធ្វើការប្រើបំពង់អុកស៊ីហែ្ស៊នជួយដកដង្ហើមទាន់ពេលវេលា។
នៅក្នុងករណីត្រូវពិនិត្យទឹកនោមផ្អែម ខណៈពេលកំពុងតាំងគភ៌នៅឡើយ ៖
• ការឆ្លុះ Screening តម្រូវឱ្យទទួលទានស្ករស 50ក្រាម និងបូមឈាមបន្ទាប់ពីទទួលទានរួចរយៈពេល1ម៉ោង ដោយមិនចាំបាច់តមអាហារ។
• ការពិនិត្យវិនិច្ឆ័យរោគ ចាំបាច់ត្រូវតមអាហារតមទឹកជាមុនសិន ព្រោះពេលបូមឈាមក្រោយការតម ក៏នឹងឱ្យទទួលទានស្ករ 100ក្រាមហើយបូមឈាមក្រោយទទួលទានរួចក្នុងអំឡុងពេល1-3ម៉ោង។ ក្នុងអំឡុងពេលរង់ចាំការបូមឈាម ត្រូវឱ្យអង្គុយស្ងៀម ហាមដើរទៅណាមកណា មិនដូច្នោះនឹងធ្វើឱ្យមិនឃើញលិទ្ធផល។
យ៉ាងណាមិញ នៅមានព័ត៌មានលម្អិតពីការត្រូវតមអាហារ តមទឹកមុនពេលពិនិត្យឈាមជាច្រើនទៀត ដែលយើងខ្ញុំសូមណែនាំឱ្យអញ្ជើញទៅរកគ្រូពេទ្យ ដើម្បីប្រឹក្សាយោបល់ឱ្យកាន់តែច្បាស់លាស់បន្ថែមទៀត៕
August 7, 2018
បង្គាស្រស់កោះកុង
“បង្គាស្រស់កោះកុង” ជាមុខម្ហូបដ៏ពេញនិយមប្រចាំភោជនីយដ្ឋាន ក្តាមប្រៃ ដែលអាចទទួលទានជុំគ្នាយ៉ាងរីករាយជាមួយនឹងទឹកត្រីកោះកុងដែលមានរសជាតិហឹរ និងមុតឆ្ងាញ់តែម្តង។ ជួបជាមួយនឹងមេចុងភៅធំ គឺលោក ផង់ ផានី្ន លោកបានប្រាប់ពី គ្រឿងផ្សំ និងរបៀបធ្វើមុខម្ហូបមួយមុខនេះដូចតទៅ។
គ្រឿងផ្សំ ទឹកត្រីកោះកុង
• ខ្ទឹមស
• ខ្ទឹមក្រហម
• ម្ទេសស្រស់
• ទឹកត្រី
• អំបិល
• ស្ករស
• ទឹកខ្មេះ
• ទឹក-សធម្មតា
វិធីធ្វើ ទឹកត្រីកោះកុង
ដំបូងត្រូវដាក់ឆ្នាំងដាំទឹក-សធម្មតាឱ្យពុះរួចសឹមចាក់ទឹកត្រី ស្ករស និងអំបិលបន្តិចចូល រំងាស់រហូតដល់រីងទឹកបន្តិច ទើបដាក់ទឹកខ្មេះចូលរំងាស់ជាមួយគ្នា ដើម្បីឱ្យទទួលបានរសជាតិជូរ ប្រៃ និងផ្អែម។ បន្ទាប់មក ត្រូវយកខ្ទឹមស ខ្ទឹមក្រហម និងម្ទេសស្រស់មកបុកឱ្យម៉ដ្ឋ រួចដាក់ចូលទៅក្នុងឆ្នាំងទឹកត្រី ដែលកំពុងរំងាស់នៅលើចង្ក្រាន ហើយកូរចូលគ្នាឱ្យសព្វ និងភ្លក្សរសជាតិឱ្យត្រូវតាមចំណង់ចំណូលចិត្តជាការស្រេច។
គ្រឿងផ្សំ បង្គាស្រស់កោះកុង
• បង្គាស្រស់ 2ខាំ
• ម្រះ
• ទឹកកក
• ទឹកត្រីកោះកុង
វិធីធ្វើ បង្គាស្រស់កោះកុង
របៀបរៀបចំមុខម្ហូបមួយនេះគឺមានភាពងាយស្រួលខ្លាំងណាស់ ដោយលោកអ្នកគ្រាន់តែយកបង្គាស្រស់នោះទៅបកសម្បកចេញ លាងទឹកឱ្យស្អាតល្អ និងវះយកអាចម៍ចេញពីខ្នងរបស់វាឱ្យអស់ ទុកឱ្យស្រស់ទឹក។ ចំណែកម្រះ ត្រូវពុះយកគ្រាប់ចេញ រួចលាងទឹកសម្អាតឱ្យបានស្អាត និងចិតជាបន្ទះស្តើងៗ ហើយយកចានស្អាតមួយមកក្រាលដោយដុំទឹកកក រួចដាក់បន្ទះផ្លែម្រះ និងតម្រៀបបង្គាស្រស់ ដែលបានលាងសម្អាតស្អាតនោះពីលើជាការស្រេច ដោយលោកអ្នកត្រូវក្លាស្សេវាឱ្យត្រជាក់ល្អ រួចទុកទទួលទានជាមួយនឹងទឹកត្រីកោះកុង ដែលមានរសជាតិហឹរ ជូរ ប្រៃ និងផ្អែមយ៉ាងរីករាយជាមួយនឹងមិត្តភក្តិ ឬក្រុមគ្រួសារបាត់ទៅហើយ៕
August 7, 2018
កែប្រែទម្លាប់គ្មានអនាម័យប្រចាំថ្ងៃ ដើម្បីសុខភាពល្អ
ទម្លាប់នៃការធ្វើអនាម័យរាងកាយជាប្រចាំថ្ងៃ គឺជារឿងដ៏ល្អបំផុតដែលមនុស្សគ្រប់រូបគួរតែធ្វើ ក៏ប៉ុន្តែទម្លាប់មួយចំនួនក៏អាចបង្កឱ្យមានគ្រោះថ្នាក់ដល់សុខភាពវិញផងដែរ ប្រសិនបើអ្នកអនុវត្តមិនបានត្រឹមត្រូវ។ បើតាមអ្នកជំនាញសុខភាពពិភពលោកបានប្រាប់ឱ្យដឹងថា ក្រៅពីទម្លាប់ធ្វើអនាម័យខ្លួនប្រាណ មនុស្សជាច្រើនក៏ជាប់នូវទម្លាប់ខ្ជិល និងគ្មានអនាម័យប្រចាំថ្ងៃដែលមើលរំលង ហើយអាចបណ្តោលឱ្យគ្រោះថ្នាក់ដល់សុខភាព បើអ្នកមិនព្រមផ្លាស់ប្តូរ។
1. ទម្លាប់ខ្ជិលលាងដៃពេលចេញពីបន្ទប់ទឹក ឬបង្អន់
ការលាងសម្អាតដៃ គឺជាមធ្យាបាយមួយដែលមានប្រសិទ្ធភាពបំផុតក្នុងការការពារខ្លួនឯង និងអ្នកដទៃកុំឱ្យឆ្លងមេរោគ។ ប៉ុន្តែមនុស្សមួយចំនួនមិនបានលាងសម្អាតដៃត្រឹមត្រូវនោះទេ ដែលជាហេតុនាំឱ្យមានការឆ្លងមេរោគផ្សេងៗ។ សូមលាងសម្អាតដៃជាមួយនឹងសាប៊ូឱ្យបានញឹកញាប់ ពេលចេញពីបង្គន់នៅផ្ទះ ឬបង្គន់តាមទីសាធារណ:។
2. ទម្លាប់លាងមុខញឹកញាប់
ការលាងសម្អាតផ្ទៃមុខ គឺជាមធ្យាបាយដ៏ល្អក្នុងការកម្ចាត់បាក់តេរី និងកោសិកាងាប់ៗនៅលើស្បែក ធ្វើឱ្យស្បែករបស់អ្នកស្រស់ថ្លាឡើង។ ក៏ប៉ុន្តែការលាងផ្ទៃមុខច្រើនហួសប្រមាណ អាចធ្វើឱ្យស្បែករលាក ដោយសារតែការបាត់បង់ជាតិខ្លាញ់នៅលើស្បែក។
3. ទម្លាប់ខ្ជិលងូតទឹកក្រោយពេលហាត់ប្រាណ
នៅពេលធ្វើលំហាត់ប្រាណ រាងកាយរបស់អ្នកនឹងបែកញើសច្រើន ដែលជាឱកាសមួយនៃពពួកបាក់តេរីតោងនៅជាប់នឹងស្បែក។ ប្រសិនបើអ្នកមិនបានងូតទឹកនោះទេ គឺជាកំហុសដ៏ធំមួយ ព្រោះអ្នកអាចកើតមានបញ្ហាធំុក្លិនខ្លួន កន្ទួលរមាស់ និងបញ្ហាស្បែកឡើងមុនលើស្បែកជាមិនខាន។ ប៉ុន្តែ ក្រោយពេលធ្វើលំហាត់ប្រាណ អ្នកត្រូវរងចាំរយ:ពេល15នាទី ឬចាំឱ្យញើសស្ងួតជាមុនសិន ទើបងូតទឹកបាន។
4. ទម្លាប់ប្រើដៃខ្ទប់មាត់នៅពេលកណ្តាស់
ការខ្ទប់នៅពេលក្អក ឬកណ្តាស់ ដើម្បីទប់ស្តាត់កុំឱ្យសាយភាយទឹកមាត់ដាក់អ្នកដទៃ គឺជាសុជីវធម៌មួយដ៏ល្អបំផុត។ ប៉ុន្តែ អ្នកមិនត្រូវប្រើដៃខ្ទប់នោះឡើយ ព្រោះអ្នកមិនអាចលាងសម្អាតដៃគ្រប់ពេលនោះទេ ដូច្នេះមេរោគវានឹងវិលមករករាងកាយរបស់អ្នកវិញជាមិនខាន។ យកល្អ អ្នកត្រូវមានកូនកន្សែង ឬក្រដាសអនាម័យនៅជាប់តាមខ្លួន ដើម្បីប្រើប្រាស់នៅពេលមានបញ្ហាកណ្តាស់ ឬក្អក។
5. ទម្លាប់ប្រើច្រាស់ដុសធ្មេញសើម
ការប្រើប្រាស់ច្រាស់ដុសធ្មេញសើមមិនមែនជារឿងល្អសម្រាប់សុខភាពនោះទេ ព្រោះសំណើម គឺជាទីជំរកដ៏ល្អបំផុតសម្រាប់ពពួកបាក់តេរីក្នុងការបង្កាត់ពូជ ហើយបាក់តេរីទាំងនេះនឹងចូលទៅក្នុងមាត់ ដែលបង្កឱ្យមានបញ្ហាធ្មេញ និងអញ្ចាញធ្មេញ។ វិធីដ៏ល្អបំផុត អ្នកត្រូវទុកច្រាលដុសធ្មេញ នៅកន្លែងដែលមានខ្យល់អាកាសចេញចូលបានល្អ ដើម្បីឱ្យច្រាស់ស្ងួត ហើយរៀងរាល់រយ:ពេលពី3ទៅ6ខែ គួរតែដូរច្រាស់ថ្មីចេញម្តង។
6. ទម្លាប់ប្រើសំឡីត្បាល់ត្រចៀក
ជាធម្មតា អ្នកតែងតែមានទម្លាប់ប្រើប្រាស់សំឡីត្បាល់ត្រចៀក ដើម្បីសម្អាតកាកសំណល់ផ្សេងៗចេញពីរន្ធត្រចៀក។ ក៏ប៉ុន្តែបើអ្នករុកសំឡីចូលទៅក្នុងកាន់តែខ្លាំង វានឹងរុញច្រានអាចម៍ត្រចៀកចូលកាន់តែជ្រៅដែរ ដូច្នេះប្រសិនបើមានអាចម៍ត្រចៀកច្រើន គួរតែទៅជួបជាមួយគ្រូពេទ្យ ដើម្បីរកដំណោះស្រាយបញ្ហានេះ៕
August 7, 2018
ស្រាបៀរថៃហ្គ័រចាប់ឆ្នោតលើកទី ២ ជូនគូស្វាមីភរិយាថ្មី ក្នុងកម្មវិធីអាពាហ៍ពិពាហ៍ស្រាបៀរថៃហ្គ័រ ឆ្នាំ ២០១៨
រាជធានីភ្នំពេញ៖ កាលពីថ្ងៃទី ៥ ខែសីហា ឆ្នាំ២០១៨ ស្រាបៀរថៃហ្គ័របានរៀបចំកម្មវិធីចាប់ឆ្នោតលើកទី២នៅស្ថានីយទូរទស្សន៍ PNN ក្នុងកម្មវិធីអាពាហ៍ពិពាហ៍ស្រាបៀរ ថៃហ្គ័រ នៅវេលាម៉ោង ៨យប់-១០យប់ ដើម្បីផ្តល់រង្វាន់ជ័យមង្គលជូនដល់គូស្វាមីភរិយាថ្មីទាំងអស់ដែលបានជាវថៃហ្គ័រក្នុងកម្មពិធីអាពាហ៍ពិពាហ៍របស់ស្រាបៀរថៃហ្គ័រ ឆ្នាំ២០១៨ ដោយមានការអញ្ជើញចូលរួមពីថ្នាក់ដឹកនាំក្រុមហ៊ុនស្រាបៀរថៃហ្គ័រ ក្រុមការងារស្រាបៀរថៃហ្គ័រ ភ្ញៀវកិត្តិយស និងអ្នកសារព័ត៌មានជាច្រើន។
កម្មវិធីចាប់រង្វាន់ជ័យមង្គលលើកទីពីរនេះត្រូវបានរៀបចំឡើងជាពិសេសសម្រាប់អតិថិជនរបស់ស្រាបៀរថៃហ្គ័រដើម្បីថ្លែងអំណរគុណដ៏ជ្រាលជ្រៅ និងបង្ហាញពីការយកចិត្តទុកដាក់ខ្ពស់របស់ក្រុមហ៊ុនចំពោះអតិថិជនដែលតែងតែគាំទ្រ និងនិយមពិសាស្រាបៀរថៃហ្គ័រ។ រង្វាន់ដែលបានចាប់លើកទី២នេះ គឺរង្វាន់ដំណើរកម្សាន្តក្រេបចន្ទទឹកឃ្មុំនៅប្រទេសជប៉ុនជាមួយនឹងទឹកប្រាក់ ១៥០០ ដុល្លារ ចំនួន ៥ រង្វាន់។
គូស្វាមីភរិយាថ្មីចំនួនប្រាំគូដែលមានសំណាងបានឈ្នះរង្វាន់ដំណើរកម្សាន្តក្រេបចន្ទទឹកឃ្មុំនៅប្រទេសជប៉ុនជាមួយនឹងទឹកប្រាក់ ១៥០០ ដុល្លារគឺ៖
លោកអ្នកអាចស្វែងរកឈ្មោះរបស់លោកអ្នកនៅលើកាសែត ឬលើទំព័រហ្វេសប៊ុក (www.facebook.com/tigerbeerKH/)។
ចំពោះគូស្វាមីដែលមានភ័ព្វសំណាងឈ្នះរង្វាន់ ក្រុមហ៊ុននឹងទាក់ទងទៅដោយផ្ទាល់។ ដើម្បីបើករង្វាន់ សូមភ្ជាប់មកជាមួយនូវសំបុត្រអាពាហ៍ពិពាហ៍ អត្តសញ្ញាណប័ណ្ណ សន្លឹកឆ្នោតឈ្នះរង្វាន់ វិក្កយបត្រទិញផលិតផល លិខិតអញ្ជើញអាពាហ៍ពិពាហ៍ និងរូបថតអាពាហ៍ពិពាហ៍ចំនួន ១សន្លឹក។
គួររម្លឹកផងដែរថា ថៃហ្គ័រគឺជាស្រាបៀរដែលមានគុណភាពខ្ពស់លំដាប់ថ្នាក់អន្តរជាតិមានលក់ច្រើនជាង ៧០ ប្រទេសដែលកំពុងទទួលបានការគាំទ្រកាន់តែខ្លាំងឡើងជារៀងរាល់ថ្ងៃពីអតិថិជនទាំងនៅលើទីផ្សារកម្ពុជា និង ពិភពលោក ហើយជាពិសេសជាស្រាបៀរដែលសក្ត័សមបំផុត សម្រាប់ ទទួលភ្ញៀវក្នុងពិធីអាពាហ៍ពិពាហ៍កម្មវិធីផ្សេងៗ។ សម្រាប់ឆ្នាំ ២០១៨ នេះ អតិថិជនដែលជាវស្រាបៀរ ថៃហ្គ័រកំប៉ុង ឬ ដបចាប់ពី ២៥ ដល់ ៤៩ កេស នឹងទទួលបានសៀវភៅកត់ចំណងដៃ និងប៊ិចចំនួន ១ ឈុត គូប៉ុងផ្សងសំណាងចំនួន ១ សន្លឹក និងអាវរងាគូស្នេហ៍ចំនួន ១ ឈុត។ រាល់ការជាវចាប់ពី ៥០ ដល់ ៧៤ កេស នឹងទទួលបានសៀវភៅកត់ចំណងដៃ និងប៊ិចចំនួន ២ ឈុត គូប៉ុងផ្សងសំណាងចំនួន ២ សន្លឹក និងកាបូបធ្វើដំណើរចំនួន ១។ រាល់ការជាវចាប់ពី ៧៥ កេសឡើងទៅ នឹងទទួលបានសៀវភៅកត់ចំណងដៃ និងប៊ិចចំនួន ២ ឈុត គូប៉ុងផ្សងសំណាងចំនួន ៣ សន្លឹក និងកាបូបធ្វើដំណើរចំនួន ២។ ជាពិសេសរាល់ការជាវស្រាបៀរ Tiger Crystal ចំនួន ២៥ កេសឡើងទៅ នឹងទទួលបានស្រាបៀរ Tiger Crystal ចំនួន ១ កេស បន្ថែមពីលើរង្វាន់ដែលបានផ្តល់ជូន។
ឆ្លុះបញ្ចាំងភាពអស្ចារ្យនៃអាពាហ៍ពិពាហ៍របស់អ្នកជាមួយស្រាបៀរថៃហ្គ័រ និងមានឱកាសឈ្នះដំណើរកម្សាន្តក្រេបចន្ទទឹកឃ្មុំនៅប្រទេសជប៉ុន ជាមួយបទពិសោធន៍ដ៏រំភើបរីករាយនៃការជិះស្គីទឹកកក រួមជាមួយទឹកប្រាក់១,៥០០ដុល្លារ ចំនួន១៥ រង្វាន់។ កម្មវិធីនេះចាប់ផ្តើមពីថ្ងៃនេះរហូតដល់ថ្ងៃទី ៣០ ខែ កញ្ញា ឆ្នាំ២០១៨។
សម្រាប់ព័ត៌មានបន្ថែមសូមទំនាក់ទំនង៖ 011 222 400 ឬ 011 333 500៕

សូមរីករាយទទួលទានស្រាបៀរថៃហ្គ័រដោយការទទួលខុសត្រូវ។
August 7, 2018
សូមផ្អាកលេង Facebook ហើយងាកមក ប្រើវាឱ្យត្រឹមត្រូវបើមិនចង់ធ្លាក់បាក់ឌុប
នៅក្នុងសម័យបច្ចេកវិទ្យានេះ សិស្សស្ទើរតែ100% មានប្រើប្រាស់ទូរស័ព្ទទំនើប និងបណ្តាញសង្គម ដែលវាអាចផ្តល់ទាំងគុណសម្បត្តិ និងគុណវិបត្តិដល់ពួកគេយ៉ាងច្រើន។ មានសិស្សមិនតិចទេដែលបានជ្រុលខ្លួនលេងបណ្តាញសង្គមច្រើនហួសហេតុរហូតដល់ធ្វើឱ្យការសិក្សារបស់ខ្លួនត្រូវធ្លាក់ចុះ ឬចំណាយពេលវេលាច្រើនហួសក្នុងការប្រើប្រាស់ Facebook ហើយទើបភ្ញាក់ខ្លួនពេលជិតប្រឡង ហេតុនេះដើម្បីស្តារស្ថានការណ៍មុនពេលប្រឡងនេះ ពួកគេអាចកែប្រែស្ថានការណ៍អាក្រក់បានខ្លះ ដោយការបង្វែទិសដៅពីការប្រើប្រាស់បណ្តាញសង្គមបែបអវិជ្ជមានមកប្រើដើម្បីជួយដល់ការសិក្សាវិញ។
ស្របពេលជាមួយគ្នានេះ ក្រសួងអប់រំ យុវជន និងកីឡា រួមទាំងអ្នកអប់រំជាច្រើនបានចែករំលែកឯកសារយ៉ាងទូលំទូលាយតាមបណ្តាញបច្ចេកវិទ្យាដោយប្រភពព័ត៌មានសំខាន់ៗទាំងអស់នោះសុទ្ធតែចំណុចប្រកបដោយគុណតម្លៃសម្រាប់ការត្រៀមប្រឡង។ លើសពីនេះទៅទៀត ក្រសួងអប់រំ ក៏បានដាក់ចេញនូវកម្មវិធីធ្វើតេស្តសាកល្បងសមត្ថភាពដោយខ្លួនឯងផ្ទាល់តាមបណ្តាញបច្ចេកវិទ្យា និងសៀវភៅជំនួយដល់សិស្សស្ទើរជារៀងរាល់ថ្ងៃនៅក្នុងទំព័រ Facebook ផ្លូវការរបស់ក្រសួង ដែលសិស្សអាចទាញយកទៅប្រើប្រាស់បាន។ ម្យ៉ាងវិញទៀត មានអ្នកអប់រំជាច្រើនក៏បានដាក់បញ្ចូលនូវវិញ្ញាសាប្រឡង ឬឯកសារដែលធ្លាប់ប្រឡងពីឆ្នាំមុនៗ ជាមួយនឹងការពន្យល់សម្រាប់ជួយដល់សិស្សដើម្បីស្វែងយល់មុនពេលប្រឡង។
រដ្ឋមន្ត្រីនៃក្រសួងអប់រំ យុវជន និងកីឡា ឯកឧត្តម ហង់ ជួនណារ៉ុន បានលើកឡើងថាកាលពីមុនយើងចងក្រងឯកសារ ឬស្រាវជ្រាវតាមបែបបុរាណដែលធ្វើឱ្យមានការពិបាកស្វែងរក តែបច្ចុប្បន្ននេះបច្ចេកវិទ្យាមានការរីកចម្រើន ហេតុនេះស្ថាប័នអប់រំក៏បានប្រើប្រាស់បច្ចេកវិទ្យាដើម្បីជួយសម្រួលដល់ការសិក្សារបស់សិស្សឱ្យកាន់តែមានភាពងាយស្រួលក្នុងការស្វែងរកឯកសារ និងយល់កាន់តែច្បាស់ពីការអនុវត្តជាក់ស្តែង។ ហេតុនេះយុវជនកម្ពុជាគួរបង្វែរពេលប្រើប្រាស់បណ្តាញ សង្គមដើម្បីជំនួយដល់ការសិក្សា ព្រោះការសិក្សាតាមបច្ចេកវិទ្យាអាចធ្វើឱ្យសិស្សចំណេញពេលវេលាច្រើនណាស់។ តាមរយៈបច្ចេកវិទ្យាសិស្សមិនចាំបាច់អង្គុយរៀនជាមួយគ្រូគ្រប់ពេលនោះទេ ហើយសិស្សក៏អាចទាញយកឯកសារបានងាយស្រួល ដោយមិនចំណាយលុយ និងមានភាពទូលំទូលាយថែមទៀតផង។
អតីតសិស្សនិទ្ទេស A យុវជន ហេង គីមហុង បានលើកឡើងថា សិស្សគួរបង្វែរពេលលេងបណ្តាញសង្គម មកប្រើប្រាស់វាឱ្យមានប្រសិទ្ធភាពដើម្បីជាជំនួយដល់ការសិក្សាវិញ ព្រោះប្រសិនបើយើងមិនចេះប្រើប្រាស់បណ្តាញសង្គម វានឹងក្លាយជាគ្រឿងរំខានខ្លាំងដល់ការសិក្សា និងថែមទាំងធ្វើឱ្យយើងខាតបង់ពេលវេលាច្រើនឥតប្រយោជន៍ថែមទៀតផង។ ផ្ទុយមកវិញ ប្រសិនបើយើងចេះប្រើប្រាស់បណ្តាញសង្គមត្រឹមត្រូវ យើងនឹងចំណេញពេលវេលាច្រើន ហើយថែមទាំងអាចរកឃើញគន្លឹះល្អៗជាច្រើនដែលអាចដោះស្រាយចម្ងល់ដែលយើងធ្លាប់មានបានយ៉ាងល្អទៀតផង។
យុវជន ហេង គីមហុង បាននិយាយថា៖ “ការសិក្សា ជាពិសេសផ្នែកវិទ្យាសាស្រ្តពិត ចាំបាច់ត្រូវការយល់ឱ្យកាន់តែច្បាស់ពីហេតុផល និងឫសគល់សំខាន់ៗនៃមេរៀន មុននឹងអាចយករូបមន្តមកប្រើប្រាស់បាន ហើយជាធម្មតានៅក្នុងការសិក្សានៅសាលាយើងមិនសូវបានអនុវត្ត ឬពិសោធជាក់ស្តែងនោះទេ ហេតុនេះប្រសិនបើយើងចេះប្រើប្រាស់បណ្តាញសង្គមឱ្យត្រឹមត្រូវ យើងនឹងអាចស្វែងរកប្រភពវីដេអូដែលមានការពន្យល់លម្អិតបានយ៉ាងលឿន និងមានប្រសិទ្ធភាព”។
អតីតសិស្សពូកែខាងលើបានលើកឡើងផងដែរថា ម្យ៉ាងវិញទៀត ដោយសារតែបច្ចុប្បន្ននេះយុវជនជាច្រើនចេះភាសាអង់គ្លេស វាកាន់តែមានភាពងាយស្រួលថែមទៀតក្នុងការស្រាវជ្រាវ។ នៅពេលដែលយើងមើលមេរៀន ឬមិនយល់ត្រង់ចំណុចណានោះ ពីមុនយើងចាំបាច់ត្រូវរកគ្រូ ឬសិស្សច្បងដើម្បីសួរ ហើយប្រសិនបើគ្មានពួកគេទេនោះ យើងនឹងមិនអាចរៀនទៅមុខនោះទេ។ តែឥឡូវនេះមិនដូចពីមុននោះទេ រាល់ពេលដែលយើងឆ្ងល់នៅកន្លែងណាមួយ ហើយត្រូវការពន្យល់ យើងអាចស្រាវជ្រាវរកសេចក្តីពន្យល់បានយ៉ាងលម្អិតពីមេរៀននីមួយៗ។ នៅពេលដែលបច្ចេកវិទ្យាដើរលឿន ការសិក្សាក៏កាន់តែងាយស្រួល និងសម្បូរបែបដូចគ្នា តែគួរឱ្យស្តាយ ដោយសារតែមានសិស្សជាច្រើនមិនព្រមធ្វើវាឱ្យមានប្រយោជន៍៕
August 7, 2018
ផលិតផល Madam K Skin Care បន្ថែមភាពស្រស់ស្អាតដល់យុវវ័យ
ក្រុមហ៊ុន SONNKANIKA Co, Ltd. ជាក្រុមហ៊ុននាំចូលផលិតផលថែរក្សាសម្រស់ម៉ាក Madam K Skin Care ដែលនាំចូលពីប្រទេសម៉ាឡេស៊ី និងមានរូបមន្តពីប្រទេសស្វីស ឥលូវនេះបានប្រារព្ធធ្វើ ពិធីបើកសម្ពោធជាផ្លូវការនូវផលិតផលរបស់ខ្លូន កាលពី រសៀលថ្ងៃទី ០៦ ខែសីហា ឆ្នាំ២០១៨។
ក្នុងពិធីសម្ពោធនេះ ក៏មានការចូលរួមពីសំណាក់តំណាងក្រុមហ៊ុន Madam K នៅប្រទេសម៉ាឡេស៊ី ព្រមជាមួយនឹងការផ្តល់ជូននូវ ពានរង្វាន់ផ្នែកលក់ផលិតផលដាច់ជាងគេ វិញ្ញាបនបត្របញ្ជាក់ពីការសិក្សាផលិតផល វិញ្ញាបនបត្របញ្ជាក់ពីគ្រឿងផ្សំផលិតផល និងវិញ្ញាបនបត្រផ្នែកពិនិត្យស្បែកមុខផងដែរ។
ថ្លែងក្នុងកម្មវិធីនេះដែរ លោកជំទាវ សុន កណ្ណិកា នាយិកាក្រុមហ៊ុន SONNKANIKA Co, Ltd. បានមានប្រសាសន៍ថា បន្ទាប់ពីទទួលបានការគាំទ្រយ៉ាងច្រើនពីសំនាក់អតិថិជនចំពោះការប្រើប្រាស់ផលិតផល SK Teeth Whitening សម្រាប់ជួយឲ្យធ្មេញសស្រស់ស្អាតកន្លងមក ដូច្នេះតាមរយៈ ភាពជោគជ័យនេះ ក្រុមហ៊ុនក៏សម្រេចចិត្តនាំចូលផលិតផល Madam K Skin Care បន្ថែមទៀត សម្រាប់បំពេញនូវភាពស្រស់ស្អាតដល់អ្នកប្រើប្រាស់។
គួរបញ្ជាក់ផងដែរថា Madam K Skin Care គឺជាផលិតផលដែលមានគុណភាពខ្ពស់ ស្តង់ដាអន្តរជាតិ ដែលធានាប្រសិទ្ធភាពខ្ពស់ ក៏ដូចជាទំនុកចិត្តដល់អ្នកប្រើប្រាស់ដើម្បីទទួលបាននូវភាពស្រស់ស្អាត។ ហើយក្នុងនោះ Madam K Skin Care មានផលិតផលដូចជា ឡេលាបខ្លូនការពារកំដៅថ្ងៃ សាប៊ូកក់សក់កាត់បន្ថយជ្រុះ បណ្តុះសក់ និងព្យាបាលសក់ ក៏ដូចជាឈុតព្យាបាល និងថែរក្សាស្បែកមុខជាដើម។
August 7, 2018
អគារពាណិជ្ជកម្មភ្លោះលំដាប់អន្តរជាតិ ត្រូវបានសាងសង់នៅខេត្តព្រះសីហនុ
ដោយមើលឃើញសក្តានុពលពាណិជ្ជកម្មក្នុងខេត្តព្រះសីហនុដែលជាខេត្តជាប់មាត់សមុទ្ររបស់ប្រទេសកម្ពុជា ក្រុមវិនិយោគិនបរទេសបានចូលមកបណ្តាក់ទុនយ៉ាងច្រើនជាបន្តបន្ទាប់នៅមួយរយៈចុងក្រោយនេះ។ ឧទាហរណ៍ អគារពាណិជ្ជកម្មភ្លោះលំដាប់អន្តរជាតិដ៏ធំមួយបានចាប់ផ្តើមសាងសង់ឡើងហើយនៅក្នុងខែសីហា ឆ្នាំ2018នេះ។
លោក ឈីវ គួរស៊ីញ ប្រធានប្រតិបត្តិក្រុមប្រឹក្សាភិបាលក្រុមហ៊ុនអចលនទ្រព្យដ៏ធំមួយមកពីប្រទេសចិនដែលគ្រប់គ្រងលើគម្រោងមួយនេះបានមានប្រសាសន៍ថា ដោយមើលឃើញសក្តានុពលសេដ្ឋកិច្ច និងពាណិជ្ជកម្ម របស់ខេត្តជាប់មាត់សមុទ្ររបស់ប្រទេសកម្ពុជា ក្រុមហ៊ុនបានសម្រេចបោះទុនវិនិយោគក្នុងទឹកប្រាក់រាប់លានដុល្លារសាងសង់អគារពាណិជ្ជកម្មពហុមុខងារ លំដាប់ថ្នាក់អន្តរជាតិនៅដើមខែសីហា ឆ្នាំ2018នេះ ដែលវាជាចំណែកមួយជួយឱ្យសរសៃឈាមសេដ្ឋកិច្ចរបស់ខេត្តជាប់មាត់សមុទ្រមួយនេះមានភាពរស់រវើក និងរឹងមាំខ្លាំងថែមមួយកម្រិតឡើងទៀត ដោយអគារទាំងនេះធ្វើឡើងក្នុងបំណងបម្រើឱ្យវិស័យពាណិជ្ជកម្មទូទៅ និងជាពិសេសរង់ចាំទទួលភ្ញៀវទេសចរចិនដែលនឹងមកស្នាក់នៅ និងកម្សាន្តប្រទេសកម្ពុជាចំនួនប្រមាណជា2លាននាក់នាឆ្នាំ2020ខាងមុខ។
លោកបន្ដថា ទីក្រុងព្រះសីហនុបានផ្លាស់ប្តូរមុខមាត់ថ្មីតាមរយៈការអភិវឌ្ឍទៅជាទីក្រុងអន្ដរជាតិដែលមានឆ្នេរខ្សាច់ដ៏ស្រស់ស្អាត សណ្ឋាគារលំដាប់ផ្កាយ5 មជ្ឈមណ្ឌលទិញទំនិញ តំបន់កម្សាន្តលំដាប់កំពូល និងភោជនីយដ្ឋានល្បីៗមកប្រមូលផ្តុំនៅទីក្រុងមួយនេះដែលធ្វើឱ្យទីក្រុងនេះក្លាយជាគោលដៅទេសចរណ៍ដ៏ពេញនិយមនៅតំបន់អាស៊ីអាគ្នេយ៍។
លោកបានបន្តទៀតថា គម្រោងសាងសង់អគារពហុមុខងារនេះមានឈ្មោះ ព្រីនស៍ ធាន ស៊ី វ៉ាន នឹងស្ថិតនៅលើទំហំផ្ទៃដីសរុបជាង 3ហិកតា រចនាដោយក្រុមហ៊ុនអន្តរជាតិលំដាប់កំពូល ដោយគម្រោងពហុមុខងារនេះរួមមាន សណ្ឋាគារលំដាប់ផ្កាយ5 និងផ្កាយ6 សណ្ឋាគារប៊ូទិក អាផាតមិន និងមជ្ឈមណ្ឌលពាណិជ្ជកម្មជាដើម ដែលនឹងមានផ្តល់ជូននូវសេវាកម្មលំនៅឋាន និងពាណិជ្ជកម្មលំដាប់ថ្នាក់អន្តរជាតិ។
គម្រោងនេះក៏មានរួមបញ្ចូលនូវផ្សារទំនើប សាលពិព័រណ៍ សាលសន្និសីទអន្តរជាតិ លំនៅឋាន សេវាកម្ម ពាណិជ្ជកម្ម ភោជនីយដ្ឋាន អាងហែលទឹកទំនើប ក្លិបទូកល្បឿនលឿន-ល-ជាពិសេសគម្រោងនេះក៏មានចំណតរថយន្តដ៏ទំនើប និងធំទូលាយទំហំ 25,000ម៉ែត្រការ៉េផងដែរ។
ពាក់ព័ន្ធនឹងករណីនេះ លោកឧកញ៉ានួន រិទ្ធី អគ្គនាយកក្រុមហ៊ុនផ្តល់សេវាអចលនទ្រព្យ (KFA)បានមានប្រសាសន៍ថា ខេត្តព្រះសីហនុជាខេត្តជាប់មាត់សមុទ្រ និងជាប៉ូលសេដ្ឋកិច្ចដ៏ធំមួយរបស់កម្ពុជាដែលស័ក្តិសមនឹងទទួលបានការវិនិយោគលើគ្រប់វិស័យពីសំណាក់វិនិយោគិនទាំងក្នុង និងក្រៅប្រទេស។ខេត្តដ៏ល្អស្អាតមួយនេះមានសក្តានុពលដោយសារតែមានមាត់សមុទ្រ មានភាពអំណោយផលពីធម្មជាតិ ផ្តល់នូវសោភណភាព និងទេសភាពស្រស់ស្អាតសម្រាប់ការរស់នៅជាទីមនោរម្យ មានហេដ្ឋារចនាសម្ព័ន្ឋផ្លូវដឹកជញ្ជូនជាច្រើន ដូចជាផ្លូវរថយន្តល្បឿនលឿនដែលមានរយៈចម្ងាយខ្លីជាងផ្លូវជាតិលេខ4 មានផ្លូវដែក និងផ្លូវអាកាស និងផ្លូវសមុទ្រពិសេសមានកំពង់ផែទឹកជ្រៅ អំណោយផលនៅក្នុងការដឹកជញ្ជូនទំនិញចូលមកក្នុង និងចេញទៅក្រៅប្រទេស។
ក្រៅពីស្ថិរភាពសេដ្ឋកិច្ច និងនយោបាយហើយ រដ្ឋាភិបាលបានលើកទឹកចិត្តដល់វិនិយោគិនបរទេសឱ្យចូលមកបណ្តាក់ទុនរកស៊ីនៅកម្ពុជាកាន់តែច្រើនដោយអនុញ្ញាតឱ្យវិនិយោគិនបរទេសអាចបើកក្រុមហ៊ុនដោយផ្ទាល់ មានសិទ្ធិកាន់កាប់ភាគហ៊ុន100% និងមានការសម្រួលការបង់ពន្ធ ជាដើម ដែលធ្វើឱ្យអ្នកវិនិយោគទៅបណ្តាក់ទុនរកស៊ីលើគ្រប់វិស័យនៅតំបន់នោះមានទាំងវិស័យទេសចរណ៍រោងចក្រឧស្សាហកម្ម វិស័យអចលនទ្រព្យ និងសំណង់ជាដើម ដើម្បីក្លាយជាចំណែកមួយជួយលើកកម្ពស់សេដ្ឋកិច្ចខេត្ត និងសេដ្ឋកិច្ចជាតិកម្ពុជាឱ្យកាន់តែប្រសើរឡើងថែមមួយកម្រិតទៀត៕
August 7, 2018
ការនាំចេញផលិតផលសម្លៀកបំពាក់ និងស្បែកជើងកើនឡើង 9.3% ក្នុងឆមាសទី1
យោងតាមក្រសួងពាណិជ្ជកម្មបានឱ្យដឹងថាការនាំចេញរបស់វិស័យកាត់ដេរនៅក្នុងប្រទេសកម្ពុជាមានតម្លៃ 3.7 ពាន់លានដុល្លារក្នុងរយៈពេល 6ខែដំបូងនៃឆ្នាំនេះ បានកើនឡើង 9.3%។ លទ្ធផលដ៏រឹងមាំនៃវិស័យនេះក៏បានកើនឡើងផងដែរនៅក្នុងអំឡុងពេលដ៏រសើបមួយសម្រាប់ប្រទេសកម្ពុជាដោយប្រទេសមួយនេះបានប្រារព្ធការស្ទង់មតិតាមរយៈការបោះឆ្នោតថ្នាក់ជាតិនីតិកាលទី 6 របស់ខ្លួន។
កំណើននៃសកម្មភាពនាំចេញផលិតផលសម្លៀកបំពាក់ និងស្បែកជើងបានកើនឡើងយ៉ាងរឹងមាំក្នុងអំឡុងឆមាសទី 1 នៃឆ្នាំនេះ បើទោះបីជាមានការព្រមានថ្មីៗពីសហភាពអឺរ៉ុប និងសហរដ្ឋអាមេរិកដែលជាដៃគូពាណិជ្ជកម្មដ៏សំខាន់របស់កម្ពុជាថាពួកគេអាចនឹងលុបចោលពាណិជ្ជកម្មដែលពេញចិត្តនៅកម្ពុជា ប្រសិនបើស្ថានភាពសិទ្ធិមនុស្សនៅកម្ពុជាមិនត្រូវបានកែលម្អ។
យោងតាមតួលេខពីក្រសួងនេះបានឱ្យដឹងថា ការដឹកជញ្ជូនវាយនភណ្ឌទៅកាន់ប្លុកអឺរ៉ុបបានកើនឡើង 10.66% ដែលមានតម្លៃសរុបជាង 1.6 ពាន់លានដុល្លារ ខណៈសហរដ្ឋអាមេរិកវិញបានកើនឡើង 10.73 ភាគរយ និងមានតម្លៃ 858លានដុល្លារ។ ទីផ្សារទាំង2 នេះរួមចំណែក 72%លើការនាំចេញសរុបរបស់កម្ពុជា។
ការនាំចេញទៅកាន់ប្រទេសកាណាដាបានកើនឡើងជាង 9% ដែលមានតម្លៃ 324លានដុល្លារខណៈការនាំចេញទៅកាន់ពិភពលោកបានកើនឡើង 10.10% និងមានតម្លៃ 850លានដុល្លារ។
លោក កាំង ម៉ូនីកា អគ្គលេខាធិការរងនៃសមាគមរោងចក្រកាត់ដេរនៅកម្ពុជា (GMAC) បាននិយាយថា ការអនុវត្តជារួមលើវិស័យនេះមានលក្ខណៈគួរឱ្យចាប់អារម្មណ៍ ជាពិសេសបានគិតគូរថា ការបោះឆ្នោតថ្នាក់ជាតិបានធ្វើឱ្យមានការព្រួយបារម្ភដល់វិនិយោគិនជាច្រើន។ សហភាពអឺរ៉ុប និងសហរដ្ឋអាមេរិកនឹងបន្តក្លាយជាទីផ្សារដ៏សំខាន់បំផុតរបស់យើង ដែលត្រូវមានទំនុកចិត្តថាទំនាក់ទំនងរវាងប្រទេសយើងនឹងប្រសើរឡើងតាមរយៈការយល់ដឹង និងការគោរពគ្នាទៅវិញទៅមក។
លោក ស៊ាង ថៃ អ្នកនាំពាក្យក្រសួងពាណិជ្ជកម្មបានប្រាប់សារព័ត៌មាន ឡារ៉ែនថា៖ “ដូចយើងបានដឹងហើយថា កម្ពុជាយើងធ្វើពាណិជ្ជកម្មជាអន្តរជាតិ ដូច្នេះទីផ្សារកម្ពុជាមានច្រើនយើងបានបើកទូលាយគ្រប់ប្រទេសក្នុងការនាំចេញមានច្រើនទិសដៅ ប៉ុន្តែការងារដែលលេចឮព័ត៌មានមកថា នឹងបិទការនាំចេញពាណិជ្ជកម្មដោយសហគមន៍អឺរ៉ុបនោះ នៅមិនទាន់ឃើញមានទេ គឺនៅមានរបាយការណ៍ទៅមកនៅឡើយ តែយ៉ាងណា ក៏យើងនៅមានច្រកដទៃទៀតដែរ ព្រោះយើងធ្វើពាណិជ្ជកម្មដោយទូលំទូលាយមិនធ្វើតែចំពោះនរណាម្នាក់ឡើយ”។
លោក ស៊ាង ថៃ អ្នកនាំពាក្យក្រសួងពាណិជ្ជកម្ម
លោកថ្លែងថា ចំនួនលើកទឹកចិត្តក្នុងកំណើននាំចេញ គឺជាលទ្ធផលនៃសន្តិភាព និងស្ថិរភាពនៅក្នុងប្រទេស។ ស្ថិរភាព និងសណ្តាប់ធ្នាប់សាធារណៈមានសារៈសំខាន់សម្រាប់សកម្មភាពធុរកិច្ច និងការវិនិយោគ។ នេះជាប្រភេទបរិស្ថានពាណិជ្ជកម្មដែលប្រទេសយើងត្រូវការដើម្បីធានាឱ្យមានការអភិវឌ្ឍបន្ថែមទៀត មិនត្រឹមតែសម្រាប់វិស័យដែលផ្ដោតលើការនាំចេញទេ ប៉ុន្តែសម្រាប់សេដ្ឋកិច្ចទាំងមូល។
យោងតាមរបាយការណ៍របស់អគ្គនាយកដ្ឋានសេវានាំចេញ-នាំចូលនៃក្រសួងពាណិជ្ជកម្ម បានឱ្យដឹងថា ក្នុងរយៈពេល 6ខែ នៃឆ្នាំ2018 នេះ ការនាំទំនិញចេញពីកម្ពុជា រួមមាន៖ វាយនភណ្ឌ សម្លៀកបំពាក់ ស្បែកជើង និងអង្ករជាដើម។ល។ រួមទាំងការបញ្ជាទិញរបស់ម៉ាកល្បីៗទូទាំងពិភពលោកដូចជាម៉ាក អាឌីដាស (Adidas) និងអេច្ឆ អេន អឹម (H&M)ជាដើម នៅតែបន្តកើតមាន ដែលបង្ហាញថាទាំងការបញ្ជាទិញ ក៏ដូចជាការនាំចេញរបស់កម្ពុជានឹងនៅតែល្អប្រសើរ ដោយសារប្រទេសកម្ពុជារក្សាបានកំណើនសេដ្ឋកិច្ចដ៏រឹងមាំ ពិសេសស្ថានភាពនយោបាយស្ថិតក្នុងភាពប្រក្រតី ក្រោយការបោះឆ្នោតត្រូវបានបញ្ចប់។
កាលពីពេលថ្មីៗនេះ ធនាគារជាតិនៃកម្ពុជាបានចេញផ្សាយការព្យាករសេដ្ឋកិច្ចចុងក្រោយរបស់ខ្លួន ដោយបានដាក់កំណើនសេដ្ឋកិច្ចរបស់ប្រទេសកម្ពុជាសម្រាប់ឆ្នាំនេះចំនួន 7% ដែលគាំទ្រដោយវិស័យឧស្សាហកម្មកាត់ដេរ ទេសចរណ៍ និងសំណង់។ “តាមទស្សនវិស័យ ម៉ាក្រូសេដ្ឋកិច្ចរបស់ប្រទេសនេះមានភាពរឹងមាំ ដោយការនាំចេញសម្លៀកបំពាក់ គឺជាផ្នែកមួយដ៏សំខាន់ក្នុងការជំរុញកំណើនជាតិ”។
កម្មករ-កម្មការិនីកំពុងធ្វើការក្នុងរោងចក្រផលិតស្បែកជើងមួយកន្លែង
សូមបញ្ជាក់ថា សហភាពអឺរ៉ុបបាននិយាយថាខ្លួននឹងលុបចោលគម្រោងអ្វីគ្រប់យ៉ាងដែលមិនមែនជាអាវុធ(EBA= the Everything But Arms scheme)ដែលអនុញ្ញាតឱ្យកម្ពុជានាំចេញទៅទីផ្សារអឺរ៉ុប និងកូតាដោយឥតគិតថ្លៃ ប្រសិនបើស្ថានភាពសិទ្ធិមនុស្សនៅក្នុងប្រទេសមិនមានភាពប្រសើរឡើង។
សហភាពអឺរ៉ុប គឺជាគោលដៅនាំចេញនាំមុខគេរបស់កម្ពុជាដែលមានចំនួន 40%នៃការនាំចេញសរុប។ ទាំងអស់នេះបានកើនឡើងយ៉ាងខ្លាំងក្នុងប៉ុន្មានឆ្នាំថ្មីៗនេះ ដោយកើនឡើង 227% ចន្លោះពីឆ្នាំ2011 និងឆ្នាំ2016 និងឈានដល់ 5ពាន់លានដុល្លារគិតជាតម្លៃកាលពីឆ្នាំទៅមិញ។ បច្ចុប្បន្នកម្ពុជាស្ថិតនៅលំដាប់ទី2 ក្នុងចំណោមអ្នកទទួលផលពី EBA ទាក់ទងនឹងបរិមាណជួញដូរ៕
August 7, 2018