Author: ធឿន មករា

ស្រប​ពេលដែល​វិស័យ​អចលនទ្រព្យ​ខេត្ត​ព្រះសីហនុ​កំពុង​ហក់​ឡើង​ជិត​ដល់​កម្រិត​កំពូល​នោះវិស័យនេះ​បាន និង​កំពុង​បែ​មុខ​ឆ្ពោះទៅ​ក្រុង​ប៉ោយប៉ែត ខេត្តបន្ទាយមានជ័យ​វិញ​ម្តង​ហើយ ដោយសារទីនោះ​ក៏​ជា​ច្រក​អន្តរជាតិ​ដ៏​សំខាន់​ក្នុងការ​ដឹកជញ្ជូន​ទំនិញ​ចេញ-ចូលក្នុង និង​ក្រៅ​ប្រទេសមួយ​ដែរ។

អភិបាលក្រុង​ប៉ោយប៉ែត​លោក សាន ស៊ានហូ បានផ្តល់​បទ​សម្ភាស​ថា បច្ចុប្បន្ន​តម្លៃ​ដី​ក្រុង​ប៉ោយប៉ែត​កំពុងតែ​ឡើងថ្លៃ​ខ្ពស់ឡើងៗពិតប្រាកដ​មែន ដោយសារតែ​លោក​បាន​ដឹកនាំ​មន្ត្រីក្រោមឱវាទ​រៀបចំ​ហេដ្ឋារចនាសម្ព័ន្ធ​ឱ្យ​កាន់តែ​ល្អប្រសើរ​ឡើងតាមរយៈ​ការជួសជុល​ផ្លូវជាតិ ដាក់​ទ្រូងផ្លូវ​ពុះ​ចំ​កណ្តាល និង​បានរៀបចំ​កសាង​ផ្លូវលំ​ប្រវែង​សរុប​ជាង 600គីឡូម៉ែត្រ កែប្រែ​ពី​ផ្លូវដី​ទៅជា​ដី​ថ្ម​ចម្រុះ ជាហេតុ​ធ្វើឱ្យ​បណ្ដា​ក្រុមហ៊ុន​ទាំង​ក្នុងស្រុក និង​ក្រៅ​ស្រុក​នាំគ្នា​សម្រុក​ពុះ​ដីឡូត៍​លក់ និង​សាងសង់​អគារខ្ពស់ៗ ខុន​ដូ សណ្ឋាគារ រោងចក្រ​សហគ្រាស​យ៉ាងច្រើន​ជា​បន្តបន្ទាប់។

លោក​បញ្ជាក់ថា អ្វីដែល​ធ្វើឱ្យ​តម្លៃ​ដី​ក្នុង​ក្រុង​ប៉ោយប៉ែត​ហក់​ឡើង​កាន់តែ​ខ្ពស់​ខ្លាំង​នៅ​រយៈពេល​ប៉ុន្មាន​ឆ្នាំ​ចុង​ក្រោយនេះ គឺ​ដោយសារ​ក្រុង​ប៉ោយប៉ែត​ជា​កន្លែង​បណ្តុំ​មនុស្ស​មកពី​គ្រប់​ខេត្ត-ក្រុង​ចូលទៅ​ប្រកប​របរ​ចិញ្ចឹមជីវិត និង​រស់នៅ​ទីនោះ​មាន​ចំនួន​កាន់តែច្រើនឡើងៗ ហើយ​ដោយសារហេដ្ឋារចនាសម្ព័ន្ធ​មាន​ភាព​អំណោយផល​ល្អ​ក្នុងការ​ដឹកជញ្ជូន​ទំនិញ​ទៅ​ក្រៅប្រទេស​បន្ទាប់ពីរ​រដ្ឋា​ភិបាល​កម្ពុជា និង​ថៃ បាន​សាងសង់​ផ្លូវ​រថភ្លើង​ត​ភ្ជាប់​គ្នា ហើយ​ថែមទាំង​បានប្រកាស​បើក​ច្រក​អន្តរជាតិ​ថ្មី​មួយទៀត (ច្រក​ស្ទឹង​បត់) ដើម្បី​ជួយ​សម្រួល​ដល់​ការដឹកជញ្ជូន​ទំនិញ​ចេញចូល​ឱ្យ​កាន់តែ​ប្រសើរឡើង​ផង​នោះ ទើប​ធ្វើឱ្យ​តម្លៃ​ដី​នៅ​ទីនោះ​កាន់តែ​ឡើងថ្លៃ​ខ្ពស់ ហើយ​សកម្មភាព​ពុះ​ដីឡូត៍​លក់​ទីនោះ​ក៏មាន​សកម្មភាព​កាន់តែច្រើនឡើងៗដែរ។ ក្រៅពីនេះ នៅ​ច្រក​អន្តរជាតិ​ស្ទឹង​បត់ វិស័យ​សំណង់​ក៏បាន​រីកដុះដាល​ខ្លាំង​ដែរ​នៅ​កណ្តាល​ក្រុង​នោះ ដោយ​ក្នុងនោះ​មានដូចជា សំណង់ផ្ទះ​ល្វែង បុរី វីឡា និង​ខុន​ដូ (Sokha Residence)កំពុង​សាងសង់​នៅ​ឡើងជាបណ្តើរៗហើយ។ ក្រៅពី​សំណង់​លំនៅដ្ឋាន សំណង់​សណ្ឋាគារ ផ្ទះសំណាក់ ភោជនីយដ្ឋាន រួមទាំង​អគារ​កាស៊ីណូធំៗដែលមាន​ស្រាប់​ហើយ​នោះ និង​ទើប​សំណង់ថ្មីៗជាច្រើន​ទៀត​ក៏​កំពុងតែ​រីក​ឡើង​ចម្រុះ​គ្នា​នៅ​ទីនោះ​ផងដែរ។

លោក​អភិបាលក្រុង​ប៉ោយប៉ែត​បាន​បន្ថែមថា ក្រៅតែពី​សំណង់​ខាងលើ​នោះ ក្រុង​ប៉ោយប៉ែត​ក៏​ជាទី​តាំង​នៃ​បណ្តុំ​រោងចក្រ​ឧស្សាហកម្ម​ដ៏​សំខាន់​ផងដែរ ដែល​មកទល់​បច្ចុប្បន្ន​មាន​តំបន់​សេដ្ឋកិច្ច​ពិសេសធំៗចំនួន3ទីតាំង មានដូចជា​រោងចក្រ​ផលិត​គ្រឿងបន្លាស់​ក្រុមហ៊ុន​តូយ៉ូតា ដែលមាន​ក្រុមហ៊ុន​ចំនួន 20រួម​នៅ​ក្នុងនោះ​ទៀតផង។ លោក​បញ្ជាក់ថា ដើម្បី​ផ្តល់​ភាពងាយស្រួល និង​ទាក់ទាញ​វិនិយោគិន​ឱ្យបាន​កាន់តែច្រើនឡើងៗ រាជរដ្ឋាភិបាល​គ្រោង​នឹង​បង្កើត​ព្រលានយន្តហោះ​ប្រចាំ​ក្រុង​ប៉ោយប៉ែត​បន្ថែម​ថ្មី​មួយទៀត ដែល​គេ​រំពឹងថា វិស័យ​អចលនទ្រព្យ​នៅ​ទីនោះ​នឹង​រីកដុះដាល​កាន់តែខ្លាំង​ឡើង​ថែមទៀត ដែល​ត្រឹម​រយៈពេល 5ឆ្នាំ​ក្រោយនេះ​សំណង់​អគារ​នៅ​ទីនោះ​នឹង​កើនឡើង​ខ្លាំង​មិន​ចាញ់​តំបន់​ទីក្រុង​ធំផ្សេងៗទៀត​នៅក្នុង​ប្រទេស​កម្ពុជា​យើង​ឡើយ។ លោក​បញ្ជាក់​ដូច្នេះ​ថា “បច្ចុប្បន្ន​ក្រុម​វិនិយោគិន​កំពុង​បង្កើត​គម្រោង​អភិវឌ្ឍន៍​ដី 500ហិកតា​ទៅជា​គោលដៅ​ទេសចរណ៍​ដ៏​សំខាន់​មួយ​ដែល​គ្រោង​បង្កើតជា​ទីលាន​វាយ​កូន​ហ្គោល​សិប្បនិម្មិត សួនច្បារ​ខ្នាត​ធំ និង​ផ្សារ​បណ្តែត​ទឹក​បន្ថែមទៀត​ក្នុង​គោលដៅ​ទាក់ទាញ​ទេសចរ​ឱ្យបាន​កាន់តែច្រើនឡើងៗផងដែរ‟។

ក្រុង​ប៉ោយប៉ែត​ជា​ក្រុង​ធំ​មួយ​នៃ​ខេត្តបន្ទាយមានជ័យ​ស្ថិតនៅ​ទិស​ពាយព្យ​នៃ​ប្រទេស​ដែលមាន​ទំហំ​ដី 2,620,000ម៉ែត្រក្រឡា និង​ត្រូវបាន​បែង-​ចែកជា 3ទីតាំងសំខាន់ៗ ដូចជា​សង្កាត់​ប៉ោយប៉ែត សង្កាត់​ផ្សារកណ្តាល និង​សង្កាត់​និម្មិត។ ទីក្រុង​នេះ​គឺជា​តំបន់​លំនៅឋាន​ដែល​តម្លៃ​ដី 10គីឡូម៉ែត្រ​ជុំវិញ​ក្រុង​ប៉ោយប៉ែត​កំពុងតែ​ឡើងថ្លៃ​ប្រមាណ​ពី 50ទៅ120% នៅ​រយៈពេល 6ខែ​ដើមឆ្នាំ2018នេះ។ ជាមួយគ្នានេះ​សំណង់ផ្ទះ​ល្វែង​ស្ថិតក្នុង​ទីប្រជុំជន​មានតម្លៃ​ចន្លោះ​ពី 30,000ដុល្លារ​ទៅដល់ 50,000ដុល្លារ​ក្នុង​មួយ​ល្វែង ឯ​តម្លៃ​ខុន​ដូ​វិញ​មានតម្លៃ​ចាប់ពី 27,000ដុល្លារ​ឡើង​ក្នុង​មួយ​យូ​នី​ត៕

ដោយឡៃហ្វ៍ស្តាយល៍របស់ស្រ្តីសម័យថ្មីដែលនៅមានអារម្មណ៍សប្បាយ និងចង់សាកល្បងជាមួយជីវិតការធ្វើការងារឱ្យបានយូរ ឬអ្នកខ្លះទៀតជានាងក្រមុំរើសច្រើនដែលនៅមិនទាន់ជួបបុរសត្រូវចិត្តនោះ ធ្វើឱ្យការសាងក្រុមគ្រួសារ និងការរៀបការក្រកើតឡើង ឱកាសក្នុងការនឹងមានបញ្ហាពាក់ព័ន្ធជាមួយការតាំងគភ៌ និងបញ្ហាផ្នែកសុខភាពរបស់ទារកពិតជាមានភាពអាចទៅរួចខ្ពស់។

វេជ្ជបណ្ឌិតជំនាញផ្នែកស្រ្តី និងសម្ភពបានឱ្យដឹងថា ស្រ្តីដែលតាំងគភ៌នៅពេលខ្លួនអាយុច្រើន មានភាពប្រថុយប្រថានខ្ពស់ដោយសារកូននឹងកើតភាពខុសប្រក្រតី របស់ចំនួនក្រូម៉ូហ្សូមដែលនឹងនាំឆ្ពោះទៅរកក្រុមអាការរលូតបាន ដោយសារតែការធ្វើការរបស់សម្បុកស៊ុតញីនឹងចុះខ្សោយនៅពេលស្រ្តីមានអាយុច្រើនឡើង ជាពិសេសក្នុងអំឡុងអាយុ35ឆ្នាំឡើងទៅដោយពេទ្យនឹងផ្ដល់ការណែនាំ ដើម្បីជោះយកទឹកភ្លោះមកពិនិត្យរកមើលភាពខុសប្រក្រតីរបស់ក្រូម៉ូហ្សូមក្នុងអំឡុងអាយុគភ៌ប្រមាណ17 – 22សប្ដាហ៍។ ស្រ្តីមានគភ៌គួរប្រាប់ និងប្រឹក្សាសុំការណែនាំពីគ្រូពេទ្យ ដើម្បីបានទទួលព័ត៌មានអំពីការតាំងគភ៌របស់ខ្លួនឱ្យបានច្រើនបំផុត និងពិភាក្សារួមគ្នាអំពីភាពប្រថុយប្រថានដែលអាចនឹងកើតឡើងចំពោះទារក និងការថែទាំរក្សាដែលត្រឹមត្រូវជាបន្ត។

ក្រៅពីនេះ ការតាំងគភ៌នៅពេលអាយុច្រើននៅធ្វើឱ្យកើតបញ្ហាទងសុកធ្លាក់ចុះទាប ទងសុករបកមុនពេលប្រសូត អ្នកខ្លះអាចកើតភាពខុសប្រក្រតីរបស់សរសៃឈាមដែលហូរទៅចិញ្ចឹមនៅទងសុក និងខ្លួនទារក ដែលជាហេតុធ្វើឱ្យទារកមានខ្លួនតូច និងមានសភាវក្រធំ ឬធំយឺតនៅក្នុងគភ៌ពិតជាអាចកើតឡើងខ្ពស់ ឬស្រ្តីខ្លះទៀតកើតរោគទឹកនោមផ្អែមខណៈមានគភ៌ដែលនឹងរកឃើញថា ទារកនឹងមានខ្លួនធំ និងពិបាកប្រសូតធ្វើឱ្យធ្លាក់ឈាមច្រើនក្រោយពេលប្រសូតបាន។

ការពិនិត្យសុខភាពមុនពេលតាំងគភ៌មានភាពចាំបាច់ និងជួយកាត់បន្ថយក្ដីកង្វល់បានច្រើន ដោយសារតែដល់ពេលអាយុច្រើនឡើងក៏នឹងមានជំងឺលើសឈាម ឬទឹកនោមផ្អែមខណៈពេលមានគភ៌កើតឡើងដែរ ហើយបើមានគភ៌នៅពេលអាយុច្រើនជាង 25ឆ្នាំផងនោះ នឹងកើតជំងឺទឹកនោមផ្អែម និងលើសឈាមខ្លាំងជាងមនុស្សទូទៅដល់ទៅ2ដង ដូច្នេះការឃុំគ្រងការពារជំងឺមុនការតាំងគភ៌នឹងជួយកាត់បន្ថយជំងឺជ្រៀតជ្រែកទាំងនោះបាន៕

ខណៈតាំងគភ៌ ជាពិសេសតាំងគភ៌លើកដំបូង ស្រ្តីមានគភ៌អាចនៅមិនទាន់ដឹង ឬដឹងមិនអស់សេចក្ដីពាក់ព័ន្ធនឹងទង្វើដែលមិនស័ក្តិសម ឬចំណុចហាមឃាត់ផ្សេងៗដែលគ្រូពេទ្យជំនាញបានហាម ឬអនុញ្ញាតឱ្យធ្វើដែរ តែត្រូវធ្វើឱ្យតិចបំផុតដើម្បីសុខភាពរបស់ទាំងម្ដាយ និងកូនក្នុងគភ៌។ ចំណុចហាមឃាត់ទាំងនោះមានហេតុផលត្រឹមត្រូវច្បាស់លាស់ខាងវិទ្យាសាស្រ្ត មិនមែនជាជំនឿតៗគ្នានោះឡើយ។

1. ហាមមួម៉ៅ ធុញថប់ តានតឹងអារម្មណ៍
ខណៈដែលរាងកាយមានភាពធុញថប់តានតឹង ខួរក្បាលនឹងបញ្ជាទៅក្រពេញអាឌ្រីណាលីន ដែលស្ថិតនៅខាងលើក្រលៀនឱ្យបញ្ចេញអ័រម៉ូននៃភាពធុញថប់តានតឹងអារម្មណ៍មួយប្រភេទចេញមក ហុចផលឱ្យរាងកាយមានអារម្មណ៍ចង់ញ៉ាំអាហារ ធ្វើឱ្យស្រ្តីមានគភ៌ត្រូវតែញ៉ាំអាហារចូលទៅច្រើន។ ធុញថប់តានតឹងច្រើន ញ៉ាំច្រើន ធាត់ច្រើន ធ្វើឱ្យស្រ្តីមានគភ៌ឡើងទម្ងន់ព្រឹបៗដែលជារឿងមិនល្អឡើយសម្រាប់ស្រ្តីមានគភ៌ និងក្រៅពីនោះ ស្រ្តីមានគភ៌ដែលមានអារម្មណ៍មួម៉ៅធុញថប់តានតឹងច្រើន ទារកក្នុងផ្ទៃក៏នឹងទទួលផលប៉ះពាល់ដូចគ្នា ដែលក្រោយពេលប្រសូតចេញមក ទារកច្រើនតែមានទង្វើពិបាកចិញ្ចឹម និងយំរករឿងច្រើន។

2. ហាមហាត់ប្រាណបង្ខំ និងហាត់ខ្លាំង
គ្រប់ត្រីមាសរបស់ការតាំងគភ៌ គួរហាត់ប្រាណតែល្មមសមរម្យបានហើយ។ ក្នុងត្រីមាសដំបូង បើប្រឹងហាត់ប្រាណខ្លាំង និងហក់លោតពេក នឹងកើតកម្លាំងញ័ររញ្ជួយខ្លាំងមានផលប៉ះពាល់តួកំណើត អាចបណ្ដាលឱ្យរលូតបាន។ សម្រាប់ត្រីមាសទី2 និងទី3 វិញបើសិនហាត់ប្រាណខ្លាំងក្លាពេក រាងកាយនឹងប្ដូរផ្លាស់ហ្គាសអុកស៊ីហែ្ស៊នមិនទាន់ ធ្វើឱ្យទារកកើតមានសភាវខ្វះអុកស៊ីែហ្ស៊នបាន។

3. ហាមពាក់ស្បែកជើងកែងចោត
ស្រ្តីមានគភ៌ច្រើនតែមកជួបគ្រូពេទ្យដោយអាការឈឺខ្នងជាញឹកញាប់ តើនរណាទៅនឹកឃើញថា មូលហេតុគឺមកពីស្បែកជើង? ការដែលស្រ្តីមានគភ៌ពាក់ស្បែកជើងកែងចោតខ្ពស់ៗ ធ្វើឱ្យសាច់ដុំនៅម្ដុំកំភួនជើង ភ្លៅ ចង្កេះនិងខ្នង កើតភាពតានតឹង និងអាការឈឺចាប់តាមមក។ ក្រៅពីនេះនៅជួបប្រទះទៀតថា ស្បែកជើងកែងចោតបានធ្វើឱ្យចំណុចរួមនៃទម្ងន់ខ្លួនរបស់ស្រ្តីមានគភ៌បាត់បង់តុល្យភាព អាចធ្វើឱ្យដួល និងបណ្ដាលឱ្យរលូតបុត្របាន។

4. ហាមញ៉ាំថ្នាំផ្ដេសផ្ដាស
ចំណុចនេះសំខាន់ខ្លាំងណាស់ ជាពិសេស 12សប្ដាហ៍ដំបូង ព្រោះជាអំឡុងពេលកកំណើត សាងអវយវៈដែលសំខាន់ៗរបស់តួកំណើត។ បើញ៉ាំថ្នាំដែលបង្កអន្តរាយនឹងមានភាពប៉ះពាល់បណ្ដាលឱ្យមានពិការភាពដល់ទារកក្នុងគភ៌បាន ដូចជា ពិការដៃជើង ឆែបមាត់ជាដើម ជាពិសេសពពួកថ្នាំបំបាត់មុន និងនៅឱ្យឆ្ងាយពីសារធាតុគីមីផ្សេងៗ ដូចជា ថ្នាំបាញ់មូស។ល។ បើមានអាការជំងឺធ្ងន់ធ្ងរគួរទៅជួបគ្រូពេទ្យជំនាញ។

5. ហាមចូលគេងយប់ជ្រៅ
ស្រ្តីមានគភ៌ត្រូវគេងលក់សម្រាកឱ្យបានគ្រប់គ្រាន់យ៉ាងតិច 8ម៉ោងក្នុងមួយយប់។ បើគេងពេលយប់មិនគ្រប់គ្រាន់ ក្នុងអំឡុងពេលថ្ងៃចូរស្រ្តីមានគភ៌គេងលក់សម្រាកមួយស្រឡេត ជាពិសេសបំផុតក្នុងរយៈពេល14សប្ដាហ៍ដំបូងនៃការតាំងគភ៌។ មានការសិក្សាស្រាវជ្រាវនៅប្រទេសសហរដ្ឋអាមេរិកមួយបានរកឃើញថា ស្រ្តីមានគភ៌ដែលគេងបានតិចជាងមួយយប់ 5ម៉ោង នឹងប្រថុយនឹងការត្រូវជំងឺផ្សេងៗយាយីរហូតពេលមួយរយៈកាលនៃការតាំងគភ៌ ដែលអាចបង្កគ្រោះថ្នាក់ទៅដល់ទារកក្នុងគភ៌នៅទីបំផុត។

6. ហាមអត់អាហារ និងសម្រកទម្ងន់
បើស្រីមានគភ៌គ្មានចំណុចកម្រិតខាងវេជ្ជសាស្រ្តថា ត្រូវកម្រិតអាហារទេនោះគួរទទួលទាមអាហារឱ្យគ្រប់ និងសមល្មមទៅតាមតម្រូវការរបស់រាងកាយ ព្រោះការសិក្សាស្រាវជ្រាវដដែលនោះបានរកឃើញថា ស្រ្តីមានគភ៌ដែលតម ឬអត់អាហារ ធ្វើឱ្យទារកមានអត្រាក្នុងការប្រសូតមុនកាលកំណត់ខ្ពស់ និងអាចពិការខួរក្បាល ដោយសារតែនៅក្នុងអាហារទាំង

5. ប្រភេទក្រុមមានសារធាតុអាហារដែលសំខាន់
ដល់ការបំប៉នខួរក្បាលទារក ដូចជា សារធាតុហ្វូលេតដែលបានពីបន្លែផ្លែឈើ និងវីតាមីនផ្សេងៗដែលជួយក្នុងការសាងអវយវៈសំខាន់ៗ។ សម្រាប់ស្រ្តីមានគភ៌ដែលបារម្ភខ្លាចធាត់នោះក្រោយពេលប្រសូត ឡារ៉ែន សូមណែនាំ ឱ្យចិញ្ចឹមកូនដោយទឹកដោះខ្លួនឯងតែម្យ៉ាងគត់ នោះធានាថា ទម្ងន់នឹងស្រកចុះយ៉ាងឆាប់រហ័សមិនខាន។

7. ហាមរំលង ឬខកខានការណាត់ពិនិត្យគភ៌
ស្រ្តីមានគភ៌ត្រូវតែដឹងខ្លួនជាប់ជានិច្ចអំពីភាពសំខាន់នៃការពិនិត្យគភ៌ ព្រោះរាងកាយរបស់ម្ដាយ និងកូនក្នុងផ្ទៃមានការប្រែប្រួលគ្រប់ពេលវេលា បើរកឃើញភាពខុសប្រក្រតីណាមួយរបស់ម្ដាយ ឬទារកក្នុងគភ៌ គ្រូពេទ្យនឹងបានផ្ដល់ការជួយសង្គ្រោះទាន់ពេលវេលាតែបើសិនជាខកខាន ឬរំលងការណាត់ពិនិត្យគភ៌នៅថ្ងៃនោះ គួរតែទៅជួបគ្រូពេទ្យនៅថ្ងៃបន្ទាប់កុំរំលងឱ្យសោះ។ (នៅមានត)

នៅពេលស្រ្តីតាំងគភ៌រហូតមកដល់ខែទី5នេះ ទារកនៅក្នុងគភ៌នឹងមានទំហំប្រមាណជា 8-10អីុញ ការកម្រើករបស់ទារកក្នុងគភ៌នឹងខ្លាំងល្មមឱ្យម្ដាយមានអារម្មណ៍ដឹងបានហើយ ដងខ្លួនរបស់ទារកចាប់ផ្ដើមមានរោមខ្ចីៗគ្របដណ្ដប់ ចាប់ផ្ដើមមានសរសៃសក់ និងចិញ្ចើមហើយ។

ក្នុងខែទី5 នៃការតាំងគភ៌នឹងមានការប្រែប្រួលផ្សេងៗ ដែលស្រ្តីមានគភ៌អាចដឹងបានដូចតទៅ៖
• ទារកក្នុងគភ៌ចាប់ផ្ដើមរើរហូតអ្នកម្ដាយមានអារម្មណ៍ដឹង។
• មានទឹករំអិលនៅក្នុងប្រអប់ពោះច្រើនឡើង។
• កើតមានអាការទល់លាមក ឬអាចកើតឫសដូងបាត។
• ហើមពោះ ឆ្អល់ពោះ អាហារមិនរំលាយ និងមានខ្យល់ច្រើននៅក្នុងពោះ។
• ឈឺក្បាលខ្លះៗ ជួនកាលអាចមានអាការខ្យល់គ និងឆាប់វិលមុខ។
• តឹងណែនច្រមុះ ហូរឈាមតាមច្រមុះ និងហ៊ឹងត្រចៀក។
• ឃ្លានញឹកញាប់។
• អាចកើតអាការរមួលក្រពើញឹកញាប់ជាងមុន។
• មានអាការហើមនៅត្រង់ភ្នែកគោល និងប្រអប់ជើង ស្រ្តីខ្លះមុខ និងដៃក៏ហើមដែរ។
• កើតមានស្នាមជាំនៅលើជើង។
• ជីពចរដើរញាប់ជាងមុន។
• ចាប់ផ្ដើមមានអាការឈឺខ្នង។
• អារម្មណ៍ខាងផ្លូវភេទប្រែប្រួល។
• ពណ៌ស្បែកនៅត្រង់ក្បាលពោះ និងផ្ទៃមុខឡើងស្រគាំ។
• អារម្មណ៍ប្រែប្រួល ថយចុះជាងខែមុនៗតែនៅតែទន់ជ្រាយម្ដងម្កាល។

រឿងដែលគ្រូពេទ្យអ្នកពិនិត្យគភ៌ចង់ឱ្យស្រ្តីមានគភ៌ធ្វើនៅក្នុងអំឡុងខែនេះគឺ ៖
• ថ្លឹងទម្ងន់ខ្លួន និងវាស់សម្ពាធឈាម។
• ពិនិត្យមើលជាតិស្ករ និងសារធាតុស៊ុតសនៅក្នុងទឹកមូត្រ។
• ស្ដាប់សំឡេងលោតនៃបេះដូងរបស់ទារកក្នុងគភ៌។
• ពិនិត្យមើលខ្នាត និងរូបរាងរបស់ស្បូនដោយការពិនិត្យក្បាលពោះ។
• កម្ពស់ចុងកំពូលរបស់ស្បូន។
• អាការហើមនៅលើដៃ ជើង និងសរសៃឈាមនៅលើជើង។
• ពិនិត្យរកមើលជំងឺរលាកថ្លើម។
• អាការខុសប្រក្រតីផ្សេងៗ(បើមាន)។

រឿងដែលស្រ្តីមានគភ៌ត្រូវមើលថែទាំជាពិសេសក្នុងអំឡុងខែនេះគឺ ៖
1. អាចមានអាការវិលមុខញឹកញាប់ ៈ ដោយសារតែស្បូនរីកធំឡើងរហូតអាចទៅសង្កត់ពីលើសរសៃឈាមក្រហមធំនៅត្រង់កណ្ដាលដងខ្លួន ដូច្នេះពេលក្រោកឈរ ឬប្ដូរឥរិយាបថផ្សេងៗនឹងធ្វើឱ្យលំហូរវិលរបស់លោហិតផ្លាស់ប្ដូរ ធ្វើឱ្យសម្ពាធថយចុះយ៉ាងទាន់ហន់ ធ្វើឱ្យឈាមមិនអាចហូរមកចិញ្ចឹមខួរក្បាលបានទាន់ពេលវេលា ទើបបណ្ដាលឱ្យកើតអាការវិលមុខនេះឡើង។ ស្រ្តីមានគភ៌អាចការពារអាការនេះបានដោយនៅពេលត្រូវផ្លាស់ប្ដូរឥរិយាបថផ្សេងៗមិនថាតែការក្រោកឈរ អង្គុយចុះ គេង ឬដើរនោះទេ គួរធ្វើដោយយឺតៗ វានឹងជួយឱ្យរាងកាយកែសម្រួលលំហូរវិលរបស់ឈាមក្នុងរាងកាយបានទាន់ ហើយវិធីមួយទៀតដែលអាចជួយបានដែរនោះគឺ ទទួលទានប្រូតេអីុនគ្រប់ពេលអាហារទទួលទានឱ្យបានញឹកញាប់ឡើង ឬទទួលទានអាហារផ្សេងៗក្នុងចន្លោះពេលបាយចម្បងៗ ដើម្បីកុំឱ្យកម្រិតជាតិស្ករនៅក្នុងរាងកាយធ្លាក់ចុះទាបខ្លាំងពេក។

2. ពិនិត្យរកមើលជំងឺរលាកថ្លើមប្រភេទ B ៈ បើរកឃើញថា មានឆ្លងមេរោគ ត្រូវចូលទៅព្យាបាលជាបន្ទាន់។

3. ការលើករបស់ធ្ងន់ៗ ឬការពកូនច្បង ៈ បើចង់បី ឬពកូន ឬលើករបស់របរដែលមានទម្ងន់ធ្ងន់ជាង10គីឡូក្រាម អាចកើតគ្រោះថ្នាក់ដល់សាច់ដុំខ្នងយ៉ាងខ្លាំង។ បើកូនច្បងចង់ឱ្យព គួរនិយាយជាមួយកូនឱ្យបានយល់ថា ពេលនេះកូនធំហើយ អាចដើរខ្លួនឯងបានហើយ…ល្អជាងការប្រាប់ថា ពេលនេះម៉ាក់មានអូននៅក្នុងពោះ ទើបពកូនមិនបាន ព្រោះនឹងធ្វើឱ្យកូនច្បងកើតអាការច្រណែនប្អូនបាន។

4. ក្នុងរយៈពេលនេះ នឹងចាប់ផ្ដើមមានអាការហើមជើង ៈ គួរធ្វើលំហាត់ប្រាណណាដែលពាក់ព័ន្ធនឹងជើងខ្លះផង កុំពាក់ស្បែកជើងដែលចង្អៀតខ្លាំងពេក និងកុំពាក់ស្បែកជើងកែងចោតវាអាចនឹងជួយកាត់បន្ថយអាការឈឺ និងហើមជើងបាន៕

ពាក្យថា ការអប់រំ មិនសំដៅតែការសិក្សានៅក្នុងសាលាតែមួយមុខគត់នោះទេ តែវាផ្តោតសំខាន់លើ​ការទទួលយកចំណេះដឹងប្រកបដោយគុណភាពសម្រាប់ជួយដល់ការអភិវឌ្ឍជីវិត និងប្រើប្រាស់សម្រាប់​ជួយដល់មនុស្ស​ទូទៅ​ក្នុងសង្គម។

លោក ព្រើន សុវង្ស ព្រឹទ្ធបុរសរង ពុទ្ធិកមហាវិទ្យាល័យវិទ្យាសាស្ត្រអប់រំ និងព័ត៌មានវិទ្យា ទទួលបន្ទុកដេប៉ាតឺម៉ង់ថ្នាក់ឆ្នាំសិក្សាមូលដ្ឋាន នៃពុទ្ធិកសាកលវិទ្យាល័យព្រះសីហនុរាជ បានលើកឡើងថា ការអប់រំ​ គឺផ្តោតសំខាន់លើ​ការបណ្តុះបណ្តាល​ទាំងក្រៅសាលា និងក្នុងសាលា ព្រោះ​ការធ្វើការងារនៅក្នុងក្រុមហ៊ុន ឬស្ថាប័នមួយ គឺត្រូវការ​ធាតុផ្សំច្រើន។ ការសិក្សានៅក្នុងសាលា គឺសិក្សាពីក្បួនច្បាប់ដែលគេចងក្រងទុក ដើម្បីអនុវត្តការងារឱ្យត្រឹមត្រូវតាមអ្វីដែលបានកំណត់ ឬជាការសិក្សាពីជំនាញ​ ក្នុងការដោះស្រាយបញ្ហាសំខាន់ៗនៃប្រភេទការងារនីមួយៗ​ឱ្យត្រឹមត្រូវ។ បើគ្មានក្បួនខ្នាត ឬជំនាញត្រឹមត្រូវទេនោះ ការធ្វើការងារ​អាចប្រឈមនឹងបញ្ហាខ្វះភាពហ្មត់ចត់ មានចន្លោះប្រហោងច្រើន​ និងអាចធ្វើឱ្យការងារនោះ​មិនមានគុណភាពល្អសម្រាប់ជាប្រយោជន៍ដល់មនុស្សទូទៅជាដើម។ តែទោះជាយ៉ាងនេះក្តី ការមានជំនាញ​ពីក្នុងសាលាតែមួយមុខគត់ គឺមិនទាន់គ្រប់គ្រាន់នៅឡើយទេព្រោះដើម្បីឱ្យអនុវត្តការងារបានល្អចាំបាច់ត្រូវការ​ធាតុផ្សំច្រើន។

លោកសាស្ត្រាចារ្យ ព្រើន សុវង្ស បាននិយាយថា៖ “​ដើម្បីធ្វើការងារបានល្អ ឬប្រកបរបរអាជីវកម្ម​បានរីកចម្រើន ចាំបាច់ត្រូវតែ​​សិក្សាពីចំណេះដឹងជាច្រើនផ្សេងទៀតដែលមាននៅក្រៅសាលា ដូចជាការទំនាក់ទំនងរវាងក្រុមការងារ ឥរិយាបថ​របស់មនុស្សទូទៅនៅក្នុងសង្គមជាក់ស្តែង និងការរៀបចំឥរិយាបថដើម្បី​ដឹកនាំក្រុមការងារជាដើម”។

លោកសាស្ត្រាចារ្យ បានបន្ថែមទៀតថា ការ-អប់រំពិតប្រាកដមាននៅគ្រប់ទីកន្លែង តែ​មនុស្សក៏មិនអាចបោះបង់ការអប់រំនៅក្នុងប្រព័ន្ធអប់រំបានដែរ ព្រោះគ្មានផ្នែកណាមួយអាចបំភ្លេចបានទេសម្រាប់ការរស់នៅ។ ចំណេះដឹងជាក្បួន​សម្រាប់ការងារក៏ចាំបាច់ត្រូវចេះដើម្បីបង្កើតផលិតផល ឬសេវាកម្មមួយឱ្យល្អ ហើយ​ចំណេះដឹងដែលចេះពីខាងក្រៅសាលាក៏ចាំបាច់ត្រូវតែចេះដើម្បីយកវាមកអភិវឌ្ឍជំនាញដែលមានស្រាប់​ឱ្យកាន់តែមានសក្តានុពល​ និងក្លាយជា​តម្រូវការ​ដ៏​សំខាន់សម្រាប់មនុស្សទូទៅ។

អ្នកជំនាញអប់រំខាងលើបានលើកឡើងផងដែរថា ការអប់រំពិតប្រាកដមានគ្រប់ទីកន្លែង ព្រោះក្រៅពីការអប់រំក្នុងសាលា យើងក៏អាចសិក្សាស្វែងយល់​ពីកត្តាខាងក្រៅមួយចំនួនដូចជាការអនុវត្តការងារជាក់ស្តែងនៅក្នុងក្រុមហ៊ុន ក្រុមការងារស្ម័គ្រចិត្ត អង្គការ ឬស្ថាប័ននានា​ដែលវាអាចមានលក្ខណៈមិនដូចគ្នាទៅនឹងមេរៀននោះទេ ហើយកន្លែងទាំង-អស់នេះសុទ្ធតែជាកន្លែង​ល្អសម្រាប់ការរៀនសូត្រ​។

លោក កែវ ឡង់ឌី អគ្គនាយក​ក្រុមហ៊ុនស្រមោច​ Trading Solution បានលើកឡើងថា ទីណាក៏ជាសាលារៀនដែរ ព្រោះ​មនុស្សរស់នៅក្នុងស្ថានភាពខុសគ្នា របៀបរបបសង្គមខុសគ្នា មានតម្រូវការ​ និង​​បញ្ហាខុសគ្នា ហេតុនេះ​មានរឿងច្រើនណាស់ដែលត្រូវសិក្សា។ ចំណុចនេះហើយ​ដែលធ្វើឱ្យ​យើងឃើញថា​មេរៀនដែលយើងរៀនក្នុងសាលាពេលខ្លះមិនដូចគ្នាទៅនឹងការអនុវត្តជាក់ស្តែង។ នៅពេលដែលយើង​យល់ដឹងពីការអប់រំពិតប្រាកដ យើងនឹងឃើញថា​ការបើកចិត្តឱ្យទូលាយទទួលយកការអប់រំ​ គឺជារឿងសំខាន់ ព្រោះមានរឿងច្រើនណាស់ដែលយើងអាច​សិក្សាបានពីការរស់នៅជាក់ស្តែងការចូលរួម​ក្នុងកម្មវិធីសំខាន់ៗមួយចំនួន និង​ការសិក្សាជាក់ស្តែងជាមួយនឹងការងារជារឿងសំខាន់ដែលត្រូវធ្វើ។

លោក កែវ ឡង់ឌី បាននិយាយថា៖ “​ពិភពលោកមានការប្រែប្រួល​ជារៀងរាល់ថ្ងៃ ហេតុនេះជំនាញទាំងអស់នៅក្នុងសាលាត្រូវតែដេញតាម​ភាពបត់បែននោះ។ ចំពោះអ្នកសិក្សាក៏ដូចគ្នា ចាំបាច់ត្រូវតែមានភាពបត់បែនខ្ពស់ បើមិនដូច្នោះទេ បន្ទាប់ពីយើងរៀនចប់ ចំណេះដឹងនោះនឹងអាចហួសពេលសម្រាប់ការប្រើប្រាស់ក៏មានដែរ”។

អ្នកជំនួញ និងជាអ្នកអប់រំខាងលើបានលើកឡើងថា នាពេលបច្ចុប្បន្ននេះ ជាយុគសម័យបច្ចេកវិទ្យាព័ត៌មាន ហេតុនេះការសិក្សាស្រាវជ្រាវមានភាពងាយស្រួលជាងមុន។ ចំពោះការទំនាក់ទំនងរវាងមនុស្សក្នុងពិភពលោកក៏មានលក្ខណៈជិតស្និទ្ធជាងមុនដែរ ដែលកត្តានេះធ្វើឱ្យមនុស្សមានឱកាសច្រើនក្នុងការសិក្សា។ ហេតុនេះ​ចំណុចសំខាន់គឺ​យុវវ័យត្រូវចេះឆក់យកឱកាសល្អនៃការអប់រំទាំងអស់នោះ តាមរយៈការចំណាយពេលវេលាស្រាវជ្រាវ ទំនាក់ទំនង ចូលរួម និង​ទាញយក​ចំណេះដឹង​សំខាន់ៗសម្រាប់ការរស់នៅ​ឱ្យបានច្រើនតាមដែលអាចធ្វើទៅបាន បន្ថែមពីលើអ្វីដែលបានរៀនពីសាលា ដើម្បីធានាថា​យើងអាចរក្សាបាននូវនិរន្តរភាពនៃគុណភាពការងារ​សម្រាប់គ្រប់សម័យកាល៕

ការប្រកប​របរ​កសិក​ម្ម កសិករ​មិនគួរ​ធ្វើ​ការដាំដុះ​ទៅតាម​ទម្លាប់ ឬ​តាម​ការនឹកឃើញ​នោះទេពោលគឺ​ត្រូវ​លៃលកជ្រើសរើស​ដាំ​ដំណាំនៅ​រដូវ​ណា​ដែល​មិនសូវ​ចំណាយលុយ​ច្រើន ហើយ​ប្រមូល​ផល​លក់​ចំពេល​ដែលមាន​តម្រូវការ​ទីផ្សារ ខ្លាំងដែល​នេះ​ជាការ​លើកឡើង​របស់​ក​សិ​ករ​ដាំ​អំពៅ​នៅក្នុង​ខេត្តកំពង់ឆ្នាំង។

លោក ឡាយ ម៉េង​ហៃ កសិករ​ដាំ​អំពៅ​នៅក្នុង​ភូមិ​ក្តុល ឃុំ​ក្តុល ស្រុក​ទឹកផុស ខេត្តកំពង់ឆ្នាំង មានប្រសាសន៍ថា បើ​ចង់​ដាំ​អំពៅ​គេ​ត្រូវ​ដាំ​នៅ​រដូវ​ភ្លៀង​ធ្លាក់ ទើប​យើង​មិនចាំបាច់​ចំណាយ​ប្រាក់​ទិញ​ប្រេង​ដាក់​ម៉ាស៊ីនបូមទឹក​ស្រោច ហើយ​ត្រូវ​ចេះ​ប៉ាន់ប្រមាណ រដូវ​កាល​ប្រមូល​ផល​មកវិញ​ថា តើ​គួរ​ប្រមូល​ផល​នៅពេលណា​ដែលមាន​តម្រូវការ​ខ្ពស់​នៅលើ​ទីផ្សារ?។

លោក​ថា សម្រាប់​បទពិសោធ​រប​ស់លោក គឺ​តែង​ទទួលបាន​ជោគជ័យ​នៅក្នុង​ការប្រកប​របរ​ដាំ​អំពៅ​នេះ ដោយ​លោក​នឹង​ចាប់ផ្តើម​ដាំ​នៅ​ដើមខែ​មិថុនា​ជា​រៀងរាល់ឆ្នាំ ហើយ​តែង​ប្រមូល​ផល​លក់​នៅ​រដូវប្រាំង គឺ​ចាប់ពី​ខែកុម្ភៈ រហូតដល់​ចូលឆ្នាំ​ខ្មែរ​ហើយចន្លោះ​ពី​ខែមេសា ដល់​ខែឧសភា​រៀងរាល់ឆ្នាំនីមួយៗទើប​អំពៅ​កាប់​លក់​អស់ ហើយ​ចាប់ផ្តើម​ភ្ជួរ​ដី​ចោល ទុក​ដាំ​សា​ជាថ្មីទៀត។

លោក​ថា អំពៅ​លក់ដាច់​ខ្លាំង និង​បាន​ថ្លៃ​ខ្ពស់​នៅ​រដូវប្រាំង ដោយសារ​អតិថិជន​ទិញ​បន្ត​យកទៅ​កៀប​ទឹក​លក់​នៅតាម​មុខ​រោងចក្រ សហគ្រាស និង​លក់​តាម​លំនៅឋាន​ប្រជាពលរដ្ឋ​នានា​នៅក្នុង​ក្រុងភ្នំពេញ វា​មានការ​គាំទ្រ​ច្រើន​ដោយសារតែ​អាកាសធាតុ​ក្តៅ ប៉ុន្តែ​បើ​មេឃ​ត្រជាក់ ពិសេស​នៅ​រដូវវស្សា​វិញ​នោះ​មិនមាន​ការទិញ​ច្រើន​ទេ ដែល​នេះ​ជា​កត្តា​ធ្វើឱ្យ​អំពៅ​ធ្លាក់​ថ្លៃ ម្ចាស់​ចម្ការ​អាច​ខាតដើម​ច្រើន ដូច្នេះ​គួរ​ចៀសវាង​ការដាំ​អំពៅ​រួចហើយ​ប្រមូល​ផល​លក់​នៅ​រដូវវស្សា។

ជាទូទៅ​អំពៅ​មួយ​បាច់​មាន 12ដើម ដែល​តម្លៃ​ជា​មធ្យម​ចាប់ពី 8,000រៀល ដល់1,2000រៀល​ក្នុង​មួយ​បាច់ ទៅតាម​គុណភាព​អំពៅ​ល្អ ឬ​មិនល្អ ឬ​អាស្រ័យទៅលើ​ដើម​តូច និង​ដើម​ធំ។ សម្រាប់​ស្តង់​លក់​អំពៅ​របស់លោក ម៉េង ហៃ ដែល​ដាក់លក់​ដោយ​ខ្លួនឯង​នៅ​ម្តុំ​រោងចក្រ​កាណាឌីយ៉ា​លើផ្លូវ​វេ​ង​ស្រេង​មានការ​គាំទ្រ​ច្រើន ដោយ​មួយថ្ងៃ​អាច​លក់បាន​ប្រមាណ​ជា 1,000បាច់​ឯណោះ​នៅ​រដូវប្រាំង ហើយ​នៅ​រដូវ​នោះ​លោក​មិនមាន​អំពៅ​លក់​ទេ ដោយសារ​ចម្ការ​ដាំ​មុន​ត្រូវបាន​កាប់​លក់​អស់​តាំងពី​ខែឧសភា​ក្រោយ​ចូលឆ្នាំ​មកម៉្លេះ ហើយ​ចម្ការ​ថ្មី​ក៏​ទើបតែ​ចាប់ផ្តើម​ដាំ​កាលពី​ខែមិថុនាថ្មីៗនេះ ដែល​នឹង​អាច​ប្រមូល​ផល​លក់បាន​ក៏​នៅ​ពេលមុន​ចូលឆ្នាំ​ឯណោះ ពោលគឺ​ចាប់ពី​ខែកុម្ភៈ ដើមឆ្នាំ​ក្រោយ​ទៅ។

ដើម្បីឱ្យ​ការដាំដុះ​អំពៅ​ទទួលបាន​ផល​ល្អ កសិករគួរ​កាប់​ថ្នាំងអំពៅ ទៅ​ផ្សាំ​ឱ្យ​ដុះ​ចេញ​ជា​កូន​ជាមុនសិន ហើយ​អំឡុង​ពេលនោះ​កសិករ​គួរ​ឆ្លៀតពេល​ភ្ជួរ​ដី​ឱ្យបាន 1លើក​ទៅ 2លើក ដើម្បីឱ្យ​ដី​ក្លាយជា​ល្បាយ​ធូរ និង​ឱ្យ​ស្មៅ​ងាប់​ឱ្យបាន​ច្រើន​ផង ហើយ​ទើប​លើក​រង​ជាជួរៗចន្លោះ​ពីគ្នា​មួយ​ម៉ែត្រមួយ។ នៅពេល​ត្រាក់ទ័រ​ភ្ជួរ​លើក​ជា​រង​រួច កសិករ​ត្រូវ​ជីករណ្តៅ​ដែលមាន​ជម្រៅ 3តឹក និង​មាន​ទំហំ 3តឹក4​ជ្រុង​ឃ្លាត​ពីគ្នា​កន្លះ​ម៉ែត្រ​ក្នុង​មួយ​រណ្ដៅ​សម្រាប់​ដាក់​ដាំ​កូន​អំពៅ។

ក្រោយពី​ជីករណ្តៅ​រួច គេ​ត្រូវដាក់​ជី​ទ្រាប់​បាតរួច​ទើប​យក​កូន​អំពៅ​ទៅ​ដាក់​ដាំ​តាម​រណ្តៅ ដែល​គេ​កាប់​រួច​ជាជួរៗទៅតាម​រងនីមួយៗនោះ នៅក្នុងដំណាក់​កាលនោះ​បើសិន​មិនមាន​មេឃ​ភ្លៀង​ទេ គេ​ត្រូវ​បូមទឹក​ស្រោច​មួយ​សប្តាហ៍​ម្តង​រហូតដល់​កូន​អំពៅ​ចាប់​ឫស​ដុះ​លូតលាស់​ល្អ។ ឯ​វិធីសាស្ត្រ​ដាំ​ដុះ​ម្យ៉ាងទៀត គេ​មិនចាំបាច់​បណ្តុះ​កូន​ទុកជាមុន​ក៏បាន​ដែរ តែ​គេ​អាច​រើស​ថ្នាំងអំពៅ​ណា​ដែលមាន​ភ្នែកល្អៗមក​កាប់​ដាក់​ដាំ​នៅតាម​រណ្តៅនីមួយៗតែម្តង ក៏​អំពៅ​អាច​ដុះ​ឡើង​បាន​ដូចគ្នា​ដែរ តែ​ដុះ​មិនសូវ​ល្អ ឬ​មិនបាន​ដុះ​គ្រប់​ចំនួន​តាម​ការដាំ​នោះទេ កសិករ​អាច​យក​ចុង​អំពៅ​ទៅ​ដាក់​ដាំ​ជួស​កន្លែង​ណា​ដែល​មិន​ដុះ​បាន ដើម្បី​កុំឱ្យ​ខាត​ដី និង​កុំឱ្យ​បាត់បង់​ទិន្នផល​ផង។

កសិករ​ខាងលើ​អះអាងថា ជាទូទៅ​លោក​តែង​ដាំ​អំពៅ​នៅពេល​ដឹងថា​ដល់​រដូវ​ធ្លាក់ភ្លៀង​ចៀសវាង​ការចំណាយ​ប្រាក់​ច្រើន​ក្នុង​ការរៀបចំ​ប្រព័ន្ធ​ទឹក ឬ​ទិញ​ប្រេង​មក​បូមទឹក​ស្រោច​អំពៅ។ ហើយ​នៅពេល​ធ្លាក់ភ្លៀង​កូន​អំពៅ​នឹង​លូតលាស់​បានល្អ។ ក្នុងដំណាក់កាល​លូតលាស់​ដំបូង កសិករ​គួរ​ដាក់​ជី​នៅតាម​គុម្ព​អំពៅនីមួយៗ ហើយ​យក​ត្រាក់ទ័រ​ភ្ជូ​រ​ដី​កប់​ជី ដើម្បីឱ្យ​វា​លូតលាស់​រឹតតែ​ល្អ​ឡើង រហូតដល់​ដើមអំពៅ​លូត​ធំ​ឡើង​បាន 5ទៅ6ថ្នាំង គេត្រូវ​សក​ស្លឹក​វា​ចេញ​ម្តង​ដើម្បីឱ្យ​លូត​កម្ពស់បាន​កាន់តែ​ខ្ពស់​ឡើង ហើយ​នៅពេល​ដើម​អំពៅ​លូត​បាន​កម្ពស់​ជាង 1ម៉ែត្រ ទើប​គេ​សក​ស្លឹកវា​ម្តងទៀត។ លោក​ថាក្នុង​មួយឆ្នាំ​គេ​អាច​ប្រើ​ជី 2 ទៅ3លើក ដើម្បីឱ្យ​ដើម​អំពៅ​លូតលាស់​ល្អ និង​មាន​ដើម​ថ្លោសធំៗដែល​អាច​លក់បាន​ថ្លៃ។ ហើយ​បើសិនជា​យើង​ថែទាំ​ភ្ជួរ​ដី​ដាក់​ជី​បានល្អ យើង​នឹង​អាច​ប្រមូលបាន​លឿន​ត្រឡប់មកវិញ ជាពិសេស​អាច​កាប់​លក់​បាន​នៅពេល​ទីផ្សារ​មាន​តម្រូវការ​ខ្លាំង គឺ​ចាប់ពី​ខែកុម្ភៈ​រហូតដល់​ខែឧសភា។

គួរ​បញ្ជាក់ថា ក្នុង​មួយ​ហិកតា​គេ​អាច​ដាំ​អំពៅ​បាន​ប្រមាណ​ជា 2ម៉ឺន​គុម្ព ដោយ​ក្នុង​មួយ​គុម្ព​មាន​ជា​មធ្យម 3ដើម ដូច្នេះ​សរុបទៅ​គេ​ទទួលបាន​អំពៅ​ចំនួន 60,000ដើម ឬ​ស្មើនឹង5,000បាច់ ហើយ​បើ​មួយ​បាច់​ថ្លៃ​មានតម្លៃ​ជា​មធ្យម 10,000រៀល ដូច្នេះ​ក្នុង​មួយ​ហិកតា កសិករ​នឹង​ទទួលបាន​ប្រាក់​ជាង1ម៉ឺន​ដុល្លារ ដោយ​ផាត់​សោហ៊ុយ និង​ការចំណាយផ្សេងៗអស់​ទៅ កសិករ​អាច​ទទួលបាន​កម្រៃ​ច្រើន​គួរសម​ដែរ។ ប៉ុន្តែ​បើសិនជា​អំពៅ​គ្មាន​តម្រូវការ​នៅក្នុង​ទីផ្សារ ពេលខ្លះ​កសិករ​ត្រូវ​ទុកចោល ឬ​ដុតចោល​ទាំង​ចម្ការ​ក៏មាន។ ប៉ុន្តែ​សម្រាប់​លោក ម៉េង ហៃ មិនមែនដាំ​អំពៅ​តាម​ការនឹកឃើញ ឬ​ដាំ​ទាំង​ប្រថុយប្រថាន​នោះទេ បើសិនជា​គ្មាន​ម៉ូយ​ទៅ​ទិញ គឺ​លោក​នឹង​ដឹក​មក​លក់​ដោយ​ខ្លួនឯង​នៅ​ភ្នំពេញ​តែម្តង៕

ការវិនិយោគ​លើ​វិស័យ​ទេសចរណ៍​នៅក្នុង​ប្រទេស​កម្ពុជា​បច្ចុប្បន្ន​កំពុងមាន​សម្ទុះ​ខ្លាំង​ដោយសារតែ​វិស័យ​ដីធ្លី និង​អចលនទ្រព្យ ក៏មាន​ចំណែក​ពាក់ព័ន្ធ​ជាមួយ​ផងដែរ​បើទោះបីជា​មានកា​របោះ​ឆ្នោតជាតិ​ក៏ដោយ​ក៏​គេ​មើលឃើញថា មិនមាន​ការ​ថមថយ​ណាមួយ​កើតឡើង​ទេ ក្នុងនោះ​ក៏មាន​ការវិនិយោគ​ទៅលើ​កន្លែង​ស្នាក់នៅ រមណីយដ្ឋាន ដែល​សញ្ញាណ​នេះ សមាគម​ទីភ្នាក់ងារ​ទេសចរណ៍​កម្ពុជា​ក៏​ចង់បាន​ការវិនិយោគ​ណា​ដែលមាន​និរន្តរភាព​នៅក្នុង​វិស័យ​ទេសចរណ៍​នេះ​ផងដែរ។ នេះ​បើតាម​ការ​ឱ្យដឹងពី​លោកស្រី ឆាយ ស៊ីវ​លីន ប្រធាន​សមាគម​ទីភ្នាក់ងារ​ទេសចរណ៍​កម្ពុជា​ CATA (The Cambodia Association of Travel Agents)។

លោកស្រី ឆាយ ស៊ីវ​លីន ប្រធាន​សមាគម​ទីភ្នាក់ងារ​ទេសចរណ៍​កម្ពុជា​បានឱ្យដឹងថា បច្ចុប្បន្ន​តំបន់ឆ្នេរ និង​កោះ​នានា​របស់​កម្ពុជា បាននិងកំពុង​ត្រូវបាន​វិនិយោគ​ដោយ​ក្រុមហ៊ុន​ឯកជន​មួយចំនួន​ដោយ​ទទួលបាន​ការជំរុញ និង​បង្ហាញ​ទិសដៅ​ពី​ក្រសួង​ពាក់ព័ន្ធ​ក្នុងការ​អភិវឌ្ឍ​តំបន់ឆ្នេរ​ឱ្យក្លាយ​ជា​គោលដៅ​ទេសចរណ៍​ថ្មី បន្ទាប់ពី​កម្ពុជា​សម្បូរ​ដោយ​តំបន់​ទេសចរណ៍វប្បធម៌ ដូចជា​ប្រាង្គ​ប្រាសាទ​ជាដើម។ កិច្ច​ខំប្រឹងប្រែង​នេះ ធ្វើឡើង​ដើម្បី​ត្រៀម​ឆ្លើយតប​ទៅនឹង​កំណើន​អ្នកទេសចរ​អន្តរជាតិ​ដែល​នឹង​អាច​កើន​ដល់ 7លាន​នាក់​ក្នុង​ឆ្នាំ2020 ខាងមុខនេះ ខណៈដែល​កម្ពុជា​កំពុង​ផ្តោត​សំខាន់​ទៅលើ​ទេសចរណ៍​បែប​ធម្មជាតិ។

លោកស្រី​បន្ថែមថា បច្ចុប្បន្ន​ចំនួន​ភ្ញៀវទេសចរ​ជាង​កន្លះ​លាន​នាក់​បាន​ទៅ​ទស្សនា​នៅ​តំបន់ឆ្នេរ ដែល​ស្មើនឹង3 ទៅ4ដង​នៃ​តំបន់​ទេសចរណ៍ផ្សេងៗ ដូច្នេះ​យើង​ត្រូវមាន​ផែនការមេ​មួយ​សម្រាប់​អភិវឌ្ឍ​តំបន់ឆ្នេរ ដើម្បី​ធានា​លើ​ការអភិវឌ្ឍ និង​រក្សាបាន​នូវ​ចំណុចល្អៗដែល​យើង​គួរ​មានការ​អភិវឌ្ឍ ដូច​ជាការ​ស្នាក់នៅ ហូបចុក និង​សេវា​កម្សាន្ត​ជាដើម។

សមាគម​ទីភ្នាក់ងារ​ទេសចរណ៍​កម្ពុជា​បានលើកឡើង​ថា ការអភិរក្ស​តំបន់ឆ្នេរ និង​ការរុករក រមណីយដ្ឋាន​ទេសចរណ៍​បន្ថែម ក៏​ជា​ផ្នែក​មួយ​សំខាន់​ក្នុងការ​ទាក់ទាញ​ភ្ញៀវទេសចរ​អន្តរជាតិ​ឱ្យមក​ទស្សនា​នៅ​កម្ពុជា​ឱ្យមាន​ការកើនឡើង​ដែរ។ លោកស្រី​បញ្ជាក់ថា រមណីយដ្ឋានថ្មីៗដែល​ត្រូវបាន​រកឃើញ រួមមាន​រមណីយដ្ឋាន​ដូង​ទេរ ក្នុង​ខេត្តកំពត រមណីយដ្ឋានឆ្នេរ​កោះ​ឋានសួគ៌ ក្នុង​ខេត្ត​ព្រះសីហនុ និង​រមណីយដ្ឋាន​កោះរ៉ុង​សន្លឹម​ជាដើម។

ឧកញ៉ា សៀ រិទ្ធី ប្រធាន​ក្រុមហ៊ុន​វើ​ល​ប្រ៊ី​ដ (Worldbride Groups) បាន​មានប្រសាសន៍​ទាក់ទង​នឹង​វិស័យ​ទេសចរណ៍​នេះ​ថា ខ្ញុំ​មិនមែន​អ្នក​ប្រក​បរបរ​ខាង​វិស័យ​ទេសចរណ៍​ទេ តែ​ជាការ​សង្កេត និង​ពិនិត្យ​ទៅលើ​វិស័យ​ទេសចរណ៍​ខ្មែរ អ្នក​ប្រកប​អាជីវកម្ម​ទេសចរណ៍​នាំគ្នា​ធ្វើ​អ្វី​ដោយសារ​ការកើនឡើងជា​ចរន្ត​នៃ​វិស័យ​ទេសចរណ៍ (Trend) ដែលមាន​លំហូរ​ចូលមក​ស្រុក​ខ្មែរ។ ខ្ញុំ​បានឃើញ​ប្រតិបត្តិ​ករ​ទេសចរណ៍(Tour Operator) ដែល​ចង់ឱ្យ​ទេសចរ​មកលេង​នៅ​ស្រុក​យើង និង​គិតថា​ត្រូវធ្វើ​យ៉ាងម៉េច​ឱ្យគេ​មកលេង​ម្តង​ហើយ​ម្តងទៀត ព្រោះ​កន្លងមក​ប្រទេស​យើង​គេ​មកលេង​បានតែ​ម្តង​ទេ គេ​មិនដែល​មកជា​លើក​ទី2 ឬ​ទី3ឡើយ។

លោក​ឧកញ៉ា​បន្តថា បើ​គេ​មក​មើល​អង្គរវត្ត​គេ​មិន​មកជា​លើក​ទី2 ទេ ព្រោះ​អង្គរ​វត្តមាន​តែមួយ វា​អត់​មាន​ដំណាក់កាល​ថ្មី ដូច្នេះ​ត្រូវ​ស្វែងរក​ដំណាក់កាល​ថ្មី​ថា តើ​ទេស​ចរមក​មើល​អង្គរ គេ​នឹង​ទៅ​កន្លែង​ណា​ទៀត? ខ្ញុំ​ជឿថា Tour Operator បានគិត គ្រាន់តែ​ថា​ការគិត​នោះ​អាចទៅរួច ឬ​ទៅ​មិន​រួច​តែប៉ុណ្ណោះ?។ ប្រតិបត្តិ​ករ​ទេសចរណ៍ និង​ក្រសួងទេសចរណ៍​ត្រូវ​គិតថា តើ​ត្រូវ​ដើរទៅ​ផ្លូវ​ណា? យើង​មាន​ភ្ញៀវ​ច្រើន​ឬទេ? ឬ​គិតតែ​ត្រឹម​ថា យើង​មាន​រដូវ​មាន​ភ្ញៀវ(High season) រដូវ​អត់​ភ្ញៀវ(Low season) បើ​យើង​គិតតែ 2ចំណុច​ហ្នឹង យើង​មិនអាច​គិតពី​ផលិតផល(Product)ថ្មី​កើត​ទេ។ ឥឡូវ​យើង​មើលទៅ​កោះ​វិញ កោះ​គឺជា Product ថ្មី​របស់​វិស័យ​ទេសចរណ៍​ក្នុងស្រុក​យើងតែ​ការអភិវឌ្ឍ​កោះ​យើង​អាចធ្វើ​ទៅបាន គឺ​អាស្រ័យ​លើ​អ្នក​អភិវឌ្ឍ​អចលនទ្រព្យ​ដែរ នេះ​បើ​យើង​និយាយពី​ការអភិវឌ្ឍ​នៅលើ​កោះ ហើយ​បើ​និយាយ​ពី​ការអភិវឌ្ឍ វិស័យ​ទេសចរណ៍ និង​វិស័យ​អចលនទ្រព្យ​ត្រូវតែ​ស្រប​ទៅ​ជាមួយគ្នា។

អ្នកទេសចរ​មាន​សណ្ឋានខុសៗគ្នា អ្នកទេសចរ​ខ្លះ​គាត់​ចូលចិត្ត​បែប​អេកូ អ្នកខ្លះ​គាត់​ចូលចិត្ត​បែប​វប្បធម៌ អ្នកខ្លះ​ចូលចិត្ត​បែប​ធម្មជាតិ អ្នក​ខ្លះទៀត​ចូលចិត្ត​បែប​ឆ្នេរសមុទ្រ ទាំងអស់​ហ្នឹង​ជា​ចំណុច​មួយ​ដែល​បង្ហាញថា អចលនទ្រព្យ​ក៏​ជា​ចង្កោម​របស់​វិស័យ​ទេសចរណ៍​ដែរ ដូច្នេះ​ការអភិវឌ្ឍ​កោះ​ដំណើរការ​ទៅបាន ទាល់តែ​គិត​ជាថ្មី និង​ត្រូវតែ​គិតថា នៅលើ​កោះ តើ​ត្រូវ​សាងសង់​សណ្ឋាគារ ឬ​សង់​រី​សត? យើង​មិនត្រូវ​មើល​តែ​លើ​រដូវ​មាន​ភ្ញៀវ ឬ​រដូវ​អត់​ភ្ញៀវ​នោះទេ ព្រោះ​ស្រុក​ខ្មែរ​យើង​ពី​ដីគោក​ទៅ​កោះ​ជិះ​ត្រឹមតែ40នាទី ឬ1ម៉ោង​ប៉ុណ្ណោះ ហើយ​យើង​មាន​អ្នករកស៊ី​កាណូត​ដ និង​កប៉ាល់​ដឹក​អ្នកដំណើរ​ច្រើន​ប៉ុន្តែ​មិនទាន់មាន​ស្តង់ដារ​នៅឡើយ។

ប្រតិបត្តិ​ករ​ទេសចរណ៍​ត្រូវធ្វើ​អ្វី​ឱ្យមាន​ស្តង់ដារ​ដើម្បី​ឱ្យមាន​ភាព​ទាក់ទាញ​នៅលើ​កោះ។ បើ​វិស័យ​ឆ្នេរ ផ្នែក​ខាង​រី​សត​គេ​អត់​មាន​គិតពី​មាន​រដូវ​មាន​ភ្ញៀវ ឬ​រដូវ​អត់​ភ្ញៀវ​ទេ យើង​ត្រូវ​គិតថា​អ្នកទេសចរ​គេ​មិនមែន​មក​គ្រាន់តែ​គេង ឬ​ហែល​ទឹក​នោះទេ តែ​យើងត្រូវបង្កើត​សកម្មភាព(Activity) ឬ​សេវាកម្ម(service) ផ្សេងទៀត​ដើម្បីឱ្យ​ទេសចរ​គេ​មកលេង។ ដូច្នេះ​ត្រូវ​សំណូមពរ​ទៅ​រដ្ឋាភិបាល​ឱ្យ​គិតគូរ​លើ​កោះ ដោយ​អភិវឌ្ឍ​បែប​ថែរក្សា​បរិស្ថាន បើ​មិន​គិត​ទេ យើង​នឹង​ជួប​បញ្ហា​នៅ​ថ្ងៃក្រោយ​ដូច កោះ​នៅ​អ៊ុយ​រូ​ហ្គា​យ និង​ហ្វ៊ី​លី​ពី​ន​អ៊ីចឹង។

ប្រតិបត្តិ​ករ​ទេសចរណ៍​ត្រូវ​គិតពី​ការអភិវឌ្ឍ​ជា​សណ្ឋាគារ រី​សត ឬ​បាង​ហ្គា​ឡូ ដែលជា​ការទាក់ទាញ​ទេសចរ​ឱ្យមក​ស្រុក​យើង​ឱ្យបាន តែ​យើង​ត្រូវ​ការជួប​ជជែក​ពិភាក្សា​ឱ្យបាន​ច្រើន​រវាង​អ្នក​អភិវឌ្ឍន៍​អចលនទ្រព្យ និង​ប្រតិបត្តិ​ករ​ទេសចរណ៍ ទើប​កោះ​យើង​មាន​សកម្មភាព និង​ឈានទៅរក​ការអភិវឌ្ឍ​វិស័យ​ទេសចរណ៍​ឱ្យ​រីកចម្រើន​ឡើង។

លោក តេង រិទ្ធី ស្ថាបនិក និង​នាយក​ក្រុមហ៊ុន Founder & Director,​ Property Investment Realty Partner បាន​មានប្រសាសន៍ថា ខ្ញុំ​យល់ថា ដី​នៅ​កម្ពុជា​នៅសល់​ពី​ការវិនិយោគ​នៅមាន​វិសាលភាព​ធំ​នៅឡើយ។ យើង​នៅមាន​ព្រៃឈើ សម្បត្តិ​ធម្មជាតិ អរិយធម៌ វប្បធម៌​យើង​ល្អ​ជាងគេ​ច្រើន។ ភាគ​ខាងលិច​ប្រទេស​មាន​ឆ្នេរ​ស្រស់ កោះ​ស្អាត មាន​ព្រៃកោងកាងជា​ចំណុច​ទាក់ទាញ​ដល់​ភ្ញៀវ​ទេសចរណ៍ បើ​ប្រៀបធៀប​នឹង​ប្រទេសជិតខាង។

លោក រិទ្ធី បន្តថា ពិតមែនតែ​យើង​មាន​អំណោយផល​ក្នុង​វិស័យ​ទេសចរណ៍​មែន តែ​យើង​នៅ​ខ្វះ​អ្នករៀបចំ មិនទាន់មាន​អ្នករៀបចំ​ឱ្យ​ល្អ ឱ្យ​ត្រូវ​ស្តង់ដារ ទើប​មិនទាន់មាន​ការទាក់ទាញ​ខ្លាំង។ ការ​ស្នាក់នៅ​លំដាប់​ខ្ពស់ តែ​សេវាកម្ម​មិនបាន​ល្អ ការទទួល​បដិសណ្ឋារកិច្ច​មិនទាន់​ទៅដល់​លំដាប់​នោះ។ តែ​យើង​ទទួលស្គាល់ថា វិស័យនេះ​រីកចម្រើន​ខ្លាំង ក្នុងនោះ​យើង​ត្រូវ​គិតដល់​សេវាកម្ម អនាម័យ សណ្តាប់ធ្នាប់​ដែល​កត្តា​នេះ​ជាការ​ទាក់ទាញ​សម្រាប់​ប្រតិបត្តិ​ករ​ទេសចរណ៍ ប្រៀបដូចជា​ច្បាប់​ដែល​យើង​ត្រូវគោរព នោះ​ភ្ញៀវទេសចរ​ដែល​មក​កម្សាន្ត​គេ​នឹង​គោរព​តាម។

ឥឡូវ​រដ្ឋាភិបាល​រៀបចំ​បាន​ច្រើន ដែលមាន​ការផ្សព្វផ្សាយ​យ៉ាង​ទូលំទូលាយ​រហូតដល់​អឺរ៉ុប អាមេរិកទាំង​ក្នុងស្រុក​ក៏បាន​ល្អប្រសើរ​ជាង​មុន​ដែរ តែ​ក៏​មិនត្រូវ​ភ្លេច​ពង្រឹង​នូវ​វិស័យ​នេះដែរ ដោយ​ធ្វើយ៉ាងណា​ឱ្យ​ភ្ញៀវ​ពេញចិត្ត សប្បាយ នៅ​កម្សាន្ត​ឱ្យបាន​យូរ ឬ​មកលេង​លើក​ក្រោយ​ទៀត ដោយ​ត្រូវ​ផ្តល់នូវ​ស្នាមញញឹម​ដល់​គាត់ ដោយ​ប្រើ​សិទ្ធិ​ប្រកួតប្រជែង​ដើម្បីឱ្យ​វិស័យនេះ​រីកចម្រើន​ទាំងអស់គ្នា។ ការប្រើ​សិទ្ធិ​បាន ទាល់តែ​យើង​មាន​ភាព​ស្អាត សេវា​ល្អ សណ្តាប់ធ្នាប់​ល្អ និង​សុវត្ថិភាព។

តាម​ការ​ព្យាករ​របស់​ក្រសួងទេសចរណ៍​បាន​បង្ហាញថា នៅ​ឆ្នាំ2020 ខាងមុខនេះ កម្ពុជា​នឹង​ទទួលបាន​ភ្ញៀវទេសចរ​អន្តរជាតិ កើន​ឡើងដល់​ប្រមាណ​ជា 7លាន​នាក់ ក្នុងនោះ​ភ្ញៀវទេសចរ​ជនជាតិ​ចិន​មកលេង​កម្ពុជា​យ៉ាងតិច​ក៏ 2លាន​នាក់​ដែរ ដោយ​នឹង​នាំមក​នូវ​ចំណូល​សរុប​ប្រមាណ​ជា 5ពាន់​លាន​ដុល្លារ និង​បង្កើត​ឱកាស​ការងារ​ដោយផ្ទាល់​ដល់​ប្រជាពលរដ្ឋ​ប្រមាណ​ជា​ជិត 1លាន​នាក់៕