ធឿន មករា - La Reine Media

ស្ថាប័នចំនួន2 រួមគ្នាអភិវឌ្ឍវិស័យសូត្រ

រាជបណ្ឌិត្យសភាកម្ពុជា ឬRAC (the Royal Academy of Cambodia ) និងសាកលវិទ្យាល័យភូមិន្ទភ្នំពេញ ឬRUPP(Royal Univercity ofPhnomPenh)បាន និងកំពុងធ្វើកិច្ចសហប្រតិបត្តិការដាច់ដោយឡែកពីគ្នា តែមានទិសដៅក្នុងការអភិវឌ្ឍវិស័យសូត្រក្នុងស្រុកតែមួយ ដើម្បីពង្រីកចង្វាក់ផលិតកម្ម និងជំរុញការធ្វើពាណិជ្ជកម្មសំដៅលើកកម្ពស់វិស័យឧស្សាហកម្មសូត្រចូលរួមក្នុងការអភិវឌ្ឍសេដ្ឋកិច្ច។

រាជបណ្ឌិត្យសភាកម្ពុជា (RAC)និងសាកលវិទ្យាល័យកសិកម្មចិនខាងត្បូង (SCAU) The South China Agricultural University នឹងចាប់ផ្តើមសហការក្នុងការស្រាវជ្រាវ និងបណ្តុះបណ្តាលកសិករ ដើម្បីបង្កើនវិស័យសិប្បកម្មក្នុងតំបន់ ដែលជាដំបូងគោលដៅនៃកិច្ចសហការនេះគឺដើម្បីព្រាងឯកសារមួយដែលមានព័ត៌មានទូលំទូលាយអំពីឧស្សាហកម្មសរីរាង្គសូត្រក្នុងស្រុក។

បណ្ឌិតសភាចារ្យ សុខ ទូច ប្រធានរាជបណ្ឌិត្យសភាកម្ពុជា បានមានប្រសាសន៍ថា រាជបណ្ឌិត្យសភាកម្ពុជានឹងធ្វើការជាមួយមជ្ឈមណ្ឌលបណ្តុះបណ្តាលសេវាកម្មចិញ្ចឹមសត្វសម្រាប់ភូមិភាគអាស៊ីប៉ាស៊ីហ្វិករបស់ RSTCAP (Regional Sericulture Training Centre for Asia-Pacific)។ “គោលដៅរបស់យើង គឺប្រើប្រាស់បច្ចេកវិទ្យានិងវិទ្យាសាស្ត្រកែលម្អវិធីសាស្ត្របុរាណ ដើម្បីផលិតសូត្រ នឹងរៀបចំចងក្រងឯកសារស្រាវជ្រាវនានាអំពីផលិតកម្មសូត្រ សម្រាប់ផ្តល់ជាធាតុចូលដល់ក្រសួងស្ថាប័នដែលពាក់ព័ន្ធ អ្នកសិក្សា ជាពិសេសប្រជាកសិករខ្មែរទូទៅ‟។

លោកបណ្ឌិតបានឱ្យដឹងថា៖ “យើងនឹងបញ្ចូលទ្រឹស្តី និងការអនុវត្តក្នុងឯកសារមួយដែលនឹងត្រូវប្រើប្រាស់ដោយមន្ត្រីរដ្ឋាភិបាល និងកសិករ‟។ នៅលើផ្ទៃដីប្រហែល1,000ហិកតានៅក្នុងឧទ្យានតេជោសែនឫស្សីត្រពាំង ខេត្តព្រះវិហារនឹងត្រូវបានបម្រុងទុកសម្រាប់ RSTCAP-SCAU ដើម្បីធ្វើការស្រាវជ្រាវ និងធ្វើសិក្ខាសាលាសម្រាប់កសិករកម្ពុជា។ យើងក៏នឹងផ្តល់ការបណ្តុះបណ្តាល និងការគាំទ្រផ្នែកបច្ចេកទេសដល់កសិករ ហើយយើងនឹងជួយឱ្យពួកគេរកទីផ្សារសម្រាប់ផលិតផលរបស់ពួកគេ ព្រោះនេះ មិនមែនត្រឹមតែផ្តល់នូវអត្ថប្រយោជន៍ជូនដល់ស្ថាប័ន និងកសិករទូទៅប៉ុណ្ណោះទេ តែក៏ដើម្បីប្រជាពលរដ្ឋដែលរស់នៅតំបន់ជុំវិញកសិដ្ឋានចិញ្ចឹមកូននាងផងដែរ។

សាស្ត្រាចារ្យ លីវ ជី ភីង (Dr. Liu Ji Ping)នាយកស្តីទីនៃមជ្ឈមណ្ឌល RSTCAP បានថ្លែងថាការកាត់បន្ថយភាពក្រីក្រតាមរយៈការធ្វើចម្ការដង្កូវនាង។ ឧស្សាហកម្មសូត្រដើរតួនាទីយ៉ាងសកម្មក្នុងការអភិវឌ្ឍសេដ្ឋកិច្ចកម្ពុជា។ “សូត្រដើមមានតម្លៃសេដ្ឋកិច្ចខ្ពស់ ហើយមានន័យថា ប្រាក់ចំណូលបន្ថែមសម្រាប់សហគមន៍ជនក្រីក្រជាច្រើន”។

លោកមានប្រសាសន៍បន្ថែមថា សូត្រលើកកម្ពស់ការអភិវឌ្ឍរួមនៃវិស័យកសិកម្មក៏ដូចជាឧស្សាហកម្មធុនស្រាលក្នុងស្រុក និងជួយពង្រីកពាណិជ្ជកម្ម។ ប្រទេសកម្ពុជា គឺជាប្រទេសដែលមានប្រពៃណីមួយដែលមានដីច្រើន និងមានកម្លាំងពលកម្មដ៏ធំ ជំហានដំបូង គឺអប់រំ និងបណ្តុះបណ្តាលកម្លាំងពលកម្ម។ “ក្រោមកិច្ចសហប្រតិបត្តិការនេះ យើងនឹងផ្តល់ការបណ្តុះបណ្តាល ក៏ដូចជាកសាងកសិដ្ឋានធ្វើការផ្គត់ផ្គង់ដង្កូវនាង ដើមម៉ៃស្លុង និងគាំទ្រដល់ទិដ្ឋភាពផ្សេងទៀតនៃដំណើរការ” ។

ប្រធានរាជបណ្ឌិត្យសភាកម្ពុជា ក៏បានអះអាងដែរថា៖ “រាជបណ្ឌិត្យសភាកម្ពុជា សុខចិត្តខាតបង់ ប្រសិនបើពេលសិក្សាស្រាវជ្រាវដំណើរការមិនល្អ តែមិនអាចឱ្យប្រជាពលរដ្ឋ ត្រូវបរាជ័យលើវិស័យផលិតកម្មសូត្រនេះទេ”។ សរសៃសូត្រ មានសារៈសំខាន់ និងបានចាក់ឫសយ៉ាងជ្រៅនៅក្នុងប្រពៃណីទំនៀមទម្លាប់ខ្មែរ។ សរសៃសូត្របានក្លាយជាចំណែកមួយក្នុងការលើកតម្លៃសម្លៀកបំពាក់ប្រពៃណីរបស់ខ្មែរ”។

លោកបណ្ឌិតមានប្រសាសន៍ថា “នៅពេលគេនិយាយអំពីសរសៃសូត្រ គឺធ្វើឱ្យយើងនឹកឃើញភ្លាមពីសម្លៀកបំពាក់ដែលផលិតពីសរសៃសូត្រហើយប្រភេទសម្លៀកបំពាក់ធ្វើពីសរសៃសូត្រ ត្រូវបានចាត់ទុកជាប្រភេទសម្លៀកបំពាក់ប្រណីត និងមានតម្លៃថ្លៃ”។

ដោយឡែកមជ្ឈមណ្ឌលស្រាវជ្រាវដង្កូវនាងផលិតសូត្រខ្មែរដំបូងនៅកម្ពុជា គ្រោងនឹងបញ្ចប់ជាស្ថាពរក្នុងពេលឆាប់ៗនេះ។ គម្រោងនេះ បានសាងសង់នៅក្នុងបរិវេណសាកលវិទ្យាល័យភូមិន្ទភ្នំពេញ ក្រោមជំនួយរបស់រដ្ឋាភិបាលជប៉ុនប្រមាណ 9ម៉ឺនដុល្លារ ដែលបច្ចុប្បន្នបានសាងសង់រួចប្រមាណជា 85%ហើយ។

លោកបណ្ឌិត ម៉ី កល្យាណ ជាអ្នកដឹកនាំគម្រោង និងជាប្រធានក្រុមប្រឹក្សាភិបាលសាកលវិទ្យាល័យ-ភូមិន្ទភ្នំពេញ លើកឡើងថា ការបង្កើតមជ្ឈមណ្ឌលស្រាវជ្រាវនេះនឹងជួយលើកស្ទួយជីវភាពកសិករ ជាពិសេសស្ត្រីខ្មែរដែលកំពុងប្រកបរបរត្បាញសូត្រ ម្យ៉ាងទៀតដោយសារប្រទេសធំៗធ្លាប់ផលិតសូត្រ ដូចជា ជប៉ុន កូរ៉េ ចិន និង ថៃ ជាដើម គេលែងធ្វើ ហើយងាកទៅរកផលិតកម្មផ្សេងដែលចំណេញច្រើនជាងព្រោះតម្លៃពលកម្មខ្ពស់។ វាជាឱកាសសម្រាប់ខ្មែរយើង ដែលត្រូវតែធ្វើឧស្សាហកម្មនេះឱ្យបាន ព្រោះយើងនៅមានតម្លៃពលកម្មទាប។

លោកបណ្ឌិត ថ្លែងប្រាប់អ្នកសារព័ត៌មានថាគម្រោងសាងសង់បានទទួលជំនួយធំពីរដ្ឋាភិបាលជប៉ុន ប៉ុន្តែក្នុងនោះក៏មានការចំណាយពីសាកលវិទ្យាល័យផងដែរ។ យើងរំពឹងថា មជ្ឈមណ្ឌលនេះនឹងមានចំណែកចូលរួមអភិវឌ្ឍសហគមន៍មូលដ្ឋានព្រោះយើងមានធនធានមនុស្សគ្រប់គ្រាន់សម្រាប់ការងារក្នុងខ្សែចង្វាក់ផលិតកម្មសូត្រនេះ យើងមានផ្ទៃដីដាំដើមមនប្រមាណ 11ហិកតានៅខេត្តកំពង់ស្ពឺ និងមានរោងសម្រាប់ចិញ្ចឹមដង្កូវនាងដែលទើបចាប់ផ្តើមដំណើរការ តែអ្វីដែលសំខាន់ទៀតនោះ គឺយើងត្រូវការការចូលរួមពីសហគមន៍មូលដ្ឋានផងដែរ។

សូមបញ្ជាក់ថា វិស័យសូត្ររបស់កម្ពុជាស្ទើរតែផុតជីវិតទៅហើយ ដោយសារតែវាត្រូវបានគេទុកចោលមិនអភិវឌ្ឍ ហើយមានតែកសិករតិចតួចប៉ុណ្ណោះដែលនៅតែបន្តកិច្ចការដាំដុះមកសម្រាប់សិប្បកម្មជាលក្ខណៈគ្រួសារ។ ជាមួយគ្នានេះកម្ពុជាបាននាំចូលសូត្រយ៉ាងហោចណាស់ 400តោនក្នុងមួយឆ្នាំដែលមានតម្លៃប្រមាណ 30លានដុល្លារ៕

August 27, 2018

តើមូលហេតុអ្វីខ្លះដែលធ្វើឱ្យបុគ្គលិកខ្លាំងៗមួយចំនួន ចេញរកស៊ីខ្លួនឯងមិនជោគជ័យ?

មនុស្សជាច្រើនមានចម្ងល់ថា ហេតុអ្វីបានជាមនុស្សពូកែៗដែលគេធ្លាប់មើលឃើញថាជាអ្នកដឹកនាំក្រុមហ៊ុនស្តង់ដារធំៗ ឬជាអ្នកពូកែផ្នែកលក់ដែលជួយអាជីវកម្មធំៗឱ្យទទួលបានជោគជ័យ តែបែរជាបរាជ័យក្នុងជំនួញផ្ទាល់ខ្លួននៅពេលពួកគាត់ចេញទៅធ្វើអាជីវកម្មទៅវិញ?។

ស្ថាបនិក និងជាអគ្គនាយកក្រុមហ៊ុន Mekong Properties លោក ថាច ចាន់នី បានលើកឡើងថា មនុស្សពូកែភាគច្រើនដែលធ្វើការឱ្យគេ និងអាចធ្វើឱ្យក្រុមហ៊ុនធំៗដំណើរការបានល្អដោយសារការរួមចំណែករបស់ខ្លួនខណៈបុគ្គលិកខ្លះបានវិវឌ្ឍខ្លួនរហូតក្លាយជាប្រធានផ្នែកលក់ និងជាបុគ្គលសំខាន់ៗក្នុងកម្រិតអ្នកគ្រប់គ្រង តែពេលបើកអាជីវកម្មផ្ទាល់ខ្លួនបែរជាបរាជ័យនោះ គឺដោយសារតែបរិយាកាសនៃអាជីវកម្ម។ លោកថា អ្នកចេញរកស៊ីដំណាលគ្នាជាមួយលោកមួយ-ចំនួនធំបានក្ស័យធន ហើយមានមនុស្សតិចតួចប៉ុណ្ណោះដែលអាចឈរជើងបានក្នុងពិភពអាជីវកម្មជាក់ស្តែង ដែលអ្នកទាំងអស់នោះសុទ្ធតែមាន សមត្ថភាពខ្លាំងៗ។ អ្នកដែលមិនអាចទៅមុខបានភាគច្រើនជាមនុស្ស ដែលមានអំនួតលើសមត្ថភាព តែមិនមានបទពិសោធក្នុងអាជីវកម្មពិត។

លោក ថាច ចាន់នី ស្ថាបនិក និងជាអគ្គនាយកក្រុមហ៊ុន Mekong Properties

លោក ថាច ចាន់នី បាននិយាយថា៖ “មានអ្នកខ្លះកាន់តំណែងជា Sale director ហើយគាត់ស្គាល់បុគ្គលសំខាន់ៗច្រើន បន្ទាប់មកក៏ចេញរកស៊ី តែបានដួលទៅវិញក្នុងរយៈពេលមួយ។ បញ្ហាគឺត្រង់គាត់គិតថា មុខតំណែងរបស់គាត់សំខាន់ គាត់ចេះពីការងារដែលគាត់កំពុងធ្វើអស់ហើយ និងអាចរកស៊ីបានហើយ តែគាត់ភ្លេចគិតថា នៅពីក្រោយភាពជោគជ័យនៃអាជីវកម្មមួយ គេត្រូវការការចូលរួមពីផ្នែកជាច្រើនផ្សេងទៀត”។

សហគ្រិនដដែលបានលើកឡើងផងដែរថា អ្នកធ្វើការងារ គឺជាអ្នកកសាងបណ្តាញ និងមានសមត្ថភាពខ្ពស់ក្នុងពិភពការងារ ដែលមានអ្នកខ្លះបានចាក់ឫសកែវយ៉ាងជ្រៅជាយូរឆ្នាំ រហូតទទួលបានផ្លែផ្កាល្អ។ ក្រោយពេលគាត់ចេញទៅបើកអាជីវកម្មខ្លួនឯង គឺហាក់បីដូចជាគាស់ដើមឈើមួយដែលមានផ្លែផ្កានោះទៅដាក់ដាំនៅទីកន្លែងថ្មី ដែលមានបរិយាកាសថ្មីមួយផ្សេងដែលមិនប្រាកដថា តើដើមឈើនោះអាចទប់ទល់នឹងជីវជាតិដីថ្មីនោះបានកម្រិតណា ហើយអាចបន្តរស់ ឬងាប់នៅរយៈពេលណាមួយឡើយ។ កត្តានេះអាចធ្វើឱ្យគាត់ត្រូវចំណាយពេលវេលាច្រើន ដើម្បីសិក្សាពីបញ្ហាប្រឈមថ្មីៗជាច្រើនផ្សេងទៀតនៅក្នុងអាជីវកម្ម ដើម្បីបន្តអភិវឌ្ឍឱ្យខ្លាំងបំផុតតាមដែលអាចធ្វើទៅបាន បើមិនដូច្នោះទេគាត់នឹងដួលវិញក្នុងពេលណាមួយនៃដំណើរអាជីវកម្មនោះ។ ជាដំណោះស្រាយ អ្នករកស៊ីគួរបើកចិត្តឱ្យទូលាយសិក្សាឱ្យសព្វជ្រុងជ្រោយដោយកុំមោទនភាពខ្លាំងពេក ដើម្បីស្វែងរកបទពិសោធជាក់ស្តែងដែលអាចជួយគាត់ឱ្យរកឃើញវិធីល្អៗជាច្រើន ដែលសមនឹងអាជីវកម្មរបស់គាត់យកទៅអភិវឌ្ឍ ឬដោះស្រាយបញ្ហាប្រឈមនានា។

ងាកមកឧកញ៉ាវ័យក្មេង ចិត្រ សិរីសុភ័ក្ត្រ ដែលជាម្ចាស់ក្រុមហ៊ុន Luxury Smile & MONSNE កាហ្វេ បានលើកឡើងថា ការធ្វើអាជីវកម្មជោគជ័យចាំបាច់ត្រូវមានភាពបត់បែន និងចេះគ្រប់គ្រងបុគ្គលិកឱ្យបានល្អ បើមិនដូច្នេះទេយើងអាចនឹងខាតបង់បានគ្រប់ពេល។ បុគ្គលិកជាទ្រព្យសម្បត្តិសំខាន់សម្រាប់ក្រុមហ៊ុន ហើយដើម្បីដឹកនាំបុគ្គលិកឱ្យបានល្អ លុះត្រាតែអ្នកដឹកនាំចេះយកបេះដូងបុគ្គលិកឱ្យបាន។ ទោះជាយ៉ាងនេះក្តី ការយកបេះដូងបុគ្គលិកមកបាន មិនមែនជារឿងងាយនោះទេ វាទាមទារឱ្យមានការពន្យល់ណែនាំ និងលើកទឹកចិត្តច្រើនបំផុត ដើម្បីឱ្យបុគ្គលិកបើកចិត្តទទួលយកក្តីស្រឡាញ់ពីអ្នកគ្រប់គ្រង។ ប្រសិនបើអ្នកគ្រប់គ្រងព្យាយាមបង្ហាញក្តីស្រឡាញ់ទៅថ្នាក់ក្រោម តែបុគ្គលិកមិនបើកចិត្តដើម្បីទទួលយកក្តីស្រឡាញ់នោះ យើងនៅតែមិនអាចធ្វើការងារបានល្អជាមួយគ្នាដដែល ហើយអាជីវកម្មអាចប្រឈមបញ្ហាច្រើន ព្រោះមានរឿងជាច្រើនដែលមិនយល់ពីគ្នាដែលមិនអាចធ្វើឱ្យសេវាកម្មមានគុណភាពល្អបាន។

លោកឧកញ៉ា ចិត្រ សិរីសុភ័ក្រ្ត បាននិយាយថា៖ “ដើម្បីដឹកនាំការងារបានល្អ លុះត្រាតែយើងចេះសម្របខ្លួនជាមួយនឹងបរិយាកាសនៃការងារជាមួយគាត់បានល្អ ហើយយល់ច្បាស់ពីតម្រូវការជាក់ស្តែងរបស់សមាជិកផ្ទាល់ក្នុងក្រុមហ៊ុនមិនមែនអនុវត្តតែតាមទ្រឹស្តីដែលធ្លាប់ដឹងពីខាងក្រៅមកនោះទេ”។

លោកឧកញ៉ា ចិត្រ សិរីសុភ័ក្ត្រ បានលើកឡើងផងដែរថា លោកធ្លាប់សិក្សានៅសហរដ្ឋអាមេរិកតែចំណេះដឹងទាំងអស់នោះ ពេលខ្លះមិនអាចប្រើប្រាស់បាននៅកម្ពុជាទាំងស្រុងនោះទេសម្រាប់ការគ្រប់គ្រងបុគ្គលិក និងអាជីវកម្ម។ ដើម្បីអនុវត្តការដឹកនាំអាជីវកម្មបានល្អលុះត្រាតែសិក្សាបន្ថែមពីតម្រូវការរបស់ប្រជាជនខ្មែរ វប្បធម៌នៃការធ្វើការងារ និងរៀបចំវិធីសាស្ត្រជាច្រើនផ្សេងទៀតដើម្បីជំរុញទឹកចិត្ត និងឆន្ទៈរបស់ពួកគាត់ឱ្យបានច្រើន ទើបអាចឱ្យការងារអនុវត្តបានទៅដោយរលូន និងឈរជើងបានយូរ។ លោកថា មនុស្សម្នាក់ៗមិនដូចគ្នាទេ ហេតុនេះទាល់តែព្យាយាមឱ្យបានច្រើនពីការដឹកនាំខាងក្នុងខ្លួនឯងរបស់អ្នកដឹកនាំផង និងចិត្តសាស្ត្ររបស់បុគ្គលិកឱ្យល្អផងទើបអាចដំណើរការអាជីវកម្មបានល្អ៕

August 21, 2018

ដាំដើមប៉ាស្យុងលើដី1ហិកតា ប្រមូលផលក្នុង1ថ្ងៃបាន150 – 200Kg

ក្រូចវល្លិ៍ ឬភាសាដែលគេនិយមហៅថា ផ្លែប៉ាស្យុង(Passion) មានដើមកំណើតនៅទ្វីបអឺរ៉ុបដែលហូរចូលមកដល់ប្រទេសកម្ពុជាកាលពីប៉ុន្មានឆ្នាំចុងក្រោយនេះ បាន និងកំពុងមានការគាំទ្រខ្លាំងពីអតិថិជននៅលើទីផ្សារកម្ពុជា ដោយសារវាមានអត្ថប្រយោជន៍ខ្លាំងចំពោះសុខភាព ពិសេសជាអាហារផ្តល់ថាមពលដល់មនុស្សភ្លាមៗក្រោយពេលទទួលទានរួច។

អ្នកស្រី ឃឹម រ៉ាឌី ជាម្ចាស់កសិដ្ឋានដាំដើមប៉ាស្យុង់ដ៏ធំមួយឈ្មោះថា (Happy Dragon Farm) ឬកសិដ្ឋាននាគសប្បាយ នៅក្នុងភូមិត្បែង ឃុំត្បែង ស្រុកបន្ទាយស្រី ខេត្តសៀមរាបបានមានប្រសាសន៍ក្នុងទឹកមុខរីករាយថា តាមពិតទៅគ្រួសារលោកស្រីភាគច្រើនរៀនជំនាញសុខាភិបាល “វិជ្ជាពេទ្យ‟ តែដោយយល់ឃើញពីអត្ថប្រយោជន៍នៃបន្លែផ្លែឈើចំពោះសុខភាពទើបពួកគាត់ខិតខំឆ្លៀតពេលរៀបចំកសិដ្ឋានដាំដំណាំហូបផ្លែតាមរបៀបធម្មជាតិនេះឡើង ដោយដំបូងឡើយគ្រាន់តែជាកសិដ្ឋានតូចមួយទុកសម្រាប់ទទួលទានជាលក្ខណៈគ្រួសារប៉ុណ្ណោះ ប៉ុន្តែដោយសារមានតម្រូវការទីផ្សារ មិនថាតែប្រជាជនខ្មែរ ឬជនបរទសដែលកំពុងរស់នៅប្រទេសកម្ពុជានោះទេ ពួកគេបាននាំគ្នាមកកុម្ម៉ង់ទិញកាន់តែច្រើនឡើងៗ ទើបធ្វើឱ្យគ្រួសារគាត់ពង្រីកកសិដ្ឋានឱ្យកាន់តែធំឡើងៗសម្រាប់ដាំផ្លែឈើប្រភេទនេះនៅលើដីរាប់សិបហិកតានៅខេត្តសៀមរាបចាប់តាំងពីឆ្នាំ2013មកតែម្ដង។

អ្នកស្រី ឃឹម រ៉ាឌី ម្ចាស់កសិដ្ឋាន Happy Dragon Farm

ទឹកមុខពោរពេញដោយក្តីសង្ឃឹម អ្នកស្រី ឃឹម រ៉ាឌីបន្តថា កន្លងមកអ្នកស្រីដាំតែប្រភេទផ្លែឈើក្នុងស្រុក ដែលមានដូចជា ផ្លែស្រការនាគ ឬផ្លែល្មុត សេដាប៉ុណ្ណោះ ប៉ុន្តែបន្ទាប់ពីបានទៅទស្សនកិច្ចសិក្សា និងបានចូលរៀនបច្ចេកទេសវគ្គខ្លីផ្នែកដាំដុះនៅសហរដ្ឋអាមេរិកក្នុងរយៈពេលខ្លីរួចមក គ្រួសាររបស់អ្នកស្រីក៏ចាប់ផ្តើមដាំដើមឈើប្រភេទនេះ បន្ថែមលើដំណាំហូបផ្លែដទៃទៀត ដោយធ្វើពិសោធសាកល្បងដាំដុះជាលើកដំបូង។ ប៉ុន្តែក្រោយពីដាំបានរយៈពេលប្រមាណជា 3ទៅ4ខែ ដោយបានដាក់ទ្រើងឱ្យវាវារតោងឡើងតាមលក្ខណៈបច្ចេកទេសដូចផ្លែឈើមួយចំនួនទៀតមក ផ្លែឈើនេះក៏ចាប់ផ្តើមចេញផ្កា-ផ្លែ និងឱ្យផលបន្តិចម្តងៗ ហើយមិនយូរប៉ុន្មានផង យើងអាចប្រមូលផលបានក្នុង1ហិកតា ក្នុង1ថ្ងៃ ចាប់ពី150 រហូតដល់ 200គីឡូក្រាមក៏មាន។

អ្នកស្រីបន្តថា ចំពោះបច្ចេកទេសដាំដុះឱ្យទទួលបានផលច្រើន ការដាំដុះត្រូវការការថែទាំជាខ្លាំង ដោយយើងត្រូវដកស្មៅ ជ្រំដី ដាក់ជី ប៉ុន្តែដើម្បីអត្ថប្រយោជន៏សុខភាពសម្រាប់មនុស្ស គេមិនត្រូវប្រើជីគីមីឡើយ។ បន្ទាប់មកត្រូវចេះថែទាំ កាត់មែកចាស់ៗចោល ទុកឱ្យមែកថ្មីលាស់ឡើងបន្ត ទើបវាមានផ្លែ-ផ្កាបន្តទៀត។ បើយើងចេះថែទាំបានល្អ ចេះបង្កាត់ពូជញីពូជឈ្មោលនោះ ផ្លែឈើនេះអាចផ្តល់ផលបានច្រើន ហើយអាចរស់បានរយៈពេលយូរឆ្នាំដូចផ្លែឈើដទៃទៀតដែរ។

បន្ទាប់ពីប៉ាស្យុងឱ្យផល ផ្លែឈើប្រភេទនេះត្រូវបានអតិថិជនមកទទួលទិញដល់កសិដ្ឋាននៅក្នុងខេត្តសៀមរាបនោះតែម្តង ហើយបាននាំយកមកលក់នៅផ្សារកសិដ្ឋានធម្មជាតិនាគសប្បាយ(Happy Dragon Farm) នៅផ្លូវលេខ63 សង្កាត់បឹងកេងកង ក្រុងភ្នំពេញ ដែលមានអតិថិជនមកទិញយកទៅលក់បន្ត និងលក់ឱ្យអតិថិជនមួយចំនួនទៀត។ ពួកគាត់ទទួលទិញជាប្រចាំសម្រាប់ហូបជាលក្ខណៈគ្រួសារជារៀងរាល់ថ្ងៃ ដែលអតិថិជនទាំងនោះយល់ថា វាមានអត្ថប្រយោជន៏ចំពោះសុខភាពជាខ្លាំង។

បើតាមការស្រាវជ្រាវផ្នែកវេជ្ជសាស្ត្របានឱ្យដឹងថា ផ្លែនេះវាមានអត្ថប្រយោជន៍សម្រាប់មនុស្សចាស់ដែលមានរាងកាយ និងកោសិកាចុះទន់ខ្សោយអាចទទួលទានផ្លែឈើនេះជាប្រចាំក្នុង1ថ្ងៃ1-2ផ្លែវាអាចជួយបង្កើនកម្លាំងថាមពលឱ្យល្អប្រសើរឡើង ហើយអ្នកដែលសម្រានមិនសូវលក់ ពេលពិសារួចហើយ និងមានអាររម្មណ៍ល្អប្រសើរឡើងបន្តិចម្តងៗ លើសពីនេះទៀត វាថែមទាំងមានសមត្ថភាពក្នុងការការពារជំងឺផ្តាសាយ បង្កើនការចងចាំ និងជួយកាត់បន្ថយចង្កោមរោគសញ្ញាហឺតបានមួយកម្រិតទៀតផង។

អ្នកស្រី ឃឹម រ៉ាឌី បញ្ជាក់ថា បច្ចុប្បន្នផ្លែប៉ាស្យុងរបស់គ្រួសារអ្នកស្រី មិនត្រូវបានដាក់លក់នៅលើទីផ្សារក្នុងស្រុក ឬទីផ្សារទំនើបឡើយ ដោយសារតែផ្គត់-ផ្គង់មិនគ្រប់ ដោយបច្ចុប្បន្នមានដាក់លក់តែនៅកសិដ្ឋាននាគសប្បាយប៉ុណ្ណោះ និងអាចផ្គត់ផ្គង់ផ្លែប៉ាស្យុងសម្រាប់ម៉ូយប្រចាំក្នុង1គីឡូក្រាមតម្លៃ 3-4ដុល្លារ អាស្រ័យទៅតាមការប្រមូលបានតិច ឬច្រើន៕

August 21, 2018

ខណ្ឌណាខ្លះដែលដីមានតម្លៃថ្លៃជាងគេក្នុងរាជធានីភ្នំពេញ?

បច្ចុប្បន្នគេសង្កេតឃើញថា សំណង់លំនៅឋាន និងអគារខ្ពស់ៗបានកើនឡើងយ៉ាងខ្លាំងពីមួយឆ្នាំទៅមួយឆ្នាំក្នុងភូមិសាស្ត្ររាជធានីភ្នំពេញដែលធ្វើឱ្យតម្លៃដីធ្លីមានការកើនឡើងខ្ពស់កប់ពពកក្នុងរយៈពេលប៉ុន្មានឆ្នាំចុងក្រោយនេះ។

យោងតាមរបាយការណ៍ស្រាវជ្រាវរបស់ក្រុមហ៊ុន Key Real Estate បានបង្ហាញថា នៅឆមាសទី1 ឆ្នាំ2018នេះ ដីធ្លីនៅក្នុងខណ្ឌចំនួន3 ដែលមានតម្លៃដីខ្ពស់ជាងគេក្នុងរាជធានីភ្នំពេញមានដូចជា1.ខណ្ឌដូនពេញ ជាមជ្ឈមណ្ឌលពាណិជ្ជកម្មដែលដីមានតម្លៃថ្លៃបំផុត ដោយដីលំនៅឋានត្រូវបានលក់ក្នុងតម្លៃ 3,500ដុល្លារក្នុងម៉ែត្រការ៉េ និងដីសម្រាប់ធ្វើពាណិជ្ជកម្មមានតម្លៃជាមធ្យមគឺ 6,100ដុល្លារក្នុងមួយម៉ែត្រការ៉េ។ ក្នុងនោះសង្កាត់ផ្សារថ្មី1 ផ្សារថ្មី2 និងផ្សារថ្មី3 ក្នុងខណ្ឌដូនពេញដែលជាដីពាណិជ្ជកម្មមានតម្លៃថ្លៃបំផុតដែលអាចលក់បានដល់ទៅ 9,000ដុល្លារក្នុងមួយម៉ែត្រការ៉េ រីឯដីលំនៅឋានក្នុងសង្កាត់ផ្សារចាស់វិញមានតម្លៃ 4,000ដុល្លារក្នុងម៉ែត្រការ៉េ។

លោក សន សៀប ស្ថាបនិក និងជានាយកប្រតិបត្តិរបស់ក្រុមហ៊ុន Key Real Estate បានពន្យល់ថា ហេតុផលសំខាន់បំផុតដែលនាំឱ្យដីក្នុងខណ្ឌនេះមានតម្លៃថ្លៃជាងគេនោះ គឺទីផ្សារអចលនទ្រព្យដែលមានភាពចាស់ទុំ វាជាតំបន់អភិវឌ្ឍន៍ដែលចាស់ជាងគេ ហើយមានទីផ្សារធំៗ និងគោលដៅទេសចរណ៍ដ៏ពេញនិយម ដូចជាព្រះបរមរាជវាំង និងតំបន់មាត់ទន្លេផងដែរនៅក្នុងតំបន់នោះ។

បន្ទាប់ពីខណ្ឌដូនពេញ គឺខណ្ឌ7មករា ជាមជ្ឈមណ្ឌលពាណិជ្ជកម្មមួយទៀតដែលដីមានតម្លៃថ្លៃបំផុតលំដាប់លេខ2 នៅរាជធានីភ្នំពេញ គឺដីសម្រាប់សង់លំនៅឋានក្នុងតំបន់នេះត្រូវបានលក់ក្នុងតម្លៃ 3,300ដុល្លារក្នុងមួយម៉ែត្រការ៉េ ខណៈពេលដែលដីពាណិជ្ជកម្មមានតម្លៃ 5,400ដុល្លារក្នុងម៉ែត្រការ៉េ។ តំបន់ដែលដីមានតម្លៃថ្លៃជាងគេនៅក្នុងខណ្ឌមួយនេះ មានដូចជាសង្កាត់អូរឫស្សី1,2,3 និង4 គឺជាដីពាណិជ្ជកម្មដែលមានតម្លៃ 6,000ដុល្លារក្នុង 1ម៉ែត្រការ៉េ និងសង្កាត់បឹងព្រលិត ដីមានតម្លៃប្រមាណជា4,000ដុល្លារក្នុងមួយម៉ែត្រការ៉េ។

បន្ទាប់ពីខណ្ឌទាំង2 ខាងលើ ខណ្ឌចំការមនជាប់ចំណាត់ថ្នាក់លេខ3 ជាខណ្ឌដែលដីមានតម្លៃថ្លៃមធ្យមគឺ 3,000ដុល្លារក្នុង1ម៉ែត្រការ៉េសម្រាប់ដីលំនៅឋាន និងដីពាណិជ្ជកម្មមានតម្លៃ 5,100ដុល្លារក្នុង1ម៉ែត្រការ៉េ។

លោក ហ៊ឹម សីហា នាយកផ្នែកស្រាវជ្រាវអចលនទ្រព្យនៃក្រុមហ៊ុន VTrust Appraisal មានប្រសាសន៍ថា ចំណែកឯដីដែលនៅមានតម្លៃទាបនៅឡើយ គឺជាដីដែលនៅជាយៗក្រុង មានដូចជាដីនៅខណ្ឌព្រែកព្នៅខណ្ឌសែនសុខ ខណ្ឌដង្កោ ខណ្ឌពោធិ៍សែនជ័យ និងខណ្ឌមានជ័យ ជាទីតាំងជាយក្រុងព័ទ្ធជុំវិញរាជធានីភ្នំពេញដែលកន្លែងខ្លះដីមានតម្លៃក្រោម 100ដុល្លារ និងខ្លះទៀតត្រឹមតែ 20-30ដុល្លារក្នុងម៉ែត្រការ៉េក៏មាន។ លោកថា ដីដែលមានតម្លៃចន្លោះពី 20-30ដុល្លារក្នុងមួយម៉ែត្រការ៉េនេះ ជាប្រភេទដីស្រែប្រាំងដែលនៅមិនទាន់មានសំណង់ផ្ទះល្វែងទៅដល់ ពោលគឺជាដីដែលមានពលរដ្ឋជាម្ចាស់ស្រុករស់នៅតកូនតចៅបន្តគ្នារហូតមកទល់បច្ចុប្បន្ន។

យ៉ាងណាក៏ដោយ ដីនៅតំបន់ជាយក្រុងតាមបណ្តោយក្រវាត់ក្រុងទី3 ចាប់ពីស្ពានព្រែកព្នៅឆ្លងកាត់តាមភ្នំប្រសិទ្ធិ៍ កាត់លើផ្លូវលេខ51ឆ្ពោះមកខេត្តកណ្តាល ហើយបញ្ចប់នៅត្រឹមកំពង់ផែស្រុកកៀនស្វាយជិតផ្លូវជាតិលេខ1 កំពុងមានសម្ទុះកើនឡើងខ្លាំង ដោយសារគម្រោងវិនិយោគសំណង់ផ្សេងៗបានទៅបោះទីតាំងនៅទីនោះ ដែលធ្វើឱ្យតម្លៃដីបាន និងកំពុងឡើងថ្លៃខ្លាំងដែរ ចន្លោះពី 100ដុល្លារទៅដល់ 200ដុល្លារ ហើយសម្រាប់ដីជាយក្រុងដែលមានសក្តានុពលខ្លាំងផ្នែកពាណិជ្ជកម្ម អាចឡើងថ្លៃជិតដល់ 300ដុល្លារក្នុងមួយម៉ែត្រការ៉េ។

លោក ហ៊ឹម សីហា បានបញ្ជាក់ថា ដោយសារនិន្នាការតម្លៃដីចេះតែកើនឡើងដូច្នេះ បានធ្វើឱ្យទីប្រជុំជននៅតំបន់ជាយក្រុងមួយចំនួន ដូចជាតំបន់ជ្រោយចង្វារដែលស្ថិតលើផ្លូវជាតិលេខ6A ដីក្នុងក្រុងតាខ្មៅលើចំណុចតភ្ជាប់ពីភ្នំពេញទៅខេត្តកណ្តាល និងដីក្នុងតំបន់មួយចំនួនទៀតនឹងក្លាយជាអនុតំបន់ក្រុងភ្នំពេញដែលមានមនុស្សរស់នៅច្រើនហើយនោះតម្លៃដីក៏កំពុងកើនឡើងខ្លាំង មិនចាញ់ដីក្នុងទីក្រុងភ្នំពេញប៉ុន្មានឡើយ។

គួរបញ្ជាក់ថា តម្លៃដីធ្លីដែលអាចឡើងខ្ពស់ ឫចុះទាបនោះ គឺអាស្រ័យលើទីតាំង និងចម្ងាយផ្លូវពីរមណីយដ្ឋានវត្តភ្នំដែលជាចំណុចកណ្ដាលនៃរាជធានីភ្នំពេញ។ ឧទាហរណ៍តាមបណ្តោយផ្លូវធំដីទំនេរចម្ងាយប្រមាណ5គីឡូម៉ែត្រពីវត្តភ្នំ អាចមានតម្លៃ 4500ដុល្លារក្នុង1ម៉ែត្រការ៉េ ហើយប្រសិនបើចម្ងាយប្រហែល25គីឡូម៉ែត្រពីចំណុចកណ្តាលរាជធានីភ្នំពេញ តម្លៃដីអាចត្រឹមតែ 10 ទៅ50ដុល្លារប៉ុណ្ណោះក្នុង 1ម៉ែត្រការ៉េ៕

August 21, 2018

វិធីបង្រៀនកូនឱ្យស្គាល់ពីសេចក្ដីស្រឡាញ់ពិតប្រាកដ

សេចក្ដីស្រឡាញ់ធ្វើឱ្យពិភពលោកភ្លឺថ្លាស្រស់ស្រាយ និងកាន់តែគួរឱ្យចង់រស់នៅខ្លាំងឡើង តែ តើទស្សនៈពាក់ព័ន្ធនឹងសេចក្ដីស្រឡាញ់របស់កូនតូចរបស់យើងវិញ យ៉ាងណាដែរទៅហ្ន៎?… ក្មេងវ័យតេះតះនៅមិនទាន់ស្គាល់សេចក្ដីស្រឡាញ់ទេ គេដឹងតែត្រឹមថា ប៉ា និងម៉ាក់ គឺជារបស់ផស់គេ គឺបើគេត្រូវការនៅពេលណា ឬយ៉ាងណានោះ ប៉ាម៉ាក់ត្រូវតែជាអ្នកតបស្នងឱ្យគេភ្លាម មិនថាតែការឱបថើប លួងលោម របស់លេង ឬចំណីអាហារនោះឡើយ គេត្រូវតែបានវាមកតាមដែលគេត្រូវការ។

ដូច្នេះ យើងនាំគ្នាមកបណ្ដុះសេចក្ដីស្រឡាញ់នៅក្នុងចិត្តរបស់កូនយើងទាំងអស់គ្នា និងបើកចិត្តឱ្យទូលាយ ដើម្បីមេរៀនជីវិតរបស់កូន…
បេះដូងសំខាន់របស់ការបណ្ដុះសេចក្ដីស្រឡាញ់នៅក្នុងចិត្តកូនឱ្យបានសម្រេចគឺ អាណាព្យាបាលត្រូវមានក្ដីមេត្តាករុណាចំពោះកូនតូចរបស់លោកអ្នកជាមុនសិន ព្រោះក្មេងតូចៗតែងតែធ្វើរឿងខុសឆ្គងជាប់ជានិច្ច និងត្រូវរឭកដឹងជាប់ជានិច្ចថា កំហុសឆ្គងដែលកើតឡើងពីភាពមិនដឹងក្ដីរបស់កូននោះ គឺជាមេរៀនជីវិតរបស់កូនដូច្នេះឪពុកម្ដាយត្រូវចិត្តត្រជាក់ៗ តាំងសតិស្មារតីមិនគួរស្រែកគំហក ក្រេវក្រោធ ឬដាក់ទោសកូនហាក់ដូចជាថា រឿងរ៉ាវដែលកើតឡើងនោះជាកំហុសដ៏ធំធេង ព្រោះរឹតតែលោកអ្នកដាក់ទោស និងប្រើកំហឹងដាក់កូនខ្លាំងប៉ុនណា នឹងរឹតតែទៅបាំងរារាំងបេះដូងតូចមួយរបស់កូនលែងឱ្យហ៊ានក្នុងការរៀនយល់ដឹង មិនហ៊ានក្នុងការហាមាត់សួរ ឬលែងហ៊ាននិយាយស្ដីជាមួយម្ដាយរបស់ខ្លួនទៀតផង។ នៅពេលទៅជាដូច្នេះ វាក៏ប្រហែលជាមានការលំបាកណាស់ដែលគ្រាប់ពូជសេចក្ដីស្រឡាញ់ក្នុងចិត្តរបស់កូននឹងរីកចម្រើនធំធាត់ចេញផ្កា ចេញផ្លែ ដើម្បីអ្នកដទៃជាបន្តនោះ។

រឿងល្អៗក្នុងសង្គម ចាប់ផ្ដើមពីគ្រួសារ
កូនតូចគួរបានរៀនយល់ដឹងថា ការជួយគ្នាបន្តិចបន្តួចនោះ គឺជារឿងដែលគ្រួសារត្រូវការ ដោយសារតែគេជាចំណែកមួយរបស់គ្រួសារ ព្រោះយើងសុទ្ធតែអាស្រ័យនៅក្រោមដំបូលតែមួយជាមួយគ្នា និងចុងក្រោយបំផុតទៅគឺព្រោះវាជារឿងដែលត្រឹមត្រូវមួយដែលគួរធ្វើដូចជា បង្រៀនឱ្យកូនចេះរៀបចំទុកដាក់កន្លែងគេងដោយខ្លួនឯងក្រោយភ្ញាក់ពីគេង ឬប្រមូលទុកដាក់របស់លេងរៀងរាល់ពេលលេងរួច ដោយអាណាព្យាបាលអាចធ្វើជាតារាងតួនាទីការទទួលខុសត្រូវរបស់កូនបិទនៅលើកន្លែងណាដែលងាយមើលឃើញ។ នៅពេលកូនធ្វើតាមតួនាទីក្នុងមួយថ្ងៃបានសម្រេចហើយ ក៏គួរតែមានរង្វាន់ ឬពាក្យសរសើរបន្តិចបន្តួច ដើម្បីឱ្យកូនមានមោទនភាពចំពោះអ្វីដែលគេមានចំណែកធ្វើនោះផង។

យកចិត្តទុកដាក់ បារម្ភ និងអនុគ្រោះ សណ្ដោសមេត្តាគ្នាទៅវិញទៅមក
បង្ហាញឱ្យកូនឃើញថា លោកអ្នកមានក្ដីអាណិតមេត្តាចំពោះបុគ្គលជុំវិញខ្លួន ដោយការយកចិត្តទុកដាក់ និងកង្វល់បារម្ភពីជីវិតរបស់គ្នាទៅវិញទៅមក។ ចាប់ផ្ដើមយ៉ាងងាយៗពីមនុស្សក្នុងក្រុមគ្រួសារ ដូចជា បើសិនលោកតា លោកយាយឈឺថ្កាត់ លោកអ្នកអាចនឹងបបួលកូនទៅសួរសុខទុក្ខគាត់ដល់ផ្ទះ ដោយមានទិញរបស់ផ្ញើជាប់ដៃទៅជាមួយផង ឬបបួលកូនចូលចង្ក្រានដើម្បីធ្វើម្ហូបអាហារឆ្ងាញ់ៗយកទៅផ្ញើគាត់ក៏បាន។ ការបង្ហាញពីភាពមានទឹកចិត្តល្អ កង្វល់បារម្ភរកគ្នាទៅវិញទៅមកបែបនេះឱ្យកូនៗបានឃើញរហូតក្លាយជារឿងធម្មតា ទម្លាប់ល្អៗទាំងនេះក៏នឹងជ្រួតជ្រាបជាសន្សឹមៗទៅក្នុងដួងចិត្តរបស់កូន និងបញ្ជូនបន្តទៅក្នុងសង្គមដោយស្វ័យប្រវត្តិនៅពេលដែលគេធំឡើង។

ចែករំលែកសេចក្ដីស្រឡាញ់ដល់គ្នាទៅវិញទៅមក
រឿងងាយៗដែលគ្រប់ក្រុមគ្រួសារអាចធ្វើបាន តែច្រើនតែមើលរំលងនោះគឺ ការបរិច្ចាគវត្ថុរបស់របរទៅឱ្យអ្នកដែលខ្វះឱកាស។ បើទូដាក់សៀវភៅនៅក្នុងផ្ទះចាប់ផ្ដើមពេញ ឬរាងកាយរបស់កូនចាប់ផ្ដើមធំធាត់រហូតស្លៀកពាក់ខោអាវពីមុនលែងត្រូវ សាកល្បងរៀបចំវត្ថុទាំងនោះឬវត្ថុណាដែលលែងត្រូវការប្រើប្រាស់ហើយដាក់ចូលក្នុងឡាំង ហើយបបួលកូនទៅចែករំលែកវត្ថុទាំងនោះដល់អ្នកដទៃ។ រឿងនេះគឺជាមេរៀននៃការចែករំលែកដំបូងគេដែលអាណាព្យាបាលអាចធ្វើបានជាមួយកូនៗ រួមទាំងការធ្វើឱ្យកូនៗមើលឃើញថា លោកអ្នកបានធ្វើនូវរឿងដែលក្រៅពីមុខនាទីរបស់លោកអ្នក ដូចជារីករាយស្វាគមន៍ បើអ្នកជិតខាងផ្ទះត្រូវការជំនួយ ឬផ្ដាំផ្ញើមើលថែទាំសត្វសុនខ ខណៈដែលពួកគេទៅខេត្តឆ្ងាយ ឬបបួលកូនទៅអានសៀវភៅឱ្យមនុស្សពិការភ្នែកស្ដាប់ជាដើម។ ការដែលលោកអ្នកលះបង់ពេលវេលារបស់ខ្លួនទៅធ្វើរឿងផ្សេងៗដើម្បីអ្នកដទៃយ៉ាងស្ម័គ្រចិត្ត និងមានសេចក្ដីសុខនេះ មិនត្រឹមតែកូនៗនឹងមានមោទនភាពលើរូបអ្នកប៉ុណ្ណោះទេ តែគេនៅមើលឃើញលោកអ្នកថា ជាគំរូក្នុងការធ្វើអំពើល្អទៀតផង។

សម្លឹងមើលពិភពលោកក្នុងន័យវិជ្ជមាន
ក្នុងពិភពនៃព័ត៌មាន និងការប្រកួតប្រជែងគ្នាដូចសព្វថ្ងៃនេះ វាអាចទៅរួចខ្លាំងណាស់ដែលកូនៗនឹងមានអារម្មណ៍ថា ពិភពលោកជុំវិញខ្លួនគេពិតជាអាក្រក់ និងមានគ្រោះថ្នាក់ណាស់ ដូច្នេះអាណាព្យាបាលគួរតែដឹកនាំឱ្យកូនសម្លឹងមើលរឿងល្អៗរបស់ពិភពលោកមួយនេះ ឱ្យកូនមានអារម្មណ៍ថា ក្នុងពិភពលោកមួយនេះនៅមានរឿងរ៉ាវជាច្រើនទៀត មិនមែនមានតែភាពអាក្រក់ៗដែលយើងបានឮតាមរយៈព័ត៌មានប៉ុណ្ណោះទេ។

យ៉ាងណាក៏ដោយ ការដែលលោកអ្នកចង់បង្រៀនឱ្យកូនសម្លឹងពិភពលោកក្នុងន័យវិជ្ជមានបាននោះ ឪពុកម្ដាយក៏ត្រូវតែសម្លឹងពិភពលោកក្នុងន័យវិជ្ជមានដូចគ្នា។ អ្វីដែលសំខាន់នោះគឺ បើលោកអ្នកចង់ឱ្យកូនធំឡើងក្លាយជាមនុស្សបែបណា លោកអ្នកក៏ត្រូវធ្វើជាគំរូបែបនោះឱ្យទៅកូន ព្រោះទីបំផុតទៅ រូបកូនហ្នឹងឯងដែលនឹងក្លាយជាផ្ទាំងកញ្ចក់ឆ្លុះបង្ហាញពីរូបពិតប្រាកដរបស់លោកអ្នកចេញមក…។ ដូច្នេះ តើលោកអ្នកចង់ឱ្យកូនធំឡើងក្លាយជាមនុស្សបែបណា??

August 20, 2018

គឹម ឌីណា ចូលរួមជួយស្ត្រីខ្មែរតាមរយៈការនិពន្ធសៀវភៅ “មនុស្សបាក់ទឹកចិត្ត”

បើទោះបីជាបច្ចុប្បន្ននេះ មានការអភិវឌ្ឍខ្លាំងខាងផ្នែកបច្ចេកវិទ្យាក៏ដោយ ក៏ការអានសៀវភៅនៅតែជាចំណូលចិត្តមួយសម្រាប់យុវវ័យជាច្រើននៅកម្ពុជា។ ជាមួយនឹងស្ថានភាពវិជ្ជមាននេះ អ្នកនិពន្ធវ័យក្មេងកម្ពុជាមួយចំនួនដែលបានស្រាវជ្រាវ និងសិក្សាពីរឿងរ៉ាវជីវិតជាក់ស្តែងក្នុងសង្គមបង្កើតឡើងជាអត្ថបទអក្សរសិល្ប៍សំខាន់ៗជាច្រើនដើម្បីបម្រើដល់ការកម្សាន្តរបស់អ្នកអានជាមួយនឹងតម្លៃអប់រំបែបថ្មីដើម្បីជាបទពិសោធក្នុងការអភិវឌ្ឍ ជីវិត។

ក្នុងចំណោមអ្នកនិពន្ធថ្មីៗនៅកម្ពុជា កញ្ញា គឹម ឌីណា ជាអ្នកនិពន្ធស្រ្តីវ័យក្មេងមួយរូប ដែលបាននិពន្ធសៀវភៅប្រលោមលោកដែលទទួលបានការគាំទ្រពីសំណាក់យុវវ័យជាច្រើន ថែមទាំងមានតារាល្បីៗមួយចំនួនផងដែរដែលបានបង្ហាញថាបានគាំទ្រស្នាដៃរបស់អ្នកនិពន្ធរូបនេះ។ នៅថ្ងៃនេះអ្នកសារព័ត៌មាននៃកាសែត ឡារ៉ែន ពាណិជ្ជ បានធ្វើបទសម្ភាសជាមួយកញ្ញា គឹម ឌីណា ពីបទពិសោធសំខាន់ៗនៃការសរសេរសៀវភៅថ្មីមួយ ស្តីពីមនុស្សបាក់ទឹកចិត្ត ដើម្បីជាប្រភពចំណេះដឹងដល់សាធារណជន។

1. កញ្ញាជាអ្នកនិពន្ធប្រលោមលោកដែលធ្លាប់បានបោះពុម្ពផ្សាយពីស្នាដៃរឿងប្រលោមលោកវែងៗរួចមកហើយ តើហេតុអ្វីបានជាកញ្ញាចាប់អារម្មណ៍និពន្ធសៀវភៅរឿងខ្លីពាក់ព័ន្ធនឹងមនុស្សបាក់ទឹកចិត្តនេះឡើង?
មុននឹងចូលដល់ចំណុចសំខាន់ពាក់ព័ន្ធនឹងមូលហេតុមួយចំនួននៃការនិពន្ធសៀវភៅមនុស្សបាក់ទឹកចិត្តនេះ ខ្ញុំចង់រំឭកពីប្រវត្តិនៃការសរសេររឿងខ្លីជាមុនសិនថា ខ្ញុំធ្លាប់បានសរសេរ និងបោះពុម្ពរឿងខ្លីបានចំនួន3រឿងរួចមកហើយជាមួយអ្នកនិពន្ធដទៃទៀត។ ហើយនេះជាលើកទី1ហើយ ដែលខ្ញុំបោះពុម្ពរឿងខ្លីដោយខ្លួនឯង ហើយបញ្ជ្រាបចូលនូវរឿងរ៉ាវបាក់ទឹកចិត្តរបស់ខ្លួន។

ចំពោះកម្លាំងជំរុញដែលធ្វើឱ្យខ្ញុំសរសេរសៀវភៅនេះឡើង គឺក្នុងគោលបំណងដើម្បីលើកទឹកចិត្តស្ត្រីខ្មែរដែលត្រូវប្រឈមបញ្ហាជាច្រើនក្នុងការរស់នៅឱ្យចាប់ផ្តើមមានភាពរឹងមាំ និងយុវជនដទៃទៀតដែលធ្លាក់ក្នុងសភាពបាក់ទឹកចិត្តឱ្យងើបឡើងតស៊ូនឹងបញ្ហា។ “មនុស្សស្រី” ជាពាក្យដែលធ្វើឱ្យខ្ញុំគិតថា ខ្ញុំត្រូវតែតស៊ូក្នុងភាពដែលខ្លួនឯងជាស្រ្តី មិនថាជួបបញ្ហា ឬការកៀបសង្កត់ដោយគំនាបសង្គមណាមួយឡើយ។ រាល់ពេលជួបបញ្ហាលំបាក ខ្ញុំប្រាប់ខ្លួនឯងថា ព្រោះខ្ញុំជាកូនស្រី ទើបខ្ញុំត្រូវតែតស៊ូ។

ខ្ញុំធ្លាប់បានជួបស្ត្រីដែលលាក់ទុកសមត្ថភាព និងទេពកោសល្យនៅពីក្រោយរូបរាងមិនសមសួនរបស់ខ្លួន ស្ត្រីដែលបោះបង់ចោលអ្វីៗទាំងអស់នៅពេលស្នេហាមិនសមប្រកប ស្ត្រីដែលអនុញ្ញាតឱ្យគ្រួសារ ឬអ្នកដទៃសម្រេចចិត្តលើអនាគតរបស់ខ្លួនទាំងដែលស្ត្រីទាំងនោះជាអ្នកប្រឈមដោយផ្ទាល់ទៅលើលទ្ធផលដែលកើតចេញពីការសម្រេចចិត្តរបស់អ្នកដទៃ។ល។ ដូច្នេះ សៀវភៅ “មនុស្សបាក់ទឹកចិត្ត” ហាក់និយាយច្រើនពីបញ្ហារបស់មនុស្សស្រី តែក្នុងន័យលើកទឹកចិត្តឱ្យគាត់គិតវិជ្ជមានក្នុងជីវិត។

រឿងខ្លីក្នុងសៀវភៅនេះ គឺប្រមូលផ្តុំទៅដោយសា្នដៃដែលទទួលបានការគាំទ្រច្រើននៅក្នុងប្លុករបស់ខ្ញុំ ហើយរឿងខ្លះក៏ជារឿងនិពន្ធថ្មីដែរ។

កញ្ញា គឹម ឌីណា មានមតិយោបល់ក្នុងកម្មវិធីមួយ

និយាយដោយស្មោះត្រង់ ខ្ញុំពិតជាស្មានមិនដល់ដូចគ្នាដែលខ្ញុំនឹងបោះពុម្ពសៀវភៅ “មនុស្សបាក់ទឹកចិត្ត” ព្រោះមានការប្រែប្រួលច្រើនដងចំពោះស្នាដៃមួយនេះ។ កាលពីចុងឆ្នាំ2017 ខ្ញុំគិតថានៅឆ្នាំ2018 ខ្ញុំនឹងបោះពុម្ពសៀវភៅរឿងខ្លីដែលមានចំណងជើង “ក្រែមក្រហម” និងរឿងប្រលោមលោកវែង “បវរកញ្ញាប្រលោមលោក”។ តែក្រោយមកដោយសារបញ្ហាថវិកា និងពេលវេលាខ្ញុំសម្រេចថានឹងបោះពុម្ពតែមួយសិន។ ក្រោយមកទៀត ដោយសារជំងឺបាក់ទឹកចិត្តធ្វើឱ្យខ្ញុំសម្រេចថា ឆ្នាំនេះសៀវភៅអ្វីក៏ខ្ញុំនឹងមិនអាចបោះពុម្ពបានដែរ។ លុះស្ថានភាពផ្លូវចិត្តបានធូរស្រាល ខ្ញុំក៏តាំងចិត្តថា ខ្ញុំនឹងបោះពុម្ពសៀវភៅរឿងខ្លីនេះឱ្យខាងតែបាន តែបែរជាបានបោះពុម្ពសៀវភៅរឿងវែង “បវរកញ្ញាប្រលោមលោក” ទៅវិញ។ ខ្ញុំថែមទាំងប្តូរពីចំណងជើងរឿង “ក្រែមក្រហម” ទៅជា “មនុស្សបាក់ទឹកចិត្ត” វិញពីព្រោះការបាក់ទឹក-ចិត្តជាមូលហេតុដែលនាំឱ្យខ្ញុំកាន់តែយល់ច្បាស់ពីអត្ថន័យជីវិត និងស្រឡាញ់ខ្លួនឯងម្តងទៀត។ បើគិតឱ្យមែនទែនទៅ រាល់បញ្ហាដែលខ្ញុំសរសេរនៅក្នុងរឿងនេះ គឺសុទ្ធតែជាមូលហេតុដែលនាំឱ្យមនុស្សបាក់ទឹកចិត្តហើយបើយើងមិនប្រញាប់ដោះស្រាយទេ វានឹងធ្វើឱ្យយើងហ៊ានបោះបង់ចោលជីវិតខ្លួនឯងមិនខាន។ទាំងនេះធ្វើឱ្យខ្ញុំជឿថាអ្វីៗគ្រប់យ៉ាងកើតឡើងសុទ្ធតែមានហេតុផលរបស់វា ហើយហេតុផលនោះនឹងនាំយើងទៅជួបរឿងរ៉ាវដែលកាន់តែល្អជាងអ្វីដែលយើងកំពុងជួបជាក់ជាមិនខាន។ ដូច្នេះកុំអស់សង្ឃឹម!។

2. តើកញ្ញាមើលឃើញថាបញ្ហាបាក់ទឹកចិត្តនេះប៉ះពាល់អ្វីខ្លះដល់យុវវ័យបច្ចុប្បន្ន? ហើយយុវវ័យច្រើនប៉ុនណាកំពុងប្រឈមបញ្ហានេះ?
ជាការពិតណាស់ បញ្ហាបាក់ទឹកចិត្តជាបញ្ហាប្រឈមមួយដែលយុវជនជាច្រើនកំពុងជួបប្រទះ។ ផលប៉ះពាល់ដែលអាចកើតមានសម្រាប់ពួកគាត់គឺ ប៉ះពាល់ដល់ការរៀនសូត្រ ការងារ និងទំនាក់ទំនងរបស់ពួកគាត់។ ជាក់ស្តែងខ្លួនខ្ញុំផ្ទាល់ធ្លាប់មានបញ្ហានេះដែរ ពេលខ្ញុំបាក់ទឹកចិត្តខ្ញុំបានគេចពីមនុស្សម្នាទាំងខាងក្រៅ និងក្នុងបណ្តាញសង្គម ដែលពេលនោះខ្ញុំមិនអាចធ្វើអ្វីកើតទាំងអស់ ហើយសូម្បីតែសរសេររឿងក៏សរសេរមិនចេញដែរ។

ចំពោះតួលេខជាក់ស្តែង ខ្ញុំមិនបានស្រាវជ្រាវរកឃើញពីបញ្ហាបាក់ទឹកចិត្តក្នុងចំណោមយុវវ័យទេ តែខ្ញុំគិតថា យុវវ័យជាទូទៅគួរតែស្វែងយល់ឱ្យបានច្រើនពីជំងឺបាក់ទឹកចិត្ត និងការព្យាបាលជំងឺនេះដើម្បីដោះស្រាយបញ្ហាប្រឈមដែលអាចនឹងកើតមានឡើងក្នុងជីវិត។

3. ដើម្បីសរសេរសៀវភៅនេះឡើង តើកញ្ញាចំណាយពេលវេលាច្រើនប៉ុនណា? ហើយជួបបញ្ហាប្រឈមអ្វីខ្លះមុនពេលសម្រេចបានស្នាដៃនេះ?
ការពិតទៅ ស្នាដៃរឿងខ្លីនេះគឺខ្ញុំរៀបចំរួចតាំងពីដើមឆ្នាំហើយគ្រោងនឹងបោះពុម្ពក្នុងឆ្នាំនេះ។ តែដោយសារភាពបាក់ទឹកចិត្ត ខ្ញុំសម្រេចថាមិនបោះពុម្ពវាវិញ។ រហូតផ្លូវចិត្តបានធូរស្រាល ខ្ញុំក៏ចង់បោះពុម្ពវាម្តងទៀតដោយបញ្ចូលរឿងរ៉ាវនៃការបាក់ទឹកចិត្តរបស់ខ្ញុំទៅក្នុងនោះផង។ ខ្ញុំមិនបានជួបបញ្ហាប្រឈមច្រើនទេក្នុងការសរសេររឿងក្នុងសៀវភៅនេះ ព្រោះរឿងខ្លះខ្ញុំបានសរសេរទុកយូរហើយ តែមិនមានឱកាសបោះពុម្ព ខណៈរឿងខ្លះ គឺជារឿងដែលទទួលបានពីការគាំទ្រនៅលើប្លុក រួចខ្ញុំក៏យកវាមកបោះពុម្ពជាសៀវភៅ។

4. តើចំណុចសំខាន់អ្វីខ្លះដែលកញ្ញានឹងបញ្ចូលទៅក្នុងសៀវភៅ “មនុស្សបាក់ទឹកចិត្ត” នេះ?
ចំណុចដែលខ្ញុំនឹងបញ្ចូលទៅក្នុងសៀវភៅនេះគឺពាក់ព័ន្ធនឹងបញ្ហាមួយចំនួនរបស់ស្ត្រីដូចជា រូបរាងកាយ ការងារ គ្រួសារ ស្នេហា និងការសម្រេចចិត្តជាដើម។ ក្នុងនោះក៏មានបទពិសោធនៃការបាក់ទឹកចិត្ត និងការជួយស្រោចស្រង់ខ្លួនឯងពីការបាក់ទឹកចិត្តផងដែរ។

5. អ្វីខ្លះជាដំណោះស្រាយដែលកញ្ញានឹងបង្ហាញតាមរយៈស្នាដៃនិពន្ធនេះ?
ចំពោះចំណោទលើបញ្ហាខ្លះនៅក្នុងរឿងនេះគឺខ្ញុំបានផ្តល់ជាដំណោះស្រាយដោយផ្អែកទៅលើគំនិត ឬបទពិសោធរបស់ខ្លួន ខណៈចំណោទលើបញ្ហាខ្លះ គឺផ្តល់តួនាទីជូនអ្នកអានជាអ្នកកំណត់។ និយាយជារួម ដំណោះស្រាយទៅលើបញ្ហា គឺចាំបាច់យើងខ្លួនឯងជាអ្នកតាំងចិត្តចង់ដោះស្រាយនឹងរើខ្លួនឱ្យរួចពីវា។ បើទោះជាអ្នកដទៃលើកទឹកចិត្តផ្តល់គំនិត និងជំរុញយ៉ាងណាក៏ដោយ តែបើយើងមិនមានឆន្ទៈក្នុងការជួយខ្លួនឯងនោះ វានឹងក្លាយជារឿងដែលលំបាកបំផុត។

6. តើកញ្ញាបានរំពឹងពីផលវិជ្ជមានអ្វីខ្លះ សម្រាប់មនុស្សគ្រប់គ្នាដែលបានអានសៀវភៅនេះ?
ក្នុងនាមជាអ្នកនិពន្ធ ខ្ញុំសង្ឃឹមថា អ្នកអាននឹងយល់ពីបញ្ហារបស់ស្ត្រី និងចូលរួមចំណែកជាមួយគ្នាក្នុងការដោះស្រាយបញ្ហាស្ត្រី។ ម្យ៉ាងវិញទៀតក៏ចង់ជំរុញពួកគាត់កុំឱ្យបោះបង់ខ្លួនឯង បើទោះបីជាស្ថិតក្នុងបញ្ហាលំបាកយ៉ាងណាក៏ដោយ។

7. តើកញ្ញាមានមតិផ្តាំផ្ញើអ្វីទៅកាន់សាធារណជន ជាពិសេសអ្នកដែលតែងតែគាំទ្រស្នាដៃនិពន្ធរបស់កញ្ញាកន្លងមកដែរឬទេ?
ជាចុងបញ្ចប់ខ្ញុំចង់ថ្លែងអំណរគុណចំពោះអ្នកអានទាំងអស់ដែលបានគាំទ្រស្នាដៃប្រលោមលោករបស់ខ្ញុំកន្លងមក ហើយខ្ញុំសូមលើកទឹកចិត្តថា អ្នកទាំងអស់គ្នាចាំបាច់ត្រូវតែហ៊ានប្រឈមជាមួយបញ្ហារបស់ខ្លួន មិនថាបញ្ហាធំប៉ុនណាក៏ដោយព្រោះពេលខ្លះវាមិនគួរឱ្យខ្លាចដូចយើងគិតនោះទេ។ ដើម្បីទទួលបានគំនិតច្រើនក្នុងការដោះស្រាយបញ្ហា យុវវ័យ និងអ្នកផ្សេងៗទៀតចាំបាច់ត្រូវតែអានឱ្យបានច្រើន និងហ៊ានសរសេរឿងរ៉ាវផ្សេងៗដែលខ្លួនចង់ចែករំលែក៕

August 20, 2018

វ័យក្មេងមែនពិត តែពង្រីក Franchise បានជាង 10សាខា ត្រឹមរយៈពេល 2ឆ្នាំ

ក្នុងយុគសម័យទីផ្សារសេរី ការប្រកួតប្រជែងនៃអាជីវកម្មទាំងឡាយត្រូវបានគេឃើញថា មានលក្ខណៈស្វិតស្វាញ ពុះកញ្ជ្រោល ក្ដៅគគុក និងចេញដំណើរដោយភាពស្វាហាប់ តែមួយរយៈក្រោយមកលទ្ធផលបែរជាបង្ហាញឱ្យឃើញថា អាជីវកម្មមួយចំនួនបង្កើតឡើងមិនទាន់បានប៉ុន្មានផងក៏ត្រូវដួលរលំទៅវិញ តែមួយចំនួនទៀតបានចាក់គ្រឹះយ៉ាងមាំ និងបង្កើតបានសាខាជាច្រើនថែមទៀត នេះដោយ-សារតែម្ចាស់អាជីវកម្មមានចក្ខុវិស័យច្បាស់លាស់ និងគិតបានយ៉ាងត្រឹមត្រូវមុនពេលបង្កើត។

អគ្គនាយិកាក្រុមហ៊ុន T Shop កញ្ញា អ៊ុយ អ៊ែលណា បានមានប្រសាសន៍ថា កាលដើមឡើយក្រុមហ៊ុន T Shop គឺជាហាងបោះពុម្ពស្លាកយីហោលើអាវយឺត និងបោះពុម្ពលើសម្បកវេចខ្ចប់ជាលក្ខណៈគ្រួសារតែប៉ុណ្ណោះ ប៉ុន្តែស្របពេលដែលបច្ចេកវិទ្យាមានការរីកចម្រើនខ្លាំង តម្រូវការនៃការប្រើប្រាស់ទូរស័ព្ទដៃទំនើបៗក៏កាន់តែមានការពេញនិយមនោះ ហាង T Shop ក៏បានអភិវឌ្ឍខ្លួនដោយបែរមកដាក់លក់សាកល្បងនូវគ្រឿងបន្លាស់ គ្រឿងតុបតែង និងផ្តល់សេវាជួសជុលទូរស័ព្ទខ្នាតតូចនៅនឹងផ្ទះផ្ទាល់ខ្លួន និងក្រោយមកដោយសារមានការគាំទ្រខ្លាំងពីអតិថិជនរហូតមកដល់ឆ្នាំ2016 កញ្ញា អ៊ែលណា ក៏បានសម្រេចបើកក្រុមហ៊ុនស្តង់ដារមួយនៅម្ដុំវិទ្យាល័យស៊ីសុវត្ថិ ក្រុងភ្នំពេញ ដោយបាននាំចូលគ្រឿងបន្លាស់ និងសម្ភារតុបតែងលម្អទូរស័ព្ទដ៏សម្បូរបែបពីក្រៅប្រទេសដែលមានដូចជាថៃ ចិនហុងកុង សិង្ហបុរី និងសហរដ្ឋអាមេរិកជាដើម ហើយសម្ភារដែលនាំចូលទាំងនោះ សុទ្ធតែមានគុណភាព និងមានការធានាចំពោះអតិថិជនទៀតផង។

ក្រោយពីបើកហាងទីមួយទទួលបានការគាំទ្រច្រើន កញ្ញា អ៊ែលណា ក៏បានសម្រេចបើកសាខាថែមទៀតនៅលើផ្លូវម៉ៅសេទុង សាខាវិមានឯករាជ្យ សាខាផ្សារ TK Avenueទួលគោក សាខាផ្សារ Eden Garden បឹងកក់ សាខាសន្ធរមុខ សាខាផ្សារដេប៉ូ សាខាសែនសុខ Aeon Mall 2 សាខាច្បារអំពៅ សាខា inbiznest shop សាខាខេត្តបាត់ដំបង សាខាក្រុងកំពង់ចាម និងសាខាក្រុងសួង ខេត្តត្បូងឃ្មុំ ជាដើម ដែលសម្ភារទាំងនោះសុទ្ធតែជាសម្ភារប្រើប្រាស់សម្រាប់ទូរស័ព្ទដៃទាំងអស់ដូចជា ខ្សែសាក memory screen សម្បកទូរស័ព្ទ និងជាពិសេសនោះក្រុមហ៊ុនបាននាំចូលដុំសាកថ្ម(Power Bank)ផ្តាច់មុខលើម៉ាកសញ្ញាទៀតផង ហើយនៅខែកញ្ញាខាងមុខឆាប់ៗនេះ ក្រុមហ៊ុននឹងបើកសាខាខេត្តសៀមរាបមួយទៀត ដើម្បីជួយបំពេញតម្រូវការអតិថិជនក្នុងការជ្រើសរើសទិញសម្ភារដែលមានគុណភាពល្អប្រើប្រាស់បានយូរកាន់តែមានភាពងាយស្រួលឡើង។

កញ្ញា អ៊ែលណា បានអះអាងថែមទៀតថា អ្វីដែលធ្វើឱ្យក្រុមហ៊ុនអាចពង្រីក(Franchise) បានច្រើន និងឆាប់រហ័សដូច្នេះ គឺដោយសារបច្ចេកវិទ្យាមានការរីកម្រើនលឿននៅលើពិភពលោក ធ្វើឱ្យការផលិតសម្ភារអេឡិចត្រូនិកកាន់តែទំនើប និងសម្បូរបែបឡើងដើម្បីបំពេញតម្រូវការប្រើប្រាស់ ជាពិសេសគឺទូរសព្ទដៃទំនើបៗនេះតែម្តង ហើយដោយសារតែមើលឃើញពីតម្រូវការប្រើប្រាស់ដូច្នេះ ទើបក្រុមហ៊ុនសម្រេចនាំចូលសម្ភារដែលមានគុណភាពល្អមកផ្គត់ផ្គង់នៅលើទីផ្សារកម្ពុជានាពេលបច្ចុប្បន្ន។

កញ្ញា អ៊ុយ អ៊ែលណា អគ្គនាយិកាក្រុមហ៊ុន T Shop

តាមពិតទៅហាងលក់សម្ភារតុបតែងលម្អ គ្រឿងបន្លាស់ និងសេវាជួលជុលទូរស័ព្ទបានរីកដុះដាលយ៉ាងខ្លាំងនៅលើទីផ្សារកម្ពុជា មិនថាតែនៅរាជធានីភ្នំពេញ ឬនៅតាមទីប្រជុំជនក្នុងបណ្តាខេត្តផ្សេងៗឡើយ ប៉ុន្តែហាងភាគច្រើន លក់សម្ភារប្រើប្រាស់មិនមានគុណភាព និងមិនមានការធានាលើការប្រើប្រាស់បានយូរទេ ទើបធ្វើឱ្យអតិថិជនមានការខកចិត្ត និងងាកមករកសម្ភារណាដែលមានគុណភាពល្អ និងមានការធានាគុណភាពត្រឹមត្រូវវិញ ទើបធ្វើឱ្យហាង T Shop មានអតិថិជនគាំទ្រច្រើនឡើង។ ការប្រើសម្ភារមិនល្អ មិនមានគុណភាព មិនមែនជាការសន្សំសំចៃនោះទេ ទោះបីវាមានតម្លៃទាបក៏ដោយ ប៉ុន្តែបើយើងប្រើសម្ភារល្អ មានគុណភាព ទើបជាការ-សន្សំសំចៃពិតប្រាកដ ទោះជាយើងចំណាយប្រាក់ច្រើនបន្តិចមែន តែយើងចំណាយប្រាក់តែម្តង ហើយអាចប្រើប្រាស់វត្ថុ ឬសម្ភារមួយនោះបានយូរ ជាជាងទិញរបស់មិនល្អឆាប់ខូចចំណាយប្រាក់ទិញច្រើនលើកច្រើនសា។

ជាការពិតណាស់ ការកែប្រែក្រុមហ៊ុនពីលក្ខណៈគ្រួសារមកជាក្រុមហ៊ុនស្តង់ដារពិតជាមានការលំបាកខ្លាំងណាស់ ពិសេសជួបការលំបាកទៅលើការគ្រប់គ្រងផ្នែករដ្ឋបាល និងផ្លាស់ប្តូរទម្លាប់ធ្វើការរបស់បុគ្គលិកជាដើម ប៉ុន្តែដោយសារតែក្រុមហ៊ុនមានការយកចិត្តទុក ដាក់ពន្យល់ឱ្យពួកគាត់បានយល់អំពីអត្ថប្រយោជន៍នៃក្រុមហ៊ុនស្តង់ដារ រួមទាំងគោលនយោបាយលើកទឹកចិត្តបុគ្គលិក ដូចជាការបញ្ជូនបុគ្គលិកឱ្យទៅរៀនជំនាញបន្ថែម ឱ្យបានកាន់តែច្រើន និងបន្ថែមអត្ថប្រយោជន៍ផ្សេងៗ មានប្រាក់លើកទឹកចិត្តដល់បុគ្គលិកឆ្នើម ប្រាក់លើកទឹកចិត្តប្រចាំឆ្នាំ និងការនាំបុគ្គលិកដើរកម្សាន្តផ្សេងៗបង្កើតជាសាមគ្គីភាពបន្ថែមទៀត ទើបពួកគាត់មានការពេញចិត្តខិតខំជួយអភិវឌ្ឍក្រុមហ៊ុនឱ្យឆ្លងផុតពីលក្ខណៈក្រុមហ៊ុនលក្ខណៈគ្រួសារ មកជាក្រុមហ៊ុនស្តង់ដារដូច្នេះ។

សម្រាប់អ្នកមានប្រាក់ វាមិនមែនជាការលំបាកឡើយប្រសិនបើចង់បង្កើតក្រុមហ៊ុនមានលក្ខណៈស្តង់ដារ ព្រោះមានអតិថិជនស្គាល់ស្រាប់ គ្រាន់តែចំណាយប្រាក់ទិញឈ្មោះឬ (Franchise)ពីក្រៅប្រទេសមកបើកបន្តនៅក្នុងប្រទេសកម្ពុជាជាការស្រេច ប៉ុន្តែសម្រាប់ក្រុមហ៊ុនដែលបង្កើត Franchise លក់ក្នុងស្រុកវិញ ទម្រាំឈរជើងលើទីផ្សារបាន គឺត្រូវឆ្លងកាត់ឧបសគ្គផ្សេងៗជាច្រើន ពោលគឺក្រុមហ៊ុនលក្ខណៈគ្រួសារ ធ្វើអ្វីទៅតាមការនឹកឃើញ មិនមានប្រព័ន្ធគ្រប់គ្រងរដ្ឋបាល ប្រព័ន្ធគ្រប់គ្រងហិរញ្ញវត្ថុ ដែលធ្វើឱ្យក្រុមហ៊ុនមិនសូវមានការរីកលូតលាស់ និងមានការអភិវឌ្ឍយឺត ហើយប្រឈមនឹងការប្រកួតប្រជែងពីក្រុមហ៊ុនស្តង់ដារផ្សេងៗទៀត តែទោះជាយ៉ាងណា កញ្ញា អ៊ែលណា ធ្លាប់បានឆ្លងកាត់ការសិក្សា និងបទពិសោធការងារនៅក្រុមហ៊ុនស្តង់ដារអន្តរជាតិជាច្រើន ដែលធ្វើឱ្យកញ្ញាមានសមត្ថភាពក្នុងការគ្រប់គ្រង និងដឹកនាំក្រុមហ៊ុនរបស់ខ្លួនឱ្យទទួលបានជោគជ័យ។

កញ្ញា អ៊ែលណា កើតនៅអំឡុងឆ្នាំ1988 ក្នុងគ្រួសារដែលមានជីវភាពធូរធារមួយនៅសង្កាត់ទួលទំពូង ក្រុងភ្នំពេញ។ ក្រោយពីគ្រប់អាយុចូលរៀន ឪពុកម្តាយក៏បានបញ្ជូនកុមារី អ៊ែលណា ឱ្យចូលរៀននៅសាលាបឋមសិក្សាទួលទំពូងតាំងពីថ្នាក់ទី1 និងវិទ្យាល័យទួលទំពូងដល់ថ្នាក់ទី12 និងបានប្រឡងជាប់បាក់ឌុបទទួលបាននិទ្ទេសល្អបង្គួរនៅឆ្នាំ2006 រួចក៏បន្តចូលរៀននៅមហាវិទ្យាល័យ ជំនាញ Finance and Banking (ធនាគារ និងហិរញ្ញវត្ថុ) នៅសាកលវិទ្យាល័យន័រតុន។

រៀនមិនទាន់ចប់មហាវិទ្យាល័យផង កញ្ញា អ៊ែលណា បានចូលធ្វើការជាអ្នកប្រឹក្សាផ្នែកលក់ នៅក្រុមហ៊ុន RMA ក្នុងឆ្នាំ2008 រួចផ្លាស់មកធ្វើការជានាយកប្រតិបត្តិផ្នែកលក់នៅធនាគារABA រហូតដល់ឆ្នាំ2012។ ក្រោយមកទៀត ក៏បានផ្លាស់ប្តូរការងារមកធ្វើជាមន្ត្រីឥណទាន នៅធនាគារ FTB ចាប់ពីឆ្នាំ2012 ដល់ឆ្នាំ2014។ ដោយយល់ឃើញថា ខ្លួនមានចំណេះជំនាញ និងបទពិសោធល្មមសមគួរអាចរកស៊ីបានហើយ ក៏បានបើកលក់សាកល្បងគ្រឿងបន្លាស់ និងសម្ភារតុបតែងលម្អទូរស័ព្ទនេះនៅនឹងផ្ទះខ្លួនឯងដើម្បីស្ទង់មើលទីផ្សារ ក៍៏ដូចជាការគាំទ្រពីអតិថិជនដែរ។ នៅពេលដែលមានតម្រូវការទីផ្សារ និងអតិថិជនកាន់តែច្រើនឡើងនោះ ទើបកញ្ញាចាប់ផ្តើមបើកក្រុមហ៊ុនស្តង់ដារដំបូងជាផ្លូវការឡើងនៅអំឡុងឆ្នាំ2016តែម្តង ហើយបានបន្តពង្រីកសាខាជាលក្ខណៈលក់ Franchise បានច្រើនទៀតផងត្រឹមតែរយៈពេលតែ 2ឆ្នាំប៉ុណ្ណោះ។

កញ្ញាបានបន្តថា ទោះបីពង្រីកបានសាខាច្រើនដូច្នេះក៏ដោយ តែកញ្ញាក៏នៅមានមហិច្ឆតាពង្រីកសាខាឱ្យបានកាន់តែច្រើនបន្ថែមទៀត ដូចជានៅក្រុងតាខ្មៅ ក្រុងប៉ោយប៉ែត ខេត្តបន្ទាយមានជ័យ ឬក្រុងបានលុងខេត្តរតនៈគិរីជាដើម ដោយសារសេដ្ឋកិច្ចប្រជាពលរដ្ឋនៅទីនោះកាន់តែមានភាពរីកចម្រើនឡើង ហើយការប្រើសម្ភារ ពិសេសទូរស័ព្ទដៃក៏កាន់តែទំនើបឡើងៗដែរពីមួយឆ្នាំទៅមួយឆ្នាំ៕

August 20, 2018

សាលារាជធានីបន្ថែមចំនួនរថយន្ដក្រុងដើម្បីឆ្លើយតបតម្រូវការធ្វើដំណើររបស់ពលរដ្ឋ

ដើម្បីឆ្លើយតបទៅនឹងកំណើនប្រជាពលរដ្ឋក្នុងការធ្វើដំណើរតាមរថយន្តក្រុងសាធារណៈនោះរដ្ឋបាលរាជធានីភ្នំពេញបានបន្ថែមចំនួនរថយន្តក្រុងរហូតដល់ទៅ 177គ្រឿងបង្កើនខ្សែរត់ចំនួន 8ខ្សែ និងបង្កើនចំណតរហូតដល់ទៅ 623ទីតាំងនៅទូទាំងរាជធានីភ្នំពេញ។ នេះបើតាមការអះអាងរបស់លោក ម៉េត មាសភក្ដី អ្នកនាំពាក្យសាលារាជធានីភ្នំពេញ។

លោក ម៉េត មាសភក្ដី បានលើកឡើងថា បច្ចុប្បន្ននេះរដ្ឋបាលរាជធានីភ្នំពេញបានដាក់ឱ្យដំណើរការសេវាដឹកជញ្ជូនតាមរថយន្តក្រុងសាធារណៈចំនួន 177គ្រឿង ហើយតាមផែនការដែលបានគ្រោងទុក គឺនៅដំណាច់ឆ្នាំ2018 ខាងមុខនេះនឹងដាក់ឱ្យដំណើរការរថយន្តក្រុងរហូតដល់ 237គ្រឿង សម្រាប់ឱ្យប្រជាពលរដ្ឋធ្វើដំណើរ។

យោងតាមរដ្ឋាករស្វយ័តដឹកជញ្ជូនសាធារណៈបានឱ្យដឹងថា រថយន្តក្រុង (City bus)ដែលជាជំនួយរបស់ប្រទេសចិនត្រូវបានដាក់ឱ្យដំណើរការដឹកជញ្ជូនតាមតម្រាយផ្លូវចាស់ជំនួសរថយន្តចាស់ ដែលកំពុងដាក់ជួសជុល។ សង្ឃឹមថា បងប្អូនប្រជាពលរដ្ឋនឹងចូលរួមប្រើប្រាស់សេវាកម្មនេះ ដើម្បីរួមចំណែកក្នុងការកាត់បន្ថយការកកស្ទះចរាចរណ៍ បន្ទាប់ពីសេវាដឹកជញ្ជូនសាធារណៈនេះមានសេវាកាន់តែប្រសើរ សុវត្ថិភាព និងទាន់ពេលវេលា។

ទោះជាយ៉ាងណា មានមតិមួយចំនួនបានផ្តល់នៅក្នុងហ្វេសប៊ុក City bus ដោយបានឱ្យយោបល់ដូច្នេះថា (ផេចរបស់ស្រីរ័ត្ន)៖ ពេលនេះមានប្រជាជនជិះច្រើនណាស់។ តែសូមសំណូមពរដល់បងៗតែកុងឡានបើកបរដោយគោរពច្បាប់ និងកុំប្រជែងគ្នាឱ្យសោះ។ មានឡានក្រុងអាចកាត់បន្ថយការកកស្ទះចរាចរណ៍តាមដងផ្លូវបានច្រើន ព្រោះអ្នកធ្វើដំណើរមួយចំនួនគាត់មិនប្រើមធ្យោបាយខ្លួនឯងដូចជាម៉ូតូ-កង់ទេ ហើយក៏កាត់បន្ថយគ្រោះថ្នាក់ចរាចរណ៍បានច្រើនដែរ និងមិនមានភាពរញ៉េរញ៉ៃតាមដងផ្លូវច្រើនទៀតផង។

(ផេចរបស់កម្សាន្ត)៖ នៅក្នុងប្រទេសជាច្រើនក្រៅពីកម្ពុជាការធ្វើដំណើរភាគច្រើន គឺតាមរថយន្តក្រុង រថភ្លើងម៉េត្រូ ដោយមិនចំណាយ ឬខាតបង់លុយកាក់ច្រើនដូចប្រើរថយន្តផ្ទាល់ខ្លួន ព្រមទាំងកាត់បន្ថយការកកស្ទះចរាចរណ៍ទៀតផង ប្រជាពលរដ្ឋកម្ពុជាយើងបើជិះរថយន្តក្រុងក៏នឹងកាត់បន្ថយចំណាយ និងសន្សំប្រាក់ប្រចាំគ្រួសារបានយ៉ាងល្អប្រសើរមួយផ្នែកដែរ។

ការរីកចម្រើនមួយផ្នែកទៀតនៃវិស័យនេះ គឺគេសង្កេតឃើញមានការប្រើប្រាស់កាតអេឡិចត្រូនិកច្រើនសម្រាប់ធ្វើដំណើរតាមរថយន្តក្រុង។ លោក អ៊ាន សុឃីម អភិបាលរដ្ឋាករស្វយ័តដឹកជញ្ជូនសាធារណៈរថយន្តក្រុងបានថ្លែងថា ប្រព័ន្ធទូទាត់តាមកាតអេឡិចត្រូនិក សម្រាប់អ្នកដំណើរតាមរថយន្តក្រុង គឺមានចំនួន 1,459 ដែលពួកគាត់អាចជិះរថយន្តក្រុងបានចំនួនជាង 5ម៉ឺន 2ពាន់ដង ហើយការប្រើប្រាស់កាតអេឡិចត្រូនិកនេះ គឺវាមានភាពងាយស្រួលសម្រាប់ការគ្រប់គ្រងចំណូល និងទិន្នន័យអតិថិជនផងដែរ។

លោកក៏បានបញ្ជាក់ដែរថា សម្រាប់កាតអ្នកជិះរថយន្តក្រុងមាន 2ប្រភេទ ប្រភេទពណ៌ខៀវ គឺសម្រាប់សិស្ស មនុស្សចាស់ ព្រះសង្ឃ បុគ្គលិករោងចក្រ ជនពិការ និងកុមារតូចកម្ពស់ក្រោម 1ម៉ែត្រ ដែលអាចជិះរថយន្តក្រុងបានចំនួន 180ដងដោយឥតគិតថ្លៃ ដោយកាតមួយលក់ក្នុងតម្លៃតែ 4ពាន់រៀលប៉ុណ្ណោះ។ ចំពោះកាតពណ៌បៃតងវិញ មានតម្លៃ 6ពាន់រៀល និង1ម៉ឺនរៀលសម្រាប់អ្នកដំណើរទូទៅ។

តាមប្រសាសន៍របស់ ឯកឧត្ដម ឃួង ស្រេង អភិបាលរាជធានីភ្នំពេញ បានលើកឡើងថា សេវាកម្មប្រើប្រាស់កាតអេឡិចត្រូនិកសម្រាប់ទូទាត់សាច់ប្រាក់នៅពេលធ្វើដំណើរតាមរថយន្តក្រុងនេះ គឺបង្កភាពងាយស្រួលដល់អ្នកដំណើរ ទាំងភ្ញៀវជាតិ និងអន្តរជាតិ ហើយក៏បញ្ជាក់ឱ្យឃើញកាន់តែច្បាស់ផងដែរពីការរីកចម្រើនផ្នែកសេដ្ឋកិច្ចក្នុងរាជធានីភ្នំពេញ ក៏ដូចជានៅក្នុងប្រទេសកម្ពុជាទាំងមូលដែរ។

គួរបញ្ជាក់ផងដែរថា កាលពីឆ្នាំ2017 កម្ពុជាបានទទួលជំនួយរថយន្ដក្រុង 100គ្រឿងពីរដ្ឋាភិបាលចិន ដែលជាជំនួយឥតសំណងផ្តល់ជូនសាលារាជធានីភ្នំពេញ។ បច្ចុប្បន្នមានរថយន្តក្រុងចំនួន 155 គ្រឿងដែលរត់នៅលើផ្លូវសំខាន់ៗ ចំនួន 8ខ្សែនៅក្នុងក្រុងហើយមានប្រជាពលរដ្ឋប្រើប្រាស់រថយន្ដក្រុងប្រមាណ 2ម៉ឺននាក់រៀងរាល់ថ្ងៃ។

លោក ម៉េត មាសភក្ដី បានឱ្យដឹងដែរថា មិនមែនតែភាគីចិននោះទេដែលបានផ្តល់ជំនួយជារថយន្តក្រុងសាធារណៈ 100គ្រឿងមកកម្ពុជា ក្នុងនោះដែរតាមរយៈទីភ្នាក់ងារ JICA ភាគីជប៉ុននឹងជួយឧបត្តម្ភរថយន្តក្រុងថ្មីៗចំនួន 180គ្រឿងបន្ថែមទៀតដែលនឹងមកដល់កម្ពុជាតាមដំណាក់កាលបន្តបន្ទាប់។ លោកបានបន្តទៀតថា រថយន្តក្រុងទាំង 100គ្រឿងដែលចិនផ្តល់ជូននេះ រួមមាន រថយន្ត 35កៅអីចំនួន60គ្រឿង និងរថយន្ត 27កៅអីចំនួន 38គ្រឿង និងរថយន្តស្ទូចចំនួន 2គ្រឿង។

ការវិវឌ្ឍចុងក្រោយ រថយន្តក្រុងស្វយ័តរបស់សាលាក្រុងបានបំពាក់អុីនធើណិតឱ្យស្របតាមបច្ចេកវិទ្យាបច្ចុប្បន្ន។ សាលារាជធានីភ្នំពេញបានសហការជាមួយក្រុមហ៊ុន Space Media ភ្ជាប់ Cooltel WiFi នៅលើរថយន្តក្រុងទាំងអស់ដើម្បីសម្រួលដល់បងប្អូនប្រជាពលរដ្ឋប្រើប្រាស់ដោយសេរី។ ពលរដ្ឋដែលធ្វើដំណើរតាមរថយន្តក្រុងទាំងអស់នឹងបានទៅដល់គោលដៅដោយសុវត្ថិភាព ប្រកបដោយផាសុកភាព រួមទាំងការប្រើប្រាស់អុីនធើណិតដោយឥតគិតថ្លៃដោយមាន password “ppcitybus”៕

August 20, 2018

កាសែតឡារ៉ែន ពាណិជ្ជ លេខ 138

[easy_media_download url=”https://www.lareine.com.kh/wp-content/uploads/2018/08/LRPN_139-Final-For-Web.pdf” force_dl=”1″]

August 18, 2018

កាដូ 5យ៉ាង ដែលកូនចង់បានពីឪពុកម្ដាយបំផុត

ក្នុងឱកាសពិសេសៗ អ្នកគ្រូ ឆវី ជឿថា អាណាព្យាបាលជាច្រើនប្រហែលជាត្រៀមវត្ថុអនុស្សាវរីយ៍ ឬកាដូសម្រាប់ឱ្យកូនជាទីស្រឡាញ់ខ្លះៗហើយមើលទៅ តែសម្រាប់ផ្ទះណាដែលកំពុងស្វែងរកកាដូដែលត្រូវចិត្តមិនទាន់បាននោះ អ្នកគ្រូ ឆវី សូមណែនាំតែម្ដងទៅចុះថា កាដូកំពូលវិសេស5ប្រអប់ 5យ៉ាងតទៅនេះ ជឿចុះថា កូនៗគ្រប់ផ្ទះនឹងចង់បានយ៉ាងពិតប្រាកដ។ មិនខុសពីកាដូដ៏សែនពេញចិត្តដែលកូនៗធ្លាប់ចង់បាននោះឡើយ ដូច្នេះសូមលោកឪពុកអ្នកម្ដាយនាំគ្នាមកមើលថា កាដូកំពូលវិសេសដែលកូនៗចង់បាននោះ តើលោកអ្នកអាចឱ្យកូនបានឬទេ?

កាដូប្រអប់ទី1 ៈ ឪពុកម្ដាយស្រឡាញ់គ្នា និងបង្ហាញសេចក្ដីស្រឡាញ់នោះឱ្យកូនបានឃើញ
កាដូប្រអប់នេះ អាចធ្វើបានយ៉ាងងាយ គ្រាន់តែឪពុកម្ដាយស្រឡាញ់គ្នា បង្ហាញពីសេចក្ដីស្រឡាញ់ ក្ដីបារម្ភកង្វល់ដែលមានចំពោះគ្នាឱ្យកូនបានឃើញប៉ុណ្ណោះ។ ហេស… មើលទៅដូចជាមិនឃើញមានពាក់ព័ន្ធអីជាមួយកូនៗសោះ តែការពិតវិញ នៅពេលដែលកូនបានទទួលវាហើយកូននឹងមានអារម្មណ៍ល្អ មានសេចក្ដីសុខ មានអារម្មណ៍កក់ក្ដៅ និងមានភាពជឿជាក់នឹងនរខាងផ្លូវចិត្តខ្លាំងសម្បើមណាស់។

កាដូប្រអប់ទី2 ៈ សាងបរិយាកាសសុខសាន្តក្នុងផ្ទះ
កាដូប្រអប់នេះនឹងមកក្នុងរូបបែបនៃការនិយាយស្ដី ការប្រតិបត្តិចំពោះកូនៗ និងចំពោះគ្នាទៅវិញទៅមករបស់សមាជិកគ្រប់គ្នានៅក្នុងផ្ទះក្នុងផ្លូវវិជ្ជមាន។ នៅពេលកូនបានទទួល កូននឹងបានគំរូដ៏ល្អក្នុងការគិត ការនិយាយ ការមើលអ្វីៗជុំវិញខ្លួន បរិយាកាសបែបនេះពេញទៅដោយថាមពលល្អៗ ស្ថិតក្នុងរលកធាតុអាកាសកម្រិតខ្ពស់។ ថាមពលល្អច្បាស់ជានឹងធ្វើឱ្យកើតរឿងល្អៗតាមមក ដូច្នេះ នៅពេលក្នុងផ្ទះយើងពោរពេញទៅដោយបរិយាកាសសុខសាន្ត មិនថាតែយើងចង់អភិវឌ្ឍ ឬឈានដើរទៅទិសខាងណា ក៏មិនពិបាកធ្វើដែរ។ អ្នកគ្រូ ឆវី ធានាថា បរិយាកាសបែបហ្នឹង វាល្អមែនទែន!!។

កាដូប្រអប់ទី3 ៈ ឱ្យសេចក្ដីស្រឡាញ់បែបគ្មានលក្ខខណ្ឌ (Unconditional Love)
ក្មេងៗគ្រប់រូបត្រូវការសេចក្ដីស្រឡាញ់ ហើយប្រភេទរបស់សេចក្ដីស្រឡាញ់ដែលក្មេងៗត្រូវការខ្លាំងបំផុតនោះគឺ សេចក្ដីស្រឡាញ់បែបគ្មានលក្ខខណ្ឌ គ្មានចង់បានអ្វីមកវិញទាំងអស់ មិនថាយ៉ាងណា ក៏ឪពុកម្ដាយនៅតែស្រឡាញ់កូន។ កាដូប្រអប់នេះ នៅពេលកូនបានទទួលហើយកូននឹងមានអារម្មណ៍ថា ខ្លួនឯងជាមនុស្សសំខាន់ជាមនុស្សពិសេស និងកូនមានអារម្មណ៍ថា ខ្លួនឯងមានគុណតម្លៃ។

កាដូប្រអប់ទី4 ៈ ឱ្យពេលវេលាទៅកូន
កាដូប្រអប់នេះ នៅពេលកូនបានទទួល កូននឹងមានអារម្មណ៍ថា ឪពុកម្ដាយស្រឡាញ់រូបគេគេជាមនុស្សសំខាន់សម្រាប់ឪពុកម្ដាយ ឪពុកម្ដាយរៀបលំដាប់ភាពសំខាន់ចំពោះគេមុនអ្វីៗទាំងអស់។ “ក្មេងៗវាស់បរិមាណសេចក្ដីស្រឡាញ់ពីចំនួនពេលវេលាដែលឪពុកម្ដាយមានចំពោះគេ”។

កាដូប្រអប់ទី5 ៈ ឱ្យការទទួលស្គាល់នូវអ្វីដែលជារូបគេ (កូន)
មនុស្សគ្រប់រូបកើតមកមានភាពពិសេស មានឯកលក្ខណៈដោយឡែករបស់ខ្លួនដែលមិនដូចអ្នកណា យើងកើតមកដើម្បីសាងភាពខុសប្លែកពីគ្នា សាងរឿងល្អៗឱ្យពិភពលោកមួយនេះ។ កូនៗយើងក៏ដូចគ្នាដែរ កាដូប្រអប់នេះ យើងឱ្យកូនបានដោយការទទួលស្គាល់នូវបុគ្គលិកលក្ខណៈប្រចាំខ្លួនរបស់កូន ទទួលស្គាល់ថាកូនមានភាពត្រឹមត្រូវ មានរសនិយម មានចំណូលចិត្ត មានចំណាប់អារម្មណ៍ មានក្ដីស្រមៃរបស់ខ្លួនគេ។ ទទួលស្គាល់នូវគំនិតយោបល់ និងអ្វីៗគ្រប់យ៉ាងដែលជារូបគេ។

កាដូ ឬអំណោយ ឬវត្ថុអនុស្សាវរីយ៍ដែលប្រគល់ទៅឱ្យកូន ក្រៅពីការទទួលស្គាល់នូវភាពជារូបគេហើយ ថែមទាំងជាការមិនព្យាយាមផ្លាស់ប្ដូរកូន ឱ្យកូនក្លាយជាអ្វី ឬទៅតាមបែបដែលយើងត្រូវការទៀតផង។ ឧបត្ថម្ភគាំទ្រឱ្យកូនប្រើប្រាស់កាដូប្រអប់នេះឱ្យអស់តម្លៃ ដោយអនុញ្ញាតឱ្យកូននាំយកឯកលក្ខណៈពិសេសដែលមិនដូចអ្នកណារបស់គេមកប្រើឱ្យកើតប្រយោជន៍ចំពោះពិភពលោកមួយនេះ ព្រោះពិភពលោកនាយុគសម័យខាងមុខ មិនត្រូវការមនុស្សដដែលៗដែលធ្វើតាមៗគ្នានោះទេ តែត្រូវការអ្នកដឹកនាំដែលមកសាងភាពខុសប្លែក និងអ្វីដែលថ្មី៕

August 18, 2018

Author: ធឿន មករា