ធឿន មករា - La Reine Media

លោកឧកញ៉ា ចេង ខេង បង្ហាញពីយុទ្ធសាស្រ្តធ្វើការជាមួយធនាគារឱ្យជោគជ័យ

ក្រុមហ៊ុនវាយតម្លៃអចលនទ្រព្យកម្ពុជា ស៊ីភីអិល (CPL) បានប្រារព្ធពិធីចុះហត្ថលេខាជាដៃគូសហប្រតិបត្តិការដោយមានលោកឧកញ៉ា ចេង ខេង ជាអគ្គនាយក និងលោក Ha Trong Khiem អគ្គនាយករង MB Bank ជាតំណាងហត្ថលេខីនៃភាគីទាំង2 ដែលកិច្ចព្រមព្រៀងនេះនឹងបង្កើនការលក់សេវាអចលនទ្រព្យរបស់ អេមប៊ី តាមរយៈស៊ីភីអិល ក្រោយពីបានធ្វើកិច្ចការងារយ៉ាងជិតស្និទ្ធជាមួយគ្នាជាច្រើនឆ្នាំកន្លងមក។

ឧកញ៉ា ចេង ខេង អគ្គនាយកក្រុមហ៊ុនវាយតម្លៃអចលនទ្រព្យកម្ពុជា ស៊ីភីអិល CPLបានមានប្រសាសន៍ថា នេះជាការចុះហត្ថលេខារវាងស៊ីភីអិល (CPL) ជាមួយធនាគារអេមប៊ីជាលក្ខណៈដៃគូមួយបានន័យថា គាត់ប្រើសេវាកម្មផ្តាច់មុខជាមួយស៊ីភីអិលលើ“សេវាកម្មវាយតម្លៃ” ព្រោះស៊ីភីអិលអាចផ្តល់សេវាដែលគាត់ចង់បាន ដែលគាត់ពេញចិត្ត លឿនទាន់ចិត្តដែលយើងព្យាយាមធ្វើកិច្ចការងារនេះទាំងថ្ងៃទាំងយប់ និងបានសម្រេចផលក្នុងមោទនភាព។

លោក Trinh DucCuong នាយកប្រតិបត្តិរបស់ធនាគារ MB បានមានប្រសាសន៍ថា ការលើកកម្ពស់អភិវឌ្ឍន៍លើការវាយតម្លៃអចលនទ្រព្យ គឺជាមធ្យោបាយជំរុញឱ្យមានការអភិវឌ្ឍសេដ្ឋកិច្ច និងផ្តល់អត្ថប្រយោជន៍ដល់ភាគីទាំង2។ ភាពជាដៃគូរបស់យើងត្រូវបានពង្រីកដល់កិច្ចសហប្រតិបត្តិការប្រកបដោយគុណសម្បត្តិក្នុងគោលបំណងបង្កើនការប្រកួតប្រជែង។

លោកឧកញ៉ា ចេង ខេង បានបន្ថែមថា ជាកិត្តិយសរបស់ CPLដែល MB បានជ្រើសរើសធ្វើជាដៃគូក្នុងការធ្វើជំនួញជាមួយគ្នា។ ក្នុងនាមជាអគ្គនាយក ខ្ញុំប្តេជ្ញាចិត្តថានឹងបម្រើសេវាកម្មឱ្យល្អតាមដែលអាចធ្វើបាន តាមតម្លៃការងាររបស់យើងជូនដល់អតិថិជនមុននឹងទទួលបានអត្ថប្រយោជន៍ផ្ទាល់ខ្លួន។ លោកថា “នេះជាការប្តេជ្ញាចិត្តកន្លងមកនូវអ្វីដែលយើងបានធ្វើដោយទទួលបានជោគជ័យ រហូតដល់មានការទទួលស្គាល់ជាលក្ខណៈជាតិ គឺពានរង្វាន់ប្រចាំឆ្នាំ2018 ដែលនេះគឺមិនមែនជារឿងងាយស្រួលនោះទេ គឺដោយសារយើងខំប្រឹងប្រែង យើងខំសព្វគ្រប់បែបយ៉ាងលើបញ្ហាប្រឈមរបស់អតិថិជនទើបយើងមានដូចសព្វថ្ងៃ”។

លោកបញ្ជាក់ថា ការចុះហត្ថលេខានេះ គឺយើងធ្វើការតែលើសេវាវាយតម្លៃទេ ព្រោះធនាគារភាគច្រើនមុននឹងផ្ដល់កម្ចីជូនអតិថិជន គឺគាត់ត្រូវការក្រុមហ៊ុនមួយដែលមានសមត្ថភាពលើកិច្ចការងារដែលគាត់ដាក់មកឱ្យដោយមិនលម្អៀង មិនពុករលួយ។ គឺរឿងនេះហើយដែលយើងត្រូវប្រឹងប្រែងក្នុងនាមជាក្រុមហ៊ុនដែលបម្រើការលើសេវាកម្មដីធ្លីនេះ។ យើងចង់លើកទឹកចិត្តដល់ក្រុមហ៊ុនដទៃទៀតដែលបម្រើសេវាកម្មដីធ្លី គឺដាច់ខាតត្រូវតែប្រឹងប្រឺងធ្វើការងារដោយតម្លាភាព ឱ្យអតិថិជនមានទំនុកចិត្តដូច CPL បានអនុវត្តកន្លងមក និងរហូតមកទល់សព្វថ្ងៃជាសក្ខីភាពស្រាប់។

លោក Ha Trong Khiem និងលោកឧកញ៉ា ចេង ខេង ក្នុងកម្មវិធីចុះហត្ថលេខាមួយ

លោកឧកញ៉ាបានឱ្យដឹងថា មិនត្រឹមតែធនាគារ MB នោះទេដែល CPL បានសហការជាមួយ ជារួមក្រុមហ៊ុនយើងសហការជាមួយធនាគារជាច្រើននៅកម្ពុជាគឺមានធនាគារសឹងតែ 90%ដែលប្រើប្រាស់ CPL ក្នុងការវាយតម្លៃអចលនវត្ថុមុននឹងផ្ដល់កម្ចីហើយក្នុងចំណោមធនាគារទាំងអស់ ក៏មានធនាគារមួយចំនួនបានផ្តាច់មុខឱ្យក្រុមហ៊ុន CPL ដែរ គ្រាន់តែយើងមិនទាន់បានធ្វើពិធីចុះហត្ថលេខាបង្ហាញជាសាធារណៈ។

ជាមួយគ្នានេះដែរ ក្រុមការងារបច្ចេកទេសក៏បានបង្ហាញពីបច្ចេកវិទ្យាដែលសហការីរបស់ CPL ធ្វើការបានយ៉ាងឆាប់រហ័សក្នុងការស្វែងរកទីតាំងដី ទំហំ និងតម្លៃតាមរយៈស្មាតហ្វូន(មិនមែនតាមរយៈGoogle)មិនដល់រយៈពេល 1នាទីផង។

សូមបញ្ជាក់ថា យោងតាមការវាយតម្លៃ គេមើលឃើញថា ក្រុមហ៊ុន CPL អាចទទួលការងារបានតែត្រឹម 200 ទៅ300ករណីប៉ុណ្ណោះក្នុង1ខែ តែដោយសារតែការបង្កើនសមត្ថភាព គេឃើញមានការកើនឡើងខ្លាំងមែនទែន ពីព្រោះ CPLមានបច្ចេកវិទ្យាជួយ និងក្រុមការងារជួយ ទើបអាចកើនឡើងពី300 ទៅ3000ករណី។ ឃើញថាមានលក្ខណៈមួយខុសប្លែកគ្នាមែនទែន និងសង្ឃឹមថា នៅឆ្នាំ2019ខាងមុខយើងនឹងអាចមានសមត្ថភាពសម្រេចបាន 6000ករណីក្នុង1ខែ ទៅតាមផែនការដែលយើងចង់បាន។ នេះបើតាមការបញ្ជាក់ពីលោកឧកញ៉ាចេងខេង។

ចំពោះភាគលាភ វាគឺជាអ្វីដែលយើងចង់បានព្រោះជាតម្រូវការរបស់ក្រុមហ៊ុន។ នេះជាការបញ្ជាក់ប្រាប់ចំពោះអ្នកសារព័ត៌មានរបស់លោកឧកញ៉ាចេង ខេង។ លោកមានប្រសាសន៍ថា និយាយទៅ តម្រូវការមានច្រើន យើងដឹងថា ធនាគារមានច្រើន។ បើតាមការគន់គូរ បើសាខានីមួយៗមានពី3ទៅ4 ក្នុង1ខែ ក៏យើងទទួលបានរាប់រយរាប់ពាន់គម្រោងដែរ។ ក្នុងនាមយើងជាអ្នកបម្រើអតិថិជន យើងត្រូវត្រៀមខ្លួនជានិច្ចដើម្បីរង់ចាំឱកាសមកដល់។ ចៀសវាងនៅពេលដែលឱកាសមកដល់ហើយ តែយើងបែរជាមិនអាចចាប់យកឱកាសនោះបាន ធ្វើឱ្យយើងបាត់បង់ឱកាសដ៏ល្អ។ ដូច្នេះយើងត្រូវតែផ្ចង់ស្មារតី និងកសាងសមត្ថភាពក្រុមរបស់យើងឱ្យខ្លាំង នៅពេលឱកាសមកដល់ យើងអាចចាប់យកបានដោយមិនបាត់បង់។

លោកឧកញ៉ាក៏បានបញ្ជាក់ទៀតថា លើការវាយតម្លៃនេះ CPL បានប្រើប្រាស់បច្ចេកវិទ្យាជួយ ធ្វើឱ្យការងារដំណើរការបានលឿនរហ័ស និងធ្វើបានច្រើនដល់ទៅ 3,000ករណីក្នុង1ខែ ដែលប្រព័ន្ធនេះយើងបានប្រើយូរមកហើយ។ យើងមាន(ដេតា)ច្រើននៅក្នុងប្រព័ន្ធ(System)យើងមិនមែនទើបតែមានថ្ងៃនេះទេ គឺយើងកសាង និងបានធ្វើ 20ឆ្នាំមកហើយ និងមិននឹកស្មានថា យើងមានសមត្ថភាពអាចធ្វើបានបែបនេះផង។ នេះជាមោទនភាពរបស់យើង ហើយអតិថិជនយើងក៏មានមោទនភាពលើកិច្ចការដែលយើងអាចសម្រេចបានដែរ។ នេះជាការខិតខំ និងការផ្តល់តម្លៃដែលក្រុមហ៊ុនយើងខំប្រឹងប្រែងមកទល់សព្វថ្ងៃនេះ។

ទាំងអស់នេះគឺដោយសារតែមានធនាគារច្រើនណាស់ ពេលអតិថិជនមករកគាត់ ហើយគាត់មិនចង់បាត់អតិថិជន ទើបយើងមានកម្មវិធីនេះដើម្បីជួយគាត់។ ឯការបង្ហាញទិន្នន័យ គឺមិនដល់មួយនាទីទេយើងអាចផ្តល់ព័ត៌មានលម្អិតជូនអតិថិជននៅពេលនោះតែម្តង។ នេះជាការទប់ស្កាត់អតិថិជនមិនឱ្យចាកចេញ ហើយធនាគារអាចនឹងយកទិន្នន័យនេះទៅសម្រេចផ្ដល់កម្ចីជូនអតិថិជនបានភា្លមៗតែម្ដង។

ដូច្នេះហើយទើបក្រុមហ៊ុនយើងគិតហើយ គិតទៀត ដើម្បីធ្វើយ៉ាងណាឱ្យអតិថិជនមានទំនុកចិត្ត និងដោយសារយើងមានព័ត៌មានគ្រប់ជ្រុងជ្រោយ ទើបយើងអាចធ្វើកិច្ចការងារនេះបាន។ វាជាការព្រួយបារម្ភដែរនៅពេលដែលយើងមិនអាចបម្រើសេវាកម្មជូនអតិថិជនបាន តែបើយើងគិតមកដល់បច្ចុប្បន្នគឺយើងធ្វើបាន មិនទាំងដល់ 1នាទីផង យើងអាចដឹង និងអាចផ្តល់កម្ចីជូនអតិថិជនដោយមិនមានហានិភ័យ។ នេះបើតាមការបញ្ជាក់របស់លោកឧកញ៉ា។

លោកឧកញ៉ាបានអះអាងទៀតថា អ្វីដែលយើងធ្វើ គឺយើងមានវិជ្ជាជីវៈរបស់យើង ធនាគារគាត់មិនចង់បានហានិភ័យនៅពេលផ្តល់កម្ចី គាត់ផ្តល់កម្ចីដោយទទួលការប្រាក់7 ឬ 9ភាគរយយ៉ាងច្រើន ហើយគាត់ចំណាយលើកិច្ចប្រតិបត្តិការរាប់ពាន់កម្ចី បើខូចមួយ គឺខាតបង់រាប់លានដុល្លារ។ ធនាគារគាត់ត្រូវការដៃគូសហការដែលយល់ពិធីសារច្បាស់លាស់មានព័ត៌មានគ្រប់ជ្រុងជ្រោយ ទើបគាត់ជ្រើសរើសយកធ្វើជាដៃគូ ដូច្នេះហើយការចុះហត្ថលេខាទទួលយកការបម្រើសេវាកម្មផ្តាច់មុខ មិនមែនជារឿងធម្មតាទេ។

លោកឧកញ៉ា ចេង ខេង បានបញ្ជាក់ដោយមោទនភាពថា CPL ត្រូវបានចាត់ទុកជាក្រុមហ៊ុនឈានមុខគេនៅកម្ពុជា តាមរយៈពានរង្វាន់ប្រចាំឆ្នាំ2018 ដែលពីមុនមកក្រុមហ៊ុនដីធ្លី និងអចលនទ្រព្យទាំងអស់តែងចាត់ទុកថាខ្លួនឯងជាអ្នកលេខ1នៅពេលថ្លែងទៅកាន់ប្រព័ន្ធផ្សព្វផ្សាយ តែឥឡូវគាត់លែងហ៊ានហើយ ព្រោះពានរង្វាន់នេះមានការវាយតម្លៃដោយចៅក្រមដែលមានជំនាញលើវិស័យដីធ្លី ផ្តល់ឱ្យយើងមានកិត្តិយស។ ពីមុន យើងអៀនខ្លួនឯងនៅពេលថាយើងជាក្រុមហ៊ុនលេខ1 តែពេលនេះយើងអាចនិយាយយ៉ាងពេញមុខ ពេញមាត់ និងក្នុងមោទនភាព ព្រោះយើងមានភស្តុតាង និងមានការវាយតម្លៃដោយចៅក្រមដែលមានបទពិសោធ។

ទោះជាយ៉ាងណា លោកឧកញ៉ា ចេង ខេង បានថ្លែងមុនពីធីចុះហត្ថលេខា អំពីការប្រកាន់ខ្ជាប់នូវគោលការណ៍ដែលធ្វើឱ្យលោកជោគជ័យក្នុងមុខជំនួញអចលនទ្រព្យជាង 20ឆ្នាំកន្លងមកនេះ។ លោកគ្មានចេះដឹងអ្វីទាំងអស់នៅពេលចាប់ផ្តើមរកស៊ីនៅក្នុងវិស័យដីធ្លីនេះ គឺលោករៀនបណ្តើរ ធ្វើការបណ្តើរ រៀនពីកំហុសមួយ ទៅកំហុសមួយ ពីអតិថិជនម្នាក់ ទៅអតិថិជនម្នាក់ រហូតដល់ទទួលបានបទពិសោធដែលអាចបង្កើតគោលការណ៍ និងដាក់ចេញជារូបមន្តមួយចំនួន ដូចជាធ្វើការងារដោយក្តីស្រឡាញ់ពេញចិត្តលើកិច្ចការងារនេះ ជាពិសេសគឺធ្វើការដោយបេះដូង។

លោកក៏បានថ្លែងទៀតថា ដើម្បីបង្កើតគោលដៅឱ្យសម្រេចបានជោគជ័យ យើងត្រូវបង្កើតផែនការឱ្យបានច្បាស់លាស់។ មុននឹងបង្ហាញព័ត៌មាន ត្រូវសិក្សាពីទីតាំងឱ្យលម្អិត។ បើចង់បានលុយយើងត្រូវដាក់ផែនការជាក់លាក់ និងត្រូវមានទំនាក់ទំនងល្អជាមួយអតិថិជន។ យើងត្រូវគិតពីគុណភាពនៃការបម្រើសេវាកម្ម និងប្រសិទ្ធភាពការងាររបស់យើង កុំមើលឃើញលុយជាធំពេក។ យើងត្រូវរៀនពីកំហុសខ្លួនយើង ហើយចេះទទួលយកការរិះគន់ពីអតិថិជន ដើម្បីកែសម្រួល ច្នៃប្រឌិត ទើបយើងទទួលបានជោគជ័យក្នុងអាជីវកម្ម៕

September 10, 2018

បញ្ឈប់ទម្លាប់ខាំក្រចកដៃភ្លាម បើមិនចង់ឱ្យកើតបញ្ហាទាំងនេះ

ចូរក្រឡេកមកមើលទម្លាប់អាក្រក់របស់អ្នកនិយមខាំក្រចកដៃ។ តើអ្នកដឹងទេថា ក្រចក ជាកន្លែងជ្រកនៃបាក់តេរីជាច្រើនប្រភេទដែលអ្នកមិនអាចមើលឃើញនឹងភ្នែកទទេបាន។ នៅពេលក្រចកដៃមិនស្អាត មិនមានអនាម័យ ងាយប្រឡាក់ប្រលូកជាមួយវត្ថុកខ្វក់ ឬងាយចាប់កាន់វត្ថុនានានោះខណៈដែលអ្នកខាំក្រចកដៃលេង អាចធ្វើឱ្យឆ្លងបាក់តេរីចូលទៅក្នុងមាត់ និងស្បែកបាន ប្រសិនបើមានការដាច់រលាត់ស្បែក។ ការខាំក្រចកដៃមានផលប៉ះពាល់អាក្រក់ចំពោះសុខភាពរបស់អ្នកយ៉ាងខ្លាំង។ ចូរមកមើលផលប៉ះពាល់ដែលកើតឡើងចំពោះសុខភាពដូចខាងក្រោមនេះ។

1. ផលប៉ះពាល់លើស្បែកក្រចក
ទម្លាប់ខាំក្រចកក៏អាចបង្កទៅជាដំបៅបានដែរ ប្រសិនបើអ្នកខាំវាជាញឹកញាប់ជាពិសេសគឺនៅពេលអ្នកខាំរហូតដល់ដាច់សាច់ជុំវិញក្រចក។ នៅពេលអ្នកខាំក្រចក ពពួកបាក់តេរី និងមេរោគតូចៗដទៃទៀត នឹងចូលទៅក្នុងសាច់ក្រចកខាងក្នុងតាមកន្លែងដែលដាច់រលាត់ពីការខាំ បណ្ដាលឱ្យហើម ឈឺចាប់ និងឈានទៅបង្កជាខ្ទុះផងក៏មាន។ នៅពេលស្ថានភាពធ្ងន់ធ្ងរ ទាល់តែវះកាត់បង្ហូរខ្ទុះនោះចេញ ទើបជាសះស្បើយឡើងវិញ។

2. ផលប៉ះពាល់ដល់មាត់
ជំងឺដុះឫសសាច់លើម្រាមដៃ ដែលខ្មែរយើងនិយមហៅថាដុះផ្លែសាច់ បង្កឡើងដោយវីរុសម្យ៉ាងឈ្មោះថា Papillomavirus (HPV) បណ្ដាលមកពីការខាំក្រចកជាប្រចាំ។ការខាំក្រចកដៃមិនត្រឹមតែបង្កជាជំងឺនៅលើម្រាមដៃប៉ុណ្ណោះទេ វាថែមទាំងអាចរីករាលដាលឆ្លងទៅមាត់ បង្កជាជំងឺពងបែកមាត់ថែមទៀតផង។ ជាទូទៅ អ្នកមានជំងឺពងបែកមាត់ តែងគិតថាបណ្ដាលមកពីក្ដៅក្នុង តែធាតុពិតវាបង្កមកពីមេរោគឆ្លងនេះឯង។

3. ផលប៉ះពាល់ដល់ធ្មេញ
ការខាំក្រចកមិនត្រឹមតែអាចបង្កជាជំងឺប៉ុណ្ណោះទេ ប៉ុន្តែវាថែមទាំងបង្កើតជាបញ្ហាដល់ធ្មេញរបស់អ្នកទៀតផង។ ពេលខាំក្រចកញឹកញាប់ ធ្មេញរបស់អ្នកនឹងរំកិលខុសទីតាំង ខូចរូបរាង ឬលែងស្មើជួរជាដើម។ ការខាំក្រចក ធ្វើឱ្យធ្មេញខាងលើ និងខាងក្រោមប៉ះគ្នាញឹកញាប់ និងកកិតគ្នា បណ្ដាលឱ្យសឹករិចរិលហើយចុះខ្សោយប្រសិនបើអ្នកនៅតែមានទម្លាប់ខាំក្រចកញឹកញាប់។

4. ការចម្លងបាក់តេរីបង្ករោគ
ក្រចកដៃ គឺជាកន្លែងដែលប៉ះពាល់ដោយផ្ទាល់ជាមួយមេរោគ និងជាជម្រករបស់មេរោគជាច្រើនប្រភេទ។ នៅពេលអ្នកខាំក្រចក មេរោគទាំងនោះនឹងឆ្លងចូលទៅក្នុងខ្លួនតាមរយៈមាត់ ដែលអាចបង្កជាជំងឺផ្សេងៗ។ ក្រចកមានភាពកខ្វក់ជាងម្រាមដៃដល់ទៅ2ដងឯណោះ ព្រោះវាមានគន្លិកគន្លាក់ច្រើន ដែលជាទីតាំងអាចមេរោគរស់នៅយ៉ាងសុខស្រួល និងពិបាកក្នុងការសម្អាត។

ក្រៅពីនេះ ការខាំក្រចកក៏អាចបង្កផលប៉ះពាល់មួយចំនួនទៀតដូចជា ធ្វើឱ្យអ្នកមានភាពសោកសៅ មានអារម្មណ៍ថាឯកាផ្ដាច់ខ្លួនពីអ្នកដទៃ និងបាត់អស់ភាពរីករាយក្នុងជីវិត។ លើសពីនេះ ការសិក្សាដែលចុះផ្សាយលើគេហទំព័រ Mercola បានបង្ហាញផងដែរថា ការខាំក្រចកថែមទាំងធ្វើឱ្យសុខភាពចុះខ្សោយទៀតផង។ ទាំងនេះគឺជាហេតុផលចម្បង ដែលអ្នកគួរបញ្ឈប់ទម្លាប់អាក្រក់នេះ ព្រោះវានឹងបង្កផលប៉ះពាល់នៅថ្ងៃណាមួយ ប្រសិនបើនៅតែបន្តធ្វើវា៕

September 7, 2018

ប្រទេសអភិវឌ្ឍន៍ចាប់ផ្តើមកែប្រែទីក្រុងឧស្សាហកម្ម ទៅជាតំបន់បៃតង

ពិភពលោកបានឆ្លងកាត់ការធ្វើបដិវត្តន៍ និងវិវឌ្ឍជាច្រើនដំណាក់កាលពីយុគសម័យមួយទៅយុគសម័យមួយរហូតដល់តំបន់ស្ទើរតែទាំងអស់រួមទាំងប្រទេសក្រីក្រផង ក្លាយជាវាលឧស្សាហកម្មទំនើបដើម្បីផ្គត់ផ្គង់ដល់តម្រូវការរបស់មនុស្សទូទាំងពិភពលោក។

ពីដំណាក់កាលមួយទៅដំណាក់កាលមួយការរស់នៅរបស់មនុស្សកាន់តែមានភាពងាយស្រួល តែផលប៉ះពាល់លើធម្មជាតិបានកើតឡើងយ៉ាងឆាប់រហ័ស ស្របពេលដែលតំបន់ព្រៃជាច្រើនបានក្លាយជាវាលកសិកម្មកែច្នៃតំបន់លំនៅឋាន ឬរោងចក្រដែលគាំទ្រដល់ចង្វាក់ផលិតកម្មរបស់ឧស្សាហកម្មធំៗជាដើម។ ធនធានធម្មជាតិជាច្រើនផ្នែកផ្សេងទៀតក៏ត្រូវបានបាត់បង់ដែលធ្វើឱ្យប្រទេសធំៗបង្ខំចិត្តជំរុញឱ្យមានការអភិវឌ្ឍលើការដាំដើមឈើឡើងវិញ និងរៀបចំកិច្ចប្រជុំសំខាន់ៗដើម្បីកាត់បន្ថយការប្រែប្រួលអាកាសធាតុ និងផលប៉ះពាល់អវិជ្ជមានចំពោះធម្មជាតិ។

ដោយសារបញ្ហាទាំងអស់នេះ ប្រទេសអភិវឌ្ឍន៍ដែលមានចំណូលខ្ពស់លើពិភពលោក រួមទាំងតំបន់ដែលមានការរីកលូតលាស់ខ្លាំង ចាប់ផ្តើមងាកមកកែប្រែទីក្រុងរបស់ខ្លួនឱ្យក្លាយជាតំបន់បៃតង បើទោះបីជាផលប៉ះពាល់មិនអាចគ្រប់គ្រងបានទាំងស្រុងក៏ដោយ។ ភាពបៃតងនៅដំណាក់កាលនេះ មិនមែនគិតត្រឹមតែការដាំដើមឈើ ឬបង្កើតពណ៌បៃតងនៅក្នុងទីក្រុងនោះទេ តែក៏ជាការជំរុញឱ្យមានគោលនយោបាយ និងផែនការក្នុងការគ្រប់គ្រងកាកសំណល់ប្លាស្ទិកឱ្យបានល្អការកែច្នៃឡើងវិញនូវសម្ភារប្រើប្រាស់សម្រាប់ប្រជាជន ការសាងសង់សំណង់លំនៅឋាន និងអគារដោយប្រើបច្ចេកវិទ្យាដើម្បីកាត់បន្ថយការប្រើប្រាស់អគ្គិសនី និងការគ្រប់គ្រងប្រព័ន្ធដឹកជញ្ជូនជាដើម។

ប្រទេសធំៗចាប់ផ្តើមលើកទឹកចិត្តឱ្យប្រជាជនរបស់ខ្លួនសន្សំសំចៃការប្រើប្រាស់ចរន្តអគ្គិសនីរួមទាំងថាមពលនានាដើម្បីរក្សាលំនឹងនៃបរិយាកាសនៅក្នុងទីក្រុង។ ជាក់ស្តែងប្រទេសបារាំង ជប៉ុន និងប្រទេសអភិវឌ្ឍន៍ជាច្រើនផ្សេងទៀត លើកទឹកចិត្តឱ្យប្រជាជនជិះរថភ្លើង ឬសេវាដឹកជញ្ជូនសាធារណៈដើម្បីកាត់បន្ថយការប្រើប្រាស់យានយន្តផ្ទាល់ខ្លួន។ ប្រទេសចិនរៀបចំគោលនយោបាយចំណាយថវិកាដល់ប្រជាជនដែលបានដាំដើមឈើក្នុងតំបន់ដែលពួកគេរស់នៅដើម្បីលើកទឹកចិត្តដល់ការរក្សាបរិស្ថាន និងកាត់បន្ថយភាពក្រីក្រស្របពេលដែលប្រទេសនៅអឺរ៉ុបមួយចំនួនថែមទាំងបានផ្តល់ប្រាក់ដល់អ្នកជិះកង់ទៀតផង។

ស្របពេលជាមួយគ្នានេះ គម្រោងស្ថាបត្យកម្មថ្មីៗភាគច្រើនត្រូវបានគេកែច្នៃឱ្យមានពន្លឺព្រះអាទិត្យជំនួសអំពូលភ្លើង ហើយប្រព័ន្ធសន្សំសំចៃជាច្រើនផ្សេងទៀតត្រូវបានគេយកមកប្រើជំនួសឧបករណ៍ចាស់ៗដែលស៊ីភ្លើងខ្លាំង។ ក្រៅពីនេះសំណង់អគារប្រណីតដែលត្រូវបានគេសាងសង់ក្នុងយុគសម័យបច្ចេកវិទ្យាព័ត៌មាននេះ ភាគច្រើនត្រូវបានគេរចនាឱ្យមានពណ៌បៃតង ដោយការប្រើប្រាស់ដើមឈើជាគ្រឿងលម្អ និងជាការរួមចំណែកជួយដល់បរិស្ថានផងដែរ។

យោងតាមរបាយការណ៍ដែលដកស្រង់ដោយវេទិកាសេដ្ឋកិច្ចពិភពលោក បានបង្ហាញថា ទីក្រុងឡុងដ៍ជាកន្លែងដែលមានដើមឈើដល់ទៅ 8លានដើមស្របពេលដែលទីក្រុងមួយនេះនៅតែបន្តដាំដើមឈើបន្ថែមទៀត បើទោះបីជាគម្រោងនេះចំណាយថវិកាជាតិអស់យ៉ាងច្រើនសន្ធឹកសន្ធាប់ក៏ដោយ។

ទីក្រុងដែលសម្បូរទៅដោយបច្ចេកវិទ្យា និងធម្មជាតិមួយនេះបានប្រើប្រាស់ដើមឈើរាប់ម៉ឺនដើមដើម្បីបង្កើតតំបន់ទំនេរឱ្យក្លាយជាឧទ្យានសាធារណៈសម្រាប់ប្រជាជនសម្រាកកម្សាន្ត។

លោកអភិបាលក្រុង Sadiq Khan បានបញ្ជាក់ថាការដាំដើមឈើបន្ថែមត្រូវចំណាយថវិកាប្រមាណ1.9លានដុល្លារសម្រាប់អភិវឌ្ឍតំបន់ព្រៃឈើនៅទីក្រុងឡុងដ៍។ គម្រោងមួយនេះនឹងធ្វើឱ្យមនុស្សចាប់ផ្តើមស្រឡាញ់បរិស្ថានកាន់តែខ្លាំង ហើយរួមគ្នារក្សាតំបន់បៃតង ដើម្បីជំរុញគុណភាពជីវិតឱ្យកាន់តែប្រសើរឡើង។

អ្នកជំនាញបរិស្ថានបានលើកឡើងថា មនុស្សរស់នៅទីក្រុងនឹងងាកមករកធម្មជាតិកាន់តែច្រើនឡើង ហើយពួកគេអាចនឹងជំរុញឱ្យមានស្ថានភាពវិជ្ជមាន បើទោះបីជាមានសញ្ញាណជាច្រើនបញ្ជាក់ថាសកម្មភាពរបស់មនុស្សកំពុងធ្វើឱ្យប៉ះពាល់ដល់ធម្មជាតិក៏ដោយ៕

September 7, 2018

តម្រូវការចេកអំបូងលឿង ធ្វើឱ្យកសិករម្នាក់កាក់កបនឹងរបរបណ្ដុះកូនចេកលក់

អ្នកមានបទពិសោធក្នុងវិស័យកសិកម្ម ផ្នែកដំណាំហូបផ្លែ និងបណ្ដុះពូជដំណាំផ្សេងៗទៀតជាច្រើនមុខដើម្បីផ្គត់ផ្គង់ឱ្យចម្ការនានានៅក្នុងស្រុក បានងាកមកផ្សាំបណ្តុះកូនចេកអំបូងលឿងសម្រាប់លក់ជូនអតិថិជន ខណៈទីផ្សារវិស័យកសិកម្មទំនើបកំពុងមានសម្ទុះកើនឡើងគួរឱ្យកត់សម្គាល់ ឧទាហរណ៍ដូចជាចេកអំបូងលឿងដែលជាផ្លែឈើកំពុងមានតម្រូវការនាំចូលទៅប្រទេសចិនបន្ទាប់ពីមានការចុះហត្ថលេខាលើកិច្ចព្រមព្រៀងនាំចេញរួចមក។

នៅពេលមានតម្រូវការពីក្រុមហ៊ុនចិនដែលមកវិនិយោគបង្កើតកសិដ្ឋានដាំដើមចេកអំបូងលឿងមួយរយៈពេលចុងក្រោយនេះធ្វើឱ្យកូនចេកអំបូងលឿងជិតកន្លះម៉ឺនដើមត្រូវបានលក់ចេញជារៀងរាល់ខែ ដែលមានខែខ្លះលក់ចេញបានលើសពីចំនួននេះទៅទៀត។ នេះបើតាមការប្រាប់អ្នកយកព័ត៌មាននៃកាសែតឡារ៉ែនពាណិជ្ជតាមទូរស័ព្ទពីសំណាក់លោក គួន ឌឿន ជាកសិករនៅស្រុកភ្នំព្រឹក ខេត្តបាត់ដំបង។

ចេកអំបូងលឿងមានប្រភពមកពីប្រទេសឥណ្ឌាត្រូវបានគេបង្កាត់ពូជចែកចាយទៅកាន់ប្រទេសក្នុងតំបន់អាស៊ីអាគ្នេយ៍ រួមមានដូចជាប្រទេសចិនតៃវ៉ាន់ ថៃ វៀតណាម ហ្វ៊ីលីពីន និងកម្ពុជាជាដើម។ នៅកម្ពុជាក្រៅពីកសិដ្ឋានធំ3(ខេត្តរតនគីរី ក្រចេះ កំពត) ដែលបានដាំចេកអំបូងលឿងលើផ្ទៃដីរាប់រយហិកតាហើយនោះ នៅមានកសិករនៅខេត្តកណ្ដាលកំពង់ស្ពឺ កោះកុង ប៉ៃលិន និងខេត្តបាត់ដំបងក៏កំពុងចាប់ផ្ដើមដាំដុះ និងប្រមូលផលផ្គត់ផ្គង់ទីផ្សារក្នុងស្រុកដែរ។ ប៉ុន្តែដំណាំចេកប្រភេទនេះមានតិចតួចនៅឡើយ មិនអាចឆ្លើយតបនឹងតម្រូវការទីផ្សារបានឡើយ ពិសេសការនាំចេញទៅក្រៅប្រទេសខណៈពូជចេកជាច្រើនត្រូវបានកសិករខ្មែរទិញពីប្រទេសថៃមកដាំ តាំងពីឆ្នាំ2015។

លោក គួន ឌឿន បានប្រាប់ឱ្យដឹងថា ក្រោយពីលោកនាំចូលពូជចេកប្រភេទថ្មីមួយនេះពីប្រទេសថៃ លោកកត់សម្គាល់ឃើញថា កសិករក្នុងស្រុកចាប់ផ្តើមសម្លឹងមើលដំណាំប្រភេទថ្មីនេះ និងហ៊ានសាកល្បងដាំ ក៏ដូចជាប្រឹងប្រែងរៀនពីបច្ចេកទេសដាំដុះថ្មីៗផងដែរ ទើបលោកសម្រេចចិត្តចាប់ផ្តើមបណ្តុះកូនចេកប្រភេទថ្មីនេះដោយខ្លួនឯង ខណៈពេលដែលមានក្រុមហ៊ុនចិនមករកទិញកូនចេកយកទៅដាំនៅកសិដ្ឋានរបស់គេ ពេលនោះហើយទើបលោកអាចលក់បានក្នុង 1ខែពី4ពាន់ ទៅ5ពាន់ដើមឯណោះក្នុងតម្លៃ4ពាន់រៀល 1ដើម ខែខ្លះអាចកើនដល់ជាង 6ពាន់ដើមទៀតផង។

កសិកររូបនេះបន្តថា សម្រាប់ដំណាំកូនចេកប្រភេទថ្មីដែលលោកលក់ដាច់ខ្លាំងជារៀងរាល់ខែនេះ អ្នកដាំអាចលក់ផ្លែវាក្នុងតម្លៃខ្ពស់ចាប់ពី 5ពាន់រៀលរហូតដល់ 7ពាន់រៀលក្នុង 1ស្និត ឬលើសពីនេះនៅលើទីផ្សារក្នុងស្រុក ព្រោះវាមានលក្ខណៈពិសេសដាច់ពីគេត្រង់ថា រសជាតិរបស់វាឆ្ងាញ់ ក្រអូបឈ្ងុយ និងផ្អែមជាងចេកប្រភេទដទៃ ហើយអាចលក់បានក្នុងចំនួនច្រើនបើធ្វើការនាំចេញទៅក្រៅប្រទេស។ ចេកអំបូងលឿងបានក្លាយជាដំណាំដែលទទួលបានការចាប់អារម្មណ៍ខ្លាំងក្នុងការដាំដុះ ព្រោះថាដំណាំមួយនេះហុចផលឱ្យលឿន គឺក្រោយពេលដាំត្រឹមតែ8ខែប៉ុណ្ណោះ អាចផ្តល់ផលបានពេញមួយឆ្នាំ និងមានសក្តានុពលទីផ្សារខ្ពស់ និងមានតម្លៃថ្លៃជាងចេកដទៃ។

ចំណែកបច្ចេកទេសនៃការដាំដុះវិញ អ្នកមានបទពិសោធរូបនេះបានឱ្យដឹងថា ក្នុងមួយហិកតាគេអាចបណ្ដុះកូនចេកអំបូងលឿងបានជាង 2,000កូនឯណោះ ហើយអ្នកដាំត្រូវចំណាយលើការរៀបប្រព័ន្ធទឹក និងត្រូវមានការមើលថែទាំយ៉ាងដិតដល់ ដែលអាចនឹងចំណាយច្រើនជាង2,000ដុល្លារ។ សរុបមកក្នុងការដាំចេកអំបូងលឿងយកកូនលក់នេះ ចាប់ពីពេលដាក់ដាំរហូតដល់ពេលប្រមូលផល លោកត្រូវចំណាយខ្ទង់ 5,000ដុល្លារ សម្រាប់ចម្ការថ្មី តែអាចទាញចំណូលមកវិញបានខ្ទង់ពាន់ដុល្លារក្នុងមួយខែ ប្រសិនបើម្ចាស់ចម្ការដាំចំនួនខ្ទង់ពាន់ដើមឡើងទៅដែរ។ កសិកររូបនោះបានបន្ថែមថា សម្រាប់ដំណាំមួយនេះ មានតម្រូវការថែទាំជាពិសេសលើ 3ចំណុចធំៗ ក្នុងនោះរួមមាន ទី1 ការថែទាំ ទី2 ការរៀបចំ និងទី3 ការដឹកជញ្ជូនដែលតម្រូវឱ្យម្ចាស់ចម្ការមានបច្ចេកទេសច្បាស់លាស់ និងស្របតាមស្តង់ដារ ទើបគេទទួលទិញ និងហ៊ានឱ្យតម្លៃថ្លៃ។

ប៉ុន្តែលោក ឌឿន បានថ្លែងពីក្តីព្រួយបារម្ភអំពីការថែទាំដំណាំកូនចេកអំបូងលឿងនេះថា មិនអាចអត់បានឡើយនូវបច្ចេកទេសដាំដុះច្បាស់លាស់របៀបថែទាំកូនចេកឱ្យត្រូវតាមទំហំស្តង់ដារ ក៏ដូចជាការរៀបចំ រហូតដល់ការដឹកជញ្ជូនចេញផងដែរ ដែលបញ្ហាទាំងអស់នេះ ជាអ្វីដែលកសិករយើងមិនអាចបំពេញបាន ដោយសារតែកូនចេកអំបូងមានភាពខុសគ្នាពីដំណាំដទៃទៀត។ កូនចេកអំបូងលឿងចូលចិត្តដីបៀមទឹក និងដីស្មៅ ហើយដីបែបណាក៏អាចដាំបានដែរ តែប្រភេទដីដែលល្អបំផុតសម្រាប់កូនចេកនេះ គឺដីក្រហម និងដីល្បាប់នៅតាមវាលទំនាបដែលអាចស្រូបជីជាតិទៅចិញ្ចឹមដើមបាន៕

September 7, 2018

វិស័យអចលនទ្រព្យខេត្តកណ្តាលកំពុងមានសម្ទុះខ្លាំង

វិស័យអចលនទ្រព្យខេត្តកណ្តាលកំពុងមានសម្ទុះឡើងខ្លាំងគួរឱ្យកត់សម្គាល់នៅរយៈពេលប៉ុន្មានឆ្នាំចុងក្រោយនេះដោយសារភូមិសាស្ត្រដីរបស់ខេត្តមួយនេះមានទីតាំងព័ទ្ធជុំវិញរាជធានីភ្នំពេញដែលជាទីប្រជុំជនធំជាងគេបង្អស់ក្នុងប្រទេសកម្ពុជា។

លោក លឹម ច័ន្ទសុភី ប្រធានមន្ទីររៀបចំដែនដីនគរូបនីយកម្ម សំណង់ និងសុរិយោដីខេត្តកណ្តាលមានប្រសាសន៍ថា ស្របពេលដែលវិស័យអចលនទ្រព្យក្នុងរាជធានីភ្នំពេញមានសម្ទុះកើនឡើងខ្លាំងស្ទើរដល់ចំណុចកំពូលហើយនោះ បានធ្វើឱ្យវិស័យមួយនេះកំពុងហៀរឆ្ពោះទៅខេត្តកណ្តាលតាមរយៈផ្លូវ60 តភ្ជាប់ពីរាជធានីភ្នំពេញមកក្រុងតាខ្មៅ ខេត្តកណ្តាល ហើយមិនថាភាគខាងត្បូង ភាគខាងកើត និងភាគខាងជើងរបស់ខេត្តមួយនេះទេ គឺសុទ្ធតែកំពុងត្រូវប៉ាន់ទាំងអស់។

លោកមានប្រសាសន៍ថា តម្លៃដីដែលឡើងថ្លៃជាងគេស្ថិតក្នុងក្រុងតាខ្មៅកាត់តាមផ្លូវ21B ឆ្ពោះទៅស្រុកស្អាងតែម្តងដោយសារតែរដ្ឋបាលខេត្តបានប្រជុំសម្រេចជាគោលការណ៍កាត់ដីក្នុងឃុំចំនួន4មានដូចជាឃុំស្វាយរលំ ឃុំសិត្បូ ឃុំរកាខ្ពស់ និងឃុំកោះអន្លុងចិនចូលក្នុងភូមិសាស្ត្រទឹកដីក្រុងតាខ្មៅដោយទទួលបានគោលការណ៍ឯកភាពពីក្រសួងរៀបចំដែនដី នគរូបនីយកម្ម និងសំណង់រួចរាល់ហើយ រង់ចាំតែការប្រកាសជាផ្លូវការពីក្រសួងមហាផ្ទៃនៅពេលឆាប់ៗខាងមុខនេះប៉ុណ្ណោះ។ ប្លង់គោលនេះបានរៀបចំជាយុទ្ធសាស្ត្រសម្រាប់ក្រុងតាខ្មៅ និងប្លង់គោលប្រើប្រាស់ដីក្នុងស្រុកកោះធំ-ជ្រៃធំនៅឆមាសទី1 ឆ្នាំ2018 គឺត្រៀមអនុម័តសម្រេចលើប្លង់គោលប្រើប្រាស់ឆ្នាំ2030 របស់គណៈកម្មាធិការរៀបចំដែនដី នគរូបនីយកម្ម និងសំណង់ថ្នាក់ជាតិ។

លោកអះអាងថា នៅពេលមានគម្រោងកាត់ឃុំខាងលើចូលក្នុងភូមិសាស្ត្រក្រុងតាខ្មៅរួចបានធ្វើឱ្យការទិញដីពុះឡូត៍លក់កាន់តែមានសកម្មភាពមមាញឹកឡើងៗ ហើយការសាងសង់សំណង់ក្នុងក្រុងតាខ្មៅក៏មានការកើនឡើងដែរ ពិសេសសំណង់លំនៅឋានសម្រាប់អ្នកមានប្រាក់ចំណូលទាបស្ថិតក្នុងឃុំរកាខ្ពស់បានចាក់ដីខ្សាច់បំពេញរួចរាល់ និងបាន និងកំពុងចាប់ផ្តើមសាងសង់ជាបណ្តើរៗហើយ។ ហើយលោកបានបន្តថា តម្លៃដីនៅក្នុងឃុំទាំង4នេះនឹងកើនឡើងខ្លាំងថែមទៀត ខណៈវិស័យសំណង់ក៏កំពុងហូរចូលទៅចាក់គ្រឹះនៅទីតាំងនោះជាបណ្តើរៗដែរនៅរយៈពេលចុងក្រោយនេះ។

លោក លឹម ច័ន្ទសុភី ប្រធានមន្ទីររៀបចំដែនដីនគរូបនីយកម្ម សំណង់ និងសុរិយោដីខេត្តកណ្តាល

មិនថាតែភាគខាងត្បូងក្រុងតាខ្មៅនោះទេ សូម្បីនៅក្នុងភាគខាងកើតដូចជាស្រុកកៀនស្វាយ ស្រុកល្វាឯមក៏តម្លៃដីមានសម្ទុះកើនឡើងដែរ ខណៈរដ្ឋាភិបាលបាន និងកំពុងសាងសង់ផ្លូវក្រវាត់ក្រុងទី3 តភ្ជាប់ទៅផ្លូវជាតិលេខ1 ត្រង់ចំណុចកំពង់ផែដឹកទំនិញតាមផ្លូវទឹកនៅស្រុកកៀនស្វាយ ដែលនេះជាចលករជំរុញឱ្យដីនៅក្នុងស្រុកកៀនស្វាយមានសម្ទុះកើនឡើងខ្លាំងដែរ ហើយសំណង់លំនៅឋានតូចធំ និងបុរីទំនើបៗក៏កំពុងបែមុខឆ្ពោះទៅស្រុកកៀនស្វាយផងដែរ។ ជាមួយគ្នានេះដែរ នៅពេលដែលរដ្ឋាភិបាលរៀបចំគម្រោងសាងសង់ស្ពានតភ្ជាប់ពីតំបន់ជ្រោយចង្វារឆ្ពោះទៅតំបន់ស្វាយជ្រុំ សាងសង់ស្ពានពីកំពង់ចម្លងមុខសណ្ឋាគារណាហ្គាឆ្ពោះទៅកំពង់ដអរិយក្សត្រ និងស្ពានតភ្ជាប់ពីផ្លូវជាតិលេខ1កំពង់ចម្លងក្តីតាកុយឆ្ពោះទៅកាន់ឃុំសារិកាកែវ ក្នុងស្រុកល្វាឯម បានធ្វើឱ្យស្ពានទាំង 3ខ្សែនេះទៅជួបប្រសព្វគ្នានៅក្នុងស្រុកល្វាឯម ខេត្តកណ្តាលតែមួយ ធ្វើឱ្យតម្លៃដីនៅទីនោះមានសម្ទុះឡើងខ្លាំង ហើយគម្រោងសាងសង់លំនៅឋានលក់នៅតំបន់អរិយក្សត្រ តំបន់ស្វាយជ្រុំរបស់ក្រុមហ៊ុនសាងសង់សំណង់លំនៅឋានលក់បានចូលទៅវិនិយោគជាបន្តបន្ទាប់ដែរ និងថ្មីៗនេះមានក្រុមហ៊ុនសាងសង់លំនៅឋានមួយទៀតទើបតែដាក់ពាក្យស្នើសុំសាងសង់លំនៅឋានលក់នៅទីនោះដែរ។ ចំណែកមន្ទីររៀបចំដែនដីខេត្តក៏បានរៀបចំប្លង់គោលអភិវឌ្ឍន៍ហេដ្ឋារចនាសម្ព័ន្ធផ្សេងៗនៅក្នុងភូមិសាស្ត្រស្រុកល្វាឯមផងដែរ ដើម្បីត្រៀមទុកជាមុន មុនពេលដែលរដ្ឋាភិបាលសាងសង់ស្ពានអភិវឌ្ឍន៍ទៅដល់ទីនោះ។

ងាកទៅទិសខាងលិច និងទិសខាងជើងវិញ ដូចជាតំបន់ភ្នំប្រសិទ្ធិ៍ជាដើម សកម្មភាពពុះដីឡូត៍លក់ក៏កំពុងរីកដុះដាល និងមានសកម្មភាពខ្លាំងហើយដីនៅតាមផ្លូវជាតិលេខ3 ចាប់ពីចំណុចស្ពានកំពង់ទួល ឬស្ពានទំនប់7មករា ឆ្ពោះទៅផ្សារព្រៃទទឹងក្បែរផ្លូវរថភ្លើង ហួសទៅមុខប្រមាណជាង10គីឡូ-ម៉ែត្រទៀត ក៏សកម្មភាពពុះដីឡូត៍កំពុងមមាញឹកដែរ ខណៈដែលរដ្ឋាភិបាលប្រកាសសាងសង់ផ្លូវជាតិលេខ3 ឡើងវិញ ចាប់ពីរង្វង់មូលចោមចៅឆ្ពោះទៅកំពង់ផែទឹកជ្រៅនៅសមុទ្រក្នុងខេត្តកំពត។

យោងតាមរបាយការណ៍របស់មន្ទីររៀបចំដែនដី នគរូបនីយកម្ម សំណង់ និងសុរិយោដីខេត្តកណ្តាលបានបង្ហាញថា នៅឆមាសទី1 ឆ្នាំ2018នេះ មន្ទីរទទួលបានសំណើសុំសាងសង់លំនៅឋានសម្រាប់លក់កម្រិតថ្នាក់ខេត្ត និងក្រសួង ចំនួន 55ច្បាប់ និងបានបញ្ជូនទៅក្រសួងរួចរាល់ហើយដែលមានផ្ទៃដីសរុបចំនួន 879,981.05ម៉ែត្រក្រឡា និងមានទុនវិនិយោគសរុបចំនួន 241,361,000.ដុល្លារ។ ក្នុងនោះមន្ទីរទទួលបានសំណើសាងសង់កម្រិតថ្នាក់ខេត្តចំនួន 22ច្បាប់ដែលមានផ្ទៃដីសរុបចំនួន 27,913.71ម៉ែត្រក្រឡា មានទុនវិនិយោគសរុបចំនួន 7,143,358.80ដុល្លារ និងសមត្ថកិច្ចក្រសួងចំនួន 33ច្បាប់ដែលមានផ្ទៃក្រឡាសរុប 852,067.34ម៉ែត្រក្រឡាដែលមានទុនវិនិយោគ 234,217,642.00ដុល្លារដែលធៀបរយៈពេលដូចគ្នាក្នុងឆ្នាំ2017 មានចំនួន48ច្បាប់ និងមានទំហំដីសរុបចំនួន 312,036.70ម៉ែត្រក្រឡា កើនឡើងប្រមាណជា1.82ដង៕

September 7, 2018

ស្វែងយល់ពីប្រភេទមុន ដែលតែងកើតមានលើស្បែកមុខ

ប្រភេទមុន ដែលតែងកើតមាននៅលើស្បែកមុខរបស់មនុស្សនាសម័យនេះមានដូចជា មុនដែលកើតពីប្រតិកម្ម មុនដែលកើតពីការប្រែប្រួលអ័រម៉ូនមុនកប់ក្នុងសាច់ មុនធំ មុនធម្មតា សូមតាមដានលម្អិតជាមួយនឹងប្រភេទនៃមុនដូចតទៅ៖

ប្រភេទមុន
**មុនមិនប្រតិកម្មមានដូចជា ៖
– មុនក្បាលបើក
– មុនអង្កាម
– មុនក្បាលខ្មៅ
-មុនក្បាលបិទ
– មុនក្បាលស

**មុនកើតពីការប្រតិកម្មមានដូចជា ៖
– មុនប្រតិកម្ម
– មុនក្បាលខ្ទុះ
– មុនក្បាលដំរី
– មុនខ្ទុះគ្រាប់ធំ។ល។

ដំណើរនៃការកកើតមុន
នៅតាមបរិវេណរបស់រន្ធរោមនៅលើស្បែកមុខរបស់មនុស្សយើងនេះហើយ ជាមូលហេតុសំខាន់ដែលធ្វើឱ្យកើតមុន។ ក្រពេញខ្លាញ់ (Sebaceous Gland) បរិវេណរន្ធរោម មានតួនាទីកសាងខ្លាញ់ (Sebum) ប្រឆាំងនឹងស្បែកមុខ ដែលធ្វើឱ្យស្បែកមិនស្ងួត និងមានភាពរលើបរលោង។ Sebum បន្សំដោយ Triglyceride, Ester, Wax និងសារធាតុផ្សេងៗទៀត។ នៅពេលខ្លះវាបានបញ្ចេញជាតិខ្លាញ់ច្រើនជ្រុល ធ្វើឱ្យកកកុញនៅបរិវេណក្បែរៗរន្ធរោម និងកើតមានប្រតិកម្មបង្កឱ្យកើតជាមុន ដែលហៅថា ម៉ៃក្រូខូមីឌុន (Microcomedone) ដែលជាមូលហេតុនៃការកើតមុននៅលើស្បែក។ Microcomedone អាចនឹងបាត់ទៅវិញដោយខ្លួនឯង ឬវិវត្តទៅជាមុនតាមបែបផ្សេងៗគ្នាទៅតាមកត្ដារួមបញ្ចូល។ ប្រសិនបើមានការលាយឡំរបស់ជាតិខ្លាញ់ និងកោសិកាស្បែកចាស់(ក្អែល)នឹងធ្វើឱ្យកើតមុននៅក្នុងសាច់ជាដើម៕

September 6, 2018

វិធីការពារ និងព្យាបាលមុន

វិធីការពារងាយៗគឺ ការកម្ចាត់បញ្ហាដែលបង្កឱ្យកើតមុន និងមិនធ្វើឱ្យឡើងខ្លាញ់មុខ តាមចំណុចណែនាំដូចខាងក្រោមនេះ ៖

1. គេងឱ្យបានគ្រប់គ្រាន់ : ការគេងមិនគ្រប់គ្រាន់ អាចជាមូលហេតុបណ្ដាលឱ្យកើតមុនដូចគ្នា ដោយសារតែរាងកាយរបស់យើងទន់ខ្សោយ និងអស់កម្លាំង។

2. ធ្វើអារម្មណ៍ឱ្យរីករាយ : អារម្មណ៍រីករាយស្រស់ស្រាយ ធ្វើឱ្យអ្នកមានសេចក្ដីសុខចៀសផុតពីភាពតានតឹង ដែលជាមូលហេតុបណ្ដាលឱ្យកើតមុន។

3. ទទួលទានអាហារបន្លែច្រើន : ការដែលអ្នកទទួលទានអាហារបន្លែ នឹងធ្វើឱ្យអ្នកលាងជាតិពុលចេញពីរាងកាយបានយ៉ាងល្អ និងផ្តល់វីតាមីនផ្សេងៗដល់រាងកាយរបស់អ្នកជាច្រើនព្រមទាំងជួយឱ្យរាងកាយរបស់អ្នករឹងមាំឡើង។

4. ទទួលទានអាហារដែលមានសារធាតុខ្លាញ់សមល្មម : ប្រសិនបើអ្នកទទួលទានអាហារដែលមានសារធាតុខ្លាញ់ច្រើនពេក អាចនឹងបណ្ដាលឱ្យមានជាតិខ្លាញ់ក្នុងរាងកាយច្រើនដែលជាមូលហេតុមួយទៀតនៃការកើតមុន។

5. លាងមុខឱ្យបានស្អាត : ការលាងមុខឱ្យស្អាត ធ្វើឱ្យមុខរបស់អ្នកស្អាត មិនកខ្វក់ដែលវាជាវិធីការពារមួយទៀត តែគប្បីប្រយ័ត្នបន្ដិច មិនគួរលាងមុខញឹកញាប់ពេកនោះទេព្រោះបណ្ដាលឱ្យស្បែកមុខរបស់អ្នកស្ដើង និងខូច។ ការលាងមុខ គួរលាងត្រឹមតែ2ដងនៅក្នុងមួយថ្ងៃ គឺនៅពេលព្រឹក និងពេលល្ងាច និងនៅក្នុងអំឡុងពេលលេងកីឡារួច ពេលហាត់ប្រាណរួច ឬអំឡុងពេលណាដែលអ្នកគិតថាផ្ទៃមុខរបស់អ្នកកខ្វក់ខ្លាំង។ អ្នកអាចលាងមុខបានតាមតម្រូវការ ជាមួយប្រភេទសាប៊ូដែលមិនកាត់ស្បែកមុខ មិនគួរញីដុសស្បែកមុខជាមួយសាប៊ូខ្លាំងៗពេកនោះទេ អ្នកត្រូវលាងមុខយ៉ាងថ្នមៗ។ អ្នកត្រូវលាងមុខ ចាប់ពីផ្នែកខាងក្រោមដេញទៅដល់ថ្ងាស និងស្នៀតផ្កា។ បន្ទាប់ពីដុសមុខនឹងសាប៊ូរួច អ្នកត្រូវលាងសម្អាតសាប៊ូចេញឱ្យអស់ពីផ្ទៃមុខផង។ មិនត្រូវប្រើឡេ ឬ Astringent ជូតស្បែកមុខរបស់អ្នកនោះទេលើកលែងតែមុខរបស់អ្នកមានខ្លាញ់ច្រើនតែប៉ុណ្ណោះ។ ហើយអ្នកគួរកក់សក់យ៉ាងខ្ជាប់ខ្ជួនផងដែរ ចំពោះអ្នកដែលមានសក់ក្រាស់ អ្នកគួរ កក់សក់ជារៀងរាល់ថ្ងៃ ដើម្បីការពារមេរោគចម្លងមកផ្ទៃមុខរបស់អ្នក ដែលអាចបណ្តាលឱ្យកើតមុនបាន។

6. ប្រើក្រដាសផ្ដិតខ្លាញ់ពីផ្ទៃមុខ : ប្រសិនបើមុខរបស់អ្នកមានខ្លាញ់ច្រើនពេកនោះ សូមសាកល្បងប្រើក្រដាសផ្ដិតខ្លាញ់ចេញពីផ្ទៃមុខរបស់អ្នក ក៏ជាវិធីការពារមួយដែរ។ អ្នកត្រូវផ្ដិត ឬជូតល្មមៗបានហើយ មិនគួរជូតពេញមួយថ្ងៃនោះទេ។

7. ចៀសវាងការប៉ះពាល់មុខ : ផ្ដោតអារម្មណ៍ជាមួយមុខឱ្យបានតិចតួចបំផុត ព្រោះដៃរបស់អ្នកទាំងកខ្វក់ ទាំងមានបាក់តេរី ដែលជាមូលហេតុធ្វើឱ្យកើតមុន។

8. ប្រើថ្នាំបំបាត់មុន : ប្រើប្រាស់ថ្នាំ ដើម្បីជួយបំបាត់បញ្ហាមុននៅលើផ្ទៃមុខរបស់អ្នក៕

September 6, 2018

ក្រោយប្រឡងបាក់ឌុប ត្រូវធ្វើអ្វីខ្លះ ដើម្បីកុំឱ្យលំបាកក្រោយឃើញលទ្ធផល?

ក្រោយប្រឡងមធ្យមសិក្សាទុតិយភូមិហើយភ្លាម ជាពេលដែលមានសេចក្តីសុខខ្លាំងបំផុតសម្រាប់បេក្ខជនប្រឡងទាំងអស់ ព្រោះវាជាពេលវេលាដែលបានដកបន្លាចេញពីទ្រូង និងជាពេលត្រូវសម្រាកសងសម្រាប់ការនឿយហត់ដែលបានខិតខំប្រឹងប្រែងអស់រយៈពេលជាយូរខែដើម្បីត្រៀមរង់ចាំដល់ថ្ងៃប្រឡង។ តែទោះជាយ៉ាងនេះក្តី សិស្សមិនគួរសប្បាយភ្លេចខ្លួននោះទេ ព្រោះវាគ្រាន់តែជាដំណាក់កាលចាប់ផ្តើមតែប៉ុណ្ណោះសម្រាប់ការប្រយុទ្ធក្នុងសមរភូមិអប់រំដើម្បីអនាគត។

លោក ស៊ិន បញ្ញាវុឌ្ឍី សាស្ត្រាចារ្យសេដ្ឋកិច្ច បានលើកឡើងថា យុវជនដែលទើបតែប្រឡងបាក់ឌុបហើយចាំបាច់ត្រូវត្រៀមចិត្តត្រៀមកាយឱ្យបានល្អបើទោះបីជាមិនទាន់ដឹងថាធ្លាក់ ឬជាប់ក៏ដោយ។ អ្វីដែលពួកគាត់អាចធ្វើបានគឺព្យាយាមស្វែងយល់ពីខ្លួនឯងថា តើគាត់ចង់សិក្សាជំនាញអ្វីបន្តទៀតនៅថ្ងៃអនាគត ហើយអាជីពរបស់គាត់ត្រូវនឹងមុខវិជ្ជាវិទ្យាសាស្រ្តពិត ឬវិទ្យាសាស្រ្តសង្គម។ ដំណាក់កាលនេះប្រសិនបើគាត់អាចដឹងពីគោលដៅច្បាស់លាស់ហើយ គាត់អាចចំណាយពេលវេលាដើម្បីស្រាវជ្រាវឱ្យដឹងថា អាជីពដែលគាត់ស្រឡាញ់នោះគេធ្វើអ្វីពិតប្រាកដ ហើយត្រូវនឹងចំណង់ចំណូលចិត្តពីកំណើតរបស់គាត់ដែរឬទេ កុំឱ្យក្រោយពីដឹងលទ្ធផល និងចុះឈ្មោះចូលរៀនយោងតាមរបាយការណ៍ ហើយទើបដឹងថាខ្លួនមិនពេញចិត្តជំនាញនោះ។ ម្យ៉ាងវិញទៀតសិស្សម្នាក់ៗត្រូវចាំបាច់សិក្សា ផងដែរពីមធ្យោបាយដើម្បីសម្រេចក្តីស្រមៃនោះ ទាំងថវិកា និងការត្រៀមខ្លួនផ្សេងទៀត។

លោកសាស្ត្រាចារ្យ ស៊ិន បញ្ញាវុឌ្ឍី បាននិយាយថា៖ “មធ្យោបាយដែលអាចជំរុញឱ្យយុវជនសម្រេចក្តីស្រមៃរបស់ខ្លួនបាន គឺទី1 ត្រូវគិតពីមូលដ្ឋានគ្រឹះនៃចំណេះដឹងដែលខ្លួនគាត់មានជាមុនសិន។ ប្រសិនបើគាត់ស្រឡាញ់ពេទ្យ ឬវិស្វករ តើគាត់មានចំណេះដឹងគ្រឹះអ្វីខ្លះដែលអាចជួយគាត់ឱ្យសិក្សាបានដោយជោគជ័យ និងទទួលបានការងារល្អ។ ចំណុចទី2 គឺមធ្យោបាយជាថវិកា ថាតើអាជីពដែលគាត់ចង់រៀននេះគាត់មានលទ្ធភាពគ្រប់គ្រាន់ដែរឬទេ ហើយត្រូវធ្វើអ្វីបន្តទៀតដើម្បីដោះស្រាយបញ្ហាទាំងអស់នេះ”។

អ្នកជំនាញអប់រំខាងលើបានលើកឡើងផងដែរថា សិស្សក៏អាចចំណាយពេលវេលាទំនេរនេះមកសិក្សាពីទីផ្សារការងារបច្ចុប្បន្ន និងអនាគតផងដែរ ដើម្បីឱ្យដឹងច្បាស់ថាជំនាញណាខ្លះដែលអាចជួយគាត់ឱ្យបំពេញទាំងក្តីស្រឡាញ់ផ្ទាល់ខ្លួន និងមានទីផ្សារទូលាយ ហើយអាចជួយសង្គមបានល្អ។ ហើយជំនាញណាខ្លះដែលអាចធ្វើឱ្យគាត់ខាតបង់ព្រោះមនុស្សម្នាក់ៗមានក្តីស្រឡាញ់ច្រើន ហេតុនេះនៅពេលគាត់ដឹងពីអាជីពក្នុងក្តីស្រឡាញ់ហើយ គាត់ចាំបាច់ត្រូវចេះជ្រើសរើសយកអាជីពល្អបំផុតមួយក្នុងចំណោមអាជីពទាំងអស់នោះដើម្បីបន្តដំណើរប្រកបដោយការអភិវឌ្ឍខ្ពស់។

លោក មាំ វិបុល ស្ថាបនិកកម្មវិធី Millionaire Idea ដែលជាកម្មវិធីស្រាវជ្រាវ និងអប់រំយុវជននៅកម្ពុជា បានលើកឡើងថា ដំណាក់កាលក្រោយប្រឡងមធ្យមសិក្សាទុតិយភូមិនេះ យុវជនគួរត្រៀមទាំងអស់ទាំងអ្នកសង្ឃឹមច្រើន និងអ្នកមិនសូវសង្ឃឹមថាខ្លួនឯងជាប់។ សម្រាប់អ្នកសង្ឃឹមច្រើនថា ខ្លួនឯងប្រឡងជាប់ គាត់អាចសប្បាយចិត្ត តែសូមកុំសប្បាយចិត្តជ្រុល ព្រោះនៅមានរឿងច្រើនណាស់ដែលត្រូវធ្វើបន្តបន្ទាប់ទៀត។ ហើយសម្រាប់អ្នកមិនសង្ឃឹមថាជាប់ក៏កុំអស់សង្ឃឹម ព្រោះវាជាដំណាក់កាលបើកទំព័រថ្មីមួយនៃជីវិតដូចគ្នា ហេតុនេះកុំបារម្ភខ្លាំងពេក ពេលខ្លះអ្នកធ្លាក់ក៏អាចមានលទ្ធផលល្អជាងអ្នកជាប់ដែរប្រសិនបើយើងប្រើភាពឈឺចាប់នេះដើម្បីជំរុញខ្លួនឯងឱ្យខិតខំប្រឹងប្រែងខ្លាំងឡើង។

លោក មាំ វិបុល បាននិយាយថា៖ “អ្នកជាប់រៀនចប់ក៏ត្រូវរកការងារធ្វើ ហើយអ្នកធ្លាក់ក៏ត្រូវរកការងារធ្វើដូចគ្នាដែរ។ ហេតុនេះកុំអស់សង្ឃឹម អ្នកធ្លាក់អាចយឺតជាងគេបន្តិច តែក៏អាចល្អដែរប្រសិនបើគាត់ពិតជាខិតខំមិនបោះបង់ ព្រោះអ្នកជ្រើសរើសបុគ្គលិកគេមិនរើសអើងថា អ្នកធ្លាប់ធ្លាក់បាក់ឌុបគេមិនយកនោះទេ អ្វីដែលគេមើលពិតប្រាកដ គឺសមត្ថភាពធ្វើការងារជាក់ស្តែង ហេតុនេះយើងនៅតែអាចប្រកួតប្រជែងបាននៅថ្ងៃក្រោយ”។

ក្រៅពីការតាំងចិត្តនេះ លោកវិបុល បានបញ្ជាក់ផងដែរថា យុវជនអាចស្វែងរករៀមច្បងដែលធ្លាប់មានបទពិសោធច្រើនក្នុងការសិក្សា ទាំងអ្នកជោគជ័យខ្លាំងលើការងារសិក្សា និងអ្នកជោគជ័យខ្លាំងលើការងារតែធ្លាប់ឈឺចាប់ក្នុងការសិក្សា។ នៅពេលដែលយើងជួបជជែកជាមួយពួកគាត់ យើងនឹងអាចទទួលបានបទពិសោធច្រើនក្នុងការដាស់តឿនខ្លួនឯងឱ្យខិតខំប្រឹងប្រែងជម្នះឧបសគ្គជាច្រើនផ្សេងទៀត ក្នុងការសិក្សានៅកម្រិតមហាវិទ្យាល័យ។ ម្យ៉ាងវិញទៀត បទពិសោធជីវិតទាំងអស់នេះក៏អាចជួយយុវជនឱ្យដើរលឿនជាងអ្នកដទៃផ្សេងទៀតដែលមិនបានត្រៀម ហើយវាក៏ជាចំណុចចាប់ផ្តើមដ៏ល្អក្នុងការពង្រឹងគុណភាពខ្លួនឯងដើម្បីប្រកួតប្រជែងក្នុងទីផ្សារការងារផងដែរ៕

September 6, 2018

ការបន្ថែមជើងហោះហើរចិនមកកម្ពុជានឹងជួយជំរុញពាណិជ្ជកម្មកាន់តែប្រសើរឡើង

ដើម្បីទាក់ទាញភ្ញៀវទេសចរក៏ដូចជាជំរុញវិស័យពាណិជ្ជកម្មឱ្យកាន់តែមានភាពប្រសើរឡើងដែរនោះ កម្ពុជាបានអនុញ្ញាតឱ្យក្រុមហ៊ុនអាកាសចរណ៍ចិនថ្មីមួយទៀតធ្វើការហោះហើរត្រង់ទៅ-មកពីទីក្រុងប៉េកាំង ប្រទេសចិន មកកាន់ទីក្រុងភ្នំពេញ ប្រទេសកម្ពុជានៅដើមខែវិច្ឆិកា ចុងឆ្នាំ2018 ខាងមុខនេះ។

ប្រតិភូតំណាងក្រុមហ៊ុនអាកាសចរណ៍ជាតិនៃសាធារណរដ្ឋប្រជាមានិតចិន (Air China) បានឱ្យដឹងថា ក្រុមហ៊ុនអាកាសចរណ៍ Air China នឹងធ្វើការហោះហើរត្រង់ផ្ទាល់ពីរដ្ឋធានីប៉េកាំង ប្រទេសចិនមកកាន់រាជធានីភ្នំពេញ ប្រទេសកម្ពុជា ជាគោលនយោបាយពង្រឹងការលើកកម្ពស់ការតភ្ជាប់ការហោះហើរដើម្បីឆ្លើយតបទៅនឹងទំនាក់ទំនងដ៏ល្អរវាងប្រទេសទាំងពីរ និងដើម្បីផ្តល់ភាពងាយស្រួលកាន់តែប្រសើរឡើងដល់ភ្ញៀវទេសចរ និងជំរុញកំណើនសេដ្ឋកិច្ចពាណិជ្ជកម្មរបស់ប្រទេសទាំងពីរឱ្យកាន់តែរឹងមាំឡើងថែមទៀត។

ឯកឧត្តមនាយឧត្តមសេនីយ៍បណ្ឌិត ម៉ៅ ហាវណ្ណាល់ រដ្ឋលេខាធិការនៃរដ្ឋលេខាធិការដ្ឋានអាកាសចរស៊ីវិល បានមានប្រសាសន៍ថា ក្នុងនាមថ្នាក់ដឹកនាំរបស់រដ្ឋលេខាធិការដ្ឋានអាកាសចរស៊ីវិល ឯកឧត្តមថ្លែងគាំទ្រដល់ក្រុមហ៊ុនអាកាសចរណ៍ជាតិនៃសាធារណរដ្ឋប្រជាមានិតចិន ហើយថា អាកាសចរស៊ីវិលកម្ពុជានឹងជួយសម្រួលបែបបទ និងបច្ចេកទេសនានា ធ្វើយ៉ាងណាឱ្យមានការហោះហើរត្រង់មកតាមពេលវេលាដែលបានគ្រោងទុក គឺការហោះហើរនឹងចាប់ផ្តើមនៅថ្ងៃទី1 ខែវិច្ឆិកា ឆ្នាំ2018 ដោយប្រើយន្តហោះប្រភេទ Airbus 320 ហោះហើរ 3ជើងក្នុងមួយសប្តាហ៍។

ឯកឧត្តមបណ្ឌិត ម៉ៅ ហាវណ្ណាល់ ជួបជាមួយអ្នកតំណាងក្រុមហ៊ុន Air China

ឯកឧត្តមបានបញ្ជាក់ថា តាមរយៈការហោះហើរត្រង់រវាងរដ្ឋធានីប៉េកាំង និងរាជធានីភ្នំពេញនេះ នឹងជំរុញនូវចំណងមិត្តភាពប្រទេសទាំង2 ឱ្យកាន់តែជិតស្និទ្ធ កំណើនអ្នកដំណើរតាមផ្លូវអាកាសកាន់តែច្រើនឡើង និងមានការផ្លាស់ប្តូរពាណិជ្ចកម្មរវាងប្រទេសទាំង2កាន់តែល្អប្រសើរឡើងមួយកម្រិតទៀត។

ឯកឧត្តម ស៊ិន ចាន់សេរីវុត្ថា អ្នកនាំពាក្យនៃរដ្ឋលេខាធិការដ្ឋានអាកាសចរស៊ីវិលមានប្រសាសន៍ថា កម្ពុជាមិនមានច្បាប់ ឬគោលនយោបាយហាមឃាត់ប្រទេសណាមួយ មិនឱ្យហោះហើរត្រង់ទៅ-មកនោះទេ គឺអាស្រ័យទៅលើកិច្ចព្រមព្រៀងសេវាកម្មរវាងប្រទេសទាំង2 ពិសេសតម្រូវការផ្នែកសេដ្ឋកិច្ច និងពាណិជ្ជកម្ម។

លោកមានប្រសាសន៍ថា មកទល់បច្ចុប្បន្ន មានក្រុមហ៊ុនអាកាសចរណ៍ចិនចំនួន11 ហើយ ដែលហោះហើរត្រង់ទៅ-មកជាមួយប្រទេសកម្ពុជា ខណៈកម្ពុជាមានជើងហោះហើររបស់ក្រុមហ៊ុនតែ4 ប៉ុណ្ណោះដែលហោះត្រង់ទៅកាន់ប្រទេសចិន។ កត្តាដែលកម្ពុជាមានជើងហោះហើរតិចជាងចិននេះ ដោយសារតែកម្ពុជាមានទីផ្សារបើកចំហ ប្រសិនបើក្រុមហ៊ុនបរទេសចង់ហោះត្រង់មកកម្ពុជា យើងមានឯកសារ និងបំពេញគ្រប់លក្ខខណ្ឌតាមតម្រូវការច្បាប់របស់កម្ពុជា ហើយនៅមានទីកន្លែងទំនេរ ដែលអាចហោះហើរត្រង់ទៅ-មកតែម្តង ចំណែកឯភាគីចិនវិញ គេមានភាពតឹងរ៉ឹង ដោយតម្រូវឱ្យចំពោះតែក្រុមហ៊ុនអាកាសចរណ៍ណាដែលមានភាពចាស់ទុំ មានន័យថា ធ្លាប់ហោះហើរលើសពី1,000ជើងឡើងទៅ ទើបអាចស្នើសុំការហោះត្រង់ទៅកាន់ប្រទេសចិនបាន តែបើសិនជាព្រលានយន្តហោះនោះ មិនមានទីកន្លែងទំនេរ ក៏មិនអាចហោះត្រង់ទៅបានដែរ។

គួរបញ្ជាក់ថា មកទល់បច្ចុប្បន្នមានក្រុមហ៊ុនអាកាសចរណ៍បរទេសចំនួន 42ក្រុមហ៊ុនហើយដែលហោះហើរត្រង់មកកាន់ព្រលានយន្តហោះអន្តរជាតិភ្នំពេញ ដែលការបើកដំណើរការហោះហើរកាន់តែច្រើននេះ នឹងធ្វើឱ្យសេវាកម្មដឹកជញ្ជូនផ្លូវអាកាសនេះកាន់តែប្រសើរឡើង និងបំពេញបានតាមតម្រូវការអតិថិជន ឯអតិថិជនក៏មានជម្រើសច្រើនក្នុងការសម្រេចចិត្តប្រើប្រាស់សេវាកម្មហោះហើរក្រុមហ៊ុនណាមួយផងដែរ។

ការស្នើសុំហោះហើរត្រង់មកកាន់កម្ពុជា របស់ក្រុមហ៊ុន Air China នេះធ្វើឡើងនៅពេលដែលគេមើលឃើញថា ភ្ញៀវទេសចរចិនបានធ្វើដំណើរមកកាន់កម្ពុជាមានចំនួនកាន់តែច្រើនឡើងៗនៅរយៈពេលប៉ុន្មានឆ្នាំចុងក្រោយនេះ ជាចំនួនមួយដែលនាំមុខគេក្នុងចំណោមភ្ញៀវទេសចរដទៃទៀតដែលបានមកទស្សនាប្រទេសកម្ពុជា។ តាមរយៈរបាយការណ៍របស់ក្រសួងទេសចរណ៍បានបង្ហាញថានៅឆមាសទី1 ឆ្នាំ2018នេះ ភ្ញៀវទេសចរចិនដែលមកទស្សនាកម្ពុជាមានចំនួន 93ម៉ឺននាក់ ស្មើនឹង31ភាគរយនៃភ្ញៀវទេសចរសរុបខណៈដែលភ្ញៀវវៀតណាមឈរលំដាប់ថ្នាក់លេខ2។

ចំណែកទំហំពាណិជ្ជកម្មកម្ពុជា-ចិន កាលពីឆ្នាំ2017កន្លងទៅ សម្រេចបានមានប្រមាណ 5,800លានដុល្លារអាមេរិក គឺកើនឡើង21.8% បើធៀបនឹងឆ្នាំ2016 ដែលមានត្រឹមតែ 4,760លានដុល្លារ ហើយភាគីទាំង2 បានប្តេជ្ញាបង្កើនពាណិជ្ជកម្មដល់6ពាន់លានដុល្លារ នៅត្រឹមឆ្នាំ2020៕

September 6, 2018

ពាណិជ្ជករត្រូវតែប្រើប្រាស់បច្ចេកវិទ្យា ដើម្បីរក្សាជំហរក្នុងទីផ្សារអាជីវកម្ម

វាមិនមែនជារឿងចម្លែកពេកទេដែលការធ្វើអាជីវកម្មចាំបាច់ត្រូវមានភាពបត់បែនខ្ពស់នៅក្នុងសម័យបច្ចេកវិទ្យាព័ត៌មាននេះ។ ការធ្វើអាជីវកម្មលើគ្រប់ផ្នែកទាំងអស់ ទាំងការផ្គត់ផ្គង់ចំណីអាហារ ការដឹកជញ្ជូន ឬអាជីវកម្មធំៗជាច្រើនផ្សេងទៀត ចាំបាច់ត្រូវតែបត់បែនឱ្យបានលឿនបំផុតដើម្បីឱ្យទាន់ស្ថានភាពរីកចម្រើននៃបច្ចេកវិទ្យាដែលធ្វើឱ្យការប្រកួតប្រជែងកើតមានកាន់តែខ្លាំងក្នុងពិភពជំនួញ។

លោក Tom Den Hertog អគ្គនាយកក្រុមហ៊ុន Ahold Asia Pacific បានលើកឡើងថា វត្តមាននៃបច្ចេកវិទ្យាទំនើប បានផ្លាស់ប្តូរការរស់នៅរបស់អតិថិជនយ៉ាងច្រើន ព្រោះពួកគេរស់នៅក្នុងពិភពព័ត៌មានយ៉ាងសម្បូរបែប ហេតុនេះការធ្វើអាជីវកម្មចាំបាច់ត្រូវតែប្រើប្រាស់បច្ចេកវិទ្យាដើម្បីបង្កើនល្បឿននៃសេវាកម្ម និងការផ្តល់ព័ត៌មានឱ្យបានកាន់តែលម្អិតទៅដល់អតិថិជន។ លោកថា ជាក់ស្តែងការធ្វើអាជីវកម្មលើការផ្គត់ផ្គង់ចំណីអាហារ ពីមុនមកយើងចាប់ផ្តើមពីការបង្កើតផលិតផលកសិកម្ម បន្ទាប់មករុញចូលទៅក្នុងរោងចក្រកែច្នៃវេចខ្ចប់ បញ្ជូនទៅផ្នែកចែកចាយ ហើយបន្ទាប់មកទៀតទើបដឹកទៅដល់ហាងលក់រាយ ឬភោជនីយដ្ឋានទើបដល់ដៃអតិថិជន។ ដំណើរនៃការរៀបចំចង្វាក់ផ្គត់ផ្គង់ (supply chain) បែបនេះនៅពេញនិយមខ្លះនៅឡើយ តែវានឹងត្រូវផ្លាស់ប្តូរស្ទើរតែទាំងស្រុងនៅពេលឆាប់ៗខាងមុខនេះ។

លោក Tom Den Hertog និយាយថា៖ “អ្នករកស៊ីផ្នែកផ្គត់ផ្គង់ចំណីអាហារនាពេលបច្ចុប្បន្ននេះត្រូវការចាំបាច់បំផុតនូវភាពច្នៃប្រឌិត។ មានក្រុមហ៊ុនមួយឈ្មោះថា Hello Fresh គាត់បានបង្កើតគំនិតច្នៃប្រឌិតយ៉ាងខ្ពស់ដោយការបង្កើតជាប្រអប់សម្រាប់ដាក់បន្លែ និងគ្រឿងផ្សំស្រេច ដោយបញ្ចូលជាមួយវិធីសាស្ត្រធ្វើម្ហូបនៅក្នុងប្រអប់ និងបង្ហាញច្បាស់ពីប្រភពលម្អិតតាំងពីកន្លែងដាំរហូតដល់ដៃអតិថិជនតាមប្រព័ន្ធបច្ចេកវិទ្យា”។

លោកបានបញ្ជាក់ផងដែរថា រាល់ការទិញរបស់អតិថិជននឹងត្រូវដឹកដល់ដៃ មិនចាំបាច់លំបាកស្វែងរកនៅទីផ្សារនោះទេ អតិថិជនក៏អាចរៀនធ្វើម្ហូប និងស្វែងរកវិធីសាស្ត្រប្រកបដោយភាពរីករាយជាច្រើនសម្រាប់ការរស់នៅតាមរយៈប្រព័ន្ធបច្ចេកវិទ្យានៅផ្ទះ ដោយប្រើប្រាស់តែទូរស័ព្ទ Smart Phone មួយប៉ុណ្ណោះ។ ការធ្វើបែបនេះនឹងធ្វើឱ្យអតិថិជនកាត់បន្ថយចំណាយតិច ចំណេញពេលវេលាច្រើនសម្រាប់គ្រួសារ និងមានអារម្មណ៍កក់ក្តៅគ្រប់គ្រាន់ចំពោះម្ហូបអាហារដែលដឹកជញ្ជូនមកដល់ដៃគាត់គ្រប់ពេលវេលានោះ។ លោកថា ការធ្វើពាណិជ្ជកម្មនាពេលបច្ចុប្បន្នចាំបាច់ត្រូវតែបង្កើនល្បឿន គិតឱ្យបានមុនគេ និងផ្តល់ព័ត៌មានលម្អិត ព្រោះផលិតផលដែលយើងនឹងចេញ គឺត្រូវជួបនឹងការប្រកួតប្រជែងខ្លាំង។

លោក Tom Den Hertong បាននិយាយទៀតថា៖ “ប្រសិនបើយើងនាំអាហារ ឬផលិតផលទៅកាន់ប្រទេសណាមួយ សូមកុំគិតថា យើងប្រកួតប្រជែងតែជាមួយក្រុមហ៊ុននៅក្នុងស្រុក តែត្រូវគិតថា យើងប្រកួតប្រជែងជាមួយក្រុមហ៊ុនទាំងអស់លើពិភពលោក ព្រោះអតិថិជនបច្ចុប្បន្ននេះដឹងគ្រប់ព័ត៌មានទាំងអស់លើពិភពលោក ហើយពេលខ្លះអតិថិជនអាចឆ្លាតជាងអ្នកលក់ទៀតផង។ ខ្ញុំមិនដឹងថានៅទីនេះ ប្រជាជនគិតពីប្រភពនៃអាហារ ឬអត់នោះទេតែសម្រាប់ប្រទេសខ្ញុំ គឺគេគិតទាំងអស់ ទាំងកន្លែងកែច្នៃ ការវេចខ្ចប់ ក្រុមហ៊ុនចែកចាយ និងវិធីសាស្ត្ររក្សាទុកផលិតផល ជាដើម។ ហេតុនេះដើម្បីទាក់ទាញអតិថិជនឱ្យទិញបាន លុះត្រាតែរៀបចំប្រព័ន្ធគ្រប់គ្រងដោយប្រើប្រាស់បច្ចេកវិទ្យាដើម្បីធានាថា យើងបានបញ្ជូនព័ត៌មានលម្អិតគ្រប់បែបយ៉ាងទៅកាន់អតិថិជនលើរាប់រយមុខទំនិញដែលយើងផ្គត់ផ្គង់”។

លោកអគ្គនាយករូបនេះ បានបញ្ជាក់ផងដែរថា ការរកស៊ីបច្ចុប្បន្នចាំបាច់ដើរឱ្យបានមុនគេ ដើម្បីទទួលបានជោគជ័យ។ មានការស្រាវជ្រាវមួយពីឥរិយាបថរបស់មនុស្សបានរកឃើញថា ប្រសិនបើគេបើកពហុកីឡដ្ឋាននៅម៉ោង 12:00 ហើយបិទលែងឱ្យចូលនៅម៉ោង 12:50នាទីសម្រាប់ទស្សនាកីឡា មនុស្សនឹងសម្រុកចូលតែពេលជិតដល់ម៉ោងបិទប៉ុណ្ណោះ។ រយៈពេលចាប់ពីម៉ោង 12:00ដល់ម៉ោង 12:45នាទី គឺមានកៅអីទំនេររហូតដល់ 97% ហេតុនេះមនុស្សនឹងនាំគ្នាសម្រុកចូលនៅរយៈពេលត្រឹមតែ 5នាទីចុងក្រោយប៉ុណ្ណោះ។ ការរកស៊ីក៏ដូចគ្នាដែរ ជាទូទៅក្រុមហ៊ុនដែលដើរមិនទាន់គេ ហើយបិទទ្វារទៅវិញភាគច្រើនគឺដោយសារតែមិនព្រមចាប់ផ្តើមធ្វើការច្នៃប្រឌិតឱ្យបានមុនគេ ហើយរួមគ្នាប្រកួតខ្លាំងនៅពេលចុងក្រោយជាមួយគេឯង នោះពួកគេនឹងពិបាកឈរជើង។

បន្ថែមពីលើនេះ លោក Picheat Chansate នាយកគ្រប់គ្រងទូទៅនៃក្រុមហុន ThaiSomdej Service ដែលជាក្រុមហ៊ុនជាប់ពានរង្វាន់ Excellent Logistic Management award 2018 បានលើកឡើងថា ក្រុមហ៊ុនរបស់លោក ជាក្រុមហ៊ុនឡូជីស្ទីក ហេតុនេះការគ្រប់គ្រងសេវាកម្ម និងឯកសារមានសារៈសំខាន់បំផុត ហើយអ្វីដែលជំរុញឱ្យក្រុមហ៊ុនរបស់លោកអាចឈរជើងបានល្អក្នុងទីផ្សារ និងទទួលបានពានរង្វាន់ដ៏សំខាន់នេះក៏មានការរួមចំណែកពីបច្ចេកវិទ្យាផងដែរ។ បច្ចេកវិទ្យាបានដើរតួនាទីយ៉ាងសំខាន់សម្រាប់ពាណិជ្ជកម្មនៅពេលបច្ចុប្បន្ននេះ។ ក្រុមហ៊ុនរបស់លោកបានចំណាយទុនយ៉ាងច្រើនដើម្បីអភិវឌ្ឍកម្មវិធីបច្ចេកវិទ្យាព័ត៌មានដោយខ្លួនឯងដែលមានឈ្មោះថា Intelligent Customs Clearance Technology (ICCT) ដើម្បីសម្រួលដល់សកម្មភាពការងារឱ្យបានកាន់តែឆាប់រហ័ស និងងាយស្រួល។

លោក Picheat Chansate បាននិយាយថា៖ “ពីមុនសម្រាប់អតិថិជនម្នាក់ដែលប្រើប្រាស់សេវារបស់យើង យើងប្រើប្រាស់ពេលរហូតដល់ទៅ 4ម៉ោងដើម្បីរៀបចំវិក្កយបត្រ និងបញ្ចូលទៅក្នុងកម្មវិធី Excell តែបច្ចុប្បន្ននេះយើងបង្រួញពេលឱ្យសល់ត្រឹមតែប្រហែល 5នាទីប៉ុណ្ណោះ។ ហើយយើងក៏អាចបំពេញទម្រង់ចេញ ឬចូលសម្រាប់ពួកគាត់ដោយប្រើពេលត្រឹមតែ 5នាទីដូចគ្នាលើមុខទំនិញជាច្រើនមុខរបស់គាត់”។

លោក Picheat Chansate បានលើកឡើងផងដែរថា រាល់ឯកសារទាំងអស់របស់អតិថិជននឹងត្រូវបានផ្ទុកក្នុងកន្លែងផ្ទុកទិន្នន័យធំៗចំនួន 2 ដែលវាមានសមត្ថភាពរក្សាទុករហូតដល់ទៅ 5ឆ្នាំ ដែលធ្វើឱ្យអតិថិជនកាន់តែមានទំនុកចិត្ត និងងាយស្រួលស្វែងរកឯកសារផ្សេងៗផងដែរ។ ប្រព័ន្ធផ្ទុកទិន្នន័យទាំងអស់នេះជាបេះដូងរបស់ក្រុមហ៊ុនលោក ហេតុនេះវាត្រូវបានការពារយ៉ាងល្អិតល្អន់។ ក្រោយពេលប្រើប្រាស់បច្ចេកវិទ្យាទាំងអស់នេះ ការធ្វើការងារកាន់តែមានប្រសិទ្ធភាពជាងមុន ដែលផ្តល់ឱកាសឱ្យក្រុមហ៊ុនរបស់លោកពង្រីកសេវាកម្ម បានកាន់តែច្រើន និងមានគម្រោងបោះទីតាំងទៅកាន់តំបន់សំខាន់ៗជាច្រើនផ្សេងទៀតដោយក្នុងនោះក៏មានកម្ពុជាផងដែរ។

អ្នកគ្រប់គ្រងក្រុមហ៊ុនខាងលើបានលើកឡើងផងដែរថា បើទោះបីជាមានវត្តមាននៃបច្ចេកវិទ្យាទំនើបក្តី តែបុគ្គលិករបស់លោកនៅតែអាចរក្សាលំនឹងរបស់ខ្លួនក្នុងការធ្វើការងារដដែល តែអ្វីដែលពួកគេត្រូវធ្វើគឺបង្កើនសមត្ថភាពក្នុងការប្រើប្រាស់ និងគ្រប់គ្រងប្រព័ន្ធបច្ចេកវិទ្យាទាំងអស់នោះ។ វានឹងធ្វើឱ្យពួកគេមានពេលវេលាទំនេរច្រើនជាងមុន តែយើងនៅតែត្រូវការមនុស្សដើម្បីផ្ទៀងផ្ទាត់ ព្រោះមនុស្សមានអ្វីដែលម៉ាស៊ីនគ្មាន គឺខួរក្បាល៕

September 6, 2018

Author: ធឿន មករា