ធឿន មករា - La Reine Media

ឱកាសអាហារូបករណ៍មានច្រើន តែធ្វើម៉េចចាប់យកបាន?

ការសិក្សាជាការវិនិយោគយ៉ាងធំសម្រាប់ជីវិត ព្រោះចាប់ផ្តើមពីការអប់រំ មនុស្សម្នាក់ៗនឹងទទួលបានមកវិញនូវអាជីពសម្រាប់ជីវិត ទ្រព្យសម្បត្តិកិត្តិយស និងស្នាដៃល្អៗជាច្រើនសម្រាប់ខ្លួនឯងសង្គម និងពិភពលោក។ ជាធម្មតាទេ គ្រប់ការវិនិយោគចាំបាច់ត្រូវតែចំណាយដើមទុន តែមាននិស្សិតជាច្រើនបានព្យាយាមចាប់យកឱកាសល្អៗ ដើម្បីបន្ថយការចំណាយសម្រាប់គ្រួសារ ហើយបញ្ចប់ការសិក្សាកម្រិតឧត្តមសិក្សាទាំងក្នុងប្រទេស ឬនៅបរទេសដោយជោគជ័យ។

លោក ង៉ែត សុខឡា ស្ថាបនិក KP Foundation និងជាប្រធានពិធីការ និងសម្ព័ន្ធការនៃសាកលវិទ្យាល័យបញ្ញាសាស្ត្រកម្ពុជាបានលើកឡើងថា ការដាក់ពាក្យប្រឡងអាហារូបករណ៍កម្រិតបរិញ្ញាបត្រមិនមែនជារឿងលំបាកខ្លាំង តែក៏មិនងាយពេកដែរ។ ការស្វែងរកព័ត៌មានជាដំណាក់កាលសំខាន់ដំបូងបំផុត សម្រាប់ការទទួលបានអាហារូបករណ៍ ព្រោះអ្នកទទួលបានអាហារូបករណ៍ខ្លះមិនប្រាកដថា ខ្លាំងជាងគេនោះទេ តែគេទទួលបានព័ត៌មានមុន និងច្រើនជាងអ្នកឯទៀត ហេតុនេះហើយទើបធ្វើឱ្យគេមានឱកាសច្រើនក្នុងការប្រឡងជាប់។ សិស្សដែលមានបំណងចង់ទទួលបានអាហារូបករណ៍ គួរស្រាវជ្រាវឱ្យបានច្រើនពីព័ត៌មានអាហារូបករណ៍ ពីក្នុងគេហទំព័រសាកលវិទ្យាល័យនីមួយៗ ឬពីទំព័រ Facebook របស់ក្រសួងអប់រំ ព្រោះក្រសួងអប់រំតែងតែបង្ហាញពីដំណឹងអាហារូបករណ៍ជាច្រើនទាំងរដ្ឋ និងឯកជនទៅកាន់សិស្ស-និស្សិតនៅទូទាំងប្រទេស។

លោក ង៉ែត សុខឡា បាននិយាយថា៖ “ដើម្បីទទួលបានព័ត៌មានកាន់តែលម្អិត សិស្សក៏អាចទៅសាកលវិទ្យាល័យ ឬគ្រឹះស្ថានសិក្សានោះដោយផ្ទាល់តែម្តង ដើម្បីសិក្សាពីតម្រូវការរបស់សាលា និងមុខវិជ្ជាណាខ្លះដែលយើងចង់សិក្សា ហើយក៏អាចមានឱកាសក្នុងការជួបសិស្សច្បងនានាដែលជាប់អាហា-រូបករណ៍នៅទីនោះដោយផ្ទាល់ផងដែរ”។

លោក សុខឡា បានបញ្ជាក់ផងដែរថា សិស្សម្នាក់ៗត្រូវមានសេចក្តីក្លាហានក្នុងការដាក់ពាក្យប្រឡងយកអាហារូបករណ៍ ព្រោះការប្រឡងដ៏សំខាន់នេះជាឱកាសដ៏ល្អដើម្បីធ្វើឱ្យយើងមានឱកាសបន្តការសិក្សានៅមហាវិទ្យាល័យ ប្រសិនបើធនធានរបស់យើងមានកម្រិត។ សូមកុំបារម្ភប្រសិនបើយើងមិនទទួលបានពិន្ទុខ្ពស់ក្នុងការប្រឡងមធ្យមសិក្សាទុតិយភូមិ ព្រោះកន្លងមកសិស្សនិទ្ទេស D ឬ E ក៏មានមិនតិចដែរដែលជាប់អាហារូបករណ៍។ ចំណុចសំខាន់ដែលធ្វើឱ្យពួកគេជោគជ័យលើការដាក់ពាក្យប្រឡងអាហារូបករណ៍ គឺការត្រៀមខ្លួនបានល្អ។ សិស្សនិទ្ទេស A B ឬ C ក៏ដោយ ប្រសិនបើមិនមានការត្រៀមខ្លួនឱ្យបានល្អទេ គាត់ក៏អាចនឹងបាត់បង់ឱកាសក្នុងការប្រឡងជាប់អាហារូបករណ៍ដែរ តែប្រសិនបើអ្នកប្រឡងដឹងថា ពិន្ទុក្នុងសាលារបស់ខ្លួនមិនទាន់ល្អ ហើយខិតខំប្រឹងប្រែងខ្លាំងដើម្បីត្រៀមប្រឡងនោះ ពួកគេនឹងអាចមានសង្ឃឹមឡើងវិញ។ ហេតុនេះសូមកុំអស់សង្ឃឹម បើទោះបីជាស្ថិតក្នុងកាលៈទេសៈណាក៏ដោយ។

លោក លី តារា ប្រធានក្រុមអ្នកនិពន្ធវ័យក្មេងកម្ពុជា និងជានិស្សិតពូកែមួយរូបដែរនោះបានលើកឡើងថា សិស្សដែលចង់ជាប់អាហារូបករណ៍គួរពង្រឹងចំណេះដឹងភាសាអង់គ្លេសឱ្យបានខ្លាំង ព្រោះសាលាភាគច្រើនបើកទទួលសិស្សឱ្យប្រឡងអាហារូបករណ៍ដោយប្រើប្រាស់ភាសាអង់គ្លេស រួមទាំងវិញ្ញាសាសរសេរផ្សេងៗទៀតដែលត្រូវការភាសាអង់គ្លេស។ ហេតុនេះប្រសិនបើគាត់ជាមនុស្សពូកែសរសេរជាភាសាអង់គ្លេស គាត់នឹងមានឱកាសខ្ពស់ដើម្បីទទួលបានអាហារូបករណ៍។ ក្រៅពីនេះសិស្សក៏គួរតែមានចំណេះដឹងផ្នែកវប្បធម៌ទូទៅឱ្យបានទូលំទូលាយព្រោះគ្រប់សាកលវិទ្យាល័យ ឬគ្រឹះស្ថានសិក្សា សុទ្ធតែត្រូវការនិស្សិតដែលមានចំណេះដឹងខ្ពស់។ ម្យ៉ាងវិញទៀត សិស្សក៏គួរតែស្រាវជ្រាវព័ត៌មានខ្លះៗពីមុខវិជ្ជាដែលខ្លួនត្រូវប្រឡងនោះ។ ថ្វីត្បិតតែពេលចូលប្រឡងមិនត្រូវការចំណេះដឹងពីជំនាញណាមួយ បែបស៊ីជម្រៅមែន តែក៏ចាំបាច់ត្រូវមានមូលដ្ឋានខ្លះៗដែរ ទើបអាចដណ្តើមអាហារូបករណ៍បាន។

លោក លី តារា បាននិយាយថា៖ “ចំពោះសមត្ថភាពសិស្សវិញ មិនប្រាកដថាសិស្សនៅខេត្តអាចខ្សោយជាងសិស្សនៅទីក្រុងនោះទេ គឺវាអាស្រ័យលើការត្រៀមទុក ព្រោះអ្នកនៅតាមបណ្តាខេត្តជាច្រើនក៏ទទួលបានអាហារូបករណ៍សំខាន់ៗផងដែរ។ ហេតុនេះសិស្សនៅតាមបណ្តាខេត្ត កុំអស់សង្ឃឹម ហើយព្យាយាមត្រៀមខ្លួនឱ្យបានល្អ ដើម្បីធ្វើការប្រកួតប្រជែង”។

លោក តារា បានលើកឡើងផងដែរថា សិស្សដែលពិតជាចង់ជាប់អាហារូបករណ៍ អាចស្វែងរកបទពិសោធពីសិស្សច្បងដែលធ្លាប់ទទួលបានអាហារូបករណ៍ ដើម្បីសួរនាំពីបទពិសោធជាក់ស្តែងដែលគេធ្លាប់មាន ព្រោះអាហារូបករណ៍ ពេលខ្លះមិនលំបាកយកពេកទេប្រសិនបើដឹងវិធី។ ការសួរទៅសិស្សច្បងដែលធ្លាប់ជាប់ អាចជួយឱ្យយើងស្រាវជ្រាវត្រូវចំណុចដែលគ្រឹះស្ថានអប់រំនោះចង់បានហើយក៏អាចជាពន្លឺច្រើនសម្រាប់ការប្រកួតប្រជែងផងដែរ៕

September 15, 2018

ស្ថាបនិកសាលាភាសាជប៉ុន បង្ហាញក្តីសង្ឃឹមក្នុងការបញ្ជូនកូនខ្មែរទៅរៀននៅប្រទេសជប៉ុន

ភាពជោគជ័យរបស់មនុស្សមិនមែនបានមកដោយចៃដន្យនោះឡើយ ពោលគឺត្រូវខិតខំព្យាយាមអំណត់ អត់ធន់ ពុះពារគ្រប់ការលំបាក ទើបអាចឈានទៅរកក្ដីស្រមៃរបស់ខ្លួនបាន។ ឧទាហរណ៍ដូចជាយុវជនម្នាក់កើតមកជាកូនអ្នកជនបទស្រុកស្រែ នៅជុំវិញផ្ទះហ៊ុមព័ទ្ធទៅដោយគ្រោះថ្នាក់(ចម្ការមីន) តែបច្ចុប្បន្នបានក្លាយជានាយកសាលាប្រឹក្សាយោបល់ នាំយុវជនខ្មែរទៅរៀននៅប្រទេសជប៉ុន ទោះជាមិនបាច់ជាប់អាហារូបករណ៍ក៏បាន។

លោក អុឹម ឌឺប៉េរ៉េ ស្ថាបនិក និងជានាយកប្រតិបត្តិសាលាភាសាជប៉ុនមិរ៉ៃ (Mirai) មានទីតាំងនៅទល់មុខបុរីប៉េងហួតស្ទឹងមានជ័យ បានមានប្រសាសន៍ឱ្យដឹងថា ដោយចង់ចែករំលែកបទពិសោធនិងចង់ជួយឱ្យយុវជនខ្មែរបានទៅរៀននៅប្រទេសជប៉ុនកាន់តែច្រើន លោកបានសម្រេចបង្កើតសាលាផ្ទាល់ខ្លួនខាងលើនេះឡើង ដើម្បីធ្វើការបណ្តុះបណ្តាល និងប្រឹក្សាយោបល់ដល់យុវជនខ្មែរដែលចង់ទៅសិក្សានៅប្រទេសជប៉ុន ដែលជាប្រទេសមួយរីកចម្រើនខ្លាំងខាងវិស័យអប់រំ ប្រជាជនមានសីលធម៌រស់នៅល្អ មានភាពឧស្សាហ៍ព្យាយាម និងអំណត់ក្នុងការងាររហូតមានការទទួលស្គាល់នៅទូទាំងសកលលោក។

លោកថា កន្លងមក ភាគច្រើនមានតែសិស្សជាប់អាហារូបករណ៍ប៉ុណ្ណោះទើបអាចទៅបន្តការសិក្សានៅប្រទេសជប៉ុនបាន ប៉ុន្តែចាប់ពីពេលនេះតទៅសម្រាប់សិស្សប្រឡងជាប់បាក់ឌុប ហើយ ទោះជាមិនបានជាប់អាហារូបករណ៍ក៏អាចទៅសិក្សានៅប្រទេសជប៉ុនបានដែរ តាមរយៈការបណ្តុះបណ្តាល និងប្រឹក្សាយោបល់ផ្ទាល់ពីគ្រូជំនាញនៅសាលារបស់លោក ពិសេសបានសិក្សា និងប្រឹក្សាយោបល់ផ្ទាល់ពីរូបលោកដែលធ្លាប់បានឆ្លងកាត់ការសិក្សានៅទីនោះ ដោយមិនបានជាប់អាហារូបករណ៍ និងខំប្រឹងធ្វើការរកលុយបានរៀននៅទីនោះដោយខ្លួនឯង មិនចាំបាច់មានការផ្គត់ផ្គង់ពីអាណាព្យាបាលឡើយ។

ជាបទពិសោធផ្ទាល់ កាលពីឆ្នាំ2014 កន្លងទៅ ខណៈដែលលោកកំពុងសិក្សាឆ្នាំទី3 នៅក្នុងមហាវិទ្យាល័យមួយ ក៏ត្រូវបានថ្នាក់ដឹកនាំសាលាជ្រើសរើសឱ្យធ្វើជាតំណាងប្រទេសទៅចូលរួមក្នុងកម្មវិធី“សប្តាហ៍សាកៃអាស៊ាន‟ (Sakai-ASEAN Week) ដែលរៀបចំឡើងនៅទីក្រុងចំណាស់មួយឈ្មោះ សាកៃ ដែលមាននិស្សិតពូកែៗតំណាងឱ្យប្រទេសជាច្រើននៅអាស៊ី ដូចជា ជប៉ុន ថៃ ហ្វីលីពីន ម៉ាឡេស៊ី វៀតណាម ជាដើមចូលរួមប្រកួតប្រជែងនៅទីនោះ ដើម្បីបង្ហាញពីវប្បធម៌ប្រពៃណីនៃប្រទេសនីមួយ។

តាមពិតទៅលោកមិនមែនជាសិស្សពូកែនៅមហាវិទ្យាល័យទេ ប៉ុន្តែចំណេះដឹងផ្នែកភាសានិយាយ និងស្តាប់បានល្អ ទទួលបានពិន្ទុនិយាយ និងស្តាប់ស្មើនឹងនិស្សិតជាប់និទ្ទេសល្អបំផុតនៅក្នុងថ្នាក់ គួបផ្សំ និងកាយវិការ ការនិយាយស្តី ការចេះស្តាប់ស្ទាត់ជំនាញ និងចរិតឫកពាផងនោះ លោកក៏ត្រូវបានជ្រើសរើសឱ្យធ្វើជាតំណាងប្រទេសកម្ពុជាតែម្តង។ អ្វីដែលធ្វើឱ្យយុវជនម្នាក់នេះមានចំណេះដឹងជំនាញផ្នែកនិយាយ និងស្តាប់ច្បាស់លាស់នេះ គឺដោយសារចាប់តាំងពីរៀនមហាវិទ្យាល័យឆ្នាំទី2 មក លោកតែងឆ្លៀតពេលបង្រៀនសិស្សប្អូនឆ្នាំទី1 និងបង្រៀនគួរដល់សិស្សមួយចំនួននៅតាមផ្ទះទៀតផង។ ប្រធានបទដែលលោកបានលើកឡើងក្នុងកម្មវិធី Sakai-ASEAN Week នោះ គឺនិយាយអំពីព្រះព្រហ្មមុខ4ជាតំណាងឱ្យព្រហ្មវិហារធម៌ទាំង 4យ៉ាង ដែលឪពុកម្តាយទូទៅមានចំពោះកូន ហើយស្នាមញញឹមនៃព្រះព្រហ្ម គឺតំណាងឱ្យស្នាមញញឹមរបស់ប្រជាជនខ្មែរដែលពិភពលោកតែងផ្តល់តម្លៃថា ប្រជាជនខ្មែរជាមនុស្សរួសរាយរាក់ទាក់ មានទំនាក់ទំនងល្អជាមួយជនបរទេសគ្រប់ជាតិសាសន៍ ដោយមិនរើសអើងវណ្ណៈពណ៌សម្បុរនោះទេ។

ក្រោយពីចប់កម្មវិធីខាងលើ លោកបានត្រឡប់មកបន្តការសិក្សាវិញ ហើយក៏បានបញ្ចប់ថ្នាក់បរិញ្ញាបត្រគ្រប់គ្រងពាណិជ្ជកម្មផ្នែកភាសាជប៉ុននៅឆ្នាំ2015 ពេលនោះលោកបានធ្វើការជាអ្នកលក់សំបុត្រជូនប្រជាជនខ្មែរទៅទស្សនាបាល់ទាត់ពិភពលោកក្នុងក្រុមហ៊ុនមួយនៅម្តុំវិមានឯករាជ្យរយៈពេល 3ខែដើម្បីសន្សំប្រាក់បន្តការសិក្សា។ ក្នុងបំណងចង់បន្តការសិក្សានៅប្រទេសជប៉ុនដើម្បីពង្រឹងជំនាញឱ្យកាន់តែច្បាស់ លោកបានខិតខំសន្សំលុយ-កាក់រួមនឹងការជួយទំនុកបម្រុងពីឪពុកម្តាយ និងបងប្អូនផងបានមួយចំនួន ក៏បានទៅបន្តការសិក្សានៅប្រទេសជប៉ុនចាប់ពីឆ្នាំ2015។ រហូតដល់ឆ្នាំ2017 ទើបបញ្ចប់ការសិក្សាទីនោះ និងបានវិលត្រឡប់មកប្រទេសកំណើតវិញ។ ក្រោយពីត្រឡប់មកវិញ លោកបានសហការជាមួយមិត្តភក្តិបើកសាលាជ្រើសរើស និងបង្រៀនពលករទៅធ្វើការនៅក្រៅប្រទេស និងជួយប្រឹក្សាយោបល់ទៅដល់ពលករដែលត្រៀមទៅធ្វើការនៅទីនោះផង។

ក្រោយមកលោកក៏បានដើរសុំការសហការដើម្បីបង្រៀនភាសាជប៉ុនជាមួយសាកលវិទ្យាល័យមួយចំនួនដែលមិនទាន់មានជំនាញភាសានេះ នៅក្នុងទីក្រុងភ្នំពេញ។ ប៉ុន្តែដោយសារមើលឃើញថា យុវជន ឌឹប៉េរ៉េ ហាក់ដូចជានៅមានវ័យក្មេងពេកធ្វើឱ្យថ្នាក់ដឹកនាំនៅក្នុងសាកលវិទ្យាល័យទាំងនោះមិនសូវមានទំនុកចិត្ត ទើបមិនបានសហការជាមួយ
ក្នុងការបើកថ្នាក់បង្រៀនជំនាញភាសាជប៉ុននេះ។ ដោយសារមិនទទួលបានការសហការនេះ លោកក៏សម្រេចចិត្តបើកសាលាបង្រៀនជំនាញភាសាជប៉ុនឡើងដោយខ្លួនឯងដែលកាលពី7 ឆ្នាំ2018កន្លងទៅនេះ ប៉ុន្តែដោយសារធ្លាប់បានឡើងធ្វើបទបង្ហាញតាមវេទិកាសាធារណៈមួយចំនួនកន្លងមកទើបមានការគេស្គាល់ច្រើន ហើយមានសិស្សដែលជាប់បាក់ឌុបកាលពីឆ្នាំមុន និងសិស្សទើបប្រឡងចប់បាក់ឌុបឆ្នាំនេះ បានមកចុះឈ្មោះចូលរៀនភាសាជប៉ុននៅសាលាខាងលើបណ្តើរៗហើយ ដែលមកទល់ពេលនេះមានសិស្សប្រមាណជាង 40នាក់បានចូលរៀនវគ្គបណ្តុះបណ្តាលនៅទីនោះ ក្នុងនោះមានសិស្សចំនួន 4នាក់កំពុងត្រៀមចេញទៅរៀននៅប្រទេសជប៉ុននៅសាលា ICA International Language School ហើយ 15នាក់ទៀតនឹងចេញទៅនៅឆ្នាំបន្ទាប់។

ងាកមកមើលពីអតីតកាលវិញ កុមារ ឌឺប៉េរ៉េ កើតនៅឆ្នាំ1992 ដែលជាកូនទី4 នៅក្នុងគ្រួសារកសិករដែលមានជីវភាពលំបាកមួយនៅក្នុងភូមិអូរអន្លក់ ឃុំតាសែន ស្រុកកំរៀង ខេត្តបាត់ដំបង។ ជាភូមិមួយពោពេញទៅដោយគ្រាប់មីនដែលបន្សល់ទុកតាំងពីសម័យសង្គ្រាមមក ប៉ុន្តែដោយសារតែឪពុកធ្លាប់ចូលបម្រើកងទ័ព មានបទពិសោធផ្នែកដោះមីន ក៏ធ្វើការដោះគ្រាប់មីនមួយចំនួនចេញ និងសាងសង់ផ្ទះ រួចហើយដោះគ្រាប់មីនជាបន្តបន្ទាប់ដើម្បីពង្រីកដីកាន់តែធំឡើងៗសម្រាប់ប្រកបរបរធ្វើចម្ការចិញ្ចឹមគ្រួសារ។ ដោយសារតែឪពុករបស់លោកមានជំនាញច្បាស់លាស់ ទើបការដោះមីនទាំងនោះមិនដែលជួបបញ្ហា ឬគ្រោះថ្នាក់អ្វីឡើយ។ រហូតដល់ឆ្នាំ1999 ទើបម្តាយនាំកុមារា ឌឹប៉េរ៉េ ទៅចុះឈ្មោះចូលរៀនថ្នាក់ទី1 ដែលលោកនៅចាំបានថា កាលនោះលោកហាក់ដូចជាស្រឡាញ់ម្តាយខ្លាំងណាស់ បើគាត់មិនជូនទៅរៀនទេ លោកក៏មិនទៅរៀនដែរ និងបើជូនទៅហើយទាល់តែនៅចាំរហូតដល់ម៉ោងចេញ បើហ៊ានតែម្តាយមកមុន លោកនឹងរត់ចេញពីសាលាទៅតាមម្ដាយដែរមិនខាន ទើបជាហេតុធ្វើឱ្យការសិក្សារបស់លោកកាលនោះមិនទទួលបានលទ្ធផលល្អឡើយ។ រហូតដល់ឆ្នាំក្រោយៗមកទើបលោកដឹងពីការងារសិក្សា ក៏ខិតខំប្រឹងរៀនសូត្ររហូតបានឡើងថ្នាក់ លុះដល់ឆ្នាំ2005 រៀនចប់ថ្នាក់បឋមសិក្សា ក៏បន្តការសិក្សាថ្នាក់អនុវិទ្យាល័យនៅសាលាដែលមានចម្ងាយជាង7 គីឡូម៉ែត្រពីផ្ទះ ហើយដោយសារតែផ្លូវលំបាកមានជង្ហុក និងភក់ផងនោះ ធ្វើឱ្យលោកក៏ដូចជាសិស្សរួមថ្នាក់ដទៃទៀតដែរត្រូវចំណាយពេលជិះកង់ទៅ-មកជិត 2ម៉ោងជារៀងរាល់ថ្ងៃ ដើម្បីទៅសិក្សានៅសាលាដែលមានជញ្ជាំងបិទបាំងដោយបន្ទះឫស្សី និងដំបូលប្រក់ស្លឹក។ ទោះជាលំបាកយ៉ាងណាក្តី តែដោយសារចិត្តស្រឡាញ់ការសិក្សា កុមារា ឌឹប៉េរ៉េ បានខិតខំជួយធ្វើចម្ការឪពុកម្តាយដោយស្ពាយធុងបាញ់ថ្នាំ និងមើលការងារកម្មករផង និងឆ្លៀតពេលរៀនផង រហូតទទួលបាននិទ្ទេសល្អជារៀងរាល់ឆ្នាំ។ លុះឆ្នាំ2009 ក៏បញ្ចប់ថ្នាក់ឌីប្លូម និងបានបន្តទៅវិទ្យាល័យពេជ្រចិន្តា ដែលមានចម្ងាយជិត10គីឡូម៉ែត្រពីផ្ទះ ហើយពេលនោះក៏មិនទាន់មានម៉ូតូជិះនឹងគេដែរ គឺជិះដោយសារគេ និងជួយចេញថ្លៃសាំងឱ្យគេខ្លះ។

ដោយសារចង់ឃើញទីក្រុងភ្នំពេញ និងចង់រំដោះខ្លួនចេញពីកូនកសិករផងនោះ យុវជន ឌឹប៉េរ៉េក៏បន្តខំប្រឹងរៀន និងទទួលបានពិន្ទុល្អជាប្រចាំ លើកលែងតែថ្នាក់ទី12 ដោយសារតែគ្រួសារជួបការលំបាក ធ្វើឱ្យមិនសូវបានរៀនដិតដល់ តែយ៉ាងណាក៏ ឌឹប៉េរ៉េបានប្រឡងជាប់បាក់ឌុបក្នុងឆ្នាំ2011។ ក្រោយចប់បាក់ឌុប ឪពុកម្តាយប្រាប់ថា គាត់មិនមានលុយឱ្យកូនមករៀនបន្តនៅភ្នំពេញទេ ដោយសារតែបងៗ 3នាក់ បានឡើងទៅរៀនមុនៗមិនទាន់មានការងារធ្វើ មិនអាចជួយម្តាយបាននៅឡើយ ទើបឪពុកម្តាយមិនមានលុយបញ្ជូនកូនម្នាក់ទៀតនេះទៅរៀនបន្តទៀតបាន ប៉ុន្តែម្តាយបានប្រាប់ថា បើសិនជាកូនជាប់អាហារូបករណ៍ ម្ដាយនឹងជួយទំនុកបម្រុងលើការស្នាក់នៅ និងហូបចុកឱ្យកូនបានរៀនបន្ត។ ឮដូច្នេះ យុវជន ឌឹប៉េរ៉េ ក៏បានឡើងមកភ្នំពេញ និងដាក់ពាក្យចូលដេប៉ាតឺម៉ង់ភាសាជប៉ុននេះ។ ការដាក់ពាក្យដើម្បីចូលរៀនយកជំនាញភាសាជប៉ុននេះ គឺដោយសារនៅឯស្រុកមានរោងចក្រជប៉ុននៅទីនោះ ហើយជប៉ុនបានជួយកសាងសាលាឱ្យក្មេងៗនៅក្នុងភូមិបានរៀនផងដែរ។ ចំណែកមិត្តភក្តិផ្សេងទៀត គេដាក់ពាក្យរៀនវិស្វកម្ម ពេទ្យ និងជំនាញផ្សេងៗអស់ទៅហើយ លើកលែងតែខ្លួនឯងមួយដែលដាក់យកជំនាញគ្រប់គ្រងពាណិជ្ជកម្មផ្នែកភាសាជប៉ុននេះ។ នៅពេលមកដាក់ពាក្យនោះ យុវជន ឌឹប៉េរ៉េមិនចេះភាសាជប៉ុនសូម្បីតែអក្សរមួយតួ ហើយពេលឡើងមកធ្វើតេស្តក៏មិនចេះដែរ តែដោយសាររស់នៅតំបន់ដាច់ស្រយាលនៅក្នុងភូមិមួយដែលបន្សល់គ្រាប់មីនពីជំនាន់សង្គ្រាម សាលាបានផ្តល់អទិភាពឱ្យបានចូលរៀន ដូចសិស្សចេះមួយចំនួនទៀត។

ត្រង់នេះយុវជន ឌឹប៉េរ៉េ បានរំឭកថា ក្រោយដាក់ពាក្យ និងធ្វើតេស្តរួច ខ្លួនក៏ត្រឡប់ទៅផ្ទះវិញ ស្រាប់តែមួយរយៈខ្លីខាងសាលាបានទូរស័ព្ទទៅប្រាប់ថា ខ្លួនជាប់អាហារូបករណ៍ហើយ ពេលនោះលោកមានចិត្តត្រេកអរជាខ្លាំង បានរត់មកប្រាប់ម្តាយទាំងត្រហេបត្រហប រត់ទាំងមិនខ្លាចជាន់បន្លាមុតជើងឡើយ។ ជិតដល់ពេលចូលរៀន លោកក៏ត្រូវម្តាយជូនមកនៅជាមួយបងៗនៅក្នុងទីក្រុងភ្នំពេញដើម្បីចូលរៀននៅសាកលវិទ្យាល័យភូមិន្ទភ្នំពេញ ដេប៉ាតឺម៉ង់ជំនាញគ្រប់គ្រងពាណិជ្ជកម្មផ្នែកភាសាជប៉ុននេះ។ ប៉ុន្តែនៅពេលដំបូងដោយសារខ្លួនមិនចេះអក្សរជប៉ុនសោះ ធ្វើឱ្យមានការលំបាកក្នុងការសិក្សាជាខ្លាំង ស្ទើរតែបោះបង់ចោលម្តងៗ តែដោយសារសិស្សក្នុងថ្នាក់ភាគច្រើនពួកគេជាប់ដោយសមត្ថភាព ដូច្នេះលោកត្រូវតែខំរៀនតាមគេឱ្យទាន់ រហូតក្លាយជាសិស្សពូកែផ្នែកនិយាយ និងស្តាប់ទៀតផង ហើយក៏ចេះតែខិតខំប្រឹងរៀនរហូតចប់មហាវិទ្យាល័យនៅឆ្នាំ2015 ហើយបន្តទៅសិក្សានៅប្រទេសជប៉ុនរហូតដល់ឆ្នាំ2017 ទើបត្រឡប់មកប្រទេសកំណើតវិញ។

សម្រាប់បំណងទៅថ្ងៃអនាគត យុវជនខាងលើចង់បានតែម្យ៉ាងគត់ គឺជួយឱ្យយុវជនខ្មែរបានទៅរៀនជំនាញនៅប្រទេសជប៉ុនកាន់តែច្រើន ដើម្បីត្រឡប់មកវិញរួមគ្នាជួយអភិវឌ្ឍសង្គមខ្មែរឱ្យកាន់តែល្អប្រសើរថែមទៀត តាមរយៈការពង្រីកសាខានៅតាមបណ្តាខេត្តគោលដៅមួយចំនួនឱ្យបានកាន់តែច្រើនឡើង។ ករណីនេះលោកសូមផ្តាំផ្ញើទៅដល់អាណាព្យាបាលសិស្សថា បើសិនជាចង់ឱ្យកូនទទួលបានចំណេះដឹងច្បាស់លាស់ គួរបញ្ជូនកូនទៅរៀនទីនោះឱ្យបាន ជួយកូនតែឆ្នាំដំបូង ឆ្នាំទី2កូនប្រាកដជាមានសមត្ថភាពរកការងារធ្វើ រកប្រាក់ផ្គត់ផ្គង់ការសិក្សាខ្លួនឯងបានយ៉ាងងាយ ដែលនេះជាវប្បធម៌របស់ជប៉ុន ក្នុងការបង្ហាត់បង្រៀនឱ្យសិស្សចេះរកលុយដោយខ្លួនឯងតាំងពីថ្នាំទី10ម៉្លេះ៕

September 15, 2018

ចំណុចអ្វីខ្លះធ្វើឱ្យកម្ពុជាក្លាយជាគោលដៅសម្រាប់ ការវិនិយោគអចលនទ្រព្យរបស់ជនបរទេស?

ស្របពេលដែលតម្លៃដីនៅកម្ពុជានៅមានកម្រិតទាបជាងប្រទេសជិតខាង បានធ្វើឱ្យវិនិយោគិនបរទេសចូលមកបណ្តាក់ទុនរកស៊ីជាបន្តបន្ទាប់ ដែលធ្វើឱ្យវិស័យអចលនទព្យនេះក្លាយជាគោលដៅវិនិយោគដ៏ធំរបស់ជនបរទេសនៅលើពិភពលោក ពិសេសប្រទេសក្នុងតំបន់អាស៊ាន និងចិនតែម្តង។

លោក Thomas O’Sullivan អ្នកជំនាញអចលនទ្រព្យមានប្រសាសន៍ថា ប្រទេសកម្ពុជា កំពុងក្លាយជាគោលដៅរបស់អ្នកវិនិយោគផែ្នកអចលនទ្រព្យមកពីបរទេស ពិសេសនៅក្នុងតំបន់អាស៊ាន និងចិនតែម្តង។ តើអ្វីដែលធ្វើឱ្យប្រទេសកម្ពុជាក្លាយជាគោលដៅវិនិយោគអចលនទ្រព្យសម្រាប់វិនិយោគិនបរទេស? នោះគឺដោយសារតែកម្ពុជាមានកំណើនសេដ្ឋកិច្ចរឹងមាំ ពិសេសកម្ពុជាបានអនុគ្រោះផ្នែកច្បាប់ ផ្តល់សិទ្ធិដល់ជនបរទេសសម្រាប់កាន់កាប់អចលនទ្រព្យថែមទៀត។

លោកអះអាងថា ក្រោយពីការបោះឆ្នោតចប់ ការទិញ-លក់អចលនទ្រព្យនៅក្នុងប្រទេសកម្ពុជាមានការកើនឡើងយ៉ាងគំហុក ជាក់ស្តែងក្នុងរយៈពេលជាង 2ខែថ្មីៗនេះ ការទិញលក់ក្នុងវិស័យអចលនទ្រព្យមានការកើនឡើង ប្រមាណជាង50ភាគរយ ហើយវិនិយោគិនបរទេសដែលនាំមុខគេគឺជនជាតិចិនតែម្តង។

លោក ច្រឹក សុខនីម អគ្គនាយកក្រុមហ៊ុន Century 21 មេគង្គ មានប្រសាសន៍ទទួលស្គាល់ថាទីផ្សារអចលនទ្រព្យនៅកម្ពុជានៅមានតម្លៃទាបនៅឡើយ បើប្រៀបនឹងប្រទេសជិតខាង ដូចជាប្រទេសថៃ និងប្រទេសវៀតណាមដែលជាកត្តានាំឱ្យអ្នកវិនិយោគិនមួយចំនួន សម្លឹងមើលឃើញសក្តានុពលនៅកម្ពុជា ដូចជាតម្លៃដីនៅក្រុងហាណូយ ប្រទេសវៀតណាម និងក្រុងបាងកក ប្រទេសថៃតម្លៃដីស្មើមួយគុណនឹងពីរ ធៀបនឹងតម្លៃដីនៅក្រុងភ្នំពេញ ប្រទេសកម្ពុជា។ តម្លៃដីនៅតំបន់ថ្លៃបំផុតក្នុងប្រទេសកម្ពុជាជាមធ្យមជាង 5,000ដុល្លារក្នុងមួយម៉ែត្រការ៉េ តែតម្លៃដីក្នុងតំបន់ថ្លៃបំផុតនៅក្នុងប្រទេសវៀតណាម និងថៃ ក្នុងមួយម៉ែត្រការ៉េមានតម្លៃជាមធ្យមប្រហែលជា 10,000ដុល្លារ។

ក្រៅពីតម្លៃដីនៅទាបជាងហើយ កម្ពុជានៅប្រើប្រាស់ដុល្លារភាវូបនីយកម្មដែលអាចឱ្យបរទេសធ្វើចរាចរណ៍ប្រាក់ដុល្លារចូលមកក្នុងទីផ្សារក្នុងប្រទេសងាយស្រួលជាងប្រទេសជិតខាង ដោយមិនធ្វើឱ្យគាត់ខាតបង់ទៅលើអត្រាប្តូរប្រាក់ទៀតផង ទោះជាចង់ដក ឬដាក់ក្នុងចំនួនច្រើនក៏ដោយ ដែលនេះជាចំណុចផ្តល់ផលល្អសម្រាប់ទាក់ទាញវិនិយោគិនឱ្យចូលមករកស៊ីនៅក្នុងប្រទេសកម្ពុជា។ ក្រៅពីនេះកម្ពុជាថែមទាំងទទួលបានការស្វាគមន៍ពីបណ្តាវិនិយោគិនបរទេសគ្រប់ជាតិសាសន៍ ជាពិសេសអ្នកវិនិយោគចិនដែលពួកគាត់ឆក់ឱកាសចូលមកមុនគេ ដោយសារអ្នកវិនិយោគចិនច្រើនប្រកាន់យកទស្សនៈមួយដែលថាhigh risk high return ដែលមានន័យថា “ប្រថុយកាន់តែខ្ពស់ ផលចំណេញដែលបានមកវិញក៏កាន់តែខ្ពស់‟ ខណៈដែលវិនិយោគិននៅបណ្តាប្រទេសជឿនលឿនមួយចំនួនមានការគិតពិចារណាខ្លាំង មុននឹងចូលមកបណ្តាក់ទុនរកស៊ីផ្សេង។ ក្រៅពីជនជាតិចិន កម្ពុជាក៏មានសក្តានុពលខ្លាំងសម្រាប់អ្នកវិនិយោគបរទេស ដូចជាកូរ៉េ ជប៉ុន និងវិនិយោគិនអឺរ៉ុប ដែរ ដូចជាជនជាតិបារាំងក៏បានចូលមកបោះទុនជាបណ្តើរៗហើយ ប៉ុន្តែការវិនិយោគធ្វើឡើងទៅតាមវិស័យផ្សេងៗគ្នា ដូចជាវិស័យអចលនទ្រព្យ សំណង់ ហិរញ្ញវត្ថុ ដឹកជញ្ជូន ដែកថែប ឧស្សាហកម្ម និងបច្ចេកវិទ្យាជាដើម។

ទោះយ៉ាងណា លំហូរវិនិយោគបរទេសដែលហូរចូលមកយ៉ាងគំហុកនេះ ក៏មានផលប៉ះពាល់ដល់អ្នករកស៊ីតូចតាចក្នុងស្រុកដែរ ដោយសារភាគច្រើននៃអ្នកវិនិយោគក្នុងស្រុកពុំសូវមានលុយច្រើនដូចជនបរទេស ដូច្នេះកន្លែង ឬទីតាំងដែលល្អៗត្រូវបានវិនិយោគិនបរទេសចំណាយលុយទិញយកមុន ចំណែកវិនិយោគិនក្នុងស្រុកទិញបានតែនៅតំបន់ឆ្ងាយៗពីទីប្រជុំជនប៉ុណ្ណោះ។ ប៉ុន្តែទោះជាដូច្នេះក្ដី កត្តានេះវាបានជះឥទ្ធិពលទៅដល់អ្នកវិនិយោគក្នុងស្រុកឱ្យខិតខំពង្រឹង និងពង្រីកអាជីវកម្មរបស់ខ្លួនឱ្យបានទៅដល់ទីឆ្ងាយៗ និងជួយឱ្យសេដ្ឋកិច្ចមានកំណើនកាន់តែរឹងមាំថែមទៀតផងដែរ។

ទុនវិនិយោគក្នុងវិស័យសំណង់ និងអចលនទ្រព្យកាលពីឆ្នាំមុនមានទំហំជាង 6,400លានដុល្លារអាមេរិក និងរយៈពេល 8ខែនៃឆ្នាំ 2018នេះ មានទឹកប្រាក់ជិត3,000លានដុល្លារ។

នេះបើតាមរបាយការណ៍របស់ក្រសួងរៀបចំដែនដី នគរូបនីយកម្ម និងសំណង់៕

September 15, 2018

កត្តា 6យ៉ាងដែលជំរុញឱ្យមនុស្សវ័យក្មេងហ៊ានខ្ចីប្រាក់ធនាគារមកធ្វើអាជីវកម្ម

ការជំពាក់បំណុលធនាគារដើម្បីធ្វើអាជីវកម្មមិនមែនជារឿងអាក្រក់នោះទេ ប្រសិនបើអ្នកបានគិតច្បាស់លាស់ពីការបង្កើតមុខរបរផ្ទាល់ខ្លួន ឬចង់ក្លាយជាសហគ្រិនវ័យក្មេងដើម្បីដំណើរឆ្ពោះទៅរកវិថីជីវិតជោគជ័យទៅថ្ងៃអនាគត តែផ្ទុយទៅវិញប្រសិនជាអ្នកមិនបាន ឬមិនហ៊ានខ្ចីប្រាក់ធនាគារទេនោះ មនុស្សភាគច្រើននឹងចាយវាយខ្ជះខ្ជាយ ហើយអនាគតនឹងមិនមានសល់អ្វីជាដុំកំភួននោះឡើយ។

អ្នកជំនាញផ្នែកប្រឹក្សា និងវិភាគស្ថានភាពសេដ្ឋកិច្ច សេដ្ឋវិទូ ង៉ែត ជូ បានបង្ហាញពីលក្ខខណ្ឌល្អៗចំនួន6ចំណុចក្នុងការខ្ចីលុយធនាគារសម្រាប់បង្កើតរបរផ្ទាល់ខ្លួន ឬធ្វើអាជីវកម្មពេលវ័យនៅក្មេងដែលក្នុងនោះរួមមាន៖ 1.ធ្វើឱ្យអ្នកក្លាយជាមនុស្សដែលមានវិន័យខាងហិរញ្ញវត្ថុ គឺនៅពេលមានបំណុលជាប់ខ្លួន មនុស្សនឹងយល់ថា ខ្លួនមានកាតព្វកិច្ច និងភាពទទួលខុសត្រូវខ្ពស់ក្នុងការសងប្រាក់ទៅម្ចាស់បំណុលវិញ ដូច្នេះមនុស្សនឹងមានវិន័យខ្លាំងក្នុងការ-ចាត់ចែងលុយកាក់នោះ។

ចំណុចទី2. ធ្វើឱ្យអ្នកក្លាយជាមនុស្សកាន់តែមានវិន័យ និងភាពអំណត់ក្នុងការបំពេញការងារ។ ពេលខ្ចីប្រាក់មកវិនិយោគ មនុស្សតែងខ្វល់ខ្វាយពីសុវត្ថិភាពការងារ(Job Security) ក៏ដូចជាសួរខ្លួនឯងថាតើធ្វើយ៉ាងណាទើបមានការងារល្អជាងនេះ? មានប្រាក់ចំណូលច្រើនជាងនេះដើម្បីអាចខ្ចីប្រាក់បានច្រើនជាងសព្វថ្ងៃសម្រាប់យកទៅវិនិយោគ? ធ្វើយ៉ាងណាអាចទទួលបានចំណេះដឹងជំនាញបន្ថែមពីការងារសព្វថ្ងៃដើម្បីយកទៅពង្រឹងសមត្ថភាពក្នុងការធ្វើអាជីវកម្ម? ដែលសំណួរទាំងនេះនឹងជំរុញឱ្យមនុស្សបំពេញការងារដោយមិនខ្លាចនឿយហត់ព្រោះជាជីវិតការងារដែលមានបុព្វហេតុច្បាស់លាស់។

3.ធ្វើឱ្យអ្នកក្លាយជាមនុស្សដែលចេះបង្កើតក្តីស្រមៃសម្រាប់ជីវិតជារឿយ។ ជីវិតធ្វើការងារជាបុគ្គលិកយកប្រាក់ខែ មិនបានបង្ហាញផ្លូវថា តើអ្នកចង់ធ្វើអ្វីឱ្យពិតប្រាកដនោះទេ។ អ្នកពិបាកនឹងរកឃើញគោលដៅក្នុងជីវិតណាស់ តែបើចេះវិនិយោគអ្នកប្រហែលជាអាចដកបទពិសោធពីជីវិតបានច្រើន អ្នកនឹងស្គាល់ខ្លួនឯងកាន់តែច្បាស់ រហូតអាចឈានដល់ការបង្កើតក្តីស្រមៃសម្រាប់ជីវិតបានទៀតផង ព្រោះជីវិតអ្នកវិនិយោគត្រូវរៀនសូត្រជានិច្ចជាពិសេសរៀនសូត្រពីបុគ្គលជោគជ័យនានា។

4.ធ្វើឱ្យអ្នកចេះវិភាគពីផលចំណេញ-ខាត ហានិភ័យ និងរិះគិតពីដំណោះស្រាយ។ ពេលអ្នកខ្ចីប្រាក់ពីធនាគារយកមកវិនិយោគលើអាជីវកម្ម អ្នកអាចសួរខ្លួនឯងថា តើខ្ចីមកអាចចំណេញដែរឬទេសម្រាប់ការប្រាក់ប៉ុណ្ណឹង? ចុះបើខ្ចីប្រាក់ធនាគារមិនបាន តើត្រូវមានដំណោះស្រាយយ៉ាងណាដើម្បីបានប្រាក់មកធ្វើអាជីវកម្ម? តើជម្រើសនីមួយៗមានហានិភ័យអ្វីខ្លះប្រសិនបើការវិនិយោគមិនអាចទទួលបានផលចំណេញដូចការរំពឹងទុក? ជួនកាលអ្នកអាចសុំយោបល់ពីអ្នកដទៃ អ្នកនឹងទទួលបានបទពិសោធ និងចំណេះដឹងជាច្រើនពីសំណួរទាំងនេះ។

5.ធ្វើឱ្យអ្នកចេះជ្រើសរើសការសេពគប់ប្រភេទមិត្តភក្តិ និងសង្គមល្អ។ អ្នកបានខ្ចីប្រាក់ពីធនាគារយកមកធ្វើអាជីវកម្ម ដូច្នេះអ្នកនឹងមិនមានចំណាប់អារម្មណ៍សេពគប់មនុស្សដែលធ្វើការដើម្បីតែរស់ និងមានជីវិតសម្រាប់តែហ៊ឺហានោះទេ។ អ្នកខ្លះមានបុព្វហេតុផ្សេងគ្នា ពេលអ្នកនិយាយពីការវិនិយោគគេក៏មិនចូលចិត្តស្តាប់ដែរ។ រឿងនេះកើតឡើងដូចគ្នាពេលគេនិយាយពីការទិញទូរស័ព្ទបង់រំលស់អ្នកក៏មិនចូលចិត្តដែរ។ អ្នកក៏នឹងមិននិយមរាប់រកសង្គមមនុស្សដែលចូលចិត្តផឹកស៊ីអត់ប្រយោជន៏ដែរ។ អ្នកនឹងនិយមរាប់អានតែមនុស្សដែលចេះធ្វើអាជីវកម្មតែប៉ុណ្ណោះ។

និងចុងក្រោយទី6.ធ្វើឱ្យអ្នកចំណេញពេលវេលា និងមានសេរីភាពហិរញ្ញវត្ថុក្នុងវ័យក្មេង គឺត្រូវខ្ចីប្រាក់វិនិយោគលើអាជីវកម្មបណ្តើរ ធ្វើការបណ្តើរ ក្រៅពីផលចំណេញផ្នែកហិរញ្ញវត្ថុហើយ អ្នកនឹងអាចសន្សំបានបទពិសោធ និងចំណេះដឹងជាច្រើន។ ប្រការនេះធ្វើឱ្យសមត្ថភាពរបស់អ្នកកាន់តែខ្លាំង អ្នកនឹងទទួលបានសេរីភាពហិរញ្ញវត្ថុក្នុងការធ្វើអាជីវកម្មក្នុងវ័យក្មេង។ មានមនុស្សជាច្រើនចំណាយពេលក្នុងជីវិតការងារប្រហែលចន្លោះពី3-5ឆ្នាំដំបូងសប្បាយហ៊ឺហានឹងជីវិតនៅលីវ មានប្រាក់ខែចាយមិនជាប់កម្ចី មិនមានកាតព្វកិច្ច និងមិនមានវិន័យហិរញ្ញវត្ថុ។

ជាបទពិសោធផ្ទាល់របស់លោក លោកមានមិត្តភក្តិប្រភេទនេះច្រើន មកដល់ថ្ងៃនេះពួកគេនៅតែខ្វល់ខ្វាយពីសេរីភាពហិរញ្ញវត្ថុនៅឡើយ។ ពួកគេត្រូវធ្វើការយ៉ាងតិចចន្លោះពី10-20ឆ្នាំទៀត។ នេះជាប្រការដ៏គួរឱ្យអាណិត ព្រោះឮតែត្អូញត្អែរថាធុញថប់នឹងការងារសព្វថ្ងៃណាស់ ហើយបើឈប់នឹងអត់មានអ្វីចិញ្ចឹមកូនប្រពន្ធ។ល៕

September 15, 2018

វិស័យចិញ្ចឹមសត្វ និងជលផលក្នុងប្រទេស បង្ហាញការរីកចម្រើន

វិស័យកសិកម្មមានចំណែកនៅក្នុងសេដ្ឋកិច្ចកម្ពុជា 25%នៃផលិតកម្មក្នុងស្រុកសរុបរបស់កម្ពុជាហើយទទួលបានការយកចិត្តទុកដាក់ពីរាជរដ្ឋាភិបាល ធ្វើឱ្យការនាំចេញផលិតផលកសិកម្មកើនឡើងដល់ 5.13លានតោននៅឆ្នាំ2017 កើនបាន 4,7លានតោនបើធៀបទៅនឹងឆ្នាំ2016 ដែលជាសញ្ញាមួយបង្ហាញថា វិស័យនេះកំពុងស្ថិតនៅលើផ្លូវត្រូវស្របតាមគោលការណ៍ក្រសួងកសិកម្ម រុក្ខា ប្រមាញ់ និងនេសាទបានកំណត់។ នេះបើផ្អែកតាមសេចក្តីប្រកាសព័ត៌មានដែលបានបញ្ជាក់ក្នុងពិធីសម្ពោធពិព័រណ៍ស្តីអំពីផលិតកម្មចិញ្ចឹមសត្វ និងជលផលសម្រាប់ឆ្នាំ2018 (AGRI CAMBODIA 2018) របស់កម្ពុជា។

កម្ពុជាជាទីផ្សារជោគជ័យសម្រាប់ក្រុមហ៊ុនបរទេសដែលបានវិនិយោគលើការដាំដុះ និងកែច្នៃផ្លែឈើ ដំឡូងមី សណ្តែក និងគ្រាប់ពូជ ផលិតចំណីសត្វ ផលិតទឹកដោះ និងជលផល។ ក្នុងនោះផលិតកម្មបសុសត្វ និងជលផលនៅតែជាវិស័យសំខាន់របស់សេដ្ឋកិច្ចជាតិ។

គួរបញ្ជាក់ថា ការរៀបចំពិព័រណ៍ AGRI CAMBODIA 2018 គឺជាពិព័រណ៍ពាណិជ្ជកម្មធំជាងគេបង្អស់នៅកម្ពុជាដែលបង្ហាញពីឧបករណ៍គ្រឿងម៉ាស៊ីន និងផលិតផលបច្ចេកវិទ្យាថ្មីៗបំផុតក្នុងវិស័យកសិកម្ម ដូចជាគ្រាប់ពូជ គ្រាប់ធញ្ញជាតិ បន្លែ រុក្ខជាតិ សារធាតុគីមី និងផលិតផលកាពាររុក្ខជាតិ ជាដើមដែលមានស្ដង់ចូលរួមតាំងបង្ហាញគ្រប់បណ្តាផលិតផលកសិកម្មប្រមាណ 60មុខ និងផលិតផលផ្សេងៗប្រមាណ 500ម៉ាកដែលបានដាក់តាំងនាឱកាសនោះ។

លោក គិត សេង អនុរដ្ឋលេខាធិការក្រសួងកសិកម្ម រុក្ខា ប្រមាញ់ និងនេសាទបានលើកឡើងក្នុងពិព័រណ៍នេះថា នេះជាឱកាសមួយសម្រាប់ឱ្យសហគ្រិនទាំងអស់ពង្រីកទីផ្សារអាជីវកម្មរបស់ខ្លួនឱ្យទាន់សម័យតាមរយៈការច្នៃប្រឌិតបច្ចេកវិទ្យាចុងក្រោយ ផ្សារភ្ជាប់ជាមួយអតិថិជនដ៏មានសក្តានុពលប្រកបដោយប្រសិទ្ធភាព និងមានទស្សនទានអំពីទីផ្សារអាស៊ីអាគ្នេយ៍។

លោកបានបន្ដថា នៅឆ្នាំ2030 វិស័យកសិកម្មកម្ពុជានឹងឆ្ពោះទៅរកការធ្វើទំនើបកម្មកសិកម្មមានលក្ខណៈប្រកួតប្រជែងទីផ្សារ និងមាននិរន្តរភាពដើម្បីរួមចំណែកក្នុងការធានាបាននូវសន្តិសុខស្បៀងសុវត្ថិភាពអាហារូបត្ថម្ភសម្រាប់សុខុមាលភាពនៃប្រជាជនកម្ពុជា។

ជាមួយគ្នានេះដែរទឹកប្រាក់ 120លានអឺរ៉ូ ឬស្មើប្រមាណ 138លានដុល្លារសហរដ្ឋអាមេរិក នឹងត្រូវចំណាយលើការគាំទ្រ ការការពារធនធានជលផលនិងការលើកស្ទួយកម្រិតជីវភាពសហគមន៍នេសាទ តាមរយៈជំនួយរបស់សហភាពអឺរ៉ុប (EU) ផ្តល់ឱ្យកម្ពុជារយៈពេល 5ឆ្នាំ ពីឆ្នាំ2018-2022។

ជំនួយរបស់សហភាពអឺរ៉ុបលើវិស័យជលផលនេះ នឹងជួយជំរុញកម្រិតជីវភាពប្រជាសហគមន៍នេសាទ តាមរយៈការបណ្តុះបណ្តាលការចិញ្ចឹមត្រីតាមបែបវារីវប្បកម្ម ការកែច្នៃផលិតផលត្រីរបស់សហគមន៍នេសាទដើម្បីរកទីផ្សារជាដើម ម្យ៉ាងទៀត ជំនួយរបស់សហភាពអឺរ៉ុបនេះ ក៏ផ្តោតសំខាន់លើការអភិរក្សធនធានធម្មជាតិ តាមរយៈការសហការជាមួយរដ្ឋបាលជលផល ដើម្បីទប់ស្កាត់បទល្មើសនេសាទ។

សូមជម្រាបដែរថា តាមរយៈកម្មវិធីគាំទ្រមូលនិធិវិស័យជលផលសម្រាប់ឆ្នាំ2013 ដល់ឆ្នាំ2018សហភាពអឺរ៉ុបបានចំណាយទឹកប្រាក់ជាង 20លានអឺរ៉ូ ស្មើប្រមាណ 23លានដុល្លារសហរដ្ឋអាមេរិក។ ថវិកានេះបានគាំទ្រដល់គម្រោងចិញ្ចឹមត្រីតាមសហគមន៍ កែច្នៃធនធានជលផលដើម្បីរកទីផ្សារ និងជួយបណ្តុះបណ្តាលសមត្ថភាពមន្ត្រីជលផលផងដែរ។

យោងតាមនាយកដ្ឋានអភិវឌ្ឍន៍នេសាទនៃរដ្ឋបាលជលផលបានឱ្យដឹងថា បច្ចុប្បន្នសហគមន៍នេសាទនៅទូទាំងប្រទេសមានចំនួន 516សហគមន៍ ក្នុងខេត្តចំនួន20។ ក្នុងនោះសហគមន៍នេសាទតំបន់ទឹកសាបមានចំនួន 475សហគមន៍ ស្ថិតនៅក្នុងខេត្តចំនួន16។ រីឯសហគមន៍ទឹកប្រៃវិញមានចំនួន 41សហគមន៍នេសាទ ស្ថិតក្នុងខេត្តចំនួន4 នៅតាមតំបន់ឆ្នេរសមុទ្រ និងយោងតាមសិ្ថតិរបស់រដ្ឋបាល
ជលផលក៏បានឱ្យដឹងដែរថា ទិន្នផលត្រីដែលប្រជាជនប្រមូលបាន មានចំនួនប្រមាណ 500ពាន់តោន ទៅ600ពាន់តោនក្នុងមួយឆ្នាំ។ មន្ត្រីសហភាពអឺរ៉ុបផ្នែកកម្មវិធីវិស័យជលផលបានឱ្យដឹងទៀតថា ប្រជាពលរដ្ឋកម្ពុជាប្រមាណ 6លាននាក់កំពុងប្រកបរបរនេសាទ៕

September 15, 2018

កម្ពុជាមានតម្រូវការ 10ម៉ឺនបន្ទប់សណ្ឋាគារបន្ថែមទៀតនៅពេលខាងមុខ

ស្របពេលដែលកម្ពុជានឹងត្រូវធ្វើជាម្ចាស់ផ្ទះកីឡាអាស៊ានហ្គេមនៅឆ្នាំ2023ខាងមុខ ក្នុងអំឡុងពេល 5ឆ្នាំខាងមុខទៀតនោះគេរំពឹងថា ភ្ញៀវទេសចរនឹងចូលមកស្នាក់នៅកម្ពុជាយ៉ាងគំហុកដែលធ្វើឱ្យអ្នកវិនិយោគិនផ្នែកវិស័យទេសចរណ៍ត្រៀមខ្លួនសាងសង់បន្ទប់សណ្ឋាគារសម្រាប់ទេសចរស្នាក់នៅកាន់តែច្រើនថែមទៀត។

តាមការព្យាកររបស់ក្រសួងទេសចរណ៍បានបង្ហាញថា នៅឆ្នាំ2018នេះ កម្ពុជានឹងទទួលបានភ្ញៀវទេសចរអន្តរជាតិប្រមាណ 6.2លាននាក់ និងនៅឆ្នាំ2020 ប្រមាណជាជាង 7លាននាក់ហើយដល់ឆ្នាំ2030 កម្ពុជារំពឹងថានឹងទទួលបានទេសចរអន្តរជាតិប្រមាណជា 15លាននាក់ និងទេសចរជាតិប្រមាណជា 13លាននាក់។

ដើម្បីឆ្លើយតបនឹងកំណើនភ្ញៀវទេសចរនេះ កម្ពុជាត្រូវការសណ្ឋាគារប្រមាណជាង10ម៉ឺនបន្ទប់ថែមទៀត ក្នុងនោះមានសណ្ឋាគារប្រណីតលំដាប់ផ្កាយ4 និងផ្កាយ5 ប្រមាណ60ភាគរយ ស្មើនឹងប្រមាណ 6ម៉ឺនបន្ទប់ នៅទូទាំងប្រទេស ក្នុងនោះសម្រាប់ខេត្តព្រះសីហនុត្រូវការបន្ទប់សណ្ឋាគារជាង 3ម៉ឺនបន្ទប់បន្ថែមទៀត សណ្ឋាគារប្រណីតជាង2ម៉ឺនបន្ទប់ ដើម្បីឆ្លើយតបនឹងតម្រូវការកំណើនភ្ញៀវទេសចរអន្តរជាតិប្រមាណ 2លាននាក់ និងទេសចរជាតិប្រមាណ 3លាននាក់នៅឆ្នាំ2030។

ឯកឧត្តម ថោង ខុន រដ្ឋមន្ត្រីក្រសួងទេសចរណ៍មានប្រសាសន៍ទៅដល់វិនិយោគិនចិន និងអន្តរជាតិប្រព័ន្ធផ្សព្វផ្សាយ និងស្ថានីយទូរទស្សន៍មកពីអគ្គនាយកដ្ឋានវិទ្យុ ភាពយន្ត និងទូរទស្សន៍របស់ចិននៅក្នុងពិធីបើកសម្ពោធ “សណ្ឋាគារព្រីនស៍ថាម‟ (Prince Times Hotel) និងការបើកដំណើរការថតខ្សែភាពយន្ត“ពន្លកស្នេហ៍រីកលើដីកម្ពុជា‟ កាលពីសប្តាហ៍មុនដោយឯកឧត្ដមបានបង្ហាញនូវការគាំទ្រចំពោះគម្រោងវិនិយោគលើវិស័យទេសចរណ៍ និងអំពាវនាវឱ្យមានការវិនិយោគបន្ថែមទៀតប្រកបដោយគំនិតច្នៃប្រឌិត និងទទួលខុសត្រូវខ្ពស់ គោរពតាមបទដ្នានបរិស្ថាន និងគោលការណ៍ការណែនាំរបស់រាជរដ្ឋាភិបាលក្នុងការគ្រប់គ្រងតំបន់ឆ្នេរសមុទ្រដើម្បីឆ្លើយតបនឹងកំណើនភ្ញៀវទេសចរ និងនិរន្តរភាពទេសចរណ៍នាពេលបច្ចុប្បន្ន និងពេលអនាគត។

លោក ហូ វណ្ឌី ទីប្រឹក្សាសមាគមទីភ្នាក់ងារទេសចរណ៍កម្ពុជា មានប្រសាសន៍ទទួលស្គាល់ថា ប្រសិនបើទៅថ្ងៃអនាគតលំហូរភ្ញៀវទេសចរកាន់តែរីកចម្រើនខ្លាំងដូចពេលបច្ចុប្បន្ន នោះកម្ពុជាប្រាកដជាត្រូវការបន្ទប់ស្នាក់នៅ ក៏ដូចជាសណ្ឋាគារទំនើបៗរួមនិងផ្ទះសំណាក់ចំនួន 10ម៉ឺនបន្ទប់បន្ថែមមែន។ លោកអះអាងថា កត្តាដែលនាំឱ្យភ្ញៀវទេសចរនៅតែបន្តមកទស្សនា ហើយអ្នកវិនិយោគនៅតែធ្វើការបណ្តាក់ទុនរកស៊ីនៅកម្ពុជា ដែលធ្វើឱ្យកម្ពុជានៅតែបន្តមានកំណើនទៅបាននោះ អាស្រ័យទៅលើចំណុច 4យ៉ាង គឺ1.កត្តានយោបាយក្នុងប្រទេស ប្រសិនបើកម្ពុជានៅតែមានស្ថិរភាពនយោបាយដូចពេលបច្ចុប្បន្ន វាជាចំណុចល្អប្រសើរមួយក្នុងការផ្តល់ទំនុកចិត្តទៅដល់វិនិយោគិនបរទេស និងអ្នកទេសចរឱ្យចូលមកទស្សនាកម្ពុជាកាន់តែច្រើនឡើងៗបន្ថែមទៀតទៅថ្ងៃអនាគត។ 2.កត្តាសេដ្ឋកិច្ចពិភពលោក បើសិនជាសេដ្ឋកិច្ចក្នុងតំបន់ក៏ដូចជាសេដ្ឋកិច្ចពិភពលោកនៅតែរីកចម្រើន មិនមានជម្លោះសេដ្ឋកិច្ចរវាងប្រទេសមួយទៅប្រទេសមួយ និងធ្វើឱ្យកំណើនសេដ្ឋកិច្ចប្រជាជននៅលើពិភពលោកមានភាពល្អប្រសើរ ហើយជាកត្តាធ្វើឱ្យមនុស្សធ្វើដំណើរទេសចរណ៍ចេញទៅក្រៅប្រទេសកាន់តែច្រើន។ 3.កត្តាធម្មជាតិ ប្រសិនបើពិភពលោក និងប្រទេសកម្ពុជាយើងមិនមានគ្រោះធម្មជាតិទេនោះ ប្រជាជនក្នុងពិភពលោកពួកគាត់នឹងធ្វើដំណើរទេសចរណ៍ចេញក្រៅប្រទេស ដែលធ្វើឱ្យប្រទេសនីមួយត្រូវត្រៀមបន្ទប់សណ្ឋាគារទុកសម្រាប់ទទួលពួកគេ
កាន់តែច្រើនឡើង។ និងទី4.កត្តាច្បាប់ គឺថារដ្ឋាភិបាលកម្ពុជាមានការអនុគ្រោះផ្នែកច្បាប់ជាច្រើនក្នុងការលើកទឹកចិត្តជនបរទេសដែលចូលមកវិនិយោគ បណ្តាក់ទុនលើគ្រប់វិស័យនៅកម្ពុជា ដែលធ្វើឱ្យអ្នកជំនួញបរទេសទាំងនោះចូលមកបណ្តាក់ទុនរកស៊ី ហើយត្រូវការបន្ទប់ស្នាក់នៅនៅកម្ពុជាកាន់តែច្រើនឡើងដែរ។

ទោះយ៉ាងណាលោកអះអាងថា យោងតាមលំហូរទេសចរណ៍ក៏ដួចជាវិនិយោគិនបរទេសដែលចូលមកក្នុងប្រទេសកម្ពុជានាពេលបច្ចុប្បន្ននេះ កម្ពុជានៅមិនទាន់មានការខ្វះខាតបន្ទប់សណ្ឋាគារឬផ្ទះសំណាក់នៅឡើយទេ លើកលែងតែមានព្រឹត្តិការណ៍ធំកើតឡើង។ ព្រឹត្តិការណ៍ធំដែលថានេះ គឺដូចជានៅឆ្នាំ2023 ខាងមុខកម្ពុជានឹងធ្វើជាម្ចាស់ផ្ទះនៃកីឡាអាស៊ានហ្គេម ពេលនោះភ្ញៀវទេសចរនឹងសម្រុកចូលមកស្នាក់នៅកម្ពុជាមួយរយៈ ដែលធ្វើឱ្យអ្នកវិយោគលើវិស័យទេសចរណ៍ត្រូវត្រៀមសណ្ឋាគារទុកជាមុនដែរ។ ដោយសារកត្តានេះហើយ បច្ចុប្បន្នគេសង្កេតឃើញថា ការវិនិយោគលើវិស័យសណ្ឋាគារ និងខុនដូ ពិសេសខុនដូរបស់វិនិយោគិនចិនដែលកំពុងសាងសង់នៅក្នុងរាជធានីភ្នំពេញ និងនៅតាមតំបន់ឆ្នេរសមុទ្របានក្លាយជាតំបន់គោលដៅសម្រាប់ការស្នាក់នៅរបស់ភ្ញៀវទេសចរបរទេសទាំងនោះ។

ជាមួយគ្នានេះដើម្បីទាក់ទាញអ្នកទេសចរឱ្យបានកាន់តែច្រើន លោកបានស្នើឱ្យរដ្ឋាភិបាលរៀបចំសុវត្ថិភាព សណ្តាប់ធ្នាប់ ក៏ដូចជាបរិដ្ឋាននៅតាមដងផ្លូវជាតិ ផ្លូវធ្វើដំណើរផ្សេងៗក្នុងក្រុងភ្នំពេញ និងផ្លូវទៅកាន់បណ្តាខេត្តទេសចរណ៍ឱ្យកាន់តែប្រសើរឡើងថែមទៀត។ បច្ចុប្បន្នទោះជាក្រសួងទេសចរណ៍បានរៀបចំយុទ្ធសាស្ត្រប្រឡងប្រណាំងទីក្រុងស្អាតក៏ដោយ ក៏នៅកម្ពុជាមានទីក្រុងមួយចំនួនបានស្អាតឡើង និងមួយចំនួនទៀតមិនទាន់បានស្អាតនៅឡើយ ដែលបញ្ហានេះតម្រូវឱ្យមានការយកចិត្តទុកដាក់ កែលម្អឱ្យមានស្ថានភាពល្អប្រសើរឡើងថែមទៀត ទើបអាចទាក់ទាញភ្ញៀវទេសចរមកកម្សាន្តកម្ពុជាបានកាន់តែច្រើនឡើងថែមទៀតដែរ។

គួរបញ្ជាក់ថា បច្ចុប្បន្ននេះកម្ពុជាមានសណ្ឋាគារប្រមាណ 800កន្លែង ស្មើនឹង 46ពាន់បន្ទប់ក្នុងនោះសណ្ឋាគារប្រណីតមានប្រមាណជាជាង 2ម៉ឺនបន្ទប់។ ដោយឡែកខេត្តព្រះសីហនុមានសណ្ឋាគារ 69កន្លែងស្មើនឹងជាង 4ពាន់បន្ទប់ ក្នុងនោះសណ្ឋាគារប្រណីតទើបមានប្រមាណជាង1000បន្ទប់ប៉ុណ្ណោះ៕

September 15, 2018

UEFA នឹងរៀបចំយុទ្ធនាការលំដាប់ទី3 សម្រាប់ក្លិបនៅអឺរ៉ុប ពីរដូវកាលឆ្នាំ2021-2022

សហព័ន្ធកីឡាបាល់ទាត់ទ្វីបអឺរ៉ុប ហៅកាត់ថា UEFA នឹងត្រូវចាប់ផ្តើមយុទ្ធនាការលំដាប់ទី3 សម្រាប់ក្លិបអឺរ៉ុប ពីចាប់ពីរដូវកាលឆ្នាំ2021-2022។ នេះបើយោងតាមការប្រកាសរបស់លោក Andrea Agnelli ដែលជាប្រធានសហព័ន្ធក្លិបអឺរ៉ុប (ECA)។

ក្នុងពេលបើកកិច្ចប្រជុំរបស់លោកនៅឯសន្និបាតរយៈពេល 2ឆ្នាំម្តងរបស់ ECA ក្នុងទីក្រុង Split កាលពីថ្ងៃអង្គារ ប្រធានក្លិប Juventus រូបនេះបានឱ្យដឹងថា៖ «ស្របពេលដែលកំពុងរង់ចាំការអនុម័តរបស់គណៈកម្មាធិការប្រតិបត្តិរបស់ UEFA ភ្លើងខៀវត្រូវបានផ្តល់ឱ្យដើម្បីយុទ្ធនាការលំដាប់ទី3 និងដើម្បីនាំយកក្លិបសរុបចំនួន96 ចូលរួមក្នុងរដូវកាលឆ្នាំ2021-2022»។ លោក Agnelli ប្រធានសហព័ន្ធក្លិបទ្វីបអឺរ៉ុប បានប្រាប់សមាជិករបស់ខ្លួនក្នុងកិច្ចប្រជុំមួយក្នុងទីក្រុង Split ថា វានឹងមានយុទ្ធនាការលំដាប់ទី3 ដែលនឹងត្រូវរៀបចំឡើងរួមជាមួយនឹងក្របខ័ណ្ឌដែលមានស្រាប់ដូចជា Champions League ដែលជាយុទ្ធនាការលំដាប់ទី1 និងក្របខ័ណ្ឌលំដាប់ទី2 Europa League។ ក្រោយមក ECA បានបញ្ជាក់ក្នុងសេចក្តីថ្លែងការណ៍មួយថា សំណើនេះគឺជាមានគោលបំណងក្នុងការកាត់បន្ថយចំនួនក្រុមក្នុងក្របខ័ណ្ឌ Europa League វគ្គចែកពូលពី48 នៅត្រឹម 32ក្រុម។ ក្របខ័ណ្ឌ Champions League នឹងរក្សានៅដដែលជាមួយនឹងក្រុមចំនួន32 ក្នុងវគ្គចែកពូល។ អឺរ៉ុប ធ្លាប់មានយុទ្ធនាការក្របខ័ណ្ឌលំដាប់ទី3 សម្រាប់ក្រុមឈ្នះពានក្នុងស្រុកនានា ដែលមានឈ្មោះថា Cup Winners’ Cup ប៉ុន្តែ ពាននេះត្រូវបានលុបចោលទៅវិញក្នុងឆ្នាំ1999។ បច្ចុប្បន្ន ក្រុមឈ្នះពាន នឹងឈានទៅកាន់ក្របខ័ណ្ឌ Europa League តែម្តង៕

ប្រភពពី៖ The Guardian

September 14, 2018

Vettel ចង់ផ្តល់ភាពជូរចត់ដល់ Hamilton នៅលើទឹកដីសិង្ហបុរី ចុងសប្តាហ៍នេះ

កីឡាករ Sebastian Vettel កំពុងតែស្ថិតក្រោមសម្ពាធ ក្នុងការកាត់បន្ថយពិន្ទុនាំមុខរបស់កីឡាករ Lewis Hamilton នៅលើតារាងពិន្ទុរួម ក្នុងព្រឹត្តិការណ៍ Singapore Grand Prix នៅចុងសប្តាហ៍នេះ ក៏ដូចជាលុបចោលការចងចាំដ៏ឈឺចាប់របស់ក្រុម Ferrari ពីការប្រណាំងកាលពីឆ្នាំមុនដែរ។

ជាធម្មតា ក្រុម Mercedes ជួបការលំបាកនៅលើទីលានក្រោមពន្លឺថ្ងៃដ៏ក្តៅ Marina Bay Circuit ប៉ុន្តែ កាលពីឆ្នាំ2017 Hamilton បានទទួលជ័យជម្នះពីការចេញដំណើរពីលេខរៀងទី5 លើទីលាន ក្រោយពីទាំងក្រុម Ferrari និងកីឡាករ Max Verstappen របស់ក្រុម Red Bull សុទ្ធសឹងបានជួបបញ្ហាដូចគ្នានៅលើទីលាន។ ក្រុម Ferrari និង Vettel នៅតែមានការជឿជាក់ ក្រោយពី Hamilton បានទទួលជ័យជម្នះក្នុងការប្រណាំងនៅលើទីលាន Mozaក្នុងប្រទេសអ៊ីតាលី កាលពី 10ថ្ងៃមុន បើទោះបីក្រុមមួយនេះ បានដណ្តើមយកការនាំមុខមុននៅលើទីលានប្រណាំងរបស់ខ្លួនក៏ដោយ។ ការជួបបញ្ហារបស់ Vettel ក្នុងជុំទី1 ក្រោយពីការប៉ះទង្គិចជាមួយនឹង Hamilton បានធ្វើឱ្យកីឡាករអង់គ្លេសរូបនេះ បង្កើនពិន្ទុនាំមុខរបស់គេនៅលើតារាងជើងឯកផ្នែកបើកបររហូតដល់ទៅ 30ពិន្ទុ ហើយកីឡាករ Vettel សញ្ជាតិអាល្លឺម៉ង់ បានសន្យាថា នឹងធ្វើការស្តារមុខមាត់ត្រឡប់មកវិញ នៅលើទឹកដីសិង្ហបុរី ជាកន្លែងដែលរូបគេធ្លាប់បានឈ្នះការប្រណាំងចំនួន 4លើក។

ក្រោយពីការប្រណាំងនៅអ៊ីតាលី Vettel បានឱ្យដឹងថា៖ «ពិតណាស់ វាគឺជារឿងដ៏ខកចិត្តមួយនៅពេលនេះ។ ប៉ុន្តែខ្ញុំនឹងប្តូរទំព័រថ្មី និងផ្តោតលើការប្រណាំងនៅសិង្ហបុរី។ ខ្ញុំចូលចិត្តកន្លែងនោះ ហើយខ្ញុំរីករាយក្នុងការទៅប្រកួតនៅទីនោះ»។ ការប្រណាំងនេះ នឹងចាប់ផ្តើមនៅម៉ោង4:09រសៀល (ម៉ោងនៅកម្ពុជា)៕

ប្រភពពី៖ Channel News Asia

September 14, 2018

ក្រសួងអប់រំនឹងប្រើពេល 1សប្តាហ៍ដើម្បីដោះស្រាយបញ្ហាមិនសុខចិត្តរបស់សិស្សទូទាំងប្រទេស

បន្ទាប់ពីមានការកើតទុក្ខមិនសុខចិត្តពីសំណាក់សិស្សានុសិស្សនៅទូទាំងប្រទេសចំពោះលទ្ធផលនៃការប្រឡងមធ្យមសិក្សាទុតិយភូមិ ជាពិសេសលើមុខវិជ្ជាគណិតវិទ្យានោះ ក្រសួងអប់រំ យុវជន និងកីឡា បានចេញសេចក្តីប្រកាសឱ្យអ្នកចង់តវ៉ាទាំងអស់ដាក់ពាក្យបណ្តឹងមកកាន់ក្រសួងដោយផ្ទាល់។

ស្របពេលជាមួយគ្នានេះដែរ ក្រសួងអប់រំ យុវជន និងកីឡា ក៏បានចេញសេចក្តីប្រកាសកាលពីថ្ងៃពុធផងដែរថា ក្រសួងនឹងរៀបចំគណៈកម្មការកោសល្យវិច័យ ដើម្បីពិនិត្យដោះស្រាយឡើងវិញចំពោះការមិនពេញចិត្ត លើលទ្ធផលនៃការប្រឡងមធ្យមសិក្សាទុតិយភូមិ សម័យប្រឡង 20សីហា ឆ្នាំ2018 កន្លងទៅនោះ។

ចំពោះគណៈកម្មការកោសល្យវិច័យនេះ នឹងចាប់ផ្តើមដំណើរការងារចាប់ពីថ្ងៃទី12 ខែកញ្ញាទៅ ដោយចំណាយពេល 1សប្តាហ៍ដើម្បីដោះស្រាយ។

មជ្ឈដ្ឋានជាច្រើនកំពុងតែតាមដានមើលយ៉ាងល្អិតល្អន់ចំពោះការដោះស្រាយបញ្ហានេះ ខណៈសិស្សពូកែជាច្រើន រួមទាំងសិស្សពូកែទូទាំងប្រទេសផ្នែកគណិតវិទ្យាផង ក៏បានចូលរួមតវ៉ាផងដែរ ចំពោះលទ្ធផលនៃការផ្ដល់ពិន្ទុគណិតវិទ្យាដែលភាគច្រើនមានផលប៉ះពាល់ថា ពួកដែលបាននិទ្ទេស F គឺដោយសារការទាញថយនៃពន្ទុគណិតវិទ្យាដែលធ្វើឱ្យលទ្ធផលការប្រឡងទាំងមូលរបស់គេធ្លាក់ចុះ ដែលធ្វើឱ្យពួកគេបាត់បង់ឱកាសក្នុងការប្រឡងយកអាហារូបករណ៍ ប្រឡងចូលសាលាល្បីៗ ឬប្រឡងទៅសិក្សានៅក្រៅប្រទេសជាដើម៕

September 14, 2018

ជិតចប់ត្រីមាសទី3 ឆ្នាំ2018នេះ ការប្រមូលពន្ធកើនឡើង12.58%ធៀបនឹងឆ្នាំ2017

បើគិតក្នុងរយៈពេលដូចគ្នា ចាប់ពីខែមករា ដល់ខែសីហា ឆ្នាំ2018 អគ្គនាយកដ្ឋានពន្ធដារទទួលបានចំណូលពន្ធ-អាករគ្រប់ប្រភេទដែលប្រមូលបានប្រមាណ 168លានដុល្លារអាមេរិក ស្មើនឹង12.58%។ នេះបើយោងសេចក្ដីប្រកាសព័ត៌មានរបស់អគ្គនាយកដ្ឋានពន្ធដារ កាលពីរសៀលថ្ងៃទី១០ ខែកញ្ញា។

ក្នុងខែសីហា ឆ្នាំ2018 លទ្ធផលប្រមូលចំណូលពន្ធដែលអគ្គនាយកដ្ឋានពន្ធដារទទួលបាន(តាមប្រព័ន្ធគ្រប់គ្រងទិន្នន័យចំណូលអនឡាញ(online)របស់អគ្គនាយកពន្ធដារ) មានចំនួន 587.63ប៊ីលានរៀល(ប្រមាណជា 146.91លានដុល្លារអាមេរិក) ស្មើនឹង 7.64% នៃផែនការច្បាប់ឆ្នាំ2018។

ឯកឧត្តម គង់ វិបុល អគ្គនាយកពន្ធដារ បញ្ជាក់ថា បើប្រៀបធៀបនឹងចំណូលកាលពីខែសីហា ឆ្នាំ2017(តាមប្រព័ន្ធគ្រប់គ្រងទិន្នន័យចំណូលអនឡាញ)ឃើញថា ការប្រមូលពន្ធ-អាករគ្រប់ប្រភេទក្នុងខែសីហា ឆ្នាំ2018នេះកើនឡើងចំនួន 74.27ប៊ីលានរៀល (ប្រមាណ 18.57លានដុល្លារអាមេរិក) កំណើន ស្មើនឹង14.47%។

ឯកឧត្តមបានឱ្យដឹងទៀតថា ចំណូលសរុបរយៈពេល 8ខែ ដើមឆ្នាំ2018 នេះអគ្គនាយកដ្ឋានពន្ធដារ ប្រមូលចំណូលពន្ធ-អាករគ្រប់ប្រភេទបានចំនួន 6013.20ប៊ីលានរៀល (ប្រមាណជា1503.29លានដុល្លារអាមេរិក) ស្មើនឹង 78.15% នៃផែនការច្បាប់កំណត់។

បើប្រៀបធៀបនឹងរយៈពេលដូចគ្នាក្នុងឆ្នាំ2017ឃើញថា ការប្រមូលពន្ធ-អាករគ្រប់ប្រភេទក្នុង រយៈពេល 8ខែ ឆ្នាំ2018 មានការកើនឡើងចំនួន 671.89ប៊ីលានរៀល(ប្រមាណ 168លានដុល្លារអាមេរិក) កំណើនស្មើនឹង12.58%។

អគ្គនាយកពន្ធដារបានរំពឹងថា ចំណូលពន្ធអាករគ្រប់ប្រភេទសម្រាប់ឆ្នាំ2018 អាចប្រមូលបានគ្រប់ផែនការកំណត់ដោយច្បាប់។ ឯកឧត្តមក៏បានណែនាំបន្ថែមដល់គ្រប់អង្គភាពឱ្យបន្តខិតខំពង្រឹងការអនុវត្តច្បាប់វិន័យការងារ និងត្រូវមានភាពទន់ភ្លន់ តែម៉ឺងម៉ាត់ដោយផ្អែកលើទិដ្ឋភាពច្បាប់ក្នុងការឆ្លើយតបទៅកាន់អ្នកជាប់ពន្ធ សំដៅឱ្យពួកគាត់រីករាយទទួលយក និងស្ម័គ្រចិត្តបង់ពន្ធគ្រប់ៗគ្នាធ្វើយ៉ាងណាកាត់បន្ថយជាអតិបរមានូវការរអ៊ូរទាំរបស់អ្នកជាប់ពន្ធ និងផ្តល់កិច្ចសហការល្អ។

ទន្ទឹមនេះអគ្គនាយកដ្ឋានពន្ធដារបានដាក់ចេញនូវវិធានការមួយចំនួនដូចជា បន្តអនុវត្តប្រកបដោយប្រសិទ្ធភាពខ្ពស់ថែមទៀតសម្រាប់ឆ្នាំចុងក្រោយនេះនូវយុទ្ធសាស្ត្រកៀរគរចំណូលរយៈពេលមធ្យមរបស់រាជរដ្ឋាភិបាលឆ្នាំ2014-2018 ការរៀបចំកែសម្រួលយន្តការបង្វិលសងអាករលើតម្លៃបន្ថែមឱ្យបានកាន់តែប្រសើរឡើង។

លើសពីនេះទៀត វិធានការបន្ទាប់គឺ សហការជាមួយអគ្គនាយកដ្ឋានគោលនយោបាយនៃក្រសួងសេដ្ឋកិច្ច និងហិរញ្ញវត្ថុ និងស្ថាប័នពាក់ព័ន្ធដើម្បីរៀបចំយុទ្ធសាស្ត្រកែទម្រង់ពន្ធដារដោយផ្តោតការយកចិត្តទុកដាក់ជាសំខាន់លើការរៀបចំយុទ្ធសាស្ត្រកៀរគរចំណូលរយៈពេលមធ្យមរបស់រាជរដ្ឋាភិបាលឆ្នាំ2019-2023 និងការលើកទឹកចិត្តពន្ធចំពោះវិស័យធុរកិច្ចមួយចំនួន៕

September 13, 2018

Author: ធឿន មករា