Author: ធឿន មករា

ចិញ្ចឹមមេជ្រូក 1ក្បាលអាចបង្កើតកូនលក់បាន 1,000ដុល្លារក្នុងមួយឆ្នាំ
ការចិញ្ចឹមជ្រូកយកកូនលក់ជារបរគួបផ្សំមួយទៀតបន្ទាប់ពីការធ្វើស្រែចម្ការ ឬការងារចម្បងផ្សេងទៀត ដែលជួយឱ្យគ្រួសារកសិករអាចរកចំណូលបន្ថែមបានច្រើនគួរសម និងជួយឱ្យជីវភាពរស់នៅរបស់គាត់កាន់តែប្រសើរឡើងពីមួយឆ្នាំទៅមួយឆ្នាំទៀតផង។
លោក អឿន សុខរ៉ា ជាគ្រូបង្រៀនមុខវិជ្ជាភូមិវិទ្យានៅវិទ្យាល័យមោងឫស្សី បានមានប្រសាសន៍ថា លោកមិនមែនមានការងារត្រឹមតែជាគ្រូបង្រៀនប៉ុណ្ណោះទេ ប៉ុន្តែលោកថែមទាំងមានដីធ្វើស្រែចំនួន2ហិកតាដូចកសិករក្នុងភូមិផ្សេងៗទៀតដែរ ប៉ុន្តែរបរទាំង 2នេះគ្រាន់តែរកចំណូលសម្រាប់ដោះស្រាយជីវភាពប្រចាំថ្ងៃប៉ុណ្ណោះ ហើយដើម្បីឱ្យមានប្រាក់ចំណូលបន្ថែមទៀតសម្រាប់ទិញសម្ភារទាន់សម័យប្រើប្រាស់នឹងគេ លោកបានឆ្លៀតពេលចិញ្ចឹមមេជ្រូកយកកូនលក់ ដែលធ្វើឱ្យអាចរកចំណូលបានច្រើនគូរសមថែមទៀត ធ្វើឱ្យលោកអាចមានលទ្ធភាពទិញដីធ្វើផ្ទះនៅ ទិញគោយន្តធ្វើស្រែ ក្លាយជាគ្រួសារមានជីវភាពល្អប្រសើរមួយនៅក្នុងភូមិម្រះព្រៅ ឃុំជ្រៃ ស្រុកមោងឫស្សី ខេត្តបាត់ដំបង។
លោក អឿន សុខរ៉ា កំពុងលាយចំណីជ្រូក
លោកបានបញ្ជាក់ថា គ្រួសារលោកបានចិញ្ចឹមមេជ្រូកយកកូនលក់នេះតាំងពីឆ្នាំ2009មកម៉្លេះ ដែលរបរនេះលោកចេះតៗគ្នាពីអ្នកចិញ្ចឹមក្នុងភូមិ ដោយកាលពីដំបូងលោកចិញ្ចឹមមេជ្រូកចំនួន 4ក្បាល ដែលធ្វើឱ្យអាចរកចំណូលបានប្រមាណជា4,000ដុល្លារដែរក្នុងមួយឆ្នាំៗ ហើយគិតៗទៅជ្រូកមេមួយក្បាលជាមធ្យមអាចជួយរកចំណូលឱ្យម្ចាស់បានចំនួន 1,000ដុល្លារក្នុងមួយឆ្នាំ។ លោកថា ជាទូទៅរយៈពេល 5ខែ មេជ្រូកនឹងកើតកូនម្តងបានចំនួនពី12 ទៅ15ក្បាល ហើយនៅពេលកូនជ្រូកអាយុបាន30 ទៅ35ថ្ងៃ វានឹងមានទម្ងន់ប្រហែល8-10គីឡូក្រាមក្នុងមួយក្បាល ដែលយើងអាចចាប់លក់បានក្នុងតម្លៃចន្លោះពី20 ទៅ25ម៉ឺនរៀលក្នុងមួយក្បាល អាស្រ័យទៅលើហាងឆេងទីផ្សារឡើងថ្លៃ ឬចុះថ្លៃសម្រាប់កសិករដែលទិញយកទៅចិញ្ចឹមយកសាច់លក់បន្តទៀត។
ទោះយ៉ាងណា ការចិញ្ចឹមជ្រូកមេយកកូនលក់នេះទាមទារឱ្យយើងមានការយកចិត្តទុកដាក់ និងមានការថែទាំខ្លាំងទៅលើការផ្តល់ចំណីអាហារ ការថែរក្សាអនាម័យការថែរក្សាសុខភាពជ្រូក និងយល់ដឹងពីវិធីសាស្ត្រចាក់ថ្នាំបង្ការ ថ្នាំព្យាបាល ឬវ៉ាក់សាំងការពារជំងឺផ្សេងៗទៀតផងដែរ។ ឧទាហរណ៍ មួយសប្តាហ៍នៅមុនពេលមេជ្រូកបង្កើតកូន គេត្រូវចាក់ថ្នាំទម្លាក់សត្វល្អិតចោលម្តង ហើយត្រូវផ្តល់ចំណីណាដែលជំនួយកម្លាំងដើម្បីឱ្យមេជ្រូកមានកម្លាំងបង្កើតកូន និងមានទឹកដោះច្រើនឱ្យកូនបៅ។ លុះដល់ដំណាក់កាលកើតកូន គេត្រូវចាក់ថ្នាំឱ្យស្បូនជ្រូកបើកជាជំនួយឱ្យវាកើតកូនបានលឿន និងមានសុខភាពល្អផងដែរ ដែលថ្នាំជំនួយក្នុងការបង្កើតកូននេះ គេត្រូវចាក់ឱ្យវាបន្ទាប់ពីវាកើតបានកូនមួយមុនគេ។ ជាមួយគ្នានេះគេត្រូវចាក់ថ្នាំផ្សះការពារមេរោគឆ្លងផងដែរ។ ពេលចាក់ថ្នាំរួច គេត្រូវបង្កាត់ភ្នក់ភ្លើងនៅក្បែវា ឬដាក់អំពូលភ្លើងកម្ដៅ ហើយបើគ្មានអំពូលភ្លើងទេ គេត្រូវក្រាលចំបើង ឬរកក្រណាត់ចាស់ៗយកមកក្រាលឱ្យមេជ្រូកដេក ដើម្បីឱ្យមានភាពកក់ក្តៅ បង្ការខ្លាចក្រែងជ្រូកកើតជំងឺផ្តាសាយ និងជំងឺផ្សេងៗទៀត។
បន្ទាប់ពីវាកើតកូនអស់ កសិករត្រូវកាត់ធ្មេញកូនជ្រូកទាំងនោះចោល ដើម្បីកុំឱ្យវាខាំគ្នា ឬខាំដោះមេវានៅពេលបៅ ព្រោះពេលណាវាខាំដោះមេវាហើម មេវានឹងលែងឱ្យបៅមិនខាន។ ដំណាក់កាលបន្ទាប់ គេត្រូវកាត់កន្ទុយកូនជ្រូកទាំងនោះចោលទៀត ព្រោះថាកន្ទុយវាត្រូវបានអ្នកជំនាញរកឃើញថា មានញាណពិសេសធ្វើឱ្យកូនជ្រូកឆាប់ភ្ញាក់ដឹងខ្លួន ដេកមិនបានយូរនៅពេលឮសម្លេងអ្វីមួយ ដែលជាហេតុធ្វើឱ្យកូនជ្រូកមិនសូវធំធាត់ល្អ ឬធំធាត់យឺត ឬក្រធំនាំឱ្យយើងខាតចំណី និងពេលវេលាក្នុងការចិញ្ចឹមវា ប៉ុន្តែកុំភ្លេចចាក់ថ្នាំផ្សះឱ្យវាផងពេលកាត់ធ្មេញ និងកាត់កន្ទុយវារួច ដោយត្រូវយកថ្នាំក្រហមមកលាបកន្ទុយ និងផ្ចិត វាដើម្បីឱ្យឆាប់ជាសះពីមុខរបួស។
កូនជ្រូកកំពុងបៅ
ក្រៅពីវិធីសាស្ត្រខាងលើ កសិករត្រូវលាងសម្អាតទ្រុងជាប្រចាំ តែមិនត្រូវលាងកូនជ្រូកនោះទេ ព្រោះថាកូនជ្រូកនៅតូច ស្បែកវានៅស្តើងដែលងាយកើតជំងឺខ្លាំងណាស់ពេលអាកាសធាតុក្តៅ ហើយបើយើងយកកូនជ្រូកមកលាង វាអាចនឹងឈឺ ដោយសារវាមិនទាន់សុំានឹងអាកាសធាតុក្តៅ ហើយត្រជាក់ភ្លាមប៉ុន្តែបើសិនជាខ្លួនកូនជ្រូកប្រឡាក់លាមកវាច្រើន យើងអាចលាងសម្អាតវាបាន ដោយយកសាប៊ូម្សៅដុសលាងសម្អាតតាមធម្មតា ប៉ុន្តែពេលលាងរួច ត្រូវយកក្រណាត់មកជូតឱ្យស្អាត រួចសឹមលែងវាចូលទ្រុងវិញ។ រហូតដល់កូនជ្រូកអាយុបាន 15ថ្ងៃ គេអាចលាងសម្អាត និងងូតទឹកឱ្យកូនជ្រូកបានហើយ និងក្រៅពីថែររក្សាអនាម័យហើយ គេត្រូវគិតរឿងចំណីឱ្យវាផងដែរក្នុងអំឡុងពេលនេះ។ ក្នុងដំណាក់កាលទើបកើតដំបូង គេមិនបាច់ដាក់ចំណីឱ្យវាស៊ីទេ ព្រោះវាចេះបៅដោះមេតែមួយមុខគត់ រហូតដល់កូនជ្រូកមានអាយុបាន 1សប្តាហ៍ ទៅ10ថ្ងៃ ទើបគេដាក់ចំណីឱ្យវាស៊ីតិចៗជាដំបូងដោយលាយជាមួយចេកទុំ។ តាមពិតទៅ ដំបូងៗកូនជ្រូកមិនចេះស៊ីចំណីទេ តែវាចេះស៊ីចេកទុំ លុះស៊ីបានមួយរយៈខ្លី ទើបវាសុំានឹងចំណី ហើយចេះស៊ីដោយខ្លួនឯង។ រហូតដល់កូនជ្រូកអាយុបាន 20ថ្ងៃទើបវាលែងបៅ និងងាកមកស៊ីចំណីវិញម្ដង។ កូនជ្រូក10ក្បាលជាមធ្យមវាស៊ីចំណីអស់ 30គីឡូក្រាមក្នុងរយៈពេល 10ថ្ងៃ រហូតដល់អាយុបាន 35ថ្ងៃកូនជ្រូកនឹងមានទម្ងន់ចន្លោះពី 8 ទៅ10គីឡូក្រាមក្នុងមួយក្បាល ពេលនោះយើងអាចចាប់លក់បានហើយ។
យ៉ាងណាក៏ដោយ កន្លងមកដោយសារជ្រូករស់នាំចូលពីក្រៅប្រទេសច្រើនពេក បានធ្វើឱ្យជ្រូករស់ក្នុងស្រុកធ្លាក់ថ្លៃ នាំឱ្យកសិករជាច្រើនក្នុងភូមិឃុំខាងលើ បោះបង់ចោលរបរចិញ្ចឹមជ្រូកនេះ ហើយអ្នកភូមិបានអំពាវនាវឱ្យមន្ត្រីពាក់ព័ន្ធកំណត់ចំនួនជ្រូកនាំចូលឱ្យបានច្បាស់លាស់មុននឹងនាំចូលមកលក់លើទីផ្សារកម្ពុជា ដោយទុកលទ្ធភាពឱ្យជ្រូកកសិករខ្មែរអាចលក់បានថ្លៃខ្ពស់នៅលើទីផ្សារខ្លួនឯងផង៕
September 18, 2018
កំណើនប្រជាជនក្នុងទីក្រុង ធ្វើឱ្យដីឡូត៍នៅជាយក្រុងឡើងថ្លៃ
តម្លៃដីនៅក្នុងតំបន់សំខាន់ៗមួយចំនួនក្នុងរាជធានីភ្នំពេញបានស្ថិតនៅទ្រឹងក្នុងឆមាសទី1 ឆ្នាំ2018 ដោយសារតម្លៃដីក្នុងសង្កាត់មួយចំនួនបានឈានដល់កម្រិតខ្ពស់រួចស្រេចទៅហើយ និងដីដែលតម្លៃមានការកើនឡើងខ្លាំងគួរឱ្យកត់សម្គាល់នោះ គឺដីស្ថិតនៅតំបន់ជាយក្រុង។ នេះបើតាមរបាយការណ៍ស្រាវជ្រាវស្តីពីតម្លៃដីធ្លីនៅក្នុងរាជធានីភ្នំពេញរបស់ក្រុមហ៊ុនអចលនទ្រព្យ។
លោកឧកញ៉ា ចេង ខេង អគ្គនាយកក្រុមហ៊ុនអចលនទ្រព្យ CPL បានពន្យល់ថា ការឡើងថ្លៃរបស់ដីធ្លីសម្រាប់ទីក្រុងសំខាន់ៗ មានភ្នំពេញ បន្ទាប់មកគឺសៀមរាប និងព្រះសីហនុដែលយើងមើលឃើញថាកំពុងឡើងថ្លៃខ្លាំង។ ការឡើងថ្លៃរបស់ដីធ្លីនេះ មិនមែនយើងចេះតែថា តំបន់នេះឡើងថ្លៃ ឬតំបន់នោះចុះថ្លៃនោះទេគឺការឡើងថ្លៃវាអាចមានកម្រិតរបស់វា ព្រោះវាមានលក្ខណៈមួយដែលអាចឱ្យខាងវិស័យឯកជនទទួលបានព័ត៌មានគ្រប់ជ្រុងជ្រោយអំពីតម្លៃ។
លោកឧកញ៉ា ចេង ខេង អគ្គនាយកក្រុមហ៊ុនអចលនទ្រព្យ CPL
លោកឧកញ៉ាបានបញ្ជាក់ថា ចំពោះព័ត៌មានអំពីតម្លៃដី ពេលខ្លះក៏យើងទទួលបានតាមរយៈ Media ដែរ។ ឥឡូវនេះដើម្បីឱ្យកាន់តែច្បាស់លាស់នោះ គឺយើងកំពុងគ្រប់គ្រងនូវអ្វីដែលជាព័ត៌មានដីធ្លីឱ្យច្បាស់លាស់ថា តើតំបន់ណាឡើងថ្លៃ តំបន់ណានៅទ្រឹង និងតំបន់ណាតម្លៃធ្លាក់ចុះវិញ ដូច្នេះយើងកំពុងតែធ្វើការងារហ្នឹងហើយ ដើម្បីងាយស្រួលក្តាប់បាននូវព័ត៌មាននៃតម្លៃដី។
ចំពោះអ្វីដែលអ្នកវិភាគនិយាយថា តម្លៃដីនៅថេរនោះ លោកឧកញ៉ាយល់ថា៖ “យោបល់របស់អ្នកជំនាញគឺមិនខុសទេ ព្រោះតម្លៃដីនៅកន្លែងណាដែលឡើងដល់កម្រិតរបស់វាហើយ វានឹងមិនឡើងទៀតទេ ប៉ុន្តែដីនៅជាយក្រុងរបស់យើង វានៅមានតម្លៃទាបនៅឡើយ បើឡើងត្រឹមតែ 20ដុល្លារ ទៅ40ដុល្លារអី មិនទាន់ហៅថាឡើងទេ គឺនៅតម្លៃទាបនៅឡើយ។ នៅតំបន់ជាយក្រុងមានការពុះដីឡូត៍លក់ដោយមិនមានការគោរពតាមប្លង់មេនោះទេដូច្នេះយើងនឹងមិនទទួលបានទីប្រជុំជនមួយដែលអាចទាក់ទាញភ្ញៀវអន្តរជាតិបានឡើយ ដោយសារតែគ្មានសណ្ដាប់ធ្នាប់ និងមិនធ្វើតាមប្លង់មេ(Master plan)។
សម្រាប់មូលហេតុនៃកំណើនការពុះដីឡូត៍លក់នៅតំបន់ជាយក្រុងនេះ លោកអគ្គនាយកក្រុមហ៊ុនអចលនទ្រព្យរូបនេះបានលើកឡើងថា “ដោយសារកំណើនប្រជាជនក្នុងទីក្រុងមានការកើនឡើង ធ្វើឱ្យតម្លៃដីក្នុងទីក្រុងឡើងថ្លៃ ហើយពលរដ្ឋភាគច្រើនមិនមានលទ្ធភាពទិញផ្ទះក្នុងតម្លៃថ្លៃ ទើបងាកទៅសម្លឹងមើលដីនៅជាយក្រុងវិញ កត្តាមួយនេះហើយដែលធ្វើឱ្យដីឡូត៍ដាក់លក់នៅតាមតំបន់ជាយក្រុងមានតម្រូវការខ្លាំង។ ដីឡូត៍ភាគច្រើន គេអភិវឌ្ឍនៅតំបន់ជាយក្រុងដែលស្ថិតនៅមិនឆ្ងាយពេកទេ មានរោងចក្រច្រើន និងជាទីប្រជុំជនដែលមានប្រជាជនរស់នៅច្រើនជាដើម‟។
លោកឧកញ៉ា ចេង ខេង បានលើកឡើងថា ស្ថានភាពពុះដីឡូត៍លក់មានចំនួនច្រើនហួស អាចបណ្តាលឱ្យវិស័យនេះមានភាពអនាធិបតេយ្យ។ ការពុះដីឡូត៍លក់ទោះជាទទួលបានលុយច្រើនក៏ពិតមែន លក់ដាច់ក៏ពិតមែន ប៉ុន្តែបើយើងគិតដល់អនាគត វាមិនជាអស្ចារ្យអីទេ ព្រោះការពុះដីឡូត៍លក់នេះ គ្មានអ្នកទទួលខុសត្រូវចំពោះការកសាងហេដ្ឋារចនាសម្ព័ន្ធថ្មីទាំងនោះឡើយ។
អ្នកជំនាញសេដ្ឋកិច្ចមួយរូបធ្លាប់បានអត្ថាធិប្បាយអំពីតម្រូវការដី និងកំណើនប្រជាជននៅឆ្នាំ2030ថា ទីក្រុងភ្នំពេញនឹងត្រូវការដីសង់លំនៅដ្ឋានរហូតដល់3,600ហិកតា។ ក្នុងមួយឆ្នាំប្រជាជនក្នុងទីក្រុងភ្នំពេញត្រូវការផ្ទះចំនួន 2ម៉ឺនខ្នង ពោលគឺត្រូវការដី300ហិកតាក្នុង1ឆ្នាំ ដើម្បីសង់លំនៅឋានដោយបូករួមទាំងសួនច្បារ សាលារៀន និងផ្លូវថ្នល់ជាដើមផង នេះមិនទាន់គិតពីដីសម្រាប់សង់រោងចក្រ និងឃ្លាំងនៅឡើយទេ។
យោងតាមតម្រូវការខាងលើ យើងអាចធ្វើផែនការក្នុងការវិនិយោគដីធ្លីសម្រាប់រយៈពេលវែងដើម្បីចាប់យកឱកាសពីតម្រូវការទាំងនេះ។ សម្រាប់រដ្ឋាភិបាលគួរមានផែនការមេសម្រាប់អភិវឌ្ឍទីក្រុងក្នុងរយៈពេល 100ឆ្នាំទៅមុខទៀត។ ទីក្រុងភ្នំពេញសព្វថ្ងៃត្រូវការការអភិវឌ្ឍ ពង្រីក និងកសាងទីក្រុងរណប បុរី ខុនដូ និងសំណង់អចលនទ្រព្យទំនើបៗជាច្រើនទៀត ទើបអាចឆ្លើយតបសមស្របទៅនឹងតម្រូវការនៃកំណើនប្រជាជននាពេលបច្ចុប្បន្ន និងអនាគតបាន។
គួររំឭកដែរថា ឯកសារប្លង់មេដែលមានឈ្មោះថា“ការប្រើប្រាស់ដីនៅរាជធានីភ្នំពេញសម្រាប់ឆ្នាំ2035‟ គឺជាបណ្ដុំឯកសារចំនួន 330ទំព័រជាភាសាបារាំងដែលត្រូវបានផ្តល់មូលនិធិឱ្យដោយស្ថានទូតបារាំង ហើយមានឈ្មោះជាភាសាបារាំងថា Livre Blanc ត្រូវបានសង្ខេបទៅជាឯកសារជាភាសាខ្មែរត្រឹមតែ35ទំព័រនិងបានផ្សព្វផ្សាយជាសាធារណៈកាលពីឆ្នាំ2015កន្លងមក៕
September 18, 2018
5ចំណុចហាមធ្វើ បើមិនចង់ឱ្យអវយវៈភេទឆ្លងរោគ
ប្រសិនបើជារឿងរបស់អវយវៈភេទហើយ មិនថាបុរស ឬក៏នារីនោះទេ េក៏មានភាពអៀនខ្មាសនៅក្នុងការនិយាយចេញមកក្រៅ និងធ្វើឱ្យពិបាកចិត្តនៅពេលដែលនិយាយអំពីរឿងនេះ ឬក៏ពិបាកពិគ្រោះជាមួយអ្នកដទៃអំពីបញ្ហានេះ។ ដូច្នេះហើយខណៈដែលមានអាការចម្លែកៗ ដូចជា អាការ “ឆ្លងរោគ” កើតឡើង មនុស្សជាច្រើនបានប្រើការព្យាយាមអំណត់ ខ្លះរកផ្លូវព្យាបាលដោយខ្លួនឯងយ៉ាងមិនត្រឹមត្រូវ ខ្លះព្យាបាលតាមការស្រាវជ្រាវមួយចំនួន រហូតដល់ចុងក្រោយមានការហុចផលមិនល្អដល់រាងកាយលើសដើមទៀត។ ដូច្នេះ ដំណោះស្រាយដែលត្រឹមត្រូវនោះគឺ ការមើលថែរក្សាអនាម័យរបស់អវយវៈភេទឱ្យបានល្អប្រសើរ កុំឱ្យមានការប្រឡាក់ប្រឡូក ដែលជាហេតុបង្កឱ្យឆ្លងរោគដល់ខ្លួនអ្នកផ្ទាល់។ ទស្សនាវដ្តី ឡារ៉ែន សូមណែនាំនូវចំណុចទាំង5 ដូចខាងក្រោមនេះ៖
1. ហាមស្លៀកខោក្នុងដដែលៗ
បរិវេណអវយវៈភេទ គឺមានក្រពេញញើសដូចជាបរិវេណផ្សេងៗទៀតនៃសារពាង្គកាយដែរ ដែលមានរន្ធរោម ថែមទាំងមានកន្លុកកន្លៀតដែលបានបិទបាំងដោយសម្លៀកបំពាក់ផងដែរ។ ការបិទមុខរន្ធញើស ជាកត្តាដែលនាំឱ្យកើតមានក្លិនមិនល្អជាប់នឹងស្បែក និងសម្លៀកបំពាក់ ហើយបាក់តេរីក៏អាចចម្រើនលូតលាស់បានយ៉ាងលឿនទៀតផង។ អ្នកគួរតែធ្វើការផ្លាស់ប្ដូរខោក្នុងឱ្យបានជារៀងរាល់ថ្ងៃដើម្បីថែរក្សាអនាម័យនៅក្នុងចំណុចដែលបានលាក់បាំងនេះ។ អ្នកគួរតែធ្វើការផ្លាស់ឈុតខោក្នុង មួយថ្ងៃឱ្យបាន2ដងទើបជាការប្រសើរ ពោលគឺនៅពេលព្រឹក និងមុនពេលចូលគេង។ ប្រញាប់ធ្វើការសម្អាតអវយវៈភេទភ្លាម នៅពេលដែលអ្នកមានអារម្មណ៍ថា ធំុក្លិន អាប់អួរ ឬក៏ក្រោយពេលដែលអ្នកធ្វើការហាត់ប្រាណរួច។
2. ហាមលាងសម្អាតទ្វារមាសផ្នែកខាងក្នុង
ស្ត្រីខ្លះ ចង់សម្អាតផ្នែកខាងក្នុងនៃទ្វារមាស ទើបខំព្យាយាមប្រើម្រាមដៃស៊កចូលទៅសម្អាតខាងក្នុង ដោយសាប៊ូ ឬផលិតផលសម្រាប់សម្អាតអនាម័យស្ត្រីផ្សេងៗដែលមានលក់នៅតាមផ្សារ។ ក៏ប៉ុន្ដែ តាមការពិតទៅការធ្វើការសម្អាតចូលទៅខាងក្នុងទ្វារមាស គឺមានផលប៉ះពាល់រាងកាយលើសដើម ព្រោះសាប៊ូមានកម្រិត pH ខ្ពស់ជាងទ្វារមាស ហើយធាតុផ្សំនៃក្លិនប្រអូបរបស់សាប៊ូ អាចធ្វើឱ្យទ្វារមាសរលាក ឡើងក្រហម និងមានអាការរមាស់ ហើយក្រៅពីនេះ វាក៏មិនបានសម្លាប់បាក់តេរីចេញពីរាងកាយនោះទេ។ ប្រសិនបើអ្នកចង់ធ្វើការសម្អាតអនាម័យខាងក្នុងទ្វារមាស អ្នកគួរតែជ្រើសរើសប្រើទឹកស្អាត ធ្វើទឹកអនាម័យដែលមានកម្រិត pH ទាបសម្រាប់សម្អាត ឬគ្រាន់តែសម្អាតផ្នែកខាងក្រៅ មិនឱ្យលើសពីមួយថ្ងៃម្ដងក៏បាន។
3. ហាមលាបប្រេង ឬជែលរលោងផ្សេងៗ
ដើម្បីឱ្យមានភាពងាយក្នុងការរួមដំណេកជាមួយគូស្នេហ៍ អ្នកខ្លះអាចប្រើប្រាស់គ្រឿងជំនួយដូចជា ជែលទឹករំអិល ឬប្រេងរំអិលដែលមានក្លិនក្រអូប ដើម្បីឱ្យការរួមដំណេកមានភាពរលូន និងជួយជំរុញអារម្មណ៍ឱ្យកាន់តែខិតទៅដល់ចំណុចកំពូល។ មិនថាជាផលិតផលបែបណា យីហោណា ឬមានការបញ្ជាក់ថាគ្មានគ្រោះថ្នាក់បែបណាក៏ដោយ ខណៈដែលបានប្រើលាបពីលើស្បែក តែខុសពីភាពរំអិលដែលផលិតចេញមកពីខាងក្នុងនៃចំណុចលាក់បាំង វាអាចហុចផលអាក្រក់ប៉ះពាល់ដល់រាងកាយស្ត្រីបាន។ ដោយសារតែនៅពេលដែលរួមដំណេកហើយ ធ្វើឱ្យពិបាកនៅក្នុងការលាងសម្អាត និងធ្វើឱ្យកើតស្នាមប្រឡាក់ស្អិតជាប់នឹងអវយវៈភេទ បង្កឱ្យកើតមានបាក់តេរីចម្លងមេរោគជាដើម។ ប្រសិនបើចង់ឱ្យអវយវៈភេទមានភាពស្រស់ស្អាត និងមានអនាម័យ ខណៈដែលរួមដំណេក អ្នកគួរប្រើទឹករំអិលបែបធម្មជាតិតែប៉ុណ្ណោះ។
4. ហាមចោះ ឬចាក់សាក់
នៅពេលដែលអវយវៈភេទជាចំណុចលាក់បាំង ដែលទន់ស្ដើង សើមផ្អាប់ ផ្អាប់ញើស និងក្អែល ហើយងាយឆ្លងរោគនោះ ប្រសិនបើអ្នកធ្វើការចោះក្រវិល ឬចាក់សាក់ ដែលធ្វើឱ្យស្បែកនៅបរិវេណអវយវៈភេទមានស្នាមផ្លែរហូតដល់មានគ្រោះថ្នាក់ពីការឆ្លងមេរោគទៀតផង។ ទោះជាយ៉ាងនេះក្ដី យើងសូមណែនាំមិនឱ្យអ្នកធ្វើការចោះ ឬសាក់នៅបរិវេណនោះឡើយ តែបើអ្នកបានចោះរួចហើយនោះ សូមណែនាំឱ្យដោះក្រវិល ឬឧបករណ៍ផ្សេងៗចេញវិញ ដើម្បីឱ្យស្បែកនៅបរិវាណអវយវៈភេទត្រឡប់មករកសភាពដើមវិញ។ ប្រសិនបើអ្នកបានសាក់នៅបរិវេណនោះរួចហើយ សូមអ្នកកុំព្យាយាមលុបស្នាមសាក់ ឬសាក់បន្ថែមពីលើទៀតឱ្យសោះ។
5. ហាមស៊ករបស់ចម្លែកៗចូលទៅខាងក្នុង
មិនថាជា បន្លែ ផ្លែឈើ ឬឧបករណ៍ផ្សេងៗ គឺមិនគួរស៊កចូលទៅក្នុងទា្វរមាសរបស់អ្នកនោះទេ ព្រោះភាពកខ្វក់របស់វត្ថុទាំងអស់នោះ គឺមានគ្រោះថ្នាក់ដល់អវយវៈភេទរបស់អ្នកខ្លាំងណាស់ ដែលធ្វើឱ្យឆ្លងរោគបានយ៉ាងងាយ។ វត្ថុទាំងនោះអាចជាប់មានសារធាតុថ្នាំសម្លាប់សត្វល្អិត លម្អងធូលី និងកម្ទេចកម្ទីផ្សេងៗ ជាប់នូវបាក់តេរីជាច្រើនប្រភេទ ដែលអ្នកមើលមិនឃើញ ហើយឧបករណ៍សិច ក៏មានហានិភ័យនៃការឆ្លងមេរោគចូលទៅក្នុងទ្វារមាសផងដែរ ប្រសិនបើរបស់នោះមិនមានអនាម័យល្អគ្រប់គ្រាន់៕
September 17, 2018
កុំមើលរំលងបន្លែស្លឹកបាស មានគុណប្រយោជន៍ច្រើនចំពោះសុខភាព
ស្លឹកបាស ជាបន្លែម្យ៉ាងសម្រាប់ចម្អិនធ្វើជាម្ហូបអាហារ និងមានផលប្រយោជន៍ផ្នែកសុខភាពជាខ្លាំង។ ស្លឹកបាសមិនត្រឹមតែជាបន្លែដ៏ពេញនិយមបំផុតសម្រាប់អាហារប្រចាំថ្ងៃនោះទេ ប៉ុន្តែវាបានផ្តល់នូវអត្ថប្រយោជន៍ដល់សុខភាពទូទៅរបស់មនុស្សយើងផងដែរ។ លើសពីនេះទៅទៀត ស្លឹកបាសក៏ត្រូវបានបណ្តាប្រទេសមួយចំនួនប្រើជាឱសថធម្មជាតិក្នុងការព្យាបាលជំងឺមួយចំនួនទៀតផង។ ទាំងនេះក៏ព្រោះតែស្លឹកបាសមានផ្ទុកទៅដោយសារធាតុបំប៉ន និងសារធាតុសំខាន់ៗជាច្រើនដែលរាងកាយត្រូវការ។ ខាងក្រោមនេះ គឺជាផលប្រយោជន៍មួយចំនួនជួយឱ្យរាងកាយមានសុខភាពល្អ និងជួយបំបាត់អាការជំងឺផ្សេងៗដូចជា ៖
1. ជំនួយភ្នែក
នៅក្នុងស្លឹកបាស មានវីតាមីន A ចំនួនច្រើនគួរសម ដែលយើងងាយស្រួលរកបាន ហើយក្រៅពីវីតាមីន A ហើយនោះ បេតាខេរ៉ូទីន (Beta Carotene) ដែលមាននៅក្នុងស្លឹកបាស គឺជាសារធាតុរ៉ាឌីកាល់សេរីដែលអាចបំលែងខ្លួនឱ្យទៅជាវីតាមីន A បានថែមទៀតផង។ ដូច្នេះ ស្លឹកបាស ជាបន្លែដែលជួយដល់ភ្នែកមួយប្រភេទ ដែលអ្នកងាយរកទទួលទាន។
2. បង្កើនប្រព័ន្ធភាពស៊ាំ
ដូចបានដឹងថា ស្លឹកបាសមានវីតាមីន A និង បេតាខេរ៉ូទីន ដែលជាសារធាតុបង្កបង្កើតវីតាមីន A កម្រិតខ្ពស់នៅក្នុងរាងកាយ។ ដោយឡែក វាក៏បានជួយបង្កើនប្រព័ន្ធភាពស៊ាំបន្ថែមឱ្យអ្នក ធ្វើឱ្យអ្នកមិនងាយឈឺថ្កាត់ផ្តេសផ្ដាស។ ជាពិសេស អាចការពារជំងឺគ្រុនផ្ដាសាយ ទើបប្រសិនបើរាងកាយរបស់អ្នកខ្វះខាតវីតាមីន A នោះនឹងមានឱកាសឈឺ ឬគ្រុនបានដោយងាយបំផុត។
3. ស្លឹកបាសព្យាបាលទឹកនោមផ្អែម
បើតាមអ្នកជំនាញខាងសុខភាព និងមហាវិទ្យាល័យស្រាវជ្រាវសុខាភិបាលពិភពលោក បានអះអាងថា នៅក្នុងស្លឹកបាសមានសារធាតុប្រឆាំងរ៉ាឌីកាល់សេរី ដូចជា Flavonoid ច្រើនគួរសម អាចជួយព្យាបាល និងការពារជំងឺផ្សេងៗបាន ទាំងជំងឺទឹកនោមផ្អែមផងដែរ។ ក្រៅពីបានធ្វើការស្រាវជ្រាវរកឃើញថា ស្លឹកបាស មានចំណែកជួយកាត់បន្ថយជាតិស្ករនៅក្នុងឈាម ហើយនៅក្នុងស្លឹកបាសមានសារធាតុប្រឆាំងរ៉ាឌីកាល់សេរីជាច្រើនទៀត ដែលជួយការពារការកកើតជំងឺមហារីកផងដែរ។
4. ជួយថែរក្សាសុខភាពឆ្អឹង
ការរួមផ្សំនៃជាតិកាល់ស្យូម និងជាតិដែក ដែលត្រូវបានរកឃើញនៅក្នុងស្លឹកបាស ជាហេតុផលដែលអាចជួយដល់សុខភាពឆ្អឹងរបស់អ្នកយ៉ាងល្អ។ លើសពីនេះទៅទៀតស្លឹកបាសក៏ត្រូវបានគេណែនាំដល់ស្ត្រីមានផ្ទៃពោះឱ្យទទួលទានផងដែរ ដើម្បីបង្កើនប្រសិទ្ធភាពក្នុងការលូតលាស់របស់គភ៌ និងទារកក្នុងផ្ទៃ។ ចំពោះអ្នកដែលមានអាការចាញ់ទឹកដោះគោ ឬពិសាទឹកដោះគោហើយបណ្ដាលឱ្យរាក អ្នកអាចងាកមកទទួលទានស្លឹកបាសជំនួសវិញ។
5. ព្យាបាលអាការរមាស់ដោយសារសត្វល្អិតខាំ
ស្លឹកបាស មានធាតុត្រជាក់ ជួយបន្សាពិសក្ដៅចេញពីសត្វល្អិតបានក្នុងមួយកម្រិត ដោយអ្នកធ្វើការលាងសាច់របួសដោយទឹកស្អាតឱ្យបានស្អាត រួចយកស្លឹកបាសចាស់ មកទំពាឱ្យល្អិត ហើយញីពីលើស្នាមរបួសដែលសត្វល្អិតខាំ។ បន្ទាប់មក បិទកម្ទេចស្លឹកបាសដែលបានទំពាឱ្យល្អិតមួយសន្ទុះ នោះអាការរមាស់នឹងមានភាពសះស្បើយប្រសើរឡើងវិញ។
6. បង្កើនប្រសិទ្ធភាពប្រព័ន្ធរំលាយអាហារ
ស្លឹកបាសក៏ជាប្រភពនៃវីតាមីន B1 ឬជាតិ Thiamine ដែលមានតួនាទីក្នុងការស្រូបយកសារធាតុចិញ្ចឹម និងបង្កើនថាមពលជំនួសឱ្យកោសិកាខ្លាញ់ដែលរាងកាយមិនត្រូវការផងដែរ។ លើសពីនេះទៅទៀត ស្លឹកបាសក៏ជួយចែកចាយអុកស៊ីហែ្ស៊ន និងសារធាតុចិញ្ចឹមដល់រាងកាយបានល្អប្រសើរទៀតផង។ មិនតែប៉ុណ្ណោះ ស្លឹកបាស មានអង់ស៊ីម អាម៉ាយលែសជាច្រើន ដែលជួយជំរុញដល់ការរំលាយអាហារ ដែលការពាររាល់ជំងឺតឹងពោះ ចុកសៀតណែន និងល្អសម្រាប់អ្នកនិយមបរិភោគអាហារម្សៅ។
7. ជួយការពារភាពធាត់ហួសកំណត់
អ្នកត្រូវដឹងថា ការធាត់ហួសកំណត់មិនមែនបណ្តាលមកពីការទទួលទានច្រើនពេកទាំងស្រុងនោះទេ វាអាចបណ្តាលមកពីការរំលាយអាហារមិនបានល្អ ឬកត្តាផ្សេងៗមួយចំនួនទៀត។ ហេតុនេះស្លឹកបាសអាចជួយអ្នកក្នុងការការពារបញ្ហាធាត់ហួសកំណត់តាមរយៈការជំរុញល្បឿនរំលាយអាហារ៕
September 17, 2018
ពិធីប្រគល់រថយន្តប្រណីតម៉ាក Jaguar ចំនួន 3គ្រឿងជូនសណ្ឋាគារ Rosewood Phnom Penh
កាលពីថ្ងៃអង្គារ ទី4 ខែកញ្ញា ឆ្នាំ2018 ក្រុមហ៊ុន Jaguar Land Rover ប្រចាំព្រះរាជាណាចក្រកម្ពុជាមានក្តីសោមនស្សរីករាយក្នុងការប្រគល់រថយន្តប្រណីតម៉ាក Jaguar XJL ចំនួន 2គ្រឿង និងរថយន្តម៉ាក Jaguar F-PACE ចំនួន 1គ្រឿងជូនសណ្ឋាគារលំដាប់ផ្កាយ5 Rosewood Phnom Penh ក្រោមអធិបតីភាពដ៏ខ្ពង់ខ្ពស់របស់ម្ចាស់សណ្ឋាគារ លោកឧកញ៉ា សំអាង (វឌ្ឍនៈ) និងនាយកគ្រប់គ្រងសណ្ឋាគារលោក Michael James Parker។
ជាថ្ងៃមួយដ៏ពិសេសដែល Rosewood Phnom Penh ជាសណ្ឋាគារដ៏មានកិត្យានុភាព និងមានកេរ្តិ៍ឈ្មោះល្បីល្បាញដំបូងគេបង្អស់នៅក្នុងប្រទេសកម្ពុជាដែលបានបញ្ជាទិញរថយន្ដប្រណីតម៉ាក Jaguar XJL និងJaguar F-PACE។ Jaguar ជាប្រភេទរថយន្តដែលមានការបូកបញ្ចូលគ្នាដ៏ល្អឥតខ្ចោះនៃបច្ចេកវិទ្យាឈានមុខគេដ៏មានសក្តានុពល និងស័ក្តិសមជាមួយនឹងគោលការណ៍ “បដិសណ្ឋារកិច្ចជានិរន្តរ៍‟របស់សណ្ឋាគារ Rosewood Hotels & Resorts®។
គួរបញ្ជាក់ផងដែរថាក្រុមហ៊ុន Jaguar Land Rover និង Rosewood Phnom Penh បានរួមបញ្ចូលគ្នានូវប្រណីតភាពដ៏ទាន់សម័យជាមួយសេវាកម្មផ្ទាល់ខ្លួន ជាពិសេសក្នុងការរួមគ្នាថែរក្សានូវសម្បត្តិបេតិកភណ្ឌក្នុងតំបន់ដល់ភ្ញៀវជាតិ និងអន្តរជាតិក្នុងបរិយាកាស និងបែបបទពិសេសប្លែកពីគេដែលក្រុមហ៊ុនទាំង2 បានបង្ហាញពីគុណតម្លៃរបស់អតិថិជន និងបុគ្គលិក។
លោក Ulf Sebecke នាយកគ្រប់គ្រងក្រុមហ៊ុន Jaguar Land Rover ប្រចាំព្រះរាជាណាចក្រកម្ពុជាបានគូសបញ្ជាក់ថា អ្វីដែលកាន់តែពិសេស និងសំខាន់មួយផ្សេងទៀតដែលបានធ្វើឱ្យសណ្ឋាគារលំដាប់ថ្នាក់ផ្កាយ5 Rosewood Phnom Penh សម្រេចចិត្តបញ្ជាទិញរថយន្តដ៏ប្រណីតនេះ សណ្ឋាគារក៏ទទួលបាននូវកញ្ចប់សេវាកម្ម “សន្តិភាពផ្លូវចិត្ត‟ របស់ក្រុមហ៊ុន Jaguar Land Rover ដែលមានរយៈពេល 5 ឆ្នាំ និងសេវាកម្មជួសជុលនិងថែទាំចល័ត 24ម៉ោងលើ24ម៉ោងក្នុងមួយសប្តាហ៍៕

September 17, 2018
Jack Ma សម្លឹងឃើញអាហ្វ្រិក ជាតំបន់វិនិយោគសេដ្ឋកិច្ចឌីជីថល
ប្រធានាធីបតីអាហ្វ្រិកខាងត្បូង លោក Cyril Ramaphosa បាននិយាយថា រដ្ឋាភិបាលរបស់លោក នឹងធ្វើការជាមួយក្រុមហ៊ុនលក់ទំនិញតាមអនឡាញដ៏ធំរបស់ចិន Alibaba ជាពិសេសគឺលោក Jack Ma ក្នុងការរុញច្រានវិស័យបច្ចេកវិទ្យាតាម-រយៈការអភិវឌ្ឍលើសេដ្ឋកិច្ចឌីជីថលនៅក្នុងតំបន់អាហ្រ្វិក។
ថ្មីៗនេះ ប្រធានាធីបតីអាហ្វ្រិកខាងត្បូង លោក Cyril Ramaphosa បានដឹកនាំគណៈប្រតិភូរដ្ឋមន្ត្រី និងមន្ត្រីជាច្រើនរូបទៅធ្វើទស្សនកិច្ចនៅក្រុមហ៊ុនបច្ចេកវិទ្យាយក្សរបស់ចិន Alibaba នេះ។ នៅក្នុងដំណើរទស្សនកិច្ចនោះ លោកប្រធានាធិបតី បានស្នើសុំឱ្យស្ថាបនិករបស់ក្រុមហ៊ុន Alibaba គឺលោកមហាសេដ្ឋី Jack Ma ចូលរួមជួយអភិវឌ្ឍវិស័យបច្ចេកវិទ្យាតាមរយៈការអភិវឌ្ឍលើសេដ្ឋកិច្ចឌីជីថលនៅក្នុងតំបន់អាហ្រ្វិក។
ប្រធានាធិបតីលោក Ramaphosa បានបង្ហាញជំហរ និងឆន្ទៈរបស់លោកថា លោកចង់អញ្ជើញ Jack Ma ទៅកាន់អាហ្វ្រិកខាងត្បូងដើម្បីជួយជ្រោមជ្រែងប្រទេសរបស់លោកក្នុងការបង្កើតមជ្ឈមណ្ឌលហ្វឹកហាត់លើវិស័យពាណិជ្ជកម្មអេឡិចត្រូនិក ដែលនេះគឺជាការគិតទុករបស់លោកជាយូរណាស់មកហើយ ដោយសារតែនៅពេលដែលលោកបានប្រកាសរឿងនេះទៅកាន់ទីសាធារណៈ អ្នកគ្រប់គ្នាពិតជាមានភាពសប្បាយរីករាយ និងរំភើបចិត្តក្នុងការបង្កើតមជ្ឈមណ្ឌលបណ្ដុះបណ្ដាលយុវវ័យ ពិសេសសម្រាប់យុវនារីនៅអាហ្វ្រិកតែម្ដង។
លោក Jack Ma ដែលជាស្ថាបនិកដ៏មហិមានៃក្រុមហ៊ុន Alibaba បាននិយាយថា ហេដ្ឋារចនាសម្ព័ន្ធអាហ្វ្រិកសព្វថ្ងៃនេះ មិនទាន់ល្អឥតខ្ចោះ នៅឡើយទេ ហើយក៏មិនទាន់អាចនិយាយបានថា ល្អនោះដែរ ប៉ុន្តែនេះគឺជាឱកាសដ៏ល្អមួយ។ ដូច្នេះ នេះគឺជាអ្វីដែលពួកគេជឿជាក់ ពីព្រោះនោះគឺអ្នកមានឱកាសដើម្បីចូលទៅជួយស្ដារហេដ្ឋារចនាសម្ព័ន្ធលើវិស័យសេដ្ឋកិច្ចឌីជីថល។ ពួកគេមានទំនុកចិត្តចំពោះទ្វីបអាហ្វ្រិក ពួកគេគិតថា សហគ្រិនមជ្ឈិមវ័យ និងអ្វីៗទាំងអស់ សុទ្ធតែត្រូវធ្វើ ពួកគេគួរតែចាប់ផ្តើមធ្វើឥឡូវនេះតែម្ដង។
គួរបញ្ជាក់ផងដែរថា កំពូលមហាសេដ្ឋីចិន លោក Ma បានទៅលេងប្រទេសអាហ្រ្វិកកាលពីខែមុនកន្លងទៅ។ អ្នកបង្កើតក្រុមហ៊ុន Alibaba រូបនេះ បានលើកឡើងថា ទ្វីបអាហ្រ្វិក គឺជាទឹកដីដែលសម្បូរទៅដោយឱកាស និងក្ដីសង្ឃឹម៕
September 17, 2018
ជំនាញភាពជាអាណាព្យាបាល (parenting skill) សំខាន់ខ្លាំងសម្រាប់ការអភិវឌ្ឍកុមារ
បើនិយាយពីការអប់រំមួយម៉ាត់ មិនមែនសំដៅតែលើការបណ្តុះបណ្តាលកូនក្មេងនោះទេ តែវាចាំបាច់មានការចូលរួមពីអាណាព្យាបាលផងដែរ ព្រោះកុមារមិនអាចអភិវឌ្ឍសមត្ថភាពបានល្អនោះទេ ប្រសិនបើពួកគេរៀនពីមេរៀនល្អៗនៅសាលា ហើយត្រូវទាញទៅមិនល្អវិញនៅពេលពួកគេចូលមករស់នៅក្នុងគ្រួសារជាក់ស្តែង។
នៅកម្ពុជា បញ្ហាយុវជនមានភាពបាក់ស្បាត ឬមិនមានសមត្ថភាពគ្រប់គ្រាន់ក្នុងការសម្រេចចិត្ត គឺដោយសារតែពួកគេមួយចំនួនធំ រស់នៅក្នុងពិភពគ្រួសារ និងសហគមន៍ ដែលរឹតត្បិតដល់សេរី-ភាពនៃការសម្រេចចិត្តរបស់ពួកគេ។ កុមារត្រូវបានគេកំណត់ថា ឱ្យត្រូវតែដើរតាមអ្វីដែលមនុស្សធំកំណត់ ហើយពួកគេមិនមានលទ្ធភាពគ្រប់គ្រាន់ក្នុងការបញ្ចេញមតិ ឬបង្ហាញពីអ្វីដែលគេចង់បាននោះទេ ព្រោះទម្លាប់របស់សង្គមយើងឱ្យតែកុមារបញ្ចេញមតិយោបល់តវ៉ា ឬនិយាយអំពីអ្វីដែលចង់បានគឺគេហៅថាជាការតមាត់ ឬជាសកម្មភាព ហាមឃាត់។ ក្រៅពីការកំណត់បន្ទាត់សម្រាប់កុមារ ហើយនោះ ពួកគេមួយចំនួនក៏បានទទួលការអប់រំបែបតឹងរ៉ឹងពីអាណាព្យាបាលដែលធ្វើឱ្យពួកគេបាក់ស្បាត និងងាយរងគ្រោះដោយអំពើហិង្សានៅក្នុងការរស់នៅនៅពេលដែលពួកគេធំឡើង និងបន្តទៅអ្នកជំនាន់ក្រោយបន្តទៀត។
នៅពេលកុមារមិនទទួលបានការគាំពារបែបវិជ្ជមាន វាអាចនឹងផ្តល់វិបត្តិមួយចំនួនសម្រាប់សង្គម ព្រោះយុវជនដែលធំឡើងពីស្ថានភាពអវិជ្ជមាន អាចនឹងមិនសូវហ៊ានសម្រេចចិត្តលើវាសនាខ្លួនឯងនោះទេ ហើយតែងតែបារម្ភពីការស្តីបន្ទោស ឬទណ្ឌកម្មជាដើម។ ម្យ៉ាងវិញទៀត កត្តាទាំងអស់នេះអាចជាបញ្ហាប្រឈមមួយដែលធ្វើឱ្យយុវជននាសម័យថ្មីមិនសូវមាននាវានុវត្តន៍ថ្មីៗ ដែលទាមទារឱ្យមានការបណ្តុះបណ្តាលខ្លាំងក្លាបន្ថែម។ តែជាទូទៅ អាណាព្យាបាលទាំងឡាយគួរយកចិត្តទុកដាក់ខ្លាំងពីជំនាញភាពជាអាណាព្យាបាល (Parenting Skill) ដែលជាកត្តាសំខាន់ក្នុងការជំរុញកូនៗឱ្យក្លាយជាមនុស្សខ្លាំងនៅថ្ងៃអនាគត។
លោក គង់ សំនៀង ប្រធាននាយកប្រតិបត្តិការនៃក្រុមហ៊ុនវ៉េស្ទឡាញន៍ អេឌ្យូខេសិន គ្រុប បានលើកឡើងថា ទន្ទឹមនឹងកូនតូចៗទទួលបានការសិក្សាល្អពីប្រព័ន្ធអប់រំដែលមានគុណភាព អាណាព្យាបាលក៏ចាំបាច់ត្រូវយល់ដឹងផងដែរពីវិធីក្នុងការអប់រំកូនដើម្បីជំរុញពួកគេឱ្យក្លាយជាមនុស្សខ្លាំងនៅថ្ងៃអនាគត។ ប្រសិនបើអាណាព្យាបាលយល់ដឹងខ្ពស់ពីវិធីសាស្រ្តក្នុងការអប់រំកូននៅក្នុងផ្ទះ យល់ពីតម្រូវការជាក់ស្តែងរបស់កុមារ ហើយចេះលើកទឹកចិត្តពួកគេឱ្យមានការខិតខំប្រឹងប្រែង នោះកុមារនឹងអាចអភិវឌ្ឍខ្លួនក្នុងស្ថានភាពវិជ្ជមាន ដែលធ្វើឱ្យពួកគេអាចក្លាយជាមនុស្សមានភាពច្នៃប្រឌិតខ្ពស់ និងអត្តចរិតល្អនៅថ្ងៃអនាគត។
លោក គង់ សំនៀង ប្រធាននាយកប្រតិបត្តិការនៃក្រុមហ៊ុនវ៉េស្ទឡាញន៍ អេឌ្យូខេសិន គ្រុប
លោក គង់ សំនៀង បាននិយាយថា៖ “ប្រសិនបើកូនតូចៗ កំពុងខិតខំប្រឹងរៀន តែអាណាព្យាបាលគាត់មានបញ្ហាច្រើន មានវិបត្តិឈ្លោះទាស់ទែងគ្នាមានអំពើហិង្សា និងមានគំរូមិនល្អ នោះក្មេងក៏មិនអាចរៀនពូកែបានដែរ”។
អាណាព្យាបាលចាំបាច់ត្រូវតែដឹងពីតួនាទីរបស់ខ្លួនក្នុងការបណ្តុះបណ្តាលកុមារ ព្រោះក្មេងៗនៅសាលាក្នុងរយៈពេលខ្លី តែរស់នៅជាមួយអាណាព្យាបាលក្នុងរយៈពេលវែង ហេតុនេះប្រសិនបើអាណាព្យាបាលមានចំណេះដឹងក្នុងការគ្រប់គ្រងក្មេងបានល្អ នោះមានន័យថា ការអប់រំកុមារក៏មានលក្ខណៈពេញលេញ ឆ្លើយតបឱ្យគ្នាបានល្អផងដែរ។ អាណាព្យាបាលជាច្រើនចង់ឱ្យកូនក្លាយជាមនុស្សល្អ តែពេលខ្លះទង្វើរបស់គាត់អាចប៉ះពាល់ដល់ការគិតរបស់ក្មេងដោយមិនដឹងខ្លួន ហេតុនេះអ្វីដែលអាចធ្វើបានគឺកាត់បន្ថយទម្លាប់អវិជ្ជមានដែលធ្លាប់ទទួលបានពីអាណាព្យាបាលជំនាន់មុន ហើយស្វែងយល់ពីវិធីល្អៗដើម្បីជំរុញក្មេងៗជំនាន់ក្រោយឱ្យកាន់តែមានសក្តានុពលវិជ្ជមាន។
អាណាព្យាបាលជាច្រើននៅកម្ពុជាមិនសូវផ្តល់ឱកាសឱ្យកូនក្នុងការសម្រេចចិត្តខ្លួនឯងនោះទេ តែគាត់ចូលចិត្តសម្រេចចិត្តជំនួសកូនតូច ព្រោះគាត់តែងតែគិតថា កូនរបស់គាត់នៅក្មេងជានិច្ច។ ចំណុចនេះពេលខ្លះបានផ្តល់ផលវិជ្ជមានដល់ក្មេងដោយទទួលបានការថ្នាក់ថ្នម និងទំនុកបម្រុងជាប់ជានិច្ចតាំងពីតូចដល់ធំ តែវាក៏ផ្តល់គុណវិបត្តិច្រើនផងដែរនៅពេលអាណាព្យាបាលនៅតែព្យាយាមក្តោបក្តាប់សិទ្ធិក្នុងការសម្រេចចិត្តរបស់កូនលើគ្រប់រឿងទាំងអស់ ដែលធ្វើឱ្យគេបាត់បង់សេរីភាពក្នុងការគិត។ ក្រៅពីនេះ យុវជនជាច្រើនហាក់ព្យាយាមដើរក្នុងផ្លូវអវិជ្ជមានដើម្បីគេចចេញពីគំនាបអប់រំក្នុងគ្រួសារដែលអាណាព្យាបាលមិនបានយល់ដឹងពីវិធីសាស្ត្រប្រឹក្សាជាមួយកូន និងវិធីសាស្រ្តជំរុញកូនឱ្យមានភាពក្លាហាន និងសម្រេចចិត្តឱ្យបានត្រឹមត្រូវ៕
September 17, 2018
ពហុប្រយោជន៍របស់សាប៊ូដុំ មិនមែនមានសម្រាប់តែទុកលាងដៃទេ
ទោះជានាពេលបច្ចុប្បន្នសាប៊ូទឹកបានទទួលការពេញនិយមខ្លាំងជាងសាប៊ូដុំ(សាប៊ូក្រអូប)មែន តែទោះយ៉ាងណាសាប៊ូដុំក៏នៅតែជារបស់ប្រើប្រាស់ដែលត្រូវតែមាននៅក្នុងផ្ទះដដែល ព្រោះក្រៅតែពីសម្រាប់ដុសសម្អាតខ្លួនប្រាណហើយសាប៊ូដុំនៅមានប្រយោជន៍ល្អៗដ៏គួរឱ្យចាប់អារម្មណ៍ជាច្រើនទៀត ដូច្នេះថ្ងៃនេះ ឡារ៉ែន សុំអនុញ្ញាតឱ្យអ្នកគ្រូ ឆវី នាំយកគុណប្រយោជន៍របស់សាប៊ូដុំមកជម្រាបជូនមិត្តអ្នកអាន ជាពិសេសបងៗស្រ្តីមេផ្ទះ ដោយអ្នកគ្រូ ឆវី បានលួចខ្សឹបប្រាប់ថាសាប៊ូដុំនេះអាចប្រើប្រាស់បានគ្រប់កន្លុកកន្លៀតនៅក្នុងផ្ទះ ដែលពេលបានដឹងហើយច្បាស់ជាប្រញាប់រត់ទៅទិញសាប៊ូដុំយកមកទុកប្រើជាមិនខាន។
1. កែបញ្ហាថតតុ ថតទូ ឬទ្វាររុញ តឹងពិបាកបើក-បិទ
បើសិនជាថតតុ ថតទូ ឬទ្វាររុញ(ទៅខាង)តឹងស្អិតរហូតដល់ត្រូវប្រើកម្លាំងខ្លាំងក្នុងការបើក-បិទនោះ សាកល្បងយកសាប៊ូដុំមកដុសចុះឡើងនៅត្រង់គែមថតតុ ឬលើចង្អូរផ្លូវរុញរបស់ទ្វារលមើល៍ ធានាថា បន្ទាប់ពីនោះមកគ្រាន់តែទាញតែបន្តិចក៏នឹងបើក-បិទបានយ៉ាងងាយស្រួល រអិលប្រិល លែងមានបញ្ហាជាមិនខាន។
2. បិទរន្ធតូចៗនៅលើជញ្ជាំង
កុំបណ្ដោយឱ្យជញ្ជាំងផ្ទះមានរន្ធ ឬប្រហោងតូចៗច្រើនរហូតដល់មើលទៅលែងស្អាតនោះ គ្រាន់តែជ្រើសរើសយកដុំសាប៊ូណាដែលមានពណ៌ដូចគ្នា ឬស្រដៀងៗនឹងពណ៌ជញ្ជាំងនោះមកដុសខាត់នៅត្រង់រន្ធទាំងនោះរហូតទាល់តែសាច់សាប៊ូចូលពេញរន្ធទាំងនោះ រួចយកម្រាមដៃកៀរសម្អាតឱ្យរាបស្មើ តែប៉ុណ្ណឹងជញ្ជាំងផ្ទះនឹងស្អាតរលោងដូចដើមមិនខាន។
3. ការពារគ្រឿងសង្ហារិមខូចខាតដោយសារសត្វចិញ្ចឹម
សម្រាប់ស្នាមខ្វាចឆ្កូតរបស់សត្វឆ្មា ឬឆ្កែនៅលើគ្រឿងសង្ហារិមធ្វើពីឈើ ក៏អាចកែខៃឱ្យល្អដូចដើមវិញបានដែរ ដោយគ្រាន់តែយកដុំសាប៊ូមកដុសលើបរិវេណដែលមានស្នាមឆ្កូតនៅលើគ្រឿងសង្ហារិម(តុ និងកៅអី-ល-)ទាំងនោះជាការស្រេច ហើយថែមទាំងជាការការពារមិនឱ្យសត្វចិញ្ចឹម(ឆ្មា និងឆ្កែ-ល-) ចូលមកជិតទៀតផង ព្រោះសត្វទាំងនោះមិនចូលចិត្តក្លិនសាប៊ូក្រអូបទាំងនោះទេ។
4. កម្ចាត់ស្នាមកខ្វក់ដែលស្អិតជាប់ណែន
មិនថាតែស្នាមប្រឡាក់ខ្លាញ់ ឬស្នាមកខ្វក់ជាប់ស្អិតផ្សេងៗនោះទេ គ្រាន់តែចាក់ទឹកដាក់លើស្នាមប្រឡាក់ទាំងនោះឱ្យសើមជោក រួចហើយយកសាប៊ូដុំមកដុសខាត់រហូតឡើងពពុះ រួចហើយលាងសម្អាតចេញ ក៏អាចកម្ចាត់ស្នាមកខ្វក់ទាំងនោះចេញបានយ៉ាងងាយទៅហើយ។
5. ជួយឱ្យការដេរប៉ាក់កាន់តែងាយស្រួលឡើង
សាប៊ូដុំអាចយកមកជួយក្នុងការងារដេរប៉ាក់បានច្រើនយ៉ាង មិនថាតែការយកសាប៊ូដុំមកដុសលើក្រណាត់ត្រង់កន្លែងដែលត្រូវដេរ ដើម្បីជួយឱ្យការដេរកាន់តែងាយស្រួល និងរអិលឡើង ឬមុននឹងដេរ អាចយកម្ជុលមកចាក់ៗលើដុំសាប៊ូហើយសឹមយកទៅដេរក៏នឹងធ្វើឱ្យការដេររអិល និងងាយស្រួលដេរផងដែរ។
6. បំបាត់ក្លិនស្អុយរបស់ស្បែកជើង
គ្រាន់តែយកក្រដាសអនាម័យជូតដៃមករុំខ្ចប់ដុំសាប៊ូ រួចយកទៅដាក់នៅក្នុងស្បែកជើងណាដែលធុំក្លិនស្អុយ ទុកចោលមួយយប់ តែប៉ុណ្ណឹងធានាថា ក្លិនស្អុយនឹងរលាយបាត់សូន្យឈឹង ក្លាយជាមានក្លិនក្រអូបប្រហើររបស់សាប៊ូជំនួសវិញ។
7. ធ្វើឱ្យសម្លៀកបំពាក់ក្រអូបស្រស់ស្រាយ
ទោះជាមិនបានប្រើការក៏ដោយ តែក៏យើងអាចធ្វើឱ្យសម្លៀកបំពាក់ចាស់ៗនៅរក្សាភាពក្រអូបស្រស់ស្រាយបានរហូតដែរ គ្រាន់តែយកបន្ទះក្រណាត់មួយផ្ទាំងមកខ្ចប់ដុំសាប៊ូ ព្រមទាំងចងឱ្យជាប់ដោយកៅស៊ូកង រួចយកទៅដាក់នៅក្នុងថតទូដាក់ខោអាវ តែប៉ុណ្ណឹងបញ្ហាសម្លៀកបំពាក់ធុំក្លិនអាប់ក៏លែងមានបាត់ទៅហើយ។
8. បណ្ដេញសត្វល្អិតសត្រូវដំណាំ
សូមប្រាប់នៅពេលនេះទៅចុះថា សាប៊ូដុំក៏អាចបណ្ដេញសត្វល្អិតសត្រូវដំណាំបានដែរដោយប្រើវិធីងាយៗគឺ យកដុំសាប៊ូសើមៗទៅដុសនៅលើស្លឹកដើមរុក្ខជាតិ ក៏អាចជួយការ-ពារសត្វដង្កូវ និងសត្វល្អិតសត្រូវដំណាំបានដែរ ឬបើអ្នកណាចង់ធ្វើជាទឹកថ្នាំបណ្ដេញសត្វល្អិតក៏គ្រាន់តែយកសាប៊ូដុំដាក់ចូលក្នុងដបទឹក ហើយក្រឡុកឱ្យរលាយទៅជាទឹក រួចហើយយកទៅបាញ់នៅលើដើមរុក្ខជាតិ ដើម្បីបណ្ដេញសត្វបានតែម្ដង។
9. កម្ចាត់ស្នាមផ្សែងខ្មៅៗនៅគូទឆ្នាំង ឬខ្ទះ
សម្រាប់អ្នកដែលចម្អិនម្ហូបអាហារដោយចង្ក្រានធ្យូង យើងសូមណែនាំឱ្យយកសាប៊ូដុំទៅដុសៗ ដើម្បីស្រោបលើគូទឆ្នាំង ឬខ្ទះនោះស្ដើងៗមុននឹងយកទៅដាក់ដាំស្ល។ ដល់ពេលយកទៅលាងសម្អាត វានឹងជួយឱ្យងាយស្រួលដុសសម្អាតស្នាមប្រឡាក់ផ្សែងខ្មៅៗដែលនៅជាប់គូទឆ្នាំងនោះបានកាន់តែឆាប់ស្អាតឡើង៕
September 15, 2018
ការការពារស្បែកជើងមិនឱ្យភាយក្លិនក្នុងរដូវភ្លៀង
ពេលដោះស្បែកជើង តើអ្នកមានធុំក្លិនស្អុយដែរឬទេ? ប្រសិនបើមានមែននោះ វាគឺជាសញ្ញាមួយដែលប្រាកដណាស់ថា ជើងរបស់អ្នកមានក្លិនដូចជាសំរាមដែលផ្អាប់ទុកយូរអុីចឹង។ អ្នកពិតជាពិបាកចិត្តចំពោះបញ្ហាធុំក្លិនជើង ហើយជាពិសេសនៅក្នុងរដូវភ្លៀងនេះ ស្បែកជើងមិនស្ងួត និងធុំក្លិនជើងភាយក្លិនអាក្រក់រំខានដល់អ្នកនៅក្បែរខ្លួន គឺពិតជាធ្វើឱ្យអ្នកអាម៉ាសមុខណាស់មែនទេ? តោះមកយល់ដឹងពីដំណោះស្រាយចំពោះបញ្ហានេះទាំងអស់គ្នា។
តើធ្វើដូចម្តេចដើម្បីយកក្លិនអាក្រក់នេះចេញពីស្បែកជើងរបស់អ្នកបាន? ដំបូងអ្នកត្រូវរកមើល និងលុបបំបាត់មូលហេតុរបស់វាជាមុនសិន។ ប្រសិនបើស្បែកជើងមានលក្ខណៈតឹងពេក ហើយមិនមានខ្យល់ចេញចូលនោះ វាពិតជាងាយបង្កឱ្យមានក្លិនអាក្រក់ ដោយសារភាពហប់ណែនពេក។ ជាធម្មតាស្បែកនៅបាតដៃ ឬបាតជើង ជាកន្លែងដែលមានក្រពេញបញ្ចេញញើសច្រើនជាងកន្លែងដទៃទៀត។ ញើសដែលបញ្ចេញនៅបាតដៃ នឹងត្រូវបានខ្យល់បរិយាកាសសម្ងួតអស់ តែបើញើសនៅបាតជើងវិញ នឹងត្រូវផ្អាប់ទុកដោយស្បែកជើង និងស្រោមជើងដែលហប់ ឬសើម។ ការផ្អាប់ទុកនេះ នឹងផ្ដល់ឱកាសឱ្យបាក់តេរីមួយចំនួនរីកដុះដាល ហើយបង្កជាក្លិនស្អុយដល់ជើង ស្បែកជើង និងស្រោមជើង។ បើអ្នកកំពុងតែប្រឈមនឹងបញ្ហានេះ សូមកុំទាន់បារម្ភ ទស្សនាវដ្តី ឡារ៉ែន កំពុងយកចិត្តទុកដាក់ចំពោះអ្នក ដើម្បីដោះស្រាយបញ្ហាមួយនេះ ដូចខាងក្រោម ៖
1. ធ្វើការប្តូរស្រោមជើង : ស្រោមជើងត្រូវបោកសម្អាតជានិច្ចជារៀងរាល់ថ្ងៃ ហើយមិនត្រូវពាក់ស្បែកជើងដដែលៗរាល់ថ្ងៃនោះទេ ដោយចាំបាច់ត្រូវហាលស្បែកជើងដែលពាក់រួច ឱ្យត្រូវខ្យល់24ម៉ោង ដើម្បីឱ្យញើសដែលជាប់នៅនឹងស្បែកជើងស្ងួតល្អ។
2. ប្ដូរស្បែកជើង : នៅក្នុងរដូវភ្លៀង អ្នកគួរជ្រើសរើសប្រភេទស្បែកជើងណាដែលអាចឱ្យខ្យល់ចេញចូលបានល្អ ប្រសិនបើអ្នកជាអ្នកធ្វើការ សូមជ្រើសរើសយកប្រភេទស្រោមជើងណាដែលផលិតចេញពីក្រណាត់យឺតធ្វើអំពីកប្បាស ទើបមិនរឹបជិត។
3. សម្លាប់បាក់តេរី : ចូរប្រើប្រាស់សាប៊ូប្រភេទកម្ចាត់មេរោគ និងជូតជើងឱ្យស្ងួត ជាពិសេសនៅចន្លោះម្រាមជើងម្យ៉ាងទៀត ត្រូវឧស្សាហ៍ត្រាំជើងក្នុងទឹកឱ្យបានយ៉ាងតិច30នាទី ព្រោះសារធាតុអាស៊ីតតានីកដែលមាននៅក្នុងទឹក អាចសម្លាប់មេរោគនៅនឹងជើងរបស់អ្នកបាន។ លាងសម្អាតក្រពេញញើសនៅបាតជើងរបស់អ្នក ដែលវាបានផលិតញើសដែលមានជាតិទឹក សូដ្យូម ក្លរ ជាតិខ្លាញ់ សារធាតុខនិច និងពពួកអាស៊ីតជាច្រើន។ ពេលមានបាក់តេរីមួយចំនួន វានឹងធ្វើឱ្យញើសទៅជាមានក្លិនអាក្រក់។ ការលាងសម្អាតជើងឱ្យអស់បាក់តេរីជាមួយសាប៊ូបំបាត់ក្លិន និងសម្ងួតវាឱ្យបានល្អ អាចកាត់បន្ថយក្លិនជើងរបស់អ្នកបានយ៉ាងល្អ។
4. ត្រាំទឹកអំបិល : សម្រាប់ជើងដែលមានបែកញើសច្រើន សូមលាយអំបិលកន្លះពែងក្នុងទឹក ហើយត្រាំជើងរបស់អ្នកក្នុងទឹកនោះ។ បន្ទាប់ពីត្រាំហើយ សូមកុំលាងជើងរបស់អ្នក គ្រាន់តែទុកឱ្យវាស្ងួតល្អគឺបានហើយ។
5. ព្យាយាមសម្ងួតស្បែកជើង : សូមឱ្យមានខ្យល់ចេញពីស្បែកជើងនៅពេលអ្នកឈប់ពាក់។ ប្រសិនបើអ្នកអាចធ្វើបាន ចូរដូរស្បែកជើងជារៀងរាល់ថ្ងៃ ហើយអ្នកមិនគួរពាក់ស្បែកជើងតែមួយគូដូចគ្នារយៈពេលពីរថ្ងៃនោះទេ។ ហើយត្រូវបន្ធូរខ្សែស្បែកជើងផង ពេលដែលអ្នកពាក់ស្បែកជើងប៉ាតា បន្ទាប់ពីពាក់រួច អ្នកត្រូវព្យួរស្បែកជើងរបស់អ្នកឱ្យត្រូវពន្លឺថ្ងៃ ដើម្បីសម្លាប់មេរោគ និងបំបាត់ក្លិនមិនល្អ៕
September 15, 2018
ពិនិត្យខ្លួនឯងទៅមើល៍… តើអ្នកគួរទទួលទានវីតាមីនបន្ថែម ឬទេ?
នៅពេលអាយុកើនច្រើនឡើង ការមើលថែទាំសុខភាពក៏ត្រូវតែកើនច្រើនឡើងទៅតាមនោះដែរ។ មនុស្សជាច្រើនអាចមានអារម្មណ៍ថា ខ្លួនមិនបានរឹងប៉ឹងស្វាហាប់ដូចកាលពីវ័យនៅរៀន ឬអំឡុងពេលវ័យជំទង់ឡើយ ព្រោះធ្វើការបានមួយរយៈមក ក៏ចាប់ផ្ដើមមានរោគាជំងឺដង្កាត់សួររកមុខបែបមិនធ្លាប់ដូច្នោះពីមុនមកឡើយ មិនថាតែឈឺក្បាលម៉ៃក្រេន ចុកស្មា ឈឺសន្លាក់កដៃ ជំងឺក្រពះ រហូតទៅដល់ជំងឺខ្លាញ់រុំថ្លើម ឬ Cysts ជាដើម។
ក្រៅពីជំងឺដង្កាត់ហើយ បញ្ហាដែលមកព្រមជាមួយវ័យដែលមានដូចជា ជ្រុះសក់ កើតស្លាកស្នាម សាច់ស្បែកលែងស្រស់ថ្លា ភ្នែកស្រវាំងស្រអាប់ ឬមានភាពធុញថប់តានតឹងប្រមូលសន្សំច្រើនឡើងរហូតដល់គេងមិនលក់ក៏ចាប់ផ្ដើមកើតឡើងដែរ ដូច្នេះមុននឹងទិញវីតាមីនបន្ថែមមកទទួលទាន យើងនាំគ្នាមកមើលសិនថា តើយើងមានបញ្ហាទាំងអស់នេះឬទេ? បើមាន តើត្រូវទទួលទានវីតាមីនមួយណា?
សាច់ស្បែកស្ងួតក្រៀម មានស្លាកស្នាម មិនតឹងណែនរលោង
វីតាមីនបន្ថែមដែលណែនាំ : វីតាមីន C ខូឡាជេន វីតាមីន A អូមេហ្កា3 និងសារធាតុដែក។
ជ្រុះសក់ ក្រចកដៃ-ជើងស្ដើងស្រួយ
វីតាមីនបន្ថែមដែលណែនាំ : វីតាមីន B2 និងជាតិស័ង្កសី។
មិនស្រួលខ្លួន គ្រុនផ្ដាសាយញឹកញាប់
វីតាមីនបន្ថែមដែលណែនាំ : វីតាមីន C វីតាមីន B និងសារធាតុដែក។
សម្រាកមិនបានគ្រប់គ្រាន់ ប្រើខួរក្បាលច្រើន
វីតាមីនបន្ថែមដែលណែនាំ : វីតាមីន B និងអូមេហ្កា3។
ឆ្អឹង និងសន្លាក់នៅក្នុងរាងកាយចាប់ផ្ដើមចុករួយ
វីតាមីនបន្ថែមដែលណែនាំ : វីតាមីន D, A, K, កាល់ស្យូម និងផូស្វ័រ។
រួយភ្នែក និងស្រវាំងមើលលែងសូវច្បាស់
វីតាមីនបន្ថែមដែលណែនាំ : វីតាមីន A និង វីតាមីន B2។
ភាពធុញថប់ តានតឹងក្នុងអារម្មណ៍កើតឡើងច្រើន
វីតាមីនបន្ថែមដែលណែនាំ : វីតាមីន B រួម វីតាមីន C និងម៉ាញេស្យូម។
តើចាំបាច់ត្រូវទទួលទានវីតាមីនបន្ថែមឬទេ?
ជាសំណួរដ៏ល្បីល្បាញមួយដែលមនុស្ស ជាច្រើនលួចគិតនៅក្នុងចិត្ត… វីតាមីនមួយប្រអប់ តម្លៃមិនមែនធម្មតាៗទេ តើយើងចាំបាច់ត្រូវតែទទួលទានវីតាមីនបន្ថែមមែន ឬយ៉ាងណា? ចម្លើយក៏គឺ មិនចាំបាច់ទេ វីតាមីនបន្ថែមគ្រាន់តែជាជំនួយការសម្រាប់អ្នកដែលដឹងច្បាស់ថា ខ្លួនឯងមានភាពប្រថុយប្រថានក្នុងការបានទទួលសារធាតុអាហារមិនគ្រប់គ្រាន់ ឬមិនសូវមានពេលមើលថែទាំខ្លួនឯងច្រើន អាចហៅបានថា ជាជំនួយការរបស់អ្នកទីក្រុងដែលត្រូវធ្វើការធ្ងន់ រហូតមិនអាចរៀបចំចំណីអាហារ និងបែងចែកពេលវេលាសម្រាប់ហាត់ប្រាណតាមតម្រូវការបាន។
តែនឹងក្លាយជារឿងល្អខ្លាំងណាស់ បើយើងអាចទទួលបានវីតាមីនទាំងអស់តាមរយៈអាហារដែលចម្អិនស្រស់ៗថ្មីៗ និងមានគុណប្រយោជន៍ខាងសារធាតុអាហារ គ្រប់ទាំង5ប្រភេទក្រុម ហាត់ប្រាណយ៉ាងជាប់លាប់ សម្រាកឱ្យគ្រប់គ្រាន់ និងរកពេលវេលាបន្ធូរអារម្មណ៍តានតឹងធុញថប់ដោយកិច្ចការងារដែលខ្លួនឯងចូលចិត្ត តែប៉ុណ្ណឹងលោកអ្នកមិនចាំាបាច់ចំណាយប្រាក់ជាមួយវីតាមីនតម្លៃច្រើនពាន់ច្រើនម៉ឺនបានបាត់ទៅហើយ។
តែបើមានអាការធ្ងន់ធ្ងរដល់ថ្នាក់ត្រូវទៅជួបគ្រូពេទ្យវិញនោះ វីតាមីនបន្ថែមក៏អាចជាជម្រើសមួយទៀតក្នុងការជួយជីវិតលោកអ្នកបានដូចគ្នា ដូច្នេះត្រូវពិនិត្យមើលខ្លួនឯងថា តើមានភាពចាំបាច់ក្នុងការទទួលទានវីតាមីនបន្ថែមច្រើនតិចប៉ុនណា។
ចំណុចមិនល្អរបស់ការទទួលទានវីតាមីនបន្ថែម
បើយើងទទួលទានវីតាមីនបន្ថែមជាប់ៗគ្នាក្នុងរយៈពេលយូរជ្រុលពេក អាចធ្វើឱ្យរាងកាយបានទទួលវីតាមីនមួយនោះច្រើនលើសតម្រូវការថ្លើម និងក្រលៀនត្រូវធ្វើការខ្លាំង ដើម្បីចម្រាញ់សារធាតុអាហារដែលត្រូវប្រើ និងត្រូវចោល ហើយការបានទទួលវីតាមីនបន្ថែមច្រើនជ្រុលពេក នៅអាចធ្វើឱ្យកើតជំងឺច្រើនឡើងបានដូចគ្នា ដូចជា បើសិនជាទទួលទានកាល់ស្យូមច្រើនជ្រុលពេក អាចប្រថុយនឹងការកើតក្រួសក្នុងក្រលៀន ឬឈាមហូរមិនឈប់ ឬពិបាកនឹងបញ្ឈប់(ពេលមានរបួស) បើសិនជាទទួល-ទានខ្លាញ់ត្រីច្រើនជ្រុលពេកជាដើម។
ដូច្នេះ មុននឹងទទួលទានអាហារបន្ថែម គួរសិក្សាពីវិធី និងបរិមាណដែលគួរទទួលទាន ព្រមទាំងចងចាំចំណុចគួរប្រយ័ត្នផង ដើម្បីឱ្យបានទទួលមកតែគុណប្រយោជន៍របស់វីតាមីនបន្ថែមដូចដែលចិត្តយើងត្រូវការ៕
September 15, 2018