Author: ធឿន មករា

អ្នកវិភាគថា កម្ពុជាគួរធ្វើពិពិធកម្មលើវិស័យផ្សេងទៀតដើម្បីរក្សាស្ថិរភាពសេដ្ឋកិច្ចយូរអង្វែង
ដើម្បីរក្សាកំណើនសេដ្ឋកិច្ចកម្ពុជាឱ្យបានឋិតថេរ និងយូរអង្វែងទៅមុខទៀត អ្នកវិភាគសេដ្ឋកិច្ចបានអះអាងថា កម្ពុជាគួរធ្វើពិពិធកម្មដោយបង្វែរទិសអភិវឌ្ឍន៍ទៅលើវិស័យមួយចំនួនទៀតឱ្យកាន់តែខ្លាំងឡើង ពិសេសវិស័យកសិកម្ម និងវិស័យទេសចរណ៍ ដែលជាវិស័យមានសក្តានុពលស្រាប់នៅក្នុងប្រទេសសមាជិកអាស៊ានមួយនេះ។
អ្នកវិភាគសេដ្ឋកិច្ចកម្ពុជាលោក ង៉ែត ជូ បានអះអាងថា ប្រសិនបើគេធ្វើការអង្កេតមើលក្នុងរយៈពេលខ្លី ឬរយៈពេលមធ្យមទៅមុខទៀត ឃើញថាវិស័យកាត់ដេរសម្លៀកបំពាក់ និងស្បែកជើង វិស័យធនាគារ វិស័យអចលនទ្រព្យ និងសំណង់នៅតែមានសក្តានុពលនៅឡើយ ខណៈដែលវិនិយោគិនបរទេសពិសេសជនជាតិចិនចូលមកវិនិយោគច្រើនលើសលប់ លើវិស័យទាំង2 នៅរយៈពេលប៉ុន្មានឆ្នាំចុងក្រោយនេះ ប៉ុន្តែប្រសិនជាគេសង្កេតមើលក្នុងរយៈពេលវែងឃើញថា វិស័យនេះហាក់មានភាពមិនទៀងទាត់ ដោយសារការនាំចេញទំនិញផ្សេងៗពិសេសផលិតផលឧស្សាហកម្មកាត់ដេរ សម្លៀកបំពាក់ ស្បែកជើង និងអង្ករជាដើម ទៅកាន់ទីផ្សារសហគមន៍អឺរ៉ុបមានភាពមិនទៀងទាត់ ឬកម្ពុជាត្រូវផុតកូតានាំចេញណាមួយ ហើយវិស័យសំណង់ក៏អាចនឹងកើនឡើងដល់ចំណុចកំពូលដែរ ដែលធ្វើឱ្យវិស័យទាំង2 នេះមានភាពថមថយចុះបន្តិចម្តងៗក្នុងរយៈពេលវែងទៅថ្ងៃអនាគត។ ករណីនេះលោកបានស្នើដល់រដ្ឋាភិបាលគួរតែធ្វើពិពិធកម្ម និងអភិវឌ្ឍន៍វិស័យផ្សេងមួយចំនួនទៀត ដើម្បីរក្សាស្ថិរភាពយូរអង្វែង ពិសេសវិស័យកសិកម្ម និងវិស័យទេសចរណ៍ដែលមានសក្តានុពលយូរអង្វែងស្រាប់ សម្រាប់ជួយជ្រោមជ្រែងសេដ្ឋកិច្ច នៅពេលដែលវិស័យកាត់ដេរ និងសំណង់មានការថមថយចុះក្នុងរយៈពេលវែងទៅថ្ងៃអនាគត។ លោកថា រដ្ឋាភិបាលគួរធ្វើការអភិវឌ្ឍវិស័យកសិកម្មឱ្យកាន់តែរីកចម្រើនខ្លាំងថែមទៀត ដើម្បីចែកចាយផលិតផលនៅលើទីផ្សារក្នុងស្រុកឱ្យបានកាន់តែច្រើន កាត់បន្ថយការនាំចូល និងនាំផលិតផលរបស់កម្ពុជាទៅកាន់ទីផ្សារអន្តរជាតិឱ្យបានកាន់តែច្រើនផងដែរ។
លោក ង៉ែត ជូ អ្នកវិភាគសេដ្ឋកិច្ចកម្ពុជា
ផ្អែមតាមរបាយការណ៍ការិយាល័យស្រាវជ្រាវម៉ាក្រូសេដ្ឋកិច្ចអាស៊ានបូក3 បានព្យាករថាកំណើនសេដ្ឋកិច្ចកម្ពុជានៅឆ្នាំ2018នឹងកើនឡើងលើសពី 7ភាគរយខណៈដែលធនាគារអភិវឌ្ឍន៍អាស៊ី(ADB) រកឃើញថា មានកំណើនត្រឹមតែ7% ប៉ុណ្ណោះ។
លោកបណ្ឌិត Seung Hyun Hong អ្នកឯកទេសនាំមុខរបស់ការិយាល័យស្រាវជ្រាវម៉ាក្រូសេដ្ឋកិច្ចអាស៊ានបូក3 ដែលហៅកាត់ថា AMRO បានមានប្រសាសន៍ថា សេដ្ឋកិច្ចកម្ពុជានៅតែរក្សាបានកំណើន7.2% នៅឆ្នាំ2018 ពោលគឺកើនឡើងខ្ពស់ជាងអត្រា7% កាលពីឆ្នាំ2017 ដែលបានមកពីការរីកចម្រើនរបស់វិស័យសំណង់ វិស័យកាត់ដេរ និងវិស័យទេសចរណ៍នៅកម្ពុជា។ របាយការណ៍ដែលចេញផ្សាយកាលពីពាក់កណ្តាលខែកញ្ញា បានគូសបញ្ជាក់ថា ដោយសារមានកំណើនសេដ្ឋកិច្ចនេះ បានធ្វើឱ្យរដ្ឋាភិបាលអាចបង្កើនការចំណាយសាធារណៈទៅលើប្រាក់បៀវត្សរ៍របស់មន្ត្រីសាធារណៈកាន់តែច្រើនឡើង។
យ៉ាងណាក៏ដោយ ប្រទេសកម្ពុជាមានអត្រាអតិផរណាបានកើនឡើងដល់3.1% នៅឆ្នាំ2018 ដោយសារតែតម្លៃថាមពល។ ហើយដើម្បីដោះស្រាយបញ្ហានេះ លោកបានផ្តល់អនុសាសន៍ឱ្យប្រទេសកម្ពុជាត្រូវការពង្រឹងគោលនយោបាយក្នុងកំណែទម្រង់រចនាសម្ព័ន្ធស្ថិរភាពហិរញ្ញវត្ថុ និងផ្តល់អាទិភាពលើធនធានសាពើរពន្ធឆ្ពោះទៅរកការចំណាយដែលលើកកម្ពស់កំណើនដើម្បីរក្សាកំណើនសេដ្ឋ-កិច្ចដ៏រឹងមាំ។ ដោយឡែកបំណុលសាធារណៈពីក្រៅប្រទេសនៅតែគ្រប់គ្រងបានល្អប្រសើរ ដែលបានឆ្លុះបញ្ចាំងពីលំហូរវិនិយោគពីបរទេសកើនឡើងខ្ពស់ជាងឱនភាពថវិកាចរន្ត។
ជាលទ្ធផលទុនបម្រុងអន្តរជាតិបានកើនឡើងដល់ 10ពាន់លានដុល្លារនៅចុងឆ្នាំ2018 នេះបើប្រៀបធៀបនឹងរយៈពេលដូចគ្នាកាលពីឆ្នាំ2017 ដែលមានត្រឹមតែ 8ពាន់8រយលានដុល្លារ។ ចំពោះស្ថានភាពវិស័យហិរញ្ញវត្ថុវិញ គឺនៅរក្សាបានភាពរឹងមាំដោយបានអនុវត្តបទប្បញ្ញត្តិនានា ព្រមទាំងការកំណត់ដើមទុនអប្បបរមាថ្មី និងអត្រាសន្ទនីស្សន៍ បានជួយឱ្យមានភាពប្រសើរឡើងនៃវិស័យហិរញ្ញវត្ថុ ប៉ុន្តែកម្ពុជាត្រូវការបន្តកំណែទម្រង់បទប្បញ្ញត្តិនានា ដើម្បីស្របទៅតាមស្តង់ដារអន្តរជាតិ។
ចំពោះកំណើនសេដ្ឋកិច្ចដែលមានតួលេខខុសគ្នារវាងADB 7% និងAMRO 7.2% សម្រាប់ឆ្នាំ2018នេះ ត្រូវបានអ្នកវិភាគអះអាងថា គ្រាន់តែជាតួលេខលម្អៀងប៉ុណ្ណោះ មិនមានអ្វីគួរភ្ញាក់ផ្អើលនោះទេ ដោយសាររបាយការណ៍ស្រាវជ្រាវធ្វើឡើងទៅតាមប្រភពផ្សេងៗគ្នា លុះត្រាតែខុសគ្នា 0.5% ឡើងទៅទើបបង្កឱ្យមានការភ្ញាក់ផ្ញើល និងមិនអាចទទួលយកបាន សរុបទៅរបាយការណ៍របស់ស្ថាប័នទាំង2 នេះ សុទ្ធតែអាចទទួលយកបានទាំងអស់៕
September 28, 2018
ស្វែងយល់ពីបញ្ហាសក់ជ្រុះធម្មតា និងខុសធម្មតា
បញ្ហា “សក់ជ្រុះ” អាចកើតឡើងស្ទើតែគ្រប់វ័យ ជាពិសេសក្នុងក្រុមមនុស្សប្រុស-ស្រីវ័យជំទង់ ដែលអ្នកខ្លះស្ទើតែមិនមានសក់មួយសរសៃនៅលើក្បាលឡើយ។ ក៏ប៉ុន្ដែពួកគេនៅតែព្យាយាមរកថ្នាំល្អៗមកទទួលទាន និងលាប ដើម្បីព្យាបាលរហូតដល់ខាតបង់ថវិកាមាសប្រាក់យ៉ាងច្រើនសន្ធឹកសន្ធាប់ ក៏នៅតែមិនទទួលបាននូវលទ្ធផលល្អប្រសើរដែរ។ ទាំងអស់នេះ កើតពីការមិនយល់ដឹងពីធម្មជាតិនៃរាងកាយរបស់អ្នកខ្លួនឯងហ្នឹងហើយ។ ដូច្នេះសូមមកស្វែងយល់ទាំងអស់គ្នា ដើម្បីដឹងកាន់តែច្បាស់ពីបញ្ហាជ្រុះសក់ ដែលជាលក្ខណៈធម្មជាតិ (ធម្មតា) និងខុសពីធម្មតាដូចខាងក្រោមនេះ។
សក់ជ្រុះតាមធម្មជាតិ (ធម្មតា)
វដ្ដជីវិតរបស់សរសៃសក់មាន3ដំណាក់កាលដូចជា៖
ដំណាក់កាលទី 1
ដំណាក់កាលនៃការលូតលាស់ ៈ ដោយសរសៃសក់ ដែលដុះចេញពីឫសសក់ លូតលាស់ប្រវែង1សង់ទីម៉ែត្រក្នុងមួយខែ និងអាចជាប់នៅលើស្បែកក្បាលបានយូររហូតដល់3-7ឆ្នាំ ចំពោះមនុស្សដែលមានសុខភាពល្អ។
ដំណាក់កាលទី 2
ដំណាក់កាលសម្រាកខ្លួន ៈ នៅក្នុងដំណាក់កាលនេះ សរសៃសក់មិនរីកលូតលាស់នោះទេ ហើយគល់សក់នៅតែបង្រួម។ រយៈពេលនេះនឹងប្រើពេលវេលាប្រមាណ3-4សប្ដាហ៍ មុនពេលឈានចូលដល់ដំណាក់កាលចុងក្រោយ។
ដំណាក់កាលទី 3
ដំណាក់កាលជ្រុះ ៈ ដោយគល់ និងសរសៃសក់ជ្រុះពីស្បែកក្បាល ត្រូវចំណាយពេលប្រម៉ាណ 3-4 សប្ដាហ៍ តែនៅទីបំផុតរាងកាយ និងមានកត្ដាជំរុញឱ្យកើតមានការបង្កើតសរសៃសក់ថ្មីដុះឡើងមកវិញ ដើម្បីជំនួសសរសៃសក់ចាស់ដែលជ្រុះទៅ។ ចំពោះអ្នកដែលមានសុខភាពល្អធម្មតា សរសៃសក់ 80-90 ភាគរយនឹងស្ថិតនៅក្នុងរយៈពេលលូតលាស់ 5-20% នៃរយៈពេលជ្រុះចុងក្រោយបំផុត។ ចំណែកឯ ដំណាក់ទី 2នោះនឹងត្រូវចំណាយពេលខ្លីវិញ។
ដូច្នេះហើយ គ្រប់គ្នាមានសក់ជ្រុះរាល់ថ្ងៃ ប្រមាណជា100-150សរសៃក្នុងមួយថ្ងៃ ដែលជាធម្មតា ទោះជាយ៉ាងណាក៏ដោយ អ្នកវិទ្យាសាស្ត្របានប្រាប់ថា ស្ត្រីមានសរសៃសក់ក្រាស់ជាងមនុស្សប្រុស។ នៅមានភាពខុសគ្នាក្នុងវ័យ ដែលហុចផលដល់ការលូតលាស់របស់សរសៃសក់ថែមទៀតគឺ នៅក្នុងវ័យកុមារ និងវ័យជំទង់ ដែលជាវ័យប្រែប្រួលរូបរាងកាយ និងអ័រម៉ូនខ្ពស់បំផុត។ កោសិកានៅក្នុងរាងកាយមានការបែងចែកខ្លួនយ៉ាងពេញទំហឹង គល់សក់ក៏ដូចគ្នានឹងមានគល់សក់ថ្មីកើតមកជំនួសគល់សក់ចាស់ភ្លាម។ តែនៅពេលដែលចូលដល់វ័យកណ្ដាល និងវ័យជរាអត្រាការកើតរបស់កោសិកាគល់សក់ថ្មី និងថយចុះតិចជាអត្រាគល់សក់ដែលបានបាត់បង់ទៅ ធ្វើឱ្យមើលទៅដូចជា សក់ស្ដើង ស្របពេលដែលអាយុកាន់តែច្រើនឡើង។
ដូច្នេះហើយ ប្រសិនបើអ្នកស្ថិតនៅក្នុងវ័យកណ្ដាល ឬវ័យជរា ការដែលមានសក់ស្ដើង អាចចាត់ទុកថាជារឿងធម្មតា និងមិនគួរព្យាយាមទៅរកទិញថ្នាំ ឬវីតាមីន មកទទួលទានឱ្យអស់លុយនោះទេ។
សក់ជ្រុះមិនធម្មតា
អ្នកដែលជ្រុះសក់ច្រើនខុសពីធម្មតា បណ្ដាលមកពីកត្តាជាច្រើនដូចជា៖
1. សក់ជ្រុះម្ដងម្កាល ៖ មូលហេតុមានដូចជា មានអារម្មណ៍តានតឹងក្នុងរយៈពេលយូរ អាចនឹងមានអាការជ្រុះសក់កើតមកដោយមិនដឹងខ្លួន អាចកើតឡើងបានគ្រប់វ័យ ឬអាចកើតឡើងដោយសារអាការជំងឺ ឬរោគផ្សេងៗដួចជា ជំងឺទឹកនោមផ្អែម កើតក្នុងភេទស្ត្រីដែលទើបប្រសូតបុត្រ និងស្ត្រីដែលនិយមប្រើប្រាស់ថ្នាំពន្យារកំណើតជាដើម។
ការព្យាបាល អាការជ្រុះសក់បែបនេះ មិនចាំបាច់ត្រូវការព្យាបាលច្រើនទេ ព្រោះវាអាចនឹងបាត់ទៅដោយឯកឯង។
2. សក់ជ្រុះបណ្ដាលមកពីដំណរពូជ ៖ គឺបណ្ដាលមកពីមូលហេតុដំណរពូជ និងកម្រិតអ័រម៉ូន Testosterone កើនឡើងក្នុងរាងកាយ ដែលកើតមានឡើងចំពោះទាំងភេទប្រុស និងភេទស្រី ក៏ប៉ុន្ដែរកឃើញកើតមានចំពោះបុរសច្រើនជាង។
ការព្យាបាល អាចនឹងមានដំណោះស្រាយពិបាកបន្ដិច បើទោះបីជាអ្នកវិទ្យាសាស្ត្រព្យាយាមស្វែងរកនូវថ្នាំថ្មីៗ តែនៅតែមិនទទួលបានលទ្ធផល។ ពេទ្យសើរស្បែក និយមឱ្យប្រើថ្នាំបន្ថយបរិមាណអ័រម៉ូនដែលពោលខាងលើ នៅក្នុងរាងកាយតែប៉ុណ្ណោះ ឬប្រើប្រាស់ថ្នាំបញ្ចុះសម្ពាធឈាម។ ចំពោះអាការប្រហាក់ប្រហែលគឺ ការដុះនូវគល់សក់ដែលជាប្រភេទសក់ខ្ចី និងស្ដើងតែប៉ុណ្ណោះ។ សូម្បីតែថ្នាំនៅក្នុងក្រុមសារធាតុ Steroids ដែលគ្រូពេទ្យនិយមប្រើ ក៏នៅតែទទួលបានលទ្ធផលសក់តិចណាស់ គឺអាចនឹងទទួលឱកាសគ្រោះថ្នាក់បន្ថែមទៀតក៏មានដែរ។
សមាសធាតុគីមីនៃផលិតផលថែរក្សាសក់ ឬការពារការសក់ជ្រុះ
មានធាតុផ្សំដោយ
1. សារធាតុសំខាន់ជំរុញក្នុងការលំហូរឈាមទៅកាន់ឫសសក់ ដើម្បីការពារសក់ជ្រុះដូចជា វីតាមីនផ្សេងៗ សារធាតុការពារចម្រាញ់ចេញពីឱសថបុរាណ។
2. សារធាតុអាហារមាននៅក្នុងក្រុមប្រូតេអីុនដើម្បីពង្រឹងភាពរឹងមាំដល់ឫសសក់ និងសរសៃសក់។
3. សារធាតុសំខាន់ៗដែលមានប្រសិទ្ធភាពកាត់បន្ថយ និងគ្រប់គ្រងបរិមាណជាតិខ្លាញ់នៅក្នុងស្បែកក្បាល និងបន្ថយការប្រតិកម្មរលាកក្រពេញខ្លាញ់។
4. សារធាតុសំខាន់ៗ ដើម្បីគ្រប់គ្រងការលូតលាស់របស់ Micro-organisms នៅលើស្បែកក្បាល។
កត្តាគួរកត់សម្គាល់
ប្រសិនបើថ្នាំ ឬផលិតផលការពារសក់ជ្រុះមានប្រសិទ្ធភាពអាចដោះស្រាយបញ្ហាសក់ជ្រុះបានពិតមែននោះ យើងប្រហែលមិនបានឃើញមនុស្សក្បាលទំពែក ឬក្បាលឆកនៅក្នុងប្រទេសទូទាំងពិភពលោកទៀតហើយ ដោយសារហេតុផលដំណរពូជជារឿងដែលយើងត្រូវទទួលស្គាល់ការពិត។ ដូច្នេះហើយ អ្នកអាចដោះស្រាយបញ្ហាបានដោយការប្រើប្រាស់ សក់ពាក់ ឬសក់ជ័រនៅលើស្បែកក្បាល នោះទើបមានសុវត្ថិភាព ច្រើនជាងការព្យាបាលពិសេស ដែលអាចមានគ្រោះថ្នាក់ ដោយបើមិនមានការប្រុងប្រយ័ត្នខ្ពស់៕
September 27, 2018
លេងម៉ូដក្រចកបែបកូនក្រមុំ សម្រាប់ថត Pre-wedding វិញម្តង
ម៉ូដសក់ស្អាតហើយ ម៉ូដសម្លៀកបំពាក់ក៏ស្អាតដែរ ដូច្នេះម៉ូដក្រចកក៏ត្រូវលេងម៉ូដឱ្យសីុគ្នា ដើម្បីឱ្យការថត Pre-wedding របស់អ្នកចេញមកគឺស្អាតបែបឥតទាស់តែម្តង។ តោះអនាគតកូនក្រមុំទាំងអស់ សូមជ្រើសរើសម៉ូដក្រចកសម្រាប់ថត Pre-wedding ដែលអ្នកស្រឡាញ់ ហើយថតរូបទុកជាអនុស្សាវរីយ៍ និងទុកតាំងបង្ហាញនៅក្នុងថ្ងៃដ៏វិសេសរបស់អ្នកភ្លាមទៅ៕

September 27, 2018
ជប៉ុនប្រើប្រាស់បច្ចេកវិទ្យាដើម្បីកាត់បន្ថយការនឿយហត់របស់បុគ្គលិក និងបង្កើនប្រសិទ្ធភាពការងារ
មិនមែនជារឿងចម្លែកពេកទេដែលឃើញអ្នកធ្វើការងារនៅក្នុងប្រទេសជប៉ុនសម្រាកនៅលើតុធ្វើការរបស់ពួកគេនៅគ្រប់ក្រុមហ៊ុន និងស្ថាប័នសំខាន់នានា។ នៅប្រទេសជប៉ុនការសម្រាកក្នុងរយៈពេលខ្លីដើម្បីប្រមូលថាមពលដើម្បីធ្វើការងារនៅទីសាធារណៈ និងកន្លែងផ្សេងៗទៀតជារឿងពេញនិយម ហើយក៏ត្រូវបានគេយកចិត្តទុកដាក់ផងដែរ ដោយគ្រប់គ្នាព្យាយាមបន្ថយការរំខានដល់ពួកគេ។ ការធ្វើបែបនេះត្រូវបានគេមើលឃើញថាវាអាចជួយពួកគេឱ្យមានពេលគ្រប់គ្រាន់ដើម្បីកាត់បន្ថយភាពតានតឹង ឬជាការសម្រាកយ៉ាងល្អមួយដើម្បីបន្តសកម្មភាពប្រកបដោយថាមពលសម្រាប់ការងារ។
ដោយមើលឃើញពីបញ្ហានេះ ក្រុមហ៊ុនធំៗ2 នៅជប៉ុនបានចាប់ដៃគ្នាបង្កើតបច្ចេកវិទ្យាដើម្បីសម្រួលដល់ការសម្រាករបស់បុគ្គលិក តាមរយៈការគ្រប់គ្រងសីតុណ្ហភាពនៅខាងក្នុងបន្ទប់ធ្វើការងារ។ ក្រុមហ៊ុនទាំង2នោះគឺក្រុមហ៊ុនផលិតម៉ាស៊ីនត្រជាក់ Daikin និងក្រុមហ៊ុនអេឡិចត្រូនិកយក្ស NEC ដែលបានដាក់បញ្ចូលនូវកម្មវិធីពិសេសដោយការប្រើប្រាស់កាមេរ៉ាភ្ជាប់ជាមួយនឹងកុំព្យូទ័ររបស់បុគ្គលិកដើម្បីមើលពីការកម្រើកភ្នែករបស់ពួកគេ។ នៅពេលដែលប្រព័ន្ធដឹងថាពួកគេកំពុងតែទន់ភ្នែកខ្លាំង វានឹងបន្ថយសីតុណ្ហភាពរបស់ម៉ាស៊ីនត្រជាក់ដោយស្វ័យប្រវត្តិ។
គំនិតក្នុងការអភិវឌ្ឍបច្ចេកវិទ្យានេះឡើងគឺបន្ទាប់ពីមានការស្រាវជ្រាវបឋមដើម្បីស្វែងរកពីវិធីដែលធ្វើឱ្យមនុស្សកាន់តែយកចិត្តទុកដាក់ ឬធ្វើឱ្យមនុស្សមានប្រសិទ្ធភាពកាន់តែខ្លាំងដូចជាទើបនឹងភ្ញាក់ពីដេកនាពេលព្រឹកព្រឹលឹមជាដើម។
ការស្រាវជ្រាវគឺត្រូវបានធ្វើឡើងដោយក្រុមអ្នកស្រាវជ្រាវបានសាកល្បងឱ្យមនុស្សដោះស្រាយលំហាត់គណិតវិទ្យាងាយៗក្នុងលក្ខខណ្ឌផ្សេងគ្នា។ បន្ទប់ទី1 គឺបន្ទប់ដែលមានសីតុណ្ហភាពត្រជាក់ជាងបន្ទប់ទីពីរ 4-10អង្សារ មានពន្លឺភ្លឺជាងបន្ទប់ទី2 និងមានក្លិនផ្សេងពីគ្នា។ ក្រោយពេលស្រាវជ្រាវបានរកឃើញថា បន្ទប់ដែលមានសីតុណ្ហភាពត្រជាក់ជាង មានការសម្រាកច្រើនជាង តែប្រសិទ្ធភាពការងារបែរជាលឿនជាង និងមានភាពច្នៃប្រឌិតខ្លាំងជាងផងដែរ។
យោងតាមអ្នកនាំពាក្យរបស់ក្រុមហ៊ុន Daikin បានឱ្យដឹងថា គម្រោងនេះនឹងត្រូវប្រែក្លាយជាឱ្យទៅជាពាណិជ្ជកម្ម និងផលិតផលជាក់ស្តែងនៅឆ្នាំ2020 ខាងមុខនេះ។ គម្រោងការនេះក៏នឹងបង្កើនភាពវៃឆ្លាតលើម៉ាស៊ីនត្រជាក់តាមរយៈការបក់ខ្យល់ម៉ាស៊ីនត្រជាក់ចែកចាយទៅកាន់អ្នកដែលសម្រាកក្នុងម៉ោងធ្វើការម្នាក់ៗផងដែរ។
តាមច្បាប់ការងាររបស់ប្រទេសជប៉ុន គឺអនុញ្ញាតឱ្យបុគ្គលិកធ្វើការងារក្នុងមួយថ្ងៃ 8ម៉ោង ហើយជាអតិបរមា 40ម៉ោងក្នុងមួយសប្តាហ៍។ តែទោះជាយ៉ាងនេះក្តីវាមិនសូវត្រូវបានគេអនុវត្តជាប់លាប់ដោយអ្នកគ្រប់គ្រងក្រុមហ៊ុន ឬអាជ្ញាធរនោះទេ។ ហេតុនេះការធ្វើការងារច្រើនម៉ោងខ្លាំងអាចបណ្តាលឱ្យមានផលប៉ះពាល់ដល់ការងារ និងជីវិតជាក់ស្តែង ដែលទាមទារឱ្យមានការដោះស្រាយដោយប្រើប្រាស់បច្ចេកវិទ្យា៕
September 27, 2018
អាជីវកម្មផ្នែកសម្ភារសុវត្ថិភាព មិនសូវមានអ្នកចាប់អារម្មណ៍ តែទទួលជោគជ័យខ្ពស់
ការចាប់ផ្តើមធ្វើអាជីវកម្ម ឬការបើកធ្វើជំនួញរបស់បុគ្គលម្នាក់ៗរមែងមានការចាប់ផ្តើមពីបុព្វហេតុផ្សេងៗគ្នា ខ្លះសម្លឹងមើលឃើញពីផលចំណេញល្អ និងបានគិតគូរយ៉ាងច្បាស់លាស់ រួចក៏ចាប់ផ្តើមធ្វើជំនួញនោះតែម្តង។ ខ្លះទៀតមើលឃើញពីភាពលំបាកក្នុងការងារដែលខ្លួនកំពុងធ្វើ ក៏បែរទៅធ្វើជំនួញផ្ទាល់ខ្លួនវិញ។ ឧទាហរណ៍ដូចជា ប្រធានក្រុមហ៊ុន RINCO ដែលបានផ្តល់បទសម្ភាសដល់កាសែតឡារ៉ែនពាណិជ្ជ នូវអ្វីដែលលោកបើកដំណើរការក្រុមហ៊ុនដូចខាងក្រោម៖
លោក ម៉ម សុថារិន្ទ បានបញ្ចប់ការសិក្សាថ្នាក់អនុបណ្ឌិតពហុបច្ចេកវិទ្យានៅប្រទេសអារមេនី(រដ្ឋមួយក្នុងអតីតសហភាពសូវៀត)ក្នុងឆ្នាំ1992។ ពេលមកដល់ប្រទេសកំណើតវិញ លោកបានក្លាយជាមន្ត្រីក្នុងស្ថាប័នរដ្ឋមួយ។ បន្ទាប់ពីលោកបានប្រឡូកក្នុងការងារជាមន្ត្រីរាជការបានមួយរយៈ លោកក៏ឈប់ ដោយសារមានគំនិតចង់រកស៊ីវិញម្ដង។
ប៉ុន្តែលោកបានទៅធ្វើការនៅក្នុងក្រុមហ៊ុនបារី-ថ្នាំជក់ (British American Tobacco Cambodia) របស់ឧកញ៉ា គង់ ទ្រីវ រយៈពេល 7ឆ្នាំក្នុងតំណែងជាអ្នកគ្រប់គ្រងសម្ភារ និងរៀបចំបញ្ជូនទំនិញ និងបន្ទាប់នោះមកទៀត លោកបានចូលទៅធ្វើការនៅក្រុមហ៊ុនប្រេងតូតាល់ Total អស់រយៈពេល 7ឆ្នាំដូចគ្នា ដែលទាំងអស់នេះជាឱកាសធ្វើឱ្យលោកបានដកស្រង់យកបទពិសោធមកប្រើក្នុងអាជីវកម្មរបស់ខ្លួនឯង។ ក្នុងការងារទាំងពីរខាងលើលោក ម៉ម សុថារិន្ទ ទទួលបានប្រាក់ខែ 2,000 និងជាង 2,000ដុល្លារអាមេរិកតាមលំដាប់ ប៉ុន្តែលោកមិនមានការសោកស្តាយឡើយ។
នៅក្នុងឆ្នាំ2010 លោកក៏ចាប់ផ្ដើមបើកក្រុមហ៊ុនផ្ទាល់ខ្លួនដែលមានឈ្មោះថា RINCO TRADING co.,Ltd ដើម្បីបម្រើសេវាកម្មសុវត្ថិភាព Safety SHE (Safety Health Environment) ដែលពីដំបូងមិនទាន់បានចុះបញ្ជីទេ(បង់ត្រឹមពន្ធប៉ាតង់) លុះដល់ឆ្នាំ2014 ទើបក្រុមហ៊ុនលោកមានការចុះបញ្ជីច្បាស់លាស់ ដោយប្រើប្រាស់ដើមទុនដំបូងចំនួន 2,000ដុល្លារអាមេរិកប៉ុណ្ណោះ។
លោកបានរៀបរាប់ថា៖ “កាលពីចាប់ផ្ដើមរកស៊ីដំបូង គេមកកក់ដោយផ្ទាល់ ឬផ្ញើតាមអុីមែលតាមរយៈភ្ញៀវក្នុងស្រុក ឬបរទេសដែលចង់ទិញមុនមួយអាទិត្យ ឬមួយខែតាម Plan របស់គេ ព្រោះឧបករណ៍បរិក្ខារយើងសុទ្ធតែបញ្ជាទិញពីបរទេស ភ្ញៀវអាចមកយកបាននៅថ្ងៃដែលអីវ៉ាន់មកដល់។ បច្ចុប្បន្នយើងប្រើបច្ចេកវិទ្យាមានប្រព័ន្ធគ្រប់គ្រងត្រឹមត្រូវ ធ្វើឱ្យអាចលក់ទំនិញតាមប្រព័ន្ធអនឡាញ តាមឌីជីថលនេះបានជាហូរហែ និងទទួលបានការកុម្ម៉ង់ទិញកើនឡើង យើងក៏ជួលបុគ្គលិក 5នាក់ដើម្បីជួយក្នុងអាជីវកម្មនេះ‟។
លោកបានប្រាប់ឱ្យដឹងថា ហេតុអីបានជាលោកចាប់យកមុខជំនួញនេះ នោះគឺដោយសារតែលោកមានបទពិសោធពីការងារនៅក្រុមហ៊ុនបារី និងក្រុមហ៊ុនតូតាល់ ដែលកាលនោះ ការគិតពីការគ្រប់គ្រងសុវត្ថិភាពពុំត្រូវបានគេអនុវត្តទេ។ ជាងដប់ឆ្នាំក្នុងការងារ លោកមិនទទួលបានការការពារសុវត្ថិភាពគ្មានអ្នកបង្ហាត់បង្ហាញបង្រៀន និងគ្មានទាំងឧបករណ៍ការពារទៅទៀត។ ពេលត្រូវការបញ្ជាទិញពីបរទេសដូចជាពីសិង្ហបុរី ឬចិនតៃវ៉ាន់ជាដើម សុទ្ធតែមិនបានដូចអ្វីដែលយើងត្រូវការ ជួនកាលមិនមានទៀតផង។
ហេតុនេះទើបលោកចិញ្ចឹមចិត្ត និងគិតប្រមើលមើលពីការបើកក្រុមហ៊ុនដែលផ្គត់ផ្គង់បរិក្ខារសុវត្ថិភាពដើម្បីពេលក្នុងស្រុកយើងត្រូវការ យើងអាចផ្គត់ផ្គង់បានតាមតម្រូវការ។ ដោយសារយើងធ្លាប់លំបាក យើងព្យាយាមសម្លឹងទៅមុខថា ថ្ងៃណាមួយយើងនឹងធ្វើវាឱ្យបាន។ យើងដឹងពីផលលំបាកនេះទើបយើងអាចធ្វើបាននៅថ្ងៃនេះ ដែលអាចជួយ
ផ្គត់ផ្គង់ដល់តម្រូវការក្នុងស្រុកដែលបានចាប់ផ្តើមមានតម្រូវការនូវឧបករណ៍បរិក្ខារទាំងនោះហើយ។
លោកបន្តថា ដំបូងៗយើងមានការលំបាកណាស់ព្រោះយើងទទួលបានការបញ្ជាទិញតិចតួចពេក។ ក្រុមហ៊ុនសហគ្រាសដែលបញ្ជាទិញនៅមានចំនួនតិចនៅឡើយ និងមិនទាន់បានគិតគូរខ្លាំងពីបញ្ហាសុវត្ថិភាពជាចម្បងនេះទេ តែនៅពេលពួកគេចាប់ផ្តើមយល់ដឹងពីបញ្ហាសុវត្ថិភាព ពួកគេបានធ្វើការបញ្ជាទិញ ធ្វើឱ្យយើងទទួលបានការបញ្ជាទិញកាន់តែច្រើនឡើង ធ្វើឱ្យមុខរបររបស់យើងកាន់តែមានភាពរីកចម្រើនឡើង។
លោក សុថារិន្ទ បានបញ្ជាក់ថា បើគិតទៅ មុខរបររបស់លោកហាក់ដូចមានហានិភ័យខ្ពស់ តែថាពិបាក ក៏ដូចជាមិនពិបាកទេ ព្រោះឧបករណ៍បរិក្ខារសុវត្ថិភាពមានតម្រូវការច្រើននៅក្នុងវិស័យសំណង់អគារ អចលនទ្រព្យ និងខុនដូជាដើម និងរួមទាំងក្នុងវិស័យរោងចក្រកាត់ដេរផងដែរ។ បើគិតពីតម្លៃវិញ សម្ភារប្រើប្រាស់ធម្មតា ដូចជាមួក ស្រោមដៃ វ៉ែនតា ម៉ាស់ការពារ សុទ្ធតែជាសម្ភារមានស្តង់ដារ មិនសូវជាមានតម្លៃថ្លៃប៉ុន្មានទេ តែឧបករណ៍ខ្សែរ៉កសម្រាប់យោងមនុស្សឡើង-ចុះអាចនឹងមានតម្លៃថ្លៃបន្តិច។
លោកបន្តថា ការទិញ-លក់តាមអនឡាញ អតិថិជនមិនចាំបាច់មកទិញដល់ក្រុមហ៊ុនទេ គឺគ្រាន់តែមានទូរស័ព្ទទំនើប និងកុំព្យូទ័រដែលអាចដំណើរការអុីនធើណិតបានជាការស្រេច។ ពួកគេអាចពិនិត្យមើលឧបករណ៍បរិក្ខារទំនិញដែលយើងបានបង្ហាញ និងបានផ្ញើគំរូដែលគេចង់បាននោះទៅគេ។
លោកបានបញ្ជាក់ថា ជារួមនៅក្នុងការដ្ឋានសំណង់មួយ គេតែងតែព្រមព្រៀងជាមួយយើង និងឱ្យយើងផ្គត់ផ្គង់គ្រឿងបរិក្ខារសុវត្ថិភាពឱ្យគេ 100% តែម្ដង។ ចំពោះការលក់សម្ភារបរិក្ខារសុវត្ថិភាពនេះក្រោយពីមានការផ្សព្វផ្សាយរបស់ក្រសួងការងារអំពីភាពងាយរងគ្រោះថ្នាក់របស់កម្មករសំណង់ និងកម្មកររោងចក្រមក ក្រុមហ៊ុនដែលសាងសង់សំណង់អគារធំៗ រឹតតែមានតម្រូវការសម្រាប់ការដ្ឋានរបស់ពួកគេ។ ឯខាងរោងចក្រវិញក៏បានជាវគ្រឿងបរិក្ខារសម្រាប់សុវត្ថិភាពកាន់តែច្រើនឡើងៗដែរ ដូច្នេះផលចំណេញ ក៏យើងទទួលបានទៅតាមនោះដែរ។
ទោះជាមានវ័យរាងជ្រេរបន្តិចមែន តែលោកសុថារិន្ទ ក្លាយជាសហគ្រិនជោគជ័យម្នាក់ដែលសព្វថ្ងៃនេះក្រុមហ៊ុនរបស់លោកត្រូវបានទទួលស្គាល់ថា ជាក្រុមហ៊ុនមានសក្តានុពលលើផ្នែកសម្ភារបរិក្ខារសុវត្ថិភាពនៅកម្ពុជា ហើយលោកគ្រោងបង្កើតសេវាត្រេននីង(Tranning)សម្រាប់អាជីវកម្មរបស់លោកថែមទៀត។ ចំពោះគ្រឿងសម្ភារបរិក្ខារដែលលក់នៅក្នុងអាជីវកម្មរបស់លោក គឺលោកបានកុម្ម៉ង់ពីបណ្តាប្រទេសមួយចំនួន ដូចជាប្រទេសអុីតាលី ចិន ចិនតៃវ៉ាន់ ជប៉ុន បារាំង និងអាមេរិកជាដើមតាមការចង់បានរបស់អតិថិជន។
ទន្ទឹមនឹងភាពជោគជ័យក្នុងអជីវកម្ម លោក សុថារិន្ទ បានចែករំលែកបទពិសោធ និងចំណេះដឹងមួយចំនួនដល់អាជីវករ ឬសហគ្រិនវ័យក្មេងជាច្រើនទៀតផងដែរ ដោយលោកបានអះអាងថា ការផ្តោតលើអាជីវកម្ម ការស្គាល់ច្បាស់ពីអាជីវកម្មរបស់ខ្លួន និងតម្រូវការទីផ្សារ គឺជាចំណុចសំខាន់ដែលជំរុញឱ្យអាជីវកម្មរីកធំធាត់លឿន និងជោគជ័យខ្លាំង៕
September 27, 2018
ចំណុចមួយចំនួនដែលអ្នកត្រូវយល់ដឹង ដើម្បីក្លាយជាសហគ្រិនជោគជ័យម្នាក់
ប្រសិនមានគោលដៅច្បាស់លាស់ មនុស្សគ្រប់គ្នាសុទ្ធតែអាចក្លាយជាសហគ្រិនបានដោយជោគជ័យ មិនថាអ្នកមានប្រាក់ ឬមិនមានប្រាក់នោះទេ សូម្បីតែកម្មករក៏អាចក្លាយជាថៅកែបានដែរប្រសិនបើបុគ្គលម្នាក់នោះមានការតាំងចិត្តច្បាស់លាស់។
លោក ង៉ែត ចាន់សុខ ប្រធានការិយាល័យយុវជននៃមន្ទីរអប់រំ យុវជន និងកីឡារាជធានីភ្នំពេញមានប្រសាសន៍ថា សហគ្រិនគឺជាអ្នកដែលមានគំនិតបង្កើតអ្វីដែលថ្មី មានគំនិតច្នៃប្រឌិត និងបើមានទំនុកចិត្តលើខ្លួនឯងច្បាស់លាស់ហើយនោះ ប្រាកដជាអាចក្លាយជាសហគ្រិនជោគជ័យមិនខាន។ ឧទាហរណ៍ដូចជាមនុស្សម្នាក់ពេលខ្លួនចង់ក្លាយជាថៅកែ ទោះជាគ្មានប្រាក់ ក៏អាចធ្វើបានដែរ ដោយគាត់ត្រូវចាប់ផ្តើមការងារពីធ្វើការជាកម្មករគេ ហើយខំប្រឹងសន្សំលុយ និងប្រឹងរៀនជំនាញដែលគាត់ធ្វើរាល់ថ្ងៃឱ្យកាន់តែចេះស្ទាត់ នៅពេលមានទំនុកចិត្តពីថៅកែហើយ គាត់នឹងអាចក្លាយជាទៅជាមេការនៅថ្ងៃណាមួយ ពេលក្លាយទៅជាមេការហើយគាត់ខំប្រឹងសន្សំលុយ ថ្ងៃក្រោយទៀតគាត់នឹងក្លាយជាអ្នកម៉ៅការ លុះម៉ៅការបានប្រាក់ចំណេញច្រើននឹងអាចមានលទ្ធភាពបើកក្រុមហ៊ុនមួយដោយខ្លួនឯង និងក្លាយជាថៅកែតែម្តង។
លោក ង៉ែត ចាន់សុខ ប្រធានការិយាល័យយុវជននៃមន្ទីរអប់រំ យុវជន និងកីឡារាជធានីភ្នំពេញ
លោកបន្តថា មុននឹងទៅដល់ចំណុចខាងលើមនុស្សត្រូវមានជំនាញច្បាស់លាស់ និងបុគ្គលិកលក្ខណៈមួយចំនួនដែរ ពិសេសមនុស្សត្រូវមានទឹកចិត្តដែលកើតចេញពីឆន្ទៈខ្លួនឯង ខំប្រឹងប្រែងឱ្យកាន់តែប្រសើរឡើងៗពីមួយថ្ងៃទៅមួយថ្ងៃ។ ទោះយ៉ាងនេះក្តី ការអភិវឌ្ឍបុគ្គលិកលក្ខណៈនេះទៀតសោត គឺគ្រាន់តែជាចំណុចចាប់ផ្តើមប៉ុណ្ណោះ ហើយក៏នៅមិនទាន់អាចធានាបាននូវភាពជោគជ័យនៅក្នុងការប្រកបអាជីវកម្មឡើយ ដូច្នេះត្រូវមានផែនការច្បាស់លាស់ជាមុនដែរ ដើម្បីដឹងថា ពេលធ្វើដំណើរទៅមុខយើងមានភាពជោគជ័យប៉ុន្មានភាគរយ និងបរាជ័យប៉ុន្មានភាគរយ?។
ដើម្បីក្លាយជាសហគ្រិនជោគជ័យបាន មនុស្សត្រូវចេះមើលឱកាសថ្មីៗ ឬវិធីថ្មីៗសម្រាប់អាជីវកម្មខ្លួនឯង ហើយត្រូវត្រៀមដោះស្រាយការងារជាបន្តបន្ទាប់ជាមួយនឹងការប្រែប្រួលនានា ព្រោះថា ការដំណើរការអាជីវកម្មទៅមុខតែងតែជួបឧសគ្គជានិច្ច ដូចជាការបញ្ជ្រៀតផលិតផលរបស់ខ្លួនចូលក្នុងទីផ្សារ ដែលតែងតែមានការប្រកួតប្រជែងគ្នាខ្លាំងដោយចៀសមិនផុតឡើយទាក់ទងនឹងតម្លៃ និងគុណភាពទំនិញ ឬផលិតផល ដែលនេះជាចំណុចគំរាមកំហែងមួយ ជាអ្វីដែលកើតឡើង ឬអាចនឹងកើតឡើងនៅខាងក្រៅអាជីវកម្មដែលនាំឱ្យរារាំងដល់ដំណើរការជោគជ័យរបស់យើង និងអាចធ្វើឱ្យប្រាក់ចំណេញថយចុះ។
ជាឧទាហរណ៍ អាជីវកម្មមួយដែលបង្កើតឡើង ហើយផលិតផលបានទទួលការពេញនិយមលើទីផ្សារ ពេលនោះប្រាកដជាមានផលិតផលថ្មីមួយទៀតចាប់ផ្តើមស្រដៀងគ្នានេះដែរ ហើយនិងមានការប្រកួតប្រជែងកាន់តែច្រើនឡើងៗមិនខាន។ ពេលនោះអតិថិជននឹងថ្លឹងថ្លែងថា តើផលិតផលមួយណាល្អជាងមួយណាមុននឹងសម្រេចចិត្តទិញយកមកប្រើប្រាស់ដើម្បីឱ្យប្រាកដថា មានគុណភាពល្អ ឬអាចប្រើជាប្រយោជន៍របស់គេបាន។ ដូច្នេះនៅពេលដែលយើងកំពុងតែដើរលើផ្លូវមួយ ឬកំពុងតែរកស៊ីក្នុងមុខរបរអ្វីមួយ យើងត្រូវគិតយ៉ាងយកចិត្តទុកដាក់ថា អ្វីដែលយើងកំពុងធ្វើវាត្រឹមត្រូវ ឬអត់ ឬវានៅតែមានតម្រូវការទីផ្សារដែរទេ? ព្រោះវាជាចំណុចសំខាន់បំផុតក្នុងការជ្រើសរើសមុខរបរមួយដែលត្រឹមត្រូវ ហើយបើរើសមុខរបរខុស ទោះខំប៉ុនណាក៏មិនជោគជ័យដែរ ប៉ុន្តែបើសិនជាអ្នកមានមុខរបរស្រាប់ដែលមិនសូវត្រូវទីផ្សារទេនោះ អ្នកត្រូវតែខិតខំរិះរកគំនិតច្នៃប្រឌិតថ្មីៗ ដើម្បីកែប្រែមុខរបរនោះឱ្យវាត្រូវនឹងទីផ្សារឡើងវិញ។
ជ្រើសរើសមុខរបរត្រូវ គឺមុខរបរណាដែលអាចរកស៊ីបានមួយជីវិត ដែលធានាថា អតិថិជនមានតម្រូវការនៅលើទីផ្សាររហូតមិនចេះរីងស្ងួត ឧទាហរណ៍សាមញ្ញមួយ របរផលិតសៀវភៅសរសេរលក់ជាដើម។ សៀវភៅសរសេរជាផលិតផលដែលមានតម្រូវការគ្មានទីបញ្ចប់នៅទូទាំងពិភពលោក មិនថាប្រទេសណាទេ ចាប់តាំងពីកុមាររហូតដល់យុវវ័យ មនុស្សត្រូវការទិញសៀវភៅសរសេរ សៀវភៅសិក្សា ហើយរហូតដល់រៀនចប់ចូលធ្វើការ ក៏មនុស្សនៅតែត្រូវការសៀវភៅសរសេរដើម្បីបំពេញការងារផ្សេងៗផងដែរ។
ងាកមកប្រជាជនខ្មែរយើងវិញ មានមុខរបរសាមញ្ញមួយ គឺការផលិតធូបលក់។ ប្រជាជនខ្មែរកាន់សាសនាព្រះពុទ្ធ ពួកគាត់តែងអុចធូបសែនព្រេននៅរៀងរាល់ថ្ងៃសិល ដូច្នេះពួកគាត់ប្រាកដជាត្រូវការទិញធូបជាប្រចាំ។ នៅពេលដែលអ្នកបានជ្រើសរើសមុខរបរត្រឹមត្រូវហើយ អ្នកក៏មិនអាចចេះតែធ្វើវាដោយគ្មានក្បួនខ្នាតត្រឹមត្រូវដែរ ពោលគឺត្រូវកែច្នៃឱ្យមានភាពប្រសើរឡើងជានិច្ច ទាំងគុណភាព និងការវេចខ្ចប់ជាដើម ដើម្បីបង្កើនសោភណភាព គុណភាពល្អដើម្បីមានសមត្ថភាពប្រកួតប្រជែងលើទីផ្សារ និងមានការគាំទ្រពីអតិថិជនដែលកើនឡើងជាលំដាប់៕
September 27, 2018
មុនគឺជាអ្វី? មូលហេតុ និងកត្តាដែលធ្វើឱ្យកើតមុន
មុន គឺជាដុំប៉ោងគ្រាប់តូចៗ ដែលមានខ្ទុះពណ៌សៗនៅខាងក្នុង កើតឡើងព្រោះស្បែកកើតមានប្រតិកម្ម ឬមានការកកស្ទះជាតិខ្លាញ់នៅរន្ធរោម។ ការកកកុញនៅក្រោមរន្ធរោមចេញពីក្បាលមុន ហៅថា “Comedone” ដែលវាអាចកើតប្រតិកម្មបានដោយងាយ ប្រសិនបើមានការប៉ះពាល់បន្ថែមដូចជាបាក់តេរី ឬលម្អងនៅក្នុងអាកាស ជាទូទៅវានៅក្បែរៗបរិវេណស្បែកមុខរបស់អ្នក។ មុន ភាគច្រើនកើតឡើងនៅបវរិវេណផ្ទៃមុខ ក និងដងខ្លួនផ្នែកខាងលើ ដែលជាផ្នែកដែលមានក្រពេញជាតិខ្លាញ់ខ្នាតធំ។
យោងតាមឯកសាររបស់មន្ទីរព្យាបាលស្បែក និងរោគសើស្បែក បានរកឃើញថា មុន គឺជាជំងឺដែលមានអ្នកកើតច្រើនជាងគេ និងតែងមកទទួល-ការព្យាបាលក្នុងលំដាប់ខ្ពស់ជាងគេបង្អស់តែម្ដងស្ទើរតែនិយាយបានថា កើតមានលើផ្ទៃមុខភាគច្រើន ឬក្នុងចំណោមអ្នកជំងឺ3នាក់មានម្នាក់ដែលកើតមុន ហើយមកទទួលការព្យាបាលពីសំណាក់គ្រូពេទ្យសើរស្បែកឯកជន និងមន្ទីរពេទ្យរដ្ឋ។
នៅក្នុងវិទ្យាវេជ្ជសាស្ត្រ “មុន” អាចកើតឡើងចាប់តាំងពីក្មេងអាយុ8-10ឆ្នាំ និងចាត់ទុកថាជាការចាប់ផ្ដើមកើតមុនក្នុងពេលបម្រែបម្រួលវ័យជាសញ្ញាបញ្ជាក់ពីការឈានចូលដល់យុវវ័យដំបូង ឬជាវ័យពេញក្រមុំពេញកំលោះ។ ក្មេងស្រីដែលកើតមុនជាលើកដំបូង គឺនៅពេលមុនមករដូវដំបូង1ឆ្នាំ ដែលអាយុចាប់ផ្ដើមកើតមុនច្រើននៅក្នុងអំឡុងពីអាយុ12-15ឆ្នាំ និងកើតមុនខ្លាំងបំផុតនៅចន្លោះអាយុ17-21ឆ្នាំ។ ក្មេងប្រុសអាចកើតមាននៅក្នុងអាយុ16-17ឆ្នាំ និងចាប់ផ្ដើមបាត់ទៅវិញនៅអាយុឈានដល់វ័យកំលោះ (យុវវ័យ) ដោយមុននឹងចាប់ផ្ដើមបាត់បន្ដិចម្ដងៗ។ លើកលែងតែអ្នកជំងឺធ្ងន់ធ្ងរមួយចំនួន ដែលមានមុនច្រើន ហើយត្រូវចំណាយពេលព្យាបាលរហូតដល់អាយុ35ឆ្នាំ ឬយូរជាងនេះក៏មានដែរ។ ក្រៅពីនេះ បុរសដែលមានអាយុ40ឆ្នាំ គឺមានម្នាក់ក្នុងចំណោមបុរស100នាក់ ដែលនៅតែកើតមានបញ្ហាមុខឡើងមុន និងស្ត្រី5នាក់ក្នុងចំណោម100នាក់ ដែលនៅតែមានមុននៅលើស្បែកមុខហើយអាចនឹងបាត់ទៅវិញនៅអាយុ45ឆ្នាំ។
ការស្រាវជ្រាវរកឃើញថា ស្ត្រីកើតមុននៅអាយុ25ឆ្នាំ គឺមានច្រើនជាបុរស ព្រោះអាចមកពីស្ត្រីបើគ្រឿងសម្អាង ដើម្បីបន្ថែមភាពស្រស់ស្អាត គឺគ្រឿងសម្អាងនេះហើយ ដែលជាមូលហេតុសំខាន់នៃការកកើតមុននៅលើស្បែកមុខប្រសិនបើអ្នកជ្រើសរើសផលិតផលគ្រឿងសម្អាងខុស ឬមិនត្រូវជាមួយនឹងសភាពស្បែករបស់អ្នក៕
September 26, 2018
វិធីថែរក្សាស្បែកសម្រាប់អនាគតកូនក្រមុំ
កូនក្រមុំគឺជាមនុស្សដ៏សំខាន់បំផុតនៅក្នុងពិធីមង្គលការ ដូច្នេះពិតជាគេចមិនផុតទេដែលថា គ្រប់ក្រសែភ្នែកនៃភ្ញៀវដែលមកចូលរួមទាំងអស់នឹងបាញ់តម្រង់សម្តៅមករកកូនក្រមុំ ហេតុដូច្នេះគ្រប់យ៉ាងនៅក្នុងថ្ងៃពិសេសនេះគឺត្រូវតែពេញដោយទំនុកចិត្ត។ មិនថាជាស្បែក មុខ ដៃ ជើង ឬដងខ្លួននោះទេ គឺសុទ្ធតែមានភាពសំខាន់ទាំងអស់សម្រាប់កូនក្រមុំគ្រប់រូប ព្រោះវាជាផ្នែកមួយដែលធ្វើឱ្យអ្នកកាន់តែមានទំនុកចិត្តចំពោះខ្លួនឯងខ្លាំងឡើង។ ដូច្នេះតើអ្នកគួរធ្វើដូចម្តេច ដើម្បីទទួលបាននូវភាពជឿជាក់នេះ? ដូច្នេះដើម្បីឱ្យក្លាយជាកូនក្រមុំដ៏ស្រស់ស្អាតម្នាក់ ដែលមានស្បែករលោងភ្លឺថ្លាស្រស់ស្អាតជានិច្ចនោះ សូមចាប់ផ្តើមថែរក្សាស្បែករបស់អ្នកតាំងពីពេលនេះតទៅ ហើយរឿងដែលអ្នកគួរធ្វើដើម្បីទទួលបាននូវភាពស្រស់ស្អាតនោះគឺមានរៀបរាប់ដូចខាងក្រោមនេះ៖
វាជារឿងល្អបំផុតប្រសិនបើអ្នកអាចធ្វើឱ្យមនុស្សគ្រប់គ្នាបានឃើញថា ភាពស្រស់ស្អាតដែលអ្នកកំពុងតែមាននេះគឺជាភាពស្រស់ស្អាតបែបធម្មជាតិ។ ដូច្នេះបើអ្នកនៅមានពេលវេលាច្រើនដែរទំរាំថ្ងៃពិធីមកដល់នោះ អ្នកគួរតែឧស្សាហ៍ខាត់ស្បែកកម្ចាត់កោសិកាចាស់ៗតាមក្បួនធម្មជាតិដូចជា ការខាត់ស្បែកដោយអម្ពិលទុំ ក្រូចពោធិ៍សាត់ ឬទឹកដោះគោឆៅជាដើម ហើយក៏ត្រូវឧស្សាថែទាំស្បែកមុខដោយការបិទម៉ាសធម្មជាតិលើផ្ទៃមុខផងដែរ។ វិធីមួយចំនួនទៀតដូចជា ម៉ាស្សាប្រេង ស្ទីម និងចំហុយស្បែកជាដើម សុទ្ធតែជារឿងដែលអនាគតកូនក្រមុំគួរធ្វើដើម្បីឱ្យស្បែកស្រស់ស្អាតភ្លឺថ្លា។ ការធ្វើចិត្តឱ្យសប្បាយ សម្រាកឱ្យបានគ្រប់គ្រាន់ ទទួលទានអាហារមានប្រយោជន៍ចំពោះស្បែក ផ្តល់សំណើមដល់ស្បែក ការពារស្បែកពីកម្តៅថ្ងៃលាបឡេថែរក្សាស្បែក និងពាក់ខោអាវជិតៗពេលចេញទៅខាងក្រៅ គឺសុទ្ធសឹងជាផ្នែកមួយដែលជួយឱ្យស្បែករបស់អ្នកសស្អាតភ្លឺថ្លា ដើម្បីត្រៀមជាស្រេចក្នុងការបង្ហាញពីសម្រស់ស្បែករបស់អ្នកក្នុងថ្ងៃដ៏មានអត្ថន័យរបស់អ្នកនាថ្ងៃខាងមុខនេះ។ ប៉ុន្តែមានរឿងមួយទៀតដែលឡារ៉ែន ចង់រំឭកដល់អនាគតកូនក្រមុំគ្រប់រូបដឹងនោះគឺ ក្នុងអំឡុងពេលនេះ សូមកុំព្យាយាមសាកល្បងប្រើប្រាស់ផលិតផលប្លែកៗដែលអ្នកមិនធ្លាប់ប្រើអី ព្រោះមិនមានអ្នកណាម្នាក់ដែលហ៊ានធានាថា វាពិតជាធ្វើឱ្យស្បែករបស់អ្នកសស្អាតយ៉ាងពិតប្រាកដនោះទេ ហើយស្រួលមិនស្រួលវាបែរជាធ្វើឱ្យមានអាការប្រតិកម្មចាញ់វិញនោះគឺពិតជាយ៉ាប់មិនខានទេ។ សូមចាំថាគ្រប់រឿងដែលអ្នកធ្វើ គឺត្រូវការពេលវេលា ដូច្នេះអ្នកគួរធ្វើវាឱ្យបានមុនថ្ងៃពិសេសរបស់អ្នកចូលមកដល់ បើបានកាន់តែយូរគឺកាន់តែល្អ។
ដើម្បីទទួលបានសម្រស់ស្បែកល្អផូរផង់ក្លាយជាកូនក្រមុំដ៏ស្រស់ស្អាត គួរជាទីកាប់ចិត្តនៅក្នុងថ្ងៃសំខាន់របស់អ្នក សូមអនុវត្តតាមទម្លាប់ល្អៗដូចខាងក្រោមនេះ ៖
លាងសម្អាតស្បែកមុខ
ការលាងសម្អាតផ្ទៃមុខ ដើម្បីកម្ចាត់ចោលនូវរាល់ សារធាតុកខ្វក់ទាំងឡាយគឺជាមូលដ្ឋានគ្រឹះនៃការថែរក្សាស្បែក មិនថាជាស្បែកមុខ ឬស្បែកដងខ្លួននោះទេ។ សារធាតុកខ្វក់ទាំងឡាយនឹងសម្ងំលាក់ខ្លួននៅក្នុងស្រទាប់ស្បែកមិនព្រមចេញទៅណាឡើយ ប្រសិនបើអ្នកមិនព្រមកម្ចាត់វាចេញទេនោះ ធានាថាមិនយូរទេការបំផ្លាញស្បែក និងការកើតមុនជាដើមពិតជាបង្ហាញឡើងជាក់ជាមិនខាន។ សូមលាងសម្អាតផ្ទៃមុខរបស់អ្នក ដោយផលិតផលសម្រាប់លាងសម្អាតផ្ទៃមុខ ក្នុងមួយថ្ងៃឱ្យបាន2ដង គឺនៅពេលព្រឹក និងនៅពេលយប់មុនពេលអ្នកចូលគេង ដើម្បីទទួលបានប្រសិទ្ធភាពខ្ពស់។
ចិញ្ចឹមស្បែក
ការចិញ្ចឹមថែរក្សារស្បែក មិនមែនគ្រាន់តែធ្វើឡើងនៅផ្នែកខាងលើនៃស្បែកមុខនោះទេប៉ុន្តែវាត្រូវតែមានសមត្ថភាពថែបំប៉នតាំងពីផ្នែកខាងក្នុងមកផងដែរ។ មានផលិតផលជាច្រើនដែលផលិតឡើងសម្រាប់លេប ដើម្បីចិញ្ចឹមថែរក្សាស្បែកឱ្យបានស្អាត និងមានសុខភាពល្អ។ ស្វែងរកផលិតផលណាដែលស័ក្តិសមជាមួយនឹងស្បែករបស់អ្នក ហើយសូមស្វែងយល់ឱ្យបានច្បាស់អំពីរបៀបនៃការប្រើប្រាស់ផង ដើម្បីទទួលបាននូវលទ្ធផលគួរជាទីពេញចិត្ត។
ការពារស្បែកពីការបំផ្លាញនៃកម្ដៅថ្ងៃ
ព្រះអាទិត្យទទួលបាននូវការងារដ៏សំខាន់មួយ គឺបញ្ចេញកម្តៅរបស់ខ្លួន ដើម្បីបំផ្លាញសម្រស់ស្បែករបស់មនុស្សគ្រប់គ្នាដែលមិនបានប្រុងប្រយ័ត្ន។ SPF ជាសារធាតុម្យ៉ាងដែលមានសមត្ថភាពក្នុងការការពារស្បែកមុខរបស់អ្នកពីការបំផ្លិចបំផ្លាញនៃកម្តៅថ្ងៃ ហេតុនេះនៅរាល់ពេលដែលចេញទៅខាងក្រៅ អ្នកត្រូវការពារស្បែកមុខរបស់អ្នកឱ្យបានល្អជាមួយនឹងឡេថែរក្សាស្បែកមុខដែលមានផ្ទុកនូវសារធាតុ SPF គ្រប់គ្រាន់។ ក្រៅពីសារធាតុ SPF ហើយនោះអ្នកគួរតែបន្ថែមការការពារមួយជាន់ទៀត ដោយការប្រើប្រាស់មួក កន្សែងគ្រប ឬខោអាវដែលអាចបិទបាំងស្បែកយ៉ាងជិតល្អជាដើម ដើម្បីការពារស្បែករបស់អ្នកពីកម្ដៅថ្ងៃបានយ៉ាងមានប្រសិទ្ធភាព។
ប្រើក្រែមលាបស្បែកឱ្យត្រូវតាមពេលវេលា
ពេលយប់ និងពេលថ្ងៃតម្រូវឱ្យមានការថែរក្សាសម្រស់ផ្ទៃមុខ ឬស្បែកខុសពីគ្នា ហេតុនេះសូមកុំប្រើក្រែមសម្រាប់លាបពេលយប់មកលាបនៅពេលថ្ងៃ ឬប្រើក្រែមលាបពេលថ្ងៃមកលាបនៅពេលយប់ឱ្យសោះ ព្រោះទាំងក្រែមសម្រាប់ប្រើនាពេលថ្ងៃ និងសម្រាប់ប្រើនាពេលយប់គឺជាផលិតផលដែលផលិតឡើងដោយឡែកពីគ្នា និងមានប្រសិទ្ធភាពខុសគ្នាផងដែរ។
មានទម្លាប់ល្អ
សម្រាប់កូនក្រមុំ ក៏ដូចជាស្ត្រីគ្រប់គ្នាសុទ្ធតែអាចទទួលរងនូវការបំផ្លាញ ប្រសិនបើអ្នកមិនដែលមានទម្លាប់ល្អក្នុងការថែរក្សាស្បែកមុខទាល់តែសោះ។ ទម្លាប់ល្អៗមួយចំនួនត្រូវបានចាត់ទុកថា ជាជំនួយការដ៏ល្អក្នុងការថែរក្សាសម្រស់ផ្ទៃមុខ ក៏ដូចជាការពារស្បែកមុខមិនឱ្យកើតមុនផងដែរ។ សកម្មភាព និងទម្លាប់ល្អដែលអ្នកគួរតែបង្កើតឡើងនោះមានដូចជា ចៀសវាងការគេងផ្អៀង ព្រោះវាអាចធ្វើឱ្យអ្នកកើតមុនប្រសិនបើខ្នើយរបស់អ្នកមានជាប់មេរោគ ហើយថ្ពាល់របស់អ្នកទៅប៉ះនឹងខ្នើយ ម៉្យាងវិញទៀតវាក៏អាចបង្កឱ្យមានស្នាមជ្រួញនៅលើផ្ទៃមុខរបស់អ្នកផងដែរ។ សូមចាំថា ការហាត់ប្រាណដើម្បីបញ្ចេញសារធាតុពុល ការទទួលទានអាហារល្អៗមានប្រយោជន៍ចំពោះសុខភាពស្បែកនិងការធ្វើអារម្មណ៍ឱ្យសប្បាយៗជាដើម ក្រៅពីជួយឱ្យមានសុខភាពល្អហើយនោះ វាក៏ជាទម្លាប់ដ៏ល្អដែលអាចជួយឱ្យផ្ទៃមុខរបស់អ្នកស្រស់ថ្លាបានដែរ។
បន្ទាប់ពីបានអនុវត្តយ៉ាងត្រឹមត្រូវទៀងទាត់ហើយនោះ អ្នកនឹងសង្កេតឃើញពីភាពខុសប្លែកគ្នារវាងពេលមុន និងក្រោយពេលអនុវត្ត។ ដូច្នេះមិនថាតែមុនពេលរៀបការ ឬក្រោយពេលរៀបការនោះទេ សូមចាប់ផ្តើម និងបន្តអនុវត្តរហូតទៅ ដើម្បីភាពស្រស់ស្អាតផូរផង់នៃស្បែកនឹងនៅជាប់ជាមួយអ្នកជារៀងរហូតទៅ៕
September 26, 2018
ម៉ូដសម្លៀកបំពាក់នារីម៉ាក LOOKSWOMEN លេខ 124

September 26, 2018
ហេតុអ្វីបានអ្នករៀនតែមួយមហាវិទ្យាល័យ ទទួលជោគជ័យខ្ពស់ជាងអ្នករៀនច្រើនមហាវិទ្យាល័យក្នុងពេលតែមួយ?
ការសិក្សាច្រើនមហាវិទ្យាល័យក្នុងពេលតែមួយបានក្លាយជាប្រធានបទដ៏សំខាន់នាពេលបច្ចុប្បន្នព្រោះនិស្សិតជាច្រើនយល់ឃើញថា ការសិក្សាច្រើនមហាវិទ្យាល័យក្នុងពេលតែមួយ អាចជួយឱ្យជោគជ័យក្នុងជីវិត ឬបង្ហាញពីការសង្វាតប្រឹងប្រែងជាដើម។ តែស្ថានភាពពិតប្រាកដ អ្នកជំនាញអប់រំជាច្រើនបានធ្វើការណែនាំថា គួរសិក្សាក្នុងមហា-វិទ្យាល័យតែមួយបានហើយ ព្រោះការសិក្សាច្រើនមហាវិទ្យាល័យមិនអាចធ្វើឱ្យមនុស្សជោគជ័យខ្លាំងទាំងស្រុងនោះទេ តែពួកគេនឹងបាត់បង់ឱកាសក្នុងការអនុវត្តជំនាញដែលគេកំពុងសិក្សាឱ្យច្បាស់លាស់នោះ ដែលនឹងនាំឱ្យពួកគេមិនអាចស្វែងរកការងារឱ្យត្រូវជំនាញបាន។
លោកឧកញ៉ា គួច ម៉េងលី អគ្គនាយកនៃក្រុមហ៊ុន Mengly J. Quach Group បានលើកឡើងថា សិស្សនៅក្នុងប្រទេសអភិវឌ្ឍន៍នានាលើពិភពលោក គេមិនសូវសិក្សាច្រើនមហាវិទ្យាល័យនោះទេ ហើយភាគច្រើន គេសិក្សាតែក្នុងមហាវិទ្យាល័យមួយប៉ុណ្ណោះ ព្រោះគេទុកពេលវេលាសម្រាប់អនុវត្តការងារជាក់ស្តែង។ ការសិក្សនៅមហាវិទ្យាល័យ ចាំបាច់ត្រូវមានការស្រាវជ្រាវឱ្យបានច្រើនដើម្បីយល់ពីឫសគល់នៃមុខវិជ្ជានីមួយៗឱ្យបានស៊ីជម្រៅ និងអនុវត្តជាក់ស្តែងឱ្យបានច្រើន ហេតុនេះបានជាមហាវិទ្យាល័យគេមិនរៀនច្រើនម៉ោងពេកទេនៅសាលា តែត្រូវចំណាយពេលច្រើននៅក្នុងការរស់នៅជាក់ស្តែង។ ការសិក្សានៅមហាវិទ្យាល័យគេរៀនតែ 4-5ម៉ោងប៉ុណ្ណោះ មិនមែនគេទុកពេលឱ្យរត់ទៅរៀនមហាវិទ្យាល័យមួយ ឬពីរទៀតនោះទេ តែគេទុកពេលវេលាឱ្យធ្វើការងារហាត់ការ ឬធ្វើសកម្មភាពផ្សេងៗទៀតដើម្បីយកបទពិសោធជាក់ស្តែង តែនិស្សិតនៅស្រុកយើងភាគច្រើនមានការយល់ច្រឡំ ហើយខំរៀនច្រើនមហាវិទ្យាល័យ ហើយចុងក្រោយមានអ្នកខ្លះមិនច្បាស់ទាំងអស់ក៏មាន។
លោកឧកញ៉ា គួច ម៉េងលី អគ្គនាយកក្រុមហ៊ុន Mengly J. Quach Group
លោកឧកញ៉ា គួច ម៉េងលី បានមានប្រសាសន៍ថា៖ “វ័យជានិស្សិតគួរចំណាយពេលក្នុងឆ្នាំដំបូងដើម្បីសិក្សាឱ្យបានច្បាស់លាស់ពីមូលដ្ឋានគ្រឹះបន្ទាប់ពីមានគ្រឹះរឹងមាំហើយ គឺដល់ពេលអនុវត្តជាក់ស្តែងនៅក្នុងក្រុមហ៊ុន ឬកន្លែងដែលយើងចង់ធ្វើការងារ។ ការងារដំបូងមិនបាច់ស្វែងរកកន្លែងដែលមានលុយច្រើននោះទេ តែត្រូវស្វែងរកកន្លែងណាដែលផ្តល់ឱកាសឱ្យរៀនបានច្រើន។ ក្រោយពេលធ្វើការងារបានល្អ រៀនចប់មានបទពិសោធស្រាប់ និស្សិតនឹងអាចរកការងារធ្វើបានដោយងាយស្រួល មិនចាំបាច់ហក់លោតទៅរៀន 2-3សាលារួចចេញមកមិនស្គាល់ពិភពការងារនោះទេ”។
អ្នកជំនាញអប់រំខាងលើបានលើកឡើងផងដែរថា និស្សិតដែលខំរៀនពិតប្រាកដ គេមិនខ្វល់ខ្លាំងពេកទេថា គ្មានការងារធ្វើនោះ តែអ្វីដែលគេខំធ្វើ គឺប្រើពេលវេលាដែលសល់ពីការសិក្សាលើមុខវិជ្ជាណាមួយនោះ មកខំប្រឹងអានឱ្យបានច្រើន ស្គាល់ឱ្យបានច្រើន ដើរឱ្យបានច្រើន និងរៀនធ្វើការងារឱ្យបានច្រើនដើម្បីឆ្លើយតបទៅនឹងអ្វីដែលកំពុងរៀន ឬអាចនិយាយបានថា គេសង្វាតយកមេរៀនដែលគេបានរៀនមកប្រើ។ ប្រសិនបើចំណាយថាមពេល ចំណាយកម្លាំងរៀន 2-3មហាវិទ្យាល័យវិញ ពេលខ្លះហត់នឿយខ្លាំង រៀនមិនទាន់គេ ពេលខ្លះរៀនទាន់ តែគ្មានពេលអនុវត្តការងារជាក់ស្តែង ពេលចប់ពីសាលា ត្រូវខំប្រឹងតាមគេ ទម្រាំធ្វើការងារបានល្អក៏មាន។ ហើយអ្នកខ្លះទៀតហត់ខ្លាំងពេកបោះបង់ចោលកណ្តាលទីក៏មានហេតុនេះ ការជ្រើសរើសរៀនតែមួយមហាវិទ្យាល័យជាជម្រើសល្អមួយដែលអាចឱ្យប្អូនៗអភិវឌ្ឍខ្លួនបានយ៉ាងល្អដើម្បីចាប់អាជីពណាមួយឱ្យច្បាស់លាស់ឬឱ្យក្លាយជាអ្នកប្រសប់ កុំគ្រាន់តែចេះស្ទើរៗហើយធ្វើការងារមិនកើត។
លោក តន់ រតនា ប្រធានក្រុមយុវជនដើម្បីការអភិវឌ្ឍសង្គមដែលធ្វើការងារលើការតម្រង់ទិស និងអភិវឌ្ឍន៍យុវជន បានលើកឡើងថា ការសិក្សាតែមួយមហាវិទ្យាល័យមិនមែនមានន័យថា ពួកគាត់សិក្សាតែមួយមុខនោះទេ តែគាត់ផ្តោតខ្លាំងតែលើមុខវិជ្ជាសម្រាប់អាជីពការងាររបស់គាត់នៅថ្ងៃអនាគត។ មាននិស្សិតមួយចំនួនបានយល់ច្រឡំថា នៅពេលគាត់សិក្សាថ្នាក់បរិញ្ញាបត្រលើជំនាញណាមួយហើយ គាត់ចាំបាច់ត្រូវតែសិក្សាថ្នាក់បរិញ្ញាបត្រអក្សរសាស្ត្រអង់គ្លេសមួយផ្សេងទៀត ឬសិក្សាវិទ្យាសាស្ត្រកុំព្យូទ័រមួយបន្ថែមទៀតជាដើម។ ការធ្វើបែបនេះអាចធ្វើឱ្យពួកគាត់ហត់នឿយខ្លាំង និងបាត់បង់ថាមពលដើម្បីផ្តោតលើមុខវិជ្ជាដែលគាត់ត្រូវសម្រួច។
លោក តន់ រតនា បាននិយាយថា ៖ “តម្រូវការការងារជាក់ស្តែងពិតជាត្រូវការប្រើប្រាស់ភាសា និងបច្ចេកវិទ្យា តែមិនមែនត្រូវការឱ្យមានបរិញ្ញាបត្រលើផ្នែកនោះទាំងស្រុងទេ។ អ្វីដែលគេត្រូវការគឺជំនាញពិតប្រាកដលើការងារសម្រាប់ស្ថាប័ន និងបទពិសោធជាក់ស្តែងដែលអាចធ្វើការងារបានល្អ និងមានការរីកចម្រើន”។
លោករតនា បញ្ជាក់ផងដែរថា ដើម្បីធ្វើការងារបានល្អ លុះត្រាតែមនុស្សម្នាក់ៗចេះសម្របខ្លួនក្នុងបរិស្ថានច្រើនផ្សេងៗគ្នា និងស្វែងយល់ច្រើនពីពិភពការងារ និងការរស់នៅជាក់ស្តែង ហេតុនេះការសិក្សាតែមួយមហាវិទ្យាល័យអាចផ្តល់ឱកាសឱ្យនិស្សិតមានពេលច្រើនដើម្បីស្វែងយល់ពីគ្រប់ជ្រុងជ្រោយក្នុងសង្គម។ តែទោះបីជាយ៉ាងនេះក្តី ការសិក្សាតែមួយមហាវិទ្យាល័យត្រូវចេះគ្រប់គ្រងពេលវេលារបស់ខ្លួនឱ្យបានល្អ បើមិនដូច្នោះទេ ការដែលមានពេលទំនេរច្រើនអាចធ្វើឱ្យយើងខាតបង់កាន់តែខ្លាំងដោយសារតែការបណ្តែតបណ្តោយខ្លួនឱ្យសប្បាយជ្រុលភ្លេចផ្តោតលើគោលដៅសំខាន់សម្រាប់អនាគត៕
September 26, 2018