Author: ធឿន មករា

ក្រោយពីមាន​រៀបចំ​ការប្រកួត​ដើម្បីស្វែងរកអង្ករ​ដែលមាន​គុណភាព​ល្អ​ជាងគេ ជាអង្ករជាប់ចំណាត់ថ្នាក់លេខ1 ប្រចាំឆ្នាំ​2018 តាម​ប្រភេទ​អង្ក​រស អង្ករ​ក្រអូប និង​អង្ករ​ក្រអូប​ប្រណីតរួចមកនោះ សហព័ន្ធ​ស្រូវ​អង្ករ​កម្ពុជាបានរកឃើញនូវអង្ករល្អជាងគេប្រចាំឆ្នាំ​2018 និងបាននាំយក​ទៅដាក់ចូលរួម​ប្រកួតប្រជែង​ក្នុងកម្មវិធី​ប្រកួត​អង្ករ​ល្អ​បំផុតលើ​ពិភពលោកដែលរៀបចំឡើងនៅប្រទេស វៀតណាម​។

ជា​លទ្ធផល​នៃ​ការប្រកួតអង្ករ​ដែល​បាន​ជាប់​ចំណាត់ថ្នាក់​លេខ​1 ដល់3 របស់កម្ពុជាសម្រាប់យកទៅចូលរួមការប្រកួត រួមមាន​៖

1) អង្ករ​ក្រអូប​ប្រណីត(Premium Aromatic Rice)របស់​ក្រុមហ៊ុន​ City Rice Import Export Co. LTD។

2) អង្ករ​ក្រអូប​ធម្មតា(Fragrant Rice)​ របស់រោង​ម៉ាស៊ីន​ថ្មគោល ThmorKol Rice Mill។

3) អង្ក​រសគ្រាប់​វែង (Long Grain White Rice)​របស់ក្រុមហ៊ុន VongBunheng Import Export Co.Ltd​។

សូមរំឭកថា ការប្រកួត​​ដើម្បីស្វែងរកអង្ករ​ដែលមាន​គុណភាព​ល្អ​ជាងគេជាលើកទី3នេះ ត្រូវបាន​ប្រព្រឹត្តទៅ​ក្រោម​អធិបតីភាពរបស់លោក​ឧកញ៉ា វង្ស ប៊ុន​ហេង អនុប្រធាន​សហព័ន្ធ​ស្រូវ​អង្ករ​កម្ពុជាតំណាង​របស់ឯកឧត្តម សុខ ពុ​ទ្ធី​វុ​ធ ប្រធាន​សហព័ន្ធ​ស្រូវ​អង្ករ​កម្ពុជាដោយមាន​ការចូលរួម​​វាយតម្លៃពី​គណៈកម្មការដែលមាន​សមាសភាព​ចូលរួម​ពី​ចុងភៅ​នៃ​សហព័ន្ធ​ចុងភៅ​កម្ពុជា តំណាង​ក្រុមហ៊ុន​ត្រួតពិនិត្យ​គុណភាព (CCIC, OMIC) តំណាង​វិទ្យាស្ថាន​ស្រាវជ្រាវ និង​អភិវឌ្ឍន៍​កសិកម្ម​កម្ពុ​ជា​ កា​ឌី (CARDI) និង​សមាជិក​សហព័ន្ធ​ស្រូវ​អង្ករ​កម្ពុជា​​ផងដែរ។​

ការប្រកួត​នេះមានការ​ដាក់​សំណាក​អង្ករ​ចូលរួម​ប្រកួត​ពី​វិទ្យាស្ថាន​កា​ឌី (CARDI) និង​សមាជិក​សហព័ន្ធ​ស្រូវ​អង្ករ​កម្ពុជាដែលជា​សហគមន៍​កសិក​ម្មរោង​ម៉ាស៊ីនកិនស្រូវ និង​អ្នក​នាំចេញចំនួន​22 និង​មាន​សំណាក​អង្ករ​សរុប​ចំនួន​ 28ប្រភេទ​។​

សម្រាប់​ការវាយតម្លៃ​ គឺផ្តោតលើលក្ខណសម្បត្តិ​អង្ករ​នៅ​មុនពេល​ចម្អិន (​ស​ភាព​ បាក់ ទំហំ ពណ៌​) និង​ក្រោយ​ចម្អិន (​ភាព​ភ្លឺរលោង ភាព​ស្អិតល្មួ​ត រសជាតិ ក្លិន និងភាព​ងាយ​ស្រួលក្នុងការ​បរិភោគ​)​។​

ក្រោយពីបានរកឃើញអង្ករល្អជាងគេប្រចាំឆ្នាំ​សម្រាប់យក​ទៅ​ប្រកួតប្រជែង​ក្នុងកម្មវិធី​ប្រកួត​អង្ករ​ល្អ​បំផុតលើ​ពិភពលោក​នៅប្រទេសវៀតណាមកាលពីថ្ងៃទី10 ដល់ថ្ងៃទី12 ខែតុលាកន្លងមក អង្ករកម្ពុជាបានឈ្នះការប្រកួត​ជាអន្តរជាតិនេះ។ នេះបើតាមការឱ្យដឹងពីសហព័ន្ធស្រូវអង្ករកម្ពុជា។

លោក មូល សារិទ្ធិ អគ្គលេខាធិការសហព័ន្ធស្រូវអង្ករកម្ពុជាបានឱ្យដឹងថា កម្ពុជាបានឈ្នះពានរង្វាន់អង្ករល្អបំផុតលើពិភពលោកប្រចាំឆ្នាំ2018នេះ(Worlds Best Rice2018)នៅក្នុងសន្និសីទស្រូវ-អង្ករពិភពលោកលើកទី10(10th World Rice Conference)ដែលរៀបចំដោយ The Rice Trader រយៈពេល3ថ្ងៃ(ពីថ្ងៃទី10-12ខែតុលា)នៅទីក្រុងហាណូយ ប្រទេសវៀតណាម។

សូមបញ្ជាក់ថា កម្ពុជាធ្លាប់គ្រងពានរង្វាន់អង្ករល្អជាងគេបំផុតក្នុងពិភពលោករយៈពេល 3ឆ្នាំជាប់ៗគ្នា គឺឆ្នាំ2012-2013 និងឆ្នាំ2014 ហើយសម្រាប់ឆ្នាំក្រោយមកទៀត គឺ2015-2016 តែសម្រាប់ឆ្នាំ2017 កម្ពុជាទទួលចំណាត់ថ្នាក់លេខ2 ហើយសម្រាប់ឆ្នាំ2018នេះ កម្ពុជាបានគ្រងពានរង្វាន់អង្ករល្អជាងគេបំផុត​ក្នុងពិភពលោកជាថ្មីម្តងទៀត៕

បន្ទាប់ពីផុតសុពលភាពកាលពីថ្ងៃទី30 ខែកញ្ញា ឆ្នាំ2018 កន្លងទៅថ្មីៗនេះ ប្រទេសកាណាដាបានឯកភាពជាថ្មីឡើងវិញទៀតដល់កម្ពុជា លើកិច្ចព្រមព្រៀងស្តីពីការសម្រួលពាណិជ្ជកម្ម ដើម្បីពង្រឹង និងពង្រីកកិច្ចសហប្រតិបត្តិការសេដ្ឋកិច្ច និងពាណិជ្ជកម្មរវាងប្រទេសទាំង2។

ការឯកភាពបន្តកិច្ចព្រមព្រៀងនេះធ្វើឡើងនៅក្នុងជំនួបពិភាក្សាការងារទ្វេភាគីរវាងឯកឧត្តម ប៉ាន សូរស័ក្តិ រដ្ឋមន្រ្តីក្រសួងពាណិជ្ជកម្មកម្ពុជា ជាមួយលោកជំទាវ ដូនីកា ប៉ូទី (Donica Pottie) ឯកអគ្គរដ្ឋទូតកាណាដា ប្រចាំព្រះរាជាណាចក្រកម្ពុជាកាលពីម្សិលមិញ។

លោកជំទាវ ដូនីកា ប៉ូទី ឯកអគ្គរដ្ឋទូតនៃប្រទេសកាណាដាបានសម្តែងការកោតសរសើរ ចំពោះគោលនយោបាយរដ្ឋាភិបាលកម្ពុជាក្នុងការលើកទឹកចិត្តដល់អ្នកវិនិយោគបរទេសដែលចូលមកបណ្តាក់ទុនរកស៊ីនៅកម្ពុជា។ លោកជំទាវក៏បានលើកទឹកចិត្តរដ្ឋាភិបាលកម្ពុជាបន្តប្រឹងប្រែង​ និងប្រកាន់និយាមការងារនេះបន្តទៀត ដើម្បីនាំមកនូវភាពឈ្នះ-ឈ្នះ ដល់គ្រប់តួអង្គពាក់​ព័ន្ធ សម្រាប់ឧស្សាហកម្មមួយនេះ ហើយលោកជំទាវនឹងពិនិត្យលទ្ធភាពជួយកៀងគរវិនិយោគិនកាណាដាឱ្យចូលមកបណ្តាក់ទុនលើការកែច្នៃវត្ថុធាតុដើមសំខាន់ៗ ដើម្បីបម្រើការអភិវឌ្ឍឧស្សាហកម្មវាយនភណ្ឌ និងការធ្វើទំនើបកម្មវិស័យកសិកម្ម នៅកម្ពុជា។

ឯកឧត្តមរដ្ឋមន្ត្រី ប៉ាន សូរស័ក្តិ បានលើកឡើងពីកិច្ចប្រឹងប្រែងរបស់រាជរដ្ឋាភិបាលកម្ពុជា ក្នុងការគាំទ្រវិស័យវាយនភណ្ឌ តាមរយៈការបន្តស្វែងរកទីផ្សារសក្តានុពលបន្ថែម និងការបង្កើនប្រាក់បៀវត្សរ៍អប្បបរមាជូនកម្មករ-និយោជិត ចាប់ពី 140ដុល្លារ ក្នុងឆ្នាំ2016 ដល់ 170ដុល្លារ ក្នុងឆ្នាំ2018 ហើយគ្រោងនឹងបង្កើនឱ្យបាន 182ដុល្លារ នៅដើមឆ្នាំ2019 ខាងមុខថែមទៀត។

ឯកឧត្តម ប៉ាន សូរស័ក្តិ បានគូសបញ្ជាក់ថា រាជរដ្ឋាភិបាលកម្ពុជាបានអនុលោមតាមកាតព្វកិច្ចការងារដែលអង្គការ ILO បានកំណត់តាំងពីឆ្នាំ1999 និងបានគាំទ្រការអនុវត្តគម្រោងធ្វើឱ្យប្រសើរឡើងនៃរោងចក្រកម្ពុជា (Better Factory Cambodia) ដើម្បីលើកស្ទួយលក្ខខណ្ឌការងារ និងការប្រកួតប្រជែងក្នុងវិស័យនេះ។

សូមជម្រាបថា កាលពីឆ្នាំ2017 ទំហំពាណិជ្ជកម្មទ្វេភាគីរវាងកម្ពុជា និងកាណាដា សម្រេចបានទឹកប្រាក់សរុប 1.04ប៊ីលានដុល្លារអាមេរិក ជាមួយអត្រាកំណើនប្រចាំឆ្នាំ គិតជាមធ្យម 11%។ ក្នុងនោះ ទឹកប្រាក់នាំចេញពីកម្ពុជាទៅកាណាដាមានចំនួន 1ប៊ីលានដុល្លារអាមេរិក និងនាំចូលមានចំនួន 40លានដុល្លារអាមេរិក។ ចំពោះផលិតផលសក្តានុពលនាំចេញរបស់កម្ពុជា រួមមាន៖ សម្លៀកបំពាក់ ស្បែកជើង គ្រឿងផ្គុំយានយន្ត គ្រឿងសង្ហារិម ប្លាស្ទិក ផលិតផលក្មេងលេង និងទំនិញកសិកម្មជាដើម៕

អត្រា​នៃ​ប្រជាជន​ពេញវ័យ​ដែល​ប្រើប្រាស់​សេវា​ហិរញ្ញវត្ថុ បច្ចុប្បន្ននេះ​មានការ​កើនឡើង​ខ្ពស់ រហូតដល់67% បើ​ធៀប​នឹង​កាលពី​ពេលមុន​ដែលមាន​ត្រឹមតែ​ក្រោម10%ប៉ុណ្ណោះ។ នេះ​បើ​យោងតាម​ការលើកឡើងរ​បស់​អគ្គទេសាភិបាល​ធ​នាគារ​ជាតិ​នៃ​កម្ពុជា។

ឯកឧត្តម ជា ចាន់តូ បានឱ្យដឹងថា បច្ចុប្បន្ន​វិស័យ​មីក្រូហិរញ្ញវត្ថុ​នៅ​កម្ពុជា​បាននិងកំពុង​រួមចំណែក​កាត់បន្ថយ​ភាពក្រីក្រ និង​លើកស្ទួយ​ជីវភាព​របស់​ពលរដ្ឋ ហើយ​ការកើនឡើង​ជា​លំដាប់​នេះ បាន​ឆ្លុះបញ្ចាំង​តាមរយៈ​កំណើន​នៃ​ប្រជាជន​ពេញវ័យ​ដែល​កំពុង​ប្រើប្រាស់​សេវា​ហិរញ្ញវត្ថុ។

ឯកឧត្តម​ក៏បាន​បញ្ជាក់ទៀតថា កំណើន​រហូតដល់ 67%នៃ​ការប្រើប្រាស់​សេវា​ហិរញ្ញវត្ថុ​របស់​ប្រជាជន​ពេញវ័យ​នៅ​កម្ពុជា​នេះ មានការ​កើនឡើង​ខ្ពស់​មែនទែន បើ​ធៀប​នឹង​រយៈពេល​ដូចគ្នា​កាលពី 1ទសវត្សរ៍​កន្លងទៅ​ដែលមាន​មិន​ដល់ 10%ផង។ លើសពីនេះ​កំណើនប្រជាជន​ដែល​កំពុង​ប្រើប្រាស់​សេវា​ហិរញ្ញវត្ថុ​ក៏​ឆ្លុះបញ្ចាំង​ពី​កម្រិត​នៃ​ការយល់ដឹង​របស់​ពល​រដ្ឋ​មកលើ​វិស័យនេះ​ផងដែរ។

វិស័យ​ហិរញ្ញវត្ថុ​ដែល​បាន​រីកចម្រើន​យ៉ាង​ឆាប់រហ័ស​នេះ គឺ​ដោយសារតែ​បច្ចុប្បន្ន វិស័យ​ធនាគារក៏ដូចជា​វិស័យ​ហិរញ្ញវត្ថុ​មិនមែន​ធនាគារ​ដែល​ក្នុងនោះ​រួមមាន៖ វិស័យ​មូល​ប​ត្រ វិស័យ​ធានារ៉ាប់រង និង​សោធន បានរួម​ចំណែក​ផ្តល់​សេវា​ហិរញ្ញវត្ថុ ព្រមទាំង​ពង្រឹង​ការជឿជាក់ និង​មាន​ភាពច្បាស់លាស់​ចំពោះ​អនាគត​របស់​ប្រជាជន​ដែលជា​មូលដ្ឋានគ្រឹះ​ក្នុងការ​ពង្រឹង​សិទ្ធិសេរីភាព និង​លទ្ធិប្រជាធិបតេយ្យនៅ​កម្ពុជា។

ឯកឧត្តម អគ្គទេសាភិបាល​បន្តទៀត​ថា វិស័យ​មីក្រូហិរញ្ញវត្ថុ​កំពុង​រីកចម្រើន ដោយ​ក្នុងនោះ​ទ្រព្យសកម្ម​ក្នុង​វិស័យនេះ​កើន​រហូតដល់ 14%នៃ​ទ្រព្យសកម្ម​របស់​គ្រឹះស្ថាន​ធនាគារ ឥណទាន​បាន​កើន​ដល់ 19,2%នៃ​ឥណទាន​គ្រឹះស្ថាន​ធនាគារ និង​ប្រាក់​បញ្ញើ​កើន​ដល់ 11,1%នៃ​ប្រាក់​បញ្ញើ​គ្រឹះស្ថាន​ធនាគារ។

ជាក់ស្ដែង​វិស័យ​ធនាគារ និង​មីក្រូហិរញ្ញវត្ថុ​បាន​រីកចម្រើន​ឥតឈប់ឈរ។ ការរីកចម្រើន​នេះ បានផ្ដល់​ការងារ​ដល់​ពលរដ្ឋ​ជាច្រើន ខណៈ​បច្ចុប្បន្ន​ប្រជាពលរដ្ឋ​ជាង 6ម៉ឺន​នាក់​បាន​ចូល​បម្រើ​ការងារ​ក្នុង​វិស័យ​ធនាគារ និង​គ្រឹះស្ថាន​មីក្រូហិរញ្ញវត្ថុ។ ជាការ​កត់សម្គាល់​ក្នុង​រយៈពេល 2ទសវត្សរ៍​ចុងក្រោយ វិស័យនេះ​បានរួម​ចំណែក​បង្កើត​ការងារ​ដោយផ្ទាល់ និងដោយ​ប្រយោល​សម្រាប់​សេដ្ឋកិច្ច​នៅ​ទូទាំងប្រទេស។

ឯកឧត្តម​បញ្ជាក់ថា តាមរយៈ​ការផ្តល់​ការងារ​ដោយផ្ទាល់ បច្ចុប្បន្ន​គ្រឹះស្ថាន​ធនាគារ និង​មីក្រូហិរញ្ញវត្ថុ​បានផ្តល់​ការងារ​ចំនួន 61.000កន្លែង​ដែល​ចំនួន​នេះ​បាន​កើនឡើង​ប្រមាណ 8ដង ធៀប​នឹង 10ឆ្នាំមុន គឺជា​មធ្យម​ផ្តល់​ការងារ​ថ្មី​ក្នុង​មួយឆ្នាំ​ប្រមាណ5,000នាក់ ឬ​កើន​ក្នុង​អត្រា 20%ក្នុង​មួយឆ្នាំ។ វិស័យ​ធនាគារ​បាន​ចូលរួម​បង្កើត​ការងារ​ដោយ​ប្រយោល​តាមរយៈ​ការគាំទ្រ​របស់​វិស័យ​ធនាគារ​ក្នុងការ​បង្កើត ឬ​ពង្រីក​អាជីវកម្ម​នៅក្នុង​វិស័យ​នានា​នៃ​សេដ្ឋកិច្ច។ វិស័យ​ធនាគារ​នឹង​បន្ត​ផ្តល់ឱកាស​ការងារ​ដោយផ្ទាល់ និង​ប្រយោល​យ៉ាងច្រើន​ថែមទៀត​នាពេលខាងមុខ​ក្នុងស្ថានភាព​ដែល​សេដ្ឋកិច្ចកម្ពុជា​បន្ត​មាន​កំណើន​ខ្ពស់​រឹងមាំ។

ឯកឧត្តម អគ្គទេសាភិបាល​បាន​បញ្ជាក់ថា៖ “គិត​ត្រឹម​ពាក់កណ្តាល​ឆ្នាំ2018នេះ ទ្រព្យសកម្ម​វិស័យ​ធនាគារ​មាន​ទំហំ​ប្រមាណ 160%នៃ​ផលិតផល​ក្នុងស្រុក​សរុប(ផ.ស.ស)។ ចំពោះ​ឥណទាន​ក្នុង​វិស័យ​ឯកជន​មាន​កម្រិត 100%នៃ​ផ.ស.ស ហើយ​ប្រាក់​បញ្ញើ​មាន​កម្រិត 93%នៃ​ផ.ស.ស”។

បើ​ធៀប​ក្នុង​រយៈពេល 15ឆ្នាំមុន ទ្រព្យសកម្ម​វិស័យ​ធនាគារ​បាន​កើនឡើង 44ដង។ ចំណែក​ឥណទាន​កើនឡើង 87ដង និង​ប្រាក់​បញ្ញើ​កើនឡើង 42ដង។ ចំណែក​ទុនបម្រុង​អន្តរជាតិ​វិញ​បាន​បន្ត​ពូន​ជ្រំ​ជា​លំដាប់​ដែល​បច្ចុប្បន្ន​អាច​ធានា​ការ​នាំចូល​ទំនិញ និង​សេវា​បាន​ប្រមាណ​រយៈពេល 6ខែ ស្មើនឹង 2ដង​នៃ​កម្រិត​ប្រទេស​ដែល​កំពុងអភិវឌ្ឍន៍​គួរ​មាន​ដល់ 3ខែ។

គួរ​បញ្ជាក់ផងដែរថា វិស័យ​មីក្រូហិរញ្ញវត្ថុ​បានផ្ដល់​ឥណទាន​ដល់​ប្រជាជន​ចំនួន 1.8លាន​នាក់ និង​មាន​អ្នក​ដាក់​ប្រាក់​បញ្ញើ 1.6លាន​នាក់ ព្រមទាំង​បានផ្ដល់​ការងារ​ដល់​ប្រជាជន​ប្រមាណ 3ម៉ឺន​នាក់ ហើយ​ឥណទាន​របស់​មីក្រូហិរញ្ញវត្ថុ បានផ្ដល់​ទៅលើ​វិស័យសេដ្ឋកិច្ច​នានា​រួមមាន៖ វិស័យ​កសិកម្ម30% ក្រុមគ្រួសារ30.5% វិស័យ​ពាណិជ្ជកម្ម18.8% វិស័យ​សេវាកម្ម10% និង​វិស័យផ្សេងៗទៀត10% ផងដែរ៕

គ្មាន​ខ្សែ​មិនអាច​រក​ការងារ​ធ្វើបាន រៀន​ហើយ​ខ្លាច​មិនបាន​ប្រាក់ខែ​ច្រើន ឬ​មនុស្ស​ច្រើនណាស់​រក​ការងារ​មិនបាន​ធ្វើ ជា​អ្វីដែល​យុវជន​ជាច្រើន​កំពុង​បារម្ភ និង​មាន​ភាពស្ទាក់ស្ទើរ​ក្នុង​ការបន្ត​ការសិក្សា​នៅ​សាកលវិទ្យាល័យ ជាពិសេស​គឺ​សិស្ស​មកពី​បណ្តា​ខេត្ត​នានា។

លោក ងួន ប៊ុន​និ​ត អគ្គនាយក​ក្រុមហ៊ុន​ធនធានមនុស្ស Idea plus បាន​លើកឡើងថា​ មុននឹង​ដើរចូល​មហាវិទ្យាល័យ និស្សិត​មួយចំនួន​មិនទាន់​ដឹងថា​ខ្លួន​ចង់បាន​អ្វី​ពិតប្រាកដ ខណៈ​អ្នក​ខ្លះទៀត​បារម្ភ​ខ្លា​ចរក​ការងារ​ធ្វើ​មិនបាន ហើយ​មិន​ហ៊ាន​សម្រេចចិត្ត​បន្ត​ការសិក្សា​នៅ​មហាវិទ្យាល័យ។ តាមពិត​យុវជន ឬ​ជា​សិស្ស​-និស្សិត​មិនគួរ​បារម្ភ​ខ្លាំងពេក​ទេ​ថា​គ្មាន​ការងារ​ធ្វើ ព្រោះ​មាន​ក្រុមហ៊ុន​ជាច្រើន​កើត​ឡើងជា​រៀងរាល់ថ្ងៃ ហើយ​ម្ចាស់​ក្រុមហ៊ុន​ទាំងអស់នោះ​ពេលខ្លះ​ក៏​កំពុង​តែមាន​បញ្ហា​រក​បុគ្គលិក​ធ្វើការ​មិនបាន​ផងដែរ។ អ្វីដែល​យុវជន​ត្រូវធ្វើ​គឺ​សិក្សា​ឱ្យបាន​ច្បាស់លាស់​ពី​ចំណង់​ចំណូលចិត្ត​ពិតប្រាកដ​របស់ខ្លួន និង​តម្រូវការ​ទីផ្សារ ដើម្បី​អភិវឌ្ឍ​សមត្ថភាព​ឱ្យស្រប​ទៅនឹង​ទីផ្សារការងារ​ជាក់ស្តែង​ដែល​កំពុងមាន​តម្រូវការ​ខ្ពស់។ ការជ្រើសរើស​ជំនាញ​ត្រឹម​ត្រូវជា​ចំណុច​វិជ្ជមាន​ក្នុង​ការជំរុញឱ្យ​សិស្ស​ក្លាយជា​អ្នកមាន​អាជីព​ច្បាស់លាស់ ព្រោះ​នៅពេលដែល​យើង​មាន​សមត្ថភាព​ច្បាស់លាស់ នឹងមិន​ខ្វះ​ទេ​ស្ថាប័ន​ដែល​គេ​ចង់បាន ហើយ​កុំ​បារម្ភ​ឱ្យសោះ​ពី​បញ្ហា​គ្មាន​ការងារ​ធ្វើ។

លោក ងួន ប៊ុន​និ​ត បាន​និយាយថា៖ “យុវជន​បច្ចុប្បន្ន មិនទាន់មាន​ចំណេះដឹង​ទូលំទូលាយ​នៅឡើយ​ពី​ការជ្រើសរើស​ជំនាញ​សិក្សា ហើយ​ស្គាល់​ជំនាញ​តិច ដែល​ធ្វើឱ្យ​គាត់​ជ្រើសរើស​ ជំនាញដដែលៗ និង​ពេលខ្លះ​ក៏​ជ្រើសរើស​ប៉ះ​ជំនាញ​ដែល​គេ​មិនសូវមាន​ទីផ្សារ ដែល​ធ្វើឱ្យ​ពួកគាត់​រក​ការងារ​មិនបាន​ធ្វើ”។

អ្នកជំនាញ​ទីផ្សារ​ខាងលើ​បានលើកឡើង​ផងដែរ​ថា មុននឹង​ទទួលបាន​ការងារ​លុះត្រា​តែ​យើង​មាន​សមត្ថ​ភាពខ្លាំង​ជាមុនសិន ហេតុនេះ​ប្រសិនបើ​យើង​រវល់​តែ​ខ្វល់ខ្វាយ​ពី​បញ្ហា​គ្មាន​ការងារ​ធ្វើ ហើយ​មិន​ព្រម​ប្រឹងប្រែង នោះ​ច្បាស់​ណាស់​ថា​ យើង​មិនអាច​ស្វែងរក​ការងារ​បាន។ ហេតុនេះ​សូម​ពង្រឹងសមត្ថភាព​ឱ្យ​ខ្លាំង​ជាមុនសិន ហើយ​ព្យាយាម​ស្វែងយល់​ឱ្យ​ស៊ីជម្រៅ​ពី​ជំនាញ​ដែល​គេ​ត្រូវការ​នៅ​ថ្ងៃ​អនាគត ដូចជា​ការសិក្សា​លើ​ជំនាញ​បច្ចេកទេស ឬ​ចាប់យក​ជំនាញ​ទៅតាម​វិស័យ​ដែល​កំពុងមាន​ការអភិវឌ្ឍ​ខ្លាំង ហើយ​ត្រូវការ​មនុស្ស​ជា​ចាំបាច់។ តែ​ទោះជា​យ៉ាងណាក៏ដោយ ការជ្រើសរើស​ជំនាញ​ដែល​ត្រូវ​តាម​ទីផ្សារ ក៏​ចាំបាច់​ទាល់តែ​ជំនាញ​នោះ​យើង​ពេញចិត្ត​ដែរ ព្រោះ​ប្រសិនបើ​យើង​គិតតែ​ទីផ្សារ ហើយ​យើង​គ្មាន​ទេពកោសល្យ​សោះ ក៏​យើង​មិនអាច​ក្លាយជា​អ្នកខ្លាំង​បានដែរ។

ស្រប​ជាមួយគ្នា​ដែរ បុគ្គលិក​ក្រុមហ៊ុន​ឯកជន​មួយ លោក ឈឹម សុ​ភី ដែលជា​អ្នកមាន​បទពិសោធ​ធ្វើ​ការងារ​តាំងពី​នៅ​សិក្សា​មហាវិទ្យាល័យ និង​ច្រើន​វិស័យ​នោះ បាន​លើកឡើងថា និស្សិត​ជាច្រើន​តែងតែ​បានឃើញ​សិស្ស​ច្បង​មួយចំនួន ឬ​អ្នក​ស្គាល់គ្នា​ក្នុង​តំបន់​របស់គាត់​មិនមាន​ការងារ​ធ្វើ ឬ​ធ្វើ​ការងារ​មិនត្រូវ​ជំនាញ ច្រើនជាង​អ្នក​ដែលមាន​ការងារ​ល្អ​ធ្វើធ្វើឱ្យ​ពួកគាត់​វាយតម្លៃថា​ទីផ្សារការងារ​មាន​លក្ខណៈ​ចង្អៀត ឬ​ចាំបាច់​ទាល់​តែមាន​ខ្សែ​ជាដើម​ទើប​អា​ចរក​ការងារ​ល្អ​បានធ្វើ។ តាមពិតទៅ ស្ថានភាព​ជាក់ស្តែង​នៃ​ពិភព​ការងារ​មិន​ចង្អៀត​ខ្លាំងពេក​ដូច​ពួកគាត់​ធ្លាប់​គិត​នោះទេ។ រូបភាព​ដែល​ពួកគាត់​ធ្លាប់​ឃើញ​នោះ​គឺអាច​មកពី​បញ្ហា​សង្គម​មួយចំនួន​ដែល​នៅ​ហ៊ុមព័ទ្ធជុំវិញ​បញ្ហា​អប់រំ និង​ការងារ។ ជា​ឧទាហរណ៍និស្សិត​កាលពី​ប៉ុន្មាន​ឆ្នាំមុន​មិនសូវ​ខ្វល់​ច្រើន​ពី​ការងារ​ស្ម័គ្រចិត្ត ឬ​ចាប់អារម្មណ៍​លើ​ការធ្វើការងារ​ដោយ​ចាប់ផ្តើម​ពី​ប្រាក់ខែ​តិចតួច​នោះទេ ខណៈ​អ្នកខ្លះ​ក៏​សំដៅ​ប្រាថ្នា​ចង់បាន​ការងារ​រដ្ឋ ដែល​ធ្វើឱ្យ​គាត់​នៅ​រង់ចាំ​ឱកាស​ទាំងអស់នោះ​ជាច្រើន​ឆ្នាំ ខណៈ​ក្រុមហ៊ុន​ឯកជន​ជាច្រើន​កំពុង​ត្រូវការ​អ្នក​ដែលមាន​សមត្ថភាព​បម្រើ​ការងារ តែ​រកម​នុស្ស​ដែលមាន​បទពិសោធធ្វើ​ការងារ​មិនបាន។

លោក ឈឹម សុ​ភី បាន​និយាយថា៖ “កុំ​ខ្វល់​ច្រើនពេក​ថា​អត់​ការងារ​ធ្វើ បើទោះបីជា​សិស្ស​ដែល​ទើបនឹង​ប្រឡង​បាក់​ឌុប​ចប់ថ្មីៗមិន​ទទួលបាន​ពិន្ទុ​ខ្ពស់ ឬ​មិនទាន់​ខ្លាំង​ក៏ដោយ ក៏​មិនទាន់​ហួសពេល​នៅឡើយ​ដែរ ព្រោះ​យើង​នៅសល់​ពេល4ឆ្នាំ​ទៀត។ កុំ​រារែក ហើយ​ខ្លាច​ការខិតខំ​ប្រឹងប្រែង ព្រោះ​ពិភព​ការងារ​ជាក់ស្តែង​វា​មិន​លំបាក​ដូច​ក្នុង​សាលា​នោះទេ”។

បុគ្គលិក​ដែល​ប្រឡូក​ការងារ​ច្រើន​វិស័យ​ខាងលើ​បានលើកឡើង​ផងដែរ​ថា ការងារ​មិន​ខ្វះ​ទេ តែ​អ្វីដែល​លំបាក​គឺ​រក​ខ្លួនឯង​ឱ្យឃើញថា តើ​យើង​ចង់​ធ្វើ​អ្វី​ឱ្យ​ពិតប្រាកដ ហើយ​ការងារ​ប្រភេទ​ណា​ដែល​ពិតជា​ជំរុញ​ជីវិត​ឱ្យ​យើង​មាន​ភាព​រីករាយ និង​មាន​ថាមពល​ខ្លាំង​មិន​នឿយណាយ។ ការងារ​មួយចំនួន​វា​អាច​មិនត្រូវ​នឹង​ជំនាញ​របស់​យើង​ទាំងស្រុង​នោះទេ តែ​យើង​អាច​រៀន​ពី​វា​បាន ហេតុនេះ​ការចូល​ថ្នាក់​ឧ​ត្ត​មសិ​ក្សា​គ្រាន់តែ​ជា​ចំណុច​ចាប់ផ្តើម​តូច​មួយ​ប៉ុណ្ណោះ​សម្រាប់​ការអភិវឌ្ឍ​ខ្លួនឯង​ពេញ​មួយជីវិត។ ឱ្យតែ​មានការ​តាំងចិត្ត​ខ្ពស់ ហើយ​ហ៊ាន​អភិវឌ្ឍ​ខ្លួនឯង ភាព​ថ្កុំថ្កើង នឹង​នៅ​ជាមួយ​យើង ហេតុនេះ​សូម​ក្លាហាន​ស្វែងរក​អ្វីដែល​ខ្លួន​ស្រឡាញ់​ពិតប្រាកដ ហើយ​ជ្រើសរើស​មុខវិជ្ជា​នោះ​ដើម្បី​ចាប់ផ្តើម មុននឹង​ឈានដល់​ការ​ប្រឡូក​ក្នុង​ពិភព​ការងារ​ហាត់​ការ ឬ​ស្វែងរក​បទពិសោធ ដើម្បី​ពង្រឹង​អាជីព​នា​ថ្ងៃ​អនាគត៕

ស្ពៃ​តឿ​ជា​ប្រភេទ​បន្លែ​បៃតង​មួយ​ដែល​ស្ត្រី​មេផ្ទះ​អាច​យកទៅ​ច្នៃ​ធ្វើ​ម្ហូប​បាន​ច្រើន​មុខ ដូចជា​យកទៅ​ស្រុស​ធ្វើជា​អន្លក់​ក៏បាន ឬ​ធ្វើជា​បន្លែ​សម្រាប់​ស្ល-ស្ងោរ ឬ​សម្រាប់​ឆា​បាន​ដោយ​ងាយស្រួល និង​ថែមទាំង​មាន​រសជាតិ​ឆ្ងាញ់​ទៀតផង ដោយហេតុ​នេះហើយ​ទើប​ធ្វើឱ្យ​បន្លែ​ប្រភេទ​នេះ​ក្លាយជា​តម្រូវការ​មួយ​សម្រាប់គ្រប់ៗក្រុមគ្រួសារ ដែលជា​កត្តា​ធ្វើឱ្យ​វា​ត្រូវបាន​គេ​ស្គាល់ និង​លក់ដាច់​ខ្លាំង​នៅលើ​ទីផ្សារ។

អ្នកស្រី ហេង ង៉ោ កសិករ​នៅ​ភូមិ​ពោធិ​លើ ឃុំ​ត្រើយ​ស្លា ស្រុក​ស្អាង ខេត្តកណ្តាល​បាន​ប្រាប់​ឱ្យដឹងថា​ដោយសារតែ​ស្ពៃ​តឿ​មាន​តម្រូវការ​ច្រើន​នៅលើ​ទៅ​ផ្សារ គ្រួសារ​គាត់​ក៏បាន​ងាក​មក​ដាំ​បន្លែ​ប្រភេទ​នេះ ជំនួស​បន្លែផ្សេងៗទៀត​អស់​រយៈពេល​ប្រមាណ​ជាជាង 2ឆ្នាំ​មកហើយ។

អ្នកស្រី​បន្តថា ស្ពៃ​តឿ​ទោះបីជា​សម្បូរ​យ៉ាងណា ក៏​មិន​ភ័យ​រឿង​លក់​មិន​ចេញ​ដែរ គ្រាន់តែ​ធ្លាក់​ថ្លៃ​បន្តិច​ប៉ុណ្ណោះ មិន​ដូច​បន្លែ​ប្រភេទ​ខ្លះ នៅពេល​សម្បូរ​ខ្លាំង​លក់​មិន​ចេញ​ដល់​ថ្នាក់​ចាក់ចោល​នោះទេ ហើយ​ម៉ូយ​ថែមទាំង​មក​ទទួល​ទិញ​ដល់​ចម្ការ​ទៀតផង មិន​ពិបាក​ចំណាយពេល និង​ចំណាយលុយ​ដឹកជញ្ជូន​ទៅ​អង្គុយ​លក់​នៅ​ផ្សារ​ឡើយ។

កសិករ​ខាងលើ​ដដែល​បាន​បន្ថែមទៀតថា នៅ​រដូវប្រាំង​គេ​អាច​លក់​ស្ពៃ​តឿ​ចេញ​បាន​ក្នុងតម្លៃ1គីឡូក្រាម 4,000រៀល ទៅ5,000រៀល​ឯណោះហើយ​នៅ​រដូវវស្សា​លក់បាន​តម្លៃ​ចន្លោះ​ពី1,800រៀល ទៅ2,500រៀល​ដែរ​ក្នុង​មួយ​គីឡូក្រាម ប៉ុន្តែ​នៅពេល​សម្បូរ​ខ្លាំង​វា​អាច​ធ្លាក់​ថ្លៃ​ចុះ​ដល់ 1គីឡូក្រាម​បានត្រឹមតែ 500 ទៅ600រៀល​ក៏មានដែរ គ្រាន់តែ​ថា វា​ធ្លាក់​ថ្លៃ​មិនយូរ​ទេ 1ថ្ងៃ ឬ2ថ្ងៃ​ក្រោយមក វា​នឹង​ឡើងថ្លៃ​វិញ​ហើយ ដូច្នេះហើយ​ទើប​គ្រួសារ​គាត់ និង​គ្រួសារ​អ្នកភូមិផ្សេងៗទៀត​ចេះតែ​នាំគ្នា​ដាំ​ដុះ​បន្លែ​ស្ពៃ​តឿ​នេះ​ជា​បន្តបន្ទាប់​មកទល់​ប​ច្ចុ​ប្បន្ន។

ចំណែកឯ​អ្នកស្រី ជួប សុខ​វ៉ន កសិករ​ម្នាក់ទៀត​នៅ​ឃុំ​ស្វាយ​ប្រទាល​ដែល​ដាំ​បន្លែ​ស្ពៃ​តឿ​នេះដែរ​បាន​ប្រាប់​ដែរ​ថា ស្ពៃ​តឿ ឬ​ឈ្មោះ​មួយទៀត​ហៅថា​ស្ពៃ​កា​ឆាយ​នេះ ងាយស្រួល​ដាំ​ជាង​ប្រភេទ​បន្លែ​មួយចំនួនទៀត ហើយក៏​មិនសូវ​ជា​លំបាក​ថែទាំ ដូច​បន្លែ​សាលាដ ឬ​ខាត់ណា​នោះដែរ ពិសេស​វា​ប្រើពេល​ត្រឹមតែ1ខែ​ប៉ុណ្ណោះ​ក៏​អាច​កាត់​លក់បាន​ហើយ។ អ្នកស្រី​ក៏បាន​ប្រាប់​ពី​របៀប​ដាំ​ដុះ​ផងដែរ​ថា មុនដំបូង​យើង​ត្រូវ​ភ្ជួរ​ដី ហើយ​ឆូត​ជា​រង​ដោយ​មិនចាំបាច់​ហាល​ដី​ចោល​នោះទេ រួចហើយ​យក​ចំបើង​ស្ងួត​មក​គ្របពីលើ​រង រួច​យក​គ្រាប់​មក​បាច​ព្រោះ និង​ស្រោច​ទឺ​ក1ថ្ងៃ 3ដង។ លុះ​ក្រោយពី​បន្លែ​ដុះ​ឡើងមក​ហើយ គឺ​យើង​ត្រូវ​បន្ថយ​ការ​ស្រោច​ទឹក​មក​នៅត្រឹម​ស្រោច 2ដង និង​ស្រោច1ដង ក្នុង1ថ្ងៃ​វិញ។ នៅពេល​កូន​ស្ពៃ​តឿ​អាយុ​បាន15 ទៅ20ថ្ងៃ​ហើយ បើសិនជា​នៅក្នុង​រដូវភ្លៀង​វិញ​នោះ គេ​មិនចាំបាច់​ស្រោច​ទឹក​ទេ គ្រាន់តែ​មើលថែទាំ​សម្អាត​ស្មៅ និង​ដាក់​ជី ព្រមទាំង​បាញ់ថ្នាំ​ការពារ​កុំឱ្យ​សត្វល្អិត​ចង្រៃ​មក​ស៊ី​បំផ្លាញ​ប៉ុណ្ណោះ​ជាការ​ស្រេច ហើយ​ស្ពៃ​តឿ​វា​នឹង​លូតលាស់​ល្អ​ឡើង​ដោយ​ខ្លួនឯង​មិន​ខាន។ អ្នកស្រី​ក៏បាន​លើកឡើង​ដែរ​ថា ប្រសិនជា​ស្ពៃ​តឿ​មានតម្លៃ​ស្ថិត​ត្រឹមតែ 2,000រៀល ទៅ2,500រៀល​នោះ គឺ​វា​នឹង​ប្រសើរ​ណាស់​ទៅហើយ មិនបាច់​ដល់​ទៅ4,000 ឬ5,000រៀល​ក៏បាន​ដែរ ព្រោះថា​តម្លៃ​នេះ យើង​អាច​ចំណេញ​បាន​គួរសម​ហើយ តែបើ​ទោះជា​តម្លៃ​ឡើង​ចុះ​មិន​ទៀងទាត់​ក៏ដោយ ក៏​ពួកយើង​នៅតែ​បន្ត​ដាំ​ស្ពៃ​តឿ​ដែរ ព្រោះ​វា​ជា​បន្លែ​ដែល​ទីផ្សារ​ត្រូវការ​ជាប្រចាំរៀងរាល់ថ្ងៃ និង​ជា​មុខរបរ​ប្រចាំ​គ្រួសារ​ទៅហើយ។

ប្រធានការិយាល័យ​កសិក​ម្ម​ស្រុក​ស្អាង លោក អ៊ុក សុគន្ធ បានឱ្យដឹងថា ស្រុក​ស្អាង​គឺជា​ស្រុក​មួយ​ដែល​ជាប់​ចំណាត់ថ្នាក់​លេខ1ក្នុង​ការផលិត​បន្លែ​ក្នុងចំណោម​ស្រុក-ខេត្ត​ទាំងអស់​ទូទាំងប្រទេស​ក​ម្ពុ​ជា​ព្រោះ​គ្រាន់តែ​ឃុំ​ស្វាយ​ប្រទាល​មួយ ក្នុង1ថ្ងៃ​យើង​ផលិត​បន្លែ​គ្រប់​ប្រភេទ​សម្រាប់​ផ្ត​ត់​ផ្គង់​លើ​ទីផ្សារ​ក្នុងស្រុក​បាន​ប្រមាណ​ពី10 ទៅ15តោន​ដែរ។ ជាមួយគ្នានេះ លោក​បាន​អំពាវនាវ​ឱ្យ​កសិករ​ផ្លាស់ប្តូរ​ទម្លាប់​ការដាំដុះ​បែប​តាមចិត្ត​ចង់ មក​បង្កើន​ការដាំដុះ​បន្លែ​បែប​សុវត្ថិភាព និង​បន្លែ​សរីរាង្គ​ឱ្យបាន​កាន់តែ​ច្រើនឡើង​ដើម្បី​កាត់បន្ថយ​ការប្រើប្រាស់​ជី ក៏ដូចជា​ថ្នាំ​គីមី​ពុល​ហួស​កម្រិត​ដែលនាំឱ្យ​ប៉ះពាល់​ដល់​សុខភាព​របស់​យើង​ជា​អ្នក​ដាំ​ដុះ ក៏ដូចជា​អ្នក​បរិភោគ​ដែរ ហើយក៏​ដើម្បី​ប្រកួតប្រជែង និង​កាត់បន្ថយ​ការហូរចូល​បន្លែ​គីមី​ពី​ប្រទេសជិតខាង​ផងដែរ៕

ការធ្វើ​អាជីវកម្ម​ចាំបាច់​បំផុត​ត្រូវមាន​ភាពបត់បែន​ខ្ពស់​ឱ្យស្រប​ទៅនឹង​តម្រូវការ​ជាក់ស្តែង​នៃ​ចរន្ត​ទីផ្សារ​សកល និង​ត្រៀមខ្លួន​ជាស្រេច​សម្រាប់​ការប្រកួតប្រជែង​ជាមួយនឹង​ដៃគូ​ប្រកួតប្រជែង។ នៅ​កម្ពុ​ជាមាន​អាជីវកម្ម​ខ្លះ​បាន​ដំណើរការ​ល្បីល្បាញ​ត្រឹម​រយៈពេល​ខ្លី ក៏​ដួល​ទៅវិញ​ដែល​ធ្វើឱ្យ​ម្ចាស់​អាជីវកម្ម​ត្រូវ​ងើបឡើង​ជាមួយ​អាជីវកម្ម​ថ្មី ដោយ​ក្នុងនោះ​មាន​អ្នកខ្លះ​ត្រូវ​ងើបឡើង​ម្តង​ហើយ​ម្តងទៀត ព្រោះតែ​អាជីវកម្ម​របស់ខ្លួន​មិន​ស្របទៅនឹង​តម្រូវការ​ជាក់ស្តែង​យូរអង្វែង​ក្នុងសង្គម។

លោក សុខ សុភមង្គល នាយក​ក្រុមហ៊ុន Codingate បាន​លើកឡើងថា បច្ចេកវិទ្យា​ជា​អ្វីដែល​ពិភពលោក​កំពុង​ត្រូវការ​ទាំង​ពេលបច្ចុប្បន្ន និង​អនាគត ព្រោះ​វត្តមាន​របស់បច្ចេកវិទ្យា​អាច​ដោះស្រាយ​បញ្ហា​ជាច្រើន​របស់​មនុស្ស។ មិនថាតែ​ការរស់នៅ ការធ្វើការងារ ឬ​ការធ្វើ​អាជីវកម្ម​នោះទេ បច្ចេកវិទ្យា​អាចជួយ​សម្រួល​បាន​យ៉ាង​ល្អ ហើយ​វា​ក៏​ជា​ផ្នែក​មួយ​ដែល​ធ្វើឱ្យមាន​ការរីកចម្រើន​ដែរ ប្រសិនបើ​យើង​ចេះ​ប្រើប្រាស់​វា​ប្រកបដោយ​ភាព​វិជ្ជមាន។ បច្ចុប្បន្ននេះមនុស្ស​ស្ទើរ​គ្រប់គ្នា​បាន​ប្រើប្រាស់​កុំព្យូទ័រ និង​ទូរស័ព្ទដៃ​ស្មា​ត​ហ្វូ​ន ហេតុនេះ​បច្ចេកវិទ្យា​បាន​ក្លាយជា​ផ្នែក​មួយ​នៃ​ជីវិត​របស់​ពួកគេ ហើយ​ក្រុមហ៊ុន​បច្ចេកវិទ្យាធំៗជាច្រើន​បាន​ព្យាយាម​បង្កើត​សមិទ្ធផល​ថ្មី​ប្រកប-ដោយ​ភាព​ច្នៃប្រឌិត ដើម្បី​បម្រើឱ្យ​សេចក្តីត្រូវការ​សម្រាប់​កា​ររ​ស់​នៅ​របស់​មនុស្ស។ ទំនាក់ទំនង​រវាង​មនុស្ស​ដែល​នៅ​ឆ្ងាយ​ពីគ្នា​ក៏​កាន់​តែមាន​លក្ខណៈ​ប្រសើរឡើង ហើយ​មនុស្ស​កាន់តែ​ត្រូវការ​បច្ចេកវិទ្យា​ខ្លាំងឡើង។

លោក សុខ សុភមង្គល បាន​និយាយថា៖ “បច្ចេកវិទ្យា​មាន​ភាព​ឆ្លាត​វៃ​កាន់តែខ្លាំង ហើយ​បញ្ហា​របស់​មនុស្ស​ជាច្រើន​មិនអាច​ដោះស្រាយបាន​ដោយ​មនុស្ស​ម្នាក់ ឬ​ពីរ​នាក់​នោះទេ តែ​វា​ត្រូវការ​វត្តមាន​របស់​បច្ចេកវិទ្យា​ដែល​អាច​យល់បាន​ពីអ្វី​ដែល​មនុស្ស​កំពុង​ជួបប្រទះ និង​ពេលខ្លះ​អាច​ដឹង​ទាំង​អារម្មណ៍​របស់​មនុ​ស្សទៀ​ត​ផង។ ការប្រើប្រាស់​បច្ចេកវិទ្យា​ដើម្បី​ដោះស្រាយ​បញ្ហា អាចធ្វើឱ្យ​សង្គម​កាន់តែ​ប្រសើរឡើង ព្រោះ​វា​អាចធ្វើឱ្យ​មនុស្សម្នាក់ៗមាន​សន្តិភាព​ផ្នែក​ផ្លូវចិត្ត ហើយ​មាន​ពេលវេលា​ច្រើន​សម្រាប់​អភិវឌ្ឍ​សមត្ថភាព​ការងារ”។

ស្ថាបនិក​ក្រុមហ៊ុន​បច្ចេកវិទ្យា​ខាងលើ​បានលើកឡើង​ផងដែរ​ថា បច្ចុប្បន្ននេះ ក្រុមហ៊ុនធំៗនានា​ចាប់ផ្តើម​ប្រើប្រាស់​បច្ចេកវិទ្យា​កាន់តែ​ច្រើនឡើង ព្រោះ​វា​ចំណេញ​ពេលវេលា មាន​សុវត្ថិភាព​ខ្ពស់ និង​មាន​ប្រសិទ្ធភាព​កាន់តែខ្លាំង ហេតុនេះ​អ្នក​អភិវឌ្ឍន៍​បច្ចេកវិទ្យា​ចាំបាច់​ត្រូវតែ​ខិតខំ​ប្រឹងប្រែង​បន្ត​បង្កើត​ស្នាដៃ​ឱ្យបាន​កាន់តែ​ប្រសើ​ឡើង។ កត្តា​ទាំងអស់នេះ​នឹង​ជំរុញ​ឱ្យ​អ្នកជំនាញ​បច្ចេកវិទ្យា និង​កាន់​តែមាន​ទីផ្សារ ហើយ​ក្លាយជា​តម្រូវការ​សម្រាប់​គ្រប់ផ្នែក​ទាំងអស់​ក្នុងសង្គម។

នៅ​រយៈពេល​ប្រមាណ 5ឆ្នាំ ទៅ 7ឆ្នាំ​ខាងមុខ បដិវត្តន៍​ឧស្សាហកម្ម4.0 នឹង​ជំរុញ​ឱ្យ​ប្រព័ន្ធ​នៃ​ការធ្វើ​អាជីវកម្ម​ទាំងអស់​ឱ្យប្រើ​ប្រាស់​បច្ចេកវិទ្យា ទាំង​ការគ្រប់គ្រង​ទិន្នន័យ ការធ្វើ​ទីផ្សារ ការបម្រើ​សេវាកម្មការផលិត រួមទាំង​ការ​ចរាចរ​ទំនិញ​ជាដើម សុទ្ធតែ​ត្រូវ​ប្រើប្រាស់​ដោយ​គ្រឿង​ម៉ាស៊ីន​ច្រើន​បំផុត។ ហេតុនេះ​សេវាកម្ម​បច្ចេកវិទ្យា​ដែល​បម្រើឱ្យ​អាជីវកម្ម​ទាំងអស់​នឹង​ក្លាយជា​តម្រូវការ​ចាំបាច់ ហើយ​មនុស្ស​ត្រូវតែមាន​ចំណេះដឹង​បច្ចេកវិទ្យា​ដើម្បី​ប្រើប្រាស់​ប្រព័ន្ធ​ទំនើប​ទាំងអស់នេះ។

លោក ស៊ឹម ចាន់​គី​រី​រ័ត្ន អគ្គនាយក​ក្រុមហ៊ុន BanhJi បាន​លើកឡើងថា នាពេល​បច្ចុប្បន្ននេះ មនុស្ស​ចាប់ផ្តើម​ប្រើប្រាស់​សេវា​ហិរញ្ញវត្ថុ​ដោយ​បច្ចេកវិទ្យា​កាន់តែ​ច្រើនឡើង​នៅលើ​ពិភពលោក។ ចំពោះ​វិធីសាស្ត្រ​នៃ​ការគ្រប់គ្រង​ទិន្នន័យ និង​ការធ្វើការងារ​របស់​ក្រុមហ៊ុននីមួយៗ លើ​បញ្ជីស្នាម​ក៏មាន​ការប្រែប្រួល​ផងដែរ ព្រោះ​ការប្រមូល​ទិន្នន័យ​នាពេល​បច្ចុប្បន្ននេះ មិន​ប្រើប្រាស់​មនុស្ស​ច្រើន​ដូចពេលមុន​នោះទេ។ បច្ចេកវិទ្យា​កាន់តែ​មាន​ភាព​ឆ្លាត​វៃហើយ​ការប្រមូល និង​គ្រប់គ្រង​ទិន្នន័យ​កាន់​តែមាន​លក្ខណៈ​ទំនើប សុវត្ថិភាព និង​លឿន​ជាង​មុន។ គ្រប់​អាជីវកម្ម​ទាំងអស់​នឹង​លែងមាន​ការលំបាក​លើ​ការគ្រប់គ្រង​ចំណាយ-ចំណូល ឬ​គិត​ពន្ធ​ទៀតហើយ ព្រោះ​ម៉ាស៊ីន​អាចធ្វើ​បាន។

លោក ស៊ឹម ចាន់​គី​រី​រ័ត្ន បាន​និយាយថា៖ “ឥឡូវនេះ​មានកម្ម​វិធី​ខ្លះ​ធ្វើឱ្យ​ម្ចាស់​អាជីវកម្ម​កាន់តែ​មាន​លក្ខណៈ​ងាយស្រួល ព្រោះ​ជា​ឧទាហរណ៍​ប្រសិនបើ​យើង​ទិញ​កុំព្យូទ័រ​មួយគ្រឿង យើង​គ្រាន់តែ​សរសេរ​ពី​ប្រភេទ​កុំព្យូទ័រ តម្លៃ កន្លែង​ទិញ និង​ព័ត៌មាន​មួយចំនួនទៀត ប្រព័ន្ធ​បច្ចេកវិទ្យា​នឹង​បែងចែក​ទិន្នន័យ​នោះ​ទៅតាម​ប្រភេទ​ឱ្យតែ​ម្តង”។

អ្នកជំនាញ​ខាងលើ​បានលើកឡើង​ផងដែរ​ថាបច្ចេកវិទ្យា​ជា​អ្វីដែល​មនុស្ស​ត្រូវការ​នៅពេល​ខាងមុខ តម្រូវការ​នេះ​នឹង​ធ្វើឱ្យ​ការធ្វើ​អាជីវកម្ម​កាន់តែ​មា​នល​ក្ខ​ណៈ​ងាយស្រួល។ អ្នក​ដែល​មិន​ធ្លាប់មាន​របាយការណ៍​ហិរញ្ញវត្ថុ ឬ​មិនសូវ​ចេះ​ផ្នែក​រៀបចំ​របាយការណ៍​ហិរញ្ញវត្ថុ ក៏មាន​ភាពងាយស្រួល​ជាង​មុន តែ​ចំពោះ​អ្នក​ដែល​ធ្វើ​ការងារ​ផ្នែក​នេះ​វិញ ចាំបាច់​ត្រូវតែ​សិក្សា​បន្ថែម​ពី​ការប្រើប្រាស់​បច្ចេកវិទ្យា​ដើម្បី​ផ្លាស់ប្តូរ​ពី​អ្នកធ្វើការងារ​លើ​ឯកសារ​ដោយផ្ទាល់ មក​ក្លាយជា​អ្នកគ្រប់គ្រង​បច្ចេកវិទ្យា​វិញ​ម្តង។

គួរបញ្ជាក់​ផងដែរ​ថា នាពេលខាងមុខ ការងារ​ដែល​ត្រូវការ​ប្រើប្រាស់​កម្លាំង​នឹងត្រូវ​បាន​ជំនួស​ដោយ​ម៉ាស៊ីន​ទាំងអស់ ព្រោះ​បច្ចេកវិទ្យា​អាច​ដោះស្រាយ​វា​បាន​យ៉ាង​ប្រសើរ។ ការងារ​លើកដាក់ លីសែង​នៅក្នុង​វិស័យ​ឡូ​ជី​ស្ទិ​ក​នឹង​កាត់បន្ថយ​មនុស្ស​កាន់តែ​ច្រើន។ នៅពេលនោះ​អ្នកធ្វើការងារ​ដោយ​ប្រើប្រាស់​កម្លាំង នឹង​លែង​ក្លាយជា​តម្រូវការ​ទៀតហើយ ព្រោះ​គេ​អាច​ប្រើប្រាស់​ម៉ាស៊ីន​ដើម្បី​ធ្វើការ​ងារ​ពេញ 24ម៉ោង ដោយ​គ្មាន​ការ​សម្រាក និង​មិនចេះ​មាន​គ្រោះថ្នាក់​ដល់​អាយុជីវិត​មនុស្ស។ ឱកាស​នៃ​ការគ្រប់គ្រង​ការងារ​ទាំងអស់នោះ​នឹង​ធ្លាក់​លើ​ក្រុមហ៊ុន​បច្ចេកវិទ្យាថ្មីៗដែលមាន​សមត្ថភាព​ផ្តល់​សេវាកម្ម​គ្រប់គ្រង​ការងារ​ដល់​ក្រុមហ៊ុនធំៗដែល​ត្រូវ​ផ្លាស់ប្តូរ​វិធីសាស្ត្រ​ក្នុង​ការធ្វើ​ពាណិជ្ជកម្ម៕

គន្លឹះថ្មីៗល្អៗ 6យ៉ាងក្នុងការបោកគក់សម្លៀកបំពាក់ ប្ដូរការងារពិបាក ឱ្យក្លាយជារឿងងាយ។

បងៗស្រ្តីមេផ្ទះជាច្រើនតែងតែគិតថា ការបោកគក់សម្លៀកបំពាក់គឺជាការងារមួយដែលពិបាក និងប្រើពេលវេលាច្រើន ជាពិសេសចំពោះសម្លៀកបំពាក់ណាដែលមានស្នាមប្រឡាក់ស្អិតជាប់ណែន សឹងតែបោះចោលតែម្ដង។ តែឈប់សិន! កុំអាលបោះចោលអី ព្រោះថ្ងៃនេះ ឡារ៉ែន មានគន្លឹះថ្មីៗ ល្អៗក្នុងការបោកគក់សម្លៀកបំពាក់មកជម្រាបជូន ទាំងវិធីកម្ចាត់ស្នាមកខ្វក់ដែលគិតថា បោកមិនចេញ វិធីមើលថែទាំខោអាវឱ្យនៅមានទ្រង់ទ្រាយដូចមុនដដែលមានពណ៌ស្រស់ស្អាតដដែល និងពាក់បានកាន់តែយូរឡើង មកជម្រាបជូន និងមានថែមវិធីលាងសម្អាតម៉ាស៊ីនបោកគក់សម្លៀកបំពាក់យ៉ាងងាយៗមកចែករំលែកជូនទៀតផង។

1. លាងសម្អាតម៉ាស៊ីនបោកគក់សម្លៀកបំពាក់ដោយទឹកថ្នាំខ្ពុរមាត់
បើបងៗស្រ្តីមេផ្ទះសង្កេតឃើញថា ម៉ាស៊ីនបោកគក់ខោអាវនៅក្នុងផ្ទះចាប់ផ្ដើមមានក្លិនមិនល្អ ឬមានស្នាមកខ្វក់ហើយនោះ បញ្ជាក់ថា ដល់ពេលត្រូវលាងសម្អាតវាចេញម្ដងហើយ ដូច្នេះគ្រាន់តែចាក់ទឹកថ្នាំខ្ពុរមាត់ប្រមាណជាកន្លះកែវចូលទៅក្នុងប្រឡោះដាក់ម្សៅសាប៊ូ បន្ទាប់មកក៏ចុចកុងតាក់បើកឱ្យម៉ាស៊ីនធ្វើការតាមធម្មតា។ តែប៉ុណ្ណឹង ទាំងមេរោគផ្សិត និងបាក់តេរីបង្កក្លិនផ្សេងៗនឹងត្រូវសម្លាប់អស់មិនខាន។

2. កម្ចាត់ស្នាមលឿងៗលើសម្លៀកបំពាក់ដោយថ្នាំអាស្ពីរីន
ដោយគ្រាន់តែកិនគ្រាប់ថ្នាំអាស្ពីរីន ចំនួន5គ្រាប់ រួចយកទៅលាយក្នុងទឹក2លិត្រ រួចហើយយកសម្លៀកបំពាក់ពណ៌សទៅត្រាំ (កុំភ្លេចសង្កត់ឱ្យទទឹកសព្វ) ហើយទុកចោលយ៉ាងតិច8ម៉ោង ដើម្បីរង់ចាំឱ្យជាតិអាស៊ីត សាលីស៊ីលិក ពីគ្រាប់ថ្នាំអាស្ពីរីនបញ្ចេញឫទ្ធិ បន្ទាប់មកសឹមយកមកបោកគក់តាមធម្មតា។ តែប៉ុណ្ណឹងក៏នឹងជួយឱ្យសម្លៀកបំពាក់នោះត្រឡប់ទៅជាសស្អាតបានបាត់ទៅហើយ។

ក្រៅពីនេះ ថ្នាំអាស្ពីរីន នៅអាចកម្ចាត់ស្នាមប្រឡាក់ឈាមនៅលើខោអាវបានទៀតផង ដោយគ្រាន់តែរំលាយថ្នាំអាស្ពីរីននៅក្នុងទឹកត្រជាក់(ហាមប្រើទឹកក្ដៅជាដាច់ខាត ព្រោះនឹងធ្វើឱ្យស្នាមប្រឡាក់នោះរឹតតែជាប់ស្អិតទៅទៀត)បន្ទាប់មកក៏យកខោអាវដែលប្រឡាក់ឈាមនោះមកត្រាំ។ បើស្នាមប្រឡាក់ឈាមនោះស្ងួតចូរយកថ្នាំអាស្ពីរីនដែលកិនជាម្សៅមកដុសនៅលើស្នាមប្រឡាក់នោះ ទុកចោល2ម៉ោង រួចសឹមយកទៅបោកគក់តាមធម្មតា។

3. មិនគួរហាលយូរពេកទេ
ព្រោះការហាលសម្លៀកបំពាក់ចោលយូរពេក នឹងធ្វើឱ្យសាច់ក្រណាត់ឡើងរឹង ពិបាកអ៊ុតទោះបីជាឆ្នាំងអ៊ុតមានចំហាយទឹកក៏អ៊ុតឱ្យរាបមិនបានដែរ តែបើសិនជាហាលទុកចោលរហូតដល់ភ្លេចសា និងមានបញ្ហាដូចខាងដើមនោះឡារ៉ែន ណែនាំឱ្យប្រោះទឹកលើសម្លៀកបំពាក់នោះបន្តិចៗ ក៏អាចជួយឱ្យកាន់តែងាយស្រួលអ៊ុតឡើងដែរ។

4. ដាក់ស្រោមជើងក្នុងថង់ស្បៃ ឬថង់សំណាញ់មុននឹងដាក់បោក
សម្រាប់អ្នកដែលមានបញ្ហា ស្រោមជើងយារ ឬច្រើនតែបាត់អស់ម្ខាងជាប្រចាំនោះ ឡារ៉ែន ណែនាំឱ្យដាក់ក្នុងថង់ស្បៃ ឬថង់សំណាញ់មុននឹងយកទៅដាក់បោកក្នុងម៉ាស៊ីន ព្រោះវាជាការថែទាំស្រោមជើងឱ្យទុកពាក់បានយូរ និងថែមទាំងមិនធ្វើឱ្យបាត់អស់ម្ខាងក្រោយពេលបោកគក់រួចទៀតផង។

5. ស្ដារសភាពសម្លៀកបំពាក់រួញដោយសាប៊ូកក់សក់កូនក្មេង
ស្ដារសភាពសម្លៀកបំពាក់ណាដែលរួញដោយការលាយទឹកសាប៊ូកក់សក់ក្មេងជាមួយទឹកក្ដៅឧណ្ហៗនៅក្នុងចានដែក ហើយយកសម្លៀកបំពាក់ដែលរួញនោះមកដាក់ត្រាំទុកចោលប្រមាណ5-10នាទី បន្ទាប់ពីនោះស្រង់ឡើងមកដោយមិនចាំបាច់លាងសម្អាតទេ ហើយយកទៅដាក់លើកន្សែងពោះគោដែលស្ងួត ព្រមទាំងមូររុំចូលគ្នាដើម្បីឱ្យបឺតជាតិទឹកចេញ។ ធ្វើបែបហ្នឹងដដែលៗរហូតទាល់តែសម្លៀកបំពាក់នោះត្រឡប់មកមានខ្នាតដូចដើមវិញ។

6. ប្រើគ្រីមរំអិលសម្រាប់កោរពុកមាត់លុបស្នាមប្រឡាក់គ្រឿងសម្អាង
បើមានស្នាមគ្រឿងសម្អាងប្រឡាក់ជាប់នៅលើសម្លៀកបំពាក់ ហើយបោកមិនចេញសោះនោះ ចូរយកគ្រីមរំអិលសម្រាប់កោរពុកមាត់មកដុសនៅលើកន្លែងដែលប្រឡាក់ ហើយទុកចោល10-15នាទី មុននឹងយកទៅបោកគក់តាមធម្មតា ហើយបើសិនធ្វើបែបនោះម្ដងហើយ នៅតែមិនទាន់ជ្រះស្អាតទៀត ចូរធ្វើដូចគ្នាម្ដងទៀត។

សម្លៀកបំពាក់ដែលស្លៀកយូរៗទៅ វាត្រូវតែខូចទ្រង់ទ្រាយ រាងរៅឬស្លេកពណ៌ខ្លះៗជារឿងធម្មតា តែយើងអាចពន្យារពេលការប្រើប្រាស់ឱ្យបានយូរឡើងតាមរយៈគន្លឹះល្អៗទាំងអស់ខាងលើដែលវានឹងជួយរក្សាទ្រង់ទ្រាយ និងពណ៌របស់សម្លៀកបំពាក់ឱ្យនៅតែស្អាត ភ្លឺរលោង មើលទៅមិនចាស់ព្រមទាំងទុកស្លៀកពាក់បានកាន់តែយូរឡើងទៀតផង៕

សំអាងការ ក្រវាន់ មានសម្លៀកបំពាក់ និងគ្រឿងអលង្ការ ទាំងបុរាណ ទាំងសម័យ ជាច្រើនពណ៌ ជាច្រើនម៉ូដ យ៉ាងប្រណីត សម្រាប់ជាជម្រើសជូនអតិថិជន។

សំអាងការ ក្រវាន់ មានបុគ្គលិកទទួលភ្ញៀវ ប្រកបដោយភាពរួសរាយរាក់ទាក់ និងមានជំនាញខ្ពស់ក្នុងការផ្តល់សេវាកម្មជូនដល់លោកអ្នក។

សំអាងការ ក្រវាន់ មានក្រុមជាងតុបតែង សំអិតសំអាង ដែលមានស្នាដៃដ៏ចំណាន និងមានបទពិសោធន៍ជាច្រើនឆ្នាំនៅក្នុងវិស័យសំអាងការ។

សំអាងការ ក្រវាន់ បានចាប់ផ្តើមដំណើរការជាផ្លូវការនៅខែមករា ឆ្នាំ2018

អគារលេខ18C ផ្លូវលេខ328 សង្កាត់ទួលស្វាយព្រៃ2 ខណ្ឌចំការមន រាជធានីភ្នំពេញ
ទូរស័ព្ទ : 097 745 5757 / 095 234 567