ធឿន មករា - La Reine Media

ថ្ងៃក្ដៅយ៉ាងហ្នឹងហើយ នៅខ្វះវីតាមីន D ទៀតឬ?

ក. នែ បើយើងខ្វះវីតាមីន D ត្រូវធ្វើយ៉ាងម៉េចទៅ?
ខ. ខ្វះវីតាមីនអី ក៏ទិញវីតាមីនហ្នឹងមកញ៉ាំទៅ មានលក់ម៉ាគំនរ
គ. ធ្លាប់ឮគេប្រាប់ថា ជំងឺពុកឆ្អឹងពាក់ព័ន្ធនឹងវីតាមីន D ណា៎…
ខ. មែនហ្អេ៎? វាអត់ពាក់ព័ន្ធនឹងកាល់ស្យូមសោះ…
គ. វីតាមីន Dហ្អេ៎? វាមាននៅក្នុងពន្លឺថ្ងៃហ្នឹងណា៎…
ខ. ស្រុកយើងថ្ងៃក្ដៅយ៉ាងហ្នឹង មិនខ្វះវីតាមីន D ទេ

តាមរយៈបទសន្ទនាខាងលើ វេជ្ជបណ្ឌិតជំនាញ និងជាអ្នកធ្វើការវិភាគរឿងវីតាមីន D បានប្រាប់ថា មនុស្សជាច្រើនខ្វះចំណេះដឹងពាក់ព័ន្ធនឹងវីតាមីន D ឬបើទោះជាដឹង និងដឹងយ៉ាងច្បាស់ពីភាពសំខាន់របស់វីតាមីន D មែន តែបែរជាយល់ច្រឡំថា យើងរស់នៅក្នុងប្រទេសក្ដៅ នឹងបានទទួលពន្លឺថ្ងៃយ៉ាងបរិបូណ៍សម្រាប់រាងកាយក្នុងការសាងវីតាមីន D យ៉ាងគ្រប់គ្រាន់ហើយ។

តាមរយៈការស្រាវជ្រាវបានរកឃើញថា ប្រជាជនដែលរស់នៅក្នុងតំបន់ទីក្រុងមានសភាវខ្វះវីតាមីន D ច្រើនណាស់ ដោយមនុស្សចាស់អាយុ 60ឆ្នាំឡើងខ្វះវីតាមីន D មានប្រមាណជា 65% ក្រុមមនុស្សក្នុងវ័យលែងមានបុត្រ 60% ក្រុមស្ត្រីដែលអស់វដ្តរដូវមានច្រើនដល់ទៅ 80% ជាហេតុធ្វើឱ្យក្រុមមនុស្សទាំងនោះកើតមានភាពប្រថុយប្រថានក្នុងការកើតជំងឺពុកឆ្អឹងនាពេលអនាគត។

វីតាមីន D និងរោគពុកឆ្អឹង
វីតាមីន D ជាវីតាមីនដែលមានភាពចាំបាច់ចំពោះរាងកាយមនុស្ស ដោយវានឹងទៅជួយទប់ស្កាត់ការបញ្ចេញអ័រម៉ូន ប៉ារ៉ាថៃរ៉យដ៍ (Parathyroid) ជាអ័រម៉ូនគ្រោះថ្នាក់ ដែលនឹងទៅបំផ្លាញកាល់ស្យូមចេញពីឆ្អឹង។ ក្រៅពីនេះវីតាមីន D នៅជួយសាងសារធាតុ អូស្តេអូខាល់ស៊ីន (Osteocalcin) ជួយទាញកាល់ស្យូមចូមក្នុងឆ្អឹង និងជួយសាងសាច់ដុំឱ្យរឹងមាំ។ ជាការការពាររោគពុកឆ្អឹងបានមួយផ្លូវ ហើយថែមទាំងជួយកាត់បន្ថយភាពប្រថុយប្រថានក្នុងការដួលរបស់មនុស្សចាស់បានទៀតផង។

វីតាមីន D និងពន្លឺថ្ងៃ
មនុស្សភាគច្រើនប្រហែលជាដឹងច្បាស់ស្រេចហើយថា វីតាមីន D ពាក់ព័ន្ធនឹងពន្លឺថ្ងៃតែ… ពាក់ព័ន្ធយ៉ាងណានោះ យើងអាចអធិប្បាយបានយ៉ាងងាយបំផុតគឺ នៅពេលរាងកាយបានទទួលពន្លឺថ្ងៃ រាងកាយប្រៀបដូចជា “គ្រឿងបំប្លែង‟ ដែលអាចបំប្លែងពន្លឺថ្ងៃដែលទទួលបាននោះឱ្យក្លាយទៅជាវីតាមីន D បានដោយឯកឯងជាស្វ័យប្រវត្តិ។ វីតាមីន D ដែលកើតឡើងនោះនឹងចាកចេញពីស្បែកឆ្ពោះទៅសរសៃឈាមតូចៗខាងក្រោមស្បែក ដោយធ្វើប្រតិកម្មជាមួយប្រូតេអុីនចាប់វីតាមីន D ចូលទៅក្នុងក្រសែឈាម និងឆ្ពោះទៅរកអវយវៈផ្សេងៗជាបន្ត ដូចជា ថ្លើមក្រលៀន ពោះវៀន ឆ្អឹង ដើម្បីបឺតជ្រាបយកកាល់ស្យូមធ្វើឱ្យឆ្អឹងរឹងមាំហ្នឹងឯង។

ទទួលបានពន្លឺថ្ងៃយ៉ាងម៉េច ទើបគ្រប់គ្រាន់?
នៅពេលនិយាយថា ត្រូវទទួលពន្លឺថ្ងៃ នារីៗច្បាស់ថ្ងូររហ៊ឹសជាមិនខាន ព្រោះកម្ដៅដ៏ក្ដៅរបស់ព្រះអាទិត្យនៅស្រុកយើងនេះពិបាកនឹងទ្រាំទ្របានណាស់ តែវេជ្ជបណ្ឌិតជំនាញបានផ្ដល់ព័ត៌មានថា អំឡុងពេលដែលស័ក្តិសមក្នុងការទទួលយកពន្លឺថ្ងៃ គឺម៉ោង06.00 – 09.00 និងម៉ោង15.00 – 17.00 ជាអំឡុងពេលដែលពន្លឺថ្ងៃមិនក្ដៅខ្លាំង និងមិនបង្កអន្តរាយដល់ស្បែកមនុស្សខ្លាំងពេកទេ ដោយរយៈពេលត្រឹមតែ30នាទីដែលស្បែកបើកទទួលយកពន្លឺថ្ងៃចូលមកក្នុងរាងកាយនេះនឹងអាចសាងវីតាមីន Dដល់រាងកាយបានដល់ទៅ1,000យូនីតឯណោះ។

ញ៉ាំផ្សិត ជម្រើសមួយទៀតក្នុងការទទួលបាន វីតាមីន D
រុក្ខជាតិដែលមានវីតាមីន D ខ្ពស់បំផុតគឺ ផ្សិត។ ទាំងវាស្ថិតនៅក្នុងទីម្លប់ និងសើម តែបែរជាមានសារធាតុដែលជាតួផ្ដើមកំណើតឱ្យវីតាមីន D ខ្ពស់បំផុតនៅពេលដែលសារធាតុត្រូវពន្លឺថ្ងៃផ្លាស់ប្ដូរក្លាយជាវីតាមីន D ដូច្នេះបើអ្នកបេះផ្សិតបានមក ត្រូវយកផ្សិតនោះទៅដាក់ហាលថ្ងៃប្រមាណជាកន្លះម៉ោង ទៅមួយម៉ោង រួចសឹមយកមករក្សាទុកក្នុងទូទឹកកក ហើយទាំងអស់នេះ ផ្សិតដែលហាលថ្ងៃរួចអាចយកទៅរក្សាទុកក្នុងទូទឹកកកបានយូររហូតដល់ទៅ14ថ្ងៃ។ ក្រៅពីផ្សិតហើយ គេនៅអាចរកវីតាមីន D បានពីសាច់ត្រី ្រថាត៍ ត្រីប្លាធូ និងគ្រំអយស្ទ័របានផងដែរ។

ឡារ៉ែនសង្ឃឹមថា មិត្តអ្នកអានប្រហែលជាបានទទួលចំណេះដឹងល្អៗពាក់ព័ន្ធនឹងវីតាមីន D ដែលជាប្រយោជន៍ល្មមសមគួរហើយ ជាពិសេសនារីៗដែលខ្លាចពន្លឺថ្ងៃ ចូរងាកមកផ្ដល់ភាពសំខាន់ជាមួយវីតាមីន D ព្រមជាមួយការមើលថែទាំសុខភាពលើផ្នែកផ្សេងៗទៀត ដើម្បីឱ្យបានស្អាត សង្ហា សុខភាពរឹងមាំ ចាកឆ្ងាយពីជំងឺទាំងអស់គ្នា៕

October 19, 2018

ម៉ូដសម្លៀកបំពាក់នារីម៉ាក LOOKSWOMEN លេខ 125

October 19, 2018

ការរៀបការនឹងធ្វើឱ្យអ្នកមានសេចក្ដីសុខ និងអាយុវែង

អ្នកដែលមានសុខភាពល្អ មិនមែនជាមនុស្សដែលមានសេចក្ដីសុខតែម្យ៉ាងនោះទេ តែបច្ចុប្បន្ននេះគួរតែរាប់ការរៀបការចូលផងដែរ ព្រោះគូអាពាហ៍ពិពាហ៍ គឺជាអ្នកដែលសាងសេចក្ដីសុខដល់រូបអ្នក និងធ្វើឱ្យអាយុរបស់អ្នកកាន់តែវែងឡើងទៀតផង។ ក្រុមអ្នកស្រាវជ្រាវផ្នែកកម្មវិធីកាំរស្មីមហារីកវិទ្យាពីមហាវិទ្យាល័យ ហាវ៉ាដ បានរកឃើញថា អ្នកដែលរៀបការ ហើយមានជំងឺមហារីកនឹងមានជីវិតរស់នៅបានយូរជាងអ្នកនៅលីវ ហើយមានជំងឺដូចគ្នា។

ក្នុងអំឡុង4ឆ្នាំកន្លងមក មានអ្នកជំងឺច្រើនជាង735,000នាក់បានទទួលការវិនិច្ឆ័យថា កើតជំងឺមហារីក និងជំងឺមហារីកចង្រៃដែលសម្លាប់ជីវិតមនុស្សមានដូចជា មហារីកពោះវៀនធំ មហារីកសុដន់ និងមហារីកថ្លើម។ តាមរយៈការសិក្សាស្រាវជ្រាវបានរកឃើញថា ការនៅលីវគឺជាបច្ច័យប្រថុយប្រថានសម្រាប់អ្នកកើតជំងឺមហារីក ពួកគេអាចនឹងគ្មានសេចក្ដីព្យាយាម និងតាំងចិត្តចូលទៅទទួលយកការព្យាបាលតាមដែលអាចធ្វើបានឡើយ។ ដោយហេតុនេះ ការគាំទ្រពីដៃគូជីវិតនឹងនឹងជួយជំរុញឱ្យអ្នកមានជីវិតកាន់យឺនយូរឡើង ដូច្នេះគោលបំណងចុងក្រោយនាំការមានជីវិតរស់នៅយូរអង្វែង គឺការមានជីវិតអាពាហ៍ពិពាហ៍ដែលល្អ និងឥតខ្ចោះ។ ក្រៅពីនេះ ការសិក្សាស្រាវជ្រាវផ្សេងៗទៀតនៅបានរកឃើញទៀតថា គូអាពាហ៍ពិពាហ៍ដែលមានសេចក្ដីសុខច្រើនតែមានសុខភាពល្អប្រសើរជាងមនុស្សទាំងឡាយទៀតផង។

ការសិក្សាស្រាវជ្រាវមួយដែលបានបោះពុម្ពផ្សាយនៅក្នុងព្រឹត្តិបត្រពាក់ព័ន្ធនឹងការរៀបការ និងគ្រួសារ បានតាមដានគូស្វាមីភរិយាចំនួន1,681គូដើម្បីនឹងសង្កេតមើលថា តើសភាវសេចក្ដីសុខក្នុងជីវិតអាពាហ៍ពិពាហ៍មានផលដល់សុខភាពរាងកាយរបស់ពួកគេយ៉ាងណាខ្លះ? ការសិក្សាស្រាវជ្រាវនោះបានរកឃើញថា កិច្ចការងាររវាងគូស្វាមីភរិយា ដូចជា ការដើរលេងក្នុងពេលរាត្រី ការមើលខ្សែភាពយន្តនៅពេលយប់ ឬការចេញទៅញ៉ាំអាហារនៅក្រៅផ្ទះជាមួយគ្នា សុទ្ធតែធ្វើឱ្យគូស្វាមីភរិយាទាំងនោះមានសេចក្ដីសុខ និងមានសុខភាពល្អឡើង។ អ្នកសិក្សាស្រាវជ្រាវក៏បានធ្វើការវិភាគដោយការដាក់សំនួរ 11ចំណុចសម្រាប់គូស្វាមីភរិយាចំនួន 1,681គូនោះ ដើម្បីសង្កេតមើលថា តើពួកគេមានសេចក្ដីសុខប៉ុនណា និងមានវិធីចាត់ការជាមួយការប្រចណ្ឌហួងហែង កំហឹង និងភាពមិនស្មោះត្រង់នឹងគ្នាយ៉ាងណាខ្លះទៀតផង។

លទ្ធផលនៃការវិភាគបានបង្ហាញឱ្យដឹងថា ជីវិតអាពាហ៍ពិពាហ៍ដែលមានគុណភាព និងការមានសុខភាពល្អនោះ ជារឿងដែលគួបផ្សំទៅជាមួយគ្នា ហើយទោះបីជាគូស្វាមីភរិយាមានអាយុខុសឆ្ងាយពីគ្នាក៏ដោយ ក៏សម្ព័ន្ធភាពដែលអស្ចារ្យបំផុតនៅតែជាជីវិតអាពាហ៍ពិពាហ៍ដែលពោរពេញទៅដោយសេចក្ដីសុខ និងមានសុខភាពដែលរឹងប៉ឹងល្អដែរ។

គ្មានចំណុចជំទាស់អ្វីទាំងអស់សម្រាប់ការងារវិភាគទាំង2យ៉ាងនេះ ហើយអ្វីដែលសំខាន់ ការវិភាគនេះថែមទាំងជាការចង្អុលឱ្យឃើញពីភាពសំខាន់របស់តួបុគ្គល សម្ព័ន្ធភាព និងការរៀបការផងដែរ៕

October 19, 2018

ម្ចាស់អាជីវកម្មបង្ហាញពីវិធីសាស្ត្រយកចិត្ត និងជំរុញបុគ្គលិកឱ្យមានការអភិវឌ្ឍ

នៅពីក្រោយភាពជោគជ័យរបស់ស្ថាប័នចាំបាច់ត្រូវតែមានអ្នកដឹកនាំប្រកបដោយភាពប៉ិនប្រសប់ តែនៅជុំវិញអ្នកដឹកនាំខ្លាំងក៏ចាំបាច់ត្រូវមានបុគ្គលិកស្មោះត្រង់ និងល្អៗជាច្រើនដើម្បីរួមចំណែកអភិវឌ្ឍស្ថាប័នទាំងមូលដែរ។

លោកជំទាវ តាំង ហ្គិចលៀង អគ្គនាយិកា នៃក្រុមហ៊ុនឌីហ្វើនីឈ័របានលើកឡើងថា ការគ្រប់គ្រងបុគ្គលិកគឺជារឿងសំខាន់មួយដែលម្ចាស់ស្ថាប័នទាំងអស់ត្រូវយកចិត្តទុកដាក់ ព្រោះបុគ្គលិកជាចំណែកយ៉ាងសំខាន់ក្នុងការ-បង្កើតភាពជោគជ័យដល់ស្ថាប័ន។ ដើម្បីឱ្យបុគ្គលិកស្រឡាញ់ស្ថាប័ន យកចិត្តទុកដាក់ និងចូលរួមចំណែកអភិវឌ្ឍស្ថាប័នដោយភាពស្មោះត្រង់ លុះត្រាតែម្ចាស់ស្ថាប័ន ឬអ្នកគ្រប់គ្រងផ្តល់ក្តីស្រឡាញ់ដល់បុគ្គលិកជាមុនសិន។

ជាធម្មតានៅពេលដែលម្ចាស់ស្ថាប័នចាត់ទុកបុគ្គលិកទាំងអស់ជាកូន ជាបង ឬជាប្អូន នៅពេលនោះគាត់នឹងអាចធ្វើឱ្យគ្រប់ផ្នែកទាំងអស់ក្នុងក្រុមហ៊ុនក្លាយជាគ្រួសារធំមួយ ហើយភាពជាគ្នាឯងនេះហើយដែលធ្វើឱ្យបុគ្គលិកមានភាពកក់ក្តៅ និងព្យាយាមអភិវឌ្ឍការងារប្រសិទ្ធភាពឱ្យកាន់តែមានខ្លាំងឡើងដោយមិនរួញរា។ ពាក្យសម្តី កាយវិការ និងការយកចិត្តទុកដាក់របស់អ្នកគ្រប់គ្រងស្ថាប័នដែលចាត់ទុកបុគ្គលិកជាគ្រួសារតែមួយភាគច្រើនគឺបង្កប់នូវចេតនាល្អ ហើយអ្នកដឹកនាំនោះនឹងក្លាយជាអ្នកប្រឹក្សាដ៏ល្អដើម្បីធ្វើឱ្យជីវិតរបស់អ្នកនៅក្រោមឱវាទមានការរីកចម្រើន។

លោកជំទាវ តាំង ហ្គិចលៀង បាននិយាយថា៖ “ការអត់ឱន និងការជួយតម្រង់ទិស ជាចំណុចសំខាន់ដែលអ្នកដឹកនាំស្ថាប័នអាចជំរុញឱ្យបុគ្គលិកមានថាមពលកាន់តែខ្លាំងក្នុងការធ្វើការងារ ព្រោះគ្មានមនុស្សណាចូលចិត្តការស្តីបន្ទោសនោះទេ តែយើងអាចតម្រង់ទិស ហើយផ្តល់ឱកាសឱ្យគាត់ព្យាយាមកែតម្រូវ។ ភាគច្រើនពួកគាត់អាចកែតម្រូវបានល្អ តែប្រសិនបើគាត់នៅតែមិនយកចិត្តទុកដាក់នោះមានន័យថា គាត់ធ្វើឱ្យខាតបង់ខ្លួនឯង ហើយចេញទៅកន្លែងណាក៏មិនអាចលូតលាស់បានដែរ”។

អ្នកដឹកនាំក្រុមហ៊ុនខាងលើបានលើកឡើងផងដែរថា ក្រុមការងារត្រូវការការយកចិត្តទុកដាក់ទាំងអស់គ្នា តែបុគ្គលិកក្នុងក្រុមហ៊ុនមួយមានមនុស្សច្រើនណាស់ ហេតុនេះអ្នកគ្រប់គ្រង ឬដឹកនាំក្រុមហ៊ុនត្រូវចេះបណ្តុះក្តីស្រឡាញ់ និងចែករំលែករឿងល្អប្រកបដោយភាពឆ្លាតវៃ។ អ្នកដឹកនាំកំពូលមិនអាចទៅយកចិត្តទុកដាក់ដល់បុគ្គលិកទាំងអស់គ្រប់គ្នាបានទេ ហេតុនេះដើម្បីធានាថាយើងអាចធ្វើឱ្យបុគ្គលិកចូលរួមធ្វើការងារបានល្អទាំងអស់គ្នាដោយភាពកក់ក្តៅ គឺការបណ្តុះអ្នកបន្តវេន ឬបងៗដែលកាន់ផ្នែកសំខាន់ៗឱ្យយកចិត្តទុកដាក់ចំពោះអ្នកនៅក្រោមឱវាទបន្តបន្ទាប់ទៅទៀត។

លោកស្រី ចេន សុភាព ស្ថាបនិកសិប្បកម្ម កីតម្បាញខ្មែរ បានលើកឡើងថា មនុស្សគ្រប់គ្នាតែងតែនិយាយថាអតិថិជនជាស្តេច តែមុននឹងផលិតផល ឬសេវាកម្មដល់ដៃអតិថិជន បុគ្គលសំខាន់ដែលគួរយកចិត្តទុកដាក់គឺអ្នកផលិត។ មានន័យថា ដើម្បីធ្វើឱ្យផលិតកម្មអាចធ្វើទៅបានជោគជ័យ លុះត្រាតែបុគ្គលិក និងអ្នកចូលរួមក្នុងសកម្មភាពការងារនេះទទួលបានការអភិវឌ្ឍ ឬមានភាពរីកចម្រើនជាមុនសិន។ ការយកចិត្តទុកដាក់លើការដោះស្រាយបញ្ហាលំបាករបស់បុគ្គលិក និងការសម្រួលឱ្យមានការ-បណ្តុះបណ្តាល គឺជាវិធីដ៏សំខាន់ដែលធ្វើឱ្យបុគ្គលិកមានឱកាសអភិវឌ្ឍខ្លួនឯង ហើយថែមទាំងអាចធ្វើឱ្យការផលិតកាន់តែប្រសើរថែមទៀតផង។

លោកស្រី ចេន សុភាព បាននិយាយថា៖ “សម្រាប់អាជីវកម្មរបស់ខ្ញុំ ប្រាក់ចំណេញមិនមែនជារឿងអាទិភាពទី1 នោះទេ តែអ្វីដែលត្រូវគិតមុនគេគឺជំរុញឱ្យមានការយកចិត្តទុកដាក់ដល់ស្ត្រីតម្បាញនៅសហគមន៍។ នៅពេលយើងជួយគាត់ឱ្យមានទីផ្សារស្ត្រីតម្បាញអាចនឹងមានទំនុកចិត្តក្នុងការ-ផលិត ហើយគាត់អាចអភិវឌ្ឍជីវភាពបានកាន់តែប្រសើរ តាមរយៈការបង្កើនកម្រិតជីវភាព និងមិនបាច់ចំណាកស្រុកនាំឱ្យលំបាក ឬឆ្ងាយពីផ្ទះនោះឡើយ។ នៅពេលនោះគាត់នឹងអាចរីករាយក្នុងការអភិវឌ្ឍស្នាដៃឱ្យកាន់តែមានគុណភាព ហើយប្រាក់ចំណេញគឺដំណាក់កាលបន្ទាប់”។

លោកស្រី ចេន សុភាព បានលើកឡើងផងដែរថាការធ្វើអាជីវកម្ម អ្នកណាក៏ចង់ចំណេញដែរ តែចំណុចអាទិភាពគឺការរីកចម្រើនជាមួយគ្នា ទាំងបុគ្គលិក និងស្ថាប័ន។ នៅពេលអ្នកផលិតគាត់ផលិតបាន ផលិតល្អ នោះអ្នកលក់ ឬអ្នកចែកចាយ ក៏មានទំនុកចិត្តកាន់តែខ្ពស់ក្នុងការចែកចាយផលិតផលដែលមានគុណភាពទៅកាន់អតិថិជនដែរ ពេលនោះផលចំណេញនឹងមកតាមក្រោយ ព្រោះប្រសិនបើផលិតផលពិតជាមានគុណភាពល្អ ហើយប្រកបដោយភាពច្នៃប្រឌិត អតិថិជនក៏នឹងគាំទ្រទៅតាមនោះដែរ។ ម្យ៉ាងវិញទៀត ការធ្វើបែបនេះមិនមែនជារឿងងាយស្រួលពេកទេ តែប្រសិនបើយើងមានក្តីស្រឡាញ់ និងចង់ឱ្យមានការរីកចម្រើនពិតប្រាកដលើវិស័យដែលយើងកំពុងធ្វើនោះ យើងនឹងរីករាយជាមួយការអភិវឌ្ឍពីមួយដំណាក់ទៅមួយដំណាក់រហូតជម្នះបានឧបសគ្គជាច្រើនដើម្បីសម្រេចគោលដៅអាជីវកម្ម៕

October 19, 2018

ម្ចាស់កសិដ្ឋានម្នាក់កំពុងត្រូវប៉ាន់ខ្លាំងពីការលក់កូនដើមទុរេន

មជ្ឈដ្ឋានទូទៅទទួលស្គាល់ថា ទឹកដីក្នុងខេត្តនីមួយៗរបស់ប្រទេសកម្ពុជាសុទ្ធតែសម្បូរទៅដោយជីវជាតិ និងអំណោយផលពីធម្មជាតិសម្រាប់ដាំដុះដំណាំគ្រប់ប្រភេទ ប៉ុន្តែដោយសារតម្លៃទីផ្សារមិនសូវស្ថិតស្ថេរ ទើបធ្វើឱ្យដំណាំកសិផលមួយចំនួនមិនត្រូវបានកសិករដាំដុះ និងម្ចាស់ចម្ការមួយចំនួន បានស្វែងរកដំណាំណាដែលមានសក្តានុពលទីផ្សារក្នុងស្រុក និងនាំចេញខ្លាំងដើម្បីទទួលបានជោគជ័យក្នុងមុខរបរ និងទទួលបាននូវការគាំទ្រច្រើនពីប្រជាពលរដ្ឋផងដែរ។

ហេតុដូច្នេះហើយទើបក្រៅពីផ្លែឈើមួយចំនួនដែលពេញនិយម ដូចជាចេក ស្វាយ មៀន ជាដើមត្រូវបាននាំចេញទៅក្រៅប្រទេសហើយនោះ នៅមានផ្លែឈើជាច្រើនមុខទៀតក៏កំពុងត្រៀមខ្លួននាំចេញផងដែរ។ ដោយឡែក ទុរេនដែលជាដំណាំហូបផ្លែមួយដែរនោះកំពុងត្រូវបានកសិករជាច្រើន សម្រេចចិត្តដាំ ដោយសារតែដំណាំប្រភេទនេះងាយស្រួលរកទីផ្សារ ព្រោះផ្លែរបស់វាទទួលបានការពេញនិយមសម្រាប់ប្រជាពលរដ្ឋខ្មែរចូលចិត្តពិសា ដោយសាររសជាតិរបស់វាផ្អែមឆ្ងាញ់ និងក្រអូបខុសពីផ្លែឈើដទៃទៀត។

ដោយសារតែកសិករខ្មែរយើងជាច្រើនបានងាកមកដាំដំណាំទុរេនវិញនេះ ធ្វើឱ្យម្ចាស់កសិដ្ឋានបណ្ដុះកូនឈើដំណាំហូបផ្លែគ្រប់ប្រភេទម្នាក់នៅខេត្តបាត់ដំបងលក់កូនដើមទុរេនក្នុងរយៈពេលប៉ុន្មានខែកន្លងមកនេះទទួលបានប្រាក់កម្រៃក្នុង 1ខែខ្ទង់ម៉ឺនដុល្លារ។ លោក គួន ឌឿន នៅកសិដ្ឋានកសិកម្មភ្នំព្រឹកបានរៀបរាប់ប្រាប់កាសែត ឡារ៉ែនពាណិជ្ជថា មូលហេតុដែលកសិករខ្មែរចាប់អារម្មណ៍ងាកមកដាំដំណាំទុរេននេះ គឺដោយសារកត្តាតម្លៃទីផ្សារ ព្រោះថាផ្លែទុរេននេះពេញនិយមសម្រាប់ការបរិភោគរបស់ពលរដ្ឋទូទៅ ហើយតម្លៃវាមានលក្ខណៈល្អប្រសើរ ពុំមានការធ្លាក់ថ្លៃខ្លាំង ដូចផលិតផលកសិកម្មផ្សេងទៀត ដូច្នេះទើបពួកគាត់សម្រេចចិត្តដាំដំណាំទុរេនវិញម្ដង។

លោក គួន ឌឿនម្ចាស់កសិដ្ឋាន កសិកម្មភ្នំព្រឹក

អ្នកមានបទពិសោធខាងកសិកម្មរូបនេះបានរៀបរាប់ថា បច្ចុប្បន្ននៅស្រុកខ្មែរពុំទាន់មានការបណ្តុះពូជទុរេននៅឡើយទេ ព្រោះគ្រាប់ពូជបណ្តុះនៅស្រុកយើងធ្វើមិនបានល្អ។ ដូច្នោះហើយទើបយើងតែងនាំពូជពីថៃមកលក់ ដូចជាកសិដ្ឋានរបស់លោកក៏បាននាំពូជពីថៃមកលក់បន្តដែរ។ លោកបានបញ្ជាក់ថា សព្វថ្ងៃពូជទុរេនដែលនាំមកលក់មានតែ 2ប្រភេទទេដែលគេនិយមដាំ គឺពូជទុរេនថៃឈ្មោះម៉នថង និងពូជទុរេនម៉ាឡេស៊ីឈ្មោះ មូសាំឃីង។ ប្រភេទទុរេនទាំង2នេះនាំចូលមករាងធូរថ្លៃ គេនិយមដាំ ដែលយើងនាំចូលមកលក់បន្តក្នុងតម្លៃពី5$ ទៅ7$ក្នុងមួយដើម។

លោកបានឱ្យដឹងទៀតថា កាលពីប៉ុន្មានខែមុនកសិដ្ឋានលោកបានបណ្ដុះកូនចេកអំបូងលឿងលក់ទៅឱ្យក្រុមហ៊ុនចិនយកទៅដាំនៅឯកសិដ្ឋានធំៗជាច្រើននៅបណ្តាខេត្តមួយចំនួន ប៉ុន្តែមកដល់បច្ចុប្បន្ននេះលោកបាននាំចូលកូនដើមទុរេនមកលក់វិញម្ដង ដោយក្នុង 1ខែលោកអាចលក់បានយ៉ាងតិចបំផុតក៏ 1ម៉ឺន(10,000)ដើមដែរ។ ឯការចំណាយដើមទុនវិញគឺប្រមាណជា2 ទៅ3ម៉ឺនដុល្លារពេលទៅយកកូនពីថៃម្តងៗដែលរួមទាំងការដឹកជញ្ជូនផង(ក្នុង1ម៉ឺនដើម) ដូច្នេះបើគិតត្រឹមតែ 1ដើមចំណេញតែ1$នោះ ក្នុង1ខែគាត់អាចចំណេញបាន1ម៉ឺនដុល្លារដែរ។

លោក ឌឿន បានឱ្យដឹងទៀតថា ចំពោះខេត្តដែលបានទិញកូនដើមទុរេនពីលោកយកទៅដាំមានដូចជាខេត្តរតនគិរី មណ្ឌលគិរី កំពង់ចាម កំពង់ធំ កំពត ត្បូងឃ្មុំ និងសៀមរាបជាដើម ដែលកសិដ្ឋាននៅក្នុងបណ្តាខេត្តទាំងនោះមានចំនួនពី5 ទៅ10កសិដ្ឋាន ហើយក្នុងកសិដ្ឋាននីមួយៗមានពី10 ទៅ20ហិកតា ចំណែកការដឹកជញ្ជូន គឺលោកដឹកទៅដល់គោលដៅតែម្តងដោយទូទាត់តម្លៃតាមការចរចា។

លោកបានប្រាប់ថា ក្នុងការនាំចូលកូនដើមទុរេនពីថៃយកមកលក់នេះ គឺយើងបានបង្រៀនពីបច្ចេកទេសដាំដុះដល់កសិករដោយពុំបានឱ្យប្រើជីគីមីទេ គឺប្រើតែជីធម្មជាតិដោយមានអ្នកបច្ចេកទេសមកពីប្រទេសថៃមកពន្យល់ពីការដាំដុះ និងថែទាំ។ លោកបន្តថា ថ្វីដ្បិតតែទុរេនមិនងាយស្រួលដាំប៉ុន្មានមែន តែរយៈពេលតែ 4ឆ្នាំប៉ុណ្ណោះ ទុរេននឹងចាប់ផ្ដើមឱ្យផលហើយ។ លោកបន្ថែមថា ក្នុងរយៈពេលដែលទុរេនចាប់ផ្ដើមឱ្យផលដំបូងនេះ អ្នកដាំទទួលបានផលតិចតួចនៅឡើយទេ តែចាប់ពីឆ្នាំទី6ឡើងទៅទើបទុរេនចាប់ផ្ដើមឱ្យផលពេញទំហឹង ដោយក្នុង1ដើមបានប្រមាណជា100 ទៅ200គីឡូក្រាម ហើយវាក៏អាចកើនឡើងបន្ថែមទៀតដែរនៅពេលដើមកាន់តែចាស់ទៅ។

លោក ឌឿន បានឱ្យដឹងថា បើតាមម្ចាស់ចម្ការទុរេន1កន្លែងដែលមានផ្ទៃដីដាំដុះចំនួន 5ហិកតា ស្មើនឹងទុរេន 200ដើម ស្ថិតក្នុងភូមិជ្រី សង្កាត់យក្សឡោមក្រុងបានលុង ខេត្តរតនគិរីបានឱ្យដឹងថា បច្ចុប្បន្នចំពោះផ្ទៃដី 5ហិកតារបស់គាត់នេះ គាត់អាចរកប្រាក់ចំណូលបានប្រមាណជា 2ម៉ឺនដុល្លារសហរដ្ឋអាមេរិកក្នុង 1ឆ្នាំៗ ដោយលក់បានក្នុង 1គីឡូតម្លៃចន្លោះពី1ម៉ឺន7ពាន់រៀល ទៅ2ម៉ឺន2ពាន់រៀល។

លោកក៏បានអំពាវនាវដល់បងប្អូនប្រជាពលរដ្ឋខ្មែរទាំងអស់ផងដែរថា សុំឱ្យបន្តការគាំទ្រកសិផលធម្មជាតិរបស់កូនខ្មែរ ព្រោះថា ប្រជាកសិករយើងបានងាកមកចាប់ផ្ដើមដាំដំណាំទុរេនជាបន្តបន្ទាប់នៅក្នុងឆ្នាំ2018 នេះ បើទោះជាពូជនាំចូលពីប្រទេសជិតខាង និងកសិផលមានតម្លៃខ្ពស់ជាងបន្តិចបន្តួចបើធៀបជាមួយកសិផលនាំចូលពីប្រទេសជិតខាងក៏ដោយ៕

October 19, 2018

DeSilk Garden & Eatery ទីប្រជុំម្ហូបថៃឆ្ងាញ់ៗសម្រាប់យុវវ័យ

សម្រាប់យុវវ័យដែលនិយមចូលចិត្តបរិភោគអាហាររសជាតិហិរបែបថៃជាមួយកន្លែងទទួលទានអាហារដែលប្រកបដោយផាសុកភាព និងការតុបតែងរចនាដ៏ស្រស់ស្អាតនោះ ហាង DeSilk Garden & Eatery គឺជាហាងដែលយុវវ័យមិនគួររំលងឡើយ។

ក្នុងនោះ DeSilk Garden & Eatery គឺជាហាងដែលប្រមូលផ្តុំទៅដោយម្ហូបថៃរសជាតិដើមឆ្ងាញ់ៗជាច្រើនដែលចម្អិនដោយចុងភៅជំនាញជាជនជាតិថៃដោយផ្ទាល់ ហើយការចម្អិនត្រូវបានធ្វើឡើងយ៉ាងយកចិត្តទុកដាក់ និងផ្ចិតផ្ចង់យ៉ាងខ្លាំងចំពោះសុខភាពរបស់អ្នកបរិភោគ។ អ្វីដែលកាន់តែពិសេសទៅទៀតនោះគឺហាង DeSilk Garden & Eatery ក៏មានអាហារប្រភេទគ្រឿងសមុទ្រថ្មីស្រស់ៗផងដែរ។

លោកអ្នកអាចទទួលទានអាហារឆ្ងាញ់ៗប្រចាំហាង DeSilk Garden & Eatery មានដូចជា៖ បុកល្ហុងក្តាមប្រៃ ត្រីបំពងស្តាយល៍ថៃ បាយឆាម្រះព្រៅគ្រឿងសមុទ្រ និងស៊ុបជីមជុម ជាមួយស្រាក្រឡុកច្រើនរសជាតិទៀតផង។

លោកអ្នកអាចស្វែងរក DeSilk Garden & Eatery តាមរយៈអាសយដ្ឋានផ្ទះលេខ67 ផ្លូវ446 សង្កាត់ទួលទំពូង1 ខណ្ឌចំការមន រាជធានីភ្នំពេញ ឬតាមរយៈលេខទូរស័ព្ទ 017 939 789៕

October 19, 2018

តបបញ្ហាសុខភាពគូស្នេហ៍: ពិនិត្យសុខភាពមុនរៀបការ ត្រូវពិនិត្យអ្វីខ្លះ?

ការពិនិត្យសុខភាពរាងកាយមុនរៀបការ ជារឿងដែលគូស្នេហ៍ទាំងឡាយគួរធ្វើមុននឹងសម្រេចចិត្តរស់នៅជាមួយគ្នាជាជីវិតគូ ឬរៀបការ ឬការសាងក្រុមគ្រួសារជាមួយគ្នាយ៉ាងពិតប្រាកដ។ ដោយសារតែម្នាក់ៗធ្លាប់តែរស់នៅតាមបែបរបស់ខ្លួនឯងរៀងៗខ្លួននោះ ការពិនិត្យសុខភាពរាងកាយមុនរៀបការ នឹងបញ្ជាក់ប្រាប់ពីសុខភាពរបស់អ្នកទាំងពីរ រួមទាំងភាពរឹងប៉ឹង និងភាពត្រៀមជាស្រេចក្នុងការមានបុត្រផងដែរ។

ចំណុចល្អរបស់ការពិនិត្យសុខភាពរាងកាយមុនរៀបការ
1. បង្ហាញពីភាពស្មោះស្ម័គ្រចំពោះគ្នាទៅវិញទៅមក
ដោយសារការព្រមទៅពិនិត្យសុខភាពជាការបង្ហាញប្រាប់ពីសេចក្ដីស្រឡាញ់ដែលមានចំពោះគ្នា និងសម្ដែងឱ្យឃើញថា អ្នកត្រៀមខ្លួនជាស្រេចក្នុងការពិនិត្យសុខភាពដើម្បីរូបគេ(ឬនាង) ហើយបើសិនជារកឃើញជំងឺ ឬរោគណាមួយដែលអាចឆ្លងរាលដាលទៅដល់គេ(ឬនាង) ឬកូន ក៏យើងត្រៀមខ្លួនជាស្រេចក្នុងការទទួលយកការព្យាបាល ដើម្បីការពារទុកជាមុនដែរ។

2. ត្រៀមខ្លួនជាស្រេចសម្រាប់ការសាងក្រុមគ្រួសារ
ជាការពិនិត្យដើម្បីរកមើលថា តើគូស្នេហ៍របស់អ្នកមានជំងឺឆ្លងដែលនឹងបង្កគ្រោះថ្នាក់ដល់ការតាំងគភ៌ឬទេ? ដើម្បីនឹងបានព្យាបាលជាមុន ព្រោះរូបអ្នកខ្លួនឯងក៏ប្រហែលជាចង់ឃើញកូនតូចកើតមកព្រមជាមួយសុខភាពរាងកាយដែលរឹងមាំ និងល្អឥតខ្ចោះបំផុតដែរ។

តើគ្រូពេទ្យនឹងពិនិត្យអ្វីខ្លះ?
នៅពេលយល់ព្រមទៅជួបគ្រូពេទ្យជាមួយគ្នាហើយ ក្រៅពីគ្រូពេទ្យនឹងពិនិត្យរាងកាយជាទូទៅហើយ ពេទ្យអាចនឹងពិនិត្យឈាម ដើម្បីរកមើលភាពខុសប្រក្រតីណាមួយដែលអាចនឹងបង្កប់នៅក្នុងនោះ ដូចជា៖

1. ក្រុមឈាម : ដើម្បីឱ្យដឹងថា ជាឈាមក្រុម A, B, AB ឬ O។

2. ភាពខាប់របស់គ្រាប់ឈាមក្រហម : ដើម្បីរកមើលថា តើមានលោហិតស្លេកឬទេ? បើសិនមានសភាវលោហិតស្លេក គ្រូពេទ្យនឹងធ្វើការពិនិត្យរកមើលមូលហេតុជាបន្ត។

3. ស៊ីហ្វ៊ីលីស ឬដែលនិយមហៅថា រោគស្វាយ :
ជាជំងឺកាមរោគមួយប្រភេទ។ អាចមិនដែលមានចេញអាការអ្វីប្លែកមែន តែអាចពិនិត្យឃើញដោយការពិនត្យឈាម។

4. រើម : ជំងឺនេះជួនកើត ជួនបាត់ និងមិនទាន់មានថ្នាំណាមួយអាចព្យាបាលរោគរើមដែលបង្កដោយមេរោគវីរុសឱ្យជាដាច់បាននៅឡើយ។

5. វីរុសរលាកថ្លើម B : បើរកឃើញថា មានមេរោគរលាកថ្លើម B ក៏នឹងបានមើលថែទាំខ្លួនឯង និងការពារមិនឱ្យឆ្លងរាលដាល។

6. មេរោគវីរុសអេដស៍ : សម្រាប់ការពិនិត្យរកមេរោគអេដស៍នេះ ស្រេចលើការស្ម័គ្រចិត្តរបស់អនាគតគូស្វាមីភរិយាថា តើត្រូវការពិនិត្យឬទេ? តែអ្នកដែលដឹងខ្លួនថា ស្ថិតក្នុងក្រុមប្រថុយប្រថាន (ស្ត្រីមានអាជីពពិសេស ពួកស្រឡាញ់ភេទដូចគ្នា) ក៏គួរពិនិត្យទុកឱ្យហើយប្រសើរជាងនោះក៏ដោយសារតែមនុស្សគ្រប់រូបដឹងច្បាស់ហើយថា មច្ចុរាជដែលមានឈ្មោះថា “អេដស៍” នេះគួរឱ្យភ័យខ្លាចប៉ុនណា ហើយការរួមភេទរួមឈាមជាមួយអ្នកដែលផ្ទុកមេរោគអេដស៍នេះ អ្នកមានឱកាសក្លាយជា “សមាជិកថ្មី” របស់ពួកគេយ៉ាងប្រាកដ។

ពេលអានចប់ហើយ កុំអាលខ្លាចការរៀបការអី ព្រោះការស្គាល់ពីជំងឺ ស្គាល់ការការពារ ក៏ប្រៀបដូចជាមានប្រព័ន្ធការពារជំងឺដែលធ្វើឱ្យយើងមានសុខភាពល្អដូច្នោះដែរ ទោះជាជំងឺឆ្លងតាមការមានភេទសម្ព័ន្ធប្រភេទខ្លះនៅមិនទាន់មានថ្នាំព្យាបាលឱ្យជាដាច់ ឬមានវ៉ាក់សាំងដែលអាចការពារបាននៅឡើយក្ដី តែក៏នៅមានវិធីផ្សេងអាចជួយបានដែរបើបានដឹងមុនដោយការពិនិត្យសុខភាពរាងកាយមុនរៀបការ។ ទាំងអស់នេះគឺដើម្បីមិនឱ្យរោគឆ្លងរាលដាលទៅស្វាមី ឬភរិយា ឬកូនតូចក្នុងគភ៌តាមរយៈឈាមហ្នឹងឯង៕

October 18, 2018

ភាពប៉ិនប្រសប់មិនស្តែងចេញត្រឹមពិន្ទុក្នុងសាលានោះទេ

មនុស្សពូកែមិនប្រាកដថាមានភាពប៉ិនប្រសប់នោះទេ ហេតុនេះហើយទើបសិស្សពូកែមួយចំនួនតូចបែរជាមិនសូវទទួលបានលទ្ធផលល្អក្នុងការធ្វើការងារទៅវិញ ហើយសិស្សមធ្យមក្នុងថ្នាក់បែរជាអាចទទួលបានលទ្ធផលការងារល្អជាងក៏មាន ព្រោះអ្នកខ្លះមានតែចំណេះដឹងក្នុងសាលា តែខ្វះភាព-ប៉ិនប្រសប់ក្នុងការងារជាក់ស្តែង។

ឯកឧត្តមបណ្ឌិតសភាចារ្យ ហង់ ជួនណារ៉ុន រដ្ឋមន្ត្រីក្រសួងអប់រំ យុវជន និងកីឡា បានលើកឡើងថា ចំណេះដឹងសម្រាប់ធ្វើការងារពិតប្រាកដ មិនមែនមានតែមុខវិជ្ជាដែលសិក្សាពីក្នុងសាលាទាំងស្រុងនោះទេ តែវាត្រូវការធាតុផ្សំជាច្រើនផ្សេងទៀតដែលកើតចេញពីបទពិសោធ និងភាពច្នៃប្រឌិតរបស់មនុស្ស។ នៅពេលយើងធ្វើការងារ មិនមែនចាំបាច់ត្រូវប្រើតែជំនាញមួយមុខនោះទេ តែត្រូវការភាពប៉ិនប្រសប់ក្នុងការសម្របសម្រួល ដើម្បីធានាថាក្រុមការងារអាចយល់ពីគ្នា មានសមត្ថភាពក្នុងការទំនាក់ទំនងបានល្អ មានសមត្ថភាពដើម្បីធ្វើបទបង្ហាញ និងរិះរកគំនិតឆ្លាតវៃដើម្បីជំរុញឱ្យការងារកាន់តែធ្វើបានលឿន និងមានប្រសិទ្ធភាពខ្ពស់ឡើង។ ក្រៅពីនេះ បុគ្គលិកដែលមានគុណភាពខ្ពស់ ហើយជាសេចក្តីត្រូវការរបស់ក្រុមហ៊ុនធំៗ ចាំបាច់ត្រូវតែជាអ្នកដែលមានភាពជាអ្នកដឹកនាំខ្ពស់ ដែលអាចប្រើប្រាស់បានទាំងជំនាញនៅក្នុងសាលា និងជំនាញនៅក្រៅសាលាដើម្បីធ្វើយ៉ាងណាឱ្យវាមានភាពរលូនដើម្បីអភិវឌ្ឍដល់ស្ថាប័នទាំងមូល។

ឯកឧត្តម ហង់ ជួនណារ៉ុន បានមានប្រសាសន៍ថា៖ “និស្សិត ឬធនធានមនុស្សដែលមានសមត្ថភាពធ្វើការងារ អាចអនុវត្តបានទៅតាមកម្រិតជាក់ស្តែង។ មានអ្នកខ្លះដាក់ការងារ10ធ្វើបានតែ8 ឬតិចជាងនេះទៅទៀត ហើយអ្នកខ្លះទៀតដាក់ការងារឱ្យ10ធ្វើបានតែ10គត់ មានន័យថា គាត់មិនអាចចេញពីខ្សែបន្ទាត់ដែលគេកំណត់ស្រេចនោះទេ តែចំពោះអ្នកដែលមានភាពជាអ្នកដឹកនាំខ្ពស់ គាត់អាចចេញពីតំបន់ដែលគេកំណត់ស្រេច ហើយធ្វើការងារក្នុងវិសាលភាពកាន់តែទូលាយឡើង។ អ្នកខ្លះគេដាក់មក10 គាត់អាចធ្វើបានច្រើនជាងនេះ ឬធ្វើបានល្អលើសពីអ្វីដែលអ្នកគ្រប់គ្រងរំពឹងទុកទៅទៀត”។

រដ្ឋមន្ត្រីក្រសួងអប់រំ បានលើកឡើងផងដែរថាពិន្ទុនៅក្នុងសាលា ឬការសិក្សានៅក្នុងសាលា គ្រាន់តែជាមូលដ្ឋានគ្រឹះ ឬក្បួនខ្នាតដើម្បីធ្វើការងារឱ្យបានត្រឹមត្រូវប៉ុណ្ណោះ តែការអភិវឌ្ឍ ឬធ្វើការងារនោះល្អកម្រិតណា អាស្រ័យលើវិធីសាស្ត្រផ្ទាល់ខ្លួនរបស់បុគ្គលនោះ។ ចំណេះដឹងដែលអាចធ្វើឱ្យពួកគាត់មានសមត្ថភាពក្នុងការធ្វើការងារខ្លាំងជាងគេ អាចកើតចេញពីការស្វះស្វែងព្យាយាមស្វែងយល់បន្ថែមផ្ទាល់ខ្លួន បូករួមទាំងភាពឆ្លាតវៃក្នុងការសង្កេតពីអ្វីដែលមានស្រាប់ហើយបំបែកឱ្យទៅជាក្បួន ឬវិធីឆ្លាតវៃនានា។ នៅប្រទេសអភិវឌ្ឍន៍ខ្លះ សិស្ស-និស្សិតគេខិតខំប្រឹងប្រែងយកក្បួនខ្នាតដែលមានស្រាប់ទៅស្រាវជ្រាវបន្តដើម្បីធ្វើយ៉ាងណាបង្កើតជាសមិទ្ធផល ឬវិធីសាស្រ្តថ្មីៗបន្ថែមទៀត ហើយចំណុចនេះក៏ជាអ្វីដែលយើងចង់ជំរុញឱ្យសិស្ស-និស្សិតកម្ពុជាខិតខំប្រឹងប្រែងផងដែរ។

លោកសាស្ត្រាចារ្យ សុខ ខុម ព្រឹទ្ធបុរសមហាវិទ្យាល័យវិស្វកម្ម និងស្ថាបត្យកម្មនៃសាកលវិទ្យាល័យបៀលប្រាយ បានលើកឡើងថា ការសិក្សាចាំបាច់ត្រូវតែមានការអនុវត្តផ្ទាល់ឱ្យបានច្រើន ព្រោះបើសិនជាមិនអនុវត្តផ្ទាល់ទេ និស្សិតនឹងមិនមានឱកាសច្រើនដើម្បីបង្ហាញស្នាដៃពិតប្រាកដពីការសិក្សានៅក្នុងថ្នាក់នោះទេ។ ម្យ៉ាងវិញទៀត និស្សិតក៏គួរតែជាអ្នកដែលព្យាយាមស្វែងយល់ សង្កេត និងប្រមូលព័ត៌មានឱ្យបានច្រើនទាក់ទងនឹងជំនាញរបស់ខ្លួនព្រោះពិភពលោកមានការប្រែប្រួល ហេតុនេះនៅពេលដែលយើងមានព័ត៌មានច្រើន យើងអាចនឹងក្លាយជាមនុស្សដែលមានសមត្ថភាពខ្លាំងជាងគេ ហើយក៏អាចប្រើប្រាស់វាក្នុងការប្រកួតប្រជែងក្នុងទីផ្សារការងារផងដែរ។

សាស្ត្រាចារ្យ សុខ ខុម បានមានប្រសាសន៍ថា៖ “ការធ្វើការងារដែលពាក់ព័ន្ធនឹងជំនាញរបស់ខ្លួនក្នុងពេលកំពុងសិក្សាអាចជាវិធីល្អមួយជំរុញឱ្យនិស្សិតកាន់តែមានភាពសមត្ថភាព និងឱកាសអនុវត្តផ្ទាល់ចំពោះអ្វីដែលខ្លួនបានរៀន។ និស្សិតខ្លះឆ្នាំទី3 ឬឆ្នាំទី4 គាត់ចាប់ផ្តើមចេញធ្វើការងារដើម្បីរកចំណូលខ្លួនឯងផង និងដើម្បីកសាងបទពិសោធជាក់ស្តែងផង។ វិធីនេះអាចធ្វើឱ្យគាត់ចំណេញទាំងថវិកាសម្រាប់ការសិក្សា និងចំណេះដឹងសម្រាប់អាជីពផ្ទាល់ខ្លួន”។

អ្នកជំនាញអប់រំខាងលើបានលើកឡើងផងដែរថា ការសិក្សានៅមហាវិទ្យាល័យ ឬការសិក្សាដើម្បីទទួលបានការងារពិតប្រាកដ ត្រូវការការតស៊ូ និងការយកចិត្តទុកដាក់។ ហេតុនេះអ្នកដែលមានភាព-ឆ្លាតវៃពិតប្រាកដ គឺជាអ្នកដែលយល់ពីការខិតខំប្រឹងប្រែងដើម្បីអាជីពការងារ មិនមែនគ្រាន់តែរៀនដើម្បីឱ្យបានពិន្ទុល្អក្នុងថ្នាក់នោះទេ។ ម្យ៉ាងវិញទៀត ប្រសិនបើយើងមានសមត្ថភាពគ្រប់គ្រាន់ហើយ ស្គាល់ពិភពការងារបានល្អ និងមានភាពឆ្លាតវៃក្នុងការយល់ពីអតិថិជនហើយ យើងនឹងអាចក្លាយជាអ្នកជំនាញដែលគេត្រូវការ៕

October 18, 2018

កត្តាអ្វីខ្លះដែលធ្វើឱ្យបរទេសបណ្តាក់ទុនវិនិយោគនៅកម្ពុជាកាន់តែច្រើន?

រយៈពេលជាង 2ទសវត្សរ៍ចុងក្រោយនេះ គេសង្កេតឃើញថា វិនិយោគិនបរទេសបានចូលមកបណ្តាក់ទុនរកស៊ីនៅកម្ពុជាកាន់តែច្រើនឡើងៗដែលនេះជាចលករដ៏សំខាន់មួយក្នុងការរុញច្រានកំណើនសេដ្ឋកិច្ចកម្ពុជាឱ្យកាន់តែរឹងមាំឡើងបន្ថែមទៀតពីមួយឆ្នាំទៅមួយឆ្នាំ។ សួរថា តើមានកត្តាអ្វីខ្លះបានជាបរទេសសម្រេចចូលមកបណ្តាក់ទុនរកស៊ីនៅកម្ពុជាកាន់តែច្រើនឡើងៗដូច្នេះ?

បើគេក្រឡេកមើលពីទីតាំងភូមិសាស្ត្រ កម្ពុជាស្ថិតនៅលើទីតាំងមួយដ៏ល្អក្នុងតំបន់អាស៊ានដែលមានភាពអំណោយផលក្នុងការសាងសង់រោងចក្រសហគ្រាសសម្រាប់ផលិតទំនិញនានាដើម្បីនាំចេញទៅលក់នៅទីផ្សារក្នុងតំបន់ និងនៅសហគមន៍អន្តរជាតិនានា។ ការផលិតទំនិញនៅកម្ពុជាមិនមែនសម្រាប់តែផ្គត់ផ្គង់ក្នុងទីផ្សាកម្ពុជាដែលមានប្រជាជនប្រមាណតែជាង 15លាននាក់នេះប៉ុណ្ណោះទេគឺសម្រាប់ការនាំចេញទៅលក់នៅប្រទេសក្នុងអនុតំបន់ទន្លេមេគង្គដែលមានប្រជាជនប្រមាណជា 250លាននាក់ និងលក់នៅលើទីផ្សារអាស៊ានដែលមានប្រជាជនជាង 630លាននាក់ និងទីផ្សារអឺរ៉ុបដែលមានប្រជាជនជាង740លាននាក់ដែលកំពុងក្លាយជាសក្តានុពលទីផ្សារដ៏ខ្លាំងមួយ ដោយសារកម្ពុជានៅតែទទួលបានកូតានាំទំនិញទៅកាន់អឺរ៉ុបដោយមិនគិតពន្ធ។

ចំណែកកម្លាំងពលកម្មវិញ កម្ពុជាមានមនុស្សវ័យក្មេងក្រោមអាយុ 35ឆ្នាំ ប្រមាណជា 72ភាគរយដែលអាចបំពេញការងារពលកម្មបានច្រើន ងាយស្រួលក្នុងការរើសបុគ្គលិក-កម្មករចូលធ្វើការដែលមានប្រាក់បៀវត្សរ៍កម្រិតមធ្យម បើប្រៀបធៀបជាមួយបណ្តាប្រទេសមួយចំនួនទៀតនៅក្នុងតំបន់អាស៊ី។ ជាមួយគ្នានេះ រដ្ឋាភិបាលកម្ពុជាបាន និងកំពុងប្រឹងប្រែងកែប្រែកម្លាំងពលកម្មសុទ្ធសាធទៅជាកម្លាំងពលកម្មជំនាញ ជាគោលដៅយុទ្ធសាស្រ្តក្នុងការ-បំពេញការងារបានល្អ និងលឿនជាងមុន អាចកាត់-បន្ថយការចំណាយលើពលកម្ម បានមួយចំណែកផងដែរ។ ជាមួយគ្នានេះកម្ពុជាក៏បានប្រឹងប្រែងអភិវឌ្ឍធនធានមនុស្សឱ្យកាន់តែពូកែខ្លាំងឡើង ពិសេសចំណេះដឹងផ្នែកបច្ចេកទេសក្នុងយុគសម័យបច្ចេកវិទ្យា ដើម្បីសម្រួលដល់ការងារមួយចំនួនឱ្យកាន់-តែមានប្រសិទ្ធភាព និងប្រសិទ្ធផលច្រើនឡើង។

ក្រៅតែពីចំណុច 2ខាងលើ កម្ពុជាបាន និងកំពុងអភិវឌ្ឍហេដ្ឋារចនាសម្ព័ន្ធតាមរយៈការបង្កើតផ្លូវល្បឿនលឿន ប្រព័ន្ធផ្លូវរថភ្លើងតភ្ជាប់ពីខេត្តមួយទៅខេត្តមួយ ដូចជាផ្លូវដឹកជញ្ជូនពីភ្នំពេញឆ្ពោះទៅខេត្តមាត់សមុទ្រដែលមានកំពង់ផែទឹកជ្រៅ និងខេត្តជាប់ព្រំដែនប្រទេសជិតខាងដែលមានសក្តានុពលសេដ្ឋកិច្ចមួយចំនួនទៀត ដើម្បីសម្រួលដល់ការធ្វើដំណើររបស់ប្រជាជន និងការដឹកជញ្ជូនទំនិញបានលឿន កាត់បន្ថយពេលវេលា និងកាត់បន្ថយការចំណាយថ្លៃដឹកជញ្ជូនទៀតផង។

អ្វីដែលសំខាន់នោះ កម្ពុជាបានបើកចំហសេដ្ឋកិច្ចរបស់ខ្លួនសម្រាប់អ្នកវិនិយោគទាំងអស់ ដោយសមភាពរវាងអ្នកវិនិយោគកម្ពុជា និងអ្នកវិនិយោគបរទេស។ ការបើកចំហគ្រប់វិស័យដែលរួមមានទាំងវិស័យធនាគារ វិស័យធានារ៉ាប់រង និងវិស័យទូរគមនាគមន៍ ដែលជាទូទៅប្រទេសជាច្រើននៅក្នុងពិភពលោកមិនអនុញ្ញាតឱ្យវិនិយោគិនបរទេសវិនិយោគ 100% ដោយគ្មានការចូលរួមពីសំណាក់អ្នកវិនិយោគក្នុងស្រុកលើវិស័យទាំងនោះឡើយ។ កម្ពុជានៅមានសក្តានុពលយ៉ាងច្រើនក្នុងការអភិវឌ្ឍវិស័យហិរញ្ញវត្ថុ រួមមានការបន្តបង្កើនភាពស៊ីជម្រៅនៃអន្តរការី-កម្មហិរញ្ញវត្ថុ ការលើកកម្ពស់វិស័យធានារ៉ាប់រង និងការអភិវឌ្ឍទីផ្សារមូលបត្រ។

យ៉ាងណាក៏ដោយ តម្លៃភ្លើងអគ្គិសនី និងកត្តាច្បាប់ដែលនៅមិនទាន់រឹងមាំនៅឡើយនោះ គឺជាកត្តារារាំងខ្លះៗដល់ការធ្វើវិនិយោគពីក្រៅប្រទេសនេះដែរ ពិសេសប៉ះពាល់ដល់សហគ្រាសខ្នាតតូច និងមធ្យមដែលពួកគាត់ជួបការលំបាក បាត់បង់ប្រាក់ចំណេញមួយចំនួន ដោយសារតែតម្លៃអគ្គិសនីនៅកម្ពុជាមានតម្លៃខ្ពស់ជាងប្រទេសជិតខាង ដូចជាប្រទេសថៃ និងប្រទេសវៀតណាម ជាដើម។ តែទោះជាយ៉ាងណា កម្ពុជាកំពុងសាងសង់ទំនប់វារីអគ្គិសនីដោយខ្លួនឯង ដែលគេរំពឹងថា តម្លៃភ្លើងអគ្គិសនីនឹងអាចចុះថោកដូចប្រទេសជិតខាង ដែលធ្វើឱ្យចំនួនវិនិយោគិនបរទេសនឹងចូលមកបណ្តាក់ទុនរកស៊ីនៅកម្ពុជាកាន់តែច្រើនឡើង។ បច្ចុប្បន្ន វិនិយោគិនចិនឈរលំដាប់លេខរៀងនាំមុខគេ ឯវិនិយោគិនជប៉ុនក៏កំពុងសម្លឹងឃើញ និងចូលមកដាក់ទុនវិនិយោគនៅកម្ពុជាកាន់តែច្រើនឡើងជាបណ្ដើរៗផងដែរ។ ជាមួយគ្នានេះ ពាណិជ្ជករអឺរ៉ុបក៏មកបណ្តាក់ទុនច្រើនដែរ ដែលបច្ចុប្បន្ននេះមានក្រុមហ៊ុនមកពីអឺរ៉ុបកំពុងវិនិយោគប្រមាណ 52គម្រោងដែលមានទឹកប្រាក់សរុបចំនួន 1.1ប៊ីលានដុល្លារ ក្នុងនោះការវិនិយោគក្នុងវិស័យឧស្សាហកម្ម និងកម្មន្តសាលចំនួន274លានដុល្លារ។

គូរបញ្ជាក់ថា នៅឆមាសទី1 ឆ្នាំ2018នេះ ក្រុមប្រឹក្សាអភិវឌ្ឍន៍កម្ពុជាបានអនុម័តគម្រោងវិនិយោគសរុបចំនួន 106គម្រោង ដែលក្នុងនោះមានគម្រោងថ្មីចំនួន97 និងគម្រោងពង្រីកផលិតកម្មចំនួន9 មានទុនវិនិយោគសរុបនៃគម្រោងដែលត្រូវបានអនុម័តទាំងនោះមានចំនួនប្រមាណជា 3,500លានដុល្លារអាមេរិក ដែលអាចបង្កើតការងារបានចំនួនប្រមាណជិត 10ម៉ឺនកន្លែងឯណោះ។

បើគេធ្វើការប្រៀបធៀបឆមាសទី1 ឆ្នាំ2018 និងរយៈពេលដូចគ្នាកាលពីឆ្នាំ2017 កម្ពុជាមានការកើនឡើងចំនួន 19គម្រោង ខណៈដែលទំហំទុនវិនិយោគមានការកើនឡើងចំនួន 14% ជាពិសេសការវិនិយោគលើវិស័យកសិកម្ម និងកសិ-ឧស្សាហកម្មមានការកើនឡើងខ្លាំងរហូតដល់ទៅ77%។ ការវិនិយោគក្នុងវិស័យឧស្សាហកម្ម និងកម្មន្តសាលមានការកើនទ្បើង22% ដែលក្នុងនោះគម្រោងរោងចក្រកាត់ដេរសម្លៀកបំពាក់មានការកើនទ្បើងចំនួន8គម្រោង ពី15គម្រោងក្នុងឆមាសទី1 ឆ្នាំ2017 មក23គម្រោងក្នុងឆមាសទី1 ឆ្នាំ2018។ យោងតាមការព្យាកររបស់មូលនិធិរូបិយវត្ថុអន្តរជាតិ(IMF) បានឱ្យដឹងថា សេដ្ឋកិច្ចរបស់កម្ពុជានឹងមានកំណើនក្នុងអត្រា 7.25%ក្នុងឆ្នាំ2018នេះ ដែលអត្រាកំណើននេះនឹងរក្សាបានក្នុងឆ្នាំខាងមុខបន្តទៀត៕

October 18, 2018

សហភាពអឺរ៉ុបនៅតែជាដៃគូសេដ្ឋកិច្ចដ៏សំខាន់របស់ប្រទេសកម្ពុជា

សហភាពអឺរ៉ុបគឺជាដៃគូសេដ្ឋកិច្ចដ៏សំខាន់មួយសម្រាប់ប្រទេសកម្ពុជាដែលមានការនាំចេញនូវផលិតផលសម្លៀកបំពាក់ និងស្បែកជើងចូលទៅកាន់ទីផ្សារអឺរ៉ុបដែលជាប្រភពចំណូលដ៏ធំបំផុត និងជាធាតុផ្សំដ៏សំខាន់នៃកំណើនដ៏ខ្លាំងក្លារបស់កម្ពុជានៅក្នុងប៉ុន្មានឆ្នាំថ្មីៗនេះ។

លោក George Edgar ឯកអគ្គរដ្ឋទូតសហភាពអឺរ៉ុបបានថ្លែងថា៖“ទំនាក់ទំនងសេដ្ឋកិច្ចដ៏រឹងមាំជាមួយសហភាពអឺរ៉ុបបានធ្វើឱ្យប្រទេសកម្ពុជាមានការរីកចម្រើនយ៉ាងឆាប់រហ័ស”។ ការផ្លាស់ប្តូរសេដ្ឋកិច្ចគឺជាកត្តាជំរុញនូវកំណើន។ ពាណិជ្ជករសហភាពអឺរ៉ុបបានបង្កើតការងារនៅកម្ពុជា ដោយពួកគេមានទស្សនវិស័យយូរអង្វែងក្នុងការជំរុញការច្នៃប្រឌិត និងលើកកម្ពស់ការអនុវត្តច្បាប់សង្គម និងការគិតគូរខ្ពស់ដល់បរិស្ថាន។

លោកបានបញ្ជាក់ថា៖ អាជីវកម្មរបស់សហភាពអឺរ៉ុប គឺជាដៃគូរឹងមាំ និងអាចទុកចិត្តបានសម្រាប់ប្រទេសកម្ពុជា “ការចូលទៅកាន់ទីផ្សារអឺរ៉ុបបានជំរុញឱ្យមានការរីកចម្រើនយ៉ាងឆាប់រហ័សនៃឧស្សាហកម្មនាំចេញរបស់កម្ពុជា ជាពិសេសសម្លៀកបំពាក់ និងស្បែកជើង”។ លោក Edgar បាននិយាយថា ជាមួយគ្នានេះដែរការនាំចេញរបស់កម្ពុជាទៅកាន់សហភាពអឺរ៉ុបបានកើនឡើងយ៉ាងឆាប់រហ័ស។ ការចូលទៅកាន់គម្រោងអ្វីៗទាំងអស់ក្រៅពីអាវុធ EBA (Everything-but-arms) បានអនុញ្ញាតឱ្យប្រទេសកម្ពុជាទទួលបានអត្ថប្រយោជន៍ប្រកួតប្រជែងកំណើនសេដ្ឋកិច្ច និងបង្កើតការងារ។

លោក ថាស៊ីឡូ ប្រ៊ីនហ្សើ (Tassilo Brinzer) អនុប្រធានសភាពាណិជ្ជកម្មអឺរ៉ុបប្រចាំនៅប្រទេសកម្ពុជាបានលើកឡើងថា ក្រុមហ៊ុនអឺរ៉ុបបានបង្កើតការងារជាច្រើននៅក្នុងព្រះរាជាណាចក្រកម្ពុជា និងផ្តល់ប្រាក់ខែល្អ “បរិយាកាសអាជីវកម្មនៅទីនេះគឺល្អ ដូច្នេះយើងកំពុងព្យាយាមទាក់ទាញការវិនិយោគនៅអឺរ៉ុបកាន់តែច្រើននៅក្នុងប្រទេស”។ លោកបានបន្ថែមថា មានប្រហែលជា 500ក្រុមហ៊ុនមកពីសហភាពអឺរ៉ុបកំពុងតែមានវត្តមាននៅកម្ពុជា។ ជារៀងរាល់ឆ្នាំ សហភាពអឺរ៉ុបតែងតែចង់ឱ្យមានការឆ្លើយតបពីបញ្ហាដែលជួយសម្រួលដល់ការធ្វើពាណិជ្ជកម្មនៅកម្ពុជា ដូចជាបញ្ហាអភិបាលកិច្ច បញ្ហាបរិស្ថាន ព្រមទាំងលក្ខខណ្ឌការងារល្អផងដែរ។

លោក ថាស៊ីឡូ បាននិយាយថា កម្ពុជាជាប្រទេសមានកំណើនសេដ្ឋកិច្ចល្អមួយក្នុងចំណោមបណ្ដាប្រទេសដទៃទៀតក្នុងតំបន់។ ក៏ប៉ុន្តែជាមួយនឹងការលូតលាស់សេដ្ឋកិច្ចយ៉ាងឆាប់រហ័សនេះ រដ្ឋាភិបាលគួរគិតគូរបន្ថែមទៀតលើបរិយាកាសធុរកិច្ចសម្រាប់ដៃគូវិនិយោគ។ ក្នុងនោះការបើកប្រាក់-បំណាច់អតីតភាពការងារ 2ដងក្នុងមួយឆ្នាំ ក៏ជាការលំបាកដល់អ្នកវិនិយោគដែរ។

យ៉ាងណាក៏ដោយ សភាពាណិជ្ជកម្មអឺរ៉ុបដែលជាតំណាងក្រុមហ៊ុនរបស់អឺរ៉ុបបានបញ្ជាក់ថា ខ្លួនបាន និងកំពុងគាំទ្រលើការតាក់តែងគោលនយោបាយរបស់រដ្ឋាភិបាលកម្ពុជា ដើម្បីសម្របសម្រួលដល់ការវិនិយោគឱ្យកាន់តែល្អប្រសើរ។ នេះមិនមែនសម្រាប់តែការវិនិយោគពីអឺរ៉ុបទេ តែសម្រាប់ទាក់ទាញការបណ្ដាក់ទុនពីគ្រប់វិនិយោគិនបរទេស រួមទាំងក្រុមហ៊ុនក្នុងស្រុកផងដែរ។

ជាការកត់សម្គាល់ ប្រជាពលរដ្ឋកម្ពុជាភាគច្រើនស្គាល់សហភាពអឺរ៉ុបត្រឹមតែជាសហគមន៍ ដែលផ្ដល់ជំនួយធំជាងគេបង្អស់ និងជាទីផ្សារនាំចូលផលិតផលដ៏ចម្បងរបស់កម្ពុជាប៉ុណ្ណោះ ក៏ប៉ុន្តែលើសពីម្ចាស់ជំនួយអភិវឌ្ឍន៍ និងជាទីផ្សារនាំចូលផលិតផលប្រមាណ 45%របស់កម្ពុជា អឺរ៉ុបក៏ជាដៃគូវិនិយោគលំដាប់ទី3 នៅប្រទេសកម្ពុជា បន្ទាប់ពីចិន និងកូរ៉េដែរ។

សូមបញ្ជាក់ថា សហភាពអឺរ៉ុបគឺជាគោលដៅនាំចេញនាំមុខគេរបស់កម្ពុជាដែលមានចំនួន 40%នៃការនាំចេញសរុប។ ទាំងនេះបានកើនឡើងយ៉ាងខ្លាំងក្នុងប៉ុន្មានឆ្នាំថ្មីៗនេះដោយកើនឡើង 227% ចន្លោះពីឆ្នាំ2011 និងឆ្នាំ2016 និងឈានដល់ 5ពាន់លានដុល្លារគិតជាតម្លៃកាលពីឆ្នាំទៅមិញ។ បច្ចុប្បន្នកម្ពុជាស្ថិតនៅលំដាប់ទី2 ក្នុងចំណោមអ្នកទទួលផលពី EBA ទាក់ទងនឹងបរិមាណជួញដូរ។

គិតរហូតមកដល់ពេលនេះ ក្រុមហ៊ុនរបស់អឺរ៉ុបកំពុងឈរជើងរកស៊ីនៅកម្ពុជាមានប្រមាណជា 500ក្រុមហ៊ុនជាមួយនឹងទុនវិនិយោគប្រមាណ4ពាន់លានដុល្លារ ហើយអាចបន្តកើនឡើងបន្ថែមទៀតក្នុងរយៈពេលពី3 ទៅ5ឆ្នាំខាងមុខ។ ការវិនិយោគរបស់អឺរ៉ុបនៅកម្ពុជាគឺវិស័យសំណង់ កម្មន្តសាលកសិកម្ម ផលិតផលព្រៃឈើ អាកាសចរណ៍ ធនាគារ ថាមពល បច្ចេកវិទ្យា និងការដឹកជញ្ជូនជាដើម។ នេះបើតាមការឱ្យដឹងពីសភាពាណិជ្ជកម្មអឺរ៉ុបប្រចាំប្រទេសកម្ពុជា៕

October 18, 2018

Author: ធឿន មករា