Author: ធឿន មករា

ភាពស្រស់ស្អាតគឺជារឿងសំខាន់សម្រាប់នារីគ្រប់រូប ជាពិសេសក្រមុំៗ ដែលកំពុងត្រៀមខ្លួនក្លាយជាកូនក្រមុំ កាន់តែត្រូវការគន្លឹះក្នុងការថែរក្សាសម្រស់ខ្លាំងឡើងតែម្ដង។ ដើម្បីឱ្យខ្លួនអ្នកអាចក្លាយជាកូនក្រមុំដែលស្រស់ស្អាតបំផុតក្នុងថ្ងៃរៀបមង្គលការរបស់ខ្លួន តើអ្នកមានពេលវេលាគ្រប់គ្រាន់ក្នុងការថែរក្សាសម្រស់ស្បែកមុខហើយឬនៅ? តើស្បែកមុខរបស់អ្នកមើលទៅស្រស់ថ្លា សម៉ដ្ឋរលោងឬនៅ? អ្នកត្រូវត្រៀមខ្លួនជាស្រេចក្នុងការរៀបចំស្បែកមុខមុនថ្ងៃរៀបការចូលមកដល់ណា៎។ ពេលវេលារៀបមង្គលការរបស់អ្នកកាន់តែកៀកហើយ អ្នកមានពេលវេលាខ្លីណាស់សម្រាប់ត្រៀមខ្លួន ណាមួយត្រូវរៀបចំគម្រោងការសម្រាប់កម្មវិធីអាពាហ៍ពិពាហ៍ ចែកធៀបការ និងត្រូវទទួលបងប្អូនញាតិមិត្តមកចូលរួម និងជួយនៅក្នុងកម្មវិធីទៀត។ ដើម្បីកុំឱ្យខកខានយូរ ទស្សនាវដ្ដី ឡារ៉ែន សូមប្រាប់ពីអាថកំបាំងរក្សាសម្រស់ស្បែកមុខសម្រាប់កូនក្រមុំ ក្នុងរយៈពេល7ថ្ងៃ គឺសម្រាប់កូនក្រមុំមានវ័យ25ឆ្នាំឡើង។

ការថែរក្សាស្បែកមុខរបស់កូនក្រមុំវ័យ25ឆ្នាំឡើង
កូនក្រមុំក្នុងវ័យនីមួយៗ មានបញ្ហាស្បែកមុខខុសៗគ្នា កូនក្រមុំដែលមានអាយុនៅក្នុងអំឡុង25ឆ្នាំឡើងទៅនោះ អាចមានបញ្ហារឿងមុខមុន និងស្បែកមុខខ្លាញ់កើតឡើងភាគច្រើនដោយសារតែការផ្លាស់ប្ដូរអ័រម៉ូននៅក្នុងរាងកាយ។ នារីៗមួយចំនួនទៀត ភ្នាសស្បែកមុខ និងការលូតលាស់របស់ភ្នាសស្បែកមុខមានសភាពប្រែប្រួលខ្លាំង ក៏ជាបញ្ហាដែរ។ ស្បែកមុខដែលធ្លាប់មានសភាពតឹងណែន និងស្រស់ថ្លាបានផ្លាស់ប្រែទៅជាជ្រីវជ្រួញ និងជាំខ្មៅទៅតាមសភាពវ័យ។ ដូច្នេះហើយ នៅក្នុងផលិតផលមួយចំនួនដែលអាចជួយកម្ចាត់កោសិកាស្បែកខូច និងអាចជួយបំប៉នពង្រឹងកោសិកាស្បែកមុខ និងភ្នាសស្បែកមុខឱ្យលូតលាស់មកតឹងណែនឡើងវិញបាននោះ គឺមានបញ្ចូលនូវសារធាតុផ្សំពី AHA និង BHA ដែលវាបានជួយស្បែកមុខឱ្យស តឹងណែន ម៉ដ្ឋរលើបរលោង និងស្រស់ផូរផង់។ យ៉ាងណាមិញ អ្នកក៏មិនអាចចោលការប្រើប្រាស់ឡេការពារកម្ដៅថ្ងៃពីកាំរស្មី UV ព្រះអាទិត្យផងដែរ ព្រោះកម្ដៅថ្ងៃ និងពន្លឺអំពូលភ្លើងមួយចំនួន ដូចជា អេក្រង់កុំព្យូទ័រ ក៏បានបំផ្លាញកោសិកាស្បែកមុខ និងធ្វើឱ្យមុខជាំខ្មៅផងដែរ។ កាន់តែខ្វះមិនបានទៀតនោះគឺ ផលិតផលដែលមានផ្សំពីសារធាតុធ្វើឱ្យស្បែកមុខស ដែលអាចប្រើប្រាស់ដឹងលទ្ធផលក្នុងរយៈពេល1-2សប្ដាហ៍ ដោយមិនមានការប៉ះពាល់ចំពោះស្បែកមុខរបស់អ្នកឡើយ។ ផលិតផលនេះ អ្នកត្រូវព្យាយាមប្រើប្រាស់ឱ្យបានជាប់ជាប្រចាំ ទាំងបរិវេណស្បែកមុខ និងស្បែកក។

ការថែរក្សាស្បែកមុខ និងវិធីត្រៀមខ្លួនជាកូនក្រមុំកក្នុងរយៈពេល7ថ្ងៃ មុនពេលរៀបការ
នៅក្នុងអំឡុងពេល7ថ្ងៃ ឬមួយសបា្ដហ៍មុនពេលរៀបអាពាហ៍ពិពាហ៍ អាចចាត់ទុកថា ជារឿងសំខាន់សម្រាប់កូនក្រមុំទាំងឡាយដែលត្រូវយកចិត្តទុកដាក់ថែរក្សាស្បែកខ្លួន និងស្បែកមុខជាពិសេសតែម្ដង។ បើទោះបីជាត្រូវធ្វើតិច ឬច្រើន សម្រាប់ថែទាំសុខភាពស្បែកមុខ ដោយវិធីផ្សេងៗគ្នាទៅតាមប្រភេទស្បែក ក៏អ្នកត្រូវត្រៀមខ្លួនថែរក្សាសុខភាពស្បែកតាមរយៈគន្លឹះដូចខាងក្រោមនេះ ៖

7ថ្ងៃមុនពេលរៀបការ
ធ្វើការម៉ាសស្បែកមុខ15នាទីជាប្រចាំថ្ងៃតែបើស្បែកមុខរបស់អ្នកឡើងមុនច្រើន និងមានរន្ធរោមធំៗ ហើយមានស្លាក​ស្នាមច្រើនមិនងាយជាសះស្បើយ អ្នកត្រូវទៅពិភាក្សាជាមួយអ្នកជំនាញខាងស្បែក ដោយអាចនឹងត្រូវចាក់បន្ថែមវីតាមីនដល់ស្បែកមុខ និង ហ្វីលល័រ (Filler) ស្បែកមុខឱ្យមើលទៅតឹងណែន និងរលើបរលោងជាដើម។

6ថ្ងៃមុនពេលរៀបការ
សាកល្បងគូសចិញ្ចើម ឬជ្រើសរើសម៉ូដចិញ្ចើមឱ្យសមនឹងទម្រង់មុខរបស់អ្នក។ ធ្វើឡាស៊ែរកម្ចាត់រោម តែប្រសិនបើអ្នកមិនធ្លាប់ធ្វើឡាស៊ែរទេ អាចប្រើប្រាស់ផលិតផលបករោមមុខ ដោយធ្វើការម៉ាស្សាមុខ និងបករោមតូចៗចេញពីលើស្បែកមុខក៏បាន។

5ថ្ងៃមុនពេលរៀបការ
បំប៉នស្បែកមុខរបស់អ្នក ដើម្បីឱ្យស្បែកមុខឡើងសស្អាតម៉ដ្ឋរលោងនាថ្ងៃរៀបមង្គល-ការចូលមកដល់ ដោយទទួលយកនូវការចាក់វីតាមីនបំប៉នស្បែកមុខ ការធ្វើ IPL treatment រួមមាន AHA និងការអ៊ុតស្បែកមុខជាមួយកាំរស្មី LED ដើម្បីឱ្យស្បែកមុខកាន់តែរលុបស្លាកស្នាម និងសភ្លឺរលោង។

4ថ្ងៃមុនពេលរៀបការ
ប្រសិនបើមុខមានប្រតិកម្ម គឺហាមច្របាច់ កេះ ឬញេចគ្រាប់មុន ឬកន្ទួលតូចៗ ដែលមាននៅលើស្បែកមុខឱ្យសោះ ត្រូវប្រញាប់ចាក់ថ្នាំបំបាត់មុន ជាមួយគ្រូពេទ្យជំនាញជាបន្ទាន់។

3ថ្ងៃមុនពេលរៀបការ
ចំពោះការសម្អាតស្បែកមុខឱ្យស្អាតសម្រាប់កូនក្រមុំ ក៏ត្រូវតមការផាត់មុខមួយរយៈពេលសិន ដើម្បីឱ្យស្បែកមុខទទួលសារធាតុគីមីបិទបាំងពីគ្រឿងសម្អាង ហើយងាកមកព្យាយាមបំប៉នស្បែកមុខឱ្យស្រស់ស្អាតឡើងវិញ។ ពេលវេលានៅសល់តែ3ថ្ងៃមុនពេលរៀបការតែប៉ុណ្ណោះ រឿងសំខាន់ដែលអ្នកត្រូវធ្វើគឺការបណ្ដឹងស្បែកមុខ និងបំបាត់រន្ធរោម ដែលអាចនិយាយបានថា ជាគន្លឹះសំខាន់មួយសម្រាប់កូនក្រមុំ។អ្នកអាចជ្រើសរើសការបណ្ដឹងស្បែកមុខតាមបែបបុរាណ និងធម្មជាតិ ឬធ្វើម៉ាស្សាជាមួយអ្នកជំនាញក៏បាន។

2ថ្ងៃមុនពេលរៀបការ
ធ្វើម៉ាសមុខរយៈពេល30នាទីជារៀងរាល់ថ្ងៃ ដើម្បីឱ្យស្បែកមុខទន់រលោង។

1ថ្ងៃមុនពេលរៀបការ
ក្រោយបិទម៉ាសជាប្រចាំ រយៈពេល30នាទីហើយ អ្នកត្រូវលាងស្បែកមុខឱ្យស្អាត ហើយប្រើក្រែមលាបបំប៉នស្បែកមុខ ឬសេរ៉ូមសម្រាប់ជំនួយស្បែកមុខក្នុងរយៈពេល30នាទីនាពេលព្រឹក និងមុនពេលចូលគេង។ ថ្ងៃនេះអ្នកត្រូវសម្រាកឱ្យបានគ្រប់គ្រាន់ ហាមធ្វើកិច្ចការទាំងឡាយ អ្នកត្រូវឆាប់ចូលគេង ដើម្បីក្រោមនៅថ្ងៃស្អែកជាមួយនឹងទឹកមុខស្រស់ស្រាយ និងស្រស់ស្អាតបំផុត ស្វាគមន៍ថ្ងៃដ៏វិសេសរបស់អ្នក។

ថ្ងៃរៀបការមកដល់
អ្នកធ្លាប់បានដឹងហើយថា កូនក្រមុំទាំងអស់នៅពេលថ្ងៃរៀបការចូលមកដល់ ត្រូវក្រោកតាំងពីព្រលឹម ហើយរឿងដំបូងដែលអ្នកត្រូវធ្វើនោះគឺ ត្រូវកក់សក់ និងប្រើក្រែមបន្ទន់សក់ឱ្យរួចជាស្រេច។ ហើយមុនពេលជាងជំនាញចាប់ផ្ដើមធ្វើការផាត់មុខរបស់អ្នក អ្នកត្រូវប្រើប្រាស់ផលិតផលលាបការពារមុខដែលមានសារធាតុ Intensive Moisturizer ជាមុនសិន រួចសឹមលាងចេញ ហើយផ្ដើមធ្វើការផាត់មុខតាមក្រោយដើម្បីការពារស្បែកមុខរបស់អ្នក និងការពារប្រតិកម្មចាញ់គ្រឿងសម្អាង។ ការបន្ថែមភាពស្រស់ស្អាតសម្រាប់កូនក្រមុំ គឺស្ថិតនៅលើថ្វីដៃជាងជំនាញរបស់អ្នកហើយ សូមរីករាយជាមួយថ្ងៃរៀបអាពាហ៍ពិពាហ៍ដ៏មានអត្ថន័យនៅក្នុងជីវិតរបស់អ្នក៕

បងៗបុរសៗ សូមពិនិត្យមើលបន្តិចមើល៎ ម៉ូដសម្លៀកបំពាក់សម្រាប់កូនកំលោះសម័យថ្មី តើម៉ូដមួយណាស័ក្តិសមនឹងរូបអ្នក? កុំឱ្យចាញ់កូនក្រមុំរបស់បងៗណា៎ សូមលេងម៉ូដសម្លៀកបំពាក់សម្រាប់ថ្ងៃដ៏មានអត្ថន័យរបស់អ្នកដូចមាននៅក្នុងទំព័រ ទស្សនាវដ្តី ឡារ៉ែន ហើយមាននៅក្នុងទំព័រនេះស្រាប់ ដើម្បីឱ្យថ្ងៃពិសេសរបស់អ្នក អ្នកអាចក្លាយជាតួឯកប្រុសដ៏ស្រស់សង្ហានៅក្នុងក្រសែភ្នែកនារីៗទាំងពួង ជាពិសេសគឺ ធ្វើឱ្យកូនក្រមុំរបស់អ្នកញញឹមពេញចិត្តនឹងរូបអ្នកតែម្តង។ រឿងអីមិនញញឹម មិនពេញចិត្ត បើកូនកំលោះសង្ហាយ៉ាងនេះនោះ សង្ហាក៏សង្ហា ទាន់សម័យក៏ទាន់សម័យ សមជាបុរសនៅក្នុងក្តីស្រមៃរបស់នារីសម័យថ្មីពិតៗ៕

ថ្ងៃ​ពិសេស​របស់​អ្នក​ជិត​មកដល់​ហើយ​មែន​ទេ? សូម​ជ្រើសរើស​រ៉ូ​ប​បែប​សម័យថ្មី​សម្រាប់​ពិធីជប់លៀង​នាពេល​ល្ងាច​ថ្ងៃ​រៀប​អាពាហ៍ពិពាហ៍​របស់​អ្នក​ឱ្យ​រួចជាស្រេច ដើម្បីឱ្យ​រូប​អ្នកមាន​ភាពជឿជាក់ និង​ទទួលបាន​នូវ​ភាពស្រស់ស្អាត​ដូច​នៅក្នុង​ក្តី​ស្រមៃ​របស់​អ្នកពិតៗ។ សូម​ក្រឡេក​មក​មើល​គំរូ​នៃ​ម៉ូដ​រ៉ូ​ប​ពណ៌​ស​សម្រាប់​ពិធីជប់លៀង​ពេល​ល្ងាច ដែលមាន​នៅក្នុង​ទំព័រ​ម៉ូដ​សម្លៀកបំពាក់​របស់ ឡា​រ៉ែ​ន ហើយ​ជ្រើសរើស​ម៉ូដ​រ៉ូ​ប​ដែល​អ្នក​ស្រឡាញ់​ពេញចិត្ត សម្រាប់​លេង​ម៉ូដ​នៅក្នុង​ថ្ងៃ​រៀប​អាពាហ៍ពិពាហ៍​របស់​អ្នក​នាពេល​ខាងមុខនេះ​ដូចតទៅ៕

ក្រសួង​ដែនដី នគរូបនីយកម្ម និង​សំណង់​បានលើកឡើង​ពី​គម្រោង​ធ្វើ​បច្ចុប្បន្នភាព​តម្លៃ​ដីធ្លី​នៅ​ទូទាំងប្រទេស ដែល​ការធ្វើ​បច្ចុប្បន្នភាព​តម្លៃ​ដីធ្លី​នេះ​មាន​គោលបំណង​កំណត់​តម្លៃ​គិត​ពន្ធ​លើ​អចលនទ្រព្យ​ឱ្យបាន​ត្រឹមត្រូវ​តាម​តម្លៃ​ទីផ្សារ​ស្របពេល​តម្លៃ​ដីធ្លី​នៅតាម​រាជធានី-ខេត្ត​បាន​ឡើងថ្លៃ​ជា​បន្តបន្ទាប់។

ឯកឧត្ដម ជា សុផារ៉ា ឧបនាយករដ្ឋមន្ត្រី រដ្ឋមន្ត្រីក្រសួង​ដែនដី នគរូបនីយកម្ម និង​សំណង់​ថ្លែងថា ការធ្វើ​បច្ចុប្បន្នភាព​តម្លៃ​ដីធ្លី​នេះ គឺ​នឹង​ត្រូវធ្វើ​នៅ​គ្រប់​ភូមិបាល​ដីធ្លី​ទូទាំងប្រទេស ហើយ​ប្រធាន​មន្ទីរ​ខេត្ត-ក្រុងនីមួយៗជា​អ្នកទទួលបន្ទុក​លើ​កិច្ចការងារ​នេះ “យើង​ធ្វើ​បច្ចុប្បន្នភាព​ផ្ទៃដី​ដែល​ស្ថិតនៅក្នុង​ភូមិសាស្ត្រ​នៃ​ការគ្រប់គ្រង​របស់​អស់លោក​ជា​ប្រធាន​ភូមិបាល​នៅតាម​បណ្ដា​ខេត្ត​ក្រុង ការខកខាន​មិនបាន​ធ្វើ​បច្ចុប្បន្នភាព​លើ​តម្លៃ​ដីធ្លី​បានធ្វើឱ្យ​រដ្ឋ​បាត់បង់​ចំណូលពន្ធ​យ៉ាង​សន្ធឹកសន្ធាប់”។

សូមបញ្ជាក់ថា បច្ចុប្បន្ននេះ ការកំណត់​ពន្ធ​ដី ឬ​ពន្ធ​ប្រថាប់ត្រា​ត្រូវបាន​សម្ដេចនាយក​រដ្ឋមន្ត្រី ហ៊ុន សែន បានលើកឡើង និង​រំឭក​ទៅកាន់​អគ្គនាយក​ពន្ធដារ​ថាប​ច្ចុ​ប្បន្ន ពន្ធ​ប្រថាប់ត្រា​ចំពោះ​ការផ្ទេរកម្មសិទ្ធិ​អចលនទ្រព្យ​សព្វថ្ងៃ​ត្រូវបាន​កំណត់ដោយ​ក្រសួង​សេដ្ឋកិច្ច និង​ហិរញ្ញវត្ថុ​ដែលមាន​រយៈពេល​ច្រើន​ឆ្នាំមកហើយៗមកទល់នឹង​ពេលនេះ​តម្លៃ​ផ្ទះសំបែង​បាន​ហក់​ខ្ពស់​ឡើងជា​លំដាប់​ដែល​ត្រូវធ្វើ​ការសិក្សា​កំណត់​តម្លៃ​ពន្ធ​នេះ​សាជាថ្មី​ឡើងវិញ។

សម្តេច ហ៊ុន សែន បាន​មានប្រសាសន៍ថា“ក្រសួង​សេដ្ឋកិច្ច និង​ហិរញ្ញវត្ថុ​បាន​វាយ​ពន្ធ​ប្រថាប់ត្រា​លើ​ការកំណត់ថ្លៃ​ដី​តាំងពី3-4ឆ្នាំមុន​មកម៉្លេះ ប៉ុន្តែ​តម្លៃ​អត្រា​ទីផ្សារ​បច្ចុប្បន្ន​មិន​នៅ​អ៊ីចឹង​ទៀត​ទេ…កាលពី 3ឆ្នាំមុន តម្លៃ​ដី 1ម៉ែត្រការ៉េ ថ្លៃ200ដុល្លារ ប៉ុន្តែ​ឥឡូវ​តម្លៃ​វា​គឺ 1ម៉ែត្រការ៉េ 1000ដុល្លារ”។

ដោយ​មិនបាន​បញ្ជាក់​ពី​កាលបរិច្ឆេទ​នៃ​ការចាប់ផ្ដើម​នៅពេលណា​នោះ ឯកឧត្ដម ជា សុផារ៉ា​បានឱ្យដឹងថា នេះ​គឺជា​គោលដៅ​មួយ​ដែល​អាចធ្វើឱ្យ​ចំណូល​រដ្ឋ​កើនឡើង1គុណ​ជា2 ខណៈ​គម្រោង​ធ្វើ​បច្ចុប្បន្នភាព​នេះ​នឹង​អាចធ្វើ​មួយឆ្នាំ​ម្ដង ដើម្បីឱ្យ​ស្របទៅតាម​តម្លៃ​ដី​តាម​ទីផ្សារ។ អ៊ីចឹង​នៅពេល​យើង​ធ្វើការ​យកពន្ធ បើ​ធ្វើបាន​អាចឱ្យ​ចំណូល​រដ្ឋ​កើនឡើង 1គុណ​នឹង2ដែរ។

លោក​បណ្ឌិត គីម ហ៊ាង ប្រធាន​សមាគម​អ្នកវាយតម្លៃ និង​ភ្នាក់ងារ​អចលនវត្ថុ​កម្ពុជា​បានទទួលស្គាល់ ថា​បច្ចុប្បន្ន​តម្លៃ​ដីធ្លី ផ្ទះសំបែង ពិតជា​មានតម្លៃ​ខ្ពស់​មែន ហើយ​លោក​គាំទ្រ​ចំពោះ​ការលើកឡើង​របស់​សម្ដេច​នាយករដ្ឋមន្ត្រី ប៉ុន្តែ​យ៉ាងណាក៏ដោយ លោក​ស្នើឱ្យ​រដ្ឋាភិបាល​គួរតែ​ធ្វើការ​សិក្សា​អំពី​ស្ថានភាព​ដីធ្លី​ឱ្យ​ល្អិតល្អន់​ស្របទៅតាម​សភា​ពដី​ប្រភេទនីមួយៗ និង​តាម​តំបន់​ផងដែរ ចៀសវាង​ការកំណត់​តម្លៃ​មិន​ត្រឹមត្រូវ​ទៅតាម​ស្ថានភាព​ជាក់ស្តែង​នៃ​តម្លៃ​អចលនទ្រព្យ​នោះ។

លោក គីម ហ៊ាង មានប្រសាសន៍ថា ខ្ញុំ​គាំទ្រ​ការដំឡើង​ពន្ធ​នេះ ព្រោះ​ប្រទេស​ណា​ក៏​គេ​យកពន្ធ​ដែរតែ​បារម្ភ​ថា វា​អាច​ប៉ះពាល់​ដល់​សតិអារម្មណ៍​សាធារណជន និង​អ្នកវិនិយោគ​លើ​វិស័យ​ដីធ្លី។ ម្យ៉ាងវិញទៀត តើ​វា​ជា​ពេលវេលា​សមស្រប​ក្នុងការ​ដំឡើង​ពន្ធ​ឬ​នៅ? ហើយ​តើ​ត្រូវ​ដំឡើង​របៀប​ណា? តើ​វា​មាន​តុល្យភាព​ការរីកចម្រើន​របស់​ស​ង្គ​ម​ឬទេ? វា​អាច​ត្រូវការ​ពេលវេលា​មួយចំនួនទៀត បើតាម​ខ្ញុំ គឺ​យើង​ត្រូវការ​ពេលវេលា “ការដំឡើង​ពន្ធ​ដី ឬ​ពន្ធ​ប្រថាប់ត្រា គួរតែ​ត្រូវធ្វើ​ក្នុង​រយៈពេល 2-3ឆ្នាំ​ខាងមុខ​ទៀត ទើប​ជាការ​ល្អប្រសើរ ព្រោះ​វា​មិន​ធ្វើឱ្យប៉ះពាល់​ដល់​សាធារណជន”។

លោក ង៉ែត ជូ ទីប្រឹក្សា​ជាន់ខ្ពស់​ផ្នែក​សេដ្ឋកិច្ច និង​អភិវឌ្ឍន៍​នៃ​ក្រុមហ៊ុន​ពិគ្រោះ​យោបល់ (EMC) បាន​បញ្ជាក់ថា បើតាម​ខ្ញុំ​យល់ អត្រា4%នេះ គឺជា​ការកំណត់​តម្លៃ​ដី​នៅតាម​តំបន់នីមួយ។ ប៉ុន្តែ​ការដំឡើង​នោះ គឺ​ដំឡើង​អត្រា​មូលដ្ឋាន​នៃ​ពន្ធ ឧទាហរណ៍​ដូចជា​ដីស្រែ​ពីមុន​តម្លៃ 1$ ឥឡូវ​តម្លៃ 2$ ដូច្នេះ​គេ​យក​តម្លៃ​នោះ​គុណ​នឹង​អត្រា4%នោះ។

លោក​ថា ជាការ​សម​ហេតុ​សម​ផល​ដែរ ដែល​រដ្ឋាភិបាល​បច្ចុប្បន្ន​មាន​គម្រោង​ដំឡើង​តម្លៃ​អត្រាពន្ធ​លើ​តម្លៃ​ដី និង​តម្លៃ​ផ្ទះ​នេះ។ លោក ង៉ែត ជូ យល់ថា ការដំឡើង​ពន្ធ​លើ​តម្លៃ​ដី និង​ផ្ទះ​ជាការ​ល្អ ប៉ុន្ដែ​គួរ​កុំ​ដំឡើងថ្លៃ​ពន្ធ​ខ្ពស់​តាម​ដី​តម្លៃ​ដី​ពេក ព្រោះ​ដី​ខ្លះ​បាន​ឡើងថ្លៃតៗគ្នា គ្មាន​មូលដ្ឋាន​ច្បាស់លាស់​ទេ។លោក​ថា តម្លៃ​ពន្ធ​ប្រថាប់ត្រា​នៅ​តំបន់​ខ្លះ មិនបាន​ចូល​រដ្ឋ​ទាំងអស់​ទេ ព្រោះ​មានការ​កិបកេង​ពី​មន្ត្រី​ពន្ធដារ​មួយចំនួន​ទើប​ធ្វើឱ្យ​បាត់បង់​ចំណូល​ពន្ធ។ ដូច្នេះ​រដ្ឋាភិបាល​គួរតែ​សិក្សា​ដែរ​ពីអ្វី​ដែល​លោក​ចង់​បង្កើន​ចំណូល​ពន្ធ តែ​ត្រូវ​ធ្វើឱ្យ​ប្រជាពលរដ្ឋ​សប្បាយចិត្ត​ក្នុងការ​ចូលរួមចំណែក​ផង។

លោក​ឧកញ៉ា នួន រិទ្ធី អគ្គនាយក​ក្រុមហ៊ុន Khmer Foundation appraisal (KFA) បាន​មានប្រសាសន៍​ស្រដៀង​គ្នា​នេះដែរ​ថា មិនមែនជា​ការដំឡើង​ពន្ធ​ប្រថាប់ត្រា​ទេ តែ​ជាការ​ពាក់ព័ន្ធ និង​អត្រា​ Rate នៃ​ពន្ធ ដែល​យើង​បានកំណត់​ជាច្រើន​ឆ្នាំ​មកហើយ វា​ជា​អត្រាពន្ធ​យោងទៅតាម​ទីផ្សារ។

លោក​ឧកញ៉ា​បាន​បញ្ជាក់ថា ចំពោះ​លោក​គ្មាន​បញ្ហា​ទេ ចំពោះ​អត្រាពន្ធ​នេះ ព្រោះ​បើ​និយាយ​ពី​ភាពអនុគ្រោះ​ពន្ធ​របស់​រដ្ឋាភិបាល​វិញ មានការ​ប្រមូល​ពន្ធ​ជាច្រើន​ប្រភេទ មាន​ពន្ធ​ប្រចាំឆ្នាំ​ជាដើម ផ្ទះ​ដែលមាន​ពន្ធ​ក្រោម 100លាន​រៀល មិន​តម្រូវឱ្យ​បង់ពន្ធ​ទេ។ ពោលគឺ​ស្ថិតនៅលើ​ការយោគយល់ និង​ការអនុគ្រោះ​ពន្ធ​ថែមទៀត ឯ​រឿង​ពាក់ព័ន្ធ​អចលនទ្រព្យ អ្នក​ចំណេញ​ដោយសារ​ពន្ធ​ក៏មាន​ច្រើន​មកហើយ​ដែរ។

ដូច្នេះ​ពាក់ព័ន្ធ​នឹង​ការយកពន្ធ​ឱ្យ​ត្រូវ​អត្រា​ទីផ្សារ​នេះ ជា​រឿង​កាតព្វកិច្ច​របស់​ប្រជាពលរដ្ឋ​ទាំងអស់​ត្រូវតែ​ធ្វើ ក្នុងករណី​រាជរដ្ឋាភិបាល ឬ​ខាង​ពន្ធដារ​ចុះ​តម្លៃ (Discount)ប៉ុន្មាន​នោះ គឺជា​ការលើកទឹកចិត្ត​បន្ថែម​ជូន​ដល់​ប្រជាពលរដ្ឋ៕

អ្នក​មកពី​ឧស្សាហកម្ម​មូល​ប​ត្រ​ចង់ឱ្យ​ធនាគារជាតិ​នៃ​កម្ពុជា (National Bank of Cambodia ឬ​ NBC) និង​គណៈកម្មការ​មូល​ប​ត្រ​កម្ពុជា (The Securities and Exchange Commission of Cambodia ឬ​ SECC) ជំ​រុញឱ្យ​ធនាគារ គ្រឹះស្ថាន​មីក្រូហិរញ្ញវត្ថុ និង​ក្រុមហ៊ុន​ធានារ៉ាប់រង​ត្រូវតែ​ចុះបញ្ជី​នៅ​ផ្សា​រមូល​ប​ត្ររួមទាំង​ពិចារណា​ពី​ការប្រើប្រាស់​ប្រាក់​ដុល្លារ​អាមេរិក​សម្រាប់​ការជួញដូរ​នៅ​ផ្សារ​ហ៊ុន​ផងដែរ។

លោក Ha Jong Weon នាយករង​ក្រុមហ៊ុន​ផ្សា​រមូល​ប​ត្រ​កម្ពុជា (Cambodia Securities Exchange ឬ ​CSX)​ បាន​និយាយថា ផ្សារ​ហ៊ុន​គឺជា​វេទិកា​មួយ​ដើម្បី​ជំរុញ​ការប្រកួតប្រជែង​របស់​ក្រុមហ៊ុន ដោយ​ផ្តល់ជូន​នូវ​បណ្តាញ​ជាច្រើន​ដើម្បី​បង្កើន​ដើមទុន និង​បង្កើន​រូបភាព​របស់​ក្រុមហ៊ុន ដូច្នេះ​ការទាក់ទាញ​វិនិយោគិន​បន្ថែមទៀត​ដើម្បីឱ្យ​ផ្សារ​ហ៊ុន​កាន់តែ​មាន​ភាព​រីកដុះដាល និង​ទទួលបាន​ការយកចិត្ត​ទុកដាក់​ពី​សាធារណជន ធនាគារជាតិ​នៃ​កម្ពុជា​គួរតែ​ទាក់ទាញ​ធនាគារ និង​ក្រុមហ៊ុន​ធានារ៉ាប់រង​ឱ្យ​ចុះបញ្ជី។

លោក​បន្តថា សម្រាប់​រយៈពេល​ខ្លី​យើង​ចង់ឱ្យ​ធនាគារ និង​គ្រឹះស្ថាន​មីក្រូហិរញ្ញវត្ថុ​នៅ​កម្ពុជា​ចុះបញ្ជី​នៅលើ​ទីផ្សារ​ក្នុង​រយៈពេល 3ឆ្នាំ​ខាងមុខ។ យើង​ជំរុញ​ឱ្យ NBC ជំរុញ​គ្រឹះស្ថាន​ហិរញ្ញវត្ថុ​ឱ្យចេញ​ភាគហ៊ុន ឬ​មូល​ប​ត្រ​បំណុល​ក្នុង​ផ្សារ​ហ៊ុន ខណៈ​គ្រឹះស្ថាន​ទាំងនោះ​នឹង​ជួយ​បង្កើន​ទីផ្សារ “យើង​ត្រូវការ​ការគាំទ្រ​ពី​រាជរដ្ឋាភិបាល ពិសេស​ពី​ធនាគារជាតិ​នៃ​កម្ពុជាដោយសារ​បច្ចុប្បន្ន​យើង​មើលឃើញថា ស្ថាប័ន​ដែលស័ក្តិសម​ចុះបញ្ជី​ជាងគេ គឺ​គ្រឹះស្ថាន​ធនាគារ និងគ្រឹះស្ថាន​ហិរញ្ញវត្ថុ ព្រោះ​ពួកគាត់​ជា​ស្ថាប័ន​ដែលមាន​ការគោរព​ប​ទ​ប្បញ្ញត្តិ និង​សកម្មភាព​ច្រើនជាង​មុន​នៅក្នុង​ទីផ្សារ​មូល​ប​ត្រ និង​ផ្តល់​ការអភិវឌ្ឍ​ដែល​កាន់​តែមាន​ស្ថិរភាព​ដល់​សេដ្ឋកិច្ចជាតិ”។

លោក អុីវ រ៉ា​ណ្ណា​រិ​ទ្ធិ នាយក​ប្រតិបត្តិ​ធនាគារ RHB Indochina Securities បាន​មានប្រសាសន៍ថា ដើម្បី​ជំរុញ​កំណើន​ទីផ្សារ​មូល​ប​ត្រ និង​ទាក់ទាញ​វិនិយោគិន​បន្ថែមទៀត ប្រាក់​ដុល្លារ​គួរតែ​ជា​រូបិយប័ណ្ណ​សម្រាប់​ការជួញដូរ​នៅពេលដែល​ធនាគារ​មីក្រូហិរញ្ញវត្ថុ និង​ក្រុមហ៊ុន​ធានារ៉ាប់រង​ជាច្រើន គួរ​ត្រូវបាន​លើកទឹកចិត្ត​ឱ្យ​ចុះបញ្ជី ឬ​វិនិយោគ​នៅក្នុង​ទីផ្សារ​ហ៊ុន។ ព្រោះថា រូបិយប័ណ្ណ គឺជា​បញ្ហា​ប្រឈម​មួយ​សម្រាប់​ការកំណត់​នៃ​កំណើន​ទីផ្សារ​មូល​ប​ត្រ​ដែល​រដ្ឋាភិបាល​គួរតែ​ពិចារណា​ប្រាក់​ដុល្លារ​អាមេរិក​ជា​រូបិយប័ណ្ណ​ជួញដូរ​សម្រាប់​ផ្សារ​ហ៊ុន។

លោក​បន្តថា “វា​នឹង​ក្លាយជា​គុណប្រយោជន៍​មួយ​ក្នុងការ​ទាក់ទាញ​វិនិយោគិន​កាន់តែច្រើន​ទៅកាន់​ទីផ្សារ​ខណៈពេលដែល​យើង​មាន​ប្រាក់​ដុល្លារ​នៅក្នុង​ប្រព័ន្ធ​សេដ្ឋកិច្ច​របស់​យើង”។ លោក​បន្តថា “វិនិយោគិន​ភាគច្រើន​ភ័យខ្លាច​ចំពោះ​ការប្រែប្រួល​អត្រា​ការប្រាក់ ប្រសិនបើ​ពួកគេ​ចង់​វិនិយោគ​ក្នុង​ផ្សារ​ហ៊ុន​ពីព្រោះ​ពួកគេ​ត្រូវ​ប្តូរ​រូបិយប័ណ្ណ​បរទេស​របស់​ពួកគេ​ទៅជា​រូបិយប័ណ្ណ​ក្នុងស្រុក​ដើម្បី​ធ្វើ​ពាណិជ្ជកម្ម ប៉ុន្តែ វា​ផ្ទុយ​នឹង​អ្វីដែល​វិនិយោគិន​ចង់បាន”។

លោកស្រី ហ៊រ លី​គា ប្រធាន​ការស្រាវជ្រាវ ការបណ្តុះបណ្តាល ផ្នែក​ទីផ្សារ​មូល​ប​ត្រ​នៃ​គណៈកម្មការ​មូល​ប​ត្រ​កម្ពុជា​បាន​មានប្រសាសន៍ថា យើង​កំពុងធ្វើការ​ជាមួយ​អ្នកពាក់ព័ន្ធ ដើម្បី​ជំរុញ​ធនាគារ និង​គ្រឹះស្ថាន​មីក្រូហិរញ្ញវត្ថុ​ត្រូវបាន​ចុះបញ្ជី​ក្នុង​ទីផ្សារ​ភាគហ៊ុន ដោយសារ​យើង​ជឿជាក់ថា នៅពេល​ស្ថាប័ន​ទាំងនោះ​ត្រូវបាន​ចុះបញ្ជី ពួកគេ​នឹង​បង្កើន​ទំនុកចិត្ត​កាន់តែច្រើន​ក្នុងចំណោម​វិនិយោគិន និង​ក្រុមហ៊ុន​ផ្សេងទៀត។

លោកស្រី​បញ្ជាក់ថា យើង​កំពុង​ព្យាយាម​ធ្វើឱ្យ​នីតិវិធី​ចុះបញ្ជី​មាន​លក្ខណៈសាមញ្ញ ធ្វើឱ្យ​តម្លៃ​ចុះបញ្ជី​ស្ថិតក្នុង​តម្លៃ​ទាប មានការ​លើកទឹកចិត្ត​ពន្ធ និង​អនុញ្ញាតឱ្យ​ក្រុមហ៊ុន​ទាំងអស់ ផ្តល់​របាយការណ៍​ហិរញ្ញវត្ថុ​ដែល​បានធ្វើ​សវនកម្ម​ក្នុង​រយៈពេល​តែ2ឆ្នាំ ដើម្បី​ជំរុញ​ឱ្យ​ក្រុមហ៊ុន ធនាគារ និង MFI កាន់តែច្រើន​ចុះបញ្ជី​នៅក្នុង​ផ្សារ​ហ៊ុន។

លោកស្រី​ហ៊ លី​គា បាន​ថ្លែង​ទៀតថា ទីផ្សារ​មូល​ប​ត្រ​គឺជា​កន្លែង​មួយ​ផ្តល់នូវ​ដើមទុន​រយៈពេល​វែង​សម្រាប់​ពង្រីក​អាជីវកម្ម​ឱ្យ​ដំណើរ​ការល្អ​ជាង​មុន និង​ចូលរួម​ជំរុញ​ការនាំចេញ​ដល់​កំណើនសេដ្ឋកិច្ច​និង​បង្កើត​ការងារ​បន្ថែម​ដល់​ប្រជាពលរដ្ឋ តែ​ជាក់ស្តែង​សព្វថ្ងៃ​កម្ពុជា​ទើប​តែមាន​ក្រុមហ៊ុន​តិចតួច​ប៉ុណ្ណោះ​ដែល​បាន​បោះផ្សាយ​លក់​ភាគហ៊ុន​របស់ខ្លួន ហើយ​ទំហំ​នៃ​ការជួញដូរ​ប្រចាំ​ថ្ងៃជា​មធ្យម​ប្រមាណ​ជា 1.3ម៉ឺន​ដុល្លារ​ក្នុង​មួយថ្ងៃ គឺ​នៅ​តិចតួច​នៅឡើយ។

ឯកឧត្តម ស៊ូ សុជាតិ អគ្គនាយក​គណៈកម្មកា​រមូល​ប​ត្រ​កម្ពុជា បាន​ថ្លែងថា៖ “អ្នកវិនិយោគ​លើ​ភាគហ៊ុន ឬ​មូល​ប​ត្រដែ​លបោះ​លក់​ដោយ​ក្រុមហ៊ុន​ណាមួយ អាច​ទទួលបាន​ប្រាក់ចំណេញ ឬ​ខាត​អាស្រ័យ​លើ​ក្រុមហ៊ុន​នោះ​រកស៊ី​ខាត ឬ​ចំណេញ”។ បច្ចុប្បន្ន​គណៈកម្មការ​មូល​ប​ត្រ​កម្ពុជា​បាន និង​កំពុងធ្វើការ​ជាមួយ​ក្រុមហ៊ុន​មូល​ប​ត្រ​កម្ពុជា ដោយបាន​អនុញ្ញាតឱ្យ​ក្រុមហ៊ុន​ចំនួន5 បោះផ្សាយ​លក់​មូល​ប​ត្រ​របស់ខ្លួន​នៅលើ​ទីផ្សារ ដែល​ក្រុមហ៊ុន​ទាំងនោះ​រួមមាន រដ្ឋាករទឹក​ស្វយ័ត​ក្រុងភ្នំពេញ កំពង់ផែ​ស្វយ័ត​ក្រុងភ្នំពេញ កំពង់ផែ​ស្វយ័ត​ក្រុងព្រះសីហនុ រោងចក្រ​កាត់ដេរ​ហ្គ្រេ​ន​ធ្វី​ន និង​តំបន់​សេដ្ឋកិច្ច​ពិសេស​ភ្នំពេញ និង​ជា​ចុងក្រោយ​គ្រឹះស្ថាន​មីក្រូហិរញ្ញវត្ថុ​ហត្ថា​កសិករ​លី​មី​ធី​ត។

លោក ហួត អៀង​តុង ​នាយក​ប្រតិបត្តិ​របស់​ធនាគារ​ហ​ត្ថា​កសិករ​លី​មី​ធី​ត​បានឱ្យដឹងថា គ្រឹះស្ថាន​មីក្រូហិរញ្ញវត្ថុ និង​ស្ថាប័ន​ដាក់​ប្រាក់​បញ្ញើ​នឹង​ចេញ 1.2 លាន​ប័ណ្ណ​ដែលមាន​តម្លៃ​សរុប​ចំនួន120ពាន់លាន​រៀល។ វា​មាន​កាលបរិច្ឆេទ​ផុតកំណត់ 3ឆ្នាំ(2018-2021) ចាប់តាំងពី​កាលបរិច្ឆេទ​ចេញ និង​អនុវត្ត​អត្រា​គូ​ប៉ុង (ដុល)ពី7.5% ដល់8.5% បន្ទាប់ពី​ហត្ថា​កសិករ​ក្លាយជា​ក្រុមហ៊ុន​ទី6 ដែល​ចុះបញ្ជី​នៅ​ផ្សារ​ហ៊ុន​កម្ពុជា។

ឯកឧត្តម ហុង សុ​ហួរ អគ្គនាយក​ក្រុមហ៊ុន​ផ្សា​រមូល​ប​ត្រ​កម្ពុជា​បាន​ថ្លែងថា លោក​ជឿជាក់ថា យុទ្ធសាស្ត្រ​នេះ​នឹង​ទទួលបាន​ជោគជ័យ​ដោយសារ​មានការ​គាំទ្រ​យ៉ាងច្រើន​ពី​សំណាក់​សាធារណជន​ និង​វិនិយោគិន “ខ្ញុំ​សង្ឃឹមថា ហត្ថា​កសិករ និង​គ្រឹះស្ថាន​ហិរញ្ញវត្ថុ​ដទៃទៀត​នឹង​ពិចារណា​ប្រមូល​លុយ​តាមរយៈ​ការចេញ​ប័ណ្ណសន្យា​រ៉ាប់រង​បន្ថែម​នាពេល​អនាគត។ ខ្ញុំ​តែងតែ​លើកទឹកចិត្ត​ដល់​គ្រប់​អាជីវកម្ម​ទាំងអស់​ឱ្យ​ទាញយក​ផលប្រយោជន៍​ពី​ផ្សារ​ហ៊ុន ដើម្បី​បង្កើន​មូលនិធិ​ដែល​នឹង​អនុញ្ញាតឱ្យ​ពួកគេ​ពង្រីក​អាជីវកម្ម​របស់ខ្លួន”។

ឯកឧត្តម ស៊ូ សុជាតិ អគ្គនាយក​គណៈកម្មកា​រមូល​ប​ត្រ​កម្ពុជា​បាន​មានប្រសាសន៍ថា ការបង្ហាញ​ផ្លូវ​នេះ គឺ​ដើម្បី​ធ្វើ​បច្ចុប្បន្នភាព​សាធារណជន អំពី​ការអភិវឌ្ឍ​ថ្មី ហើយ​ផ្សា​រមូល​ប​ត្រ​កម្ពុជា​កំពុង​បន្ត​ស្វែងរក​ក្រុមហ៊ុន​បន្ថែមទៀត​ដើម្បី​ចុះបញ្ជី​មូល​ប​ត្រ​បំណុល​សាជីវកម្ម។ ដើម្បី​រក្សា​និរន្តរភាព​សេដ្ឋកិច្ច​របស់​ប្រទេស និង​ជំរុញ​សេដ្ឋកិច្ច​ឱ្យ​ឈានដល់​សក្តានុពល​ពេញលេញ​របស់ខ្លួន ប្រព័ន្ធ​ហិរញ្ញវត្ថុ​ត្រូវតែមាន​ភាពរឹងមាំ និង​មាន​ប្រសិទ្ធភាព។

ឯកឧត្តម​បាន​មានប្រសាសន៍ថា “ផ្សារ​ហ៊ុន​នឹង​ដើរតួ​យ៉ាងសំខាន់​ដើម្បី​បំពេញបន្ថែម​ប្រព័ន្ធ​ធនាគារ​បច្ចុប្បន្ន។ ការចុះបញ្ជី​នេះ​នឹង​ជួយ​ឱ្យ​គ្រឹះស្ថាន​មីក្រូហិរញ្ញវត្ថុ ក្រុមហ៊ុន​ធានារ៉ាប់រង​ទទួលបាន​ហិរញ្ញវត្ថុ​បន្ថែមទៀត ហើយនឹង​ជួយ​បង្កើន​តម្លៃ​របស់​វា និង​បើកទ្វារ​ឱ្យ​សាធារណជន​ធ្វើការ​វិនិយោគ​នៅក្នុង​ក្រុមហ៊ុន​ផងដែរ ប្រាក់ចំណូល​នេះ​ក៏​នឹង​ជួយ​ដល់​អាជីវកម្ម និង​សាធារណជន ក្នុង​ការផ្តល់​ប្រាក់កម្ចី តាមរយៈ​គ្រឹះស្ថាន​មីក្រូហិរញ្ញវត្ថុ និង​ក្រុមហ៊ុន”៕

បើទោះជា​កម្ពុជា​មានការ​រីកចម្រើន​ខ្លាំង​លើ​ប្រព័ន្ធ​អេឡិចត្រូនិក​ក្នុងការ​ទូទាត់​ប្រាក់​សម្រាប់​សេវាផ្សេងៗគួរកត់សម្គាល់​ក៏ដោយ ក៏ត្រូវ​បាន​គេ​មើលឃើញថា កម្ពុជា​កំពុងស្ថិត​ក្នុងដំណាក់កាល​នៃ​ការកសាង​មូលដ្ឋានគ្រឹះ​លើ​ប្រព័ន្ធ​ទូទាត់​តាមបែប​អេឡិចត្រូនិក​នេះ​នៅឡើយ។

ក្នុងជំនួប​ដ៏​កម្រ​មួយ​ជាមួយ​ប្រតិភូ​នៃ​ក្រុមហ៊ុន Union Pay កាលពីពេលថ្មីៗ ឯកឧត្តម អូន ព័ន្ធមុនីរ័ត្ន ឧបនាយករដ្ឋមន្ត្រី រដ្ឋមន្ត្រីក្រសួង​សេដ្ឋកិច្ច និង​ហិរញ្ញវត្ថុ​បាន​មានប្រសាសន៍ថា ស្ថិតក្រោម​កម្មវិធី​កែទម្រង់​ការគ្រប់គ្រង​ហិរញ្ញវត្ថុ​សាធារណៈ កម្ពុជា​បាន​កសាង និង​ប្រើប្រាស់​សេវាកម្ម​មួយចំនួន​តាមបច្ចេកវិទ្យា​ព័ត៌មានវិទ្យា ដូចជា​ការបើក​ប្រាក់បៀវត្ស​រ៍​ជូន​មន្ត្រីរាជការ​តាម​ប្រព័ន្ធ​ធនាគារ ការទូទាត់​ទៅ​អ្នកផ្គត់ផ្គង់​តាម​ប្រព័ន្ធ​អេឡិចត្រូនិក ការរៀបចំ​ប្រព័ន្ធ​ចំណូល​ពន្ធ​និង​មិនមែន​សារពើពន្ធ ការរៀបចំ​សិក្សា​លើ​ការផ្ទេរ​ប្រាក់​អេឡិចត្រូនិក​រវាង​រតនាគារជាតិ និង​ធនាគារពាណិជ្ជ​ជាដើម។

ឯកឧត្តម​មានប្រសាសន៍​សង្កត់ធ្ងន់ថាដូច្នេះកម្ពុជា​កំពុងស្ថិត​ក្នុងដំណាក់កាល​នៃ​ការកសាង​មូលដ្ឋានគ្រឹះ​លើ​ប្រព័ន្ធ​ទូទាត់​តាមបែប​អេឡិចត្រូនិក​នេះ ដែល​តម្រូវឱ្យ​កសាង​ឱ្យបាន​នូវ​មូលដ្ឋាន​រួមមួយ (Platform) សម្រាប់​ផ្សារភ្ជាប់​រវាង​អង្គភាព ឬ​ស្ថាប័ន​ពាក់ព័ន្ធ ដូចជា​រតនាគារជាតិធនាគារជាតិ និង​អង្គភាព​ពាក់ព័ន្ធ​ដទៃទៀត​ជាដើម។ ប្រព័ន្ធ​ព័ត៌មានវិទ្យា​នេះ​នឹង​ជួយ​ឱ្យ​ការផ្តល់សេវា​សាធារណៈកា​ន់​តែមាន​ប្រសិទ្ធភាព តម្លាភាព និង​គណនេយ្យភាព​ឡើង។ បច្ចេកវិទ្យា​ព័ត៌មាន​ហិរញ្ញវត្ថុ ការទូទាត់​តាម​ប្រព័ន្ធ​អេឡិចត្រូនិក និង​កា​រៀបចំ​ប្រព័ន្ធ​រដ្ឋាភិបាល​វៃឆ្លាត (Smart Government) គឺ​ពិតជា​ចូលរួមចំណែក​យ៉ាងសំខាន់​ក្នុងការ​អភិវឌ្ឍ​សេដ្ឋកិច្ចជាតិ។

លោក SHI Wenchao នាយក​ក្រុមហ៊ុន Union Pay បានបង្ហាញ​ពីបទ​ពិសោធ​ផ្ទាល់​ថា ក្រុមហ៊ុន​លោក​កំពុង​រីកចម្រើន​ខ្លាំង​នៅលើ​ទីផ្សារ​ក្នុងប្រទេស​ចិន ក៏ដូចជា​នៅលើ​ពិភពលោក​ដែរ ហើយ​ដើម្បី​ជួយផ្តល់​បទពិសោធ និង​ចូលរួម​លើកកម្ពស់​វិស័យ​បច្ចេកវិទ្យា ពិសេស​លើ​សេវា​ផ្ទេរ និង​ទូទាត់​ប្រាក់​នៅ​កម្ពុជា​ឱ្យ​កាន់តែ​រីកចម្រើន​ខ្លាំង​ថែម​មួយកម្រិត​ទៀតទើប​ក្រុមហ៊ុន​ឈាន​ជើង​ចូលមកក្នុង​ប្រទេស​កម្ពុ​ជានា​រយៈពេល​ប៉ុន្មាន​ឆ្នាំ​កន្លងមកនេះ។ លោក​ថា Union Pay ផ្តល់​ភាពងាយស្រួល​ដល់​ការទូទាត់​ប្រាក់ ការផ្ទេរ​ប្រាក់​បាន​លឿន​ឆាប់រហ័ស និង​មាន​ទំនុកចិត្ត​ខ្ពស់​នៅលើ​ទីផ្សារ​ពិភពលោក។

ពាក់ព័ន្ធ​ករណីនេះ លោក ជា សេរី​វ​ឌ្ឍ មន្ត្រី​ជំនាញ​បច្ចេកវិទ្យា​ជាន់ខ្ពស់​ក្រុមហ៊ុន Microsoft ប្រចាំ​នៅ​កម្ពុជា និង​ជាទី​ប្រឹក្សា​ថ្នាក់ជាតិ​លើ​ការអភិវឌ្ឍ​ប្រព័ន្ធ​Onlineរបស់​រដ្ឋាភិបាល មានប្រសាសន៍​ទទួលស្គាល់​ថា កម្ពុជា​ពិតជា​ស្ថិតនៅក្នុង​ដំណាក់កាល​ក​សាង​មូលដ្ឋានគ្រឹះ​លើ​ប្រព័ន្ធ​ទូទាត់​តាមបែប​បច្ចេកវិទ្យា​នេះ​ប្រាកដ​មែន ដោយសារតែ​ក្រុមហ៊ុន​ឯកជន​ក៏ដូចជា​ធនាគារពាណិជ្ជ​មួយចំនួន​បានដាក់​ឱ្យ​អតិថិជន​ប្រើប្រាស់​បច្ចេកវិទ្យា​ក្នុងការ​ទូទាត់​សេវាផ្សេងៗរបស់ខ្លួន មានដូចជា​ធនាគារ​អេ​ស៊ី​ដា​បាន​ដាក់ឱ្យ​អតិថិជន​ប្រើ​ប្រព័ន្ធ​អេស៊ីលីដា​ទាន់​ចិត្ត​សម្រាប់​ឱ្យ​អតិថិជន​អាច​ផ្ទេរប្រាក់ ទូទាត់​ទំនិញ​នៅលើ​ទីផ្សារ និង​ទូទាត់​សេវាកម្ម​តាក់ស៊ី​ជាដើម ចំណែក​ធនាគារ​កាណាឌីយ៉ា​បង្កើត​ប្រព័ន្ធ​ទូទាត់ តារា​ផេ (Dara Pay) ដែល​អាចឱ្យ​អតិថិជន​មាន​ភាពងាយស្រួល​ក្នុងការ​ផ្ទេរប្រាក់ ឬ​វេរ​លុយ ហើយ​ធនាគារ​ABA បង្កើត​ប័ណ្ណ ABA Pay សម្រាប់​ឱ្យ​អតិថិជន​មាន​ភាពងាយស្រួល​ក្នុងការ​ទូទាត់​សាច់ប្រាក់​តាម​ប្រព័ន្ធ​អេឡិចត្រូនិក​នេះដែរ ប៉ុន្តែ​ភាគច្រើន​នៃ​អតិថិជន​អាចមាន​លទ្ធភាព​ត្រឹមតែ​បង់​ទឹក​ភ្លើង​របស់​រដ្ឋ​តាម​ប្រព័ន្ធ​អន​ឡាញ​ប៉ុណ្ណោះ មិនទាន់មាន​ភាពទូលំទូលាយ​អាច​ទិញ​ទំនិញ​គ្រប់​ប្រភេទ​នៅលើ​ទីផ្សារ​បាន​នៅឡើយ​ទេ ដែល​ធ្វើឱ្យ​អតិថិជន​ភាគច្រើន​នៅ​មិនទាន់មាន​ការចាប់អារម្មណ៍​ប្រើប្រាស់ ឬ​ទូទាត់​ប្រាក់​តាម​ប្រព័ន្ធ​អន​ឡាញ​នេះ​នៅឡើយ។

ទោះជា​យ៉ាងនេះ​ក្ដី ក៏​កម្ពុ​ជាមាន​សក្តានុពល​ខ្លាំង​ក្នុង​ការផ្តល់​សេវាកម្ម​ឱ្យ​អតិថិជន​ប្រើ​ប្រព័ន្ធ​ទូទាត់​តាម​អន​ឡាញ (Online Payment)នេះ​កាន់តែច្រើន​ដែរ ដោយសារ​ប្រជាជន​កម្ពុ​ជាមាន​ទំនោរ​ប្រើប្រាស់​ទូរស័ព្ទ​ស្មា​ត​ហ្វូ​ន​ស្ទើរតែ​គ្រប់គ្នាហើយ​មនុស្ស​មួយចំនួន​កាន់​ទូរស័ព្ទ​ដៃដល់​ទៅ2គ្រឿង ឬ3គ្រឿង ដែល​ធ្វើឱ្យ​ទូរស័ព្ទដៃ​នៅ​កម្ពុ​ជាមាន​ចំនួន​ច្រើនជាង​ចំនួន​ប្រជាជន​ទៅទៀត ហើយ​ដើម្បីឱ្យ​អតិថិជន​មានការ​គាំទ្រ និង​ងាក​មក​ប្រើ​ប្រព័ន្ធ​ទូទាត់​ឱ្យបាន​កាន់តែ​ច្រើនឡើង​នោះ ក្រុមហ៊ុន​ឯកជន​នានា​រួម​នឹង​ធនាគារ​គួរ​សហការគ្នា​ស្វែងរក​ដៃគូ​លក់ទំនិញផ្សេងៗឱ្យបាន​កាន់តែច្រើន ដើម្បីឱ្យ​អតិថិជន​មានលទ្ធភាព​ទូទាត់​ទំនិញ​នៅលើ​ទីផ្សារ​នានា​បាន​ទូលំទូលាយ នៅពេលដែល​គាត់​មាន​តម្រូវ​ការទិញ​សម្ភារ​ប្រើប្រាស់​នៅតាម​ផ្សារ​នានា​ទូទាំង​ព្រះរាជាណាចក្រ​កម្ពុជា៕

គ្រប់គ្នា​សុទ្ធតែ​ចង់​ក្លាយជា​មនុស្ស​សំខាន់​សម្រាប់​សង្គម ក្លាយជា​អ្នកជំនាញ​ល្បីល្បាញ ឬ​ក្លាយជា​មនុស្ស​ដែលមាន​សមត្ថភាព និង​លទ្ធភាព​ខ្ពស់​គួរឱ្យ​ស្ងើចសរសើរ​ជាដើម។ ដើម្បី​សម្រេចបាន​នូវ​វត្ថុបំណង​សំខាន់​សម្រាប់​ជីវិត​ទាំងអស់នេះ ពួកគេ​ចាំបាច់​ត្រូវ​ឆ្លងកាត់​ការអប់រំ ដែលជា​ថ្នាល​បណ្តុះបណ្តាល​អាជីព និង​វិជ្ជាជីវៈ ហេតុនេះហើយ​ទើប​និស្សិត​ភាគច្រើន​តែងតែ​បារម្ភ​ខ្លាំង​ពី​ការជ្រើសរើស​ជំនាញ។ ការជ្រើសរើស​ជំនាញ ចាំបាច់​ត្រូវតែ​មើល​ឱ្យបាន​វែងឆ្ងាយ ព្រោះ​ជំនាញ​ខ្លះ​ចាប់ផ្តើម​ពី​ការធ្វើការងារ​ដ៏​សាមញ្ញ​បំផុត តែ​អនាគត​មានឱកាស​ល្អ​សម្រាប់​ទទួលបាន​អាជីព​ប្រកបដោយ​សក្តានុពល ខណៈ​និស្សិត​មួយចំនួន​មើល​ត្រឹមតែ​បច្ចុប្បន្នភាព​នៃ​អាជីព ក៏​សម្រេចចិត្ត​បោះបង់​មុខវិជ្ជា​ទាំងនោះ ដែល​អាចធ្វើ​ឱ្យគេ​ខាតបង់ និង​ស្តាយក្រោយ​នៅ​ថ្ងៃ​អនាគត។

រដ្ឋលេខាធិការ​ក្រសួង ការងារ និង​បណ្តុះបណ្តាល​វិជ្ជាជីវៈ ឯកឧត្តម ពេ​ជ សោភ័ន បាន​លើកឡើងថា យុវជន​មួយចំនួន​នាពេល​បច្ចុប្បន្ន​ចង់​ធ្វើការ​ងារ​ណា​ដែល​មើលទៅ​ខ្ពង់ខ្ពស់ ឬ​សំខាន់ភ្លាមៗ តែ​ក្រោយពេល​ចេញពី​សាកលវិទ្យាល័យ​មាន​ភាពលំបាក​ក្នុងការ​ប្រកួតប្រជែង ហើយ​អ្នកខ្លះ​ធ្វើការ​ងារ​ខុស​ជំនាញ​ថែម​ទៀតផង ព្រោះ​ការងារ​ដែល​ខ្លួន​កំពុង​សិក្សា​មាន​ភាព​ចង្អៀត។ នៅ​កម្ពុជា​យើង​មាននិស្សិត​ជាច្រើន​រៀន​បាន​ខ្ពស់ ហួស​ពី​អាជីព​ដែល​គេ​ត្រូវការ​ខ្លាំង ហេតុនេះ​គាត់​អាច​ប្រឈម​នឹង​បញ្ហា ស្របពេល​ដែលមាន​និស្សិត​ចំនួន​តិចតួច​ប៉ុណ្ណោះ​ដែល​បាន​ចាប់យក​ឱកាស​ពិតប្រាកដ​ហើយ​អភិវឌ្ឍ​ខ្លួន​ឱ្យ​ក្លាយជា​ធនធានមនុស្ស​ដ៏​សំខាន់​នៅ​ថ្ងៃ​អនាគត។

ឯកឧត្តម ពេ​ជ សោភ័ន បាន​មានប្រសាសន៍ថា៖ “បច្ចុប្បន្ន​បើ​និយាយ​ពី​ការជ្រើសរើស​អាជីព សម្បូរ​វិស្វករ​ច្រើន តែ​អ្នកជំនាញ​បច្ចេកទេស​មិនសូវ​សម្បូរ​នោះទេ។ តែ​ស្ថានភាព​ទីផ្សារ​ជាក់ស្តែង គេ​ត្រូវការ​អ្នកជំនាញ​បច្ចេកទេស​ច្រើនជាង​វិស្វករ ហេតុនេះ​ម្ចាស់​គម្រោង ឬ​ក្រុម​ហ៊ុ​នានា​ត្រូវ​បង្ខំចិត្ត​ជួល​កម្មករ​ជំនាញ​ក្នុងតម្លៃ​ថ្លៃ។ ប្រសិនបើ​យុវជន​ចេះ​ចាប់​ឱកាស​នេះ​ពេលខ្លះ​គាត់​អាច​ទទួលបាន​លទ្ធផល​ល្អ ព្រោះ​គាត់​អាច​ទទួលបាន​ប្រាក់ខែ​ច្រើន ហើយ​ទីផ្សារ​ទូលាយ​ថែម​ទៀតផង”។

អ្នកជំនាញ​ផ្នែក​ការងារ​ខាងលើ​បានលើកឡើង​ផងដែរ​ថា និស្សិត​គួរ​មើល​ឱ្យបាន​ច្រើន​ជំហាន​បន្តិច​ពី​អនាគត​នៃ​ការងារ។ មាន​អ្នកខ្លះ​គាត់​មិន​ចាប់យក​វិស្វករភ្លាមៗទេ តែ​គាត់​ចាប់យក​អាជីព​ជា​កម្មករ​ជំនាញ ឬ​អ្នកមធ្យម​បច្ចេកទេស ដែលជា​ច្រក​យ៉ាងសំខាន់​ក្នុងការ​ធ្វើឱ្យ​គាត់​ក្លាយជា​មនុស្ស​ពូកែ​ម្នាក់។ ចំពោះ​អ្នកជំនាញ​បច្ចេកទេស ចេញមក​ភ្លាម​ត្រូវធ្វើ​ការងារ​ក្រោម​គេ​បន្តិច តែ​ពេលខ្លះ​គេ​ខ្វះ​គាត់​មិនបាន ហើយ​សិក្សា​តែ2 ឬ3ឆ្នាំ គាត់​អាច​ចេញមក​ធ្វើការ​ងារ​ដែល​អាចធ្វើឱ្យ​គាត់​រកបាន​ប្រាក់ចំណូល​ផង និង​មាន​បទពិសោធ​ការងារ​ផង។ បន្ទាប់ពី​ទទួលបាន​របស់​សំខាន់​ទាំង2 នេះហើយ គាត់​អាច​បន្ត​យក​សញ្ញាបត្រ​វិស្វករ ដែល​ធ្វើឱ្យ​គាត់​មានឱកាស​ខ្ពស់​ជាងគេ​ក្នុង​ការទទួល​បានការ​ងារ​ល្អ ព្រោះថា ប្រសិនបើ​គាត់​ចេញពី​សាលា​ភ្លាម គាត់​ស្វែងរក​ការងារ​ជា​វិស្វករ​ភ្លាម គាត់​ត្រូវ​ប្រកួតប្រជែង​ខ្លាំង​ហើយ​ពេលខ្លះ​ត្រូវ​ចាប់ផ្តើម​ពី​ការងារ​តិចជាង​អ្នកបច្ចេកទេស​ផង​ក៏មាន។ ចំពោះ​អ្នក​ដែល​ចាប់ផ្តើម​ពី​ការងារ​ជា​អ្នកមធ្យម​បច្ចេកទេស គាត់​អាច​មានឱកាស​ទទួលបាន​ប្រាក់ខែ​ខ្ពស់ជាង ព្រោះ​គាត់​ស្គាល់​ការងារ​ច្បាស់ មាន​ទំនាក់ទំនង​ល្អ និង​មាន​លុយកាក់​ច្រើន​គួរសម ដែល​អ្នកខ្លះ​គាត់​អាច​ចេញ​រកស៊ី​ខ្លួនឯង​ថែមទៀត​ក៏មាន ប្រសិនបើ​គាត់​ពូកែ​ខ្លាំង។

ជាទូទៅ​និស្សិត​ភាគច្រើន​នៅ​កម្ពុជា​ត្រូវបាន​គេ​មើលឃើញថា ចូលចិត្ត​ធ្វើការ​ងារ​នៅក្នុង​ការិយាល័យ ហើយ​មិនសូវ​ចូលចិត្ត​ការងារ​ណា​ដែល​ធ្វើ​នៅ​ទីវាល ឬ​ចេញ​ក្រៅ​ច្រើន​នោះទេ។ ចំពោះ​ការងារ​ដែល​ធ្វើ​ការងារ​ពាក់ព័ន្ធ​នឹង​បម្រើ​សេវាកម្ម ឬ​ចាប់ផ្តើម​ពី​ការងារតូចៗក៏​មិនសូវ​ឃើញ​មាន​អ្នក​ចូលចិត្ត​ដែរ តែ​ជា​លទ្ធផល​អ្នក​ដែល​កំពុងមាន​ស្នាដៃក៏ដូចជា​សមត្ថភាពខ្លាំងៗមិនតិច​ទេ​ដែល​អភិវឌ្ឍ​ខ្លួន​មកពី​ការងារ​ដែល​គ្រប់គ្នា​មើលរំលង​នេះ។

លោក ជួប រតនា ប្រធាន​ផ្នែក​ស្តង់ដារ និង​វាយតម្លៃ​គ្រូ​បង្គោល​អាស៊ាន នៃ​ក្រសួងទេសចរណ៍ បាន​លើកឡើងថា ការធ្វើការងារ​ចាំបាច់​ត្រូវ​សម្លឹង​ឱ្យដល់​អនាគត​ធំ​បំផុត​នៃ​ឱកាស​ការងារ​ដែល​យើង​កំពុង​ធ្វើ។ មាន​និស្សិត​ជាច្រើន​បាក់​ទឹកចិត្ត និង​អស់សង្ឃឹម​នៅពេល​ឃើញ​គេ​ចេញពី​មហាវិទ្យាល័យ​ដែល​ចំណាយលុយ​ច្រើន​ពាន់​ដុល្លារ តែ​ទទួលបាន​ប្រាក់ចំណូលដំបូងៗតិចតួច ឬ​ធ្វើ​ការងារតូចៗជាដើមតែ​ពួកគាត់​ភ្លេច​គិតថា ការងារ​ខ្លះ​ត្រូវ​ចាប់ផ្តើម​ពី​តូច តែមាន​ផ្លែផ្កា​ល្អ​នៅ​ថ្ងៃ​ខាងមុខ ដែលមាន​ចំណូល​ច្រើន។ ជា​ឧទាហរណ៍​ជាក់ស្តែង​ការងារ​ទេសចរណ៍ មាន​និស្សិត​ខ្លះ​មិន​ចង់​រៀន​ផ្នែក​នេះ​នោះទេ ព្រោះ​គាត់​គិតថា​រៀន​អស់​លុយ​ច្រើន ហើយ​ចេញមក​ធ្វើ​ត្រឹមតែ​ជាង​អ្នកបម្រើ​សេវាកម្ម​ក្នុង​ភោជនីយដ្ឋាន ឬ​សណ្ឋាគារ​ជាដើម តែ​គាត់​ភ្លេច​គិតថា​នេះ​គ្រាន់តែ​ជាការ​ចាប់ផ្តើម​នៃ​វិថី​ឆ្ពោះទៅរក​ភាពជា​អ្នកគ្រប់គ្រង​ប៉ុណ្ណោះ។

លោក ជួប រតនា បាន​និយាយថា៖ “អ្នកកាន់ការ​ងារ​គ្រប់គ្រង​សេវាកម្ម​ក្នុង​ភោជនីយដ្ឋាន និង​សណ្ឋាគារ​ទាំងអស់​សុទ្ធតែ​ត្រូវ​អភិវឌ្ឍ​ខ្លួន​ចេញពី​អ្នកបម្រើ​សេវាកម្ម​តូច​បំផុត​ទាំងអស់។ អាជីព​ក្នុង​វិស័យ​ទេសចរណ៍​មាន​រូបភាព​ដំបូង​មិនសូវ​ល្អមើល តែ​វា​មាន​ផលប្រយោជន៍​ខ្ពស់​នៅ​ថ្ងៃ​ខាងមុខ ហើយ​សង្គម​ក៏ត្រូវ​ការ​ខ្លាំង​ដែរ។ អ្នក​ដែល​សម្រេចចិត្ត​តស៊ូ​ជម្នះ​ការលំបាក​ពីដំបូង​ក្នុង​វិស័យនេះ អាចមាន​ឱកាស​ច្រើន​ក្នុងការ​កាន់ការ​ងារសំខាន់ៗនៅ​ថ្ងៃ​ខាងមុខ”។

លោក ជួប រតនា បានបញ្ជាក់​ផងដែរ​ថា អ្នកណា​ក៏ត្រូវ​ចាប់ផ្តើម​ពី​តូច​ដែរ ហេតុនេះ​ប្រសិន​និស្សិត​ដាក់ចិត្ត​ដាក់​កាយ​គិត​ឱ្យបាន​ល្អិតល្អន់ ហើយ​ជ្រើសរើស​អាជីព​ដោយ​គិតគូរ​ឱ្យបាន​វែងឆ្ងាយ​ពួកគេ​នឹង​អាច​ទៅដល់​គោលដៅ​ប្រកបដោយ​ភាពល្អប្រសើរ ហើយ​អ្នក​ដែល​តែងតែ​បោះបង់​ឱកាសតូចៗ និង​មិន​មើល​ឱ្យបាន​វែងឆ្ងាយ​អាច​នឹង​ស្តាយក្រោយ​នៅពេល​ឃើញ​គេ​ទទួលបាន​លទ្ធផល​ល្អ​ហួស​ពី​ការ​ស្មាន៕