Author: ធឿន មករា

ទស្សនៈវិជ្ជមានលើវិស័យកៅស៊ូ ខណៈចំណូល 10ខែ ឆ្នាំ2018ទទួលបាន 218លានដុល្លារ
ទោះបីជានៅក្នុងប្រទេសជិតខាងមួយចំនួនមានបញ្ហាផលិតកម្មក្ដី ក៏ទិន្នផលកៅស៊ូរបស់កម្ពុជានឹងកើនឡើងនៅឆ្នាំ2018ដែរ ដោយសារលក្ខខណ្ឌអាកាសធាតុអំណោយផលហើយវិស័យនេះក៏ទទួលបានអត្ថប្រយោជន៍ពីស្ថិរភាពតម្លៃផងដែរ។
ឯកឧត្តម ប៉ុល សុផា អគ្គនាយកនៃអគ្គនាយកដ្ឋានកៅស៊ូបានបង្ហាញទស្សនវិស័យសម្រាប់វិស័យកៅស៊ូក្នុងស្រុកថា នៅតែមានភាពវិជ្ជមានដោយផលិតកម្មនឹងកើនឡើងជារៀងរាល់ឆ្នាំ និងមានតម្លៃថេរ។
ឯកឧត្តម ប៉ុល សុផា អគ្គនាយកនៃអគ្គនាយកដ្ឋានកៅស៊ូ
ឯកឧត្តមបានថ្លែងថា មិនដូចប្រទេសផ្សេងទៀតនៅក្នុងតំបន់ដែលដាំដើមកៅស៊ូនៅលើដីពុំសូវមានជីជាតិនោះឡើយ កៅស៊ូរបស់កម្ពុជាភាគច្រើនស្ថិតនៅតំបន់ដែលមានដីសម្បទានសម្បូរជីជាតិ ដែលឱ្យផលិតកម្មកើនឡើងទោះបីជាទើបមានទឹកជំនន់ថ្មីៗក៏ដោយ។
ឯកឧត្តមបានពន្យល់ថា លក្ខខណ្ឌអាកាសធាតុល្អនៅក្នុងប្រទេសកម្ពុជាកំពុងធ្វើឱ្យផលិតកម្មកៅស៊ូកើនឡើង។ លោកបញ្ជាក់ថា៖“មានសញ្ញាណល្អជាច្រើនសម្រាប់វិស័យកៅស៊ូកម្ពុជា នៅចុងឆ្នាំនេះយើងរំពឹងថា នឹងផលិតបានកៅស៊ូប្រមាណជាង 220,000តោន”។
សូមបញ្ជាក់ថា កម្ពុជាបានផលិតកៅស៊ូតាំងពីឆ្នាំ2007មក និងបច្ចុប្បន្នមានចម្ការកៅស៊ូចំនួន440,000ហិកតានៅក្នុងប្រទេស ដែលក្នុងនោះមាន 200,000ហិកតាកំពុងត្រូវបានគេប្រមូលផលហើយគេរំពឹងថា ផលិតកម្មនឹងបន្តពង្រីកបន្ថែមទៀត។ ចំពោះតម្លៃកៅស៊ូវិញ នៅមានស្ថិរភាពប៉ុន្តែអ្នកផលិតសង្ឃឹមថា វានឹងកើនឡើងនាពេលអនាគត ប្រសិនបើការផ្គត់ផ្គង់សកលកំពុងធ្លាក់ចុះ និងស្តុកនៅប្រទេសចិន និងជប៉ុននៅតែមានទំហំធំ។
យោងតាមក្រសួងកសិកម្មបាននិយាយថា តម្លៃជាមធ្យមរបស់កៅស៊ូគឺ 1,394ដុល្លារក្នុងមួយតោន។ ប្រទេសវៀតណាមនៅតែជាទីផ្សារសំខាន់សម្រាប់កៅស៊ូរបស់កម្ពុជា ហើយរដ្ឋាភិបាលកំពុងចរចាជាមួយប្រទេសចិនដែលជាអ្នកនាំចូលកៅស៊ូធំបំផុតក្នុងពិភពលោកដើម្បីចាប់ផ្ដើមនាំចេញដោយផ្ទាល់។ ការចរចាផ្តោតលើបញ្ហាផ្សេងៗគ្នារួមទាំងពន្ធដែលមានស្រាប់ផង ដោយរដ្ឋាភិបាលចិននៅតែពុំទាន់សម្រេចចិត្តថា តើនឹងផ្តល់ការអនុគ្រោះពន្ធដល់កៅស៊ូកម្ពុជាដែរឬអត់?។
បើតាមឯកឧត្តម ប៉ុល សុផា បានឱ្យដឹងថា៖ “កម្ពុជានឹងមិនធ្វើតាមអ្នកផលិតកៅស៊ូធំៗក្នុងការផ្លាស់ប្តូរផលិតកម្មដើម្បីបង្កើនតម្លៃនោះទេ យើងជាអ្នកផ្គត់ផ្គង់តូចមួយនៅលើទីផ្សារពិភពលោកហើយបើទោះជាមានការធ្លាក់ចុះតម្លៃក៏ដោយ ក៏យើងនឹងមិនកាត់បន្ថយផលិតកម្ម ឬកាត់បន្ថយការដាំកៅស៊ូដែរ ព្រោះថា ការផ្គត់ផ្គង់កៅស៊ូលើសនៅលើទីផ្សារពិភពលោក តែងតែប៉ះពាល់ដល់តម្លៃក្នុងស្រុក”។ ការកត់សម្គាល់របស់លោកបានកើតមានបន្ទាប់ពីប្រទេសថៃដែលជាអ្នកផ្គត់ផ្គង់កៅស៊ូធំបំផុតមួយនៅលើពិភពដែលបានបង្ហាញពីផែនការកាត់បន្ថយផលិតកម្មដើម្បីបង្កើនតម្លៃក្នុងស្រុក។
យោងតាមក្រសួងកសិកម្ម រុក្ខាប្រមាញ់ និងនេសាទ បានឱ្យដឹងថា បច្ចុប្បន្នកម្ពុជាមានរោងចក្រសិប្បកម្មកែច្នៃកៅស៊ូចំនួន 139កន្លែង ដោយអាចផលិតកៅស៊ូស្ងួតបានជាង 19ម៉ឺនតោនក្នុងមួយឆ្នាំ។ ក្នុងឆ្នាំ2017 ប្រាក់ចំណូលបានពីការលក់ជ័រកៅស៊ូមានរហូតដល់ជិត 300លានដុល្លារអាមេរិក ដែលចំណូលនេះបានរួមចំណែកយ៉ាងធំធេងក្នុងការទ្រទ្រង់កំណើនសេដ្ឋកិច្ចក្នុងរង្វង់7%។
ក្នុងជំនួបកាលពីពេលថ្មីៗនេះ មន្ត្រីជាន់ខ្ពស់នៃអង្គការស្បៀងអាហារ និងកសិកម្ម FAO បានជួបពិភាក្សាជាមួយនឹងឯកឧត្ដមរដ្ឋមន្ដ្រីក្រសួងកសិកម្មរុក្ខាប្រមាញ់ និងនេសាទ ស្តីពីការរៀបចំបង្កើតគម្រោងថ្នាក់តំបន់ដែលពាក់ព័ន្ធនឹងប្រទេសចំនួន3 គឺ កម្ពុជា ថៃ និងប្រទេសមីយ៉ាន់ម៉ាលើវិស័យកៅស៊ូដោយបានផ្ដោតសំខាន់ទៅលើវិស័យកៅស៊ូនៅកម្ពុជាដែលធ្វើឱ្យមានកៅស៊ូកម្ពុជាស្ថានភាពនឹងនរ និងមានចីរភាពឡើងវិញ។
លោក បណ្ឌិត Pierre-Marie Bosc មន្ត្រីជាន់ខ្ពស់នៃអង្គការស្បៀងអាហារ និងកសិកម្ម FAO មានប្រសាសន៍ថា កសិករផលិតកៅស៊ូមានបញ្ហាប្រឈមជាខ្លាំងគួរឱ្យព្រួយបារម្ភ ជាពិសេសលើបញ្ហាតម្លៃកៅស៊ូធម្មជាតិកំពុងធ្លាក់ថ្លៃ និងការប្រែប្រួលខាងអាកាសធាតុ រួមទាំងទិន្នផលកៅស៊ូបានធ្លាក់ចុះ។
គម្រោងថ្នាក់តំបន់ត្រីភាគីរវាងប្រទេសទាំង3នឹងធ្វើការផ្ដោតសំខាន់ទៅលើប្រព័ន្ធសង្កេតការណ៍ការសិក្សាស្រាវជ្រាវ និងវិភាគជាលម្អិតនៃលទ្ធផលដែលទទួលបាននៃប្រទេសនីមួយៗ ដើម្បីធ្វើការប្រៀបធៀប និងវាយតម្លៃអំពីស្ថានភាព ក៏ដូចជាប្រសិទ្ធភាពនៃការអនុវត្តការដាំដុះ និងការប្រមូលផលជ័រកៅស៊ូ រួមទាំងធ្វើការកែសម្រួល។
លោក ង៉ែត ជូ ទីប្រឹក្សាសេដ្ឋកិច្ច និងអភិវឌ្ឍន៍នៃក្រុមហ៊ុន Emerging Market Consulting យល់ឃើញថា វិស័យមួយនេះនឹងប្រសើរឡើង បើទោះបីជាមានពេលខ្លះធ្លាក់ចុះក៏ដោយ តែជារួម គឺត្រូវតែកើនឡើងនាថ្ងៃអនាគត។
លោក ង៉ែត ជូ ថ្លែងប្រាប់កាសែតឡារ៉ែនថា៖”ថ្វីដ្បិតតែខ្ញុំពុំមានព័ត៌មាននៃការវិវឌ្ឍថ្មីៗនៃវិស័យកៅស៊ូក្ដី តែខ្ញុំយល់ឃើញដូច្នេះថា វិស័យកៅស៊ូឆ្នាំខ្លះវាធ្លាក់ថ្លៃក្នុងរយៈពេលខ្លី ដោយសារតែការផ្គត់ផ្គង់លើសតម្រូវការជាដើម ប៉ុន្ដែជារួម និន្នាការទីផ្សារកៅស៊ូ វាត្រូវតែឡើងថ្លៃ ដោយផ្អែកលើការរីកចម្រើននៃឧស្សាហកម្មកែច្នៃមួយចំនួននៅក្នុងស្រុកម្យ៉ាងយើងមានតែទីផ្សារនាំចេញដូច្នេះយើងត្រូវជំរុញការផលិត ការធានាពីគុណភាព និងនិរន្ដរភាពនៃផលិតផល”។
គិតត្រឹមរយៈពេល10ខែនៃឆ្នាំ2018នេះ កម្ពុជាបាននាំចេញជ័រកៅស៊ូជាង 16ម៉ឺនតោន ទទួលបានចំណូល 218លានដុល្លារ។ ចំនួននេះបានកើនឡើង23% បើធៀបនឹងរយៈពេលដូចគ្នាកាលពីឆ្នាំ2017។នេះបើតាមរបាយការណ៍របស់អគ្គនាយកដ្ឋានកៅស៊ូដោយរបាយការណ៍ក៏បានបញ្ជាក់ផងដែរថា ក្នុងរយៈពេល10ខែកន្លងមកនេះ តម្លៃកៅស៊ូបានធ្លាក់ចុះក្នុងកម្រិត1,355ដុល្លារក្នុង1តោន គឺធ្លាក់ចុះប្រមាណ18%។
កម្មករកំពុងធ្វើការប្រមូលផលជ័រកៅស៊ូ
សូមបញ្ជាក់ផងដែរថា កៅស៊ូរបស់កម្ពុជាត្រូវបាននាំចេញទៅកាន់ប្រទេសវៀតណាម ម៉ាឡេស៊ី សិង្ហបុរី ចិន និងប្រទេសកូរ៉េខាងត្បូង។ បច្ចុប្បន្នកម្ពុជាមានផ្ទៃដីដាំដុះកៅស៊ូចំនួនជាង 44ម៉ឺនហិកតា ក្នុងនោះផ្ទៃដីដែលចៀរជ័របានមាន 20ម៉ឺនហិកតា ស្មើនឹង47% និងផ្ទៃដីកំពុងថែទាំជាង 24ម៉ឺនហិកតា ស្មើនឹង53%៕
December 6, 2018
អនុវត្តតាមវិធីទាំងនេះ ទោះដើរលេងយូរប៉ុណ្ណាក៏ស្បែកនៅតែស្រស់ស្អាតដែរ!
“ចង់ទៅដើរលេងឱ្យបានច្រើនថ្ងៃ សប្បាយឱ្យអស់ចិត្តតែម្តង ប៉ុន្តែខ្លាចតែពេលត្រឡប់មកវិញស្បែកមើលមិនយល់ទេខ្ញុំ” នេះប្រហែលជាក្តីកង្វល់មួយដែលស្ថិតនៅក្នុងអារម្មណ៍ និងគំនិតរបស់នារីមួយចំនួនធំ ដែលនិយមភាពស្រស់ស្អាត នៅពេលត្រូវធ្វើដំណើរកម្សាន្តនាចុងឆ្នាំខាងមុខនេះ។ កុំគិត និងខ្វល់ខ្វាយច្រើនអី សប្បាយឱ្យអស់ដៃទៅណ៎ា ហើយវិធីថែរក្សាស្បែកក្នុងអំឡុងពេលធ្វើដំណើរកម្សាន្តទុកឱ្យ ឡារ៉ែន ជាអ្នករ៉ាប់រង ហើយធានាថា ស្បែករបស់អ្នកពិតជាមិនមានបញ្ហាទេ ឬបើទោះជាមានក៏មិនច្រើនដែរ ប្រសិនបើអ្នកពិតជាបានអនុវត្តតាមយ៉ាងខ្ចាប់ខ្ចួន ត្រូវតាមក្បួនមែននោះ។ អូខេ! ងាកមកអានអំពីក្បួននៃការថែរក្សាស្បែកក្នុងពេលដើរកម្សាន្តទាំងអស់គ្នាដូចខាងក្រោមនេះ៖
គ្រឿងការពារស្បែក : មុនពេលចេញដំណើរសូមពិនិត្យឱ្យច្បាស់ថា កាបូបរបស់អ្នកមានរបស់ការពារស្បែកសំខាន់ៗមួយចំនួនដូចជា ឡេថែរក្សាស្បែក វ៉ែនតាខ្មៅ មួក អាវវែង ឬឆ័ត្រគ្រប់សព្វអស់ហើយឬនៅ? របស់អស់ទាំងនោះនឹងត្រូវយកមកធ្វើជាសេនាដែលមិនអាចខ្វះបានក្នុងការការពារស្បែករបស់អ្នកពីការបំផ្លាញពីកម្តៅថ្ងៃ ហើយវាក៏ត្រូវបានយកមកប្រើតាមពេលវេលារបស់វាផងដែរ។
លាបឡេការពារស្បែក : មុនចេញទៅដើរលេងកម្សាន្ត អ្នកត្រូវលាបឡេការពារស្បែកឱ្យបានមុនប្រហែលជា10នាទីសិនសឹមចេញទៅខាងក្រៅប៉ះនឹងកម្តៅថ្ងៃ។ កុំភ្លេចយកទៅជាប់ខ្លួនជានិច្ចនូវមួក (គួរជាមួកដែលមានហាមធំ) ឬឆ័ត្រ វ៉ែនតាខ្មៅ អាវធំសម្រាប់ពាក់ពីខាងក្រៅ ព្រោះវាជារបស់ដែលអ្នកត្រូវពាក់ជាប់រាងកាយនៅពេលធ្វើដំណើរ (ទោះដើរលេងលើឆ្នេរខ្សាច់ ឬដើរលេងតាមតំបន់ភ្នំក៏ដោយ)។
របៀបការពារស្បែកនៅតំបន់មាត់សមុទ្រ : សម្រាប់ដំណើរកម្សាន្តនៅក្នុងតំបន់សមុទ្រវិញអ្នកត្រូវគិតដល់ការបំពោកឡេការពារស្បែកពីកម្តៅថ្ងៃឱ្យបានក្រាស់បន្តិច មុនពេលអ្នកចុះទៅងូតទឹកសមុទ្រ ឬដើរលេងលើឆ្នេរខ្សាច់ ប៉ុន្តែបើអាកាសធាតុក្តៅខ្លាំង (ពិសេសចន្លោះពីម៉ោង9ព្រឹកដល់ម៉ោង3:30រសៀល អាស្រ័យលើអាកាសធាតុ) អ្នកមិនគួរចុះទៅលេងទឹកសមុទ្រនោះទេ ព្រោះពេលវេលានេះស្បែកអាចនឹងទទួលរងនូវការបំផ្លាញខ្លាំងពីកម្តៅថ្ងៃ។ អ្នកត្រូវងូតទឹកលាងសម្អាតខ្លួន និងកក់សក់ឱ្យបានស្អាតបន្ទាប់ពីលេងទឹកសមុទ្ររួច ហើយក៏មិនត្រូវភ្លេចលាបឡេថែរក្សាស្បែកបន្ថែមជាថ្មីម្តងទៀតផងណា៎៕
December 5, 2018
គន្លឹះ5យ៉ាង កម្ចាត់ភាពខ្មៅស្រអាប់ ជួយឱ្យនារីកាន់តែមានមន្ដស្នេហ៍
បញ្ហាពណ៌សម្បុរនៃស្បែក គឺជារឿងដ៏សំខាន់មួយសម្រាប់នារីនៅក្នុងប្រទេសកម្ពុជាយើងបើទោះបីជាអាកាសធាតុក្ដៅ មានពន្លឺព្រះអាទិត្រខ្លាំងក៏ដោយ ក៏នារីខ្មែរយើងហតែងសង្ឃឹមចង់បានស្បែក-សស្អាតដូចជានារីកូរ៉េដែរ។ យ៉ាងណាមិញកុំទាន់
បាក់ទឹកចិត្តអី ទោះជាស្បែកមិនសភ្លឺចែងចាំដូចជានារីកូរ៉េ ក៏ប៉ុន្ដែទស្សនាវដ្តី ឡារ៉ែន បានពាំនាំនូវគន្លឹះទាំង5យ៉ាងដែលជួយកម្ចាត់ភាពខ្មៅស្រអាប់នៅលើស្បែកដងខ្លួន ផ្ទៃមុខ ឱ្យប្រែមកជាស្រស់ស្អាតតាមបែបធម្មជាតិ និងចំណេញថវិកាច្រើនព្រមទាំងស្រស់ស្អាតបានរយៈពេលយូរផងដែរ។
1. ខាត់ស្បែក
នារីមួយចំនួននិយមលាបេឡការ ពារកម្ដៅថ្ងៃ តែមិនសូវយកចិត្តទុកដាក់ក្នុងការខាត់ស្បែកឡើយ នេះជាមូលហេតុមួយដែលធ្វើឱ្យស្បែកអ្នកកាន់តែខ្មៅស្រអាប់ព្រោះ ថាការខាត់ស្បែកគឺជាការជម្រុះនូវកោសិកាស្បែកចាស់ចេញ ហើយកោសិកាស្បែកដែលរងនូវកម្ដៅព្រះអាទិត្យ វាបានខ្លោចស្លាប់ហើយទោះបីជាអ្នកប្រើឡេលាបការពារកម្ដៅថ្ងៃក៏ដោយ ក៏នៅតែមើលឈើញស្បែករបស់ អ្នកមានសភាពខ្មៅស្រ-អាប់ដែរ។ ដូច្នេះនារីទាំងឡាយគួរតែ យកចិត្ត-ទុកដាក់ក្នុងការខាត់ស្បែក ឬជម្រុះក្អែលនៅលើស្បែកចេញ ដោយប្រើអំបិលខាត់ស្បែកនិងផ្សំលាយសម្រាប់ប្រើ ជាក្រែមខាត់ស្បែក ដើម្បីឱ្យស្បែកទន់ភ្លឺ រលោង។
2. លាបឡេ Whitening Body Lotion
នេះប្រហែល ជាការចាប់ផ្ដើមដំបូងសម្រាប់សុភាពនារីទាំងអស់ក្នុងការប្រើប្រាស់នូវប្រភេទឡេWhitening Body Lotion ដែលត្រឹមត្រូវ ហើយជួយឱ្យស្បែកភ្លឺ រលោង ដោយអនុវត្តតាមវិធីងាយៗដូចជា៖
– ជ្រើសរើសផលិតផលដែលមានម៉ាកល្បីៗមានទំនុកចិត្តអាចថែរក្សាស្បែករបស់អ្នកបានដោយវាមិនមានប្រតិកម្មជាមួយស្បែក និងមិនធ្វើឱ្យស្បែកខូចខាត។
– ត្រូវពិនិត្រមើលប្រភេទឡេ Whitening Body Lotion ថាមានសារធាតុផ្សំពី Niacinamide,
Vitamin C, Vitamin B3/B5 ដែលឬទេ? ព្រោះ វាជួយឱ្យស្បែកសភ្លឺរលោង និងមិនមានគ្រោះថ្នាក់ដល់ស្បែក។
– ប្រើប្រាស់ក្នុងបរិមាណដែលច្រើនគ្រប់គ្រាន់ដល់ស្បែក និងលាបជាប្រចាំថ្ងៃ។
3. ឡេការពារកម្ដៅថ្ងៃ
នារីខ្មែរភាគច្រើននិយម លាបឡេការពារកម្ដៅថ្ងៃតែនៅត្រង់កន្លែងមួយចំនួននៃដងខ្លួនដូចជា ស្បែកមុខ ដៃ និងជើងជាដើម។ ដូច្នេះការស្ថិតនៅក្រោមកម្ដៅថ្ងៃបានធ្វើឱ្យស្បែកនារីៗយើងមានសភាពស្រអាប់ខ្មៅត្រង់កន្លែងមួយចំនួនដែលមិនបានការពារដោយឡេការពារកម្តៅថ្ងៃ ដែលធ្វើឱ្យស្បែកមានសភាពមិនដូចគ្នា។ ការប្រើឡេការពារកម្ដៅថ្ងៃដ៏ត្រឹម-ត្រូវ គឺអ្នកគួរតែលាបជារៀងរាល់2-3ម៉ោងម្ដងព្រោះដើម្បីបន្ថែមប្រសិទ្ធភាពនៃការការពារស្បែកពីកម្ដៅថ្ងៃ អំពូលភ្លើងនៅកន្លែងធ្វើការបានប្រ-សើរឡើងព្រមទាំងស្បែកមានសភាពទន់ ភ្លឺរលោងជានិច្ច។
4. ទទួលទានផ្លែប៉េងបោះ
ការទទួលទានផ្លែប៉េងបោះស្រស់ ជាវិធីថែរក្សាស្បែកដ៏ល្អមួយទៀត ព្រោះថានៅក្នុងផ្លែប៉េងបោះមានសារធាតុម្យ៉ាង ដែលមានឈ្មោះថា Lycopene និងវីតាមីន C ដែលជួយឱ្យស្បែករបស់អ្នកសស្អាត ភ្លឺរលោង និងជួយទំនុកបម្រុងការពាររាងកាយបានយ៉ាងល្អប្រសើរ។ អ្នកអាចទទួលទានជាផ្លែ ឬជាទឹកស្រស់100% ជារៀងរាល់ថ្ងៃក៏បាន គឺពិតជាល្អចំពោះស្បែករបស់អ្នកខ្លាំងណាស់។
5. តុបតែងខ្លួនឱ្យមានភាពទាក់ទាញ
វិធីចុងក្រោយនេះ គឺជាការបន្ថែមទំនុកចិត្តនៅពេលដែលស្ថិតនៅ ក្រោមកម្ដៅថ្ងៃ ដោយអ្នកគួរស្លៀកសម្លៀកបំពាក់បែបជិតល្អ ដូចជាអាវដៃវែង និងខោជើងវែងជាដើម។ យើងសូមណែនាំឱ្យប្រើសម្លៀកបំពាក់វែងៗ ដែលមានពណ៌ស ព្រោះមើលទៅស័ក្ដិសម និងជួយលើកសម្រស់របស់អ្នកបានមួយកម្រិតទៀត ដែលមើលទៅទាក់ទាញបំផុត។
គន្លឹះទាំង5 ដែលបានរៀបរាប់ខាងលើ នេះមិនមែនជាអាថ៌កំបាំងអ្វីនោះទេ ក៏ប៉ុន្ដែជាវិធីសាស្ត្រងាយៗ ដែលជួយឱ្យសុភាពនារីទាំងឡាយទទួលបាននូវសម្រស់ និងសុខភាពស្បែកល្អមិនបណ្ដោយឱ្យ ស្បែករបស់អ្នកចាស់ទៅតាមអាយុកាលដែលកន្លង ទៅជារៀងរាល់ថ្ងៃនោះឡើយ ដូចពាក្យស្លោកមួយបានពោលថា សម្រស់មិនរង់ចាំយើងឡើយការពារប្រសើរជាងព្យាបាល៕
December 5, 2018
ការសិក្សារួម 4ប្រទេស ជំរុញការតភ្ជាប់ផ្លូវអាកាសតំបន់មេគង្គដើម្បីកំណើនសេដ្ឋកិច្ច
ការសិក្សាស្រាវជ្រាវថ្មីមួយបានរកឱ្យឃើញពីការប្រឈម និងឱកាសក្នុងការបង្កើនទំនាក់ទំនងតាមផ្លូវអាកាសដែលត្រូវបានគេរំពឹងថានឹងផ្តល់នូវការយល់ដឹង និងបង្ហាញអំពីប្រសិទ្ធភាពខ្លាំងបំផុតនៃការតភ្ជាប់បណ្តាញផ្លូវអាកាសរវាងប្រទេស4 រួមមាន ប្រទេសកម្ពុជា ឡាវ មីយ៉ាន់ម៉ា និងចិន។
ការសិក្សានេះជាការរៀបចំឡើងក្នុងកម្រិតថ្នាក់តំបន់មេគង្គ-ឡានឆាង ដែលជាកិច្ចសហប្រតិបត្តិការក្នុងវិស័យតភ្ជាប់ផ្លូវអាកាស ដែលកន្លងមកពុំទាន់មានការផ្តល់ព័ត៌មានជាក់លាក់ ស្តីអំពីជើងហោះហើរ ការធ្វើទំនើបកម្មនៃអាកាសយានដ្ឋាន បទពិសោធឧស្សាហកម្មអាកាសចរណ៍នៃប្រទេសនីមួយៗនៅឡើយថា តើមានការរីកចម្រើនដល់កម្រិតណាហើយក្នុងពេលបច្ចុប្បន្ន?។
ឯកឧត្តម ម៉ៅ ហាវណ្ណាល់ រដ្ឋលេខាធិការអាកាសចរស៊ីវិលកម្ពុជាបានថ្លែងថា៖ “គម្រោងនេះនឹងផ្តល់នូវមូលដ្ឋានចំណេះដឹង ដែលត្រូវការដើម្បីធ្វើឱ្យប្រសើរឡើងនូវវិស័យដឹកជញ្ជូនផ្លូវអាកាសនៅក្នុងប្រទេសកម្ពុជា ឡាវ មីយ៉ាន់ម៉ា និងចិន វានឹងជួយបង្កើនស្តង់ដារនៃគុណភាពនៅក្នុងឧស្សាហកម្មអាកាសចរណ៍ក៏ដូចជានៅក្នុងឧស្សាហកម្មដែលពាក់ព័ន្ធ ដូចជាវិស័យទេសចរណ៍ជាដើមដែរ”។
ឯកឧត្តម ម៉ៅ ហាវណ្ណាល់ រដ្ឋលេខាធិការនៃរដ្ឋលេខាធិការដ្ឋានអាកាសចរស៊ីវិលកម្ពុជា
ឯកឧត្តមបានមានប្រសាសន៍ថា ការសិក្សានេះនឹងជួយឱ្យអ្នកស្ថិតក្នុងវិស័យឧស្សាហកម្មអាកាសចរណ៍ យល់ដឹងពីផលប៉ះពាល់ដែលការតភ្ជាប់តាមផ្លូវអាកាសដែលល្អប្រសើរនៅក្នុងតំបន់នឹងធ្វើឱ្យមានកំណើនសេដ្ឋកិច្ច ក៏ដូចជាផ្តល់នូវការយល់ដឹងដ៏សំខាន់ អំពីរបៀបដើម្បីលើកទឹកចិត្តក្រុមហ៊ុនអាកាសចរណ៍ឱ្យបង្កើតផ្លូវហោះហើរថ្មីដែលតភ្ជាប់ប្រទេសនីមួយ។ ឯកឧត្តមបានបន្ថែមទៀតថា ការសិក្សានេះនឹងបញ្ចប់នៅខែកញ្ញា ឆ្នាំក្រោយ និងអាចផ្តល់ព័ត៌មានសំខាន់ៗជាច្រើនស្តីពីរបៀបដើម្បីឱ្យក្រុមហ៊ុន និងរដ្ឋាភិបាលបង្កើនការវិនិយោគនៅក្នុងឧស្សាហកម្មអាកាសចរណ៍។
ឯកឧត្តម ស៊ីន ចាន់សិរីវុត្ថា អ្នកនាំពាក្យនៃរដ្ឋលេខាធិការដ្ឋានអាកាសចរស៊ីវិល បានប្រាប់កាសែតឡារ៉ែនពាណិជ្ជថា ការសិក្សានេះនឹងពិនិត្យមើលទៅលើបញ្ហាជាច្រើន ដែលរួមបញ្ចូលទាំងឧបសគ្គចម្បងនៃការតភ្ជាប់ផ្លូវអាកាសនៅក្នុងប្រទេសនីមួយ(កម្ពុជា ឡាវ មីយ៉ាន់ម៉ា និងប្រទេសចិន)និងសមត្ថភាពបច្ចុប្បន្នរបស់ព្រលានយន្តហោះរបស់ប្រទេសនីមួយៗផងដែរ។
ឯកឧត្តមបានមានប្រសាសន៍ថា៖ “យើងចង់ស្វែងយល់ និងចែករំលែកព័ត៌មានពីគ្នាទៅវិញទៅមកថា តើការតភ្ជាប់របស់យើងប្រើអស់លទ្ធភាពហើយឬនៅ? ទី1-ចង់ដឹងថា តើប្រទេសទាំងនោះគាត់មានទស្សនវិស័យ និងយុទ្ធសាស្ត្រក្នុងការតភ្ជាប់យ៉ាងម៉េច? ទី2-តើសមត្ថភាពនៃ Airport Airspace របស់គាត់អាចទទួលយកកំណើននឹងបានឬទេ? ហើយនៅពេលបញ្ចប់ តើប្រទេសទាំង4នឹងប្រើការរកឃើញនេះដើម្បីបង្កើតយុទ្ធសាស្ត្រថា តើប្រទេសរបស់គាត់មានយុទ្ធសាស្ត្រយ៉ាងម៉េច? គាត់ទទួលយកឱកាស និងអ្វីជាបញ្ហាប្រឈម ឬអ្វីជាកាលានុវត្តភាពដើម្បីធ្វើឱ្យប្រសើរឡើងនូវការតភ្ជាប់តាមផ្លូវអាកាសរវាងប្រទេសទាំង4នេះ?”។
ជាមួយគ្នានេះដែរ ឯកឧត្តម ចាន់សិរីវុត្ថា បានឱ្យដឹងទៀតថា ការតភ្ជាប់ផ្លូវអាកាសកាន់តែល្អប្រសើរនឹងជួយបង្កើនចំនួនភ្ញៀវទេសចរដែលនឹងជួយដល់កំណើនសេដ្ឋកិច្ច ទាក់ទាញការវិនិយោគ ការដឹកជញ្ជូន និងបង្កើតការងារ ព្រោះថា ការតភ្ជាប់តាមផ្លូវអាកាសដែលកំពុងដំណើរការនៅក្នុងតំបន់ គឺមិនទាន់គ្រប់គ្រាន់ទេ ដោយលោកបានបន្ថែមថា គម្រោងនេះមានសក្តានុពលក្នុងការកែលម្អស្ថានភាព។
ឯកឧត្តមបញ្ជាក់ថា៖ “ដូច្នេះក៏ត្រូវតែមើលដែរទៅលើបទប្បញ្ញត្តិនៃច្បាប់ថា តើមានបញ្ហាទេ សម្រាប់ការបង្កើនទំនាក់ទំនងនៃការតភ្ជាប់នេះ? បញ្ហាចម្បងសម្រាប់យើង គឺថាការតភ្ជាប់តាមផ្លូវអាកាសជាមួយប្រទេសឡាវ ចិន និងមីយ៉ាន់ម៉ាមានកម្រិតខ្លាំងមួយដែលខ្ញុំជឿជាក់ថា ការសិក្សានេះនឹងជួយធ្វើឱ្យការតភ្ជាប់តាមផ្លូវអាកាសរវាងប្រទេសទាំង4 កាន់តែល្អប្រសើរឡើង”។ ការតភ្ជាប់តាមផ្លូវអាកាសនេះនឹងជួយជំរុញការតភ្ជាប់វិស័យទេសចរណ៍ក្នុងការទាក់ទាញភ្ញៀវទេសចរ និងការកសាងហេដ្ឋារចនាសម្ព័ន្ធ ដែលអាចបង្កលក្ខណៈងាយស្រួលដល់ការតភ្ជាប់នៃវិស័យដឹកជញ្ជូនទំនិញតាមផ្លូវអាកាសផងដែរ។
ឯកឧត្ដមក៏បានឱ្យដឹងទៀតដែរថា ក្នុងឱកាសនៃការបង្កើនទំនាក់ទំនងតាមផ្លូវអាកាសនេះ ត្រូវបានគេរំពឹងថា នឹងផ្តល់នូវប្រសិទ្ធភាពខ្ពស់បំផុតក្នុងការតភ្ជាប់បណ្តាញផ្លូវអាកាសរវាងប្រទេសទាំង4 ស្របពេលដែលអាកាសយានដ្ឋានអន្តរជាតិទាំង3 របស់ប្រទេសកម្ពុជារួមមាន ព្រលានយន្តហោះខេ្តព្រះសីហនុ សៀមរាប និងភ្នំពេញក៏កំពុងទទួលបានអ្នកដំណើរដែលគិតជាមធ្យមបានកើនឡើងប្រមាណ21%ក្នុងអំឡុងពេល 9ខែនៃឆ្នាំ2018 បើធៀបនឹងឆ្នាំ2017។
បច្ចុប្បន្ន កម្ពុជាមានជើងហោះហើរត្រង់ចំនួន 28ជើងដែលភ្ជាប់ទីក្រុងភ្នំពេញជាមួយទិសដៅទូទាំងប្រទេសចិន ដោយជើងហោះហើរ 16ក្នុងចំណោមជើងហោះហើរទាំងនេះចាកចេញពីខេត្តសៀមរាប ខណៈដែលជើងហោះហើរផ្សេងទៀតបានចាកចេញពីអាកាសយានដ្ឋានអន្តរជាតិភ្នំពេញ៕
December 5, 2018
ធនាគារពិភពលោក៖ ត្រូវប្រយ័ត្នហានិភ័យក្នុងអត្រាកំណើនសេដ្ឋកិច្ចកម្ពុជា
យោងតាមរបាយការណ៍អំពីបច្ចុប្បន្នភាពសេដ្ឋកិច្ចកម្ពុជារបស់ធនាគារពិភពលោក (World Bank) បានឱ្យដឹងថា ស្របពេលដែលសេដ្ឋកិច្ចពិភពលោកត្រូវបានគេព្យាករថា នឹងនៅតែបន្តបន្ថយល្បឿន និងមានហានិភ័យកើនឡើងនោះ សេដ្ឋកិច្ចរបស់ប្រទេសកម្ពុជាមានសភាពផ្ទុយពីនេះ ពោលគឺនៅតែបន្តកើនឡើង ដោយអត្រាកំណើនសេដ្ឋកិច្ចត្រូវបានព្យាករថា នឹងកើនឡើងបន្តិចបន្តួច ខ្ពស់ជាងឆ្នាំកន្លងទៅ គឺនឹងកើនឡើងដល់7.1% នៅក្នុងឆ្នាំ2018 ដែលកំណើននេះនាំមុខដោយការប្រើប្រាស់ទំនិញក្នុងស្រុក និងការនាំចេញ។
បន្ទាប់ពីមានការងើបឡើងវិញបន្តិចម្តងៗនៃសេដ្ឋកិច្ចនៅឆមាសទី2 ក្នុងឆ្នាំ2017មក ការនាំ- ចេញរបស់កម្ពុជាបានកើនឡើងយ៉ាងរហ័ស ដោយមួយភាគធំ គឺតម្រូវការដ៏ច្រើននៅក្នុងសហរដ្ឋអាមេរិក និងសហភាពអឺរ៉ុប។ កម្ពុជាស្ថិតក្នុងចំណោមប្រទេសមួយចំនួនតូចក្នុងតំបន់អាស៊ីបូព៌ា និងប៉ាស៊ីហ្វិកដែលគេរំពឹងថា នឹងមានកំណើនសេដ្ឋកិច្ចល្អប្រសើរតិចតួច។
ដូច្នេះហើយទើបធនាគារពិភពលោកបានណែនាំអ្នកបង្កើតគោលនយោបាយកម្ពុជាឱ្យមានពេលវេលាបន្ថែមទៀតដើម្បីឱ្យប្រទេសនេះក្លាយជាប្រទេសមានចំណូលមធ្យមកម្រិតខ្ពស់ដោយស្នើឱ្យរដ្ឋាភិបាលកំណត់គោលដៅទៅឆ្នាំ2035 ជំនួសឱ្យឆ្នាំ2030 ដើម្បីបញ្ចប់ពីស្ថានភាពរឿងប្រាក់ចំណូលបច្ចុប្បន្ន។
ធនាគារពិភពលោកបានឱ្យដឹងក្នុងរបាយការណ៍របស់ខ្លួនថា ដើម្បីសម្រេចបានតាមគោលដៅឆ្នាំ2030 ការកើនឡើងនៃលក្ខខណ្ឌក្នុងមនុស្សម្នាក់ៗ នឹងមានចំនួនស្មើនឹង 9.3% ជាមធ្យមក្នុងអំឡុងពេល 13ឆ្នាំខាងមុខ ប៉ុន្តែកំណើននៅក្នុងមនុស្សម្នាក់ក្នុងរយៈពេលនេះត្រូវបានប៉ាន់ស្មានថាមានប្រមាណតែពី 5% ទៅ 6% ប៉ុណ្ណោះ។
ក្នុងការចាប់ផ្តើមរបាយការណ៍អំពីបច្ចុប្បន្នភាពសេដ្ឋកិច្ចកម្ពុជា លោក Norman V. Loayza សេដ្ឋវិទូជាន់ខ្ពស់របស់ WB បានថ្លែងថា៖ “កម្ពុជាគួរតែពិចារណាពន្យារពេលគោលដៅពីឆ្នាំ2030 ក្នុងការមានប្រាក់ចំណូលមធ្យមកម្រិតខ្ពស់ រហូតដល់ឆ្នាំ2035 ព្រោះគោលដៅ2030 មិនអាចនឹងសម្រេចបានទេព្រោះសេដ្ឋកិច្ចនៅប្រទេសអាស៊ីផ្សេងទៀតក៏បានខកខានគោលដៅបែបនេះដែរ នៅពេលពួកគេស្ថិតនៅក្នុងកម្រិតអភិវឌ្ឍន៍ដូចប្រទេសកម្ពុជា”។
លោក Loayza បានមានប្រសាសន៍ថា៖“ប្រសិនបើប្រទេសកម្ពុជាបន្តកើនឡើងក្នុងអត្រាការប្រាក់បច្ចុប្បន្ននៅតាមបន្ទាត់មូលដ្ឋានធម្មតានោះ ប្រទេសនេះនឹងអាចខកខានទាំងឋានៈប្រាក់ចំណូលមធ្យមកម្រិតខ្ពស់ និងឋានៈប្រាក់ចំណូលកម្រិតខ្ពស់”។ ព្រោះបន្ទាប់ពីទទួលបានឋានៈជាប្រទេសមានប្រាក់ចំណូលមធ្យមកម្រិតទាបរហូតដល់ឆ្នាំ2030 កម្ពុជាមានបំណងក្លាយទៅជាប្រទេសមានប្រាក់ចំណូលកម្រិតខ្ពស់ក្នុងឆ្នាំ2050”។
លោកស្រី អុីងហ្គូណា ដូប្រាចា ប្រធានគ្រប់គ្រងធនាគារពិភពលោកប្រចាំនៅកម្ពុជា បានមានប្រសាសន៍ថា “ដើម្បីសម្រេចបានគោលបំណងរបស់ខ្លួនក្នុងការទទួលបានចំណាត់ថ្នាក់ជាប្រទេសដែលមានប្រាក់ចំណូលមធ្យមកម្រិតខ្ពស់ កម្ពុជាចាំបាច់ត្រូវបង្កើនការវិនិយោគរបស់ខ្លួនលើផ្នែកធនធានមនុស្ស និងហេដ្ឋារចនាសម្ព័ន្ធ និងធ្វើកំណែទម្រង់នានាដែលគាំទ្រដល់កំណើនសេដ្ឋកិច្ចលើគ្រប់វិស័យ។ ការកៀរគរប្រាក់សន្សំក្នុងស្រុកឱ្យបានច្រើន ដើម្បីយកទៅបង្កើនការវិនិយោគ គឺជាកត្តាសំខាន់ក្នុងការឈានទៅដល់គោលដៅមួយដូចបណ្តាប្រទេសមានសេដ្ឋកិច្ចល្អជាងគេនៅអាស៊ីសម្រេចបាន”។
លោក លី សុដេត អ្នកសេដ្ឋកិច្ចជាន់ខ្ពស់របស់ WB ប្រចាំនៅកម្ពុជាបានមានប្រសាសន៍ថា៖“ដូចដែលបានបង្ហាញតាមរយៈការសិក្សារួចហើយ ប្រសិនបើយើងមិនផ្លាស់ប្តូរវិធីសាស្ត្រទេនោះយើងប្រហែលជាមិនអាចសម្រេចបានគោលដៅនោះទេ”។ សម្រាប់កម្ពុជា អាទិភាពមានច្រើន រួមមាន ការការពារវិស័យហិរញ្ញវត្ថុឱ្យបានល្អ កសាងធនធានបម្រុង ពង្រឹងភាពប្រកួតប្រជែង និងទប់ស្កាត់កំណើននៃអត្រាប្តូរប្រាក់ដែលបណ្តាលមកពីកំណើនដ៏ឆាប់រហ័សនៃការនាំចូល។ ដូច្នេះប្រសិនបើយើងមិនផ្លាស់ប្តូរទេ វាមិនមានឱកាសច្រើនដើម្បីសម្រេចបានគោលដៅនោះដែរ។
លោកបណ្ឌិត ឈាង វណ្ណារិទ្ធ នាយករងនៃវិទ្យាស្ថានកម្ពុជាសម្រាប់ការសិក្សាយុទ្ធសាស្ត្រ បានស្វាគមន៍អនុសាសន៍របស់WB ទាំងអស់នោះ ប៉ុន្តែលោកនៅតែចាត់ទុកថា គោលដៅរបស់រដ្ឋាភិបាលនៅឆ្នាំ2030 នៅតែអាចធ្វើទៅបាន។ លោកបណ្ឌិតបានថ្លែងថា៖ “ជារួមខ្ញុំយល់ស្របនឹងការសិក្សានេះ តែយើងនៅតែអាចសម្រេចគោលដៅរបស់យើងនៅឆ្នាំ2030”។
លោកបណ្ឌិត វណ្ណារិទ្ធ បានពន្យល់ថា វិធីសាស្ត្រដែលត្រូវបានប្រើនៅក្នុងការសិក្សារបស់ធនាគារពិភពលោក គឺខុសគ្នាពីរបស់រដ្ឋាភិបាលដែលនាំទៅដល់លទ្ធផលខុសគ្នា។ នៅប្រទេសកម្ពុជាយើងបានបង្កើតយុទ្ធសាស្ត្រចតុកោណ ដែលជាគោលនយោបាយអភិវឌ្ឍន៍ជាតិរៀងរាល់ 5ឆ្នាំម្តង។ ឥឡូវយើងស្ថិតក្នុងដំណាក់កាលទី4 ហើយបន្ទាប់មកយើងនឹងអនុវត្តផែនការអភិវឌ្ឍន៍ជាតិ ដើម្បីជួយដល់គោលនយោបាយនេះឱ្យសម្រេចបាននូវគោលដៅ។
យោងតាមរបាយការណ៍របស់ធនាគារពិភពលោក GDP ឆ្នាំនេះនឹងកើនឡើង7,1% ដែលខ្ពស់ជាងឆ្នាំ2017 បន្តិច ដោយសារតែការប្រើប្រាស់ក្នុងស្រុក និងការនាំចេញ។ ទស្សនវិស័យកំណើននោះ ត្រូវបានព្យាករថា នឹងចុះថយបន្តិចមកនៅត្រឹម 6,8% ក្នុងរយៈពេល 2ឆ្នាំខាងមុខ។
ទស្សនវិស័យរយៈពេលវែងអំណោយផលត្រូវបានជំរុញដោយការកើនឡើងនៃលំហូរចូល វិនិយោគផ្ទាល់ពីបរទេសទៅផលិតកម្ម និងកសិកម្ម និងការផ្សារភ្ជាប់រវាងខ្សែចង្វាក់ផ្គត់ផ្គង់រវាង FDI និងកម្ពុជា។
ចំពោះហានិភ័យនានាដែលកើតឡើងនៅក្នុងវិស័យហិរញ្ញវត្ថុកម្ពុជាដែលកំពុងបន្តកើនឡើង នោះវានឹងពាក់ព័ន្ធច្រើនទៅលើវិស័យសំណង់ និងអចលនទ្រព្យ។ ហានិភ័យពីមជ្ឈដ្ឋានខាងក្រៅ រួមមានសក្តានុពលនៃការដកប្រព័ន្ធអនុគ្រោះពន្ធលើទំនិញនាំចេញ(EBA)សម្រាប់កម្ពុជា និងផលប៉ះពាល់ដែលមិនអាចព្យាករមុនបានដែលកើតចេញពីជម្លោះពាណិជ្ជកម្មរវាងសហរដ្ឋអាមេរិក និងប្រទេសចិន។
WB បាននិយាយថា ប្រទេសកម្ពុជាត្រូវផ្តោតលើការអភិវឌ្ឍធនធានមនុស្ស និងការបង្កើនផលិត-ភាព។ ដូចគ្នានេះដែរ ការវិនិយោគសាធារណៈចាំបាច់ត្រូវបង្កើនយ៉ាងហោចណាស់28,5% នៃផលិតផលក្នុងស្រុកសរុបត្រឹមឆ្នាំ2030 ខណៈពេលដែលអត្រាសន្សំប្រាក់ចាំបាច់ត្រូវកើនឡើងប្រហែល11% នៃផលិតផលក្នុងស្រុកសរុបGDP ដើម្បីផ្តល់មូលនិធិដល់ការវិនិយោគដែលត្រូវការ ដើម្បីសម្រេចបាននូវគោលដៅកំណើន និងកាត់បន្ថយការពឹងផ្អែកលើការសន្សំប្រាក់បរទេស។
លោកអគ្គនាយកក្រុមហ៊ុនហ្វ័រតេក៏បានបញ្ជាក់អំពីការធ្វើសន្ទស្សន៍របស់ WB ថា ពិតជាមានមូលដ្ឋានគិតគូរច្បាស់លាស់។ ជាធម្មតាការគិតគូរ ឬការព្យាករតែងដាក់លក្ខខណ្ឌជាមុនថា ត្រូវតែបំពេញកត្តាអ្វីខ្លះ ឬចំណុចខ្វះខាត ដូចជា កត្តាវិស័យសំណង់ ជាទូទៅយើងឃើញថា នៅពេលណាមួយវានឹងមានការកែតម្រូវអំពីតម្រូវការ និងការផ្គត់ផ្គង់ ព្រោះដោយមើលឃើញតម្រូវការទីផ្សារកើន អ្នកផ្គត់ផ្គង់ត្រូវតែដាក់ចូលទីផ្សារច្រើនដែរ(បញ្ចេញលក់)ចុងក្រោយយើងនឹងឃើញការផ្គត់ផ្គង់វាធំជាងតម្រូវការ។
លោក យក់ ចំរើនឬទ្ធិ បានបញ្ជាក់ថា៖ “នៅក្នុងដំណាក់កាលណាមួយ តម្រូវការនោះវានឹងបន្ថយល្បឿន បន្ទាប់មកវាក៏មានតម្រូវការឡើងវិញនៅពេលដែលការអភិវឌ្ឍបានកើតឡើងបន្ត ដែលនេះជាវដ្តនៃការវិលជុំដែលត្រូវតែកើតមាន”។ ដូច្នេះអ្វីៗដែល WB បានធ្វើការទស្សន៍ទាយនោះ គឺយើងបានដឹងដែរ ជារឿងធម្មតាដែលសេដ្ឋកិច្ចគ្រប់ប្រទេសតែងជួបបញ្ហាហ្នឹង។
“ចំពោះផលិតភាពការងារ យើងទទួលស្គាល់ថា បើយើងមិនបានរៀបចំឱ្យស្រួលទេ វាអាចមានបញ្ហា ព្រោះប្រជាជនយើងនៅមានផលិតភាពការងារទាបជាងប្រទេសជិតខាង ឧទាហរណ៍សម្រាប់ប្រទេសយើងកិច្ចការមួយយើងធ្វើគ្នា 3នាក់តែនៅប្រទេសជិតខាងគេធ្វើតែ 2នាក់ ពោលគឺវាទាក់-ទងទៅនឹងធនធានមនុស្សដែលមានបទពិសោធ និងជំនាញបច្ចកទេស”។ នេះបើតាមលោក យក់ ចំរើនឬទ្ធិ បានបញ្ជាក់។
លោកអគ្គនាយកបានបន្តថា “យើងមានការងារជាច្រើនដែលមានផលិតភាពទាប ដោយសារយើងខ្វះអ្នកចេះដឹង ខ្វះខាតអ្នកមានចំណេះដឹងផ្នែកវិជ្ជាជីវៈ បើយើងមានការបណ្តុះបណ្តាលបន្ថែមទៀត យើងនឹងមានផលិតភាពការងារដូចគេដូចឯង។ ផលិតភាពការងារ វាទាក់ទងទៅនឹងធនធានមនុស្ស និងជាកត្តាសម្រាប់កំណត់នូវជោគជ័យដែរ។ ដូច្នេះទើប WB ចាត់ទុកថា វាជាកត្តាហានិភ័យ ប្រសិនបើមិនបានបង្ហាត់បង្រៀន បណ្តុះបណ្តាលថ្នាលយុវជនយើងឱ្យបានខ្ពស់ទេ គោលដៅរបស់យើងនឹងមិនបានសម្រេចទេ ខ្ញុំជឿថា រាជរដ្ឋាភិបាលបានដឹងពីកិច្ចការហ្នឹង គាត់បានរៀបចំទប់ទល់ចំពោះហានិភ័យនេះហើយ។ ក្នុងការជំរុញឱ្យមានកំណើនសេដ្ឋកិច្ចថេរយើងជឿថាកម្ពុជាអាចទៅរួច ដោយរដ្ឋាភិបាលគាត់មានយុទ្ធសាស្ត្រដឹកនាំពីដំណាក់កាលនីមួយ។ បើយើងមានការកសាងមូលដ្ឋាននៃផលិតភាពឱ្យខ្ពស់ យើងនឹងមិនមានបញ្ហាអ្វីនោះឡើយ ព្រោះប្រទេសដែលកំពុងអភិវឌ្ឍន៍ដូចយើងនេះតែងជួបប្រទះនូវហានិភ័យសម្រាប់ខ្លួនជាធម្មតា”៕
December 5, 2018
អ្នកវិនិយោគលើវិស័យឧស្សាហកម្មសំណង់ត្រូវ ចូលរួមគោរពច្បាប់ និងបទប្បញ្ញត្ដិនៃវិស័យនេះ
លោកឧបនាយករដ្ឋមន្ដ្រីកម្ពុជា បានអំពាវនាវដល់ក្រុមហ៊ុនក្នុងប្រទេស និងមកពីក្រៅប្រទេសឱ្យពិនិត្យមើលលទ្ធភាពបណ្ដាក់ទុនវិនិយោគនៅទីផ្សារ ឬធ្វើជាដៃគូអភិវឌ្ឍន៍នៅកម្ពុជាដែលជាទីផ្សារប្រកបដោយសក្ដានុពល។ ការអំពាវនាវបែបនេះត្រូវបានធ្វើឡើងក្នុងឱកាសនៃពិធីសម្ពោធការតាំងពិព័រណ៍ឧស្សាហកម្មសំណង់កម្ពុជា2018 របស់សមាគមអ្នកសាងសង់កម្ពុជា។
ឯកឧត្តម ជា សុផារ៉ា ឧបនាយករដ្ឋមន្ដ្រី និងជារដ្ឋមន្ដ្រីក្រសួងដែនដី នគរូបនីយកម្ម និងសំណង់ បានថ្លែងថា កម្មវិធីនេះជាពេលវេលាសម្រាប់ផ្ដល់ឱកាសឱ្យសហគ្រាស-ក្រុមហ៊ុនដែលជាសមាជិកសមាគម និងក្រុមហ៊ុនជាតិ និងអន្ដរជាតិជាច្រើនផ្សេងទៀតបានជួបជុំគ្នាដើម្បីផ្ដល់ និងផ្លាស់ប្ដូរយោបល់គ្នាចែករំលែកបទពិសោធ និងចំណេះដឹងគ្នាទៅវិញទៅមក។
តែទោះជាយ៉ាងណាក៏ដោយ ឯកឧត្តមរដ្ឋមន្ត្រីក៏បានទទូចស្នើសុំដល់អ្នកវិនិយោគ អ្នកសាងសង់ ក៏ដូចជាអ្នកគ្រប់គ្រងសំណង់ និងអ្នកអភិវឌ្ឍន៍អចលនទ្រព្យទាំងអស់ សូមចូលរួមគោរពច្បាប់ និងបទប្បញ្ញត្តិនានាពាក់ព័ន្ធនឹងវិស័យសំណង់ឱ្យបានត្រឹមត្រូវដើម្បីធានាបាននូវសុវត្ថិភាព និងគុណភាពសំណង់នៅកម្ពុជា។ ឯកឧត្តម បានបញ្ជាក់ថា “ខ្ញុំសង្ឃឹមថា ធុរជនរបស់យើង ទាំងអ្នកនៅក្នុងប្រទេស និងមកពីក្រៅប្រទេសនឹងឆ្លៀតយកកាលានុវត្ដភាពនេះ ដើម្បីកសាងទំនាក់ទំនងភាពជាដៃគូជាមួយគ្នា”។ ឯកឧត្តម ជា សុផារ៉ា ក៏បានបន្ដទៀតដែរថាជាពិសេសកម្មវិធីនេះអ្នកធុរកិច្ចទាំងអស់នឹងទទួលបានព័ត៌មានអំពីសកម្មភាព និងសមិទ្ធផលនានាដែលសមាគមអ្នកសាងសង់កម្ពុជាសម្រេចបាន ព្រមទាំងផ្ដល់ឱកាសដល់អតិថិជនដែលបានចូលរួមទស្សនា មានដូចជាអ្នកអភិវឌ្ឍន៍ និងអ្នកវិនិយោគលើវិស័យអចលនវត្ថុ អ្នកសាងសង់ និងអ្នកលក់សម្ភារសំណង់ បានជួបពិភាក្សាគ្នាដោយផ្ទាល់អំពីតម្រូវការ និងការផ្គត់ផ្គង់។ល។
អ្នកឧកញ៉ា ពុង ឃាវសែ បានថ្លែងថា៖“ពិព័រណ៍នេះរៀបចំឡើង គឺចង់បង្ហាញពីការអភិវឌ្ឍ ការរីកចម្រើន និងសក្តានុពលនៃការវិនិយោគលើវិស័យសំណង់នៅក្នុងទីផ្សារទាំងមូល។ ជាក់ស្តែងដូចយើងបានឃើញរួចមកហើយថា នៅរាជធានីភ្នំពេញបច្ចុប្បន្នមានសំណង់អគារខ្ពស់ៗ ទំនើបៗ ធំស្កឹមស្កៃបានរីកដុះដាលគួរឱ្យមានភាពស្ញប់ស្ញែង”។
អ្នកឧកញ៉ាបានបន្តថា សំណង់ទាំងនោះមានដូចជា អគារមជ្ឈមណ្ឌលពាណិជ្ជកម្ម អគារការិយាល័យ ធនាគារ ផ្សារទំនើប សណ្ឋាគារ អគារស្នាក់នៅរួមទាំងបុរីលំនៅឋាន ត្រូវបានសាងសង់ឡើងជាបន្តបន្ទាប់ដែលសំណង់ទាំងអស់នេះសុទ្ធតែមានលក្ខណៈទំនើបទាន់សម័យ និងបានប្រើប្រាស់បច្ចេកវិទ្យាសម្ភារ បរិក្ខារ និងឧបករណ៍ក្នុងការសាងសង់ដែលមានគុណភាពខ្ពស់ មានបច្ចេកទេសទំនើប និងមានស្តង់ដារខ្ពស់ និងត្រឹមត្រូវមិនចាញ់បណ្តាប្រទេសកំពុងអភិវឌ្ឍន៍ដទៃនៅលើពិភពលោកឡើយ។
អ្នកឧកញ៉ាបានបន្ថែមថា កម្មវិធីទំនាក់ទំនងធុរកិច្ចវិស័យសំណង់ គឺមានសារៈសំខាន់ណាស់ដែលវានឹងផ្តល់ឱកាសដល់សមាជិកសមាគមដែលមាន 148ក្រុមហ៊ុន និងអ្នកធុរកិច្ចដទៃទៀតដែលមានមុខរបរ និងជំនួញលើវិស័យសំណង់នៅកម្ពុជា និងអ្នកដែលនៅក្រៅប្រទេសមានឱកាសបានមកធ្វើការទំនាក់ទំនងពិភាក្សាអំពីកិច្ចការជំនួញពាណិជ្ជកម្មដោយផ្ទាល់ជាមួយគ្នាយ៉ាងជិតស្និទ្ធដើម្បីឱ្យយល់ដឹងច្បាស់ពីតម្រូវការការផ្គត់ផ្គង់សម្ភារឧបករណ៍ និងគ្រឿងចក្រសំណង់នៅក្នុងទីផ្សារសំណង់របស់កម្ពុជា។
ដោយឡែកក្រសួងរៀបចំដែនដី បានលើកទឹកចិត្ដដល់អ្នកប្រកបអាជីព និងអ្នកធុរកិច្ចក្នុងវិស័យឧស្សាហកម្មសំណង់ដែលរួមមាន ស្ថាបត្យករ វិស្វករអ្នកប្រឹក្សាយោបល់ អ្នកគ្រប់គ្រងសំណង់ អ្នកសាងសង់ និងអ្នកអភិវឌ្ឍន៍អចលនទ្រព្យ សុំឱ្យចូលរួមគោរពច្បាប់ និងបទប្បញ្ញត្ដិពាក់ព័ន្ធវិស័យសំណង់ឱ្យបានត្រឹមត្រូវ ដើម្បីធានានូវសុវត្ថិភាព និងគុណភាពសំណង់នៅកម្ពុជា៖
* ត្រូវមានលិខិតអនុញ្ញាតសាងសង់ និងលិខិតអនុញ្ញាតបើកការដ្ឋាន មុនពេលធ្វើការសាងសង់ និងត្រូវអនុវត្ដតាមប្លង់បច្ចេកទេសដែលបានអនុញ្ញាត និងបទប្បញ្ញត្ដិបច្ចេកទេសផ្សេងៗ ឱ្យបានត្រឹមត្រូវ។
* ក្រុមហ៊ុនប្រកបអាជីវកម្មសាងសង់ និងសិក្សាគម្រោងប្លង់ រួមទាំងក្រុមជាងសំណង់ទាំងអស់ ត្រូវមកស្នើសុំចុះបញ្ជីជាអ្នកប្រកបអាជីវកម្មស្របតាមច្បាប់ជាធរមាន។
* ត្រូវរៀបចំការដ្ឋានសាងសង់ឱ្យមានសណ្ដាប់ធ្នាប់ និងអនាម័យជាប្រចាំ និងការដ្ឋានសំណង់ទាំងអស់ពុំត្រូវដឹកបេតុង ដី និងសម្ភារសំណង់ឱ្យជ្រុះរាយប៉ាយតាមដងផ្លូវសាធារណៈឡើយ។
* ការដ្ឋានសំណង់ទាំងអស់ត្រូវមានបំពាក់សម្ភារ និងឧបករណ៍សម្រាប់ការពារសុវត្ថិភាព និងសុខភាពជូនកម្មករទាំងអស់ ដែលធ្វើការក្នុងការដ្ឋាន។ល។
សូមជម្រាបផងដែរថា សម្រាប់ទុនវិនិយោគលើវិស័យសំណង់មានការកើនឡើងជាលំដាប់ និងមានតួលេខកើនឡើងហួសការស្មាន។ ឯកឧត្តមរដ្ឋមន្ត្រីបានឱ្យដឹងថា ក្នុងឆ្នាំ2016 ទុនវិនិយោគសំណង់មានជាង 5,049លានដុល្លារអាមេរិក មានកំណើន68% បើប្រៀបធៀបនឹងឆ្នាំ2015។ ក្នុងឆ្នាំ2017 ទុនវិនិយោគសំណង់មានជាង6,207ដុល្លារអាមេរិក មានកំណើន21,84%បើប្រៀបធៀបនឹងឆ្នាំ2016 ដោយឡែកក្នុងរយៈពេល 10ខែក្នុងឆ្នាំ2018នេះ ទុនវិនិយោគសំណង់មានជាង4,990ដុល្លារអាមេរិក៕
December 5, 2018
ពិព័រណ៍ការងារតាមខេត្ត ជាផ្នែកសំខាន់កាត់បន្ថយការធ្វើចំណាកស្រុក
វិស័យការងារជារឿងសំខាន់សម្រាប់ប្រទេសនីមួយៗ ព្រោះវាជាផ្នែកមិនអាចខ្វះបានសម្រាប់សេដ្ឋកិច្ចជាតិមិនថារោងចក្រសហគ្រាស ពាណិជ្ជកម្ម សេវាកម្ម ទេសចរណ៍ ឬកសិកម្មនោះទេ កម្លាំងពលកម្មក្នុងស្រុកជាធាតុផ្សំចម្បងដើម្បីជំរុញឱ្យមានការអភិវឌ្ឍ និងសម្បូរបែប។
នៅកម្ពុជា ការធ្វើចំណាកស្រុកនៅតែជាចំណោទធំមួយសម្រាប់ការអភិវឌ្ឍ ព្រោះប្រជាជននៅតាមបណ្តាខេត្តដាច់ស្រយាលមួយចំនួនមិនសូវនិយមបម្រើការងារនៅក្នុងតំបន់របស់ខ្លួននោះទេ តែភាគច្រើនបានឆ្លងដែនទៅធ្វើការងារនៅប្រទេសជិតខាង ដែលធ្វើឱ្យចង្វាក់ផលិតកម្មក្នុងស្រុកបែរជាខ្វះមនុស្សធ្វើការងារទៅវិញ។ ការឆ្លងដែន ទៅធ្វើការងារនៅក្រៅប្រទេសនេះត្រូវបានអ្នកជំនាញការងារមើលឃើញថា វាអាចបណ្តាលមកពីប្រជាជនទទួលបានព័ត៌មានមិនគ្រប់ជ្រុងជ្រោយឬមកពីប្រជាជនក្នុងតំបន់មិនទាន់ដឹងច្បាស់ពីទីផ្សារការងារក្នុងខេត្ត ឬកន្លែងរស់នៅរបស់គាត់ផ្ទាល់។
លោកស្រី ញ៉ឹក សាគន្ធ អភិបាលរងខេត្តបាត់ដំបង បានថ្លែងនៅឯវិទ្យាស្ថានបច្ចេកវិទ្យាបាត់ដំបងថាពិព័រណ៍ការងារជាផ្នែកមួយក្នុងការលើកកម្ពស់ទីផ្សារការងារនៅក្នុងខេត្ត តាមរយៈការជួយយុវជនឱ្យទទួលបានភាពងាយស្រួលក្នុងការចាប់យកឱកាសការងារ។ និយោជកអាចជ្រើសរើសបុគ្គលិកស្របតាមតម្រូវការក្នុងវិស័យនានា ក៏ដូចជាចូលរួមកាត់បន្ថយការធ្វើចំណាកស្រុកដោយប្រថុយប្រថានទៅក្រៅប្រទេស។
ការធ្វើពិព័រណ៍ការងារនៅតាមបណ្តាខេត្តនានាជាវិធីសាស្ត្រដ៏មានប្រសិទ្ធភាពក្នុងការផ្សព្វផ្សាយឱ្យប្រជាពលរដ្ឋ ជាពិសេសយុវជន បានឃើញពីតម្លៃនៃការធ្វើការងារនៅក្នុងស្រុក ការបណ្តុះបណ្តាលជំនាញ និងមានភាពជឿជាក់កាន់តែខ្លាំងថាខ្លួនអាចនឹងមានឱកាសធ្វើការងារដែលស្របទៅតាមចំណេះដឹង និងទេព-កោសល្យបានដោយមិនចាំបាច់ធ្វើចំណាកស្រុកនោះទេ។ នៅពេលយុវជនមើលឃើញពីឱកាសទាំងអស់នោះហើយ គាត់នឹងមិនមានភាពរារែកនោះទេក្នុងការ-បន្តការសិក្សាអំពីជំនាញបច្ចេកទេស ឬជំនាញសេវាកម្មដែលតំបន់របស់គាត់ត្រូវការ។
ក្រោយពេលតំបន់នីមួយៗមានធនធានមនុស្សគ្រប់គ្រាន់សម្រាប់ធ្វើការងារក្នុងក្រុមហ៊ុន និងរោងចក្រសហគ្រាសធំៗហើយ វាអាចនឹងចាប់ផ្តើមមានភាពងាយស្រួលក្នុងការពង្រីកខ្លួនទៅកាន់តំបន់ឆ្ងាយៗនៅកម្ពុជា ដែលកត្តានេះជាចំណុចវិជ្ជមានមួយក្នុងការតភ្ជាប់តំបន់ប្រជុំជន និងតំបន់ដាច់ស្រយាល។ លើសពីនេះទៅទៀត វាក៏ជាចំណុចចាប់ផ្តើមក្នុងការទាក់ទាញអ្នកដែលមានជំនាញតិច ឬអ្នកកំពុងធ្វើការងារនៅបរទេសឱ្យងាកមកចាប់អារម្មណ៍លើការងារក្នុងស្រុកវិញ៕
December 3, 2018
សិប្បកម្មផលិតទឹកម្ទេសកូនខ្មែរ កំពុងមានការគាំទ្រខ្លាំងនៅលើទីផ្សារ
ដើម្បីជួយលើកកម្ពស់ផលិតផលកសិកម្មក្នុងស្រុក កូនខ្មែរមួយរូបបានខិតខំកែច្នៃផ្លែម្ទេសស្រស់ ឱ្យក្លាយទៅជាផលិតផលទឹកម្ទេសមានរសជាតិឆ្ងាញ់មិនចាញ់ផលិតផលនាំចូលពីបរទេស ហើយថែមទាំងទទួលបានការគាំទ្រយ៉ាងខ្លាំងនៅលើទីផ្សារក្នុងស្រុក រហូតធ្វើឱ្យសិប្បកម្មលក្ខណៈគ្រួសារមួយនេះក្លាយជាសហគ្រាសក្នុងស្រុកដ៏លេចធ្លោមួយទៀតផង។
អ្នកនាង កូវ ច័ន្ទសុវណ្ណារិទ្ធ ម្ចាស់សិប្បកម្មផលិតទឹកម្ទេស “រ៉ារី” បានរៀបរាប់ឱ្យដឹងថា តាំងពីដើមមកអ្នកនាងមិនដែលគិតថា គ្រួសាររបស់អ្នកនាងអាចមានសមត្ថភាពបង្កើតសហគ្រាសធំដូចសព្វថ្ងៃនេះទេ ដោយសារតែដំបូងឡើយ គ្រួសាអ្នកនាងគ្រាន់តែជាអ្នកធ្វើម្ទេសឆាដោយដៃផ្ទាល់សម្រាប់ហូបខ្លួនឯងជាលក្ខណៈក្រុមគ្រួសារតែប៉ុណ្ណោះ ហើយក្រោយមកដោយសារមើលទៅផលិតផលនេះហាក់មានភាពទាក់ទាញគួរឱ្យចង់ទទួលទាន អ្នកនាងក៏បង្ហោះនៅលើបណ្តាញសង្គមហ្វេសប៊ុកចែកចាយបន្តដល់មិត្តភក្តិបានមើលលេង និងក្រោយពីបង្ហោះរួច ក៏ស្រាប់តែមានមិត្តភក្តិនាំគ្នាកុម្ម៉ង់ទិញតៗគ្នាពីម្នាក់ទៅម្នាក់ ដែលពេលនោះអ្នកនាងក៏បានធ្វើម្ទេសឆាផ្ញើជូនមិត្តភក្តិហូបដោយមិនគិតប្រាក់នោះទេ តែដោយសារម្ទេសឆាមានរសជាតិឆ្ងាញ់ មិត្តភក្តិដែលបានសាកល្បងទទួលទានហើយ ក៏បន្តកុម្ម៉ង់ទៀត និងបានកុម្ម៉ង់ទិញតៗគ្នាកាន់តែច្រើនឡើងៗ ជាហេតុធ្វើឱ្យអ្នកនាងសម្រេចធ្វើលក់តាមអនឡាញតែម្ដង និងកាលនោះមិនទាន់មានសម្បកវេចខ្ចប់ល្អស្អាតដូចសព្វថ្ងៃនេះទេ តែទោះជាយ៉ាងណាក្ដីដោយសារតែមានរសជាតិឆ្ងាញ់ ទើបធ្វើឱ្យមានអតិថិជនកុម្ម៉ង់ទិញកាន់តែច្រើនឡើងៗ រហូតធ្វើឱ្យក្រុមគ្រួសារអ្នកនាងសម្រេចបើកជាសិប្បកម្មផលិតទឹកម្ទេស និងម្ទេសឆាតូចមួយឡើងកាលពីអំឡុងពេល 6ឆ្នាំមុន…។
កាលនោះការបង្កើតសិប្បកម្មនេះឡើង គឺគ្រាន់តែជាការសាកល្បងប៉ុណ្ណោះ ប៉ុន្តែក្រោយមានអតិថិជនគាំទ្រកាន់តែច្រើនឡើងៗ ក៏ចេះតែពង្រីកសិប្បកម្មនេះឱ្យធំឡើងបន្តិចម្តងៗ ដោយបានកុម្ម៉ង់ទិញម៉ាស៊ីនផលិតពីប្រទេសចិន ដើម្បីបង្កើនចង្វាក់ផលិតកម្មឱ្យបានកាន់តែច្រើនឡើងសម្រាប់ផ្គត់ផ្គង់នៅលើទីផ្សារហើយបានបង្កើតផលិតផលថ្មីមួយទៀត គឺម្ទេសឆាដើម្បីដាក់លក់បន្ថែមនៅលើទីផ្សារទៀតផង។
ក្រោយពីផលិតបានផលិតផលថ្មីហើយ គ្រួសាររបស់អ្នកនាងក៏បានយកកាពិឆាទៅឱ្យមិត្តភក្តិហូបសាកល្បងទៀត ហើយត្រូវបានមិត្តភក្តិប្រាប់ថា មានរសជាតិឆ្ងាញ់ប្លែកគួរឱ្យចង់ញ៉ាំ និងបានជំរុញឱ្យផលិតសម្រាប់ដាក់លក់នៅលើទីផ្សារទៀតផង ហើយបន្ទាប់មកក៏បានបែកគំនិតធ្វើជាទឹកត្រីកោះកុងបន្ថែមទៀត សម្រាប់ដាក់លក់នៅលើទីផ្សារ និងទទួលបានការគាំទ្រខ្លាំងថែមទៀតដូចគ្នា។
ការទទួលបានការគាំទ្រយ៉ាងខ្លាំងនេះ គឺដោយសារផលិតផលទាំង 4មុខខាងលើនោះមានរសជាតិឆ្ងាញ់ មិនចាញ់ផលិតផលនាំចូលពីបរទេស ពិសេសបានរៀបចំសម្បកវេចខ្ចប់ល្អស្អាតត្រូវតាមគុណភាពអនាម័យស្តង់ដារ មិនចាញ់ផលិតផលមួយចំនួនដែលកំពុងដាក់លក់នៅលើទីផ្សារក្នុងស្រុកនាពេលបច្ចុប្បន្ននេះឡើយ។
អ្នកនាងបានអះអាងថា ចំពោះការរៀបចំឱ្យផលិតផលមានគុណភាពស្តង់ដារ អ្នកនាងបានចុះបញ្ជីស្នើសុំវិញ្ញាបនបត្រពីក្រសូងដែលមានលេខបារកូដនៅលើសម្បកវេចខ្ចប់ ងាយស្រួលចំណាំជាផលិតផលរបស់កូនខ្មែរពិតៗឥតមានការក្លែងបន្លំ។
ការធ្វើបែបនេះ គឺដើម្បីចង់ឱ្យបរទេសទទួលស្គាល់ស្នាដៃកូនខ្មែរថា មានសមត្ថភាពមិនចាញ់បរទេសនោះទេ កូនខ្មែរក៏ចេះកែច្នៃវត្ថុធាតុដើមដែលជាផលិតផលក្នុងស្រុក មិនមែនអង្គុយចាំតែដាំដុះបានផលហើយយកទៅលក់ឱ្យគេនាំចេញ និងកែច្នៃរួចយកមកលក់ឱ្យយើងប្រើវិញក្នុងតម្លៃថ្លៃនោះឡើយ។
ដោយសារការខិតខំផលិតផលិតផលស្តង់ដារមានអនាម័យ និងមានការគាំទ្រនៅលើទីផ្សារអស់រយៈពេល 6ឆ្នាំមកនេះ ក្រុមហ៊ុនបានរៀបចំ និងអភិវឌ្ឍឱ្យកាន់តែធំឡើងមានលក្ខណៈស្តង់ដារបន្ថែមទៀត ដើម្បីចែកចាយទៅទីផ្សារក្នុងស្រុកឱ្យកាន់តែទូលំទូលាយឡើង និងថែមទាំងមានបំណងនាំចេញទៅលក់នៅលើទីផ្សារក្រៅប្រទេសទៀតផង។
អ្នកនាង កូវ ច័ន្ទសុវណ្ណារិទ្ធ បានរំឭកថា កាលពីការផលិតលក់សាកល្បង សិប្បកម្មខាងលើមិនមានចម្ការម្ទេសរបស់ខ្លួនឯងទេ ហើយក៏មិនទាន់មានកសិករសហការដើម្បីផ្គត់ផ្គង់ផ្លែម្ទេសជាប្រចាំដែរ ពោលគឺទឹកម្ទេសដែលបានផលិតលក់នៅពេលនោះ គឺសិប្បកម្មអ្នកនាងបានទិញវត្ថុធាតុដើម (ផ្លែម្ទេស) ពីផ្សារយកមកផលិត ហើយមកដល់ពេលបច្ចុប្បន្ន នៅពេលដែលសហគ្រាសបានពង្រីកខ្លួនក្លាយជាក្រុមហ៊ុនធំហើយ អ្នកនាងបានអំពាវនាវដល់កសិករឱ្យសហការជាមួយក្រុមហ៊ុនក្នុងការដាំម្ទេសធម្មជាតិដើម្បីផ្គត់ផ្គង់មកក្រុមហ៊ុន និងដើម្បីទទួលបានប្រាក់កម្រៃសម្រាប់ផ្គត់ផ្គង់គ្រួសារឱ្យមានជីវភាពកាន់តែប្រសើរឡើងជាមួយគ្នា។
អ្នកនាងបានបញ្ជាក់ថា ក្រុមហ៊ុនរបស់អ្នកនាងគាំទ្រវត្ថុធាតុ-ដើម ដែលជាផលិតផលក្នុងស្រុកជានិច្ច ហើយថា បើកសិករដាំបានផលកាន់តែច្រើន កាន់តែប្រសើរ ព្រោះសព្វថ្ងៃក្រុមហ៊ុនអ្នកនាងបាន និងកំពុងពង្រីកទីផ្សារឱ្យកាន់តែធំឡើងៗ ដោយបានដាក់លក់នៅលើទីផ្សារតាមទីប្រជុំជននានា តាមផ្សារទំនើប និងគ្រោងផលិតនាំចេញទៅលក់នៅក្រៅប្រទេសទៀតផង។ ការយកផលិតផលកសិកម្មក្នុងស្រុកមកកែ-ច្នៃនេះ ក្រុមហ៊ុនមានបំណងតែមួយប៉ុណ្ណោះ គឺចង់ឱ្យកសិករខ្មែរទទួលបានប្រាក់ចំណូលជាប់ជាប្រចាំ ដើម្បីឱ្យជីវភាពកាន់តែប្រសើរឡើងទាំងអស់គ្នា។
គួរបញ្ជាក់ដែរថា កន្លងមកផលិតផលរបស់កសិករខ្មែរ ជួនមានការគាំទ្រលើទីផ្សារ ជូនមិនមានការគាំទ្រ ឬមិនមានអ្នកទិញតែម្តងនៅពេលណាដែលការផ្គត់ផ្គង់មានចំនួនច្រើនលើសតម្រូវការទីផ្សារទៅតាមរដូវកាលនីមួយៗ ដែលធ្វើឱ្យកសិករបង្ខំចិត្តយកផលិតផលកសិកម្មរបស់ខ្លួនទៅចាក់ចោល ឬទុកឱ្យផ្លែទុំចោលមិនបេះមកលក់ទៀតផង ដូច្នេះនៅពេលមានសហគ្រាសកែច្នៃវត្ថុធាតុដើមក្នុងស្រុកកាន់តែច្រើន ដូចជាសិប្បកម្មផលិតទឹកម្ទេស “រ៉ារី” ជាដើមយើងនឹងអាចចូលរួមលើកកម្ពស់ផលិតផលកសិកម្មក្នុងស្រុក ឱ្យលែងសូវមានការព្រួយបារម្ភពីកង្វះទីផ្សារលក់ទិន្នផលដូចមុនទៀតហើយ។
អ្នកស្រី តាំង ឡាំងហេង កសិករដាំម្ទេសនៅស្រុកត្បូងឃ្មុំ ខេត្តត្បូងឃ្មុំមានប្រសាសន៍ថា កាលពីឆ្នាំកន្លងទៅប្រជាកសិករនៅក្នុងភូមិបាននាំគ្នាដាំម្ទេសច្រើនគ្រួសារដែរ ប៉ុន្តែផ្លែម្ទេសដែលប្រមូលបានរបស់កសិករមិនសូវមានការគាំទ្រលើទីផ្សារនោះទេ ជួនកាលមានឈ្មួញចុះទិញ ជួលកាលទិញថ្លៃ ជួនកាលទិញថោក ហើយពេលខ្លះទៀត មិនមានអ្នកទិញទៀតផង ជាហេតុធ្វើឱ្យកសិករបាក់ទឹកចិត្តលែងដាំម្ទេសនៅរយៈពេលប៉ុន្មានឆ្នាំចុងក្រោយនេះ។ អ្នកស្រីអះអាងថា បើសិនជាមានក្រុមហ៊ុនសហការ និងចាំទទួលទិញផ្លែម្ទេសពីកសិករពិតមែននោះ អ្នកស្រីក៏ដូចជាគ្រួសារកសិករផ្សេងទៀតដែរ នឹងនាំគ្នាដាំម្ទេសនេះដើម្បីផ្គត់ផ្គង់ទៅក្រុមហ៊ុនគ្រាន់បានកម្រៃសម្រាប់ដោះស្រាយជីវភាពប្រចាំថ្ងៃទាំងអស់គ្នា៕
December 3, 2018
ការអនុគ្រោះពន្ធបានធ្វើឱ្យវិនិយោគកូរ៉េជិត 2,000ក្រុមហ៊ុនចូលមកបណ្តាក់ទុននៅកម្ពុជា
មិនត្រឹមតែវិនិយោគិនចិន និងជប៉ុនប៉ុណ្ណោះទេបច្ចុប្បន្នមានវិនិយោគិនកូរ៉េដល់ទៅជិត 2ពាន់ក្រុមហ៊ុនឯណោះបាននាំគ្នាចូលមកបណ្តាក់ទុនរកស៊ីនៅកម្ពុជា ដោយសារតែកម្ពុជាមានស្ថិរភាពសេដ្ឋកិច្ចកាន់តែរឹងមាំ ពិសេសរាជរដ្ឋាភិបាលបានរៀបចំគោលនយោបាយអនុគ្រោះពន្ធដល់អ្នកវិនិយោគបរទេស ដែលនឹងផ្តល់ឱកាសឱ្យពួកគេអាចរកប្រាក់ចំណេញបានកាន់តែច្រើនត្រឡប់ទៅវិញ។
ឯកឧត្តម គង់ វិបុល ប្រតិភូរាជរដ្ឋាភិបាលទទួលបន្ទុកជាអគ្គនាយកនៃអគ្គនាយកដ្ឋានពន្ធដារបានមានប្រសាសន៍ថា កត្តាសំខាន់ដែលជំរុញឱ្យវិនិយោគិនចំនួនជិត 2,000ក្រុមហ៊ុនបានចូលមកបណ្តាក់ទុនរកស៊ីនៅកម្ពុជា គឺដោយសារកម្ពុជាមានភាពអនុគ្រោះពន្ធនាំចេញ-នាំចូល និងមានការកែទម្រង់ស៊ីជម្រៅលើវិស័យពន្ធដារជាច្រើន។
ឯកឧត្តម គង់ វិបុល ប្រតិភូរាជរដ្ឋាភិបាលទទួលបន្ទុកជាអគ្គនាយកនៃអគ្គនាយកដ្ឋានពន្ធដារ
ដើម្បីឱ្យពួកគេយល់កាន់តែច្បាស់អំពីវិស័យពន្ធដារនៅកម្ពុជា និងគោលនយោបាយអនុគ្រោះពន្ធនាំចេញ-នាំចូលរបស់រដ្ឋាភិបាលកម្ពុជា ឯកឧត្តមបានជួបជាមួយគណៈប្រតិភូកូរ៉េមួយក្រុម ដឹកនាំដោយសមាគមអ្នករកទទួលទានរបស់កូរ៉េដើម្បីពង្រឹងការផ្តល់សេវាដល់អ្នកជាប់ពន្ធឱ្យបានយល់ និងឈានទៅសហការជាមួយសមាគមវិនិយោគកូរ៉េ (KOTRA) ឱ្យបានកាន់តែប្រសើរថែមទៀត ដើម្បីជំរុញឱ្យអ្នកជាប់ពន្ធ ឬអ្នកវិនិយោគមកពីប្រទេសកូរ៉េយល់ពីកាតព្វកិច្ច និងយល់ដឹងច្បាប់ស្តីពីសារពើពន្ធរបស់កម្ពុជាកាន់តែច្បាស់ឡើង។
ឯកឧត្តមបញ្ជាក់ថា៖ “អគ្គនាយកដ្ឋានពន្ធដារតែងតែគិតគូរជានិច្ចដើម្បីពង្រឹងកាតព្វកិច្ចស្តីពីការបង់ពន្ធ និងការធ្វើឱ្យមានតម្លាភាពលើផ្នែកច្បាប់ និងការអនុវត្តច្បាប់នៅកម្ពុជា ជាពិសេសបង្កើនភាពទាក់ទាញអ្នកវិនិយោគទុនមកពីប្រទេសកូរ៉េមកវិនិយោគនៅប្រទេសកម្ពុជាឱ្យកាន់តែច្រើន ខណៈដែលប្រទេសយើងមានភាពអនុគ្រោះពន្ធនាំចេញ-នាំចូល និងមានការកែទម្រង់នៅលើវិស័យពន្ធដារជាច្រើន”។ វត្តមានរបស់វិនិយោគិនកូរ៉េ គឺបានចូលរួមចំណែកក្នុងការអភិវឌ្ឍ និងជំរុញកំណើនសេដ្ឋកិច្ចកម្ពុជា ហើយដើម្បីបង្កលក្ខណៈងាយស្រួល និងជំរុញការប្រកួតប្រជែងដោយស្មើភាពក្នុងចំណោមក្រុមហ៊ុន-សហគ្រាសនានានោះ ក្នុងរយៈពេល 6ឆ្នាំកន្លងមកនេះ អគ្គនាយកដ្ឋានពន្ធដារតែងខិតខំធ្វើទំនើបកម្មពន្ធដារឱ្យកាន់តែប្រសើរឡើងជាប់ជានិច្ច។
ឯកឧត្តម OHNAK YOUNG ឯកអគ្គរដ្ឋទូតនៃសាធារណរដ្ឋកូរ៉េប្រចាំកម្ពុជាបានថ្លែងដោយក្តីរីករាយដែល អគ្គនាយកដ្ឋានពន្ធដារកម្ពុជាបើកចំហបង្ហាញពីការប្រមូលពន្ធដោយស្មើភាព និងផ្តល់ឱ្យវិនិយោគិនកូរ៉េបានយល់ច្បាស់អំពីច្បាប់កម្ពុជា ជាពិសេសការអនុគ្រោះលើពន្ធនាំចេញនាំចូលតែម្តង ដែលនេះជាឱកាសផ្តល់ឱ្យវិនិយោគិនបរទេសអាចរកប្រាក់ចំណេញបានច្រើន។ ជាមួយគ្នានេះឯកឧត្តមក៏បានថ្លែងអបអរសាទរចំពោះស្ថិរភាពសេដ្ឋកិច្ចកម្ពុជា 7% ក្នុងរយៈពេល 2ទសវត្សរ៍ចុងក្រោយ ដែលជាកត្តាផ្តល់ទំនុកចិត្តខ្ពស់ដល់វិនិយោគិនបរទេសក្នុងការចូលមកបណ្តាក់ទុនរកស៊ីនៅកម្ពុជាកាន់តែច្រើនឡើង។
ឯកឧត្តម OHNAK YOUNG ឯកអគ្គរដ្ឋទូតនៃសាធារណរដ្ឋកូរ៉េប្រចាំកម្ពុជា
ការចូលមកបណ្តាក់ទុនរកស៊ីនៅកម្ពុជាកាន់តែច្រើននេះ គឺជាចលករដ៏សំខាន់ក្នុងការរុញច្រានល្បឿនសេដ្ឋកិច្ចកម្ពុជាឱ្យកាន់តែរីកចម្រើនលឿនឡើងៗ និងជាកត្តាសំខាន់ជួយឱ្យចំណូលប្រជាពលរដ្ឋកើនឡើងពីមួយឆ្នាំទៅមួយឆ្នាំ ដែលជួយឱ្យជីវភាពប្រជាពលរដ្ឋខ្មែរមានភាពប្រសើរឡើងថែមមួយកម្រិតទៀត។ តាមការព្យាកររបស់ធនាគារពិភពលោកបានបង្ហាញថា ឆ្នាំ2019 ខាងមុខសេដ្ឋកិច្ចកម្ពុជានឹងកើនឡើងជាងឆ្នាំមុនៗ។
គួរបញ្ជាក់ថា បច្ចុប្បន្នក្រុមហ៊ុនកូរ៉េកំពុងវិនិយោគលើគម្រោងធំៗជាច្រើននៅកម្ពុជា ដូចជាក្រុមហ៊ុន YUNWOO កំពុងវិនិយោគសាងសង់អគារ Gold Tower42, Booyoung Town, Decastle Condo, CAMKO CITY និងគម្រោងជាច្រើនទៀត ហើយកាលពីមួយទសវត្សរ៍មុន កូរ៉េជាប្រទេសនាំមុខគេក្នុងការវិនិយោគលើវិស័យសំណង់ និងអចលនទ្រព្យនៅកម្ពុជា។ គិតរហូតមកដល់ពេលនេះ កម្ពុជាទទួលបានអ្នកវិនិយោគទុនកូរ៉េចំនួន1,666ក្រុមហ៊ុន ហើយកម្ពុជាប្រមូលពន្ធពីអ្នកវិនិយោគបានចំនួន 50លានដុល្លារក្នុងឆ្នាំ2018 នេះ៕
December 3, 2018
កាសែតឡារ៉ែន ពាណិជ្ជ លេខ 152
[easy_media_download url=”https://www.lareine.com.kh/wp-content/uploads/2018/12/LRPN_152-Final-For-Web.pdf” force_dl=”1″]
December 3, 2018