ធឿន មករា - La Reine Media

ក្រូចថ្លុងកោះទ្រង់ ខេត្តក្រចេះមានទីផ្សារខ្លាំង បន្ទាប់ពីទទួលបានឈ្មោះជាផលិតផលសម្គាល់ភូមិសាស្ត្រ

ក្រោយពីទទួលបានវិញ្ញាបនបត្របញ្ជាក់ផលិតផលសម្គាល់ភូមិសាស្ត្រ(GI)កាលពីខែមិថុនាឆ្នាំមុន ក្រូចថ្លុងកោះទ្រង់ ខេត្តក្រចេះទទួលបានការចាប់អារម្មណ៍ខ្លាំងពីសំណាក់ភ្ញៀវទេសចរជាតិ និងអន្តរជាតិ ទាំងក្នុងតំបន់ និងនៅតាមបណ្តាខេត្តនានា។

ក្រូចថ្លុងកោះទ្រង់ ខេត្តក្រចេះ ជាផលិតផលសម្គាល់ភូមិសាស្ត្រទី3 បន្ទាប់ពីម្រេចខេត្តកំពត និងស្ករត្នោតកំពង់ស្ពឺ។ ក្រូចថ្លុងកោះទ្រង់ ខេត្តក្រចេះ គឺជាផលិតផលដំណាំហូបផ្លែប្រពៃណី ហើយវាមានសក្តានុពលខ្ពស់ក្នុងការលើកកម្ពស់ប្រាក់ចំណូលប្រជាជនក្នុងតំបន់ និងជួយបង្កើនចំនួនភ្ញៀវទេសចរទៅកាន់រមណីយដ្ឋានកោះទ្រង់ ខេត្តក្រចេះទៀតផង។

ចាប់តាំងពីក្រូចថ្លុងកោះទ្រង់ ត្រូវបានទទួលស្គាល់ជាផលិតផលសម្គាល់ភូមិសាស្ត្រមក ប្រជាពលរដ្ឋនៅក្នុងសង្កាត់កោះទ្រង់ ខេត្តក្រចេះចាប់ផ្តើមពង្រីកការដាំដុះបន្ថែមទៀតដើម្បីផ្គត់ផ្គង់ និងបំពេញតម្រូវការទីផ្សារ។ នេះបើយោងតាមលោកស្រី គាន រីណា ប្រធានសមាគមអ្នកដាំក្រូចថ្លុងកោះ-ទ្រង់ក្រចេះ។

លោកស្រី រីណា មានប្រសាសន៍ថា សព្វថ្ងៃសមាគមរបស់លោកស្រីមានសមាជិកចំនួន 226គ្រួសារ ដែលមានក្រូចថ្លុងប្រមាណជាង 1ម៉ឺនដើម ដោយឡែកក្រូចថ្លុងដែលកំពុងផ្តល់ផលមានប្រមាណតែជាង 2ពាន់ដើមប៉ុណ្ណោះ។

លោកស្រី រីណា បន្ថែមទៀតថា ទនិ្នផលរបស់ក្រូចថ្លុងកោះទ្រង់ អាស្រ័យលើអាយុកាលរបស់ដើមក្រូចដោយលោកស្រីពន្យល់ថា ដើមក្រូចថ្លុងដែលលូតលាស់ថ្មីៗ ផ្តល់ផលឆ្នាំដំបូងបានប្រមាណតែ4 ទៅ10ផ្លែតែប៉ុណ្ណោះ ដោយឡែកដើមក្រូចថ្លុងដែលមានអាយុកាលចាប់ពី2 ទៅ3ឆ្នាំ ទិន្នផលនឹងទទួលបានប្រមាណពី50 ទៅ50ផ្លែក្នុងមួយដើម ហើយចាប់ពី 3ឆ្នាំឡើងទៅ ទន្និផលនឹងទទួលបានកាន់តែច្រើនឡើងដែរ។

លោកស្រីបានបន្តថា៖“ឥឡូវនេះមានការទទួលស្គាល់ច្រើនលើរសជាតិរបស់ក្រូចថ្លុងកោះទ្រង់ហើយក្រោយពីទទួលបានផលិតផលសម្គាល់ភូមិសាស្ត្រ កាន់តែមានការទទួលស្គាល់ថែមទៀតពីសំណាក់អ្នកនិយមទទួលទានក្រូចថ្លុងកោះទ្រង់ ឯតម្លៃវិញ ក្រូចថ្លុងមួយផ្លែមានតម្លៃប្រមាណជា 14,000រៀល ឬ3.5ដុល្លារអាមេរិក”។

លោកស្រី រីណា បានបញ្ជាក់ថា ក្រូចថ្លុងកោះទ្រង់ភាគច្រើនគេយកមកលក់នៅភ្នំពេញ ហើយឥឡូវការផ្គត់ផ្គង់នៅមានកម្រិតនៅឡើយ ដោយសារក្រូចថ្លុងកោះទ្រង់ផ្លែតាមរដូវ ដោយរដូវប្រមូលផលក្រូចថ្លុងកោះទ្រង់ គឺចាប់ពីខែតុលា ដល់ខែធ្នូ ហើយបើផុតពីរដូវប្រមូលផល រសជាតិក៏មិនសូវឆ្ងាញ់ដូចរដូវប្រមូលផលដែរ។

លោកស្រីមានប្រសាសន៍ថា នៅពេលនេះយើងកំពុងធ្វើការពង្រីកការដាំដុះបន្ថែមទៀត ដោយសារតែឃើញក្រូចថ្លុងរបស់យើងទទួលបានការគាំទ្រច្រើនពីសំណាក់មហាជន។ កាលពីមុន កសិករមានការពិបាកលក់បន្តិច ប៉ុន្តែឥឡូវនេះមានការបញ្ជាទិញច្រើន ដែលសឹងតែគ្មានក្រូចថ្លុងលក់ឱ្យគេទៀតផង។ ជាទូទៅ ការទិញក្រូចថ្លុងកោះទ្រង់ភាគច្រើនគឺគេយកទៅបរិភោគជាលក្ខណៈគ្រួសារ ដោយឡែកក៏មានអាជីវករមួយចំនួនចាប់ផ្តើមទាក់ទងមកទំនាក់ទំនងសមាគមដើម្បីម៉ៅទិញយកទៅលក់បន្តផងដែរ។

លោក ប៊ុន បាន ប្រធានសហគមន៍អេកូទេសចរណ៍កោះទ្រង់ បានថ្លែងថា រមណីយដ្ឋានកោះទ្រង់មិនត្រឹមតែជាតំបន់កសិ-ទេសចរណ៍ប៉ុណ្ណោះទេប៉ុន្តែវាថែមទាំងមានឆ្នេរខ្សាច់វែង លាតសន្ធឹងប្រមាណជាង 4គីឡូម៉ែត្រទៀតផង។

លោកបានបន្ថែមថា៖“យើងថែមទាំងមានសមាគមផលិតបន្លែសម្រាប់ផ្គត់ផ្គង់សហគមន៍ផ្ទះសំណាក់ ដើម្បីទទួលភ្ញៀវទេសចរ លើកលែងតែបន្លែមួយចំនួនដែលពិបាករក។ យើងមានដំណាំហូបផ្លែតាមរដូវកាលដូចជា ក្រូចថ្លុង ខ្នុរ ផ្លែទឹកដោះគោជាដើម”។

លោកថា៖“យើងបានចងក្រងជាសហគមន៍សមាគម និងជាក្រុមតូចៗដើម្បីបម្រើសេវាកម្មទេសចរណ៍ ដូចជារទេះសេះ រទេះគោ រ៉ឺម៉កកង់បី កង់ ទូកជិះកម្សាន្ត និងផ្ទះស្នាក់នៅ ជាដើម យើងបង្កើតមុខរបរបានជាច្រើន និងកាត់បន្ថយការធ្វើចំណាកស្រុករបស់ប្រជាពលរដ្ឋក្នុងស្រុកទៀតផង។

លោក បាន បានបន្តថា ទេសចរជាច្រើនបានទៅលេងរមណីយដ្ឋានកោះទ្រង់ ដោយនៅឆ្នាំ2018 ទេសចរជាតិដែលបានទៅទស្សនារមណីយដ្ឋានកោះទ្រង់មានជាង 17,000នាក់ និងភ្ញៀវបរទេសមានជាង 300នាក់បានមកកម្សាន្តឆ្នេរខ្សាច់។

ដោយឡែកលោក អប់ រ៉ាឌី ប្រធាននាយកដ្ឋានកម្មសិទ្ធិបញ្ញានៃក្រសួងពាណិជ្ជកម្ម បានថ្លែងថាបច្ចុប្បន្នកម្ពុជាមានផលិតផលកសិកម្មជាង 20មុខទៀតដែលអាចនឹងទទួលបានវិញ្ញាបនបត្រផលិតផលសម្គាល់ភូមិសាស្ត្រនាពេលអនាគត ដូចជា អំបិលកំពត ទុរេនកំពត សូត្រភ្នំស្រុក ខេត្តបន្ទាយមានជ័យ ស្រូវសែនក្រអូបខេត្តបាត់ដំបង និងប្រហុកខេត្តសៀមរាបជាដើម៕

January 14, 2019

ឆ្នាំ2018 ផ្សារមូលបត្រកម្ពុជា CSX បានបង្ហាញភាពរីកចម្រើន និងរឹងមាំ

ដោយសារការជួញដូរដ៏រឹងមាំនៅចុងបញ្ចប់ឆ្នាំ2018 ផ្សារមូលបត្រកម្ពុជា CSX (The Cambodia Securities Exchange) ទទួលបានក្នុងកម្រិតខ្ពស់បំផុតគឺ 48,098ពិន្ទុ កើនឡើង40% បើធៀបនឹងឆ្នាំ2017 សម្រាប់មូលធនូបនីយកម្មទីផ្សារ (Market capitalization) ចំនួន 44,292លានដុល្លារអាមេរិក (1.77ពាន់ពាន់លានរៀល)។ក្នុងនោះកំណើនភាគច្រើនបានពីកំពង់ផែស្វយ័តក្រុងព្រះសីហនុ Sihanoukville Autonomous Port (PAS)។ នេះបើយោងតាមសេចក្តីប្រកាសព័ត៌មានរបស់ CSX។

នៅក្នុងសេចក្តីប្រកាសព័ត៌មានរបស់ CSX បានឱ្យដឹងថា សន្ទស្សន៍នេះបានកើនឡើង 9.81ពិន្ទុ ឬ 2.08% ជាមួយនឹងភាគហ៊ុនចំនួន19,602ភាគហ៊ុនត្រូវបានជួញដូរក្នុងតម្លៃសរុប 26,553.98 ដុល្លារ។ តម្លៃជួញដូរប្រចាំថ្ងៃជាមធ្យមបានកើនឡើង101% ដល់26,701ដុល្លារ ពី10,660លានរៀល។

ផ្សារហ៊ុនដែលមានក្រុមហ៊ុនចុះបញ្ជីចំនួន5 និងមូលបត្របំណុលសាជីវកម្មមួយបានកើនឡើង 4ភាគហ៊ុនក្នុងចំណោមភាគហ៊ុន5 នៅចុងឆ្នាំធៀបនឹងឆ្នាំមុនជាពិសេសកំពង់ផែស្វយ័តព្រះសីហនុ ឬPAS ដែលគ្រប់គ្រងដោយរដ្ឋដែលកើនឡើង98.04% ដល់ចំនួន 10,100រៀល ពី5,100រៀលសម្រាប់មូលបត្រទីផ្សារចំនួន 11,029.62ដុល្លារអាមេរិក និងភាគហ៊ុនសរុបចំនួន 4,386ត្រូវបានធ្វើចរាចរណ៍។

កាលពីសប្តាហ៍មុន CSX បានមើលឃើញបរិមាណជួញដូរធំជាងគេជាមួយភាគហ៊ុនPAS ចំនួនជាង 2លានដុល្លារដែលផ្លាស់ប្តូរដៃតាមរយៈវិធីសាស្ត្រជួញដូរដែលបានចរចា។ ភាគហ៊ុន PAS ចំនួន 2.14លានហ៊ុន ឬភាគហ៊ុន2.5% ត្រូវបានទិញដោយក្រុមហ៊ុន Kobe-Osaka International Port Corp (KOI) ដែលជាប្រតិបត្តិករកំពង់ផែ Hanshin មកពីទីភ្នាក់ងារសហប្រតិបត្តិការអន្តរជាតិជប៉ុន (JICA)។

ពីមួយឆ្នាំទៅមួយឆ្នាំអង្គភាពនៃអាជីវកម្មដែលមានទំនាក់ទំនងជាមួយរដ្ឋាភិបាល គឺកំពង់ផែ ស្វយ័តភ្នំពេញ (PPAP) បានកើនឡើងជិត 50% ស្មើនឹង 7,680រៀលក្នុងមួយហ៊ុនគិតចាប់ពី 5,140 រៀល ហើយរដ្ឋាករទឹកស្វយ័តក្រុងភ្នំពេញ (PWSA) បានកើនឡើង 8.81% ខ្ពស់ជាង 4,200រៀល។ កំណើននេះបានធ្វើឱ្យ PPAP និងPWSA មូលធនកម្មទីផ្សារមានចំនួន 279ដុល្លារ និង12,090.71 ដុល្លារ។

តំបន់សេដ្ឋកិច្ចពិសេសភ្នំពេញដែលជាតំបន់អភិវឌ្ឍន៍ឧស្សាហកម្មរបស់ភ្នំពេញបានឃើញថាភាគហ៊ុនបានជួញដូរក្នុងតម្លៃខ្ពស់ជាង 2.84% ដល់ជិត 2,900រៀលធៀបនឹងឆ្នាំមុនសម្រាប់មូលធនកម្មទីផ្សារ 1,135.36ដុល្លារ។

ផ្ទុយទៅវិញក្រុមហ៊ុនកាត់ដេរ Grand Twins International (កម្ពុជា) ភីអិលស៊ីបានធ្លាក់ចុះ 8.09% ស្មើនឹង 4,320រៀល ពី 4,700 រៀលកាលពីឆ្នាំមុនដោយមានទុនវិនិយោគ 2,019.30ដុល្លារ។

ផ្សារមូលបត្រកម្ពុជាបានឱ្យដឹងថា ចំនួននៃគណនីជួញដូរបានកើនឡើងដល់ 20,525គណនី ពី8,973នៅដើមឆ្នាំ ដោយ84% ជារបស់វិនិយោគិនក្នុងស្រុក។ 17% នៃម្ចាស់គណនីជួញដូរបានចុះបញ្ជីប្រព័ន្ធពាណិជ្ជកម្មចល័ត (MTS) ដែលត្រូវបានដាក់ឱ្យដំណើរការនៅពាក់កណ្តាលឆ្នាំ2018 ដើម្បីឱ្យវិនិយោគិនអាចដាក់ការបញ្ជាទិញ និងពិនិត្យមើលតុល្យភាពរបស់ពួកគេពីគ្រប់ទីកន្លែងដោយបានឱ្យដឹងបន្ថែមថា 59%នៃការបញ្ជាទិញភាគហ៊ុនត្រូវបានដាក់តាម MTS។

កាលពីមុន CSXបានឱ្យដឹងថា ការកើនឡើងនៃការចូលរួមពីការលក់រាយត្រូវបានជំរុញដោយការកើនឡើងនៃការអប់រំរបស់វិនិយោគិនកំណើនសេដ្ឋកិច្ចកម្ពុជា និងទិន្នផលភាគលាភជាមធ្យមពី4 ទៅ5% ក្នុងឆ្នាំ2017។

អ្នកជំនាញទីផ្សារមូលបត្រនៃគណៈកម្មការផ្សារមូលបត្រកម្ពុជា បានប្រាប់ឡារ៉ែនពាណិជ្ជឱ្យដឹងថា មូលធនូបនីយកម្មទីផ្សាររបស់ផ្សារមូលបត្រកម្ពុជាកើនឡើងខ្លាំងនៅឆ្នាំ2018 កន្លងមកនេះ មកពីចំណុចធំ2 គឺទី1-ដោយសារទំនុកចិត្តរបស់វិនិយោគិននាំឱ្យមានការជួញដូរលើទីផ្សារកើនឡើងដូច្នេះធ្វើឱ្យមានការកើនឡើងតម្លៃភាគហ៊ុនដែលធ្វើឱ្យសកម្មភាពជួញដូរប្រចាំថ្ងៃ និងមួយរយៈពេលចុងឆ្នាំមានភាពប្រសើរឡើង។ ទី2-ការបោះផ្សាយភាគហ៊ុនបន្ថែមរបស់ក្រុមហ៊ុនតំបន់សេដ្ឋកិច្ចពិសេសភ្នំពេញ (PPSP)បានលក់ភាគហ៊ុនបន្ថែមចំនួន 14លានហ៊ុន(Shares)ទៅឱ្យវិនិយោគិនជាស្ថាប័នចំនួន2 គឺក្រុមហ៊ុន JWD Infologistics Plc ដែលជាក្រុមហ៊ុនឡូជីស្ទិករបស់ប្រទេសថៃ និងក្រុមហ៊ុន Bok Seng Group ដែលជាក្រុមហ៊ុនឡូជីស្ទិករបស់ប្រទេសសិង្ហបុរី ក៏ជាហេតុផលដែលជំរុញឱ្យមូលធនូបនីយកម្មទីផ្សាររបស់ផ្សារមូលបត្រកម្ពុជាកើនឡើងខ្លាំងដែរ។ អ្នកជំនាញដដែលបានបន្ថែមថា “ដូច្នេះការកើនឡើងរបស់ CSX ឆ្នាំ2018 បានបង្ហាញពីភាពរីកចម្រើន និងរឹងមាំរបស់វិស័យមូលបត្រនៅកម្ពុជា”។

អ្នកជំនាញទីផ្សារមូលបត្រក៏បានឱ្យដឹងទៀតដែរថា៖ ដើម្បីជំរុញឱ្យផ្សារមូលបត្រកម្ពុជាកាន់តែមានភាពរីកចម្រើនសម្រាប់ឆ្នាំ2019នេះ យើងរំពឹងទុកថានឹងមានការកើនឡើងថែមទៀត ដោយយើងនឹងមានក្រុមហ៊ុនបោះផ្សាយភាគហ៊ុនបន្ថែម។ ជាមួយគ្នានេះយើងនឹងខិតខំធ្វើការងារមួយចំនួនដូចជាបង្កើនភាពទាក់ទាញ ជំរុញការយល់ដឹង និងផ្សព្វផ្សាយឱ្យកាន់តែទូលំទូលាយដើម្បីឱ្យក្រុមហ៊ុនកាន់តែច្រើនមកចុះឈ្មោះក្នុងផ្សារហ៊ុនដើម្បីធ្វើឱ្យមានការទាក់ទាញទីផ្សារបន្ថែម។

ម្យ៉ាងទៀតទាំងគណៈកម្មការមូលបត្រ ទាំងទីផ្សារភាគហ៊ុនបានយកចិត្តទុកដាក់ទៅលើការបង្កើនរយៈពេលប្រតិបត្តិការទីផ្សារ ដោយពង្រីកម៉ោងជួញដូរពី3-5ម៉ោង ដល់7ម៉ោងតែម្ដងក្នុង1ថ្ងៃយើងក៏បានកសាងមូលដ្ឋានបទដ្ឋានគតិយុត្ត ការលើកទឹកចិត្តផ្នែកពន្ធសម្រាប់វិនិយោគិនក្នុងវិស័យមូលបត្រ និងបង្កើនភាពទាក់ទាញដល់វិនិយោគិនជាតិ និងអន្តរជាតិជាដើម។

អ្នកជំនាញទីផ្សារមូលបត្រដដែលបានឱ្យដឹងទៀតថា បច្ចុប្បន្នផ្សារមូលបត្រកម្ពុជាទទួលបានការចាប់អារម្មណ៍កាន់តែច្រើនពីសាធារណជនក្នុងស្រុក និងបរទេសដែលជំរុញឱ្យទំហំនៃការជួញដូរ និងតម្លៃរបស់មូលបត្រកើនឡើងជាបន្តបន្ទាប់ជាពិសេសចាប់ពីអំឡុងត្រីមាសទី3 នៃឆ្នាំ2018មក។ កំណើនមូលធនូបនីយកម្មទីផ្សាររបស់ផ្សារមូលបត្រកម្ពុជាពេលនេះក៏អាចបញ្ជាក់ពីទំនុកចិត្តរបស់វិនិយោគិនចំពោះផ្សារមូលបត្រកម្ពុជាផងដែរ។

“សម្រាប់ឆ្នាំ2019នេះ សកម្មភាពនៃការទិញលក់នៅក្នុងផ្សារមូលបត្រកម្ពុជានឹងរឹតតែបង្ហាញសញ្ញាវិជ្ជមានបន្ថែមទៀត។ ប៉ុន្តែសម្រាប់តម្លៃវិញអាចនិយាយថាអាចនឹងមានការប្រែប្រួលព្រោះវាអាស្រ័យទៅលើស្ថានភាពរបស់ក្រុមហ៊ុននីមួយៗ តែយើងរំពឹងថា ឆ្នាំ2019នេះ គឺជាឆ្នាំដ៏ជោគជ័យសម្រាប់ទីផ្សារមូលបត្របន្តទៀត”៕

January 14, 2019

មណ្ឌលតាកែវចាប់ផ្តើមសករាជថ្មីនៃការប្រកួត Tiger Street Football Festival 2019

ខេត្តតាកែវ៖បន្ទាប់ពីខេត្តព្រះសីហនុដែលក្រុមការងារ Tiger Street Football Festival 2019 បានមករៀបចំការប្រកួតដំបូង និងធំជាងគេនៅក្នុងប្រទេសកម្ពុជា ពេលនេះបានធ្វើដំណើរមកដល់ខេត្តតាកែវដែលជាមណ្ឌលទី២ សម្រាប់ឆ្នាំ២០១៩រង្វាន់សរុបទូទាំងប្រទេសកាន់តែធំអស្ចារ្យរហូតដល់៥០០០០ដុល្លារ។

ចំពោះខេត្តតាកែវជាមណ្ឌលថ្មីនេះមាន៣២ក្រុមចូលរួមក្នុងការប្រកួតជម្រុះនាថ្ងៃទី១៣ ខែមករាឆ្នាំ២០១៩ នេះដើម្បីចូលរួមចំណែកក្នុងការលើកកម្ពស់សកម្មភាពកីឡាក៏ដូចជាវេទិកាមួយសម្រាប់កីឡាករបាល់ទាត់ និងអ្នកស្នេហាវិស័យបាល់ទាត់ ដើម្បីបង្ហាញទេពកោសល្យ ផ្លាស់ប្តូរបទពិសោធន៍ និងរៀនពីទម្រង់ថ្មីៗនៃការលេង។

ព្រឹត្តិការណ៍ប្រកួតបាល់ទាត់ Tiger Street Football Festival ប្រចាំឆ្នាំ ២០១៩ រដូវកាលទី៧បានត្រឡប់មកវិញទៀតហើយ និងកាន់តែជាព្រឹត្តិការណ៍ដ៏ធំអស្ចារ្យ ក្រុមចូលរួមប្រកួត កាន់តែច្រើន និងមានរង្វាន់សរុបរហូតដល់៥០០០០ដុល្លារ។

ព្រឹត្តិការណ៍ប្រកួតបាល់ទាត់ Tiger Street Football Festival រួមមានសកម្មភាពសប្បាយរីករាយជាច្រើន ទាំងការប្រកួតបាល់ទាត់ ស្តង់លេងហ្គេមកម្សាន្ត ស្តង់សម្រាប់អ្នកគាំទ្រមានជាបដា សម្រាប់សរសេរគាំទ្រក្រុមរបស់ខ្លួន និងមានការគូរមុខគួរឲ្យទាក់ទាញ មានកន្លែងលក់វត្ថុអនុស្សាវរីយ៍ ជាសម្ភារៈកីឡា កន្លែងថតរូបអនុស្សាវរីយ៍ និងកម្មវិធីប្រូម៉ូសិនពិសេស សម្រាប់ការជាវស្រាបៀរថៃហ្គ័រមកពិសា បន្ទាប់ពីការប្រកួតបាល់ទាត់ ។ អ្វីដែលកាន់តែអស្ចារ្យនោះគឺ កម្មវិធីប្រគំតន្រ្តីកាន់តែធំជាងមុនឆាកតន្រ្តីកាន់តែទំនើប ភ្លើងពណ៌ចម្រុះ នឹងមានការអញ្ជើញចូលរួម សម្តែងពីសំណាក់តារាល្បីៗ ប្រចាំព្រះរាជាណាចក្រកម្ពុជាកាន់តែរំភើបកាន់តែអស្ចារ្យ ដែលញ៉ាំងឲ្យព្រឹត្តិការណ៍នេះកាន់តែជក់ចិត្ត និងដក់ជាប់អារម្មណ៍ដល់អ្នកទស្សនា។ ការប្រកួតជាផ្លូវការនឹងចាប់ផ្តើមនាវេលាម៉ោង៧៖៣០នាទីព្រឹក ថ្ងៃទី១៣ ខែមករា ឆ្នាំ២០១៩នៅផ្សារបុរីរស្មី

Tiger Street Football Festival ឆ្នាំ២០១៩ នេះ មណ្ឌលប្រកួតកើនឡើងរហូតដល់៩ខេត្ត-ក្រុងទូទាំងប្រទេស រួមមាន ខេត្តព្រះសីហនុ ខេត្តតាកែវ ខេត្តកំពង់ស្ពឺ ខេត្តបាត់ដំបង ខេត្តសៀមរាប ក្រុងប៉ោយប៉ែត ខេត្តកំពង់ចាម ក្រុងតាខ្មៅខេត្តកណ្តាល និងរាជធានីភ្នំពេញ។ ការប្រកួតដណ្ដើមតំណែងជើងឯក Tiger Street Football Festival ឆ្នាំ២០១៩នេះ និងមានឱកាសជួបផ្ទាល់ជាមួយកំពូលតារាបាល់ទាត់អន្តរជាតិ Ronaldo នៅថ្ងៃវគ្គផ្តាច់ព្រ័ត្រដណ្តើមជើងឯកនៅរាជធានីភ្នំពេញថ្ងៃទី ១៦-១៧ មីនាខាងមុខនេះ។

ស្រាបៀរថៃហ្គ័រជាស្រាបៀរដែលមានគុណភាពខ្ពស់លំដាប់ថ្នាក់អន្តរជាតិមានដើមកំណើតតាំងពីឆ្នាំ១៩៣២នៅប្រទេសសិង្ហបុរី និងមានលក់នៅច្រើនជាង៧០ប្រទេសនៅទូទាំងពិភពលោក ហើយស្រាបៀរថៃហ្គ័រឈ្នះពានរង្វាន់លំដាប់ថ្នាក់អន្តរជាតិច្រើនជាង៤០មេដាយផ្នែករសជាតិ និងគុណភាព។

សូមចូលទៅកាន់ទំព័រហ្វេសប៊ុកផ្លូវការ របស់ស្រាបៀរថៃហ្គ័រ៖ www.facebook.com/TigerBeerKH

(ដោយការទទួលខុសត្រូវ)៕

January 13, 2019

សុខភាពល្អ គ្រួសារមានសុភមង្គល

ការមើលថែរក្សាគ្រប់គ្នានៅក្នុងគ្រួសារ ជាពិសេសកូនៗឱ្យរស់នៅប្រកបដោយសុខភាពល្អ គឺជាតួនាទី និងជាបំណងប្រាថ្នារបស់លោកឪពុកអ្នកម្តាយគ្រប់ៗរូប។ ការចេះជួយសហការគ្នារវាងគ្រប់គ្នាដែលរស់នៅក្នុងផ្ទះគឺជាការចូលរួមថែរក្សាសុខភាពដ៏ល្អប្រសើរបំផុត។ បើទោះជាយ៉ាងនេះក្តី អ្នកម្តាយនៅតែដើរតួជាមនុស្សម្នាក់ដែលសំខាន់បំផុតនៅក្នុងសាច់រឿងមួយនេះ។ ការថែរក្សាសុខភាពគ្រប់គ្នាក្នុងគ្រួសារ ត្រូវគិតគូរគ្រប់បែបយ៉ាង តាំងពីអាហារហូបចុក អនាម័យ ការការពារ និងការថែរក្សា ព្រមទាំងសកម្មភាពផ្សេងៗជាច្រើនទៀត។

អាហារហូបចុក : ត្រី សាច់ ស៊ុត បន្លែ ផ្លែឈើ ដែលជាប្រភពនៃប្រូតេអីុន គឺជារឿងទីមួយដែលអ្នកត្រូវគិតដល់ ប៉ុន្តែសូមកុំភ្លេចឱ្យសោះថា ការចម្អិនអាហារទាំងនោះតែម្យ៉ាងគឺមិនទាន់គ្រប់គ្រាន់នោះទេ មានន័យថា លោកអ្នកក៏ត្រូវគិតដល់ប្រភពនៃវត្ថុធាតុដើមដែលអ្នកបានយកមកធ្វើការចម្អិនផងដែរ។ វាជាការពិបាកបន្តិចក្នុងការប្រគល់សេចក្តីទុកចិត្តទាំងស្រុងទៅលើអ្នកលក់ និងបន្លែផ្លែឈើដែលអ្នកត្រូវយកមកធ្វើជាអាហារ ព្រោះថាបច្ចុប្បន្ននេះការចង់បានប្រភពអាហារដែលគ្មានជាតិពុលគឺជារឿងដែលពិបាកបន្តិចហើយ។ បើដូច្នេះតើយើងគួរតែធ្វើដូចម្តេច ដើម្បីកាត់បន្ថយផលប៉ះពាល់នេះឱ្យមកនៅទាបបំផុត? បន្លែដែលដាំដោយខ្លួនឯង (ប្រសិនបើអាច) បន្លែដែលមានការធានាថាពិតជាគ្មានសារធាតុគីមី ឬបន្លែដែលបានលាងសម្អាតយ៉ាងត្រឹមត្រូវ… ជាផ្នែកមួយដែលអ្នកគួរតែធ្វើ ដើម្បីកាត់បន្ថយការប៉ះពាល់សុខភាពបានមួយភាគដែរ។

ទទួលទានឱ្យត្រូវតាមកាលៈទេសៈ : អ្នកម្តាយត្រូវមានភាពឆ្លាតវៃក្នុងការជ្រើសរើសអាហារល្អសម្រប់សមាជិកក្នុងគ្រួសារ។ នៅពេលសមាជិកម្នាក់ ឬច្រើននៅក្នុងគ្រួសារមានបញ្ហាសុខភាពនោះ លោកអ្នកក៏ត្រូវនឹកគិតដល់អាហារជំនួយផងដែរ។ ប្រសិនបើលោកអ្នកកំពុងតែចង់ឱ្យសមាជិកក្នុងគ្រួសារទទួលទានផ្លែឈើដែលអាចជួយសម្អាតជាតិពុលក្នុងរាងកាយនោះ សូមកុំភ្លេចផ្លែឈើមួយចំនួនដូចជា ល្ហុង ប៉ោម ម្នាស់ ឪឡឹក ទំពាំងបាយជូរជាដើម ព្រោះថាផ្លែឈើប្រភេទនេះអាចជួយសម្អាតជាតិពុលពីក្នុងពោះវៀន បានយ៉ាងប្រសើរ។ សម្រាប់លោកអ្នកដែលចង់ឱ្យសមាជិកក្នុងគ្រួសារជាមនុស្សដែលពេញទៅដោយថាមពលវិញនោះ ឡារ៉ែន សូមណែនាំអ្នកឱ្យដាក់បញ្ចូលអាហារមួយចំនួនដែលជាអាហារថាមពលនៅក្នុងមឺនុយអាហាររបស់អ្នក (ទាំងអាហារក្រៅពេល និងអាហារចម្បង) ដូចជា ទឹកឃ្មុំ ផ្លែប៉ោម ស៊ុត ដំឡូងជ្វា សាច់ត្រីសាលម៉ុន ក្រូច ចេក ស្រូវអូក សណ្តែក ស្ពៃ (spinach) យ៉ាអួរ និងគ្រាប់អាល់ម៉ុនជាដើម។

គ្រូពេទ្យក្នុងផ្ទះ : ក្រៅពីគ្រូពេទ្យនៅខាងក្រៅ លោកអ្នកក៏អាចដើរតួនាទីជាគ្រូពេទ្យក្នុងផ្ទះបានដែរ។ ដូចដែលអ្នកបានដឹងស្រាប់ហើយថាក្មេងតូចៗងាយនឹងទទួលរងការកើត ឬការឆ្លងជំងឺផ្តាសាយខ្លាំងណាស់ ជាពិសេសគឺក្នុងខែដែលមានខ្យល់ធ្លាក់ និងការផ្លាស់ប្តូរនៃអាកាសធាតុ។ ការព្យាបាលជំងឺផ្តាសាយឱ្យជាក្នុងរយៈពេលភ្លាមៗគឺជារឿងដែលស្ទើរតែមិនអាចធ្វើបាន ប៉ុន្តែអ្នកម្តាយលោកឪពុកឆ្លាតវៃនៅតែអាចជួយធ្វើឱ្យសភាពជំងឺមួយនេះមានភាពធូរស្រាលជាងមុនបាន ដោយការអនុវត្តតាមវិធីមួយចំនួនដូចជា ការត្រាំជើងដោយទឹកក្តៅឧណ្ហៗ ឆ្អង់ចំហាយទឹក ឬងូតទឹកក្តៅជាដើម។ គួរចៀសវាងការទទួលទានទឹកត្រជាក់ខ្លាំង ហើយងាកមកទទួលទានទឹកក្តៅៗ ឬទឹកតែខ្ញី និងទឹកក្រូចឆ្មារជាមួយទឹកឃ្មុំវិញ។ ទទួលទានផ្លែឈើមួយចំនួនដូចជា ប៉ោម ល្ហុង ក្រូច ចេក ប៊ឺរី ត្របែក និងផ្លែឈើផ្សេងៗទៀត ដែលសម្បូរទៅដោយវីតាមីន។ នៅពេលដែលអ្នកណាម្នាក់មានជំងឺត្រូវប្រើប្រាស់ឱសថអ្នកត្រូវចាំចំណុចសំខាន់មួយចំនួនដូចជា កុំលេបថ្នាំដោយទឹកត្រជាក់ខ្លាំង កុំគេងភ្លាមៗក្រោយលេបថ្នាំរួច មិនថាវាជាថ្នាំដែលត្រូវលេបមុន ឬក្រោយអាហារនោះទេ អ្នកមិនគួរលេបវាភ្លាមៗទេ គួរទុកចន្លោះពេលមុន ឬក្រោយអាហារ ប្រមាណជា10នាទីសិន។

ការនាំគ្នាធ្វើលំហាត់ប្រាណជាលក្ខណៈគ្រួសារ : ការនាំគ្នាដើរកម្សាន្តស្រូបយកខ្យល់អាកាស មិនត្រឹមតែជួយឱ្យសុខភាពរបស់លោកអ្នកមានភាពរឹងមាំនោះទេ តែវាថែមទាំងជួយបង្កើនភាពរីករាយ សេចក្តីគោរពស្រឡាញ់ និងសុភមង្គលក្នុងគ្រួសារផងដែរ។

អនាម័យ : គ្រប់គ្នានៅក្នុងគ្រួសារគួរតែសហការគ្នា ដើម្បីឱ្យក្នុងផ្ទះ និងក្រៅផ្ទះប្រកបដោយអនាម័យ។ មនុស្សធំនៅក្នុងគ្រួសារអាចបង្រៀនកូនតូចៗឱ្យធ្វើជាមនុស្សដែលមានអនាម័យ តាមរយៈការនិយាយប្រាប់ណែនាំ និងការធ្វើជាគំរូល្អដល់ពួកគេ។ ជាការពិតលោកឪពុកអ្នកម្តាយគ្រប់រូបតែងប្រាថ្នាចង់ឱ្យកូនៗរស់នៅប្រកបដោយអនាម័យ ដើម្បីកាត់បន្ថយ និងជួយការពារពួកគេពីការឆ្លងជំងឺនានា។

ប្តូរទម្លាប់មិនល្អ : ប្រសិនបើសមាជិកក្នុងគ្រួសារ ជាពិសេសកូនៗរបស់អ្នកមានទម្លាប់ចូលគេងយប់ជ្រៅ នោះអ្នកគួរតែព្យាយាមធ្វើយ៉ាងណាកែប្រែទម្លាប់នេះចេញ។ ដូចដែលអ្នកដឹងហើយថា ការគេងបានតិច ឬការចូលគេងយប់ជ្រៅពេក មិនមែនជារឿងល្អទេ វាអាចធ្វើឱ្យមានផលប៉ះពាល់ខ្លះៗចំពោះការវិវឌ្ឍនៃខួរក្បាលក្មេងតូច អាចធ្វើឱ្យការទទួលបានភាពស្កប់ស្កល់ក្នុងការគេងមានតិច បើប្រៀបធៀបទៅនឹងការដែលឆាប់ចូលគេង (ការចូលគេងម៉ោង9យប់ជាពេលវេលាដំណេកដ៏ល្អបំផុត)។ ជឿជាក់ថាលោកអ្នកពិតជាបានដឹងច្បាស់ណាស់ថា អាហារបែបនំកញ្ចប់ អាហារដែលមានជាតិស្ករ អាហារដែលមានជាតិខ្លាញ់ច្រើនជាដើម មិនមែនជាអាហារដែលផ្តល់នូវគុណប្រយោជន៍ដល់រាងកាយនោះទេ ដូច្នេះបើចៀសវាងបានអ្នកគួរតែចៀសវាង។ នៅមានទម្លាប់មួយចំនួនទៀតដែលត្រូវបានទុកថាជាទម្លាប់មិនល្អ ហើយអ្នកគួរតែប្តូរចេញដូចជា ទទួលទានអាហាររួចគេងភ្លាម ទទួលទានអាហាររួច បញ្ចេញសកម្មភាពខ្លាំងៗ និងទទួលទានអាហារច្រើនពេកនាពេលល្ងាចជាដើម។

ទាំងអស់នេះសុទ្ធសឹងជាសារមួយដែលអាចឱ្យគ្រប់គ្នាដឹងថា អ្នកពិតជាស្រឡាញ់ និងយកចិត្តទុកដាក់ក្នុងការមើលថែគ្នាជាពិសេសបំផុត ព្រោះថាគ្មានសេចក្តីណាដែលមានទំហំធំធេងជាងការដែលបានរស់នៅក្នុងគ្រួសារមួយដែលប្រកបដោយសុភមង្គលនោះទេ៕

January 12, 2019

ម៉ាសផ្សំពីម្សៅសណ្តែក និងប្រទាលកន្ទុយក្រពើ ស័ក្តិសមជាមួយស្បែកគ្រប់ប្រភេទ

ទស្សនាវដ្តី ឡារ៉ែន នៅក្នុងខែនេះសូមណែនាំពីម៉ាសបិទមុខ ដែលផ្សំពីម្សៅសណ្តែកបាយ និងប្រទាលកន្ទុយក្រពើ ស័ក្តិសមជាមួយស្បែកមុខគ្រប់ភេទ។ ម៉ាសផ្សំពីគ្រឿងផ្សំធម្មជាតិនេះ នឹងចូលទៅបំប៉នថែរក្សាផ្ទៃមុខ សម្អាតស្នាមអុចខ្មៅនៅលើផ្ទៃមុខ និងស្នាមជាំស្រគាំពីពន្លឺព្រះអាទិត្យផងដែរ។

សណ្កែកបាយ ពោរពេញទៅដោយ ជាតិរ៉ែដែលសំខាន់ និងជាតិវីតាមីនជាច្រើនដូចជា វីតាមីន C, B1, A, B2, B5, B3, B6, ជាតិដែក, អាស៊ីតហ្វូលិក, កាល់ស្យូម, ម៉ាញេស្យូម, ជាតិសូដ្យូម, ទង់ដែង, សង្ក័សី, Selenium, ផូស្វ័រ, ប៉ូតាស្យូម និងសារធាតុជាច្រើនមុខផ្សេងទៀត។ ចំពោះស្បែក សណ្កែកបាយត្រូវបានគេទទួលស្គាល់ថា សម្បូរទៅដោយជាតិវីតាមីន និងជាតិរ៉ែហើយប្រឆាំងនឹងរ៉ាឌីកាល់សេរី ដែលល្អក្នុងការព្យាបាលស្បែក។ ជាពិសេស ជាតិវីតាមីន C ដែលមាននៅក្នុងសណ្តែក គឺត្រូវបានគេដឹងយ៉ាងច្បាស់ថា ជួយការពារការខូចខាតចំពោះស្បែកដោយសារតែរ៉ាឌីកាល់សេរី។ វាក៏អាចជួយក្នុងការជួសជុល និងធ្វើឱ្យស្បែកក្មេងជាងវ័យផងដែរ។ការបិតម៉ាសសណ្កែកបាយ ជាមួយប្រទាលកន្ទុយក្រពើឱ្យបានទៀងទាត់ នឹងជួយធ្វើឱ្យស្បែកទន់ និងភ្លឺរលោង។

វិធីធ្វើ និងវិធីប្រើ
ដំបូងត្រូវយកម្សៅសណ្តែកបាយ1ស្លាបព្រា លាយជាមួយប្រទាលកន្ទុយក្រពើ1ស្លាបព្រា ច្របល់ឱ្យចូលគ្នាសព្វ ហើយយកមកលាបលើផ្ទៃមុខ រក្សាទុក10នាទី រួចលាងជម្រះចេញជាការស្រេច។ អ្នកគួរធ្វើបែបនេះ 2ទៅ3ដងក្នុងមួយសប្តាហ៍៕

January 12, 2019

ពិតទេ គេងយប់ជ្រៅ បណ្ដាលឱ្យធាត់ដោយមិនដឹងខ្លួន?

សម្រាប់អ្នកដែលចង់រក្សាទម្ងន់ គួរតែចាប់អារម្មណ៍អាននូវអត្ថបទនេះ ព្រោះថាប្រសិនបើអ្នកជាមនុស្សកំពុងតែសម្រាកមិនបានគ្រប់គ្រាន់ និងមិនសមល្មមទេនោះ ការគេងយប់ជ្រៅរបស់អ្នកជាបញ្ហាចម្បងមួយដែលធ្វើឱ្យអ្នកឡើងទម្ងន់ដោយមិនដឹងខ្លួន។ អ្នកអាចនឹងគិតថា ខំញ៉ាំអាហារបន្ដិចៗ ឬបង្អត់អាហារពេលល្ងាចហើយនៅតែឡើងគីឡូទៀត ព្រោះមូលហេតុអ្វីទៅ? ថ្ងៃនេះទស្សនាវដ្ដី ឡារ៉ែន សូមណែនាំនូវអត្ថបទដ៏គួរឱ្យចាប់អារម្មណ៍នេះ។

1. គេងមិនគ្រប់ រាងកាយទន់ខ្សោយ
អ្នកវិទ្យាសាស្ត្របានស្រាវជ្រាវឃើញថាការដែលគេងមិនគ្រប់គ្រាន់ មានការហុចផលដល់ការប្រើប្រាស់កម្លាំងរាងកាយខ្សោយជាងធម្មតា5% និងធ្វើឱ្យប្រពន្ធរំលាយអាហារធ្វើការមិនបានល្អ ហើយបណ្ដាលឱ្យបន្ទោបង់មិនទៀងទាត់។ រាងកាយរបស់មនុស្សត្រូវប្រើប្រាស់កម្លាំងធ្វើការ20% បើកើតមានអាការនឿយហត់ អស់កម្លាំងហើយនោះ បានសេចក្ដីថា រាងកាយរបស់អ្នកចុះថាមពលហើយ។

2. ការគេងមិនគ្រប់ ធ្វើឱ្យញ៉ាំកាន់តែច្រើន
ការស្រាវជ្រាវទូទៅបានបញ្ជាក់ឱ្យឃើញថា ប្រសិនបើអ្នកគេងមិនគ្រប់គ្រាន់ក្នុងមួយយប់ នៅព្រឹកថ្ងៃបន្ទាប់ នោះនឹងធ្វើឱ្យរាងកាយអ្នកទន់ខ្សោយ និងមានអារម្មណ៍ចង់ទទួលទានអាហារមកបំពេញកម្លាំងបន្ថែម។ យ៉ាងណាមិញ ក្រុមអ្នកស្រាវជ្រាវបានធ្វើការសាកល្បងលើបុរស និងស្ត្រី ឱ្យគេងតិចក្នុងរយៈពេល4ម៉ោងប៉ុណ្ណោះ។ ការស្រាវជ្រាវនោះ បានរកឃើញថា នៅពេលព្រឹកឡើង ស្ត្រីបានទទួលទានអាហារច្រើនលើសដើមរហូតដល់លើសកាឡួរី 329គីឡូកាឡូរី ក្នុងខណៈដែលបុរសបានទទួលទានអាហារលើសត្រឹមតែ263គីឡួកាឡូរី (ស្ត្រីទទួលទានច្រើនជាងពិតមែន) ។

3. គេងមិនគ្រប់ បណ្ដាលឱ្យទទួលទានអាហារមានជាតិផ្អែមលើសដើម
ដោយសារតែរាងកាយទទួលបានការសម្រាកមិនគ្រប់គ្រាន់ រាងកាយនិងធ្វើការផ្លាស់-ប្ដូរអ័រម៉ូន ដែលហៅថា Ghrelin ដែលជាអ័រម៉ូនរំញោចឱ្យមានអារម្មណ៍ថាឃ្លាន និងធ្វើឱ្យចង់ទទួលទានសារធាតុផ្អែមមកបំពេញ។ ជាពិសេសអាហារដែលផលិតពីជាតិស្ករ ដូចជា ទឹកក្រូច នំផ្អែម ឬបង្អែមជាដើម។ កាលណារាងកាយទទួលបានជាតិស្គរគ្រប់គ្រាន់ហើយនោះ ទើបបណ្ដាលឱ្យរាងកាយមានសភាពស្រស់ស្រាយឡើងវិញ។

4. គេងមិនគ្រប់គ្រាន់ រាងកាយនឹងឡើងជាតិខ្លាញ់លើសដើម
ការគេងមិនគ្រប់គ្រាន់ អាចបណ្ដាលឱ្យអ័រម៉ូនដុតកំលោចសារជាតិខ្លាញ់នៅក្នុងរាងកាយចុះខ្សោយ ធ្វើការមិនបានប្រសើរ។ ក្រៅពីអ័រម៉ូនខាងលើ Ghrelin បណ្ដាលឱ្យរាងកាយឃ្លានអាហារខ្លាំងហើយនោះ ការរំលាយអាហារនៅក្នុងរាងកាយរបស់យើងក៏នៅតែដំណើរការមិនសូវបានល្អផងដែរ ជាហេតុនាំឱ្យការដុតកំលោចជាតិខ្លាញ់ក្នុងរាកាយខុសប្រក្រតី។

5. គេងមិនគ្រប់គ្រាន់ មានឱកាសទទួលទានអាហារមិនទំនេរ
ត្រង់ចំណុចនេះ អាចពន្យល់បានយ៉ាងងាយតែម្ដង ព្រោះនៅខណៈដែលយើងនៅគេងពេលយប់ជ្រៅ មិនប៉ុន្មាននាទីនោះទេ ក្រពះរបស់យើងនិងឃ្លាន នោះក៏ដោយសារតែខួរក្បាលនៅមានអារម្មណ៍ថា ពេលវេលានោះ កំពុងតែស្ថិតនៅពេលថ្ងៃនៅឡើយ ជាហេតុធ្វើឱ្យអ្នកចង់ទទួលទានអាហារបន្ទាប់បន្សំ។ ម្យ៉ាងវិញទៀត កាលណាខួរនៅតែធ្វើការឥតឈប់សម្រាក នោះរាងកាយក៏ត្រូវបានស្រែកឃ្លាន អាហារដើម្បីបំពេញថាមពលខួរក្បាលដូចគ្នា។ សរុបមកទង្វើបែបនេះ ហើយដែលបណ្ដាលឱ្យអ្នកធាត់ដោយមិនដឹងខ្លួន៕

January 12, 2019

បង្កើតទម្លាប់ល្អដើម្បីភាពស្រស់ស្អាតគ្រប់សមាជិកក្នុងគ្រួសារ

មិនចាំបាច់ទាល់តែទៅស្វែងរកសេវាកម្មថែរក្សាសម្រស់ ក៏លោកអ្នកអាចទទួលបានភាពស្រស់ស្អាតដែរ ព្រោះថាការដែលលោកអ្នកមានទម្លាប់ល្អៗសម្រាប់អនុវត្តហើយនោះ ភាពស្រស់ស្អាតក៏ពិតជាមិនរត់ទៅណាដែរ។ កាន់តែពិសេសជាងនេះទៅទៀតនោះគឺ ប្រសិនបើអ្នកអាចធ្វើជាអ្នកដឹកនាំគ្រប់គ្នានៅក្នុងគ្រួសារ ឱ្យមានទម្លាប់ថែរក្សាភាពស្អាតឱ្យបានត្រឹមត្រូវដូចអ្នកដែរនោះ ធានាថាគ្រប់គ្នាពិតជាបានស្រស់ជាមិនខាន។ សូមចាំថាការអនុវត្តវិធីងាយៗនៅផ្ទះដោយខ្លួនឯងឱ្យបានញឹកញាប់ វានឹងក្លាយជាទម្លាប់ ហើយនៅពេលដែលគ្រប់គ្នានៅក្នុងគ្រួសារមានទម្លាប់ល្អហើយនោះសូមធានាថា ក្តីបារម្ភដែលទាក់ទងនឹងការថែរក្សាសម្រស់ក៏ពិតជាមិនអាចមករំខានអ្នកណាម្នាក់នៅក្នុងផ្ទះរបស់អ្នកបានទៀតឡើយ។

ស្បែកស្អាតត្រូវចាប់ផ្តើមពីការសម្អាត : ការ សម្អាតស្បែកជាប្រចាំនាពេលព្រឹក និងពេលយប់ជាអ្វីដែលអ្នកត្រូវតែធ្វើឱ្យបានជាប់ជាប្រចាំ។ ក្នុងករណីដែលអ្នកចង់ឱ្យការសម្អាតផ្ទៃមុខរបស់អ្នក កាន់តែមានលក្ខណៈពិសេស និងមានប្រសិទ្ធភាពខ្ពស់ ព្រមទាំងផ្តល់នូវគុណប្រយោជន៍ជាច្រើនដល់សម្រស់ស្បែករបស់អ្នកទៀតនោះ អ្នកអាចយកទឹកឃ្មុំបន្តិចលាយជាមួយទឹកដោះគោឆៅមួយស្លាបព្រា រួចយកវាទៅកំដៅ3-4វិនាទីក្នុងម៉ាស៊ីនមៃក្រូវេវ ហើយយកមកលាបឱ្យសព្វលើផ្ទៃមុខ និងក រួចលាងសម្អាតចេញជាមួយទឹកក្ដៅតិចៗជាការស្រេច។

ចំហុយជាកូនសោបើកទ្វារនៃភាពស្រស់ស្រាយ : ចំហុយមុខរបស់អ្នកឱ្យបានម្ដងក្នុងមួយសប្ដាហ៍ដើម្បីសម្អាតជាតិពុល មុនក្បាលខ្មៅ និងស្នាមតូចៗចេញពីស្បែកមុខ។ ការបន្ថែមប្រេងផ្សេងៗឱ្យត្រូវទៅតាមប្រភេទស្បែករបស់អ្នក គឺជាការជួយឱ្យការចំហុយស្បែកមុខកាន់តែមានប្រសិទ្ធភាពខ្ពស់ឡើង។ សូមចាំថា ការចំហុយស្បែកគឺជាវិធីដែលជួយឱ្យស្បែកមានភាពស្រស់ស្រាយ និងសុខភាពល្អជាប់ជានិច្ច។

គ្រឿងម៉ាស្សានៅផ្ទះ : ការម៉ាស្សាសម្អាតស្បែកដោយប្រើផលិតផលដែលមានស្រាប់នៅក្នុងផ្ទះម្តង ឬពីរដងក្នុងមួយសប្តាហ៍គឺជាទម្លាប់ដ៏ប្រសើរមួយ ដែលអ្នកគួរតែនាំគ្នាអនុវត្ត។ គ្រាន់តែយកប្រេងអូលីវបន្តិចលាយជាមួយនឹងស្ករត្នោតបន្តិច ហើយយកមកត្រដុសថ្នមៗលើស្បែក រួចសម្អាតចេញដោយទឹកក្តៅឧណ្ហៗ ក្រោយមកបន្តិចកុំភ្លេចបិទរន្ធញើសរបស់អ្នកដោយការសាចទឹកត្រជាក់លើផ្ទៃមុខផង។ វិធីនេះនឹងចូលរួមចំណែកធ្វើការកម្ចាត់ និងសម្អាតស្បែកចាស់ៗចេញ ដើម្បីផ្តល់ឱកាសឱ្យស្បែកថ្មីបានបង្ហាញវត្តមាននៅលើផ្ទៃមុខរបស់អ្នក វិញជាមិនខាន។

ចងចាំជានិច្ចថាស្បែកត្រូវមានសំណើម : ប្រេងបន្លែ ដូចជា ប្រេងអាល់ម៉ុនជាដើម ត្រូវបានគេទុកថាជាជំនួយការដ៏ល្អបំផុតក្នុងការនាំមកនូវសំណើមដល់ស្បែក និងកាត់បន្ថយស្នាមជ្រួញ។

កុំបំភ្លេចម៉ាសជំនួយផ្ទៃមុខ : ការប្រើម៉ាសបិទមុខដែលអ្នកទិញមកស្រាប់ៗអាចនឹងធ្វើឱ្យស្បែករបស់អ្នកប្រឈមនឹងបញ្ហាផ្សេងៗ ហើយអ្នកក៏អាចនឹងត្រូវចំណាយប្រាក់ច្រើនបន្តិច ដូច្នេះប្រសិនបើអ្នកចង់ឱ្យមានភាពចំណេញ និងមិនមានក្តីបារម្ភទៀតនោះ សូមសាកល្បងនាំសមាជិកក្នុងគ្រួសារបិទម៉ាសដែលអ្នកធ្វើឡើងដោយខ្លួនឯង ដែលបានមកពីការផ្សំចូលគ្នានៃគ្រីមមួយស្លាបព្រា ចេកទុំកិនម៉ដ្ឋមួយផ្លែ និងវីតាមីនEមួយគ្រាប់។ លាបលើផ្ទៃមុខទុកចោលប្រហែលជា15នាទីសឹម សម្អាតចេញជាការស្រេច។

ទាំងនេះសុទ្ធតែជាវិធីដែលអាចនាំអ្នក និងសមាជិកក្នុងគ្រួសាររបស់អ្នកទៅរកភាពស្រស់ស្អាត ប៉ុន្តែសូមចងចាំផងថា ក្រៅពីការធ្វើតាមវិធីទាំងនេះហើយនោះ លោកអ្នកក៏ត្រូវថែរក្សាស្បែក ដោយការលាបឡេការពារកម្តៅថ្ងៃឱ្យបានជាប្រចាំ កុំជក់បារី ត្រូវទទួលទានទឹកឱ្យបានគ្រប់គ្រាន់ មិនថាជាទឹកធម្មតា ឬទឹកបន្លែ ផ្លែឈើដែលចម្រាញ់ចេញពីផ្លែឈើស្រស់ៗនោះទេ៕

January 12, 2019

រដូវរងា ប្រេះបបូរមាត់ ស្ងួតចេញឈាម គួរអានអត្ថបទនេះ

ស្នាមញញឹមស្រស់អាស្រ័យលើបបូរមាត់ដ៏មានមន្ដស្នេហ៍របស់លោកអ្នក ជាពិសេសសម្រាប់សុភាពនារី។ បបូរមាត់ស្រស់ មានសុខភាពល្អ បង្កើននូវភាពទាក់ទាញបានមួយកម្រិត។ កម្រមានអ្នកដែលមានបបូរមាត់ស្អាតឥតខ្ចោះ ដោយប្រាសចាកពីការថែរក្សាណាស់។ ជាពិសេសនៅក្នុងរដូវរងាបែបនេះ បបូរមាត់ មនុស្សភាគច្រើនជួបតែបញ្ហាប្រេះ និងមានអ្នកខ្លះទៀតអាលែកហ្ស៊ីក៏មានដែរ។ ការថែរក្សាមានវិធីជាច្រើនផ្សេងទៀត ដែលទាមទារឱ្យលោកអ្នកអនុវត្ដ។ ថ្ងៃនេះទស្សនាវដ្តី ឡារ៉ែន សូមលើកយកនូវគន្លឹះខ្លះៗក្នុងការថែរក្សាបបូរមាត់មិនឱ្យប្រេះក្នុងរដូវរងានេះ។

1. វិធីថែទាំបបូរមាត់ឱ្យស្រស់ស្អាត
ស្រទាប់បបូរមាត់ គឺជាច្រកខាងក្រៅរបស់មាត់។ បបូរមាត់ និងមាត់ផ្សារភ្ជាប់គ្នា ផ្អែកទៅខាងក្នុងជាប់នឹងធ្មេញ។ នៅលើបបូរមាត់មានស្រទាប់ស្បែកស្ដើងដែលងាយរងនូវប្រតិកម្មផ្សេងៗ តាមរយៈចំណីអាហារដែលបរិភោគប្រចាំថ្ងៃ និងការប្រើប្រាស់ក្រែមសម្រាប់លាបបបូរមាត់។ ដើម្បីថែរក្សាបបូរមាត់ឱ្យមានសុខភាពល្អ អ្នកនាងកញ្ញាគួរជ្រើសរើសការទទួលទានទឹក បន្លែ និងផ្លែឈើឱ្យបានច្រើនជាប្រចាំ។ សូមចៀសវាងនូវប្រការមួយចំនួន។

ដើម្បីថែរក្សាបបូរមាត់ឱ្យស្អាត កុំឧស្សាហ៍លិទ្ធបបូរមាត់ញឹកញាប់ពេក ព្រោះជាតិអាស៊ីតនៅក្នុងទឹកមាត់អាចធ្វើឱ្យបបូរមាត់ស្ងួត និងប្រេះបាន។ មុននឹងសម្រេចចិត្ដប្រើប្រាស់ក្រែមសម្រាប់លាបបបូរមាត់ប្រភេទណាមួយ ត្រូវពិនិត្យឱ្យបានដិតដល់ ព្រោះបើការជ្រើសរើសក្រែមមិនបានល្អ អាចធ្វើឱ្យបបូរមាត់ខូចបាន ដូចជា ធ្វើឱ្យបបូរមាត់ប្រេះ ខ្មៅ ស្រអាប់ជាដើម។ សុភាពនារីទាំងអស់មិនគួរប្រើក្រែមដែលស្ងួតពេកទេ ព្រោះមើលទៅដូចជាបបូរមាត់ដែលមានជំងឺក្រៀមខ្សោះខ្វះជីវជាតិដូច្នេះដែរ។ ទម្លាប់ផ្លាស់ប្ដូរពណ៌ក្រែមលាបបបូរមាត់ញឹកញាប់ និងការលាបហើយជូតចេញ រួចលាបទៀតច្រើនដងក្នុងមួយថ្ងៃ ក៏អាចធ្វើឱ្យបបូរមាត់មានបញ្ហាដែរ។

2. ការព្យាបាលបបូរមាត់ប្រេះ ឬប្រេះមានឈាម
រដូវធ្លាក់ខ្យល់ចូលមកដល់ភ្លាមបបូរមាត់អាចប្រែសភាពទៅជាស្ងួត ប្រេះមានការឈឺចាប់ ឬហូរឈាមតិចៗ។ តើមានវិធីអ្វីអាចការពារ ឬព្យាបាលបបូរមាត់ស្ងួតប្រេះបានទៅ? អស់ក្ដីកង្វល់ទៀតហើយ យើងសូមបង្ហាញបរូបមន្តធម្មជាតិ3យ៉ាង ដែលមានសុវត្ថិភាពក្នុងការព្យាបាលបញ្ហាបបូរមាត់ឱ្យជាសះស្បើយឆាប់រហ័សបំផុត។

*ប្រេងដូង៖ ប្រេងដូង គឺជាអាហារដែលមានសុវត្ថិភាព និងមានសមត្ថភាពបំផុតក្នុងការព្យាបាលបបូរមាត់ដែលប្រេះចេញឈាម។ ផលិតផលធម្មជាតិមួយប្រភេទនេះអាចជួយផ្តល់សំណើមដល់បបូរមាត់ និងឱ្យបបូរមាត់ទន់រលោង។

របៀបប្រើ៖ អ្នកគ្រាន់តែយកប្រេងដូងបន្តិចមកលាបនៅលើបបូរមាត់ជារៀងរាល់ព្រឹក និងល្ងាច (មិនចាំបាច់លាងចេញទេ)។

**ទឹកឃ្មុំ៖ ទឹកឃ្មុំ ត្រូវបានគេទទួលស្គាល់ថា គឺជាឱសថដ៏ពូកែសម្រាប់ដោះស្រាយបញ្ហាបបូរមាត់ប្រេះ។ ទឹកឃ្មុំ អាចជួយបង្កើនល្បឿននៃការព្យាបាល និងជួយផ្តល់សំណើមឱ្យបបូរមាត់របស់អ្នកផងដែរ។ មិនតែប៉ុណ្ណោះបបូរមាត់នឹងមានពណ៌ផ្កាឈូក ប្រសិនបើប្រើប្រាស់រាល់ថ្ងៃ។

របៀបប្រើ៖ យកទឹកឃ្មុំបន្តិចលាបដោយផ្ទាល់ទៅលើបបូរមាត់ ហើយទុកយ៉ាងហោចណាស់រយ:ពេល15នាទី ទើបលាងសម្អាតដោយទឹកធម្មតា។ អ្នកត្រូវអនុវត្តជារៀងរាល់ថ្ងៃ ទើបបញ្ហាបបូរមាត់ប្រេះចេញឈាមឆាប់បាត់ទៅវិញ។

***ទឹកដោះគោយ៉ាអួ៖ ទឹកដោះគោជូរ គឺជាឱសថផ្តល់សំណើមដ៏អស្ចារ្យបំផុតសម្រាប់បបូរមាត់ស្ងួត។ ម្យ៉ាងវិញទៀតអ្នកអាចប្រើផ្តាកុលាបពីរបីស្រទាប់ទៅត្រាំនៅក្នុងទឹកដោះគោឱ្យបានពីរទៅបីម៉ោង គឺកាន់តែមានប្រសិទ្ធភាពក្នុងការព្យាបាល។

របៀបប្រើ៖ លាបទឹកដោះគោយ៉ាងអួសុទ្ធ ឬទឹកដោះគោដែលត្រាំផ្តាកុលាបនៅលើបបូរមាត់ ហើយទុកឱ្យស្ងួតរយៈពេល15នាទី។ បន្ទាប់មកត្រូវលាងសម្អាតដោយប្រើទឹកធម្មតា ប៉ុន្តែអ្នកត្រូវអនុវត្តជារៀងរាល់ថ្ងៃទើបបបូរមាត់ស្ងួតឆាប់ជាសះស្បើយ។

ក្រៅពីអនុវត្តរូបមន្តខាងលើនេះហើយ អ្នកកុំភ្លេចព្យាយាមទទួលទានទឹកឱ្យបានច្រើន រួមទាំងផ្លែឈើដែលសម្បូរវីតាមីន C ដូចជាផ្លែក្រូចពោធិ៍សាត់ជាដើម។ មិនតែប៉ុណ្ណោះកុំព្យាយាមលិទ្ធបបូរមាត់ខ្លួនឯង កុំប្រើក្រែមពណ៌ពេលប្រេះបបូរមាត់ និងហាមជក់បារីផងដែរ៕

January 12, 2019

នាំសមាជិកក្នុងគ្រួសារហាត់ប្រាណដើម្បីរាងស្អាត

ចង់ឱ្យគ្រប់គ្នានៅក្នុងគ្រួសារមានសុខភាពល្អរាងស្អាតស្រស់សង្ហាទាំងអស់មែនទេ? ដូច្នេះហើយបានជាម្នាក់ៗ ជាពិសេស ស្ត្រីយើងតែម្តងតែងតែខិតខំចម្រាញ់យកតែអាហារណាដែល មានរសជាតិឆ្ងាញ់ មានប្រយោជន៍ចំពោះសុខភាព តែទន្ទឹមនឹងការហូបចុកល្អ មានអនាម័យហើយនោះលោកអ្នកក៏មិនត្រូវភ្លេចបបួលគ្នាធ្វើលំហាត់ប្រាណ ដើម្បីសុខភាពដែរ ជាពិសេសគឺដើម្បីសម្រកខ្លាញ់ដែលលើសកំណត់នៅក្នុង រាងកាយចេញឱ្យអស់។ មានលំហាត់ប្រាណច្រើនយ៉ាងណាស់ដែលអាចឱ្យអ្នកធ្វើជុំគ្នាដើម្បីសម្រកខ្លាញ់ ហើយវិធីទាំងនោះមានដូចជា៖

ជិះកង់ : មិនពិបាកនោះទេ ឱ្យតែមានកង់ ចង់ជិះពេលណាក៏បាន ឌុបគ្នាម្តងម្នាក់ក៏ចាត់ទុកថាជាការហាត់ប្រាណម្នាក់ម្តងដែរ។ ជិះកង់បណ្តើរជជែកគ្នាលេងបណ្តើរ លេងៗរយៈពេលកន្លះម៉ោងក៏កន្លងផុតទៅបាត់ទៅហើយ ហើយអ្វីដែលពិសេសនោះគឺពេលវេលានៃការហាត់ប្រាណក៏អាចចាត់ទុកថាគ្រប់គ្រាន់ទៅហើយសម្រាប់ថ្ងៃនេះ។

ហែលទឹក : ចាត់ទុកថាជាកីឡាដែលមានភាពទាន់សម័យ និងពេញនិយមបំផុតសម្រាប់ មនុស្សសម័យនេះ ហើយអ្វីដែលសំខាន់ជាង នេះទៀតនោះគឺ កីឡាប្រភេទនេះ មិនធ្វើឱ្យអ្នកបារម្ភខ្លាចថាមានញើសដែលនាំឱ្យមានក្លិនមិនល្អភាយដាក់អ្នកផ្សេងនោះទេ ព្រោះនៅក្នុងទឹកត្រជាក់ស្រួលបំផុតហើយ។

ដើរ : មិនចាំបាច់ត្រូវស្វែងរកឧបករណ៍អីនោះ ទេ ប្រើតែជើងទាំងពីររបស់អ្នកក៏អាចធ្វើឱ្យអ្នក និងសមាជិកនៅក្នុងក្រុមគ្រួសារ កម្ចាត់ជាតិខ្លាញ់មិនល្អចេញពីរាងកាយបានដែរ។ នាំសមាជិកនៅក្នុងគ្រួសាររបស់អ្នកដើរទៅជាមួយគ្នាអ្នកនឹងទទួលបានទាំងការសម្រកទម្ងន់ និងចំណងសុភមង្គល នៅក្នុងគ្រួសារថែមទៀតផង។

រត់ : វាខុសពីការដើរត្រង់ថា អ្នកត្រូវចំណាយកម្លាំងច្រើនជាង ត្រូវមានការតាំងចិត្តច្រើនជាងខុសពីការដើរដែលអ្នកអាចធ្វើវាលេងៗក៏បាន ប៉ុន្តែយ៉ាងណាលទ្ធផលដែលអ្នកទទួលបានក៏វារហ័សជាងការដើរលេងៗដែរ។

ម៉ាស៊ីនរត់ហាត់ប្រាណ : អាចសម្រកទម្ងន់ ដោយមិនចាំបាច់ទៅណាឆ្ងាយ រត់តែមួយកន្លែងក៏អាចចេញញើស មិនត្រូវការរើសទីតាំង ឬចំងាយដែលត្រូវរត់នោះទេ ទាំងអស់នេះគឺជាភាពងាយស្រួលនៃការសម្រកទម្ងន់ដោយការ រត់លើម៉ាស៊ីន។ ក្រៅពីសកម្មភាពហាត់ប្រាណទាំងនេះអ្នកក៏អាចជ្រើសរើសលេងកីឡាផ្សេងៗដូចជា វាយសី លោតអន្ទាក់ និងធ្វើការងារក្នុងសួនជាដើម សុទ្ធសឹងតែជាកីឡា និងការងារដែលអ្នកអាចលេងជាមួយសមាជិកក្នុងគ្រួសារ ដើម្បីទទួល បាននូវប្រយោជន៍មួយផ្សេងទៀតគឺ ការសម្រកទម្ងន់៕

January 12, 2019

7 អៃឌៀក្នុងការតុបតែងបន្ទប់អាផាតមិន

1. សិល្បៈក្នុងស្ទីលអាផាតមិន

អៃឌៀការតុបតែងបន្ទប់អាផាតមិនទំហំតូចអាចស្ថិតលើមូលដ្ឋានគ្រឹះនៃចំនួនប្រាក់ដែលមានកំណត់ តែយើងអាចបញ្ចូលគំនិតច្នៃប្រឌិតបាន ដូចជា ការប្រើរូបភាពខ្មៅ-សបិទដោយស្កុតមុខពីរដែលអាចបកវិញបានដោយមិនបន្សល់ស្លាកស្នាមមកតុបតែងលម្អជញ្ជាំងបន្ទប់ ក៏ជាអៃឌៀដ៏ល្អមួយដែរ។

2. ធ្នើដាក់សម្ភារបែបវៃឆ្លាត

ដោយសារតែបន្ទប់ជួល ឬអាផាតមិនអាចមានទីធ្លាកំណត់ និងមិនមានគ្រឿងសង្ហារិមត្រៀមទុកសម្រាប់ឱ្យយើងទុកដាក់ឥវ៉ាន់តាមដែលយើងត្រូវការឡើយ ដូច្នេះការជ្រើសរើសប្រើប្រាស់ធ្នើរដាក់សម្ភារបែបវៃឆ្លាតក៏ជាអៃឌៀមួយដែល ឡារ៉ែន ចង់ណែនាំដែរ។

3. តុបតែងបង្អួច

កុំទុកឱ្យបង្អួចបន្ទប់ទំនេរចោល អាចជ្រើសរើសក្រណាត់វាំងននស្អាតៗមកបំពាក់តុបតែងបន្ទប់ ឬ DIY វាំងននមកតុបតែងបន្ថែមភាពស្រស់ស្អាត និងបរិយាកាសក្នុងបន្ទប់ឱ្យកាន់តែគួរឱ្យចង់ស្នាក់នៅខ្លាំងឡើង។

4. លាបពណ៌លម្អដោយខ្លួនឯង

ការលាបពណ៌ជញ្ជាំងបន្ទប់ជាចំណុចហាមឃាត់ និងជាច្បាប់ទូទៅមួយដែលអ្នកជួលត្រូវប្រតិបត្តិតាម ដូច្នេះនៅពេលលាបពណ៌ជញ្ជាំងបន្ទប់មិនបាន ក៏ប្ដូរមកលាបពណ៌គ្រឿងសង្ហារិមរបស់យើងឱ្យស៊ីគ្នានឹងពណ៌ជញ្ជាំងបន្ទប់វិញក៏បាន។

5. ប្រើផ្ទាំងកញ្ចក់តុបតែងលម្អ

នៅក្នុងទីកន្លែងដែលមានទំហំតូច កញ្ចក់គឺជាតិចនិកសំខាន់មួយដែលនឹងជួយធ្វើឱ្យបន្ទប់មើលទៅរាងស្រឡះទូលាយឡើងបាន ដោយអ្នកគួរជ្រើសរើសព្យួរផ្ទាំងកញ្ចក់ធំមួយនៅក្នុងបន្ទប់ក្នុងទីតាំងដែលស័ក្តិសមបំផុត ដើម្បីឱ្យរូបភាពដែលឆ្លុះឃើញនៅក្នុងកញ្ចក់ជួយធ្វើឱ្យបន្ទប់មើលទៅរាងធំទូលាយឡើង។

6. សម្រួលឱ្យទូរទស្សន៍ទៅនៅជាប់នឹងជញ្ជាំង

ជាប្រក្រតី អ្នកអាចដាក់ទូរទស្សន៍នៅលើតុ ឬក្នុងទូថ្នាក់ទូទៅបាន ដែលធ្វើឱ្យស៊ីទីកន្លែងអស់មួយផ្នែក ដូច្នេះការយកទូរទស្សន៍មកបំពាក់ជាប់នៅលើជញ្ជាំង នឹងជួយសន្សំសំចៃទីកន្លែងហើយយើងថែមទាំងអាចដាក់វត្ថុតុបតែងលម្អផ្សេងៗនៅពីក្រោមទូរទស្សន៍បានទៀតផង។

7. នាំធម្មជាតិចូលមកក្នុងបន្ទប់

នៅតែជាវិធីការមួយដែលចង់ណែនាំសម្រាប់អ្នកដែលចូលចិត្តតុបតែងផ្ទះ ព្រោះការនាំយកធម្មជាតិ ឬពណ៌បៃតងចូលមកតុបតែងខាងក្នុងបន្ទប់ ដែលយើងអាចប្រើបានទាំងវត្ថុតុបតែងល្អៗ ដើមផ្កា ស្រោមពូក ស្រោមខ្នើយដែលមានរូបធម្មជាតិនៅតែធ្វើឱ្យបន្ទប់ដ៏តូចមួយនោះគួរឱ្យចង់ស្នាក់នៅជានិច្ច៕

January 11, 2019

Author: ធឿន មករា