ធឿន មករា - La Reine Media

គម្រោង GOLD TOWER 42 នឹងបញ្ចប់សំណង់អគារទាំងស្រុងនៅដើមឆ្នាំ2020

គ្រោងអគារ Gold Tower 42ជាន់បានបញ្ចប់ការសាងសង់ហើយកាលពីចុងខែមករា) បន្ទាប់ពីសំណង់អគារមួយនេះត្រូវបានពន្យារពេលសាងសង់បន្តអស់ជាច្រើនឆ្នាំកន្លងមក។

ក្រុមហ៊ុន Yon Woo Cambodia ដែលជាក្រុមហ៊ុនកាន់កាប់អគារ Gold Tower 42ជាន់នេះ បានចុះកិច្ចព្រមព្រៀងកាលពីខែវិច្ឆិកា ឆ្នាំ2017 កន្លងទៅជាមួយក្រុមហ៊ុន Shenzhen Hongtao Co.,Ltd និងក្រុមហ៊ុនវិស្វកម្មសំណង់ Hongtao Weimin ក្នុងការទទួលខុសត្រូវបញ្ចប់គម្រោងនេះ។

សំណង់អគារ 42ជាន់ ស្ថិតនៅចំបេះដូងនៃរាជធានីភ្នំពេញត្រង់ចំណុចប្រសព្វរវាងមហាវិថីព្រះមុនីវង្ស និងមហាវិថីព្រះសីហនុ។ គម្រោងនេះបានចាប់ផ្តើមនៅឆ្នាំ2008 ហើយបានពន្យារពេល 3ដងមកហើយ ពោលគឺ ម្តងនៅក្នុងឆ្នាំ2009 ដោយសារតែវិបត្តិហិរញ្ញវត្ថុសកល និងម្តងទៀតនៅឆ្នាំ2012។ បន្ទាប់មកសំណង់នេះបានសាងសង់ឡើងវិញនៅឆ្នាំ2013 ក្រោយមកបានបញ្ឈប់ទៅវិញម្តងទៀតនៅឆ្នាំ2017។

ក្រុមហ៊ុន Yon Woo Cambodia ធ្លាប់បានប្រកាសកាលពីឆ្នាំ2018 ថា សំណង់អគារ 42ជាន់នេះបានចំណាយទុនវិនិយោគអស់ប្រមាណជា100លានដុល្លារអាមេរិករួចមកហើយ ហើយទឹកប្រាក់ជាង 140លានដុល្លារអាមេរិកទៀតនឹងត្រូវវិនិយោគបន្ថែមដើម្បីបញ្ចប់គម្រោងទាំងមូល។

ដោយឡែកនៅថ្ងៃទី28 ខែមករាកន្លងមកថ្មីៗនេះ គម្រោងសាងសង់ Gold Tower 42ជាន់នៅប្រទេសកម្ពុជាដែលបានចុះហត្ថលេខាដោយក្រុមហ៊ុនវិស្វកម្មសំណង់ Hongtao Weimin (ខេមបូឌា)បានធ្វើការបញ្ចប់គ្រោងអគារនេះជាផ្លូវការហើយ។

លោក Liu Nianxin ប្រធានក្រុមហ៊ុនវិស្វកម្មសំណង់ Hongtao Weimin (ខេមបូឌា) Co., Ltd បានថ្លែងថា គម្រោងអគារដ៏ខ្ពស់នៅរាជធានីភ្នំពេញមួយនេះត្រូវបានចុះកិច្ចសន្យាដោយក្រុមហ៊ុន Hongtao Weimin ដែលមានការខិតខំប្រឹងប្រែងរួមគ្នាជាមួយដៃគូសហការទាំងអស់នោះ គឺជាសមិទ្ធផលដ៏សំខាន់នៃភាគហ៊ុនទាំងអស់របស់ក្រុមហ៊ុន Hongtao និងស្ថាបត្យកម្មរបស់ម៉ាកាវ Weimin ដែលទទួលបានភាពជោគជ័យនៅក្នុងទីផ្សារតុបតែងស្ថាបត្យកម្មខ្ពស់បំផុតនៅអាស៊ីអាគ្នេយ៍។

លោក Liu បានលើកឡើងថា៖“វាមានសារៈសំខាន់ណាស់ ដែលក្នុងនាមជាអ្នកម៉ៅការទូទៅ យើងមានកិត្តិយសយ៉ាងខ្ពង់ខ្ពស់ក្នុងការចូលរួមសាងសង់ និងអភិវឌ្ឍទីក្រុងរបស់ប្រទេសកម្ពុជាឱ្យមានភាពរឹងមាំ និងទំនុកចិត្តគ្រប់គ្រាន់ក្នុងការកសាងបញ្ចប់គម្រោងប្រកបដោយគុណភាពនៅអាស៊ីអាគ្នេយ៍ និងនៅជុំវិញពិភពលោក ដើម្បីរួមចំណែកដល់កិច្ចសហប្រតិបត្តិការពាណិជ្ជកម្ម និងការផ្លាស់ប្តូររវាងទំនាក់ទំនងចិន និងកម្ពុជាផងដែរ។

លោក Liu ថ្លែងថា ឆ្នាំ2019 ទើបចូលមកដល់ ហើយអគាររបស់យើងបានបញ្ចប់ការសាងសង់ គឺជារឿងល្អមួយដែលបង្ហាញពីចំណងមិត្តភាពចិន កូរ៉េ និងកម្ពុជា។ លោកបានបញ្ជាក់ថា៖“យើងបានដំណើរការសាងសង់នៅខែមីនា ឆ្នាំ2018 ហើយត្រឹមតែរយៈពេល 10ខែប៉ុណ្ណោះ យើងបានបញ្ចប់គ្រោងអគារទាំងមូល ហើយនៅពេលនេះជញ្ជាំងរបស់អគារត្រូវបានសាងសង់បានពាក់កណ្តាលហើយ វាមានល្បឿនលឿនក្នុងការសាងសង់ និងថែមទាំងបង្ហាញពីសមត្ថភាពនៃការសាងសង់ផងដែរ”។

លោក Liu បានបន្តថា៖“យើងកំពុងតែធ្វើការតុបតែងផ្ទៃខាងក្នុងអគារ ការតុបតែងរបស់យើងនឹងស្របតាមស្តង់ដារ យើងខ្ញុំនឹងបញ្ចប់ជញ្ជាំងខាងក្រោយនៅខែមិថុនា ហើយក្នុងឆ្នាំ2019 យើងនឹងបញ្ចប់សំណង់អគារទាំងមូល រួចប្រគល់ជូនអតិថិជន”។

ឯកឧត្តម លាង មុនីរិទ្ធ រដ្ឋលេខាធិការនៃក្រសួងរៀបចំដែនដី នគរូបនីយកម្ម និងសំណង់បានថ្លែងក្នុងពិធីបញ្ចប់គម្រោងសាងសង់នេះថា បើទោះបីជាគ្រោងអគារ Gold Tower 42 នេះបានផ្អាកការសាងសង់នៅចុងឆ្នាំ2010 រហូតដល់ឆ្នាំ2018ក្ដី ក៏ក្នុងរយៈពេលផ្អាកនេះ ក្រសួងបានចុះមកពិនិត្យការដ្ឋានទូទៅ ក្នុង 1ឆ្នាំពី 2ទៅ3ដងដែរ លើសុវត្ថិភាព និងណែនាំឱ្យបន្តការសាងសង់។

ឯកឧត្តមបន្តថា ក្រសួងក៏តែងតែជួយសម្របសម្រួលជាមួយថ្នាក់ដឹកនាំនៃក្រសួងផ្សេងៗ និងរដ្ឋាភិបាលដើម្បីជួយរកដៃគូមកអភិវឌ្ឍ។ នៅពេលនោះ ក្រុមហ៊ុន Yon Woo Cambodia បានចាប់ដៃគូជាមួយចិនក្នុងការបន្តសាងសង់ គឺមកទល់ពេលនេះបានបញ្ចប់គ្រោងអគារទាំងស្រុងហើយ។

ឯកឧត្តម មុន្នីរិទ្ធ បញ្ជាក់ថា៖“ខ្ញុំជឿជាក់ថា គម្រោងនេះនឹងទទួលបានជោគជ័យ និងផ្តល់មុខមាត់ដល់ប្រទេសកម្ពុជា ក៏ដូចជាជនរួមជាតិប្រជាពលរដ្ឋកម្ពុជាដែរ”។

ឯកឧត្តម បានបញ្ជាក់ទៀតថា ជារៀងរាល់ឆ្នាំ យើងតែងតែមានគម្រោងធំៗជាច្រើន ជាក់ស្តែងនៅដើមឆ្នាំ2019 យើងមានគម្រោងមួយចំនួនដែលមានកម្ពស់ខ្ពស់ៗ ជាពិសេសនៅរាជធានីភ្នំពេញ និងក្រុងព្រះសីហនុ និងគម្រោងមួយទៀតដែលមានកម្ពស់ជាង 44ជាន់នៅក្នុងតំបន់ជ្រោយចង្វារដោយក្រុមហ៊ុនពហុមុខងាររបស់ប្រទេសចិន។
ឯកឧត្តម មុន្នីរិទ្ធ បន្តថា៖“ការងារបញ្ចប់គ្រោង
អគារមួយនេះក្រសួងតែងតែជំរុញឱ្យក្រុមហ៊ុនសាងសង់ធ្វើតាមស្តង់ដារបច្ចេកទេស និងជំរុញឱ្យបញ្ចប់តាមការប្រកាសឱ្យកាន់តែឆាប់ ព្រោះនៅពេលអគារនេះបញ្ចប់ វានឹងជួយដល់សេដ្ឋកិច្ច ហើយខ្ញុំអាចបញ្ជាក់បានថា ដោយសារការសហការនេះ គម្រោងនេះ នឹងទទួលបានជោគជ័យ ហើយអ្វីដែលក្រុមហ៊ុនកំពុងធ្វើនៅពេលនេះ គឺបញ្ចប់ការតុបតែងខាងក្នុង”។

សូមរំឭកថា គម្រោងអគារ Gold Tower ស្ថិតនៅចំកណ្ដាលតំបន់ដ៏មមាញឹកនៃរាជធានីភ្នំពេញ គឺជាគម្រោងដ៏មានឥទ្ធិពលបំផុតសម្រាប់សហគ្រាសនៅក្រុង Shenzhen និងម៉ាកាវដើម្បីចូលរួមក្នុងការសាងសង់ និងអភិវឌ្ឍរាជធានីរបស់ប្រទេសកម្ពុជា។

បន្ទាប់ពីបញ្ចប់គម្រោងអគារដែលមានកម្ពស់ខ្ពស់ជាង 200ម៉ែត្រ និងមានចំនួន 42ជាន់នេះហើយ អគារនេះ គឺជាអគារដ៏ខ្ពស់មួយដែលរួមបញ្ចូលទាំងមជ្ឈមណ្ឌលពាណិជ្ជកម្ម ការិយាល័យ និងលំនៅឋាននៅក្នុងទីតាំងតែមួយ ហើយអគារនេះមានក្រឡាផ្ទៃសរុបទំហំ 129,300ម៉ែត្រការ៉េ។ បន្ទាប់ពីបានបញ្ចប់គ្រោងអគារហើយ គម្រោងនេះនឹងត្រូវបានកំណត់ នឹងពន្លឿនការវិនិយោគយ៉ាងទូលំទូលាយបន្ថែមទៀតក្នុងការសាងសង់ជញ្ជាំងកញ្ចក់ បំពាក់គ្រឿងបរិក្ខារអគ្គិសនី និងស្ថាបត្យកម្មតុបតែងផ្នែកខាងក្នុង ដោយនឹងត្រូវបញ្ចប់ការសាងសង់គម្រោងនេះជាស្ថាពរនៅដើមឆ្នាំ2020៕

February 11, 2019

កាសែតឡារ៉ែន ពាណិជ្ជ លេខ 161

[easy_media_download url=”https://www.lareine.com.kh/wp-content/uploads/2019/02/LRPN_161-Final-For-Web.pdf” force_dl=”1″]

February 10, 2019

ខ្លាចយុវជនយល់ច្រឡំថ្ងៃនៃសេចក្តីស្រឡាញ់ថាជាថ្ងៃបុណ្យសង្សារ ក្រសួងអប់រំចេញសេចក្តីណែនាំទប់ស្កាត់បញ្ហា

រយៈពេលប៉ុន្មានឆ្នាំចុងក្រោយនេះរាល់ថ្ងៃទី14កុម្ភៈ បានក្លាយជាថ្ងៃភ័យផងអរផងចំពោះប្រជាជនខ្មែរនៅទូទាំងប្រទេស ជាពិសេសគ្រួសារដែលមានកូនស្រី ព្រោះមានបញ្ហាជាច្រើនកើតឡើងចំពោះនៅថ្ងៃទិវានៃក្តីស្រឡាញ់ ដែលកើតចេញពីការយល់ខុសថាវាជាទិវាបុណ្យសង្សារ ឬជាពេលវេលាក្នុងការប្រគល់ខ្លួនប្រាណឱ្យសង្សារជាដើម។

ដើម្បីទប់ស្កាត់ផលប៉ះពាល់ចំពោះយុវវ័យ ក្រសួងអប់រំ យុវជន និងកីឡា នៅថ្ងៃទី7 ខែកុម្ភៈ ឆ្នាំ2019 នេះបានចេញសេចក្តីណែនាំស្តីពីវិធានការទប់ស្កាត់សកម្មភាពមិនប្រក្រតីក្នុងទិវាបុណ្យនៃក្តីស្រឡាញ់នៅតាមគ្រឹះស្ថានសិក្សាសាធារណៈ និងឯកជន។ នៅក្នុងសេចក្តីណែនាំនោះបានបញ្ជាក់ថាក្រសួងអប់រំ សង្កេតឃើញថាជារៀងរាល់ឆ្នាំនៅថ្ងៃទី14 ខែកុម្ភៈ ដែលជាថ្ងៃបុណ្យនៃក្តីស្រឡាញ់ ជាថ្ងៃមួយដែលសិស្សានុសិស្សមួយចំនួនយល់ច្រឡំថា ថ្ងៃនេះជាថ្ងៃបុណ្យសង្សារ ឬជាថ្ងៃណាត់ជួបគ្នារវាងគូស្នេហ៍។ ទិវានេះពុំមែនជាបុណ្យប្រពៃណីរបស់ជនជាតិខ្មែរយើងទេ ហើយនៅអំឡុងប៉ុន្មានឆ្នាំចុងក្រោយនេះ ទិវានៃក្តីស្រឡាញ់កាន់តែមានឥទ្ធិពលធំឡើងៗ ធ្វើឱ្យយុវវ័យភ្លើតភ្លើនភ្លេចការសិក្សាបាត់បង់សេចក្តីថ្លៃថ្នូររបស់ខ្លួន និងក្រុមគ្រួសារ ប្រាសចាកវប្បធម៌ និងប្រពៃណីជាតិដ៏ផូរផង់របស់ខ្មែរទៀតផង។

ដើម្បីពង្រឹងការអនុវត្តបទបញ្ជាផ្ទៃក្នុងសម្រាប់គ្រឹះស្ថានសាធារណៈ ក្រសួងអប់រំ យុវជន និងកីឡា សូមធ្វើការណែនាំស្តីពីវិធានការទប់ស្កាត់សកម្មភាពមិនប្រក្រតីក្នុងទិវានៃក្តីស្រឡាញ់នៅតាមគ្រឹះស្ថានសាធារណៈ និងឯកជនដូចជា ត្រូវផ្សព្វផ្សាយដល់សិស្សានុសិស្សតាមគ្រប់មធ្យោបាយ ដូចជាតាមការប្រជុំនៅពេលគោរពទង់ជាតិកុំឱ្យមានការយល់ខុសពីអត្ថន័យនៃក្តីស្រឡាញ់។ ត្រូវពង្រឹងការអនុវត្តបទបញ្ជាផ្ទៃក្នុងរបស់គ្រឹះស្ថានសិក្សាសាធារណៈឱ្យបានម៉ឺងម៉ាត់ ជាពិសេសលើការគ្រប់គ្រងសីលធម៌ និងវិន័យដោយតាមដានអវត្តមានរបស់សិស្សានុសិស្សជាប្រចាំ។ ត្រូវជំរុញដំណើររបស់ក្រុមប្រឹក្សាយុវជន ក្រុមប្រឹក្សាកុមារប្រចាំសាលា ដោយអនុវត្តសកម្មភាព “មិត្តអប់រំមិត្ត” និងត្រូវទំនាក់ទំនងជិតស្និទ្ធជាមួយមាតាបិតា អ្នកអាណាព្យាបាលសិស្សសហគមន៍ដើម្បីផ្តល់ និងទទួលព័ត៌មាននានាពាក់ព័ន្ធនឹងសកម្មភាពមិនប្រក្រតី ដែលប្រព្រឹត្តដោយសិស្សានុសិស្ស ដើម្បីសហការគ្នាអប់រំណែនាំកែលម្អសិស្សានុសិស្សបានទាន់ពេលវេលា៕

February 8, 2019

ឧបករណ៍ផលិតទឹកស្អាតរបស់អ្នកជំនាញកម្ពុជា មានលទ្ធភាពដោះស្រាយបញ្ហាពិភពលោក

ទឹក ជាប្រភពសំខាន់បំផុតសម្រាប់ជីវិត ហេតុនេះការផ្គត់ផ្គង់ទឹកស្អាត ជាការផ្តល់នូវធាតុផ្សំដែលមិនអាចខ្វះបានសម្រាប់ការរស់នៅរបស់មនុស្សទាំងអស់គ្នា។ តាមរបាយការណ៍របស់អង្គការសុខភាពពិភពលោក មានមនុស្សមិនតិចជាង 800លាននាក់ទេក្នុងពិភពលោកនេះដែលកំពុងត្រូវការទឹកស្អាត ហើយវាក៏ជាផ្នែកយ៉ាងសំខាន់មួយដែលពិភពលោកកំពុងយកចិត្តទុកដាក់ដែរ។

នៅកម្ពុជា អ្នកជំនាញមួយក្រុមបានបង្កើតគម្រោងមួយដែលមានឈ្មោះថា Water Dispenser ដើម្បីផ្តល់ការផ្គត់ផ្គង់ទឹកស្អាតសម្រាប់ប្រជាជនកម្ពុជាគ្រប់ស្រទាប់វណ្ណៈ និងជាពិសេស គឺសិស្សនិស្សិតដែលពីមុនធ្លាប់ចំណាយច្រើនលើការទិញទឹកស្អាតប្រើប្រាស់ជារៀងរាល់ថ្ងៃ។

នៅថ្ងៃនេះ អ្នកយកព័ត៌មាននៃកាសែតឡារ៉ែនពាណិជ្ជ បានធ្វើបទសម្ភាសជាមួយលោក កែវ ចក្រពិត្តរិទ្ធីអ្នកជំនាញមួយរូបក្នុងគម្រោង Water Dispenser ដើម្បីបង្ហាញពីគម្រោងលម្អិតដែលត្រូវបានគេមើលឃើញថាជាគំនិតផ្តួចផ្តើមប្រកបដោយប្រសិទ្ធភាពក្នុងការដោះស្រាយបញ្ហាទឹកស្អាតនេះ។

1. តើលោកអាចប្រាប់បានទេថា មូលហេតុអ្វីបានជាក្រុមការងាររបស់លោកបង្កើតគម្រោង Water Dispenser នេះឡើង?
មូលហេតុសំខាន់ដែលយើងបង្កើតគម្រោងនេះឡើង គឺចង់ចូលរួមចំណែកក្នុងការកាត់បន្ថយការចាយវាយរបស់ប្រជាជនខ្មែរ តាមរយៈការផ្តល់ទឹកសុវត្ថិភាពក្នុងតម្លៃធូរថ្លៃបំផុតសម្រាប់ពួកគាត់ ដោយប្រើប្រាស់បច្ចេកវិទ្យា។ ដូចយើងគ្រប់គ្នាបានដឹងហើយថា ជារៀងរាល់ថ្ងៃប្រជាជន និងសិស្សនិស្សិតកម្ពុជាបានចំណាយលុយយ៉ាងច្រើនដើម្បីទិញទឹក ស្របពេលដែលគាត់ត្រូវការបែងចែកលុយកាក់របស់គាត់ទៅលើការចាយវាយផ្សេងៗទៀត ហេតុនេះប្រសិនបើមានផលិតផលទឹកណាដែលធានាបាននូវសុវត្ថិភាព និងងាយស្រួលសម្រាប់គាត់ គាត់នឹងអាចរស់នៅបានកាន់តែប្រសើរជាងមុន ព្រោះគាត់អាចសល់លុយច្រើនដើម្បីប្រើប្រាស់លើអ្វីដែលមានប្រយោជន៍ផ្សេងទៀត។

បើគិតពីការប្រើប្រាស់ទឹក ក្នុងមួយថ្ងៃមនុស្សម្នាក់ៗអាចចំណាយរហូតដល់ទៅ 4,000រៀល ឬច្រើនជាងនេះក្នុងការទិញទឹកសុទ្ធ។ បើគិតក្នុងរយៈពេលខ្លីយើងឃើញថា គាត់ចំណាយតិចតួចបំផុត តែប្រសិនបើបូកបញ្ចូលគ្នាក្នុងរយៈពេលច្រើនខែ ឬច្រើនឆ្នាំក្រោយយើងនឹងឃើញថា គាត់ត្រូវចំណាយលុយរាប់លានរៀលលើការទិញទឹកប្រើប្រាស់។ ដោយមើលឃើញបែបនេះហើយ ទើបយើងខ្ញុំដែលជាអ្នកបច្ចេកវិទ្យា និងវិស្វករបានព្យាយាមស្វែងរកដំណោះស្រាយសម្រាប់ពួកគាត់ ដោយផ្តល់សេវាទឹកស្អាតក្នុងតម្លៃធូរថ្លៃបំផុត គឺក្នុងមួយលីត្រគាត់ចំណាយត្រឹមតែ 100រៀលប៉ុណ្ណោះ ដែលគិតទៅមួយខែគាត់ចាយប្រមាណតែ6,000រៀលតែអាចទទួលបានទឹកប្រើប្រាស់គ្រប់គ្រាន់។

2. បើមើលទៅលើដំណោះស្រាយដែល Water Dispenser ផ្តល់ជូនប្រជាជន គឺអាចធ្វើឱ្យពួកគាត់ចំណេញច្រើនណាស់។ តើលោកប្រើប្រាស់បច្ចេកវិទ្យាដូចម្តេចខ្លះដើម្បីធានាពីសុវត្ថិភាព និងភាពងាយស្រួលដល់អ្នកប្រើប្រាស់?
បាទ ពិតណាស់ គម្រោង Water Dispenser អាចធ្វើឱ្យអ្នកប្រើប្រាស់ចំណេញច្រើន ព្រោះបើគិតទៅប្រជាជនអាចកាត់បន្ថយការចំណាយលើទឹកពីច្រើនពាន់រៀលមកត្រឹម 200រៀលប៉ុណ្ណោះ តែខ្ញុំក៏ចង់បញ្ជាក់ផងដែរថា ក្រៅពីការផ្តល់ផលប្រយោជន៍សម្រាប់ប្រជាជនហើយ គម្រោងរបស់យើងក៏គិតគូរដល់ផ្នែកសំខាន់មួយទៀតផងដែរ គឺកាត់បន្ថយការប្រើប្រាស់ប្លាស្ទិក។

គម្រោងរបស់យើង គឺផ្គត់ផ្គង់ទឹកតាមរយៈការដាក់ធុងចម្រោះទឹកដោយប្រើប្រាស់បច្ចេកវិទ្យាទំនើបដើម្បីផ្តល់ទឹកជូនអ្នកប្រើប្រាស់នៅគ្រប់ទីកន្លែង ជាពិសេសនៅតាមសាកលវិទ្យាល័យ។ អ្នកប្រើប្រាស់ចាំបាច់ត្រូវតែមានដបទឹកឆ្លាតវៃ ដែលបញ្ចូលនូវប្រព័ន្ធបច្ចេកវិទ្យា និងទិន្នន័យសម្រាប់អ្នកប្រើប្រាស់ម្នាក់ៗដាច់ដោយឡែកពីគ្នា។ ការធ្វើបែបនេះ គឺដើម្បីកំណត់ពីអនាម័យ និងការគ្រប់គ្រងទឹកកុំឱ្យខ្ជះខ្ជាយ ព្រោះធុងចម្រោះទឹកនេះនឹងចេញទឹកដោយស្វ័យប្រវត្តិនៅពេលដែលយើងប្រើប្រាស់ជាមួយដបទឹកឆ្លាតវៃរបស់យើង។ សម្រាប់មនុស្សទូទៅ មិនអាចចុចប្រើប្រាស់បានទេ ដែលធ្វើឱ្យយើងអាចសន្សំសំចៃ ហើយធានាសុវត្ថិភាពជូនអ្នកប្រើប្រាស់ទូទៅទៀតផង។

ចំពោះអ្នកប្រើប្រាស់វិញ គឺអាចទាញទឹកយកមកប្រើប្រាស់បានគ្រប់ធុង តែគាត់អាចប្រើប្រាស់បានត្រឹមតែ 2លីត្រប៉ុណ្ណោះក្នុងមួយថ្ងៃ។ ការកំណត់បែបនេះគឺស្របពេលដែលយើងស្រាវជ្រាវឃើញថា ជាទូទៅមនុស្សប្រើប្រាស់ទឹកសម្រាប់ទទួលទានប្រហែលជា 2លីត្រ ដើម្បីផ្តល់លទ្ធភាពសមល្មមសម្រាប់មនុស្សម្នាក់។

3. លោកបានប្រាប់ផងដែរថា គម្រោងរបស់លោកអាចជួយដល់បរិស្ថាន តើលោកអាចបញ្ជាក់ឱ្យកាន់តែលម្អិតទៀតបានទេ ថាតើមានលក្ខខណ្ឌអ្វីខ្លះទៀតដែលគម្រោងនេះអាចជួយបាន?
ដូចបានបញ្ជាក់ខាងលើហើយថា បើគិតពីបរិស្ថាន ចំណុចសំខាន់ទី1 គឺកាត់បន្ថយការប្រើប្រាស់ដបប្លាស្ទិក។ យើងគ្រប់គ្នាសុទ្ធតែបានឃើញហើយថា យើងគ្រប់គ្នាប្រើប្រាស់ដបទឹកប្លាស្ទិកច្រើនណាស់ ដោយទឹកកន្លះលីត្រ ឬ1លីត្រយើងបោះចោលដបទឹក1 ហេតុនេះបើប្រើប្រាស់រាល់ថ្ងៃ មានន័យថា មានដបទឹកជ័ររាប់រយនឹងត្រូវក្លាយជាសំរាម។ បើងាកមកប្រើប្រាស់ដបទឹកឆ្លាតវៃវិញ គាត់អាចប្រើប្រាស់ដប1 ក្នុងរយៈពេលយូរ និងសុវត្ថិភាពខ្ពស់។ ក្រៅពីនេះ ដោយសារគម្រោងរបស់យើងមិនមែនជាប្រភេទជំនួញ ឬជាគម្រោងសហគ្រាសសង្គម ដូច្នេះយើងអាចយកថវិកាដែលបានពីផលចំណេញដើម្បីផ្តល់សេវាទឹកស្អាត ឬជួយដល់ប្រជាជនកម្ពុជាជាច្រើនបន្ថែមទៀតនៅជនបទដាច់ស្រយាល៕

February 6, 2019

យុវជនកម្ពុជាគួរត្រៀមខ្លួនដូចម្តេចខ្លះដើម្បីប្រកួតប្រជែងជាមួយប្រទេសក្នុងតំបន់?

កម្ពុជាជាសមាជិកនៃតំបន់អាស៊ាន និងជាប្រទេសមួយដែលស្ថិតក្នុងបរិបទនៃការប្រកួតប្រជែងក្នុងតំបន់ដែលទាមទារឱ្យមានធនធានមនុស្សប្រកបដោយសក្តានុពលដើម្បីចូលរួមទាញយកផលប្រយោជន៍ និងជំរុញល្បឿននៃការអភិវឌ្ឍក្នុងសហគមន៍អន្តរជាតិ។

ក្នុងចំណោមផ្នែកសំខាន់ៗនៃការប្រកួតប្រជែងនេះយុវជនជំនាន់ថ្មីដែលជាអ្នកបន្តវេនលើគ្រប់វិស័យ ទាំងរដ្ឋ និងឯកជន ចាំបាច់ត្រូវតែព្យាយាមគ្រប់លទ្ធភាពដើម្បីធ្វើការអភិវឌ្ឍសមត្ថភាពរបស់ខ្លួនឱ្យក្លាយជាប្រជាជនសកល។

លោក ហួ តុលា នាយកកម្មវិធី The Perspectives Cambodia បានលើកឡើងថា ដើម្បីធ្វើការប្រកួតប្រជែងក្នុងបរិបទតំបន់ យុវជនគួរមានលក្ខណសម្បត្តិចំនួន 5សំខាន់ៗគឺ ទី1 យុវជនកម្ពុជាគួរមានសមត្ថភាពផ្នែកភាសាឱ្យបានច្បាស់លាស់ជាពិសេសភាសាអង់គ្លេស ព្រោះភាសាជាផ្នែកសំខាន់ក្នុងការទំនាក់ទំនង និងជាចំណុចភ្ជាប់យ៉ាងសំខាន់ដើម្បីសិក្សាលើជំនាញជាច្រើនផ្សេងទៀតលើពិភពលោក។ ក្រៅពីនេះចំណេះដឹងភាសា ក៏ជាផ្នែកមួយដែលមិនអាចខ្វះបានក្នុងការធ្វើអាជីវកម្ម និងធ្វើការងារជាមួយគ្រប់ស្ថាប័នទាំងអស់ក្នុងតំបន់ផងដែរ។ ចំណុចសំខាន់ទី2 បន្ទាប់ពីភាសាគឺ ត្រូវមានជំនាញច្បាស់លាស់ ជាពិសេស គឺជំនាញដែលសង្គមកំពុងត្រូវការ ទាំងកម្រិតជាតិ និងអន្តរជាតិ។ ការចេះតែភាសាមួយមុខមិនគ្រប់គ្រាន់នោះទេ យុវជនត្រូវតែមានជំនាញដើម្បីទាញយកឱកាសការងារនៅក្នុងតំបន់ ព្រោះបច្ចុប្បន្ននេះអាស៊ាន ក៏ដូចជាប្រទេសជាច្រើនផ្សេងទៀតដែលបានបើកចំហ និងត្រូវការអ្នកជំនាញសំខាន់ៗដើម្បីបម្រើការងារឱ្យកាន់តែប្រសើឡើង។ ចំណុចសំខាន់ទី3 គឺការចូលរួមប្រកួតប្រជែង ព្រោះការប្រកួតប្រជែង គឺការបង្ហាញពីសមត្ថភាព និងបង្កើតជាសមិទ្ធផលល្អៗដើម្បីបង្ហាញដល់ស្ថាប័ននានាថា យើងពិតជាមានសមត្ថភាពខ្លាំងលើសពីអ្នកដទៃផ្សេងទៀតមែន។

លោក ហួ តុលា បាននិយាយថា៖ “យុវជនកម្ពុជាគួរចាប់ផ្តើមចូលរួមប្រកួតប្រជែងឱ្យបានច្រើនទាំងក្នុងបរិបទអាស៊ាន និងក្នុងពិភពលោក ដូចជាការប្រកួតប្រជែងយកអាហារូបករណ៍ កម្មវិធីវិទ្យាសាស្ត្រការនិយាយសាធារណៈ ការសរសេរគម្រោងអាជីវកម្ម ឬការផលិតវីដេអូជាដើម។ បច្ចុប្បន្ននេះមានការ-ប្រកួតប្រជែងជាច្រើនមិនថាតែផ្នែកគណិតវិទ្យា វិទ្យាសាស្ត្រ ឬសង្គមនោះទេ យុវជនខ្មែរយើងមិនតិចទេអាចឈ្នះបណ្តាប្រទេសធំៗ ហើយទទួលបានជយលាភីត្រឡប់មកវិញ”។

លោក ហួ តុលា បានលើកឡើងផងដែរថា ចំណុចទី4 ដែលយុវជនគួរធ្វើគឺ ចាប់ផ្តើមបង្កើនទំនាក់ទំនងល្អជាមួយយុវជន និងប្រជាជននៅក្នុងបណ្តាប្រទេសនានាលើពិភពលោក ព្រោះការបង្កើតបណ្តាញទំនាក់ទំនងល្អនេះអាចធ្វើឱ្យយើងទទួលបានឱកាសកាន់តែច្រើនក្នុងការចាប់យកឱកាសការងារ ក៏ដូចជាការធ្វើអាជីវកម្មជាដើម។ ចំណុចសំខាន់ទី5 គឺយុវជនគួរបង្ហាញទស្សនវិជ្ជមានចំពោះសង្គមឱ្យបានច្រើន ដើម្បីធ្វើយ៉ាងណាបង្ហាញឱ្យគេឃើញពីលក្ខណពិសេស និងសក្តានុពលរបស់យើង ដែលវាជាចំណុចចាប់ផ្តើមក្នុងការទាក់ទាញអ្នកវិនិយោគ ឬមើលឃើញពីតម្លៃក្នុងការទំនាក់ទំនងជាមួយយើង។ ម្យ៉ាងវិញទៀត យើងទាំងអស់គ្នាក៏គួរតែព្យាយាមគ្រប់លទ្ធភាពក្នុងការកំណត់អត្តសញ្ញាណ វប្បធម៌ និងសាមគ្គីភាព ដើម្បីបង្ហាញឱ្យគេឃើញថា យើងជាមនុស្សដែលមានសមត្ថភាព និងជាមនុស្សដែលអាចជួយឱ្យស្ថាប័នរបស់គេអាចអភិវឌ្ឍបានល្អ។

ចំពោះកម្រិតគុណភាពរបស់យុវជនវិញនោះលោក តុលា បានបញ្ជាក់ថា បើគិតពីក្របខណ្ឌអាស៊ានយើងមិនអន់ពេកទេ ព្រោះបើរាប់តាមលេខរៀង យើងប្រហែលជាលេខ6 លេខ7 ដែរ ប្រៀបធៀបជាមួយយុវជនក្នុងប្រទេសដទៃ។ កត្តាសំខាន់ដែលអាចធ្វើឱ្យយើងអាចវាយតម្លៃបែបនេះ ទី1 គឺយុវជនកម្ពុជាមានឱកាសច្រើនក្នុងការអភិវឌ្ឍសមត្ថភាព ទាំងការចូលរួមក្នុងកិច្ចការងារសង្គម ការសិក្សាលើភាសា និងការ-បង្កើតកម្មវិធីថ្មីៗ ខុសពីប្រទេសមួយចំនួន ដូចជាមីយ៉ាន់ម៉ា វៀតណាម ម៉ាឡេស៊ី ឥណ្ឌូនេស៊ី និងប្រទេសមួយចំនួនទៀតដែលយុវជនមិនសូវត្រូវបានលើកទឹកចិត្តឱ្យមានឱកាសបែបនេះទេ ព្រោះប្រទេសគេទាំងនោះរឹតត្បិតខ្លាំងលើការរៀបចំ និងបង្កើតកម្មវិធីផ្សេងៗ ក៏ដូចជាបញ្ហាភាសាជាដើម។ ចំណុចសំខាន់ទី2គឺយើងឃើញថា និស្សិតកម្ពុជាទទួលបានមេដាយមាស-ប្រាក់ និងសមិទ្ធផលសំខាន់ៗជាច្រើនពីអន្តរជាតិ។ និយាយនេះមិនមែនមានន័យថា ប្រទេសគេមិនជាប់ជយលាភីនោះទេ គេក៏មានច្រើនដែរ តែអ្វីដែលសំខាន់គឺលើវិញ្ញាសាខ្លះ យើងអាចឈ្នះលើប្រទេសធំ។ ជាក់ស្តែងចំពោះអាហារូបករណ៍អន្តរជាតិវិញ មានប្រទេសខ្លះមិនមានយុវជនជាប់នោះទេ តែយុវជនខ្មែរយើងអាចជាប់ទៅសិក្សាបាន។ ចំណុចសំខាន់មួយផ្សេងទៀតដែលយើងមើលឃើញថា ជាចំណុចល្អរបស់យើងនោះគឺ តាមការស្រាវជ្រាវ កម្ពុជាមានយុវជនចន្លោះពី 18ឆ្នាំ ដល់ 40ឆ្នាំច្រើនជាងគេក្នុងតំបន់ ដែលកំពុងចូលរួមយ៉ាងសំខាន់ក្នុងគ្រប់ផ្នែក ជាពិសេសចង្វាក់ផលិតកម្មក្នុងវិស័យសេដ្ឋកិច្ច។

ទោះបីជាយ៉ាងនេះក្តី សហស្ថាបនិកកម្មវិធីអភិវឌ្ឍន៍យុវជនខាងលើបានបង្ហាញផងដែរថា យុវជនយើងក៏មានចំណុចខ្វះខាតចំនួនផងដែរដែលជាឧបសគ្គសម្រាប់ការប្រកួតប្រជែង។ បញ្ហាសំខាន់គឺយុវជនកម្ពុជាមួយចំនួនមិនទាន់ចេះប្រើប្រាស់ឱកាសរបស់ខ្លួនឱ្យក្លាយជាប្រយោជន៍សំខាន់នៅឡើយទេ។ មានយុវជនខ្លះបានបណ្តែតបណ្តោយឱ្យឱកាសទាំងអស់នោះរំលងផុតទៅដោយការផ្តេកផ្តួលខ្លួនជាមួយនឹងរឿងមិនល្អ ឬលង់ខ្លួនជាមួយភាពសប្បាយរីករាយច្រើនពេក ភ្លេចគិតពីការអភិវឌ្ឍសមត្ថភាពស្របពេលដែលយុវជននៃបណ្តាប្រទេសដទៃកំពុងមមាញឹកខ្លាំងក្នុងការអភិវឌ្ឍចំណេះដឹងរបស់ខ្លួន។ម្យ៉ាងវិញទៀត យុវជនកម្ពុជាបច្ចុប្បន្នក៏មានទម្លាប់មិនល្អមួយ គឺចូលចិត្តធ្វើអ្វីដដែលៗ ដែលធ្វើឱ្យពួកគេមិនអាចស្វែងរកនវានុវត្តន៍ ឬអ្វីដែលថ្មីខុសពីអ្វីដែលមនុស្សចាស់ធ្លាប់ធ្វើ។ បញ្ហានេះធ្វើឱ្យយើងដើរក្រោយគេ ព្រោះទម្លាប់ចាស់គំរឹលមួយចំនួនដែលយុវជនកំពុងក្តោបទុកក្នុងខ្លួន បានក្លាយជាឧបសគ្គសំខាន់ក្នុងការធ្វើការងារក្នុងសង្គមដែលកំពុងប្រែប្រួលយ៉ាងឆាប់រហ័សនេះ។ ចំណុចសំខាន់មួយផ្សេងទៀត គឺយុវជនកម្ពុជាមិនទាន់ចេះសាមគ្គី និងធ្វើការជាក្រុមឱ្យបានល្អ ដែលធ្វើឱ្យយើងមានការលំបាកក្នុងការប្រកួតប្រជែងជាមួយបណ្តាប្រទេសខាងក្រៅ ព្រោះយើងរវល់តែមានបញ្ហាផ្ទៃក្នុងច្រើន។ ជាក់ស្តែងប្រសិនបើយើងធ្វើការងារគម្រោងណាមួយ ហើយយើងរវល់តែឈ្លោះប្រកែកគ្នា ផ្នែកដទៃផ្សេងទៀត ឬដៃគូប្រកួតប្រជែង គេនឹងដើរទៅមុនយើងអស់មិនខាន។

ងាកមកវិញ ដើម្បីស្តារស្ថានការណ៍ទាំងអស់នេះយើងគួរព្យាយាមគ្រប់លទ្ធភាពដើម្បីសិក្សាឱ្យបានច្រើន ទាំងក្នុងប្រទេស និងក្រៅប្រទេស ដើម្បីដឹងឱ្យច្បាស់ថា តើគេដើរដល់ណាហើយ? ហើយយើងត្រៀមខ្លួនអ្វីខ្លះដើម្បីប្រកួតប្រជែង?។ លើសពីនេះទៅទៀតយុវជនគួរព្យាយាមប្រើប្រាស់ពេលដើម្បីស្វែងយល់ឱ្យ-បានស៊ីជម្រៅលើការងារដែលយើងកំពុងធ្វើ ដើម្បីអភិវឌ្ឍឱ្យកាន់តែប្រសើរឡើង ហើយប្រសិនបើយើងក្តោបព័ត៌មាន ឬទិន្នន័យបានល្អប្រសើរទៀតផងនោះ យើងនឹងអាចរកឃើញគំនិតច្នៃប្រឌិតជាច្រើនដែលធ្វើឱ្យយើងក្លាយជាបុគ្គលិកដែលមានប្រសិទ្ធភាពខ្ពស់៕

February 6, 2019

Sirloin Steak ស្តេកសាច់គោអូស្ត្រាលីដ៏ឆ្ងាញ់ពិសា

Sirloin Steak ស្តេកសាច់គោអូស្ត្រាលីដ៏មានឱជារសឈ្ងុយឆ្ងាញ់ប្រចាំភោជនីយដ្ឋាន ស្លា (Slla Sky Bar) ដែលស្ថិតនៅជាន់ទី9 នៃសណ្ឋាគារ AQUARIUS Hotel & Urban Resort។ ស្តេកសាច់គោអូស្ត្រាលីនេះគឺជាមុខម្ហូបដ៏ពេញនិយម ជាពិសេសបើបានទទួលទានជាមួយនឹងស្រាក្រហមទៀតនោះគឺកាន់តែត្រូវមាត់តែម្តង។ ដូច្នេះ តោះរៀនចម្អិន ស្តេកសាច់គោអូស្ត្រាលី Sirloin Steak ជាមួយនឹងលោក ចាន់ វ៉ាន់ផល មេចុងភៅប្រចាំភោជនីយដ្ឋាន Slla Sky Bar ដូចខាងក្រោមនេះ។

គ្រឿងផ្សំ
– សាច់គោអូស្ត្រាលី (Sirloin Steak) 200g
– ប្រេងអូលីវ 15 ml
– ប៊័រ (សាប) 30g
– ខ្ទឹមបារាំងពណ៌ស 15g
– មើមការ៉ុត 30g
– សណ្តែកបារាំង 15g
– ននោងបារាំង (Zucchini) 20g
– ផ្កាខាត់ណា ប្រូខូលី 40g
– ផ្កាខាត់ណាពណ៌ស 40g
– ស្រាក្រហមសម្រាប់ចម្អិនអាហារ 20ml
– ខ្ទឹមក្រហម 10g
– ម្រេចខ្ចី 10g
– ម្រេចខ្មៅម៉ដ្ឋ 2ml
– គ្រីមសម្រាប់ចម្អិនអាហារ 10g
– ម្សៅ Demi Glace 10g
– ស្លឹកជីវ៉ាន់ស៊ុយ 2g

វិធីចម្អិន
ដំបូងត្រូវយកសាច់គោអូស្ត្រាលីមួយដុំ ដែលមានទម្ងន់200g មកប្រឡាក់ជាមួយនឹងអំបិល និងម្រេចម៉ដ្ឋ រួចយកទៅប្រឡាក់ជាមួយនឹងប្រេងអូលីវ ហើយយកទៅចៀននៅក្នុងខ្ទះស្ងួត (មិនមានបន្ថែមប្រេង ឬខ្លាញ់ទេ) ដោយបើកភ្លើងឱ្យក្តៅខ្លាំង រួចចៀនឱ្យឆ្អិនតាមកម្រិតដែលអ្នកចូលចិត្ត (ចំពោះកម្រិតឆ្អិន50% ត្រូវចម្អិនរយៈពេល1នាទីក្នុងមួយចំហៀង រួចសឹមប្រែសាច់ទៅម្ខាងទៀត)។ ចំណែកបន្លែវិញ ត្រូវយកបន្លែទាំងអស់ដែលមានដូចជា ផ្កាខាត់ណា ប្រូខូលី ការ៉ុត ខ្ទឹមក្រហម សណ្តែកបារាំងខ្ទឹមបារាំងពណ៌ស និងននោងបារាំង យកទៅស្រុះជាមុនសិន រួចសឹមយកមកចៀនជាមួយប៊័រ ដោយបន្ថែមម្រេចម៉ដ្ឋ និងអំបិលចូលបន្តិច ចៀនឱ្យរាងទន់បន្តិចជាការស្រេច រួចដួសដាក់នៅក្នុងចានជាមួយនឹងសាច់គោអូស្ត្រាលី ដែលបានចៀនរួចនោះជាការស្រេច ដោយទទួលទានជាមួយនឹងទឹកម្រេច ឬទឹកសុសផ្សិត ឬទឹកសុសស្រាក្រហមក៏បាន៕

February 6, 2019

វិស័យបច្ចេកវិទ្យាហិរញ្ញវត្ថុនៅកម្ពុជាមានការរីកចម្រើនបង្គួរ ខណៈការប្រើសេវានេះនៅមានកម្រិត

បើទោះបីជាសេវាបច្ចេកវិទ្យាហិរញ្ញវត្ថុនៅកម្ពុជាមានការរីកចម្រើនយ៉ាងឆាប់រហ័សក្នុងរយៈពេល 2 – 3ឆ្នាំចុងក្រោយនេះក្តី តែការអភិវឌ្ឍសេវាបច្ចេកវិទ្យាហិរញ្ញវត្ថុ និងការប្រើប្រាស់សេវាមួយនេះក៏ហាក់នៅមិនទាន់មានភាពទូលំទូលាយនៅឡើយ។ នេះបើយោងតាមមន្ត្រីជំនាញនៅក្នុងវិស័យហិរញ្ញវត្ថុ។

លោក អ៊ុក សារ៉ាត ប្រធាននាយកដ្ឋានប្រព័ន្ធទូទាត់សងប្រាក់នៃធនាគារជាតិនៃកម្ពុជា បានថ្លែងក្នុងឱកាសសន្និបាតបូកសរុបលទ្ធផលការងារប្រចាំឆ្នាំ2018 របស់ធនាគារជាតិនៃកម្ពុជាកាលពីពេលថ្មីៗនេះ ថា ការរីកចម្រើននៃបច្ចេកវិទ្យាដែលរួមមានទូរស័ព្ទចល័តឆ្លាតវៃ ប្រព័ន្ធអុីនធើណិត បច្ចេកវិទ្យាប្លុកឆេន បញ្ញាសិប្បនិម្មិត ឃ្លាំងទិន្នន័យ ការវិភាគទិន្នន័យ បច្ចេកវិទ្យាជីវមាត្រ រួមទាំងបច្ចេកវិទ្យាសម្រួលដល់ការត្រួតពិនិត្យផ្សេងៗ បានជំរុញឱ្យមានការរីកចម្រើនក្នុងវិស័យហិរញ្ញវត្ថុ ដែលការណ៍នេះត្រូវបានទទួលស្គាល់ជាទូទៅថា ជាបច្ចេកវិទ្យាហិរញ្ញវត្ថុ។

លោក សារ៉ាត បានបន្តថា បច្ចេកវិទ្យាហិរញ្ញវត្ថុនៅក្នុងប្រទេសកម្ពុជាមានការរីកចម្រើនបង្គួរនៅក្នុងសេវា មួយចំនួនដូចជា ប្រព័ន្ធទូទាត់ ការផ្ទេរប្រាក់ឆ្លងដែន និងការផ្តល់ឥណទានជាដើម ប៉ុន្តែសេវាផ្សេងទៀតមានការលូតលាស់តិចតួចប៉ុណ្ណោះ។

លោកបានបញ្ជាក់យ៉ាងដូច្នេះថា៖“សេវាកម្មផ្សេងៗទៀតនៅក្នុងបច្ចេកវិទ្យាហិរញ្ញវត្ថុដូចជា បញ្ញាសិប្បនិម្មិត និងឃ្លាំងទិន្នន័យ នៅតែមិនទាន់មានប្រតិបត្តិការនៅក្នុងប្រទេសកម្ពុជានៅឡើយទេ”។ លោកបន្តថា៖“ទោះជាស្មាតហ្វូន និងអុីនធើណិតដែលបម្រើដល់បច្ចេកវិទ្យារីកចម្រើនខ្លាំងក៏ដោយ តែយើងមិនទាន់ឃើញមានការប្រើប្រាស់បច្ចេកវិទ្យាហិរញ្ញវត្ថុដទៃទៀតនៅឡើយ។ ខ្ញុំមិនទាន់ឃើញមានការរីកចម្រើនខ្លាំងទេ នៅពេលដែលយើងនិយាយពីបច្ចេកវិទ្យាហិរញ្ញវត្ថុ”។

លោកប្រធាននាយកដ្ឋានបានបន្ថែមថា ជាទូទៅការយល់ដឹងរបស់ប្រជាជនកម្ពុជានៅមានកម្រិតនៅឡើយទៅលើបច្ចេកវិទ្យាហិរញ្ញវត្ថុ ខណៈដែលវាមានសារៈសំខាន់ដើម្បីជំរុញ និងលើកកម្ពស់ការយល់ដឹងផ្នែកបច្ចេកវិទ្យា និងការប្រើប្រាស់អ្វីទាំងអស់នោះ។

លោកបន្តថា៖ “មានប្រជាជនកម្ពុជាជាច្រើនប្រើបាស់ស្មាតហ្វូន ហើយភាគច្រើននៅក្នុងទីក្រុង និងទីប្រជុំជន ប៉ុន្តែពួកគេមានការខ្វះខាតការយល់ដឹងលើបច្ចេកវិទ្យាហិរញ្ញវត្ថុ ខណៈពេលដែលវិនិយោគិនក្នុងស្រុក មិនចាប់អារម្មណ៍នៅក្នុងការវិនិយោគលើវិស័យនេះ”។

លោក គីមទី កោមលី អគ្គនាយករងបច្ចេកទេសទី1 នៃធនាគារជាតិនៃកម្ពុជា បានឱ្យដឹងថា ការដាក់ចេញនូវបច្ចេកវិទ្យាទាំងនេះបានផ្តល់នូវកាលានុវត្តភាពក្នុងការជំរុញឱ្យមានប្រសិទ្ធភាពថែមឡើងទៀតនៅក្នុងវិស័យហិរញ្ញវត្ថុពាក់ព័ន្ធការចំណាយថ្លៃដើមល្បឿន សុវត្ថិភាព និងតម្លាភាព ការជំរុញលទ្ធភាពក្នុងការទទួលបានសេវាកម្មហិរញ្ញវត្ថុ ក៏ដូចជាការជំរុញឱ្យមានបរិវត្តន៍នៃសេវាកម្មហិរញ្ញវត្ថុ និងធ្វើឱ្យប្រសើរឡើងនូវប្រព័ន្ធទូទាត់ជាអេឡិចត្រូនិក និងកាត់បន្ថយការចំណាយលើប្រតិបត្តិការសម្រាប់អតិថិជន។

លោកបន្តថា៖“បច្ចេកវិទ្យាហិរញ្ញវត្ថុអនុញ្ញាតឱ្យធនាគារកាត់បន្ថយតម្លៃ និងបញ្ជូនសេវាកម្មរបស់ពួកគេឱ្យកាន់តែមានប្រសិទ្ធភាពជាងមុន”។

លោក អុិន ចាន់នី ប្រធាននាយកប្រតិបត្តិនៃធនាគារអេស៊ីលីដា បាននិយាយថា បច្ចេកវិទ្យា-ហិរញ្ញវត្ថុ និងដើរតួនាទីយ៉ាងសំខាន់ក្នុងការអភិវឌ្ឍវិស័យធនាគារក្នុងស្រុក និងឧស្សាហកម្មផ្សេងៗទៀតនៅក្នុងប្រទេសកម្ពុជា។

លោក ចាន់នី បន្តថា៖ “បច្ចេកវិទ្យាអាចកាត់បន្ថយហានិភ័យសម្រាប់ធនាគារ និងគ្រឹះស្ថានមីក្រូហិរញ្ញវត្ថុ និងជួយបង្កើនភាពងាយស្រួលដល់អតិថិជន”។

បើយោងតាមរបាយការណ៍របស់ធនាគារជាតិនៃកម្ពុជា ការអភិវឌ្ឍបច្ចេកវិទ្យាហិរញ្ញវត្ថុនៅកម្ពុជាកំពុងស្ថិតក្នុងដំណាក់កាលដំបូងនៅឡើយ ដោយប្រតិបត្តិការភាគច្រើនមានដូចជា កាបូបអេឡិចត្រូនិក ការទូទាត់តាមរយៈប្រព័ន្ធទូរស័ព្ទ និងការទូទាត់ឆ្លងប្រទេស ជាដើម។

របាយការណ៍ដដែលបន្តថា ធនាគារកណ្តាលកំពុងតែរៀបចំក្របខណ្ឌបទប្បញ្ញតិ្ត និងគោលនយោបាយផ្សេងៗទៀតដើម្បីជំរុញវិស័យនេះ តែទោះជាយ៉ាងនេះក្តី បច្ចេកវិទ្យាហិរញ្ញវត្ថុក៏ជំរុញឱ្យមានបញ្ហាប្រឈមមួយចំនួនផងដែរពាក់ព័ន្ធនឹងបទល្មើសតាមប្រព័ន្ធអុីនធើណិត កិច្ចការពារអតិថិជន និងការប្រឆាំងការសម្អាតប្រាក់ និងហិរញ្ញប្បទានភេរវកម្ម។

ម្យ៉ាងវិញទៀត បច្ច័យ និងឥទ្ធិពលនៃបច្ចេកវិទ្យាហិរញ្ញវត្ថុចំពោះការអនុវត្តគោលនយោបាយរូបិយវត្ថុ និងស្ថិរភាពហិរញ្ញវត្ថុរបស់ធនាគារកណ្តាល មិនទាន់មានភាពច្បាស់លាស់នៅឡើយ តែធនាគារជាតិនៃកម្ពុជាបានខិតខំដាក់ចេញនូវគោលនយោបាយសមស្រប ដើម្បីលើកកម្ពស់បច្ចេកវិទ្យាហិរញ្ញវត្ថុ ក៏ដូចជាបន្ធូរបន្ថយហានិភ័យនានាដែលអាចកើតមានឡើង។

ជាមួយគ្នានេះ ធនាគារជាតិនៃកម្ពុជាបានសហការជាមួយដៃគូអភិវឌ្ឍន៍ក្នុងការកសាងបរិស្ថានសមស្របមួយសម្រាប់អភិវឌ្ឍបច្ចេកវិទ្យាហិរញ្ញវត្ថុនៅកម្ពុជា។

បើយោងតាមរបាយការណ៍ ធនាគារជាតិនៃកម្ពុជាបាននិងកំពុងខិតខំអភិវឌ្ឍលើគម្រោង“បាគង ឬរូបិយបណ្ណឌីជីថល” ដែលជាផ្នែកមួយក្នុងការជំរុញបច្ចេកវិទ្យាហិរញ្ញវត្ថុ ក្នុងគោលដៅលើកកម្ពស់សុវត្ថិភាព និងប្រសិទ្ធភាពប្រព័ន្ធទូទាត់សងប្រាក់នៅប្រទេសកម្ពុជា។ គោលបំណងនៃការអភិវឌ្ឍប្រព័ន្ធនេះ គឺដើម្បីឆ្លើយតបទៅនឹងការរីកចម្រើនសេដ្ឋកិច្ច និងបច្ចេកវិទ្យាហិរញ្ញវត្ថុនាពេលបច្ចុប្បន្ន កាត់បន្ថយការប្រើប្រាស់សាច់ប្រាក់ក្នុងទីផ្សារ និងចូលរួមលើកកម្ពស់បរិយាប័ន្នហិរញ្ញវត្ថុ។

គួររំឭកដែរថា នៅក្នុងឆ្នាំ2018 គ្រឹះស្ថានធនាគារ និងហរិញ្ញវត្ថុចំនួន24 បានផ្តល់សេវាកម្មធនាគារតាមអនឡាញ (Internet Banking) និង 19គ្រឹះស្ថានទៀតបានផ្តល់សេវា Mobile Banking ដល់អតិថិជន។ ទំហំប្រតិបត្តិការទូទាត់ធ្វើឡើងតាម Internet banking មានចំនួនសរុប 80ម៉ឺនប្រតិបត្តិការ គិតជាទឹកប្រាក់ស្មើនឹង 3.9ប៊ីលានដុល្លារអាមេរិក ចំណែកឯប្រតិបត្តិការ Mobile Banking មានចំនួន 12.3លានប្រតិបត្តិការ គិតជាទឹកប្រាក់ស្មើ 5.7ប៊ីលានដុល្លារអាមេរិក៕

February 6, 2019

រដ្ឋាភិបាលផ្ដល់ការអនុគ្រោះ ដោយព្យួរទុកជាបណ្តោះអាសន្ននូវការបង់ប្រាក់រំដោះពន្ធលើប្រាក់ចំណូលប្រចាំខែរបស់សហគ្រាសកែច្នៃកសិផល

រាជរដ្ឋាភិបាលកម្ពុជាកាលពីចុងខែមករា បានសម្រេចផ្តល់ការអនុគ្រោះព្យួរទុកជាបណ្តោះអាសន្ននូវ ការបង់ប្រាក់រំដោះពន្ធលើប្រាក់ចំណូលប្រចាំខែរយៈពេល 5ឆ្នាំដល់សហគ្រាសប្រកបអាជីវកម្មក្នុងវិស័យ កសិកម្ម។ នេះបើយោងតាមសេចក្តីប្រកាសក្រសួងសេដ្ឋកិច្ច និងហិរញ្ញវត្ថុ។

ប្រកាសស្តីពីការព្យួរទុកការបង់ប្រាក់រំដោះពន្ធលើប្រាក់ចំណូលរបស់សហគ្រាសប្រកបអាជីវកម្មក្នុងវិស័យកសិកម្ម ដែលបានចុះហត្ថលេខាដោយឯកឧត្តម អូន ព័ន្ធមុនីរ័ត្ន ឧបនាយករដ្ឋមន្ត្រី និងជារដ្ឋមន្ត្រី ក្រសួងសេដ្ឋកិច្ច និងហិរញ្ញវត្ថុ ដើម្បីជំរុញ និងគាំទ្រដល់ផលិតកម្ម និងការនាំចេញផលិតផលកសិកម្មស្របតាមគោលនយោបាយរបស់រាជរដ្ឋាភិបាលកម្ពុជា។

ការសម្រេចនេះមានគោលដៅព្យួរទុកការបង់ប្រាក់រំដោះពន្ធលើប្រាក់ចំណូលរបស់សហគ្រាសប្រកបអាជីវកម្មផលិត និងផ្គត់ផ្គង់ក្នុងស្រុក ឬនាំចេញផលិតផលកសិកម្មមួយចំនួន ដោយនឹងអនុវត្តចំពោះសហគ្រាសដាំដុះ ផលិត និងផ្តត់ផ្គង់ក្នុងស្រុក ឬនាំចេញផលិតផលកសិកម្មមួយចំនួន។ ប្រកាសនេះបានកំណត់នូវផលិតផលកសិកម្មមួយចំនួន ដូចជា ស្រូវ អង្ករ ពោត សណ្តែក ម្រេច គ្រាប់ស្វាយចន្ទី ដំឡូងមី និងកៅស៊ូ។

សេចក្តីសម្រេចរបស់ក្រសួងសេដ្ឋកិច្ចបានបញ្ជាក់ថា៖“ចំពោះសហគ្រាសដាំដុះ ផលិត និងផ្តត់ផ្គង់ក្នុងស្រុក ឬនាំចេញផលិតផលកសិកម្ម ត្រូវបានអនុគ្រោះព្យួរទុកជាបណ្តោះអាសន្ននូវការបង់ប្រាក់រំដោះពន្ធ(ដែលមានចំនួន 1ភាគរយ) លើប្រាក់ចំណូលប្រចាំខែរយៈពេល 5ឆ្នាំ គិតចាប់ពីខែមករា ឆ្នាំ2019 តរៀងទៅ”។

ប្រកាសនេះបានបន្តថា ការព្យួរទុកការបង់ប្រាក់រំដោះពន្ធលើប្រាក់ចំណូលប្រចាំខែ ត្រូវផ្សារភ្ជាប់ជាមួយនឹងអនុលោមភាពសារពើពន្ធ ស្របតាមច្បាប់ និងបទប្បញ្ញត្តិស្តីពីពន្ធដារដោយក្រុមហ៊ុនកាន់បញ្ជិកាគណនេយ្យឱ្យបានត្រឹមត្រូវតាមបទបញ្ញត្តិនៃច្បាប់ស្តីពីសារពើពន្ធ និងបទប្បញ្ញត្តិនៃច្បាប់ស្តីពីគណនេយ្យជាធរមាន និងប្រកាសបង់ពន្ធអាករដទៃទៀតជាធរមានទៅតាមកាលកំណត់។ ប្រកាសនេះទៀតសោតបានបញ្ជាក់ថា ក្នុងករណីសហគ្រាសមិនគោរពតាមលក្ខខណ្ឌទាំង2 ខាងលើ ការព្យួរទុកការបង់ប្រាក់រំដោះពន្ធលើប្រាក់ចំណូលប្រចាំខែ អាចត្រូវបានដកហូត ហើយសហគ្រាសត្រូវទទួលរងទោសទណ្ឌនានាតាមច្បាប់ជាធរមាន។

លោក សុង សារ៉ន អគ្គនាយកនៃក្រុមហ៊ុន អេមរុរាយស៍ ខេមបូឌា ខូអិលធីឌី (AMRU Rice Cambodia Co.,Ltd) បានឱ្យដឹងថា លោកស្វាគមន៍លើចំណាត់ការរបស់រដ្ឋាភិបាលលើការលើកកម្ពស់ភាពប្រកួតប្រជែង ក្នុងការកែច្នៃផលិតផលកសិកម្មនៅក្នុងប្រទេសកម្ពុជាយើង។

លោកបន្តថា វាជាជំហានមួយដ៏ប្រសើរក្នុងការជួយដល់សហគ្រិនកម្ពុជា និងជួយឱ្យរោងចក្រកែច្នៃមានលទ្ធភាពប្រកួតប្រជែងបាននៅលើទីផ្សារអន្តរជាតិ។

លោក សារ៉ន ឱ្យដឹងទៀតថា៖“យើងស្នើសុំរដ្ឋាភិបាលជួយពិនិត្យបន្ថែមទៀត និងកែសម្រួលនីតិវិធីផ្សេងៗទៀតក្រៅពីពន្ធនេះ”។

លោកអគ្គនាយកក្រុមហ៊ុនបានបន្តថា ពន្ធនេះមានចំនួន 1ភាគរយនៃប្រាក់ចំណូលរបស់ក្រុមហ៊ុនតែមានពន្ធជាច្រើនទៀតបន្តនៅជាប់ដូចជា សម្ភារម៉ាស៊ីនផ្សេងៗដែលយកមកដំឡើងសម្រាប់កែច្នៃលើកសិផលរបស់កម្ពុជាដែលនៅតែមានការជាប់ពន្ធ និងពន្ធកាត់ទុកផ្សេងៗនៅតែមាន ដោយយើងពិនិត្យឃើញថា កម្ពុជានាំចេញផលិតផលវត្ថុធាតុដើម 100ភាគរយ។

លោក សារ៉ន បញ្ជាក់ថា៖“វាជារឿងល្អ ការណ៍នេះវានឹងជួយលើកកម្ពស់ភាពប្រកួតប្រជែងរបស់វិស័យឯកជន ជាពិសេសឧស្សាហកម្មកែច្នៃផលិតផលកសិកម្ម ហើយយើងចង់ឱ្យរដ្ឋាភិបាលពិនិត្យមើលពន្ធផ្សេងៗទៀតផងដើម្បីជួយទាក់ទាញវិនិយោគិនមកវិនិយោគនៅកម្ពុជាលើវិស័យឧស្សាហកម្មកែច្នៃផលិតផលកសិកម្ម ដើម្បីបង្កើនតម្លៃបន្ថែម កាត់បន្ថយការនាំចេញវត្ថុធាតុដើម និងលើកកម្ពស់ភាពប្រកួតប្រជែង”។

គួរបញ្ជាក់ថា ថ្មីៗនេះ រដ្ឋាភិបាលបានប្រកាសលុបចោលស្ថាប័នជាន់គ្នាមួយចំនួន ព្រមទាំងភ្នាក់ងារកម្ពុជានាវាចរណ៍កាំសាប ដើម្បីកាត់បន្ថយការចំណាយលើការធ្វើធុរកិច្ច និងធ្វើឱ្យផលិតផលកម្ពុជាមានភាពប្រកួតប្រជែងខ្ពស់៕

February 6, 2019

អ្នកជំនាញថា វិស័យធានារ៉ាប់រងនៅកម្ពុជាគួរប្រើស្តង់ដារគណនេយ្យ IFRS 17

រាជរដ្ឋាភិបាលបានចាត់ទុកវិស័យធានារ៉ាប់រងជាសសរស្តម្ភមួយនៃវិស័យហិរញ្ញវត្ថុ នៅក្នុងយុទ្ធសាស្ត្រអភិវឌ្ឍន៍វិស័យហិរញ្ញវត្ថុសម្រាប់ឆ្នាំ2016-2025 ដែលក្នុងនោះសកម្មភាពអាទិភាពចម្បងៗមួយចំនួនត្រូវបានដាក់ចេញយ៉ាងច្បាស់ ដូចជាការលើកកម្ពស់បរិស្ថាន បទប្បញ្ញត្តិកាន់តែប្រសើរ ការពង្រឹងយន្តការគ្រប់គ្រង និងត្រួតពិនិត្យទីផ្សារឱ្យកាន់តែមានស្តង់ដារខ្ពស់ ស្របតាមភាពចាំបាច់នៃការអភិវឌ្ឍទីផ្សារធានារ៉ាប់រងនៅកម្ពុជា។

ឯកឧត្តម ងី តាយី រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ និងជាប្រធានក្រុមប្រឹក្សាគណនេយ្យជាតិ បានជំរុញគ្រឹះស្ថានធានារ៉ាប់រងនានាឱ្យបង្កើនការយល់ដឹងដល់សាធារណជន និងពង្រីកទីផ្សារធានារ៉ាប់រងតាមរយៈការជំរុញការផ្សព្វផ្សាយអំពីអត្ថប្រយោជន៍នៃការធានារ៉ាប់រងជូនប្រជាពលរដ្ឋ និងការលើកកម្ពស់សមត្ថភាពវិជ្ជាជីវៈ ទាំងនិយតករ ទាំងប្រតិបត្តិករ។

ឯកឧត្តមក៏បានលើកទឹកចិត្ដដល់គ្រឹះស្ថានធានារ៉ាប់រងទាំងអស់ឱ្យបង្កើនការគាំទ្រ និងចូលរួមចំណែកដល់ការលើកកម្ពស់សមត្ថភាពវិជ្ជាជីវៈរបស់បុគ្គលិកជំនាញរបស់ខ្លួនឱ្យបានកាន់តែច្រើន ដែលនេះជាកត្តាគន្លឹះមួយដែលមិនត្រឹមតែនាំទៅរកភាពជោគជ័យនៃធុរកិច្ចរបស់គ្រឹះស្ថានធានារ៉ាប់រងនីមួយៗប៉ុណ្ណោះទេ ប៉ុន្តែថែមទាំងផ្ដល់នូវមូលដ្ឋានរឹងមាំសម្រាប់ការអភិវឌ្ឍទីផ្សារធានារ៉ាប់រង ប្រកបដោយចីរភាព និងជំរុញអានុភាពនៃប្រព័ន្ធសេដ្ឋកិច្ចកម្ពុជាដែលមិនគាំទ្រដល់កំណើននៃសេដ្ឋកិច្ចជាតិ។

លោក យក់ ចំរើនរិទ្ធិ អគ្គនាយកក្រុមហ៊ុនធានារ៉ាប់រងហ្វ័រតេ បានប្រាប់ឡារ៉ែនពាណិជ្ជថា ការអនុវត្តស្តង់ដាគណនេយ្យ IFRS 17(International Financial Report section)version17 ក្នុងវិស័យធានារ៉ាប់រងនៅកម្ពុជា ជាកម្មវិធីថ្មីមួយសម្រាប់កម្ពុជា ព្រោះជាស្តង់ដាបាយការណ៍ហិរញ្ញវត្ថុខ្នាតអន្តរជាតិដែលទើបកែសម្រួល។

លោកអគ្គនាយកបានបន្តថា កាលណាក្រុមហ៊ុនធានារ៉ាប់រង និងធនាគារដែលបានទទួលស្គាល់ឬអនុវត្តស្តង់ដាគណនេយ្យ IFRS 17 ក្រុមហ៊ុនធានារ៉ាប់រងនោះនឹងមានលក្ខណៈស្តង់ដាអន្តរជាតិផ្នែកហិរញ្ញវត្ថុទាំងអស់ ដូចនេះមិនអាចក្លែងបន្លំ ឬបំភ័ន្តចំណុចណាមួយនៃហិរញ្ញវត្ថុក្រុមហ៊ុនបានឡើយ។ ឧទាហរណ៍ ដូចជាក្រុមហ៊ុនអសោធនភាព បានន័យថា ក្រុមហ៊ុនខ្វះធន គឺវាចេញបង្ហាញនៅក្នុងរបាយការណ៍នោះតែម្តង។

លោក ចំរើនឫទ្ធិ បានពន្យល់ថា៖“ការអនុវត្តស្តង់ដាបាយការណ៍គណនេយ្យអន្តរជាតិ IFRS 17 ក្នុងវិស័យធានារ៉ាប់រងវាផ្តល់ផលប្រយោជន៍ ព្រោះវាជាស្តង់ដានៃរង្វាស់រង្វាល់ខាងផ្នែកហិរញ្ញវត្ថុក្រុមហ៊ុនធានារា់ប់រងថា តើក្រុមហ៊ុននោះមានតាមស្តង់ដាអន្តរជាតិដែរឬអត់? ព្រោះសព្វថ្ងៃអ្វីដែលយើងនៅប្រើនៅឡើយ គឺស្តង់ដាគណនេយ្យកម្ពុជាដែលកម្មវិធីនេះមិនទាន់លម្អិតពីបញ្ហាអស់ទេ។ សព្វថ្ងៃប្រទេសជាច្រើនដែលប្រកាន់យករបបសេដ្ឋកិច្ចទីផ្សារបានប្រើប្រាស់គណនេយ្យ IFRS 17 នេះហើយ”។

លោកបានបញ្ជាក់ថា យើងបានរៀបចំប្រើប្រាស់ក្នុងឆ្នាំនេះ តែវាអាចនឹងមានផលប៉ះពាល់ដល់ក្រុម-ហ៊ុនមួយចំនួនដែលពុំទាន់បានត្រៀមខ្លួន ដូច្នេះដើម្បីឱ្យក្រុមហ៊ុនធានារ៉ាប់រងទាំងអស់ដែលនៅប្រើស្តង់ដាគណនេយ្យកម្ពុជាកែសម្រួលមកប្រើស្តង់ដាថ្មី គួរតែងាកមកប្រើគណនេយ្យ IFRS 17នេះ តែវាក៏អាចប៉ះពាល់ដល់របាយការណ៍ហិរញ្ញវត្ថុរបស់គាត់ដែរ។

លោក ហ៊ុយ វ៉ាថារ៉ូ ប្រធានសមាគមធានារ៉ាប់រងកម្ពុជា បានមានប្រសាសន៍ថា ផលប៉ះពាល់នៃការអនុវត្តស្តង់ដាគណនេយ្យ IFRS 17 ក្នុងវិស័យធានារ៉ាប់រងនៅកម្ពុជា ត្រូវបានចាត់ទុកថាជាបញ្ហាចម្បងដែលបានលើកឡើងនៅក្នុងសិក្ខាសាលាស្ដីពី ការអនុវត្តស្តង់ដាគណនេយ្យ IFRS 17 ក្នុងគោលបំណងដើម្បីចែករំលែកព័ត៌មាន ចំណេះដឹង និងបញ្ហាប្រឈមនៃការអនុវត្តស្តង់ដាថ្មីនេះ ព្រមទាំងផលប៉ះពាល់ដែលអាចកើតមានឡើងសម្រាប់ជាមូលដ្ឋានជួយដល់ក្រុមហ៊ុនធានារ៉ាប់រងទាំងអស់ឱ្យត្រៀមរៀបចំខ្លួនអនុវត្តឱ្យបានរលូន។

លោកប្រធានសមាគមបានបញ្ជាក់បន្ថែមថាវិស័យធានារ៉ាប់រងនៅកម្ពុជាមានការរីកចម្រើនយ៉ាងខ្លាំង និងជាវិស័យដែលកំពុងទទួលបាននូវទំនុកចិត្តកាន់តែខ្លាំងពីសាធារណជនលើការ-ធានារ៉ាប់រងអាយុជីវិត និងទ្រព្យសម្បត្តិ ជាពិសេសទំនុកចិត្តចំពោះក្រុមហ៊ុនធានារ៉ាប់រងនីមួយៗក្នុងការផ្តល់សេវា និងអត្ថប្រយោជន៍ធានារ៉ាប់រង ជូនអតិថិជនប្រកបដោយតម្លាភាព និងគណនេយ្យភាព។

លោកក៏បានលើកឡើងដែរថា ភាពជឿនលឿនគួរឱ្យកត់សម្គាល់នៃទីផ្សារធានារ៉ាប់រងកម្ពុជា ក្នុងរយៈពេល 3ឆ្នាំចុងក្រោយនេះ(2014-2017) ក្នុងនោះចំនួនក្រុមហ៊ុនធានារ៉ាប់រងមានការកើនឡើងជាង 2ដង គឺកើនពី 12ក្រុមហ៊ុននៅឆ្នាំ2014 ទៅ26ក្រុមហ៊ុននៅឆ្នាំ2017។ បុព្វលាភសរុបនៃទីផ្សារធានារ៉ាប់រងក៏បានកើនឡើងជាទ្វេដងផងដែរ ពោលគឺក្នុងរយៈពេលនេះបានកើនពី 61លានដុល្លារនៅឆ្នាំ2014 ដល់ប្រមាណ 152,5លានដុល្លារនៅឆ្នាំ2017៕

February 5, 2019

អ្នកវិភាគសេដ្ឋកិច្ចជំរុញឱ្យប្រជាជនវ័យក្មេងចេះចាត់ចែងប្រាក់ចំណូលដែលខ្លួនមាន

បច្ចុប្បន្ននេះដោយសារតែការទិញផ្ទះ និងសម្ភារទំនើបៗកាន់តែមានភាពងាយស្រួលឡើង ប្រជាជនខ្មែរជាច្រើន ជាពិសេសអ្នកទើបបង្កើតគ្រួសារថ្មីអាចទិញផ្ទះថ្លៃៗ និងឧបករណ៍ប្រើប្រាស់ទំនើបៗប្រើប្រាស់បានយ៉ាងងាយ បើទោះបីជាមិនចាំបាច់មានលុយគ្រប់ក៏ដោយ។ ការទិញសម្ភារបង់រំលស់នេះ ពេលខ្លះត្រូវបានគេមើលឃើញថា ជានិន្នាការវិជ្ជមានមួយសម្រាប់ប្រជាជនដែលមានចំណូលមធ្យមដើម្បីទទួលបានលំនៅឋានសមរម្យ និងការរស់នៅល្អប្រសើរ តែសម្រាប់អ្នកវិភាគសេដ្ឋកិច្ចខ្លះយល់ឃើញថា វាអាចធ្វើឱ្យអ្នកទិញបាត់បង់ឱកាសក្នុងការអភិវឌ្ឍខ្លួនឱ្យក្លាយជាសហគ្រិនប្រសិនបើទិញដោយមិនពិចារណាឱ្យបានច្បាស់លាស់។

លោក ង៉ែត ជូ អ្នកសេដ្ឋកិច្ច និងជាទីប្រឹក្សាជាន់ខ្ពស់នៃក្រុមហ៊ុនប្រឹក្សាយោបល់វិនិយោគ បានបញ្ជាក់ថា យុវជន ឬអ្នកធ្វើការងារដែលមានចំណូលមធ្យមគួរចាប់ផ្តើមមើលពីឱកាសក្នុងការបង្កើនប្រាក់ចំណូលអកម្មឱ្យបានច្រើន ជាជាងការទិញសម្ភារប្រើប្រាស់ទំនើបៗដែលហួសពីលទ្ធភាពខ្លាំងពេក។ លោកបានបញ្ជាក់ថា មេរៀនពិតជាក់ស្តែងមួយដែលប្រជាជនមិនគួរមើលរំលង គឺយើងគួរមើលពីស្ថានភាពរបស់ប្រជាជននៃប្រទេសសិង្ហបុរី ដែលជាប្រទេសមាន GDP រាប់ម៉ឺនដុល្លារសម្រាប់មនុស្សម្នាក់ៗ តែមនុស្សតចាស់នៅប្រទេសនេះត្រូវធ្វើការងារច្រើនក្រោយចូលនិវត្តន៍ ព្រោះបើឈប់ធ្វើការងារ ពួកគេនឹងបាត់បង់ប្រភពហិរញ្ញវត្ថុភ្លាមតែម្ដង។ សម្រាប់កម្ពុជាត្រូវបានគេរកឃើញថា មានមនុស្សតិចណាស់ដែលមានទម្លាប់សន្សំប្រាក់ និងមានសេរីភាពហិរញ្ញវត្ថុ ហេតុនេះហើយទើបពួកគេត្រូវធ្វើការងារច្រើន និងយូរ បើទោះបីជាពួកគេមានចំណូលច្រើនគួរសមក៏ដោយ ព្រោះបញ្ហាត្រង់ថាចំណូលច្រើន តែចំណាយក៏ច្រើនដូចគ្នា។

លោក ង៉ែត ជូ បាននិយាយថា៖ “មុននឹងទិញផ្ទះបង់រំលស់ អ្នកទាំងអស់គ្នាគួរគិតឱ្យច្បាស់សិនថាតើយើងអាចមានលទ្ធភាពបង់រំលស់ត្រឹមកម្រិតណា។ មានអ្នកខ្លះចាប់ផ្តើមបង់រំលស់ផ្ទះនៅអាយុក្បែរ 30ឆ្នាំ បើគិតទៅទម្រាំបង់ផ្ទះអស់ ត្រូវចំណាយពេល 17ឆ្នាំ។ ពេលនោះគាត់មានអាយុក្បែរនឹង50ឆ្នាំទៅហើយ វាអាចហួសពេលសម្រាប់ការកសាងមុខជំនួញ”។

អ្នកវិភាគសេដ្ឋកិច្ចខាងលើបានលើកឡើងផងដែរថា មានអ្នកខ្លះគាត់ចូលចិត្តទិញផ្ទះបង់រំលស់ក្នុងតម្លៃថ្លៃ ហើយស្របពេលនោះគាត់យកលុយសេសសល់ពីការបង់លើផ្ទះទាំងប៉ុន្មាន ទៅបង់រំលស់សម្ភារទំនើបផ្សេងៗទៀត ដូចជាទូរស័ព្ទដៃទំនើប និងរថយន្តទំនើបជាដើម ដែលធ្វើឱ្យគាត់បន្តជំពាក់គេពេញមួយជីវិត។ ស្ថានភាពបែបនេះមិនល្អនោះទេសម្រាប់មនុស្សម្នាក់ៗ ព្រោះពេលយើងឈឺ ឬមានបញ្ហាត្រូវដោះស្រាយបន្ទាន់ យើងមិនមានលទ្ធភាពគ្រប់គ្រាន់សម្រាប់ទ្រទ្រង់ស្ថានភាពលំបាកទាំងអស់នោះដែលធ្វើឱ្យយើងលំបាកខ្លាំងនោះឡើយ។

ជាដំណោះស្រាយ លោក ង៉ែត ជូ ជំរុញឱ្យប្រជាជនត្រូវពិចារណាក្នុងការសន្សំសំចៃឱ្យបានច្រើនជាងការចំណាយធំហួសមាឌ។ ការទិញផ្ទះ គួរទិញផ្ទះតូចល្មមតាមតម្រូវការ កុំឱ្យជំពាក់គេយូរពេកហើយសម្ភារទំនើប គួរទិញប្រើប្រាស់ក្រោយពេលដែលយើងមានលទ្ធភាពគ្រប់គ្រាន់ កុំបង្ខំពេក។ ពេលខ្លះមនុស្សមួយចំនួនមើលឃើញគិតថា អ្នកដែលមានសម្ភារទំនើបៗ និងផ្ទះល្អៗទាំងនោះកំពុងរស់នៅយ៉ាងល្អប្រសើរ តែបើពិនិត្យមើលទៅលើស្ថានភាពហិរញ្ញវត្ថុរបស់គាត់វិញ គាត់អាចមានបញ្ហាច្រើនណាស់ដែលយើងមិនបានដឹង ព្រោះការបង់រំលស់ឧបករណ៍ខ្លះ ដូចជាឧបករណ៍អេឡិចត្រូនិក និងរថយន្ត គឺមានការប្រាក់ខ្ពស់ដែលធ្វើឱ្យគាត់ត្រូវប្រើប្រាស់ចំណូលប្រចាំថ្ងៃទៅចិញ្ចឹមរបស់ទាំងអស់នោះ។

លោក ង៉ែត ជូ បានបន្ថែមផងដែរថា ប្រសិនបើចង់ទទួលបានសេរីភាពហិរញ្ញវត្ថុ មនុស្សម្នាក់ៗគួរព្យាយាមកាត់បន្ថយការចំណាយ ហើយសន្សំចំណូលទុកដើម្បីបង្កើនចំណូលអកម្ម ដូចជាចំណូលពីអចលនទ្រព្យ និងពីការវិនិយោគ ឬអាជីវកម្មជាដើម ដើម្បីធានាថា យើងអាចរស់នៅដោយសុខស្រួល ហើយមិនខ្វល់ខ្លាំងពីបញ្ហាហិរញ្ញវត្ថុ។ ចំណូលដែលបានមកពីអចលនទ្រព្យ គឺមានដូចជាការជួលផ្ទះ ជួលបន្ទប់ ជួលឃ្លាំង ឬជួលដីដែលយើងបានយកលុយសន្សំទៅទិញ។ ចំពោះចំណូលពីការវិនិយោគ ឬអាជីវកម្ម យើងអាចទទួលបានពីការដាក់ទុនជាមួយក្រុមហ៊ុននានា ការដាក់លុយចូលហ៊ុនជាមួយក្រុមវិនិយោគ ឬដាក់ក្នុងធនាគារ និងការប្រើប្រាស់លុយដើម្បីរកលុយជាច្រើនផ្សេងទៀត ដូចជាការចងការប្រាក់ ឬទិញបណ្ណភាគហ៊ុនជាដើម ដែលវាអាចធ្វើឱ្យយើងទទួលបានថវិកាបើទោះបីជាមិនបាច់ធ្វើការក៏ដោយ។ នៅពេលយើងមានស្ថានភាពហិរញ្ញវត្ថុល្អប្រសើរហើយ ពេលនោះគឺជាពេលដែលយើងចាប់ផ្តើមយកពេលវេលាមកគិតគូរពីការរកស៊ីវិញម្តង នេះហើយដែលជាហេតុធ្វើឱ្យអ្នកមាន ចេះតែមានទៅ ឯអ្នកធ្វើការឱ្យគេខ្លះ នៅតែធ្វើការឱ្យគេតទៀតជាយូរអង្វែងនោះ៕

February 5, 2019

Author: ធឿន មករា