ធឿន មករា - La Reine Media

ផ្លែក្រូចពោធិ៍សាត់ចង់ស្វែងរកការក្លាយជាផ្លែឈើសម្គាល់ភូមិសាស្ត្រ

ជាមួយនឹងការសិក្សាមួយដែលកំពុងត្រូវបានអនុវត្តនាពេលបច្ចុប្បន្នដើម្បីកំណត់ថា តើពួកគេសមនឹងទទួលបានការកំណត់ ឬយ៉ាងណានោះ ផ្លែក្រូចពោធិ៍សាត់ដែលបានដាំដុះនៅខេត្តពោធិ៍សាត់ និងខេត្តបាត់ដំបងអាចនឹងក្លាយជាផលិតផលកសិកម្មកម្ពុជាបន្ទាប់ ដើម្បីទទួលបាននូវចំណាត់ថ្នាក់ជាផ្លែឈើសម្គាល់ភូមិសាស្ដ្រ (Geographical Indication ឬ GI)។

ក្រុមអ្នកឯកទេសបាននិយាយថា ការទទួលបានផ្លាកសញ្ញា GI នឹងអាចការពារកេរ្តិ៍ឈ្មោះ និងរសជាតិរបស់ផលិតផលផ្លែក្រូច ខណៈដែលផ្លែក្រូចពោធិ៍សាត់នេះត្រូវបានដាំដុះយ៉ាងច្រើននៅភាគខាងលិចនៃប្រទេសនៅក្នុងខេត្តពោធិ៍សាត់ និងខេត្តបាត់ដំបងដែលបានជួយបង្កើនប្រាក់ចំណូលដ៏ច្រើនដល់កសិករដែលបានដាំដំណាំនេះ។

ចំពោះបំណងនេះក្រសួងពាណិជ្ជកម្ម និងអ្នកដាំដុះដំណាំក្រូចកំពុងពិចារណាលើការបង្កើតជាសមាគមមួយឈ្មោះថា “សមាគមផ្លែក្រូចពោធិ៍សាត់ – បាត់ដំបង” ហើយសង្ឃឹមថា នឹងទទួលបានជាផ្លែឈើចុះបញ្ជីផលិតផល GI។

តាមពិតផលិតផលទាំងអស់នេះមានសក្តានុពល ប៉ុន្តែពួកគេមិនដឹងថា តើក្រសួងពាណិជ្ជកម្មនឹងគាំទ្របេក្ខភាពសម្រាប់ GI ដែរឬទេ?។ ជាអាទិភាពសមាគមនេះត្រូវសិក្សាពីលទ្ធភាពដែលពួកគេកំពុងធ្វើ។ ដោយសារកេរ្តិ៍ឈ្មោះនៃផ្លែក្រូច និងការគាំទ្រពីក្រសួងពាណិជ្ជកម្ម ក្រូចពោធិ៍សាត់ដែលដាំដុះនៅពោធិ៍សាត់ និងបាត់ដំបង គឺអាចនឹងក្លាយជាបេក្ខជនដ៏ខ្លាំងក្លាក្នុងការទទួលបានការចុះបញ្ជីជាផលិតផល GI នេះ។ អ្នកឯកទេសស្តង់ដាគុណភាពផលិតផលកសិកម្មបានឱ្យដឹងថាអង្គការកម្មសិទ្ធិបញ្ញាពិភពលោក the World Intellectual Property Organisation (WIPO) ទំនងជាគាំទ្រដល់កិច្ចខិតខំប្រឹងប្រែងរបស់ក្រសួងការបរទេសផងដែរដើម្បីទទួលបានវិញ្ញាបនបត្រ GI សម្រាប់ផ្លែឈើកម្ពុជា។

លោក ឡាយ វិសិដ្ឋ ប្រធានមន្ទីរកសិកម្ម ខេត្តពោធិ៍សាត់បានមានប្រសាសន៍ប្រាប់កាសែតឡារ៉ែនថា៖ “កាលពីអំឡុងខែមុន មានការធ្វើសិក្ខាសាលាមួយរបស់កសិករអ្នកដាំដំណាំក្រូចពោធិ៍សាត់ និងបាត់ដំបង ដោយមានការអញ្ជើញពីក្រុមអ្នកផលិត និងជាសមាគមចាស់មួយ។ សមាគមនោះចង់ផ្លាស់ឈ្មោះតែមិនអាចធ្វើការសម្រេចចិត្តលើការចុះឈ្មោះផលិតផលក្រូចពោធិ៍សាត់បានទេ”។

លោកប្រធានមន្ទីរបានឱ្យដឹងថា៖ ក្រូចរបស់យើងមានរសជាតិផ្អែមឆ្ងាញ់ និងទទួលបានផលប្រយោជន៍ពីការរីកចម្រើនដ៏ធំដោយសារគ្មានសារធាតុគីមី ដោយបច្ចុប្បន្ននៅក្នុងខេត្តពោធិ៍សាត់យើងមានចម្ការក្រូចប្រមាណជា 5,000 ហិកតាដែលកំពុងទទួលផល។លោកវិសិដ្ឋបានបញ្ជាក់ថា “ប្រសិនបើការទទួលបានវិញ្ញាបនបត្រ GI ផលិតផលក្រូចពោធិ៍សាត់នឹងជួយលើកកម្ពស់កេរ្តិ៍ឈ្មោះរបស់ផ្លែក្រូចខ្មែរយើងនៅបរទេស ទោះបីជាផ្លែក្រូចរបស់យើងភាគច្រើនត្រូវបានគេលក់ដូរតែនៅក្នុងស្រុកក៏ពិតមែន តែយើងក៏បាននាំចេញទៅប្រទេសថៃខ្លះៗដែរ”។

លោក ឡាយ វិសិដ្ឋ បានមានប្រសាសន៍ទៀតថា៖ “បញ្ហាប្រឈមធំបំផុតក្នុងការទទួលបានការចុះបញ្ជី GI នេះ គឺត្រូវសម្រេចលើឈ្មោះដែលត្រូវប្រើដើម្បីចុះបញ្ជីជាមុនសិន”។ លោកបានបន្តថា ក្នុងអំឡុងពេលសិក្ខាសាលាជាមួយអ្នកដាំក្រូចពោធិ៍សាត់ និងបាត់ដំបងកាលពីខែមុន ពួកគេមិនទាន់អាចធ្វើការសម្រេចចិត្តលើឈ្មោះផលិតផលនេះបាននៅឡើយ ព្រោះអ្នកដាំក្រូចមកពីខេត្តពោធិ៍សាត់ទាមទារថា គួរតែដាក់ឈ្មោះថា“ក្រូចពោធិ៍សាត់”ខណៈដែលអ្នកដាំមកពីខេត្តបាត់ដំបងចង់ហៅថា“ផ្លែក្រូចពោធិ៍សាត់-បាត់ដំបង”។ លោកបានបន្ថែមថា ការសម្រេចចិត្តចុងក្រោយនៅលើប្រធានបទនេះនឹងធ្វើឡើងដោយក្រសួងពាណិជ្ជកម្ម”។

ឯកឧត្តម ស៊ាង ថៃ អនុរដ្ឋលេខាធិការក្រសួងពាណិជ្ជកម្មបានប្រាប់ឡារ៉ែនថា៖ “លោកសុំបញ្ជាក់ជូនថា ការសុំចុះបញ្ជីនេះទាល់តែមានគ្រប់លក្ខខណ្ឌដែលគេបានកំណត់យ៉ាងត្រឹមត្រូវ មិនមែនគ្រាន់តែដាក់ពាក្យស្នើសុំ ហើយគេចុះបញ្ជីឱ្យទេ។ ឧទាហរណ៍ដូចជាម្រេចកំពត ដែលយើងបានចុះGIហើយ ក្រូចថ្លុងកោះទ្រង់ខេត្តក្រចេះ ស្ករត្នោតខេត្តកំពង់ស្ពឺដែលក្រសួងផ្តល់GI នោះ សុទ្ធតែមានភា្ជប់លក្ខខណ្ឌទាំងអស់”។

ឯកឧត្តមអនុរដ្ឋលេខាបានបញ្ជាក់ដែរថា ដូច្នេះក្រូចពោធិ៍សាត់ដែលគាត់នឹងដាក់មកក្រសួងនេះត្រូវកំណត់ថា វាស្ថិតនៅភូមិសាស្ត្រតំបន់ណា ខេត្តណា ជាលក្ខណៈបច្ចេកទេសដែលត្រូវការសិក្សាវិភាគពីស្ថានភាពដី និងទីតាំងតំបន់ជាដើម។ តែមកដល់ពេលនេះក្រសួងពុំទាន់បានទទួលពាក្យសុំពីសមាគមដែលមានគម្រោងស្នើសុំនោះនៅឡើយទេ៕

February 20, 2019

អាជ្ញាធរខេត្តកណ្តាលប្រកាសឱ្យទប់ស្កាត់ការពុះដីឡូត៍ដែលមិនគោរពច្បាប់

ដើម្បីកុំឱ្យអតិថិជនជួបបញ្ហាផ្នែកផ្លូវច្បាប់ទៅថ្ងៃខាងមុខ អាជ្ញាធរខេត្តកណ្តាលបានប្រកាសស្នើឱ្យអ្នកវិនិយោគពុះដីឡូត៍លក់ និងសាងសង់ផ្ទះលក់ទាំងអស់ត្រូវតែអនុវត្តតាមគោលការណ៍ច្បាប់ ហើយក្នុងករណីមិនគោរពច្បាប់ អាជ្ញាធរនឹងមិនធ្វើការចុះហត្ថលេខាផ្ទេរកម្មសិទ្ធិជូនឡើយ។

យោងតាមឯកសារដែលទើបចុះហត្ថលេខាកាលពីពេលថ្មីៗ ដោយឯកឧត្តមបណ្ឌិត ម៉ៅ ភិរុណ អភិបាលនៃគណៈអភិបាលខេត្តកណ្តាលដែលបានជម្រាបទៅអាជ្ញាធរស្រុក និងឃុំដែលមានខ្លឹមសារថា បច្ចុប្បន្ននេះខេត្តកណ្តាលបាននិងកំពុងមានការអភិវឌ្ឍ និងរីកចម្រើនយ៉ាងខ្លាំងលើផ្នែកសេដ្ឋកិច្ច ជាពិសេសលើវិស័យដីធ្លី និងសំណង់ ជាមួយគ្នានៃដំណើការលូតលាស់យ៉ាងប្រសើរនេះ វាក៏បាននិងកំពុងមានបញ្ហាប្រឈមយ៉ាងធ្ងន់ធ្ងរដែរ ជុំវិញអាជីវកម្មលើដីធ្លីដោយការពុះជាឡូត៍លក់ ឬសាងសង់សំណង់ផ្ទះសំបែងជាច្រើនកន្លែងដែលពុំមានច្បាប់ត្រឹមត្រូវ។

ការពុះដីជាឡូត៍ ឬសាងសង់សំណង់ផ្ទះសំបែងមិនត្រឹមត្រូវនេះមានដូចជា ពុះដីជាឡូត៍លក់ដោយមិនកាត់ឈ្មោះ និងមិនធ្វើប្លង់បំបែកក្បាលដីជូនអ្នកទិញឱ្យបានស្របច្បាប់ ដោយពេលខ្លះអ្នកពុះដីឡូត៍លក់នោះ មិនមានប្លង់កម្មសិទ្ធិខ្លួនឯងត្រឹមត្រូវ និងលក់ដីឡូត៍ដែលមិនស្របច្បាប់ទៅឱ្យអ្នកទិញ ហើយអ្នកពុះដីឡូត៍លក់ ឬសាងសង់ផ្ទះដោយគ្មានច្បាប់អនុញ្ញាតពីអាជ្ញាធរ និងអង្គភាពពាក់ព័ន្ធត្រឹមត្រូវមួយចំនួនបានបង្កទៅជាការពុះដីឡូត៍លក់ និងសាងសង់ដោយអនាធិបតេយ្យដោយមិនបានគោរពតាមប្លង់គោល(ប្លងមេ) នៃផែនការប្រើប្រាស់ដី និងបទប្បញ្ញត្តិនគរូបនីយកម្មឱ្យបានត្រឹមត្រូវឡើយ។

ដើម្បីពង្រឹងគុណភាពនៃការប្រើប្រាស់ដីធ្លី ការគ្រប់គ្រងដីធ្លី និងសំណង់ឱ្យប្រកបដោយប្រសិទ្ធភាព និងសុវត្ថិភាពខ្ពស់ សូមអាជ្ញាធរពាក់ព័ន្ធត្រូវមានវិធានការទប់ស្កាត់ឱ្យបានល្អ និងរាយការណ៍ពីស្ថានភាពបទល្មើសជាក់ស្តែងឱ្យបានទាន់ពេលវេលា។ ក្រៅពីនេះត្រូវធ្វើការផ្សព្វផ្សាយជូនដំណឹង និងណែនាំឱ្យបានច្បាស់លាស់ដល់អ្នកដែលមានបំណង ឬអ្នកកំពុងពុះដីឡូត៍ ឬសាងសង់សំណង់ផ្ទះសំបែងដើម្បីលក់ ជួល ឬសម្រាប់រស់នៅដោយខ្លួនឯងនៅក្នុងមូលដ្ឋានរបស់ខ្លួន ចាំបាច់ត្រូវគោរពតាមគោលការណ៍មួយចំនួនដូចជា 1.ត្រូវសុំច្បាប់អនុញ្ញាតជាមុនសិន មុននឹងសាងសង់សំណង់ ឬធ្វើការពុះដីឡូត៍របស់ខ្លួនដើម្បីលក់ ឬដោះដូរ។ ចំពោះនីតិវិធី ឬបែបបទនៃការសុំច្បាប់អនុញ្ញាត ម្ចាស់សំណើត្រូវមកទាក់ទងជាមួយការិយាល័យច្រកចេញចូលតែមួយ ចំណុះមន្ទីររៀបចំដែនដីនគរូបនីយកម្ម សំណង់ និងសុរិយោដីខេត្ត ឬអង្គភាពចំណុះស្ថិតក្នុងដែនសមត្ថកិច្ចទទួលខុសត្រូវ ដោយយោងតាមលក្ខណៈនៃករណីដីធ្លីជាក់ស្តែង ដើម្បីរៀបចំសុំការអនុញ្ញាតច្បាប់ឱ្យបានត្រឹមត្រូវ។ 2.ដាច់ខាតត្រូវបិទស្លាក ឬដាក់តាំងបង្ហាញឱ្យបានច្បាស់លាស់អំពីទីតាំងដីឡូត៍នៅលើទីតាំងដី-ផ្ទះជាក់ស្តែង និងនៅការិយាល័យលក់ដី ឬការដ្ឋានតែម្តងនូវឯកសារស្របច្បាប់ ដែលបានទទួលការអនុញ្ញាតឱ្យពុះដីឡូត៍លក់ ឬសាងសង់។ 3. ត្រូវប្រគល់ជូនអតិថិជននូវឯកសារបញ្ជាក់ចម្លងពីច្បាប់ដើមនៃលិខិតអនុញ្ញាតស្របច្បាប់ពីអង្គភាពទទួលខុសត្រូវឱ្យពុះដីឡូត៍លក់ ឬឱ្យសាងសង់នៅលើដី ឬផ្ទះនោះ ដូចជាអាជ្ញាប័ណ្ណ ឬលិខិតអនុញ្ញាតច្បាប់ និងបណ្ណ-កម្មសិទ្ធិដីធ្លី ព្រមទាំងលិខិតស្នាម ឬឯកសារពាក់ព័ន្ធចាំបាច់ផ្សេងៗទៀត។

លោក នឹម នីរ៉ាដេត អភិបាលស្រុកអង្គស្នួល ខេត្តកណ្តាល ជាទីតាំងជាយក្រុងដែលកំពុងមានសកម្មភាពពុះដីឡូត៍លក់យ៉ាងផុលផុសនោះបានមានប្រសាសន៍ថា កន្លងមកមិនមានករណីពុះដីឡូត៍លក់ខុសច្បាប់នោះទេ គ្រាន់តែថា ម្ចាស់ដីឡូត៍មួយចំនួន គាត់ពុះដីខ្លួនឯងច្រៀកជាឡូត៍ដោយវាស់ម៉ែត្រខ្លួនឯង ហើយយកឯកសារមកឱ្យសាលាស្រុកចុះហត្ថលេខាទទួលស្គាល់ ដូច្នេះស្រុកមិនហ៊ានចុះហត្ថលេខាទទួលស្គាល់នោះទេ ដែលការណ៍នេះតម្រូវឱ្យអ្នកពុះដីឡូត៍ត្រូវសុំច្បាប់អនុញ្ញាតជាមុន ហើយស្រុកនឹងបញ្ជូនមន្ត្រីសុរិយោដីឱ្យចុះទៅពិនិត្យនិយាមការបាញ់ប្លង់ដោយបច្ចេកទេសប្រព័ន្ធGPS ដើម្បីឱ្យការពុះដីជាឡូត៍នោះមានភាពសុក្រឹតតាមស្តង់ដារច្បាប់ច្បាស់លាស់។ លោកបន្តថា សម្រាប់ការិយាល័យភូមិបាលស្រុកមានសមត្ថកិច្ចផ្តល់ច្បាប់អនុញ្ញាតត្រឹម5,000ម៉ែត្រការ៉េចុះក្រោម ចំណែកខេត្តមានសមត្ថកិច្ចផ្តល់ច្បាប់អនុញ្ញាតត្រឹម 30,000 ម៉ែត្រការ៉េចុះក្រោម លើសពីនេះត្រូវសុំច្បាប់អនុញ្ញាតពីក្រសួង។ ជាមួយគ្នានេះដែរ លោកស្នើសុំឱ្យអ្នកពុះដីឡូត៍ ឬសាងសង់សំណង់ផ្ទះលក់ ត្រូវគោរពអនុក្រឹត្យនៃការអភិវឌ្ឍដី ពិសេសដីឡូត៍ទំហំធំលើសពី5ហិកតាឡើងទៅ ត្រូវធ្វើសួនច្បារ និងមានផ្លូវធំទូលាយ ជាពិសេសត្រូវទុកផ្លូវនៅចំច្រកឌឿងហែមឱ្យបានធំទូលាយងាយស្រួលក្នុងការធ្វើចរាចរណ៍ផ្សេងៗផង។

រាល់ករណីដែលអ្នកប្រើប្រាស់ដីប្រព្រឹត្តល្មើសខុសពីការណែនាំខាងលើ ឬធ្វើការធ្វេសប្រហែសដោយមិនយកចិត្តទុកដាក់ ឬការឱ្យដៃពីសំណាក់អាជ្ញាធរ ឬអង្គភាពពាក់ព័ន្ធណាមួយជាមួយនឹងម្ចាស់ដី ឬអ្នកទទួលសិទ្ធិប្រើប្រាស់ដីក្នុងការពុះដីឡូត៍លក់ ឬសាងសង់សំណង់លំនៅឋានដោយមិនស្របច្បាប់នោះ នឹងត្រូវចាត់វិធានការពិន័យ ឬទទួលទោសតាមច្បាប់ជាធរមាន។

លោក ភឿង ប៊ន អ្នកពុះដីឡូត៍លក់នៅស្រុកអង្គស្នួលមានប្រសាសន៍គាំទ្រទៅនឹងសេចក្តីប្រកាសណែនាំរបស់អាជ្ញាធរខេត្តក៏ដូចជាស្រុក-ខណ្ឌដែរដោយលោកអះអាងថា ការប្រកាសរឹតបន្តឹងច្បាប់នេះធ្វើឡើងក្នុងគោលការណ៍ការពារច្បាប់ទាំងសងខាង ទាំងអ្នកលក់ និងអ្នកទិញ ចៀសវាងបង្កបញ្ហាទៅថ្ងៃអនាគត៕

February 18, 2019

Mertens ជម្នះលើបញ្ហាឈឺខ្នង ដើម្បីផ្តួល Halep ឈ្នះពាន Qatar Open

កីឡាការិនីវាយកូនបាល់ Elise Mertens របស់បែលហ្ស៊ិកបានកត់ត្រាជ័យជម្នះដ៏ធំបំផុតនៃអាជីពរបស់នាងកាលពីថ្ងៃសៅរ៍ដោយបានបង្កើតភាពភ្ញាក់ផ្អើលដ៏គួរឱ្យកត់សម្គាល់ដោយការផ្តួលកីឡាការិនីមានចំណាត់ថ្នាក់លេខ3ក្នុងពិភពលោក Simona Halep និងឈ្នះពាន Qatar Open។

កីឡាការិនីមានចំណាត់ថ្នាក់លេខ21 ក្នុងពិភពលោករូបនេះ បានទទួលជ័យជម្នះក្នុងលទ្ធផល 3-6, 6-4 និង6-3 និងបើទោះបីចាញ់ក្នុងសិតទី1ក៏ដោយ ប៉ុន្តែនាងបានជម្នះលើបញ្ហាឈឺសាច់ដុំខ្នង និងបានទទួលការព្យាបាលរយៈពេលតែ 8នាទី ក្នុងសិតទី2 វាយដណ្តើមយកជ័យជម្នះនេះតែម្តង។

Mertens វ័យ 23ឆ្នាំ បាននិយាយបន្ទាប់ពីចប់ការប្រកួតថា៖ «វាជាពេលវេលាដ៏ធំមួយសម្រាប់ខ្ញុំក្រោយពីដណ្តើមបានជ័យជម្នះនេះ។ ខ្ញុំគិតថា ជ័យជម្នះនេះនឹងក្លាយជាជ័យជម្នះដ៏ល្អបំផុតសម្រាប់ខ្ញុំជាពិសេសជាមួយនឹងកីឡាវាយកូនបាល់ដែលខ្ញុំបានលេង»។

ជ័យជម្នះរបស់នាង ដែលបានចំណាយពេលអស់ជាង 2ម៉ោង គឺជាជ័យជម្នះជាលើកទី3របស់នាងហើយដែលបានឈ្នះលើកីឡាការិនីមានចំណាត់ថ្នាក់កំពូលទាំង10 ក្នុងទីក្រុងដូហា នៅសប្តាហ៍នេះ និងជាជ័យជម្នះជាលើកទី2 លើម្ចាស់ជើងឯកពាន Grand Slam ម្នាក់។

Mertens បានផ្តួល Halep ដែលជាម្ចាស់ការពារតំណែងជើងឯក French Open និងកីឡាការិនី Angelique Kerber ដែលចាញ់ក្នុងវគ្គពាក់កណ្តាលផ្តាច់ព្រ័ត្រ និងជាម្ចាស់ជើងឯក Wimbledon៕

February 18, 2019

ស្របពេលវិស័យសំណង់កំពុងរីកខ្លាំង ជប៉ុនផ្តល់ឱកាសបណ្តុះបណ្តាលដល់ពលករកម្ពុជាលើផ្នែកសំណង់

កម្ពុជាជាប្រទេសដែលកំពុងមានការអភិវឌ្ឍយ៉ាងខ្លាំងលើផ្នែកសំណង់ និងអចលនវត្ថុ ដែលទាំងអស់នេះបានបង្ហាញឡើងតាមរយៈការរីកដុះដាលយ៉ាងខ្លាំងនូវសំណង់អគារខ្ពស់ៗក្នុងរាជធានីភ្នំពេញ និងគម្រោងលំនៅឋានជាច្រើននៅក្នុងទីក្រុង និងតាមបណ្តាខេត្តជាពិសេសតំបន់ប្រជុំជននានា។

ស្របពេលដែលវិស័យសំណង់កំពុងមានការរីកដុះដាលខ្លាំងនេះ សមាគមសហប្រតិបត្តិការកម្ពុជា-ជប៉ុន (Japan Cambodia Interactive Association ឬ JCIA ) បានជំរុញលើកទឹកចិត្តឱ្យក្រុមហ៊ុននៅប្រទេសជប៉ុនជួយបណ្តុះបណ្តាលពលករខ្មែរដែលកំពុងធ្វើការនៅប្រទេសជប៉ុនឱ្យមានសមត្ថភាពអនុវត្តផ្ទាល់តាមរយៈការបម្រើការងារក្នុងវិស័យសំណង់នៅជប៉ុន។

លោក Fumio Yamada ប្រធានសមាគមសហប្រតិបត្តិការកម្ពុជា-ជប៉ុន(JCIA ) បានលើកឡើងថា លោកបាននាំអ្នកវិនិយោគជប៉ុនផ្នែកសំណង់ជាច្រើនមកវិនិយោគនៅកម្ពុជា ហើយក្នុងនោះក្រុមហ៊ុនមួយចំនួនក៏បានទទួលពលករខ្មែរប្រមាណជាជាង 300នាក់រួចមកហើយដើម្បីធ្វើកម្មសិក្សាផ្នែកសំណង់នៅប្រទេសជប៉ុន។ តាមរយៈសកម្មភាពនេះលោកសង្ឃឹមថា ពលករខ្មែរដែលបានទៅធ្វើការនៅប្រទេសជប៉ុន នឹងបានសិក្សាស្វែងយល់កាន់តែច្បាស់ និងមានជំនាញពិតប្រាកដលើផ្នែកសំណង់ ដើម្បីធ្វើការអភិវឌ្ឍវិស័យដ៏មានសារៈសំខាន់នេះនៅកម្ពុជា។

លោក Fumio Yamada បានលើកឡើងផងដែរថា លោកនឹងព្យាយាមទាក់ទាញអ្នកវិនិយោគជប៉ុនថ្មីៗបន្ថែមទៀតឱ្យមកវិនិយោគនៅកម្ពុជា ជាពិសេសលើវិស័យសំណង់ដែលជាវិស័យសំខាន់មួយ និងមានតម្រូវការខ្ពស់នៅក្នុងប្រទេសកម្ពុជា។

ឯកឧត្តម អុិត សំហេង រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈបានបង្ហាញថា បច្ចុប្បន្ននេះវិស័យសំណង់នៅក្នុងប្រទេសកម្ពុជា កំពុងមានការរីកចម្រើនយ៉ាងខ្លាំង ដែលក្នុងនោះក្រុមហ៊ុនសំណង់របស់ជប៉ុនក៏បានរួមចំណែកយ៉ាងសំខាន់ក្នុងការអភិវឌ្ឍវិស័យមួយនេះផងដែរ។ កម្ពុជាកំពុងត្រូវការការវិនិយោគ និងជំរុញឱ្យមានការពង្រឹងគុណភាពកាន់តែខ្លាំង ជាពិសេសលើស្តង់ដារបច្ចេកទេសឱ្យបានហ្មត់ចត់ ដើម្បីធានាដល់សុវត្ថិភាព និងផ្នែកសំខាន់ៗជាច្រើនផ្សេងទៀត។

ឯកឧត្តម អុិត សំហេង បានមានប្រសាសន៍ថា៖ “សំណង់មិនអាចប្រហែសបាននោះទេ ព្រោះវាប៉ះពាល់ដល់ជីវិតរបស់មនុស្ស ប្រសិនបើបច្ចេកទេសមិនល្អ គឺមានហានិភ័យដល់ជីវិតរបស់មនុស្ស ដូច្នេះត្រូវតែយកចិត្តទុកដាក់ឱ្យបានខ្ពស់ក្នុងដំណើរការសាងសង់ឱ្យស្របទៅតាមស្តង់ដារ”។

ឯកឧត្តមរដ្ឋមន្ត្រីបានលើកឡើងផងដែរថា ពលករខ្មែរដែលកំពុងធ្វើការងារនៅប្រទេសជប៉ុនមានចំនួនប្រមាណជាង 9ពាន់នាក់ ហើយយើងសង្ឃឹមថា នឹងមានការកើនឡើងបន្ថែមទៀតទ្វេដងនៅឆ្នាំថ្មីនេះ ដើម្បីផ្តល់ឱកាសឱ្យពលករមានឱកាសទទួលបានការបណ្តុះបណ្តាលជំនាញឱ្យបានកាន់តែច្បាស់លាស់ក្នុងការបំពេញកិច្ចការងាររបស់ខ្លួនឱ្យបានប្រសើរឡើង។ ជាមួយគ្នានេះក្រសួងការងារ និងបណ្តុះបណ្តាលវិជ្ជាជីវៈកំពុងសហការជាមួយមន្ត្រីជំនាញជប៉ុនដើម្បីពិនិត្យ និងរៀបចំកិច្ចព្រមព្រៀងសហប្រត្តិបត្តិការជាមួយគ្នាក្នុងគោលបំណងបង្កើនទីផ្សារការងារ និងឱកាសការងារជាច្រើនសម្រាប់ប្រជាជនកម្ពុជា និងដើម្បីដោះស្រាយបញ្ហាកង្វះពលកម្មជំនាញនៅប្រទេសជប៉ុនផងដែរ៕

February 18, 2019

Sister of Code ជំរុញស្ត្រីកម្ពុជាឱ្យមានមូលដ្ឋានគ្រឹះខ្លាំងផ្នែកបច្ចេកវិទ្យា

កន្លងមកស្ត្រីក្នុងវិស័យបច្ចេកវិទ្យាមានមិនច្រើនពេកទេនៅកម្ពុជា ព្រោះប្រជាជនខ្មែរនៅមានផ្នត់គំនិតមួយយល់ឃើញថាមុខវិជ្ជាបច្ចេកវិទ្យាព័ត៌មាន (ICT) គឺជាមុខវិជ្ជាសម្រាប់បុរស។ ជាក់ស្តែងមុខវិជ្ជានេះជាមុខវិជ្ជាដែលមានលក្ខណសម្បត្តិល្អសម្រាប់ស្ត្រីផងដែរក្នុងសង្គមដែលកំពុងតែមានការវិវឌ្ឍយ៉ាងលឿនផ្នែកបច្ចេកវិទ្យា នៅគ្រប់វិស័យទាំងអស់។

បច្ចុប្បន្ននេះ ស្ត្រីលើពិភពលោកមិនមែនតែកម្ពុជា នោះទេ ត្រូវបានលើកទឹកចិត្តឱ្យចូលរួមឱ្យបានសកម្មក្នុងវិស័យបច្ចេកវិទ្យា។ ការលើកទឹកចិត្តទាំងអស់នោះមានដូចជា ការផ្តល់កូតាអាហារូបករណ៍ពិសេសសម្រាប់ស្ត្រី ការបង្កើតកម្មវិធីផ្លាស់ប្តូរបទពិសោធ ការប្រកួតប្រជែងសម្រាប់ស្ត្រី និងការលើកទឹកចិត្តចំពោះមុខតំណែងមួយចំនួនសម្រាប់ស្ត្រីតែម្តងនៅក្នុងក្រុមហ៊ុនសំខាន់ៗនានា។ ស្ត្រីជាចំណែកយ៉ាងសំខាន់នៅក្នុងសង្គមនាពេលបច្ចុប្បន្ន ដែលអាចមានលទ្ធភាពខ្ពស់ដើម្បីដោះស្រាយបញ្ហាប្រឈមនានាដោយការប្រើប្រាស់បច្ចេកវិទ្យា ជាពិសេសបញ្ហារបស់ស្ត្រីដូចគ្នា ព្រោះមានតែស្ត្រីទេដែលយល់ និងដឹងពីអារម្មណ៍ស្ថានភាព និងបញ្ហាប្រឈមនានារបស់ស្ត្រីដូចគ្នា។

ដើម្បីជំរុញស្ត្រីឱ្យចូលរួមកាន់តែសកម្មក្នុងវិស័យបច្ចេកវិទ្យាព័ត៌មានវិទ្យា ក្រសួងអប់រំ យុវជន និងកីឡា សហការជាមួយគ្រឹះស្ថានបណ្តុះបណ្តាល IT Academy STEP Cambodia ចាប់ផ្តើមអនុវត្តកម្មវិធីមួយឈ្មោះថា “Sister of Code” ដើម្បីលើកទឹកចិត្តឱ្យសិស្សស្រីនៅកម្ពុជាព្យាយាមសរសេរកូដកម្មវិធី និងអភិវឌ្ឍទំនុកចិត្តក៏ដូចជាផ្តល់ឱកាសជោគជ័យផ្នែកឌីជីថលដល់និស្សិតស្រីនៅផងដែរ។

កម្មវិធី នេះនឹងជួយស្ត្រីកម្ពុជាឱ្យកាន់តែមានសមត្ថភាពដើម្បីចូលរួមប្រកួតប្រជែងក្នុងទីផ្សារការងារ ជាពិសេសគឺបង្កើតស្នាដៃជានវានុវត្តន៍ថ្មីសម្រាប់ដោះស្រាយបញ្ហានានា និងឈានទៅក្លាយជាអ្នកជំនាញខ្លាំងៗដើម្បីបម្រើឱ្យវិស័យនានានាពេលអនាគត។ ចំពោះសិស្សដែលអាចចូលរៀនបានគឺមានអាយុចន្លោះពី 10ឆ្នាំ ដល់ 18ឆ្នាំ ដែលកម្មវិធីនេះនឹងបង្រៀនពីមូលដ្ឋានគ្រឹះក្នុងការសរសេរកូដដោយឥតគិតថ្លៃរយៈពេល 6ខែ ហើយត្រូវសិក្សាក្នុងមួយថ្ងៃ-មួយសប្តាហ៍ រយៈពេល 2ម៉ោងកន្លះ៕

February 18, 2019

កាសែតឡារ៉ែន ពាណិជ្ជ លេខ 162

[easy_media_download url=”https://www.lareine.com.kh/wp-content/uploads/2019/02/LRPN_162-Final-For-Web.pdf” force_dl=”1″]

February 17, 2019

ធនាគារ អេស៊ីលីដា បោះជំហានកាន់តែលឿនក្នុងការបម្រើអតិថិជននៅគ្រប់ទីកន្លែងក្នុងពិភពលោក

ធនាគារអេស៊ីលីដា ភីអិលស៊ី ជាធនាគារដែលកំពុងមានប្រតិបត្តិការល្អ និងមានភាពទូលំទូលាយក្នុងការផ្តល់សេវាកម្មធនាគារដល់អតិថិជនទាំងក្នុងប្រទេស និងនៅតាមបណ្តាប្រទេសនានាលើពិភពលោក តាមរយៈការបង្កើនកិច្ចសហការជាមួយធនាគារ និងស្ថាប័នអន្តរជាតិដៃគូធំៗជាច្រើន។

នៅថ្ងៃទី5 ខែកុម្ភៈ ឆ្នាំ2019 នេះ ធនាគារអេស៊ីលីដាភីអិលស៊ី និងក្រុមហ៊ុន JCB International Co., Ltd. (JCBI) ជាក្រុមហ៊ុនបុត្រសម្ព័ន្ធ JCB Co., Ltd. បានប្រកាសជាសាធារណៈស្តីពីពិធីដាក់ឱ្យប្រើប្រាស់ជាផ្លូវការនូវបណ្ណឥណពន្ធ អេស៊ីលីដា JCB នៅប្រទេសកម្ពុជា។ បណ្ណឥណពន្ធ អេស៊ីលីដា JCB នេះផ្តល់ជូនអតិថិជននូវមុខងារ ឌីជីថល ជាច្រើនដែលអាចឱ្យអតិថិជនមានជម្រើសក្នុងការទូទាត់ប្រាក់ដុល្លារ និងប្រាក់រៀល អាស្រ័យលើប្រភេទប័ណ្ណ និងជាប័ណ្ណដែលមានប្រព័ន្ធការពារខ្ពស់ចំពោះសុវត្ថិភាពហិរញ្ញវត្ថុសម្រាប់អតិថិជនទាំងអស់។

អតិថិជនដែលជាម្ចាស់បណ្ណឥណពន្ធ អេស៊ីលីដា JCB មិនត្រឹមតែអាចប្រើប្រាស់នៅតាមបណ្ដាញភ្នាក់ងារទូទាត់ JCB ប្រមាណ 30លានទីតាំងទូទាំងសកលលោកនោះទេ ថែមទាំងអាចធ្វើប្រតិបត្តិការដែល JCB ផ្តល់សិទ្ធិ និងការបញ្ចុះតម្លៃនៅតាមភោជនីយដ្ឋាន និងបណ្ដាហាងទំនិញនានា នៅក្នុងសកលលោកទៀតផង។

លោកបណ្ឌិត អុិន ចាន់នី ប្រធាននាយកប្រតិបត្តិធនាគារ អេស៊ីលីដា ភីអិលស៊ី បានមានប្រសាសន៍ថា ធនាគារ អេស៊ីលីដា ភីអិលស៊ី មានសេចក្តីសោមនស្សរីករាយដែលក្រុមហ៊ុន JCBI លំដាប់ពិភពលោកផ្នែកសេវាកម្មទូទាត់មានគុណភាពខ្ពស់លំដាប់អន្តរជាតិ មានទីតាំងនៅប្រទេសជប៉ុនបានជ្រើសរើសយកធនាគារ អេស៊ីលីដា ភីអិលស៊ី ជាដៃគូយុទ្ធសាស្រ្តក្នុងការធ្វើសហប្រត្តិបត្តិការបម្រើសេវាកម្មទូទាត់។ តាមរយៈកិច្ចព្រមព្រៀងនេះ អតិថិជន ឬសមាជិកប័ណ្ណ និងភ្នាក់ងារទូទាត់របស់ធនាគារ អេស៊ីលីដា ភីអិលស៊ី និង JCBI អាចពង្រីកប្រតិបត្តិការទូទាត់ជាសកលនៅតាមបណ្តាញធនាគារ អេស៊ីលីដា និងJCBI ជាង 30លានទីតាំង និងទីតាំងសម្រាប់ការធ្វើប្រតិបត្តិការដកប្រាក់បុរេប្រទានជាង 1លានកន្លែងនៅក្នុងសកលលោក។

លោកបណ្ឌិត អុិន ចាន់នី បានមានប្រសាសន៍ថា៖“ចំណុចសំខាន់នៃកិច្ចព្រមព្រៀងនេះគឺសមាជិកប័ណ្ណអេធីអឹមរបស់ធនាគារ អេស៊ីលីដា ភីអិលស៊ី អាចទទួលបានប័ណ្ណសហនិមិត្តសញ្ញារវាង ធនាគារ អេស៊ីលីដា ភីអិលស៊ី និង JCBI តាមរយៈការស្នើសុំ។ ម្យ៉ាងវិញទៀត ប័ណ្ណនេះមិនត្រឹមតែជួយសម្រួលដល់ការធ្វើប្រតិបត្តិការទូទាត់នៅក្នុង និងក្រៅប្រទេសប៉ុណ្ណោះទេ ថែមទាំងសម្រួលដល់សមាជិកប័ណ្ណ និងភ្នាក់ងារទូទាត់ របស់ធនាគារ អេស៊ីលីដា ភីអិលស៊ី និង JCBI ក្នុងការធ្វើប្រតិបត្តិការទូទាត់យ៉ាងសម្បូរបែប ធ្វើប្រតិបត្តិការទូទាត់លើសកលលោកនៅគ្រប់ទីកន្លែង និងគ្រប់ពេលវេលា តាមតម្រូវការ”។

លោកបណ្ឌិត អុិន ចាន់នី បានលើកឡើងផងដែរថាធនាគារ អេស៊ីលីដា ភីអិលស៊ី បានសហការជាមួយបណ្តាដៃគូសំខាន់ៗជាច្រើនរួចមកហើយ ហើយដៃគូដែលយើងបានប្រកាសសហការគ្នានេះគឺមានលក្ខណពិសេសត្រង់គាត់មានសមាជិកច្រើនរហូតដល់ជាង 30លាននាក់លើពិភពលោក។ ម្យ៉ាងវិញទៀតដូចយើងបានដឹងហើយថា JCBI គឺជាស្ថាប័នមកពីប្រទេសជប៉ុន ដែលផលិតផលជប៉ុន គឺតែងតែភ្ជាប់ជាមួយនឹងកេរ្តិ៍ឈ្មោះ គុណភាព និងភាពដែលអាចជឿជាក់បាន។

លោក គីមីហ៊ីសា អ៊ីម៉ាដា អគ្គនាយក និងជាប្រធាននាយកប្រតិបត្តិរបស់ JCBI បានមានប្រសាសន៍ថា៖ “ក្រុមហ៊ុន JCB International Co., Ltd. (JCBI) មានសេចក្តីសោមនស្សរីករាយ ដែលធនាគារអេស៊ីលីដា ភីអិលស៊ី ជាធនាគារឈានមុខធំបំផុតក្នុងប្រទេសកម្ពុជាបានក្លាយជាដៃគូពាណិជ្ជកម្មជាមួយ JCB ក្នុងការបម្រើសេវាបណ្ណឥណ្ណពន្ធដល់អតិថិជនរបស់ស្ថាប័នទាំង2 និងសាធារណជនទូទាំងពិភពលោក។ ខ្ញុំជឿជាក់ថា ភាពជាដៃគូដ៏ល្អនេះ នឹងផ្តល់ឱកាសជាច្រើនបន្ថែមទៀតដល់ធនាគារ អេស៊ីលីដា ភីអិលស៊ី និង JCBI ក្នុងការពង្រីកពាណិជ្ជកម្មក្នុងប្រទេសកម្ពុជាដែលនេះជាការបង្ហាញពីសក្តានុពលខ្ពស់នាថ្ងៃអនាគត ខណៈសេដ្ឋកិច្ចកំពុងបោះជំហានលូតលាស់យ៉ាងរលូន”។

គួរបញ្ជាក់ថា ធនាគារ អេស៊ីលីដា ភីអិលស៊ីមានទ្រព្យសកម្មសរុបចំនួនជាង 5.7ពាន់លានដុល្លារអាមេរិក សមតុល្យឥណទានសរុបចំនួន 3.63ពាន់លានដុល្លារអាមេរិក និងប្រាក់បញ្ញើសន្សំសរុបចំនួន3.84ពាន់លានដុល្លារ និងមានអតិថិជនប្រមាណជាង2.5លាននាក់ គិតត្រឹមដំណាច់ខែធ្នូ ឆ្នាំ2018 នេះ។ ចំណែកឯក្រុមហ៊ុន JCB ជាក្រុមហ៊ុនដែលមាន យីហោសេវាកម្មទូទាត់លំដាប់ពិភពលោក និងជាអ្នកចេញ និងទទួលបណ្ណឥណទាន ឈានមុខគេនៅជប៉ុនដែលមានប្រតិបត្តិការចាប់តាំងពីឆ្នាំ1961 មកម៉្លេះ៕

February 16, 2019

អាងចិញ្ចឹមចង្រិតបែបថ្មី ប្រើបច្ចេកវិទ្យាជួយអ្នកចិញ្ចឹមចង្រិតនៅតំបន់ឆ្ងាយៗ

ការចិញ្ចឹមចង្រិតជាមុខរបរថ្មីមួយដែលធ្វើឱ្យប្រជាជនខ្មែរមួយចំនួនទទួលបានប្រាក់កម្រៃរាប់រយដុល្លារក្នុងមួយខែៗ តែអ្វីដែលជាបញ្ហាប្រឈមរបស់អ្នកចិញ្ចឹមនោះ គឺបញ្ហាបច្ចេកទេសគ្រប់គ្រងកន្លែងចិញ្ចឹម និងបញ្ហាភ្លើងអគ្គិសនី ព្រោះអ្នកដែលអាចចិញ្ចឹមចង្រិតបាន លុះត្រាតែស្ថិតក្នុងតំបន់ដែលមានភ្លើងរដ្ឋប្រើប្រាស់ ចំណែកឯអ្នកនៅជនបទឆ្ងាយៗមិនអាចចិញ្ចឹមបានទេ។

ដោយមើលឃើញពីបញ្ហាប្រឈមនេះ និងចំណុចពិសេសជាច្រើនផ្សេងទៀត អ្នកជំនាញផ្នែកអគ្គិសនីមួយក្រុមមកពីវិទ្យាស្ថានបច្ចេកវិទ្យាកម្ពុជា (ITC) បានរួមគ្នាបង្កើតគម្រោងមួយឈ្មោះថា The Licht ដើម្បីបង្កើតអាងចិញ្ចឹមចង្រិតដែលមានលក្ខណៈឆ្លាតវៃ គ្រប់គ្រងសីតុណ្ហភាពដោយប្រើបច្ចេកវិទ្យា និងអាចប្រើប្រាស់ជាមួយអាគុយ ឬផ្ទាំងសូឡាបានយ៉ាងងាយសម្រាប់ប្រជាជននៅតំបន់គ្មានភ្លើងអគ្គិសនីប្រើប្រាស់។

លោក ស្វែងឌី សិទ្ធិផន ជាអ្នកជំនាញផ្នែកអគ្គិសនី និងជាសហស្ថាបនិកគម្រោង The Licht បានលើកឡើងថា មូលហេតុដែលលោកចាប់ផ្តើមផលិតអាងចិញ្ចឹមចង្រិតនេះឡើង ព្រោះលោកយល់ឃើញថា ចង្រិតជាសត្វដែលងាយស្រួលចិញ្ចឹម ចំណាយទុនតិច ហើយទទួលបានផលច្រើន រួមទាំងមានប្រូតេអុីនខ្ពស់ ល្អសម្រាប់សុខភាពមនុស្សទៀតផង។

ការចិញ្ចឹមចង្រិត ប្រសិនបើចិញ្ចឹមដោយការភ្ញាស់ពង ត្រឹមតែ 1សប្តាហ៍ វាអាចញាស់ចេញមកជាកូនចង្រិត រួចហើយចំណាយពេលត្រឹមតែ6 ទៅ7សប្តាហ៍ទៀត យើងអាចប្រមូលផលបានហើយ។ ចំណែកឯចំណីទៀតសោត ក៏មិនចំណាយប្រាក់ច្រើនដែរ ដែលកត្តានេះផ្តល់ឱកាសល្អសម្រាប់កសិករដែលធ្វើឱ្យមានភាពងាយស្រួល ចំណាយតិច និងចំណេញច្រើន។ តែទោះជាយ៉ាងនេះក្តី កសិករខ្មែរអ្នកចិញ្ចឹមចង្រិតបច្ចុប្បន្ន ក៏មានកត្តាប្រឈមមួយចំនួនផងដែរ ដូចជាបញ្ហាអាងចិញ្ចឹមដែលត្រូវការទំហំដីធំ ប្រើប្រាស់ភ្លើងអគ្គិសនីច្រើន ហើយការគ្រប់គ្រងសីតុណ្ហភាពសម្រាប់អ្នកចិញ្ចឹមបែបប្រពៃណីក៏នៅមិនទាន់ធ្វើបានល្អដែរ។

ចង្រិតជាសត្វដែលមិនលំបាកថែទាំពេកទេ តែវាត្រូវការភាពសើម និងសីតុណ្ហភាពល្អ ចន្លោះពី 27 ទៅ 30អង្សារCប្រសិនបើក្តៅពេក ឬត្រជាក់ពេក វានឹងងាប់ ហេតុនេះការចិញ្ចឹមបែបធម្មជាតិអាចប្រឈមនឹងបាត់បង់ចង្រិតច្រើនទៅតាមការប្រែប្រួលរបស់អាកាសធាតុ។

លោក ស្វែងឌី សិទ្ធិផន បាននិយាយថា៖ “ដោយមើលឃើញពីផលចំណេញ និងកត្តាប្រឈមទាំងនេះ ទើបក្រុមរបស់ខ្ញុំសម្រេចចិត្តបង្កើតអាងចិញ្ចឹមចង្រិតឆ្លាតវៃ ដែលមុខងាររបស់វាអាចដោះស្រាយបញ្ហារបស់កសិករចិញ្ចឹមចង្រិតបានយ៉ាងច្រើន ទាំងបញ្ហាបច្ចេកទេស និងថវិកា”។

អ្នកជំនាញខាងលើបានលើកឡើងផងដែរថា អាងចិញ្ចឹមចង្រិតឆ្លាតវៃនេះមានបំពាក់ដោយបន្ទះបញ្ជរ (controller Board) ដែលមានមុខងារគ្រប់គ្រងសីតុណ្ហភាពឱ្យនៅល្មមសម្រាប់ការថែរក្សាចង្រិត និងចេះប្រែប្រួលទៅតាមអាកាសធាតុ ប្រសិនបើអាកាសធាតុត្រជាក់ក្រោម 27អង្សាC វានឹងប្រើម៉ាស៊ីនកម្តៅឱ្យមានសីតុណ្ហភាពល្មមឡើងវិញ តែប្រសិនបើមានសីតុណ្ហភាពលើស 30អង្សាC វានឹងបញ្ចេញសារធាតុសំណើមដើម្បីបន្ថយសីតុណ្ហភាពឱ្យមកល្មមវិញ។ ក្រៅពីនេះ វាមានបំពាក់ Sensor ជាមួយធុងទឹក និងគ្រប់គ្រងចំណីរបស់សត្វចង្រិតបានល្អផងដែរ ហើយឧបករណ៍មួយនេះថែមទាំងស៊ីភ្លើងតិច ដែលអនុញ្ញាតឱ្យអ្នក-ចិញ្ចឹមចង្រិតអាចប្រើប្រាស់អាគុយ ឬថាមពលពន្លឺព្រះអាទិត្យ(ផ្ទាំងសូឡា)បានយ៉ាងងាយស្រួល មិនលំបាកដូចកាលពីមុនដែលត្រូវការតែភ្លើងរដ្ឋទើបអាចចិញ្ចឹមបាននោះទេ។ ម្យ៉ាងវិញទៀត ការចិញ្ចឹមក្នុងអាងចិញ្ចឹមចង្រិតឆ្លាតវៃនេះធ្វើឱ្យកសិករយើងចំណេញដី ព្រោះទំហំរបស់វាប្រហែលជា 3ម៉ែត្រ 4ជ្រុងតែប៉ុណ្ណោះ មានកម្ពស់ 3ជាន់ និងមាន 6អាងត្រួតលើគ្នា។ ហេតុនេះប្រជាជនដែលមានទីកន្លែងតូចក៏អាចចិញ្ចឹមបានដែរ មិនចាំបាច់ចំណាយទីធ្លាធ្វើអាងធំដល់ទៅ 10ម៉ែត្រ 4ជ្រុង ឬធំជាងនេះដើម្បីចិញ្ចឹមនោះទេ។

លោក សុង វែហ្សឺនីឡងឌី អ្នកជំនាញអគ្គិសនី និងជាសហស្ថាបនិកគម្រោងអាងចិញ្ចឹមចង្រិតឆ្លាតវៃនេះបានលើកឡើងថា អាងចិញ្ចឹមចង្រិតតាមបែបបច្ចេកវិទ្យានេះ ក្រៅពីការរក្សាសីតុណ្ហភាព និងលក្ខខណ្ឌបច្ចេកទេសមួយចំនួនហើយ អាងនេះអាចជួយប្រជាជនឱ្យមានភាពងាយស្រួលខ្លាំងជាងមុនលើការប្រមូលផលផងដែរ ព្រោះពីមុន អ្នកចិញ្ចឹមតាមបែបប្រពៃណីត្រូវចុះទៅប្រមូលចាប់ចង្រិតនៅក្នុងអាងចិញ្ចឹមធំៗដែលធ្វើឱ្យត្រូវចំណាយពេលយូរ និងចំណាយធនធានច្រើនទៀតផងតែសម្រាប់អាងចិញ្ចឹមចង្រិតឆ្លាតវៃនេះវិញ គឺមិនលំបាកទេ ពេលប្រមូលផល គាត់គ្រាន់តែទាញថតចិញ្ចឹមនីមួយៗដែលមានចង្រិតចិញ្ចឹមនៅក្នុងនោះចេញមក គឺអាចប្រមូលផលចង្រិតបានយ៉ាងងាយ។

ចំពោះតម្លៃនៃការធ្វើអាងចិញ្ចឹមចង្រិតឆ្លាតវៃនេះវិញ ក៏ធូរថ្លៃជាងដែរ ទោះជាស្ថិតក្នុងចំនួនចិញ្ចឹមប៉ុនគ្នាក៏ដោយ ដូចជាអាងចិញ្ចឹមតាមបែបប្រពៃណីត្រូវចំណាយលុយប្រមាណជាង 1ពាន់ដុល្លារ តែអាងចិញ្ចឹមចង្រិតឆ្លាតវៃនេះត្រូវចំណាយត្រឹមតែជាង 700ដុល្លារតែប៉ុណ្ណោះ ដោយកសិករអាចប្រមូលផលពីការចិញ្ចឹមមួយលើកៗបានជាមធ្យម 180គីឡូក្រាមក្នុងអាងមួយ និងបើគិតជាសាច់ប្រាក់ក៏ប្រហែលជា 360ដុល្លារ។

លោក សុង វែហ្សឺនីឡងឌី បាននិយាយថា៖ “គម្រោងបង្កើតអាងចិញ្ចឹមចង្រិតឆ្លាតវៃនេះ មិនមែនត្រឹមតែជាគំនិតអាជីវកម្មនោះទេ តែវាក៏ជាគម្រោងមួយដែលជួយដល់បរិស្ថានផងដែរ ព្រោះគោលបំណងរបស់យើង គឺកាត់បន្ថយការប្រមូលចាប់សត្វចង្រិតពីក្នុងព្រៃ ដែលមិនយូរមិនឆាប់វានឹងប៉ះពាល់ដល់ជីវចម្រុះ ហើយវាថែមទាំងអាចសន្សំសំចៃភ្លើងអគ្គិសនីដែលជាផ្នែកមួយក្នុងការជួយដល់ភពផែនដីយើងថែមទៀតផង”។

ឆ្លើយតបចំពោះការយល់ឃើញខុសគ្នារវាងចង្រិតចិញ្ចឹម និងចង្រិតធម្មជាតិ លោក វែហ្សឺនីឡងឌី បានលើកឡើងថា តាមពិតមនុស្សភាគច្រើនមិនចូលចិត្តរបស់ចិញ្ចឹមនោះទេ ហើយចូលចិត្តចង្រិតធម្មជាតិ តែស្ថានភាពពិត ចង្រិតចិញ្ចឹមតាមអាងចិញ្ចឹមឆ្លាតវៃអាចមានអនាម័យជាងចង្រិតនៅក្នុងព្រៃ ព្រោះអាហាររបស់វាត្រូវបានផ្សំចេញពីបន្លែ និងអាហារមួយចំនួនទៀតដែលគ្មានជាតិគីមី ដែលរកបាននៅក្នុងភូមិ។ ចំណែកឯចង្រិតនៅក្នុងព្រៃ វាអាចមានបញ្ហាមួយចំនួនលើរឿងចំណី ព្រោះយើងមិនអាចគ្រប់គ្រងវាបាន៕

February 16, 2019

ឆ្នាំ2019 វិស័យនាំចេញសម្លៀកបំពាក់ និងស្បែកជើងនឹងចំណេញពីការលុបចេញ CO ប្រមាណ 13លានដុល្លារ

ការនាំចេញផលិតផលកាត់ដេរសម្លៀកបំពាក់ និងស្បែកជើងក្នុងឆ្នាំ2018 របស់កម្ពុជាទៅកាន់ទីផ្សារអន្តរជាតិមានកំណើនឡើង 24.7% (គិតជាទឹកប្រាក់ប្រមាណ 10ប៊ីលានដុល្លារ) បើធៀបនឹងឆ្នាំ2017។ នេះបើតាមរបាយការណ៍របស់ធនាគារជាតិនៃកម្ពុជា។

របាយការណ៍នេះបានបញ្ជាក់ថា ការនាំចេញសម្លៀកបំពាក់ និងស្បែកជើងបានកើនឡើង24.7% ស្របពេលការនាំចេញផលិតផលចម្បងៗផ្សេងទៀត ដូចជា ទោចក្រយាន បរិក្ខារអគ្គិសនី និងគ្រឿងបន្លាស់យានយន្តក៏បានរួមចំណែកដល់កំណើននាំចេញសរុបដែរ។ ការធ្វើពិពិធកម្មលើមុខទំនិញនាំចេញបាននិងកំពុងកាត់បន្ថយការពឹងផ្អែកទាំងស្រុងលើផលិតផលសម្លៀកបំពាក់ និងស្បែកជើងជាលំដាប់ បើទោះបីជាការនាំចេញផលិតផលទាំងនេះបន្តមានសមាមាត្រធំនៅក្នុងការនាំចេញសរុបក៏ដោយ។

របាយការណ៍បានលើកឡើងថា៖ “ការនាំចេញផលិតផលកាត់ដេរ និងស្បែកជើងក្នុងឆ្នាំ2018មានប្រមាណជាង 73.7%នៃការនាំចេញសរុប ក្នុងនោះសម្រាប់ផលិតផលសម្លៀកបំពាក់មាន 66% និងស្បែកជើងមាន 8%។ សមាមាត្រនៃការនាំចេញផលិតផលកាត់ដេរបានថយចុះពី69% មក76%ក្នុងរយៈពេល10ឆ្នាំចុងក្រោយនេះ”។

ឯកឧត្តមអគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុបានបង្ហាញពីការដាក់ចេញនូវវិធានការកែទម្រង់ធំថ្មីៗ នៅក្នុងកិច្ចប្រជុំនៃវេទិការាជរដ្ឋាភិបាលផ្នែកឯកជនដែលក្នុងនោះ វិធានការជាក់ស្តែងក្នុងការលុបចោលនូវការចេញវិញ្ញាបនបត្របញ្ជាក់ប្រភពដើម(Certificate of Origin ឬCO)នឹងធ្វើឱ្យវិស័យកាត់ដេរសម្លៀកបំពាក់ និងស្បែកជើងចំណេញជាទឹកប្រាក់ប្រមាណ 13លានដុល្លារអាមេរិក។

ឯកឧត្តមបានបញ្ជាក់ទៀតថា ជាមួយគ្នានេះ ដើម្បីកាត់បន្ថយថ្លៃនាំចេញ និងនាំចូលឱ្យបានជាអតិបរិមាដល់អ្នកធុរកិច្ចក្នុងវិស័យនេះ សម្រាប់ថ្លៃស្គែនកុងតឺន័រទាំងនាំចេញ និងនាំចូលត្រូវបានបញ្ចុះដូចគ្នានឹងការនាំចេញអង្ករដែរគឺ 10ដុល្លារសម្រាប់កុងតឺន័រទំហំ 20ហ្វ៊ីត និង16ដុល្លារសម្រាប់កុងតឺន័រទំហំ 40ហ្វ៊ីត ដោយចាប់អនុវត្តពីថ្ងៃទី1 ខែមេសា ឆ្នាំ2019 តទៅ។

ក្នុងការលុបបំបាត់នូវបញ្ហាចំណាយនេះ វិស័យកាត់ដេរសម្លៀកបំពាក់ និងស្បែកជើងនឹងទទួលបានការចំណេញជាទឹកប្រាក់ប្រមាណពី 80លានដុល្លារអាមេរិក និងចំណេញពីការកាត់បន្ថយថ្លៃស្គែនកុងតឺន័រប្រមាណពី 3.2លានដុល្លារអាមេរិក។

ជាមួយគ្នានេះដែរ រាជរដ្ឋាភិបាលក៏នឹងទទួលរងនូវការបាត់បង់ចំណូលប្រមាណ 32លានដុល្លារអាមេរិក។ តែ វិស័យឯកជននឹងចំណេញជាទឹកប្រាក់ប្រមាណ 43លានដុល្លារអាមេរិក ពីការបញ្ចប់តួនាទីអចិន្ត្រៃយ៍របស់អគ្គនាយកដ្ឋានកាំកុងត្រូល ពីមាត់ច្រកអន្តរជាតិ ព្រំដែនគោក អាកាសយានដ្ឋាន និងកំពង់ផែ។

យោងតាមរបាយការណ៍ធនាគារជាតិនៃកម្ពុជាបានបញ្ជាក់ថា៖ “បច្ចុប្បន្នពលកម្មក្នុងផ្នែកកាត់ដេរសម្លៀកបំពាក់ និងស្បែកជើងមានចំនួនកម្មករ-កម្មការិនីប្រមាណ 80ម៉ឺននាក់។ ចំនួនរោងចក្រសរុបមានប្រមាណ 1,585រោងចក្រ កើនឡើង 4.1% បើធៀបនឹងឆ្នាំ2017 ក្នុងនោះរោងចក្រដែលបើកថ្មីមានចំនួន 146រោងចក្រ។ ទន្ទឹមនឹងនេះ រោងចក្រផលិតទំនិញសម្រាប់នាំចេញបានកើនឡើងគួរឱ្យកត់សម្គាល់ដែលបង្ហាញពីឥទ្ធិពលវិជ្ជមានពីសង្គ្រាមពាណិជ្ជកម្មរវាងសហរដ្ឋអាមេរិក និងចិនមកលើវិស័យនេះ ”។

លោកឧកញ៉ា វ៉ាន់ ស៊ូអៀង ប្រធានសមាគមរោងចក្រកាត់ដេរនៅកម្ពុជា (GMAC) បានមានប្រសាសន៍កាលពីពេលកន្លងមកថា៖ “មកដល់បច្ចុប្បន្ន សមាគមមានរោងចក្រជាសមាជិកប្រហែល600រោងចក្រ ដែលបានផ្តល់ការងារទៅដល់ពលរដ្ឋខ្មែរប្រមាណជា 78ម៉ឺននាក់ ហើយផលិតផលក្នុងវិស័យកាត់ដេររបស់កម្ពុជាដែលនាំចេញទៅទីផ្សារអឺរ៉ុប មានរហូតជាង 40% បន្ទាប់មកមាន អាមេរិក កាណាដា និងជប៉ុន”។

ទោះជាយ៉ាងណា បច្ចុប្បន្ន ក្រៅពីទីផ្សារនាំចេញទៅអឺរ៉ុប និងអាមេរិកហើយ សមាគមរោងចក្រកាត់ដេរក៏បាននិងកំពុងជំរុញដល់ក្រសួងពាណិជ្ជកម្មព្យាយាមជួយរកទីផ្សារ និងឱ្យជួយចរចាជាមួយប្រទេសផ្សេងៗ ដូចជាប្រទេសរុស្ស៊ី និងចិនជាដើម ដើម្បីអាចទទួលបានការលើកលែង ឬអនុគ្រោះពន្ធនាំចូល ដោយសង្ឃឹមថា នឹងមានលទ្ធផលជាផ្លែផ្កានាពេលឆាប់ៗខាងមុខ៕

February 16, 2019

ស្រូវ 3ប្រភេទ ទទួលបានជយលាភីជាស្រូវល្អបំផុតប្រចាំប្រទេសកម្ពុជា

ការប្រកួតស្រូវថ្នាក់ជាតិ លើកទី3 បានបញ្ចប់កាលពីដើមខែនេះ ដោយមានស្រូវ 3ប្រភេទទទួលបានជយលាភីជាស្រូវល្អបំផុតប្រចាំប្រទេសកម្ពុជា។

បើយោងតាមលទ្ធផលជយលាភីនៃការប្រកួតស្រូវល្អបំផុតលើកទី3 ប្រចាំកម្ពុជា ស្រូវដែលល្អបំផុតប្រចាំកម្ពុជានោះរួមមាន ស្រូវផ្ការំដួល បានទៅលើសហគមន៍ស្វាយរន្ធអមត:ស្រូវពូជ ខេត្តតាកែវ។ ស្រូវសែនក្រអូប បានទៅលើសហគមន៍ជ្រៃសាមគ្គីបង្កើនផល ខេត្តបាត់ដំបង។ ស្រូវអុីអ៊ែរបានទៅលើសហគមន៍អភិវឌ្ឍន៍សង្គមកម្ពុជា ខេត្តកំពង់ឆ្នាំង។ សហគមន៍ដែលបានទទួលជយលាភីទាំងនោះ ទទួលបានម៉ាស៊ីនដាំគ្រាប់ស្រូវ (Eli Seeders) ម្នាក់ 1គ្រឿង សរុបជាទឹកប្រាក់ប្រមាណ 15លានរៀលពីសហព័ន្ធស្រូវអង្ករកម្ពុជា និងសមាជិក-សមាជិកា។

លោក សុខ ពុទ្ធិវុធ ប្រធានសហព័ន្ធស្រូវអង្ករកម្ពុជា បានឱ្យដឹងថា គោលបំណងដែលសហព័ន្ធស្រូវអង្ករកម្ពុជារៀបចំការប្រកួតស្រូវល្អបំផុតលើកទី3 នេះឡើង គឺដើម្បីស្វែងរកសហគមន៍ដែលបានផលិតស្រូវមានគុណភាពល្អបំផុតប្រចាំកម្ពុជាក្នុងឆ្នាំ2018 ដោយទទួលបាននូវពានរង្វាន់លើកទឹកចិត្តពីសហព័ន្ធស្រូវអង្ករកម្ពុជា និងរាជរដ្ឋាភិបាលកម្ពុជា។

លោកប្រធានសហព័ន្ធ បានមានប្រសាសន៍ថា៖ “កម្មវិធីនេះទៀតសោត ក៏មានការលើកទឹកចិត្តដល់សហគមន៍កសិករទាំងអស់ឱ្យបន្តខិតខំអភិវឌ្ឍសហគមន៍របស់ខ្លួន ដើម្បីក្លាយជាសហគមន៍គំរូប្រចាំប្រទេសកម្ពុជា និងសហគមន៍ដែលផលិតស្រូវចំតម្រូវការទីផ្សារ នឹងពង្រឹង និងពង្រីកការទំនាក់ទំនងរវាងសហគមន៍ និងភាគីពាក់ព័ន្ធនៅក្នុងខ្សែចង្វាក់ផលិតកម្មស្រូវអង្ករកម្ពុជា ជាពិសេសរវាងសមាជិកសហព័ន្ធ ដែលមានទាំងក្រុមហ៊ុននាំចេញ រោងម៉ាស៊ីនកិនស្រូវ ហើយនិងសហគមន៍កសិករ”។

លោក ពុទ្ធិវុធ បានបន្តថា ការប្រកួតប្រជែងនេះនឹងជួយពង្រឹងគុណភាពស្រូវអង្ករ និងធ្វើឱ្យស្រូវអង្ករកម្ពុជាទទួលបានការប្រកួតប្រជែងខ្ពស់នៅក្នុងទីផ្សារអន្តរជាតិ។

លោកបន្ថែមថា៖ “តម្រូវការអង្ករដែលមានគុណភាព មានច្រើនណាស់នៅលើទីផ្សារអន្តរជាតិ ហើយការប្រារព្ធពិធីប្រកួតប្រជែងស្រូវល្អបំផុតនេះ យើងសង្ឃឹមថា នឹងផ្សព្វផ្សាយស្រូវអង្ករកម្ពុជា និងជួយបង្កើនគុណភាពចំពោះស្រូវអង្កររបស់យើង ដូច្នេះយើងអាចប្រកួតនៅលើទីផ្សារអន្តរជាតិបាន”។

បើយោងតាមសេចក្តីប្រកាសព័ត៌មានរបស់សហព័ន្ធស្រូវអង្ករកម្ពុជាបានឱ្យដឹងថា ការប្រកួតស្រូវថ្នាក់ជាតិលើកទី3 នេះក៏មានការធ្វើបទបង្ហាញរបស់សហព័ន្ធស្រូវអង្ករកម្ពុជាស្តីពីបច្ចុប្បន្នភាពនៃវិស័យស្រូវអង្ករកម្ពុជា មានកិច្ចពិភាក្សាពិគ្រោះយោបល់ និងស្វែងរកដំណោះស្រាយជាមួយសមាជិក សមាជិកាទាក់ទងទៅនឹងវិស័យស្រូវអង្ករកម្ពុជាទាំងមូល បន្ទាប់ពីសហគមន៍អឺរ៉ុបបានសម្រេចដាក់ពន្ធមកលើការនាំចូលអង្ករពីកម្ពុជា ដែលសហព័ន្ធបានអញ្ជើញវាគ្មិនជាតិ អន្តរជាតិមកផ្លាស់ប្តូរទស្សនៈ និងចែករំលែកនូវបទពិសោធលើចំណុចសំខាន់ជាច្រើន។

ក្នុងនោះមានការពិភាក្សាថា តើការដាក់ពន្ធរបស់សហគមន៍អឺរ៉ុបលើការនាំចូលអង្ករពីកម្ពុជា បាននិងកំពុងធ្វើឱ្យប៉ះពាល់ដល់វិស័យស្រូវអង្ករកម្ពុជាដូចម្តេចខ្លះ? តើកម្ពុជាគួរធ្វើពិពិធកម្មទីផ្សារអន្តរជាតិដូចម្តេចសម្រាប់វិស័យស្រូវអង្កររបស់កម្ពុជា ក្រៅពីការជួយសម្រួលពាណិជ្ជកម្មក្នុងប្រទេសរបស់រដ្ឋាភិបាល? និងថាតើកម្ពុជាគួររៀបចំផែនការយុទ្ធសាស្ត្រទីផ្សារយ៉ាងដូចម្តេច ដើម្បីផ្សព្វផ្សាយ និងជំរុញការប្រើប្រាស់ម៉ាកវិញ្ញាតកម្ម “ម្លិះអង្គរ” ដោយផ្សារភ្ជាប់ជាមួយពានរង្វាន់អង្ករពិភពលោក?។

គួរបញ្ជាក់ថា កាលពីឆ្នាំមុន ការនាំចេញអង្កររបស់កម្ពុជាបានធ្លាក់ចុះប្រមាណជា 1.5ភាគរយ ដែលមានចំនួន 626ពាន់តោន។ ក្នុងនោះប្រទេសចិនជាទីផ្សារដ៏ធំបំផុតរបស់កម្ពុជា ដោយបានស្រូបយកអង្ករប្រមាណជា 270ពាន់តោននៅឆ្នាំ2018។

ដោយឡែកកាលពីខែមុននេះ លោកប្រធានាធិបតីចិន ស៊ី ជីន ភីង បានប្រកាសបន្ថែមកូតានាំចូលអង្ករពីកម្ពុជាប្រមាណជា 100ពាន់តោនបន្ថែមទៀត ដែលនឹងធ្វើឱ្យការនាំចេញអង្ករពីកម្ពុជាទៅចិនមានប្រមាណជា 400ពាន់តោននៅឆ្នាំ2019 នេះ។

អង្ករក្រអូបប្រណីតកម្ពុជាដែលមានម៉ាក ម្លិះអង្គរ (Malys Angkor) បានទទួលពានរង្វាន់អង្ករល្អបំផុតរបស់ពិភពលោកប្រចាំឆ្នាំ2018 ជាឆ្នាំទី4 ហើយដែលកម្ពុជាបានគ្រងតំណែងជើងឯកអង្ករល្អបំផុតរបស់ពិភពលោក 4ឆ្នាំជាប់ៗគ្នា ពោលគឺនៅឆ្នាំ2012 - 2013 និង2014 ដោយឡែកអង្ករកម្ពុជាក៏ទទួលបានតំណែងជារងជើងឯកចំនួន 3ឆ្នាំជាប់គ្នាផងដែរ។

បើយោងតាមរបាយការណ៍ពីក្រសួងកសិកម្ម នៅឆ្នាំ2018 កន្លងទៅនេះ កម្ពុជាផលិតស្រូវបានចំនួន 7.4លានតោន។ ផ្ទៃដីច្រូតកាត់បានប្រមាណជា 2.4លានហិកតាក្នុងចំណោមផ្ទៃដីដាំដុះ 2.7លានហិកតា។ របាយការណ៍បានបញ្ជាក់ថា ជាមធ្យមក្នុង 1ហិកតាកសិករអាចផលិតបានស្រូវចំនួន 3.07តោន ដែលកាលពីឆ្នាំ2006 បានតែប្រមាណ 2.6តោនជាមធ្យមប៉ុណ្ណោះក្នុង 1ហិកតា៕

February 15, 2019

Author: ធឿន មករា