ធឿន មករា - La Reine Media

ការលើកទឹកចិត្តផ្នែកពន្ធដារក្នុងវិស័យមូលបត្រ ជាកាតាលីករជំរុញការអភិវឌ្ឍសេដ្ឋកិច្ចជាតិ

ឯកឧត្តម ស៊ូ សុជាតិ អគ្គនាយកនៃគណៈកម្មការមូលបត្រកម្ពុជា The Cambodia Securities Exchange (CSX)បានមានប្រសាសន៍ថា អនុលោមតាមយុទ្ធសាស្ត្រអភិវឌ្ឍន៍វិស័យហិរញ្ញវត្ថុឆ្នាំ2016-2025 របស់រាជរដ្ឋាភិបាលកម្ពុជា ដែលក្នុងនោះវិស័យមូលបត្រជាចលករមួយក្នុងចំណោមចលករសំខាន់ៗទាំងឡាយសម្រាប់បង្កើនល្បឿនសេដ្ឋកិច្ចជាតិ។

ដូច្នេះការលើកទឹកចិត្តផ្នែកពន្ធដារក្នុងវិស័យមូលបត្រ និងបទប្បញ្ញត្តិថ្មីៗក្នុងវិស័យមូលបត្រ ជាបទដ្ឋានក្នុងការធ្វើឱ្យប្រសើរឡើងចំពោះការលើកទឹកចិត្ត ការចូលរួមនៅក្នុងទីផ្សារមូលធនសម្រាប់ក្រុមហ៊ុន/សហគ្រាសដែលមានសក្តានុពល ក៏ដូចជាវិនិយោគិនសាធារណៈ ជាកត្តាចាំបាច់មិនអាចខ្វះបានសម្រាប់អភិវឌ្ឍវិស័យមូលបត្ររបស់ព្រះរាជាណាចក្រកម្ពុជា។

ឯកឧត្តមអគ្គនាយកបានបញ្ជាក់ថា៖ បច្ចុប្បន្ននេះ ក្រុមហ៊ុនដែលបានចុះបញ្ជីក្នុងផ្សារមូលបត្រកម្ពុជា មានក្រុមហ៊ុន/សហគ្រាស ចំនួន5 (ប្រាំ)រួមនឹងបុគ្គលចុះបញ្ជីលក់មូលបត្រកម្មសិទ្ធិចំនួន1(មួយ)គឺទី1 រដ្ឋាករទឹកស្វយ័តក្រុងភ្នំពេញ(PWSA) ទី2 ក្រុមហ៊ុនហ្គ្រេនធ្វីន អុីនធើណេសិនណល(ខេមបូឌា)ភីអិលស៊ី(GTI) ទី3 កំពង់ផែស្វយ័តភ្នំពេញ (PPAP) ទី4 ភ្នំពេញអេសអុីហ្សិត ភីអិលស៊ី(PPSP) និងទី5 កំពង់ផែស្វយ័តក្រុងព្រះសីហនុ (PAS)។ ចំណែកបុគ្គលចុះបញ្ជីលក់មូលបត្របំណុលចំនួន1 គឺគ្រឹះស្ថានមីក្រូហិរញ្ញវត្ថុ ហត្ថាកសិករ លីមីតធីតដែលទើបតែចុះបញ្ជីនៅផ្សារមូលបត្រកម្ពុជា (ផ.ម.ក)កាលពីថ្ងៃ5 ខែធ្នូ ឆ្នាំ2018 កន្លងទៅ។ គិតត្រឹមដំណាច់ឆ្នាំ2018 ទំហំជួញដូរសរុបមានចំនួន 3,781,231ភាគហ៊ុនប្រហែល នឹង 25 ពាន់លានរៀល(ប្រហែលជាង 6លានដុល្លារ និងមានមូលធនីយកម្មទីផ្សារចំនួន 1,771,678លានរៀល(ប្រហែល443ដុល្លារ)ហើយគណៈកម្មការមូលបត្រកម្ពុជាបានផ្តល់អត្តសញ្ញាណវិនិយោគិន ដល់អ្នកវិនិយោគបានចំនួន 20,549នាក់ (17,300នាក់ជាសញ្ជាតិខ្មែរ)។

ដោយឡែកគិតត្រឹមថ្ងៃទី8 ខែកុម្ភៈ ឆ្នាំ2019 ទំហំជួញដូរសរុបមានចំនួន 755,568ភាគហ៊ុន សើ្មនឹង 5ពាន់លានរៀល (ប្រហែលជាង 1លានដុល្លារ) និងមានមូលធនីយកម្មទីផ្សារចំនួន 2,297,853លានរៀល (574.46លានដុល្លារ) ហើយគណៈកម្មការមូលបត្រកម្ពុជា បានផ្តល់អត្តសញ្ញាណវិនិយោគិនដល់អ្នកវិនិយោគចំនួន 20,750នាក់។

នាពេលថ្មីៗនេះ រាជរដ្ឋាភិបាលបានចេញអនុក្រឹត្យស្តីពីការលើកទឹកចិត្តផ្នែកពន្ធដារក្នុងវិស័យ មូលបត្រដែលក្នុងអនុក្រឹត្យនោះមានគោលបំណងលើកទឹកចិត្តដល់ក្រុមហ៊ុន/សហគ្រាស បោះផ្សាយ មូល-បត្រកម្មសិទ្ធិ និង/ឬ មូលបត្របំណុលលើកដំបូងជាសាធារណៈ ដែលបានទទួលការអនុញ្ញាតពីគណៈកម្មការមូលបត្រកម្ពុជា និងបានចុះបញ្ជីជួញដូរមូលបត្រនៅទីផ្សារមូលបត្រប្រតិស្រុត និងលើកទឹកចិត្តដល់វិនិយោគិនសាធារដែលកាន់កាប់ាប់ និង/ឬ ទិញ-លក់មូលបត្ររដ្ឋ មូលបត្រកម្មសិទ្ធិ និង/ឬ មូលបត្របំណុល ដែលបានបោះផ្សាយលក់ជាសាធារណៈ និងបានចុះបញ្ជីជួញដូរមូលបត្រនៅទីផ្សារមូលបត្រ ។

លោក អ៊ុន សុធន តំណាងក្រុមហ៊ុនមកពីខេត្តព្រៃវែងបានមានចំណាប់អារម្មណ៍ថា៖ “ទី1- រដ្ឋាភិបាលមានការលើកទឹកចិត្តពន្ធរយៈពេល 3ឆ្នាំ ; ដូច្នេះបើមានការអនុគ្រោះផ្សេងៗទៀត ជាការល្អ ហើយខ្ញុំត្រូវការការគាំទ្រឱ្យខ្លាំងក្លាពីរដ្ឋាភិបាល ប្រសិនបើរដ្ឋាភិបាលអាចសម្រេចបាន។ ទី2- ក្រុមហ៊ុនដែលមានសក្តានុពលមកចុះបញ្ជី គាត់មើលឃើញអត្ថប្រយោជន៍នៃការមិនយកពន្ធ គាត់នឹងព្យាយាមពង្រីកវិស័យហិរញ្ញវត្ថុរបស់គាត់ ដោយងាកមកលើទីផ្សារមូលបត្រឱ្យបានច្រើន។ ទី3-នៅពេលណាដែលស្រុកយើងមានក្រុមហ៊ុនចុះបញ្ជីនៅក្នុងផ្សាររបស់យើងច្រើន ប្រជាពលររដ្ឋរបស់យើងមានឱកាសក្នុងការវិនិយោគ ការលេងភាគហ៊ុនក្នុងទីផ្សារមូលបត្រ គ្រប់វិស័យណាដែលគាត់ចូលរួមទិញភាគហ៊ុន”។

លោក សុធន បានបន្ថែមថា៖ “ដូច្នេះចំណុចនេះធ្វើឱ្យពលរដ្ឋកម្ពុជាងាកមកមើលវិស័យមូលបត្រហើយគាត់នឹងធ្វើការវិនិយោគ ទៅតាមវិស័យដែលគាត់ប្រកបអាជីវកម្មបច្ចុប្បន្ន។ ជីវភាពគាត់នឹងកើន ឡើងបន្តិចម្តងៗ ព្រោះគាត់មានប្រាក់តិចតួចមែនតែគាត់មានឱកាសវិនិយោគ គាត់មិនបានទុកលុយចោលក្នុងផ្ទះទេ នេះគឺជាចំណុចល្អរបស់រាជរដ្ឋាភិបាលកម្ពុជាក្នុងការលើកទឹកចិត្តផ្សារមូលបត្រកម្ពុជា”។

លោក យុន សុវណ្ណា នាយកប្រតិបត្តិនៃសមាគមគ្រឹះស្ថានមីក្រូហិរញ្ញវត្ថុ បានបង្ហាញចំណាប់អារម្មណ៍ដល់កាសែត ឡារ៉ែនពាណិជ្ជថា នេះជាការជំរុញវិស័យឯកជនយើងឱ្យចូលរួមកាន់តែសកម្មនៅក្នុងទីផ្សារ គឺដើម្បី ទី1-ទាញយកផលប្រយោជន៍ពីទីផ្សារបំណុល និងទីផ្សារមូលបត្រកម្ពុជា ដើម្បីពង្រឹងកិច្ចសហប្រតិបត្តិការរបស់ខ្លួន ពង្រីកអាជីវកម្ម។ ទី2-ដើម្បីពង្រឹងប្រព័ន្ធហិរញ្ញវត្ថុរបស់យើងឱ្យកាន់តែរឹងមាំនិងមានភាពទូលំទូលាយ ដោយយើងឃើញថា បច្ចុប្បន្នមានតែស្ថាប័នធនាគារប៉ុណ្ណោះដែលសកម្ម។

លោកបានបន្ដថា៖ ការមានការចូលរួមច្រើនពិវិស័យឯកជននៅក្នុងទីផ្សារមូលបត្រ និងការលក់មូលបត្របំណុល គឺជាការចាប់អារម្មណ៍ពីការលើកទឹកចិត្ត ការផ្តល់ជូនសម្រាប់គ្រឹះស្ថាន និងក្រុមហ៊ុននានាដែលបានចូលរួមក្នងការបោះផ្សាយសញ្ញាណប័ណ្ណ ឬមូលបត្របំណុល។

លោក សុវណ្ណា បានបញ្ជាក់ដែរថា៖ “ការចូលរួមរបស់គ្រឹះស្ថានមីក្រូហិរញ្ញវត្ថុនៅក្នុងវិស័យផ្សារមូលបត្រនេះ វាអាស្រ័យលើមូលនិធិ(ថ្លៃដើម)ពោលសម្រាប់វិស័យមីក្រូហិរញ្ញវត្ថុរបស់យើង នៅមានចំណុចខ្ពស់ បើប្រៀបធៀបទៅនឹងប្រទេសនានាផ្សេងទៀត(ដោយមិនគិតដល់ប្រទេសអភិវឌ្ឍន៍ទេ)ដោយថ្លៃដើមរបស់យើងមានតម្លៃ 8% ទៅ11% និងប្រែប្រួលអាស្រ័យលើប្រាក់ដុល្លារ និងប្រាក់រៀល។ ដូច្នេះការចូលរួមរបស់វិស័យមីក្រូហិរញ្ញវត្ថុ(ដែលជាស្ថាប័នស្ថិតក្រោមអាណាព្យាបាលរបស់ធនាគារ)ទៅក្នុងទីផ្សារមូលបត្រ ជាឆន្ទៈ យើងគិតថា ធនាគារ និងគ្រឹះស្ថានហិរញ្ញវត្ថុនៅមានច្បាប់ បទប្បញ្ញត្តិ ប្រទាក់ក្រឡាគ្នាដែលតម្រូវឱ្យមានការជជែកគ្នាច្រើនទៀត”។

លោកនាយកប្រតិបត្តិបានបញ្ជាក់ទៀតថា៖“ប៉ុន្តែកត្តាដែលជំរុញខ្លាំងសម្រាប់វិស័យមីក្រូហិរញ្ញវត្ថុឱ្យចូលរួម គឺការទាក់ទាញ និងការមើលឃើញគឺគ្រឹះស្ថានមីក្រូហិរញ្ញវត្ថុហត្ថាកសិករលីមីតធីត ដែលទើបតែចុះបញ្ជីនៅផ្សារមូលបត្រកម្ពុជាកាលពីថ្ងៃ5 ខែធ្នូ ឆ្នាំ2018 ថ្មីៗនេះ បានក្លាយជាបុគ្គលលក់មូលបត្របំណុលលើផ្សារមូលបត្រកម្ពុជា។ ដូច្នេះគ្រឹះស្ថានមីក្រូហិរញ្ញវត្ថុដទៃទៀតក៏នឹងពិចារណាសិក្សាអំពីតម្រូវការ និងស្វែងរកនីតិវិធី ដើម្បីឈានដល់ការចូលរួមក្នុងទីផ្សារមូលបត្រនេះ”។

ជាមួយគ្នានេះដែរ CSX បានឱ្យដឹងថា ក្រុមហ៊ុនចុះបញ្ជីជាសាធារណៈទាំងអស់បានបង្ហាញពីការអនុវត្តអាជីវកម្មដ៏រឹងមាំក្នុងឆ្នាំ2018។ មូលធនបត្រទីផ្សារសរុប បានកើនឡើង 86,2% ពី 303,8លានដុល្លារកាលពីថ្ងៃទី2 ខែមករា ឆ្នាំ2018 ដល់ 565,6លានដុល្លារនៅថ្ងៃទី7 ខែកុម្ភៈ ឆ្នាំនេះ។

តម្លៃភាគហ៊ុននៅកំពង់ផែស្វយ័តភ្នំពេញ និងកំពង់ផែស្វយ័តក្រុងព្រះសីហនុ បានកើនឡើងយ៉ាងខ្លាំង ជាពិសេសគឺ កើនឡើង 96,5% និង161,4 %។តម្លៃភាគហ៊ុននៅរដ្ឋាករទឹកស្វយ័តក្រុងភ្នំពេញបានកើនឡើងជាង59% ខណៈតំបន់សេដ្ឋកិច្ច ពិសេស Grand Twins និងតំបន់សេដ្ឋកិច្ចពិសេសភ្នំពេញមានកំណើនតិចតួចជាមួយតម្លៃភាគហ៊ុនកើន ឡើង 5,1% និង14,8 %។ បើតាម CSX បានឱ្យដឹងទៀតថា ជាមធ្យមតម្លៃភាគហ៊ុនបានកើនឡើង 66% ។

តម្លៃភាគហ៊ុនឆ្លុះបញ្ចាំងពីតម្លៃរបស់ក្រុមហ៊ុន ហើយតម្លៃនេះជួយបង្កើនស្ថានភាព និងកិត្តិនាមរបស់ក្រុមហ៊ុននៅក្នុងឧស្សាហកម្មមូលបត្រ។ ដោយសារតែតម្លៃរបស់វាបន្តកើនឡើង ក្រុមហ៊ុនមួយអាចបង្កើនប្រាក់ចំណូលកាន់តែច្រើន ពេលដែលការផ្តល់ភាគហ៊ុនកាន់តែតិច។

ទីផ្សារមូលបត្រ គឺជាប្រភពដ៏ល្អបំផុតនៃការផ្តល់មូលនិធិសម្រាប់កំណើនរយៈពេលវែងសម្រាប់ក្រុមហ៊ុនភាគច្រើន។ មិនដូចការខ្ចីប្រាក់ជាមួយស្ថាប័នហិរញ្ញវត្ថុទេ ការចូលរួមក្នុងផ្សារហ៊ុន មិនតម្រូវឱ្យមានការបង់ប្រាក់តាមកាលកំណត់ ការធានា ឬកាតព្វកិច្ចណាមួយឡើយ។ លោក សុវណ្ណា បន្តថា“អ្វីដែលសំខាន់បំផុតនោះ គឺក្រុមហ៊ុនដែលទើបបានចុះបញ្ជីថ្មី អាចទទួលបានការលើកទឹកចិត្តពន្ធរយៈពេល3ឆ្នាំ នេះបើយោងតាមអនុក្រឹត្យស្ដីពីការលើកទឹកចិត្តពន្ធសម្រាប់វិស័យមូលបត្រ ដែលមានប្រសិទ្ធភាពចាប់ពីថ្ងៃទី4 ខែមករា ឆ្នាំ2019 រហូតមក”។ជារួម វិស័យមូលបត្រជាកាតាលីករដ៏សំខាន់មួយក្នុងការជំរុញឱ្យសេដ្ឋកិច្ចជាតិអភិវឌ្ឍបាន លឿនដូច្នេះការចូលរួមពីក្រុមហ៊ុន/សហគ្រាសសក្តានុពល ក៏ដូចជាវិនិយោគិនសាធារណៈ ជាកត្តាចាំបាច់ មិនអាចខ្វះបានសម្រាប់អភិវឌ្ឍវិស័យមូលបត្រនៅព្រះរាជាណាចក្រកម្ពុជា៕

March 1, 2019

មានបញ្ហាក្លិនមាត់ អាចបញ្ជាក់ពីសញ្ញានៃជំងឺទាំង6 ដែលអ្នកមិនបានកត់សម្គាល់

មនុស្សមួយចំនួនដែលមានបញ្ហាក្លិនមាត់មិនល្អ ពួកគេតែងតែរកវិធីដើម្បីបំបាត់វាដូចជា ការដុសសម្អាតធ្មេញភ្លាមៗ ការប្រើឧបករណ៍បាញ់បំបាត់ក្លិនក្នុងមាត់ ការខ្ពុរមាត់ ឬការទំពាស្ករកៅស៊ូជាដើម។ មានមនុស្សមិនច្រើននោះទេដែលជួបនឹងបញ្ហានេះ ហើយព្យាយាមរកមូលហេតុដែលបណ្ដាលឱ្យមានក្លិនមាត់មិនល្អ និងរកដំណោះស្រាយ ដើម្បីបំបាត់វាជារៀងរហូត។ តើអ្នកធ្លាប់គិតទេថា ក្លិនមាត់របស់អ្នកអាចប្រាប់អំពីសុខភាពរាងកាយរបស់អ្នក? ជំងឺទូទៅមួយចំនួន ដែលរោគសញ្ញាអាចត្រូវបានបង្ហាញដំបូងតាមរយៈក្លិនមាត់របស់អ្នក។ ទស្សនាវដ្តី ឡារ៉ែន សូមជម្រាបអំពីជំងឺទាំង6 ដែលមានរោគសញ្ញាដំបូងតាមរយៈក្លិនមាត់ដូចខាងក្រោមនេះ។

1. ជំងឺអញ្ចាញធ្មេញ
គឺជាជំងឺដែលបណ្ដាលឱ្យមានការរលាកហើមដល់អញ្ចាញធ្មេញ ឆ្អឹង និងសាច់ជុំវិញធ្មេញ។ វាបណ្តាលមកពីមេរោគតូចៗ ដែលយើងតែងតែហៅថា បាក់តេរី ដែលតោងជាប់ធ្មេញ និងអញ្ចាញធ្មេញ។ បាក់តេរីទាំងនេះគឺជាកំណកកំបោរដែលតោងជាប់នឹងធ្មេញរបស់អ្នក។ វាមិនមានពណ៌ ស្អិតៗដែលបង្កឡើងពីកត្តាចំណីអាហារ។ បាក់តេរីដែលតោងជាប់ក្លាយជាកំណកកំបោរបានមកពីសារជាតិស្ករ ដែលបំលែងពីចំណីអាហារ វាបង្កើតទៅជាជាតិពុល និងសារធាតុគីមីផ្សេងៗ។ ជាតិពុលទាំងនោះ ធ្វើឱ្យរលាកអញ្ចាញធ្មេញដែលបណ្តាលឱ្យហើម សណ្តក និងងាយចេញឈាមនៅពេលដុសធ្មេញ។ យូរៗទៅវានឹងធ្វើឱ្យធ្មេញរបូតចេញពីអញ្ចាញតែម្តង។

2. ជំងឺរលាកផ្លូវដង្ហើម
ក្លិនមាត់មានភាពមិនប្រក្រតីអាចបណ្តាលមកពីការឆ្លងមេរោគរលាកផ្លូវដង្ហើមដូចជា ជំងឺផ្តាសាយ និងជំងឺរលាកប្រហោងឆ្អឹងមុខសងខាងច្រមុះជាដើម។ វាបណ្តាលមកពីបាក់តេរីជាច្រើន ដែលមាននៅក្នុងរន្ធច្រមុះ និងប្រហោងឆ្អឹងមុខសងខាងច្រមុះដែលធ្វើឱ្យមានក្លិនមិនល្អ។ ក្នុងករណីខ្លះ ក្លិនមាត់របស់អ្នកក៏អាចបង្ហាញអំពីជំងឺដុះសាច់បំពង់កផងដែរ ។

3. ជំងឺធាត់
ខ្យល់ដង្ហើមមិនល្អ ត្រូវបានអ្នកស្រាវជ្រាវអះអាងថា មានភាគរយពីជាតិខ្លាញ់ខ្ពស់ ដែលមានសារធាតុមេតាន និងអុីដ្រូសែនច្រើនជាង បើប្រៀបធៀបទៅនឹងអ្នកដែលមានសុខភាពល្អ។ ឧស្ម័នទាំងពីរនេះបណ្តាលឱ្យមានក្លិនស្អុយស្រដៀងនឹងក្លិនបង្គន់ដែរ។ ហើយឧស្ម័នទាំងពីរនេះវាងាយនឹងធ្វើឱ្យរាងកាយរបស់អ្នកវិវឌ្ឍទៅរកភាពធាត់ដោយមិនដឹងខ្លួន។

4. ជំងឺប្រេះមាត់
ជំងឺប្រេះមាត់ គឺជាបញ្ហាមួយដែលបណ្តាលមកពីបញ្ហានៅក្នុងក្រពេញទឹកមាត់ ឬការដកដង្ហើមតាមមាត់។ ប្រសិនបើអ្នកមានជំងឺប្រេះមាត់ ហើយស្ងួតមាត់ ក្លិនមាត់របស់អ្នកនឹងមានក្លិនមិនល្អខ្លាំង រួមជាមួយនឹងរោគសញ្ញាដទៃទៀត។

5. ខ្សោយថ្លើម
ជំងឺថ្លើមអាចកត់សម្គាល់បានយ៉ាងងាយស្រួល ដោយរោគសញ្ញាខ្យល់ដង្ហើមរបស់អ្នកមានក្លិនមិនល្អខ្លាំង។ នៅពេលដែលថ្លើមដំណើរការមិនល្អ ជាតិពុលនៅក្នុងរាងកាយបញ្ចេញមកតាមសួត ដែលបណ្តាលឱ្យក្លិនមានមិនល្អ។ បើអ្នកសង្ស័យខ្លាំង សូមពិគ្រោះជាមួយគ្រូពេទ្យជំនាញ ដើម្បីធ្វើតេស្ត៍ឈាមរកមេរោគថ្លើម។

6. ជំងឺទឹកនោមផ្អែម
ជំងឺទឹកនោមផ្អែម និងជំងឺអញ្ចាញធ្មេញអាចកើតឡើងជាមួយគ្នា ហើយក៏អាចធ្វើឱ្យជំងឺស្ដែងចេញមកតាមរយៈក្លិនមាត់មិនល្អផងដែរ។ យ៉ាងណាមិញ សញ្ញាព្រមានរបស់ជំងឺអញ្ចាញធ្មេញ មានដូចជា៖
– អញ្ចាញធ្មេញដែលហូរឈាម ក្រោយពីប្រើអំបោះរូសធ្មេញ ឬដុសសម្អាតធ្មេញរួច។
– អញ្ចាញធ្មេញដែលតឹងឈឺ ហើម ឬក្រហម
– សឹកអញ្ចាញធ្មេញ ដែលធ្វើឱ្យធ្មេញមើលទៅវែងជាងមុន
– ក្លិនមាត់មិនល្អ
– មានខ្ទុះចេញមកនៅពេលសង្កត់អញ្ចាញធ្មេញប៉ះគ្នា
– បាត់បង់ធ្មេញ ឬធ្មេញរង្គើ។ល៕

February 28, 2019

ធ្វើម៉េចដើម្បីទទួលបានត្រគាកស្រឡូនស្អាត?

ជាតិជាស្ត្រីយើងស្ទើរតែអាចនិយាយថាមិនមានអ្នកណាម្នាក់ដែលថាមិនចង់បានដៃជើង ភ្លៅ ចង្កេះ និងត្រគាកដ៏ស្រស់ស្អាត សិចស៊ីគួរជាទីទាក់ភ្នែកនៃអ្នកផងទាំងពួងនោះទេ។ ចង្កេះ និងត្រគាកស្រឡូនស្អាតកាន់តែជួយឱ្យរាងកាយទាំងមូលរបស់អ្នកមើលទៅសមសួនពោរពេញដោយមន្តស្នេហ៍ទ្វេដង។ ដើម្បីឱ្យមានត្រគាកស្រស់ស្អាតដូចប៉ងប្រាថ្នានោះអ្នកគួរតែអនុវត្តតាមចំណុចមួយចំនួនដូចខាងក្រោម៖

ម៉ាស្សា : ពេលដែលអ្នកងូតទឹកម្តងៗអ្នកគួរចំណាយពេលបន្តិចធ្វើការម៉ាស្សាត្រង់ចង្កេះ និងត្រគាកឱ្យបានជាប្រចាំ។ ប្រើដៃរបស់អ្នកម៉ាស្សាពីបរិវេណចង្កេះចុះមកត្រគាកទៅមកៗ ព្រោះការធ្វើបែបនេះអាចជួយកាត់បន្ថយសារធាតុខ្លាញ់ដែលផ្ទុកនៅម្តុំនោះចេញបានខ្លះ។

ហាត់ប្រាណ : រាល់ពេលដែលអ្នកហាត់ប្រាណ អ្នកត្រូវចំណាយពេលប្រហែល5ទៅ10នាទីដើម្បីធ្វើចលនាត្រគាក និងភ្លៅ។ គេងផ្អៀង ហើយលើកជើងចុះឡើងៗ (យ៉ាងហោចណាស់15ដងនៃជើងម្ខាង)។ វិធីនេះជួយកាត់បន្ថយខ្លាញ់ និងរឹតបន្តឹងសាច់ដុំភ្លៅ និងត្រគាកឱ្យមានភាពតឹងណែនល្អ។ លំហាត់ប្រាណបែបនេះគួរតែធ្វើឡើងរៀងរាល់ពេលព្រឹក។ ក្រៅពីជួយឱ្យអ្នកទទួលបានការសម្រកខ្លាញ់ក្នុងរាងកាយហើយនោះ ការហាត់ប្រាណឱ្យបានទៀងទាត់ក៏អាចជួយឱ្យអ្នកបញ្ចេញចោលរាល់សារធាតុពុលទាំងឡាយក្នុងរាងកាយចេញមកក្រៅបានយ៉ាងល្អទៀតផង ហើយការបញ្ចេញជាតិពុលអស់ទាំងនេះគឺពិតជាល្អខ្លាំងណាស់សម្រាប់សុខភាព និងសម្រស់របស់អ្នក។ បន្ទាប់ពីការហាត់ប្រាណបញ្ចេញញើសរួចនោះ អ្នកចាំបាច់ត្រូវទទួលទានទឹកឱ្យបានច្រើនផងដែរ។ បើទោះជាអ្នកមិនចូលចិត្ត ឬមិនចង់អនុវត្តវិធីហាត់ប្រាណតាមបែបខាងលើក៏មិនមានបញ្ហាដែរ ព្រោះការពិតទៅហាត់ប្រាណបែបណាក៏បានប្រយោជន៍ចំពោះសុខភាព និងអាចជួយសម្រកទម្ងន់បានដែរ សុំតែម្យ៉ាងគឺកុំខ្ចិលទៅបានហើយ។

អាហារ : ការហាត់ប្រាណជាផ្នែកមួយដែលធ្វើឱ្យភ្លៅរបស់អ្នកមានភាពស្រឡូនស្អាតជាងមុន ប៉ុន្តែសូមចងចាំចំណុចមួយទៀត គឺ ការហាត់ប្រាណអាចនឹងមិនមានប្រសិទ្ធភាពនោះទេ ប្រសិនបើរបបអាហារដែលអ្នកទទួលទានចូលទៅមានភាពមិនសមស្រប។ មានប្រភេទអាហារជាច្រើនដែលអាចកាត់បន្ថយសារធាតុខ្លាញ់តាមបរិវេណចង្កេះ ភ្លៅ និងត្រគាកបាន។ ប្រភេទអាហារទាំងនោះមានដូចជា អង្ករសំរូប ត្រាវ ខ្លាញ់ត្រី និងសណ្កែកជាដើម។ ក្រៅពីទទួលទានអាហារមានប្រយោជន៍ហើយនោះ ឡារ៉ែន ក៏ចង់ឱ្យអ្នកពោលពាក្យលាចំពោះអាហារមួយចំនួនដូចជា ប្រភេទអាហារដែលមានជាតិស្ករខ្ពស់ អាហារមានរសជាតិផ្អែម ប៊័រ កាហ្វេអុីន និងអាហារខ្លាញ់ ចៀនបំពងជាដើម ព្រោះវាជាមូលហេតុធ្វើឱ្យមានខ្លាញ់ផ្ទុកនៅក្នុងរាងកាយរបស់អ្នកកាន់តែច្រើន៕

February 28, 2019

គុណប្រយោជន៍3យ៉ាងដែលស៊ុតផ្នែកព័ណសជួយដល់សម្រស់

ស៊ុត ជាអាហារប្រចាំផ្ទះដែលមានលក្ខណៈធម្មតា និងតម្លៃមិនថ្លៃ ដែលទិញបានដោយងាយស្រួល។ មិនតែប៉ុណ្ណោះ ស៊ុត មានសារធាតុចិញ្ចឹម ព្រមទាំងសមាសធាតុរ៉ែជាច្រើនទៀតដែលល្អសម្រាប់សុខភាព។ ក្រៅពីយកស៊ុតទៅចម្អិនជាអាហារហើយនោះ ស៊ុតត្រូវបានគេមើលឃើញថា មានគុណប្រយោជន៍ចំពោះផ្នែករក្សាសម្រស់ រហូតដល់អ្នកខ្លះទទួលទានស៊ុតឆៅ ដើម្បីរក្សាសម្រស់ តែផ្ទុយទៅវិញ ស៊ុតឆៅ បើទទួលទានលើសកំណត់វាក៏មិនល្អចំពោះសម្រស់ និងសុខភាពដែរ។ ស៊ុតមានគុណសម្បត្តិក្នុងការថែរក្សាសម្រស់ជាច្រើនដូចជា ជួយកម្ចាត់មុនតូចៗ ជួយបន្តឹងស្បែកមុខ ជួយបំបាត់ស្នាមជ្រួញលើផ្ទៃមុខ ជួយធ្វើឱ្យមុខស្អាតផូរផង់ និងសភ្លឺរលោងជាដើម។ តែថ្ងៃនេះ ទស្សនាវដ្ដី ឡារ៉ែន សូមជម្រាបជូននូវគុណប្រយោជន៍សំខាន់3យ៉ាងរបស់ស៊ុតផ្នែកព័ណសក្នុងការថែរក្សាសម្ផស្ស។

1. កម្ចាត់ជាតិពុលជួយឱ្យស្បែកតឹងណែនគ្រាន់តែឧស្សាហ៍បំពោកមុខដោយស៊ុតផ្នែកពណ៌សជាប្រចាំរាល់ថ្ងៃប្រមាណមួយសប្តាហ៍ នោះអ្នកនឹងសង្កេតឃើញការប្រែប្រួលនៃស្បែកមុខរបស់អ្នក គឺស្បែកមុខរបស់អ្នកនឹងតឹងហាប់ណែន ស ភ្លឺថ្លា ហើយក្មេងជាងវ័យ។ អ្នកអាចថែទាំស្បែកមុខរបស់អ្នកដោយប្រើស៊ុតផ្នែកពណ៌សដើម្បីឱ្យស៊ុតសបឺតស្រូប និងកម្ចាត់សារធាតុពុលចេញពីរន្ធរោមឱ្យអស់។ គ្រាន់តែបំពោកផ្នែកពណ៌សនៃស៊ុតនៅលើផ្ទៃមុខរបស់អ្នកទុកចោលប្រមាណ20នាទី ហើយលាងសម្អាតចេញវិញដោយទឹកស្អាត ដើម្បីជួយកម្ចាត់ជាតិពុលពីស្បែកមុខ និងជួយសម្រួលដល់តុល្យភាពនៃស្បែកធានាថានឹងផ្តល់នូវប្រសិទ្ធភាពជាទីគាប់ចិត្តដល់ផ្ទៃមុខរបស់អ្នកជាមិនខាន។

2. ជួយកម្ចាស់មុនខ្សាច់ការបកមុនខ្សាច់នៅលើផ្ទៃមុខ ដោយមិនភ័យព្រួយចំពោះការប៉ះពាល់ដល់សុខភាពស្បែកមុខ ដោយប្រើផ្នែកពណ៌សនៃស៊ុត ដែលមិនត្រឹមតែមិនប៉ះពាល់ដល់សុខភាពស្បែកមុខនោះទេ ថែមទាំងជួយបន្តឹងរន្ធរោម ជម្រុញដល់ការផលិតកោសិកាថ្មី កម្ចាត់ជាតិពុលពីស្បែកមុខ និងធ្វើស្បែកមុខស ភ្លឺថ្លា ហាប់តឹងណែន ដោយអ្នកគ្រាន់តែយកស៊ុតពណ៌សមកអនុវត្តតាមការណែនាំខាងក្រោមនេះជាការស្រេច។
– យកស៊ុតមាន់ផ្នែកពណ៌ស មកលាបបំពោកនៅលើផ្ទៃមុខដែលមានមុន ឬត្រង់បរិវេណដែលអ្នកចង់បកមុនខ្សាច់។
– យកក្រដាសស្អាតបិតពីលើស៊ុតមាន់ ដែលអ្នកបានលាបនៅលើផ្ទៃមុខនោះ។
– អ្នកអាចបន្ថែមទឹកក្រូចឆ្មារ 2ទៅ3តំណក់ ឬមិនបាច់ក៏បាន។
– ពេលស៊ុតមាន់ផ្នែកពណ៌សស្ងួត សូមបកបន្ទះក្រដាសដែលបិតនៅលើផ្ទៃមុខនោះចេញ នោះមុនខ្សាច់នឹងមកតាមស៊ុតពណ៌សនោះអស់ជាមិនខាន។

3. ស៊ុតផ្នែកពណ៌ស ជួយបឺតស្រូបគ្រាប់មុនស៊ុតផ្នែកពណ៌ស មានប្រយោជន៍ចំពោះស្បែកមុខ ជាពិសេសប្រសិនបើអ្នកត្រូវការកម្ចាត់មុនខ្សាច់ ឬមុនក្បាលខ្មៅ ដោយពុំចាំបាច់ប្រើដៃសង្កត់ ឬច្របាច់ឱ្យស្បែកជាំឡើយ គ្រាន់តែលាងស្បែកត្រង់កន្លែងដែលមានមុនឱ្យស្អាត ផ្ដិតឱ្យស្ងួតទឹក ហើយប្រើបន្ទះសំឡីជ្រសក់ស៊ុតផ្នែកពណ៌សរួចហើយបិទនៅលើផ្ទៃមុខ (លើកលែងបិរវេណជុំវិញភ្នែក និងបបូរមាត់) រួចរង់ចាំឱ្យស្ងួត។ ពេលសំឡីដែលជ្រលក់ស៊ុតពណ៌សនោះស្ងួតហើយ សឹមបកវាចេញ នោះអ្នកនឹងឃើញមុនក្បាលខ្មៅជាប់មកជាមួយនឹងសំឡី និងក្បាលមុនពណ៌ស លៀនចេញមក។ បន្ទាប់មកទៀត សូមប្រើទឹកក្ដៅឧណ្ហៗជូតលើផ្ទៃមុខរបស់អ្នក ហើយលាងដោយទឹកត្រជាក់ ដើម្បីបិទរន្ធរោមមកវិញជាការស្រេច៕

February 28, 2019

ឥឡូវនេះ អ្នកឈប់រៀនយូរឆ្នាំក៏អាចត្រឡប់មករៀន និងបានសញ្ញាបត្រដូចសិស្សក្នុងសាលាដែរ

ការអប់រំជាមូលដ្ឋានយ៉ាងសំខាន់ក្នុងការជំរុញឱ្យមានការអភិវឌ្ឍក្នុងសង្គម និងជាចំណុចដែលមិនអាចខ្វះបាននៃគោលដៅអភិវឌ្ឍន៍ប្រកបដោយចីរភាពសម្រាប់ពិភពលោក។ ហេតុនេះការជំរុញមនុស្សទាំងឡាយណាដែលរៀនមិនទាន់ចប់ថ្នាក់មូលដ្ឋាន ឱ្យទទួលបានការអប់រំឡើងវិញសម្រាប់បន្តអាជីពជំនាញនៅថ្ងៃអនាគត គឺជាផែនការសកម្មភាពប្រកបដោយភាពវិជ្ជមានមួយដើម្បីជួយសង្គមផង និងដោះស្រាយបញ្ហាជាសកលផង។

នៅកម្ពុជា ក្រសួងអប់រំ យុវជន និងកីឡា បានសហការជាមួយក្រសួងការងារ និងបណ្តុះបណ្តាលវិជ្ជាជីវៈ អង្គការ UNESCO ក្រុមហ៊ុនឯកជន និងដៃគូពាក់ព័ន្ធ បង្កើតកម្មវិធីមួយឈ្មោះថា កម្មវិធីសមមូលអប់រំកម្រិតមូលដ្ឋានតាមអុីនធើណិត (Basic Education Equivalency Program ឬ BEEP) ដើម្បីជួយដល់សិស្សដែលបានបោះបង់ចោលការសិក្សាឱ្យបានត្រឡប់មកសិក្សាវិញតាមរយៈបច្ចេកវិទ្យា។

ឯកឧត្តមបណ្ឌិតសភាចារ្យ ហង់ ជួនណារ៉ុន រដ្ឋមន្ត្រីក្រសួងអប់រំ យុវជន និងកីឡា បានលើកឡើងថា កម្មវិធីនេះមានគោលដៅសំខាន់សម្រាប់ជួយដល់សិស្សដែលមិនមានលទ្ធភាពគ្រប់គ្រាន់សម្រាប់ការសិក្សាបន្តឱ្យចប់ថ្នាក់ទី9 ឬអ្នកដែលបានបោះបង់ចោលការសិក្សាឱ្យវិលត្រឡប់មកសិក្សាឡើងវិញ។ មូលហេតុសំខាន់ៗដែលសិស្សគួរតែត្រឡប់មកសិក្សាវិញនោះ គឺទី1 យុវជនម្នាក់ៗនឹងមិនអាចមានការងារល្អធ្វើបានទេ ប្រសិនបើមិនបានចប់ថ្នាក់សិក្សាមូលដ្ឋានហើយបើទោះបីជាមានការងារធ្វើក៏បានត្រឹមតែការងារ និងជំនាញសាមញ្ញៗតែប៉ុណ្ណោះ។ ទី2 គឺក្នុងក្របខ័ណ្ឌអន្តរជាតិ យើងមានគោលដៅអភិវឌ្ឍន៍ប្រកបដោយចីរភាព (SDG) ដែលចង់ឱ្យប្រជាជនទាំងអស់រៀនចប់យ៉ាងហោចណាស់ត្រឹមថ្នាក់ទី9 ហេតុនេះដើម្បីសម្រេចបានគោលដៅនេះ យើងនឹងព្យាយាមសម្រួលគ្រប់លទ្ធភាពឱ្យយុវជនជាច្រើនដែលមិនបានចូលសាលា បានមកសិក្សាឱ្យចប់ថ្នាក់មូលដ្ឋាន ហើយគាត់ក៏នឹងទទួលបានសញ្ញាបត្រសមមូលមានតម្លៃស្មើនឹងសញ្ញាបត្រមធ្យមសិក្សាទុតិយភូមិផងដែរ។

ឯកឧត្តម ហង់ ជួនណារ៉ុន កំពុងសាកល្បងប្រើកម្មវិធី BEEP

ឯកឧត្តម ហង់ ជួនណារ៉ុន មានប្រសាសន៍ថា៖ “កម្មវិធី BEEP នេះយើងមានបញ្ចូលមុខវិជ្ជាជាច្រើនដូចជារូបវិទ្យា គីមីវិទ្យា ភាសាខ្មែរ គណិតវិទ្យា ភាសាអង់គ្លេស ព័ត៌មានវិទ្យា និងជំនាញមួយចំនួនផ្សេងៗទៀត ដូចជាសហគ្រិនភាព យេនឌ័រ និងទេសចរណ៍ជាដើម។ បន្ទាប់ពីរៀនចប់កម្មវិធីទាំងអស់នេះ សិស្សអាចបន្តថ្នាក់វិទ្យាល័យ ឬជំនាញវិជ្ជាជីវៈរយៈពេល 3ឆ្នាំបន្ថែមទៀតបាន ដូចជានៅសៀមរាបអាចបន្តមុខវិជ្ជាទេសចរណ៍ ហើយទទួលបានសញ្ញាបត្រសមមូលស្មើនឹងសញ្ញាបត្របាក់ឌុបដែរ”។

រដ្ឋមន្ត្រីក្រសួងអប់រំ យុវជន និងកីឡា បានលើកឡើងផងដែរថា យុវជនយើងបច្ចុប្បន្នចូលចិត្តប្រើប្រាស់បណ្តាញអនឡាញ ហើយគ្រប់ៗគ្នាសុទ្ធតែមានទូរស័ព្ទដៃទំនើប ហេតុនេះសូមប្រើប្រាស់បណ្តាញអនឡាញឱ្យមានប្រយោជន៍។ ប្រសិនបើចង់សិក្សាបន្ត សិស្សអាចចុះឈ្មោះរៀនបានគ្រប់ទីកន្លែង គ្រប់ពេលវេលា តាមរយៈទូរស័ព្ទដៃ ឬបើខ្វះឧបករណ៍ ពួកគេអាចមកសិក្សានៅមជ្ឈមណ្ឌលនានាបាន ព្រោះក្នុងកម្មវីធីនេះសុទ្ធតែផលិត និងថតដោយគ្រូចំណានៗ និងពូកែ។

លោក Santosh Khatri ប្រធានផ្នែកអប់រំនៃអង្គការយូណេស្កូ បានលើកឡើងថា ការសម្រេចគោលដៅដើម្បីការអភិវឌ្ឍប្រកបដោយចីរភាពឆ្នាំ2030 មានឧបសគ្គជាច្រើន តែយើងសង្ឃឹមថា តាមរយៈការធ្វើការងារជាដៃគូជាមួយក្រសួងអប់រំ និងស្ថាប័នពាក់ព័ន្ធដើម្បីបន្តបណ្តុះបណ្តាលជំនាញ និងវិជ្ជាជីវៈផ្សេងៗនៅពេលនេះនឹងអាចធ្វើឱ្យយើងសម្រេចបាននូវគោលដៅដ៏សំខាន់នេះ។

ឯកឧត្តម ចឹក លីម អគ្គលេខាធិការង នៃអគ្គលេខាធិការដ្ឋានក្រុមប្រឹក្សាជាតិកម្ពុជាដើម្បីអភិវឌ្ឍយុវជនបានលើកឡើងថា កម្មវិធី BEEP ត្រូវបានបង្កើតឡើងដោយមើលឃើញថា សិស្សកម្ពុជាកំពុងសិក្សាជាមធ្យមនៅថ្នាក់បឋមសិក្សាមានចំនួន 95% តែសម្រាប់អ្នកបញ្ចប់ការសិក្សានៅកម្រិតមធ្យមសិក្សាបឋមភូមិវិញមានទាបជាង 45% នេះបើយោងតាមសូចនាករសាធារណៈឆ្នាំ2015-2016 និងឆ្នាំ2016-2017។ អត្រានេះជាចំនួនមួយដែលយើងត្រូវយកចិត្តទុកដាក់ដើម្បីធ្វើយ៉ាងណាឱ្យសិស្សដែលបានបញ្ចប់ការសិក្សាថ្នាក់ទី6 ហើយមិនបានបន្តការសិក្សា ឬអ្នកបោះបង់ការសិក្សាត្រឹមថ្នាក់ទី 7 ទី8 ឬទី9 បានសិក្សាឡើងវិញ យ៉ាងហោចណាស់ចប់ថ្នាក់មធ្យមសិក្សាទុតិយភូមិដែរដើម្បីជាទុនមូលដ្ឋានសម្រាប់ឱ្យពួកគាត់បន្តចាប់យកជំនាញដែលប្រសើរជាងមុនធ្វើជាអាជីពចិញ្ចឹមជីវិត។

ឯកឧត្តម ចឹក លីម បានមានប្រសាសន៍ថា៖ “ដើម្បីជួយដល់សិស្សដែលបានបោះបង់ចោលការសិក្សានៅកម្រិតមធ្យមសិក្សាបឋមភូមិឱ្យបានចូលរៀនវិញតាមបច្ចេកវិទ្យា ឥឡូវនេះយើងមានបង្កើតមជ្ឈមណ្ឌលសិក្សាចំនួន 10ទីតាំង ដែល 5ទីតាំងនៅរាជធានីភ្នំពេញ និង 5ទីតាំងផ្សេងទៀតស្ថិតនៅខេត្តសៀមរាប។ នៅក្នុងមជ្ឈមណ្ឌលទាំងនោះមានបំពាក់សម្ភារបរិក្ខារ និងឧបករណ៍អេឡិចត្រូនិក (Tablets) ដើម្បីឱ្យសិស្សបានចូលរៀនដោយឥតគិតថ្លៃ”។

ឯកឧត្តមអគ្គលេខាធិការរង បានលើកឡើងផងដែរថាមជ្ឈមណ្ឌលទាំង10 នេះ មានមជ្ឈមណ្ឌល2 នៅរាជធានីភ្នំពេញ និង 3នៅខេត្តសៀមរាបគ្រប់គ្រងដោយក្រសួងអប់រំ យុវជន និងកីឡា និងមជ្ឈមណ្ឌល 2 នៅភ្នំពេញ និង 3នៅសៀមរាប គ្រប់គ្រងដោយក្រសួងការងារ និងបណ្តុះបណ្តាលវិជ្ជាជីវៈ។ បច្ចុប្បន្ននេះយើងកំពុងព្យាយាមគ្រប់លទ្ធភាពដើម្បីបង្កើតគណៈកម្មការទទួលស្គាល់ និងវាយតម្លៃ រួមទាំងបណ្តុះបណ្តាលបន្ថែម ដើម្បីពង្រីកវិសាលភាពនៃការផ្តល់សេវា BEEP ឱ្យកាន់តែប្រសើរឡើង។ ហើយជាទិសដៅបន្ទាប់យើងនឹងបញ្ចប់ការថតសកម្មភាពបង្រៀនលើមុខវិជ្ជាដែលនៅសេសសល់ដើម្បីដាក់បញ្ចូលទៅក្នុងប្រព័ន្ធសម្រាប់សិស្សសិក្សា បន្តបំពាក់សម្ភារបន្ថែមនៅមណ្ឌលសិក្សាទាំងអស់នៅទូទាំងប្រទេស និងផ្សព្វផ្សាយឱ្យកាន់តែទូលំទូលាយដើម្បីលើកទឹកចិត្តដល់យុវជនក្រៅសាលាឱ្យចូលរួមកម្មវិធី BEEP និងនិស្សិតស្ម័គ្រចិត្តដើម្បីធ្វើជាអ្នកសម្របសម្រួល ឬជួយបង្រៀនជាដើម។ ក្រៅពីនេះក្រសួងនឹងមានផែនការក្នុងការរៀបចំកិច្ចប្រជុំគណៈកម្មការវាយតម្លៃ និងការទទួលសញ្ញាបត្រ ដើម្បីធានាថា សិស្សដែលបានចេញពីកម្មវិធីនេះមានសមត្ថភាពគ្រប់គ្រាន់ជាមូលដ្ឋាន រួមទាំងសកម្មភាពសំខាន់ៗមួយចំនួនបន្ថែមទៀតលើការងារបង្រៀនតាមបច្ចេកវិទ្យា និងការជំរុញឱ្យកាន់តែមានប្រសិទ្ធភាព៕

February 28, 2019

ឱកាសស្វែងយល់ពីអចលនទ្រព្យនៅអូស្ត្រាលី

យោងតាមតួលេខគណនេយ្យជាតិចុងក្រោយបង្អស់ដែលចេញផ្សាយដោយការិយាល័យស្ថិតិ អូស្ត្រាលី (The Australian Bureau of Statistics ឬ ABS) បានបង្ហាញថា បន្ទាប់ពីកំណើន 2.1%ក្នុងឆ្នាំ2016-17 ផលិតផលក្នុងស្រុកសរុបពិតប្រាកដរបស់ប្រទេសអូស្ត្រាលីបានកើនឡើង 2.9% ក្នុងឆ្នាំ2017-18។

បច្ចុប្បន្នអូស្ត្រាលីកំពុងឈានដល់ឆ្នាំទី28 នៃកំណើនសេដ្ឋកិច្ចជាប់ៗគ្នា ហើយក្នុងចន្លោះឆ្នាំ2019 និងឆ្នាំ2023 សេដ្ឋកិច្ចរបស់ប្រទេសអូស្ត្រាលីត្រូវបានព្យាករថា នឹងមានភាពប្រសើរជាងសេដ្ឋកិច្ចរបស់ប្រទេសជឿនលឿនធំៗដទៃទៀត។ នេះបើយោងតាមរបាយការណ៍ទស្សនវិស័យសេដ្ឋកិច្ចពិភពលោករបស់មូលនិធិរូបិយវត្ថុអន្តរជាតិ (IMF) កាលពីខែមេសា ឆ្នាំ2018។

ដោយឡែកតំបន់ ហ្គោលខូស្ត (Gold Coast) ឬឆ្នេរសមុទ្រមាស គឺជាទិសដៅរបស់អ្នកទេសចរអូស្ត្រាលីដែលមានចំនួនប្រហែល 11លាននាក់ក្នុងមួយឆ្នាំ។ គួរឱ្យភ្ញាក់ផ្អើលណាស់ ទីក្រុងនេះមានសមត្ថភាពផលិតទ្វេដងនៃផលិតផលក្នុងស្រុកសរុបរបស់ខ្លួនប្រហែល18,9ដុល្លារអូស្ត្រាលីក្នុងរយៈពេល10ឆ្នាំ។ វាក៏ចង្អុលបង្ហាញផងដែរនូវការអភិវឌ្ឍ GDP 5% យ៉ាងជាប់លាប់។ ខាងក្រោមនេះគឺជាកិច្ចសម្ភាសន៍រវាងលោក Duke Vaughan នាយកគ្រប់គ្រងនៃក្រុមហ៊ុន Crown Realty International អំពីអចលនទ្រព្យនៅតំបន់ ហ្គោលខូស្ត (Gold Coast City)។

1- តើបច្ចុប្បន្នអចលនទ្រព្យនៅប្រទេសអូស្ត្រាលីមានការរីកចម្រើនកម្រិតណាដែរ?
ប្រទេសអូស្ត្រាលី ជាប្រទេសអភិវឌ្ឍន៍ហើយក៏ពិតមែន តែវិនិយោគិនក៏នៅតែមានឱកាសវិនិយោគដែរ ព្រោះមនុស្សតែងមានកំណើនរហូតជាមួយនឹងការរីកចម្រើន។ បើមនុស្សមានការកើនឡើង ដូច្នេះតែងតែត្រូវការឧបករណ៍ប្រើប្រាស់ និងអចលនទ្រព្យ ដូច្នេះធ្វើឱ្យវិស័យនេះមានការរីកចម្រើនខ្ពស់មែនទែននៅអូស្ត្រាលី ដែលគេអាចបានហៅថា អចលនទ្រព្យបែបឡាយហ្វ៍ស្តាយល៍។

2- តើការរីកចម្រើនអចលនទ្រព្យនោះមានកំណើនប៉ុន្មានភាគរយបើប្រៀបធៀបទៅនឹង GDP?
វិស័យអចលនទ្រព្យនៅប្រទេសអូស្ត្រាលី បើនិយាយពីការប្រៀបធៀប ផ.ស.ស (GDP) វាមានទីផ្សារខុសៗគ្នាទាំងអស់ពីតំបន់1 ទៅតំបន់1 ដូចជា ហ្គោលខូស្ត គឺជាតំបន់មួយដែលមានការរីកចម្រើន GDP លើសច្រើនដែលយើងអាចបញ្ជាក់បានថា មានការកើនឡើងចំនួនភាគរយ គឺលើសពី GDP នៃប្រទេសអូស្ត្រាលីទាំងមូល។ផលិតផលក្នុងស្រុកសរុបរបស់ប្រទេសអូស្ត្រាលីបានកើនឡើង 2.8% ក្នុងឆ្នាំ2017 បើប្រៀបធៀបទៅនឹងឆ្នាំមុន។ អត្រានេះគឺ 5/10នៃចំនួនមួយខ្ពស់ជាងតួលេខនៃការកើនឡើង 2.3% នៅឆ្នាំ2016។ តួលេខផលិតផលក្នុងស្រុកសរុបក្នុងឆ្នាំ2017 មានចំនួន 1,323,421លានដុល្លារអូស្ត្រាលីជាប់ចំណាត់ថ្នាក់លេខ13 នៅក្នុងចំណាត់ថ្នាក់ GDP នៃប្រទេសចំនួន196។ ចំណែកតំបន់ ហ្គោលខូស្ត (Gold Coast) បានបង្ហាញនូវកំណើនការអភិវឌ្ឍ GDP 5%យ៉ាងជាប់លាប់។

3- តើហេតុផលអ្វីដែលធ្វើឱ្យប្រជាជនកម្ពុជាត្រូវវិនិយោគអចលនទ្រព្យនៅប្រទេសអូស្ត្រាលី?
ហេតុផលដែលធ្វើឱ្យប្រជាជនកម្ពុជាត្រូវវិនិយោគអចលនទ្រព្យនៅប្រទេសអូស្ត្រាលី គឺទាក់ទិននឹងការសិក្សារៀនសូត្រតែមួយគត់ ដែលបច្ចុប្បន្នមាននៅអូស្ត្រាលី តែពុំទាន់មានការវិនិយោគជាទ្រង់ទ្រាយធំ ឬជាការបណ្តាក់ទុននៅឡើយទេ ដោយគ្រាន់តែមានការទិញ រួចដាក់ជួល គឺមានជនជាតិខ្មែរច្រើនដែរ ព្រោះការដាក់ជួលវាបានចំណេញ (ក្នុង1សប្តាហ៍ 500 x 4(1ខែ)=2,000ដុល្លារអូស្ត្រាលី។ ពោលគ្រាន់តែជាការទិញផ្ទះដាក់ជួល ពុំទាន់ថាជាការបណ្តាក់ទុននៅឡើយ។ ជារួមមានអ្នកវិនិយោគមកពីប្រទេសចិន វៀតណាម សិង្ហបុរី ញូវហ្ស៊ីលែន។ល។

ក្នុងហេតុផលមួយទៀត គឺគាត់ទិញដើម្បីចង់បានសញ្ជាតិ(តែមិនមែនបានន័យថា ទិញផ្ទះបានសញ្ជាតិទេ ទាល់តែមានលិខិតបទដ្ឋាន និងការរស់នៅរយៈពេល 5ឆ្នាំ)។

4- ទាក់ទងនឹងការទិញផ្ទះនៅប្រទេសអូស្ត្រាលី តើរដ្ឋាភិបាលរបស់ប្រទេសអូស្ត្រាលីមានផ្តល់ការលើកទឹកចិត្ត និងលក្ខខណ្ឌអ្វីខ្លះសម្រាប់ប្រជាជនកម្ពុជាដែលចង់ទៅរស់នៅក្នុងប្រទេសអូស្ត្រាលី?
ក្នុងច្បាប់ប្រទេសអូស្ត្រាលី ពុំមានការចែងច្បាស់ពីការលើកទឹកចិត្តយ៉ាងម៉េចទេ តែបើការអនុវត្តផ្ទាល់វិញ មានការលើកទឹកចិត្តរួចជាស្រេច គឺរដ្ឋាភិបាលអូស្ត្រាលីមានគោលនយោបាយលើកទឹកចិត្តដល់វិនិយោគិនដូចនៅស្រុកខ្មែរដែរ។

ពោលគឺ ជនបរទេសមានសិទ្ធិទិញដី ទិញផ្ទះ ជាម្ចាស់កម្មសិទ្ធិលើអចលនទ្រព្យបាន ដោយរដ្ឋាភិបាលនឹងផ្តល់ប្លង់រឹងដល់អ្នកទិញអចលនទ្រព្យ គាត់ក៏អាចចេញចូលប្រទេសអូស្ត្រាលីដោយការផ្តល់វីសា និងអ្នកដែលមានបំណងចង់ទិញ ដី ផ្ទះ ឬខុនដូគាត់អាចរកអ្នកណាដែលផ្តល់ដំបូន្មានពីទីតាំង កន្លែង ឬតំបន់អភិវឌ្ឍន៍ថ្មីបាន ដែលកន្លែងទាំងនោះធ្វើឱ្យគាត់ចូលចិត្ត និងមានភាពងាយស្រួលក្នុងការរស់នៅ ឬសម្រាប់ការសិក្សារៀនសូត្ររបស់កូនៗរបស់គាត់។

5- រវាងផ្ទះ និងខុនដូនៅប្រទេសអូស្ត្រាលី តើមួយណាដែលប្រជាជនកម្ពុជាចាប់អារម្មណ៍ទិញច្រើនជាងគេ?
រវាងផ្ទះ និងខុនដូនៅប្រទេសអូស្ត្រាលី ប្រជាជនកម្ពុជាចាប់អារម្មណ៍ទិញច្រើនជាងគេ គឺផ្ទះ(គេហដ្ឋាន)ប៉ុន្តែគេមើលឃើញភាពខុសគ្នារវាងអាយុ បើអាយុចាប់ពី 40ឆ្នាំឡើងគេបានទិញផ្ទះទុកសម្រាប់ឱ្យកូនស្នាក់នៅ ងាយស្រួលក្នុងការរៀនសូត្រ។ តែបើអ្នកទិញនោះអាយុត្រឹម30ឆ្នាំឡើង គាត់តែងទិញខុនដូ។ ប៉ុន្តែការទិញផ្ទះ និងខុនដូពុំមានតម្លៃខុសគ្នាប៉ុន្មានទេ។

6- ប្រសិនបើចង់វិនិយោគលើវិស័យអចលនទ្រព្យនៅប្រទេសអូស្ត្រាលី តើយើងគួរតែទិញផ្ទះ ឬទិញដី ឬទិញខុនដូ? និងតើមួយណាអាចមានឱកាសចំណេញលុយបានច្រើនជាង?
តាមពិតទៅ វាមានលក្ខណៈផ្សេងគ្នាបន្តិច នៅស្រុកគេៗចង់រស់នៅខុនដូជាង ព្រោះបើយើងចង់ដាក់ជួល វាលឿនជាង តែបើយើងលក់ខុនដូ វាមិនចំណេញច្រើនដូចលក់ផ្ទះទេ។ តែប្រសិនបើឱ្យគេទិញផ្ទះ គេមិនចង់ទិញទេ ព្រោះបើដាក់ជួល វារាងតឹងតែងបន្តិច(តែនៅតែអាចជួលបាន) ហើយបើយើងទុកផ្ទះនោះឱ្យយូរ វានឹងបានថ្លៃជាងខុនដូ ហើយនៅពេលយើងចង់លក់ ក៏វាចំណេញច្រើនជាងលក់ខុនដូដែរ។

7- តើការទិញផ្ទះ ឬទិញខុនដូនៅទីក្រុង និងជនបទខុសគ្នាដូចម្តេចខ្លះ?
ដោយសារនៅ ហ្គោលខូស (Gold Coast) ជារដ្ឋមួយនៅប្រទេសអូស្ត្រាលី ដែលបើប្រៀបធៀបមកស្រុកខ្មែរ ដូចជាតំបន់អភិវឌ្ឍន៍ថ្មី ដូចនេះហ្គោលខូស្តជាតំបន់ទើបអភិវឌ្ឍន៍ មិនដូចនៅទីក្រុងមែលប៊ន ឬស៊ីដនីនៃប្រទេសអូស្ត្រាលីដែលបានក្លាយជាតំបន់អភិវឌ្ឍន៍ជឿនលឿនយូរហើយនោះទេ។

ដូច្នេះមានការកើនឡើងនៃចំនួនមនុស្សដែលចង់ទៅរស់នៅ ហើយសេចក្តីត្រូវការក៏កើនឡើងដែរព្រោះវានៅមានសល់ចន្លោះនៃការអភិវឌ្ឍច្រើន ខុសពីទីតាំងនៃតំបន់ជឿនលឿនមួយចំនួន បានន័យថា នៅ Gold Coast នៅមានសល់ចន្លោះនៃការអភិវឌ្ឍច្រើន វាទូលាយ និងជាតំបន់សមុទ្រ ជាតំបន់អភិវឌ្ឍន៍របស់រដ្ឋាភិបាលអូស្ត្រាលីដែលបានផ្តល់ភាពងាយស្រួលដល់អ្នកចង់ទិញខុនដូ ផ្ទះ ឬចង់វិនិយោគ។ នៅទីក្រុង Gold Coast City សេវាកម្មជួល និងអចលនទ្រព្យមានការលក់ក្នុងស្រុកខ្ពស់បំផុត ដោយបង្កើតបាន 12,637លានដុល្លារក្នុងឆ្នាំ2017/18។

8- ប្រសិនបើយើងមិនមានលុយគ្រប់ក្នុងការទិញអចលនទ្រព្យនៅប្រទេសអូស្ត្រាលី តើធនាគារនៅប្រទេសអូស្ត្រាលីអាចឱ្យយើងខ្ចីបង់រំលស់លើអចលនទ្រព្យនោះទេ? ហើយត្រូវមានលក្ខខណ្ឌអ្វីខ្លះ?
ក្នុងការទិញអចលនទ្រព្យនៅប្រទេសអូស្ត្រាលីបើយើងមិនមានលុយគ្រប់ យើងអាចដាក់ការស្នើសុំបាន តែសម្រាប់ជនបរទេស ឬជនជាតិខ្មែរជាការលំបាក ព្រោះជាការឆ្លងប្រទេស និងដោយសារតែគេមិនស្គាល់ប្រវត្តិរបស់យើង។ ប៉ុន្តែគេមាន 2កម្រិត គឺធនាគារ និងរបៀបជាមីក្រូហិរញ្ញវត្ថុដូចនៅស្រុកយើងដែរ ដែលគេអាចពិចារណាលើសំណើដែលយើងបានស្នើសុំ។

តែយើងត្រូវឱ្យយល់ពីរបៀបទិញរបស់គេ គឺនៅអូស្ត្រាលីវាខុសពីស្រុកយើង ការទិញដីធ្លី ផ្ទះសំបែងមិនមានការបង់រំលស់ទេ។ បើយើងមានប្រាក់ត្រឹម 20% (ដែលជាប្រាក់ Diposit គេដាក់ក្នុងធនាគារ)យើងអាចកក់ប្រាក់ទិញផ្ទះបាន។ រហូតដល់កាលបរិច្ឆេទចុងក្រោយ (ក្នុងពេលបញ្ចប់គម្រោង)យើងនៅមានពេលវេលា ដូចជាការបង់រំលស់ដែរ ទើបយើងបង់ផ្តាច់ 80% ដោយទទួលលិខិតផ្ទេរ-ប្រគល់ និងបានគេហដ្ឋានដែលយើងបានទិញនោះ។

9- ប្រសិនបើឪពុកម្តាយដែលចង់ឱ្យកូនចូលរៀននៅប្រទេសអូស្ត្រាលី តើការទិញផ្ទះនៅទីនោះដើម្បីទុកឱ្យកូនស្នាក់នៅ និងជួលផ្ទះឱ្យកូនស្នាក់នៅដើម្បីរៀន តើមួយណាចំណេញជាង?
តាមពិត ការទិញផ្ទះវាតែងតែល្អជាងការជួលផ្ទះ តែសួរថា តើគាត់មានលុយដែរទេ? ប្រសិនបើយើងមានលុយគ្រប់សម្រាប់ទិញផ្ទះ។ ឧទាហរណ៍យើងទិញផ្ទះមាន 3បន្ទប់។ យើងរស់នៅមិនអស់ទេ ដូច្នេះយើងអាចជួល 2បន្ទប់ដើម្បីយកប្រាក់នោះមកបង្គ្រប់ការបង់ថ្លៃការសិក្សា និងថ្លៃការរស់នៅរបស់កូនបាន ពីព្រោះផ្ទះអាចជួលបានថ្លៃ ទម្រាំកូនរៀនចប់។ លុះដល់ពេលរៀនចប់ បើយើងចង់លក់ក៏បានចំណេញលើការរៀនសូត្ររបស់កូនដែរ។ ដូច្នេះទិញផ្ទះល្អជាង និងចំណេញជាង។

ចំពោះខុនដូវិញក៏ល្អម្យ៉ាងដែរ តែសួរថា តើយើងមានលុយសម្រាប់ទិញដែរឬទេ? ព្រោះបើគាត់មិនមានលុយសម្រាប់ទិញផ្ទះ គាត់អាចជួលខុនដូរស់នៅបាន(1បន្ទប់)គាត់អាចរស់នៅបានដោយសុខស្រួលក្នុងបរិយាកាសនៅទីនោះ ឬដើម្បីការរៀនសូត្រ៕

February 28, 2019

គំនិតច្នៃប្រឌិត ភាគច្រើនជាស្នាដៃកើតចេញពីរឿងដែលមនុស្សជុំវិញខ្លួនជំទាស់

ពីមួយថ្ងៃទៅមួយថ្ងៃ យុវជនកម្ពុជាកាន់តែច្រើនឡើងៗហើយដែលអាចបង្កើតគំនិតច្នៃប្រឌិតថ្មីៗ និងបង្កើតសមិទ្ធផលទាំងខាងវិទ្យាសាស្ត្រ និងសង្គមបានយ៉ាងល្អតែទន្ទឹមនឹងចំណុចវិជ្ជមានមួយនេះ យុវជនដែលតស៊ូសម្រេចជោគជ័យលើរបកគំហើញថ្មីៗទាំងអស់នោះ តែងតែមានចំណុចត្អូញត្អែរមួយរួមគ្នាថា ខ្វះការលើកទឹកចិត្ត និងមិនសូវទទួលបានការគាំទ្រមុនពេលពួកគេសម្រេចជោគជ័យ។

កញ្ញា ហេង សុវណ្ណមុនីនុត អ្នកបច្ចេកវិទ្យាវ័យក្មេងកម្ពុជាមួយរូបដែលបានកាន់ពានរង្វាន់នវានុវត្តន៍វិទ្យាសាស្ត្រជាច្រើនពីអន្តរជាតិ បានលើកឡើងថាមុនកញ្ញាទទួលបានជោគជ័យលើគម្រោងទាំងអស់នេះ កញ្ញាមិនសូវទទួលបាន ការលើកទឹកចិត្តឱ្យខិតខំលើផ្នែកបច្ចេកវិទ្យានេះប៉ុន្មានទេ ព្រោះកញ្ញាជាមនុស្សស្រី ហើយការងារផ្នែកនេះ ភាគច្រើនមនុស្សប្រុសជាអ្នកធ្វើ។ ក្រៅពីនេះអ្នកជំនាញផ្នែកបច្ចេកវិទ្យាខាងលើក៏បានលើកឡើងផងដែរថា ការស្វែងរកគំនិតបង្កើតថ្មីមិនមែនជារឿងលំបាកពេកនោះទេ ប្រសិនបើយើងមានសេចក្តីក្លាហានគ្រប់គ្រាន់ដើម្បីធ្វើវា និងមានជំនឿចិត្តរឹងមាំថា យើងពិតជាចង់ធ្វើវាឱ្យបានសម្រេចប្រាកដមែន។មិនថាកាលៈទេសៈណាក៏ដោយ ពេលខ្លះយើងអាចមើលឃើញឱកាសនៅក្នុងឧបសគ្គប្រសិនបើយើងមានគំនិតវិជ្ជមាន។ ជាក់ស្តែងប្រសិនបើយើងគេហាមយើងមិនឱ្យធ្វើអ្វីដែលយើងស្រឡាញ់ ហើយយើងក៏ជឿតាមអ្នកដទៃ បន្ទាប់មកបោះបង់ក្តីស្រមៃរបស់ខ្លួនឯង យើងនៅតែមិនអាចប្រើប្រាស់ភាពច្នៃប្រឌិតរបស់យើងដើម្បីសម្រេចការងារដែលយើងចង់បាននោះជារៀងរហូត។ តែប្រសិនបើយើងមានចិត្តវិជ្ជមាន យើងនឹងមើលឃើញថា អ្នកដទៃដែលជំទាស់ជាមួយយើងនោះ គឺដោយសារគាត់មិនមែនជារូបយើង ហើយគាត់មិនយល់ច្បាស់ពីបញ្ហា និងឱកាសដូចយើងនោះទេ ហេតុនេះយើងអាចនឹងធ្វើឱ្យគាត់ឃើញ និងបង្ហាញគាត់ទៅវិញថា យើងអាចធ្វើបាន។

កញ្ញា ហេង សុវណ្ណមុនីនុត បាននិយាយថា៖ “ពេលខ្លះខ្ញុំធ្លាប់មិនសូវសប្បាយចិត្តដែរនៅពេលដែលគេជំទាស់លើគំនិតថ្មីៗទាំងអស់នោះ តែក្រោយមកខ្ញុំប្តូរផ្នត់គំនិតថា គ្មានអ្វីដែលយើងមិនអាចធ្វើបាននោះទេប្រសិនបើយើងស្រឡាញ់វាពិតប្រាកដ”។

កញ្ញា សុវណ្ណមុនីនុត បានបន្ថែមទៀតថា នៅពេលដែលយើងចង់ច្នៃប្រឌិតរបស់ថ្មី លុះត្រាតែយើងមានគំនិតខុសពីគេ ហេតុនេះនៅពេលគេមិនយល់ស្រប វាគ្មានហេតុផលអីដែលយើងត្រូវបាក់ទឹកចិត្តនោះទេ តែយើងអាចប្រើប្រាស់ឧបសគ្គទាំងអស់នោះមកដាស់ស្មារតីឱ្យយើងកាន់តែមានចិត្តរឹងមាំហើយ ដាច់ខាតត្រូវតែប្រឹងប្រែងតស៊ូគ្រប់កាលៈទេសៈ កុំបោះបង់។

អ្នកច្នៃប្រឌិតមួយរូបទៀតដែលបានបង្កើតកម្មវិធីបច្ចេកវិទ្យាសម្រួលដល់ការធ្វើដំណើរ លោក ហុង សេងថៃ បានលើកឡើងថា គំនិតរបស់លោកដើមឡើយគ្មានអ្នកណាគាំទ្រទេ ហើយក៏គ្មានអ្នកណាជឿថា វាអាចធ្វើទៅបានដែរ តែអ្វីដែលលោកមើលឃើញគឺបញ្ហាមិនមែនស្ថិតនៅលើមាត់អ្នកដទៃនោះទេ តែជាការដោះស្រាយបញ្ហាជាក់ស្តែងឱ្យបាន។ លោកនិយាយថា កុំខ្វល់ខ្វាយ ឬយកគំនិតអវិជ្ជមានរបស់អ្នកដទៃមកដាក់ក្នុងចិត្តច្រើនពេក ប្រសិនបើយើងពិតជាចង់បង្កើតផលិតផលថ្មីដែលគេមិនធ្លាប់ធ្វើពីមុនមក ហើយក៏កុំគិតថាគំនិតទាំងអស់នោះត្រូវតែធំៗ ទើបអាចធ្វើបាននោះ។ ពេលខ្លះគំនិតតូចៗដែលគេមិនចាប់អារម្មណ៍ក៏អាចក្លាយជាចំណុចល្អផងដែរសម្រាប់យើងជ្រើសរើសយកមកច្នៃ ហើយក្រោយពេលយើងច្នៃវាបានសម្រេច នោះវានឹងក្លាយជារឿងធំ ដែលមនុស្សជាច្រើនពេលនោះនឹងចាប់ផ្តើមផ្លាស់ប្តូរផ្នត់គំនិតចំពោះយើងមិនខាន។

លោក ហុង សេងថៃ បាននិយាយថា៖ “យុវជនកម្ពុជាសូមចាប់ផ្តើមមានសេចក្តីក្លាហានក្នុងការបង្កើតគំនិតថ្មីៗឡើង បើទោះពីជាមានការជំទាស់ ឬមិនទទួលបានការគាំទ្រក៏ដោយ ព្រោះស្ថានភាពជាក់ស្តែងនៅពេលយើងអនុវត្តវា យើងនឹងដឹងថាវាល្អប្រសើរជាងការបារម្ភរបស់យើងទៅទៀត”។

លោក សេងថៃ បានលើកឡើងផងដែរថា យើងម្នាក់ៗអាចចាប់ផ្តើមបង្កើតគំនិតច្នៃប្រឌិត ឬផលិតផលថ្មីបានគ្រប់ពេលវេលា ព្រោះឱ្យតែមានគំនិតថ្មីគឺវាស្មើនឹងការចាប់ផ្តើមដើររកច្រកចេញមួយទៅកាន់គោលដៅដែលយើងចង់ទៅនោះ។ ជាក់ស្តែងប្រសិនបើយើងធ្វើ យើងអាចនឹងធ្វើខុស ឬធ្វើត្រូវ តែប្រសិនបើយើងមិនធ្វើវិញនោះ យើងនឹងគ្មានទទួលបានលទ្ធផលអ្វីទាំងអស់។ ការចាប់ផ្តើមគំនិតបង្កើតថ្មី អាចនឹងធ្វើឱ្យយើងភ្ញាក់ផ្អើល ហើយមានមោទនភាពនៅទីចុងបញ្ចប់ ហេតុនេះកុំបារម្ភពេក ព្រោះនៅពេលដែលយើងដើរទៅជួបឧបសគ្គ យើងនឹងព្យាយាមស្វែងរកច្រកចេញដោយឯកឯង ហើយបន្តិចម្តងៗយើងនឹងកាន់តែច្បាស់ឡើងៗ ហើយក្រោយពេលបញ្ចប់សកម្មភាពទាំងអស់នោះ បើសិនយើងងាកមកមើលក្រោយវិញ យើងនឹងមើលឃើញថា យើងបានធ្វើរឿងដែលមិនគួរឱ្យជឿជាច្រើន ដែលសូម្បីតែពេលខ្លះក៏យើងសឹងតែមិនជឿថា យើងអាចធ្វើវាបានផងពីមុនមក ហើយប្រសិនបើយើងបោះបង់វាចោលតាមអ្វីដែលអ្នកដទៃរិះគន់វិញនោះ យើងនឹងមិនអាចមានថ្ងៃនេះឡើយ៕

February 27, 2019

ខេត្តក្រចេះនឹងក្លាយជាគោលដៅទេសចរណ៍លំដាប់ទី2 និងជាទីក្រុងបេតិកភណ្ឌ

រាជរដ្ឋាភិបាលមានគម្រោងរៀបចំខេត្តក្រចេះឱ្យក្លាយទៅជាគោលដៅទេសចរណ៍លំដាប់ទី2 (Secondary Destination) និងជាទីក្រុងបេតិកភណ្ឌដើម្បីទាក់ទាញភ្ញៀវទេសចរទៅទស្សនាខេត្តក្រចេះឱ្យបានច្រើនថែមទៀត និងធ្វើពិពិធកម្មផលិតផលទេសចរណ៍ក្រៅពីតំបន់រមណីយដ្ឋានអង្គរ។ នេះបើយោងតាមក្រសួងទេសចរណ៍។

ឯកឧត្ដម ថោង ខុន រដ្ឋមន្ត្រីក្រសួងទេសចរណ៍មានប្រសាសន៍ថា សភាពការណ៍វិវឌ្ឍន៍រីកចម្រើននៃវិស័យទេសចរណ៍សកលលោក និងក្នុងតំបន់ បានធ្វើឱ្យកម្ពុជារំលេចអំពីសារៈសំខាន់នៃវិស័យទេសចរណ៍ដើម្បីរួមចំណែកអភិវឌ្ឍសេដ្ឋកិច្ចជាតិ បង្កើតការងារ បង្កើនប្រាក់ចំណូល និងកាត់បន្ថយភាពក្រីក្ររបស់ប្រជាពលរដ្ឋ។

ឯកឧត្ដមរដ្ឋមន្ត្រីបានលើកឡើងអំពីសារៈសំខាន់នៃសត្វផ្សោតទន្លេមេគង្គដែលជាភាពទោលដោយឡែកពីគេរបស់កម្ពុជា ហើយដែលអង្គការទេសចរណ៍ពិភពលោក (UNWTO) បានផ្តល់ជំនួយតាមរយៈគម្រោងអភិរក្ស និងអភិវឌ្ឍន៍សត្វផ្សោត ដែលមានឈ្មោះថា Mekong Discovery Trails និងបានធ្វើឱ្យពិភពលោកស្គាល់ច្បាស់ពីសត្វផ្សោតទន្លេមេគង្គរបស់កម្ពុជា។

ឯកឧត្ដមរដ្ឋមន្ត្រីបានលើកឡើងនូវពាក្យស្លោកមួយថា៖“មានផ្សោតទើបមានទេសចរ គ្មានផ្សោត គឺគ្មានទេសចរ” ដូច្នេះយើងទាំងអស់គ្នាត្រូវតែរួមគ្នាថែរក្សា អភិរក្ស និងអភិវឌ្ឍតំបន់ទេសចរណ៍អន្លង់ផ្សោតនេះឱ្យបានល្អ និងមាននិរន្តរភាព (សព្វថ្ងៃ ផ្សោតបានបង្កើតកូនបន្តថែមទៀតហើយ)”។

ឯកឧត្ដម ថោង ខុន បានបន្តទៀតថា ក្រៅពីសត្វផ្សោត ខេត្តក្រចេះក៏មានផលិតផលទេសចរណ៍ល្បីៗជាច្រើនទៀតដែរ (ដូចជានំក្រឡាន ផ្លែក្រូចថ្លុង-ល-) មានតំបន់ទេសចរណ៍ និងសហគមន៍ទេសចរណ៍ជាច្រើនដែលត្រូវយកចិត្តទុកដាក់ពង្រឹង និងលើកកម្ពស់គុណភាពផលិតផល និងសេវាកម្មឱ្យស្របតាមស្តង់ដា។

ឯកឧត្ដមមានប្រសាសន៍ថា៖“មន្ទីរទេសចរណ៍ខេត្តក្រចេះត្រូវរៀបចំឱ្យមានផែនការយុទ្ធសាស្ត្រលើវិស័យទេសចរណ៍ក្នុងខេត្តក្រចេះ ឆ្លើយតបតាមផែនការយុទ្ធសាស្ត្រទេសចរណ៍ជាតិ ក្នុងតំបន់ និងសកលលោក ពង្រឹងគុណភាពផលិតផល និងសេវាកម្មទេសចរណ៍ក្នុងទូទាំងខេត្ត បង្កើតផលិតផលទេសចរណ៍ថ្មីៗ (ពង្រឹងផលិតផលដែលមានស្រាប់ និងបង្កើតថ្មី) ខិតខំអភិវឌ្ឍខេត្តក្រចេះឱ្យក្លាយជាគោលដៅទេសចរណ៍លំដាប់ទី2 និងជាទីក្រុងបេតិកភណ្ឌ បង្កើតឱ្យមានព្រឹត្តិការណ៍ទេសចរណ៍ថ្មីៗដូចជា សកម្មភាពទេសចរណ៍នៅលើឆ្នេរខ្សាច់ កីឡាលើឆ្នេរ លើទឹក ពង្រឹងចលនាប្រឡងប្រណាំងទីក្រុងស្អាតដោយត្រូវដំឡើងឱ្យមានបញ្ជរព័ត៌មានទេសចរណ៍ បង្គន់អនាម័យសាធារណៈ សោភណភាព អនាម័យ បរិស្ថានប្រកបដោយភាពស្អាត និងបៃតង”។

ឯកឧត្ដមបញ្ជាក់ទៀតថា៖“មន្ទីរទេសចរណ៍ខេត្តក្រចេះត្រូវខិតខំដណ្តើមឱ្យបានផ្ការំដួល 3ទង និងរង្វាន់ទីក្រុងទេសចរណ៍ស្អាតអាស៊ាននៅឆ្នាំ2023 ត្រូវពង្រឹងគុណភាព និងសេវាកម្មកាណូត និងទូកទេសចរណ៍ឱ្យបានល្អត្រឹមត្រូវតាមបច្ចេកទេស និងស្តង់ដា រួមទាំងឯកសណ្ឋានអ្នកបើកបរកាណូតទេសចរណ៍ផងដែរ”។

គួរបញ្ជាក់ថា ខេត្តក្រចេះស្ថិតនៅតំបន់ខ្ពង់រាបប៉ែកឦសាននៃប្រទេសកម្ពុជា តាមដងទន្លេមេគង្គ សម្បូរទៅដោយសម្បត្តិវប្បធម៌‌ប្រវត្តិសាស្ត្រ និងធម្មជាតិជាច្រើនដែលទាក់ទាញចំណាប់អារម្មណ៍ភៀ្ញវជាតិ និងអន្តរជាតិឱ្យមកទស្សនាកម្សាន្ត និងសិក្សាស្រាវជ្រាវដើម្បីបានឃើញ បានយល់ និងបានស្គាល់ពីទិដ្ឋភាពពិតនៃសម្បតិ្តទេសចរណ៍ទាំងនោះដោយមិនអាចខានបាន។

លោក ជុក ជំនោរ អ្នកនាំពាក្យក្រសួងទេសចរណ៍បានឱ្យដឹងថា តំបន់រមណីយដ្ឋានអង្គរវត្ត គឺជាគោលដៅអាទិភាព ដោយឡែកយើងចង់ឱ្យខេត្តក្រចេះក្លាយជាគោលដៅគាំទ្រ ឬជាគោលដៅទេសចរណ៍លំដាប់ទី2 ដោយសារតែខេត្តនេះមានសក្តានុពលខាងទេសចរណ៍ជាច្រើននៅភូមិភាគឦសាន ជាពិសេសសត្វផ្សោតទន្លេមេគង្គ ជាអេកូទេសចរណ៍សម្រាប់ខេត្តក្រចេះ និងនៅភូមិភាគឦសាន ហើយមួយទៀតខេត្តក្រចេះមានសហគមន៍កោះទ្រង់ (ក្រូចថ្លុងកោះទ្រង់) កោះផ្តៅ វត្តសសរមួយរយ ដែលអាចនិយាយបានថា ខេត្តក្រចេះ គឺជាឋានសួគ៌អេកូទេសចរណ៍សម្រាប់ភូមិឦសាន។

លោក ជំនោរ បន្ថែមថា៖ “ក្រសួងទេសចរណ៍កំពុងតែសហការជាមួយក្រសួងវប្បធម៍ធ្វើការជាមួយអង្គការ យូណេស្កូក្នុងការជំរុញការចុះបញ្ជីទីក្រុងបាត់ដំបង ទីក្រុងកំពត និងទីក្រុងក្រចេះជាទីក្រុងបេតិកភណ្ឌ ដោយសារតែភ្ញៀវអឺរ៉ុបចូលចិត្តទៅទស្សនាកន្លែងដូច្នេះ”។

លោក ធួន ស៊ីណាន ប្រធានសមាគមទេសចរណ៍អាស៊ីប៉ាស៊ីហ្វិក (Pacific Asia Travel Association) នៅប្រទេសកម្ពុជា បានឱ្យដឹងថា គោលដៅទេសចរណ៍លំដាប់ទី2 គឺជាយុទ្ធសាស្ត្រនៃការគាំទ្រ និងបង្កើនឱកាសសម្រាប់អភិវឌ្ឍន៍សេដ្ឋកិច្ចសង្គម តាមរយៈការវិនិយោគ និងការអភិវឌ្ឍលើវិស័យទេសចរណ៍។

លោកបន្តថា កម្ពុជាមានសម្បត្តិវប្បធម៌ និងធនធានធម្មជាតិជាច្រើនសម្រាប់ផ្តល់ជូនភ្ញៀវបរទេសម្យ៉ាងវិញទៀតគោលដៅទេសចរណ៍លំដាប់ទី2 គឺជាការធ្វើពិពិធកម្មវិស័យទេសចរណ៍ និងជាប្រភពនៃការបង្កើតប្រាក់ចំណូលក្នុងវិស័យទេសចរណ៍ ដោយសារតែវាធ្វើឱ្យភ្ញៀវទេសចរបរទេសអាចមកកម្សាន្តនៅតំបន់ផ្សេងៗក្រៅពីអង្គរវត្ត និងទាក់ទាញឱ្យពួកគេស្នាក់នៅកម្ពុជាបានយូរ និងចំណាយប្រាក់ច្រើន។

លោក ស៊ីណាន បានបន្តទៀតថា៖ “នៅពេលដៃគូអភិវឌ្ឍន៍សហការជិតស្និទ្ធ និងជាដៃគូយុទ្ធសាស្ត្រជាមួយរដ្ឋាភិបាល អ៊ីចឹងហើយហេដ្ឋារចនាសម្ព័ន្ធគាំទ្រនឹងត្រូវបានអភិវឌ្ឍតាមហ្នឹងដែរ ប៉ុន្តែវាទាមទារឱ្យមាននូវប្លង់មេ ដើម្បីដាក់ចេញ និងឱ្យផែនការដើរទៅមុខដោយរលូន”។

នៅឆ្នាំ2018 ខេត្តក្រចេះទទួលបានទេសចរសរុបចំនួន 349,186នាក់ (កើនឡើង15.22%ធៀបនឹងរយៈពេលដូចគ្នានៅឆ្នាំ2017) ក្នុងនោះទេសចរជាតិមានចំនួន 323,196នាក់ និងទេសចរអន្តរជាតិចំនួន25,990នាក់ (ក្នុងនោះភាគច្រើនជាជនជាតិបារាំង)៕

February 27, 2019

វិធីកម្ចាត់អង្កែ មេបញ្ហាចំពោះស្បែកក្បាល

នៅពេលដែលសង្កេតឃើញថា ស្បែកក្បាលកំពុងតែទម្លាក់ចុះនូវកម្ទេចសៗ ឬដែលភាសាងាយៗហៅថា អង្កែ នោះ ឡារ៉ែន ជឿជាក់ថារឿងដំបូងបំផុតដែលលោកអ្នកតែងតែគិតឃើញនោះគឺការស្វែងរកសាប៊ូកក់សក់ណាដែលមានប្រសិទ្ធភាពក្នុងការកម្ចាត់អង្កែ។ វាជារឿងល្អណាស់បើអ្នកអាចរកឃើញសាប៊ូកក់សក់ណាដែលអាចកម្ចាត់អង្កែលើស្បែកក្បាលរបស់អ្នកបាន ប៉ុន្តែបើសំណាងមិនល្អរកមិនបានវិញនោះ ឡារ៉ែន ចង់ស្នើឱ្យអ្នកងាកមកសាកល្បងវិធីព្យាបាលបែបបុរាណវិញម្តង។

វិធីកម្ចាត់អង្គែ ដោយប្រេងអូលីវ
ក្រៅពីប្រើដើម្បីជាប្រយោជន៍ចំពោះរាងកាយហើយនោះ ប្រេងអូលីវក៏អាចយកមកម៉ាស្សាលើស្បែកក្បាលដើម្បីកម្ចាត់អង្កែផងដែរ។ ការម៉ាស្សាក្បាលជាមួយនឹងប្រេងអូលីវ អាចជួយបន្ថូរអារម្មណ៍ភាពតានតឹង បន្ថែមការសម្រាកដល់ខួរក្បាល ហើយក៏ជាវិធីធម្មជាតិដ៏មានប្រសិទ្ធភាពក្នុងការបំបាត់អង្កែ និងបញ្ហារបកស្បែកក្បាលផងដែរ។ ភាពសម្បូរបែបនៃវីតាមីនE សារធាតុចិញ្ចឹម និង antioxidants ដែលមាននៅក្នុងប្រេងអូលីវ នឹងចូលទៅជួយកម្ចាត់អាការរលាកស្បែកក្បាល រមាស់ និងបន្ថែមសំណើមដល់ស្បែកក្បាល ព្រមទាំងបន្ថយសភាពស្បែកស្ងួតផងដែរ។ យកប្រេងអូលីវក្តៅៗបន្តិចមកដាក់លើស្បែកក្បាល ហើយម៉ាស្សាថ្នមៗលើស្បែកក្បាលប្រហែល20នាទី។ ទុកចោលរយៈពេលមួយម៉ោង រួចសឹមកក់សម្អាតសក់ចេញជាការស្រេច។

វិធីកម្ចាត់អង្គែ ដោយទឹកក្រូចឆ្មារ
ប្រសិនបើប្រេងអូលីវធ្វើឱ្យអ្នកមានការបារម្ភថានឹងពិបាកស្វែងរកនោះ សូមសាកល្បងវិធីងាយបំផុតមួយទៀតគឺ ទឹកក្រូចឆ្មារ។ ទឹកក្រូចឆ្មារដែលទើបតែច្របាច់ចេញពីផ្លែថ្មីៗមានប្រសិទ្ធភាពណាស់ក្នុងការកម្ចាត់អង្កែ។ យកទឹកក្រូចឆ្មារមកចាក់លើស្បែកក្បាល ហើយប្រើម្រាមដៃអេះម៉ាស្សាតិចៗ រួចទុកចោលមួយសន្ទុះ សឹមលាងសម្អាតចេញ។

វិធីកម្ចាត់អង្គែ ដោយស្លឹកស្តៅ
នៅមានវិធីមួយទៀតដែលអ្នកគួរតែដឹងនោះគឺការព្យាបាលស្បែកក្បាលពីការកើតអង្កែដោយស្លឹកស្តៅ។ ដោយគ្រាន់តែយកស្លឹកស្តៅប្រមាណ2ក្បង់ដៃទៅដាក់ក្នុងទឹកក្តៅ4-5ពែង រួចត្រាំទុកចោលពេញមួយយប់។ លុះព្រឹកឡើង យកទឹកដែលត្រាំស្លឹកស្តៅនោះមកកក់សក់ រួចទុកចោល1ម៉ោង មុនពេលសម្អាតចេញដោយទឹកស្អាត។

ឡារ៉ែន បានត្រឹមតែធ្វើជាអ្នកណែនាំ ចំណែកការអនុវត្តគឺជាទង្វើរបស់អ្នក! ដូច្នេះសូមសាកល្បងវិធីងាយៗ ចំណាយប្រាក់តិច មិនប៉ះពាល់ដល់សុខភាពស្បែក ហើយបើវាមានប្រសិទ្ធភាពចំពោះស្បែកក្បាលរបស់អ្នកនោះ ទុកថាជារឿងដែលប្រសើរបំផុតហើយ៕

February 26, 2019

ស្រស់ស្អាតរាល់ថ្ងៃ បើធ្វើតាមអត្ថបទនេះ

ពេញមួយថ្ងៃរាងកាយដូចជាមិនអាចគេចផុតពីការបំផ្លាញនៃអាកាសធាតុ និងពេលវេលានោះទេ បើដូច្នេះមែននោះតើធ្វើម៉េចនឹងអាចបង្អួតអ្នកជិតខាងឱ្យឃើញថា អ្នកនៅតែស្អាតតាំងពីព្រលឹមទល់ប្រលប់បានទៅ? ស្អាតរាល់ថ្ងៃ អ្នកណាមិនប្រាថ្នាចង់បាន តែវាទាស់ត្រង់ថាមិនដឹងធ្វើយ៉ាងម៉េចទើបអាចនាំក្តីស្រមៃនេះទៅកាន់ពិភពពិតបានតែប៉ុណ្ណោះ។ មិនស្រួល ហើយក៏មិនពិបាកដែរ ប៉ុន្តែវាតម្រូវឱ្យអ្នកយកចិត្តទុកដាក់ក្នុងការអនុវត្ត មិនមែនធ្វើតែមួយ ឬពីរថ្ងៃនៅមិនទាន់ឃើញពីប្រសិទ្ធភាព ក៏បោះបង់ចោលនោះទេ។ រក្សាឱ្យបានខ្ជាប់ខ្ជួននូវទង្វើមួយចំនួនដូចខាងក្រោម នោះភាពស្រស់ស្អាតនឹងស្ថិតនៅជាមួយអ្នករាល់ថ្ងៃជាមិនខាន។

ព្រឹកព្រលឹម : បន្ទាប់ពីក្រោកពីដំណេកនាពេលព្រឹក សូមកុំទាន់លុបលាងជាតិខ្លាញ់ដែលនៅជាប់លើផ្ទៃមុខ ជាពិសេសនៅជុំវិញច្រមុះ និងចង្កាចេញភ្លាមៗអី សូមប្រើដៃរបស់អ្នកញីវាឱ្យពេញផ្ទៃមុខ រួចទុកមួយសន្ទុះសិនសឹមចាប់ផ្តើមធ្វើអ្វីដែលអ្នកចង់ធ្វើជាបន្តចុះ។ ការរក្សាទុកនូវជាតិខ្លាញ់នៅលើផ្ទៃមុខបែបនេះគឺជាការជួយរក្សាស្បែកឱ្យមានសំណើម(សម្រាប់អ្នកដែលមានស្បែកស្ងួត) និងក្មេងជាងវ័យព្រោះវាជាខ្លាញ់ធម្មជាតិដែលរាងកាយបានបញ្ចេញមកក្រៅ។

មុនអាហារពេលព្រឹក : មុនទទួលទានអាហារពេលព្រឹក ត្រូវទទួលទានទឹកក្ដៅឧណ្ហ2កែវ (លាយជាមួយទឹកឃ្មុំ 1ស្លាបព្រាកាហ្វេ និងទឹកក្រូចឆ្មារបន្ដិចកាន់តែល្អ)។ ការធ្វើបែបនេះអាចជួយសម្អាតក្រពះ ហើយអាចជួយដល់ការរក្សារាងបានទៀតផង (ពេលខ្លះវាអាចនឹងមានការពិបាកបន្តិចសម្រាប់អ្នកក្នុងការទទួលទានពីដំបូង ហេតុនេះអ្នកគួរបង្រៀនខ្លួនឯងឱ្យចាប់ផ្តើមធ្វើវាម្តងបន្តិចៗក៏បាន)។

មិនត្រូវបោះបង់បន្លែបៃតង : រាល់ពេលទទួលទានអាហារអ្នកគួរទទួលទានអាហារដែលមានប្រយោជន៍ចំពោះសុខភាព និងសម្រស់ ដូចជា ផ្លែឈើ ត្រី ស៊ុត និងគ្រប់ធញ្ញជាតិជាដើម។

សម្អាតស្បែក : បន្ទាប់ពីត្រឡប់មកពីធ្វើការងារ ឬការចេញទៅខាងក្រៅផ្ទះអ្នកត្រូវលាងជម្រះ ឬប្រើកន្សែងសើម ដើម្បីសម្អាតសារជាតិកខ្វក់ផ្សេងៗដែលនៅជាប់លើផ្ទៃមុខចេញឱ្យបានស្អាត។

បន្ថែមពីលើសកម្មភាពអស់ទាំងនោះអ្នកត្រូវគិតទៅដល់ទង្វើមួយចំនួនទៀតដូចជា ការទទួលទានទឹកឱ្យបានគ្រប់គ្រាន់ ហើយត្រូវកាត់បន្ថយការបរិភោគអាហារដែលផ្ទុក ឬប្រើសារជាតិ ឬមានខ្លាញ់ច្រើន ដូចជា អាហារចៀន និងបំពងជាដើម។ ហាត់ប្រាណតាមដែលអាចធ្វើទៅបាន (បើទោះជាពេលខ្លះអ្នករវល់នឹងការងារច្រើន រហូតមិនមានពេលវេលាគ្រប់គ្រាន់ដើម្បីទៅហាត់ប្រាណនៅតាមក្លឹប ឬទីកន្លែងផ្សេងៗក៏ដោយ អ្នកគួរតែឆ្លៀតពេលដើរក្នុងកំឡុងពេលធ្វើការ) ព្រមទាំងធ្វើការផ្លាស់ប្តូរឥរិយាបទនៃការអង្គុយ ឈរ គេង និងដកដង្ហើមត្រូវធ្វើឱ្យបានត្រឹមត្រូវ៕

February 26, 2019

Author: ធឿន មករា