ធឿន មករា - La Reine Media

Woods ដកខ្លួនចេញពីការប្រកួត Arnold Palmer ជុំវិញបញ្ហា-ក

អតីតកីឡាករវាយកូនគោលចំណាត់ថ្នាក់លេខ១ក្នុងពិភពលោក Tiger Woods បានដកខ្លួនចេញពីព្រឹត្តិការណ៍ Arnold Palmer Invitational នៅសប្តាហ៍នេះកាលពីថ្ងៃចន្ទ ក្រោយពីមិនអាចជម្នះលើបញ្ហា-កបាន។

នៅលើបណ្តាញសង្គម Twitter កីឡាករ Woods បាននិយាយថា បញ្ហានេះមិនទាក់ទងនឹងកញ្ចឹងកផ្នែកខាងក្រោម ដែលធ្លាប់បានធ្វើឱ្យរូបគេអវត្តមានជិត 2ឆ្នាំនោះឡើយ និងបានបន្ថែមថា រូបគេមិនមានការខ្វល់ខ្វាយលើការសម្រាកព្យាបាលរយៈពេលវែងឡើយ។

Woods បានឱ្យដឹងថា៖ «ជាអកុសល ដោយសារតែបញ្ហាក ដែលខ្ញុំបានជួបប្រទះអស់រយៈពេល2 ទៅ 3សប្តាហ៍ថ្មីៗនេះ ខ្ញុំត្រូវបង្ខំចិត្តដកខ្លួនចេញពីការប្រកួត API (Arnold Palmer Invitational)»។

កីឡាកររូបនេះបានបញ្ជាក់ថា៖ «ខ្ញុំកំពុងតែទទួលបានការព្យាបាល ប៉ុន្តែវាមិនមានភាពល្អប្រសើរក្នុងការអាចលេងបានឡើយ។ ផ្នែកខាងក្រោមនៃករបស់ខ្ញុំ មិនមានបញ្ហាឡើយ ហើយខ្ញុំក៏មិនមានការខ្វល់ខ្វាយលើការសម្រាករយៈពេលវែងដែរ»។

កីឡាករ Woods បានបន្ថែមថា រូបគេសង្ឃឹមថា អាការរបស់គេនេះនឹងជាសះស្បើយសម្រាប់យុទ្ធនាការ The Players Championship នៅលើទីលាន TPC Sawgrass ដែលនឹងចាប់ផ្តើមប្រកួតនៅថ្ងៃទី14 ដល់ទី17 ខែមីនា ស្របពេលរូបគេក៏ត្រៀមខ្លួនសម្រាប់ការប្រកួត Masters នៅខែក្រោយផងដែរ។

Arnold Palmer គឺជាយុទ្ធនាការមួយដែល Woods ចូលចិត្តប្រកួតជាងគេក្នុងរយៈពេលប៉ុន្មានឆ្នាំចុងក្រោយនេះ ខណៈដែលកីឡាករវ័យ 43ឆ្នាំរូបនេះ បានឈ្នះពាននៅលើទីលាន Bay Hill ដល់ទៅ 6លើក។

ការបង្ហាញខ្លួននៅសប្តាហ៍នេះ នឹងក្លាយជាការបង្ហាញខ្លួនជាលើកទី 19របស់គេក្នុងព្រឹត្តិការណ៍នេះ។ កីឡាករ Woods បានឱ្យដឹងថា៖ «ខ្ញុំចង់ផ្ញើការសោកស្តាយរបស់ខ្ញុំទៅកាន់ក្រុមគ្រួសារនៃការប្រកួត Palmer និងអ្នកគាំទ្រនៅ Orlando»៕

ប្រភពពី៖ Channel News Asia

March 5, 2019

Kane ត្រៀមបង្ហាញថ្វីជើង ពេល Spurs ជួប Dortmund នៅរាត្រីនេះ

ខ្សែប្រយុទ្ធ Harry Kane បានបញ្ជាក់ថា ក្រុម Tottenham នឹងបញ្ចប់ការធ្លាក់ចុះទម្រង់លេងក្នុងក្របខ័ណ្ឌ Premier League របស់ពួកគេ ខណៈដែលតារាឆ្នើមអន្តរជាតិអង់គ្លេសរូបនេះ សម្លឹងរកការជួយឱ្យក្រុមរបស់គេឈានទៅដល់វគ្គ 8ក្រុមចុងក្រោយនៃក្របខ័ណ្ឌ Champions League ពេលជួបក្រុម Borussia Dortmund នៅរាត្រីនេះ។

ក្នុងចន្លោះពេលត្រឹមតែ 7ថ្ងៃ ក្តីសង្ឃឹមរបស់ក្រុម Tottenham នៃការឈ្នះពានក្របខ័ណ្ឌ Premier League បានស្ថិតក្នុងភាពស្តួចស្តើង ដោយសារតែការបរាជ័យក្រោមស្នាដៃក្រុម Burnley និង Chelsea និងការបញ្ចប់ត្រឹមលទ្ធផលស្មើនៅពេលជួបក្រុម Arsenal ក្នុងការប្រកួតរវាងក្រុមស្ថិតក្នុងទីក្រុងឡុងដ៍តែមួយកាលពីថ្ងៃសៅរ៍។

វាបានក្លាយជារបាររារាំងជ័យជម្នះចុងក្រោយបំផុតរបស់ក្រុម Tottenham ក្នុងពេលស្ថិតក្នុងដំណាក់កាលដ៏សំខាន់របស់ពួកគេ។

ការសង្គ្រោះបាល់ប៉េណាល់ទីយ៉ាងល្អនៅរយៈពេល 1នាទីចុងក្រោយរបស់អ្នកចាំទី Hugo Lloris ពីការស៊ុតរបស់ខ្សែប្រយុទ្ធ Pierre-EmerickAubameyang បានការពារមិនឱ្យក្រុម Tottenham រងបរាជ័យជាលើកទី3 ជាប់ៗគ្នា។

ប៉ុន្តែ Kane ជឿជាក់ថា ក្រុម Tottenham មានសមត្ថភាពក្នុងការស្រោចស្រង់ពីសប្តាហ៍ដ៏ឈឺចាប់មួយ ហើយរូបគេបានលើកទឹកចិត្តឱ្យក្រុមរបស់គេប្រើប្រាស់ការប្រកួតក្របខ័ណ្ឌ Champions League វគ្គ 16ក្រុមចុងក្រោយ ជើងទី2 របស់ពួកគេ លើទឹកដីក្រុម Dortmund នេះធ្វើជាប្រេងសាំងដើម្បីបន្ថែមល្បឿននៃការវិលទៅរកភាពខ្លាំងវិញរបស់ពួកគេ។

Kane បានឱ្យដឹងថា៖ «យើងត្រៀមរួចរាល់ហើយក្នុងការប្រយុទ្ធរហូតដល់ដំណាក់កាលចុងក្រោយនៃរដូវកាលនេះ»។

Spurs នឹងត្រូវប្រកួតជាមួយនឹងក្រុម Dortmund នៅលើទឹកដីអាល្លឺម៉ង់ នៅរាត្រីនេះ ក្នុងវគ្គ 16ក្រុមចុងក្រោយ ជើងទី2 ក្រោយពីបានយកឈ្នះលើក្រុមអាល្លឺម៉ង់មួយនេះ ក្នុងលទ្ធផល 3-០ ក្នុងការប្រកួតជើងទី1 នាកីឡដ្ឋាន Wembley។

កាលពីមុនជួបគ្នាជើងទី1 ក្រុម Spurs បានបញ្ចប់ក្នុងលទ្ធផលស្មើ 1-1 លើទឹកដីខ្លួនឯងពេលប្រកួតជាមួយនឹងក្រុម Arsenal ក្នុងជំនួបរវាងក្រុមស្ថិតក្នុងទីក្រុងឡុងដ៍តែមួយកាលពីថ្ងៃសៅរ៍ ស្របពេលដែលក្រុម Dortmund បានរងបរាជ័យ 2-1 នៅលើទឹកដីក្រុម Augsburg កាលពីរាត្រីថ្ងៃសុក្រ ក្នុងក្របខ័ណ្ឌ Bundesliga៕

March 5, 2019

មិនចង់ឱ្យក្មេងៗជួបគ្រោះថ្នាក់ដោយសារអ៊ីនធើណិត”momo chellenge” ឪពុកម្ដាយគួរឱ្យកូនប្រើរបស់នេះវិញ

Kiddle ជា Search Engine សម្រាប់កុមារដែលជាកន្លែងសុវត្ថិភាពសម្រាប់ពួកគេក្នុងការចៀសផុតពីគ្រោះថ្នាក់ពីអ៊ីនធើណិតនានា រួមទាំងមេរោគថ្មីដែលរាតត្បាតពេញបណ្ដាញសង្គមគឺ “momo chellenge”។

Kiddle ជាប្រភេទម៉ាស៊ីនរុករកដែលផលិតដោយក្រុមការងាររបស់ Google។ វាមានសមត្ថភាពអាចស្វែងរកបានព័ត៌មានច្រើនយ៉ាង ទាក់ទងជាមួយកុមារមានទាំងវីដេអូ រូបភាព និងអក្សរមកជាមួយដែរ។

ដូច្នេះកុំបណ្ដោយឱ្យកូនៗរបស់អ្នកចាប់ផ្ដើមប្រើប្រាស់អ៊ីនធើណិតដោយមិនបានមើលការខុសត្រូវ ឬចេះតែបណ្ដោយឱ្យលេងឱ្យសោះ តែគួរឱ្យពួកគេប្រើ Kiddle ជាជាង Google ឬជាមួយបណ្ដាញសង្គម ឬមាតិកាវីដេអូនានាសម្រាប់យុវវ័យវិញប្រសើរជាង៕

March 4, 2019

ទំនើបណាស់! សូម្បីស្រោមអនាម័យ ក៏មានបច្ចេកវិទ្យាអាចវាស់ល្បឿននៃការវាយលុកដែរ

i.Con Smart Condom គឺជាស្រោមអនាម័យឆ្លាតវៃដំបូងគេក្នុងពិភពលោកដែលបានប្រកាសចេញកាលពីខែកក្កដា ឆ្នាំ2017 កន្លងទៅ។ ស្រោមអនាម័យនេះមានបើកទទួលការកុម្ម៉ង់ទិញលើវេបសាយ British Condoms ដែលមានតម្លៃប្រហែល 79ដុល្លារ ដោយរំពឹងថានឹងចេញលក់នៅអំឡុងត្រីមាសទី3 ឆ្នាំ2019 នេះ។

ដោយឡែកមុខងាររបស់ i.Con គឺវានឹងកត់ត្រានូវទិន្នន័យដូចខាងក្រោម៖

ចំនួនកាឡូរីដែលបានដុតបំផ្លាញនៅពេលរួមភេទ
ល្បឿននៃការវាយលុក និងចំនួនសរុបនៃការវាយលុក
ចលនានៃវគ្គនីមួយៗ
រយៈពេលសរុបនៃវគ្គនីមួយៗ
ល្បឿនមធ្យមនៃការវាយលុក
សីតុណ្ហភាពជាមធ្យមរបស់ស្បែក និងទិន្នន័យដទៃទៀត។

ក្រុមហ៊ុនផលិតស្រោមអនាម័យនេះនៅមិនទាន់ប្រាប់ពីថ្ងៃខែចេញលក់ជាផ្លូវការនៅឡើយទេ។ យោងតាមវេបសាយទទួលការកុម្ម៉ង់ទិញបានឱ្យដឹងថា i.Con មិនមែនជាស្រោមអនាម័យមែនទែនឡើយ វាគឺកងដែលពាក់លើផ្នែកគល់នៃស្រោមអនាម័យដែលអាចប្រើបានម្ដងហើយម្ដងទៀត៕

March 4, 2019

តារាឆ្នើមកូរ៉េខាងត្បូង Park ឈ្នះពាន HSBC Women’s World Championship

កីឡាការិនីវាយកូនគោល Park Sung-hyun ដែលមានចំណាត់ថ្នាក់លេខ2 ក្នុងពិភពលោក បានវាយកូនគោលយ៉ាងល្អបំផុតប្រចាំសប្តាហ៍ ដើម្បីរកបាន 64ពិន្ទុ កាលពីថ្ងៃអាទិត្យ និងដើម្បីឈ្នះពាន HSBC Women’s World Championship តាមរយៈការនាំមុខ 2ឈើ។

កីឡាការិនីរបស់កូរ៉េខាងត្បូងវ័យ 25ឆ្នាំរូបនេះ បានផ្តួលកីឡាការិនីអូស្ត្រាលី Minjee Lee តាមរយៈការវាយកូនគោលយ៉ាងល្អចំនួន 4លើក នៅលើរន្ធទី9 ដើម្បីឈ្នះពានដែលមានប្រាក់រង្វាន់ 1.5លានដុល្លារអាមេរិក ខណៈដែល Lee រកបាន 69ពិន្ទុនៅថ្ងៃចុងក្រោយ។

Park បានឱ្យដឹងថា៖ «ខ្ញុំពិតជារីករាយណាស់ និងរំភើបជាមួយនឹងការលេងរបស់ខ្ញុំនៅថ្ងៃនេះ ហើយខ្ញុំគិតថា ថ្ងៃនេះគឺជាថ្ងៃមួយក្នុងចំណោមថ្ងៃដ៏ល្អបំផុតរបស់ខ្ញុំ និងក្នុងចំណោមការលេងក្នុងកម្មវិធី LPGA Tour មកទល់ពេលនេះ»។

កីឡាការិនីរូបនេះបានបន្ថែមទៀតថា៖ «ខ្ញុំគិតថា វានឹងមិនទទួលជ័យជម្នះយ៉ាងលឿនបែបនេះឡើយ ហើយខ្ញុំពិតជារីករាយណាស់។ ខ្ញុំធ្លាប់មានការចាប់ផ្តើមដ៏តានតឹង កាលពីឆ្នាំមុន ហើយការឈ្នះជាលើកទី 1នេះ ពិតជាលឿនមែនទែន។ ខ្ញុំគិតថា ខ្ញុំនឹងលេងយ៉ាងល្អក្នុងការប្រកួតបន្ទាប់ទៀតនៃរដូវកាលនេះ»។

ការប្រជែងរបស់កីឡាការិនីមានចំណាត់ថ្នាក់លេខ1 ក្នុងពិភពលោក Lee បានជួបការខកចិត្ត ក្រោយពីការវាយមិនបានល្អលើរន្ធទី14។

ដោយឡែក កីឡាការិនី KoJin-young របស់កូរ៉េខាងត្បូង និង Zahara Munoz របស់អេស្ប៉ាញ សុទ្ធសឹងបានបញ្ចប់ដោយស្ថិតក្នុងចំណាត់ថ្នាក់លេខ3 ដូចគ្នា ក្រោយពីរកបាន 69ពិន្ទុ ក្នុងការប្រកួតជុំចុងក្រោយដូចគ្នា៕

March 4, 2019

លោក Klopp នៅតែជឿជាក់លើ Liverpool ទោះបីបាត់បង់ការនាំមុខលើតារាង

ក្រុម Liverpool បានជួបការសោកស្តាយយ៉ាងខ្លាំងចំពោះការខ្ជះខ្ជាយឱកាសដ៏ល្អចំនួន 2លើក ពីសំណាក់ខ្សែប្រយុទ្ធ Mohamed Salah ខណៈដែលក្រុម Everton បានធ្វើឱ្យពួកគេទទួលបានត្រឹមលទ្ធផលស្មើ ០-០ ក្នុងការប្រកួតរវាងក្រុមស្ថិតក្នុងទីក្រុង Merseyside កាលពីថ្ងៃអាទិត្យ។

បច្ចុប្បន្នក្រុមរបស់លោក Jurgen Klopp ដេញតាមពីក្រោយក្រុមម្ចាស់ការពារតំណែងជើងឯក Manchester City ចំនួន 1ពិន្ទុ នៅលើកំពូលតារាងនៃក្របខ័ណ្ឌ Premier League ខណៈដែលនៅសល់ការប្រកួតត្រឹមតែ 9លើកទៀតប៉ុណ្ណោះ។

ការស៊ុតបាល់របស់ Salah ត្រូវបានជួយសង្គ្រោះដោយអ្នកចាំទី Jordan Pickford របស់ Everton ខណៈដែលក្រុម Liverpool បានបាត់បង់ពិន្ទុជាលើកទី4 ក្នុងចំណោមការប្រកួតលីក 4លើកចុងក្រោយរបស់ពួកគេ។

លោក Klopp បានឱ្យដឹងថា៖ «ខ្ញុំមិនចាំបាច់ត្រូវផ្តល់ដំបូន្មានដល់កីឡាកររបស់ខ្ញុំឡើយ ព្រោះពួកគេដឹងរួចទៅហើយ។ ពួកគេមិនមែននៅក្មេងទៀតឡើយ»។

គ្រូបង្វឹករូបនេះបានបន្ថែមទៀតថា៖ «ខ្ញុំជឿជាក់ 100ភាគរយទៅលើឱកាសរបស់យើង។ ខ្ញុំដឹងថា ពីការប្រកួត 1លើក ទៅការប្រកួត 1លើកទៀត អារម្មណ៍របស់ខ្ញុំកាន់តែល្អប្រសើរអំពីកីឡាករ ពីព្រោះពួកគេហាក់ដូចជាត្រៀមខ្លួនរួចរាល់ហើយ»។

ដោយឡែក ការមិនស្គាល់ឈ្នះរបស់ក្រុម Everton ក្នុងការប្រកួតរវាងក្រុមស្ថិតក្នុងតំបន់តែមួយ បានបន្តរហូតដល់ 19ប្រកួត បើគិតចាប់តាំងពីឆ្នាំ2010។ ប៉ុន្តែ ទោះបីជាយ៉ាងណា ការអបអរផ្សេងៗពីសំណាក់អ្នកគាំទ្រនៃក្រុមម្ចាស់ផ្ទះ ក្នុងពេលបញ្ចប់ការប្រកួតបានបង្ហាញថា ពួកគេជឿជាក់ថា ពួកគេបានកម្ទេចក្តីសង្ឃឹមរបស់ Liverpool ក្នុងការឈ្នះពានលីកជាលើកទី1 ក្នុងរយៈពេល 29ឆ្នាំ៕

March 4, 2019

រូបគំរូផ្លូវល្បឿនលឿន ភ្នំពេញ-ព្រះសីហនុ ត្រូវបានដាក់បង្ហាញ!

រូបគំរូផ្លូវល្បឿនលឿន ភ្នំពេញ-ព្រះសីហនុ ប្រវែងជាង 190គីឡូម៉ែត្រ ត្រូវបានដាក់បង្ហាញដោយក្រសួងសាធារណការ និងដឹកជញ្ជូន នៅថ្ងៃទី4 ខែមីនា ឆ្នាំ2019 នេះ ខណៈដែលថ្ងៃបើកការដ្ឋានសាងសង់ជាផ្លូវការនឹងត្រូវធ្វើឡើងនៅថ្ងៃទី22 ខែមីនា ឆ្នាំ2019 ខាងមុខនេះ។

ឯកឧត្តម ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូនបានថ្លែងថា ផ្លូវល្បឿនលឿនមួយខ្សែនេះនឹងរួមចំណែកកាន់តែខ្លាំងក្នុងការជំរុញសេដ្ឋកិច្ចរបស់កម្ពុជា ព្រោះថា ផ្លូវល្បឿនលឿនភ្នំពេញ-ព្រះសីហនុនេះនឹងដើរតួនាទីយ៉ាងសំខាន់ក្នុងការដឹកជញ្ជូនទំនិញរវាងតំបន់ប៉ូលសេដ្ឋកិច្ចដ៏សំខាន់2 គឺរាជធានីភ្នំពេញ និងខេត្តព្រះសីហនុ។

ជាពិសេសការដឹកទំនិញពីបណ្តារោងចក្រនានាទៅកាន់កំពង់ផែស្វយ័តព្រះសីហនុ សម្រាប់ការនាំចេញទៅក្រៅប្រទេស ក៏ដូចជាការដឹកទំនិញពីកំពង់ផែស្វយ័តព្រះសីហនុមកតំបន់ដទៃទៀតក្នុងកម្ពុជាដែរ។

គម្រោងផ្លូវល្បឿនលឿននេះ ឆ្លងកាត់ 4រាជធានី-ខេត្ត រួមមាន រាជធានីភ្នំពេញ ខេត្តកណ្តាល ខេត្តកំពង់ស្ពី ខេត្តព្រះសីហនុ ក្នុងនោះគឺឆ្លងកាត់ 6ស្រុក 1ខណ្ឌ 2ក្រុង 31ឃុំ/សង្កាត់ និង110ភូមិ។

ផ្លូវនេះមានប្រវែងសរុប 190.365គីឡូម៉ែត្រ។ សាងសង់ជា 4គន្លងផ្លូវ សម្រាប់រថយន្ត (2ទៅ 2មក) និង 2គន្លងសម្រាប់ម៉ូតូ (1ទៅ 1មក)។ ជាប្រភេទផ្លូវក្រាលបេតុងកៅស៊ូ (AC) កម្រាស់ 10ស.ម និងថ្មលាយកៅស៊ូ (ATB)12ស.ម។ ពង្រីកទទឹងផ្លូវដល់ 24.5ម៉ែត្រ ខណ្ឌដោយសួនច្បារនៅកណ្ដាលទ្រូងផ្លូវ និងមានរបាំងអមសងខាងផ្លូវ ការពារសត្វ ឬមនុស្សឆ្លងកាត់។ មានកន្លែងសម្រាប់ឈប់សម្រាកចំនួន 4កន្លែង និងស្ថានីយប្រេងឥន្ធនៈ 3កន្លែង។ រយៈពេលសាងសង់ 48ខែ។

លោក វ៉ា ស៊ីមសូរិយា អ្នកនាំពាក្យក្រសួងសាធារណការ និងដឹកជញ្ជូនបានមានប្រសាសន៍ឱ្យដឹងថា សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តីនៃព្រះរាជាណាចក្រកម្ពុជានឹងអញ្ជើញជាអធិបតីក្នុងពិធីបើកការដ្ឋានសាងសង់ផ្លូវល្បឿនលឿនភ្នំពេញ-ខេត្តព្រះសីហនុនៅថ្ងៃទី22 ខែមីនាខាងមុខនេះ។

លោកបានបន្តថា ផ្លូវល្បឿនលឿនភ្នំពេញ-ក្រុងព្រះសីហនុនេះមានប្រវែងជាង 190គីឡូម៉ែត្រ(190.365គ.ម) ដែលចេញពីម្តុំផ្លូវរថភ្លើងនៃតំបន់ទំនប់កប់ស្រូវ ស្ថិតនៅខាងស្តាំដៃផ្លូវជាតិលេខ4 និងសាងសង់ស្របគ្នានឹងផ្លូវជាតិនេះ រហូតជិតដល់ទីរួមខេត្តកំពង់ស្ពឺ ទើបផ្លូវនេះឆ្លងកាត់ផ្លូវជាតិលេខ4ងាកមកខាងឆ្វេងដៃវិញ ហើយបន្តរហូតដល់ស្រុកព្រៃនប់ ទើបផ្លូវនេះងាកមកស្តាំដៃ រហូតដល់មាត់សមុទ្រនៃក្រុងព្រះសីហនុតែម្ដង។

អ្នកនាំពាក្យរូបនេះបានមានប្រសាសន៍ឱ្យដឹងទៀតថា ផ្លូវល្បឿនលឿននេះនឹងមានការធ្វើរបងអមសងខាងផ្លូវ លើកលែងតែចំណុចឆ្លងកាត់មួយចំនួនដែលមានស្ពានអាកាស និងស្ថានីយឈប់សំចត ព្រោះវាជាផ្លូវលឿនដែលអាចបើកបរក្នុងល្បឿនពី120 ទៅ160គីឡូម៉ែត្រក្នុងមួយម៉ោង ហេតុនេះទើបផ្លូវនេះមិនតម្រូវឱ្យមានចំណុចឆ្លងកាត់ច្រើនទេ៕

March 4, 2019

ទឹកប្រាក់ 36លានដុល្លារជាជំនួយរបស់ជប៉ុន ជួយសាងសង់ប្រព័ន្ធការពារទឹកជំនន់

គម្រោងសាងសង់ប្រព័ន្ធការពារទឹកជំនន់ និងកែលម្អប្រព័ន្ធប្រឡាយ-លូក្នុងរាជធានីភ្នំពេញ ជំហានទី4 ក្រោមហិរញ្ញប្បទានឥតសំណងរបស់ប្រទេសជប៉ុន ត្រូវបានបើកការដ្ឋានស្ថាបនាហើយ នៅព្រឹថ្ងៃចន្ទ 13រោច ខែមាឃ ឆ្នាំច សំរឹទ្ធិស័ក ព.ស2562 ត្រូវនឹងថ្ងៃទី4 ខែមីនា ឆ្នាំ2019 ក្រោមអធិតីភាព សម្តេចហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា រួមជាមួយលោក HORINOUCHI Hidehisa ឯកអគ្គរាជទូតជប៉ុនប្រចាំនៅកម្ពុជា។

ឯកឧត្ដម ឃួង ស្រេង អភិបាលរាជធានីភ្នំពេញបានឱ្យដឹងថា គម្រោងការពារទឹកជំនន់ និងកែលម្អប្រព័ន្ធប្រឡាយលូក្នុងរាជធានីភ្នំពេញ ជំហានទី4នេះ មានទឹកប្រាក់សរុបប្រមាណ 36លានដុល្លារអាមេរិក ជាជំនួយឥតសំណងរបស់រាជរដ្ឋាភិបាលជប៉ុន។

គម្រោងនេះរួមមាន ការដាក់បណ្តាញលូមេនៅក្នុងភូមិសាស្ត្រខណ្ឌទួលគោកប្រវែង 8.2គីឡូម៉ែត្រ ដាក់បណ្តាញលូមេនៅក្នុងភូមិសាស្ត្រខណ្ឌដូនពេញប្រវែង 4.4គីឡូម៉ែត្រ សាងសង់អាងស្តុកទឹកក្រោមដី និងសាងសង់ស្ថានីយបូមទឹក នៅសួនច្បារមុខក្រុមប្រឹក្សាអភិវឌ្ឍន៍កម្ពុជា CDC ដំឡើងរបារមេកានិចស្វ័យប្រវត្តិ ដើម្បីប្រមូលសំរាមនៅមុខផ្លូវបង្ហូរទឹកនៅស្ថានីយបូមទឹកចតុមុខព្រះគម្លង់1 ព្រះគម្លង់2 និងផ្សារចាស់ និងផ្តល់រថយន្តបូមទឹកចល័តចំនួន 2គ្រឿង។

ឯកឧត្តមអភិបាលរាជធានីភ្នំពេញបានឱ្យដឹងទៀតថា គម្រោងសាងសង់សំណង់ផ្សេងៗក្នុងគម្រោងការពារទឹកជំនន់ និងកែលម្អប្រព័ន្ធប្រឡាយ-លូក្នុងរាជធានីភ្នំពេញជំហានទី4នេះ ប្រើរយៈពេលប្រមាណជា 36ខែ ដោយចាប់ផ្តើមគម្រោងពីថ្ងៃទី1 ខែធ្នូ ឆ្នាំ2018 ហើយគ្រោងបញ្ចប់នៅថ្ងៃទី31 ខែតុលា ឆ្នាំ2021។ ឯកឧត្តមបានបង្ហាញក្តីសង្ឃឹមថា គម្រោងនេះនឹងរួមចំណែកស្តារ និងអភិវឌ្ឍសេដ្ឋកិច្ច-សង្គម ក៏ដូចជាធ្វើឱ្យបរិស្ថាននៃការរស់នៅរបស់ប្រជាពលរដ្ឋក្នុងរាជធានីភ្នំពេញប្រមាណជាង 2លាននាក់ល្អប្រសើរឡើងដែរ។

ឯកឧត្ដមបានបន្ថែមទៀតថា តាមរយៈកិច្ចសហប្រតិបត្តិការរវាងសាលារាជធានី ភ្នំពេញ ជាមួយដៃគូអភិវឌ្ឍន៍នានា ជាពិសេសជាមួយទីភ្នាក់ងារសហប្រតិបត្តិការអន្តរជាតិ ជប៉ុន(JICA) ក្រោមជំនួយរបស់រដ្ឋាភិបាលជប៉ុននោះ បានអនុវត្តគម្រោងការពារទឹកជំនន់ និងកែលម្អប្រព័ន្ធប្រឡាយ-លូក្នុងរាជធានីភ្នំពេញចំនួន 3លើករួចមកហើយ ដែលតាមរយៈគម្រោងទាំង3 កន្លងមកបានជួយឱ្យរាជធានីភ្នំពេញគេចផុតពីការគំរាមកំហែងដោយទឹកជំនន់ និងបានជួយកសាងប្រព័ន្ធលូកាន់តែល្អប្រសើរសម្រាប់រំដោះជំនន់ទឹកភ្លៀង។

ឯកឧត្តម Hidehisa HORINOUCHI ឯកអគ្គរដ្ឋទូតប្រទេសជប៉ុនប្រចាំនៅកម្ពុជាបានមានប្រសាសន៍ថា បន្ទាប់ពីការអនុវត្តដ៏ជោគជ័យនូវជំហានទី1 ជំហានទី2 និងជំហានទី3 នៃគម្រោងនៅក្នុងឆ្នាំ2004 ឆ្នាំ2010 និងឆ្នាំ2015 ; ក្រោមគម្រោងហិរញ្ញប្បទានឥតសំណងរបស់ប្រទេសជប៉ុន ដើម្បីកែលម្អប្រព័ន្ធប្រឡាយលូនៅភាគនិរតី ភាគឦសាន និងភាគអាគ្នេយ៍នៃរាជធានីភ្នំពេញរួចមក ការជន់លិចនៅតំបន់ទាំងនោះត្រូវបានកាត់បន្ថយយ៉ាងច្រើននៅក្នុងទីក្រុងភ្នំពេញ។

ឯកឧត្ដមបានបញ្ជាក់ថា ទោះជាយ៉ាងណាក៏នៅមានតំបន់មួយចំនួននៅក្នុងរាជធានីភ្នំពេញ នៅតែទទួលរងការខូចខាតដោយទឹកជំនន់ តែរដ្ឋាភិបាល ជប៉ុនបានផ្តល់ហិរញ្ញប្បទានឥតសំណងសម្រាប់ការអនុវត្តជំហានទី4 នៃគម្រោងដែលគ្របដណ្តប់ភាគច្រើននៅភាគខាងជើងនៃរាជធានីភ្នំពេញ។ ឯកឧត្ដមឯកអគ្គរដ្ឋទូត មានជំនឿយ៉ាងមុតមាំថា ការបញ្ចប់គម្រោងនេះដោយជោគជ័យ នឹងរួមចំណែកដល់ ការអភិវឌ្ឍសេដ្ឋកិច្ចរបស់កម្ពុជា ក៏ដូចជាពង្រឹងថែមទៀតនូវចំណងមិត្តភាពរវាងប្រទេសជប៉ុន និងព្រះរាជាណាចក្រកម្ពុជាដែរ៕

March 4, 2019

ក្រសួងការងារចាប់ផ្តើមប្រើរថយន្តចល័តដើម្បីផ្សព្វផ្សាយទីផ្សារការងារនៅតំបន់ឆ្ងាយៗ

ដើម្បីជំរុញការផ្តល់ព័ត៌មានផ្នែកទីផ្សារការងារឱ្យកាន់តែទូលំទូលាយនៅទូទាំងប្រទេសដល់និស្សិត និងប្រជាជននៅគ្រប់ទីកន្លែងក្នុងប្រទេសកម្ពុជា ក្រសួងការងារ និងបណ្តុះបណ្តាលវិជ្ជាជីវៈបានសម្ពោធដាក់ឱ្យប្រើប្រាស់រថយន្តមជ្ឈមណ្ឌលការងារចល័ត ដែលមានសេវាប្រឹក្សា និងបច្ចេកវិទ្យាសម្រួលដល់ការដាក់ពាក្យធ្វើការងារ។

ឯកឧត្តម អុិត សំហេង រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈបានលើកឡើងថា រថយន្តដែលជាមជ្ឈមណ្ឌលការងារចល័តនេះមានសារៈសំខាន់ខ្លាំងណាស់ក្នុងការអភិវឌ្ឍធនធានមនុស្ស និងទីផ្សារការងារនៅតាមតំបន់ជនបទ និងខេត្តឆ្ងាយៗដែលមិនទាន់មានមណ្ឌលការងារ។ តាមរយៈសកម្មភាពនេះ យុវជនកាន់តែមានភាពងាយស្រួលក្នុងការស្វែងរកការងារធ្វើបានយ៉ាងឆាប់រហ័ស ចំណេញពេលវេលា និងចំណាយតិច។ សកម្មភាពនេះជាគម្រោងដែលមានកិច្ចសហការជាមួយទីភ្នាក់ងារអភិវឌ្ឍន៍អន្តរជាតិស៊ុយអែត (SIDA) និងទីភ្នាក់ងារផ្តល់សេវាសាធារណៈស៊ុយអែត (SPES)ដែលស្របតាមក្របខ័ណ្ឌគោលនយោបាយ និងយុទ្ធសាស្ត្រអភិវឌ្ឍន៍វិស័យការងាររបស់រាជរដ្ឋាភិបាលកម្ពុជាក្នុងការខិតខំបង្កើតឱកាសការងារឱ្យកាន់តែច្រើន និងបង្ខិតសេវាស្វែងរកការងារឱ្យទៅដល់តំបន់ជនបទឆ្ងាយៗនៅទូទាំងប្រទេសកម្ពុជា។

ឯកឧត្តម អុិត សំហេង មានប្រសាសន៍ថា៖“ក្រសួងការងារបានខិតខំបង្កើតឱកាសការងារកាន់តែច្រើន និងជួយបែងចែកឱកាសទាំងនេះឱ្យបានទៅដល់ប្រជាជនគ្រប់រូបប្រកបដោយតម្លាភាព និងសមធម៌ សំដៅប្រែក្លាយឱកាសការងារដែលមានទាំងអស់ឱ្យទៅជាមុខរបរកាន់តែល្អសម្រាប់ប្រជាជនគ្រប់រូប”។

ឯកឧត្តមរដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈក៏បានលើកឡើងផងដែរថា អ្នកដែលទទួលបានផលប្រយោជន៍ច្រើនជាងគេអំពីគម្រោងដ៏មានសារៈសំខាន់នេះគឺ យុវជន និស្សិត ជនពិការ រួមទាំងស្ត្រីដែលទទួលបានការបណ្តុះបណ្តាលអភិវឌ្ឍន៍ជំនាញ និងទទួលបានឱកាសការងារ។ កន្លងមកគម្រោងនេះធ្លាប់បានធ្វើការងារបណ្តុះបណ្តាលជំនាញទន់ និងសហគ្រិនភាពដល់អ្នកចូលរួមប្រមាណ3,450នាក់ និងទទួលបានអ្នកចុះឈ្មោះស្វែងរកការងារប្រមាណ 90,000នាក់ ដោយក្នុងនោះអ្នកដែលទទួលបានការងារធ្វើប្រមាណ 2ម៉ឺននាក់ និងយុវជនដែលបានចុះធ្វើកម្មសិក្សាផ្ទាល់ចំនួន 749នាក់ក្នុងទីផ្សារការងារ។

បើតាមឯកឧត្តមរដ្ឋមន្ត្រី រថយន្តមជ្ឈមណ្ឌលការងារចល័តនេះជាប្រភេទរថយន្តវ៉ែន (ven) ដែលមានមុខងារផ្តល់សេវាកម្មសំខាន់ៗដូចជាមជ្ឈមណ្ឌលការងារ សម្រាប់ជួយដល់សេវាស្វែងរកការងារ ការចុះឈ្មោះស្វែងរកការងារទាំងលើឯកសារ (off line) និងលើអុីនធើណិត (online) សេវាទទួលប្រឹក្សាយោបល់ការងារ និងមានផ្តល់ជូននូវបណ្ណាល័យការងារថែមទៀតផង៕

March 4, 2019

កាសែតឡារ៉ែន ពាណិជ្ជ លេខ 164

[easy_media_download url=”https://www.lareine.com.kh/wp-content/uploads/2019/03/LRPN_164-Final-For-Web.pdf” force_dl=”1″]

March 3, 2019

Author: ធឿន មករា