ធឿន មករា - La Reine Media

ការអនុវត្តស្តង់ដាគណនេយ្យអន្តរជាតិ IFRS 17 ជាជំហានថ្មីមួយនៃវិស័យហិរញ្ញវត្ថុ

ការអនុវត្តស្តង់ដារបាយការណ៍គណនេយ្យអន្តរជាតិ IFRS 17 ក្នុងវិស័យធានារ៉ាប់រង និងធនាគារនឹងជួយដល់ក្រុមហ៊ុន និងធនាគារទាំងនោះឱ្យមានលក្ខណៈស្តង់ដាអន្តរជាតិផ្នែកហិរញ្ញវត្ថុ និងផ្តល់ផលប្រយោជន៍ដ៏សំខាន់ដល់លំនឹងនៃការរីកចម្រើនវិស័យហិរញ្ញវត្ថុរបស់កម្ពុជានាពេលបច្ចុប្បន្ន។

លោក យក់ ចំរើនឬទ្ធិ អគ្គនាយកក្រុមហ៊ុនធានារ៉ាប់រងហ្វ័រតេបានប្រាប់ឡារ៉ែនថា ការអនុវត្តស្តង់ដារគណនេយ្យ IFRS 17(International Financial Report section version17) ក្នុងវិស័យធានារ៉ាប់រងនៅកម្ពុជា ជាកម្មវិធីថ្មីមួយសម្រាប់កម្ពុជា ព្រោះជាស្តង់ដារបាយការណ៍ហិរញ្ញវត្ថុខ្នាតអន្តរជាតិដែលទើបកែសម្រួលថ្មី។

លោកអគ្គនាយកបានបញ្ជាក់ថា កាលណាក្រុមហ៊ុនធានារ៉ាប់រង និងធនាគារដែលបានទទួលស្គាល់ ឬអនុវត្តស្តង់ដាគណនេយ្យ IFRS17 ក្រុមហ៊ុនធានារ៉ាប់រងនោះនឹងមានលក្ខណៈស្តង់ដារអន្តរជាតិផ្នែកហិរញ្ញវត្ថុទាំងអស់ ដូចនេះមិនអាចក្លែងបន្លំ ឬបំភ័ន្តចំណុចណាមួយនៃហិរញ្ញវត្ថុរបស់ក្រុមហ៊ុនបានឡើយ។

លោក ចំរើនឬទ្ធិ បានពន្យល់ថា៖ “ព្រោះវាជាស្តង់ដានៃរង្វាស់រង្វាល់ខាងផ្នែកហិរញ្ញវត្ថុរបស់ក្រុមហ៊ុនធានារា់ប់រង ឬធនាគារថា តើក្រុមហ៊ុន ឬធនាគារទាំងនោះមានស្តង់ដារគណនេយ្យស្របតាមស្តង់ដាអន្តរជាតិដែរឬអត់? ព្រោះសព្វថ្ងៃដែលយើងនៅប្រើនៅឡើយ គឺស្តង់ដាគណនេយ្យកម្ពុជាដែលកម្មវិធីនេះមិនទាន់លម្អិតពីបញ្ហាអស់ទេ ដោយសារវាមាន version ទាបនៅឡើយ។ សព្វថ្ងៃប្រទេសជាច្រើនដែលប្រកាន់យករបបសេដ្ឋកិច្ចទីផ្សារ បានប្រើប្រាស់គណនេយ្យ IFRS 17 នេះហើយ”។

លោក ប៊ូ ចន្ទភីរូ អគ្គនាយករងនៃអគ្គនាយកដ្ឋានឧស្សាហកម្មហិរញ្ញវត្ថុនៃក្រសួងសេដ្ឋកិច្ច និងហិរញ្ញវត្ថុបានប្រាប់ឡារ៉ែនពាណិជ្ជថា ស្តង់ដាគណនេយ្យអន្តរជាតិ IFRS នេះត្រូវបានយកមកប្រើប្រាស់ស្របទៅតាមស្តង់ដាគណនេយ្យជាតិរបស់យើង ហើយដើម្បីឆ្លើយតបទៅនឹងតម្រូវការស្តង់ដាគណនេយ្យអន្តរជាតិ IFRS នេះ ស្តង់ដាគណនេយ្យជាតិនាពេលបច្ចុប្បន្នបានអនុវត្តទៅតាមស្តង់ដាគណនេយ្យអន្តរជាតិ IFRS 4។

លោកអគ្គនាយករងបានបញ្ជាក់ថា៖ “សម្រាប់ប្រព័ន្ធស្តង់ដាគណនេយ្យ IFRS 17 នេះ គេបានផ្តល់ឱ្យយើងពិចារណាសិន តែការអនុវត្តនឹងចាប់ផ្តើមនៅ2ឆ្នាំក្រោយ។ ចង់បញ្ជាក់ថា ចំពោះស្តង់ដាគណនេយ្យជាតិរបស់យើង តែកាលណាអន្តរជាតិគេធ្វើអ្វីថ្មី យើងនឹងអនុវត្តទៅតាមគេ គឺទទួលយក ដើម្បីឱ្យទាន់សភាពការណ៍អន្តរជាតិ តែចំពោះស្តង់ដាគណនេយ្យ IFRS 17 នេះ អន្តរជាតិគេទើបរកឃើញ គេទើបនឹងដាក់ឱ្យប្រើប្រាស់”។

លោកបានបន្តថា ដូច្នេះប្រទេសនីមួយៗ បើមុននឹងត្រូវអនុវត្ត ត្រូវតែកែសម្រួលសិនដែរ ហេតុនេះ2ឆ្នាំទៀត បើត្រូវអនុវត្ត IFRS17 នេះទើបយើងជូនដំណឹងទៅក្រុមហ៊ុនគ្រឹះស្ថានហិរញ្ញវត្ថុ និងធ្វើសិក្ខាសាលាដើម្បី៖ ទី1-ផ្សព្វផ្សាយពីកាលបរិច្ឆេទថា នឹងត្រូវអនុវត្តនៅប៉ុន្មានឆ្នាំខាងមុខ។ ទី2-គឺជាការជូនដំណឹងឱ្យក្រុមហ៊ុននីមួយៗរៀបចំខ្លួនឱ្យបានទាន់សភាពការណ៍។លោកបានបន្តទៀតថា ការសម្រេចចិត្តអនុវត្តប្រព័ន្ធស្តង់ដាគណនេយ្យ IFRS 17 នេះ ទី1-ដោយសារយើងចូលជាសមាជិករបស់គេហើយ បើគេអនុវត្តស្តង់ដាគណនេយ្យនេះ យើងត្រូវតែអនុវត្តដែរ។ ទី2-ចំពោះក្រុមហ៊ុនបរទេស ដែលគេមកវិនិយោគនៅប្រទេសយើង គេមើលទៅតាមស្តង់ដាអន្តរជាតិស្តង់ដាគណនេយ្យ IFRS17 នេះ។ ដូច្នេះក្រុមហ៊ុនភាគច្រើនផ្នែកធានារ៉ាប់រងជាក្រុមហ៊ុនរបស់បរទេស បើគេអនុវត្តប្រព័ន្ធនេះ គឺមិនជាលំបាកទេសម្រាប់គេ ហើយគេចង់បានស្តង់ដាអន្តរជាតិនេះ ព្រោះវាមានតម្លាភាព។ ហេតុនេះការអនុវត្តទៅតាមបទដ្ឋានអន្តរជាតិនេះចាំបាច់ត្រូវតែទៅតាមហ្នឹងហើយ ប៉ុន្តែសម្រាប់យើង យើងត្រូវការពេលវេលា។

សម្រាប់លោក យក់ ចំរើនឬទ្ធិ បានមើលឃើញអំពីប្រព័ន្ធស្តង់ដាគណនេយ្យ IFRS 17 នេះចំនួន7ចំណុចដែលល្អ៖
ទី1- វាឆ្លុះបញ្ចាំងពីតថភាព និងស្ថានភាពហិរញ្ញវត្ថុជាក់ស្តែងរបស់ក្រុមហ៊ុន។

ទី2- IFRS17នៅលើពិភពលោកនឹងក្លាយជាប្រព័ន្ធមួយដូចគ្នាទាំងអស់ ដោយមិនចាំបាច់អ្នកពិនិត្យ មើលទៅស្តង់ដាគណនេយ្យរបស់ប្រទេសណាមួយទេ ព្រោះប្រទេសនីមួយៗមានស្តង់ដាគណនេយ្យផ្សេងគ្នា។ ដូចនេះវាជួយឱ្យរបាយការណ៍ហិរញ្ញវត្ថុមានតម្លាភាព។

ទី3- IFRS 17 ជួយដល់ការគ្រប់គ្រងរបស់រដ្ឋាភិបាលនៅក្នុងវិស័យហិរញ្ញវត្ថុបានច្រើន ទៅតាមស្ថានភាពជាក់ស្តែងនៅតាមក្រុមហ៊ុន។ វាជួយរដ្ឋាភិបាលក្នុងការដឹងពីហិរញ្ញវត្ថុរបស់ក្រុមហ៊ុនមួយថាមានសក្តានុពលត្រឹមណា? ទិសដៅក្រុមហ៊ុនដល់ណា ឬអាចក្ស័យធន? រដ្ឋាភិបាលមានប្រព័ន្ធនេះគឺអាចគ្រប់គ្រងបានស្រួល។

ទី4- ផ្តល់ទំនុកចិត្តដល់អតិថិជនកាលណាមាន IFRS 17 គឺអ្វីៗមានស្តង់ដា ជាអត្ថប្រយោជន៍ដល់អតិថិជនឱ្យមានទំនុកចិត្ត ព្រោះនៅពេលគាត់បានឃើញថា ក្រុមហ៊ុនមានស្តង់ដាដែលឆ្លុះបញ្ចាំងតថភាពជាក់ស្តែង ដូចនេះអតិថិជនគាត់ដឹងថា ក្រុមហ៊ុនដែលគាត់រកស៊ីជាមួយនោះខ្លាំង ឬខ្សោយកម្រិតណា។

ទី5- ការប្រើប្រព័ន្ធ IFRS17 គឺឥតកេងបន្លំប្រាក់ចំណេញ និងមិនបំប៉ោងតួលេខប្រាក់ចំណេញ ព្រោះមានស្តង់ដាហ្នឹង គាត់មិនអាចបន្លំក្នុងការបង់ពន្ធបានទេ វាបានឆ្លុះបញ្ចាំងនូវប្រាក់ចំណេញជាក់ស្តែង។

ទី6- បង្កទំនុកចិត្តដល់អ្នកវិនិយោគ។ ក្រុមហ៊ុន ឬធនាគារដែលប្រើ IFRS 17 នឹងធ្វើឱ្យវិនិយោគិនចង់វិនិយោគជាមួយធនាគារនោះ ដោយគាត់មានទំនុកចិត្ត ព្រោះវាបង្ហាញនូវភាពច្បាស់លាស់។

ទី7- កត្តាសំខាន់មួយនៅក្នុងទីផ្សារហិរញ្ញវត្ថុ គឺជាក្រុមហិរញ្ញវត្ថុដែលធ្វើពិពិធកម្មហិរញ្ញវត្ថុ។ ការគិតពីភាពច្បាស់លាស់នៃតម្លៃដែលយកពីអតិថិជនថា តើយើងមានលទ្ធភាពធ្វើសំណងទៅអតិថិជនវិញឬអត់? ដូច្នេះក្រុមពិពិធកម្មហិរញ្ញវត្ថុ គាត់មានកិច្ចសហការគ្នាដើម្បីឆ្លុះបញ្ចាំង ថាតើស្ថានភាពហិរញ្ញវត្ថុក្រុមហ៊ុន តើមានលទ្ធភាពធ្វើសំណងខាងលើដែរឬទេ?។

លោក ប៊ូ ចន្ទភីរូ ក៏បានបញ្ជាក់ពីចំណុចល្អ និងចំណុចមិនល្អរបស់ប្រព័ន្ធស្តង់ដាគណនេយ្យ IFRS 17 ដែរថា ចំណុចល្អរបស់ប្រព័ន្ធស្តង់ដាគណនេយ្យ IFRS 17 នេះ ជាទូទៅ គឺពេលគេអនុវត្តដល់ណា យើងក៏នឹងអនុវត្តដល់នោះដែរ គឺយើងក៏ចូលចុះនឹងស្តង់ដារបស់គេដែរ។ ឯចំណុចមិនល្អ របស់ប្រព័ន្ធស្តង់ដាគណនេយ្យ IFRS17 នេះ គឺការជំរុញឱ្យក្រុមហ៊ុនដែលមិនទាន់មានស្តង់ដានេះឱ្យគាត់ខំប្រឹង បើគាត់លំបាកខ្លាំង ត្រូវខំប្រឹងឱ្យខ្លាំងដើម្បីឱ្យទាន់គេ។

លោកអគ្គនាយកក្រុមហ៊ុនធានារ៉ាប់រងហ្វ័រតេបានបញ្ជាក់ថា៖ “ក្រុមហ៊ុនហ្វ័រតេយើងបានរៀបចំ ប្រើប្រាស់គណនេយ្យ IFRS 17 នៅក្នុងឆ្នាំ2019 នេះ។ ប្រសិនបើស្តង់ដានេះត្រូវបានដាក់ឱ្យអនុវត្ត វាអាចនឹងមានផលប៉ះពាល់ដល់ក្រុមហ៊ុនមួយចំនួនដែលពុំទាន់បានត្រៀមខ្លួន។ ដូច្នេះការត្រៀមខ្លួនក្នុងការប្រើប្រព័ន្ធនេះ គឺដើម្បីឱ្យក្រុមហ៊ុនធានារ៉ាប់រងទាំងអស់ដែលនៅប្រើស្តង់ដារគណនេយ្យមិនមានភាពត្រឹមត្រូវ ត្រូវតែកែសម្រួលមកប្រើស្តង់ដាថ្មី ឬត្រូវតែងាកមកប្រើ IFRS 17នេះ បើពុំដូច្នោះទេវាអាចនឹងប៉ះពាល់ដល់របាយការណ៍ហិរញ្ញវត្ថុរបស់គាត់ ដែលនាំឱ្យមានផលលំបាកដល់ក្រុមហ៊ុនជាមិនខាន”៕

March 7, 2019

ក្រុមហ៊ុនធំៗជាច្រើននឹងចូលរួមពិព័រណ៍លំនៅឋានកម្ពុជាឆ្នាំ2019 នៅសាលពិព័រណ៍កោះពេជ្រនៅខែមេសា ឆ្នាំនេះ

ពិព័រណ៍លំនៅឋានកម្ពុជាមិនត្រឹមតែមានការតំាងបង្ហាញគម្រោងលំនៅឋានប៉ុណ្ណោះទេ ប៉ុន្តែក៏មានការបង្ហាញពីសក្ដានុពលរបស់ក្រុមហ៊ុនជាច្រើនទៀតផងដែរ មានដូចជា ក្រុមហ៊ុនផ្នែកហិរញ្ញវត្ថុ ធនាគារ ធានារ៉ាប់រង សំណង់ គ្រឿងសង្ហារិម រថយន្ត និងក្រុមហ៊ុនជាតិ និងអន្តរជាតិជាច្រើនទៀត។

វត្តមានក្រុមហ៊ុនជាតិ និងអន្តរជាតិនៅក្នុងព្រឹត្តិការណ៍ពិព័រណ៍

នឹងមានក្រុមហ៊ុនជាតិ និងអន្តរជាតិមកចូលរួមបង្ហាញពីគម្រោងរបស់ខ្លួនជាច្រើន ដែលរួមមានគម្រោងលំនៅឋាន The Peninsula Private Residences KT Pacific, KohThmey, La Vista One, Angkor 4 Season Hotel, R&F Properties, V-House, 7 Residence, Borey VIP, PH Real Estate, LCJ – H.Y.O (Cambodia) International Real Estate Company Limited, Creed, Borey BTS, Prime One, The National Coast, BooYoung Town, Urban Village, Seara Sports and Arakawa Residence និងក្រុមហ៊ុនជាច្រើនទៀតដែលនឹងចូលរួមជាមួយនឹងពិព័រណ៍នេះ។

ក្រុមហ៊ុនCellcard ដែលជាក្រុមហ៊ុនផ្គត់ផ្គង់សេវាទូរស័ព្ទក្នុងស្រុកដ៏ធំបំផុត ក៏សម្រេចចិត្តចូលរួមធ្វើជា ម្ចាស់ឧបត្ថម្ភនៅក្នុងពិព័រណ៍នេះផងដែរ។

ជាមួយគ្នានេះដែរ លោក Chris Hong អ្នកប្រឹក្សាយោបល់ផ្នែកលក់នៃក្រុមហ៊ុនអចលនទ្រព្យ Prime One Real Estate បានឱ្យដឹងថា ការចូលរួមជាមួយនឹងព្រឹត្តិការណ៍ពិព័រណ៍លំនៅឋានដ៏ធំនេះ ជាឱកាសដ៏ល្អមួយដែលយើងនឹងអាចភ្ជាប់ទំនាក់ទំនងដោយផ្ទាល់ទៅកាន់អតិថិជនគោលដៃរបស់យើង។ ក្រៅពីឱកាសនៃការលក់ហើយ យើងក៏អាចផ្សព្វផ្សាយពីកិត្តិនាមក្រុមហ៊ុនរបស់យើងទៅកាន់សាធារ ណជនឱ្យបានស្គាល់ផងដែរ។

ចំណែកអ្នកនាង ចេង សុខា នាយករងផ្នែកលក់ និងទីផ្សាររបស់ក្រុមហ៊ុនលំនៅឋានជប៉ុន Creed Group បានឱ្យដឹងថា ក្រុមហ៊ុនរបស់យើងធ្លាប់បានចូលរួមក្នុងព្រឹត្តិការណ៍ពិព័រណ៍ដែលរៀបចំដោយ Realestate.com.kh កាលពីឆ្នាំមុនរួចមកហើយ វាពិតជាមានការរៀបចំដ៏ល្អមែន ហើយឆ្នាំនេះវានឹងកាន់តែធំជាងមុន ដែលកម្មវិធីពិព័រណ៍នេះរៀបចំនៅសាលពិព័រណ៍កោះពេជ្រ។

អ្វីដែលអ្នករំពឹងទុក

មិនត្រឹមតែជាពិព័រណ៍ដែលលោកអ្នកអាចស្វែងយល់បន្ថែមអំពីគម្រោងលំនៅឋានប៉ុណ្ណោះទេ ប៉ុន្តែវាជាព្រឹត្តិការណ៍នៃការតាំងបង្ហាញរបស់ក្រុមហ៊ុនជាច្រើនពាក់ព័ន្ធនឹងការរស់នៅប្រចាំថ្ងៃ ដែលរួមមាន៖ រថយន្ត សំណង់ ផ្នែកតុបតែង ស្ថាបត្យកម្ម ធនាគារ និងធានារ៉ាប់រង ជាដើម។

លោក Tom O’Sullivan បាននិយាយថា “រស់នៅប្រកបដោយស្តង់ដាខ្ពស់ អមដោយការរស់នៅដោយភាពស៊ីវិល័យ លោកអ្នកអាចចូលរួមស្វែងយល់ដែលមិនត្រឹមតែគម្រោងលំនៅឋានតែប៉ុណ្ណោះទេ តែ លោកអ្នកអាចស្វែងយល់បន្ថែមអំពីបច្ចេកវិទ្យា ក៏ដូចជាការបង្ហាញពីរថយន្តទំនើបទៀត”។

បន្ថែមពីនេះទៀតលោក ហេង ចាន់រដ្ឋា ប្រធានផ្នែកទីផ្សាររបស់ក្រុមហ៊ុនកោះថ្មីដែលមាន App ត្នោតជាបណ្តាញព័ត៌មានបានឱ្យដឹងថា “ការមានវត្តមាន App ត្នោត គឺជាបណ្តាញព័ត៌មានចែកចាយនូវព័ត៌មានពិតៗ ចំណេះដឹងទូទៅ សង្គម ធុរកិច្ចក៏ដូចជាព័ត៌មានទាន់ហេតុការណ៍ជាដើម។

រង្វាន់សម្រាប់អ្នកចូលរួមពិព័រណ៍

ទន្ទឹមនឹងនេះអ្នកចូលរួមពិព័រណ៍ក៏មានឱកាសឈ្នះរង្វាន់ផ្សេងៗជាច្រើនពីកម្មវិធីនេះផងដែរ។ ទោះជាលោកអ្នកមិនបានឈ្នះរង្វាន់អ្វីក៏ដោយ ប៉ុន្តែលោកអ្នកនឹងទទួលផលប្រយោជន៍ជាច្រើនពីការចូលរួមក្នុងពិព័រណ៍នេះ ព្រោះថា ព្រឹត្តិការណ៍នេះមានកម្មវិធីសិក្ខាសាលាដែលចូលរួមដោយវាគ្មិនល្បីៗនៅក្នុងវិស័យពាក់ព័ន្ធដែលនឹងលើកយកប្រធានបទសំខាន់ៗ ដូចជាការវិនិយោគនៅក្នុងវិស័យអចលនទ្រព្យ ច្បាប់ និងធុរកិច្ច ជាដើមមកជម្រាបជូន និងចែករំលែក ដែលទាំងអស់នេះគឺជាចំណេះដឹងដ៏មានប្រយោជន៍សម្រាប់លោកអ្នក៕

ទំនាក់់ទំនងក្នុងការកក់ស្តង់៖ +855 78 637 323 (ភាសាខ្មែរ និងចិន) ឬ +855 12 599 699 (ភាសាអង់គ្លេស)

March 6, 2019

អាហារកាត់បន្ថយគ្រោះថ្នាក់នៃការច្រាលអាស៊ីតពីក្រពះទៅបំពង់ក

តើអ្វីជាមូលហេតុបណ្តាលឱ្យមានជំងឺច្រាលទឹកក្រពះ? មូលហេតុចម្បង និងកើតឡើងញឹកញាប់នោះគឺជាភាពមិនប្រក្រតីនៃក្រពះ។ បញ្ហានេះកើតឡើងនៅពេលដែល ផ្នែកខាងលើនៃក្រពះ និងសន្ទះបិទបើករបស់ក្រពះលយទៅលើសាច់ដុំឌីយ៉ាហ្វ្រាម (សាច់ដុំឌីយ៉ាហ្វ្រាម ជាសាច់ដុំដែលបែងចែកក្រពះ របស់អ្នកពីទ្រូង)។ ជាធម្មតាសាច់ដុំនោះវាបានជួយទប់ជាតិអាស៊ីតក្នុងក្រពះ។ ប៉ុន្តែប្រសិនបើ អ្នកមានបញ្ហាជំងឺច្រាលទឹកអាស៊ីតក្រពះ ទឹកអាស៊ីតអាចនឹងរត់ ឬច្រាលទៅកាន់បំពង់អាហារ ហើយវាជាសញ្ញាដំបូងនៃជំងឺក្រពះ។

តើយើងអាចដោះស្រាយបញ្ហាច្រាលទឹកអាស៊ីតក្រពះតាមបែបធម្មជាតិ ងាយៗបានដែរឬទេ ?
វិធីព្យាបាលជំងឺច្រាលទឹកអាស៊ីតក្រពះគឺអាចធ្វើបានតាមរយៈការទទួលទានអាហារមួយចំនួនដូចខាងក្រោម ៖
1. ម្រះព្រៅ
គឺជាឱសថបែបធម្មជាតិដ៏ល្អសម្រាប់ព្យាបាលជំងឺច្រាលទឹកអាស៊ីតក្រពះ។ អ្វីដែលអ្នកត្រូវធ្វើនោះ គឺគ្រាន់តែទំពាស្លឹកម្រះព្រៅស្រស់ចំនួន5ស្លឹកជាការស្រេច។ អ្នកក៏អាចយកស្លឹកម្រះព្រៅទៅឆុងជាតែ រួចសឹមទទួលទានក៏បាន។

2. ទឹកក្ដៅឧណ្ហៗ
ការពិសាទឹកក្ដៅឧណ្ហៗ ដែលមានប្រសិទ្ធភាពធ្វើឱ្យទឹកអាស៊ីតក្រពះស្រាល ឬខ្សោយ គឺទទួលទាននាពេលព្រឹក ហើយដើម្បីឱ្យកាន់តែប្រសើរនោះ ចូរទទួលទាន1ទៅ2កែវ ខណៈពេលពោះទទេ។

3. ទឹកប្រទាលកន្ទុយក្រពើ
ទឹកប្រទាលកន្ទុយក្រពើ គឺជាឱសថធម្មជាតិ ដែលជួយព្យាបាលជំងឺក្រពះរ៉ាំរ៉ៃ និងជួយបន្ថយជាតិអាស៊ីតនៅក្នុងក្រពះបានផងដែរ។ វាពិតជាមានអត្ថប្រយោជន៍ចំពោះសុខភាពណាស់។ ដើម្បីជួយគ្របបាំងស្រទាប់បំពង់អាហារ និងក្រពះ ទប់ស្កាត់ការរលាក លោកអ្នកអាចយកទឹកប្រទាលកន្ទុយក្រពើយកមកទទួលទាន គឺទទួលទានសុទ្ធ100%កាន់តែល្អ។

4. ផ្លែចេក
ដូចប្រិយមិត្តអ្នកអានបានជ្រាបរួចមកហើយថា ផ្លែចេកមានគុណសម្បត្តិច្រើនយ៉ាងណាសម្រាប់អ្នកជួបប្រទះបញ្ហាច្រាលទឹក-អាស៊ីតក្រពះ។ ជាតិម្សៅដែលមាននៅក្នុងផ្លែចេកនឹងធ្វើឱ្យអ្នកធូរស្រាលពីអាការនៃជំងឺនេះបានយ៉ាងឆាប់រហ័ស ប៉ុន្តែត្រូវប្រាកដថា ចេកដែលអ្នកយកមកទទួលទាន គឺជាចេកទុំល្អ។

5. ផ្លែប៉ោម
អ្នកនិយមតមអាហារសម្រកទម្ងន់ មុនចូលគេងត្រូវទទួលទានផ្លែប៉ោម 1ផ្លែសម្រាប់ចម្អែតក្រពះ គឺដើម្បីកាត់បន្ថយការឡើងទឹកអាស៊ីតក្រពះ បើអ្នកមានជំងឺទឹកនោមផ្អែម ឬធាត់ពេក អ្នកត្រូវទទួលទានផ្លែប៉ោមពណ៌បៃតងទើបល្អ។

វិធីការពារជំងឺ រលាកក្រពះរ៉ាំរ៉ៃ ដំបៅក្រពះ មហារីកក្រពះ និងជំងឺច្រាលទឹកអាស៊ីតក្រពះ
1. ត្រូវពិនិត្យ និងព្យាបាលឱ្យជាដាច់នូវមេរោគ ដែលជាដើមហេតុដ៏ធំក្នុងការបង្កជំងឺមហារីក ដំបៅក្រពះ ឈាមក្រពះ ឬរលាកក្រពះរ៉ាំរ៉ៃ។
2. ត្រូវទំពាអាហារឱ្យម៉ដ្ឋល្អ ហើយត្រូវទទួលទានទឹកឱ្យបានមួយកែវផង ដើម្បីឱ្យអាហាររំលាយបានល្អ និងបន្សាបទឹកអាស៊ីតបានល្អ។
3. ត្រូវទទួលទានឱ្យយឺតៗ ដោយក្នុងមួយពេលត្រូវចំណាយពេលប្រមាណ15នាទី។
4. ត្រូវទទួលទានអាហារតិចៗ តែច្រើនដង កុំឱ្យទំនេរក្រពះលើសពី3ម៉ោង។
5. ចៀសវាងការទទួលទានអាហារចៀន បំពង និងឆា កុំបំពងខ្ទឹម ដាក់ខ្ទឹមពេលឆាឆ្អិន ហើយកុំប្រើខ្ទឹមលីងដាក់ក្នុងគុយទាវ បបរ និងសម្លម្ជូរ ឬអាហារជូរផ្អាប់។
6. កុំផឹកស្រា ឬគ្រឿងស្រាវឹងផ្សេងៗច្រើន ឬញឹកញាប់ពេក។
7. កុំជក់បារី និងនៅក្បែរអ្នកដែលជក់បារី ឬកុំឱ្យអ្នកជក់បារីនៅក្បែរ។
8. កាត់បន្ថយការបន្ថែមស្ករត្នោត ស្ករស ស្ករពោត ឬស្ករអំពៅក្នុងម្ហូបអាហារ និងកាត់បន្ថយការទទួលទានបង្អែម។
9. ចៀសវាងការទទួលទានត្រីខ សាច់ខ អាហារកំប៉ុង និងអាហារកញ្ចប់។
10. មុនចូលគេងត្រូវចាំឱ្យស្រកពោះសិន ប្រមាណជា1ម៉ោងក្រោយទទួលទានអាហារពេលល្ងាច។
11. មុនចូលគេង ត្រូវលោតតិចៗ ហើយលើកដៃឡើងលើប្រមាណ1ទៅ2នាទីសិន ដើម្បីឱ្យក្រពះដំណើរការបានល្អ៕

March 6, 2019

10យ៉ាងរបស់ “ជីវ៉ាន់ស៊ុយ” អុីចឹងបានជាជនជាតិជប៉ុនចូលចិត្តញ៉ាំេម្ល៉ះ!

បច្ចុប្បន្ននេះនៅឯប្រទេសជប៉ុន “ជីវ៉ាន់ស៊ុយ” បានក្លាយជាបន្លែដែលមនុស្សជាច្រើននាំគ្នានិយមចូលចិត្តទទួលទានយ៉ាងខ្លាំង នាំគ្នាញ៉ាំទាំងក្ដាប់ៗ (ទាំងតម្លៃជីវ៉ាន់ស៊ុយនៅប្រទេសគេមិនមែនថោកៗដូចស្រុកយើងផង) ដល់ថ្នាក់មានអ្នកចម្រៀងប៊យប៊ែនដ៍របស់ជប៉ុនតែងបទចម្រៀងច្រៀងដែលមានឈ្មោះថា “ជីវ៉ាន់ស៊ុយ ហេវិន” (ជីវ៉ាន់ស៊ុយស្ថានសួគ៌) ដែលបង្ហាញអំពីការនិយមចូលចិត្តញ៉ាំជីវ៉ាន់ស៊ុយដ៏ខ្លាំងក្លារបស់ជនជាតិជប៉ុនទៀតផង។

តាមរយៈការចូលចិត្តញ៉ាំជីវ៉ាន់ស៊ុយដ៏ខ្លាំងក្លានេះ ទើបធ្វើឱ្យនៅប្រទេសជប៉ុនមានភោជនីយដ្ឋានដែលល្បីល្បាញរឿងមុខម្ហូបដែលមានបន្លែជីវ៉ាន់ស៊ុយជាចំណែកផ្សំចម្បង មិនមែនគ្រាន់តែហាន់តូចៗរោយពីលើម្ហូបអាហារដូចនៅស្រុកយើងនោះទេ។ ពួកគេនាំគ្នាញ៉ាំជីវ៉ាន់ស៊ុយទាំងបាច់ៗតែម្ដងហើយថែមទាំងមានភោជនីយដ្ឋានដែលលក់តែមុខម្ហូបដែលផ្សំតែពីបន្លែជីវ៉ាន់ស៊ុយសុទ្ធទៀតផង។ ក្រៅពីនេះ មុខម្ហូបជីវ៉ាន់ស៊ុយ ថែមទាំងជាមុខម្ហូបប្រចាំឆ្នាំរបស់ប្រទេសជប៉ុន(ឆ្នាំ2016) ដែលបញ្ជាក់ច្បាស់ពីការនិយមចូលចិត្តញ៉ាំជីវ៉ាន់ស៊ុយរបស់ជនជាតិជប៉ុនយ៉ាងច្បាស់ទៀតផង។បើនិយាយអំពីរសជាតិ ប្រហែលជារឿងពិសេសដោយឡែកពិតៗមិនខាន ព្រោះអ្នកខ្លះអាចនឹងចូលចិត្ត អ្នកខ្លះទៀតអាចនឹងមិនចូលចិត្ត ដូចគ្នានឹងផ្លែទុរេននៅប្រទេសយើងដែរ ដែលអ្នកណាចូលចិត្ត ក៏ចូលចិត្តខ្លាំង តែអ្នកដែលមិនចូលចិត្ត ក៏ស្អប់តែម្ដង ព្រោះរសជាតិ និងក្លិនរបស់វាដែលខ្លាំងក្លា និងជាឯកលក្ខណៈពិសេសដោយឡែកពិតៗហ្នឹងឯង។ តែបើនិយាយអំពីប្រយោជន៍របស់ជីវ៉ាន់ស៊ុយវិញនោះ សូមជម្រាបថាមានច្រើនណាស់ រហូតដល់មិត្តអ្នកអានអាចនឹងត្រូវងាកមកនិយមចូលចិត្តញ៉ាំជីវ៉ាន់ស៊ុយខ្លាំងដូចជនជាតិជប៉ុនដែរមិនខាន។

សារធាតុអាហារនៅក្នុងបន្លែជីវ៉ាន់ស៊ុយ
- វីតាមីន A
– វីតាមីន B
– វីតាមីន C
– សារធាតុដែក
- បេតាឃែរ៉ូធីន
- កាល់ស្យូម និងផ្សេងៗទៀតជាច្រើន។

ប្រយោជន៍ល្អៗរបស់ “ជីវ៉ាន់ស៊ុយ”
1. ជួយបញ្ចុះជាតិស្ករនៅក្នុងឈាម ត្រូវនឹងអ្នកជំងឺទឹកនោមផ្អែម និងអ្នកដែលកំពុងសម្រកទម្ងន់
2. ការពារជំងឺផ្ដាសាយ3. បំបាត់អាការស្រេកទឹក
4. តតាំង ប្រឆាំងមេរោគផ្សេងៗនៅក្នុងពោះវៀន
5. ជួយបណ្ដេញខ្យល់នៅក្នុងក្រពះអាហារ
6. មានសារធាតុប្រឆាំងរ៉ាឌីកាល់សេរី ជួយកាត់បន្ថយភាពប្រថុយប្រថានក្នុងការកើតជំងឺមហារីក
7. ជាឱសថបន្ទន់លាមក ជួយឱ្យបន្ទោបង់ស្រួល
8. បំបាត់អាការវិលមុខ
9. ថែបំប៉នភ្នែក
10. ជួយជំរុញការធ្វើការងាររបស់ឈាម និងសាច់ដុំ

ទោះជាបន្លែជីវ៉ាន់ស៊ុយមានក្លិនហាក់ដូចជាឈួលខ្លាំង តែក៏មិនចាំបាច់ទៅកង្វល់អ្វីដែរ ព្រោះក្លិនរបស់បន្លែជីវ៉ាន់ស៊ុយនេះនឹងត្រូវបញ្ចេញចោលមកតាមទឹកមូត្រហើយបើមិនទទួលទានក្នុងបរិមាណច្រើនជ្រុលពេកទេនោះវានឹងមិនធ្វើឱ្យធុំក្លិនខ្លួនដូចដែលមនុស្សជាច្រើនអាចធ្លាប់បានឮនោះទេតែទោះជាយ៉ាងណាក៏ដោយ ការដែលនាំគ្នាងាកមកទទួលទានបន្លែជីវ៉ាន់ស៊ុយដើម្បីឱ្យទទួលបានប្រយោជន៍ល្អៗដល់រាងកាយនោះ ក៏មិនគួរទទួលទានច្រើនជ្រុលពេកដែរ ព្រោះមិនថាអាហារប្រភេទណាដែលថាល្អៗនោះទេ បើយើងទទួលទានច្រើនជ្រុលពេក ក៏វាហុចគុណវិបត្តិដល់យើងដែរ៕

March 6, 2019

លោក ប៉ិច ប៉ូឡែន៖ ចង់សម្រេចគោលដៅអភិវឌ្ឍន៍ខ្លាំងក្លា លុះត្រាប្រជាជនមានចរិតល្អ និងប្រសិទ្ធភាពការងារខ្ពស់

អត្តចរិត និងការគិតជាឫសគល់សំខាន់នៃសកម្មភាព និងលទ្ធផលរបស់មនុស្សម្នាក់ៗដែលជាកោសិការបស់សង្គម។ ប្រសិនបើមនុស្សម្នាក់ៗមានអត្តចរិតល្អ ជាមនុស្សដែលមានការទទួលខុសត្រូវខ្ពស់ មានភាពហ្មត់ចត់ ស្មោះត្រង់ និងប្រសិទ្ធភាព នោះសង្គមនឹងទទួលបានការរីកចម្រើនយ៉ាងឆាប់រហ័ស តែប្រសិនបើប្រជាជនមិនគោរពពេលវេលា មិនចេះធ្វើការជាក្រុម ឬនិយាយដោយខ្លីថា អត្តចរិតមិនទាន់ល្អ នោះការអភិវឌ្ឍទៅរកគោលដៅសំខាន់ណាមួយក៏មានការលំបាកទៅតាមនោះដែរ។

លោក ប៉ិច ប៉ូឡែន អគ្គនាយកនៃក្រុមហ៊ុនវេសឡាញ អេឌ្យូខេសិន គ្រុប បានលើកឡើងថា វិស័យធនធានមនុស្ស គឺជាចំណុចសំខាន់មួយក្នុងការសម្រេចគោលដៅអភិវឌ្ឍន៍ឱ្យក្លាយជាប្រទេសដែលមានចំណូលមធ្យមកម្រិតខ្ពស់នៅឆ្នាំ2030 និងប្រទេសដែលមានចំណូលខ្ពស់នៅឆ្នាំ2050 ព្រោះនៅពេលដែលប្រជាជនមានកម្រិតនៃការយល់ដឹងល្អ មានផលិតភាពការងារខ្ពស់ នៅពេលនោះយើងអាចមានភាពជាម្ចាស់ការ និងមានឱកាសទាញយកការងារសំខាន់ៗបានជាច្រើនទៀត។ ក្រោយពេលយើងទាញបានឱកាសការងារ និងឱកាសអាជីវកម្មរបស់យើង ធ្វើឱ្យចំណូលរបស់យើងម្នាក់ៗកើនឡើង ដែលរុញច្រាន GDP ឱ្យកើនឡើងពីជាង1,000ដុល្លារក្នុង 1ឆ្នាំ ទៅជាង3,000ដុល្លារ និងកើនឡើងខ្ពស់ជាងនេះជាដើម។

លោក ប៉ិច ប៉ូឡែន បាននិយាយថា៖ “បច្ចុប្បន្ននេះយើងឃើញថា មានបងប្អូនយើងខ្លះទៅបរទេសដើម្បីទិញទំនិញមកលក់បន្ត ហើយនៅថ្ងៃអនាគតការរីកចម្រើនកាន់តែខ្លាំង ការប្រកួតប្រជែងកាន់តែខ្លាំង ដែលធ្វើឱ្យទំនិញខ្លះយើងលែងនាំចូលមកបានទៀត គឺគេយកមកលក់ដល់ទីផ្សាររបស់យើងផ្ទាល់តែម្តង ហេតុនេះយើងត្រូវអភិវឌ្ឍសមត្ថភាព និងបង្កើនភាពម្ចាស់ការលើទីផ្សាររបស់យើង”។

អ្នកជំនាញអប់រំខាងលើបានលើកឡើងផងដែរថាដើម្បីទទួលបានភាពជាម្ចាស់ការនេះ លុះត្រាតែយើងម្នាក់ៗមានអត្តចរិត និងផ្នត់គំនិតល្អជាមុនសិន។ មូលហេតុសំខាន់ដែលយើងគួររៀបចំអត្តចរិត និងបន្តបណ្តុះក្មេងៗជំនាន់ក្រោយឱ្យមានអត្តចរិត និងផ្នត់គំនិតល្អនោះ ព្រោះវាជាផ្នែកសំខាន់មួយដែលភាគីសំខាន់ៗទាំងអស់បានលើកឡើង។ យើងអាចមើលឃើញបានតាមរយៈរបាយការណ៍របស់ធនាគារពិភពលោក ធនាគារអភិវឌ្ឍន៍អាស៊ី និងរបាយការណ៍ក្នុងប្រទេសយើង យើងឃើញថា ភាពរួមគ្នាមួយដែលជាកត្តាប្រឈមសម្រាប់ប្រជាជនកម្ពុជា គឺនៅខ្វះភាពជាអ្នកដឹកនាំ ការធ្វើការងារជាក្រុម ការទំនាក់ទំនង និងការដោះស្រាយបញ្ហាជាដើម។ ចំណុចទាំងអស់នេះបើស្ដាប់មួយភ្លែតគឺ មិនសូវអាក្រក់ស្តាប់ពេកទេ តែបើយើងយកមកពិចារណាតែបន្តិចយើងនឹងដឹងថា គេចង់ថាឱ្យយើងនៅមិនទាន់មានចរិតល្អនៅឡើយហ្នឹងឯង។ ហេតុនេះយើងត្រូវតែធ្វើការផ្លាស់ប្តូរឱ្យកាន់តែប្រសើរឡើង ដើម្បីចូលរួមចំណែកយ៉ាងសំខាន់ក្នុងការអភិវឌ្ឍសង្គម កុំឱ្យគេបន្តវាយតម្លៃមិនល្អមកលើយើងតទៅទៀត។

លោក ប៉ូឡែន បានលើកឡើងផងដែរថា មូលហេតុនេះហើយទើបយើងនាំចូលកម្មវិធីទម្លាប់ទាំង7 ដ៏មានប្រសិទ្ធភាព (7 habits for highly effective people) និងកម្មវិធី Leader in me មកកម្ពុជាដើម្បីព្យាយាមផ្លាស់ប្តូរគ្រប់លទ្ធភាពដល់ប្រជាជនកម្ពុជាឱ្យលុបបំបាត់ទម្លាប់អវិជ្ជមានចាស់ៗចោល ហើយបង្កើតទម្លាប់ថ្មីដើម្បីលើកតម្លៃរបស់យើងឡើងវិញ។ កន្លងមកបញ្ហាដែលយើងគ្រប់គ្នាសុទ្ធតែបានដឹងគឺ ប្រជាជនយើងខ្លះមិនទាន់មានទម្លាប់នៃការទទួលខុសត្រូវល្អ និយាយមិនច្បាស់លាស់ គ្មានផែនការក្នុងការធ្វើការ ព្រោះមានអ្នកខ្លះដល់ពេលចូលធ្វើការហើយទើបរកនឹកថា ថ្ងៃនេះត្រូវធ្វើអ្វី ហើយសម្បីតែផែនការជីវិតក៏គ្មានដែរដែលធ្វើឱ្យពួកគេលំបាកក្នុងការអភិវឌ្ឍខ្លួន។ ដោយសារតែមូលហេតុនេះហើយទើបយុវជនយើងមួយចំនួនមានតែបំណង តែប៉ងអ្វីបរាជ័យនោះ និងមិនចេះបែងចែកចំណុចអាទិភាពសម្រាប់ការងារ គ្រួសារ និងការរស់នៅជាដើម។ លើសពីនេះទៅទៀតមានមនុស្សខ្លះឆ្នើមតែបុគ្គល តែមិនចេះធ្វើការងារជាក្រុម ដាក់ចូលក្រុមណា ឈ្លោះគ្នាក្រុមនោះ ជាដើម។

លោក ប៉ិច ប៉ូឡែន បាននិយាយថា៖ “បញ្ហាប្រឈមមួយផ្សេងទៀតដែលជាចំណុចអវិជ្ជមាន គឺប្រជាជនយើងខ្លះទទួលផ្នត់គំនិតចង់ចាញ់ចង់ឈ្នះតាំងពីតូចមិនចេះស្តាប់គ្នា ហេតុនេះហើយទើបធំឡើងពេលធ្វើការងារចង់មានបានតែឯង បំបាក់គ្នាយកតែឈ្នះ ដែលជាហេតុធ្វើឱ្យយើងមិនអាចរីកចម្រើនជាមួយគ្នាបាន។ ដោយមើលឃើញពីកត្តាទាំងនេះហើយ ទើបសាលាយើងមិនបង្រៀនឱ្យមានលេខ1 លេខ2 នោះទេ គឺយើងចង់បណ្តុះគំនិតពួកគេឱ្យខំប្រឹងតែមិនមែនចង់ចាញ់ចង់ឈ្នះនោះទេ”។

ពាក់ព័ន្ធនឹងអ្នកធ្វើការងារវិញ លោក ប៉ិច ប៉ូឡែនបានលើកឡើងផងដែរថា ដោយសារតែយើងមានទម្លាប់មិនសូវល្អ និងស្ថានភាពអសកម្មទាំងនេះហើយទើបធ្វើឱ្យពេលខ្លះទាំងបុគ្គលិករដ្ឋ និងឯកជន នៅមានបញ្ហាប្រសិទ្ធភាពការងារ ព្រោះធ្វើការច្រើនតែម៉ោង តែលទ្ធផលទទួលបាននៅទាបនៅឡើយ ដែលជាចំណុចលំបាកក្នុងការជំរុញឱ្យមានការកើនប្រាក់ចំណូល ដែលឈានទៅដល់ស្ថានភាពលំបាកក្នុងការសម្រេចគោលដៅអភិវឌ្ឍន៍។ ហេតុនេះដល់ពេលហើយ ដែលយើងត្រូវធ្វើការផ្សព្វផ្សាយ និងបណ្តុះទម្លាប់ល្អឡើងវិញឱ្យបានទូទាំងប្រទេស ដោយសហការគ្រប់លទ្ធភាព ដើម្បីសម្រួលដល់គ្រឹះស្ថានអប់រំ និងស្ថាប័ននានាទទួលបានកម្មវិធីល្អៗជាច្រើនសម្រាប់ជាប្រយោជន៍សម្រាប់បុគ្គលិកផង សម្រាប់ស្ថាប័នផង និងសម្រាប់សង្គមផង ព្រោះក្រោយពេលបុគ្គលិកមានទម្លាប់ល្អ គាត់នឹងមានភាពទទួលខុសត្រូវច្រើនជាងមុន ការងារល្អជាងមុន ការចំណាយរបស់ស្ថាប័នលើភាពខ្ជះខ្ជាយក៏តិចជាងមុនដែរ ដែលធ្វើឱ្យយើងម្នាក់ៗអាចពង្រីកខ្លួន និងចូលរួមអភិវឌ្ឍបានយ៉ាងល្អ៕

March 6, 2019

ការអនុវត្តកិច្ចព្រមព្រៀងដឹកជញ្ជូនឆ្លងកាត់ព្រំដែនគោកក្នុងក្របខ័ណ្ឌមហាអនុតំបន់មេគង្គ ត្រូវការពេល2ឆ្នាំទៀត

បើទោះបីជាកិច្ចព្រមព្រៀងដឹកជញ្ជូនឆ្លងកាត់ព្រំដែនក្នុងក្របខ័ណ្ឌមហាអនុតំបន់មេគង្គ (GMS-CBTA) ត្រូវបានចុះហត្ថលេខា និងចូលជាធរមានតាំងពីឆ្នាំ2015 រួចរាល់ក៏ពិតមែន តែការអនុវត្តពេញលេញលើកិច្ចព្រមព្រៀងនេះហាក់ត្រូវបានអូសបន្លាយពេលជាង 2ឆ្នាំទៀត។

កិច្ចព្រមព្រៀងស្តីពីការដឹកជញ្ជូនឆ្លងកាត់ព្រំដែនក្រោមក្របខ័ណ្ឌមហាអនុតំបន់មេគង្គ (GMS-CBTA) មានប្រទេស6 ជាសមាជិក ក្នុងនោះរួមមាន វៀតណាមកម្ពុជា ឡាវ មីយ៉ាន់ម៉ា ថៃ និងចិន។ កិច្ចព្រមព្រៀងនេះនឹងជួយលុបបំបាត់ឈ្មួញកណ្តាល បង្កើន និងលើកកម្ពស់សកម្មភាពពាណិជ្ជកម្មដោយកាត់បន្ថយចំនួនពេលវេលាដែលចំណាយក្នុងការឆ្លងកាត់ព្រំដែន។ កិច្ចព្រមព្រៀងស្តីពីការដឹកជញ្ជូនឆ្លងកាត់ព្រំដែនក្នុងក្របខ័ណ្ឌមហាអនុតំបន់មេគង្គ (GMS-CBTA) នឹងអនុញាតឱ្យប្រទេសជាសមាជិកនីមួយៗ អាចប្រើប្រាស់រថយន្តបានចំនួន 500គ្រឿង សម្រាប់ការដឹកជញ្ជូនឆ្លងកាត់គ្នាទៅវិញទៅមកតាមច្រកព្រំដែនដែលបានកំណត់។

លោក វ៉ា ស៊ីមសូរិយា អ្នកនាំពាក្យក្រសួងសាធារណការ និងដឹកជញ្ជូនបានមានប្រសាសន៍ថា ការអនុវត្តកិច្ចព្រមព្រៀង GMS-CBTA នេះមិនទាន់អាចធ្វើបានទាំងស្រុងនៅឡើយទេ ពោលគឺប្រទេសមួយចំនួនក្នុងមហាអនុតំបន់មេគង្គ ដូចជា ឡាវ និងមីយ៉ាន់ម៉ា មិនទាន់បើកច្រកព្រំដែនរបស់ខ្លួនចំពោះការដឹកជញ្ជូនឆ្លងកាត់នៅឡើយ ដោយប្រទេសទាំង2 នេះស្នើសុំរយៈពេល 2ឆ្នាំទៀត។

យ៉ាងណាមិញ ប្រទេសកម្ពុជាដែលប្រកាសថា ខ្លួនបានត្រៀមរួចរាល់អស់ហើយក្នុងការបើកច្រកព្រំដែន ដើម្បីឱ្យមានការដឹកជញ្ជូនឆ្លងកាត់ពីបណ្តាប្រទេសនៅក្នុងមហាអនុតំបន់មេគង្គនោះ ក៏មិនទាន់មានរថយន្តគ្រប់គ្រាន់ចំនួន 500គ្រឿងដើម្បីដឹកជញ្ជូនទំនិញ និងអ្នកដំណើរទៅកាន់ប្រទេសក្នុងមហាតំបន់មេគង្គនោះដែរ។ នេះបើយោងតាមអ្នកនាំពាក្យក្រសួងសាធារណការ។

លោក សូរិយា បានថ្លែងថា៖ “ឥឡូវប្រទេសថៃវៀតណាម និងប្រទេសចិន អាចអនុវត្តកិច្ចព្រមព្រៀងបានដោយគេមានរថយន្តគ្រប់ចំនួន 500គ្រឿង ប៉ុន្តែកម្ពុជា បើទោះបីជាបានត្រៀមរួចរាល់ហើយក្ដី តែមិនមានរថយន្តគ្រប់ចំនួន 500គ្រឿងនោះក្នុងការដឹកជញ្ជូនឆ្លងកាត់ប្រទេសទាំងនោះទេ ខណៈពេលដែលប្រទេសមីយ៉ាន់ម៉ាសុំពិចារណា 2ឆ្នាំទៀតដើម្បីអនុញាតឱ្យមានការដឹកញ្ជូនឆ្លងកាត់ប្រទេសរបស់ខ្លួន ខណៈប្រទេសឡាវក៏សុំពេលពិចារណា 2ឆ្នាំទៀតដែរ ដោយលើកហេតុផលថា ផ្លូវខូច ត្រូវការថវិកាជុសជុលផ្លូវខូច និងគិតសេវាដឹកជញ្ជូនឆ្លងកាត់ប្រទេសឡាវ”។

លោក សូរិយា បន្តថា កម្ពុជាបានត្រៀមរួចរាល់អស់ហើយ និងកំពុងតែអនុវត្តកិច្ចព្រមព្រៀងនេះដោយអនុញ្ញាតឱ្យរថយន្តរបស់ថៃចំនួន 500គ្រឿង និងវៀតណាម 500គ្រឿងដឹកញ្ជូនទំនិញ និងអ្នកដំណើរចូលមក និងឆ្លងកាត់កម្ពុជាជារៀងរាល់ថ្ងៃ។

លោកបានបន្តទៀតថា ប្រទេសកម្ពុជាស្ថិតនៅចំកណ្តាលនៃមហាអនុតំបន់មេគង្គ ដូច្នេះកម្ពុជាជាប្រទេស ដែលមានការដឹកជញ្ជូនឆ្លងកាត់ច្រើនពីប្រទេសជិតខាង ដូចជាវៀតណាម និងថៃជាដើម។ លោកបន្ថែមថា ក្រៅពីកិច្ចព្រមព្រៀង GMS-CBTA នេះ កម្ពុជាបានចុះអនុស្សរណៈយោគយល់គ្នាដោយឡែកមួយទៀតជាលក្ខណៈទ្វេភាគី ជាមួយប្រទេសវៀតណាម និងថៃ។

លោកបន្ថែមទៀតថា អនុស្សរណៈយោគយល់គ្នាមួយទៀតជាលក្ខណៈទ្វេភាគីរវាងថៃ និងកម្ពុជា គឺមានរថយន្តចំនួនតែ 150គ្រឿងប៉ុណ្ណោះដែលអាចឆ្លងកាត់ទៅវិញទៅមករវាងកម្ពុជា និងថៃ ដោយប្រើប្រាស់ច្រកព្រំដែនដែនតែមួយប៉ុណ្ណោះ គឺច្រកព្រំដែនអន្តរជាតិ ប៉ោយប៉ែត។ ដោយឡែកកម្ពុជាបានចុះកិច្ចព្រមព្រៀងទ្វេភាគីជាមួយប្រទេសវៀតណាម ដោយបើកចំហឱ្យមានរថយន្ត 500គ្រឿងទៅវិញទៅមក ហើយប្រើប្រាស់ និងបើកច្រកព្រំដែន 6កន្លែង។

លោក ស៊ីន ចន្ធី ប្រធានសមាគមភ្នាក់ងារបញ្ជូនទំនិញកម្ពុជាមានប្រសាសន៍ថា បណ្តាប្រទេសនៅក្នុង មហាអនុតំបន់មេគង្គបានចុះកិច្ចព្រមព្រៀងរួចរាល់អស់ហើយស្តីពីការដឹកជញ្ជូនឆ្លងកាត់តាមបណ្តាប្រទេសនៅក្នុង GMS នេះ តែដោយឡែកប្រទេសនីមួយៗមិនទាន់បានអនុវត្តពេញលេញនូវកិច្ចព្រមព្រៀងនេះនៅឡើយ ហើយប្រទេសខ្លះមិនចង់អនុវត្តកិច្ចព្រមព្រៀងនេះទៀតផង។

លោកថា ប្រទេសវៀតណាម និង ប្រទេសថៃមានច្បាប់រៀងៗខ្លួន ដែលធ្វើជារនាំងឧបសគ្គ ពីព្រោះប្រទេសនីមួយៗមិនចង់ឲ្យរថយន្ត ឆ្លងកាត់ប្រទេសរបស់ខ្លួន ដោយសារគេគិតថា ខួចផ្លូវ ខាតនេះ ខាតនោះ ប៉ុន្តែជារួមរដ្ឋាភិបាលនៃប្រទេស ជាសមាជិក GMSបានចុះកិច្ចព្រមព្រៀងរួចរាល់ហើយ។

លោក ចន្ធី បានបន្តថា៖ “ខ្ញុំគិតថា បើសិនជាការដឹកជញ្ជូនឆ្លងកាត់ក្នុងបណ្តាប្រទេស GMS បាន វាជារឿងល្អណាស់ ដូចជានៅសហគមន៍អឺរ៉ុបដែលអាចធ្វើឱ្យមានការដឹកជញ្ជូនឆ្លងកាត់ពីប្រទេសមួយទៅប្រទេសមួយបាន ជាពិសេសវាល្អក្នុងការធ្វើពាណិជ្ជកម្ម”។

លោក ចន្ធី បញ្ជាក់ថា៖ “ប្រទេសនីមួយៗនៅតែបង្កនូវឧបសគ្គរៀងៗខ្លួន ដោយលើកពីបញ្ហាលើច្បាប់ទម្លាប់អ្នកបើកបរជាដើម តែជាគោលការណ៍រួម បើអាចធ្វើទៅបាន ចំពោះសេដ្ឋកិច្ចគឺ ពិតជាល្អ ប៉ុន្តែប្រទេសមួយចំនួនមិនមានឆន្ទៈធ្វើនោះទេ ដូច្នេះវានឹងមិនអាចទៅរួចទេក្នុងពេលឆាប់ៗខាងមុខនេះ”។

គួរបញ្ជាក់ថា កម្ពុជានឹងទទួលធ្វើជាម្ចាស់ផ្ទះក្នុងការរៀបចំ និងធ្វើជាប្រធានបន្តវេនតាមលំដាប់តួអក្សរឡាតាំងនូវកិច្ចប្រជុំលើកទី7 នៃគណៈកម្មាធិការរួមសម្រាប់អនុវត្តកិច្ចព្រមព្រៀងដឹកជញ្ជូនឆ្លងកាត់ព្រំដែន ក្រោមក្របខណ្ឌមហាអនុតំបន់មេគង្គ និងកិច្ចប្រជុំគណៈកម្មាធិការជាតិសម្រួលការដឹកជញ្ជូនឆ្លងដែនដែលនឹងប្រព្រឹត្តទៅនៅថ្ងៃទី12-13 ខែមីនា ឆ្នាំ2019 ខាងមុខ នៅទីក្រុងសៀមរាប ខេត្តសៀមរាប។

កិច្ចប្រជុំនៅខែក្រោយនេះនៅសៀមរាប យើងនឹងជជែកពីកិច្ចព្រមព្រៀង GMS ដែលបានធ្វើតាំងពីឆ្នាំ2015 ប្រទេសទាំងអស់ផ្តល់សច្ចាប័នហើយ តែប្រទេសមួយចំនួនត្រូវបង្ហើយ ជាពិសេសនៅលើច្រករបៀងឆ្លងកាត់ និងច្រកទ្វារព្រំដែន និងនិតិវិធីផ្សេង និងធ្វើពិធីចុះហត្ថលេខាលើកិច្ចព្រមព្រៀងមួយទៀត ដើម្បីបន្ថែមច្រករបៀង ច្រកទ្វារថែមទៀត៕

March 6, 2019

តើយុវជនយល់យ៉ាងណាអំពីទិវាអំណានជាតិនៅឆ្នាំ2019នេះ?

ទិវាអំណាន ជាទិវាដ៏មានសារៈសំខាន់សម្រាប់សង្គមកម្ពុជា ព្រោះបច្ចុប្បន្នកំពុងត្រូវការធនធានមនុស្សលើគ្រប់ផ្នែកទាំងអស់។ ហេតុនេះការបំផុសឱ្យប្រជាជនចាប់ផ្តើមអាន គឺជាយន្តការដ៏សំខាន់មួយដែលកំពុងស្ថិតក្នុងការយកចិត្តទុកដាក់របស់ស្ថាប័នពាក់ព័ន្ធនានា។

នៅថ្ងៃទី18 ខែមីនា ឆ្នាំ2019 ខាងមុខនេះកម្ពុជានឹងប្រារព្ធទិវាអំណានធំប្រចាំឆ្នាំ ស្របទៅតាមអនុក្រឹត្យបង្កើតទិវាអំណានជាតិឆ្នាំ2015 ដែលកំណត់យកថ្ងៃទី18 ខែមីនា រៀងរាល់ឆ្នាំជាទិវាអំណាន ដែលថ្ងៃនេះគឺត្រូវចំនឹងថ្ងៃកំណើតរបស់សម្តេចព្រះមហាសង្ឃរាជ ជួន ណាត ដែលត្រូវបានគេស្គាល់ថា ជាស្ថាបនិកដ៏សំខាន់លើវិស័យអក្សរសាស្ត្រជាតិ។

ស្ថាបនិក My BOOKSHOPCambodia លោក ប៊ួយ សុធន យល់ឃើញថា ទិវាអំណានជាតិ គឺជាព្រឹត្តិការណ៍ជាវិជ្ជមានមួយដែលជំរុញឱ្យប្រជាជនកម្ពុជាកាន់តែច្រើនចូលចិត្តអាន។ ដើម្បីលើកស្ទួយការអាន នៅកម្ពុជាយើងត្រូវការធាតុផ្សំជាច្រើន ក្នុងនោះការរៀបចំព្រឹត្តិការណ៍ថ្នាក់ជាតិ គឺជាយន្តការមួយសំខាន់ក្នុងចំណោមកត្តាគន្លឹះសម្រាប់អភិវឌ្ឍការអាននៅកម្ពុជា។ បច្ចុប្បន្ននេះថ្វីដ្បិតតែចំនួននាក់អាននៅកម្ពុជានៅមានកម្រិតក៏ពិតមែន តែចំនួនអ្នកចាប់អារម្មណ៍ពីការអានមានការកើនឡើង ហេតុនេះទិវាអំណានជាតិឆ្នាំនេះអាចនឹងមានកំណើនអ្នកចូលរួមច្រើនជាងឆ្នាំមុនៗ តែទន្ទឹមនឹងនេះក៏សូមឱ្យមានការរៀបចំ និងច្នៃប្រឌិតឱ្យបានកាន់តែទាក់ទាញឡើង បើទោះបីជាមានមនុស្សចូលរួមច្រើនហើយក៏ដោយ។

លោក ប៊ួយ សុធន បាននិយាយថា៖ “ការចែកសៀវភៅ និងសកម្មភាពច្នៃប្រឌិតនៅក្នុងព្រឹត្តិការណ៍ធំៗពាក់ព័ន្ធនឹងអំណាន គឺជារឿងល្អមួយដែលអាចទាក់ទាញមនុស្សឱ្យបានចូលរួមកាន់តែច្រើន។ សកម្មភាពបែបនេះ គឺជារឿងវិជ្ជមាន ព្រោះពេលខ្លះគោលបំណងសំខាន់ មិនមែនគ្រាន់តែទៅចូលរួមកម្មវិធីនោះទេ តែគាត់អាចទៅដើម្បីកម្សាន្ត ឬចង់បានសៀវភៅ ហើយអ្វីដែលសំខាន់នោះ យ៉ាងហោចណាស់ក៏យើងអាចទាក់ទាញមនុស្សថ្មីៗដែលមិនទាន់ចាប់អារម្មណ៍លើការអានឱ្យចូលទៅក្នុងបរិស្ថានល្អមួយ និងកាន់តែយល់ច្បាស់ពីផលប្រយោជន៍នៃអំណានដែរ”។

លោក សុធន ក៏បានលើកឡើងផងដែរថា ព្រឹត្តិការណ៍ដ៏មានសារៈសំខាន់នេះក៏ជាផ្នែកយ៉ាងសំខាន់មួយសម្រាប់ជួយដល់អ្នកនិពន្ធផងដែរ ព្រោះវាជាឱកាសក្នុងការតាំងបង្ហាញសៀវភៅល្អៗ និងជាទីផ្សារដ៏សំខាន់មួយផងដែរសម្រាប់ឱ្យប្រជាជនបានស្គាល់ស្នាដៃរបស់អ្នកនិពន្ធថ្មី។

សហស្ថាបនិកបណ្ណាគារមួយរូប លោក ហម សុខនី បានបង្ហាញការយល់ឃើញថា លោកគាំទ្រឱ្យមានការប្រារព្ធទិវាអំណាននេះ ហើយវាក៏ជាព្រឹត្តិការណ៍នៃការចងចាំមួយដែលបានដាស់ស្មារតីប្រជាជនថា ប្រទេសកម្ពុជាយើងមានទិវាដ៏ពិសេសមួយជារៀងរាល់ឆ្នាំ គឺទិវាអំណានជាតិ។ ទិវានេះក៏ជាឱកាសមួយល្អផងដែរសម្រាប់អាណាព្យាបាលដែលចង់ឱ្យកូនក្លាយជាមនុស្សពូកែ និងមានទម្លាប់ល្អនៅថ្ងៃអនាគត ព្រោះគាត់អាចនាំកូនឱ្យឃើញពីពិភពដ៏ធំមួយដែលពោរពេញទៅដោយមនុស្សស្រឡាញ់ការអប់រំ។ ការនាំកូនតូចៗទៅកាន់ទិវាអំណាន ជាការអប់រំដោយផ្ទាល់ដើម្បីឱ្យក្មេងរីករាយជាមួយនឹងការអាន ហើយជំរុញឱ្យប្រជាជនខ្មែរជំនាន់ថ្មីកាន់តែច្រើនចូលចិត្តអាន និងក្លាយជាធនធានមនុស្សដែលមានចំណេះដឹង ទាំងផ្នែករឹង និងទន់។

លោក ហម សុខនី និយាយថា៖ “នៅពេលក្មេងតូចៗចូលចិត្តអាននោះ ពួកគេនឹងអាចទទួលបានចំណេះដឹងពីផ្នត់គំនិតអប់រំជាច្រើនដែលបង្កប់នៅក្នុងស្នាដៃនិពន្ធទាំងប្រលោមលោក សៀវភៅកុមារ សៀវភៅអប់រំ ឬសៀវភៅស្តីពីជំនាញក៏ដោយ”។

កញ្ញា ប៉ា សុខេង ជាអ្នកស្រឡាញ់ការអានមួយរូបបានលើកឡើងថា ការរៀបចំទិវាអំណានជាតិលើកទី4 នេះនឹងមានភាពផុសផុល និងប្រសិទ្ធភាពជាងមុន ព្រោះមួយរយៈពេលចុងក្រោយនេះមានការពេញនិយមការអានសៀវភៅច្រើនដែលយើងទាំងអស់គ្នាសុទ្ធតែបានមើលឃើញថា កម្មវិធីធំៗនានាមានកំណើនល្អ។ ចំណុចដែលនាំឱ្យមានកំណើនអ្នកចូលរួមនេះព្រោះមានសារព័ត៌មានចុះផ្សព្វផ្សាយយ៉ាងផុសផុល ហើយសម្រាប់ឆ្នាំនេះក៏មានសារាចរណែនាំពីរាជរដ្ឋាភិបាលឱ្យមានការផ្សព្វផ្សាយកាន់តែទូលំទូលាយឡើងដើម្បីបញ្ជ្រាបការយល់ដឹងដល់យុវជនលើអំណានឱ្យកាន់តែមានប្រសិទ្ធភាពផងដែរ។ ក្នុងសារាចរក៏បានកំណត់ពីផែនការសកម្មភាពមួយចំនួនដែលក្រសួង ស្ថាប័នពាក់ព័ន្ធ មានដូចជាក្រសួងអប់រំ យុវជន និងកីឡា ក្រសួងវប្បធម៌ និងវិចិត្រសិល្បៈ រួមទាំងក្រសួងព័ត៌មានគួរធ្វើដើម្បីជំរុញវិស័យអំណាន៕

March 5, 2019

កម្ពុជា៖ អាស៊ាន-ឥណ្ឌា រួមគ្នាធ្វើកំណែទម្រង់លើកិច្ចសម្រួលពាណិជ្ជកម្ម

រដ្ឋមន្ត្រីក្រសួងពាណិជ្ជកម្មកម្ពុជាបានថ្លែងក្នុងវេទិកាពិភាក្សានៃកិច្ចប្រជុំកំពូលអាស៊ាន-ឥណ្ឌា លើកទី4 ថា ការកាត់បន្ថយរបាំងពន្ធគយ ការកាត់បន្ថយអត្រាពន្ធ និងការកាត់បន្ថយរបាំងផ្សេងៗដែលមិនមែនពន្ធគយចំពោះពាណិជ្ជកម្ម គឺជាធាតុសំខាន់ក្នុងការធ្វើសេរីភាវូបនីយកម្មពាណិជ្ជទំនិញក្រោមកិច្ចព្រមព្រៀង Trade liberalization under the Agreement ATIGA នឹងជាការបង្កើនពាណិជ្ជកម្ម និងការវិនិយោគឱ្យកាន់តែស៊ីជម្រៅ។

ឯកឧត្តម ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្មបានលើកឡើងពីទំហំពាណិជ្ជកម្មទ្វេភាគី និងលំហូរវិនិយោគដោយផ្ទាល់ Direct Investment Flows (FDI) ពីឥណ្ឌាចូលមកអាស៊ាន មានការកើនឡើង 3ដង ចាប់តាំងពីកិច្ចព្រមព្រៀងពាណិជ្ជកម្មសេរីអាស៊ាន-ឥណ្ឌា The ASEAN-India Free Trade Agreement (AIFTA)បានចូលជាធរមាននៅថ្ងៃទី1 ខែមករា ឆ្នាំ2010។

ជាក់ស្តែងក្នុងអំឡុងពេលដូចគ្នានេះ លំហូរវិនិយោគផ្ទាល់ពីបរទេស (FDI)ទឹកប្រាក់វិនិយោគផ្ទាល់ពីឥណ្ឌាមកកាន់អាស៊ានបានកើនឡើងពី 1.47ពាន់លានដុល្លារក្នុងឆ្នាំ2015 ដល់ 1.73ពាន់លានដុល្លារនៅក្នុងឆ្នាំ2017។ ទន្ទឹមគ្នានេះ ទំហំពាណិជ្ជកម្មទ្វេភាគីរវាងអាស៊ាន និងឥណ្ឌា សម្រេចបានទឹកប្រាក់ 73.59ពាន់លានដុល្លារ គឺកើនឡើង 25.5%ធៀបនឹងឆ្នាំ2016 ដែលមានត្រឹមតែ 58.6 ពាន់លានដុល្លារប៉ុណ្ណោះ។

ទន្ទឹមនឹងមានការវិវឌ្ឍទៅមុខជានិច្ចលើវិស័យពាណិជ្ជកម្ម និងវិនិយោគរវាងប្រទេសសមាជិកអាស៊ាន និងឥណ្ឌា លោករដ្ឋមន្ត្រីក៏បានបញ្ជាក់អំពីគន្លឹះសំខាន់ៗសម្រាប់ធ្វើឱ្យអាស៊ានក្លាយជាទីផ្សារតែមួយ និងជាមូលដ្ឋានផលិតកម្មតាមរយៈការធ្វើសេរីភាវូបនីយកម្មលើទំនិញ សេវាកម្ម និងការវិនិយោគ។

ឯកឧត្តមរដ្ឋមន្ត្រីបានបន្ថែមទៀតថា បើទោះបីជាមានការកាត់បន្ថយនូវរបាំងមិនមែនពន្ធគយ យ៉ាងណាក៏ដោយ ក៏នៅតែមានប្រទេសសមាជិកអាស៊ានមួយចំនួនត្រូវបានគេសង្កេតឃើញថា បាននិងកំពុងបន្តដាក់របាំងមិនមែនពន្ធគយដែលមានដូចជា SPS និង TBT ដែលទាំងនេះជាឧបសគ្គរារាំងការធ្វើពាណិជ្ជកម្ម ជាពិសេសសម្រាប់ប្រទេសដែលមានការអភិវឌ្ឍតិចតួច ដូចជាប្រទេសកម្ពុជា ឡាវ និងមីយ៉ាន់ម៉ា។

ឯកឧត្តមបានលើកឡើងថា ដើម្បីទទួលបានកំណើនសេដ្ឋកិច្ច ពាណិជ្ជកម្មឱ្យកាន់តែមានការ-រីកចម្រើនទាំងក្នុងតំបន់ និងសកលលោក គ្រប់បណ្តាប្រទេសទាំងអស់ក្នុងតំបន់អាស៊ាន និងបណ្តាប្រទេសដៃគូផ្សេងទៀត គួរយកចិត្តទុកដាក់លើការពង្រឹងកិច្ចសហប្រតិបត្តិការក្នុងការកាត់បន្ថយ ឬលុបបំបាត់នូវរបាំងមិនមែនពន្ធគយ ក៏ដូចជាកិច្ចសម្រួលពាណិជ្ជកម្ម លំហូរនៃព័ត៌មាន សុខដុមនីយកម្ម និងការទទួលស្គាល់កម្រិតស្តង់ដាគ្នាទៅវិញទៅមក ដើម្បីឈានឆ្ពោះទៅរកការកាត់បន្ថយរបាំងពាណិជ្ជកម្ម ជាពិសេសរបាំងមិនមែនពន្ធគយ។

ឯកឧត្តម ស៊ាង ថៃ អ្នកនាំពាក្យក្រសួងពាណិជ្ជកម្មបានប្រាប់ឡារ៉ែន ពាណិជ្ជ តាមទូរស័ព្ទថា នៅក្នុងការធ្វើពាណិជ្ជកម្មជាអន្តរជាតិ វាមិនមែនត្រឹមតែជាការដោះដូរទូទាត់ទំនិញដូចការធ្វើពាណិជ្ជកម្មជាធម្មតានោះទេ។

ជាលក្ខណៈអន្តរជាតិ ការដោះពាណិជ្ជកម្ម មហាជនតែងមានការផ្តោតលើពន្ធនាំចូលដែលគេបានចរចាគ្នារួចហើយដែរ នៅក្នុងតំបន់អាស៊ាន គឺពន្ធនាំចូល 0%ទាំងអស់ ដែលបច្ចុប្បន្នយើងមានទំនិញរាប់លានមុខ តែគេបានរៀបជាលំដាប់ថ្នាក់ និងបែងចែកជាប្រភេទរបស់វា ដោយគេធ្វើជាតារាងពន្ធទៅតាមលំដាប់ថ្ងៃ ខែ ដែលបានកំណត់ តែវាមិនមានបញ្ហាធំទៀតទេ។ ប្រទេសសមាជិកអាស៊ានបានធ្វើកិច្វការនេះរួចស្រេចហើយ ដូចជានៅប្រទេសសិង្ហបុរីជាដើម ការនាំចូល ពន្ធគយគឺសូន្យ តែគេនៅយកលើមុខទំនិញខ្លះ ដូចជារថយន្ត ប្រេងឥន្ធនៈ និងស្រា ជាដើម ដូចប្រទេសយើងដែរ។

ឯកឧត្តមអ្នកនាំពាក្យបានបញ្ជាក់ថា៖ “ប៉ុន្តែទន្ទឹមនឹងនេះ វានៅមានរបាំងមិនមែនពន្ធផ្សេងទៀតដែលគេហៅថា វិធានការមិនមែនពន្ធ Non-tariff measures NTM និងNon-tariff barriers NTB ដែលក្នុងនោះមានផ្នែកតូចៗទៀត ដូចជា SPS ដែលនិយាយពីរឿងអនាម័យ ជាដើម ឧទាហរណ៍ ដូចជាការនាំចូលផ្លែស្វាយ ដល់ពេលនាំចូលទៅ គេថាមិនឱ្យចូល ព្រោះខុសបច្ចេកទេស ដោយសារដាក់ជីគីមីច្រើន ជាដើម”។

ចំណែក TBT Technical Barrier toTrade របាំងពន្ធបច្ចេកទេស(ពាក់ព័ន្ធនឹងបញ្ហាបច្ចេកទេស)ឬឧទាហរណ៍ទំនិញមួយដែលយើងនាំចូល ការដាំមិនមែនបញ្ហាទេ តែគេមិនចង់ឱ្យនាំចូល គេបានឃាត់ថា វាមានបញ្ហានេះ បញ្ហានោះ-ល- ត្រូវការត្រួតពិនិត្យបន្ថែម បង្កធ្វើឱ្យមានការលំបាកជាឧបសគ្គ ទោះមានពន្ធ0%ក៏មិនអាចនាំចូលកើតដែរដែលរបាំងមិនមែនពន្ធទាំងនេះ ត្រូវតែមានវិធានការបន្ថែមទៀត ព្រោះជារឿងពិបាក”។

ឯកឧត្តម ស៊ាង ថៃ បានឱ្យដឹងដែរថា ដូច្នេះហើយទើបឯកឧត្តមរដ្ឋមន្ត្រីបានស្នើនៅក្នងវេទិកាអាស៊ាន-ឥណ្ឌាដោយស្នើសុំឱ្យដករបាំងមិនមែនពន្ធនេះ ដោយឱ្យលុបចេញពីក្នុងតារាងពន្ធដែលមានក្រុមអ្នកសម្របសម្រួលការងារអាស៊ានបានធ្វើរួចហើយ តែនៅមានការយឺតយ៉ាវ ទើបគាត់បានជំរុញបន្ថែម។

ក្នុងនាមជាប្រទេសសមាជិកអាស៊ាន កម្ពុជាបានធ្វើកំណែទម្រង់លើកិច្ចសម្រួលពាណិជ្ជកម្មសំខាន់ៗជាច្រើន ដើម្បីពង្រឹង និងពង្រីកការធ្វើពាណិជ្ជកម្ម និងវិនិយោគនៅកម្ពុជាក៏ដូចជានៅក្នុងតំបន់ ដែលកំណែទម្រង់ទាំងនោះរួមមាន៖ 1-យន្តការច្រកចេញចូលតែមួយ។ 2-ព័ត៌មានពាណិជ្ជកម្ម។ 3-ការចេញវិញ្ញាបនបត្របញ្ជាក់ប្រភពដើមទំនិញ(C/O online)។ 4-ការចុះបញ្ជីពាណិជ្ជកម្ម និងម៉ាកសញ្ញាតាមប្រព័ន្ធ online។ 5-ការសម្របសម្រួលនីតិវិធីបញ្ចេញទំនិញ និងកាត់បន្ថយថ្លៃចំណាយផ្សេងៗនៅតាមព្រំដែន និង6-កំណែទម្រង់ផ្សេងៗទៀតនៅតាមបណ្តាក្រសួង និងស្ថាប័នពាក់ព័ន្ធលើវិស័យពាណិជ្ជកម្មដើម្បីសម្រួលដល់ការធ្វើពាណិជ្ជកម្ម និងវិនិយោគនៅកម្ពុជា។

ដោយឡែក តំណាងវិស័យឯកជននៃប្រទេសឥណ្ឌាបានបង្ហាញពីចំណាប់អារម្មណ៍វិនិយោគលើវិស័យសំខាន់ៗចំនួន4 នៅក្នុងប្រទេសកម្ពុជា រួមមាន៖ វិទ្យាសាស្ត្រ និងបចេ្ចកវិទ្យា ទេសចរណ៍ ហេដ្ឋារចនាសម្ព័ន្ធ (ផ្លូវថ្នល់ ផ្លូវដែក និងស្ពាន) និងកសិ-ឧស្សាហកម្ម ដើម្បីពង្រឹង និងពង្រីកកិច្ចសហប្រតិបត្តិការសេដ្ឋកិច្ច និងទំនាក់ទំនងពាណិជ្ជកម្ម រវាងប្រទេសទាំង2 ឱ្យបានខ្លាំងក្លាថែមទៀត។

នៅក្នុងឱកាសនោះលោក សាន់ឌិប សូម៉ានី បានជម្រាបជូនលោករដ្ឋមន្ត្រីអំពីទំនាក់ទំនងពាណិជ្ជកម្ម និងវិនិយោគរវាងប្រទេសឥណ្ឌា និងរដ្ឋជាសមាជិកអាស៊ាន ព្រមទាំងចក្ខុវិស័យរបស់រដ្ឋាភិបាលឥណ្ឌាក្នុងការពង្រីកកិច្ចសហប្រតិបត្តិការសេដ្ឋកិច្ច និងពាណិជ្ជកម្មជាមួយកម្ពុជា ដែលបច្ចុប្បន្ននៅមានទំហំតិចតួចនៅឡើយ បើធៀបជាមួយប្រទេសផ្សេងៗនៅក្នុងតំបន់។

ឯកឧត្តម ប៉ាន សូរស័ក្តិ បានសម្តែងការស្វាគមន៍ចំពោះគម្រោងវិនិយោគខាងលើ និងបានជម្រាបជូនលោក សាន់ឌិប សូម៉ានី អំពីលក្ខណៈអំណោយផលនៃទីតាំងភូមិសាស្ត្រប្រទេសកម្ពុជា គោលនយោបាយបើកចំហ និងគោលការណ៍លើកទឹកចិត្តវិនិយោគផ្សេងៗរបស់រាជរដ្ឋាភិបាល ព្រមទាំងយុទ្ធសាស្ត្រអភិវឌ្ឍន៍ឧស្សាហកម្ម Industrial Development Strategy(IDP)ឆ្នាំ2015-2025 ដែលមានគោលដៅប្រែក្លាយកម្ពុជាពីប្រទេសដែលពឹងផ្អែកខ្លាំងលើការប្រើប្រាស់កម្លាំង ទៅជាប្រើប្រាស់ជំនាញនៅឆ្នាំ2030។ ឯកឧត្តមរដ្ឋមន្ត្រីក៏បានសំណូមពរឱ្យមានជើងហោះហើរត្រង់ពីឥណ្ឌាមកកម្ពុជា ដើម្បីលើកកម្ពស់វិស័យទេសចរណ៍ វប្បធម៌ និងកិច្ចសហប្រតិបត្តិការធុរកិច្ចរវាងប្រទេសទាំង2ថែមទៀត៕

March 5, 2019

ច្រឡំដៃផ្ញើសារទៅគេក្នុង Messenger បើចង់លុបវិញ អាចធ្វើតាមវិធីនេះបាន…

ក្រុមហ៊ុន Facebook បានបញ្ចូលមុខងារដ៏ពិសេសមួយដែលអនុញ្ញាតឱ្យអ្នកប្រើប្រាស់អាចលុបសារចាស់ៗ ឬសារដែលខ្លួនគិតថា ខុសឆ្គង និងមិនចង់ឱ្យបុគ្គលម្ខាងទៀតឃើញក្នុងកម្មវិធីផ្ញើសារ Messenger របស់ខ្លួន។

មុខងារថ្មីនេះបានដាក់បញ្ចេញប្រើប្រាស់ទូទាំងពិភពលោកចាប់ពីពេលនេះ ដោយតម្រូវឱ្យអ្នកប្រើប្រាស់អាប់ដេតកម្មវិធី Messenger ទៅកាន់ជំនាន់ចុងក្រោយ។ អ្នកប្រើប្រាស់អាចសិក្សាទុកជាចំណេះដឹងនៅពេលក្រោយតាមរយៈការអនុវត្តដ៏សាមញ្ញដូចខាងក្រោម។

- បើកដំណើរការ Facebook Messenger លើទូរស័ព្ទ ឬ Desktop

ចូលទៅកាន់ការសន្ទនាដែលអ្នកចង់លុប
ចុចសង្កត់ឱ្យជាប់លើសារណាមួយដែលចង់លុប
រើសយកពាក្យ Delete > ជ្រើសត្រង់ពាក្យ Remove for everyone
(សារនោះនឹងបាត់ចេញពីប្រអប់សាររបស់អ្នក និងបុគ្គលម្ខាងទៀត ប៉ុន្តែត្រូវរង់ចាំពេលប្រហែល 10នាទី)៕

March 5, 2019

មិនគួរឱ្យជឿថា មានទូរស័ព្ទដែលមានថ្មធំខ្លាំងជាងគេលើលោកដល់ទៅ 18,000mAh សោះ…

Energizer ដែលជាក្រុមហ៊ុនល្បីឈ្មោះលើការផលិតថ្មទូរស័ព្ទនោះ កាលពីពេលថ្មីៗនេះបានប្រកាសចេញស្មាតហ្វូនថ្មីមួយដែលមានថ្មទំហំធំមហាសាលដល់ទៅ 1,8000mAh ឯណោះ។ ស្មាតហ្វូនមួយនេះបានលេចមុខឡើងនៅក្នុងកម្មវិធី MWC ហើយរូបរាងរបស់វាត្រូវបានគេចែកចាយឱ្យឃើញជាលើកដំបូង។

ស្មាតហ្វូននេះមានឈ្មោះថា Energizer Power Max P18K Pop ដែលមានរូបរាងប្រៀបដូចជាដុំឥដ្ឋមួយដុំអ៊ីចឹង។ ជាមួយនឹងថ្មទំហំ 18,000mAh នឹងធ្វើឱ្យ Power Max P18K Pop មានទំហំថ្មធំជាង iPhone XS Max ដល់ទៅជាង 5ដងឯណោះ។

Energizer អះអាងថា ស្មាតហ្វូននេះអាចទស្សនាវីដេអូបាន 2ថ្ងៃ ស្ដាប់ចម្រៀងបាន 100ម៉ោង និងអាចនិយាយបាន 90ម៉ោង។ បន្ថែមពីនេះអាច Standby (ទុកចោល) បានរហូតដល់ 50ថ្ងៃឯណោះ (អាចនិយាយបានថា ប្រើរហូតភ្លេចសាកថ្មតែម្ដង)។

ដោយផ្ដោតសំខាន់លើថាមពលថ្ម ហេតុនេះហើយទើប Power Max P18K Pop មានគ្រឿងក្នុងមិនសូវជាខ្លាំងក្លាប៉ុន្មានឡើយ។ វាមានបំពាក់បន្ទះឈីប MediaTek ដែលមានល្បឿនរត់ 2GHz និងមិនអាចធន់នឹងទឹកបានទេ។ RAM បំពាក់លើស្មាតហ្វូននេះមានទំហំ 6GB មានអេក្រង់ 6.2អ៊ីញ មានកាមេរ៉ាខាងក្រោយចំនួន 3គ្រាប់ និងកាមេរ៉ា Selfieភ្លោះ បង្កប់ក្នុងតួខ្លួន។

Energizer គ្រោងនឹងបញ្ចេញលក់ Power Max P18K Pop នៅខែមិថុនាខាងមុខនេះជាមួយតម្លៃប្រមាណជា 680ដុល្លារ៕

March 5, 2019

Author: ធឿន មករា