ធឿន មករា - La Reine Media

វិស័យហិរញ្ញវត្ថុកម្ពុជានៅបន្តកំណើនថេរ តែនៅលំបាកផ្នែកបច្ចេកវិទ្យាបែបទំនើប

មន្ត្រីជាន់ខ្ពស់ក្រសួងសេដ្ឋកិច្ច និងហិរញ្ញវត្ថុបានអះអាងថា វិស័យហិរញ្ញវត្ថុបែបទំនើបបាន ដើរតួនាទីយ៉ាងសំខាន់ក្នុងការជួយជំរុញកំណើនសេដ្ឋកិច្ចជាតិ ប៉ុន្តែវិស័យនេះក៏នៅតែជួបការលំបាកដោយសារចំណេះដឹងផ្នែកបច្ចេកវិទ្យា ចំណេះដឹងពាក់ព័ន្ធនឹងវិស័យហិរញ្ញវត្ថុឌីជីថល បើទោះបីជាវិស័យមួយនេះកន្លងមកនៅមានកំណើនថេរក៏ដោយ។ នេះបើយោងតាមការថ្លែងរបស់រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ។

លោកជំទាវ ងួន សុខា រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ បានបញ្ជាក់ថា ការយល់ដឹងរបស់អតិថិជននៅមានកម្រិត ព្រមទាំងភាពស្មុគស្មាញនៃប្រតិបត្តិការហិរញ្ញវត្ថុបែបទំនើបដែលជាមូលហេតុចម្បងបានជំរុញឱ្យរាជរដ្ឋាភិបាលត្រូវតែគិតគូរឡើងវិញក្នុងការអភិវឌ្ឍវិស័យហិរញ្ញវត្ថុបែបទំនើប ដែលជាបដិវត្តន៍ឧស្សាហកម្មទី4.0នៅកម្ពុជាឱ្យមានការរីកចម្រើនតាមរយៈយុទ្ធសាស្ត្រចតុកោណដំណាក់កាលទី4 និងយុទ្ធសាស្ត្រអភិវឌ្ឍន៍វិស័យហិរញ្ញវត្ថុឆ្នាំ2016-2025 និងឯកសារទស្សនទានស្តីពីសារពើពន្ធអេឡិចត្រូនិក ដើម្បីជួយគាំទ្រដល់វិស័យហិរញ្ញវត្ថុបែបទំនើបក្នុងការពង្រីកអាជីកម្ម និងលើកទឹកចិត្តការបង្កើតថ្មី (Startup) ផងដែរ។

តាមការអះអាងលោកជំទាវបានបញ្ជាក់ថា ការព្យាកររបស់ក្រសួងសេដ្ឋកិច្ច និងហិរញ្ញវត្ថុនៅក្នុងឆ្នាំ2019នេះ កំណើនសេដ្ឋកិច្ចរបស់កម្ពុជានឹងអាចរក្សាបានក្នុងរង្វង់ 7% ដដែលដែលគាំទ្រដោយកំណើនរឹងមាំនៃវិស័យធំៗ ដូចជាវិស័យសំណង់ កាត់ដេរ កសិកម្ម វិស័យទេសចរណ៍ និងការលក់ដុំ-លក់រាយជាដើម។

លោកជំទាវរដ្ឋលេខាធិការ បានមានប្រសាសន៍ទៀតថា នៅក្នុងអំឡុងពេលជាង 2ទសវត្សរ៍ចុងក្រោយនេះ ស្ថានភាពម៉ាក្រូសេដ្ឋកិច្ចកម្ពុជាមានលក្ខណៈល្អប្រសើរ គឺធ្វើឱ្យសេដ្ឋកិច្ចកម្ពុជាសម្រេចបានកំណើនក្នុងរង្វង់ 7% ប្រកបដោយបរិយាប័ន្ន និងសមធម៌ ក្នុងនោះថែមទាំងសម្រេចបានជាប្រវត្តិសាស្ត្រដោយនឹងធ្វើឱ្យកម្ពុជាបានឆ្លងផុតពីឋានៈប្រទេសមានចំណូលទាប ទៅជាប្រទេសមានចំណូលមធ្យមកម្រិតទាបនៅឆ្នាំ2015 និងធនាគារអភិវឌ្ឍន៍អាស៊ីបានចាត់ទុកកម្ពុជា “ជាខ្លាសេដុ្ឋកិច្ចថ្មីក្នុងអាស៊ី”នៅឆ្នាំ2016 ទៀតផង។

លោកជំទាវបានបន្តថា៖ “នៅក្នុងដំណើរការអភិវឌ្ឍន៍សេដ្ឋកិច្ច រាជរដ្ឋាភិបាលទទួលស្គាល់ថា វិស័យធនាគារ និងវិស័យហិរញ្ញវត្ថុមិនមែនធនាគារ មានតួនាទីយ៉ាងសំខាន់ ជាពិសេសក្នុងការបង្កើតកំណើនសេដ្ឋកិច្ច។ វិស័យនេះនឹងបានបំពេញតួនាទីរបស់ខ្លួនកាន់តែប្រសើរថែមទៀត ប្រសិនបើវិស័យនោះអាចចាប់យកនូវកាលានុវត្តន៍នៃបច្ចេកវិទ្យាទំនើប”។

លោកជំទាវបានបន្ដទៀតថា បន្ថែមលើនេះក្រសួងសេដ្ឋកិច្ច និងហិរញ្ញវត្ថុក៏បានដាក់ចេញនូវវិធានការលើកទឹកចិត្ត និងអភិឌ្ឍន៍ SMEs នៅក្នុងវិស័យមូលបត្រ ដើម្បីចូលរួមចំណែកលើកកម្ពស់គុណវុឌ្ឍិរបស់ធុរកិច្ចថ្មីៗឱ្យមានលទ្ធភាពទទួលបានហិរញ្ញប្បទានក្នុងលក្ខខណ្ឌប្រកួតប្រជែងពីស្ថាប័នហិរញ្ញវត្ថុ។

លោក ង៉ែត ជូ ទីប្រឹក្សាជាន់ខ្ពស់នៅក្រុមហ៊ុន Emerging Markets Consulting (EMC) បានពន្យល់ប្រាប់ឡារ៉ែនពាណិជ្ជថា៖ “ជារួមយើងកុំច្រឡំថា ក្នុងកំណើនសេដ្ឋកិច្ចមិនមែនមានន័យថា បច្ចេកទេសរឹងមាំទេ ពីព្រោះថា វិស័យសេដ្ឋកិច្ចវាមានប្រភពច្រើន ទាក់ទងនឹងការវិនិយោគក្នុងស្រុក-ក្រៅស្រុក ជាដើម ហើយដូចជាទាក់ទងនឹងការនាំចេញ វាមិនទាក់ទងនឹងបច្ចេកវិទ្យាទេ ដូច្នេះផ្នែកបច្ចេកវិទ្យាយើងនៅទន់ខ្សោយជារឿងត្រឹមត្រូវ”។

លោក ង៉ែត ជូ បានបន្តទៀតថា ក្នុងការអភិវឌ្ឍវិស័យហិរញ្ញវត្ថុបែបទំនើបឱ្យមានការរីកចម្រើន ; វាមានភាពស្មុគស្មាញច្រើន ដែលរាជរដ្ឋាភិបាលគួរគិតគូរឡើងវិញក្នុងលើកទឹកចិត្តការពង្រីកអាជីវកម្ម។ ដើម្បីជួយគាំទ្រដល់វិស័យហិរញ្ញវត្ថុបែបទំនើបនេះលោកបញ្ជាក់ថា៖ “បច្ចុប្បន្ន យើងមានតែបច្ចេកវិទ្យាបែបប្រើប្រាស់ប៉ុណ្ណោះ ដូចជាការប្រើប្រព័ន្ធទូរស័ព្ទបែបទំនើប បែបហៅ Pass app ឬទូរស័ព្ទដែលប្រើ Skyp តែយើងមិនមានរោងចក្រផលិតកុំព្យូទ័រ ឬរថយន្តដែលប្រើបច្ចេកវិទ្យាទំនើបទេ។ ក្នុងការជំរុញកំណើនសេដ្ឋកិច្ច យើងមានតែការនាំចូល និងពឹងផ្អែកលើការនាំចេញសម្លៀកបំពាក់ និងការជួយជំរុញផ្នែកកសិកម្មប៉ុណ្ណោះ”៕

March 12, 2019

កិច្ចព្រមព្រៀង RCEP រំពឹងថា នឹងបញ្ចប់នៅចុងឆ្នាំនេះ ខណៈការចរចាសម្រេចបាន 90ភាគរយ

ការចរចាលើកិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយតំបន់ (RCEP) សម្រេចបាន 90ភាគរយហើយ ហើយកិច្ចព្រមព្រៀងនេះ ត្រូវគេរំពឹងថានឹងបញ្ចប់នៅចុងឆ្នាំនេះ។ នេះបើយោងតាមរដ្ឋមន្ត្រីពាណិជ្ជកម្មកម្ពុជាដែលបានថ្លែងប្រាប់ក្រុមអ្នកសារព័ត៌មានក្រោយកិច្ចប្រជុំអន្តរកិច្ចប្រជុំរដ្ឋមន្ត្រីលើកទី7 ស្តីពី “កិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយតំបន់ចប់សព្វគ្រប់នៅខេត្តសៀមរាបកាលពីទី2 ខែមីនា2019”។

ឯកឧត្តម ប៉ាន សូរស័ក្ដិ រដ្ឋមន្ត្រីក្រសួងពាណិជ្ជកម្មកម្ពុជាបានមានប្រសាសន៍ថា កិច្ចព្រមព្រៀងនេះបានចរចាគ្នាអស់រយៈពេលជាង 6ឆ្នាំមកហើយ ដោយលោកបញ្ជាក់ថា កិច្ចព្រមព្រៀងនេះ គឺជាការធ្វើពាណិជ្ជកម្មដោយសេរីក្នុងតំបន់ ដែលជួយលើកកម្ពស់ការធ្វើពាណិជ្ជកម្មដោះដូរទំនិញ សេវាកម្ម និងការវិនិយោគក្នុងតំបន់។

ឯកឧត្ដមបានបន្តថា៖ “កម្ពុជាធ្វើជាម្ចាស់ផ្ទះសម្រាប់កិច្ចប្រជុំអន្តរកិច្ចប្រជុំរដ្ឋមន្ត្រីលើកទី7 ស្តីពី“កិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយតំបន់នេះ ដូច្នេះយើងនឹងជំរុញឱ្យកិច្ចព្រមព្រៀងនេះបញ្ចប់នៅចុងឆ្នាំនេះ។ រដ្ឋមន្ត្រី RCEP ទាំងអស់បានបញ្ជាក់ពីជំហរក្នុងការបញ្ចប់ការងារចរចានេះនៅខែវិច្ឆិកា ឆ្នាំនេះ និងដាក់ជូនថ្នាក់ដឹកនាំ RCEP ដើម្បីសម្រេចជាចុងក្រោយ។ បន្ទាប់ពីកិច្ចប្រជុំនៅសៀមរាប រដ្ឋមន្ត្រី RCEP មានផែនទីបង្ហាញផ្លូវ និងកាលវិភាគដើម្បីជួបគ្នាពិភាក្សាគ្នារហូតដល់ខែវិច្ឆិកា និងបញ្ចប់កិច្ចព្រមព្រៀងទាំងស្រុងនៅចុងឆ្នាំនេះ”។

ឯកឧត្ដមរដ្ឋមន្ត្រីបានលើកឡើងទៀតថា ការចរចា និងពិភាក្សា បានសម្រេចប្រមាណជា 90ភាគរយហើយ ដោយឡែកចំណុចសេសសល់ប្រមាណជាង 10ភាគរយទៀតកំពុងស្ថិតក្នុងការចរចាដ៏តានតឹង ដែលក្នុងនោះវិស័យសេវាកម្ម ទំនិញ និងការវិនិយោគត្រូវបានចរចា និងពិភាក្សាគ្នាយ៉ាងល្អិតល្អន់ ជាពិសេសប្រទេសដែលមានសេដ្ឋកិច្ចធំ។

ឯកឧត្ដមរៀបរាប់ថា៖ “បញ្ហាដែលសេសសល់ 10ភាគរយនោះនឹងមានការពិភាក្សាដ៏តានតឹង និងតម្រូវឱ្យមានឆន្ទៈពីថ្នាក់ដឹកនាំប្រទេស RCEP ដើម្បីបញ្ចប់កិច្ចព្រមព្រៀងនៅក្នុងឆ្នាំនេះ ពីព្រោះថា 10ភាគរយនេះមិនស្ថិតក្នុងដំណាក់កាលបច្ចេកទេសនោះទេ”។

ឯកឧត្ដមបន្តថា កិច្ចព្រមព្រៀងនេះនឹងជួយទាក់ទាញរោងចក្រជាច្រើនមកកែច្នៃវត្ថុធាតុដើម ជាពិសេសកសិផលកម្ពុជាដើម្បីធ្វើការនាំចេញ និងបង្កើនជញ្ជីងពាណិជ្ជកម្មរបស់ប្រទេសកម្ពុជាឱ្យស្មើគ្នាជាមួយប្រទេសផ្សេងៗក្នុងតំបន់។

សម្តេចនាយករដ្ឋមន្ត្រី ហ៊ុន សែន មានប្រសាសន៍ថា គោលនយោបាយពាណិជ្ជកម្មអន្តរជាតិនាពេលបច្ចុប្បន្ន បាននិងកំពុងឈានដល់ចំណុចរបត់ដែលធ្វើឱ្យប្រព័ន្ធពាណិជ្ជកម្មពហុភាគីដែលមានលក្ខណៈសេរី និងបើកចំហ ស្ថិតក្នុងស្ថានភាពតានតឹង និងគំរាមកំហែងដោយសារប្រទេសមួយចំនួន រួមទាំងបណ្តាប្រទេសមហាអំណាចធំៗបាន និងកំពុងដោះស្រាយបញ្ហាដោយប្រកាន់គោលនយោបាយឯកតោភាគី និងទេ្វភាគី។

សម្តេចនាយករដ្ឋមន្ត្រីបន្តថា៖ “គោលនយោបាយប្រកួតប្រជែងរបស់ប្រទេសមហាអំណាច និងនិន្នាការផ្លាស់ប្តូរប្រឆាំងប្រព័ន្ធពាណិជ្ជកម្មពហុភាគី និងប្រឆាំងគំនិតសកលភាវូនីយកម្ម បាននិងកំពុងទាញប្រទេសនីមួយៗឱ្យមានទស្សនវិស័យជាយុទ្ធសាស្ត្រ និន្នាការនយោបាយ និងគិតពីផលប្រយោជន៍ជាតិរៀងខ្លួន”។

ទោះបីជាយ៉ាងនេះក្តី សម្តេចតេជោបានមានប្រសាសន៍ថា កម្ពុជាក៏ដូចជាប្រទេសសមាជិកអាស៊ានទាំងអស់ដែរ គឺនៅតែអាចធ្វើការជាមួយគ្នា និងសហការស្វែងរកមូលដ្ឋានរួម ទិសដៅរួម ក៏ដូចជាផលប្រយោជន៍រួមបានជានិច្ច។ សម្តេចបន្តថា ការប្រែប្រួលភូមិសាស្ត្រ នយោបាយ និងសេដ្ឋកិច្ចពិភពលោក ព្រមទាំងការលេចចេញនូវគំនិតផ្តួចផ្តើមតំបន់ថ្មីៗ នឹងធ្វើឱ្យមានការផ្លាស់ប្តូរប៉ូលសេដ្ឋកិច្ចសកលលោកផងដែរ។

សម្តេចនាយករដ្ឋមន្ត្រីបានបន្តទៀតថា ការបង្កើតតំបន់ពាណិជ្ជកម្ម តំបន់សេរី RCEP មានសារៈសំខាន់ខ្លាំងណាស់ក្នុងការធ្វើឱ្យសេដ្ឋកិច្ចក្នុងតំបន់អាស៊ីក្លាយទៅជាប៉ូលសេដ្ឋកិច្ចស្នូលដែលអាចជួយរក្សាសិ្ថរភាពនយោបាយ និងសេដ្ឋកិច្ចសកលលោក ព្រមទាំងអាចជួយទប់ស្កាត់នូវនយោបាយគាំពារនិយម និងការរីករាលដាលនៃសង្គ្រាមពាណិជ្ជកម្ម។

សម្តេចតេជោមានប្រសាសន៍បញ្ជាក់ថា៖ “ខ្ញុំបានជំរុញរដ្ឋមន្ត្រី និងក្រុមអ្នកចរចាខិតខំពុះពារឧបសគ្គតាមវិស័យនីមួយៗ ឱ្យបញ្ចប់ការចរចាតាមអាណត្តិដែលផ្តល់ដោយថ្នាក់ដឹកនាំ RCEP ទោះបីជាកម្ពុជាត្រូវធ្វើការកែទម្រង់លិខិតបទដ្ឋានច្បាប់មួយចំនួន និងផ្តល់នូវការសម្របសម្រួលជាមួយបណ្តាប្រទេសជាដៃគូដទៃទៀតក៏ដោយ។ បើសិនជាកម្ពុជាត្រូវការកែច្បាប់ និងបទប្បញ្ញត្តិដើម្បីឱ្យស្របតាមកិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយតំបន់ (RCEP)នោះ កម្ពុជាគួរតែធ្វើ”។

លោកបណ្ឌិត ម៉ី កល្យាណ ទីប្រឹក្សាជាន់ខ្ពស់នៃឧត្តមក្រុមប្រឹក្សាសេដ្ឋកិច្ចជាតិបានឱ្យដឹងថា រាល់កិច្ចព្រមព្រៀងណាក៏ដោយ គឺសុទ្ធសឹងតែជាប្រយោជន៍ល្អ និងសំខាន់ចំពោះប្រទេសកម្ពុជាទាំងអស់។ វាល្អសម្រាប់ប្រទេសកម្ពុជា ព្រោះ RCEP ជាផ្នែកមួយក្នុងការជំរុញការនាំចេញរបស់ប្រទេសកម្ពុជា។

លោកបណ្ឌិតបានបន្ថែមថា៖ “យើងពិបាកនិយាយថា RCEP វាជំនួសឱ្យទីផ្សារដែលមានស្រាប់របស់កម្ពុជា ប៉ុន្តែវាអាចជួយកម្ពុជាឱ្យធ្វើពិពិធកម្មទីផ្សារនាំចេញ ក្រៅពីទីផ្សារដែលមានស្រាប់។ ខ្ញុំជឿថា RCEP មិនជំនួសឱ្យទីផ្សារដែលកម្ពុជាមានស្រាប់ទេ ប៉ុន្តែវានឹងបើកទីផ្សារបន្ថែម និងអាចទាក់ទាញវិនិយោគិន មកដំឡើងរោងចក្របន្ថែមនៅកម្ពុជាដើម្បីផលិតនូវផលិតផលសក្តានុពលផ្សេងទៀត ដើម្បីនាំចេញទៅក្នុងប្រទេសនៅក្នុងតំបន់”។

ទន្ទឹមគ្នានោះដែរ សម្តេចតេជោនាយករដ្ឋមន្ត្រីក៏បានផ្តល់នូវអនុសាសន៍សំខាន់ៗចំនួន3 ដល់រដ្ឋមន្ត្រីនៃប្រទេសចរចា RCEP ទាំង16 ដើម្បីបញ្ចៀសការខ្វែងគំនិតគ្នានៅក្នុងវិស័យមួយចំនួន សំដៅពន្លឿនការបង្កើតតំបន់ពាណិជ្ជកម្មសេរី RCEP ដ៏ពេញលេញមួយ ទៅតាមចង់បានរបស់ប្រទេសចូលរួម។

សម្តេចនាយករដ្ឋមន្ត្រីមានប្រសាសន៍ថា ភាគីទាំងអស់ត្រូវចាត់ទុកកិច្ចចរចាទាំងនេះជាដំណើរការឈ្នះឈ្នះដែលលទ្ធផលចុងក្រោយនៃកិច្ចព្រមព្រៀងនេះ នឹងផ្តល់អត្ថប្រយោជន៍ដល់ភាគីទាំងអស់ទោះជាក្នុងកម្រិតខុសគ្នាក៏ដោយ ហើយបើទោះជាមានរបៀបវារៈសេដ្ឋកិច្ចផ្សេងៗគ្នា ភាគីចរចាទាំងអស់ត្រូវនាំគ្នាពិនិត្យមើលទិដ្ឋភាពរួមនៃសក្តានុពល និងអត្ថប្រយោជន៍ដ៏ធំនៃកិច្ចព្រមព្រៀង RCEP ដើម្បីឱ្យដំណើរការនៃកិច្ចចរចានេះអាចជម្នះបានឧបសគ្គ។ រដ្ឋមន្ត្រីនៃប្រទេសចូលរួមទាំងអស់ត្រូវគោរពឆន្ទៈនយោបាយ និងផ្តល់ការណែនាំដល់សមាជិកនៃគណៈកម្មការចរចាពាណិជ្ជកម្មរបស់យើងនូវភាពទន់ភ្លន់ និងការយោគយល់គ្នា ស្របតាមគោលការណ៍ណែនាំដែលបានឯកភាពគ្នាកាលពីឆ្នាំ2012។

កិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយតំបន់ (RCEP) ជាកិច្ចព្រមព្រៀងពាណិជ្ជកម្មសេរីតំបន់ (Regional FTA) ដែលកំពុងស្ថិតនៅក្នុងដំណាក់កាលនៃការចរចា ដែលចូលរួមដោយប្រទេសចំនួន16 រួមមាន៖ ប្រទេសជាសមាជិកអាស៊ានទាំង10 និងប្រទេសដៃគូពាណិជ្ជកម្មសេរីអាស៊ានចំនួន6 គឺអូស្ត្រាលី ចិន ឥណ្ឌា ជប៉ុន កូរ៉េខាងត្បូង និងនូវែលសេឡង់។

កិច្ចព្រមព្រៀងនេះ ជាគំនិតផ្តួចផ្តើមរបស់អាស៊ានដែលផ្អែកលើកុងសង់ស៊ីសសម្រាប់ការធ្វើសេចក្តីសម្រេចចិត្តដែលបានប្រកាសឱ្យចាប់ផ្តើមចរចាក្នុងឆ្នាំ2012 នៅព្រះរាជាណាចក្រកម្ពុជា។ RCEP មានទំហំ GDP ជិត 30ភាគរយនៃ GDP ពិភពលោក នៅឆ្នាំ2014 មានប្រជាជនស្ទើរតែពាក់កណ្តាលនៃចំនួនប្រជាជនពិភពលោក និងផលិតកម្មសរុបប្រមាណជា 31.6%៕

March 12, 2019

កាសែតឡារ៉ែន ពាណិជ្ជ លេខ 165

[easy_media_download url=”https://www.lareine.com.kh/wp-content/uploads/2019/03/LaReine_Peanich_165_Final_Web.pdf” force_dl=”1″]

March 11, 2019

គ្រាន់តែបណ្តុះកូនស្វាយលក់ ក៏អាចរកបានប្រាក់ជាង 20លានរៀលដែរក្នុង 1ឆ្នាំ

ថ្វីដ្បិតតែកម្ពុជាបានអភិវឌ្ឍ និងជំរុញឱ្យមានវិស័យឧស្សាហកម្មច្រើននៅទូទាំងប្រទេសក៏ដោយ ក៏វិស័យកសិកម្មនៅតែដើរតួនាទីយ៉ាងសំខាន់មិនអាចខ្វះបានសម្រាប់ប្រជាជនខ្មែរ។ ដីដាំដំណាំនៅសល់យ៉ាងច្រើនតាមតំបន់ជនបទដែលអនុញ្ញាតឱ្យប្រជាពលរដ្ឋយើងមានលទ្ធភាពគ្រប់គ្រាន់ដើម្បីទាញយកផលប្រយោជន៍តាមរយៈការដាំដុះដំណាំកសិកម្មទៅតាមលក្ខណៈ និងសណ្ឋានដី។

នៅក្នុងចំណោមដំណាំហូបផ្លែទាំងអស់ ស្វាយ ជាប្រភេទដើមឈើហូបផ្លែដែលគេសង្កេតឃើញមានច្រើនជាងគេនៅក្នុងប្រទេសយើង មិនថានៅតំបន់ជនបទ ឬនៅតាមលំនៅឋានក្នុងបុរី ឬនៅតាមដងផ្លូវក្នុងទីក្រុងនោះទេ ប្រជាជនខ្មែរយើងតែងនិយមដាំដើមស្វាយនៅក្នុងផ្នែកណាមួយក្នុងរបងផ្ទះ ព្រោះវាងាយថែទាំ ទទួលបានផលច្រើន មានសោភណភាពល្អ មានម្លប់ត្រជាក់ និងជាប្រភេទផ្លែឈើដែលអាចទទួលទានបានទាំងខ្ចី និងទុំ ហើយបើសិនសម្បូរច្រើនហូបមិនអស់នោះ គេថែមទាំងអាចកែច្នៃវាធ្វើជាដំណាប់សម្រាប់រក្សាទុកហូបបានយូរទៀតផង។

លោក សុធា កសិកររស់នៅឃុំព្រែករៃ ស្រុកល្វាឯម ខេត្តកណ្តាល ក៏ប្រកបរបររកស៊ីពាក់ព័ន្ធនឹងដំណាំហូបផ្លែដ៏មានប្រជាប្រិយនេះដែរ ដោយលោកបានឱ្យដឹងថា ក្រុមគ្រួសាររបស់លោកបានចាប់យកអាជីពបណ្តុះកូនស្វាយលក់ជាមុខរបរបន្ថែមអស់រយៈពេលជាង 5ឆ្នាំមកហើយ ព្រោះមុខរបរនេះបានជួយគ្រួសារលោកឱ្យរកបានចំណូលបន្ថែមច្រើនគួរសមដែរសម្រាប់ចិញ្ចឹមជីវិតក្នុងជីវភាពមធ្យម ពោលគឺមិនមានខ្លាំងពេក តែក៏មិនលំបាកណាស់ដែរ ព្រោះស្វាយជាផ្លែឈើដែលពេញនិយមសម្រាប់ប្រជាជនខ្មែរ ហេតុនេះជាមធ្យមប្រសិនបើមានទីផ្សារថេរល្អរហូត លោកអាចរកចំណូលបានប្រមាណជាង 20លានរៀលដែរក្នុង 1ឆ្នាំ។

កសិករអ្នកចាប់យកអាជីពបណ្ដុះកូនស្វាយលក់ខាងលើបានឱ្យដឹងផងដែរថា មុននឹងបណ្តុះកូនស្វាយ យើងត្រូវជ្រើសរើសយកពូជស្វាយណាដែលមានផ្លែធំៗល្អ ដោយយកគ្រាប់របស់វាមកត្រាំក្នុងទឹករយៈពេល 1យប់។ បន្ទាប់មកទើបយើងយកគ្រាប់ស្វាយនោះទៅដាក់បណ្តុះនៅក្នុងដីដែលយើងបានរៀបចំទុកជាស្រេច និងមានជីវជាតិគ្រប់គ្រាន់។ ក្រោយពេលកូនស្វាយដុះឡើងបានកម្ពស់ប្រមាណជា 20សង់ទីម៉ែត្រ យើងអាចយកវាច្រកចូលក្នុងកន្ទោងដែលមានដីនៅខាងក្នុង ដោយដាក់ឱ្យកូនស្វាយដែលទើបបណ្ដុះបាននោះនៅផុតពីដីក្នុងកន្ទោង(គ្រាប់នៅក្នុងដីក្នុងកន្ទោង) ហើយត្រូវយកទៅទុកនៅក្នុងកន្លែងដែលកុំឱ្យត្រូវពន្លឺថ្ងៃខ្លាំងពេក។ ការរក្សាទុកកូនស្វាយនៅក្នុងកន្ទោងនេះ គឺមានរយៈពេល 15ថ្ងៃ ដោយនៅក្នុងទីតាំងនោះគួរដាក់ស្បៃនីឡុងខៀវបាំងគ្របពីលើ ហើយត្រូវស្រោចទឹកព្រឹក-ល្ងាចឱ្យជោកល្អផង។ ក្រោយពេលវាដុះលូតលាស់ធំល្អហើយ រយៈពេល 3ខែក្រោយយើងអាចលក់ចេញបានក្នុង1ដើមតម្លៃប្រមាណ 5,000រៀល ទៅ 6,000រៀល។

ចំពោះថ្លៃទូទាត់លើការចំណាយវិញ ក្នុងមួយដើមៗចាប់តាំងពីពេលដាក់បណ្ដុះរហូតដល់ពេលលក់ចេញបាន យើងត្រូវចំណាយប្រាក់ប្រមាណជា 3,000រៀល ដូច្នេះយើងបានចំណេញប្រហែលជា 2,000រៀលដែរក្នុងមួយដើម។ ហើយការចំណេញបានតិច ឬបានច្រើន គឺអាស្រ័យលើចំនួនកូនស្វាយដែលយើងបណ្តុះបាន ព្រោះបើយើងបណ្តុះកាន់តែច្រើន ការចំណាយផ្សេងៗនឹងកាន់តែអាចសន្សំសំចៃបានច្រើន(ចំណាយកាន់តែតិច) ព្រោះបើយើងទិញច្រើន តម្លៃនឹងធូរជាងទិញតិចតួច។

ចំពោះទីផ្សារវិញ លោក សុធា ប្រាប់ថា មិនលំបាកពេកនោះទេ ព្រោះឥឡូវនេះអតិថិជនបានស្គាល់ទីតាំងរបស់លោក និងមានអ្នកខ្លះបានប្រាប់តៗគ្នា ដែលធ្វើឱ្យមានអ្នកមកទិញដល់ផ្ទះអស់ៗតែម្តង មិនលំបាកដឹកដើរលក់នោះទេ។

យោងតាមរបាយការណ៍របស់មន្ទីរកសិកម្ម រុក្ខាប្រមាញ់ និងនេសាទ ខេត្តកណ្តាល បានឱ្យដឹងថានៅទូទាំងខេត្ត មានដំណាំស្វាយប្រមាណជាង 6,000ហិកតាហើយនៅឆ្នាំនេះការដាំដើមស្វាយមានការកើនឡើងប្រមាណជា 1ពាន់ហិកតាហើយ។ ចំពោះប្រភេទស្វាយដែលប្រជាជនចូលចិត្តដាំច្រើនជាងគេ គឺស្វាយកែវរមៀត ដោយក្នុងមួយដើម ស្វាយប្រភេទនេះអាចផ្តល់ផលជាមធ្យមបានប្រមាណជា 80គីឡូក្រាម៕

March 11, 2019

កសិករខេត្តកំពង់ចាមនាំគ្នាដាំបន្លែស្ពៃក្ដោបបំពេញតម្រូវការទីផ្សារ

កសិករដាំបន្លែសរីរាង្គនៅខេត្តកំពង់ចាមនាពេលបច្ចុប្បន្ននេះ កំពុងតែនាំគ្នាងាកមកដាំបន្លែស្ពៃក្ដោបច្រើនជាងបន្លែដទៃទៀត នៅពេលដែលស្ពៃក្ដោបដែលគេដាំដុះនៅខេត្តកំពង់ចាមត្រូវបានអ្នកបរិភោគទូទៅវាយតម្លៃថា មានគុណភាពល្អ ស្រួយឆ្ងាញ់ជាងស្ពៃក្ដោបដែលដាំនៅតំបន់ផ្សេង ដោយសារកត្តានេះហើយទើបជំរុញឱ្យកសិករនៅទីនោះពង្រីកការដាំដុះបន្លែស្ពៃក្ដោបទ្វេដងឡើង ដើម្បីបង្កើនផលិតផលបន្លែកសិកម្មប្រភេទនេះឱ្យគ្រប់តាមតម្រូវការ និងធ្វើការផ្គត់ផ្គង់នៅលើទីផ្សារឱ្យបានច្រើនផងដែរ។

លោក គឹម សារឿន ជាកសិករដាំបន្លែនៅភូមិទី3 ឃុំល្វា ស្រុកចំការលើ ខេត្តកំពង់ចាម ដែលជាអ្នកទីផ្សារ និងផ្សព្វផ្សាយសហគមន៍បន្លែ បានរៀបរាប់ឱ្យកាសែត ឡារ៉ែនពាណិជ្ជបានដឹងថា សព្វថ្ងៃនេះសហគមន៍របស់លោកបានដាំបន្លែគ្រប់ប្រភេទលើផ្ទៃដីប្រហែលជាជាង 3ហិកតា ដោយនៅក្នុងចម្ការដំណាំបន្លែនោះលោកបានដាំស្ពៃក្ដោប ប្រមាណពី 3ម៉ឺន ទៅ 3ម៉ឺន 5ពាន់គុម្ព ច្រើនជាងបន្លែដទៃ ព្រោះស្ពៃក្ដោបអាចលក់បានក្នុងតម្លៃថ្លៃ និងមានទីផ្សារល្អជាងបន្លែផ្សេង។

ក្រៅពីប្រភេទបន្លែស្ពៃក្ដោបនោះ លោក គឹម សារឿន បានបញ្ជាក់ថា សហគមន៍របស់លោកនៅមានដំណាំស្ពៃជាច្រើនមុខទៀត ដែលក៏អាចលក់បាន និងមានតម្រូវការទីផ្សារច្រើនដូចគ្នាដែរ ប៉ុន្តែគ្រាន់តែមិនច្រើនដូចបន្លែស្ពៃក្ដោបទេ ដូច្នេះហើយទើបលោកសម្រេចចិត្តដាំបន្លែស្ពៃក្ដោបច្រើនជាងគេ ព្រោះវាត្រូវនឹងរដូវដាំដុះ បន្ទាប់មកគឺ បន្លែស្ពៃចង្កឹះ ស្ពៃក្រញ៉ាញ់ និងស្ពៃបូកគោ ហើយក្រៅពីនោះគឺ នៅមានដំណាំបន្លែរួមផ្សំបន្តិចបន្តួចទៀត ដើម្បីផ្គត់ផ្គង់ទីផ្សារក្នុងខេត្តទាំងមូល។

លោក សារឿន បានឱ្យដឹងថា សហគមន៍របស់លោកមានសមាជិកតែ 10គ្រួសារប៉ុណ្ណោះដោយបានធ្វើចម្ការបន្លែប្រភេទស្ពៃគ្រប់ប្រភេទជិត 10ឆ្នាំមកហើយ ប៉ុន្តែសហគមន៍របស់លោកពុំទាន់មានទីផ្សារល្អនៅឡើយទេ។

លោកបន្តថា ស្ពៃក្ដោបរបស់សហគមន៍លោកអាចលក់បានក្នុងតម្លៃ 1,300-1,500រៀលប៉ុណ្ណោះក្នុង1គីឡូក្រាម ហើយមានប៉ុន្មាន ក៏លក់អស់ដែរទោះជាបច្ចុប្បន្នពុំទាន់មានការបញ្ជាទិញពីទីផ្សារធំៗនៅទីក្រុងភ្នំពេញក៏ដោយ។ ដោយសព្វថ្ងៃនេះ មានតែការចែកចាយតាមទីផ្សារក្នុងស្រុក និងតាមទីផ្សារក្នុងខេត្តកំពង់ចាមប៉ុណ្ណោះ ហើយតម្រូវការទីផ្សារក្នុងខេត្តវិញ គឺមួយថ្ងៃមិនលើសពី 80 ទៅ100គីឡូក្រាមឡើយ។

លោកក៏បានបញ្ជាក់ទៀតដែរថា តម្លៃលក់ដែលបានបញ្ជាក់ខាងលើនោះ គឺស្ថិតនៅក្នុងរដូវផលិតរយៈពេល(3ខែ)ដែលក្នុងរយៈពេលនោះ ការប្រមូលផល គឺទទួលបានច្រើន ប្រមាណជាជាង 5តោន ហើយតម្លៃដែលបានបញ្ជាក់ខាងលើនោះ គឺជាតម្លៃដែលលក់បាននៅក្នុងរដូវប្រមូលផលរបស់បន្លែស្ពៃក្តោប ដែលមានន័យថា ពេលដែលវាសម្បូរ វាពុំសូវបានថ្លៃខ្ពស់ទេ តែបើរដូវមិនសម្បូរវិញ វាបានតម្លៃខ្ពស់ខ្លាំង គឺ 5,000រៀលឯណោះក្នុង1គីឡូក្រាម។ លោកបានបន្តឱ្យដឹងទៀតថា សម្រាប់ដំណាំស្ពៃក្ដោបនេះ វាផ្តល់ផលលឿន ទោះជារដូវប្រមូលផលវាមិនសូវផ្ដល់កម្រៃច្រើនដល់សហគមន៍លោកក្ដី តែសមាជិកសហគមន៍របស់លោកនៅតែយកចិត្តទុកដាក់ក្នុងការដាំបន្លែស្ពៃក្តោបនេះជាបន្តបន្ទាប់ ដើម្បីផ្គត់ផ្គង់ទីផ្សាមិនឱ្យខ្វះ និងមានបន្លែស្ពៃក្ដោបរសជាតិឆ្ងាញ់នេះលក់ជាប់រហូត ព្រោះការដាំដំណាំបន្លែធម្មជាតិ ជាពិសេសបន្លែស្ពៃក្ដោបនេះ គឺជាមុខរបរចម្បងរបស់សមាជិកសហគមន៍របស់លោកដែលបានបង្កើនប្រាក់ចំណូលដល់ក្រុមគ្រួសារ។

សម្រាប់មហិច្ឆតានៃការធ្វើចម្ការដំណាំបន្លែស្ពៃក្តោបនេះ លោកសារឿនក៏បានបញ្ជាក់ឱ្យដឹងដែរថា សហគមន៍របស់លោកនឹងធ្វើពង្រីកការដាំដុះបន្លែស្ពៃក្តោបនេះបន្ថែមទៀត ដោយនឹងពង្រីកផ្ទៃដីដាំដុះឱ្យបានរហូតដល់ប្រមាណ 10ហិកតា ហើយសហគមន៍របស់លោកមានពូជស្ពៃក្ដោបល្អៗមួយចំនួនទៀតដែលទីផ្សារ និងអ្នកបរិភោគប្រាកដជានឹងទទួលស្គាល់នូវរសជាតិរបស់វាដែលបច្ចុប្បន្នសហគមន៍របស់លោកកំពុងដាំដុះ និងប្រមូលផលក្នុងរយៈពេលដ៏ខ្លីខាងមុខ៕

March 11, 2019

ដើមឆ្នាំ2019 ទុនវិនិយោគលើវិស័យសំណង់មានប្រមាណ 829លានដុល្លារ

នៅក្នុងខែមករា ឆ្នាំ2019 កន្លងទៅនេះ ការវិនិយោគលើវិស័យសំណង់កម្ពុជាមានទំហំទឹកប្រាក់ចំនួនប្រមាណ 829លានដុល្លារ មានការកើនឡើងរហូតដល់ 178% បើប្រៀបធៀបនឹងរយៈពេលដូចគ្នាកាលពីឆ្នាំ2018 កន្លងទៅនេះ។

ឯកឧត្តម ជា សុផារ៉ា រដ្ឋមន្ត្រីក្រសួងរៀបចំដែនដីនគរូបនីយកម្ម និងសំណង់ បានលើកឡើងថា ការអភិវឌ្ឍវិស័យអចលនទ្រព្យ និងសំណង់បានក្លាយជាសសរស្តម្ភស្នូលយ៉ាងសំខាន់ក្នុងការជំរុញកំណើនសេដ្ឋកិច្ចកម្ពុជា។ ចំពោះក្រុមហ៊ុនសាងសង់ និងក្រុមហ៊ុនសិក្សាគម្រោងប្លង់ដែលមានអាជ្ញាប័ណ្ណចំនួន 2,307 ក្រុមហ៊ុន រួមមានស្ថាបត្យករប្រមាណជាង 2,500នាក់ វិស្វករប្រមាណជាង 30,000 នាក់។ នេះ គឺជាសញ្ញាវិជ្ជមានដ៏ប្រសើរមួយចំពោះការអភិវឌ្ឍក្នុងវិស័យសំណង់ និងអចលនទ្រព្យនៅកម្ពុជានាពេលបច្ចុប្បន្ន និងបន្តទៅថ្ងៃអនាគត។

ឯកឧត្តមបានបន្តថា៖“ជាក់ស្ដែងនៅក្នុងរយៈពេល 10ឆ្នាំចុងក្រោយនេះដោយរាប់ចាប់ពីឆ្នាំ2010 រហូតដល់ឆ្នាំ2019 ទំហំវិនិយោគលើវិស័យសំណង់ និងអចលនទ្រព្យនៅកម្ពុជាមានទឹកប្រាក់សរុបចំនួនប្រមាណជា 43,896 លានដុល្លារសហរដ្ឋអាមេរិក ហើយនៅដើមឆ្នាំ2019នេះ ការវិនិយោគលើវិស័យមួយនេះមានទំហំទឹកប្រាក់ប្រមាណ 829លានដុល្លារអាមេរិក ធៀបនឹងរយៈពេលដូចគ្នាក្នុងឆ្នាំ2018 ឃើញថាមានការកើនឡើងប្រមាណ 178% ”។

ឯកឧត្តមបានបញ្ជាក់ទៀតថា ជាមួយនឹងការអភិវឌ្ឍនគរូបនីយកម្ម និងសំណង់ដែលកំពុងមានកំណើនក្នុងល្បឿនដ៏លឿននេះ យើងអាចមើលឃើញពីតម្រូវការវិនិយោគជាច្រើន មានជាអាទិ៍ដូចជា ការអភិវឌ្ឍសំណង់លំនៅឋាន សំណង់ពាណិជ្ជកម្ម សំណង់សេវាកម្ម សំណង់ឧស្សាហកម្ម សំណង់ហេដ្ឋារចនាសម្ព័ន្ធរូបវ័ន្ត និងបរិស្ថាន សេដ្ឋកិច្ចសង្គម។ ជាពិសេសការអភិវឌ្ឍលំនៅឋានតម្លៃសមរម្យ បណ្តាញផ្លូវ ការផ្គត់ផ្គង់ទឹកស្អាត អគ្គិសនី ប្រព័ន្ធលូ និងប្រពន្ធការពារទឹកជំនន់ ស្ថានីយប្រព្រឹត្តកម្មទឹកកខ្វក់ ការគ្រប់គ្រងសំណល់រឹង និងរាវ លម្ហសាធារណៈ និងផ្ទៃបៃតងបរិស្ថានទីក្រុង ដែលសុទ្ធសឹងជាដំណោះស្រាយដ៏មានប្រសិទ្ធភាពសម្រាប់គោលដៅនៃការអភិវឌ្ឍប្រកបដោយចីរភាព មានបរិយាប័ន្ន មានភាពធន់ និងមានភាពប្រកួតប្រជែងឆ្ពោះទៅសម្រេចចក្ខុវិស័យកម្ពុជាឆ្នាំ2030 ក្លាយជាប្រទេសមានចំណូលមធ្យមកម្រិតខ្ពស់ និងនៅឆ្នាំ2050 ក្លាយជាប្រទេសមានចំណូលខ្ពស់។

លោក ច្រឹក សុខនីម ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា (CVEA)បានប្រាប់ឡារ៉ែនពាណិជ្ជឱ្យដឹងផងដែរថា៖ “ជារួម វិស័យអចលនទ្រព្យដែលយើងមើលឃើញនៅដើមឆ្នាំ2019 នេះ វាដំណើរការជាធម្មតានៅឡើយទេ វាអត់មានអ្វីជាឧបសគ្គធំទេ ព្រោះវាពុំមានអ្វីជាអវិជ្ជមាន ប៉ះពាល់ដល់វិស័យនេះទេ ហើយអ្វីដែលជាដំណើរការក្នុងវិស័យអចលនទ្រព្យនេះ គេអាចហៅបានថាមានសម្ទុះខ្លាំង តែក៏ពុំទាន់មានអ្វីលេចធ្លោនៅឡើយដែរ”។

លោកប្រធានសមាគមបានបញ្ជាក់ថា ពាក់ព័ន្ធនឹងទុនវិនិយោគនៃវិស័យអចលនទ្រព្យ ជារួម វាចាប់ផ្តើមគម្រោង និងបានដំណើរការទៅហើយ ដូចនេះដើម្បីឱ្យដឹងពីទំហំនៃគម្រោងនេះ គឺយើងត្រូវមើលលើការងាររបស់វា ឬចុងបញ្ចប់នៃគម្រោង និងការលក់របស់គម្រោងនោះ។

លោក សុខនីម បានបន្ថែមថា ប៉ុន្តែគម្រោងដែលមាន និងបានបង្ហាញពីទុនវិនិយោគរួចហើយនោះ គេអាចប៉ាន់ស្មានបាន ប្រសិនបើគម្រោងនោះបានធ្វើជាក់ស្តែង គឺយើងអាចដឹងពីទំហំកំណើនបានថា ស្ថិតក្នុងចន្លោះណា? បើទុននោះយកមកពីបរទេស គេអាចវាយតម្លៃនៃទុនវិនិយោគនោះដោយធៀបនឹងផលទុនសរុបរបស់ជាតិ(ផ.ស.ស)។ ពោលគឺ ប្រសិនបើកើនឡើងប្រមាណ 800លាន គឺថែមតម្លៃនោះចាក់បញ្ចូលទៅក្នុងផ.ស.ស នៃថវិកាជាតិរបស់យើង។

លោកប្រធានសមាគមបានបញ្ជាក់ទៀតថា ទោះបីជាមិនទាន់មានការបង្ហាញពិវិស័យនេះថាមានអ្វីឱ្យលេចធ្លោ និងគួរឱ្យកត់សម្គាល់ក៏ដោយ តែសម្រាប់លោកវិញ លោកមើលឃើញថា វិស័យនេះកំពុងតែចាប់ផ្តើមល្អ ដោយការលេចចេញនូវគម្រោងថ្មីៗជាបន្តបន្ទាប់ ឯគម្រោងចាស់ក៏បានបញ្ចប់ទៅដោយរលូន និងមានទីផ្សារល្អដែរ ហើយទំហំទុនវិនិយោគចាប់ផ្តើមក្នុងដើមឆ្នាំ2019នេះ ក៏បង្ហាញពីកំណើនច្រើនជាងកាលពីឆ្នាំកន្លងទៅដែរ៕

March 11, 2019

ស្ពានមិត្តភាពកម្ពុជា-ជប៉ុនគ្រោងបើកដំណើរការបណ្តោះអាសន្នមុនចូលឆ្នាំខ្មែរ

ក្រសួងសាធារណការ និងដឹកជញ្ជូនបានឱ្យដឹងថា ក្រសួងគ្រោងដាក់ឱ្យដំណើរការឡើងវិញនូវស្ពានមិត្តភាពកម្ពុជា-ជប៉ុន(ស្ពានជ្រោយចង្វារ)នៅមុនថ្ងៃបុណ្យចូលឆ្នាំថ្មីប្រពៃណីជាតិខ្មែរ ក្រោយពីធ្វើការជួសជុល សម្រេចបាន 97% លឿនជាងការគ្រោងទុកចំនួន 11% មុនផែនការរំពឹងទុកដែលនឹងបញ្ចប់មុនពេលកំណត់។

ឯកឧត្តមទេសរដ្ឋមន្ត្រី ស៊ុន ចាន់ថុល រដ្ឋមន្រ្តីក្រសួងសាធារណការ និងដឹកជញ្ជូន បានចុះពិនិត្យមើលវឌ្ឍនភាពនៃការជួសជុលស្ពានមិត្តភាពកម្ពុជា-ជប៉ុន (ជ្រោយចង្វារ) (ថ្ងៃទី6 ខែមីនា ឆ្នាំ2019) ដោយមានការចូលរួមពីមន្ត្រីក្រសួង តំណាងក្រុមហ៊ុនជួសជុលសាងសង់ និងក្រុមហ៊ុនត្រួតពិនិត្យលក្ខណបច្ចេកទេស។

រាជរដ្ឋាភិបាលបានប្រកាសជួសជុលស្ពាននេះជាថ្មីស្ទើរទាំងស្រុងហើយស្របពេលកំណើនសេដ្ឋកិច្ច និងលំហូរចរាចរណ៍កើនឡើងជាលំដាប់ ស្ពាននេះបានតម្រូវឱ្យមានការជួសជុលឡើងវិញជាបន្ទាន់ក្រោមជំនួយហិរញ្ញប្បទានឥតសំណងរបស់រដ្ឋាភិបាលជប៉ុន ដោយចំណាយទឹកប្រាក់ប្រមាណ 3,343លានយ៉េន ស្មើនឹងប្រមាណជាង30លានដុល្លារអាមេរិក និងប្រើរយៈពេលប្រមាណ2ឆ្នាំ។

គម្រោងស្តារស្ពានមិត្តភាពកម្ពុជា-ជប៉ុន(ស្ពានជ្រោយចង្វារទី១)ឡើងវិញ ជាហិរញ្ញប្បទាន ឥតសំណងរបស់រដ្ឋាភិបាលជប៉ុន ដែលត្រូវបានចុះហត្ថលេខានៅថ្ងៃទី31 ខែមីនា ឆ្នាំ2016។ គម្រោងនេះបានចាប់ផ្តើមបើកការដ្ឋានជួសជុលនៅថ្ងៃទី15 ខែកញ្ញា ឆ្នាំ2017 ដោយមានក្រុមហ៊ុន Obayashi ជាក្រុមហ៊ុនទទួលបានសិទ្ធិក្នុងការជួសជុលសាងសង់ និងក្រុមហ៊ុន Central Consultant Inc ជាក្រុមហ៊ុនទីប្រឹក្សាបច្ចេកទេស។

ផ្អែកលើកិច្ចព្រមព្រៀងរវាងរដ្ឋាភិបាលនៃប្រទេសទាំង2 គម្រោងនេះគ្រោងនឹងបញ្ចប់នៅថ្ងៃទី14 ខែមិថុនា ឆ្នាំ2019 ប៉ុន្តែដោយសារការអនុវត្តគម្រោងនេះលឿនជាងការគ្រោងទុក ស្ពាននេះនឹង បើកឱ្យដំណើរការធ្វើចរាចរជាបណ្តោះអាសន្ន នៅពេលបុណ្យចូលឆ្នាំថ្មីប្រពៃណីជាតិខ្មែរ ខាងមុខនេះ។

យោងតាមគេហទំព័រហ្វេសប៊ុក របស់ក្រសួងសាធារណការ និងដឹកជញ្ជូនបានឱ្យដឹងថា ការងារសំខាន់ៗនៃការជួសជុលស្ពាននេះ គឺបានបញ្ចប់រួចរាល់អស់ហើយ នៅសល់តែការងារតូចៗ ដូចជា សម្អាត និងការលាបពណ៌ រៀបចំសណ្តាប់ធ្នាប់ជុំវិញស្ពាននេះប៉ុណ្ណោះ។ ការជួសជុលបញ្ចប់មុនផែនការនេះ ដោយសារក្រុមបច្ចេកទេសទាំងកម្ពុជា និងជប៉ុនបានសហការគ្នាបានល្អដែលធ្វើឱ្យការជួសជុលរួចរាល់មុនកាលកំណត់។

ក្រសួងបានបញ្ជាក់បន្ថែមថា ការដាក់ដំណើរការឱ្យប្រើប្រាស់ស្ពាននេះឡើងវិញ មុនពិធីចូលឆ្នាំថ្មី វាជាវិធានការមួយក្នុងការសម្រួលការកកស្ទះចរាចរណ៍ ដែលតែងកើតមានឡើងជារៀងរាល់ឆ្នាំ ព្រោះក្នុងពេលនោះប្រជាពលរដ្ឋនាំគ្នាសម្រុកចេញពីរាជធានីទៅស្រុកកំណើតច្រើន។ ដូច្នេះបញ្ហាកកស្ទះចរាចរណ៍នឹងត្រូវកាត់បន្ថយ ដូច្នេះការបើកឱ្យដំណើរការបណ្ដោះអាសន្ននេះ គឺនឹងជួយសម្រួលបញ្ហាចរាចរណ៍ជូនប្រជាពលរដ្ឋ។

អ្នកនាំពាក្យសាលារាជធានីភ្នំពេញ បានលើកឡើងថា ជារួម ការបើកឱ្យដំណើរការស្ពាននេះឡើងវិញ គឺជាការប្រសើរដែលចូលរួមកាត់បន្ថយការកកស្ទះចរាចរណ៍ ខណៈអាជ្ញាធរក្រុងត្រៀមរៀបចំសណ្តាប់ធ្នាប់ឱ្យបានល្អនៅជុំវិញស្ពាននេះ ជាពិសេសគឺក្នុងពិធីបុណ្យចូលឆ្នាំខ្មែរខាងមុខ។ ដោយឡែកការធ្វើដំណើររបស់ពលរដ្ឋនៅតាមផ្លូវជាតិ6 និងលេខ5 នឹងកាន់តែល្អប្រសើរជាងមុនទៀត ពីព្រោះយើងមានស្ពានដល់ទៅ 3សម្រាប់ឱ្យពលរដ្ឋឆ្លងកាត់»។

ស្ពានមិត្តភាពកម្ពុជា-ជប៉ុន (ជ្រោយចង្វារ) មានប្រវែង 971ម៉ែត្រទទឹង 13ម៉ែត្រ ស្ថិតនៅតាមបណ្តោយផ្លូវជាតិលេខ6A ក្នុងភូមិសាស្ត្រទឹកដីរាជធានីភ្នំពេញ ត្រូវបានសាងសង់ និងសម្ពោធដាក់ឱ្យប្រើប្រាស់ក្នុងឆ្នាំ1963 ក្រោមហិរញ្ញប្បទានឥតសំណងរបស់ប្រទេសជប៉ុន។ ស្ពាននេះត្រូវបានខូចខាតដោយសង្គ្រាមស៊ីវិលនៅកម្ពុជា និងត្រូវបានសាងសង់ឡើងវិញនៅឆ្នាំ1992 ដោយប្រទេសជប៉ុន ហើយត្រូវបានប្តូរឈ្មោះទៅជាស្ពានមិត្តភាពកម្ពុជា-ជប៉ុនដោយព្រះមហាវីរក្សត្រសម្ដេចព្រះបាទ ព្រះបរមរតនកោដ្ឋ នរោត្ដម សីហនុ៕

March 9, 2019

តើគួរទិញដីនៅក្បែរព្រលានយន្តហោះ ឬមិនគួរទិញ?

ស្របពេលដែលរាជរដ្ឋាភិបាលបានប្រកាសបង្កើតគណៈកម្មការសិក្សាគម្រោងសាងសង់ព្រលានយន្តហោះថ្មីនៅក្នុងទឹកដីនៃខេត្តកណ្តាលរួចមក គេសង្កេតឃើញថា ដីនៅតំបន់នោះបាន និងកំពុងតែមានតម្លៃកើនឡើងគួរឱ្យកត់សម្គាល់ ហើយប្រជាពលរដ្ឋទូទៅ ក៏ដូចជាឈ្មួញមួយចំនួនកំពុងនាំគ្នាសម្រុកទិញដីនៅតំបន់នោះផងដែរ។

លោក ច្រឹក សុខនីម ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា បានមានប្រសាសន៍ថា គួរមានការសិក្សាឱ្យបានច្បាស់លាស់ជាមុនសិន មុននឹងសម្រេចទិញដីវិនិយោគនៅក្បែរព្រលានយន្តហោះ ព្រោះថា ការសាងសង់អគារនៅក្បែរព្រលានយន្តហោះអាចមានទាំងផលវិជ្ជមាន និងអវិជ្ជមានទន្ទឹមគ្នា។ ផលវិជ្ជមានគឺស្ថិតនៅត្រង់ថា បើយើងទិញដីសង់ខុនដូ សណ្ឋាគារ ផ្ទះសំណាក់ ឬភោជនីយដ្ឋាននៅឆ្ងាយពីព្រលានបន្តិច វាមិនសូវឮសំឡេងយន្តហោះប៉ុន្មានទេ ហើយអាចមានភ្ញៀវមកស្នាក់នៅ ឬចូលទទួលទានអាហារច្រើនផងដែរ ដោយសារភ្ញៀវដែលទើបចុះពីយន្តហោះ ជួនកាលយប់ជ្រៅ មិនមានបងប្អូនមកទទួលយក ឬមកដល់នៅពេលយប់ មិនហ៊ានធ្វើដំណើរទៅផ្ទះ គាត់ត្រូវស្នាក់នៅ និងទទួលទានអាហារនៅក្នុងសណ្ឋាគារបណ្តោះអាសន្នសិន ដូច្នេះការទិញដីនៅក្បែរព្រលានយន្តហោះ ក៏អាចធ្វើអាជីវកម្មទទួលបានផលចំណេញ និងរកប្រាក់ចំណូលប្រចាំថ្ងៃបានផងដែរ។ ចំណែកផលអវិជ្ជមានវិញ បើសិនជាទិញដីនៅកៀកនឹងរបងព្រលានយន្តហោះ ឬទិញដីសង់ផ្ទះនៅក្បែរផ្លូវយន្តហោះឡើង-ចុះ នោះប្រាកដជាលំបាកក្នុងការរស់នៅមិនខាន ដោយសារតែអាជ្ញាធរមិនអនុញ្ញាតឱ្យសង់ផ្ទះខ្ពស់ច្រើនជាន់ទេ ហើយអ្វីដែលសំខាន់ខ្លាំងជាងនេះទៀតនោះ គឺការរស់នៅជិតព្រលានយន្តហោះនឹងត្រូវរងផលប៉ះពាល់ខ្លាំងពីសំឡេងយន្តហោះ មិនថាយប់ ឬថ្ងៃនោះទេ គឺព្រលានយន្តហោះអន្តរជាតិប្រាកដជាមានយន្តហោះចុះ-ឡើងឥតឈប់ឈរមិនខាន សូម្បីតែព្រលានយន្តហោះបច្ចុប្បន្ន(អាកាសយានដ្ឋានអន្តរជាតិភ្នំពេញ)ក៏មានជើងយន្តហោះឡើង-ចុះដល់ទៅជិត 60ជើងដែរក្នុងមួយថ្ងៃ។

លោក ពុជ វណ្ណៈ អាជីវករសង់ផ្ទះល្វែងលក់នៅខេត្តកណ្តាលក៏មានប្រសាសន៍ទទួលស្គាល់ក្រោយពីរដ្ឋាភិបាលប្រកាសឱ្យសិក្សាគម្រោងសាងសង់ព្រលានយន្តហោះឡើងវិញនោះដែរថា តម្លៃដីនៅក្នុងស្រុកកណ្តាលស្ទឹងរហូតទៅដល់ភូមិសាស្ត្រស្រុកស្អាង ពិតជាកំពុងមានសម្ទុះកើនឡើងគួរកត់សម្គាល់ ហើយបានបង្កជាទំនាស់រវាងឈ្មួញ និងប្រជាពលរដ្ឋទៀតផង។

លោកបានលើកជាឧទាហរហ៍ថា ដូចជាដីបឹងជាប់ព្រំប្រទល់រវាងស្រុកកណ្តាលស្ទឹង និងស្រុកស្អាង កាលពីមិនទាន់ប្រកាសសាងសង់ព្រលានយន្តហោះ ប្រជាពលរដ្ឋប្រកាសលក់មួយម៉ែត្រការ៉េក្នុងតម្លៃតែ 4ដុល្លារក៏មិនមានឈ្មួញណាទិញផង ប៉ុន្តែមកទល់ពេលនេះ ទីតាំងនោះឈ្មួញសុំទិញដោយឱ្យតម្លៃដល់ទៅ 20ដុល្លារក្នុងមួយម៉ែត្រការ៉េ ក៏ប្រជាពលរដ្ឋមិនលក់ដែរ។

លោកបន្តថា តម្លៃដីក្បែរគម្រោងព្រលាននោះបានឡើងថ្លៃក្រឺតៗទាំងអស់ គ្រាន់តែថាតំបន់ខ្លះឡើងថ្លៃខ្លាំងហើយតំបន់ខ្លះឡើងតិចតួច ទៅតាមទីតាំងដែលមានសក្តានុពលខ្លាំង និងទីតាំងមិនសូវមានសក្តានុពលប៉ុណ្ណោះ និងឡើងថ្លៃក្នុងចន្លោះពី 20ដុល្លារទៅដល់ជាង100ដុល្លារក្នុង 1ម៉ែត្រការ៉េក៏មាន ជាពិសេសឡើងថ្លៃខ្លាំងនៅក្នុងឃុំកណ្តោក ឃុំអំពៅព្រៃ ស្រុកកណ្តាលស្ទឹង ខេត្តកណ្តាល ជាដីដែលមានទីតាំងនៅកៀកនឹងព្រលានជាងគេ ឬមានទីតាំងដីនៅជាប់ផ្លូវ60ម៉ែត្រ ស្របតាមបណ្តោយផ្លូវក្រវាត់ក្រុងទី3។

គួរបញ្ជាក់ដែរថា កាលពីសប្តាហ៍មុននេះរដ្ឋាភិបាលបានចេញសេចក្តីសម្រេចថ្មីមួយ ដើម្បីបង្កើតគណៈកម្មការរៀបចំទីតាំងគម្រោងសាងសង់អាកាសយានដ្ឋានអន្តរជាតិថ្មី ដើម្បី៖ 1.ពិនិត្យ និងកំណត់និយាមការទីតាំង សម្រាប់គម្រោងសាងសង់អាកាសយានដ្ឋានអន្តរជាតិថ្មី។ 2.សិក្សាវាយតម្លៃថ្លៃដីនៅតំបន់គម្រោងសាងសង់អាកាសយានដ្ឋានថ្មី។ 3.សម្របសម្រួលដោះស្រាយបញ្ហាពាក់ព័ន្ធនឹងទីតាំងដី ដើម្បីបង្កលក្ខណៈងាយស្រួលដល់ដំណើការគម្រោងសាងសង់អាកាសយានដ្ឋានថ្មីនេះ។ 4.សម្របសម្រួលជាមួយក្រសួង ស្ថាប័ន និងអង្គភាពពាក់ព័ន្ធរបស់រាជរដ្ឋាភិបាល និងក្រុមហ៊ុនដើម្បីដំណើរការអនុវត្តឱ្យគម្រោងប្រព្រឹត្តទៅដោយជោគជ័យ។ 5.ផ្តល់អនុសាសន៍ដល់ក្រុមហ៊ុនក្នុងការបំពេញបែបបទផ្សេងៗ ដើម្បីឆ្លើយតបបានតាមតម្រូវការ សម្រាប់អនុវត្តគម្រោង ក៏ដូចជាសំណូមពរផ្សេងៗរបស់ក្រុមហ៊ុន។ 6.ពិនិត្យ និងផ្តល់យោបល់លើផែនការមេ របស់គម្រោង ក៏ដូចជាសំណូមពរផ្សេងៗរបស់ក្រុមហ៊ុន តាមដាន និងត្រួតពិនិត្យការអនុវត្តគម្រោង សាងសង់អាកាសយានដ្ឋានថ្មី និងហេដ្ឋារចនាសម្ព័ន្ធពាក់ព័ន្ធ និងទី7.ធ្វើរបាយការណ៍អំពីលទ្ធផលជូននាយករដ្ឋមន្ត្រី ដើម្បីពិនិត្យ និងសម្រេច៕

March 7, 2019

ដើម្បីទ្រទ្រង់កំណើនសេដ្ឋកិច្ចសង្គម កម្ពុជាត្រូវជំរុញវិស័យទេសចរណ៍

វិស័យទេសចរណ៍ គឺជាវិស័យមួយដែលចូលរួមទ្រទ្រង់កំណើនសេដ្ឋកិច្ច-សង្គម បង្កើតការងារ និងកាត់បន្ថយភាពក្រីក្ររបស់ប្រជាពលរដ្ឋ ជាការនាំចេញនៅនឹងកន្លែងព្រមទាំងដើរតួនាទីយ៉ាងសំខាន់ក្នុងការចូលរួមថែរក្សា និងអភិរក្សបរិស្ថាន រួមទាំងឆ្លើយតបនឹងបម្រែបម្រួលអាកាសធាតុប្រកបដោយប្រសិទ្ធភាព ដោយហេតុដូច្នេះហើយ ទើបរាជរដ្ឋាភិបាលបានចាត់ទុកវិស័យនេះថាជា មាសបៃតង។

ឯកឧត្តម ថោង ខុន រដ្ឋមន្ត្រីក្រសួងទេសចរណ៍នៅក្នុង “ទិវាជាតិទីក្រុងស្អាត” លើកទី7 ក្រោមប្រធានបទ “ទីក្រុងស្អាត៖ ទីក្រុងផ្តល់ភាពកក់ក្តៅ” បានថ្លែងបញ្ជាក់ថា៖ “នៅឆ្នាំ2018កន្លងទៅ វិស័យទេសចរណ៍យើងសម្រេចបានកំណើនក្នុងអត្រា10.7% ជាមួយនឹងការមកដល់នៃភ្ញៀវទេសចរអន្តរជាតិជាង 6.2លាននាក់ និងនាំប្រាក់ចំណូលប្រមាណ 4,356លានដុល្លារអាមេរិកចាក់បញ្ចូលក្នុងសេដ្ឋកិច្ចជាតិ” ដែលជាការកើនឡើងប្រហែល 20%។

ឯកឧត្តមរដ្ឋមន្ត្រី បន្តថា នៅឆ្នាំ2019 កម្ពុជារំពឹងថា នឹងទទួលបានភ្ញៀវទេសចរអន្តរជាតិប្រមាណ6លាន 7សែននាក់ ហើយនៅឆ្នាំ2020 នឹងទទួលបានប្រមាណជាជាង 7លាននាក់ និងនាំមកនូវចំណូលប្រមាណ 5ពាន់លានដុល្លារអាមេរិក ដែលនឹងបង្កើតឱកាសការងារបានប្រមាណជិត 1លាននាក់ និងនៅឆ្នាំ2030 អាចនឹងទទួលបានភ្ញៀវទេសចរអន្តរជាតិប្រមាណ 15លាននាក់ ដែលនឹងនាំមកនូវចំណូលប្រមាណ 10ពាន់លានដុល្លាអាមេរិក ដោយនឹងបង្កើតឱកាសការងារបានប្រមាណជិត 2លាននាក់។

ឯកឧត្តម បន្តថា ដើម្បីត្រៀមទទួលស្វាគមន៍ភ្ញៀវទេសចរអន្តរជាតិដូចដែលបានជម្រាបជូនខាងលើ ជាយុទ្ធសាស្ត្រ គឺត្រូវធ្វើឱ្យកម្ពុជាក្លាយជាគោលដៅទេសចរណ៍ប្រកបដោយភាពទាក់ទាញ និងផ្តល់ភាពកក់ក្តៅដល់ភ្ញៀវទេសចរតាមរយៈការបង្កើតឱ្យមានផលិតផលទេសចរណ៍ថ្មីៗ និងប្រកបដោយភាពវៃឆ្លាត ស្អាត និងបៃតង (Smart, Clean & Green)។ឯកឧត្តម ថោង ខុន បានបញ្ជាក់ទៀតថា៖ “ក្នុងចលនាប្រឡងប្រណាំងទីក្រុងស្អាត រដ្ឋាភិបាលបានកំណត់យកថ្ងៃទី27 ខែកុម្ភៈ ជារៀងរាល់ឆ្នាំដើម្បីប្រារព្ធពិធីអបអរសាទរ “ទិវាជាតិទីក្រុងស្អាត” ហើយផ្តើមចេញពីចលនាប្រឡងប្រណាំងនេះ គឺដើម្បីលើកទឹកចិត្ត និងទទួលស្គាល់កិច្ចខិតខំប្រឹងប្រែង របស់ផ្នែកឯកជនក្នុងវិស័យទេសចរណ៍ និងវិស័យពាក់ព័ន្ធដែលមានស្នាដៃល្អចូលរួមទ្រទ្រង់ដល់ចលនាប្រឡងប្រណាំង“ទីក្រុងស្អាត រមណីយដ្ឋានស្អាត សេវាល្អ បដិសណ្ឋារកិច្ចល្អ” និងជាការលើកកម្ពស់ភាពស្អាត និងបៃតងនៅកម្ពុជា”។

សម្តេចតេជោនាយករដ្ឋមន្ត្រីបានមានប្រសាសន៍ពាក់ព័ន្ធនឹងវិស័យទេសចរណ៍ថា៖“បើធ្វើជាអ្នកជំនួញ ឬអ្នកលក់ដូរវិញ ការរកអតិថិជនម្នាក់មកទិញរបស់យើងនោះ គឺជារឿងលំបាកហើយ តែរឿងដែលពិបាកជាងហ្នឹងទៀតនោះគឺ អ្នកលក់ត្រូវធានាយ៉ាងណាដល់អតិថិជនដែលជាអ្នកទិញទំនិញរបស់យើងនោះឱ្យថ្ងៃក្រោយគេមកទិញទៀត”។

សម្តេចតេជោបន្តថា៖ “មិនត្រឹមតែគេមកទិញខ្លួនឯងទេ គេថែមទាំងហៅមិត្តភក្តិរបស់គេឱ្យមកជួយទិញថែមទៀត ទើបជាបញ្ហាជោគជ័យនៃមុខជំនួញ កុំឱ្យគេមកទិញម្តងហើយរាងចាល មុខគេមិនមើល ដោយសារតែការកាត់តម្លៃខ្ពស់ សម្តីគំរោះគំរើយ អ៊ីចឹងថ្ងៃក្រោយរកស៊ីខាត កុំថាមកពីរដ្ឋាភិបាលត្រូវពិនិត្យមើលឡើងវិញ”។សម្តេចតេជោនាយករដ្ឋមន្ត្រី ក៏បានជំរុញឱ្យវិស័យទេសចរណ៍ត្រូវមានការផ្សារភ្ជាប់ ឬទាញផលប្រយោជន៍ពីវិស័យកសិកម្ម តាមរយៈការជំរុញឱ្យកសិករ ម្ចាស់រមណីយដ្ឋាន និងភោជនីយដ្ឋាន បង្កើនការដាំដុះដំណាំកសិកម្មបែបធម្មជាតិឱ្យបានច្រើន ដើម្បីបំពេញតម្រូវការបរិភោគរបស់ទាំងភ្ញៀវជាតិ និងអន្តរជាតិ។

បន្ថែមលើនេះសម្ដេចតេជោ ហ៊ុន សែន បានមានប្រសាសន៍យ៉ាងដូច្នេះថា៖“ក្រសួងប្រៃសណីយ៍ និងទូរគមនាគមន៍ត្រូវរៀបចំដាក់ Free WiFi នៅតាមគោលដៅតំបន់ទេសចរណ៍ទូទាំងប្រទេស ពិសេសរាជធានីភ្នំពេញ ខេត្តសៀមរាប ខេត្តបាត់ដំបង និងខេត្តព្រះសីហនុ ជាដើម ឱ្យបានមុនឆ្នាំ2023។

សម្ដេចក៏បានក្រើនរំឭកដល់ក្រសួងប្រៃសណីយ៍ និងទូរគមនាគមន៍ត្រូវតាមពិនិត្យឱ្យបានហ្មត់ចត់ទៅលើបញ្ហា Free WiFi ព្រោះស្ថានភាពការប្រើ WiFi ដែលយើងបានធ្វើនៅទីក្រុងភ្នំពេញ មិនទាន់មានប្រសិទ្ធភាពនៅឡើយទេ ពោលមាន WiFi តែអត់មានអុីនធើណិត”។

លោកស្រី ឆាយ ស៊ីវលីន ប្រធានសមាគមភ្នាក់ងារទេសចរណ៍កម្ពុជាបានមានប្រសាសន៍ថាប្រតិបត្តិករទេសចរណ៍ និងរដ្ឋាភិបាលបានកំណត់ទិសដៅសម្រាប់អ្នកទេសចរអន្តរជាតិ ជាពិសេសអ្នកទេសចរចិនក្នុងប៉ុន្មានឆ្នាំថ្មីៗនេះ ដែលនេះជាមូលហេតុចម្បងដែលពួកគេបានធ្វើដំណើរមកកាន់ប្រទេសកម្ពុជា។

លោកស្រីបានមានប្រសាសន៍ថា ៖“ដោយសារតែកិច្ចខិតខំប្រឹងប្រែងដើម្បីលើកកម្ពស់ប្រទេស ក្នុងវិស័យទេសចរណ៍ដើម្បីឱ្យអ្នកទេសចរកាន់តែច្រើនបានមកធ្វើទស្សនាចរនៅកម្ពុជា នឹងនាំឱ្យគោលនយោបាយរបស់ក្រសួងទេសចរណ៍ បានទទួលជោគជ័យ និងមានប្រសិទ្ធភាព”។ លោកស្រីបានបន្តថាបច្ចុប្បន្នអ្នកពាក់ព័ន្ធនឹងឧស្សាហកម្មទេសចរណ៍គួរតែរួមគ្នាក្នុងគោលបំណងតែមួយដើម្បីបង្កើតឱ្យមានកំណើនប្រកបដោយចីរភាពនៅក្នុងវិស័យនេះ៕

March 7, 2019

កម្ពុជាគ្រោងដំឡើងប្រព័ន្ធអុីនធើណិត WiFi នៅតាមតំបន់ទេសចរណ៍ទូទាំងប្រទេស

រដ្ឋាភិបាលកម្ពុជា កាលពីពេលថ្មីៗនេះបានប្រកាសពីគម្រោងដំឡើងប្រព័ន្ធអុីនធើណិតគ្មានខ្សែ (WiFi) នៅតាមតំបន់ទេសចរណ៍ទូទាំងប្រទេសដើម្បីសម្រួលដល់អ្នកទេសចរក្នុងស្រុក និងបរទេសដែលបានទៅទស្សនាតំបន់ទេសចរណ៍នៅក្នុងប្រទេសកម្ពុជា ហើយគម្រោងនេះត្រូវធ្វើយ៉ាងណាបញ្ចប់ឱ្យបានមុនឆ្នាំ2023។

នៅក្នុងពិធី “ទិវាជាតិទីក្រុងស្អាត” លើកទី7 នៅសណ្ឋាគារសុខាភ្នំពេញ ដែលបានប្រារព្ធធ្វើឡើងកាលពីព្រឹកថ្ងៃទី25 ខែកុម្ភៈ ឆ្នាំ2019 នេះ សម្ដេចនាយករដ្ឋមន្ត្រី ហ៊ុន សែន បានប្រាប់ឱ្យក្រសួងប្រៃសណីយ៍ និងទូរគមនាគមន៍រៀបចំដំឡើងប្រព័ន្ធអុីនធើណិតគ្មានខ្សែ ឬWiFi នៅតាមបណ្ដាតំបន់ទេសចរណ៍ទូទាំងប្រទេស ពិសេសរាជធានីភ្នំពេញ ខេត្តសៀមរាប និងខេត្តព្រះសីហនុជាដើម។ សម្តេចនាយករដ្ឋមន្ត្រីបញ្ជាក់ថា គម្រោងនេះត្រូវតែធ្វើឱ្យបានមុនឆ្នាំ2023។

សម្ដេចតេជោ ហ៊ុន សែន ក៏បានប្រាប់ក្រសួងប្រៃសណីយ៍ និងទូរគមនាគមន៍ឱ្យតាមពិនិត្យឱ្យបានហ្មត់ចត់ទៅលើបញ្ហា ប្រព័ន្ធអុីនធើណិតគ្មានខ្សែ ឬ WiFi នេះ ព្រោះការប្រើ WiFi ពេលខ្លះហាក់មិនទាន់មានប្រសិទ្ធភាពនៅឡើយទេ ដោយជួនកាលមិនអាចតភ្ចាប់ជាមួយនឹងអុីនធើណិតបាន។

សម្ដេចនាយករដ្ឋមន្ត្រីបានមានប្រសាសន៍យ៉ាងដូច្នេះថា៖ “ទន្ទឹមនឹងនេះ ក្រសួងប្រៃសណីយ៍ និងទូរគមនាគមន៍ត្រូវបំពាក់ឱ្យមានប្រព័ន្ធ Free WiFi នៅតាមគោលដៅទេសចរណ៍នីមួយៗ ពិសេសនៅរាជធានីភ្នំពេញ ខេត្តសៀមរាប ខេត្តព្រះសីហនុ ខេត្តបាត់ដំបងត្រូវដំឡើងឱ្យបានមុនឆ្នាំ2023។ ចំណុចនេះ ខ្ញុំក៏សូមទាក់ទាញឱ្យមានការយកចិត្តទុកដាក់ ព្រោះស្ថានភាពដែលយើងបានធ្វើនៅទីក្រុងភ្នំពេញប៉ុន្មានកន្លែងនេះហាក់ដូចជាមិនទាន់មានប្រសិទ្ធភាពនៅឡើយទេ”។

លោក ហូ វណ្ឌី អគ្គលេខាធិការសមាគមសម្ព័ន្ធទេសចរណ៍ជាតិកម្ពុជាបានស្វាគមន៍ចំពោះគម្រោងទាក់ទងនឹងការដំឡើងប្រព័ន្ធអុីនធើណិតគ្មានខ្សែ(WiFi) នៅតាមបណ្ដាតំបន់ទេសចរណ៍ទូទាំងប្រទេសនេះ។ លោកបានលើកឡើងថា គម្រោងនេះត្រូវបានរដ្ឋាភិបាលគិតគូរប្រមាណ 5ឆ្នាំមកហើយ។ លោក វណ្ឌី សង្ឃឹមថា ប្រព័ន្ធអុីនធើណិតគ្មានខ្សែ (WiFi) នៅតាមបណ្ដាតំបន់ទេសចរណ៍នេះនឹងផ្តល់ភាពងាយស្រួលដល់អ្នកទេសចរជាតិ និងអន្តរជាតិដើម្បីស្វែងរកទីតំបន់ទេសចរណ៍នានា ស្វែងរកកន្លែងសម្រាក និងប្រើប្រាស់សម្រាប់មធ្យោយបាយផ្សេងៗទៀត។

លោក វណ្ឌី បានបន្តថា៖“ប្រព័ន្ធអុីនធើណិតគ្មានខ្សែ WiFi នេះ នៅតាមបណ្ដាតំបន់ទេសចរណ៍ទូទាំងប្រទេសនឹងទាក់ទាញទេសចរឱ្យស្នាក់នៅកម្ពុជាកាន់តែយូរថ្ងៃឡើង ដោយសារតែគេចូលចិត្តសេវាកម្មជាច្រើនដែលយើងបានផ្តល់ជូនគេ”។

ដោយឡែកកាលពីពេលថ្មីៗនេះដែរ ក្រសួងប្រៃសណីយ៍ និងទូរគមនាគមន៍បានសម្របសម្រួលរៀបចំដំឡើងប្រព័ន្ធអុីនធើណិតគ្មានខ្សែ WiFi (5G)នៅតំបន់អង្គរផងដែរ ដើម្បីបង្កភាពងាយស្រួលសម្រាប់ការប្រើប្រាស់សេវាអុីនធើណិតដល់ភ្ញៀវទេសចរ និងបម្រើសេវាសាធារណ:ផ្សេងៗទៀត សំដៅលើកកម្ពស់សុខុមាលភាព និងកម្រិតជីវភាពរបស់ប្រជាពលរដ្ឋ។

គួរបញ្ជាក់ថា កាលពីខែឧសភា ឆ្នាំ2018 ក្រសួងប្រៃសណីយ៍ និងទូរគមនាគមន៍បានសហការជាមួយសាជីវកម្មទូរគមនាគមន៍កូរ៉េដាក់ឱ្យដំណើរការប្រព័ន្ធ WiFi នៅតាមទីសាធារណៈ នៅសួនច្បារសម្តេចហ៊ុនសែន និងនៅតាមសាលារៀនមួយចំនួន ដូចជានៅខេត្តកំពង់ឆ្នាំង និងកំពង់ស្ពឺ។ល។ ប្រព័ន្ធ WiFi សាធារណៈនេះត្រូវបានផ្តត់ផ្គង់ដោយទូរគមនាគមន៍កម្ពុជា។

ប្រព័ន្ធនេះ ដំបូងបានដាក់ឱ្យប្រើប្រាស់នៅបរិវេណសួនច្បារសម្តេចហ៊ុនសែន ហើយក្រសួងនឹងពិចារណាលើទីតាំងផ្សេងៗទៀត ដូចជានៅវត្តភ្នំ សួនច្បារមុខទីស្តីការគណៈរដ្ឋមន្ត្រី និងសួនច្បារវត្តបទុម ព្រមជាមួយៗសួនច្បារនៅតាមបណ្តាខេត្តនានាផងដែរ។

បើយោងតាមរបាយការណ៍របស់ក្រសួងទេសចរណ៍ ក្នុងឆ្នាំ2018 វិសយទេសចរណ៍រកចំណូលបានប្រមាណ 4.3ប៊ីលានដុល្លារអាមេរិក កើនប្រមាណជា 20ភាគរយ។ ដោយឡែក ចំនួនភ្ញៀវទេសចរមកទស្សនាកម្ពុជាមានប្រមាណ 6.2លាននាក់កាលពីឆ្នាំមុន ដែលកើនឡើង 10.7ភាគរយ។

កម្ពុជារំពឹងថា នឹងស្វាគមន៍ភ្ញៀវទេសចរអន្តរជាតិចំនួន 6.7លាននាក់ក្នុងឆ្នាំ2019 នេះ ហើយនៅឆ្នាំ2020កម្ពុជារំពឹងថា នឹងទាក់ទាញភ្ញៀវទេសចរបរទេសបានប្រមាណ 7លាននាក់ និងបង្កើតប្រាក់ចំណូលជាង 5ប៊ីលានដុល្លារអាមេរិក និងបង្កើតការងារបានប្រមាណជា 1លាននាក់៕

March 7, 2019

Author: ធឿន មករា