ធឿន មករា - La Reine Media

ដាំដំណាំត្រប់ស្រួយ ចំណេញពេលវេលា និងមានតម្រូវការរាល់ថ្ងៃលើទីផ្សារ

រយៈពេលកន្លងមក នៅលើទីផ្សារគេឃើញមានលក់បន្លែ និងផ្លែឈើនាំចូលពីប្រទេសជិតខាងដែលមិនច្បាស់ថាមានប្រើសារធាតុគី ឬអត់នោះទេ តែនាពេលបច្ចុប្បន្ននេះគេឃើញមានលក់កសិផលក្នុងស្រុកដែលប្រជាកសិករយើងមានការយល់ដឹងច្រើនជាងមុន និងមិនប្រើជាតិគីមីច្រើនដូចមុនទៀតឡើយ ដែលរួមមានបន្លែប្រភេទហូបស្លឹកដូចជា ស្ពៃ សាលាដ ខាត់ណា ស្ពៃក្តោប ស្ពៃចង្កឹះ-ល- បន្លែប្រភេទឡើងទ្រើង ដូចជា ត្រឡាច ននោង ត្រសក់ ម្រះ និងបន្លែប្រភេទផ្លែ មាន ប៉េងប៉ោះ ត្រប់ ម្ទេស ជាដើម ពិសេសដំណាំត្រប់ស្រួយដែលកំពុងមានតម្រូវការទីផ្សារគួរឱ្យកត់សម្គាល់។

លោក ស៊ុន សុខខេង ជាប្រធានសហគមន៍ដាំបន្លែចម្រុះដ៏ធំមួយនៅក្នុងស្រុកចំការលើបានប្រាប់កាសែតឡារ៉ែនពាណិជ្ជឱ្យដឹងថា សហគមន៍លោកមានការដាំបន្លែគ្រប់ប្រភេទ មានដូចជា ស្ពៃ ត្រសក់ ឆៃថាវ ម្ទេសគ្រប់ប្រភេទ និងជាពិសេសគឺ ដំណាំត្រប់ស្រួយនេះតែម្តង ព្រោះវាមានតម្រូវការច្រើននៅលើទីផ្សារ និងការដាំមានរយៈពេលខ្លី ឆាប់បានទទួលផលច្រើន និងចំណេញពេលវេលាទៀតផង។

លោកបានបន្តថា ការដាំត្រប់ស្រួយនេះ គឺប្រើរយៈពេលត្រឹមតែ 2ខែកន្លះប៉ុណ្ណោះ ទាំងសាបព្រោះយកកូន និងដាក់ដាំ។ ការព្រោះគ្រាប់ពូជត្រប់ស្រួយ ត្រូវបានប្រជាកសិករយើងជ្រើសរើសយកគ្រាប់ពូជណាដែលសុទ្ធល្អ ដើម្បីកុំឱ្យមានការក្លាយខូចរូបរាងដើមរបស់វា ដោយយកគ្រាប់ដែលជ្រើសរើសរួចមកដាក់ត្រាំទឹករយៈពេល 2ម៉ោង ហើយចងវេចខ្ចប់យកមកត្រាំផ្អាប់ក្នុងទឹកត្រជាក់ ឬទឹកកករយៈពេល3 ទៅ 4ថ្ងៃបន្តទៀតដែលជាការសាកល្បងដើម្បីការពារខ្លាចក្រែងវាពុំដុះ និងត្រូវរង់ចាំរហូតដល់គ្រាប់វាដុះពន្លកឡើងខ្លះៗជាមុនសិន ទើបអាចយកទៅដាក់ដាំបាន។

វិធីដាំដុះតាមបច្ចេកទេស គឺត្រូវធ្វើដីឱ្យល្អ រួចឆូតជារងទាបៗមានទទឹងជាងកន្លះម៉ែត្រ គ្របសំពត់កៅស៊ូដែលចោះប្រហោង រួចយកកូនត្រប់ស្រួយមកដាក់ដាំឃ្លាតពីគ្នាប្រវែង 1ម៉ែត្រ ហើយត្រូវស្រោចទឹក និងដាក់ជីអាចម៍គោតិចៗពីលើ។

រដូវដាំត្រប់ស្រួយ គឺគេច្រើនដាំចាប់ពីខែឧសភា ដល់ខែធ្នូ ដោយពេញ1រដូវដែលជាអាយុកាលរបស់វា នៅក្នុងផ្ទៃដីទំហំ 20×50ម៉ែត្រ គេអាចប្រមូលផលផ្លែត្រប់ស្រួយបានប្រមាណពី 20គីឡូឡើងទៅដល់ 90គីឡូរៀងរាល់ 2ថ្ងៃម្ដង ឬ1អាទិត្យ 3ដង ហើយបរិមាណនេះអាចនឹងថយចុះមកវិញ នៅពេលដែលដើមវាចាស់។

ចំណែកកសិករដែលដាំត្រប់ស្រួយនៅក្នុងសហគមន៍បានឱ្យដឹងថា មន្ត្រីកសិកម្មបានជួយណែនាំពីបច្ចេកទេសក្នុងការដាំឱ្យទទួលបានផលល្អ និងមិនសូវនឿយហត់ ហើយដំណាំត្រប់ស្រួយនេះបានជួយធ្វើឱ្យជីវភាពរបស់ពួកគាត់បានធូរធារឡើងគួរសម។

លោក សុខខេង ប្រធានសហគមន៍ខាងលើបានឱ្យដឹងថា៖ “សហគមន៍កសិករក្នុងស្រុកចំការលើរបស់លោក ភាគច្រើនដែលមានដីចម្ការទំហំតូចៗត្រឹមតែ10-20អា បានរួមគ្នាដាំត្រប់ស្រួយ ដែលសរុបទៅបានប្រហែល 2ហិកតាដែរនៅក្នុងមូលដ្ឋានរបស់លោក”។

លោកបញ្ជាក់ថា៖“បើដាំដុះ និងថែទាំបានល្អក្នុងទំហំដី 2ហិកតានេះ គឺក្នុង1ថ្ងៃយើងអាចទទួលផលបានពី 300-400គីឡូក្រាមដែរ ពោលគឺក្នុង1ខែយើងមានចំណូលពីការលក់បន្លែត្រប់ស្រួយនេះក្នុងទឹកប្រាក់ប្រមាណ 7 ទៅ 8លានរៀលដែរ ដោយលក់បានក្នុង1គីឡូក្រាមតម្លៃពី1000ទៅ1,200រៀល ហើយមានឈ្មួញមកម៉ៅទិញដល់ទីតាំងតែម្តង ហើយដំណាំត្រប់ស្រួយនេះ យើងអាចប្រមូលផលបានជាប់រហូតដល់ 3ខែ”។

លោក សុខខេង បានអំពាវនាវឱ្យប្រជាកសិករខ្មែរយើងងាកមកដាំបន្លែត្រប់ស្រួយនេះវិញ ព្រោះវាទទួលបានផលល្អប្រសើរ និងជាប្រភេទបន្លែសម្រាប់ធ្វើជាម្ហូបអាហារបានច្រើនយ៉ាង និងធ្វើជាអន្លក់ក៏បានដែរ ហើយជាប្រភេទបន្លែដែលមានតម្រូវការខ្ពស់ក្នុងទីផ្សារ។

ម្យ៉ាងទៀតដើម្បីរក្សាស្ថិរភាពតម្លៃ និងបរិមាណផ្គត់ផ្គង់ សហគមន៍លោកត្រូវបានអគ្គនាយកដ្ឋានកសិកម្ម និងមន្ទីរកសិកម្ម រុក្ខាប្រមាញ់ និងនេសាទ ចុះមកជួយរៀបចំជាសហគមន៍ផលិតបន្លែ និងបានចុះកិច្ចសន្យាជាមួយដៃគូវិស័យឯកជនប្រមូលទិញកសិផលក្នុងតម្លៃសមរម្យ និងខាងក្រសួងបានចុះមកវាយតម្លៃលើស្តង់ដាផលិតផលដើម្បីផ្តល់វិញ្ញាបនបត្រ GAP ដល់សហគមន៍របស់លោកដើម្បីធានាពីភាពត្រឹមត្រូវខាងគុណភាព និងសុវត្ថិភាព ដើម្បីបង្កើនការជឿទុកចិត្តដល់អ្នកបរិភោគ។

ចំពោះមហិច្ឆតាក្នុងការធ្វើចម្ការដំណាំបន្លែធម្មជាតិនេះ លោក សុខខេង បានបញ្ជាក់ឱ្យដឹងដែរថា៖“សហគមន៍របស់លោកនឹងធ្វើពង្រីកការដាំដុះបន្លែត្រប់ស្រួយបន្ថែមទៀត ដោយនឹងពង្រីកផ្ទៃដីប្រមាណជា 2ហិកតាថែមទៀតក្នុងរយៈពេលដ៏ខ្លីខាងមុខ ព្រោះដំណាំនេះផ្តល់ផលលឿន និងបានកម្រៃអាចទទួលយកបាន”។

យោងតាមឯកសារកសិកម្មត្រប់ស្រួយជាដំណាំបន្លែមួយប្រភេទដែលប្រជាជនខ្មែរភាគច្រើន ស្គាល់ និងចូលចិត្តបរិភោគ តែមានមនុស្សតិចណាស់ដែលស្គាល់ពីគុណប្រយោជន៍របស់វា។ ត្រប់ស្រួយមានគុណប្រយោជន៍ អាចជួយកាត់បន្ថយជាតិស្ករក្នុងសរសៃឈាម ព្រោះត្រប់ប្រភេទនេះ បញ្ចេញប្រសិទ្ធភាពស្រដៀងៗ និង Insulin ដែលធ្វើឱ្យលំពែង អាចគ្រប់គ្រងជាតិស្ករ ក្នុងរាងកាយ ឱ្យស្ថិតក្នុងកម្រិតសមល្មមបាន ហើយថែមទាំងជួយកាត់បន្ថយជំងឺខាងប្រព័ន្ធរំលាយអាហារ និងការបន្ទោបង់ផងដែរ ជាងនេះទៅទៀតត្រប់ស្រួយអាចជួយកាត់បន្ថយការច្របាច់សាច់ដុំ ទប់ស្កាត់មហារីក ថែបំប៉នបេះដូង និងជួយដល់ការធ្វើការងាររបស់សរសៃឈាមទៀតផង។ នៅក្នុងត្រប់ស្រួយទម្ងន់100ក្រាម មានថាមពល 39កាឡូរី ប្រូតេអុីន 1.6ក្រាម ខ្លាញ់ 0.5ក្រាម កាបូន-អុីដ្រាត 7.1ក្រាម កាល់ស្យូម 7មិល្លីក្រាម ផូស្វ័រ 10មិល្លីក្រាម ជាតិដែក 0.8មិល្លីក្រាម ទឹក 90.0ក្រាម និងវីតាមីនC 24ក្រាម៕

March 30, 2019

ចាប់ព្រះច័ន្ទពីប៉ារីសមកភ្នំពេញក្នុងកម្មវិធី VIP Moon Night ជាមួយ Huawei P30 សេរ៊ី!

ភ្នំពេញ ថ្ងៃទី 30 មីនា ឆ្នាំ 2019 ៖ ក្រុមហ៊ុន Huawei បានហ្សូមចាប់ព្រះច័ន្ទពីទីក្រុងប៉ារីសមកទីក្រុងភ្នំពេញ ក្នុងកម្មវិធី VIP Moon Night សម្ពោធកំពូលស្មាតហ្វូន P30 សេរ៊ី កាមេរ៉ាបួនគ្រាប់របស់ Leica ដំបូងគេបំផុតលើពិភពលោកជាផ្លូវការនៅប្រទេសកម្ពុជា ដោយមានការចូលរួមពីតំណាងចែកចាយមកពីទូទាំងប្រទេស ដៃគូអាជីវកម្ម និងបណ្តាសារព័ត៌មានយ៉ាងច្រើនកុះករ កាលពីម្សិលមិញនៅសណ្ឋាគារ Sofitel។

កំពូលស្មាតហ្វូន P30 សេរ៊ី មានសមត្ថភាពខ្លាំងអស្ចារ្យ ក្នុងការថតរូប ដែលបំពាក់ដោយឡែន SuperZoom អាចហ្សូមបែប Optical បាន 5ដង ហ្សូមបែប Hybrid បាន 10ដង និងជាពិសេស ហ្សូមបែប Digital បានរហូតដល់ 50ដង ហ្សូមបានដល់ឋានព្រះច័ន្ទដូចឃើញច្បាស់ផ្ទាល់និងភ្នែក! តិចថាអត់កប់ម៉ាមាត់ទៅ! ដូច្នេះហើយ បានជាកម្មវិធីសម្ពោធជាផ្លូវការនេះ មានឈ្មោះថា VIP Moon Night។ មិនតែប៉ុណ្ណោះ ស៊ូភើកាមេរ៉ា Leica 4 គ្រាប់ ខាងក្រោយគឺមានទំហំ 40MP ដែលបំពាក់ Super Spectrum Senor កាមេរ៉ាទំហំ 20MP ថតប្លង់ផ្តេកទ្រវែងបានកាន់តែទូលាយបែប Ultra-Wide Angle កាមេរ៉ា Telephoto ទំហំ 8MP និងកាមេរ៉ា Huawei TOF។

លើសពីនេះទៅទៀត កំពូលស្មាតហ្វូន P30 សេរ៊ី អាចផ្តិតយករូបភាពច្បាស់គ្មានគូប្រៀបដូចឃើញផ្ទាល់និងភ្នែកនៅពេលយប់ ដោយកម្រិត ISO ខ្ពស់សូម្បីតែក្នុងទីងងឹត មិនសូវមានពន្លឺ ជាមួយស៊ូភើកាមេរ៉ាបច្ចេកវិទ្យា Super Sensing Leica បួនគ្រាប់ ផ្តិតយករូបភាពកាន់តែដិតច្បាស់ យកផ្ទៃក្រោយព្រាល ពន្លឺភ្លើង Bokeh ដែលជាស្រមោល ភ្លើងជាប់គ្នា ឫច្បាស់កន្លែងណាមួយក៏បានជាមួយកាមេរ៉ា TOF ចាប់ប្លង់វីឌីអូពីរប្លង់ថតនៅលើអេក្រង់តែមួយដំណាលគ្នាអាចឲ្យអ្នកឃើញប្លង់បានពីចំងាយនិងមើលកៀក។ អស់ទាស់ហ្មង់! P30 Pro ទំលាក់កំពូលស្មាតហ្វូនដទៃ ដោយទទួលបានតំណែងជើងឯកកំពូល ក្នុងតារាង DxOMark ដោយទទួលបាន 112 ពិន្ទុ លើការហ្សូមនិងការថតបែប Bokeh។

កាន់តែរំជើបរំជួល និងភ្ញាក់ផ្អើល ក្រុមហ៊ុនក៏បានប្រកាសស្វាគមន៍ឯកអគ្គរដ្ឋទូតថ្មីពីររូបជាផ្លូវការ គឺម្ចាស់បទ កាម៉ាប់ៗកំពូលតារាចម្រៀងល្បីដ៏មានប្រជាប្រិយភាពបំផុតនៅប្រទេសកម្ពុជា អ្នកនាង ឱក សុគន្ធកញ្ញា និងកំពូលតារាចម្រៀងប្រុសដ៏ល្បីឈ្មោះ គឺលោក នីកូ ក្នុងកម្មវិធីសម្ពោធកំពូលស្មាតហ្វូន P30 សេរ៊ី។ ឯកអគ្គរដ្ឋទូតថ្មីទាំងពីររូប ពិតជាសាកសមបំផុតសម្រាប់ Huawei ដោយសារតែក្រុមហ៊ុន Huawei ជាក្រុមហ៊ុនស្មាតហ្វូនលំដាប់លេខពីរ និងជាម៉ាកដែលមានទទួលការទុកចិត្តខ្ពស់ពីអតិថិជន កេរ្តិ៍ឈ្មោះល្បីល្បាញជុំវិញពិភពលោក ព្រមទាំងមានបច្ចេកវិទ្យានិងផលិតផលឈានមុខគេបង្អស់។

លោក Henry Hsiao នាយកគ្រប់គ្រងប្រចាំប្រទេសរបស់ក្រុមហ៊ុន Huawei ប្រចាំនៅប្រទេសកម្ពុជាបានលើកឡើងថា យើងតែងតែផ្តោតសំខាន់លើការបង្កើតថ្មី និងបច្ចេកវិទ្យាឈានមុខគេបំផុត ចំពោះផលិតផលរបស់យើង ហើយការសម្ពោធកំពូលស្មាតហ្វូន P30 សេរ៊ីនេះ គឺជារបកគំហើញថ្មីនៃស៊ូភើកាមេរ៉ា សមត្ថភាពខ្លាំងអស្ចារ្យ លើសពីកំពូលស្មាតហ្វូនធម្មតានៅក្នុងទីផ្សារស្មាតហ្វូន។ ខ្ញុំពិតជាសប្បាយរីករាយយ៉ាងខ្លាំង ដែលកំពូលតារាចម្រៀងល្បីឈ្មោះប្រចាំ ប្រទេសកម្ពុជា កញ្ញា ឱក សុគន្ធកញ្ញា និង លោក នីកូ ក្លាយជាសមាជិកនៃក្រុមគ្រួសាររបស់ក្រុមហ៊ុន Huawei នៅប្រទេសកម្ពុជា! ស្វាគមន៍អ្នកទាំងពីរជា ឯកអគ្គរដ្ឋទូតរបស់ Huawei។

អ្នកនាង ឱក សុគន្ធកញ្ញា បានលើកឡើងក្នុងវីឌីអូរបស់កញ្ញាថា “ នាងខ្ញុំពិតជាមានកិត្តិយស និងរំភើបយ៉ាងខ្លាំងដែលក្លាយជាសមាជិករបស់ក្រុមហ៊ុន Huawei ជាឯកអគ្គរដ្ឋទូត។ ហ្សូមដល់ឋានព្រះច័ន្ទ ជាមួយកំពូលស្មាតហ្វូន Huawei P30 សេរ៊ី។”

លោក នីកូ ក៏បានលើកឡើងថា “ នេះជាលើកដំបូងហើយដែលខ្ញុំបានក្លាយជាឯកអគ្គរដ្ឋទូត សម្រាប់ម៉ាករបស់ក្រុមហ៊ុនស្មាតហ្វូន។ ខ្ញុំសម្រេចចិត្តជ្រើសរើសក្រុមហ៊ុន Huawei ដោយសារ Huawei ជាម៉ាកដ៏ល្បីដែលមានការទទួលស្គាល់ចំពោះផលិតផលដែលមានគុណភាពខ្ពស់ និងតែងតែមានបច្ចេកវិទ្យាថ្មីៗ ហើយខ្ញុំពិតជាស្រលាញ់កំពូលស្មាតហ្វូន P30 សេរ៊ី ខ្លាំងណាស់ជាពិសេសស៊ូភើកាមេរ៉ានេះតែម្តង។”

ការរង់ចាំត្រូវបានបញ្ចប់។ ក្រុមហ៊ុនក៏បានប្រកាសពីការកុម្ម៉ង់ទិញទុកមុនសម្រាប់ កំពូលស្មាតហ្វូន P30 Pro មានតម្លៃ $899ថែមទាំងទទួលបាន Wireless Charger និងនាឡិកាកាលីបសុខភាព រីឯកំពូលស្មាតហ្វូន P30 តម្លៃ $699 ថែម Body Fat Scale និងនាឡិកាកាលីបសុខភាព ដោយអតិថិជនអាចទទួលយកកំពូលស្មាតហ្វូននេះពីបណ្តាហាងដែលបានកុម្ម៉ងទុកចាប់ពីថ្ងៃ 05-07 មេសា 2019។ មិនតែប៉ុណ្ណោះ សម្រាប់មួយម៉ូដែលទៀតដែលកំពុងតែទទួលបានការគាំទ្រយ៉ាងគំហុក កំពូលស្មាតហ្វូន P30 Lite តម្លៃត្រឹមតែ $339 ថែម Bluetooth speaker និង ស៊ីមស្មាតលេខពិសេស គម្រោងស្មាតធំហ្មង់ និងព្រមទាំងមានឱកាសឈ្នះរថយន្ត Mazda 2 ផងដែរ។

March 30, 2019

ជំនួបកូរ៉េខាងត្បូង-កម្ពុជា ជំរុញការបើកទីផ្សារ ទិញផលិតផលកម្ពុជា និងផ្តល់កម្ចី 700លានដុល្លារ

រដ្ឋាភិបាលសាធារណរដ្ឋកូរ៉េបានផ្ដល់ហិរញ្ញប្បទានប្រមាណ 632លានដុល្លារដល់កម្ពុជា បើគិតពីឆ្នាំ1996 មកដល់ឆ្នាំ2018 គឺចាប់ពីពេលដែលសម្តេចនាយករដ្ឋមន្ត្រីបានធ្វើទស្សនកិច្ចនៅកូរ៉េខាងត្បូង នាខែកក្កដា ឆ្នាំ1996 និងបានសម្រេចឱ្យមានការចាប់ផ្ដើមឡើងវិញនូវទំនាក់ទំនងការទូតរវាងប្រទេសទាំង2 ជាមិត្តភាព និងកិច្ចសហប្រតិបត្តិការទ្វេភាគី។ ក្នុងនោះហិរញ្ញប្បទានឥតសំណងមានប្រមាណជា 300លានដុល្លារ។ នេះបើតាមការថ្លែងរបស់សម្តេចនាយករដ្ឋមន្ត្រី ហ៊ុន សែន ក្នុងវេទិកាធុរកិច្ចកម្ពុជា-កូរ៉េខាងត្បូង។

នៅក្នុងជំនួបធុរកិច្ចកម្ពុជា-កូរ៉េខាងត្បូង នាយករដ្ឋមន្ត្រីកម្ពុជាក៏បានអះអាងដែរថា៖“ សាធារណរដ្ឋកូរ៉េបានផ្តល់កម្ចីបន្ថែមទៀតចំនួន 700លានដុល្លារដោយផ្ដោតលើហេដ្ឋារចនាសម្ព័ន្ធវិស័យធនធានទឹក និងសុខុមាលភាពសាធារណៈ វិស័យអប់រំ និងបណ្ដុះបណ្ដាលធនធានមនុស្ស និងវិស័យអភិវឌ្ឍន៍ជនបទ មានជាអាទិ៍ គម្រោងបង្កើតមជ្ឈមណ្ឌលបណ្តុះបណ្តាលអាកាសចរណ៍ស៊ីវិល គម្រោងស្ដារផ្លូវជាតិលេខ2 និងផ្លូវជាតិលេខ22 ជាដើម”។

ថវិកាចំនួន 700លានដុល្លារនេះ សម្រាប់គម្រោងឆ្នាំ2019 ដល់ឆ្នាំ2023 ដោយបានធ្វើឡើង លើកិច្ចព្រមព្រៀងផ្តល់ឥណទានសម្បទាននៅក្នុងដំណើរទស្សនកិច្ចរបស់ប្រធានាធិបតីសាធារណរដ្ឋកូរ៉េ លោក មូន ជេអុីន (Moon Jae-in) មកកាន់កម្ពុជា។ ក្នុងវេទិកានេះដែរ ប្រមុខរាជរដ្ឋាភិបាលបានអំពាវនាវឱ្យវិស័យឯកជន និងអ្នកវិនិយោគកូរ៉េដែលមិនទាន់បានមកកម្ពុជា សូមអញ្ជើញមកសិក្សាស្វែងយល់អំពីសក្តានុពល និងកាលានុវត្តភាពវិនិយោគនៅកម្ពុជា ព្រមទាំងសម្រេចចិត្តបណ្ដាក់ទុនវិនិយោគ ដើម្បីចូលរួមអភិវឌ្ឍប្រទេសកម្ពុជា នឹងទាញយកផលប្រយោជន៍ជាអតិបរមា។

សម្តេចតេជោ ហ៊ុន សែន បានមានប្រសាសន៍បញ្ជាក់ថា ការចរចាផ្លូវការ និងធ្វើវេទិកាធុរកិច្ចរួមគ្នារវាងកម្ពុជា និងលោកប្រធានាធិបតីកូរ៉េខាងត្បូង Moon Jae-in ដោយការជជែកពិភាក្សានេះ គឺ“យើងនឹងខិតខំបើកទីផ្សារ ហើយយើងនឹងស្នើឱ្យកូរ៉េជួយទិញផលិតផលរបស់កម្ពុជាបន្ថែមទៀត”។

យោងរបាយការណ៍នៃការនាំចេញ-នាំចូលរបស់កម្ពុជាដោយក្រសួងពាណិជ្ជកម្ម បានបង្ហាញថា នៅឆ្នាំ2018 ទំហំពាណិជ្ជកម្មកម្ពុជាជាមួយបរទេសមានចំនួនសរុប 24,985លានដុល្លារអាមេរិក។ ដែលក្នុងនោះ នៅឆ្នាំ2018 ការនាំចេញរបស់កម្ពុជាមានការកើនឡើងចំនួន10% ដែលកំណើននេះទទួលបានពីការកើនឡើងនៃវិស័យកាត់ដេរ និងការនាំចេញផលិតផលកសិកម្ម និងឧស្សាហកម្ម តាមរយៈការខិតខំបើកច្រកទីផ្សារ នាំចេញទៅកាន់ជាង 147ប្រទេសនៅទូទាំងពិភពលោក ។

សារព័ត៌មានរបស់កូរ៉េ Yonhap News Agency កាលពីដើមឆ្នាំ2019 នេះបានបញ្ជាក់ថា យោងតាមទិន្នន័យចងក្រងដោយធនាគារនីហរ័ណអាហរ័ណរបស់កូរ៉េបានឱ្យដឹងថា មានក្រុមហ៊ុនកូរ៉េខាងត្បូងជាង 900ក្រុមហ៊ុនកំពុងដំណើរការនៅក្នុងប្រទេសកម្ពុជា ហើយការវិនិយោគរួមរបស់ពួកគេចាប់តាំងពីឆ្នាំ1968 រហូតដល់ខែកញ្ញា ឆ្នាំ2018 បានឈានដល់ 2.67ពាន់លានដុល្លារ។ បើតាមសមាគមពាណិជ្ជកម្មអន្តរជាតិរបស់កូរ៉េបានឱ្យដឹងថា ទំហំពាណិជ្ជកម្មរវាងប្រទេសទាំង2 គឺមាន ចំនួន 890លានដុល្លារក្នុងឆ្នាំ2018 ធៀបនឹង 750លានដុល្លារក្នុងឆ្នាំ2013។

ប្រធានាធិបតីកូរ៉េខាងត្បូងលោក Moon Jae-in បានធ្វើទស្សនកិច្ចផ្លូវរដ្ឋមកកាន់ប្រទេសកម្ពុជាចាប់ពីថ្ងៃទី14-16មីនា លទ្ធផលជាក់ស្តែងពីកិច្ចសហប្រតិបត្តិការកំពុងលេចចេញរូបរាងឡើងរវាងកូរ៉េ និងអាស៊ាន ជាក់ស្តែងចំនួនភ្ញៀវទេសចរ ដែលធ្វើដំណើររវាងប្រទេសអាស៊ាន និងកូរ៉េបានកើនលើស 10លាននាក់ ជាលើកដំបូងកាលពីឆ្នាំ2018។

ឧកញ៉ា លឹម ហេង អនុប្រធានសភាពាណិជ្ជកម្មកម្ពុជាបានមានប្រសាសន៍ប្រាប់ឡារ៉ែនពាណិជ្ជឱ្យដឹងតាមទូរស័ព្ទថា៖ “តាមរយៈវេទិកាធុរកិច្ចកម្ពុជាកូរ៉េនេះ អ្នកវិនិយោគកូរ៉េនឹងមកវិនិយោគនៅកម្ពុជាកាន់តែច្រើន។ មានចំណុចវិជ្ជមានជាច្រើន ដែលកូរ៉េកំពុងសហប្រតិបត្តិការជាយុទ្ធសាស្ត្រយូរអង្វែងតាមរយៈការតភ្ជាប់ ការផ្លាស់ប្តូរហិរញ្ញវត្ថុ ការផ្លាស់ប្តូរផ្នែកព័ត៌មានវិទ្យា ការជួយបណ្តុះបណ្តាលធនធានមនុស្ស និងការជំរុញការធ្វើពាណិជ្ជកម្មទៅវិញទៅមក ព្រោះថា ការមកវិនិយោគនៅកម្ពុជា ប្រទេសកូរ៉េបានផ្អែកលើសក្តានុពល និងធនធានកម្ពុជាដែលមានស្រាប់ ដែលកម្ពុជាមិនទាន់ទាញយកសក្តានុពលមកប្រើប្រាស់អស់នៅឡើយ”។

លោកឧកញ៉ាបានបន្តថា៖“នៅកម្ពុជាមានចិន និងជប៉ុនកំពុងវិនិយោគច្រើននៅកម្ពុជា ហេតុនេះគាត់(កូរ៉េ)មិនអាចនៅស្ងៀមបានទេ គាត់នឹងមកវិនិយោគនៅកម្ពុជា។ ដូចយើងបានឃើញស្រាប់ហើយ រដ្ឋាភិបាលបានចុះកិច្ចព្រមព្រៀងជាមួយប្រធានាធិបតីកូរ៉េច្រើន និងមានផ្តល់សម្បទានជាច្រើនទៀតផង”។

លោកឧកញ៉ាបានបន្តថា៖ “កម្ពុជាមានសក្តានុពលជាច្រើនដូចជា ទី1ផ្នែកទេសចរណ៍ យើងមានតំបន់ឆ្នេរ និងប្រាសាទអង្គរវត្តដ៏ល្បីល្បាញ ទី2ផលិតផលកសិកម្ម ដែលអ្នកវិនិយោគកូរ៉េអាចបង្កើតរោងចក្រកែច្នៃដើម្បីនាំចេញបាន ទី3 យើងមានធនធានរ៉ែច្រើនដែលមិនទាន់កែច្នៃដែលអាចទាក់ទាញអ្នកវិនិយោគកូរ៉េចូលមកវិនិយោគបាន និងទី4 កូរ៉េកំពុងមានទិសដៅឆ្ពោះមកកាន់តំបន់អាស៊ាន ព្រោះអាស៊ានមានទីផ្សារធំណាស់ ដែលកូរ៉េក៏ជាសមាជិកអាស៊ានបូកផងដែរ”។

លោកឧកញ៉ាបានមានប្រសាសន៍បន្តថា ចំណែកវិស័យឯកជន ក៏យើងបានទទួលវិនិយោគិនដែលមានក្រុមហ៊ុនធំៗដែលគាត់អមដំណើរមកជាមួយដែរ ដើម្បីសែ្វងយល់ពីសក្តានុពលនៃការវិនិយោគនៅកម្ពុជា។ ខាងសភាពាណិជ្ជកម្មយើងក៏នឹងទទួលបានការផ្លាស់ប្តូរពាណិជ្ជកម្ម ព្រោះជាយុទ្ធសាស្ត្ររបស់កូរ៉េ សំដៅមកភាគខាងត្បូង គឺមកប្រទេសអាស៊ាន ហើយកូរ៉េស្ថិតនៅជាសមាជិកអាស៊ានបូកដែរ ដូច្នេះកូរ៉េគាត់មានលទ្ធភាពបណ្តាក់ទុននៅក្នុងបណ្តាប្រទេសអាស៊ានយើង។

លោកឧកញ៉ា លឹម ហេង បានបញ្ជាក់ទៀតថា៖“ហេតុនេះ យើងសង្ឃឹមថា ក្រោយវេទិកាធុរកិច្ចនេះគាត់នឹងបន្ថែមអ្នកវិនិយោគថែមទៀត ព្រោះប្រទេសកូរ៉េជាប្រទេសសេដ្ឋកិច្ចជឿនលឿនមួយដែរនៅតំបន់អាស៊ីយើងនេះ គាត់មានអ្នកវិនិយោគច្រើនលំដាប់ទី2 នៅកម្ពុជា”។

សូមបញ្ជាក់ថា ទំហំពាណិជ្ជកម្មទ្វេភាគីរវាងកូរ៉េខាងត្បូង និងអាស៊ានក៏បានកើនឡើងដល់160ពាន់លានដុល្លារផងដែរ។ រដ្ឋាភិបាលកូរ៉េចង់បង្កើនទំហំពាណិជ្ជកម្មនេះឱ្យបានដល់ 200ពាន់លានដុល្លារនៅត្រឹមឆ្នាំ2020 ព្រោះតំបន់អាស៊ាន គឺជាតំបន់យុទ្ធសាស្ត្រ និងភូមិសាស្ត្រនយោបាយដ៏សំខាន់សម្រាប់កូរ៉េខាងត្បូង។ តំបន់នេះជាមជ្ឈមណ្ឌលនៃពាណិជ្ជកម្ម ការវិនិយោគ និងជាតំបន់ឆ្លងកាត់៕

March 30, 2019

កម្ពុជា និងឥណ្ឌា ចុះកិច្ចព្រមព្រៀងលើកកម្ពស់វិស័យទូរគមនាគមន៍ និងព័ត៌មាន

ក្រសួងប្រៃសណីយ៍ និងទូរគមនាគមន៍ នៃព្រះរាជាណាចក្រកម្ពុជា និងក្រសួងគមនាគមន៍ នៃសាធារណរដ្ឋឥណ្ឌា បានចុះហត្ថលេខាលើអនុស្សរណៈនៃការយោគយល់គ្នាស្ដីពី “កិច្ចសហប្រតិបត្តិការក្នុងវិស័យគមនាគមន៍” ព្រមជាមួយនឹងអនុស្សរណៈនៃការយោគយល់គ្នារវាងទូរគមនាគមន៍កម្ពុជា ជាមួយនឹងមជ្ឈមណ្ឌលអភិវឌ្ឍន៍ទូរគមនាគមន៍ (C-DOT)ដែលជាស្ថាប័នស្រាវជ្រាវដ៏ល្បីល្បាញមួយនៅឥណ្ឌា។

អនុស្សរណៈនៃការយោគយល់គ្នារវាងក្រសួងប្រៃសណីយ៍ និងទូរគមនាគមន៍ នៃព្រះរាជាណាចក្រកម្ពុជា ជាមួយក្រសួងគមនាគមន៍ នៃសាធារណរដ្ឋឥណ្ឌា មិនត្រឹមតែផ្តោតលើ “កិច្ចសហប្រតិបត្តិការក្នុងវិស័យគមនាគមន៍” ប៉ុណ្ណោះទេ ប៉ុន្តែវាក៏នឹងចូលរួមបង្កើតនូវភូមិឆ្លាតវៃ ឬ“ភូមិឌីជីថល”នៅក្នុងប្រទេសកម្ពុជាទៀតផង។

ដោយឡែកអនុស្សរណៈនៃការយោគយល់គ្នារវាងទូរគមនាគមន៍កម្ពុជា ជាមួយនឹងមជ្ឈមណ្ឌលអភិវឌ្ឍន៍ទូរគមនាគមន៍ (C-DOT) ដែលជាស្ថាប័នស្រាវជ្រាវល្បីមួយនៅឥណ្ឌា នឹងផ្តោតទៅលើការពង្រាយនូវបច្ចេកវិទ្យាទូរគមនាគមន៍ទំនើប និងការបំពាក់ប្រព័ន្ធអុីនធើណិតគ្មានខ្សែនៅតាមជនបទ។

ពិធីចុះហត្ថលេខានេះត្រូវបានធ្វើឡើងដោយឯកឧត្តមរដ្ឋលេខាធិការ សុខ ពុទ្ធិវុធ តំណាងដ៏ខ្ពង់ខ្ពស់របស់ឯកឧត្តម ត្រាំ អុីវតឹក រដ្ឋមន្ត្រីក្រសួងប្រៃសណីយ៍ និងទូរគមនាគមន៍ និងលោក V. Raghunandan អគ្គនាយក នៃក្រសួងទំនាក់ទំនងអន្តរជាតិរបស់សាធារណរដ្ឋឥណ្ឌា លោក សាន្ត វី អគ្គនាយកទូរគមនាគមន៍កម្ពុជា ព្រមជាមួយលោក Shri Vipin Tyagi នាយកប្រតិបត្តិ C-DOT។

ឯកឧត្តម សុខ ពុទ្ធិវុធ រដ្ឋលេខាធិការក្រសួងប្រៃសណីយ៍ និងទូរគមនាគមន៍បានវាយតម្លៃខ្ពស់អំពីកិច្ចសហប្រតិបត្តិការជាមួយសាធារណរដ្ឋឥណ្ឌានាពេលកន្លងមកលើការបណ្តុះបណ្តាលធនធានមនុស្ស មជ្ឈមណ្ឌលឧត្តមានុវត្តន៍ និងការសិក្សាលើ “ភូមិឌីជីថល។

ឯកឧត្តមរដ្ឋលេខាធិការបានលើកឡើងថា អនុស្សរណៈយោគយល់គ្នាដែលយើងបានចុះហត្ថលេខានៅពេលនេះ គឺជាការបោះជំហានថ្មីមួយទៀតលើកិច្ចសហប្រតិបត្តិការរបស់ប្រទេសយើងទាំង2 លើវិស័យទូរគមនាគមន៍ បន្ថែមលើកិច្ចសហប្រតិបត្តិការដែលយើងមានស្រាប់នាពេលកន្លងមកដើម្បីទាញយកនូវសក្តានុពលនៃការរីកចម្រើនឈានមុខគេមួយលើវិស័យនេះរបស់សាធារណរដ្ឋឥណ្ឌា សម្រាប់ការអភិវឌ្ឍវិស័យទូរគមនាគមន៍នៅព្រះរាជាណាចក្រកម្ពុជា។

ឯកឧត្តម សុខ ពុទ្ធិវុធ បានមានប្រសាសន៍ថា៖“ខ្ញុំមានសុទិដ្ឋនិយមថា កិច្ចសហការនេះ និងជំរុញឱ្យមានគម្រោងជាច្រើនទៀតក្នុងពេលអនាគតរវាងកម្ពុជា និងឥណ្ឌាដើម្បីអភិវឌ្ឍន៍វិស័យព័ត៌មានវិទ្យា និងទូរគមនាគមន៍នៅកម្ពុជា និងឥណ្ឌាដើម្បីលើកកម្ពស់ឱ្យកាន់តែខ្ពស់ និងពង្រឹងនូវសាមគ្គីភាពរវាងប្រជាជាតិទាំង2”។

ឯកឧត្តម សុខ ពុទ្ធិវុធ បន្តថា បន្ទាប់ពីដំណើរទស្សនកិច្ចនៅប្រទេសឥណ្ឌា រួមទាំងការបានចូលរួមក្នូងពិព័រណ៍ទូរគមនាគមន៍ឥណ្ឌា ព្រមទាំងបានធ្វើទស្សនកិច្ចនៅភូមិឌីជីថលនៅរដ្ឋ Karenda និងតំបន់ប្រវត្តិសាស្ត្រ Mewat ក្នុងតំបន់ Haryana នៃរដ្ឋ Rajasthan រួចមក យើងរៀនសូត្របានច្រើនពីប្រជាជាតិអាស៊ីខាងត្បូងមួយនេះទាក់ទងនឹងវិស័យទូរគមនាគមន៍។

ឯកឧត្តម សុខ ពុទ្ធិវុធ ថ្លែងថា៖“យើងពិតជាស្ញប់ស្ញែងជាមួយនឹងវិស័យទូរគមនាគមន៍ឥណ្ឌា ហើយជឿថា វានឹងជួយយើងឱ្យទទួលបានបន្ថែមទៀតនូវសក្តានុពល និងការលើកកម្ពស់ការអភិវឌ្ឍក្នុងវិស័យនេះ ហ្នឹង គឺជាហេតុផលដែលយើងត្រូវចុះហត្ថលេខាជាមួយឥណ្ឌា”។

ឯកឧត្ដមបន្តថា៖“រដ្ឋាភិបាលឥណ្ឌាតាមរយៈក្រសួងទូរគមនាគមន៍របស់គេ នឹងផ្តល់ជំនួយហិរញ្ញវត្ថុប្រមាណជា 10លានដុល្លារអាមេរិកក្នុងការគាំទ្រកម្មវិធីបង្កើតភូមិឌីជីថលនៅកម្ពុជា”។ ឯកឧត្ដមបន្តថា ស្រុកទ្រាំង ខេត្តតាកែវត្រូវបានជ្រើសរើសសម្រាប់គម្រោងនេះ ដែលផ្តោតលើការធ្វើឱ្យប្រសើរឡើងនូវការតភ្ចាប់ឌីជីថលដែលខ្វះខាតនៅទីជនបទ ដូចជាអុីនធើណិត សុខាភិបាលឌីជីថល ការអប់រំតាមអនឡាញ ការធ្វើពាណិជ្ជកម្មតាមអនឡាញ រដ្ឋាភិបាលអេឡិចត្រូនិក និងកសិកម្មអេឡិចត្រូនិក”។

ឯកឧត្ដមបន្តទៀតថា ការជ្រើសរើសខេត្តតាកែវដែលជាទីក្រុងប្រវត្តិសាស្ត្រមួយរបស់កម្ពុជាសម្រាប់អនុវត្តគម្រោងសាកល្បងនេះ គឺដើម្បីរំឭកដល់ទំនាក់ទំនងមិត្តភាពដ៏យូរអង្វែងរវាងប្រទេសទាំង2។

គួរបញ្ជាក់ផងដែរថា នៅក្នុងដំណើរទស្សនកិច្ចនេះ គណៈប្រតិភូសាធារណរដ្ឋឥណ្ឌាបានទៅទស្សនកិច្ចអំពីគម្រោងអភិវឌ្ឍន៍មួយចំនួនរបស់ឥណ្ឌានៅខេត្តសៀមរាប គឺវិទ្យាស្ថានជាតិ NIPTICT និងបានទៅទស្សនកិច្ចទីតាំងសម្រាប់សិក្សាលើគម្រោងសាកល្បងសម្រាប់អភិវឌ្ឍន៍ភូមិឌីជីថលនៅស្រុកទ្រាំង ខេត្តតាកែវ ផងដែរ៕

March 30, 2019

UNDP ភ្ជាប់ទំនាក់ទំនងជាមួយប្រទេសកម្ពុជា តាមរយៈសេវាភ័ស្តុភារឆ្លងដែន និងពាណិជ្ជកម្មតាមប្រព័ន្ធអេឡិចត្រូនិក (e-commerce)

ប្រទេសកម្ពុជាមានសក្តានុពលក្នុងការទាញប្រយោជន៍ពីពាណិជ្ជកម្មតាមប្រព័ន្ធអេឡិចត្រូនិក (e-commerce) ដើម្បីផ្តល់ភាពងាយស្រួល និងបង្កើនប្រសិទ្ធភាពដល់អតិថិជន អ្នកលក់រាយ ទីផ្សារ និងការទទួលបានព័ត៌មានពាណិជ្ជកម្ម។

ដើម្បីជួយឱ្យកម្ពុជាបើកឱកាសបន្ថែមទៀតសម្រាប់ទីផ្សារក្នុងស្រុកដើម្បីការរីកចម្រើន និងការទទួលស្គាល់នៅក្នុងទីផ្សារសកល កម្មវិធីអភិវឌ្ឍន៍អង្គការសហប្រជាជាតិ (UNDP) និងក្រុមហ៊ុន Shenzhen 4PX Express ដែលជាបុត្រសម្ព័ន្ធក្រុមហ៊ុន Alibaba Cainiao Group បានចុះហត្ថលេខាលើអនុស្សរណៈយោគយល់គ្នា នឹងកិច្ចព្រមព្រៀងចែករំលែកតម្លៃដើម្បីចាប់ផ្តើមដំណើរការគម្រោងភាពជាដៃគូ នៃការធ្វើពាណិជ្ជកម្មតាមប្រព័ន្ធអេឡិចត្រូនិកឆ្លងដែនកាលពីពេលថ្មីៗនេះ។

ពាណិជ្ជកម្មតាមប្រព័ន្ធអេឡិចត្រូនិក មានអត្ថប្រយោជន៍ក្នុងការធ្វើពាណិជ្ជកម្មអន្តរជាតិ ព្រមទាំងមានសក្តានុពលក្នុងការជួយលើកកម្ពស់ទីផ្សារក្នុងស្រុកផងដែរ។

សក្តានុពលនៃពាណិជ្ជកម្មអេឡិចត្រូនិកនៅក្នុងប្រទេសកម្ពុជា គឺមានសារៈសំខាន់ និងមានជោគជ័យព្រោះថា អត្ថប្រយោជន៍របស់វាមិនត្រឹមតែមានកម្រិតចំពោះពាណិជ្ជកម្មអន្ដរជាតិនោះទេ ប៉ុន្តែវាក៏សំខាន់សម្រាប់ការជំរុញទីផ្សារក្នុងស្រុកផងដែរ។

លោក Yue (KEVIN) Li ប្រធាននាយកប្រតិបត្តិនៃក្រុមហ៊ុន 4PX Express មានប្រសាសន៍ថា “សេវាភ័ស្តុភារឆ្លងដែននឹងបង្កើតនូវមធ្យោបាយសម្រាប់ឱ្យកម្ពុជាទទួលបានប្រយោជន៍ពីចរន្តដ៏រស់រវើកនៃពាណិជ្ជកម្មតាមប្រព័ន្ធអេឡិចត្រូនិកនៅក្នុងតំបន់ ដោយមានការជំរុញបន្ថែមពីសមាហរណកម្មអាស៊ាន។ វាក៏នឹងជួយឱ្យកម្ពុជាទទួលបានប្រយោជន៍តាមរយៈការវិនិយោគកាន់តែច្រើនពីសំណាក់ក្រុមហ៊ុនអន្តរជាតិធំៗដែលកំពុងផ្តល់សេវាពាណិជ្ជកម្មតាមប្រព័ន្ធអេឡិចត្រូនិក និងភ័ស្តុភារនៅក្នុងប្រទេសនេះ”។

លោក Yue បានថ្លែងថា៖ “ពាណិជ្ជកម្មតាមប្រព័ន្ធអេឡិចត្រូនិកពិតជាមានសក្តានុពលយ៉ាងធំធេងនៅក្នុងប្រទេសកម្ពុជា។ គេគួរចាត់ទុកពាណិជ្ជកម្មតាមប្រព័ន្ធអេឡិចត្រូនិកនេះថា ជាឧបករណ៍កសាងឱកាសដើម្បីបើកទ្វារបន្ថែមទៀតឱ្យទីផ្សារក្នុងស្រុកទទួលបានឱកាសរីកចម្រើន និងទទួលបានការទទួលស្គាល់នៅលើទីផ្សារសកល”។

លោក Nick Beresford អ្នកតំណាង UNDP ប្រចាំប្រទេសកម្ពុជាមានប្រសាសន៍ថា សេដ្ឋកិច្ចឌីជីថល បាន និងកំពុងប្រែក្លាយកម្ពុជាតាមរយៈការផ្លាស់ប្តូរទម្លាប់បញ្ជាទិញអាហារ ទូទាត់ថ្លៃទំនិញ ហៅរ៉ឺម៉កម៉ូតូកង់3 កក់សណ្ឋាគារ ឬទិញសម្លៀកបំពាក់ពីតាមហាងជាដើម។

លោកបន្តថា សេវាទាំងនេះបានជួយសម្រួលដល់ទំនាក់ទំនងរវាងអតិថិជន និងការប្រកបអាជីវកម្មតាមប្រព័ន្ធអនឡាញ។ ប្រការនេះនាំឱ្យមានការអភិវឌ្ឍវិស័យសេដ្ឋកិច្ចដែលអាចរក្សាបាននូវផលិតភាពសេដ្ឋកិច្ចក្នុងកម្រិតមួយខ្ពស់។ ប្រព័ន្ធអេកូ-ស៊ីស្ទឹម (Eco-System) សម្រាប់ការធ្វើពាណិជ្ជកម្មតាមប្រព័ន្ធអេឡិចត្រូនិកមានគោលបំណងលើកកម្ពស់បរិយាប័ន្ន និងភាពងាយស្រួលក្នុងការទទួលបានសេវាកម្ម ក្រោមការចូលរួមពីតួអង្គពាក់ព័ន្ធសំខាន់ៗចំនួន3 គឺ រាជរដ្ឋាភិបាល ធុរកិច្ច និងឯកត្តជន ឬអ្នកប្រើប្រាស់។

ប្រព័ន្ធនេះនឹងផ្តល់ឱកាសការងារតាមរយៈការពង្រីកការធ្វើពិពិធកម្ម និងនវានុវត្តន៍ និងបើកចំហឱ្យមានការជួលបុគ្គលិកតាមរបៀបថ្មីសម្រាប់ក្រុមហ៊ុនចាប់ផ្តើមអាជីវកម្មដំបូង (startups) សហគ្រាសខ្នាតតូចបំផុត ខ្នាតតូច និងខ្នាតមធ្យម និងសហគ្រាសប្រភេទផ្សេងទៀត និងគាំទ្រដល់ការអភិវឌ្ឍជំនាញ និងបច្ចេកទេស។

លោក Nick Beresford បានថ្លែងថា “ខណៈពេលដែលប្រទេសកម្ពុជាកំពុងខិតខំពង្រឹងសហគ្រាសខ្នាតតូចបំផុត ខ្នាតតូច និងខ្នាតមធ្យម (MSME) របស់ខ្លួន ការងាកទៅប្រើប្រាស់ប្រព័ន្ធឌីជីថល នឹងជួយឱ្យព្រះរាជាណាចក្រនេះកាន់តែអាចច្បាមយកសក្តានុពលទីផ្សារក្នុងស្រុក និងអន្តរជាតិបន្ថែមទៀត”។

ឯកឧត្តម ស៊ុន ចាន់ថុល រដ្ឋមន្ត្រីនៃក្រសួងសាធារណការ និងដឹកជញ្ជូន និងជាអនុប្រធានអចិន្ត្រៃយ៍នៃក្រុមប្រឹក្សាជាតិភ័ស្តុភារកម្ពុជាមានប្រសាសន៍ថា រាជរដ្ឋាភិបាលកម្ពុជាតាមរយៈក្រសួងសាធារណការនិងដឹកជញ្ជូន និងជាក្រុមប្រឹក្សាភ័ស្ដុភារជាតិបានប្តេជ្ញាចិត្តជំរុញប្រព័ន្ធអេកូដែលមានលក្ខណៈរួសរាយរាក់ទាក់ដើម្បីដោះស្រាយបញ្ហាប្រឈមក្នុងការដឹកជញ្ជូន និងប្រសិទ្ធភាពនៃលំហូរទំនិញ និងសេវាកម្ម និងសម្រួលដល់ក្រុមហ៊ុន Shenzhen 4PX Express បន្តការបន្តឆ្ពោះទៅកាន់តំបន់អាស៊ីអាគ្នេយ៍តាមរយៈការធ្វើឱ្យប្រទេសកម្ពុជាក្លាយជាមណ្ឌលបង្រួបបង្រួមក្នុងតំបន់ដើម្បីបម្រើតំបន់មេគង្គឡានឆាង។

ឯកឧត្ដមបានបន្តថា រាជរដ្ឋាភិបាលកម្ពុជាចង់ឃើញទំនាក់ទំនងដ៏រឹងមាំមួយរវាងការវិនិយោគ និងគម្រោងដឹកជញ្ជូនជាតិជាពិសេសការដឹកជញ្ជូនតាមទីប្រជុំជន និងការដឹកជញ្ជូនចម្ងាយឆ្ងាយ។ លោកក៏សង្ឃឹមផងដែរថា គម្រោងភាពជាដៃគូរដ្ឋ និងឯកជន PPPនេះអាចដោះស្រាយប្រព័ន្ធអេកូពាណិជ្ជកម្មកាន់តែទូលំទូលាយ ហើយការដឹកជញ្ជូនបៃតង គឺជាផ្នែកមួយនៃគោលនយោបាយដែលត្រូវបានពិចារណារួមទាំងការគាំទ្រដល់ការធ្វើពាណិជ្ជកម្មអេឡិចត្រូនិកឆ្លងកាត់ព្រំដែន និងពាណិជ្ជកម្មឆ្លងដែនដោយមិនបាច់ប្រើក្រដាស។

ឯកឧត្ដមបន្តទៀតថា រាជរដ្ឋាភិបាលកម្ពុជាក៏រំពឹងថា នឹងបានឃើញក្រុមហ៊ុន Alibaba ក្នុងការជួយបណ្តុះបណ្តាលសហគ្រិនឱ្យផ្លាស់ប្តូរប្រព័ន្ធអេឡិចត្រូនិកឌីជីថល និងបង្កើតឡើងនូវគំរូអាជីវកម្មថ្មីៗសម្រាប់ការធ្វើភ័ស្តុភារកម្មអេឡិចត្រូនិក។

ឯកឧត្ដមរដ្ឋមន្ត្រីមានប្រសាសន៍ថា៖ “ក្រសួងសាធារណការ និងដឹកជញ្ជូនក៏មានសេចក្តីសោមនស្សរីករាយផងដែរតាមរយៈគម្រោងភាពជាដៃគូឯកជនសាធារណៈនេះ មានការឧបត្ថម្ភគាំទ្រមួយចំនួនក្នុងការជួយយើងកសាងសមត្ថភាពសម្រាប់មជ្ឈមណ្ឌលភ័ស្តុភារស្រាវជ្រាវ និងបណ្តុះបណ្តាលរបស់យើងដែលបានបង្កើតឡើងនាពេលថ្មីៗនេះ”៕

March 30, 2019

រដ្ឋមន្ត្រីឧស្សាហកម្មកោះប្រជុំសហគមន៍ផលិតអំបិលកំពត-កែបនៅថ្ងៃនេះទាក់ទងនឹងការស្នើសុំរំលាយសហគមន៍

មន្ត្រីជាន់ខ្ពស់រាជរដ្ឋាភិបាលនឹងប្រជុំជាមួយនឹងសហគមន៍ផលិតអំបិលខេត្តកំពត-កែប ដែលជាអ្នកផលិត និងផ្គត់ផ្គង់អំបិលតែមួយគត់នៅកម្ពុជា នៅថ្ងៃចន្ទ(ទី25)នេះ ដើម្បីស្វែងរកដំណោះស្រាយបន្ទាប់ពីសហគមន៍អ្នកផលិតអំបិលមួយនេះបានដាក់លិខិតស្នើសុំរំលាយសហគមន៍បន្ទាប់ពីមិនមានសមាជិកគ្រប់គ្រាន់ក្នុងការដំណើរការផលិតកម្មរបស់សហគមន៍។

អ្នកនាំពាក្យក្រសួងឧស្សាហកម្ម និងសិប្បកម្ម លោក អ៊ុំ សុថា បានឱ្យដឹងថា ក្រសួងបានទទួលលិខិត របស់សហគមន៍អ្នកផលិតអំបិលខេត្តកំពត-កែបហើយ ដោយឡែកក្រសួងឧស្សាហកម្មនឹងធ្វើការកោះប្រ ជុំជាមួយនឹងសហគមន៍អ្នកផលិតអំបិលខេត្តកំពត-កែប និងអភិបាលខេត្តកំពត និងកែប រួមទាំងភាគីពាក់ព័ន្ធទាំងអស់ដើម្បីពិភាក្សាលើបញ្ហានេះ។ លោកបញ្ជាក់ថា កិច្ចប្រជុំនេះនឹងធ្វើនៅថ្ងៃចន្ទ ទី25 នេះ។

លោកសុថា បានថ្លែងថា៖“រឿងនេះមិនទាន់អាចអត្ថាធិប្បាយបានទេ ដោយរង់ចាំការប្រជុំនៅថ្ងៃទី25 នេះសិន ដោយឯកឧត្តមរដ្ឋមន្ត្រីក្រសួងឧស្សាហកម្មនឹងដឹកនាំកិច្ចប្រជុំនេះ ដើម្បីត្រួតពិនិត្យដោះស្រាយឡើងវិញថា តើត្រូវរកមធ្យោបាយណាមួយ ប៉ុន្តែយើងទទួលបានព័ត៌មាននេះហើយ”។

លោកបន្តថា ក្រសួងនឹងស្វែងរកជម្រើសដែលសមស្របមួយ។ ជាគោលគំនិត ក្រសួងគាំទ្រ ប៉ុន្តែត្រូវរកមតិសមូហភាពនៅថ្នាក់មូលដ្ឋានជាមុនសិន។ កិច្ចប្រជុំនឹងស្វែងរកជម្រើសមួយដែលសមស្រប និងត្រូវនឹង ស្ថានភាពជាក់ស្តែងដែលសហគមន៍កំពុងជួបប្រទះ។

លោក ប៊ុន បារាំង សហប្រធានសហគមន៍អ្នកផលិតអំបិលកំពត-កែប បានលើកឡើងពីបញ្ហាមួយចំនួនដែលឈានដល់ការដាក់លិខិតសុំរំលាយសហគមន៍ផលិតអំបិលនេះថា គឺដោយសារឆ្នាំនេះក្រុមអ្នកផលិតអំបិលមិនអាចផលិតអំបិលបាន ខណៈដែលអ្នកផលិតមួយចំនួនមិនបានចុះកុងត្រាជាថ្មីដើម្បីបន្តសមាជិកភាពរបស់សហគមន៍ ដែលមានចំនួនប្រមាណជាង 30ភាគរយ។

លោក បារាំង បានបន្តថា ក្នុងចំណោមអ្នកផលិតអំបិលទាំង 200ក្រុម មានប្រមាណជាង 70ភាគរយបានព្រមព្រៀងចូលជាសមាជិកក្នុងអាណត្តិថ្មីនេះប៉ុន្តែ 30ភាគរយទៀតមិនបានចុះឈ្មោះចូលជាសមាជិកនៅឡើយ ដូចនេះសហគមន៍ពិបាកក្នុងការដំណើរការ។ លោកបញ្ជាក់ថា ការផលិតអំបិលត្រូវការចូលរួមពីសមាជិកទាំងអស់ ដោយសព្វថ្ងៃនេះផ្ទៃដីផលិតអំបិលមានប្រមាណជា 4,800ហិកតា និងមានសមាជិកចំនួន 200ក្រុម។ លោកបន្តថា បើ2ទៅ 3ក្រុមក្នុងចំណោម 200ក្រុមនោះមិនបានចូលរួម ការដំណើរការនៅក្នុងសហគមន៍ក៏ពិបាកដែរ។

លោក បារាំង បានបន្ថែមថា ដោយសារតែបញ្ហា បានធ្វើឱ្យតម្លៃអំបិលឥឡូវមានការធ្លាក់ចុះរហូតដល់ 12,000រៀលក្នុង 1បាវ (50គីឡូក្រាម) ដោយកាលពីពេលមុនៗ មានតម្លៃជាង 20,000រៀលឯណោះ។ លោកបញ្ជាក់ថា តម្លៃនេះនឹងបន្តធ្លាក់ទៀត ដោយសារតែមានអ្នកផលិតអំបិលដែលស្ថិតនៅក្រៅសហគមន៍ធ្វើឱ្យឈ្មួញទម្លាក់តម្លៃតាមអំពើចិត្ត។

លោក បារាំង បានបន្ថែមទៀតថា៖“មកទល់ពេលនេះ មិនមាននៅសល់អំបិលនៅក្នុងឃ្លាំងនោះទេ ដោយសារតែអ្នកផលិតអំបិលមួយចំនួនផលិតបាន ហើយលក់ចេញតែម្តង ដោយពួកគាត់មិនបានស្តុកទុកនោះទេ។ យើងមិនទាន់មានទិន្នន័យច្បាស់លាស់នៅឡើយ ដោយសារតែអ្នកផលិតទាំងនោះមិនទាន់បានចុះបញ្ជីចូលជាសមាជិកក្នុងសហគមន៍ជាថ្មី ដូច្នេះសហគមន៍មិនមានទិន្នន័យនោះទេ ពីមុនសហគមន៍ធ្វើការប្រមូលទិន្នន័យក្នុងរយៈពេល 10ថ្ងៃម្តង”។

លោកបន្តថា នៅថ្ងៃទី25 នេះ រដ្ឋមន្ត្រីក្រសួងឧស្សាហកម្ម នឹងដឹកនាំកិច្ចប្រជុំរួមជាមួយអភិបាលខេត្តកំពត និងកែបដើម្បីពិនិត្យមើលស្ថានការណ៍អំបិលនេះ។ លោកថ្លែងថា បើសិនជាមិនមានសហគមន៍ក្នុងការជួយទ្រទ្រង់ទេនោះ អ្នកផលិតអំបិលនឹងពិបាក ដូច្នេះនឹងមានបញ្ហាប្រឈមច្រើន ខណៈដែលក្រុមតូចៗបានលក់ដីស្រែអំបិលអស់មួយចំនួនទៅហើយ។

លោក បារាំង បានអះអាងថា ការបង្កើតសហគមន៍អ្នកផលិតអំបិល គឺដើម្បីទ្រទ្រង់ដល់អ្នកផលិតទាំងអស់គ្នា តែបើកាលណាម្នាក់ៗមិនចូលរួម វានឹងធ្វើការឱ្យប្រមូល និងផលិតអំបិលមានការលំបាក នឹងបែកបាក់ រួចនឹងដួលរលំទាំងអស់គ្នា។

លោក បារាំង និយាយថា៖“យើងរង់ចាំមើលកិច្ចប្រជុំនេះថា តើនឹងមានដំណោះស្រាយយ៉ាងណា យើងមិនទាន់ដឹងនៅឡើយ យើងក៏មានសំណូមពរផងដែរ ដោយសារតម្លៃប្រកួតប្រជែងខ្លាំង កម្លាំងពលកម្មឡើងថ្លៃ តម្លៃអំបិលចុះថោក និងបើគ្មានសហគមន៍ទៀតនោះ នឹងធ្វើឱ្យមានការបោះបង់”៕

March 29, 2019

វិស័យអចលនទ្រព្យនៅតែមានតម្រូវការទីផ្សារធម្មតា និងកំពុងផ្ដោតការពង្រឹងលើផ្លូវច្បាប់

ទីផ្សារអចលនទ្រព្យនៅក្នុងប្រទេសកម្ពុជា នៅតែមានភាពទាក់ទាញ ហើយស្ថិតនៅក្នុងតម្រូវការខ្ពស់ដដែល ដោយគម្រោងអភិវឌ្ឍន៍ជាច្រើនកំពុងតែមមាញឹកទាំងនៅរាជធានីភ្នំពេញ និងទាំងនៅបណ្តាខេត្តមួយចំនួនដែលកំពុងធ្វើការអភិវឌ្ឍលើវិស័យអចលនទ្រព្យជាច្រើនប្រភេទ រួមមានៈ ការអភិវឌ្ឍចម្រុះ បុរីលំនៅឋាន អាផាតមិន សេវាកម្មខុនដូ ការិយាល័យ សណ្ឋាគារ និងនៅរមណីយដ្ឋានដែលមាននៅកម្ពុជា។ នេះបើតាមការដឹងពីអ្នកវិនិយោគលើវិស័យអចលនទ្រព្យ។

លោកឧកញ៉ា នួន រិទ្ធី អគ្គនាយកក្រុមហ៊ុនអចលនទ្រព្យ Khmer Foundation Appraisal (KFA) បានប្រាប់កាសែតឡារ៉ែនពាណិជ្ជថា រាជធានីភ្នំពេញនៅតែជាតំបន់អភិវឌ្ឍន៍ដ៏ធំបំផុត។ គ្រប់ខណ្ឌភាគកណ្តាលនៃរដ្ឋធានីបច្ចុប្បន្នមានការអភិវឌ្ឍដែលយ៉ាងហោចណាស់ក៏កំពុងត្រូវបានសាងសង់ខុនដូ អាផាតមិន(Apartment) និងអគារខ្ពស់ធំៗពិសេសតំបន់ក្រវាត់ក្រុង ដែលមានគម្រោងជាច្រើនកំពុងប្រជែងគ្នា ខណៈតំបន់ខាងក្រៅក្រុងត្រូវបានគ្របដណ្តប់ដោយសហគមន៍ដែលមានជាបុរីផ្ទះល្វែង និងគម្រោងសាងសង់លំនៅឋានសមរម្យជាដើម។

លោកឧកញ៉ាបានបង្ហើបឱ្យដឹងពីសម្ទុះក្នុងវិស័យនេះថា គម្រោងអចលនទ្រព្យនៅតាមតំបន់ក្រវាត់ក្រុងដែលបានសម្ពោធដោយរដ្ឋាភិបាលថ្មីៗនេះ មិនបង្ហាញនូវការកើនឡើងនៃវិស័យអចលនទ្រព្យបែបពុះកញ្ជ្រោលខ្លាំងនោះទេ តែវានៅតែអភិវឌ្ឍទៅមុខជាធម្មតាក្នុងអំឡុង 2ខែកន្លងមកនេះ។ តែការជួលខុនដូ អាផាតមិនដោយជនបរទេសនៅស្ទើរគ្រប់ប៉ូលសេដ្ឋកិច្ចនៅតែមានកំណើនគួរឱ្យកត់សម្គាល់ ដោយមើលទៅលើចំនួនប្រជាជនចំនួនជនបរទេស និន្នាការរស់នៅ ចំនួនអ្នកទិញផ្គត់ផ្គង់ និងតម្រូវការទិញ-ជួលពីមុន និងបច្ចុប្បន្ន។

លោកឧកញ៉ាបានបន្តថា ពាក់ព័ន្ធនឹងតំបន់ក្រវាត់ក្រុង គេឃើញមានសកម្មភាពផុលផុសចាប់ពីរង្វង់មូលកួរស្រូវ និងតំបន់កំពង់កន្ទួត និងមានការ-ផ្គត់ផ្គង់ថ្មីៗនៅតំបន់ស្រុកមុខកំពូលក្នុងគម្រោងលំនៅឋានសមរម្យ ដែលនៅកម្ពុជាគម្រោងបែបនេះកំពុងមានកំណើនគួរឱ្យកត់សម្គាល់ ហេតុដូច្នេះហើយទើបអ្នកវិនិយោគក្នុងស្រុកបានសម្លឹងឃើញថា ទីផ្សារលំនៅឋានសមរម្យ គឺជាគោលដៅទាក់ទាញបំផុត និងងាយស្រួលលក់ ទើបអ្នកវិនិយោគវិស័យអចលនទ្រព្យ ជាពិសេសអ្នកអភិវឌ្ឍន៍តែម្ដង បានបោះទុនវិនិយោគទៅលើវិស័យមួយនេះច្រើនដែរ។

លោក ច្រឹក សុខនីម ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា ធ្លាប់មានប្រសាសន៍ឱ្យដឹងនាពេលកន្លងមកថា អ្នកវិនិយោគតែងតែសម្លឹងមើលពីឱកាសដែលទទួលបានប្រាក់ចំណេញ ដូច្នេះនៅពេលតម្រូវការមានការកើនឡើងខ្លាំងនូវប្រភេទសំណង់ណាមួយ គេត្រូវតែពង្រីកការផ្គត់ផ្គង់ដើម្បីឆ្លើយតបទៅនឹងតម្រូវការទីផ្សារ។ ជាក់ស្តែងកម្រិតជីវភាពរបស់ប្រជាជនកម្ពុជាភាគច្រើន មិនទាន់មានលទ្ធភាពអាចទិញលំនៅឋានប្រណីតដែលមានតម្លៃខ្ពស់នៅឡើយទេ ដូច្នេះតម្រូវការទីផ្សារសំណង់ប្រភេទខ្លះ ឬលំនៅឋានសមរម្យ គឺនៅតែមាន ហើយនឹងយូរអង្វែងទៅមុខទៀត ព្រោះវាមិនបង្កហានិភ័យដល់អ្នកវិនិយោគវិស័យសំណង់បែបនោះទេ។

ប៉ុន្តែលោកឧកញ៉ា នួន រិទ្ធី ក៏បានប្រាប់ឱ្យដឹងបន្ថែមដែរថា ពាក់ព័ន្ធនឹងបញ្ហាជួញដូរវិស័យអចលនទ្រព្យនេះ យើងឃើញថា ហាក់ដូចជានៅទ្រឹងបន្តិចដោយសារតែមានការរឹតបន្តឹងប្រព័ន្ធច្បាប់ក្នុងវិស័យអចលនទ្រព្យ។ លោកឧកញ៉ាបានបញ្ជាក់ថា៖ “ពោលគឺមានឧបសគ្គអ្វីខ្លះក្នុងទីផ្សារ? បច្ចុប្បន្នអចលនទ្រព្យកម្ពុជាកំពុងប្រឈមនឹងការលំបាកខ្លះៗក្នុងគោលនយោបាយគ្រប់គ្រងដីធ្លី និងច្បាប់សំណង់។ បញ្ហាប្រឈមធំៗនៅទូទាំងក្រុមប្រឹក្សាភិបាល គឺហេដ្ឋារចនាសម្ព័ន្ធ ដូចជាផ្លូវថ្នល់ស្ពានអគ្គិសនី ការគ្រប់គ្រងកាកសំណល់ និងទឹក។ ទោះជាយ៉ាងណាក៏ដោយ ក៏រដ្ឋាភិបាលមានការលើកទឹកចិត្តយ៉ាងខ្លាំងក្នុងការដោះស្រាយបញ្ហាទាំងអស់នេះ និងលើកកម្ពស់បរិយាកាសវិនិយោគ”។

លោកស្រី តាំង ហួរ អនុប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា និងជានាយិកាក្រុមហ៊ុន Amatak Prorperty service បានមានប្រសាសន៍ប្រាប់ឡារ៉ែនពាណិជ្ជថា ក្នុងរយៈពេល 2ខែកន្លងមកនេះ វិស័យអចលនទ្រព្យ ថ្វីដ្បិតតែពុំមានការកើនឡើងគួរឱ្យកត់សម្គាល់ក្ដី តែវិស័យនេះក៏នៅតែមានសកម្មភាពផុលផុសដដែល ឯដីធ្លី និងដីឡូត៍ក៏នៅមានសម្ទុះល្អ នៅតែបន្តសកម្មភាពទៅមុខជាធម្មតា មានសមត្ថភាព និងជំនាញគ្រប់គ្រាន់ដើម្បីកសាងទំនុកចិត្តជាមួយអ្នកទិញ-អ្នកលក់ និងក្នុងទីផ្សារអចលនទ្រព្យទាំងមូល។លោកស្រីអនុប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា មានប្រសាសន៍បញ្ជាក់ទៀតថា៖ “អ្នកវិនិយោគ គេធ្វើឡើងតម្រូវទៅតាមទីផ្សារ និងអតិថិជនគោលដៅ។ ចំពោះទីផ្សារសំណង់ ពិសេសការពុះឡូត៍លក់ គឺនៅមានភាពទូលាយនៅឡើយ ដោយសារតែពាក់ព័ន្ធទៅនឹងកម្រិតជីវភាពរបស់អតិថិជន”។

បច្ចុប្បន្នសម្ទុះនៃការវិនិយោគលើការពុះឡូត៍លក់ ភាគច្រើនតាមតំបន់ជាយក្រុងនៅតែមាននៅឡើយ ព្រោះតំបន់ទាំងនោះទើបតែចាប់ផ្តើមរីកចម្រើន និងចាប់ផ្ដើមអភិវឌ្ឍបន្តចេញពីទីក្រុង ដូច្នេះតម្លៃដីនៅមានកម្រិត ដែលអាចផ្តល់ឱកាសចំណេញដល់អ្នកវិនិយោគក្នុងពេលដ៏ខ្លីខាងមុខ។ អ្នកវិនិយោគមានឱកាសច្រើនក្នុងការទទួលបានប្រាក់ចំណេញ ហើយអ្នកទិញអាចមានលទ្ធភាពទទួលបានដីដែលមានសុវត្ថិភាពពុំមានបញ្ហា។

លោកស្រី តាំង ហួរ បានមានមតិក្នុងបញ្ហានេះថា៖“ដូចនេះ អ្នករកស៊ីពុះដីឡូត៍លក់ត្រូវតែសិក្សាគម្រោងមេ ក្នុងតំបន់ដែលយើងធ្វើការជួញដូរ ព្រោះនិន្នាការនៃការជួញដូរអចលនទ្រព្យនេះ បើយើងសិក្សាទិដ្ឋភាពផ្នែកច្បាប់មិនដល់ វានឹងនាំឱ្យមានបញ្ហាដល់អ្នកទិញ ដែលជាធម្មតានៅពេលទិញ-លក់តែងមានប្លង់រឹង ឬមានលិខិតបទដ្ឋានសម្រាប់ជាសំអាងក្នុងការជួញដូរ ដើម្បីជាភាពស្របច្បាប់”។

លោកស្រីបានសង្កត់ធ្ងន់ថា៖“យើងចង់មិនឱ្យមានបញ្ហាជាមួយនឹងព័ត៌មានដែលថា ការពុះឡូត៍លក់មិនមានភាពស្របច្បាប់ អនាធិបតេយ្យនោះទេ ព្រោះអ្នកទិញភាគច្រើនជាអ្នកក្រ អ្នកមធ្យម មិនជាមានប្រាក់ប៉ុន្មានទេ ប្រសិនបើគាត់ទិញទៅកាត់ប្លង់រឹងជូនគាត់មិនបាន នាំឱ្យមានបញ្ហាប៉ះពាល់ដល់គម្រោងទាំងមូល”។

លោកស្រីបានបន្ថែមទៀតថា៖“អ្វីដែលយើងចង់បាននោះ គឺទី1- កុំឱ្យប៉ះពាល់ដល់គម្រោងដី។ ទី2-ពេលលក់ដីជូនអតិថិជន យើងមាន ឬអាចកាត់ប្លង់រឹងបានស្របច្បាប់ ទី3-បើកាត់ប្លង់រឹងជូនអតិថិជនបាន នោះជាការអនុវត្តទៅតាមច្បាប់ដីធ្លី។ ទាំងនេះគឺដើម្បីសុវត្តិភាពនៃការជួញដូរដីធ្លី ឬការពុះឡូត៍លក់ ពោលការអនុវត្តស្របទៅតាមច្បាប់ដីធ្លីដែលក្រសួងបានដាក់ឱ្យអនុវត្ត និងមិនមានហានិភ័យ”។

លោកឧកញ៉ា នួន រិទ្ធី បានបញ្ជាក់បន្ថែមថា ដូច្នេះហើយទើបយើងឃើញថា វិស័យអចលនទ្រព្យសព្វថ្ងៃកំពុងតែពង្រឹងខ្លួន ដោយផ្តោតទៅលើការអនុវត្តប្រព័ន្ធច្បាប់ក្នុងវិស័យអចលនទ្រព្យ ដើម្បីឱ្យវិស័យនេះអាចរីកចម្រើនក្នុងការជំរុញដល់វិស័យសេដ្ឋកិច្ចរបស់ជាតិមានលក្ខណៈស្របគ្នា។ ពោលគឺ សេដ្ឋកិច្ចមានកំណើនដោយការទទួលបានពីកំណើននៃវិស័យអចលនទ្រព្យដោយស្របទៅនឹងប្រព័ន្ធច្បាប់វិនិយោគ ដែលចំណុចនេះហើយទើបវិនិយោគិនបរទេសមានជំនឿលើវិស័យអចលនទ្រព្យនៅកម្ពុជា និងចូលរួមអភិវឌ្ឍកាន់តែច្រើនឡើង៕

March 29, 2019

ក្រសួងពាណិជ្ជកម្ម អនុញ្ញាតឱ្យខេត្តជាប់ព្រំដែនចេញ CO Form D សម្រាប់បង្កើនការតភ្ជាប់សេដ្ឋកិច្ចក្នុងតំបន់

ថ្មីៗនេះ ខេត្តចំនួន4 ទៀតទទួលបានការអនុញ្ញាតសិទ្ធិពីក្រសួងពាណិជ្ជកម្មដើម្បីចាប់ផ្តើមសេវាកម្មអនុវត្តប្រព័ន្ធវិញ្ញាបនបត្រប្រភពដើមទំនិញទម្រង់ D (CO Form D សម្រាប់តែកសិផល) ដែលជាទម្រង់បែបបទមួយ អនុវត្តដោយផ្ទាល់នៅតាមមន្ទីរពាណិជ្ជកម្មខេត្ត។ នៅថ្ងៃខាងមុខនឹងបន្តផ្តល់ការអនុវត្តប្រព័ន្ធទម្រង់D នេះដល់ខេត្តចំនួន2 បន្ថែមទៀត។ នេះបើតាមការឱ្យដឹងពីអ្នកនាំពាក្យក្រសួងពាណិជ្ជកម្ម។

ឯកឧត្តម ស៊ាង ថៃ អ្នកនាំពាក្យក្រសួងពាណិជ្ជកម្មមានប្រសាសន៍ថា វិញ្ញាបនបត្របញ្ជាក់ប្រភពដើមទំនិញទម្រង់ D គឺប្រៀបដូចជា ការប្រគល់លិខិតឆ្លងដែន ដល់អាជ្ញាធរខេត្តដើម្បីសម្របសម្រួលពាណិជ្ជកម្មជាមួយប្រទេសជិតខាង(ខេត្តដែលនៅជាប់ព្រំដែន) និងដើរតួនាទីយ៉ាងសំខាន់ក្នុងផែនការបង្កើនការតភ្ជាប់សេដ្ឋកិច្ចនៅក្នុងតំបន់ត្រីកោណអភិវឌ្ឍន៍ កម្ពុជា ឡាវ វៀតណាម(CLV DTA)។ ជារួមខេត្តចំនួន4 ដែលទទួលបានការផ្តល់សេវាការអនុវត្តប្រព័ន្ធទម្រង់D នេះ មានខេត្តត្បូងឃ្មុំ ក្រចេះ ស្ទឹងត្រែង និងខេត្តមណ្ឌលគិរី។

សូមបញ្ជាក់ថា វិញ្ញាបនបត្រប្រភពដើមទម្រង់ D (CO Form D) នេះ គឺជាឯកសារផ្លូវការមួយ ដែលត្រូវបានគេប្រើដើម្បីបញ្ជាក់ថា ផលិតផលនោះត្រូវបានផលិតទាំងស្រុងនៅក្នុងប្រទេសកម្ពុជា។ ជាទូទៅវាជាឯកសារសំខាន់ដែលអ្នកទិញត្រូវការ។

ឯកឧត្តម ប៉ាន សូរស័កិ្ត រដ្ឋមន្ត្រីក្រសួងពាណិជ្ជកម្មបានថ្លែងថា ការអនុញ្ញាតឱ្យអាជ្ញាធរខេត្ត ចេញទម្រង់បង្កើតកិច្ចសហប្រតិបត្តិការរវាងអាជ្ញាធរថ្នាក់ជាតិ និងថ្នាក់ខេត្តដើម្បីលើកកម្ពស់ការអភិវឌ្ឍសេដ្ឋកិច្ចប្រកបដោយនិរន្តរភាព។

ឯកឧត្តមបានបញ្ជាក់បន្ថែមថា “យើងបានសម្រេចចិត្តបើកដំណើរការសេវាកម្មនេះនៅក្នុងខេត្តត្បូងឃ្មុំ ក្រចេះ ស្ទឹងត្រែង និងមណ្ឌលគិរី ព្រោះខេត្តទាំងនេះស្ថិតនៅក្នុងតំបន់ត្រីកោណអភិវឌ្ឍន៍កម្ពុជា ឡាវ វៀតណាម ព្រោះថា ការកាត់បន្ថយគម្លាតសេដ្ឋកិច្ច និងការអភិវឌ្ឍ និងអត្រាភាពក្រីក្រគឺជាចំណុចអាទិភាព”។

ឯកឧត្តម ប៉ាន សូរស័កិ្ត បានមានប្រសាសន៍ទៀតថា៖ “អាជ្ញាធរនៅតាមបណ្តាខេត្តទាំងនេះ នឹងមានការទទួលខុសត្រូវក្នុងការគ្រប់គ្រង និងអនុវត្តប្រកបដោយប្រសិទ្ធភាព តម្លាភាព និងការអនុវត្តប្រព័ន្ធទម្រង់D(D Form)នេះដើម្បីជួយសម្រួលដល់សកម្មភាពរបស់អ្នកនាំចេញផលិតផលកសិកម្ម និងចៀសវាងការពន្យារពេល និងការរាំងស្ទះ”។

ចាប់តាំងពីឆ្នាំ2017 មកក្រសួងពាណិជ្ជកម្មបានចេញលិខិតបញ្ជាក់ពីប្រភពដើមដល់មន្ទីរពាណិជ្ជកម្មខេត្តនៅទូទាំងប្រទេសដោយលើកហេតុផលថា វានឹងជួយសម្រួលដល់សកម្មភាពអាជីវកម្ម និងការនាំចេញ និងជួយសន្សំសំចៃប្រាក់ និងពេលវេលាដល់ក្រុមហ៊ុននាំចេញ។

ឯកឧត្តម ស៊ាង ថៃ អ្នកនាំពាក្យក្រសួងពាណិជ្ជកម្មបានប្រាប់ឡារ៉ែនពាណិជ្ជថា៖“វិញ្ញាបនបត្រប្រភពដើមទម្រង់D នេះ សម្រាប់ប្រើនៅក្នុងបណ្តាប្រទេសអាស៊ាននាំផលិតផលចេញ ឬនាំផលិតផលចូល។ កម្ពុជាយើងនាំចេញទៅប្រទេសអាស៊ាន ភាគច្រើនជាកសិផល រួមមានពោត សណ្តែក ដំឡូង ទៅកាន់វៀតណាម ថៃ ដែលជាប្រទេសអ្នកជិតខាងយើង និងមានទំនិញរួមផ្សំដទៃទៀតដែរ តែសំខាន់ឱ្យតែជាកសិផល”។

ឯកឧត្តមអ្នកនាំពាក្យបានឱ្យដឹងទៀតថា៖ “វិញ្ញាបនបត្របញ្ជាក់ប្រភពដើមទម្រង់ D ធ្វើនៅ និងផ្តល់នៅក្រសួង ពេលធ្វើត្រូវដាក់ពាក្យសុំនៅក្រសួង តែប៉ុន្មានឆ្នាំកន្លងមកនេះ យើងគិតថាកុំឱ្យរំខានដល់អ្នករកស៊ី យើងក៏ឱ្យដាក់តាមអនឡាញ (Online) វាលឿនជាងមុន តែតាមអនឡាញក៏គាត់ត្រូវយក CO នៅភ្នំពេញដែរ ដូច្នេះលោករដ្ឋមន្ត្រី ក៏អនុញ្ញាតរុញកិច្ចការនេះឱ្យទៅខេត្ត កន្លែងអ្នកផលិតតែម្តង ដើម្បីសម្រួលដល់អ្នកនាំចេញ ហេតុនេះបានជាយើងដាក់នៅតាមខេត្ត ដូចដែលយើងបានឃើញពិធីប្រគល់នៅខេត្តក្រចេះនោះ”។

ឯកឧត្តមបានបញ្ជាក់ទៀតថា គម្រោងនេះក៏ធ្លាប់បានផ្តល់ឱ្យខេត្ត5 រួចមកហើយ គឺមានខេត្តប៉ៃលិន បាត់ដំបង បន្ទាយមានជ័យ ឧត្តរមានជ័យ និងរតនគិរី ព្រមទាំងខេត្តស្វាយរៀងនៅតំបន់សេដ្ឋកិច្ចពិសេសចំនួន2 ហើយយើងក៏មានគម្រោងដាក់ប្រព័ន្ធទម្រង់ D នេះ នៅខេត្តមួយចំនួនទៀត មានខេត្តតាកែវ កំពត និងខេត្តជាប់ព្រំដែន មានខេត្តកោះកុងជាដើម។

ឯកឧត្តម ស៊ាង ថៃ បានបន្តថា ជារួមយើងបានដាក់តាមលទ្ធភាពដែលយើងអាចធ្វើទៅបានជាដំណាក់កាលៗ ព្រោះមុននឹងដាក់ប្រព័ន្ធនេះយើងត្រូវបណ្តុះបណ្តាលមន្ត្រីមន្ទីរពាណិជ្ជកម្មឱ្យគាត់ចេះប្រើប្រព័ន្ធទំនើបនេះ និងត្រូវការសម្ភារផង ត្រូវការធនធានមនុស្សផងដែរ។ ការដែលយើងធ្វើនៅតាមខេត្តមុនៗ ដូចជាប៉ៃលិន បាត់ដំបង -ល- ដោយសារខេត្តទាំងនោះសម្បូរកសិផល ដូច្នេះនឹងធ្វើជាបន្តបន្ទាប់ ដោយធ្វើជាជំហានៗសម្រាប់ការតភ្ជាប់សេដ្ឋកិច្ចក្នុងតំបន់របស់យើង។

យោងតាមក្រសួងពាណិជ្ជកម្មបានឱ្យដឹងថា ការនាំចេញផលិតផលកសិកម្មទៅតំបន់អាស៊ានតាមរយៈវិញ្ញាបនបត្របញ្ជាក់ប្រភពដើមទម្រង់ D បានកើនឡើងពី 728លានដុល្លារក្នុងឆ្នាំ2016 ដល់ 1.4 ពាន់លានដុល្លារកាលពីឆ្នាំ2018៕

March 29, 2019

វិស្វករកម្ពុជានឹងមានឱកាសខ្ពស់ក្នុងការទៅបំពេញវិជ្ជាជីវៈនៅបរទេស ក្រោយពេលចុះបញ្ជីត្រឹមត្រូវ

វិស្វកម្ម ជាជំនាញដ៏មានសារៈសំខាន់ក្នុងការចូលរួមអភិវឌ្ឍសង្គម ក្នុងខណៈពេលដែលពិភពលោកកំពុងត្រូវការធនធានជំនាញដើម្បីសាងសង់ហេដ្ឋារចនាសម្ព័ន្ធថ្មីៗសម្ភារបរិក្ខារទំនើបៗ និងគ្រប់គ្រងចង្វាក់ផលិតកម្មបម្រើឱ្យវិស័យពាណិជ្ជកម្មជាដើម។

នៅកម្ពុជាបច្ចុប្បន្ន ដើម្បីគាំពារអាជីពដ៏មានសារៈសំខាន់នេះ រដ្ឋាភិបាលបានបង្កើតឱ្យមានគណៈវិស្វករកម្ពុជា ដែលមានតួនាទីប្រមូលផ្តុំធនធានបញ្ញវន្តវិស្វករជាតិ និងចូលរួមបណ្តុះបណ្តាលបន្តតាមកម្មវិធីគោលនយោបាយជាតិ។ ក្នុងនោះវិស្វករជាតិទាំងអស់មានសិទ្ធិក្នុងការដាក់ពាក្យស្នើសុំដើម្បីបំពេញតាមលក្ខខណ្ឌច្បាស់លាស់ដើម្បីក្លាយជាសមាជិក ពេញសិទ្ធិនៃគណៈវិស្វករ ដើម្បីទទួលបានអត្ថប្រយោជន៍ជាច្រើនក្នុងនាមជាវិស្វករនៅកម្ពុជា។

ឯកឧត្តម ពេជ សោភ័ន រដ្ឋលេខាធិការក្រសួងការងារ និងបណ្តុះបណ្តាលវិជ្ជាជីវៈ បានលើកឡើងថា វិស្វករដែលកំពុងបម្រើការងារនៅតាមស្ថាប័នរបស់រដ្ឋ និងឯកជន គួរមកចុះបញ្ជីវិស្វករនៅគណៈវិស្វករកម្ពុជា ដើម្បីទទួលបានសិទ្ធិជាវិស្វករដែលទទួលស្គាល់ដោយស្ថាប័នរបស់រដ្ឋ និងមានតម្លៃគ្រប់គ្រាន់សម្រាប់ការប្រកួតប្រជែងជាមួយបណ្តាប្រទេសនានាក្នុងតំបន់។ ក្រោយពេលចុះបញ្ជីរួច គណៈវិស្វករកម្ពុជា នឹងចុះទៅវាយតម្លៃវិស័យឯកជន ដែលជាវិស្វករដែលកំពុងប្រកបវិជ្ជាជីវៈ ដែលអាចឈានទៅដល់ការផ្តល់គោរមងារជាវិស្វករអាជីពជាតិ វិស្វករអាស៊ាន និងវិស្វករអាជីពឆ្នើមអាស៊ាន ជាដើម។ ហេតុនេះប្រសិនបើវិស្វករជាតិ មិនបានមកចុះបញ្ជីវិស្វករនៅគណៈវិស្វករកម្ពុជាទេនោះ វិស្វករនឹងបាត់បង់ឱកាសល្អៗជាច្រើន ជាពិសេសមិនមានឱកាសបំផ្លាស់ទីការងារដើម្បីប្រកួតប្រជែងស្នាដៃនៅក្នុងបណ្តាប្រទេសនានាក្នុងតំបន់ និងពិភពលោកបានឡើយ។

ឯកឧត្តម ពេជ សោភ័ន បានមានប្រសាសន៍ថា៖ “គណៈវិស្វករកម្ពុជាមានទំនាក់ទំនងល្អជាមួយបណ្តាប្រទេសនានាក្នុងតំបន់អាស៊ាន ដែលយើងតែងតែបញ្ជូនបេក្ខភាពវិស្វករជាតិ ក្រោយពីគណៈកម្មាធិការវាយតម្លៃសម្បទាវិជ្ជាជីវៈវិស្វកម្ម ពិនិត្យ និងសម្រេចរួចដើម្បីសុំឱ្យគេធ្វើការវាយតម្លៃទទួលស្គាល់ជាវិស្វករអាស៊ាន និងវិស្វករឆ្នើមអាស៊ាន ដើម្បីប្រកួតប្រជែងការងារវិស្វកម្មជាមួយបណ្តាប្រទេសនៅក្នុងអាស៊ាន ដែលកំពុងបើកចំហឱ្យមានលំហូរការងារជំនាញទៅវិញទៅមក”។

ឯកឧត្តមរដ្ឋលេខាធិការ ក៏បានលើកឡើងផងដែរថា ភារកិច្ចចម្បងរបស់គណៈវិស្វករកម្ពុជា គឺប្រមូលផ្តុំវិស្វករគ្រប់មុខជំនាញវិជ្ជាជីវៈវិស្វកម្ម ដែលបានមកចុះបញ្ជីនៅគណៈវិស្វករកម្ពុជា ដើម្បីធ្វើការបណ្តុះបណ្តាលបន្ថែម ដើម្បីឱ្យមានសមត្ថភាពជំនាញវិជ្ជាជីវៈពិតប្រាកដប្រកបដោយបទពិសោធខ្ពស់ រក្សាបាននូវភាពថ្លៃថ្នូររួមចំណែកលើកស្ទួយអត្តសញ្ញាណជាតិចូលរួម និងអភិវឌ្ឍសង្គម និងចូលរួមប្រកួតប្រជែងទីផ្សារការងារពលកម្មវិស្វកម្មក្នុងពេលបច្ចុប្បន្ន និងទៅអនាគតទាំងក្នុងប្រទេស ក្នុងតំបន់ និងលើសកលលោក។

លោកសាស្ត្រាចារ្យ សុខ ខុម ព្រឹទ្ធបុរសមហាវិទ្យាល័យវិស្វកម្ម និងស្ថាបត្យកម្មនៃសាកលវិទ្យាល័យបៀលប្រាយ បានលើកឡើងថា ថ្វីដ្បិតតែធនធានមនុស្សរបស់យើងនៅមានកម្រិត និងមានកត្តាប្រឈមមួយចំនួនលើការបណ្តុះបណ្តាលផ្នែកវិស្វ-កម្មក៏ដោយសារតែវិស្វករយើងមិនតិចទេដែលមានសមត្ថភាពគ្រប់គ្រាន់ក្នុងការប្រកួតប្រជែងក្នុងទីផ្សារការងារនៅតំបន់អាស៊ាន ព្រោះបច្ចុប្បន្ននេះ មានអ្នកជំនាញវិស្វករ ក៏ដូចជាស្ថាបត្យករខ្មែរមិនតិចទេដែលទទួលបានការងារធ្វើនៅក្នុងក្រុមហ៊ុនធំៗនៅក្នុងប្រទេសអភិវឌ្ឍន៍នានា ទាំងនៅក្នុងអាស៊ី និងនៅអឺរ៉ុបថែមទៀតផង។

លោកសាស្ត្រាចារ្យ សុខ ខុម បាននិយាយថា៖“បើគិតពីសមត្ថភាព ឥឡូវនេះអគារធំខ្ពស់ៗកម្រិតណា ក៏វិស្វករខ្មែរយើងអាចធ្វើបានដែរ ហើយនៅកម្ពុជាយើងក៏មានអគារធំៗមួយចំនួនសាងសង់ឡើងដោយអ្នកជំនាញរបស់ខ្មែរយើងដែរ”។

អ្នកជំនាញផ្នែកវិស្វកម្មខាងលើបានលើកឡើងផងដែរថា ហេតុនេះយុវជនជំនាន់ថ្មីរបស់កម្ពុជា គួរចេះចាប់យកឱកាសក្នុងការអភិវឌ្ឍសមត្ថភាព ហើយហ៊ានបង្ហាញស្នាដៃ និងធ្វើការប្រកួតប្រជែងជាមួយបណ្តាប្រទេសនានា ព្រោះថា បច្ចុប្បន្ននេះក៏ធ្លាប់មានគេសរសើរស្នាដៃរបស់អ្នកជំនាញខ្មែរយើង ដែលអាចធ្វើបានល្អ មានភាពច្នៃប្រឌិតខ្ពស់ និងមានគុណភាពល្អផងដែរ៕

March 28, 2019

តើប្រទេសអភិវឌ្ឍន៍ធំៗកែបញ្ហាការរាតត្បាតនៃសភាវឯកាយ៉ាងណាខ្លះ?

សភាវផ្លូវចិត្តឯកាត្រូវបានគេមើលឃើញថា កំពុងរាតត្បាតយ៉ាងខ្លាំងលើពិភពលោកដែលបានបង្កឱ្យកើតក្តីបារម្ភដល់ប្រទេសនានា ជាពិសេសប្រទេសអភិវឌ្ឍធំៗដែលមានការរីកចម្រើនខ្លាំងផ្នែកបច្ចេកវិទ្យា។ ទន្ទឹមនឹងមានបញ្ហាប្រឈមកើតឡើងខ្លាំងនេះ ដំណោះស្រាយក៏បានកើតឡើងដែរតាមរយៈការស្រាវជ្រាវ និងសេចក្តីសម្រេចរបស់អាជ្ញាធរនៃប្រទេសទាំងអស់នោះ។ នៅប្រទេសអុីតាលី ដោយសារតែមនុស្សវ័យចំណាស់ទទួលរងសភាវឯកាច្រើន និស្សិតជាច្រើនចាប់ផ្តើមចូលរួមចំណែកក្នុងការបង្កើតកម្មវិធីកំដរមនុស្សចាស់ដែលបានចូលនិវត្តន៍ ព្រោះវាអាចផ្តល់ផលវិជ្ជមានច្រើនដល់ពួកគេផងដែរ។ និស្សិតទាំងអស់នោះអាចធ្វើជាភ្នាក់ងារដ៏សំខាន់ក្នុងការជួយគាំពារមនុស្សចាស់ទន្ទឹមនឹងនោះពួកគេក៏អាចទទួលបានបទពិសោធជីវិតជាច្រើនពីមនុស្សចាស់ដែលធ្លាប់ជាកម្លាំងពលកម្មចម្បងកាលពីអតីតកាល។ ការងារដែលពួកគេអាចធ្វើបានគឺ ជួយមនុស្សចាស់ក្នុងការធ្វើការងារផ្ទះតិចតួច ឬធ្វើយ៉ាងណាដើម្បីឱ្យពួកគាត់មានអារម្មណ៍ថា ទទួលបានការយកចិត្តទុកដាក់។

នៅប្រទេសស្កុតលែន ការជួយមនុស្សចាស់ដើម្បីកាត់បន្ថយភាពឯកា ត្រូវបានគេធ្វើឡើងតាមរយៈការនាំពួកគាត់ជិះស៊ីក្លូដើរមើលទីក្រុង ឬចេញមកខាងក្រៅផ្ទះដើម្បីភ្ជាប់ទំនាក់ទំនងឱ្យសកម្មឡើងវិញជាមួយមនុស្សដទៃផ្សេងទៀត ឬមនុស្សចាស់ដូចគ្នា។ សកម្មភាពនេះធ្វើឡើងដោយអ្នកស្ម័គ្រចិត្តម្នាក់ត្រូវជូនមនុស្សចាស់ 2នាក់ដើម្បីជិះស៊ីក្លូទៅខាងក្រៅជាមួយក្រុមរបស់ពួកគេ ដើម្បីកម្សាន្តក្នុងតំបន់ដែលពួកគេរស់នៅ និងស្រូបយកខ្យល់អាកាស។

នៅកាលីហ្វ័រនៀ មនុស្សចាស់ដែលបានចូលនិវត្តន៍ និងកំពុងកើត ឬកំពុងប្រឈមនឹងសភាវឯកាត្រូវបានគេផ្តល់ការងារងាយៗឱ្យធ្វើ ដូចជាការងារជិះស្គីយកឥវ៉ាន់ទៅឱ្យភ្ញៀវដែលភ្លេចនៅផ្សារទំនើប ឬការងារផ្ទះងាយៗ ស្រួលៗនៅតាមអគាររបស់សហគមន៍ ឬផ្ទះរបស់ប្រជាជនណាដែលស្ម័គ្រចិត្តជួលពួកគាត់ ដើម្បីជាការចូលរួមចំណែកជួយមនុស្សចាស់ឱ្យជាសះស្បើយសភាវឯកា។ នៅអាមេរិក មានសហគមន៍ស្នាក់នៅរួមគ្នាក្នុងផ្ទះប្រមាណជា 165ខ្នង ហើយមាន 140ខ្នងផ្សេងទៀតកំពុងសាងសង់ ហើយផ្ទះខ្លះ គឺលាយបញ្ចូលគ្នារវាងមនុស្សគ្រប់វ័យ ដែលអនុញ្ញាតឱ្យមនុស្សដែលកំពុងប្រឈមនឹងសភាវផ្លូវចិត្តឯកា អាចរស់នៅក្នុងទំនាក់ទំនងល្អប្រសើរឡើងវិញ។

ចំណែកឯនៅចក្រភពអង់គ្លេសវិញ វេជ្ជបណ្ឌិតបានចេញវេជ្ជបញ្ជាឱ្យអ្នកប្រឈមសភាវឯកាទៅរាំរែក ធ្វើសកម្មភាពសិល្បៈ និងថែទាំសួនច្បារ និងសកម្មភាពមួយចំនួនផ្សេងទៀត ដូចជាការច្រៀង ការហាត់ប្រាណដោយការរាំ Aerobic Dance និងការជុំគ្នាញ៉ាំកាហ្វេពេលព្រឹកក៏ត្រូវបានណែនាំ និងរៀបចំឱ្យមានឡើងសម្រាប់សហគមន៍ដែលមានមនុស្សចាស់ផងដែរ។ សកម្មភាពទាំងអស់នេះត្រូវបានគេមើលឃើញថា អាចនឹងធ្វើឱ្យមនុស្សដែលកំពុងទទួលរងសភាវឯកាអាចទទួលបានការរាប់អានពីមនុស្សថ្មីៗ និងមានទម្លាប់ក្នុងការរស់នៅវិជ្ជមានឡើងវិញ។ តាមការបង្ហាញពីរដ្ឋាភិបាលអង់គ្លេសបានឱ្យដឹងថា បន្ទាប់ពីរយៈពេល 4ខែកន្លងទៅ អ្នកជំងឺទាំងអស់នោះចាប់ផ្តើមនាំមិត្តភក្តិមួយចំនួនផ្សេងទៀតទៅជួបវេជ្ជបណ្ឌិត ហើយក្រោយមកទៀតបញ្ហាវិបត្តិផ្លូវចិត្តទាំងអស់នោះក៏មានភាពធូរស្រាលច្រើនឡើងវិញ៕

March 28, 2019

Author: ធឿន មករា